HIS LAST LOVE-3

HIS LAST LOVE-3

"Rawn zui luh cheu ka tum a, mahse miin min lo be sek a, a chhan te min zawt a, ţhian ngam tlak zual chiah an awm tawh hlauh a, ni lo se chu a zahthlak viau ang" Nghetin a tih chuan ka lo thaw hak a, ka thusawi a ngaihven hlawl lo. 

Chawhnu lama inkutsuih kan ni bawk a kan in a haw tawh lovin ka lawi tlang a, an in chu a lian viau nain chhawng hnih chauh a ni a, a hnuai berah garage a awm a, chumi chhiar tel chuan chhawng thum a nih ber chu. 

Inchhungah chuan kan ţhu dun leh ran a, kan inpawh loh chu thuhran, kan inhua a ni ber zawk a. Chuti chunga ţhut dun fo a ngai chu a hneawm khawp mai. Pheikhawk pawh ka bun veleh ran tawh a, ka lo phelh ting tang tawh avangin ka ke hnuai a ngap hrup a, a hahdam loin inthlak thawl aia thlakhlelh ka nei tawh lo.

"Sawi tur an hre hlawm hle mai" ka bula ţhu chuan a ti deuh hluk a, ka melh zawk a, min lo en ve lem lo. Hun hmang tura ding apiang chu rum deuh deuhin a lo melh ţhin ang ka ring. 

"Ngawi hle hle la a nih chu. Dawhthei lo viau suh..nang aiin ka ning daih zawk" amah hrilh ru ang deuha lang si hian ka ti a, ka hmuh atana ngeiawm deuha a nui vel chu miin an hrethiam ve dawn mang si lo, min hual vel tu te tan chuan hmuh nuam tak kan ni ngei ang le. 

"I la ning tial tial ang, tun hi a bulţanna chauh a nih hi" ka lam a rawn thle hnai chung meuh hian a ti a, thil pek min pe duh te an awm avangin min din tir hlauh zawk a, ni lo se chu kan inhnial nasa hman viau maithei a ni. 

Kan ţhut leh hnuah pawh chuan a la duh tawk mai lo, "Engpawh thleng se ţap hauh suh ang che" thupe aw zeta a tih chuan, "I thu lo chiang emai" sehchilh zet hian ka ti a, nui sang angin ka lang tho maithei a ni. 

"Mittui hi ka haw viau a nia" ka beng zawna a rawn tih leh chuan "I hua a ni mai lawm" tih paha a lam ka hawi chu min lo en ran chungin ngeiawm zet hian a kiai suk a, felna lai a nei ve nia ka hriatna te kha ka sût leh vek tawh. 

Chaw an dawh ţan tihah kan pindanah inthlak turin kan lut a, "Engati nge in ţawng reng a? A mawi lo thei emai, mi inneih loh dan deuhin innei mah ula reilote chhung chu ngawi ve rih mai ta che u" Nghetin a ti hlak hlak a, ka chhang lem lo. A awmdan ngeiawm lutuk kha en liam mai mai har ve deuh a sin. 

Ka insilfai a, ka inthlak zawh thlap hnuah pawh Nicholas chu a lo la lang chuang lo a, pawi ka tih vak loh tehreng nen, "Khawiah nge an awm daih ang le? Awii...nangni pahnih hi a ni lo zawng hlirin in awm a, mi paw'n mak an ti ang che u. Vawiin chauh tal chu pangngai deuh a awm tur cheu nia" Ngheti zawkin a ti leh ţhin a, "Ngaihven vak lo teh. Kan inneih dan teh nuai hi ngaihtuah ta che, kan pa te pawn mawi an zawng lo a, keini pawhin mi hmuh a mawi kan zawn bik a ngai hleinem" ka ti hlak hlak a, ka nu chu ngaihtuah lo ila tunah hi chuan vairamah, ka pa'n min hmuh hlau tawkin lukhum lianpui nen ka kal kual zak zak tawh maithei a ni. 

"Nicholas chu aw...engtikah nge chaw kan ei ve dawn? A va han nikhua lo reuh tak aw" a la ti vang vang tho a, keiin, "Ka chhungte ka ngai nghal der mawle..ka huat reng ka inrin tehreng nen" ka lo ti ve thung. 

Rin loh deuhin a u zawk Anthony a rawn lut hlawl a, ka chhungte sawi hmangah kum zawna piang an ni awm e. Mizoramah pawh a awm vak ngai lo an tia, Ngheti ngei pawh hian a fel zia sawi pahin a hmuh khat thu a sawi tel ţhin. 

"A rawn la let lo em ni?" ti a min zawh chuan ka lo bu nghat ringawt a, thawk deuh hawk pahin a sam a tuai puat a, a mitmeng buai nak te chu hmuh hmaih theih a ni lo. Mahse, keichu ka ţhu mai mai a, engpawh tawk se pawi tihna ka neih miau loh avangin a mawiah pawh chanchin ka zawt buai peih lo. Kan inneih dan an hre vek a, rilru na a ţap par reng turah te min ngai ang tih te a nia ka hlauh ni. 

Anthony chuan phone a phawrh a, a hmeh mual mual hnuah a bengah a chuktuah a, a ngaithla vang vang a, a biak tum a be thei lo aniang phun hluk chung hian a kut chu a thlak thla leh hnawk a, a hmui hnuai a seh zui nauh nauh a, a rilru a buai hmel khawp mai.

"Tu nge chhe lo i tih zawk?" naupangchhia zet a Nghetin min hrilhruk sar sar chuan kan piaha ding pa chu ka en a, pangpar ang bakin ka hmu chuang lo. Suit pawl a ha a, coat hnuaia a kamis hak chu a awm thleng velin a kilhna a phelh thla vek a, coat ipte ah duhdah zetin necktie a ak a, ipte chhunga a hnawh luh kim loh ho phei chu a chhuak tun mai, chumi ka hmuh chuan ka ner nak a, iptea kan thil ah tlem te chauh pawh a lo lawr chhuah hian ka ngaithei ţhin lo. 

Nicholas aiin a upa deuh zawk nain a nau chu a chen lo deuhin ka ring. An vun rawng pawh a danglam khawp mai. Nicholas chu a vun a uk deuh kharh a, a sam a dum hlap a, a mitmeng a thip ram reng bawk a, a biang leh khabe vela hmul ţo te chuan a u ai hian a ti lang upa zawk bawk. Anthony erawh hi chu a vun a ngoin a sam pawhin a uk lam rawng a pawl a, a inhmeh khawp mai. A mitmeng chu a fiahin a dam deuh raih a, a kutzungchal ve ve ah chuan zungbun a bun tih phone a khawih lai vel khan ka lo hmu a, a kamis hma a inhawn huai avangin ţhi tawi te a awrh chu ka hmu thei bawk a, tlereuh a lawm ve hle a nih hmel. An hnar ngul sang vah leh an sam kir deuh ve ve chu an in anna awmchhun a ni hial awm e. 

"Saii" tiin ka hmingin min ko ve ngei a, a aw pawh a nau ang chiahin a thum a, ngaihthlak a hahdam zawk thung. 

"In ril a ţam tawh em?" tiin min zawt zawm zat a, min rawn pan hnai a, khum bulah chuan dingin phone chu a ak ţha a, "Ţam lo e...chaw ei ka chak vak lo zawk a" ka lo tih chuan, "A nawlpuiin ei zo se nakinah in ei ve dawn nia. In ţhiante hoin hmuh cheu an in beisei maithei a ni" a ti a, kan ţhiante ngaihven turin min duh deuh niin ka hria. A chhuak nghal daih lehnghal a, kan awmdan teh hrep chu ka ning tawh hle a ni. 

Inchung daiha awm kan nih vang nge rin aiin mi an lo chho lo a, lo chho chin chu awm tho mah se rei an awm ngai lo. Inhnuaiah kan chhuk a, ka thawhpui ţhenkhat te pawh lo la awmin an hnenah chuan chhuanlam ho te te ka siam a, inchungah bawk kan chho leh a, khua pawh a thim fel der tawh. 

"Ei san mai ang" ka tih lai mekin pindan kawngkhar chu a ri rawp a, Nicholas-a rawn lut chu a sam a pawr deuh phung tawh mai. Necktie a awrh tawh bik lo a, a coat hak lai chu a hlip sawk sawk a, khumah a theh thla tawp a, a chet dan chu ka huat zawng tak a ni. Anthony leh Lawma ten lo zui lutin Lawma chuan inthiam loh hmel takin min en a, ka lo nuih sak thung a, Nicholas hi a ni ka ngei ber mai chu. 

"Mi an rawn kal ve reng a, khatin theh hlawm tawp mah ta che" din hluai paha ka tih chuan hnai set sawtah min enin, "Ţawng tam lo mai teh" a ti hluk a, zu rim a nam ram ram mai. A kamis ban a thlep chho zui mawlh mawlh a, a mit lah chu a sen deuh ram lehnghal. 

"Eheu...kan setana chuan tuibur a hmuam a ni maw" elsen zet a ka tih chuan Lawma leh Anthony te an lo nui hawk a, ani zu in mai mai kan lo nghak reng ringawt a, ka ţhiannu a ril a ţam tehreng nen, zu inna hun a ni lo hrim hrim.

Chaw kan eikham hnu chuan ka chhungte pawhin kan pindan thar chu an rawn en ve zawk a, hetiang hunah hian hmeichhe chhungte an tel ve tawh ngai lo ti tawk an awm ţhin tak nain ka chhungte chu an rawn tel ve zel a, chaw pawh an ei thlap a, min hawsan mai tur chu huphurh tak tein ka huphurh a, Nicholas-a bulah chuan mahni chauhin ka awm peih hlawl lo a ni. 

Kan ţhiante an rawn lawr ve sek bawk nen kan ri nak nak reng a, ka pasal ve erawh chu kil khatah a ţhu ngawi ngul a, phone a bih reng ringawt a, ka thawhpui te ho pawhin an melh hrek hrek ringawt a, tuman biak enah an en lo. A hna chelh lai leh a mize naupangchhia lutuk hi inrem lo an ti ve ngawt ang. 

"Hmun dangah riak chhuak daih ula a nuam zawk ang mawle" Liantein a tih chuan, "Ka peih lo, kan pahnih chiah phei chuan awm ila kan inthat thei hial ang chu. Inţhen ka duh ka ning, ka peih tawh lo" ka ti nghal zung zung a, ka nu a che rang khawp mai. 

Min pawt kal dawr dawr a, pawnah min chhuahpuiin midang hriat ve loh tur hian "Ţawng fimkhur ţhin rawh ka tih che kha. Ngaihtuah chiang mang lovin i ţawng chhuak phawng phawng zel ringawt a, nichin a i thusawi te kha i hria em?" a ti a, dar ka lo san ak ringawt a. 

"I hre lo em ni?" a tih chuan "Ka ţawng hnem tawh e..ka hre vek thei tawh bik nang. Ka rilru buai zia i hre lo a nih kha, in hre duh lo zawk nge pawh ka hre lo. Zanin pawh reilote chhung chauh ka la hriat nen pindan kan inţawm dawn chu a nia, ka tawt up up a, ka hah vek tawh. Ka hah a ni tawp mai" ka ti bawrh bawrh a, ngaihzawng nei ngai hlei lovin pasal ka nei ta mai chu a nia, ka hlau a, khaw thim hi ka ţih tlat a, thil thleng thei awm ang te ka ngaihtuah phei chuan ka ţim a, mawng a za ve mer mer thei mai. 

"Zanin chu hahdam la, i hriatna te a lo fim ang a, naktuk aţang chuan i zia tawh mai ang. I thawmhnaw hak hi ka duh lo hle mai" ka tshirt hak lai pawh paha a tih chuan, "Luruh bula heavy metal tih inziak mai mai a nih hi..i ngaihmawh a ho emai" ka ti a, ka sawi tum pawh ka la sawi hman lo, ka kekawr hak lai leh ka slipper thlengin a en thla zel a, ka lan ţhat duh ber tu ka nu chu a lungawi loh hmel khawp mai. 

"I pasal farnu te pawh hmeichhia angin an awm kha. Hetianga mipa awm ţha duh lo ang maia i inchei reng chuan an nuihzat mai ang che. I naupanlai aţang khan ka lo zirtir lo che a ni aw" a ti vang vang a, hmeichhe fa hi chu zirtirna pek tam kan ngai reng a sin. Anmahni kan khawngaih vang leh awmpui nei pha chin kan nih avang ringawt te hian chhawr loh tur tihna pawh a ni chuang lo, thiam neih loh chuan pasal neih hnuah anmahni bawkin hrehawm an ti a, nu te an mualpho ber thung. 

"Ka thawmhnaw neih hoah i duh ang chi a awm reng reng hleinem. Tunlaiah chuan rilru zau an pu tawh hlawm a, thawmhnaw vang mai mai chuan min nuihzat lo ang. A man a to hlawm tehreng nen, an nuih phak a ni lo" ka tih tan tan lai te chuan zaizirin min lo khap ve char char a, "Naktuk zingah hma deuhah tho la, i nu leh pate thawh hmaa thawh tum rawh aw. Thingpui te i lum ang a, an rawn thawh hunah eirel dan te i zawt ang a, chhungkaw tin hian tih dan phung kan nei hrang ţheuh a, naktukah i nu hrilh ang zel chein ti la, nidangah chuan nangmah paw'n i ti thei tawh mai ang" dam thlap hian a lo ti a, ka nu meuhin chung thu min han hrilh ta chuan an hnenah ka awm tawh dawn lo tih min hriatchian tir lehzual a, ka ţah a chhuak ve ţeuh mai. 

"Alu leh artui kan bak ka thiam hleinem" ka tih chuan mangang hmel a pu tawh a, naupan tet aţangin awmpui kan nei char char a, siam sa kan ei tawp ţhin a ni ber a, rin tur 'u' ka lo nei lehzel nen, ka nu'n min tir lui ngai bawk si lo a, engmah thiam ka nei lo takmeuh a ni. Pasal neih vat ka inrin loh chu thuhran ni ta sela, ka thiam nei lo hi vei em em ngai lo mah ila tunah chuan ka zak khawp mai, ka inzahpui a, sawi reng pawh nuam ka ti lo. 

"Thil dang siam te pawh i zir chawp ang a, i thiam hma chu alu emaw artui ringawt pawh kang la i pa Chhawna te chu an lawm tho ang" a ti a, a inthiam chiah lo niin ka hria. 

Ka nu kal tum tawh chu a puan bah laiah ka pawt a, rang deuhin a lo inher leh a, "Nu, ka pa hi a ţhianpa nen inremsiamna lo nei pawh nise Zikpuii ni lovin engatinge keimah zawk ka nih a?" ka ti a, ka aw chu a lawi rût tawh a, intih pachan tum ve viau mah ila a harsa takzet a ni.

"I ţhatna tur a duh vang alawm. En kual vel la, in nuam deuhah i awm dawn a, i pasal lahin hna ţha deuh a nei a" a ti a, pangngai deuh anga lan a tum nain ka nu pawh chu a dik tawh lo. 

"Ka pa hian min duat tho rualin ka unaute aiin min endan a danglam tih chu ka hre ru ve tho alawm. Hmeichhia anga ka khawsak loh vang maiin Tuaite min tia, ka unaute chu an tuina lam apiang a tih tir laiin keichu ka tui loh zawng hlir min tih tir a, mipa an i tum tih vang ngawtin pasal min neih tir a" tih pahin ka nu ban bulah chuan ka vuan a, "Chhuanlam a tling lo emai. Ka unaute an lawr zuah laiin keichu ka te a, nu, ka pa fa hi ka ni ve chiah em?" ka tih chuan phawk deuhin min en a, ţawng tumin a ang zuau zuau a, beisei nei deuh a ka lo en lai chuan ka hriat duh zawng sawi ta lo hian, "Nicholas nen hian in anna lai in ngah a nia, nupa inkawprem tak in ni thuai ang" a ti a, inchhungah min luh san nghal daih a, a sawi awmzia ka hrethiam lo khawp mai. 

Pindan chhung ka lut chu tih tur dangin min nang lehnghal a, ka chhungte ka thlah fel hnuah present kan hawng a, ka puan ken te chu Nicholas-a nu ka pe a, ka nu khan a farnute ta tur leh a nu ta tur te kha min hrilh hrang thlap nain ka lo hre lehpek tawh lo chuan ka duh dan danin ka ti ve tawp a, an lawm ve tho ang. A farnute pahnih lah chu an han hmelţha em em khawp a, inchhang bung emaw ka tih laiin phir an lo ni reng a, Ngheti lah chuan "Ka hrilh ngun tehreng che nen" a lo ti lehpek a, min hrilh mawlh mawlh reng chung pawha ka hriat lohna chuan ka rilru buai zia a tarlang chiang viau awm e. Faith leh Hope te an ni a, an unau za ho hming chu a sap rem rem hlawm khawp mai. Phir te hming ngat phei chu a phuahchawp lehzual viauin ka hria. 

Kan ţhianten min haw san hnu chuan keini nupa pawh kan pindanah kan inzui lut a, inbual nghal mai tuma towel vel ka phawrh laiin Nicholas chuan kan pindana mini fridge inhung ve ran chu a pawt hawng a, zu bur leh tui a phawrh hnuah fridge bula no chu a ban nghal zat a, ka lo melh ram ram lai chuan "Eng nge?" a ti thum dût a, ka chhan mai lohah chuan "Mamawh i nei em?" a ti leh a, lu ka thin mât mât hnu chuan thlang lam bathlar ah a chhuak ta daih a, min be chak hlawl lo niin ka hria a, ka duh dan tak pawh a ni. Rawn lut lovin thlang lamah khuan chatthla law law sela, keimahin hahdam deuhin ka mu thei anga ka ti rilru nauh nauh a, ţah ka tum hauh lo bawk. 

Ka inbual zawh chuan bathrobe hain bualin aţangin ka chhuak a, Nicholas pawh a rawn lut ve chiah tih hre tho mah ila ka hmu lo der ve tlat. 

Khumah ţhuin ka mut kawr neih ho ka phawrh chhuak diat diat a, Zikpuiin min leisak a tum viau nain ţul ka ti lem lo. Kekawr leh kawr a nih loh chuan kawrfual ho chu ka ke rek thleng deuh vek a ni a, a hmaah milem a awm loh leh a ţial chuai vek a, a lang tlang thei lo bawk. A nghawng a chipin kun vak vak mah ila inven buai a ngai lo. 

Khum bula a din ve reng takah chuan "Eng nge i duh?" ka ti ve thung a, amah en a ka dah deuh vah lai chuan ka mut kawr ho chu chik deuhin a en a, chutah keichu min rawn en lehin a kiai suk a, a beisei ang ka ni lo a ni phawt ang.

"I ha ve duh em ni? I duh thlang la..i duh duh hi ha ve rawh. Ka ke rek a thleng vek a, chhing deuh hlek dawn mahla i ha thei tho ang, a lian ţha alawm" tiin ka runluih ve a, mi tih thinrim te lek lek ka thiam ve lutuk tho alawm. 

Min chhang mai lova a din tak rengah chuan, "Khawiah nge mut i tum?" ka ti a, ka zawhna chu hriatthiam loh hmel takin a mit ko a lo san ak a, "Keimaha mut ka duh a, nangpawh ka bulah i mut duh bik ka ring lo" ka ti leh a, pasal atana ka thinlungin a pawm thlap hma chu a bula mut ka tum lo bur. 

"I bula ka mut hun i nghakhlel viau niin ka lo hria a" ngeiawm fahran hian a ti a, a nui tel kher lehnghal, min runluih mai mai a ni. 

"Chutiang chuan tu nge hrilh che a? I bula mut te chu thih hrehin a sin ka hreh ni. I lo mu ve dawn a nih pawhin sir tawkah mu ang che" ka ti ve ngat a, a beidawng mai dawn maw ka tih laiin, "Mi thianghlim lawr zan a nih hi. Ka hmaih phal lo che" ka mitah tak min en chung hian a ti a, a ţawngzawi viau nain ka ding nghal hluai mai. 

"Nang te chu setana alawm i nih. Mi thianghlim lawr tih thuah te chuan thuneihna i nei ve reng reng hleinem. I kut hmawr pawhin min khawih suh ang che" ka tih veleh min runluih ve ni awm tak hian a kutin min rawn tawk zauh a, a la let leh thuai bawk a, "Tu thupek pah ka zawm ngai lo" bung zet hian a ti pah hmuk a, a pa thupek a min nei a ni reng sia. 

"I zu kha ka in hle hle teh..tui i tih khawlh khawlh em kha" tih paha kal mai ka tum chu ka banah lo hmerin min pawt let nawk a, min dim lo ve angreng sia maw.

"Zu aia tui zawk i awm reng alawm hei" a ti a, a aw ki a elsenna langchhuak tel chu ka hriat hmaih bik lo. 

"Lutuk che hian a...ka hmangaih vang che a nei che ka ni lo a, ka duh hlawl lo bawk che. Ka duh theih che ka ring ta hauh lo bawk a, hmangaihna tih vel phei chu sawi ve lo law law zawk ang. Chuvang chuan ka lak aţang hian engmah beisei suh. Ka hrilh lawk che a nih chu" ka tih chuan a huat ka rin tehreng nen a kiai suk duh chauh a.

"A pawi hle mai..nawmchen pui che ka chak viau a sin" zawi deuh ruih hian a ti a, hmeichhia ve tho ka ni a, a mitmeng leh nui hmel te chuan min ti zam ve lek lek a ni, mahse, helai hmun hi kan in a ni lo a, ka chunga thil thleng te hi huaisen deuha hmachhawn ka ngai a, hlauhna ka inhneh tir thei lo ang.

"Et awt che hian...midang zawng mai rawh. Innei tawh mah ila i nupuiah ka la inngai chuang lo, nula tho ka la nih hi. Ka pawm thlap theih hma che chu nula ah ka in ngai reng bawk ang. Ka duh loh zawnga i awm reng chuan kut kan la inthlak thei mai ang" hmeichhia zawkin ka tih tak khar kharah chuan ngeiawm zetin vanvadak meuhin a nui a, keiin nur nangin ka lo en a, min tih thinrim tumin a awmdan leh ţawngkam tam tak hi chu a ti lui ve deuh bawk a ni. Huaisen ka ngai tiin ka infuih ru mawlh mawlh a, ho teah ka zam chhe nghal zel tur a ni lo. 

Ka kut a vawn chu phih letin khuma ka mutkawr dah chu ka ban nghal a, na zeta amah melh ram ram chung hian inthlak tumin bualin bawk chu ka pan leh a, min nawr luih tumna a nei bik lo aniang min umzui lem lo a, ka duh lo chung chu min awmpui lui thei hauh lo bawk ang. 

Bualin aţanga ka chhuah chuan a lo awm tawh lo a, kan pindan chhung pawh a èng dul ruih tawh a, ka chau ve bawk nen ka sam pawh ti ro tawh lovin ka mu tawp a, phone erawh chu ka khawih ta tho a. 

Tu te mai pawh chuan biakin kawta kan thlalak ho an status emaw tih mai tur a ni; a tlar thla dul a, tumah ka en sak peih lo. Ka awmdan vel leh ka pasal hmel chu ka hmu peih lo a ni ber. Ka nin zia status chiam ka chak viau nain ka status a ka inphawrh chiam chuan miin engahmah min ngaih loh ka hlau a, ka insum thei hram a ni. 

'Mutthilh tum tawh rawh. Ka chah ang che khan zingah tho hma la, i nu leh pa te thawh hmain tho ngei ngei rawh aw' ka nu message ka chhiar zo chu ipik zet hian ka thaw hluai a, kan inneih dan hre ve lo ho chuan hun nuam tak hmang turah min ngai ngei ang a, kei lah chu 'ka chak alawm' tiin ka infuih mawlh mawlh reng chu a ni sia. 

Nicholas pawhin thawm a rawn nei leh ţan a, bualin a a luh thlengin ka muhil der a, kawngkhar a khar phui veleh phone bawk ka khawih leh a, 'I mu thei em?' tiin Ngheti pawhin min rawn zawt a, 'Ka mu ve ta ran chu a nia' tih bakin ka chhang lo. Mutna ngai loh a mu thut ka ni bawk a ka muhil thei kher lo maithei a ni. 

'Ngilneii hian vawiin khan inpa bialnu a lokal ve a ti. Tlaia a bo vang vang chhan te kha ka hrethiam tawh, a rukin an inhmu aniang. Ni lo se chu khati tak khan Anthony kha a mangang lo ang' a rawn ti leh a, Pa Chhawna te pawh hi nuthlawi pawh lo nise a duhzawng chu neih tir mai tur a nia, keiin ka tawrh phah ringawt lehnghal. 

'Engahmah ka ngai lo nasa mai. Ka pa hi mi pangngai ni se chu pasal ka nei hauh lo ang' ka ti leh tawh a, 'I nei vek tawh a, awmzia a awm tawh lo. A ţhiannu nen an rawnkal an tia, in inneih hma pawhin inneih naah ka kal dawn sia kawr ţhui tir a ngai a tia a nui duai duai reng mai an ti' a rawn ti ve zel a, keiin ka huat loh tehreng nen ka ţhiannu zawk chuan a huat hmel viau mai. 

Bualin kawngkhar kalhna a rik khap rual chuan lukham hnuaiah phone ka hnawh lut rawk rawk a, ka muhil der leh hmak a, kan inkhar up tawh bawk a khum bula a rawn tei kual vel chuan a rim tui ve chem chem mai. 

Kan awngphah che chu chiang takin ka hria a, ka mut hmawr em avangin a rawn hniam pha lo thung. A mu ve mai dawn maw tih laiin a tho leh a, zik ţual ţual pahin ka meng dere a, sofa lama a phei nul nul chu ka hmu a, lukham a pawm ţat bawk. A sei ve angreng sia sofa ah chuan a mu nuam hauh lo ang. Chu zawng, ka lo buaina tur a ni lo e. 

Kei lah chu a muhil thei der lo lehnghal a, lukham hnuaia ka phone dah chu a nghawr leh dat ţhin a, muhil anga awm ka duh avangin en chak viau mah ila ka en ngam tawh lo. 

Ani pawh a muhil thei bik lo aniang thawm a nei leh ţhin a, lighter a talh ri leh zial rim te chu ka hne hlur tawh mai. 

"Min lo be lo tura ka hrilh che kha" a tih chuan ka ning tawh lutuk chu ka lo thaw hak a, phone a hmang a ni ngei ang. Mutthilh theih loh ngat phei chuan thawm chhe te pawh hi a ninawm em em thei zel. 

"Nang khan vawikhat pawh min dan i tum hlek lo" chang zet hian a ti leh a, a ţawng bul bul reng a, tu nge a biak tih lah hrilh chawp ka ngai lo nasa mai. Mihring chuan zia te te kan nei vek a, kan ngaihtheih loh zawng thlengin a inang lo far mai. Kei hian mut tawh hnua thawm awm reng hi ka ngaithei lo a, naupanlai pawn ka unaute nen kan insual phah fo ţhin. Mi zawng zawng aiin ka ngaithei lo fal nalh ngei ang. 

Ka ning lutuk tawh chuan ţhut chhuah pah hian, "Awii...Remruatsak, ka hne lutuk tawh. I biak duh chuan pawnah sawn va be mai rawh. Mi mutthilh tawh hnua ţawng dût dût reng kha nuam pawh i ti em ni? I inthlahrung miah lo em ni?" ka ti chiam chiam a, muangchanga inbengkangin phone dawm reng chung chuan min rawn thlek a, "I muhil der tho alawm" pawisawi lo awm tak hian a ti a, a mu ţha leh hmak a, ka thinrim lutuk chu ka thaw halh halh mai. 

Chutah phone a a biak mek hnenah chuan, "Pâtea a suakbak a nih kha" a ti kher a, min run tawk chauha ţawngkam han neih lah a thiam narawh. Puak thei ila chu ka puak darh nasa chuai chuai tawh ngawt ang. 

Khum lu nghengin ka ţhu a, ka phone phawrh chhuakin ka nu hnenah 'Naktukah ka lo haw dawn' tiin message ka thawn a, thinrim a type tih takah ka type rang khawp mai. 

An inbiak zawh hnuah ka lam panin a rawn phei a, kawr a ha lo a, boxer chauh a la ha zui a, a taksa chu a nalhin ka hriata an fak mawlh mawlh reng pawh hi a awm ka ti tho mai. Mahse, ka tan chuan pangpar tho a ni. 

"Ka bula mut i duh loh chuan sofa ah sawn va mu rawh" tiin thu min pe leh tawh a, ka ngaihthei lo lehpek tawh. 

"Mut tumin i phei vek tawh alawm. I muttheih ngang loh leh duh leh khumah hian mu ve la, a hmawr teah sawn" ka tih chuan a nui ri suk a, min din chilh run tawh. 

"Ka lo mut ve chuan ka insum thei dawn hauh lo a nia" min elsen zet hian a ti a, thawk lak hak pahin ka melh chho a, mi tam tak an lo innei ve tawh a, insawirem naa innei zingah pawh keini ang hi an awm kher lo ang. 

"I va han hmelchhe chiang tak" thinrim zeta ka tih chuan, "Huh..ţawng duah lo khan phei mai rawh" min ti leh kher a, ka mu ţha sawk sawk thung. A thu ka zawm nachhan tur ka hre miau lo a ni. 

"A ţha alawm..i duh te chuan kawhmawh bawl lo hian sawi ve mai tur che a nia" tih leh khuma rawn lawn a rual a, ka inrin hma hauhin ka chungah a bawk titih a ni der mai.

"Eng thil nge i tih?" vin zeta ka tih chuan "I duh ka pe dawn che" ka hmui bulah a phun sup a, kan hmui pawh a insi thuak mai. A hmui a ka nghawng a nawr rual chiah chuan ka hriatna a fim ve nghal a, ka thin a ur kher mai. 

"Hmela...ka phalna loin min khawih suh ka ti a ni lawm ni?" tih leh a sam a ţham ka rual a, a inring hman bik lo aniang thinrim zet hian a phun hluk a, ka ke leng ka tum a, ka chunga awm a len em avangin duh angin ka leng thei lo. Ka tal bat bat a, a sam ka thlah rualin ka kut pahnih chu a man bet a, chunglamah a la kang a, min hmer na em em mai lehnghal. 

Tal ve bat bat mah ila mipa zawk na na na chu tharum ah ka hneh lo kher mai. Tih theih dang nei lo a ka inhriat hnuah, "Hmela...tenawmpa" vin zeta tih leh a hmaia chil chhak ka rual a, a inla hrang rang khawp mai. 

"Eng teh hrep nge i tih hi?" kei aia vin mah zawk hian a ti a, a auin a au a ni ber. 

"Chil ka chhak che a nih kha. Ka chil ai khan i tenawm daih zawk. Ka duh vanga nei che ka ni lo, ka sawi ngun tawh a, hrereng tawh ang che" thaw halh halh chung hian ka ti a, kan incheina lamah khan ka hah takzet a ni. 

A hmai chu a tuai puat a, ten hmel zet hian a chek hluk a, chutah khum aţang chuan chhukin dim lo zetin min pawt ţhu a, a rawn kun hniam a, min khawih leh dawn emaw ka tih laiin a darah min pu nawlh a!

Sofa lama min phei pui lai te chuan a taksa rem lai laiah ka chum dawm dawm reng a, "I tih leh chuan kawmthlangah ka vawr thla ang che" nuihza aw zeta tih pahin ka mawngah a beng thlawp a, ka rak deuh ţhat a, ka chum ve na te chu engahmah ngai lo angin a awm hmiah thung. 

Sofa ah dim lo zetin min nghat chawrh a, engmah sawi tawh lova min kalsanin bualin a pan ding nghal a, keipawh khum lamah tlan let lehin phone ka la leh hram a, 'A mizia hi ka hrethiam hlawl lo a ni. Ka ngei hluah hluah, ka ngei a ni tawp mai. Ka haw lutuk ringawt' tiin Ngheti hnenah message ka thawn ve thung a, a tlai deuh tawh avangin ka biak tum te chuan min chhang let ve tawh lo. 

Zing ka harh rualin meng mang lovin phone ka en a, ka mut khan kawl a êng ţan tawh a, rei pawh ka mu hman lo ka tih laia dar zat ka hmu chiah chu ka inperh tho zawt a ni ber. Ka nu missed call a awm tuarh a, rang zetin ka call let nghal a, "Rawng i bawl tawh em?" a rawn tih phei chuan lung a zing mup mup thei mai.

"Ka tho chiah" zawi tea ka tih chuan "Saidingpuii tak hi chu aw...dar9 a pelh duai tawh hi. Tho rang rawh...inhnuaiah chhuk la a ţul ţul ti rawh" a rawn ti a,a ngaihdan a nih loh hmel takzet a ni.

"Aww..ka ngai cheu a, khawvar hnuah ka muhil ve chauh alawm" tih pahin khum ka melh a, Nicholas pawh a la muttui nasa mai. 

"Aw..chhuk tawp phawt mai teh. Nangmaha i chhuk ngam loh leh inpa ko la, vawiin phei chu tih tur in la nei a ni lawm ni? Nizana i thu rawn thawn te kha eng nge a awmzia? Ho te teah khatiang kha rawn thawn tawh suh. Pasal nei i nih tawh kha hrereng rawh" a tih hlak hlak lai chuan bualin ka pan a, darthlalang hmaah ka ding ran a, hmelchhe deuh ila chu ka inhlau maithei a ni. Ka sam a thur bum a, ka mit a bui luk bawk a, Nicholas-a rilru tenawm lutuk vang vek a ni. 

Ka inphih fai hnuah khum bulah ka ding vang vang a, mahni tawpa chhuk chu ka hreh deuh a, thawh ka hai kher bawk nen, a nuam lo pha ve tlat. 

"Hei..tho teh" tih pah a ka sawi chu ka kut a lo beng per lawp a, ka dinna lo lamah a inlet hmak bawk a, ka kaitho lui duh ta bik lo. A duh leh mu nileng ţhak rawh se. 

Kailawnah muangchangin ka pen thla charh charh a, Anthony nen kan la intawk zui. Min hmuh chuan a nui sang a, "In muttui em?" a lo ti var a, a landan aiin a nelawm hmel daih mai.

"Ka muhil thei lo a, thawh ka hai phah a nih hi" ka tih chuan "Hna in la kal dawn chuang hleinem. Ka nute an ril a ţam hma ţhin a, chaw kan ei tawh aw" a la ti zui a, a zahthlak hle mai.

Inthlahrung ru deuh taka choka a ka luh chuan an nula ni awm tak hian thleng a lo sil a, phir te an lo awm bawk. Min be lem lo a, keipawhin be loin ka kalpel mai a, tui vawt raih ka in hnuah an nula zawk chu pan hnaiin "A zahthlak hle mai. Ka muhil lawk thei lo a" ka ti sar sar a, chhungkaw pangngai chaw ei hun a ni tawh reng a ni. 

"A ho lutuk...ka pu'n kaitho suh u a ti a nih kha. I muttheih loh an ring sa vek alawm. Mipuiin an chim hut hut reng cheu a, in chau dawn bawk sia, chuta kara la mutthilh theih loh zui phei chu a hrehawm ngawt ang" a ti a, a nui var var reng a, a fel hmel reuh khawp mai. 

"Engtin nge ka koh dawn che?" ti a a hming ka zawh chuan, "Kungte min ti rawh" a lo ti leh vat a, a thleng sil zo kut hruk hul pah hian, "I ei nghal dawn nge U Nico-a i nghak dawn?" tiin min zawt veleh thung a, a koh dan avang chuan ka nui chhuak ţhelh a ni. 

"Nico-a chu ka lo nghak ang" ka ti a, a hmuh loh turin ka nui ru pât pât a, hming lem a nei mawi khawp alawm.

Gas bula ka din reng lai chuan Nu Hlimi a lo lut a, ani hi nu thau luah, ngo vang mai a ni. An chhungkua hi an vun a ngo vek a, ka pasal hi a vun rawng a danglam hlak thung. 

"I lo tho ve tawh maw? Nicholas a la tho lo em ni? A va mu rei em em ve" a rawn ti nghal a, a hmai a hlai phek duai a, a sam kir hian a lu a ti lang lian takzet bawk. Mahse, hmu thut ta ila ka vawikhat hmuh naah pawh mi hausa nu a ni tih ka hre thei nghal ang. 

"Zanah a muhil thei bik lo aniang" ka tih mawi ve te chuan, "Chupawh nise thawh loh a hun tawh lo. Shooting neih in tum lehnghal a, tih deuh zung zung a ngai ang. Kan huanah daih a nia, a hla tham a nia" a ti bawrh bawrh a, anu thusawi chu hre lo ang hmakin phir te chuan phone an khawih a, kei takngial pawh ka ding ngawi ran mai. 

'Ka kaitho ang' ka ti duh bik lo a, pindana kan pahnih chiaha awm phei chu ka peih tawh rih lo. Dar10 dawnah a rawn tho chhuak a, boxer chauh a la ha a, tshirt a ha tel tawh thung a, kei ang lo takin phir te chuan an lo chhaih nghal har har a, fridge a hawn dawna "I tho hleithei nange?" ti a an fiam chuan fridge hawn pahin min rawn melh a, a nui pah suk kher lehnghal a, rilru dik lo a puttir zo vek ang. Mahse, an ngaihah chuan nupa kan ni tawh a, ka en liam vel mai mai. 

"I duat-a hian a ngai tawh ang che. Nimin chu a pil bo hmak a, nizanah ka pindanah a mu a" tih deuh lung lung pahin Anthony-an ui a rawn kai lut a, Nicholas a hmuh chuan a pan vat a, a mei a then vut vut bawk a, a ui a hmuh meuh chuan a tak takin a nui ve niin ka hria.

"A tawk tawh e Pâte, nakinah kan infiam dawn nia" a tih chuan ka ding ngil auh mai. Pâte min ti ve tho sia, a ui nen min koh dan a inang chiah a nih chu. Ui lak tur ngaihtuah ve a ngai a ni. 

CONT...(Fa an neih hmain an chhangchhe nghal ringawt a nih hi😂)