DEAR DIARY-27

DEAR DIARY-27

"Zingkarah i chhuak daih a, khawiah nge i kal a?" nui var var chunga ka nu en pahin ka kut ka beng fai a, "Kawmthlangah ka awm mai mai. Ka harh hma lutuk a" tiin dawt ka hrilh leh tawh a, kawmthlangah chuan ka kal ngei a, diary ka phum zawk a ni. Ka ti chhe phal bik si lo a, phum bo mai loh chu duhthlan tur a awm lo. 

"Chawhmeh lo chhuang lum la chaw ei vat teh ang u. Vawiin chu Pi Hmangaihin lokal hma deuh rawh a tia, kan inbual lawk ang e" a ti a, a kalsan nghal mai chu ka en zui a, Nu Hmangaihi hming a sawi hi chuan ka lo hlauthawng ve ringawt zel. 

"Nu Hmangaihi chuan kal chhuahna tur a nei em ni? Ngati nge lokal hma rawh a tih a?" tiin ka nu chu ka zawt ta nge nge a, a sam huh hruk mawlh mawlh pah hian "Sangsangi a nuam sam lo a, tonsil a ni e an ti mai a, thil a ei thei lo a, a khua a sik bawk a, an buai deuh aniang" a tih chuan ka ngaihtuah angreng khawp mai.

"A zia lo hle mai. Zonuna a chawl thei lo em ni?" ka lo tih chuan "A ni maithei. Na lutuk, damdawiin awm ngai khawp te a nih loh chuan chawlh mai mai a harsa ve ang. Niminah pawh a nu leh pa an awm si lo a, a ţap ruah ruah reng mai" a ti a, a nui zui hak hak a, a khawngaihthlak reuh hle mai. 

"An entir khan ka hre sia" ka ti leh a, Kimkimi te ina an kal hmain kan in entir chu an tih ngei kha. 

"In entir e...a nasa aniang a beng te a na tel an tia, bengchhet te a siam thei nia, doctor an hmuh pui vat a nih kha" a lo ti leh a, school pawh a kal thei lo tawp ang. 

Rintluangi hnen a chanchin ka hrilh chu 'inţhen ru' ti reng si kha "Kan ve rawh...tlaiah Zonuna nen in haw rual theih phei chuan reilote tal hmu ve la. Nu Hmangaihi hnen a in inlaichinna a hrilh chian phei chuan a lo lawm ve dawn a sin. Thil a ei thei lo a, eitur leisak a ngai chuang lo a" a rawn ti leh tawh a, ani pawh hi keimah ang thoin a nem ve zung zung zel. 

"Ka zak deuh a" ka tih chuan "Zah hun a nih loh hi. Ngaihzawng neih hi chuan nu leh paten min han fak sak te hian a nuam ve ţhin a. Sangsangi pawhin a ngaina tho che sia kan ve la, fel an lo ti ve dawn che alawm. I zei lo thei emai, thil ho deuh a kan ngaih hian mi lawmna a siam thei tih hriat tur" a ti deuh duah a, ţhahnem min ngaihpui theih tehreng nen kei lah hi mi tih lawm thiam lo chi ka ni bawk si, ka ţhian mah nise kan zia hi chu a hrang hlawk a ni mai. 

"Ka hre lo le...ka nu hnathawhna hmun a ni bawk sia, kal fo hi ka tan a nuam bik chiah lo. Ka nu awm lai ngat phei chuan mi ina hna a thawk hmuh te hi a hrehawm ve a, Zonuna te in berkher a lo ni nen, mihring taka ngaihtuah chuan nat veng veng a awl ve lutuk" ka ti a, "A dik alawm" a rawn ti ve mai bawk a, kal hma a ngai ţhin si a, biak pawh kan inbe rei hman meuh lo. 

Rohlua rualin ka kal ve thung a, an buai tak tak aniang Zonuna pawhin min rawn be tlai khawp mai. 

"Sangsangi a dam hlei thei meuh lo a" a rawn tih chuan "Tlaiah min lo sawm haw la, kan thlen meuh chuan ka nu a haw tawh tho ang a, ka lo kan ve ang" ka lo ti vat a, fa a nei tih hre lawk sa a ngaizawng ka ni a, a fanu a damloh a kan ve chu ka tih ngei ngei tur chi tho a ni. 

"Ka haw hma deuh hlek dawn a, i hman hma thei angem aw?" a tih chuan "Rohlua ka lo dil dawn nia, a fel a, damlohna thilah chuan min hrethiam em em ang" ka ti leh zung zung a, Kimkimi pawh lo awm ve se tun ţum chu ka dem vak bik lo ang, nu tan chuan fate ngaihtuah a na dawn emai. 

"I theih tak leh min rawn hrilh leh ang a tiraw?" a ti a, aw ka lo pawh thuai a, dawr kawt a ka thawmhnaw pho chu a man zat min zawt tu an awm a, ring angreng taka ka hrilh lang lang thawm a hriat chuan a nuih a za viau ang.

"Lo inhralh ţeuh rawh. Chanchin kan inhrilh leh dawn nia" tiin kan inbiakna chu kan ti tawp a, "I hman tawh em?" ti a min zawh hnuah Rohlua chuan min rawn ţhut hnaih a, thawmhnaw man min zawt tu te kha an kal leh ta daih bawk nen, a ipte aţangin pawisa a phawrh chhuak zal zal a, ka lo phu deuh uih mai.

"I inhralh em ni?" a ban rek a dawm chung meuh hian ka ti hluai a, nui pat pat chunga min enin "Ka inhralh i ring em?" tiin min han zawt let vel a. 

"Sawi thuai thuai teh..keichu ka phur e..i inhralh ţeuh tiraw?" ka tih chuan "Hralh ang chu mawle. Summer coat em ni kha kawr nghawng nei pan hling hleng fual deuh si ang kha lo hawn leh rawh an ti" a ti a, ka lo phur nasa mai. 

"A la awm ang ang hi i hawn leh dawn nia. Min pui nasa teh mai nia aw..a nuam e tiraw?" ka ti leh ţhin a, Rintluangi tih dan takah Rohlua pawh hi Pathian min pek liau liau a ni. Han vuiin dem viau chang nei ţhin mah ila Pathian hi chu a awm tih ka chiang a ni. 

"Nuam e mawle..kawrfual kha an lak loh ka lo keng leh a, tlaiah ka hawn leh ang a, duhthlan theih law lawin hawn nual teh ang" pawisa min pek pah hian a ti a, Rintluangi beidawn lai laia ka inhralh chu lawmawm tak a ni. 

"I rilru a ţha a, i fel bawk a, i tluang purh mai ang" a ti ve ngial a, ka lo nuih hak hak lai chuan "Ka ti tak tak a nia aw. Han inkhawm ve ţhin phei la chu a dik vek a ni mai" a ti tel zauh a, ka ngawi dak a, biakin chhung ka rah lohna pawh a lo rei ve ta hle mai.

'Chhunah ka lokal ang. Rawn lak kher ngai lovin i duh ang chu ka rawn dah mai ang. I thawhna hmun ka hmuhpui ve pah che a ni mai' Rintluangi message chu ka chhiar nui ber ver a, Rohlua hian hmelhriat a ngah a, hawn tam tir deuh ka duh avangin kan thawmhnaw neih dan ka zawt a, rin aiin a inhuam daih.

Haw hma deuh ka dil pawhin min phal sak thlap a, chutih rual chuan "I nu a la awm awm sia, nuam i ti dawn mi?" chu a ti tho a, mahse, "Ka haw rualpui zawk mai ang. An chhungte an rawn kal khawm lai a nih loh chuan Nu Hmangaihi ngawr ngawr chuan a duat a, hmuh a hrehawm ngai loh" ka ti a, a ngaih pawh a ţhat hmel ta deuh. 

Rintluangi lo kal chu a rawn ri buan buan a, Rohlua pawhin a en leh vang vang ţhin a, an vawikhat inhmuhna a ni hial maithei a ni. 

"Fel fai deuh a in tih loh chuan hlawkna in hmu har ang. Ba rulh zat tur pawh bituk thlap ula, in inhralh zat te nen ziak zel ula, taimak a ngai ve a nia. In ba rulh tur lah hi ka peih loh pui che u" Rohlu-an a tih chuan mitmeiin ka khap vat a, Rintluangi a tih hnual ka hlau ka ni.

"I patea a nih tho chuan tlem tlemin rul ula. Hlawkna tel lo tawp a sumdawn te chu a peih pawh in peih e a. In hlep aţangin chhe te tal chu in insem ve ang chu. Ba a a kal nghal vek te chuan hnual a awl dawn emai" a ti leh ta zawk a, Rintluangi ka lo hrilh tawh dan chiah a ni. An pahnih chuan an sawi dun a, ka ţhiannu pawh a phur thar leh ta deuh aniang dawr lamah a let leh vat mai. 

"A va han ţawng duh bawrh bawrh ve..bp mumal loh lai chu nise luhaiin kan let tawp thei dawn a nih kha" a lu tuai nauh nauh pah hian a ti nang nang a, ka nuih a za angreng. Han awmdun tak tak se chu an inmil viau awm sia. 

Tlaia Zonuna lokal chu a chauh hmel lehpek viau a, nupui te tello a fa enkawl tih takah ho te teah a buai leh chung pek a nih hmel. 

Motor a ţhut luh pah chuan "Nizan i meng rei em ni a?" ka ti a, kawngkhar ka pawt phui nghal zat a, "Ka mu hma a ka tho leh a" ti a min hrilh lai chuan ka thawmhnaw hawn ţhenkhat chu seat hnung lamah ka dah phei a, "Ţhahnem ngai deuh a ka tih loh chuan pawisa ka khawl ngah har lutuk ang" ka ti pah mawlh mawlh reng bawk a, motor a tawlh riai riai rual chuan min lo en reng tu Rohlua hmuh tur chuan ka kut ka vai a, a tlan chak zui tial tial a. 

"Sangsangi eng nge a an tawh? An lo hrilh che em?" a ţhutna lam ka hawi phei a, ngaihtuah ve viau mah ila ka ti lang vur thiam bik si lo a, ngaihven lo deuh anga min lo ngaih ka hlau deuh reuh.

"Thil a ei thei vak lo a, tunah chuan a muhil an tia" ti a min lo chhan chuan a mawiah, "Ei theih zawng a nei em? Ka lo leisak dawn mi?" ka lo ti ve a, rin ang ngeiin a phal lo a, "Eitur chu a tam a, eng tham mah a ei thei lo" a ti deuh tlat a, an in gate a kan tlan luh hnu a motor a tih din rual chuan a kut ka la a, a sana bunlai chu ka en a, kan haw hma bawk a a la tlai chhe lo khawp mai. 

Ka nu'n min lo dawngsawng a, kei min hmu tel ve chu mak a ti deuh niin ka hria. 

"Sangsangi ka kan ve duh sia Rohluan min haw hma tir a" ka tih chuan "Inchungah a awm. Tun lawk khan Kimkimi pawh a lo thleng a" a ti a, a ţawngsawi viau nain Zonuna pawh chuan a hre pha aniang "Ngaihtuahawm a ni lo ka tih kha mawle" a ti niah niah a, nuam a tih hmel chiah lo. 

"Nuin fa a hmangaihna hi chu tuman an hrethiam thei lo ang. Kan hmeichhiatpui, kan fate ngei pawh hian anmahni kan hmangaihna hi fa an neih ve hma chuan an hrethiam kher lo ang. Hma a sawn vak si lo a, Kimkimi pawhin a ngaihtuah ve a nih kha" ka nu zawk chuan a lo ti a, a dik ve tho mai. Fa te meuh an han damloh hi chuan nute tan chuan a luhai thlak ve ang.

Pindana kan luh ve rual chuan "A harh deuh chiah" ti a min lo hrilh pahin Kimkimi chu a ţhu ţha sawk sawk a, Sangsangi pawn min lo en ve ran a, nidang angin hlim hmel a pu lo thung. 

Sangsangi mutna khum tlangah Zonuna chu a ţhu a, a sam a chul sak hauh hauh a, ke tawm atin khum mawngah Kimkimi a ţhu thung a, keichu khum bul a ţhutthleng inhung saah chuan ka ţhu a, kan ngawi rauh rauh hlawm a, Kimkimi takngial pawhin sawi tur a hre rih tlat lo. 

Sangsangi pang a deh vel lai chuan "Apa, ka ril a ţam tawh" a lo ti ţiau a, a aw pawh a dik lo. 

"Eng nge i ei duh a? Soup kha i duh leh em? nizana i hawp ang kha" awki dam deuh hian a ti a, "Engmah i la ei thei si lo a, i in theih tur tui deuh ka lo siam ang aw" Kimkimi chuan a lo ti ve bawk a, a tu a mah mah chu a chhang lo nain a pa zawk chu a kuah bet tlat a, nu leh pa ngai rual lek a la ni bawk si, a damlo chung pawhin an chhuahsan lo thei si lo a, a lainatawm reuh tak tak a ni. 

Thil tuiril chu tlem a in a, chuti chung chuan a hrawk chu na a tiin a in hleithei lo a ni ber a, a ţap pur reng mai. 

"Khumah hian lo ţhu rawh. I ţhutna kha a hahdam lo emai" a tih tak tlatah chuan khum tlangah, a ţhut lohna lam zawkah ka ţhu ve a, ka ep chiahah an pafain an inpawm a, a lai chu a awl duai a, Kimkimin "Zanin chu kan in lamah ka riahpui mai dawn em ni? Nizan in mu tlem awm sia, ka nu pawh a khawngaihthlak alawm" zawitea a tih chuan "A ţullo, helamah kan buaipui thei" a ti hluk a, a aw pawh chu a nelawm fahran lo. Kimkimi pawhin engmah sawi zui tawh loin Sangsangi zawk chu a en vang vang a, khum mawng lama ţhu a nih avangin ipik hmel taka a thaw hluai te chu ka lo hmu thei a, a tho zui daih bawk.

Pindan aţanga a chhuah hnu pawh chuan boruak a la rit churh reng tho a, Rintluangin min rawn be hlauh lo phei se chu sawi tur pawh kan hre kher lo maithei. 

"Chanchin a rawn zawt che mi?" Zonunan a lo tih chuan "Aw..Sangsangi hi a ngaihtuah ve a. Hman se chu a lokal ve tur a nia, mahse vawiin chu a buai ve deuh a" tiin chhuanlam ka siam sak a, Sangsangi chu ka en leh ţhin a, a pa nen min rawn biak kha chuan a la ţawng ţha peih hle sia, vawiin chu a awm a nuam lo zual deuh a nih hmel. 

"A pang a lum leh ţan a, i piah a nachhawkna kha lo ban lawk teh" ka inher nghal vut a, ka ţhutna bul lawk a damdawi chu lain ka pe vat a, an in eitur hnu chuan Sangsangi pangchang pawh a ţap leh hliam hliam tawh a, a hnung a chulsak pah hian Zonuna chuan min rawn nuih a, "Nakin deuhah i nu nen ka thlah dawn cheu nia" a tih chuan ka lo bu nghat a, pindan chhung a awm ve reng ka nin deuh hnuah inhnuaiah ka chhuk a, ka nu ka zawn laiin Nu Hmangaihi zawkin min lo ko a, hlauhthawnna hi a lo awm nghal ringawt zel. 

"I fel hle mai" a nui var var a, lo ţhu rawh ti niawm takin a ţhutna bula hmun awl lai chu a beng thak a, "I nu chu pangpar a en leh tawh aniang. Kei ai mahin a lawm zawk a, hmun awl zau deuh lai chu nei ula in hawn ţhen ve tur a nia" a tih te chuan ka nui ringawt a, a fel viau nain ka la nel lutuk lo.

"Naupang damlo hi chu a buaithlak a ni. Sangsangi phei chu naupang awm chhun tih takah a pangchang a, duat deuh hlekin a ţah a chhuak a, ngaihsak loh deuh leh chutiang tho chu a nia, nizan pawh ţha deuhin kan mu a, zanrei lamah kan buai leh deuh a, naupang hi chu damlo leh thei lo se ţha tur a nia" a ti charh charh a, "Nia" ka lo ti leh ringawt a, ka zamin sawi tur ka hre hlawl lo a ni ber. 

"In sumdawnna chu a tluang em?" ti a min zawt chu "I lo hre ve elo?" tiin nui chung hian ka zawt let a, ka zak dawn dawn alawm le. 

"Hria ang chu..Sangsangi han dam se kan la en ve dawn nia, i nu leh Zonuna te hian an sawi ţhin a, pawisa nei lo awm tlawk tlawk ai chuan a ţul ţul thawh hi a ţha mai. Ti ţang ţang ula, hma in sawn ve zel mai ang" a ti luam a, hawi kual thuak pahin "Khaw nge Kimkimi kha?" a ti leh daih bawk a, "Ka hmu miah lo. Inchungah a chho leh tawh aniang" ti a chhan pahin keipawh chu ka hawikual ve vak vak ringawt a. 

"Nupa hi chu inţhen tawh mah ila fate vang hian inhmuh loh theih loh chang a awm a, inbiak loh theih loh chang a awm bawk a, Kimkimi pawh loh theih loh a lokal a ngaih chang a awm leh ţhin a, i dawhthei ka ti khawp mai" a ti a, Zonuna nu berin chutiang zawng a ţawngkam a nei chu ka zak angreng khawp mai.

"A ho lutuk..ka hrethiam alawm" ka ti ve mai a, mipa pakhat, hmelţha veng mai hi a rawn lut hlawl a, a hnungah Zonuna u, U Mami leh ka nu an rawn lut ve bawk a, "Eng nge ni ta?" Nu Hmangaihin a lo tih chuan "Kimkimi ka lo hruai dawn a" pangngai tak hian a ti a, ka nu leh nu Hmangaihi te, U Mami ngei pawh chu kei ang bawkin an hamhaih ve niin a lang.

"In inbia em? Nichin lawk kha chuan choka ah a awm a, ka hmu zui tawh miah lo a" a lo ti dam thlap a, Kimkimi ngaihven tum ni awm taka a ding hluai chu chupa chuan a kutin a lo zap a, "Ngaihven duh suh kan inbia alawm. A lo chhuk mai ang. Min hre tawh lo a ni maw?" a ti leh hnuhnawh a, Nu Hmangaihin "Ka va hre mai lo che ve" a tih chuan "Kimkimi nutei fa ka nia, min hre tawh lo ang. Vawikhat chiah ka lo la kal a, keichuan ka la hria che" a ti a, a nui sang mai bawk a, hmuh a nuam khawp mai. U Mami chu ka ep chiahah ţhuin nelawm tak hian min nuih a, eitur eng emaw a khai nual danah Sangsangi a rawn kan ve dawn a nih hmel. 

"A nih chu mawle..lo ţhu rawh. Han be chhin teh..inchungah a awm aniang" a tih lai mekin Kimkimi a rawn kal a, "Ka hmuh ve in phal lo thei lutuk a, min ngai viau nain kei aiin a pa buaipui a duh zawk zel a, kan la hrang hlak lo ang tih pawh a sawi theih loh a nih hi" a ti hlak hlak a, kan lo ngawi dak a, a nau mipa pawh chu a mitmeng a buai ve nak a, a inthlahrun hmel viau mai.

"I duh hun hunah lo hmu rawh ka tih ziah kha. A nu i nih chhung chu in hrang thei tak tak lo ang. Na a tuar ve rih a, hrethiam hram hram rawh" Nu Hmangaihin a tih laiin U Mami chuan "Tumah mawhpuh suh. In inţhen chhan te kha ngaihtuah ve la. Hei i nau pawh hian a hre vek ang chu. Keini ni lo phei ila chu Sangsangi hi i hmu thei tawh kher lo ang" a ti thung a, ka nu a inthiarfihlim vat a, kei erawh ka ţhutnain a zir loh em avangin bet lo deuhin a ngaiah ka la ţhu ta reng a, ka hriat ve kher loah pawh an lo buai ru viau a nih hmel.

"Ka ti sual a, ka hria alawm. Ka pawm thlap a, ka inchhir a, ngaihdam ka dil bawk. Hmuh phei chu tun hnaiah in phal ve deuh a ni mai a, rawn hmuh ka tum apiangin Zonuna leh ka pa'n min dang ziah a nih kha. La hrang nghal hmak lo ula chu na a neih te chuan min thlahlel ve em em ang" a la ti hlak hlak a, U Mami pawh a ding hluai tawh a, mi nasa ve ve tih takah an inhlau lo a, mi mitmei an veng hauh lo bawk. 

"I awm ang khan awm ve ila chu ka fate hi ka hmu ngam tawh lovang. Ka pa khan Sangsangi i hmuh a phal lo ngai lo. Zonunmawia rilru i tih nat em avangin i rawn inlan sek a duh lo zawk a nih kha. A thu hrimah, hman zanah engkim in ti tawp tawh a, tun a sawichhuah leh a ţulna a awm lo. I rui lehpek tawh em ni a?" a ti khar khar mai. 

Kimkimi chu a lo nui huk hal a, chutah keichu min rawn enin "En rawh Remruat, heng ho hi ila hrawn tur te an nih hi" elsen zet hian a ti a, "Tun hnaiah hmuh in phal chauh a, Remruati pawh hian mi fel deuhah a ngai ang che u. Ngaithla rawh Remruat, tun hma chuan ka fanu hmuh min phal sak ngai reng reng lo. A awm lo an tih loh leh a muhil an tia, he in aţanga ka chhuak tur min ngen lawm lawm te khan an pawt bet tlat a, nu mamawh rual lek si kha ka lak aţangin an la hrang alawm. Tunah lem mifel ber ang maiin an awm a, i awm lai chiahin ka chungah an ţha. Milem an nih hi" a ti bawl bawl mai. 

"Buaina a awm em?" tiin Zonuna a rawn inrawlh ta hlauh a, "In awmdanin zir se chu buaina a awm miah lo ang. Insiamţhat chu ka tum alawm. Tunge min ngaidam duh lo kha? A tawp vek tawh, ka nei tawh dawn lo che a rawn inrawlh ve tawh suh i ti vel a, engah nge ka inrawlh a? Ka fanu ka hmuh ve chu a pawi viau em ni a? Sangsangi ka hmuh ve hian min nei leh rawh ka tih naah i lo ngai deuh em ni?" Kimkimin a tih khar khar laiin "Kan sawi fel vek tawh kha" pakhatin a lo ti bul hmuk a. 

Nu Hmangaihin "A zahthlak Kimkim, nidangah kan sawi dawn nia" tiin khap a tum viau na a "Eng nge kan sawifel a? Ka nei tawh dawn lo che tih kha maw? Zah pah lo taka ka nu leh pa rawn be vel tur khan eng nge ni a i inhriat a?" tih khum tuarh pahin a bag in a darah a vaw pawp a, Nu Hmangaihi chu ka bulah a rawn ţhu hnawk a, Kimkimi thluak fim loh zia ka hmu thiam ve tain ka hria. 

"I lo ti leh tawh a ni maw?" tih hluk pahin Zonuna chuan a banrekah a hmer sak a, an buai nuai nuai a ni ber tawh. Kimkimi chuan a duh duh, thu inzawm lo zet zet a sawi reng a, a nau lahin pawh hran a tum ve reng a, a zah hmel tawh khawp mai. 

"Hruai chhuak rawh. Vawikhatmah rawnkal tir tawh suh u" Zonunan a tih hnuah pawh a nau chuan a la hruai chhuak thei chuang lo a, a dim ve deuh bawk tih chu a hmuh theih reng mai. 

Ka hming a lam deuh reng a, thu an ti tawp chu a pawm thei lo a ni ber. Sangsangi vangin a rilru a na ve deuh bawk nen, ka tan tak pawh chuan a nuam lo. Zonuna thinin a tuar tawh lo a ni ngei ang a kut a la lawk a, a hnuk nghal dawr dawr a, an kal liam chiah chu a reh duk mai. 

"Damdawi a rui leh tawh a nih kha. A nau nep zia kha i lo hmu em nu? Khawih pawh a khawih ţhat ngam loh kha. Dawheh ropui si, thiam inchan tir phet a tum a, hman zanah insawi fel vek tawh a, Zonuna berin a tawp tawh a tih te chuan pawm ve mai tur a nia. Tikhan kan inchhungah buaina a la siam ngam zawk a, a harhfim hunah a inchhir ve ngawt ang" U Mamin a tih hlak hlak laiin Nu Hmangaihi chuan "A khawngaihthlak a nih kha. Ngah nge maw damdawi a lo khawih leh reng reng ni? A ţhat loh zia hrechiang ber tawh tu tur a nia sin mawle" a ti vang vang a, Kimkimi damdawi khawih ve chu ka vawikhat hriatna a ni thung.

Zonuna lo let chu choka ah a lut tlang a, U Mami chuan inven tum tak hian "Remruat, a sawi ang kha a ni miah lo a nia. Ka nu hian min lo khap lo se chu ka chilh hrep ang. Kan ngaidam zel a ngaiah min nei tawh a nih hi. Keini chu ni lo se Sangsangi hi a hmu thei tawh teuh lo mai. Zonuna pawhin a nu leh pate zah pah lo deuhin a ţawngkhum lo, Kimkimi nu hnenah 'upa ho bulah ka sawi angin thu dik lo lo sawi tawh suh' a ti a nih kha. Chupawh a nin tawpah a khak ve chauh a, thudik kan hre ve reng chung hian an nufa hian dawt an sawi kual char char tho a" a la ti hlak hlak a, ka hriat ngai loh ka hriat belh leh ţeuh tawh. 

"Tui ka va in lawk" tih leh thawh ka rual a, an boruak hi ka zo ve meuh lo. Thil thleng thei ni pawh a ka hriat loh chu ka mithmuhah a thleng rum rum a, ka pangai hleithei lo a ni.

Nu Hmangaihin "Khatin sawi phawng phawng zel mah ta che. I thinrim hi i ang leh tun tun ţhin a" ti a U Mami a khak ri chu ka hre pha a, ţawng zawi viau mah se inchhung chu a reh em a, hriat loh theih a ni lo. Ka hmuh chhuah tak chu, chhungkaw awhawm deuh anga kan ngaih te pawh hian mi hriat ve atana an duh loh, thuruk an lo nei vek tih hi. 

Dawhkan kilin Zonuna chu a lo ţhu a, a hmaah tui no a inchhawp a, a bulah ka nu a ding bawk. Min hmuh chuan tawi tein min lo nuih a, a landan chu a pawr fap a, a mitmeng dul ruihah chuan engmah ka chhiar thei lo. 

"Thil thleng kha" a lo tih chuan a sawi zawh hmain ka lo khap a, "A ngai lo" ka ti vat a, ka la awih thei lo a ni ber. Kimkimi hi nasa tih chu ka hria, mahse khati rum rum a a chet duh kha ka ring ngai lo, a an hla lah kha sawichhawn leh tlak chu tlemte chauh a ni. Zirtirtu ve meuh siin a nihna a hloh vek kha ka hrethiam thei meuh lo a, khati khawpa a thluak ti fim lo thei tu chu damdawi chak tak a ni phawt ang. 

"Nu, engtik nge i haw theih ang?" ka ti a, Zonunan ka kut a lo vawn rual chuan rang takin ka la let a, haw phawt ka duh. 

"Tuna ka chhuan lai saw a so chuan ka haw thei mai ang. Mahse, Sangsangi han hmuh leh phawt ka duh a" a tih chuan "Ka lo nghak ang che" ka ti leh tawp a, ka nu tak pawh chuan mak min tih hmel a, thil thleng kha a hmuin a hre ve vek a, ka rilru put hmang tur chu zawi zawi a a hriatthiam thuai ka ring. 

Nu Hmangaihi rawn kal ve chu ka nu nen an inbe luam a, ka hriat tur chuan "Mami pawh a dik bik lo. Thil ni lo lo a sawi ţhin a, thinrim lai hi chuan kan sawi duh ngai miah loh sawi chhuah te a awl a, vawiin a thil thleng chu a zia lo tak tak a ni. Remruat, min hrethiam hram hram rawh aw..miin an hrezau ang tih te reu reu a nia ka hlauh ni" a ti lawm lawm a, khawngaih viau mah ila rilru mumal ka pu thei bik tlat lo. 

Sangsangi hmu tura ka nu nen an kal dawn chuan "Ka bag kha min lo lak sak nghal rawh" tiin ka nu chu ka chah a, min en vang vang hnuah Pi Hmangaihi a zui a. 

"Motor ah khan ka thil zawrh lai ka dah a, min lak pui peih em? I nawm loh hmel emai min thlah lo mai rawh. Bakah boruak a ţha lo a, khati rum rum kha a ni ta sia, Sangsangi a ngaihtuahawm" ti mah ila "Ka thlah ang che u" a ti deuh tlat a, inchungah a chho ve a, gas dawhkan nghengin choka ah chuan ka ding ta reng a. 

Ka biang dawm chung meuh hian ka inngaihtuah a, lung a zing chuk a, ka hmai ka tuai leh ringawt ţhin a, ka thil hmuh kha a rapthlak lutuk a a tak a ang lo hial zawk alawm le. Ka pa zu rui ai pawn a nasa daih zawk. 

Kalkawngah chuan ka nu nen an ti ti a, keichu an hnungah ka ţhu ngawi reng a, an titi ka zawm ve loh chu thuhran, eng nge an sawi ka hre lo hrim hrim. 

Ka nu chhuk hnua thawmhnaw ka lakkhawm lai chuan "Thil thleng kha pawi ka ti khawp mai. A bo vang vang a, a lo ti leh ang tih rin ngaihna ka hre lo" inthlahrun hmel taka a tih lai te chuan sarang chhunga thawmhnaw awm ho chu ka khawm ri rawk rawk a, ka ţah te lam lam a chhuak alawm le. 

"Remruat, inbe lawk teh ang" a ti zuai ruih a, ka ngaithla duh lo thung. Ka tana hriat pawi tur leh huat theih tur sawi an nei hauh lo nain an inţhen thei chiah angem ka chiang tawh lo.

"Inngaihtuah nawn leh ka mamawh in ka hria. Nangpawn hun thawl i mamawh ve tho. Kan pahnih hian keimahni ve ve kan inngaihtuah rih lawk a ngai a nih hi. Inbiak ka duh hunah ka lo hrilh ang che" ka ti a, kalsan tawp ka hreh deuh chu thawmhnaw pawm ţun chungin ka ţhu leh rih a. 

"Damdawi vang pawh lo nise Kimkimi awmdan mumal lo lutuk kha ka hrethiam lo. Aaa...engkim kha ka hrethiam lo vek. A hahthlak rih emai nangpawh i hah lutuk alawm" tih pahin ka ţhu chhuak deuh a, a kut chu ban rawk rawkin rem leh rem lovin ka hum a, a mitmeng dul raih mai chuan ka mitah a en ran a, "Chawl tak tak rih ang. Tupawn chawlh lawk te chu kan mamawh ţhin a, tunah chuan kan chau tlang rih a nih hi. Rei a ngai lo ang, midang ngaihtuah tel lovin mahni inngaihtuah hmasa rih lawk ila, kan hahdam deuh hunah duh leh kan inbe leh zawk dawn nia. Tunah chuan mahni kan in nawr na mah mah a, rilru hmin zan lo chungin thil tam tak pawm luih kan tum a, ka sawi vek seng lo. Hahdam nan hun tlem te chauh pawh kan mamawh rih" ngenngawl zet hian ka ti a, hrehawm ti lo ka ni bik lo, mahse inneih kan tum lutuk avang hian en liam harsa kan tih deuh, en liam luih tum kan ngah a, hmin zan lo chunga ngaihdam luih kan ngah bawk. 

Seat nghengin mit a chhing a, thinrim insum nasa ni awm taka a bek pawng ţawng ţawng te leh a insehruh ţeuh mai te chu hmuh nuam ka ti bik lo. Ka khawngaih a, a fanu damloh lai tak a kalsan phei chu ka duh dan a ni bik lo. Mahse, ka inngaihtuah fim phawt loh chuan tih luih zel chi niin ka hre tawh lo. Motor aţang chuan chhuakin ka kalsan a, ani pawn min dang bik lo. In ka thlen rualin phone ka switch off a, ka awm thei em em ang. Tunhma pawhin phone nei lo ang hmakin alawm ka awm tho. 

Ni a liam ve bek bek a, tuma hnenah engmah ka la sawi duh lo a, pawimawha min be duh tu an awm thei tih hrereng chungin phone ka switch off lui zel a, Rintluangi leh Rohlua chu ka nu phone in ka be mai zel a, chanchin min zawt nasa viau ţhin tak nain "Nakinah ka la hrilh ang che" tih chiahin ka chhang a, Kimkimi awmdan kha them te mah ka la sawichhuah sak lo bawk. 

Pathianni a nih chuan Rintluangi a rawn lang hlawl a, "Chinchang hre duhin ka lokal tawp a nih hi. Phone aţanga sawi chi loh deuh a nih ka ring a, inţhen in tum uk hnu khan engkim in sawifel ta vek emaw ka tia, rawnkal duh viau mah ila nitin dawr i kal a ngai bawk sia, eng nge awmzia ni a? In sawifel zet tawh hnua i rilru i thlak leh daih chhan hi eng nge a?" a rawn ti bawrh bawrh a, "Lo ţhu phawt teh" tih pahin ka pawt ţhu a, "I mawl emai. Phone tal kha on tawh rawh. Duh leh Zonuna bik kha block rih mai la, pawimawh deuh te a awm thei a" tiin min han hau leh rih phawt a, kan inbiak lohna pawh karkhat dawn lai chu a ni ve ta der mai.

"Biak ka tum tawh rih lo. Ka ti tawp hmak ang chu ka ti chuang lo a, mahse biak ka tum tawh rih lo. Ani pawhin a hrethiam alawm. Min be thei lo chung pawhin a lokal miah loh hi" tiin ka ţhiannu chu ka hrilh a. 

CONT..(Khua a sik ser ser reng a, rilruah a lut mawh khawp mai)