HIS LAST LOVE-2

HIS LAST LOVE-2

"I sam han khuih rawh...chaw ei dawnah phei chuan a mawi loh bakah a tenawm lutuk" ka nu'n a ti hlak hlak a, midang hriat a hlau bawk si, choka ah min hnuk lut pah nawk nawk a ni ber. 

"Ka peih lo e a..min ten chuan ka bulah ei lo mai ru. In duh danin thil in ti a, keipawh ka duh danin ka awm ve ang" ka ti kha kha a, a meng nur nang chu kal pelh pahin a darah na lo tein ka su a, chawhmeh bel ka hawng zui rak rak a, ka duh zawng hlir an siam nain chaw ei ka chak hauh lo. 

"I pa hian i ţhatna tur bakin thil a ti duh dawn lo tih hria la, runluih loin hmuh nuam deuhin awm ang che" ka nu'n a rawn tih leh chuan "Kal teh" ka ti hlak a, ka thin a rim ţun reng mai a ni. Ka kum a la upat loh chu thuhran, mahni fate ngei insawiremna mai mai a pasal neih tir a tum hi ka hua. 

Hunserh hman te an han ti ve vel a, ka pa ţawngţai lai te chuan ka maimitchhing duh lo lek lek a ni. Hunserh hman zawh hnuah pawh ka pasal tura an tih pa nen chuan che chang lovin kan ţhut ngaiin kan ţhu ta reng a, tum bur a a lam ka hawi chuan min lo en vang vang hnuah ngeiawm zet hian a kiai suk a, a in la pa ve vel em maw ni. Hmeichhe dangah chuan lo tla na pawh nise ka tan chuang pangpar a ni tho tho. Pangpar ang chiahin engahmah ka ngai lo. 

"Kan siam zo a, lokal ve tawh ula" Liantein a rawn tih chuan kan tho rual leh a, chaw pawh ka ei tam lo. Kan mikhualpa'n min biak mawlh mawlh lai chuan ka kham daih a, ka nu leh pa chu lo zak deuh mah se pawi ka ti lo. An thil tih dan hian ka rilru a ti na a, ngaihtuah loh loh tur ka ngaihtuah phah ta fo mai. 

Inchung pan chhohna kailawn a ka ţhut ngui bur lai chuan "Pate" a rawn ti thum dut a, ka ţhutna hmaah ding pa chu hmai zangthal ha hian ka en a, min endanah chuan min ngaina bik lo tih ka hria, min ngaina hlawl lo zawk ang. 

"Patea an awm lo..kan unau hi hmeichhe hlang kan ni" no fahran lo a ka tih chuan "Nangmah kha" a ti a, ka ding zawt mai. 

"Mipa hmuhin maw min hmuh a?" lawm lo zet a ka tih chuan "Ni e" a lo ti sam leh mai a, chutah ka hmai bul sêtah a rawn kun hniam a, a mitmeng lah chu a thipin chu chuan a hmel lan dan chu a ti dur khup ni maiin ka hria. 

"Engtikahmah mipa angin ka en ngai dawn lo che. He thil atthlak zet hi ti tawp ang che" zawi te, chang zet si hian a ti a, tawlh sawn tir dan dang awm hek lo le, ka hnarin boruak ka hip lut vang vang a, a inlak hran ngei ngei theihna turin a hmaiah chuan ka chhem vak a, hetianga ka tih loh chuan midangin kan boruak an rawn hrethiam mai ang. 

Ani pawh chu nur nangin a inla hrang a, a kekawr ipte zen tlat chung hian ka hmaah chuan a la ding ran a, a hniam zawka a ding chung pawh hian ka chen meuh lo chu a ni. 

"Kei hian ti tawp thei ila chu maw ka hriat hlim khan ka ti tawp tawh ang. Mipa i nia, ngaihzawng nei zawk i ni bawk a, nangman ti tawp ang che. A nih loh chuan mipa ka ni pawh inti ve tawh suh, mahni duh zawng pawh nei ngam hlei lo" ka ti ve hmak hmak a, a ner vel danah chuan a lungawi lo tawp tih a hmuh theih reng. 

"Keichuan tih tawp ka tum tal alawm. Kei min neih leh hremhmun a tlak hi thuhmun reng a ni ang. Min neih tum buai duh suh ang che, i hlim chuang lovang" ti a kal mai a tum chu "Ve lutuk che hian" ka ti halh a, ka thinrim ka insum nasa lutuk chu hrehawm tak a ni tawh. 

"Engmaw i sawi?" a ti nghat a, ka lamah a rawn thle buk a, "Engmaw i sawi?" a ti nawn leh a, ani pawh hi keimah ang tho a ni. Ho te te pawhin a thin a ti rim ve em em zel tho niin a lang. 

"Ve lutuk che hian ka ti. Kan pahnih chunga thil thleng mek hi ka duh dan a ni bik lo. Hremhmun te i ti vel a, inla setana vel lo khan tih tawp dan zawng leh zawk mai rawh. Loh theih loh a ka nei che a nih pawhin ka nun hi hremhmun a chantir tum buai duh suh. Mei alh in ka vawm belh zawk mai ang che. Hmeichhia hi kan landan aiin kan chhel tih hre rawh" ka tih ve duah takah chuan ka mitah tak enin a nui suk a, min melh dan te chu hriatthiam har tak a ni. 

"A nih te chuan min nei la..mei alh in kan invawm tawn mawlh mawlh anga a ni mai lawm" a ti sam then a, ka hamhaih zawk lek lek a ni. 

"En rawh...neih che hi ka duh dan a ni bik lo, nang anga thlawi lawm lutuk phei chu kei ang nula" ka tih lai mek chuan a lo chek tlak a, a nui hmel te chu ka hne nghal hluah hluah mai a ni. 

"I thianghlim bik zia i sawi ang a, ka rilru lak pen i tum ang. Min nei tura ka tih tawh che kha, i thianghlimna chu kan chen dun dawn nia" ti a min deusawh vel te chuan vin vak vak lo tur a ka insum nasa lutuk chuan kut ka hum ruh ţeuh a, hnek bur mai a nia ka duh tawh ni. 

"I ngaih ang ka ni hauh lo ang" sehchilh zet a ka tih chuan "Kan en ang chu" ngeiawm fahran hian a lo ti leh a, a kal hma chuan "Pate" a ti leh hram a, keichu min rawn enin ti lui tih hriat zet hian a ri in a nui a, Nicholas-a mai mai chu(h). Neih ai chuan thih ka chak leh tawh zawk. 

"Khawiah nge Nicholas kha? A chhuah lai ka hre mang si lo" a nu'n a ti lang lang a, "Pawnah mei a zu a nih kha" ti a ka nu'n a lo chhan let lai chuan keichu mut daih tumin kailawnah muangchangin ka chho a, tunah tak chuan mitthi kal thei ka ang ber ang. Thil dang daih ngaihtuah chunga chho ka nih miau avangin ka inchhuih leh khut zel a, invuan ţang ţang lo ila ka tlu sawp nuaih tawh ang. 

Khum ka thlen rualin ka bawk thlawp a, ka rilru hah leh tawt lutuk chu ka puak keh thei mai dawnin ka hria. "Ka pa hian engvanga hetiang thil hi ti nge a nih?" he zawhna chhanna hi ka hre chak khawp mai. Ka inzawt nawn tlut tlut a, a chhanna tur awm ang ka ngaihruat kual vel ţhin a, ka zangthal thawk a, mu mai mai e ti lo chuan ka hah lutuk chu ka thaw leh halh ţhin a, ka rilru a na takzet chung hian ka ţap thei der lo lehnghal. 

Kan inneih ni tur thlenga an ruat takah chuan ka thawhpuite ho pawhin an hre lo thei ta bik lo a, hriatchian tuma min zawt ho chu ka lo hau hrep zel. 

"Eng nge i an? A hrehawm em? Engtin nge i awm?" ti a min zawh seuh seuh paha Nghetin ka hnung a chul lai chuan "Thi tur inţham ang hian ka awm" ka lo ti sap a, ka hnungzanga a kut che vel chu a tawp rang hle. 

"Thih sawi ziah suh ka tih kha. Damlai hremhmun kan tih te chu e...thih hnu lam hremhmun ai chuan a let tam takin a nuam zawk tih hre tawp rawh. I pa berin thutlukna a siam tawh a, tih danglam theih a ni tawh lo. Nei ve phawt la, in inmil theih ngang loh leh i ţhen daih dawn nia" a ti malh malh a, hau vak vak hlawm mah ila min ngamtlak apiangin min chhaih nasa a, a zahthlak zawk. 

"Lalhmelţhaa" a tih lai chuan "Khati khan ko tawh suh ka tih kha" ka lo ti vin hlar a, ngeiawm deuha a nui vel te kha mitthlaah a lang chuai chuai a, tualthah mai te a chakawm rum rum hial a ni. 

"Nih leh Nicholas ka ti ang, ani pawhin nupui neih a duh bik lo a, officer a ni tawh a, amah pawhin a in enkawl zo tawh. Chuti chung chuan a pa thu angin a kal a, he inneihna hi pawm lo thei lovin an siam ve tihna a ni mai a, in pate ve ve hian innei turin an duh ve hrim hrim che u aniang. Ti daih ila, pheikhawk sang bun i zir tawh em?" a tih chuan muangchangin lu ka thing a, "Ka engtih tha mah a tho lo. Ka phur hlawl lo a, ka pa lah hi biak luih ka tum ngial pawhin ka thei lo, ka haw tlat a" ka ti a, thudik tak a ni bawk. Min biakin a rul tawkin ka chhang a, chu chu a ni mai. Kan inkar a zau sawt khawp mai. 

"Pheikhawk sang deuh hlek i bun chuan i kal bu lûk lûk zel a, mahse i bun ngei ngei a ngai dawn a nia aw. I hmel a ţhat tehreng nen nû deuhin awm ve la chu tu mipa mahin an iai lo ang che" a ti leh ţan tawh a, hmeichhia chu hmeichhia kan nihna hrim hrim hian min ti nû a, inlak nû a han inlak no chawp vel a ngaiin ka hre lo. 

Duty lai pawhin hunawl ka neih phawt chuan ka chunga thil thleng mek hi ka ngaihtuah nghal zel a, thawk ka la leh kawk kawk ţhin a, ka pasal tur ka ngaihtuah tel ngat phei chuan ka thaw hi chham daih mah se pawi ka ti lo hial zawk ţhin. 

Kan hun tiam pawh ka ti peih lo, ka pa te hun tiam pawh a hnai ve zel a, an inbuatsaih mup mup tawh a, keichuan ti tura min hrilh chin bak ka ti peih ngang lo. Chaw ka ei thei lo a, ka eng tih mah a tui thei lo a, Ngheti phei chuan "I tla kawk kawk mai. Chak lo mah la ei lui rawh, i pasal neih niah i lang ţha thei lo hlauh ange" a ti deuh reng a, mahse, chutianga a tih avang mai chuan ka thil ei a tui phah ngai chuang lo.

Inleng lah chu kan nei zut reng a, hlim hmel taka an han nui bâwk bâwk te hi hmuh hrehawm ka lo ti ţhin a, pasal ka neih dawn avanga lo phur ve em em ho hi chu ka hlimna min chhuhsak tuah riak a nia ka ngaih ni, kan chhungkhat hnaivaite thleng hian ka ngei a ni satliah lo, a huatin a nia ka huat hlawm ni. 

"Khawi i hmai ka lo facial ang che. Pasal neih dawn chuan an ti ngei ngei ţhin a nia, no lang deuha i lan theih nan ka lo tih sak ve ang che" ka cousin, Tleipuiin a ti lang lang a, parlour a nei ve ngei a, a hlawk ve thawkhat bawk. 

"Ût dum rum pawn biakinah lut ila ka pasal tur hian min nei dawn tho tho. Kei leh Nicholas te chu ka pate pahnih hian min delh bet hneh em, an thau dun si, an rit a, min delh nghet bawk a, kan thi lo chauh a nih hi" uar zeta ka tih chuan ka cousin te an inmelh tawn ralh ralh a, ka pa'n min melh khui thung a, kut min thlak dawn loh phawt chuan ka hlau lo. 

"Saidingpui, phun hlurh hlurh reng lo khan i hmai chu nuai tir mai rawh. In leng kan neih loh lai a nia, intuaifai hunlai tak a nih hi" a ti deuh hmuk a, ka lo ner nang nang mai. 

"Hmeichhia te hian inchei takngial pawh kan châk tawh lo a nih chuan kan rilru a na takzet tihna a ni mai. Chutiang chiah chuan ka awm, inchei ka chak lo a, inneih niah pawh awmhmun thawmhnaw nen ka kal ang" tih leh kalsawn ka rual a, "A ţawng ve mai mai a nih kha. Inchei loh hlau hlau a ni leh dawn. Ngawihsan rih rawh u" ti a ka pa'n ka unaute ho a hrilh ri chu ka hre pha a, ka rilru nat zia hrereng chung hian a haider lui zel duh a, eng ang pa nge maw a nih le? 

Nicholas nen lah kan la inhmu leh lo a, min pehhel char char hi ka lawm daih zawk. Anni lam pawh an inbuatsaih nasa an tih chu ka hria a, Ngheti lahin a nu leh a farnute fel loh zia a sawi chamchi bawk a, "Inneihniah an phur hawrh ang a, i chungah an ţha zui lo tawp ang" a ti a, min endanah chuan min khawngaih niin ka hria. Nei lo tur a min duh avanga sawi chhuak fo a ni lo a, min huphurh pui lutuk vang zawk a ni. 

"An in bulah sunhlu kung a awm a, an in gate pawn lamah daih a nih laiin tuman an lo ru ngam ngai lo, Hlim uikawm-in a chhiar vek an ti fiamthu ţhin a, vengchhung mi hi chu kan inhrechiang a, a nu leh a farnute hian fak an hlawh ngai lo. A u mipa erawh a fel khawp mai" a ti a, an chhungkaw chanchin hi ka la hrechiang ve hauh lo a, sawi chu an sawi ngun, ka beng kawrawngah a lut ve thei lo a ni ber. 

"Min hauh apiangin sunhlu ka sem chhuak chur chur mai ang" ka ti fiamthu a, huphurh deuh turah min ngai na a ka huphurh lem lo khawp mai. Duh vanga pasal nei tur ka ni miau lo a, lo lawi lut ta pawh ni ila min sawm luh a ni mah zawk dawn a, ka chunga sual nachhan tur an nei lo ka ti ve tlat. 

"Mahse nangchu i nasa tho alawm tiraw? Ka huphurh pui rual chein ka ngaihtuah vak chuang lo che. Engtik aţangin nge i chawlh ang?" tiin min zawt a, dawhkan a kiu nghatin a biang a dawm a, a kut awl lamin ka lukhum a khawih neuh neuh bawk a, ti ti dang vawrh tum viau mah ila inneih chungchangah bawk kan let leh tho ţhin. 

"Ka chawl peih lo e ah. Theih phei se chu damdawiinah hian nitin zantin awm chawt ila ka duh ber. Ka chhungte leh midang hrim hrim pawh ka hne vek" ka tih bawrh bawrh lai chuan "Mi chu bazarah te an kal dun ţhin a nia, bazar lam te hi engtin nge?" a ti a, ani kha ka bazar pui lul lovang.

"Duh leh a nupui fanaute nen bazar rawh se. Diktak chuan ka hmu peih hlawl lo alawm" ka tih chuan min lo hnial deuh dawn a, mahse, "A ngeiawm thiam zia i hre lo mai mai a nih kha" ka ti hlak a, kha mihring kha ka pa duhthlan chu a ni ve sia, ka ngainat theih pawh ka ring lo. 

"A buaithlak e...engmah hi ka hrethiam tawh lo. Fa te duh lo chung chu nawr luih loh mai tur a nia, ka khawngaih che emai" a ti deuh hluai a, a changin ka pa thu zawm turin min tia, a chang leh ka pa a huat zia min hrilh a, ka ţhianţhaber pawhin awmngaihna a hre bik lo. 

Zanah phone number hriat loh aţangin call ka dawng a, ka en vang vang hnuah ka la chu "Eng nge i duh?" a rawn ti nghal thawr a, mak ka ti angreng khawp mai.

"Tu nge i nih pawh ka hre hleinem. Engmah ka duh lo" a awki ang chiaha nelawm loh a ka tih chuan "Min rawn be rawh se i ti fo a ni lawm ni? Eng nge i duh?" a rawn ti nawn leh a, chutah meuh chuan tu nge a nih hrilh nawn ka ngai tawh lo. Min ngainat loh lutuk avanga a hmel dur deuh khap reng kha mitthlaah a awm nghal a, keipawh ka sa ve nghal phat mai.

"Chutiangin ka ti awzawng lo. Ka phone number te hi tu nge pe che? I telloin ka ti vek thei" ka tih ruala a nui suk ri te chu ka tan chuan ngeiawm zual duh tak a ni. 

"A ţhat nasat chu. A nghahhlelhawm tawh khawp mai Pate" min tih el awka zeta a tih chuan phone ka dah hmak a, tu nge maw ka duh anga lo hrilh reng reng ni? Ka mamawh loh lai tak a ni zawk hial ang chu. A thinrim rilruna tih vak ngaihna hre lo hi keimahah a ţuan a, ţawngkam chhe tleuh nan tak min hmang a, chutiang mai mai tur chuan ka inphal bik lo. 

"Ka pa ka sawi pui leh a ngai" ti leh ţhin mah ila phur deuhin an inbuatsaih mup mup reng bawk si, ka nu min enkawl danin a zir lo nge ka tlaw vang hrim hrim ka hre lo, thla thar lawka pasal nei mai tur ka nih laiin chaw chhum bak thiam ka nei vak lo a, artui leh alu kan mawl tawp tih loh chu chawhmeh han siam thiam em em ka nei lo. Ka pasal chhungte chu eng mi pawh lo nise hetiang teh tawp a mi mo nih chu ka hreh a ni. Pasal min neih tir nachang an hria a, hmeichhiain an thiam ngei ngei tur thil min thiam tir nachang an hre leh chuang si lo. Enganga nasa pawh lo ni ila ka mona ah chuan ka rethei tho tho ang. 

💛💛💛💛💛💛💛

(A zawmna aw)

"Mipa hmelţha tak leh sang ţha zet zawt tak mai a nia lawm. Hmeichhe tam takin neih tumin an hel nasa ţhin khawp ang chu. I vannei viau a ni lawm ni? Reiloteah a zûnah i uai mai ang" ka nu u fanu, U Btei chu ka ngei lek lek a ni. Ka pindanah rawn lutin min rawn hnaih seuh seuh a, 'a rilru hmin tum rawh' an ti pek aniang chu. 

"U Bte, ka rilru hmin a ngai tawh chuang hleinem. Hmin lo viau mah ila ka pa duhdan a ka kal tho a ngai a, an thil tih ang hi hman lai thil a nih mai bakah ring lo mite tih awm tawk chiaha ka ngaih ţhin a nia, ka chunga a thleng ve ta mai hi ka awih theih loh rualin ka pawm a ngai tho a, ţap vak vak mah ila biakin chhungah a duh ber neiturin ka pa hian min hnut lut lui tho ang" tiin ka lo phun sap sap a, khum mawng kilah ka ţhu tawm tlat a, tuman min tibuai lo se ka duh ber. 

"Ka rilru tak tak alawm ka sawi. I rilru hmin ka tum vanga fak chawp ka ni lo. A hmelţha takzet a ni. Mizoah te chuan hetiang bak an awm chuang dawn em ni?" ti a min zawh lai te chuan hnuai lam bih san daih chuang lovin ka khum puan phah ngawt chu ka la en a, midang mamawh rih lo viau mah ila, "Hmel hi a pawimawh ber hleinem. Vawikhat hmuh naah chuan a pawimawh maithei a, chu zawng chu a ni mai. Hmel hi chu langsar viau mah se hmuh kân awlsam ber a ni tel tho a" tiin ka chhang ta tho a, rilru a inhmuh tawh chuan hmel a langsar ve tawh ngai lo. 

"Aaa...ka hrethiam tawh bik lo. A landan ngau ngauah chuan sawisel tur ka hre em em lo a, amah la belchiang ve lo ta na na na chuan eng ang mizia nge a neih tih te pawh ka hre chuang lo" a ti nawi niai a, keipawh chu chu ka buaina pakhat a ni. 

"A bulah awm reng mah la a mizia i hrethiam mai thei lo ang. Hriatthiam a har lutuk...mihring maksak tak mai mawle. Theih phei chu nise mi thiam ho zirchian tir a nia ka duh ni" ka ti hlak hlak a, ka thawk a rangin ka awm a tawt leh ţup tawh a, U Btei nuih laiin keichu ka thin a rim leh hle tawh a ni. 

"I la zir chiang dawn a nia. I hriat tur chu maw...mihring hi kan landan ang ngawt kan ni ngai hauh lo a nia. Hlim ber anga lang hian lungngaihna thuk tak a pai ru reng thei a, chapo leh inti vei ve deuha kan ngaih te hian thinlung nem tak an lo nei reng thei. Kan mi hriatchian emaw kan tih te pawh hian hmaikawr an vuah fo ţhin a nia. I pasal tur mizia pawh i la hrechiang thuai mai ang" dam deuh dap hian a ti malh malh a, ka hrechiang chak lem lo khawp mai. 

"Khatiang zawngah kha chuan buai duh suh Saii, nang chu kan hrechiang che a, engang mizia pawh nei se thla khat a ral ang a, a mize ngai bo ţhak khawpin i chawk ho leh vek mai ang" a tih chuan rang zet hian a lam ka hawi a, sawi sual a intih hmel viau nain a nui tho a, an â vek tawh chu a nih ber hi. 

Ni a liam ve zel a, ka hun tawn mek chuan min ti danglam zo a, ka thin a chhiain ka bak hlur reng a, damdawiinah pawh ka kal tawh rih lo. 

"Tui hi lei kan ngai ngei ngei ang. Haw ţha se chu kan indaih dawn lutuk a sin mawle" Liantei chuan a ti leh ţhin a, eng emaw seh rep rep pahin tv ka en a, min en kân ve mai dawn emaw ka tih laiin "Saii, nang lo va vil ve deuh teh. U Hrangi sawn min lo herh tawp sak daih zel a, kan lak tam hman loh chuan tui kan nghei mai dawn a nia" a ti leh zat a, apron a awrh a, chhun a kan thil eina vel sil tur a ngah ngang mai. 

Ngawi rengin ka chhuak ve mai a, ţhenawmnu nen kan intawk a, ka nu ţhiannu ve ber a nih avangin man a ei ve dawn a, a phur zia a sawi luam mai. A rul tawk lek lekin ka chhang ve zel a, tui vil a ngaih thu sawiin ka kalsan thuai a, an hneawm hlawm tak tak a ni. 

U Hrangi chuan a lo herh tawp ngei a, henu hi a sual hri hre reuh tak tak a ni. Ka on leh rualin thil tisual lo ang maiin a rawn kal a, an in bul chiah a ni bawk nen, a inti neitu bik riau zel.

"Kan tui hi lo herh tawp tawh suh aw U Hrang" pangngai taka ka tih chuan "Ka herh tawp hlawl lo e a. Inchung sangah tuizem in dah a, a pawt chak lo aniang chu. In duh ang in dawn loh apiang hian 'i herh tawp' min ti ve ziah suh u aw" a ti nghal kha kha a, a dawheh ziap zuap bawk sia maw. 

"In hnaih ber a, kan awm loh veleh i lo herh tawp ziah alawm. Tupawn kan hre vek a kan haider vel mai mai a nih hi. Mi tui herh tawp sak ching lo la tui haw ni apiangin inhnial pui i nei lo tawp ang. Nangmah ang vek a nasa phei chu ni ila kan insual buan buan tawh ang chu. Tui hi mitinin kan mamawh vek a, mi harsa, tui leina tur nei lo tam tak an awm bawk. Tlem tlemin kan insem rual thei vek a, midang lo huphurh viau kha a ţul hran lo" ka ti ve ta tan tan a, kan indin hnaih tawh khawp mai. 

"Chutianga min rinhlelh viau leh tui haw ni apiangin rawn ţhu nileng zak zel la ti nia" a tih hnuah "I pasal neih dan tur pawh ka hre vek. Ka haider mai mai a nih hi" a ti leh kher a, U Hrangi inhauh pui chu ka hreh ve tho si, amah ang nih an hlauh avanga an ngawihsan mai mai ţhin kha a nia, ka insum nasa kher mai.

"Pasal neih loh ai chuan a ţha tho tho" ti a kal mai ka tum chu "Tuibur leh uite ka neih chuan ka duh tawk" a ti leh hram a, a dang duh ngai ţhak lo. 

"Lo herh tawp tawh suh ang che. A nih loh chuan ka rawnkal leh dawn a nia" ka tih pawh chuan "I thu lo ve e..ka kut a nia, ka thu thu" tiin duhdah deuhin min la chhang tho a, thinrimna nei sa lai mah ni ila U Hrangi zawng ka ngam ngang lo a ni. Tun aia a la naupan deuh lai, nun a hman dik loh ve deuh laia zu kawl ruk ve zeuh a chin lai pawhin a zu man sak tuma kal te kha 'ka lo khilai ang che u' a ti hem mai an ti a, zuam ngawt chi a ni hauh lo. 

Tlaiah ka cousin te an lokal khawm a, min ngen tlat avangin kan mo kawr hawh chu ka ha chhin a, ka unauten i duh ang thlapin ţhui chawp tir rawh min ti tak nain ţul ka ti lem lo, tlawm zawkin a hawh theih tho a, a awlsam zawk bawk. 

"I inhmeh hle mai..Tleipuiin a chei che ang a, i lang nalh dawn lutuk" an tih loh leh "Ka rin aiin i inhmeh daih mai. I pasal turin a endan che pawh a danglam nghal vek ang" an ti lang lang a, 'i pasal tur' an tih rual chuan ka lo ner nak mai. 

"I hak chhin chiah khan i hmai chei dan tur ka hre mai" Tleipuiin a lo ti chat a, a hna hi a hnehsawh mai bakah a inti hnehsawh ngawih ngawih bik ti ila ka sawisual tam lo ang. 

"Man hlanna a hak tur kha dahchhuak tawh rawh aw. Ngheti pawh zanin chu a lo riak dawn a ni lawm ni? Tleipuii a lo riak bawk ang a, eng eng emaw tih tur a tam lutuk" Zikpuiin a ti zat zat bawk a, kei erawh ka bing mup mup reng mai. 

Kan inah man kan inhlan dawn emaw ka tih laiin ka chhungte chuan hmun dang an lo hawh chawp diam a, chu hmun pana kan kal lai chuan ka mittui a tla ve ta nge nge a, driver bulah Tleipuii ţhuin a ţawng zat zat lai chuan Nghetin ka kut a rawn vuan a, ka hreh lutuk chu ka inti pachang lui thei tawh ngang lo a ni ber. 

Midang aiin kan kal hma lui deuh bawk a a hmun kan thlen chuan muangchangin kan insiam a, kawr te kan hak fel chuan Tleipuiin min chei zui mawlh mawlh a, "Mi tih loh dan deuhin pasal nei dawn mah la nalh deuhin ka chei tho ang che" a ti a, a nui har har reng a, nuam a ti bik khawp mai. 

Nicholas te pawh an lo thleng a, min hmu anga a awm duh loh mai bakah a rawn kal hmain an hau hrep emaw tih mai tur hmel a pu a, mi an rawn kal pheuh pheuh reng a, a chhunga kan luh hnu chuan kan ţhu dun ve ran a, min be lova, min biak ka beisei hauh lo bawk. 

Ka thawhpuite ho hmel ka hmu phei chu ka ţap lo chauh a ni. An nui sang hlawm a, min lawmpui hliah hliah hmel an pu vek ka ti mai, hlim viau turah min ngai a nih ka ring. 

"Nicholas, mi an tam tak tak hmain eng emaw in ei duh em? In duh chuan ka lo pek tir ang che u" hmeichhe pakhatin a rawn tih chuan "Kan ei tawh" tih chiahin a chhang a, a ţawng ring lova, a vin hauh lo bawk a, a aw chu a nelawm loh viau thung. A rawn zawt tu lah chuan "I chhe hmek hmuk e a" a ti hlak a, nichin lawka ka cousin pakhat nen an lokal dun ka hmuh bak ka la hmu ngai bik lo nain an in ngamtlak danah ţhian hnai tak an nih ka ring. A sawm ni hauh loin a hmelhriat pakhat a rawn tel ve a nih hmel. 

Rin aiin mi an ţhahnem daih a, man hlanna hun kan hmang zo chu ka ni deuh luk a, ka pangngai hleithei lo. Chibai tu lah chu ka ngah phian a, ka lawmpui che an ti zel lehnghal a, pasal neih ka hreh zia hre hlawm se chu min lawmpui hauh lo ang mawle. Min khawngaih hial zawk maithei a ni. 

"In inneih niah phei chuan mi an tam viau ang" ti tu ka en chu ka meng zau kawk ang ka ring. 

"U Hrang, eng nge i lo tih ve a?" ka ti hluai a, a nui sang a, a inchei nasa khawp mai. 

"I nu'n min sawm ve alawm" a ti then a, a kalsawn hnu te chuan ka en zui reng a, ka pute ho zinga ka nu ding ve chu a va pawh a, a hawi kual nasa mai. 

Ka cousin te ho lah chuan thla an la chuai chuai reng a, Nicholas te ţhian dun pawh an la awm ve a, min hmu dun duh tawk an awm reng avangin ka dinna piah deuhah bang nghengin thatchhe deuhin a ding a, a kut a kuangkuah hlun bawk a, a mitmeng nelawm loh zet chuan keimah ngawt min en emaw tih mai turin a lam ka hawi apiangin kan mit a intawng chat zel a, kan hun hman mek chu a nin zia ka hai hauh lo. 

"Pasal i nei ţha dawn khawp alawm. Vawiin chu i nalh ngei mai" ka piin a tih lai chuan ka duh vang ni hauh lovin Nicholas-a dinna lam chu ka hawi leh a, ka pi nen kan en tih hre lo ang mai hian a kekawr ipte aţangin phone a phawrh a, screen a en vang vang hnuah phone chu a bengah a chuk tuah a, chhuah mai a tum lai chuan ka pi nen kut invawn sak tlat chunga kan ding chu min rawn hmu ve ta hram a, a inthiam lo ve deuh aniang, 'min lo hrethiam lawk' ti ve ang hrim hian tawi tea nuih pahin a kut a lek chhuak zauh a, phone vuan ran chung chuan a chhuak nghal nul nul a, ka pi pawhin engmah a sawi zui tawh lo. 

A nawlpui an haw ta maw tihah chuan min rawn pawh ve ngei a, ka mamawh lem lo a sin mawle. 

"Eng nge?" pangngai thei ang ber a tih pah hian amah en tumin ka dak a, kei aia a san daih avangin min chhuk en run a, huaisen viau lo ila chu a mitmeng chu ka hlau ngei ngei ang.

"Lungawi lohna i neih chuan sawi vat law law rawh" ka ti leh a, nilengin lungawi lo hmel a pu a, ka hne ve tawk tawh. Kan pahnih chunga thil thleng mek hi lungawi deuhin ka pawm hmak bik lo a, ka pa'n min nawr luih vang a ni. Mahse, ani ang em hian ka hmel hmuh a hrehawm ve lo ang.

"I hlim hmel hle mai" bul zet hian a ti a, huat hmel deuh hian min en bawk a, ka thiam loh vekah a ngai leh tawh a nih hmel.

"Thinrimin ri rum rum ta ila ka nu'n a zo lo leh ang a, ka pa hi hrechiang la chu min dem hauh lo ang mawle. He thil hi ka duh dan a ni bik lo tih hria ang che. I khawsak dan hi a khamawm khawp mai" ka lo ti ve a, thinrim viau e ti lo chuan ka ţawng ring bik lo. 

Chutah rawn kun hniamin hnai set sawtah min en a, chhe te pawhin ka zam eih lo. Engahmah ka ngaih loh lutuk vang a ni ber ang a chezia engmah hian min la ti ţimin min la ti tim chhin lo. 

"Inchhir hauh suh ang che" a ti a, thawklehkhatah a hmel chu inthlak thutin nelawm deuha nui chung hian a ding ngil a, keipawhin ka hnunglam ka lo en ve thuai a, a ţhianpa a lokal vang lek a ni. Lawma a nia, a fel khawp mai. 

Inchhung ka luh rualin inchung chhohna kailawn ka pan ding nghal a, ka chauh mai bakah ka luak a chhuak nghulh a, tuman min be ţawng zo lo. 

"Pasal i nei tawh mai dawn sia, a mak e...mumang ang ruai reng ka ni. Vawiin phei kha chu hmuh i nuam teh mai a nia" Liantein a rawn tih te chuan ka sam kilhna phelh pah hian, "A lawmawm a nih chu" tih zawngin ka chhang a, amah pawh ka en kher peih lo. 

Inneih ni a lo thleng a, ka huphurh ngang mai. Engkim phur lo deuhin ka ti vek a, rehearsal thlengin. Nicholas lah chuan min dem zawngin ţawngkam a nei reng a, pangngai deuha min biak awm pawh ka la hre lo. Kei lahin ţhat ka chhuah lui thei bik bawk si lo a, kan inmil dawn hauh lo tih chu kan chhungte ve ve pawhin an hriatchian ka ring. 

Biakin chhunga kan lut te chu ka ke a na ut ut a, music an lo ti ri riai riai a, ka la kal rem thiam lo zui. Thla lah chu an la char char a, video a an cover ngat phei chuan ka en nawn leh ngam kher lovang. Min kai lut tu ka pa lah kei ang bawk a zei lo a ni ve a, in mil lo, inbe hleithei lo si kha music rem a kal tum ve ve tih takah kan insi leh chawt zel a, kan su phei dun auh auh a ni ber. Biakin chhungah lah mi an khat vek tawh a, min nuih ru tet tet hlawm ang ka ring. 

A bula ka ţhut rualin ka pasal tur chuan min lo thlekin hriatthiam harsa deuh hian min en a, a hmel nelawm loh ve zet chu a langsarin hlim hmel a pu lui thei thlawt lo a nih hmel a, kan inneih thlalak chu en tlak a awm lo viau ang le. Kei erawh chuan ngaina lo viau mah ila a suit hak chu inhmeh ka ti khawp mai. A taksa nen pawh a inrem thlup a, a rawng chuan a ti langsar bawk. 

Zungbun kan inbuntir dawn lai chuan ka awm hi eng nge a nih pawh ka hriat loh hian a hnawh phui tlat a, a tawt lutuk chu ka thaw a chham ang a, ka tlu mai ang tih te pawh a hlauhawm. Ka chhungril hrehawmna chu a langchhuak rang hle a, ka kut ka dah chhuah rual chuan a khur dar dar a, a langsar hauh lo nain ka kut a rawn vuan tu Nicholas chuan a hre nghal chat a ni ngei ang min thlah hmain ka kut chu a vuan nghet salh a, min thlah zui nghal mai mah se a chetzia ho te a min ngaihsakna a lantir chu tunah tak chuan ka mamawh lutuk tlat a ni. 

Inneih hunserh kan hman zawh chuan biakin kawtah thla kan la a, min lawmpuitu an ţhahnem kher mai. Thla kan lak lai chuan "Ka ke a na tawh lutuk" tiin Ngheti chu ka hrilh leh ţhin a, "A zo ţep tawh ang..tuar hram hram rawh" a lo ti mai zel a, ka din dan ka siam rem tak sekah chuan Nicholas bawk chuan a ning leh tawh aniang, "Phelh rawh" a ti hmuk a, "I thu lo ve chiang emai" ka lo tih chuan, "I ke a lang lo ang, va phelh lawk rawh" a lo ti leh a, a kut a la sawn nghal hmak bawk. 

A chet dan chu midang pawhin mak an ti deuh niin a lang. Min en ţhap lai chuan a hnaih ber a ding bulah chuan, "A pheikhawk thlak a ngai a" pawisawi lo awm tak hian a ti a, min kawk pah bawk nen, ka zak kher mai. 

Ka zai ngai deuh hian biakin chhungah min kai lut a, mi hmuhah chuan nupa inmil tak kan ang viau awm e. Ţhutthlengah ka ţhu hnawk a, ani pawh ka ep chiahah a mal a a kiu nghat chung meuh hian a ţhu kun ngul a, inhma tawnin kan ţhu nain a hmel ka hmu thei hauh lo. 

Ka pheikhawk phelh pah chuan, "Sual viau mah la ka lawm e. Vawiin chu min pui nasa khawp mai" ka ti a, min chhang lem lo. 

Hna ka neih tawh avangin keimah ka inngaihtuah thei a, innei mah ila ani hi ka mamawh hauh lo ang. Mahse, mihring chuan chak loh chang kan nei a, nichin mai a a chet dan te kha ka beisei loh tawp a ni. Ho lam te mah nise ka lo hrechiang khawp mai. Ka ngaih ang em em a sual a ni dawn lo aniang ka ti rilru a, ka ngaina lo a, ka haw takzet bawk. Chuti chung chuan a chet dan ho te khan fel na lai a nei ve niin min rin tir phah a ni. 

Ka din rual chuan a lo dak chhuak a, ka ngaihtuahna hria niawm takin ka mit a min en ran chung hian, "Min ring rawh, min nei hi nuam i ti hauh lo ang" a ti zawi ruih a, a nui tel kher bawk nen, miin an rawn hmu a nih pawhin thu hlimawm tak kan sawi dunah an ngai nghal thei hial ang. 

Kan inzui chhuah leh chuan Nghetin min lo ngaihven thuai a, kan tih ang hian midangin an tih ve awm pawh ka hre lo. Mahse, hunserh ber a zo tawh a, thla min lak pui tum tlem te chauh an awm tawh bawk a, tu mit mah kan ti kham em lo ang chu. 

Kelawnga ding mah ni ila ka ke a lan theih loh miau avangin thlalak chauh en chuan an hrethiam kher lo ang. Ka bula ding chu ka melh zauh a, ka thaw zui hak a, thlalak zawha amah ka en leh lai chuan ka lam lo hawi vein kan mit a intawn rual chuan a kiai suk a, thil ţha lo tih tum hmel te pawh a pu alawm le. 

Ka ţhiannu hnenah chuan "Ka hlau hlawl lo" ka ti ta ringawt a, a mize maksak zet hi hriatthiam a har a, hriatchian ka chak phah hauh lo thung. 

CONT...(Lo chhiar ţhin tu te in fel lutuk e🥰)