DEAR DIARY-LAST CHAPTER

DEAR DIARY-LAST CHAPTER

"In sawifel der tawh maw?" Rohlua mak ti hmel chuan min ti nui lek lek a ni. Engmah ka hrilh lawk lo a, ti hian a chian hnuah chauh ka sawi a ni mai a, hmuh thiang lo hmu ang mai a ni.

"A ni mai ang chu. Ka neih khalh dawn che a nih hmel" bu deuh nghat nghat chunga ka tih chuan a lo thaw hawk a, a mak ti hmel pawh a la bo chuang lo. 

"Ngati rum rum nge?" a ti leh ang lawi a, ka ţhutna lama ka kal hnu chuan dawhkana ban nghat chung hian a rawn inher a, "A rei ve tawh alawm. I tana ţha tur i ti ziah a, a hun a thlen meuh chuan ngati rum rum nge i ti leh a" chhuahchhal awka deuh hian ka ti a, ka thin erawh a rim hauh lo. 

"Min hrilh lawk lo a, min ţhawng alawm. Hetiang te chu inhrilh lawk tur a ni ngai. I bula awm tam ber ka nih hi aw" a ti bui bui a, ka nui chhuak ta nge nge a. 

Kan ti nek nek a, kum a lo vei ta reng mai. Zonuna nen pawh kum khat ai tam mah kan inzui tawh a, kan inneih hun tur nen lam kan sawi fel der tawh. Ka nutei chuan a hma mah mah min tih sak a, mahse ka nu ka puih theih dawn tho chuan ka duh ber neih chu pawi ka ti hran lo. Ka pa erawh thla ruk kal ta khan a boral tawh a, a ţhianpa te inah a riak a, a ţhianpa nupui fanaute kan inah an rawn riak ve thung a, ka pa te ţhiandun zuin an ngaihtheih loh vang a ni. Zingkar hma takah a ţhianpa chuan mangang thlabar takin min rawn kaitho a, ka pa a kaihthawh theih loh thu min rawn hrilh a, ka nu beidawn nan tal tiin damdawiinah kan kalpui a, awmzia a awm tawh lo. A ţhianpa te inah a muhlum a, chu chu kan sawi reng tawh dan tur a ni. A taksa a chak tawh lo a, doctor ten zu in tawh lo turin an hrilh ngun viau a, mahse, a nghei thei mang si lo a, a taksain a zo tawh lo a ni ber. 

A lungchhiatthlak a, inhau ngun viau mah se ka nu phei chuan a tuar thiam loin tun thleng hian a khawhar zia a la sawi ţhin. Keipawn ka lo duat tawk lo a ni aw tih vang vang chang ka ngah a, inchhir a sawt tawh der si lo, ka tlai tawh lutuk a ni. Ka sawi duh ber zawk chu, kan nu leh pate hi eng mi pawh nise theihtawpa kan duat a ţha khawp mai. Mihring chin hriat a ni lo a, nunna thuah lah thuneihna pakhatmah kan nei lo, zan khat mitchhin tawk thut thei vek kan nia, an thih tawh hnua inchhir hian awmzia a nei loin hrehawmna min thlen tu mai a ni. 

Ka pa thih hnuah ka nutei te inhnuaiah kan insuan lut a, in thar a luah ve hman lo chiah chiah tihna a ni. Ka nutei pawhin 'ka lo huphurh ţhin lutuk a ni' a ti leh ţhin a, inchhirna tur nei lo awmchhun chu ka nu chiah a nih ka ring. 

Kan boruakin a zir loh deuh avangin Zonuna pawhin min nghah a inhuam viau a, mahse ka nu'n fam ngaih te chu a reh tak tak thei hleinem a ti deuh tlat a, min nawr lui hauh lo nain ka upat hmaa nei turin min duh ni berin ka hria. Kan veng a inhnaih a, Pi Hmangaihi nen ţhianţha tak kan ni bawk a, chhungkuaa kan insiam phei chuan kan inpawh lehzual sawt dawn a a ti ţhin a, 'i hahdam deuh tawh ang a' tih hi a sawi ngun ber ţhin. Ani pawh a hah ve tehreng nen ka hah hian hrehawm a ti tlat zel a, an sual lo ve ve bawk a Zonuna nen pawh an inmil khawp mai. 

An inah a thawk tawh bik lo a, inah chawhmeh a zuar a, ka nutei te hi kawngpui anah an awm bawk nen, vengchhung miten an hre laklawh tawh a, ka pa boral hnuah phei chuan an khawngaih aniang an rawn lam ve reng a, in luahman chawi a ngaih tawh loh avangin kan hausa hauh lo nain eikhawp chu kan thawkchhuak ve. 

"Sir Zonuna pawh chu a va inzep thei ve a, ka u pawn engmah a la hre lo a ni phawt ang a" Rohlua chuan a ti leh ţhin a, min rawn ţhut hnaih a, rin ang ngeiin "Pawisa khawl i nei em? Ngaih loh lamah ngai lo la, puih i ngaih chuan sawi hreh suh aw. Rin ai daih hian a lo hautak ţhin a" tiin min zawt a. 

"Min zawh nachang i hria a ka lawm lutuk zawk. Nang hi chuan min ngaihtuah ţhin a, lungawi lohna ka nei ngai lo. Mahse, ka nutei pasal a phur khawp a, a inhuam zau khawp mai. Ka nutein hun a la ti lo deuh nain an pa chu ka nu ai daihin a phur a, mi ţha tak ka nei tur hian a ti lawm ve aniang" ka ti a, ka nutei pasal anga fel hi chu an vang khawp mai. Kan tan phei chuan a hlu tawpkhawk a ni. A unaupa, Pa Liana kha ka hua a, khavang khan ani pawh ka haw ve dawn a, ka u diary ka chhiar hlim phei kha chuan ka be hmu duh lo reng nghe nghe a ni. Mahse, a fel em a han tauh san reng theih pawh a ni lo. 

"Phurpui che pawh ni sela a awm ve tho alawm. Keipawn ka lawmpui lutuk che u a nia, nupui ţhen tawh a nia, a fimkhur tawh ang a, neih tlaka a ngai che a nih chuan ţha deuhin awm la, a nupui hmasa mizia i hre vek a, i mizia pangai bo hauh si lovin a chhungte lakah pawh ţhat chhuah la, mo fel nih hi a har lo a nia aw" a ti a, min zilh zui mawlh mawlh a, rin ai daihin zilhtu leh fuihtu ka ngah a, ka vannei tak tak a ni.

Kan inkhar hma deuha Zonuna lokal chu Rohluan fiamthuin a lo chhuahchhal a, "In inzep thei dun hle mai. Ka hriatah engmah in han sawi lang duh lo vel a" a tih te chuan a lo nui suk suk ringawt a, Rohlua bulah meuh chuan sawi tur pawh a hre ve mang lo. 

"Rem lohna te pawh awm leh thei a nia tih thuah kan sawi vak rih lo mai mai a nih kha" a ti ringawt a, Rohlua lah chuan a fiam zui zel a, kan haw dawn meuh chuan a tlai leh kuar tawh.

Motor a ka ţhut luh hnuah a rawn lut ve chauh a, kan kal zet tawh hnua Rohluan a koh let leh vang a ni. 

"I ril a ţam em?" kawngkhar khar paha a tih chuan "Ţam lo e..haw tlang mah ila a pawi lo. Ka nu a lo buai lutuk ang" ka ti a, min lo hnial hran bik lo. 

Kan tlanchhuah hnuah te chuan a din apiangin ka kut a rawn vuan leh ţhin a, a vuan rei hman ngai chuang lem hlei lova. 

"Sangsangi a phur tawh khawp mai" a tih chuan "A nih leh nang?" ka lo ti vat a, ka nuih pat pat lai chuan min rawn en zawkin a ni pawh a nui ve suk a, "Kei te chu i hre sa reng ang chu. Calendar ka melh reng mai dawn a nih hi" a ti vel a, ka lo chek hlak a, ka lung a awi veng veng thung. 

"I nghakhlel tawh viau a ni maw?" min chhan dan tur hre sa reng chung hian ka ti leh hram a, "Nghakhlel tehreng mai. Thiang se chu tunah pawh hian ka hawn daih ang che" a ti a, kan in nuih leh ţhin a, ka chunga thil thleng mek hi ka la awih lo hial zawk a ni. 

"Min hawn daih chuan ka nu i ti thinrim dawn a sin" ka ti a, kan inpawh ve ta bawk a kan infiam tawn ve reng tawh mai. 

"Sangsangi phei chuan thil a hre thawi ve sia, khawiah nge a mut ang te a tia" a ti a, Sangsangi chungchang hi kan sawidun tawh a, inthlahrunna chin chu a nei ve a, mahse keimah zawk hian engkim hre sa a kawp che ka nia ka ti ve tlat a, inthlahrung lo turin ka hrilh a, fa a nei tih hre lawk lo pawh ka ni lo a, han ngaihtheih loh viau nachhan tur ka nei tlat lo a ni. Amah lah chu a fel reuh em em mai lehnghal. 

"Ka nu leh Sangsangi chiah an ni mai a, ka pa leh ka nau an awm tawh bik lo a, in anna lai kan ngah i ti ve em?" ti a min zawh chuan, "Aw..kan nei nual mai. A ţhatna lai te pawh a awm ve a nia, kan inhrethiam tawn a, inhriatthiam tawnna hian inlaichinna a ti nghet ţhin a, dawhtheihna leh hmangaihna nen, a pathum hian a hlu khawp mai" ka ti duah a, zak deuh mah ila ka ngaihhlut zia ka hrilh ve fo ţhin. 

In kan thlen chuan khua a thim a ni der tawh a, kan dawr hla lutuk hi chu duh aiin ka tlai phah fo mai. A lam ka hawi rual chuan rawn kun hnaiin ka hmui a lo fawp sauh a, kei ka lo nui sak thung a, "Ka lo lut kawi lo mai ang. Zanah ka rawn bia ang che" a ti a, ka chhuk hma chuan ka kut a hmer leh vang vang a. 

"Min thlah loh chuan ka haw thei dawn lo a sin" ti a ka chhaih fiam pawh chuan min thlah mai lovin "Ka la ngai che a, nei dawn che mah ila i kut takngial pawh ka thlah phal tawh lo chu a nih hi" a ti a, a thusawi chu ka lo nuih pui hak hak a.

"I hne hnawk thlengin i bulah ka la awm dawn alawm. Kum khat vel kan awmdun hnu chuan min ngai tawh teuh lo mai" nui rah rah chung hian a nghawngah ka dawm a, "Mahse, keichuan ka ning ve dawn lo che a nia. Ka neih tawh che chuan min ning viau mah la ka zui zel tho ang che" ka tih zawm leh a, a nuih a za viau mai. 

In ka thlen chuan ka nu'n rawng a lo bawl peih diam tawh a, rin loh deuhin Zualtea nu leh pate an lo awm ve mial a, ka hmu thut bawk si nen, ka hamhaih lek lek a ni. 

"I nu hian pasal i nei dawn niin a sawi a" Nu Rintein a lo tih chuan lai deuhin ka nui a, "Nia" ka ti a, ka riat nawi zui vel mai mai a. 

"A ţha alawm...pasal i nei ţha dawn bawk si. Mahse, i la naupang a, pasal neih chuan tawrhchhel a ngai a nia aw, ngaih ang ngawt a nuam a ni ngai lo a, thu inhmuh loh chang leh rilru nat chang te i nei a nih pawhin i tuar hram hram dawn nia" a ti ve luam a, ka aw liam vel mai mai a, Zualtea ka la hrilh ve bawk si lo, a ţhawng ve viau ang le.

"Hrawn tur an tam lo a, a nuam phian ang. A fanu lah i nu sawi hmangah a la naupang a, harsatna a siam sak dawn lo che a" an pa in a lo ti ve thung a, ka bu nghat nghat a, ka nui leh tawp zel a, an pa ngat phei hi chu ka nel lo nasa mai. 

"Zothani a phur lutuk a, a hmuh hun che chu sawi tur a ngah leh viau ang" a ti a, chaw ei te a hun tak avangin rei pawh leng loin an haw a, mak an tih hmel emai an sawi zui ve rauh rauh maithei a ni. 

Zanah Zonunan min lo video call a, tunlai chu a ching thar a, a rawn ti leh zuk ţhin. 

"Hei...anu ka hmu chak a tia" tih pahin Sangsangi a ti lang a, thawm dang a tam a, inleng an ngah a ni maithei. 

"Tu nge lo leng a?" tiin Sangsangi zawk chu ka zawt a, "A ute an lo leng a" nui var var chung hian a ti a, an ina ka awm hun tur min zawt pek a, lai deuh hian ka chhang a, Sangsangi kal hnuah anu min rawn ti ve ziah chu ka hau a, ani lahin zak lo turin min hrilh a, a mak tak tak a ni. Ka en hran vang leh ngaihtheih loh vang ni hauh lovin Sangsangi ka fanu tur anga ka ngaihruat vel chang hian ka ni deuh huih zel. 

"Zanin chu a phur fal ho an lo leng a" a ti a, a cousin fate ni awm tak chu a ti lang kual a, tun hma a min ngaihtheih loh hmel deuh ţhin te pawh an nui duai duai tawh a, kan inhmu ve fo a, an chhungkaw chaw eikhawm naah te pawh Zonuna hian min hruai ve ţhin, min ţawngkhum fek fek an chin pawhin ţha deuhin ka chhang a, ka huat ve miau loh avangin min haw reng thei bik lo aniang biak hmasak ka chang lo ţhin a ni mah tawh zawk. 

"Amah ber hi alawm phur chu...a awm mai mai thei tawh lo" an ti a, an hlim tlang khawp mai. 

A kal hran hnu chuan "Mu hma rawh..keini chu kan mut mai hmel loh. Zing thawh hma leh i ngai awm si a" a ti a, ka lo pawm nasa mai.

"Naktuk engtin nge?" ka tih chuan "Ka rawn hruai ang che" a lo ti vat a, kan inbiakna pawh ti tawp zuiin mu turin ka inbuatsaih a, taksa a chauh ve deuh chuan mut a chhuak hma duh hle. 

Ka mu fel ta maw tihah ka phone ri bawk chuan rilru a kai peng leh a, Zonuna bawk a nih ka rin laiin Zualtea hming ka hmu ta zawk a, tlem chuan ka zam ve deuh. 

"Hello" tim daia ka tih laiin "Ka lo haw hnai a" phur zet hian a ti a, kan inhmu lo rei ngat ngat bawk a inhmuh a chakawm. Chutih rual chuan a rilru a la danglam lo ang a, min hmuh rualin a na leh ang tih ka hlau tho bawk si. 

Ka ngawih tak rengah chuan "Pasal i nei dawn em ni?" amah bawk chuan a ti leh a, "Umm" ka ti ringawt a, a reh zui leh vang vang a.  

"Ka lawmpui hle mai che. I pasal tur kha pa ţha tak a nia, ka ngaihtuah lo che" tiin amah bawk chu ţawng chhuak hmasa zawkah a ţang leh a, "Ka lawm lutuk a nia aw. I lo tel ve thei dawn em?" ti a ka zawh chuan "A chakawm viau rualin ka lo tel thei kher lo ang. Ka awm rei dawn lo a" a ti ban charh a.

"A pawi hle mai. Awm ve thei la ţha tur a nia, i nuten an rawn hrilh che em ni?" ka tih leh chuan "Aw..nichin lawk khan min hrilh a lawmpuina ka rawn hlan nghal che a nih hi. Kan pi ţep tawh che a ni maw?" pangngai deuh hian a ti a, a pangngai tak meuh em tih phei chu ka hre lo. Zualtea hi chu hriatthiam a har, a inthup thiam ve em a ni. 

"Keimah ngai reng ka ni dawn tho alawm. Ka tar hma chuan min pi ve reng reng suh ang che" nui chung hian ka ti a, "Ka ţhian i ni reng dawn alawm. I hlim chuan a ţha, tunlaiah miin an hlimna tur an um suau suau tawh a, nangmah ti hlim thei tu ber i neih khan a ţha, ka lawmpui tak tak che a nia" a ti mawlh mawlh a, ka hriat loh a hlauh hmel khawp mai.

"Ka hria alawm. I ţha maw? I ruala hmuh ve tur te an awm dawn em?" ti a ka fiam chuan "Awm rih lo chu a nih hi" a ti deuh hap a, "An awm thuai turah ka ngai a nia, a hun tawh alawm. Ka sawi awmzia i hria tiraw?" ka ti a, min duh zia ka hria a, ka tan engpawh a huam a, hrehawm tawrh phah mah se pawi a ti ngai lo. Chuvang chuan hma lam a pan lawk lo hi thil mak a ni lo. 

"An la awm ve mai ang" a ti zuai ruih a, lawmpuina min hlan nawn mawlh mawlh a, a chanchin min hrilh tam lo nain a thiam dan tawkin min fuih ve a, a chang leh naupangchhia zet hian "An tih hrehawm che chuan min hrilh rawh" a ti thul, min ngaihtuah nasa mai. 

"I phenah ka awm reng thei bik hleinem. Keimaha ka din ve a ngai a, ka chak tawk zia ka hriat ve te a ngai a, sawiselbo ka nih hun ka nghah kher a ngai lo a, hun ka chelh ding thei si lo. Hmanhmawh min ti deuh em ni?" ka tih chuan "Ti lo e..nghah reng a ţul ber chuang hleinem. Vawiinni ang hi a pawimawh ber a, thil ţha lam a nih chuan nghah khawtlai reng a ţul hran lo. Fa i neih hunah thil ţha deuh deuh ka lo hawn sak ţhin ang" a ti ta daih a, thu ho mai mai kan sawi zui a, keiin ka hrilh ngai lovin a nu ten an lo hrilh a, ţha deuhin kan inthlah thei bawk a, thawk khat chu a veng deuh. 

Inneih ni pawh a hnai ve zel a, Rohlua sawi ang tak takin rin aiin tih ngai a tam a, a hautak bawk a, a hahthlak khawp mai. 

Rintluangi nen a bazar kan kal a, tunlai chu kan sumdawnna lam pawh a ngaihtuah hleihtheih loh a ni ber e, beisei loh deuhin Kimkimi kan hmu nawlh a, a lo thau deuh tawh a, a hmel a ţha khawp mai. Chawlh kan tumna dawr kawta inhmu kan nia, "In lut dawn mi?" nui var var a a tih chuan ka lo bu nghat a, "Lut ila" tih leh luh a rual ta mai bawk si a, kan ţhiandun chuan hreh ru deuh chungin kan lut ve a, kil khat a a ţhu chu kan zawm ve a, buaina a siam vak hnu khan hmu leh zeuh ţhin mah ila ka hmu tam lo a, a inthukru ve deuh niin ka hria. 

"Kan inhmu khat hle mai. In innei dawn niin ka lo hria a" a ti a, lungawi lo hmel a put loh avang chuan nui chung hian a hun tur te ka hrilh a, ka nuihsawh lo thung. 

"A ţha alawm...i lo inthlahrung ange. Ka nu sawi dan takah thil inrem lo chung chu dah rem luih theih a ni ngai lo a, ka lawmpui che u" a ti tak nain a nui hmel chu a rem riau a, a ruk tak chuan a na tih hai rual a ni lo. 

"Ka lawm e" ka ti sap a, "I fel a, Sangsangi pawhin hrehawm a ti lo ang. Lo duat la, enkawl a nuam a nia. Thu a awih a, a hawihhawm bawk a, tereuhte a nih lai a kan inkhawm pui ţhin chang pawhin biakin ah bengchheng a siam ngai lo a, a mutthilh loh pawhin ţha deuhin a awm tluan tho zel. I enkawl thiam phawt chuan nu tak takah a ngai mai ang che" nui hawk hawk chunga a tih laia Rintluangi lo ner deuh nak chu ka hmu fuh a, ka sik ru zeuh nghe nghe a ni. Kimkimi hian min la ngaina chuang lo a, keipawn ka hre vek a, ka dem hauh lo bawk. 

"Tumah hi nawr luih theih an ni ngai lo a, min hmangaih lo tu na na na chu engang pawn thlem ila, an hmangaihna kha dil lui ngawng ngawng mah ila min pe thei ngai lo a, mittui nen pawh kan ngen chhuak thei ngai lo. Chutiang zawng zawng kan hrevek a nih chuan ngen nawn tlut tlut lovin hmalam pan ila a ţha zawk, min hmangaih thei lo tu ai chuan min hmangaih tu lo nghah ngawt ngawt mai pawh a thlanawm zawk" a ti duah a, ngawi rengin kan lo ngaithla a, ngaihtuah chian chuan a khawngaihthlak takzet a ni. 

Kan chhuah dawnah chuan "Pawisa hmanna tur a tam awm sia, ka lo pek kep ang che u. Ka puih ve theihna che u a ni mai" a ti a, eng rilru pu a sawi nge a nih ka hre chiah lo. Ka hnial deuh nain min pek kep lui ta tho a. 

Rintluangi lah chuan Zualtea chanchin min zawt sek a, "Kan la inhmu lo" ka ti phei chu mak a ti khawp mai. A lo haw thu pawh min hrilh miau lo a, mahse tlangkam aţangin ka hre leh tho. Tunah pawh a la awm reng a, vawikhat pawh min rawn la tlawh lo. 

In ka thleng chu ka chau khawp mai, ka nutei te nufa pawh an lo awm reng tawh a, an fanu neihchhun phei chu a rawn awm rawt a ni ber. A ţul ţulah min pui a, u ang tak tak hian min en ve a, zanah pawh ka bulah a mu ve mai zel.

Zanah Zonuna a lokal a, a inthlahrun hmel em em mai lehnghal. An lo fiam nak nak reng a, ka nutei phei chuan "A hmel hi chu a ţha ngawt mai. A palian bawk si a, i pasal tur hi chu khawi hmunah pawh a zahpuiawm loh ang" tiin min hrilh ru sar sar a, pasal neih la remti lo viau mah se a hmuh apiang hian ţha a tih zia ngawt a sawi ţhin. 

Ka nutei pasal nen an ti ti a, an bulah ţhu ve reng mah ila an thusawi ka tuipui pha ve ngang si lo a, ka ngawi kar reng a, ka nutei ten min biak changa chhan zeuh a ni mai. 

A haw dawn chuan kawtlai thleng ka zui chhuak a, ka kut chu lain a hum a, kan ding dun ta reng a. 

"Tluangtea te inah ka kal kawi leh dawn a, ka haw har deuh ang aw" tiin min hrilh thlap a, kei lahin ka lo remti ve nghal mai a, hetiang kawngah chuan kan inringtawk lutuk tlat a ni.

"Thuam chhawm vel kha tih vak a ngai lo a nia, engmah chhawm lo mah la ka lungawi em em tho ang" dam thlup hian a ti a, "Nia..mahse, tlem a zawng chu a ngai ve alawm. Dawrah ka kal tawh dawn rih lo a" ka tih chuan pawi tih hmel tak hian "Keimaha ka kal a ngai dawn ni maw" a lo ti vel a.

"Tikhan awm vel lo teh...min thlah a, hmun dangah i kal leh daih zel tho. Kan kal dun rei lo thei emai" ka tih chuan a lo nui ve hawk hawk a, kan inhmu deuh zut reng a, a rawn leng tawp a nih loh chuan rei inhmuhna hun a awm ngai lo. 

A kal dawnah ka kut chu a fawp leh vang vang a, ţhenawm ten êng an tih thim rual chuan thlahlel deuh hian min kuah a, min hmu tu tur an awm chuang lo bawk a tiin keipawn ka lo kuah let ve vat a, ka chhip a a fawh rual chuan tawi te hian ka nui a, thu tam sawi tur nei ngai lo mah se a kianga ka awm hi chuan ka kim veng veng zel. A che zia ho te pawh hian min tihlim ţhin takzet a ni. 

Inrinni a kan chhuak dun tur chuan Zualtea ka hmu hlawl a, Zonunan motor kawngkhar min hawn sak lai chuan kan piah deuhah a ding a, min lo en ve reng a, ka lut lawk lo chu Zonuna lah chuan "Engati nge?" a ti deuh hu a, "Engmah a ni lo" ka ti sap a, Zualtea lam chu ka la hawi reng a, ka en reng tih a hria aniang nui suk chung hian a bu nghat a, keipawh chuan lo nuih let ve thuaiin motor chhungah chuan ka ţhu lut ta nge nge a. 

Thil ţul ang ang te kan tih hnuah Sangsangi kan lam kawi a, Zawmpuii te inah kher a ni lehnghal a, ani nen hian kan inbe tam ta lo khawp mai. Inhmuh nikhua pawn a ţulah bak kan inbe ngai lo. 

Haw kawngah chuan a ţawng zat zat reng a, min kuah thuak thuak reng bawk a, chhawn chhaih thiam phei ila chu min ngaina zual ngawt ang. Thingpui dawra kan chawlh pawhin ka bulah kher a ţhu duh a, naupang hi chu an mak ve ngawt ang. A hmui mawm ka hruk sak lai pawhin min be deuh reng a, "A zawhna chin chiah chhang ţhin lo la" nuih hawk paha Zonunan a lo tih chuan a lam ka hawi thuai a, Sangsangi nen a kan inbuaipui vel chu hmuhnawm tih hmel deuh hian min lo en a, hmui phuna "Ka thiam rih lo alawm" ka tih chuan a lo nui leh hawk hawk a, ka zia a hrechiang a, ka biak tam loh pawhin a vui ngai lem lo. 

Kan inthleng min thlah a, lut lawk lovin an kal liam thleng ka thlir a, an liam rual chuan khua a har ve veng veng mai. Zanah pawh min rawn be leh hram a, a tlai tawh viau nghe nghe. 

"Ka mu ve hman chiah. Hun awl ka neih chuan ka be chak zel che sia, min lo ning em lo ang chu" inthlahrun hmel taka a tih chuan "Ning lo e...inneih dawn vanga inbiak loh tur tihna a ni hleinem" ka lo ti var a. 

"Ka nei thei tur che hi ka vannei takzet a ni" a rawn ti a, ka vannei daih zawk sia. 

"Kan vannei ve ve alawm. Ka dinhmun i hrethiam a" ka ti ve ngei a, hmeichhe tan chuan kan nihna ang anga min pawm thlap tu hi an ţha ber. 

Rei mawi tawk kan inbiak hnua "Ka hmangaih che" a tih chu a thusawi dang zawng zawng aiin hriat a nuam hialin ka hria, a sawi khat viau rualin he thu tawi te hi a hluin ngaihthlak a nuam takzet a, mi a ti hlim veng veng thei tlat a ni. 

Ka muhil thei lo chu tukverhah dakin van lam ka thlir a, kan inneih ni a hnai ve zel a, chhungkimin hmang thei ila chu a nuam lehzual tur a nia. Ka u leh ka pa hlim hmel tur ka ngaihtuah chuan ka mittui a hnam nghal ringawt a, rui leh dawn mah se ka pa kha min lawmpui thiam ber tur a ni. Ka u pawh hrilh chak ka ngah a, hrilh theih dan tur ka duh ngawt mai. Tunlai phei chu ka mumangah ka hmu ziah lehnghal a, ţhianţha tak mai, a thisen zawm pui te ang chiaha min duhsak tu Rintluangi ka nei tih te hi hre ve se, ka nu pawh mi inah a inhlawh tawh ngai lo a, in luahman chawi kan ngai tawh lo a, keipawh ka ţhiannu nen dawr inluah ţawmin hma kan sawn ve zel a, pawisa neih loh vanga rilru hah reng reng a awm a ngai tawh lo tih te hreve se chu a hlim ve viau ang le. Ka u leh ka pa aţang khan kan ni hman mek hlut zia ka hrethiam a, naktukah chuan engpawh a thleng thei a, vawiin a kan bula hlim taka nui bawk bawk te hi naktukah chuan mitthi an ni daih thei a, chuvang chuan vawiin hi a pawimawh takzet a ni. 

Zonuna chanchin te ka sawipui chak a, a chhungte fel zia te, ka nu thlenga min enkawl pui a inhuam thu te hria se chuan kei ai aiin a hlim zawk emaw tih tur a nia nga, inneihna thil vel te hi phur deuhin a buaipui surh surh awm sia, ka pa pawhin a ţhiante zawng zawng bulah ka pasal tur chanchin hi chhuang deuhin a sawi leh ang a. Mahse, chutiang chu engmah an ti thei tawh lo. Anni chu ka biak ve phak an ni tawh lo. 

Rilru lak pen nan Zonuna bawk ka be leh ta tawp a, mutchhuah hmel deuh hian min chhang a, ka insut feih ri a hriat chuan "Engati nge?" tiin hlauhthawn hmel tak hian min zawt leh ta zawk a. 

Ka thil ngaihtuah te ka hrilh chuan "An ngaihawm ang. An ngaihawm hunlai tak tur a ni. Mahse, an lo tho leh tawh dawn lo a, la dam ni sela chuan an lawmpui viau ang che. Lungngai lo la, kei ka awm a, i nu a awm bawk a, kan dam chhung chuan i mal lo ang. I kiangah ka awm reng ang a, khawhar hre hauh loin ka siam ang che" tiin min rawn hnem ve a, ka mittui tuai fai paha "Hmeichhia chuan kan ngaihtuah thui ţhin a, inţhen leh te" ka tih lai chuan min lo pawt chat a, ka sawi duh pawh ka sawi zo hman lo. 

"I uire a nih loh chuan ka ţhen lo ang che. Uirena hi a huatawm a, mipa zawng zawng kan ni vek ang, nupa tam tak pawt ţhen tu a ni. Kan inţhen leh ţhen loh chu nangmahah a innghat tihna a nih chu" a ti charh charh a, "Phone hi dah lo la, i duh duh sawi la ka lo ngaithla ang. Duh leh i muhil ang a, nangmah chiah chuan ţap tawh suh. Min nei alawm" amah bawk chuan a ti leh a. 

Ni e, ka nei alawm. Ka mipa duh ber, a mit sir pawha min melh chhin ve hma aţanga ka suangtuahna luahtu, thinlung zawng zawnga ka hmangaih chu ka pasal a ni tawh dawn. Ani pawhin min hmangaih a, ka duh loh zawng chu siamţhat a tum a, a siamţhat theih loh chin chu keiin pawm thiam ka lo zir ve thung a, mi chuan sawiselna tur tam tak an hria ang. Mahse, ka tan chuan a famkim si a ni. Vawiin hun ka ngaipawimawh tawh ang a, naktuk nghak zel lovin vawiin ngeiah ka hmangaih te tan hian thil ţha ka ti zel tawh ang. 

"I va mu har ve...i muhil thei nange?" ka nu'n a rawn ti a, a sam ţawn tawm tlat ţhin chu a thlah hniang a, a muhil a harh leh a ni ngei ang. Pindan kawngkhar hi ka kalh ngai lem lo a, zanreia a lo luh dawn chuan a kik buai ngai bik lo

"Ka harh leh a, diary ka ziak mai mai" ka tih chuan "Dan ngai te tein maw" nui chung hian a ti a, ka lo bu nghat a, ka diary ah hian ka rilru a thu awm ho te te ka ziak chhuak ve ţhin a, ka tan chuan a hluin tuemawin lo chhiar se chu ka nun hman dan tam zawk a hrethiam thei ngei ang. Ka nun pum hi diary ah hian a chuang a tih theih hial ang.

"Muhil tawh rawh..a tlai tawh a nia. I men vak vak chuan naktukah i chau lutuk palh ang" a ti a, ka nu kut chu ka lo hmer vang vang a, ka tana theih tawp chhuah ţhin, hah pawh sawi lova a thawh theih apiang thawk mawp mawp ţhin tu a ni a, ka neihchhun a ni bawk a, ka tan chuan a hlu takzet a ni. 

"I awm thei tak tak ang maw?" tiin ngaihţhat nan ka zawt nawn leh a, "Awm thei tehreng nen. Zonuna i nei tur hi ka thla a muang a, tunah chuan hah deuha i thawh a ngai tawh lo ang. Theihtawp i chhuah ţhin a, tlem a hahdam ve deuh i mamawh tawh alawm. I ţhiannu nen in sumdawng bek bek ang a, theihtawp i chhuah ţhinna rah chu i la seng dawn chauh" a ti a, keiin kei aia a hah zawk sia ka lo hrilh thung. 

"Rintluangi anga ţhianţha hi an vang ngawt ang. Mi tam zawk hi chu kan chan a ţhat lai leh, kan thlen san ber lai chauh a ţhian an nia, harsatna kan tawhin min ngaihven ngai lo. Ţawngkam tawite pawh an ui emaw tih mai tur a ni ţhin a, an hlim phawt chuan hrehawm tuar mek an ţhiante an ngaihven ngai lo. Mahse, Rintluangi chu ka dinhmun a hniam lai ber a ka kianga a awm mai bakah ka dinhmun a ziaawm ve deuh theih nan theih tawp a chhuah a, ka chak loh lai leh ka chauh tawpkhawk lai pawha min ngaihven ţhin tu a ni a, Faktea leh Rohlua te nen an inang reng, thilpek leh pawisa min pe lo mah se englai pawn ka tan an awm a, ka theihnghilh tawh lo ang" ka ti a, rilruah Zualtea a awm rauh rauh a, a hming ka sawi tel lo nain hlimna zawng zawng ka duh sak a ni. Zonuna aţangin hmangaihtu hlut zia ka hria a, ka ţhiante pali aţang hian ţhianţha hlut zia ka zir chhuak thung. Anni ho vang hian hmangaihtu leh ţhianţha te hlut let ve ka thiam tawh ang. 

Dear Diary,

"Zing a lo thlenin chawhnu a nih hun nghak kher lo la, chawhnu lam a lo nihin zing a lo thlen hun nghak kher suh" an ti ţhin a, he thu hi a dik a ni. 

'Vawiin a ral ang a, naktuk ah thil ţha zawk kan chungah a lo thleng ang' tih hi kan rindan a ni ţhin a, mahse, naktukah chuan tlemin kan lo upa leh sawt ang a, kan taksa a chak lo sawt ang a, kan mamawh a pung ang a, chutiang chiah chuan kan buaina pawh a lo pung thei tih kan theihnghilh fo ţhin. 

Naktuk hi vawiin aiin a lo ţha zawk a nih pawhin thil khirhkhan kan hmachhawn tur te hi kan hmachhawn nghal loh chuan vawiin ang reng a ni dawn tho a, a kiam dawn chuang lo. 

Chuvang chuan, vawiin hi hlimpui ila, nuam deuhin hmang ila, mihringin kan hriat lawk theih loh, kan hmalam hun ngaihtuah lawk lovin vawiin hi ni ţha berah chan tir tum zel ila, vawiinah theihtawp kan chhuah a nih phawt chuan naktukah ni eng mawi tak a lo chhuak thei zawk ngei ang. 

A TAWP TA..