HIS LAST LOVE-4

HIS LAST LOVE-4

Tukţhuan kan ei fel hnu lawk, dar11 velah Ngheti leh Lawma te an lo thleng a, Kungtei sawi hmangah zingkarah pawh mo en tum an lo kal nak nak reng a ni awm e. Kei lah ka muttui nasa mai sia, ka thingpui lum ngei in tuma lokal te pawh beidawngin an haw ni awm tak a ni. 

"I nu nen kan inbia a, i va tho har awm em em ve, a zak teh mai a nia" Ngheti chuan a ti nghal a, inchungah kan inzui chho a, Nicholas te ţhiandun erawh pawnah an chhuak a, eng nge tih an tum ka zawt lem lo. Awm lo se ka tan chuan a nuam zawk mah. 

"Ka nu pawh chu a sawi peih leh lutuk mai, ka muhil har a, ka harh veleh ka tho nghal a, chaw an ei vek tawh hnua ka tho kha ka nu aiin ka zak daih zawk. Hetah a rawn awm ve lo a, lo zak ve tawh suh se" ka ti bawrh bawrh a, ka thin a chhiain ka kâ hi ka veng zo lo fo mai. 

"A mak thei bawrh bawrh e...a ngaihtuah vang che a nia" a tih lai chuan, "Min ngaihtuah se chu pasal min neih tir lo ang. Min ngaihtuah loh lutuk vang zawk a nih hi" ka lo ti hmak a, dem loh tum viau mah ila ka chhungte hi ka dem lo thei lo a ni. Pasal min neih tir lo se chu tunah te hian thawveng deuhin ka la leng halh halh tur a nia. 

"Nih leh nizanah eng nge thleng?" phur zet hian a ti a, eng nge maw thleng se a tih ni. 

"Kan insual" ka ti liam puat a, mak ka tih em em loh laiin ka ţhiannu chuan mak a tih hmel khawp mai.

"Engmaw in tih?" a ti nawn leh a, "Kan insual" ka ti leh tawp a, ka nin zia a hriatthiam ka ring.

"In dangdai hle tak tak mai a" a ti ban charh a, chutah kan pindan chu enkualin, "A hnawk bawk si" a ti a, a chek zui tlak tlak a, kan inpawh lo takzet hi an hrethiam hlawm lo a, keiin beisei an neih san viau nachhan hi ka hrethiam lo ve thung. Kan inneih dan zawng zawng an hre vek a, min beisei sang lo tur ber zawk an ni. 

"Tih felna hun a la awm hleinem. Vawiinah lah shooting an lo ti ve zel a, kal loh theih te ni se ţha tur a nia" khuma ţhut hnawk pah hian ka ti a, ka dul a kiar ve angreng si, kawrfual hak pawh a peihawm tawh loh. 

"Mawi deuh deuhin thla in la ang chu..nakinah in la en let duh ang a, tar tur te pawh in duh dawn a" a tih chuan ka lo ner nang nang a, kan inneih rei hmel vak si loh a, kan en let peih tawh kher lo ang. 

"Keichu kan inneih rei pawh ka ring lo. Chhungte sawi rem chawp kan nihna lai kha chu lo dahţha ta pawh ni ila kan inmil lo lulai emai, a uite a koh dan chiahin min ko a, ui angah min ngai niin ka hria" ka ti charh charh a, thil dang sawi tur tam viau mah se keimaha pai ka thlang zawk a, nizan a thil thleng pawh a zawng zawng a sawi vek ţul ka ti lem lo. 

"Tikhan ti nghal ringawt lo la, niminah in innei a, in inneih rei i ring lo nghal a, kan inneih reng theih dan tur zawn a ngai ti zawk rawh. Pasal i ţhen chuan nuthlawi i ni ve mai dawn a sin" a ti a, kan mo kawr khung ţhat ho te chu a phawrh pah mawlh mawlh bawk.

"Ka pasal neih hma kha ka ngai nghal der a, ka duh miah loh bula awm reng ai chuan nuthlawi nih ka duh zawk" ka ti chuai raih a, ka zawi ngawih ngawih reng a, nun a hlim loh chuan taksa hian a lo tuar ve nghal zat zel. 

"Nu leh pa rinchhana awm i ni tawh lo a, puitlin i ngai a nia. Thla khat vel en thla la, i neih luih theih ngang loh leh tihdan ka ngaihtuah pui dawn che nia" a ti leh tawh a, "Engtin?" ka lo tih chuan, "Dawt kan phuahchawp mai dawn a nia, i pa'n a rin theih nan che thla khat vel chu tuar ve phawt rawh" min ti a, puitling deuha awm turin min fuih zo chauh emaw ka tia, ka ţhiannu aţang hian a dik thei tawh lo hrim hrim. 

"Bialnu a nei a, inbiak chang leh awm dun chang te an nei ngei ngei dawn a, chutiang hun a lo thleng a nih chuan inti chak la, lungngai lo anga awm tum tlat la" a tih chuan, "Awii...sawi lo zawk mai teh. I thusawi a in kawkalh nasa lutuk, chumai bakah lungngai deuh anga awm te chu ka zak e a..thik lo angin ka awm thiam alawm, ka thik lo tak tak bawk a" ka ti a, kan inbiak dan mumal lo zet chu miin lo ngaithla ru ta se kan sawi tum an hrethiam hauh lo ang. Sawi lang lo mah ila ka rilru a buai ang chiah hian ka ţhiannu pawh hi a buai ve tih ka hria a ni. 

"A hmunah kan inthlak mai dawn nia. A hla tham an ti sia, kan kal vat loh chuan haw leh lam a hrehawm ang" a tih laiin Nicholas te an lo lut a, min chei tur ber Tleipuii leh a ţhianpa tuai ni awm takin an rawn zui lut a, a hmel landan a nelawm loh leh viau tawh a, Tleipuii takngial pawn a melh hrek hrek ringawt. 

"Boxer nen em em kha chuan kal lo la" ti a Lawman a fiam te chuan, "Ka inbual phawt ang chu ka ti. Eng eng emaw hi in rawt chhuak a, biakin kawtah thla kan la ţeuh tawh alawm...thla la tura rampalaileng pan leh kher a ţul em ni?" a ti bul bul reng a, amah chiahin a peih lo emaw a inti leh tawh a nih hi. 

"Phun phun lo mai teh. Keini pawn kan peih bik reng reng hleinem" ka tih laia, "Nang kha" a lo tih chuan, "Eng nge keichu? Heng thil zawng zawng hi nangmah chiahin i tuar emaw inti suh. Keimah zawk hian ka kham teh mai a nia, chhan neiin kan tuar ve ve, chuvang chuan ngawi mai mai rawh" ka ti chiam chiam a, kan pindan chhung chu a reh dâk a, midang an inrawlh ngam miah loh laiin Nicholas chuan, "Khai a...tê si i ţawngthei mai bawk si" a ti fan ruih a, a nur nang bawk a, mak min ti ve deuh niin a lang. 

"Tê mah ila ka duh apiang ka sawi ang. Peih lo viau mah ila tih luih a ngai a nih hi. Midang tana hmuh hrehawm khawpin i hmel i ti dur chawp a" ka tih lai chuan bangbo zetin a ţhianpa chu a en a, chutah min rawn en lehin, "Ka hmel a nih hi" a ti deuh sup a, sawi tur dang a hre tawh der lo. 

"Aw..i hmel kha...rêm râwm mai" ka ti a, a sam thur deuh bum leh a ngaihna a hre lo lutuk hmel ka hmuh chuan tum loh deuhin ka nui chhuak a, rui ang mai ka ni, ka â zo tawh a, he inneihna hian min ti â in min ti rui chhar reng a ni ber. Nicholas meuh pawh ka hnial dang der mai alawm. 

"Midang hmuh nuam lo turin awm tawh suh. Kan chak avanga kal tur tumah kan awm bik loh hi. Nangmah chiah i inngaihtuah a nih kha" ka ti a, mit ti zim deuh san hian min lo en tawh a, Lawma a lo inrawlh hlauh a, ni lo se chu kan inhnial leh viau maithei a ni. 

Darthlalang hmaah ka ţhu leh a, ka hmel chu a dangdam ve deuh tih te pawh ka hmu thei a, ka ţah loh avang ngawt hian ka na lo bik tihna a ni lo a, ka hriatna te hi a la fim kâk lo niin ka hria. Nicholas hi ka ngaithei loin thu ho te pawh sawise ka hnial chak zek zel zel a, a lungawi lohna keimaha a hrithla ţhin ang chiah hian keipawhin ka ti ve ţhin a ni ber ang chu. Kum naupangtein hna ka nei a, ka hlimin mi pawn vannei min tih zia min hrilh chamchi reng a, kan chhungkaw khawsak a harsa lo bawk nen, enghelh ka nei lovin ka thawveng halh reng a, ka puitling lo bawk. Ka pasal ka hnial pung pung ţhin hi ka inven ve naah ka ngai a, diktak a sawi chuan, heng ka chunga thil thleng zawng zawng hi hmachhawn dan ka thiam lo a ni. 

"Awii...keichu ka kal leh peih lo e...an ngui ber bur hlawm si" ti a Tleipuii ţhianpa phun sar sar chu ka hre pha reng a, ka ngaihven peih lo. Ka hlim beisei ho chu an beidawng tlawk tlawk dawn tihna a ni mai. 

Ka sam ka khuih lai chuan Tleipuiin, "Tlemin zuah sei ve deuh tawh rawh aw. Niminah te khan kilh khawm a har lutuk a, ka bawk ve duh tho bawk sia, i hmelţhat tehreng nen i sam vang khan i nalh tur angin i nalh thei lo" a ti zat zat a, a nui pah bawk a, boruak tih zangkhai a tum ve a nih hmel. 

"Sam sei ka pu thiam lo. Dar a zar leh lek phei chuan a za duh si, nikhat nalh loh mai mai te chu a ho emai" ka tih hnuah a ţhianpa chu enin, "Ka ri bawrh bawrh a, ka ang tun tun zel a, ngaih khatah min ngai rawh" ka ti a, a lo nui tawi tak a. 

Nicholas pawh towel vengin a rawn chhuak a, darthlalang hmaa a rawn din ve chuan a sam a tuai phur phur a, "Min ti huh dawn lawm mawle" tih nghek pahin ka ţhutna aţang chuan ka tho a, keiin thip zet a ka melh ram ram lai chuan a sam tuai reng chung hian a lo kiai suk duh chauh a, a taksa chu a nalhin a enkawl uluk tih a hriat viau nain a thluak zawng zawng a six pack chhungah a lut vek kan tih ang chi kha a ni. 

"Pâtea kan hruai ve dawn em?" Lawma pawhin kan lam a rawn hawi ve ta nge nge a, nichin kha chuan a ning deuh aniang computer hmaah a ţhu a, min ngaihven duh lo kha a nia.

"Dawn e..hei a insiam peih diam tawh hi" ngeiawm fahrana a ţhianpa chhan pahin Nicholas chuan min rawn en a, infiamna hmanrua ang lekah min ngai ni berin ka hria. 

"Ka tih zawk chu" Lawman a tih leh chuan "An unau chuan kan veng seng lo ang" a lo ti kher bawk a, midang chu awm lo se ka ngawi reng bik hauh lo ang. 

"Ti ru...kal phawt teh ang u. Inthlak la rawn chhuk ve nghal ang che. Tlai deuh a kal ai chuan naktuka tih ţhat leh ka duh zawk" ka ti a, midang ho chu ka chhuahpui a, mo kawr ken a ngai bawk nen, kan bawr khawp mai. 

"Eng hna nge a thawh? Kum engzat nge a nih tawh?" tih chu Tleipuii ţhianpa thu min zawh hmasaber a ni. 

"I hming pawh ka la hre lo" ka ti ve thung a, zah ve hmel deuh tak hian, "Ka hming a chal lutuk a" a ti deuh sap a, hma lama kut suihin kawi deuhin a ding ţat a, tuai ho hi ka ngaina lem lo khawp mai. 

"Sawi mai la" ka tih leh chuan, "Chalţhuama" a hma aia zawi mah zawk hian a ti a, a la naupan hmel mai bawk si, enkawl thiam chuan sawn a la thlak ve ngam mai ang. 

"A nih chu...Nicholas chu a la upa lem lo, nikum nge nikum hmasa lawk a MCS tling thar kha a nia, hna sang ve tak chu a chelh ve an tih kha. A hna bak hriat a nei vak lo ang" ka ti a, kan pindan zawnah kan la ding a, kawngkhar kan khar phui lo bawk a, a hriat phak ngei tura sawi ka ni bawk a ka ţawng ring khawp mai. 

"Hna chu nei lo se a nung ho ve khawp ang" Chalţhuaman a tih ve takah chuan Tleipuiin, "Chhuk phawt teh ang u" a lo ti vat a, kan inzui thla ţham ţham a, kailawn tawpah kan ding khawm laih a, inleng an awm bawk nen, awmdan tur a vang khawp mai. 

"Saii, hei han chibai rawh. Niminah kan chibai ve hman lo a an tia, i nu ute ho an nih hi" Pa Chhawnan a lo ti zung zung a, muangchangin ka pan phei a, an zawn ka thlen chuan an kut an lo phar chhuak sap sap hlawm a, "Ti zung zung rawh u...insiam chhung leh thlalak chhung nen, in lo thim haw tawh dawn a nih hi. Khaw nge Faith-i te pawh kha? Anni pahnih pawh kha an insiam rei tawh lutuk" Nu Hlimin a ti lang lang bawk a, inrinni a ni lo hlauh hi a lawmawm khawp mai, ni se chu inleng an ţhahnem ang a, awmdan ka la thiam vak bawk si lo nen, a hrehawm lehzual dawn emai. 

"Kan in ei puar hmasa dawn an tia, choka ah an awm. U Nico-a chiah an nghak tawh" Kungtein a tih chuan a ngawi zui ve mai a, keichu an zingah ka ţhu ve a, ka ţhiante ho pawh pawnah an chhuak tawh a, sawi tur a vang duh kher mai. Min biakin ka chhang a, min biak loh leh ka ngawi reng a, Nicholas lah chu a muang lui emaw tih hial tur a ni, a reh vang vang mai. 

An muhil aniang ka tih rum rum tawh hnuah an rawn inzui thla ve hram a, a kamis hak chu a la bilh lut lo a, a hma a inhawng duai bawk a, Lawma thil khai chu coat leh necktie vel a ni maithei. A hmuna inthlak vak an peih ve lo a nih dawn hi. 

"E...hei Nicholas chu a lo chhuk alawm. Anthony chu kal ve tur dang ho nen nichin khan an kal daih tawh a, eitur lei chawp te a ngai ang ril a ţam dawn a" Nu Hlimi chuan hrilh bik pawh nei lo hian a ti a, keipawh kal tumin ka ţhutna aţang chuan ka tho ve vat a, "Eng motor nge in ken dawn? I patea motor pawh kha a awm a" Pa Chhawnan a lo ti ve bawk a, reilote chiah a ding chawl a, a nu leh paten an lo biakna leh ngaihvenna awka te chu ngaithla duh lovin min mitmei zauh a, a chhuak nghal nulh bawk a, ka hmuh laiin a nu leh pate hian an la be ţawng lo hrim hrim.

Motor chhunga kan ţhu lut pawh chu a lum huam mai. A hnungah Ngheti nen kan ţhiandunin kan ţhu a, anni a hmaah ţhuin Nicholas chuan motor a khalh a, phir te leh Tleipuii te ţhiandun ve thung chu scooty in an lokal thung ang.

Kalkawngah chuan kan ţawng tam lo tlang khawp mai. Ngheti chuan ka kut a vuan tlat a, keiin tukverh lam hawiin rilru ka kawm rauh rauh a, kan hmaa ţhu te meizial khu chu tukverh kan hawn vek avangin a ninawm pha em em lo a, ka hun tawn mek ka ngaihtuah rualin ka hma hun tur te ka duang chhin vel a, a phui mup a, ka thaw ipik lutuk chu nasa deuhin ka lo thaw chhuak leh halh ţhin a, hma hun êng tak nei niin ka inhre ve ţhin a, tunah chuan khang kha a bo vek tawh a, ka hun hman zel dan tur hi hre lawk lo mah ila a ruk tak chuan ka hlau a ni. 

"Pâte, i ril a ţam em?" ti a min zawh pahin Nicholas chu kan lam a rawn hawi a, "Ţam lo" tih zawng a ka chhan hnuah zawhna ngai chiah Ngheti a zawt veleh a, "Ţam ve deuh tho" a lo ti thung a, "Kan lei dawn nia, dawr a awm leh mai ang" pangngai deuh hian a ti ve mial a, a awihawm loh zawk alawm le. 

Kan tlan chhuah leh ruala "Ngheti, uite lak tur i hria em?" ka tih chuan a lo nui ve hawk nain a rawn hawi let tawh lem lo. 

"Hre mai rih lo...mahse a awm mai ang. Ka lo ngaihtuah dawn nia" a ti ve mai a, lak ka tum chhan hre ve hek lo, a thutak khawp mai. 

"Ui hmelţha leh sang, pian ţha zet zawt ni rawh se aw" hmalam aţang chuan a lo ti leh a, hepa hian min haw chiah em tih pawh ka hre tawh lo. 

"Huan chu kan thleng a ni mai aw Saii, in chau tawh em?" Lawma ţawng ri chu phone riin a zui a, Nicholas zawk chuan a ipte a zen nghal a, steering vuan reng chung chuan phone chu a bih zawk a, a off daih a ni ngei ang a ri chu a tawp ve nghal a, hmalamah a theh phei zui daih bawk. 

Rei loah a phone bawk chu ri lehin rang zetin a la a, a hmaa a tih ang bawkin a ti leh a, a phone riin a tihbuai tawh loh hnuah Lawma phone zawk a ri veleh a, hnung lam aţang chuan ka hmu vek lo na a a lo biak tum tu ni awm tak Nicholas a hmuh tir ve kher lai chu chiang takin ka lo hmu thei a ni. 

"Switch off ve mai teh" a ti hluk a, Lawma pawh chuan a kut chu la letin a switch off ta nge switch off ta lo tih phei chu ka hre zui thei lo. 

"Kan thleng e" Lawma chuan a ti hlut a, tukverh aţang chuan ka dak chhuak a, huan gate chungah chuan 'Healing garden' tih hi lianpuiin a intar a, a hming a pu zo angem kan en ang chu. 

Huan chhung kan tlan luh chuan Ngheti meuh pawh a insum thei lo, "Helai hmunah hian kal ang u an ti ţhin a kan thawhpuite hian, hun kan nei lo thei lutuk a, an telloin ka kal ta sia min ngei viau maithei a ni" a ti lang lang a, a awki ah pawh a phur zia a lang reng mai.

"He huan neitute hi maw in nih a?" Nicholas-a hnenah chuan a ti hlut a, ani lahin, "Ka ta a ni lo" tih chiahin a chhang a, hmun mawi leh nuam tak tak te pawh chu min en khawmuan pui lovin a tlan mawp mawp a, ka ţhiannu chu ka lo khawngaih angreng hle. Kan din rualin kan chhuk nghal a, Ngheti chu a hawi rual ruai a, keipawh ka bang chuang lo. 

"In dinna aţang kha chuan hmuh kim a har ang. Nakinah, hun remchang hmasaberah kan kal leh dawn nia" Lawma chuan a lo ti hlauh a, mi pawh a hipin he hmun hian tlawh tu a ngah tih chu huan hming ka hmuh rual khan ka hre nghal a, mahse ka ngaihven loh zawng a nih vang te, ka la kal ngai lohna hmun a nih miau avang tein kalkawng ringawt aţang kha chuan ka hre thei lo a ni. Pa Chhawna te huan a lo ni reng tih phei chu tunah ka hre chiah tak tak. 

A hming an puttir pawh chu a pu zo khawpin ka hria. Huana pangpar awm ho te chuan awmzia a nei vek a, a tam bawk nen, pangpar lawm tan chuan vanram tluk hial a ni ngei ang. A mawi tham dawn lutuk tlat a ni. Kan dinna bulah chuan juice bar a awm a, a chhungah chuan mi pahnih an awm nain vawiin tak chu an khar aniang keini lo midang hmuh tur an awm lo, A hmun hma vel ka enchian tak tak hmain Nicholas bawk chuan "Helamah" a lo ti leh a. 

Min hruaina inchhung kan lut chu ţhutthleng dup a lo inhung thluah a, helai hmun hi kan incheina tur a nih hmel. 

"Keini chu coat kan ha anga kan hman a ni mai a, hetah hian in inchei dawn nia, midang kan lo va ngaihven ang" Lawman a tih hnuah min chhuahsan a, an coat tak pawh chu an rawn la lut ve lem lo. 

Midang pawh an rawn thleng a, Anthony te erawh ka hmu lo nain Hope chuan an thlen daih tawh thu a sawi lang zauh a, an huan chu a fak zui luam a, "Mi hausa hoin an ţangkaipui zual a" a ti vel a, a hahdamthlak rualin pan vang vang a ngai tho si a, ka kal nawn peih kher lo ang. Juice bar ah lah khan dawr hnai tea kan lei theih reng kha tlem an ti danglam ang a, to deuh deuhin an hralh awm sia te ka ti rilru a, a lo ni kher lo thei tho bawk a. Mahse, USA a mi daih chu an chah lo chiang viau ang. Huan hi a ropui viau nain khawia pawisa in nge hetiang huan zau lutuk hi an neih theih bik tih ka hre miau lo a, nuam ti tho mah ila a neitute ka ngaihsan phah lo nasa mai. Mi chanai ei ru an nih phei chuan bomb darh vek ka chak zawk hial ang chu.

Tleipuiin min chei nghal mawlh mawlh a, hun kan ngah loh avangin Ngheti chu Chalţhuaman a chei ve thung a, a ţawng hlawi hlawi reng a, ning viau mah ila ka khap duh lem lo. Mi chei thiam, parlour hial nei ve ho hi chuan tuai an kawm tel ngei ngei zel, an hnaah hian a bet tel tlat em maw ni ka ti ţhin. 

Thla chu kan han la leh ta ngei a, camera hmaah awm reng mah ila kan pahnih a kan in en chang chuan kan meng no lo dun thei khawp mai. 

"Han infawp ve reng reng teh u..mi paw'n an ti fo a nia, a mawi ve alawm" an lo la ti zui a, min en ţhap a, an nui dar dar a, an nghahhleh hmel hlawm em em mai lehnghal. 

"Kha chu chikat ang" ka ti ve tak nain "Ti ve hrim hrim ru" an ti tlat a, "Ka duh lo...infawh kher a ţullo, inneih reina pawh a ni lo" thinrim ţeuh hian ka ti tawh a, thih hrehin ka hreh ti ila a dik ber ang. 

Nicholas lah chuan, "Ţawng duah zel suh, a rei. Zawh vat ka duh" a lo ti ve hluk hluk a, a mitmeng dur khup a min melh chung pawhin lu ka thing lui tlat a, ka duh lo chung pasal ka nei pawh tih tawh nak laiin mi zingah ka fawp hauh lo ang. Ngaihzawng pakhat pawh ka la nei lo a, min hriatthiam a ngai a ni. Vawikhatna leh lek phei chu mi hmuh atan ka duh lo hrim hrim. 

"Ti vat vat rawh u...kan tlai lutuk ang" an lo tih leh chuan, "Haw ang u" tih leh inher ka rual a, ka duh lo ka tih chuan ka duh lo a ni mai. Min nawr lui nasa tawh a, pasal ka neih hnuah lehzel hi chuan ka duh loh zawng ti turin tuman min nawr lui tawh suh se. 

Min umzui tu an awm tih hriain chak deuhin ka kal hlawk hlawk a, pheikhawk sang ka bun bawk nen, ka kal bai nasa viau ang. Kan incheina hmunah bawk khan lut lehin bualinah ka inkalh khum a, rei pawh ka awm hmain, "Lo hawng rawh" a rawn ti a, kawngkhar a ri zui bur a, ka ţhiannu in emaw min umzui ka ti char char a, Nicholas berkher chu ka beisei hauh lo. 

"Ka sawi chu i hria em? Kawngkhar hi hawng rawh" chang fek fawkin a ti leh a, ka hlau lo lutuk chu ka thinphu pawh a danglam phah eih lo.

"Kalsawn vat mai teh. Nangpawn i duh bik lo a, dang ve mai ta che. An thu thu a awm reng tur kan ni hleinem. Mihring chuan duh loh zawng kan nei vek a, vawikhat ka duh loh thu ka sawi chuan aw tih ve mai tur alawm. Anni ho lek saw chu i dang ngam ve em em lo em ni a? Tu ber nge i hlauh? I pa mai bakah i unaute leh an ţhiante thlengin i hlau vek em ni?" ka ti hlak hlak a, ka ţawng ring hle bawk. 

"I lei tereuhte kha veng ţha la, tlak duah zel suh. I rawn chhuah loh chuan kawngkhar hi ka ti chhe dawn a nia" a ti ve khur khur tawh a, kawngkhar a ri leh bur bawk a, ka theih tawpa nain kawngkhar chu ka beng let ve a, ka kutphah a thip vang vang mai. 

"Saii" Ngheti aw ka hriat ve takah chuan ka inthlahdul deuh a, "I duh lo chung chu ti rawh kan ti hleinem" a tih chuan, "In tih vang alawm ka inthiarfihlim daih" ka lo ti vat a, ni tla tur lang tel ngei a thlalak kha an tia, tunah chuan a tla fel vek tawh ang. 

"Lo chhuak phawt mai teh...thlalak pawh an ti tawh kher lo ang" a tih hnuah pawh ka la ding ngawi ran a, ka nun hi ka kham hluah hluah. Ka nun inthlak hlawk dan hi ka ngaihtuah neuh neuh ţhin a, ka nun hman ţhin dan leh tuna ka nun hman mek hi chu lei leh van ang vel a ni. 

Bualin aţanga ka chhuah chuan Nicholas ka hmu ve tawh lo a, Ngheti leh hmeichhe pakhat an lo awm a, midang ho pawh kha an hmel hmuh tur a awm tawh lo. 

"Duh tawk tawh mai ang u, in la hnem hman tho alawm. A tawp nan an tia, an fiamthu mai mai a nih kha" a lo ti var a, a nui sang a, a hmel hmuh a nuam khawp mai. 

"In pa i ti zak lutuk alawm. Mo a ti tau an tia, an nuih zui che a, Nicholas lah an fiam sup sup a, a rawn umzui vat zawk che a nih kha" Nghetin a lo ti thung a, "Hei hi inpa ţhiannu Biaktei a nih hi" a tih zawm zat a, ka thlavang hauh lo a Nicholas thlavang a hauh daih chhan ka hrethiam nghal uarh mai. 

"Duh dan a inang lo alawm. Pawi ti em em lo an awm laiin zak tlat an awm ve ţhin tho a, nangmah chiah i ni miah lo a nia. Inthlak tawh rawh, midang ho khan thla an la la kual a, an lak zawh chuan haw an rawt mai ang" Biaktei chuan a ti leh zung zung a, a ţhu ve tlat sia, hmeichhia ve tho alawm tiin ka inphelh ta nge nge a. 

Kan inthlak zawh veleh Ngheti chuan, "Midang ka va ngaihven lawk" tih leh tlan chhuah a rual a, Biaktei nen chiaha awm chu a nuam chiah lo a sin mawle. Nichin lawka ka chet dan naupangchhia lutuk te kha a hmu ve vek awm sia, ka zak riau. 

"Kum25 i tling tawh em?" a tih chuan lu ka thing a, "Hna ka neihna a la rei lo a" ka ti zui zat a, pawl 12 ka zawh rualin nurse ka zir nghal a, ka la naupan bakah ka rilru a puitling lo takzet a ni.

"I naupan ngaihtuah chuan i tuarchhel khawp alawm. Mahse maw, i pasal hi mi fel lutuk a nih hi" thutak zet hian a ti a, ka nui chhuak teuh kher mai. Hmui pet tlat chung hian a ţhut lohna lam ka hawi a, ngamtlak deuh ila chu a fel loh zia ka hrilh chiam ang. 

"In inneih dan ka hria a, nangmahni ang chiah midang pawh ka hre tho a, nupuite chunga ţhat chhuah thei miah lo hi tam tak an awm a nia, in innei ta sa sa, pawm thiam tum la, hmeichhe tam tak aiin i vannei zawk a nia aw. Nicholas hi misual a ni lo a, fiamthu a duh bakah a rilru a ţha a, a zau bawk a, i hriat chian hunah chuan a bula awm nuam i ti ngawt ang" a tih leh hnuah chauh a lam chu ka hawi leh a, "In inhriatchian hmel bawk a thil ka zawt ang che aw" ka tih chuan "Min zawt la" a lo ti vat a, a hmel te chu a dam thluam mai a, tu pawi mah sawi ngai lo hmel a pu. 

"Hna ţha deuh a nei a, a duh duh a lei thei ang a, hmeichhia lah a duhzawng apiang a kawp thei awm tho sia, engati nge kei hi min neih tho si?" ka ti a, a beisei loh lam daih ka zawt tih a hmel landanah chuan a hriat theih a, "Kha chu nakinah amah i la zawt dawn nia" a ti daih lehnghal a, ka ngei lek lek a ni. 

"I awm rei ang a thil awmdan i hmu thiam tial tial mai ang" tih zawng min hrilh a, thil dang zawh leh ka tum pawh chuan, "I ţhat leh ţhat loh ka rawn thlithlai che a, ngaihtuahawm i ni lo bawk a ka ţhiante ka va zawm ve tawh ang e" a ti a, a ţhutna aţanga thawh pah chuan, "Ka hrilh che kha aw...hetiang thil hi nangmahni chiahin in tawk lo a nia. Mizo ah pawh tam tak an awm a, an inthup tlat avangin kan hre lo mai mai zawk a nih hi. Thil thleng ngai lo a ni hran lo a, a thleng mawlh mawlh reng tawh zawk a, midang pawn an tuar thei ti la pawm thiam zir rawh. A nih loh chuan hrehawm i ti tial tial ang" a ti leh a, min chhuahsan zui nghal a, a ţhianpa chu a duhsak ve hle mai. 

 In kan thlen thlengin Nicholas nen kan inbe tawh lo a, a hnungah min ţhut dun tir tak nain sawi tur kan hre lo aniang kan inbe lo tluan ţhak tak tak. In lamah lah kan vaia eitur an lo siam a, "Chaw ei lo a haw loh tur" tiin Pa Chhawna chu a lo phur khawp mai a, kan indah fel hnuah choka ah ka lut tlang a, puih ve loh a nuam si lo, ka chau bawk si, kan in ka ngai khawp mai. 

"Kungte, eng nge ka lo tih ve dawn?" ka tih chuan "Engmah tih a ngai lo" a ti hlauh a, dawhkana a chi chhawp chu a tlem deuh a hriain ka dah belh a, chawhmeh dang chu ka en vang vang a, tih tur a awm lo tak tak a ang. 

Choka aţanga ka chhuak chu Ngheti leh Chalţhuama ten min lo ko hrang a, "In ti fel tawh em ni? Hmai phih ka duh a, a thak nuai nuai mai" ka ţhiannu chuan a lo ti sar sar a, "Ti fel tihah Kungtein tih tur a awm lo a tia, chawhmeh pawh a chhawp chhuak vek tawh a. Lokal rawh u kan pindanah hmai a phih theih vek alawm" ka ti a, hreh hmel deuh hian min zui a, midang mit pawh kan la deuh niin ka hria.

"Naktuk aţang chuan tih tur a awm lo pawh ti se pui zel tawh rawh aw" pindan kan luh ruala ka ţhiannun a tih chuan, "Aw..min ngaihtuah suh. Khalam kha chu ka hre ve bawk alawm. Tunah te chuan zu en ve mah la, tih tur i hmu tawh bik lo ang" ka ti a, hmai hrukna ka pek hnuah ţha takin bualin a pan ve mai bawk a. 

"Enteh Saii, keichu inpa hi a fel hmel e ka ti" Chalţhuama chuan a ti zet a, a inthiam lo leh deuh aniang kut vai ruai chung hian, "Ka sawi awmzia chu maw..a hmel landan chu a rum a, ka hre tho a, landan ang hi a lo ni lo ka ti. Nelawm loh deuh angin a lang tak nain a sual ka ring miah lo" a tih zawm leh a, chhang lem lo mah ila min rawn awm hnaih a, ka beng zawnah hian, "Ţawngthei min ti dawn tih chu ka hria a mahse hrilh chak deuh che ka nei" a ti sa sa a, ka ngaihven rang khawp mai. 

"Min hrilh la" ka ti a, sofa ah kan han ţhu dun te te a, a insiamrem sât sât hnuah, "Ih maw..thla kan lak laiin a rawn chhuak a, Tleipuii chu mipa pakhat nen an inzui a, khua a thim deuh tawh sia rawnkal ve ho khan min hre hrang tawh lo aniang an rel che a" a ti ta mai a, "Engtin nge min rel a?" ka ti thuai a, amah chu ka en ran bawk a, engtin ti thei tawh lo mah ila ka hre chak hrim hrim. 

"A mawl e..a thinrim hma si an tia, mahse an sawi tam hmain inpa'n i thlavang a lo hauh a, 'a duh vanga pasal nei a ni lo a, a la inpeih lo a, a la naupang bawk' tih velin a chhang let amaw..an sawi zui ngam lo aniang thil dang an sawi daih a, keichu a sual ka ring miah lo. Naupangchhia deuha awm chang chu lo nei ve pawh nise a rilru a puitling tho ang" tiin a fak hlawi hlawi a, ka duh phah chuang der lo. 

"Ka thlavang a hauh loh chuan a hmingchhe dawn a sin. Bakah ka mawl vang a ni hleinem, an duh dan dan a min awm tir a, min thunun an tum hi ka kham ve tawh alawm. An ngaih ngaihin lo ngai vel mai mai rawh se. Tumah ka inthunun tir tawh dawn lo a, chu chu an hriat a ngai alawm" ka ti a, Ngheti a lo chhuah tak avangin engmah kan sawi zui ta lo. 

Chaw lo ei ho chuan min be siam siam hlawm a, a rul tawk lek lekin ka chhang a, Biaktei thleng chuan tumah in nel tir vak ka duh lo thung. Hnunglama min sawi duh vek an nia, min hnaih poh leh ka tan an hlauhawm ting a ni mai. A hnu lama buai ai chuan inveng lawk thek ila thil tam tak ka pumpelh a ni mai. 

An haw hnuah kan chaw eina vel chu Kungtei nen kan tifai a, "Puih ka ngai lo" a ti tak nain inchunga chhoh nghal daih chu a mawi lo ka ti ve tho sia, ti hian theihtawp ka chhuah anga, thiam nei tlem mah ila ka zir chawp ang a, ka thiam dan danin ka ti ve zel bawk ang. Chuti chunga min ngaithei lo tu an awm a nih chuan ngawi rengin ka tuar mai mai lo bawk ang. Hrehawmna inhneh tir ka tum lo a, ka duh lo chung pasal min neih tir tawh a, an duh dan a awmin ka tih tur ka puitlin tawh bawk a, tun aţang chuan mi duh dan ni lovin ka duh danin ka nung zawm ang. Kan innei rei thei loh a nih pawhin pawi tihna ka nei bau lo. 

Pindana ka chhoh ve meuh chuan a tlai ruai tawh a, Nicholas chu thlang lam tukverh bulah bang nghengin a ding a, biak ka tum zet nain a inngaihtuah muk hmel em a, be lo in bualin ah ka luh san ta zawk a. 

Ka chhuah leh chuan ţhutthlengah thatchhe zetin a lo ţhu tawh a, beer a lo in a, meizial a zu khu hlat hlat bawk a, "Khawiah nge i mut dawn?" ti a ka zawh chuan min rawn en ve chauh a, "Khumah lo khawiah nge mu se min tih?" tiin min lo zawt let khauh a. 

"Sofa ep chiahah i ţhu tlat sia ka muhil thei nang" ka tih chuan a lo nui suk a, "Ngati nge? I zam ve deuh tihna em ni a?" a ti a, ka thin a rim leh lek lek tawh. 

"Teuh lo mai...zu rim leh meizial rim kha ka ngaithei lo alawm. Mut dawna hmuh che ka peih lo bawk a" ka ti let ve sak a, ka ţawng duh dan chu ngaithei lo ang hrim hian a lo ner sawk a, ka sawi fo ţhin angin a mizia hi ka hrethiam lo takzet a ni. 

CONT...