HIS LAST LOVE-5

HIS LAST LOVE-5

"I mut phei nghal loh chuan ka mut khalh dawn che nia" ka tih chuan ka lam a rawn hawi leh a, ngeiawm zetin a kiai suk bawk a, "Va mu rawh ka rawn mu ve ang" a ti leh tawh a, hetianga a nuih tawh chuan thu lawmawm a sawi ngai lo reng a ni. 

"I duh phawt chuan i rawn mu ve dawn nia. Nupa alawm kan nih le" ka ti let ve sak a, ka la duh tawh mai lo, nuih luih sak pah hian, "Ka mang a chhia a nia" ka ti leh hram a, ka inher hmak bawk. 

Khumah ka mu meng kar a, phone khawih pahin Nicholas chu ka en zeuh zeuh a, a la ţhu ngawi ngul reng a, beer chu a in zeuh zeuh a, a bialnu kha a ngaihtuah ve a ni maithei a ni.

'I tih tauh khan kan hamhaih lutuk a, kan en zui vang vang hlawm che a, mahse midangin an nuih hnuah che leh in pa hial an chhaih fiam tel ve hnu khan a rawn umzui che a' Nghetin a lo ti leh tawh a, min umzui tu an awm tih chu ka hre ngei alawm. Ka awmdan avang te, an lo chhaih kher avang te leh bualin a ka awm laia ka thusawi avang te khan a thin a rim dawn tih chu ka hria a, mahse pawi tihna ka nei lo, kan inngaina miau lo a, inti lawm tawn tur kan ni hleinem. Mipa duhzawng ka neih awm ka la hre lo hrim hrim a, ani phei hi chu duh lo tak ka ni. 

Ka men chhung zawng thawm a siam tawh lo a, ka chau ve bawk nen, ka lo muhil aniang ka taksa na lutukin min ti harh a, men ka tum a, pindan chhung a en ut tawh avang chuan ka chhing leh vat a, mit a vai zui mam mam mai. 

Ka taksa chet ka tum lah chuan ka thei der lo, ka bula mu chu ka en a, a ban leh bawp chu rit tham tak a ni. Min kuah bet tlat a, min khan bawk a, ka mang a chhia ka tih ve kha chu ani lakah hi chuan nep te a ni ringawt. 

Thinrim ţunin a bawp chu ka nawr sawn a, a ban ka dah sawn sak sawk bawk a, ka dim loh tehreng nen a harh miah lo. Ka ţhut chhuah rualin ka zi mar ţalh ţalh a, ka taksa na lutuk avang chuan Nicholas chu ka'n en leh ringawt ţhin, a la muttuiin ka chet vel dan kha a hre lo reng reng a, a mutthilh lai chuan pawi a sawi loh ve hmel khawp mai. 

Inhnuaia ka chhuk chuan an lo tho leh ţhap tawh a, Anthony leh phir te chuan exer an la ni ngei tur a ni thlanin a lo la bual huh phang hlawm a, phir te thawmhnaw hak ka hmuh chuan ka ner ru sak mai. An kawr hak chu a mar pang a, a chungah kawr ban tluan ha ve bawk mah se an dul a lang huai tho a, an kekawr lah chu naupang hak ni awm tak a ni, ka en zawng ringawt pawhin ka lo hah vek thei. 

Nu Hlimi a lo luh ve takah chuan, "Tih tur a awm em?" ka lo ti var a, min en zawk a, Kungtei zawk chu en lehin, "Thingpui han siam rawh. Saii pawh hian a duh ang" a ti a, dawhkan a kil zui hmak a, biak luih a huphurhawm khawp mai. 

"Ka han inbual ange...Saii, tih tur i hriat loh chuan Kungtei kha i zawt zel dawn a nia, chawhmeh kan hmeh lawr dun ngai lo a, siam vak a ngai lo ang" Anthony chuan a ti hlauh a, tawi tea nuih pah hian Nu Hlimi zawnah chuan dawhkan kilin ka ţhu ve a, thingpui nghah pahin phone ka khawih a, ka tih fo dan a ni a, sim a har angreng khawp mai. 

"Pâtea kha chhang lo pe ve rawh u" Faith-i ţawng ri ka hriat chuan ka ngaihven leh hawrh tawh a, Pâtea an tih hian min ko emaw ka ti ve ziah. 

"Lo leng ţhu rawh u..in va fel ve" tiin inpui lamah lah Pa Chhawna a ţawng lung lung reng a, Nu Hlimi pawh a phun hlak nghe nghe a ni.

"Kan hah zâwn lutuk a, inleng neih hi a khamawm rih riau. Kungte, i puin thingpui a lam leh dawn tho a, lum lâwk la Saii hian va sem rawh se" a ti nghal zung zung a, keipawh chuan ka tih tur a ni tih hriain ka lo hnial bik lo.

"Nu, inneih ni khan U Chhandami a lo inkhawm ve a, tukin a kan walk pawh a fapain min zui" tiin Hope zawk chu a phun sar sar a, Chhandami a tih pawh chu ka hre ve lem lo.

"Henu hming hi sawi tei vet suh u. Mi nun tichhe tu a nia, a huatin ka haw hlur mai a ni. Inkhawm ngam tur pawh a ni lo, zakthei lo leh lutuk mai" Nu Hlimi chuan a ti tan tan a, thingpui a inzawh rualin kuhva a phawrh nghal zat a, a thau bawk nen, a ang tun tun phei chu rapawm lamah te pawh a kal alawm le.

Pa Chhawna chuan thingpui a lam ta ngei a, Kungtei chuan a so chiah thu lo hrilhin inleng zat te chu a zawt a, ka sem huphurh ngang mai. Ka pa ţhiante an lo len ţum pawha thingpui lum hlau a hel ţang ţang ţhin kha ka nia, in a ka tih ngai loh zawng zawng ka tih vek a ngai ta si a nih hi. 

"Keiman ka va pe mai ang" Kungtein a tih chuan, "Mo thingpui lum in chak a lo leng an ni lehpek ang. Lum em lo mah la nangman va sem rawh" Nu Hlimin a lo ti deuh tlat a, hreh deuhin ka tho ţuah ţuah a, ka lai angreng viau mai. 

"Pa Chhawn, hei thingpui chu" ka ti lauh a, inleng te chu an lo nui dar dar a, Pa Chhawna pawhin lehhawi meuhin min lo en a, an ţhutna thleng lo deuha ka ding chu, "Han sem kual rawh...niminah pawh i thingpui lum in chakin an lo leng a, in lo in an haw a, ka ţhiante ho an nih hi" a ti zung zung a, ka ko sual tih ka hre kiau a, ani erawh chuan a hre lo der tlat thung.

"A thlum leh a hang kha in dah hrang tiraw?" a lo tih leh chuan, "Aw..heng ho zawng hi a thlum" tiin no var zawk chu ka kawk thuai a, Kungtei min hrilh dan kha a niin ka hria. No inang loah a dah a, a rawng dum a mi zawng hi a thlum a ti bawk. 

Ka sem zawh rualin choka ah bawk ka lut leh a, Kungtei bulah dingin a thil tih dan vel chu ka en a, "Chaw ka chhum tawh a, bawngsa hi kan kang tawp mai dawn a nia. A hmin hman em ang chu maw..thil dang siam duah ai chuan sa hi awm se a awlsam mai" a ti zung zung a, bawngsa a khawih dan vel pawh ka chhinchhiah ru ve ran a, loh theih lohin he inah hian ka hun tam zawk ka hman a ngai tawh dawn a, chuvang chuan ka pasal hi duh lo viau mah ila ţul hlei lova indawm kun reng aiin an tihdan hi ka zir ve a ţul a ni. Theihtawp ka chhuah chunga min la ngaithei lo a, sual an chhuah a nih chuan ka ţim hrep tawh mai aniang chu, mahni inven ve na zel alawm. 

"Saii, no va seng rawh" Nu Hlimin a lo ti leh tawh a, inleng neih chu a ning ve ngang aniang a chhuak phei duh ţhak lo. 

No seng tur a ka phei chu inleng zinga pakhat chuan, "Mo thar a chesual a ni maw..thingpui hang in tumin a thlum kan in daih mai. Vawikhat in zuk tawh hnua inthleng leh lah tih chi a ni mang si lo a" a lo ti charh charh a, midang pawh chuan min lo fiam vein an nui huk huk hlawm a, a zahthlak ve reng. 

"In lo len leh hunah chuan ka pe sual tawh lo ang che u" ka ti thla ve rawk a, Kungtei khan min hrilh sual nge ka hre sual ve hrim hrim pawh ka hre tawh bik lo e a. 

No ka sil laiin Nicholas pawh a rawn lut ve hlawl a, "Thingpui i duh em? I tho hma duh kher a nih kha, vawiin te chu tih tur a awm tawh lo a, office lah i la kal dawn chuang bawk si lo" a nu'n a lo ti seuh seuh a, "Duh lo" tih zawngin a chhang a, a thophang aw chu a pawr khawp mai. 

Pa Chhawnan a koh avangin phun nang nang chungin Nu Hlimi chuan min chhuahsan a, diktak chuan awm ve reng se ka ti zawk. Kut hruk hul paha "Kungte" ka ti chu, "Tih tur a awm tawh lo, in pa bulah sawn va ţhu mai mai rawh" a lo ti var a, a nui pât pât bawk a, induh tawn nghal viau turah min ngai hlawm hi mak ka ti tak tak a ni. 

"Min khan na vek alawm" zahzel a tih paha a ep a ka ţhu chu bottle dawm ran chungin min lo melh run a, min ngainat loh hmel ngawih ngawih a, nimin a ka awmdan avang khan a la lungawi lo viau ang tih ka ring thlap a, pawi tihna ka la nei lo tluang zel bawk.  

"Ka tawk hlek lo che" a tih laia a hmel awmdanah te chuan min ten emaw tih mai tur a ni, ve lutuk hian a. 

A ngei turin ka nui lui vak kher a, nur deuh nanga min la en reng lai chuan, "I mawng pawh kawm ila i hre dawn lo a nih kha" ka ti a, min chhang peih tawh lo aniang a hawisan hmak a, biak tur tumah an awm tak lohah chuan ka chhungte ka ngai leh hle tawh. Ka chhungte ka tih hian ka pa ka ngaihtuah tel ve ngai tawh lo, ka haw takzet a, min en hran bik chhan leh pasal min neih bo tir daih chhan hi ka hrechak a ni. 

Ka awm ve hnua chhungkuaa tukţhuan kan ei hona hmasaber a nih dawn avangin Pa Chhawnan chhung inkhawm neih a rawt a, "Tlai lamah chauh kan nei ţhin a" a ti hmasa te te a, chhungkaw pawimawh zia te a sawi luam a, a thusawi kar laka Pathianthu a zeh tel apiangin Nu Hlimi a lo Amen a, ka mona te chhung chu an rau rem rem khawp mai. Thlarau thianghlim a nih phawt chuan a lem leh a tak pawh a leng halh vek ang. Tukin a awmdan ka ngaihtuah let a, thlarau thianghlim tak tak, a pure ţha chu kan thlen hmel chiah loh. 

Chaw kan ei lai chuan kan nupain kan thu dun ve ran tak nain kan inbe lem lo a, ka ep chiaha ţhu Anthony chuan min melh zeuh zeuh tih ka hre ru ran a, hre lo ang hmiahin ka awm thung. A insum theih loh tawpah "Saii hi ka hmuh hnu a ang tak tak a ni" biak bik pawh nei lo hian a ti a, ka chhan hma hmain Nicholas chuan, "I hmu tawh ang...damdawiinah i mikhual hleinem" tham lo zet hian a lo ti a, Pa Chhawnan aw a thian nghal a, Nu Hlimin thil dang a sawi daih bawk a, chhungkaw ţangrual tak chu an ni. 

An phul deuh hlut hnu chuan kan ngawi leh reng ang lawi a, Kungtei sa kan lah chu a sak em em mai lehnghal. Nicholas hian bawngsa a ei lo tih chaw ei dawn khan ka hre chiah a, ka sa ngainat ber a ni ve tlat thung a. Sa ti ka seh thla chiah tihah chuan ka vawnna a pial thut a, a per zui daih a, ka en zui ngam miau loh avangin khawiah nge a tlak ka hre zui lo. 

Nicholas bawkin ngeiawm chhuah lehin, "Khawiah nge i sa ei lai kha?" tiin min lo zawt kher a, hawi chhuah loh theih ni tawh hek lo le, zak lutuk lo anga lan tum tlat chung hian ka hawi chhuak a, "A tlan bo a nih kha..umzui lo mai ang" tih pahin a dang ka suak leh a, hnar chu lian duh tak a ni. 

"Faith-i thleng bula saw a biru, va man chat rawh" a lo tih leh chuan phir te chu an lo nui kar kar tawh a, ka zak lutuk chu ka lum pap pap a, chaw ei a sak ţalh tawh mai. A chhungte zawng zawng hmaa min ti zak duh lehzel chuan ka huatna a ti belhchhah a, he mihring hi ţhian ang chauh pawha ka ngainat theih ka ring lo bur. 

Chaw ei kham a hmun kan tihfel lai chuan Kungtein min be mawlh mawlh reng a, ka aw e vel mai mai a, ka ngaihtuahna ka kawm daih avangin a thusawi pawh chu ka hre mumal lo. Thleng sil ka chuh tlat a, kal daih bik chu nuam a ti lo aniang ka bulah lo ding vein, "U Nico khan a fiam mai mai che a nih kha aw. Ih maw..a hlim lo thei lutuk a, i lo awm ve hi nuam a ti ngawt ang" a ti reuh a, a â mange aw. 

"Min duh hleinem, keipawn ka duh lo a, kan inhua alawm. Kan inneih dan te chu i hre ve vek ang chu. Ka lo awm ve hi Pathian hremna ang riakah a ngai ang chu" ka ti a, min din hnaih zual sauh a, chet a ti harsa lek lek a ni. 

"A ni lo...ţhian a mamawh alawm" a tih chuan, "A nei alawm" ka lo ti ve vat a, kum18 chiah a la ni a, a ngaihtuahna a la tlem deuh a nih pawhin ka hrethiam tho mai. 

"A hlim lo tak tak alawm. A nupui i ni tawh bawk a ka hrilh mai mai ang che, an chhungkua hi an inpawh lo a, Anthony nen phei chuan inhnial buai chang an ngah mai, mahse, u zawk na na na chuan a dawh zel a" a tih lai chuan lo nui hakin, "A naupang zawk i u a, Anthony i u leh si lo a ni maw?" ka ti a, thudang sawipui ka tum ta daih a. 

"Min u suh a ti alawm. A chang chuan U Nico hi mal riauin ka hre ţhin a" tiin thupui ngaiah bawk a lut leh tho a, "Phaiah a awm reng ţhin an tia, mahse chutih lai vel chuan hetah ka la awm lo a, hna a neih hnuah chiah ka awm a, nilengin a chhuak a, a lo haw pawhin a chhungte bulah a awm ve ngai lo. A lenchhuah loh leh pindanah a tawm bo tlat a, tunah chuan kawm tur i awm tawh a, a khua a har lutuk tawh lo deuh ang. Miin chhungte aia ţhiante a ngaihpawimawh zawk chuan eng emaw tak a lo awm ţhin an tih kha" a ti ve ngial a, kawm hlim turin min duh deuh a nih hmel. 

"A hlimna a nih te chuan lengchhuak reng rawh se..pawi ka ti hleinem. Kan pa te thu angin kan awm tawh a, tunah chuan kan nun ve ve hi kan duh danin kan chên tawh ang chu" ka ti a, mi fapa khawhar kawm hlim tura kan in chhuahsan ka ni miau lo a ni. 

Pindan ka thlen chhoh ve meuh chuan chhuah tum ni awm takin a lo insiam peih diam tawh a, darthlalang hmaah dingin a sam chu a tuai ve ngial a, sam kir tawh sa chu tuai nalh a har awm emai. Biak pawh be lem lovin khumah ka ţhu a, phone ka khawih daih a, Ngheti message a lo awm leh vang tawh. A duty tawh dawn a, keipawh kal pangngai ila chu kan ţhiandun a kan night hun chiah a ni. 

'Ka night dawn tho a, ka insiam anga ka lokal ang. Tihfel tur kha a la tam angreng si' a rawn ti hlauh a, thla a ti muang ve thei a nia. 

"I beng a nghawng em ni?" tih hluk paha ka ke rawn chhir tu chu rum zetin ka melh a, phone ringawt ka ngaihven a, min biakna ka lo hre hauh lo. Chuti chung chuan, "Aw..ngawng e...i aw hriat lohna a nih chuan ka la hnawh belh ang" ka ti ta tho a, a lo nui suk mai. 

"Pindan chhung hi lo tifai ang che" thupe aw zeta a a tih chuan, "Miin tih tur min hrilh hian ka ngaithei ngai lo tih te chu i hriat vek tawh kha. Ngawi reng khan chhuak la a ni mai" ka ti ve hmak a, ka thusawi chu ngaihpawimawh loh hmel fe hian a hmui a pet sawi zauh a, Ngheti lokal tum lo se chu ka ţhulh leh duh tak tak ang. 

"Ngît ngêt che hian" a ti hman chauh tihah chuan, "Ngawi renga chhuak tura ka tih che kha, ziah zuah mai, mipa ve si ţawngthei leh lutuk" ka lo ti vin hlar a, a haw bawk aniang a kâ in a thaw chhuak hawlh a, a nui zui hawk bawk a, ka engahmah a thawk lo thung. 

Chutah a kekawr ipte la zen hlun chung hian a rawn kun hniam a, hnai set sawtah min enin, "Hmeichhe kawlhrawng leh ţawngthei zet hi ka ngaina hauh lo. I lei kha i venţhat loh chuan i la inchhir khawp ang" tiin a phun sup sup a, ka hlau bik lo nasa mai. 

"Ka thunun theih chin a nih phawt chuan ka inchhir lehna tur thil ka ti ngai lo. Min vau zam te i lo tum ve ringawt ange, i inchhir zawk ang" ka tih ve kha kha takah chuan a hnar a tum dat a, sual a chhuah a nih vaih chuan a ni ai hian ka sual thiam zawk daih ang.

"Mi ngaihah chiah i nupui ka ni ka tih fo kha. Min thunun tum lo la, ka mimal nunah inrawlh bawk suh. Keipawh ka inrawlh lo ang" ti a ţha deuha hrilhfiah ka tum lai chuan ka nghawng a rawn nul thuak a, "Mint i ngaina a ni maw?" a ti zui sup a, inthunun hman tawh hek lo le, "Kal rawh..chhuak nghal rawh, tenawm leh lutuk mai" tih mawlh mawlh pahin a rem lai laiah ka chum zawt zawt a, a inlak hran rualin keipawh ka ding ve nghal a, kan inhmachhawn ran mai. 

"Chhuak daih rawh..zanah pawh lo haw suh ang che. Ka phalna lo chuan i kut hmawr pawhin min khawih suh ka ti a ni lawm ni?" ka ti tan tan a, ka au ri chu a chhungte pawhin an hre pha hial maithei a ni, an awm hnai a nih phawt chuan. 

"Ka nupui i ni tawh a, duh ila chu tunah pawh ka khawih thei che. I duh dan dan a i tal vel ka phal hi lawm hle zawk rawh" a la ti ngam a, chhan let ka tum ve laiin a kal daih lehnghal. 

Khumah ka ţhu leh hnawk a, eng thilah teh hrep nge maw ka pa hian min hnuh luh ni? Kan inneih hmaa Nicholas thusawi kha a dik khawp mai, hremhmun tenau a awm mek angah ka inngai. 

Pindan kawngkhar kik thawm a awm rual chuan ka lo chhawn nghal a, ka ţhiannu a nih rin nen Anthony zawk a lo ni. 

"Eng nge i duh?" ka ti deuh thawr a, ka aw pawh chu a nelawm viau loh maithei a ni. 

"Inkawm ang" a tih chuan ka hamhaih deuh a, ani lah chu lo lut tlang nghalin tlangnel deuhin sofa a pan a, a ţhut fel rualin meizial a phawrh a, hreh teh ngang mah ila ka pan phei hna hna a, a ep chiahah chuan ka ţhu ve a. 

"Tih tur i nei lo em ni?" ti a ka zawh chuan lu a thing a, Nicholas zing tho hlim ang maiin a ni pawh a sam a ther far mai. Sam kir hi chu mipa pawh, hmeichhiaah pawh enkawl a har viau ang. Sava bu emaw tih mai turin an sam an ti buk lo hlauh a, an lang fresh em em tho. 

"Tukin khan i hawi â nasa em a, i duh duh min zawt rawh ka hrilh vek ang che" a tih hnuah pawh ka la bo tho a, "Chhung tin hian kalphung kan nei a" a tih takah chuan a sawi tum ka hrethiam ve chauh a ni. 

"Zawhna ka nei tawh lo, Kungtei a fel a, tih tur min hrilh theih mai bakah min zirtir pah thei bawk a, min puih i inhuam naah chuan ka lawm tho a" ka ti bah niaih a, a nau te ho ang lo takin biak a nawm hmel khawp mai. 

"Ka nu hi chu a ang tun tun zel a, a rilru a chhe lem lo thung a" a tih chuan, "Kan inang dawn a nih chu. Ka zia a ka duh lo ber a ni" ka ti chu a bang bo deuhin ka hria. 

"Ka sawi awmzia chu maw...a thinrimin a ang bawrh bawrh a, a rilru a chhiat loh bakah a thinrim rei lo a kan tia, ţha kan ti viau ringawt a, mahse thinrim lai chuan duh loh loh kan sawi ţhin a, thinrim rei loin hre zui lo mah ila mi rilru kan hliam hman tho ang. Thusawi tawh a lak kir leh theih tawh ngai si loh a, kan an chiam chiam khan kan thawl huai a, kan thinrimna pawh a zia deuh huai zel a, mahse kan va hauh a te rilru kan ti na hman tho a, midang a lo hre ve tu ho lahin mi â min ti ru sup sup ang a, thinrim ber lai pawha insum ţang ţang ţhin, inthunun thei tak te hi an ngaihsanawm ber mai" ka ti a, ka duhthaw khawp mai. 

"Tukinah ka nu a âng em ni?" tiin min lo zawt khauh a, "Âng lo e...ka mizia a ka duh loh lai a nih avangin ka sawi ve mai mai a nih chu. Ka sim thei rih chuang lem hlei lova" ka ti ban charh a, kan nupa pindan a a lo lut mai hi a dik chiah em ka hre lo a, ani lah chuan pawi a tih loh hmelin an chhungkua an inpawh viau em maw ni tih awl tak a ni. 

"Ka pa hian thil a sawi tam lo a, ti tura min hrilh chu kan hnial ngai lo thung a, Nicholas hi a luhlul ve deuh a, phir te hian midang an ngaihven em em lo a, hrehawm i ti lo ang. Ka chik reng che a, setana meuh pawhin a hrem ve ngam lo maithei che a ni" a ti a, a nui pah bawk a, a la mawi em em zui a. 

Kan titi tak tak hmain Ngheti a lo thleng a, Anthony nen kan lo awm daih chu mak a tih hmel khawp mai. 

"I ţhiannu a lo thleng tawh bawk a inkawm ve thung rawh u" tiin Anthony chuan min chhuah san a, ka din rualin ka ţhiannu chuan min pawt her sawk a ni ber. 

"Mawl leh lutuk mai. I pasal hi duh lo mahla pasal i nei tawh tih tal hi chu pawm tum teh. A unaupa ngei ngei pawh nise in nupa pindanah mipa dang i awmpui tur a ni hleinem. Keini awm ve ila chu thuhran a nia, inhnuaiah lah tumah an awm bawk si lo. Miin rawn hmu thut che u sela chu an ngaihdan che a dang vek ang" a ti nghal hlaih hlaih a, "Keipawh ka tim ve tho alawm. Amah zawk a lo lut a nih a nih kha" tiin lo insawithiam ve bawk mah ila, "Hmun dangah inkawm ang ti mai ta che. Nicholas phei chu a hel tawh sa tehreng nen hre vaih se chu ţawngkhum vel che nuam a ti leh sawt ang. Tunah pawh ka rawn hmu a, a bialnu nen an inphur a, vengchhung mite chuan an sawi duh leh viau ang" a ti zung zung a, an nasa hle mai. 

"Min han ti zak vaih teh se aw..a chak lo viau ang. Tlawm dai anga lan ka duh hauh lo a nia, miin a pasalin ngaihzawng a nei chung pawhin a nei lui tlat te min lo ti ange, langsar deuhin ngaihzawng ka nei ve duh mai ang" ka tih chuan, "Hetiang rilru i pu ţhin hi alawm ţha lo chu. A tih ang zela i tih ve chuan in inrem thei nang. Innei hlen dawn lo mah ula inrem ula, inkawmngeih tum ula, nangpawn nuam i ti zawk ang chu" ngenngawl zet hian a ti a, ka hrethiam tho mai. Min lainat vang leh ka hrehawm a hlauh vang vek a ni. 

"Mipa an nih vang maiin an duh duhin an awm anga, kan en liam mai mai tur a ni bik hleinem. Ka rilru chu a na hauh lo a, mahse amah atchilh bur anga min ngai dawn a nih ai chuan mi zawng zawng hriat thama ngaihzawng neih ka hreh hauh lo ang" ka ti a, min sawipui zui duh ta bik lo aniang, ka thawmhnaw phawrh mawlh mawlh pah hian, "Pa Chhawna hian Nu Hlimi hi a duh zawk i ti em?" a ti ta daih a. 

"Ti ve tho e..Pa Chhawna hi chu a hmelţha a, Nicholas te unau pawh hi an vannei a nih hi, an sam kir tih lohah chuan a nu an chhun vak lo a, vun rawngah pawh Pa Chhawna lamah an kal vek" ka tih chuan, "Nicholas hi a ngo ve hleinem..vunah ngawr ngawr a nu a chhun a, a mitmeng te pawh a danglam em hi. Nu Hlimi a chhun hlawl lo" a lo ti vat a, kan sawi ho sawt khawp mai. 

"Nu Hlimi hi chu a hnar a mawi lo em a, hei hian a ti chhe mai mai a nih hi. A bawk vung ka ti dawn nge a ţhu hnûr ka ti zawk dawn ka hre lo, uluk lo deuh a vawm bei thlawp a, kawm kuak leh tawp a ang ber a, chuti tih lohah chuan a chhe em em hleinem" ka ti leh ang lawi a, a thawmhnaw thleh sa chu keiin ka lo rem lut zel a, high school kan kal ve ţan aţanga hostel a awm dun ngar ngar tawh kan ni a, hetiang hi kan tih fo dan a ni. 

"Awii...a hmai te hi a hlai mah mah a, Nu Hlimi hi chu a thau leh lutuk a a langţha thei lo a nih hi. Mi pawh hian an sawi fo a, a chhe sia a sual bawk sia an tia, mahse nangman i zir chuan i chungah tumah an sual lo ang" a ti a, min sawiţhaih pah hian awmdan tur min hrilh zaih zel. 

Ka ţhiannu'n min kalsan hnu lawkah Nicholas pawh a rawn haw a, a meng sen ram a, a ruih hmel khawp mai. A kawr hak lai chu hlipin a tih fo danin sofa ah a vawm hlawm tawp a, en liam a har ţhin kher mai. 

"Kha..engati nge i vawm hlawm tawp a? Dah ţha ve mai ta che. Suk a ngaih leh suk turah dah la" ka lo tih chuan, "Chungte chu i tih tur alawm" a ti deuh hmuk a, en pawh min en lovin chhuna kan towel khai ţhat diam chu a ban vut a, bualinah a lut ta daih a, huat loh hi a har ţhin a sin.

Khum lu lam chu nghengin ka ţhu awn diai a, phone ka hum ran bawk a, duh lo viau mah ila ka nu hnenah chuan, 'Ka ning tawh e' tiin message ka thawn leh ta nge nge a. Mi ina ka awm chiah hian mahni in hlut zia ka hriat phah a, in ropui tak, kan duh apiang kan neih theihna hmunah pawh awm ila mahni in ngei aiin a nuam ngai chuang hauh lo. 

Bualin aţanga a rawn chhuah chuan, "Zar rawh" bul zet a tih pahin towel in min vawm a, sam huh chungin khumah a bawk zui thlawp a, ka ţum nghek mai dawn em maw ni ka ti rum rum a ni. 

"Zar ve mai rawh" ka ti ve hmak a, towel bawk chu ka vawm let a, a lu a khuh hlun mai. Muangchanga a kut chetin a pawt sawn a, a che zui tawh lo. 

"I sal angah min ngai reng reng suh ang che. Hmeichhiain pasal kan neih avang ngawt hian mi chhungkaw sal kan ni tihna a ni lo" ka ti leh hram a, "Ngawi hle hle rawh...lu na i ti zual" tih bakin min chhang let lo. 

Ruah a tla cherh cherh reng a, ruah malin tukverh a rawn theh ţhat ţhat a, ipik ru tak chungin tukverh lam chu ka thlir reng a, ruah sur chuan lung a ti zing lehzual a, chutih rual chuan beiseina ka neih phah thung a ni. A sur vak anga, reiloteah a bang leh mai ang a, ka hma hun hre lawk lo mah ila keipawh ka hrehawm tawrhna hian tawp chin a la nei ve em em ang. Ka chak loh chang chuan keimah leh keimah ka infuih ţhin ang a, tuman min zuam lohna turin ţha ka tih angin ka inveng bawk ang, naupangchhia min ti dawn mah se pawi ka ti lo. Ka zahawmna a pawimawh ber. 

Chutia kan ngawih dun rauh rauh lai chuan, "Pâte" a rawn ti a, a lam chu ka hawi ve vat a, hetiang hian min ko fo lo se a ţha ang. 

"Puan min lo sin tir teh" a lo ti leh a, a aw a dam ve thlup mai. 

"Nangmahin sin ve mai rawh" ka ti zet nain a taksa chu a khur deuh niin ka hria a, khum mawnga ka puan thleh chu pawt parh vatin ka sin tir a, puan siamrem paha a taksa ka sik te chuan a lo sa vur mai. 

"Damlo chung te chuan zu in mah ta che" ka ti a, khum aţang chuan ka chhuk nghal a, "Laktlak loh leh lutuk mai. Keipawn ka hmangaih reng reng hleinem che. Hmangaih dang nei ve em lo mah ila ka hmangaih vang che a nei che ka ni hleinem. Min en ta che..zu far khat pawh ka la in ve loh hi. Hmeichhia pawh i tluk lo" ka tih tan tan chuan, "Hmeichhia i ni hleinem" chau tak chung hian a lo ti leh hram a, ţawng thlawn lah hi a ba duh der lo. 

Inhnuaiah tlan thlain chokaah ka lut tlang a, Kungtein cooker a lo keng leh va tawh. Chutia ka tlan lut thut chu min lo en phawk khawp mai. 

"Khawiah nge damdawi in dah ţhin? Nachhawkna tih angreng vel te? I u Nico-a khi a khua a sik a, damdawi ka pe lawk anga ka lo pui ve dawn che nia" ka ti zung zung a, he inah hian Kungtei lo chu hmuh tur vak an awm ngai lo, an bo diak a, chaw ei dawnah khawi khawi emaw aţangin an lo chhuak chauh zel. 

"Chhuarah khan a awm..bawm varah khan. A lo haw hlim khan tuiin turin a lo lut a, a mit a sen ka ti reng a ni. I chiu dawn em? Inchiu chu a hlau a nia aw" a lo ti ve seuh seuh a, bawm chu dawhkanah ka dah chhuak a, a chhung hai rak rak pah hian, "Chiu dawn lo e...khawsik satliahah te chuan inchiu kher a ngai hleinem" tiin ka hrilhfiah a, inchhungah ka chho lehnghal a.

Pindan a ka luh meuh chuan a lo mu ţha ve tawh a, side table a bottle inhung chu ban vatin, "Kha..damdawi ei rawh. I inhnem loh chuan a pawi lo ang" ka ti a, a che eih lo. A awmdan chu ka ngei angreng viau a, ka huatna a zual zel ni maiin ka hria. Mahse, nurse ka nih angin damlo ka en liam mai mai thei lo a ni. Tu pawh lo nise ka buaipui phaka an awm phawt chuan ka buaipui vek ang. 

"Damdawi ei rawh ka tih chu" ka ti nawn leh a, "Ka dawlh thei lo" zawi tea a lo tih chuan mak ka ti lem lo. Puitling pawh damdawi mum dawlh harsat deuh an awm ve a, zu leh a zuk ruih chi tih loh chu a rui ve thei dawn miah lo a nih hi. 

"Ka'n chhu sawm ange" ka tih lehzel takah chuan, "Bengchheng lo la ka dam mai ang" a lo ti a, bottle pawm chungin a mutna bulah chuan ka ding reng a, Kungtei khan inchiu a hlau tih chiah a sawi a, damdawi ka la lai min hmu vek chung pawhin a ei theih loh thu a sawi tel hauh lo, a ei thei tihna a ni mai. Ka buaipui a duh lo mai mai zawk a nih hmel. 

Ka kun hniam a, a mit a chhin tlat avangin min hmu thei lo a, thil dang a ngaihtuah daih phei chuan kan inhnaih hle tawh tih pawh a hre kher lo ang. 

"Damdawi mum i dawlh thei lo maw?" ka ti ţha leh a, min chhan tuma a ang chiah tihah chuan rang zetin a kâ ah ka hnawh lut a, damlo e ti lo chuan a ţhu chhuak rang khawp mai. Ka bottle ken lai chu a rawn ban vut a, tui a in zui khalh khalh a, a ţhial sawm nge a dawlh ka hre tawh bik lo. Ka dah luh khan a lei chiah a thleng ang a, a dang a zu thleng pha kher lo ang. 

"Eng nge i hriat a?" vin zet hian a ti a, a mitmeng a dur khup a, lawm lo tih hriat zetin a tum zui hmuk bawk a, mipa hian damdawi ei an hreh zual bik niin ka hria. 

"I tana ţha tur a nih kha..mu leh tawh rawh" ti a kal mai ka tum chu min pawt let nawk a, ka inring lo bawk nen khuma a ţhu chu ka bawh rawk rawk a, damlo chung pawn a chak hle mai. 

"Nupui ţhain pasalte damlo an kalsan ngai lo" a ti a, a taksa te chu a sa vung vung mai. 

"Ka tih tur chu ka tih vek tawh kha..i rilru a bawlhhawlh leh ţan tawhin ka hria, i dam nghal der a nih hi" tal phat phat chung hian ka lo ti ve thung a, min thlah nghal hlauh lo se chu a samah ka ţuan leh duh ngei ang. 

"Ka lo haw hnuah min la ti buai char char. I khua a lo har viau em ni?" ngeiawm fahrana a tih chuan, "I khua a sik a damdawi ka pe mai che a nih kha. Beisei lo ti sang vak zel suh. Ka mitah chuan pangpar ro rap, kir chuat ang chiah i ni" ka ti a, za lo zet hian a lo nui a, min tih thinrim a chak ve hrim hrim ni berin ka hria. 

"Chuan...vengchhung mite hmuh turin i bialnu phur kual tawh suh. Mi sawi kan kai vaih chuan pawisak ka nei dawn hauh lo a nia, i zak hle ang tih hre tawp rawh. Ka duhthlanna hian pasal atan a pawm thei dawn hauh lo che a, chuti chung chuan a pasalin a lerhsan ti a miin min sawi tur chu ka duh chuang lo. A let leh i tawrh ngam loh chuan a ruk hlirin hmu tawh ang che" tiin ka vau a, thinrim hmel a pu lova, mak min ti zawk mah niin a lang. 

"Kungtei ka pui ve lawk dawn a nia, inkhuh phui lutuk lo la, i sam kha ti ro bawk rawh" ka tih hnuah ka chhuahsan a, ka ti mai mai lo bawk a min chhan ngaihna a hre lo chu a nih ber kha. 

Kungtei hnenah damdawi ei chungchang chu ka zawt nawn leh a, "Aw..dawlh thei e...a nawm loh chang chuan ka pi pawhin damdawi a pe ţhin alawm. Amah tak chuan damdawi ei ngai a ti ţhin lo a" a lo ti a, a sual mai bakah a dawheh tel tih thlengin ka hriat belh phah a, a ţha khawp alawm. 

"Ruah in min dang a, kan ril a ţam a nia" tiin phir te chu an rawn phul lut hlut a, college an kal ve mek chauh a, an la upa hran lo. 

"Thingpui ka lo lum ang" Kungtein a lo ti var a, min en danah keichu min phut deuh tih a lang reng mai. 

"Zanin tlai chu alu kang tawp mai ang. A harsa zual chu i siamah ka dah rih a nia aw..ka thiam hunah ka awl char char ang che" tiin Kungtei lam ka hawi ta daih a, thingpui lum thiam lo rual an ni tawh lo. Thil dangah kan awl vek tho a, chaw an ei a, thingpui an in leh tawp a, buai lai phei chuan ka tihsak vel peih lo. 

"Aw...ka nute" Faith zawk chuan a ti lauh a, lehlam ţawng ngaichanga a ngawih vang vang hnuah, "A fel khawp mai hei...tunah pawh alu kan a tumin ka hria" a ti a, ka chanchin an sawi tih ka hre chawpchilh nghal a, a lam ka hawi zawk a, min lo en ran a, zam hmel a put loh laiin eng rilru nge a put rin thiam a har viau thung. 

"Motor chu a awm a, a mu aniang amah hmuh tur a awm lo" a ti leh a, kei lah chu an lam bawk ka hawi leh a, Hope chuan min lo nuih seih a, Faith erawh chuan a hmel ngai reng kha a la pu a, min ngainat loh zia chu tukin a ţukţhuan ei lai aţang khan a lantir der tawh.

"Nakinah anmahni be mai rawh..a nih loh leh ka nu bia la, tunah chuan choka ah kan awm" a ti a, phone chu a dah nghal aniang a reh zui vang vang a. 

An ep chiahah chuan ţhuin alu ka vel a, Faith zawk chuan Hope chu a hrilh ru leh ţhin a, ka awm ve lai renga mi an inhrilhruk hian nuam ka ti ţhin lo. 

"In thil sawi hre lo mah ila ka hnar a za reng mai. Ka chanchin in sawi em ni a? Keichu ka hnar a za nghal zel a, USA ah pawh min rel ula ka hre chat thei zel tho a nia" fiamthu a ka tih chuan Hope chu a lo nui kar kar a, a unaunu erawh a tum bar mai. 

"I inchei pâ thei lutuk a, Faith hian mak a ti deuh a, i kal theng theng zel a, i hmelţhat tehreng nen i pâ em a, chu chiah chu a sawi" a ti a, zep ţhen chin a ngah viau tho ang.

"Ni e..ka pa khawp mai. Min hmu apiangin min pu zel reng alawm" fiamthu bawk hian ka ti leh a, Hope bawk chuan zawhte ho deuh deuh min zawtin mi pawh a pawh ve sawt khawp mai. 

Chawlhkar a liam a, hna kan ţan hun a ni veleh tawh a, Nicholas te inchhung phui mup ka chhuahsan thei tur chu ka hlim ru veng veng a, ka phur sarh reng mai. Ka night dawn a ni emaw, dawn lo pawh nise boruak dang ka hip leh thei tawh tur hrim hrim hian phurna min siam a, chhuansan hlen daih tluka chak ka nei lo. 

CONT..