DEAR DIARY-26

DEAR DIARY-26

"I sawi ang chuan ţhen der ta ila awmzia a neih i ring maw?" ka ti nawn leh hram a, a ning viau tawh maithei a ni ka zawt ngun tawh emai. 

"Aw nei awm e mai. A rilru put hmang diktak i hrethei ang ka tih tawh kha. Hriatthiamna i ngah leh lutuk a nih hi. U Tluangtea sawipui pawh a ngai tawh lo a lo sawi mam sak leh tho ang" a ti a, ka nu'n min koh ri a hriat ve chuan "Chanchin min rawn hrilh ve char char rawh aw. Ka sawi awmzia chu a bo a bang awm loin ka tihna a nia aw, i hrethiam em?" ti a min zawt chu nuih hak pahin aw ka lo pawh a, kan inbiakna chu kan ti tawp ve ta nge nge a. 

"Chaw ei ang u hei i pa pawh a lo haw tawh" ka nu'n a tih chuan chaw ei ka siam a, ka pa ţawng bawrh bawrh reng chu bengkhawn ve lovin thil dang ka ngaihtuah daih a, Kimkimi awm ve laia ka tibuai ta emaw tih mai tura phone a dah hmak mai te kha ka rilru a na veng veng reng a, ka chawei chu ka puar leh puar loh pawh ka hre lo. 

'Kimkimi te inah chaw kan ei dawn a, Sangsangi hian a ngen tlat sia, kan haw veleh ka lo bia ang che' tih thu min lo thawn phei chuan ka thin a rim tel tawh a, min nam nul mah mah ni a ka hriatna chuan ka lung a ti awi tawh bik lo a ni ber. A nupui hlui a ni a, fa an nei tawh bawk a, inhaw tur chuan ka duh hauh lo, ţhian an lo nih ţhin avang hrim hrim pawhin ţha deuha an inbiak chang pawn lung lohah ka la ngai hran lo. Mahse tun ţum chu a ti ve mah mah a ni. 

Chhang let lem lovin thil dang ka khawih san a, insuk tur ka la khawm a, ka insuk zawh vek hnu a phone ka en leh chuan beisei ka nei deuh a, engmah a la awm chuang lo. Rilru bet lo deuhin dawhkan hmaah ka ţhu a, ka u diary chuan ka mit a la leh tlat tawh a, 'rilru a na thar mai mai' ka tih avanga a thla a thla ka khawih duh tawh loh kha a ni a, khatiang thil a tih chhan pawh kha a inphum ru ngeiin ka ring, mahse, mihring hi kan mak ve khawp, ngaihdan hran ţheuh nei kan nia, mi chu nise an chhiar zo nghal vek maithei, kei chuan ka chhiar hreh tlat a, ka u chunga thil thleng ngaihruat thiam tho siin thudik ka hel a ni ber. 

Tih tur dang awm hek lo, a diary la thar ţha tak mai chu lehkhabu dang kar aţang chuan ka pawt chhuak zal zal a, hreh ru deuh chung chuan ka keu a, ka chhiar tawh hnu chu kal kanin ka en phei zel a, chhiar tlak a vang khawp mai. Milem chhe deuh deuh a ziak hnem a, chhiar tlak hlawl a awm dawn lo a nih hi ka tih tawh hnuah a lo inziak tlar leh dul a, mit ka chhing vang vang a, thawk ka la hmasa te te a, thudik hi engtik niah emaw chuan ka hriat tho a la ngai dawn a, ka tlanchhiatsan reng thei dawn chuang lo. Lehkha hnutchhiah nei lo mah se eng emaw tal chu diary ah hian a awm ngei ang. Thudik ka hmachhawn a hun tawh takzet a ni. Ka tho thut a, pindan kawngkhar ka kalh hnuah diary bawk chu ka ţhut chilh leh a. 

Dear Diary, 

Hmaikawr ka vuah chhan hi mitinin an inrinsiak a, hmaikawr phenah hian hman a keimah, hmeichhe chak lo leh der dep, mi pawisawi hlau tak ţhin kha ka awm tih hre lek lovin ka hmaikawr hi an sel a, milim ang maia min cheibawl chang a tam a, ka hnaiha an awm lai reng pawhin min sawisel hreh ngai lo a, min nuih sawh tawk lah bo lo. Hmaikawr ka vuah chhan hi chu ka ngaihtuah phak ngai loh leh sawichhuah harsa khawp a rapthlak a ni. 

Mihring hi kan mak ngawt mai, sualna hian min hneh tawh lutuk a, hmeichhia an nih tawh phawt chuan naupangte pawh kan it tawh chu a nih hi. 

Khatih hunlai khan kum12 mi chauh ka la ni, ka ţhang duhin ka rualpuite aiin ka lian bik ţhin a, ka nu in hna a thawh a ngaih avangin school banah ka nutei te inah kan haw tlang mai zel a, ka nutei pasal u chiah, Pa Liana khan min awm rawt ţhin. Ka ngaina a, pa ngaihsakna dawng ngai lo tih takah pa ang chiahin ka en ţhin. Ţum khat chu ka school bang ka inthlak laiin a rawn lut a, ka taksa a zut kual a, mumangah pawh ka la man ngai loh thil tenawm lutuk ka chunga a tih lai khan ţanpuitu beiseiin ka au a, ka ţap bawk a, mahse tumah ka au eih zo lo. 

Kum12 lek ka nih laiin khawvela ka mi rin berin min pawngsual tihna a nih chu. Min vau zui nasat em avangin tu hnenah mah ka sawichhuak ngam ngai lo. Hun remchang a hmuh apiangin min pawngsual ta ţhin a, loh theih loh na avanga an khua a a haw hnuah pawh a thil tih khan min nghawng zui ta zel a, a rapthlak chu thuhran, ka zak em a ka ziak chhuak vek ngam ngang lo a ni. 

Ka upa ve zel a, ka nu hrilh ka tum nasa ţhin, mahse, hna a thawk rimin kan tan theihtawp a chhuah a, a ţhu chiah hi a muthlu a ni nghal zel a, a chauh theih em avangin a nun a tawi phah ka hlau a, ka hrilh ngam ngang lo a ni. Pawnah hlimna ka zawng lo thei ta lo a, thim ka hlauh zia hi ka nu pawn a hre kher lo ang. Chuti chung chuan zanah ka chhuak fo a, ka chunga thil thleng kha ka hriat reng loh nan ruih tur ka zawng a, mipa kawp ka nei reng a, ka nun hi kei tluk a ning an awm lovang. Ka pa pawh hrilh ka tum ve fo a, pa chuan a fa tan chuan theih tawp a chhuah ang a, misual chu hremna a pe ang ka ti ţhin a, beiseina sang tak ka neih ve laiin ka pa chuan ks min tih te a ching ţan a, mipa ka mamawh avanga fawr bo ţhinah te, ka duh reng vanga ka taksa hi zuar ţhinah te min ngai a, a ţhiante awm lai reng pawn zak tak takin min siam ţhin a, ka pa pawh ka hrilh ngam leh ta lo a ni. 

Ruihhlo ka khawih nasa zual sauh a, min man fo a, min man tu te hian ka hlawkpui theih tur thu ţha pakhat tal an sawi ka beisei ţhin a, mahse chutiang chuan an ti ngai lo. Min nuihzat a, ţhenkhatin ţawngkam chhe tleuh nan tak min hmangin min hmuhsit zia an lan tir awl lo a, zak deuh a min siam kha nuam an ti zawk emaw tih tur a ni. Mi fel inti hoin min sel rawn a, ka ţhat lohna lai hmu thei tak tak vek an ni, ka sualna an hria a, an ţawngţainaah min hre tel phei se chu a lawmawm ngawt ang.

Puitu nei lo ta na na na chu ka then thenin ka then a, ruihhlo in ka nun a tih nawm phah loh zia hrechiang viau mah ila harhfim a mi zinga ka awm ngam loh chin a thleng a, rui lo chuan tumah ka hmachhawn ngam lo a ni ber. Han inkhawm ve mah ila min hmu apiang an inhrilh ru a, min en hrek hrek a, min hnaih duh tu an awm lo. Misual len ve na biakin a awm tawh lo em maw ni aw ka ti hial a ni. Mahse mahni ka inkhawngaih vang mai mai a ni tiin chu ka ngaihtuahna chu ka dah bo leh thuai a, ka nunin zir se chu khawi hmunah pawh ka leng ang a, tuman min kawm serh lovang. 

Tunah chuan kal ngaihna reng ka hre tawh lo a, vanduaina ka tawh avanga kawng dik lo zawh ta ka nih rualin ruihhlo hian hmun nuam takah min hruai chuang lo. Ka hrehawmna belhchhah tu mai a ni tawh a, hmuhsitawm a min siam tu a ni. Ka hmaa kawng hi a inkal thelh nuk a, khawilam ber nge pan tur ka hre tawh lo. Ka nun a beidawn em em lai khan ruihhlo ni loin Pathian bel ta zawk ila eng nge a an ang le? Let leh theih a ni tawh der si lo. Kawng zawh sual tu ka ni a, keimah hi a demawm ber chu a ni. Nunna hi a hlut viau rualin sualin min eichhe nasa lutuk tawh a, puh tur ka zawn ţhin lai aţang tawh khan keimah leh keimah ka lo inti chhe char char a, mi min sel ţhinna te, min hmuhsit ţhinna te hi keima insiam chawp a ni. Dam chakna reng ka nei tawh lo. 

Diary phek a ka mittui far chu ka tuai hul thuai a, ka hmui ka pet tlat chung pawhin ka khabe a sai dar dar a, ka tha a khur hlawk hlawk a, pindan piah chiaha ka nu leh pate mu chuan min ti timin ka ţap chhuak ngam lo. 

Mak tak maiin a thuziah tawpah chuan a ziah ni a ziak thlap a, a thih ni kha a ni. Lehkha min hnut chhiah lo a, a thihni ngeiah nunkawng bumboh tak a zawh chhoh dan chu chiang lo leh kim lo takin a lo ziak diam a, keipawh ka dik bik lo. Hau reng loin inhawng deuhin vawikhat tal lo ti ti pui ila ţha tur. 

Ka u nen kan mut ţhinna khumah chuan muin ka inkhuh hlun a, ka taksa khur insawi dat dat hmu lo chuan rilru na takin ka ţap tih an hre kher lo ang. Ka inchhir a, awmzia a awm tawh mang si lo. Hetiang thu hi ka hriat ka hlauh vang a nia diary kha ka khawih duh miah loh. Inti huaisen chawpin ka chhiar a, a tawpah a ruk bawkin ka ţap leh a, a thiam loh a nih rualin kan thiam loh a nihna lai tam tak a awm ve tho, ka nu leh pate ngei pawh a harsatna hrilh ngamin awm se chu Afeli kha a bawraw lutuk lo maithei a sin. 

Ka phone ri chu meng mang lovin ka la a, ka lo ţap muhil a nih hmel. 

"Biak i va har ve" ka lak ruala ka aw hriat ţhan takin a rawn tih chuan "Ka muhil hma a" tih chiahin ka chhang a, ka mut hnu daih a min lo biak tum a nih chuan an haw tlai a ni khawp ang. 

"I duh ai hmain ka rawn ti harh che em?" a rawn ti a, a inthlahrun hmel khawp mai. 

"Nizanah ka nghak chhuak zo lo che a, a pawi hleinem" meinei zet hian ka ti a, rilru natna tawpkhawk ka tawh lai pawhin a reh vang vang a, ka ngei ve hrim hrim. A ho maithei a, mahse hmeichhia chu hmeichhia kan ni, kan thu hi a nawi riau chang a awm ţhin. 

"Sangsangin haw a duh tlat lo a, kan inthlem fe hnuah kan haw thei chauh a, zandang aiin i muhil hma deuh em ni?" dam deuh ruih hian a rawn ti leh a, ka dam ve thei chuang lo.

"Aniang...ka mu mai mai a, ka lo muhil daih a niang. In kalna chu a nuam em?" ka ti a, rizaiin ka inkhuh ţha sauh sauh a, ka mit pawh ka la meng lo. 

"I hriat kha. I aw a va dik lo ve, i nuam sam lo nge?" ti a min zawh chuan "Ka thophang aw a nih hi" ka ti mai a, rilru mumal loh lai a ni bawk nen, Rintluangi thu min hrilh kha hrereng mah ila han sawichhuah dan ka thiam chiah lo. 

"Dawrah i kal ang tiraw?" a tih leh chuan ka lo aw vat a, "Ka lo hruai ang che" a ti a, ka hnial lem lo. Hnial turin chakna ka nei rih lo a ni ber zawk. Diary thu inziak ngawt khan rilru a luah a, thil dang ka ngaihtuah thei rih lo. 

Pindan aţanga ka chhuak ka nu'n min lo hmuh chuan "I mit a va bui ve. I ţap em ni? Zonuna nen in inhau em ni a? Nge i inhralhna pawisa i ti bo?" a lo ti chul a, "A ni lo vek. Nizana ka movie en a lungchhiatthlak lutuk a, ka en rei angreng sia, ka mitin a tuar a nih hi" ka ti a, bualin pan a ka kal te chu min en zui reng tih ka hria a, insawifiah vak ka tum lo thung. Engmah an hre lo a, hre lo tlang law law rawh se. 

Ka inbual zawh chuan ka lu na lutuk pawh a zia ta deuh a, ka rit deuh churh thung a, ka ni luk mai. Chaw kan ei lai chuan ka nu hnenah "Pa Liana kha eng nge a chanchin? Kan naupan lai khan min awm nasa a, nizan chu ka ngaihtuah chhuak thut a, an khua a a haw hnu khan a reh zui vang vang a, a chanchin kan hre ta miah lo a" ka ti a, a thih tih kha engtin emaw tak a thungrulh ve ka duh vang a ni. 

"A boral daih tawh alawm. I hria emaw ka tia, u nutei pawh a rawnkal a a rawn sawi kha. Kan kal thei dawn bawk si lo a a hrehawm emai a tia, i awm ve reng emaw ka tia, i rilru kawm ngut ngut zel suh ka tih ziah kha" min ti let zek a, earphone in ka beng ka hnawh phui tlat a, mi ti ti ka ngaithla ngai mang lo ţhin kha a nia. Ka nutei fate hian an hre phak hlawm vak lo maithei a, an khuaa a let na a rei tawh bawk nen, khalai hun kha phone ka khawih ngai mang loh lai a nia, ka u lahin hria pawh nise a sawi chhawng peih dawn der lo, a lar hluai dawn lo a, ka hre miah lo hi a mak lem lo. 

"Eng nain nge a thih a?" ti a ka zawh chuan "Hrawk cancer an ti. A nat zual hnu phei chuan hmuh a hrehawm lutuk an ti alawm. Liana kha chu a ngaihawm ve ţhin" a la ti tak deuh deuh a, a fanu chunga a thil tih a hre lo mai mai a ni. Hrehawm tak tuara a lo thi tawh a nih chuan phuba lak hranpa pawh a ngai tawh lo a nih chu. An sawi fo angin, phuba chu keinin kan lak ngai lovin Pathianin min lo laksak diam tawh. Ka nu hriat lai chuan 'a va chawh ve' ka ti chhuak lo chauh a ni. 

Ka insiam laiin Zualtean min lo be ve nawlh a, "Nizan ka mumangah ka hmu che" tho phang aw zet hian a rawn ti a, khum aţangin a la tho chhuak lo hial maithei a ni. 

"Engtin nge min hmuh a?" ka lo tih chuan "Ka hre tawh lo. Ka harh a ka theihnghilh vek. Ka hmu che tih chu ka hria" a ti leh ang lawi a, nui ri hak hak mah ila "I ţha maw?" a rawn ti ta tho a. 

"Aw..ţha e. Ka sumdawng ve amaw..Rintluangi nen khan kan pahnihin secondhand leh readymade thawmhnaw chi hrang hrang kan zuar a, damdawi dawrah ka la thawk tho bawk a" ka ti bawrh bawrh a, min ngaihtuah loh nan ka aw chu ka ti zangkhai lui a, a ngaih a ţhat sawt ka beisei. Kan tana mi pawimawh deuh te hi kan hmuh phak loha an awm chuan ngaihtuah an na a, mang lama kan hmuh ngat phei chuan rilru a nuam lo ve veng veng ţhin. 

"I sumdawng ve thiam a mi? Mi thil i zawrh ve ngam dawn mi? I fak thiam awm si lo a" nuihza aw zeta a tih chuan "Thiam e...ka inhralh thei lutuk. Secondhand phei chu miin an thing peih alawm. Bakah thil chu kan ko a a tlak chuan kan ti thei zel" ka ti a, a nui huk huk reng mai. 

"I van puitling tawh tak aw" a ti vel a, ka lo chek tlak a, "In la puitling viau suh. I nau pawn min dawr nual alawm. Nangpawh i lo haw hunah ka zawrh ve ang che" ka tih chuan "Lo ti ţauh ţauh rawh kan la indawr dawn nia. Min tlawm bik ang a" a tih hnuah "Tak taka i fel hle mai" thutak deuh zawk hian a ti a, ka ţawng ve hma hauhin "I ţha tak tak maw?" a tih zawm leh zat bawk. 

"Aw ka ţha alawm. Nangpawh ţha deuhin lehkha i zir dawn nia" ka ti a, ka hmanhmawh deuh avangin kan inbiakna chu kan ti tawp leh thuai a, min rawn biak apiang hian min fiam ziah ţhin a, keipawh ka inthiam lohna te kha a bo ve tial tial mai. 

Ka nu chhuah hnuah ka chhuak a, motor a ka ţhu lut chu a tlan chhuak nghal mai dawn maw ka tih laiin "I hmel a dik lo. I dam lo em ni?" min thlek chung meuh hian a ti a, min en chik lutuk chu a zamawm zawk. Dawt sawi te hi ka hreh riau zel. 

Ka nu hnena ka sawi ang bawkin "Nizana ka thil en ka ţahpui a, ka muhil zui nghal daih bawk sia, ka mit a bui deuh a nih hi" ka ti a, ka chhanna chu duhkhawp loh hmel viau mah se engmah ka sawi zui lo. 

"Nizan khan duh aiin kan rei a, kan haw hnua biak che ka tum lahin i lo biak theih tawh si lo a" kan tlan chhuah ruala a tih chuan a lam ka hawi a, a mengrei aniang ani pawh a mitmeng a dul ruih a, a chauh hmel khawp mai. 

"Sangsangi a haw duh miau loh te chuan" ka ti a, ka lawm lo awka chu a hriatthiam ka ring. 

"A pi leh pute hi a hmuh khat viau rualin a hmuh tawh chuan a bet chat zel a, khap ka tum lahin ka nu'n min dang zel a, a buaithlak khawp mai" a ti ban charh a, "Innei leh turin an duh vek che u alawm" ka lo tih chuan min rawn en zawk a, motor khalh lai a nih miau avangin hma lam a en leh thuai a, kei aiin a hrechiang daih zawk ang. 

"Nang leh keiin kan duh loh chuan a tawk mai" zawi deuh taka a tih chuan ngawi rengin tukverh lam ka hawi ta daih a. 

Motor a din dat rualin ka kut a rawn vuan a, helai bik hi a jam ve ziah a, ngaiah ka nei tawh. Traffic jam chu remchangah lain muangchangin a lam ka hawi a, "Nuam lo ka tih theihna tur thil a thleng hnem tawh a, ka hriat laia inhruai leh an sawi vel kha chu dahţha ta ila, Kimkimi nen hian inţhen pawh in ang lo ka ti. Mi hmuah chuan...aaa..ka hmuh danah pawh a ni tho, nupa la induh deuh in ang a, hna thil avanga awm hrang mai mai in ang ka ti ber. In insuihzawm lehna dal tu mai mai ka niin ka hria. Awm lo ila chu in innei leh daih tawh ang" ti a ka rilru diktak ka sawi chhuah phawng phawng lai chuan a mitmeng dul ruih chuan min lo en ve reng a, ani pawh hian inngaihtuah nawn lehna hun a mamawh a ni. 

"In ngaihtuah nawn leh rawh. Mi nupa kara tlak zeh emaw, an insuihzawm lehna dal tu nih ka duh hauh lo a, Sangsangi vang chauh a in innei leh duh a nih pawhin kei chuan ka dal lo ang che u. Kan pahnih hian reilote chawl ila, inngaihtuah nawn leh rawh" ka ti sap sap a, chu thu ka sawi chu keipawh hian hrehawm ka ti a, ka inchhir nghal rum rum mai, mahse ka sawi zo vek tawh. 

"Nizanah engkim ka ti tawp vek tawh" nghet charha a tih chuan mak ti zawkah ka ţang leh a, phawk deuh hra a ka en lai chuan "Kan rei nachhan a ni pakhat" a lo ti leh a, chutah ka kut chu hmer ngheh salh pahin "Rilru phir deuh a awm reng hi ka kham ve tawh alawm" a ti a, thil thlen dan mumal takin ka hre chak khawp mai. 

"Eng nge awmzia ni a? Kimkimi nen in sawi dun tihna em ni?" ti a ka zawh lai chuan kan hmaa motor chu hmalamah a tawlh riai riai a, ka kut a vawnna chu a thlah a, "Aw..sawi tlang vek kha a ţha mai ka tia" tlan chhuah leh pah hian a ti a, Kimkimi zia ka hrechiang tawh a, hrilhfiah ve viau mah se a lo pawm duh kher lo ang. 

"Kimkimin a thlah che a nih loh chuan i thlah theih an ring lo a sin. Ka sawi awmzia chu, a pan zel tho ang che tihna lampang zawk" ka ti nawi niaih a, mi rin dan chu ka rin dan a ni ve tho bawk. 

"Tlaiah ka rawn lam ang che. Kan sawi ţha leh dawn nia" a ti a, dawr pawh kan thleng thuai a, kan thil zawrh lai dawr a ka riah ho chu a lo inpho chhuak diam tawh a, dawr neitu zawk si Rohlua hi a fel tak tak a ni. Ka bansan hun tur ka ngaihtuah lawk chang te hian a huphurh zawk ka ni ţhin. 

"Lo tlai lutuk lo la aw" ti a ka hrilh hnuah ka kalsan a, kan inţhen leh ta lo chu a nia, Rintluangi chu a lawm lo viau maithei a ni. Mahse, thil hrechiang lo a thutawp siam zung zung mai hi kei ka tih chi a ni ve vak lo a, ka ngaihtheih loh zawng tak zawk a ni. Kan insawifiahna inngaihthlak tawn sak ila, rilru fim tak pu chung ngeiin thutlukna siam ila ka duh ţhin a, kan tisual lo nge nge bawk ang. 

"Ee...miss, i tho nuam vak nange?" Rohlua pawh chuan a lo ti ve a, "Ka ţap nasa lutuk a" fiamthu a ka tih chuan a hmel a danglam nghal vek a, fiamthuah a lo ngai ve lo a nih hmel.

"Tu nge hau che? Engati nge i ţah a?" a ti nghal a, min ngaihtuah hmel tak tak khawp mai.

"Ka uang a nih kha. Vai film vang a nih hi" ka tih pawh chuan a awih chiah lo tih a lang reng.

"Keipawh ka bialnu hluiin vawiinah pasal a nei dawn a, ka ţap chak teh a nia" a tih chuan tih luihna ni miah lovin ka nui ve a, a hmel tak run chu enin ka nui leh ţhin a, a thusawi leh a landan chu inhmeh lo tak a ni.

"Bialnu i nei reng a ni lawm ni? Bialnu hluite pasal nei mai mai chu ho e" ka tih lah chuan "Ka duh ber a ni miau a" a lo ti sup a, "Aww..a nih chuan a pawi hle mai" ka ti a, kan duh bik deuh hi chu a dan a dang ve tlat a ni. 

"Ka ţhiante chu an kal vek ang. Kan venga mi a nei dawn a, ka ţhiante zinga tlem a zu duh, rawngbawl thiam si ho chu fatu zingah an tel ve ang a" a la ti tak deuh deuh a, ka nuih bawk bawk nain hetiang hi thil awm thei ve tak chu a ni. 

"Tlaiah rui tawkin ruai ka ţheh ve ang" fiamthu hian a ti zui leh a. 

Rohlua chhuah hnu chuan diary bawk kha ka rilruah a awm leh a, lehlamah Zonunmawia a lo ni bawk nen, ţhu hle hle mah ila ka hah lutuk chu ka hui leh pap ţhin a, awm a nuam thei hlawl lo a ni. Bet deuha ţhut thlengin a harsa vek. 

A insawi ang ngeiin tlaiah min lo lam a, rei deuh chhung chu kan ngawi dun rauh rauh a, motor chhunga a tui inchhawp chu ka in leh ţhin a, a tawpah amah zawk chuan "I inhralh thei em?" a ti a, tawi te a nuih pahin "Secondhand sale chu ka hralh" ka lo ti var a, a tirah khan kan thliar vek a, a chhe deuh ho a tlawmin kan zuar nghal a, a zia phian mai. 

"A ţhat chu" a ti a, kan ngawi dun leh rauh rauh a, zawh tur chu ka ngah a, a sawi hawn phawt loh chuan zawh ţan dan mai ka hre lo a ni. Ani lah chuan ka rilru hria ni awm takin "Min zawh duh i neih chuan min zawt rawh" a ti a, ka hmui ka pak kauh a, ka liah huh leh zet hnuah "Chuan nizanah chu eng chiah maw thleng a?" tiin bul ka ţan a, thil zawh nuam tak chu a ni lo. 

"Aa...beisei nei tawh lo turin ka hrilh a ni ber. Ka nu pawh ka hrilh chiang tawh a, tuman an sawi lang tawh lo turah ka ngai. Kimkimi nu leh pate nen pawh kan sawi ho a, an ngaihdan a ni vak lo nain a neitu tur berin thutlukna ka siam tawh a, han tih vak ngaihna an hre bik lo" a ti duah nain ka hre fiah chuang lo khawp mai. 

"Sangsangi vang pawn i nei thei tawh lo tihna maw?" ka tih chuan "A ni mai ang chu. Ka ring zo tawh lo ah ngai tawp mai rawh" a ti a, a ţhutna lam chu ka thlek deuh ha a, a rilru a buai ve deuh nge mawni a pawr deuh fapin ka hmu mai. 

"A bum nasa viau che em ni? Min hrilh vek rawh. Zep ţhen neih a nakina buai leh ai chuan tuna hriat vek ka duh" ka ti ta tawp a, "Ka sawi dan hmang chu i hriatthiam ka ring" ka tih zawm a, hriat loh tam tak ka neih hi hriat vek ka duh tawh takzet a ni. 

"Bum nasa hman a, rintlak ni ah ka ngai a, ka ngaih a ţha a, a tlai lutuk hmain ka manchhuak ti ila a a dik mai ang. Ngaihzawng a lo nei a, an thawhpui pa nen a rukin an lo inkawp reng a" a tih chuan amah chu ka en tlawk tlawk a, ka khawngaih leh hnuhnawh a, kan in peng lo lama a kual daih pawh chu ka sawisel hran lo. 

"Engtin nge i manchhuah?" ti a ka zawh chuan "A inbual hlanin Sangsangin a phone a lo en a, message lo thleng ka en khan hmeichhe hming a save si kha thu mak deuh a lo thawn a, an inbiakna ka en zel khan hmeichhia ni theiin ka hre lo a, dp a nei lo nain a number ka chhinchhiah a, ka bia a, Kimi ka zawt bawk a, pha nasa viau mah se a mipa ber ka biak hnu kha chuan engkim min hrilh a" a ti a, sawi nuam a ti lo tih chu hai rual a ni lo. 

"A pawi hle mai" tih bak sawi tur ka hre tawh lo. 

Thingpui dawr lian ve takah kan lut dun a, ka nu hnen a chinchang ka hrilh hnua dawhkan a a kut dah chu keimah zawkin ka hmer sak vang vang a, phatsanna hi engtiang chiaha runthlak nge a nih ka hrethiam chiah lo nain an inneih ţhat laia Kimkimin ngaihzawng a lo nei reng chu hriatthiam a har ve ngawt ang. A tlawm thlak ka ring tel bawk. 

"Ngaihdam a dil che em?" eitur kan chah zawh hnua ka tih leh chuan "Dil ve bawk e. A uire na pa pawh kha pawm lai nei tho a nia, keichuan thudik ka hriat rualin ka ţhen nghal a, anni kha chu an inţhen ve ta lo in ka hria" tiin ţha deuhin min lo chhang leh a. 

"A uire a maw?" ka lo ti hluai a, min en vang vang hnuah "A ni mai ang chu. Pasal nei reng chunga mipa dang a chetsual pui chuan a uire tihna a ni mai lawm ni?" tiin min zawt let khauh a, ka rin aiin a rapthlak daih mai.

"I thungrul ve em? Thil ţha lo deuh te i tih phah em?" ka tih chuan tawi tein min lo nuih a, lu thin pahin a kut ka vawn loh lam zawk chuan a hmai a tuai thuak a, a chauh hmel takzet a ni. 

"Thungrulh chu ka chak a, mahse ka ti lo. Fanu ka nei a, a nu a entawn tlak loh chuan kei talin ka zir a ngai tih rilru ka pu a, a hunlai khan rilru fim put a har a, a awm ang chiah a awm ve a chakawm bawk. Inthunun nasa viau lo ila chu tun ai hian kan inkar a chhe lehzual zawk ang. Mahse, mipa ka ni a, ka mawhphurhna ka hria a, kan in a midang mitmei veng lek lo a a awm pawhin ka inthunun thei zel chu a nia. Kan chet buan buan chuan kan mualpho lutuk dawn a, kan nupa chauh ni lo ka nu leh pa hming thlengin a chhe dawn a, a ruk a chinfel theih chu mi hriat loh a chinfel a ţha mai" tiin min hrilh a, a puitling ka ti khawp mai. 

"A zia lo hle mai" ka tih lai chuan ka lut chu a lo hmer let ve a, "Hun liam tawh a nia, tuna kan hun hman mekah a tel tawh hleinem. Nizanah engkim ka ti tawp a, i tana hriat nuam lo an sawi phawng phawng tawh lo ang" tiin min hnem let zawk a, amah hnem tu tur zawk ka ni a, ka ţangkai lo khawp mai. 

Thil kan ei zawh hnuah kan let nghal a, khua a thim fel der tawh. Kan in thlen hmaa kawng zau laiah bawk khan kan ding leh a, mei a zuk laiin kei chu tukverh a dakchhuak meuhin thli thaw ka inchhem tir a, thil tam tak kan sawi dun a, ka u chanchin erawh ka hrilh ve ta lo. 

"Sangsangi hi engtin nge a awm ang? I awmpui reng thei dawn nge a nu hian chuhpui che a tum em?" tiin ka la hriat kim loh ka zawt leh a, Sangsangi chungchang kan la sawi tel hauh lo.

"Min chuhpui ngam lo ang. Kan hnen a awm hi nuam a ti zawk a, court hial pawh thleng se hnehna an chang kher lo ang. Kan inţhen hma a, ka bulah a awm nghal bawk a. A rawnkal tawp a nih loh chuan Sangsangi hian a nu a lam ngai lo" a tih hnu chuan "Engahmah ka dal lo che u tiraw?" ka ti leh hram a. 

"Dal lo e...ka bulah awm reng thei tawh zawk la, chu chu ka duh dan ber a ni" a ti a, inneih chungchang hi a sawi fo tawh a, a pathlawi rei ve tawh a ka dem hauh lo, mahse tih nghal rum rum chu ţha ka ti lo a ni. 

"Ka la awm reng dawn alawm" ka tih lai chuan seat hnung ngheng reng chungin ka lam a lo hawi a, "Ka la nei dawn che ka tihna a nih chu. Kan inkar a fel a, rem lohna a awm loh phawt chuan ka la nei ngei ngei ang che" ka ti ta nge nge a, ţhen rih tum si khan nei turin thutlukna ka siam leh daih a, ţawngkam khat lek pawh hian mihring rilru a lo thlak danglam thei khawp mai. 

"Mahse, tunah chuan ka la inpeih lo. Tih tur hmachhawp tam tak ka la nei ve a, ka nu leh pa te hi heti tawp chuan ka kalsan thei lo a ni. Nuam sa deuh a siam hi hmeichhia ten kan duh dan a ni ţheuh a, tih puitlin a har bawk si. Kei ngat phei chuan lehkha ka zir sang lo a, thla khatah singkhat em pawh ka hlawh lo. Chuti chung chuan nuam sa deuh a siam phawt ka duh ve tho a, thil ka zuar ţauh ţauh ang a, a zia ve zel mai ang. Ka duh ang biaiin thil tihsak thei lo mah ila ka puitling tawh tih tal hre phawt rawh se. Kum tam min nghak rawh ka ti hauh lo a nia, min nghak reng turin ka ti dawn lo che. Ka tum pakhat tal min tih puitlin tir la, chumi hun chu i nghah theih phawt chuan ka la nei ang che" ka ti duah a, a lunghnur deuh ka ring nain a hmel chu a hma aiin hmuh a nuam zawk a, beiseina a nei thar leh ni tein ka hria a, a sawi anga a tawp vek tak tak tawh a nih chuan neih duh loh nachhan tur ka nei bik tlat lo a ni. 

"Ka nghak thei che alawm...hmanhmawh miah suh" min ti a, sum hmang a min puih a tum tawh lo chu ka lawm khawp mai. 

"Sangsangi hi i sawipui ngai em? Naupang hi â viau angin lang mah se thil an hre ve tho si a, min nel loh phah vek angem?" ti a ka zawh chuan lu a thing vat a, "A pawm thlap ang che" tih chiahin min chhang a, a chiang viau nain ka duh khawp zan lo a, sawi zau deuh turin ka nawr ngam chuang bawk si lo, naupang fel tak a ni tih chu ka hria mah se min hringtu nu ngei hi chu a dan a dang ve deuh ţhin. 

"Ka lo lut kawi lo mai ang aw. Ka tlai tawh si a, in lamah min lo nghakhlel lutuk ang e" a tih chuan ka sawm lui bik lo a, rilru nuam deuhin ka haw a, ka hriat chak si, ka zawh hman tak loh chu nakinah ka zawt leh mai ang ka ti rilru mawlh mawlh a, a bula ka awm khan zawh ka tum ruk reng te pawh ka theihnghilh vek a, ka kalsawn veleh ka hrechhuak leh a, ani bula ka awm hi chuan mipa dang bula ka awm a ka neih ngai miah loh danglamna eng emaw tak ka nei ţhin a, hei vang hi a nia mipa dang aia ka thlan zawk nachhan chu. Hmeichhia chuan eng emaw ti deuh a min ti danglam thei mipa kan duh ţhin a, kan tan chuan mi bik an ni ţhin. Kan thinlungin a thlan tawh chuan an thil tih ho te pawhin min ti lawm thei tawh mai ţhin.

Inchhung ka luh chuan ka nu leh pate inhau ri ka hre hmasa ber a, hah an ti dam lo ve thei khawp mai. Pindanah ka lut tlang a, ka u diary chuan ka mit a la hmasa ber a, phum turin lehkhabu dang kara ka zeh luh leh diam tawh chu ka phawrh chhuak leh a, a damlaiin khati khawp khan a mualpho nasa tawh a, a thih hnuah lehzel chuan a thuruk avanga a mualpho nawn leh ka duh tawh lo.

"Naktukah ka phum bo ang" tiin ka hriat phak tawk lekin ka phun sap a. 

Zanah Zonuna nen kan inbia a, beisei loh deuhin Sangsangi pawh min rawn biak tir ve a, ka thinphu rang ve ringawt te chu a awmzia ka hre lo. Ka lo be thiam leh vak chuang lem hlei lo va, ka mipa duh berin "Engkim a ţha vek tawh ang" a rawn tih chuan ka thla a muang veleh tawp tawh a, mipa puitling leh a thusawi tawh hlenchhuak mi a ni tih ka chian vang a ring tlat reng pawh ka ni. A sawi ang tak tak hian engkim ţha vek tawh sela, ka thil tih apiang hi kal tluang purh vek tawh se la tih hi ka duhthusam ber a ni. 

CONT..