DEAR DIARY-29

DEAR DIARY-29

"A nuam leh tawh awm ve" nui pât pât chunga Rohluan a tih chuan, "I ngaih em em chu a ni lo ang. Lo hlim lutuk rih suh" ka ti ve vel a, min chhaih loh phah chuang lo. 

"In in upat hleih viau lo maw?" bag a laptop leh charger vel khung mawlh mawlh pah hian a ti a, "Ka sawi peih lo zawk" ka ti hlak a, "Mi chuan ngaizawng se ninawm an tih tur chi aniang, kan inkar hi a dam dup reng a, boruak han san viau lai a awm ngai lo. Mahse ka zia nen a inmil phian a, ka ta tur tak ka chhar fuh ka ti mai" ka tih zawm leh a, a mawi lo leh dik lo zawnga min awmpui a tum ngai lo te hi ka duh nachhan pakhat a ni ve tlat. 

"A neitu tur berin i duh chuan a tawk mai alawm. Man ei tur list te kha siam lawk la" ti a min han chhaih leh chuan "Nasa lutuk suh aw..ka tel ve lo mai tur che a nia" ka ti kha kha a, kan nui dun zui hak hak a. 

"Rin aiin i hma daih..ka lo nghah zawk che ka ring a" motor a ţhut luh pah hian ka ti a, min chhang lem lovin eitur min lo pe a, chhuna ka ei bak la ei lo bawk a ka hawng nghal mawlh mawlh a, min thlah mawl tawp bak min lenkual puina tur a hre leh chuang lo ang. 

"I inhralh ţha em?" a ti leh tawh a, ka malchungah tui a rawn dah zui zat bawk a, a tlan chhuah nghal avang chuan tui chu a tlak hlauin ka hum bet a, nuih deuh pah hian "Min zawt ve ziah" ka lo ti a. 

"A pawimawh alawm. I inhralh ţhat hun ka nghah char char hi" a lo ti fiamthu ve vat a, ka hausak hun chiaha neih ka tum miau a ni, mahse, ngaihtuah chian chuan Rintluangi sawi ang deuh kha a ni, hun a duh rei khawp ang. 

"Vawiin chu ka inhralh miah lo. Ngaih ang ngawt a awlsam a lo ni lo a, bungraw ngai hlir a nih phei chuan a en ţhin tu te hi hemi veng hi an ni bawk sia" ka ti nang nang a, min fuih tu zawkah a ţang leh a. 

"I inngaihtuah fim ta bawk a i thil hriat fiah loh ho ka hrilhfiah ang che. Ka ţhianpa te dawrah kan chawl haw dawn nia" a tih chuan Pu Sena te dawr a ni tih sawi lo mah se ka hre nghal a, ka thawh lai pawh khan kan inkhar har ţhin a, tunah pawh a la ni tho ang. 

"Pu Sena a awm dawn em?" ti a ka zawh chuan "Awm lo ang" a ti a, a nih te chuan Faktea hmuhna remchang a ni dawn a, a ţha phian mai. 

Zonuna nen a dawr chhunga kan inzui lut chu Pi Awmpuiin min lo dawng sawng a, mak ti hmel a pu hauh lo chu a mak hran lo. Mi kâ aţangin kan inzui tih hi a lo hriat ve na a rei tawh ang. Thudik lo a hriat avangin min ban ta kha a nia, kha thil kha a hrefiah ta em ka hre chiah lo. 

"I dam em? I hahdam deuh tawh a ni maw i hmel hmuh a nuam tlat" a lo ti luam a, lawm lo hmel a pu tawh lo a, Zonuna awm vang nge phei chu ka hre lo.

Kan ţhut fel hnu thlengin Pi Awmpuii leh Zonuna te chu an la inbia a, an ti ti kar lakah chuan "Faktea ka va hmu lo ve" tiin ka lo inrawlh a, choka lam kawh zeuh pah hian "Choka ah a la awm ang" a ti mai a, ka ei duh zawng te chu min zawt zui a, helai hmunah hian ka kal nawn leh tawh ka ring ngai lo kha a nia, mihring hi chu rin loh dan deuhin kan awm nawlh nawlh reng mai. 

Pi Awmpuii kalsawn hnu chuan, "Thu ka ti tawp ka tih khan Kimkimi ni lovin a nu leh pa zawk ka bia a" tiin bul a ţan a, "Ani ringawt chu ka hrilh zing tawh a, awmzia a awm tak lohah chuan a nu leh pa te hnenah ka hrilhfiah a, ţha deuhin kan ti ti a, an lo hrilh chhawn dan a dik lo deuh a ni maithei, kha kha a rawn thinrim pui ber chu a ni" a tih zawm leh a, ka hriat vek ţul a ni ve tawh aniang a hel a hel ta bik lo. 

"Damdawi a lo ti ve ţhin reng em ni?" ka tih chuan "Aaa...anxiety ka nei a tia, doctor a pan ţhin a, an damdawi chawh bak lo ei chang a nei ţhin a" a ti ban charh a, mak ka ti lem lo. Tunlai khawvelah chuan kan rin loh deuh, nutling deuh tawh a kan ngaihte pawh hi an lo buai ru ve tho ţhin. 

"A nih chu mawle..a ţha ve zel ang chu maw. Ka thiam loh a ni ve tho a, khalam kha chu sawi tawh lo zawk ang" ka tih lai chuan ka kut chu vuanin a hum vang vang a, kan innuih leh thei tawh a, kan boruak a inthlak hlawk a ni ber. 

"Engmah a awm tawh lo tak tak a, ka sawi fo ang khan ka chhungte pawh ka hrilh chiang viau tawh a, mahni a fa enkawl ka ni a, buai chang ka ngah a, hun nei lo viau mah ila i tan hian hun ka insiam ve ţhin a, a la tawk lo a nih chuan" a tih lai chuan ka lo pawt chat a, "A tawk lutuk alawm" ka lo ti vat a.

"I tumna hrim hrim pawh kha a lawmawm a, i buai deuh a nih pawhin ka hrethiam che alawm. Engkim ka hre lawk sa vek a, khalam kha chu lungkham duh suh. Hmanni kha chu diktak a sawi chuan ka rilru a buai ve em a ni, pangai deuha kan awm laiin khatiang thil kha a thleng thut a, mahse, ka hre tawh a, a thleng nawn tawh lo ang" ka ti mawlh mawlh a, kan tih sual ve ve kan inhriatsak mai bakah a mimal ang ve ve pawn kan tihsual kan hrechiang a, kan siamţha bawk a, chu bak bak a awm chuang lo. 

"Nei tur che hian engtia rei nge ka la nghah che ngai dawn a?" a ti chu tum loh deuhin ka nui chhuak a, ka hausak har tur zia chu ani pawh hian a hrechiang viau ang. 

"Ka dinhmunin a zir lo em a, i hre vek tho bawk a, diktak chuan ka nu hi ka ngaihtuah a" ka tih chuan a lo bu nghat a, a hmel landanah erawh engmah ka chhiar thiam lo. 

"Pasal ka neih daih chuan an rethei dawn lutuk a, ka nutei te inah chuan awm thei dawn mah se kei ka awm loh chuan a damchhungin rim deuhin hna a thawk dawn tihna a ni mai a" tiin ka thiam danin ka sawi a, puih zawm zel ka duh tih chu a nuam bik miah lo. 

"Ka hnenah pawh awm la i nu chu i ngaihtuah tel thei tho alawm, i pui reng thei a" tiin amah zawk chuan a lo sawichhuak a, eitur an lo dah takah chuan ka kut a vawnna pawh chu a thlah a, Faktea ka lo zawng lehpek tawh. 

"A nih tho rualin tam tak chuan an remti ţhin lo a, ka nei ve uk ang a, ka ngaihven leh theih si loh te ka hlau a" ka ti a, hmanah Nu Hmangaihin U Mami a zilh lai ka hre fuh tawh a, chu chuan min ti dim ti ila a dik lo hauh lo ang. 

"Dinhmun a zir a ni ve a, chu loah chhungte chu tuman kan hlat tak tak thei ngai lo. Hlat tura intih ngawt chi a ni lo a, a tawk chin erawh hriat a ţha ve a" a lo ti a, ngaihdan hran ţheuh kan nei a, ţawng sual palh te pawh a hlauhawm. 

"Nia..pasal neih hnua mahni in lama kal sek hi dik ka ti bik lo, mahse, keichuan ka nu ka ngaihven a ngai a, chuvanga sawi chhuak pawh chu ka nia" ka ti sap sap a, ka ţawng zawi sawt khawp mai. 

"Ka khap lo ang che. I ngaihven zui zel thei ang. Dinhmun a inang lo a, i dinhmun angah chuan a ngai alawm. I remtih phei chuan keiman ka pui thei bawk ang a, i hahdam zawk maithei a ni. Amaherawhchu, ka nawr lui dawn chuang lo che a, i inpeih hmain min nei rawh ka tihna a ni lo. I rilru inpeih inpeih thlap hunah min nei la, kan ţang dun ang a, i nu pawh kan pui thei ang, kan pahnihin" nghet charh hian a ti a, a thutakin a thusawi chu a ti mai mai lo tih a hriat a, keipawh tlem chuan ka rilru a zangkhai ve ta deuh.

Kan ei zawh hnuah pawh kan la ţhu ta reng a, chawl ve dang pawh an awm tawh lo. Pi Awmpuii lahin "Choka kan ti fai a, vawiin chu kan tlai ang" a ti a, thawk tu te ho pawh an la awm ţhap mai. Rawn chawl lut an awm zeuh zeuh reng phei chuan inhawn rei hian a hlawk a ti ţhin a, hotel nen an kawp bawk nen, haw tlai chang kan ngah mai. 

"Ka lo ngaihtuah ang. Ka nu puih zel i remtih chuan ka nghah rei tir lutuk bik lo ang che. A nih loh chuan hausa deuhin pasal tar deuh ka nei palh ang" ka ti fiamthu a, a duh lo ve nasa mai. 

"Ngaihtuah i ngah a, min pui ve turin ka phut kher lo che a nia. Keiman ka puih zui zel theih dawn phawt chuan chu ringawt pawh chu a lawmawm a, thutlukna siam nghal rum rum erawh ka duh bik lo a" ka ti ve tlat a, min hnial lem lo. 

"Inneih tawh chuan inpuih tawn loh theih a ni ngai lo. Ţan dun hian thil a awlsam zawk ţhin" a lo ti ve khauh a, zawh duh nei si hian ka en leh ţhin a, ka zawt lawk ngam lo deuh a, ka awmdan chu a hrethiam aniang amah zawk chuan, "Min zawt la" a lo ti a, kan bulah hnaiah mi an awm lo tih ka chian hmasa te te a, chumi hnuah "Min duh tih i sawi a, ka hre bawk a, min hmangaih tel em?" ka ti tawl a, ka hriat chak si, zawh harsa ka tih ţhin a ni. Mahse, hmeichhe tan chuan hriat a nuam ve ţhin a, sawi chhuah erawh a harsa khawp mai.

"Ka duh che a, neih ngei che pawh ka tum. Hmeichhe dang ka ngaihven lo a, ka nu hnenah i chanchin ka sawi a, englai pawn ka rilru ah i awm a, ka ngai che a, i bula awm reng ka chak ţhin a, buai chung chungin i tan hun ka insiam fo a, i hausak hun thlenga nghah che ka inhuam bawk a, ka hmangaih che tihna a ni mai lo mi?" tiin min zawt let a, ka lo nui a, hriat a nuam hle mai. 

"Ka hmangaih che alawm Remruat, i rin aiin a thuk daih maithei a ni" ngaihawm deuh a nuih paha a tih chuan ka thinphu a lo rang ve ringawt a, "I sawi ngai si lo a" ka ti leh ţalh a, naupang tak hi chu min ti tawh ang ka tih laiin "I hriattheih turin ka lantir a, i hmu thiam lo a nih kha. Kei leh ka thil tih aiin ka chheh vela mi ten i rilru an la zawk a, tunah chuan ka sawichhuak tawh a, hmangaih tu i nei tih i inhrereng thei tawh ang" a ti zawk a. 

Kan haw dawnah Faktea hming ka lam leh a, Pi Awmpuii chuan "Han ko teh u..Faktea kha choka ah a awm a, lokal tir lawk teh u" a ti lang lang a, Zonunmawia bawk chu ko lehin kil khatah a bekbawr sar sar a, keiin Faktea ka lo nghak thung. 

"I lokal elo?" a rawn ti nghal hlut a, choka tifai a ni bawk a a thawmhnaw a balin amah pawh a pawr fap mai. Ka lungngaih ni a min kawm hlim ţhin tu a nia, keini ai daiha an rethei chung pawhin min tih hlim tumin ka lawm zawng lapaw chini min lei sak ţhin a, ka tan chuan a hlu takzet a ni. 

"I hre nange? Ka lokal na a rei tawh alawm" ka tih chuan "Hre miah nang. Lokal teh..hmuh i nuam hle mai" a ti a, Zonuna te din lohna lamah chuan min kai phei a, ka inthlahrung deuh hlek a, Zonuna ka en chuan "Ka lo nghak ang che, hmanhmawh suh" a lo ti a.

Kawngka bul chiah bang lamah min ţhutpui a, engmah a sawi hma hauhin sawi tur a ngah zia ka hre thei.

"In inzui reng tawh tihna mi?" ti a min zawh chuan "Inneih thlengin kan sawi tawh mawle" ka ti a, ka nui var var a.

"A lawmawm hle mai. A chhungte an fel em? Harsatna an siam lo che maw?" a tih chuan "Aw, an fel lutuk. Ka vannei tak tak a ni" ka ti thei tawh a, a lo bu nghat a, a ngui bur mai chu ka hrethiam lo takzet a ni, a hlim theih tehlul nen. 

"I ţha maw? Thil danglam deuh hlek thleng a awm em? I pi a dam em?" ka ti sawk sawk a, za lo deuh hian a ţhen suk a, lu a thing zui a. 

"Ka pi chu a dam a, bialnu ka nei ve a" a tih chuan "Chu te chu a lawmawm lutuk alawm. Ka phone number te pawh i nei a min rawn hrilh ve tur che a nia" ka lo ti ve vat a. 

"I ngaih ang a ni lo ang. College naupang a nia, dawrah hian an ţhian hoin an rawn chawl ve ţhin a, a ţhiannun ka phone number min rawn dil khan ka lo pe ve mai a, min rawn be zui a, ka duh zawng chi tak a lo ni nen, kan inkawp zui chu a ni mai a, mahse an ina ka len hnuah engkim a danglam vek a" a tih chuan "Eng nge thleng?" ka lo ti thuai a, sawi harsa a tih hmel khawp mai.

"An hausa lutuk a, kei lahin thawmhnaw ţha hak tur ka nei ve mang si lo a, a nu'n min hmuh rual khan ka hausak loh zia a hrethiam nghal aniang, harsatna an siam zui a, tunah chuan college pawh a kal tawh ngai lo" a ti a, "Khai a" ka lo ti hluai a, tawi te hian min lo nuih leh a, "Khawiah nge a awm tak? A college luhna a sawn em ni?" ti a ka zawh leh chuan lu thin pah hian "Ka hre lo" a ti a, an inbiak tawh ngai loh thu te, a biak tlang theih loh thu thlengin a sawi zawm a, a ţhiante takngial pawn engmah an hrilh duh lo a ni awm e. Ka khawngaih veleh chhawng khawp mai. 

"Phuloh ka chhai palh a" tiin a nui zui hawk hawk a, a nui hmel chuan a mit a thleng zo chuang lo.

"Nangmahin tuar reng mah ta che. Mipa i nia, a theih chin chu mahni a tawrh dam i tum dawn tih chu ka hre tho a, mahse mipa pawh hian tawrh theih loh chin in nei ve tho a, min lo hrilh ziah rawh. Pui thei lo che mah ila ka awm reng tho dawn a nia" tiin ka hnem ve a, ka hawsan tur pawh ka hreh khawp mai. 

Pi Awmpuii phalna in motor dahna thleng a lo kal ve a, "Hman veleh ka lo leng dawn nia. I thawmhnaw zawrh pawh chu ka dawr ve ang che. Ka pi hak tur awm te i zuar em?" a ti a, ka zawrh thu a hriat chuan "Thlaleh hi a piancham a nia, engemaw tal tih sak ka duh a, ka lokal ang" a ti nawn leh a, a u erawh a la insiamţhat loh thu a sawi tawh a, home ah an dah a, a tlanchhuak a, ka fel tawh dawn ti chung rengin a ngaiah bawk a tlu leh a ni awm e. A vanduai ve khawp mai. 

"I ţhianpa em ni?" ti a Zonunan min zawh chuan "Ni e..kan thawk dun ţhin a, kei aiin a thawk hmasa zawk. Kan inhriat hlim chuan a inla ngeng a, kan inkawm thei lo reng a, zawi zawiin kan inkawm chho a, tunah chuan ka ţhianţhaber tiin ka chhal ngam tawh ang" tiin phur deuhin ka chhang a, thil dang ka sawi tel lem lo. 

Kan inthlen hma deuhah dingin bawm tereuhte a phawrh a, a dah ho mai bawk sia. 

"Ka leina a rei tawh" a ti hmasa te te a, hawng lo mah ila a bawm a mawi danah a chhunga awm tur awm chu ka hrethiam thei. 

"Tuna bun pawh a ngai chuang lo" a ti leh a, zungbun a nih ka ring reng a, bun chi dang a leng thei lo hrim hrim. 

"Thutlukna i siam hunah bun la, i sawi kher ngai loin ka lo hre thei ang" a ti a, dangdai ve tak chu a ni. 

"Keimahin ka bun ang maw" ka tih chuan "A ni mai ang chu" a ti a, ka nui tawp. 

"Ka zawh reng che chuan i ning dawn a, nangpawn sawi chhuah leh ţhin i hreh ve maithei a, bun tawp mai rawh" tiin a sawifiah ve ngial a, hmuchak tawh viau mah ila a awm lai chuan ka hawng ngam bik lo. 

"Ka bun tawk ang maw?" fiamthu deuha ka tih chuan "I kut ka vuan ngun a, i bun tawk chu ka hria alawm" inringtawk tak hian a ti a, ka chhuk hma chuan ka tukhumah dawmin ka chal a fawp vang vang a, zungbun bawm tereuhte, mawi deuh si hum ran chung chuan ka haw a, Rintluangi ka hrilh chak tawh takzet a ni. 

In ka thlen veleh ka nu min biakna pawh chhang ţha mumal hman loin pindanah ka lut tlang a, zungbun bawm chu ka hawng a, a mawi khawp mai. Silver a nih hmel a, a mit pawh a mawi lutuk tlat. 

Ka bun chhin a, inringtawk viau mahse tlem chuan ka thawl deuh a, ka kut chu lek kangin ka en vang vang hnuah thla ka la a, ka ţhiannu ka thawn a, bun reng chak viau mah ila bun hun a la ni mang si lo a, ui ru deuh chungin ka khung ţha a, ka pa'n a hmuh loh nan ka u thawmhnaw ka khung khawmna thingrem chu ka hawng a, thawmhnaw kara ka dah mai bakah tala in ka kalh leh thlap a, ka fimkhur loh chuan zu manah a lo hralh leh duh mai ang. 

Ka inbual zawh hnuah chaw kan ei a, ka mut luh rualin ka ţhiannu chuan min rawn bia a, "Message kha en ta che..a tam tawh viau ang" a rawn ti nghal a, "Ka buai deuh a" ka tih chuan "Inneih puiah a sawm tawh che em ni? Zungbun a pe thlap tawh che maw? A va han che rang em em" a rawn ti zung zung a, a phur hmel khawp mai. 

"Tunah chuan ka phelh leh tawh" ka tih chuan "Engati nge? I nei duh lo tihna mi? Thil thleng a awm em ni?" a rawn ti leh zat zat a, pawi a tih hmel viau mai bawk. 

"Ka sawi dawn alawm. Ka bun nghal thei lo a, amah neih ka remtih hunah chauh ka bun ang. Chu chu a duh dan a nia, ka bun chhin mai mai a nih kha" ka tih chuan a nui ta kar kar a.

"I bun veleh palai a lo tir dawn tihna em ni?" tiin min zawt zui zat bawk.

"Dawn lo e..ka nei rum rum thei hleinem. Ka nei duh ngei tih hriat hrim hrim a duh aniang chu. Ka leina a rei tawh e chu a tia, buaina neuh neuh a awm ve reng a, min pe lawk lo aniang. I remtih hunah bun tawp mai rawh min ti alawm" ka tih phei chuan a nuih a za viau tawh a, "A ţha lutuk alawm. Tikhan inhualna angah ngai mai rawh. Fa in nei nghal dawn lehnghal a" tiin min fiam zui a, a phur nasa mai. 

"Rohlua hian in veng awmna te, i chanchin te min zawt leh ţhin a" ka tih chuan "Awii...khapa kha facebook ah min lo bia alawm. Ka thlalak a lo edit a, gas bur chungah ka lu a dah a, a tawpah ka ke pahnih a dah leh a,ka ngei a nia, ban thlengin a siam sak mawle" a ti hlak hlak a, kan nui dun hak hak a, kan inbiak reng hnu chuan Zonunmawia bawk a sawi kai leh a, "Ka lawmpui che e. A inhawn viau phei chuan a ţha lutuk. Hmelţha viau mah se a upa tawh a, pathlawi a ni bawk a, nang aia ţha chu a hmu bik teuh lo mai. Inringtawk la, insit duh bik reng reng suh" a ti a, min fuih zui mawlh mawlh a, "Ka hre lo ang che tih ka hlau" ka ti leh rih ţhin a, ani lah chuan "Min biak that duh ngai tawp loh kha a" a ti a, ho mai mai sawiin kan inbe zui reng a, darkar khat chuang daih a ni. 

Zonunan min lo video call ve mial a, ka lang ţha ngam lawk lo a, Sangsangin min rawn koh takah chuan ka lang ve ta nge nge a. 

"Lo leng la, ka dam vek tawh" a ti a, a rawn ang vak a, "Kha, a dam tawh" a rawn ti leh a, "A va lawmawm ve...i ţap hliam hliam tawh dawn lo a ni maw?" ti a ka fiam ve chuan a hmui hup chung hian a nui a, a ţha reuh tak tak a ni. 

"Anu hi a induh e a tia" ti a Zonunmawian min rawn fiam chuan "I zak lo e a" ka ti hlak a, a pa awm bawh deuh chung hian Sangsangi pawh a lo nui ve a, kei ka lo zak leh em em tawh thung a, "Anu a nih hi...anu ti tawh rawh aw" a tih leh vel phei chuan ka lum deuh pap pap thei hialin ka hria, min chhaih lai hneh khawp mai. 

"In va mu har ve" ka ti ta daih a, "I biak theih hun kan nghak a" an lo ti a, an pafa chuan min en ran a, "Rintluangi nen kan inbia a, kan sumdawnna thil velah" ka ti ve zaih a, vawiin a thil thleng vel kan sawi nasa a, ka sawi chhawn chu a ring maithei a ni. Hmeichhia ka ni miau a. 

"In hlawk bik dawn hle mai nangni chu" a ti a, naupangchhe chei a min chei chang hi a nei deuh ţhinin ka hria. 

"Inhralh a har alawm" ka tih lai mekin ka nu a rawn lut a, earphone ka hmang si lo, "I va ţawng rei ve..tu nge i biak?" tih leh ka phone en a rual a, engmah a sawi hma hauhin Sangsangi chuan "Api" a rawn ti lauh a, nui var var chungin a rawn kawk pah bawk a, ka nu pawh a phur nghal sarh mai. Mahse, Sangsangi a fiam zeuh a, min chhuahsan lehnghal a, rei kan inbe zui bik lo. 

Ni a liam leh hnu pawhin ka nu hnenah engmah ka la sawi lang leh lo a, sawipui chu a ţha ti viau mah ila ka zam tlat a, palai an rawnkal nghal dawn tihna pawh a ni lo a, nu te meuh han sawipui chu a nuam chiah lo. 

Thla a liam leh hnu pawhin zungbun ka la bun chuang lo a, kan inhmu fo tho a, inhriatthiam lohna kan nei tawh ngai lo a, kan tluang leh lutuk chuan ngaih a ti ţha lo lek lek zawk. 

Zana lo len chang a nei a, ka hnathawk min ko hruai zeuh zeuh bawk a, zungbun ka bun lawk loh avang chuan lawm lo ang pawn a awm chuang lo. 

Zan rei deuh tawhah ka phone riin min ti harh a, Zualtea a lo ni. Dar12 a ri tawh a, ngaihţha vak lo chunga ka la chu "I dam maw?" a rawn ti a, a ri luih luih a, a bengchheng khawp mai. 

"Khawiah nge i awm a?" ka ti nghal a, a lo nui hawk a. 

"Thawm i hria a ni maw? Ka ţhianpa piancham kan lawm a, hei tunah hian ni thar kan kai chiah a, mahse kan la lawm tho" a rawn ti a, a rui deuhin ka hria. 

"Zu i in em ni a?" ka tih chuan "Tlemte chauh" a ti a, a inthup lem lo nain tlem chu a ni lo tawp ang. Lehkha a zir reng emaw tih laiin hetiang thil hi a lo ti tel leh ţhin a, a thiamtheiin a zirlaiah a tluang em em tho bawk si, hepa pawh hi a mak ve khawp mai.

"Tunlai in tluang em?" ti a min rawn zawh chuan "Aw tluang e" ka lo ti vat a, a hming sawi lang lo mah se Zonunmawia a sawina tih ka hria.

"Engatinge min lo biak ve nawlh a?" ka tih chuan "Ka ngai che a" a ti a, ka ngawi ta daih a.

"Be lo tur che a ka insum nasat ţhin zia i hre pha tawp nang" amah bawk chuan a ti leh a, "Ka ngai che a, i bulah khan ka hlim a, mahse, nangchu mipa dang bulah i hlim zawk a. Rilru a nat rualin i hlimna khan min ti hlim leh a, ka hmang ţangkai che a nih chu. I hlimna kha ka lo ţawm ve char char che a, chuvang chuan hlim reng ang che inhnuainu" a tih zawm zat a, thawm dang a zia deuh a, a kalsan ve aniang. 

"Ţha deuhin zir rawh aw" ka tih chuan "Ka chak chu maw..hmun zau deuh nei ila, vawk leh ar vulh ţeuh bawk ila, farm siam ka chak" mumal lo deuh hian a rawn ti leh a, "I tui loh na lamah i kal daih a ni maw?" ka lo tih chuan "Ka nu tui naah ka kal. Ka pa aiawh zo tu ka nih a ngai a, ka nu tui naah ka kal a, ka pa zir ţhinna ah ka zir a, ka naute rin ngama ka awm a ngai a, i hlimna ka ţawm a" a ti duah a, han sawipui vak tur pawh ka hre ve lo. 

"Ka hlim avanga i lo hlim ve zel a nih chuan hlim char char ka tum dawn nia" ka ti ta ringawt a, "Umm..a ţha. I hlimna tur apiang ti rawh. I hmuh phakah awm lo mah ila i lam ka ţang reng a, ka awmna hmun aţang hian i thil tih apiang kha ka lo thlawp zel che a nia" a ti a, lawmthu te ka hrilh ta vel a, kan inbiak tawp dawnah chuan "Min lo ţawngţaipui ve ţhin la aw kei misual hi" uang zet hian a rawn ti a, nui dun hak hak chungin kan inbiakna chu kan ti tawp a, ka laka a rilru put hmang a la danglam lo tih ka hria a, khawngaih chang ka ngah mai. Mahse, duh dang nei reng chunga a kianga ka awm a nih chuan nuam a ti thei tak tak chuang lo ang.

Rintluangi nen kan buai ve map map zel a, hun lah hi a liam duak duak a, hmasawn pur pur a har bawk si, kei takngial pawh ka hnual ve fo a, ka ţhiannu fuih zeuh zeuh a ngaih avangin ka phur lui ţhin thung a, kan chakna leh chak lohna a inang lo a, kan infuih tawn ţhin a ni ber.

A hmunin a zir bawk a dawr luahman chu kan pe thei ve zel a, a patea pawh tlem tlemin kan rul ve reng a, hlep kan la nei ve mang lo ti ila a dik ber ang. Kan pawisa a ti chu ni ila kan zia ve deuh tawh ang a, ba rulh tur nei sa a ti kan nia, a hahthlak lam hret chu a ni. 

Rintluangi nen kan inbiak mawlh mawlh laiin zungbun ka phawrh a, kan inbiak zawh hnuah pawh ka la en zui ta zel a, ka duh a, ani pawhin min duh a, kan kara tlakzeh tum an awm tawh lo a, inneih hial kan sawi kai tawh a, lo bun ta pawh ni ila tuman min sawisel hauh lo ang. Nei nghal rum rum dawn lo mah ila ka tan a pawimawh ve zia a hriat nan tal ka bun sak a ngai a ni. Ka tan hian a hlu takzet a, ka duh em em a, ka duh zia ka sawichhuak thiam lo hial zawk a, ka hming pawh ve hma hauh aţang khan ka lo hlimpui tawh a, keimahah a cham veng veng reng kha a nia, englai pawha mipa dang aia ka thlan ţhin ka la thlan leh zel tur a ni. 

"Pathlawi pawh nise duhzawng an nih chuan vei an lo awl dawn a nih hi a" zungbun en vang vang chung chuan ka ti a, ka bun ta nge nge a, zungbun nalhna ai mah chuan ka thinlungin a thlan a nihna hi a hlu zawk. 

Ka insiam zo ka chhuah chuan ka nu pawhin a lo hmu aniang ka chet vel lai chuan ka kut a melh leh zeuh ţhin a, engmah phei chu a sawi lo nain dodalna a nei hran lo chuan ka hria. 

"Ka lo sawm ang che" a tih avangin Zualtea te inkawtah ka lo ding a, Zothani lo chhuak chuan min be luam a, "Ka phone cover thar hi a nalh em? Ka dawn a nih hi" intithei zet a a tih chuan fak luam pahin ka lo khawih chhin a, ka kut a rawn man tak thutah chuan ka phur nasa kher mai.

"Awii..zungbun thar i nei elo? Ehe..i dawn a ni chiang mai. A van nalh reuh, ka hrethiam mai" a ti nghal bawrh bawrh a, ani hi zawng, Rintluangi ang deuh a nia, a ţawng reng zel. 

"Ka chhar a nih hi..thawmhnaw bawm a mi a nia, ka nu a nih loh pawhin ka u ta aniang" ka tih chuan a kokia min nawk salh pah hian "Ka awih lo aw...lo leng ţhin pa khan a pe chiang che" a ti tlat reuh a, hmeichhia hi chu kan ngaihven zawng a ho a, tlereuh inbel ngai hlei loin zungbun ka bun thut a, chu chu a hmu vat a, a ngaihtuah zui chiam chiam a, a la sawi dik em em zui. 

Motor a ka ţhu lut chu ka malchungah bag ka dah a, bag ka dawm beh rual chuan a lam ka hawi a, min rawn en vein ka zungbun pawh chu a hmu tih ka hria, "Kal nghal ang aw" pangngai deuha a tih hnuah a tlanchhuak a, hmalam a hawi tak hnu chuan a nui vur vur a, a hmu chiang alawm. 

"Ka rualin i haw dawn em?" ti a min zawh chuan "I rawn kal kawi hman leh hman loh a ni mai" ka lo ti var a, "I tan chuan hman e" tih pahin min rawn melh zawk a, hmalam hawi leh pah hian "Zungbun chu i inhmeh hle mai" a ti ve ta nge nge a, nui var var chungin ka bag pawm lai chu ka vuan nghet sauh a, ani pawh a hlim zia hai rual a ni lo. 

"Ka kut tiat i hriatchian tehreng nen ka thawl deuh a" fiamthu a ka tih chuan, "A tawt chu a hrehawm lutuk ang ka tia" a lo ti ve nghal zat a, a din apiangin ka kut a rawn en ti ila ka sawi sual lo khawp ang. 

Dawr ka thlen chuan a ţul ang ang ka ti nghal zung zung a, Rohluan min lo thlen khalh a, thawmhnaw a lo dah chhuak tawh a, hmun ka phiah laiin tlaia doctor rawn hmu duh, hming inziah tir tur a rawn kal a, chu chu ka lo buaipui leh a, thil dang tih tur em em a awm chuang lo. Doctor a awm hnu pawh hian U Marti hnena ka thawh lai ai chuan ka hahdam daih tho. 

"Sir Zonuna chu a hlim awm vur vur hle mai" ka ţhut fel hnua a lo tih chuan "Engati maw?" ka lo ti ha a. 

"A hlim deuh hlek hi chuan kut a rawn vai zauh zel alawm. A rawn thlah apiang che hian a let lam thleng hian ka lo en ţhin a, ka tana kut a vai chuan a hlim tihna a ni mai" a ti a, nui pat pat chung hian ka lo bu nghat nghat a, a hlim khawp ang. Keipawh ka hlim alawm. 

CONT..