DEAR DIARY-28

DEAR DIARY-28

"A lokal miah lo maw? I thawhna dawrah pawh maw?" mak ti awm taka a tih chuan ka lo bu nghat a, mak pawh ka ti ve chiah lo. Khami ni khan mumal lo deuhin thu tawp ka siam a, a thinrim a nih loh vêk pawhin min ngaichang a ni ngei ang. 

"A chau ve rih a nih dawn chu. Lehlam zawng chuan a khawngaihthlak tho bawk sia. Kimkimi chu engtin chiah maw a awm a? Phone ah khan i sawi chiang lo lutuk a" a tih laia ka pa a lo luh avang chuan pindanah kan insawn lut a, khum a ka ţhu chu min ţhutchilh lehnghal zatin zawhna ngai bawk min zawt leh a, a awmchan ka sawi chuan uluk deuh a ngaihthlak pah hian a lo chek leh tlak zel a, mak a ti ve tho tih chu hai rual a ni lo. 

"Damdawi hi chuan mihring nihna a la bo vek thei ka ti mai. Hmanniah pawh dawr bulah hmeichhe pakhat a rawn buai chiam alawm. A rilru hah vang te a ni thei angem? Pangngai deuh anga lang siin depression te a lo nei ru ve reng a ni lo maw?" a tih chuan "Chutiang chu thil awm thei a ni. Mihring hi kan landan ang ngawt a ni ţhin si lo a, tunah chuan ka tan lo inrawlh ve sek a nuam lo a, awm hran rih hi a ţha ka ti. Khati taka Kimkimi buai khan chhan engemaw tak chu a nei ang. A nihna zawng zawng a hloh vek alawm. Amah pawh a ang lo, hmeichhe rilru na tawpkhawk, mahni pawh inhre chang tawh lo a che buan buan a ang ber. U Mami khan a thusawi ngaithla liam lo in a chhanglet ve bawk si a" ka lo ti ve a, tih vak ngaihna a hre bik lo. 

"A nih ber dawn chu. A natna kha damdawi khan a belhchhah leh salh ang a, a fim loh miau chuan pawisak leh zah pah a nei lo bawk ang a, Kimkimi pawh a khawngaihthlak tho. In dinhmun a khirh, a buaithlak em a nih chu" a ti charh charh a, "Chuvang chu alawm inhmuh rih loh ka duh. Inbe rih lo ila, mahnia awm tawp rih a ţha ka ti. Nangpawn Kimkimi nen a kan tawrhna khaikhin lo la, mihring chu kan nat hian kan tawrh dan a inang lo ţhin a, chinfel kan tum dan thlengin a danglam ţhin bawk a. Chu chuan chuti chuan a ti a, ti ve rawh intih ngawt chi pawh a ni lo. Kan thil tawrh a inang viau pawn kan nat dan a dang a, kan damna a dang bawk a, chutiang nuaih chu a ni zel a, inngaihtuah fimna hun kan mamawh vek ka ti" ka ti dap dap a, ka nu takngial pawhin Zonuna be turin min nawr lui ngai tawh lo. 

"In inţhen hlen lo ang chu tiraw?" ti a min lo zawh chuan "Ka hre lo le. Hmalam hun kan hre thei mang si lo a, engin nge min lo hmuak ka hriat lawk bik loh hi. Thinrimin ka kalsan lo a, ţha deuhin ka hrilh thlap a, ani pawh inngaihtuah se la, rilru a siam fel ve thei mai ang. Fate vanga inbiakchhiat loh tur a nih laiin inneih lai ang chiaha awm reng tur pawh a ni chuang lo a, rilru zau deuh put ka tum ve chung pawhin an awmdan hmuh hrehawm tih chang ka ngah tho. Khuanu'n ka tana min ruat sak a nih chuan kan inţhen hlen lo tawp ang" ka ti a, a thla a muan hmel huaiin ka hria.

"Mahse maw..ka sawi ve duh chu, inţhen kher hi a ţul em maw ni le ka ti" a tih laia chhan let tuma ka ang zuau chu zaizirin min lo khap a, "Nang aiin ka upa a, ka thlir dan ka sawi anga lo ngaithla phawt rawh. Puitling viau mahla nangpawh hi i naupanna lai a langchhuak ve zeuh zeuh zel tho a, i tan inthlahrunna tur a awm reng reng hleinem. Kimkimi ngei pawhin Zonunan engkim a tih tawp thu a sawi a ni lawm ni?" ti a min zawh chuan "Aw" tih chiahin ka chhang let a. 

"Chu bak eng dang nge i la beisei?" a ti leh khauh a, "Beisei ka nei hran hleinem. Ka sawi tawh ang kha a ni mai. Kimkimi ka hmu ve zel hi ka ngaithei lo a ni ber. Kan thil tawrh chu engpawh lo nise" ka tih lai chuan "Midang nun leh kan nun khaikhin loh tur i tih zawh ziah kha. Tumah hi kan famkim lo a, thil ţha chu kan hre vek a, mahse ţha kan tih ang hian kan awm thei ţhin lo a, inkhaikhin chang i lo nei a ni lo maw?" a lo ti leh a, muangchanga lu buk pahin ka ţhiannu chu ka melh ralh a. 

"Nei ve tho e...hei hi a nia ka duh loh chu. Hlawkna a awm mang si lo. Keichuan nat rukna ka neihin a theih chin chu mahnia tawrh dam ka tum ka tum ţhin a, mahse Kimkimi chuan tikhan a anchhuahpui a, chuvang chu a nia kan chhunga thil lo thleng te hi kan hmachhawn dan a danglam ţhin ka tih ni. Amaherawhchu, a nupui hlui a nih miau avangin inkhaikhin chang a lo awm leh ţhin a, kan dinhmun a inţhat hleih mai bakah a la hmangaih reng ni a ngaihna lian tak ka nei ţhin bawk a, ka naupan vang te, thil ka ngaihtuah chian loh avang tein ka kalsan tih chu ka hre tho a, mahse inngaihtuah nawn ka duh a, a la hmangaih ni a ka rin tlatna te hi a dik loh zia chiang lehzual a hriat ka duh. Aww..beisei ka nei deuh tho tihna a nih chu, a hmangaih tawh lo a ni tih lantir se ka duh" ka ti duah a, hlauhthawn rukna ka nei reng ţhin a, hei hi a bo theih nan eng emaw ti se ka ti a ni. Eng ber nge ti tura ka duh ka hre lo thung. 

"I rilru a buai rih mai mai a nih chu. A sawi chiang tawh a, awih sak tawp rawh. I hriat laiin Kimkimin chiang takin a sawi a, la hmangaih nise Zonuna hian a nei leh daih tawh ang. A nu leh a u Mami te pawh hrehawm i tih hlauin an inthlahrung em em zawk a nia, i tan lo inthlahrun ve na tur a awm lo a, Zonuna pawhin a nei duh tak tak bawk ang che" a tih chuan "Mahse, kan dinhmun hi siam ve phawt ka duh a, keipawn neih ngei chu ka duh alawm. Ka nu te hi nuam sa deuhin awm phawt se ka ti deuh a" ka lo ti leh a. 

"Nih chuan a tlem berah kum5 vel a nghah che a ngai dawn a nih chu" beidawn hmel zet hian a ti a, a lam ka hawi rang khawp mai. 

"Dawrah i thawk a, i nu a inhlawh a, ei leh in a hautak chu thuhran, in luahman pek ve reng a ngai a, kan sumdawnna hi innghahna tlak a ni tehchiam lo. I dinhmun siam nan chuan a ţha lutuk tho a, mahse in nawm sak hun i nghah tir dawn a nih chuan a nghah rei che a ngai viau ang. Ba tam tak kan nei a, dawr kan inluah ţawm a, hlep tlemte kan insem zel a ngai a, kan inhralh duak duak dawn lo bawk. Fing deuhin thil ngaihtuah rawh, inhnukdawk turin ka duh lo che a, keichu ka rilru a nghet lo a, min nawr kal reng tura i awm loh phei chuan engmah ka ni lo ang" a ti a, ka hrethiam niaih nuaih lo hle mai. 

Ţhut ţhat pah hian ka kut a vuan a, kan khup a insi leh ran tawh. Ka kut vawn hi a hrat hrim hrim a, thil pawimawh deuh a sawi dawn chuan min vuan zel a, ngaiah ka nei tawh a ni ber. 

"Zonuna hnenah chiang deuhin sawi lawk rawh. Min nei duh tak tak a nih chuan ka hnial lo ang che, mahse, ka nu leh pate ka enkawl chhunzawm zel a ngai dawn a, chu chu i remti dawn lo a nih chuan tunah sawi lawk la ti rawh" thutak deuh hian a ti a, "Chutiang te chu aman lo remti pawh nise a chhungten an remti dawn em ni?" tiin ka lo zawt let ve thung.

"Tehreng mai...a nu chauh a ni tawh a, Nu Hmangaihin a remtih phawt chuan hmun dang daih a an chhungte ve mai mai hoin an rawn thunun thei hleinem che. Kan dinhmun hi kan duhthlan a ni lo a, retheih hi tuman kan duh lo. Chutih rual chuan kan lo rethei a nih pawhin hnual chuan loh tur a nia. Pathian hian a tawk te tein ro a rel tih hriat tur. I sawi ang khan midang nen inkhaikhin miah lo ila, kan nundan leh rilru a inang hlawm lo a, midang nen a inkhaikhin vak vak chu beidawnna mai a ni. Ih e, sawi chhawn leh ka duh lo viau nain thil ka hrilh ang che aw" awki dam deuha a tih chuan "Sawi la" ka lo ti vat a, a hmui a liak zauh a, keiin tawitein ka lo nuih a, ani ang ţhian ka nei hi ka vannei takzet a ni. 

"Hmanni a kan pahnih a kan len ni daih tawh khan Nu Hmangaihi nen kan ti ti mai mai a, inchunga inchhoh hlan khan a nia" a tih mek lai chuan "Eng nge in sawi?" tiin ka lo inrawlh leh a, a nuih a za nasa mai.

"A hrethiam lutuk che alawm. Lehlamah chuan i vannei a, nu Hmangaihi hi a fel em a, i nu nen an lo inkawmnel tawh bawk a, hrawn a hrehawm ka ring lo. In dinhmun thlengin a hrethiam a, ka sawi ang khan a ni pawhin kan duhthlan a ni lo a a ti ve tho a, i nu hi a khawngaih bakah a ngaihtuah a, puih reng duhna rilru i put ngat phei chuan a lawm zawk daih ang. Hmeichhia hi chuan thil kan sawi peih ve hrim hrim a, nu Hmangaihi nen pawh kan sawi nual mai. A fak ve khawp che kha, retheihna a hrethiam a, a faten lehkha an zir theih nan a vawk vulh ve ţauh ţauh ţhin a nia, i ngaihtuahna kal thui lutukin a ti buai rih mai mai che a nih hi. Anni lam chuan harsatna an nei lovang" tiin min ţawng thlamuan a, thil tam tak ka hriat belh phah a, inngaihtuah nawn leh ka thlang hi ka tisual viau chuang lo. 

"A duh takzet che a nih chuan Zonuna hi nei la i ti fuh zawk maithei a ni. Duh leh kum khat vel te chu innghah tir la, in kum a inthlau a, i nei dawn tho a nih chuan innghah rei tir lutuk suh. Nangpawn hahdam deuh zawkin i nu leh pate i enkawl thei dawn tihna a ni mai a, kan sumdawnna a len hun i nghah chuan a rei lutuk ang" a ti a, sawi dik loh a nei hauh lo. 

"Min ţhawng deuh tu a awm hi chuan rilru a a thawh dan ang ang hian kan che tawp zel a, amah a reh zui daih bawk nen, ka duhdan kha min ţawmpui a nih ka ring a" ka tih chuan "A ţawmpui lo ang che. A zah sak zawk che aniang. Tunah pawh a lo ngaihchan reng che ka ring. A duh takzet che tih ka hria alawm. Ni lo se chu tun thlengin i kiangah a awm lo ang. A naupang zawk zawk tawh lo a, a neih duh loh tur a hel reng hauh lo ang. Inringtawk la, Kimkimi nun leh i nun khaikhin tawh lo la, an kawng daltu ah inngaiin inkiltawih tawh lo la, inthlahrunna tur a awm lo ka tih kha. I ngai a nih phei chuan be hreh suh" a ti mawlh mawlh a, ţhahnem a ngai khawp mai. 

"Hmanni khan min hmangaih leh hmangaih loh ka zawt a, min duh thu a sawi daih a, boruak a awm hlek tawh chuan kha thil kha ka ngaihtuah zel. Hmeichhia chuan kan ngaihtuah thui a, min hmangaih lo anga ka ngaih hnu phei kha chuan ho te teah hlauhna a lo awm ţhin a, i hrethiam mai em? Min hmangaih lo tu neih palh kan hlauh theih em hi" ti a ka insawifiah ve chuan "Hrethiam tehreng mai" a lo ti vat a. 

"Mahse, mi ţhenkhat chuan awlsam deuhin ka hmangaih che an tia, ţawngka chauhin an hmangaih a, an hmangaih tak tak ngai lo. Mi ţhenkhat hmangaihna lem deuh ai chuan Zonuna duhna che kha a lo thuk zawk daih maithei a sin" a tih zawm ta zel a, "Chuti chu ka be leh mai dawn em ni? Nge hun thawl ka la inpe rih ang?" ka lo tih chuan "I ngai ve em?" tiin min lo zawt let khaih a.

"A ngaih te chu ngai e" ban charh a ka tih chuan "Be leh rawh. A lo ngaichang ve reng tho ang che. Inţhen tih thumal hi sawi lang lo la, in inţhen chiah pawhin ka hre lo, amah pawn inţhenah a inngai lo maithei a ni. Nangmahin hun i hmang rei tawh alawm. Tikhan thutlukna siam la, naupangchhia deuhin che tawh suh" min ti a, kan inkawm zui zel a, thu ţha min hrilh mawlh mawlh a, mahni chiah inngaihtuah lo turin min hrilh ngun lehzual. 

"Mihring chuan harsatna kan tawk thei vek a, chutiang hun a lo thlen chuan ţhenkhat hi chu an thil tawn mek te, an nun hman mek te hian a ti mangang ţhin a, beiseina, rinna leh dawhtheihna te an hloh vek a, a tawpah anmahni chauh an inngaihtuah tawh ţhin. Chutiang chuan awm tum loh tur, mahni chiah inngaihtuah tawh chinah chuan intihhlum mai te a awl a" a ti a, ka u a hrechhuak aniang a ngawi zui ta daih a. 

A nute phalna thlapin chaw a lo ei nghal a, scooty a khalh chhuah ngam loh avangin chaw ei khamah taxi ka chanpui a, pathianni a nih vang aniang a vang khawp mai. 

"Ka thusawi ho kha hrereng ang che. Hmanni a Kimkimi rawn awmdan kha inţhen chhan a tling lo a nia" a ti mawlh mawlh reng a, "Pathian belh nachang te hi hre ve la. Chawhnu leh zan i peih loh pawhin chawhma tal chu inkhawm ve ţhin bawk rawh. Kan nun hi tluang purh angin lang ţhin mah se Pathian tello chuan a kim thei tak tak lo a, kan ruak a, hlimna tluantling a awm ngai lo" te a ti thul, fa zilh takin min zilh a ni ber e. 

Taxi ruak a lo tlan hlauh a, khaw thim hnuah kan invai liam ve thei hram a, a thusawi ho kha mut hmunah pawh ka ngaihtuah zui rauh rauh a, a dik hlawm viauin ka hria. 

Dear Diary,

Ka nun leh midang nun khaikhin ka ching leh ţhin hi bansan ka ngai a ni. Ka chunga lungngaihna lo thleng ţhin te pawh midangin an tawrh ve mek nen ka khaikhin ţhin a, ka nun leh midang nun ka buk tawn a, ka khaikhin bawk a, heng zawng zawng hi ka bansan ngei a ţul a ni. A chhan chu, an nun a thil chhe ber a lo thlen hian miin engtianga nasain nge thup tum a an beih ţhin ka hriatpui lo a, buaina nei ve miah lo anga ka ngaih ţhin te hi a na ber an lo ni maithei a, fing taka an natna te an thup ţhin avanga langchhuak lo a ni thei tlat a ni. 

Tun aţang chuan na ber angah ka inngai tawh lo ang. Khawvel ah hi chuan hlimna leh lungngaihna hi a inzat chiahin a awm reng dawn a, ka tawk fo dawn bawk a, a pahnih a dawnsawn dan leh hmachhawn dan ka thiam a pawimawh ta ber mai.

Hriat loh karin ka lo muhil a ni ngei ang zingah ka nu'n min rawn kaitho a, "Hna kal a ngai tawh si, tho ve tawh mai rawh. Chaw lo chhum la, i nutei te inah ka va kal lawk ang e" a ti a, hmanhmawh deuhin a chhuak zui a. 

Chaw ka chhuan kai hnu lawk a phone ka on rualin missed call leh message a lo lut zut zut a, a mal te tein ka hawng a, Zualtea ngei pawhin min rawn biak a tum nasa khawp mai.

Zonuna erawh chuan, 'Inbiak i duh hun ka lo nghak ang' tih zawng hi min thawn a, a missed call takngial pawh a awm lo. 

La be ta mai lo chuan Rohlua zawk ka bia a, "Phone i khawih ve ngam tawh maw?" min lo ti a, a phur hmel khawp mai.

"In veng kawnah ka lo nghak leh mai ang che aw" ka tih chuan i he lovin a lo remti nghal mai a, status te ka enkual a, ka zawn ber Zonuna status ka hmuh chuan ka en vat a, Sangsangi nen a an thlalak a ni a, eng thu mah a ziak lang lo nain Sangsangi pawh a dam hmel tawhin a hmel hmuh a nuam leh viau tawh a, a status hi a chik a, a entute zinga ka hming a hmu ve a nih chuan mak a ti khawp ang. 

Chaw hmin hnuah ka inbual a, ka insiam nghal thlap a. Pindan aţanga ka chhuah chuan ka nu'n chaw ei a rawt nghal a, ka pa hmel erawh hmuh tur a la awm lo. 

"I nutei ten an inhnuai an siam dawn a, 'kan zawh hunah in luah dawn nia' a tia, a man pawh chawi a ngai lovang. Pawisa kan khawl ve thei deuh ang chu" phur zet hian a ti a, ka nutei pasal hi a fel mai bakah ka nutei hi inchhungah a lal zawk a, a thu vek a ni tawp mai. An unauah rau rau pawh ka nu nen hian an inpawh bikin an inhmangaih bik emaw tih tur a ni ţhin a, a phal phawt chuan ka nu sawi ang hian a thlawnin kan luah thei ngei ngei dawn. 

"A ţhat hlauh chu. Kudam ah an hmang ţhin sia, an zauh dawn tihna mi?" ti a ka lo zawh chuan "A nih hmel..pawisa min pe fo mah se i pa a ngei avang hian min ngaihsak duh lo lui ţhin a, mahse hrehawm a ti aniang, ipu ten min ngaihven turin an rawn ti ve sek bawk nen, tukin a ka va phei chhan pawh kha a nia. Kan in neituten min ning tawh bawk a a tih zia tak tak a ni" a ti siam siam a, a phur lutuk chuan keipawh phurna min siam ve a, a hmel hmuh pawh a nuam khawp mai. 

💛💛💛💛💛💛💛

Rohlua nen a dawr kan thleng chu "I harh chhuak tawh maw?" min han ti ringawt a, bang bo deuha ka en lai chuan "Phone switch off ringawt te hi a ţha ngai lo, phone neih man a awm nang. Sir Zonuna nen in inbe ţha leh tawh em ni? Hmeichhe dang nasat vang mai maiin ţhen duh mah ta che" a ti duah a, ka nui ta ringawt a. 

"Ka switch off tawh lo ang. Nia, mihring hi chuan tihsual kan nei ţhin alawm. Mahse a ţha hrim hrim, tikhan ţhiante hnen aţangin thu ţha deuh deuh ka dawn phah a" ka ti a, ka tana an awm zia leh min puih an inhuam zia te pawh ka hre tel a, chu erawh ka sawi lang kher lem lo. 

"Rintluangi te kha khawi vengah nge an awm?" a ti leh ta daih, nui rah rah chung hian an veng hming ka hrilh a, ka chhaih zui ve chuan a lo ner deuh nak a, "Naa..ka zawt mai mai che a nih kha" a ti ve tak nain ka chhaih zui reng tho a, a nui vur vur reng mai. 

"Karleh aţang chuan doctor a lo ţhu ve tawh ang a, i buai sawt dawn ni mai. Chuvang chuan karleh hmain i bialpa nen insawifel hman tum ru aw. Rilru hah leh taksa hah hi a inrem chiah lo a" a ti a, a uang hauh lo. A ngaihdan hi a sawichhuak phawng phawng zel a, ţha a tih dan te nen hian. 

"Insawifel ngai vak a awm hleinem. Kan inbe lo rih mai mai a, ka nei daih lo ang tih pawh a sawi theih loh a" fiamthu a ka tih chuan "Nei daih tak tak teh. Ka u aţang hian ka hre ve a, pasal tlak alawm. A nupui hmasa khan awm dan a thiam lo a, nang chu fel deuhin awm la. A dam thlup reng mai a, a rilru a tluang bawk a, an kum hian inthunun theihna a chhawm tel tawh hrim hrim a, chu loah ka bialnu emaw an ti fo che a ka kham riau a nia" a lo ti ve nghal zat a, nui hak hak chung hian "Daw lo mai teh" ka ti hlak a, min lo en vang vang a. 

"I hmel hmuh a hahdamthlak deuh tak tak mawle. Tak taka Remruat, nang chu rilru neih i ngai a nia aw, i nawmsakna tur leh i nu leh pa en hrang lo tur i thlan a ngai a, puitling deuhin ngaihtuahna hmang rawh. Pasal tlak a ngaizawng a ka tia ka lawmpui tehreng che nen, ho deuhin i chhuah ringawt a, hetiang tur a ni ngai lo. Mahni chiah inngaihtuah vanga kan tihsual ho te hian damchhung inchhirna a thlen thei a nia" a ti a, Rintluangi min hrilh dan hmang thoin thu min hrilh ve a, ngawi rengin ka ngaithla a, rilru pe deuh angin ka awm lo na a hriat hmaih ka nei chuang hauh lo. 

Rohluan min chhuahsan hnu chuan ka phone ka hum rauh rauh a, ka kut chalin ka thai leh zeuh ţhin a, rilru mumal put loh lai mah nise inla fing fahran khan thu ka ti tawp vel a, ka ţawng ve duah bawk si a, chuvang chuan min nghak tih hrereng chungin han biak mai pawh ka hreh deuh a, ka nu hnen aţangin Sangsangi chanchin hre fo mah ila 'In dam tawh em?' tiin message ka thawn a, a last seen lah chu status a neih hunlai vel daih kha a ni a, a online lo rei tawh khawp mai. 

Phone ka en ngun ve ber ţum a ni hial awm e! Ka en sek a, chhanna ka dawn loh chu thuhran, en pawh a la en loh avang chuan ka hnual leh rawih rawih tawh. 

Darkar tam fe ka nghah hnuah 'I dam tawh zawk em?' tiin min rawn chhang let a, tawi viau mah se mi â ang maiin mahniin ka nui vur vur ang ka ring. 

'Aw..ka dam ve zel e' ka ti a, thil sawi duah chak mah ila sawi tur a vang angreng si a, ngaihdam han dil ngawt lah ni theiin ka hre mang si lo. Ka thil tih kha awm ang lo deuh mah se a hunlai kha chuan min ţhawng ve em a, inthiam nachin chu ka nei ve tho. 

'Zanah ka lokal dawn nia' a rawn tih chuan ka thaw huai mai. Ka thil tih danah khan insawifiah a phut a nih chuan ka insawifiah thei dawn lo chiang sa a, ka ti dik lo tih tawp a ni mai. Kum25 em pawh ka la tling lo a, ani angin ka dawhthei lo a, mi tam tak ang thoin rilru a a thawh dana chet chhuah pawp ka ching ve zeuh zeuh a, tihsual ka nei ve fo mai ti ila ka sawifiah ber ang. 

A insawi ang tak takin zanah chuan a lokal a, ani pawh a hmel hmuh a lo nuam deuh tawh a, ngaihawm deuha min nuih pah hian ka bulah a rawn ţhu a, ka pa pawh kan epah rui deuhin a ţhu ve bur mai.

"I damţha maw?" tiin Zonuna chuan a be hmasa a, "Aw..dam a ni mai" hawisan hmak pah hian a ti a, a chhang ţha duh lo vel te chu ka ngei ngang mai. Zu hian a ei â tawh a ni ber a, lo biak ţhat duh loh chang leh ţhat luam chang a nei ţhin. 

"Zanin chu i leng chhuak nange?" a tih leh chuan "Chhuak lo chu a nih hi" tih ringawtin a chhang leh a, a bawp khawkherhin a ke a then hliau hliau a, a ngeiawm thiam ve khawp mai.

"Khawiah nge i nu a awm a?" tiin keimah zawk chu min zawt ta daih a, ka nutei te ina a len thu ka hrilh a, sawi tur ka hriat loh luatah in chungchang te hrilh vein "A len phei chhan pawh a ni leh ang. A phur tawh lutuk a" ka ti zui a. 

"A nih chu mawle..sa zo vat se a ţha dawn a nih chu" a lo ti a, kan in en a, kan hawisawn leh ţhin a, inhmuh loh vang vang hnua han inhmuh leh takah chuan ţhu dun reng mah ila a ngaihawm tho a, ka sawithiam chiah lo, be duh lo lui reng mah ila ka thlahlel a ni ber ang chu. Ani pawn sawi duh chu a ngah ka ring a, mahse ka pa a awm ve reng si a, che hlek ila kan lam a rawn hawi a, Zonuna tan phei chuan a ninawm viau ta ve ang. 

"Tunlai i inhralh ţha em? Eng nge i an a?" ti a min zawh chuan ka pa a lo hawi tel veleh tawh a, "Hralh thei em em lo nain ka hralh ve reng tho a, doctor kan neih hunah a zia ka ring" ka ti a, min chhang ta mai lo chuan ka pa zawk chu "Meizial i duh em? Ka nei a sin" tiin a zawt leh ta daih a. 

"I neih chuan zu ila" a ti a, tlemin a rawn hnai deuh bawk a, lungawi lohna eng emaw a neih chuan Zonuna awm laiin ti hian a lo awm ve tlat zel. Zanin chu a vei kual lo hlauh zawk a, a veikual vel kher ţhin chu ngeiawm ve duh tak a ni. 

A haw tur chu ka zui chhuak a, motor ngheng a kan din dun ren rawn hnuah keimah zawk chuan "Ka ţhianten naupangchhia min ti ropui sia, i ti ve tho ang a" ka ti fiamthu a, a nuam lo duh khawp mai. 

"Sangsangi chu a dam deuh tawh e..ka la chhang lo chein ka hria" a lo ti ve a, kan in en a, kan nui leh ringawt zel a, sawi mai tur kan hre lo dun lutuk chu thupui min chhawpchhuahsak tur tur awm se ka ti rum rum tawh mai a ni. 

"Ka thiam loh a nih kha. Khami ni khan thil thleng kha mak ka ti lutuk a, Kimkimi awmdan ka hmuh khan keimahah ka inchan a, ka inhmeh bel a, keimah nen ka khaikhin thul, khatianga thil ka ti rum rum mai kha Kimkimi hriatthiam ka tum lutuk vang nge tum loh deuha in ina ka hmuh leh tak vang tih pawh ka hre lo" tiin thupha ka chawi a, min chhan mai tak lohah chuan "Tlemin ka thinrim ve deuh bawk a ni maithei" ka ti leh a, ka thik tih erawh ka sawi lang tel duh lo a, khatianga Zonuna hmaa a la awm ngam kha hmuh nuam ka ti hlawl lo a ni. 

"I khawngaih a i haw tho bawk a nih ber dawn chu" a lo ti ban charh a, "I thik bawk a" a ti leh chiah chu a lam ka hawi rang khawp mai. 

Fiamthu hmel a pu lo a, a inrintawk hmel takzet zawk a, a thusawiah chuan a chiang viau a nih hmel. 

"Ka thil tih dan khan a ti thinrim che em?" ka tih chuan "Aw" a lo ti vat a, ka nui tawi tak mai.

"Thil ţullo lutuk i ti miau a, theihtawp ka chhuah lai lehnghalin" lawm lo aw ka tak hian a la ti a, min hau bawrh bawrh mah se ka dem bik hauh lo ang. 

"Hun i inpe kha a ţhat lohna a awm chuang lo bawk. I inngaihtuah harh theih phah a, tuma chimbuai lohin i dam thleng i awm a, a ţha viau alawm" a ti leh a, lungawi lo hmel phei chu a pu hauh lo nain a awka chhuak aţang chuan a vui ve deuh niin ka hria. 

"I thil tih ka hriat sak duh ngai lo che tih chu ka hre tho a, mahse a huangtau lutuk reng kha ngaihtheih loh chin ka lo nei ve ţhin a, lo kham ve ringawt tur ka ni lo tih hre tho mah ila mihring rilru hi chu a mak khawp, kan duh loh danin min hruai peng daih zel a" ka ti niah niah a, hmeichhe tan hi chuan insawifiah lo a ngawih mai mai a har ţhin. 

"A tawp vek tawh a, tun aţang chuan ka thusawi hi ring tawh rawh. Keimah min ring la, thil dangin a ti buai lo mai ang che. Tleirawl ka ni tawh lo ka tih ţhin kha, ka duh takzet che a, neih ngei che pawh ka duh" a ti tawl a, chulam chu mumal deuh hlek a sawipui ţhat leh ka duh zawk avangin "Hun thawlah khalam kha chu kan sawi dawn nia. Khatiang thil kha a thleng tawh lo ang" ka ti a, nu Hmangaihi tak pawh a zahawm alawm le. 

"Thutlukna i siam hmain ngaihtuah chiang hmasa ţhin rawh. I inchhir leh vat dawn tih hriain ka lo nghak hram hram che a nih hi" fiamthu ti tak deuh hian a ti a, a nui hmel ka hmuh takah chuan keipawh ka thawveng huai mai. 

"I inringtawk hle mai" ka tih chuan "Ka hriatchian vang zawk che a nih hi" a lo ti thuai a, ka rin ai nasain min lo chik ţhin a nih hmel.

"Naktukah kan inhmu dawn nia" tiin min kalsan a, a liam thlengin ka thlir a, a thinrim a lo insum hlauh chu a tihzia hle mai, ni lo se chu kan inhmu leh thei tawh kher lo maithei a ni. Keini aia upa hi chu kan tan a ţhatna chin tam tak a awm a, min hrethiam a, an dawhthei ţhin bawk a, inrualkhat leh lutuk leh hmeichhia aia mipa an naupan hian engtin nge an inkar buaina an hmachhawn ka hre chiah lo nain keini aia an upat hian a lo zia zawk dawnin ka hria. 

Mut hmunah ka inngaihtuah zui nasa a, thil thleng nghal rum rum tur ni lo mah se inneih thlengin ka ngaihtuah kai ve hial a, pasal lo nei ta ila ka nu a mal lutuk angem tih te, a tam mai. Hmeichhia hi chuan kan ngaihtuah kim em a, a kim leh mah mah ţhin emaw tih tur a ni. Nula senior pasal neih nachang hre tawh lo an tih te hi la naupang viau mah ila ka hrethiam ta khawp mai. Keipawhin ka ngaihtuah kim phei chuan anni phei chu a turu dawn lutuk. 

Kimkimi lah kha engtin nge a awmzui tak zel ka hre lo a, Zawmpuii takngial pawh a reh ve hmak a, ngaih an ti ţha lo lek lek zawk thei mai. 

Ka let ka let a, mutthilh theih loh chuan zan a rei duh khawp mai. Ka pa lah chu a hnar kuk kuk a, a ngaihţhat thlak letling phian. 

Zingah ka nu hnenah "Kimkimi a lokal ngai em?" ka ti a, min sawipui a tum pawh a duh ngai lo kha ka nia, a lawm hmel riauin ka hria.

"Kal ngai lo..a zak ve rih aniang kan tia. Buaina a siam vak hnu kha chuan Sangsangi kan tur takngial pawn a lokal tawh ngai lo. Zonunan a rukin a dang nge pawh kan hre lo. Tuman a hming kan lam ngai lo a, engtin nge a awm zel ka hrechiang chiah bik lo" tiin ţha deuhin min lo hrilh a, tunah chuan boruak danglam deuh hlek pawh awm leh se dawn sawn dan ka thiam viau tawh ang. 

Inlaichinna hi chu a chhiat vek tawh chuan siamţhat leh a har ţhin a, a khik tawh hnuah hi chuan ngai a awh leh har tawh ţhin a, chuvang chuan a chhiat loh nan a venţhat mai bakah thiam taka ven a ngai tih ka hre tawh. Zonuna nen a kan inlaichinna pawh a puitlin vangin a la him thei hram a, chuti chung chuan a chhe teuh viau tho mai.

"Tunah ka nei dawn tihna ni lovin pasal nei ta ila engtin nge i awm ang?" ka tih chuan min lo nuih var var pah hian "I pasal a zir a ni mai alawm" a ti a, ka hrethiam chiah lo chuan "Eng nge awmzia?" ka ti deuh hu a, ani lah chuan a thil chhuan lai a ngaihven zui daih a, a chawh zawh hnuah gas off in ka lam a lo hawi leh chauh a. 

"I pasal a fel chuan ka rilru a hahdam ang a, ka ngaihtuah lo bawk che ang a, ka thla a muang dawn a, i pasal a sual chuan a tih nat che hlauin thlaphang deuhin ka awm reng ang a, rilru nuamin ka awm hman lo ang. Chutiang chu a ni mai" a ti a, sawi belh duh a neih takin tiin ka ngaichang a, engmah a sawi belh tawh lo. Ka beisei ang a sawi lo chu ka hamhaih lek lek zawk a ni.

"I khua a har angem? Eizawnna lam te pawh?" ka ti zauh a, "Pasal chu i neih ngei ngei a la ngai dawn a, mifel leh nangmah ngaihsak tu che nei la a tawk mai" tih chauhin min chhang leh a, ka nu hi chuan a hma a sial lo ve ngawt mai. Nu rethei leh mawl mang tak mah nise a duh chuan amahah hian zir tur tam tak an hmu thei ang. 

Nilengin dawrah ka awm a, dawr khar dawn a kan dawr chhaka motor ding a hmuh chuan Rohluan a mit a siai zauh a, a motor hmuh ţhan tak a hmu leh chu kei ai mahin a lawm zawk a ang.

CONT...