HIS LAST LOVE-6

HIS LAST LOVE-6

Damdawiin ka thleng chu min lo lawm hlawm khawp mai. Min hmu apiangin biak hmasak ngai lovin min lo be hmasa zel a, zawhna hrang hrang an neih te chu ka chhang let seng lo zawk. Ka night hun a ni ve tawh lo a, chutiang bawkin Ngheti pawh. Nurse pahnih leh attendant pakhat hi zan li kan night ţhin a, ka chawlh chhung khan a lo zo vek hman a, ka thawhna hmun ngei ka rap leh thei chu khawlum uap churh laia thlifim dawng ang mai ka ni, boruak a nuamin a veng halh mai. 

"I mona chu a nuam em? An fel em?" an ti leh ţhin a, "An fel rih" tih bakin ka chhang hlawm lo. An sualna ka hre rih miau lo a, nakin hun ka sawi thei bik lo nain tunah chuan ka pasal bak sawisel tur ka hre lo. 

Kan inbe khat a, zanah lah hian a lenchhuah loh leh amahin pawnah a ţhu chhuak daih zel a, ngaih nei a ang ka ti ţhin. Ka chhungte ka ngaihna lakah chuan a nep viau tho ang. Kan inbiak ve hlek leh kan inhnial a ni nghal zel a, a bula ka awm chuan ka hah ngawih ngawih zel. Theih chu nise pindan inluah ţawm loin a hrang ve vein awm ila tih chu ka duh dan a ni. 

In ka thlen veleh ka insu a, insuk zawhah ka inbual leh a, ka insum theih loh tawpah ka nu ka bia a, "Lo haw i chak leh tawh em ni?" a la ti zui. 

"Ka ngai ve che u a nih hi. Hna ka zawm leh tawh a, ka lo leng kawi zeuh zeuh maithei a nia" ka tih chuan, "Ka office daih zel alawm" a ti a, ka ngaih tawpkhawkah chuan office ah pawh ka kal duh mai ang. 

"A pawi hleinem...nu, ka ning tawh e. A mawi tawk chu kan innei tawh tho a, inţhen ka duh tawh" ka ti deuh tawl a, a ngaihdan a ni lo lehpek ang chu aw.

Rin ang ngeiin, "In la innei rei lo lulai lutuk. Inţhen chiah ula chu Nicholas aiin nangmah kha i mualpho zawk ang a, i chan a chhe zawk bawk dawn a nia. Thla khat em pawh in la inneih loh hi. Thlalak te a chhuak tawh em?" a ti zung zung a, an rawn dah tawh tak kha mawle. 

"Chhuak tawh ang chu..video thlengin a awm vek a, engmah ka la en lo. Ka en peih vel lo e a, Nicholas ka hmu peih lo" ka tih laia a lo thaw hak ri chu chiang takin a hriat theih a, Zikpuii zawk chu nise hetiang buaina hi an tawk lo ni mai tur a nia. 

"I pa hriatah phei chuan engmah sawi suh aw. Nicholas pawh i pasal a ni reng tawh dawn a, ngainat tum rawh. In pahnih a in inmil phawt chuan nuam i ti ve zel ang a, lo haw i sawi reng lo mai ang" a ti a, ka pa lam a ţang tlat hi alawm ka hriatthiam loh chu. Pasal nei tur hian min duh vek hlawm ni maiin ka hria. 

"Engmah hrilh tlak a nih ber bur loh kha. Ka pasal hi ka ţhen a nih pawhin ka rawn let tawh lo ang. In ka luah anga, keimahin ka awm reng tawh ang. Min tuithlar angah ka ngai" ka tih zat zat lai chuan phone a dah daih a, ka nu ka biak phei chuan ka ang buan buan zel a, a ngaithla peih lehpek tawh lo aniang. 

Pindan a inkhung reng ringawt chu ka ning ta deuh a, inhnuaiah chhukin pawnah ka chhuak tlang a, boruak a daiin tualzawl phei chu a nuam khawp mai. 

"Tih tur i hriat loh chuan min lo pui rawh" Anthony-an a lo ti lauh a, a lam ka hawi phei takah chuan min lo nuih vur vur a, mipa berin pangpar tui a pe daih chu mak ka ti angreng. 

"Pangpar i lawm em ni a?" nuih hak paha ka tih chuan a lo ner deuh sawk a, "Ka nu'n min tir a nih hi" a ti a, pot tinah chuan tui a tling pum vek mai. 

"Pangpar hi chu awm lo tawp mah se pawi ka ti lo" ka ti chu mak min ti deuh niin a lang. 

"Vawiin i chhuak lo nileng em ni a?" ka ti leh ta daih a, "Aw..ka mu nileng" a lo ti vat a, huan kha a kutah an dah deuh bik niin ka hria a, hna dang chelh lai a nei lem lo. 

"Rawngbawl a ngai lo bawk a khawi ka lo pui ve ang che" tih leh pangpar tui pekna chu vawn ka rual a, ani lahin, "Ka uang a nih kha..i ngainat loh chuan ti duh kher suh" a lo ti ve bawk a, kan inchuh a ni der mai. 

Chutianga nui hak hak chunga kan inpawh fat fat lai chuan gate chhungah motor a rawn tawlh lut riai riai a, tu nge a nih hre chiang viau mah ila ka thil vawn lai chu ka thlah phah chuang lo. 

"In pa a lo haw a nih hmel" tiin Anthony pawh a lo phun sup a, a kawng kan dal loh tehreng nen thil ţha lo a thleng ta emaw tih mai tur hian horn a pe a, a ri ruai ruai a ni ber. A hre pha chin chuan bengchheng an ti khawp ang. 

"Inhnuaiah tlan lut nghal mai la, i kawng kan dal loh hi" ti a ka au ri te chu a hriat phak pawh ka ring lo. Motor chhunga tum hmuka a ţhu chu ka hmu pha reng a, chutiang khawpa kan inhnaih tawh hnuah pawh chuan a thil tih chu a chawl chuang lo. 

"Buaipui rawh" ti a a u zawk a inlakhran hnuah a tawp ve chauh a, thaw a veng huai thei. 

"I va mawl em em ve...ţhenawm te ngaih i ti ţha lo mai anga sin" tih hlak hlak pahin ka pan phei a, a zawn ka thlen rualin tukverh darthlalang chu kut châng na vek khawp a nasa in ka kik a, motor chhung a ţhu reng chung chuan min lo en run a, a ngawi ngul bawk a, a sual ve ngawt mai. 

"Eng nge i duh a? Lo hawng ta che?" vin zeta ka tih leh pawh chuan min chhang lovin motor zawk chu a tawlh leh riai riai a, Anthony hi a haw bik riau em maw ni tih tur hian a awm ngun tawh mai. A ngainat loh zia a lanchhuah tir awl lo a ni ber. 

Inhnuai garage a a tlan thlak hnuah thinrim zet hian in lamah ka pen phei hmawk hmawk a, an in awmna lai hi a rem a, an kawt zawl a zau lutuk lo nain keini in ngaihtuah chuan ţha tak a ni. Tualzawl ah boruak ţha ka hip ve ang chu tih nak laiin mi mawl ber ang maiin a rawn khawsa a, boruak a ti chhe leh vek tawh. 

"Pawn a ri ruai ruai reng kha eng nge ni? Nicholas a lo haw em ni?" Pa Chhawnan a lo tih chuan, "A nih kha" ka ti hlak a, inchung kailawnah chuan ka pen chho hmawk hmawk a, pindanah ka lo chang dawn khawp alawm. Chhan mumal tak pawh awm lova a rawn thinrim ringawt kha ka haw hlur mai. 

Dressing table hmaah dingin ka lo nghak a, ka thinrim lutuk chu darthlalang a in enin ka sam ka tuai leh tâwk leh ţhin a, a nupui pawh lo ni ila khatianga awm theihna dan a nei lo reng reng. 

Kawngkhar a inhawn rawk rualin a rawn pen lut a, ka lam panin a rawn pen phei pawk pawk a, a hmel a dur khup a, a thinrim zia lang reng mah se hlauhna chhete mah ka nei lo.

"Remruatkima nen khan eng nge in lo tih?" sehchilh zeta tih pahin ka kawr awm ah a ţham a, min pawt lawp a, closet ngheng rawp khawpin min nam zui a nih chu mawle! 

"Remruatkima te chu nangmah i ni lawm ni? Min thlah vat rawh" vin zet hian ka lo ti ve a, "Sawi rawh..Remruatkima nen khan eng nge in lo tih?" a ti nawn leh a, min melh rum em em mai lehnghal. 

"Kan duh duh kan ti ve bawk ang chu" ti a duhdah taka ka chhan chuan ka kawr awm a ţhamna chu a ti nghet zual sauh a, a thinrim hmel hle tak tak mai. A hming pawh Remruatkima ni lovin Remruatsaka a ni tih ka hrechhuak chawpchilh nghal a, a in ang lutuk hi ka lo hriat pawlh leh ţhin. 

"A ve lutuk che hian a..min thlah teh" tih liam puat paha a kut phih thlak sak mai ka han tum chu rin aiin a lo awlsam hauh lo, min ţham nghet lutuk tlat a ni. 

"Danin hmeichhia a humhalh tlat tih hria la ţha deuha ka sawi lai hian min thlah mai rawh. Ka duh loh chung min neih luih avang ringawt pawh hian ka report thei che" ka tih kha kha laia za lo fahrana a lo nui vel hmel chu ben bo sawk ka chak khawp mai. 

"Ka duh vanga nei cheah min lo ngai a ni maw?" min tham lo zet a a tih chuan a mitah tak ka en a, "Hmeichhia hi a pasalin kut a thlak a nih chuan lungin tan theihna tham pawi a khawih tihna a ni mai. Min thlah vat loh chuan ka hek hreh hauh lo che a nia" tiin ka lo vau leh a, "I duh chuan min hek ta che" a ti a, ngeiawm zet hian a nui zui a, a mitmeng erawh a dur khap reng mai. 

"Anthony nen a kan lo ding dun mai mai chu a huatthlala awm viau em ni? A eng lai ber kha nge i huat a? Titi pahin pangpar tui kan pe ringawt a nih kha. Thinrimna tur i zawn reng chuan dam pawh i dam rei lo ang" ka ti hlak hlak a, ka zawhna neih ve te chu min chhan tum hauh lo hian hmui a pet sawi duh lek chauh a, ngeiawm ve tak chu a ni. 

"Anthony bulah hian awm tam lo ang che" a ti a, ka kawr awm a thlah ruala inher nghal mai a tum chuan, "I thu lo ve emai..ka duh dan danin ka awm ang" duhdah zet hian ka lo ti a, min rawn en rang khawp mai. 

"Engmaw i sawi?" zawi te, chang zet si a a tih chuan, "I hriat phak reng kha..ka sawi nawn peih tawh lo" ka ti a, ka tawlh sawn zal zal a, amah ka hlat deuh hnu chuan zai rât rât chung hian dressing table hmaah ka ţhu ta daih a, ka hmai ka tuai thuak thuak a, min en reng tih hriain a ngei tur tawkin ka nui lui ve vel a, ka ban leh chawn vela cream chulh hliau hliau pahin ka en ru zauh zauh a, a kut a humruh nasa mai. Kut min thlak thei si lo a, kei lahin a huat tur tawk lek a han runluih vel dan ka thiam si, a thin a rim khawp mai. 

Ka zai rât rât reng mai chu a ngaihtheih loh tawpah, "Tawp rawh" a ti bul hmuk a, ka hre lo der tlat a, a kamis kawrkilh a phelh hmawk hmawk lai te chuan nui ru tat tat chungin ka zai lui zel a, "Remruatsak, mi induh, chapo leh luhlul fawm a ţangkaina nei lo pa" ti a ka zai chu hla thlûkin min daih lo a ni ber a, hla thu mai bakah a thluk thlengin ka phuah chawp nawk nawk mai. 

Ka lu khuh hlun khawp hian a kamis chu ka lamah a rawn theh phei a, a rimtui ve zek lehnghal a, "Setana kawr chu meikhu rim a nam hle mai" nui var var chunga tih pahin kamis chu ka la thla a, ka malchungah ka dah a, tih thinrim ka duh vang hrim hrim hian fiamthu a chhaih pahin ka nui lui fo mai. Inthiam lohna pawh ka nei chuang lo, a tih loh dan bik a ni miau lo a. Ka inven ve nan chuan a awm anga ka awm ve zel a ngai tlat a ni. Chak lohna lai tam tak nei ve bawk mah ila lanchhuah tir ka tum hauh lo. 

"Anthony nen hian in inhua em ni?" ti a pangngai taka ka zawh chuan a dar a towel bah liam pah hian, "I hriat atana pawimawh chin chiah ngaihven rawh" a ti hmak a, a ţawngkam hi a ngeiawm thei khawp mai. Nichin a a thinrim vak kha chu a reh ta deuh niin ka hria a, a puitling tawh a, a inthunun theih bik zia ka hre tawh bawk a, a inbengdai tawh a nih hmel. 

"A nih chuan min hmu dun leh mahla thinrim tawh suh ang che. Pangpar tui kan pe dun lai i hmu leh a nih pawhin 'in pangpar chu a va mawi ve' ti zel tawh ang che. Tum kawh luau chunga bengchheng siam kha sim hmak rawh" ka lo ti a, ka ţawng chhung zawng chuan min lo en vung vung a, mak min ti deuh niin a lang.

"Zawhna min zawt mawlh mawlh reng a, ka zawhna pakhat lek pawh min chhang thei mang si lo" tih pahin ka ding chhuak a, "Hnaih lo la ka duh. Thil dang chu i hriat ve a ţul lem lo" a tih chuan ka lo ner nang nang a, thil sawi ve uk a, sawi chhunzawm ţha leh duh ngai lo ho hi alawm ka huat ţhin chu. 

A phone riin kan inhnial zel tur chu a ti tawp rih a, pawn lamah a chhuah pui daih lehnghal. Kan thusawi lai mek nen a inzawm leh zawm loh hriat tumin a rukin ka zui a, thlang lam bathlara tlak dal inkham chu vuanin a ding a, keiin pindan chhung aţangin ka lo en ran thung a, an chhungkua hian thuruk eng emaw tak an neih ka ring a, inpawh ang deuh a lang siin an hrang tlat tho bawk si, an khawsak dan maksak zet ţhin te hian hriatchian min ti chak a ni. 

"Êeeee...min al hneh lutuk tlat. Duhthusamin min al hneh, thluak a ti buai, rilru thlengin a chawk buai" a ti hluk hluk a, an chhungkaw buai rukna hriat ka tum nen, a tih danah hian ka hriat duh zawng ka hre dawn lo a ang tlat. 

"Kum23, 24 vel bak a la ni lo ang" duhdah zeta a tih leh phei chuan ka chanchin an sawi tih a hriatchian theih tawh a, bang phen aţangin ka ngaithla kar mai. 

"Thinrim reng theih a ni lo" a ti leh a, a ţawng zawi deuh tawh nain thawm dang a awm miau lo a, ka la hre pha ve zel.

"Ka kalsan lo ang..kei lo innghahna dang an nei hleinem" a tih takah chuan muangchangin ka tawlh sawn a, a bialnu chuan a hip beh ngheh hmel hle mai. Ka hriat chak zawng a ni tawh lo a, ka thik vang pawh ni lovin ka tan a ţangkai loh em vang zawk a ni. Ka hriat duh ber chu an chhungkaw thuruk a ni daih. Anthony a mil loh em em chhan te hi hriat ka duh a, a mawi lo viau nain ka mitah chuan Anthony a ţha zawk daih. 

A kamis chu suk tur zingah ka dah a, a thusawi ka ngaithla ru tih a hriat loh nan inhnuaiah ka chhuk ta daih a. Nu Hlimi pawh hmuh tur a lo awm ve tawh nain kan inbe lem lo. Pa Chhawna nen eng eng emaw sawiin an ti ti a, an piah a ka ţhut ve takah chuan Pa Chhawna zawk chuan min be zeuh zeuh a, "Private a i thawh phei chuan hlawh pawh i nei mumal dawn em ni? Fa in neih hma chu duh leh thawk rih la, fa in neih hnuah erawh bang daih la a ţha ang" Nu Hlimi zawk chuan a ti ve mial a, ka duh loh zawng tak a la sawi zui. 

"Mahni in lumah pawh awm thei lovin ka zir ve a, private ah thawk mah ila bansan ka tum lo. Hlawh chu engzat pawh lo nise thawh reng ka duh. Ka ban chuan zir man a awm nang" pangngai tak hian ka ti a, ka hna thlenga thunun theihna an nei lo ka ti ve tlat. 

"Tunah tut tut ka ti lo a, fa neih tawh hnuah chuan nurse hi chu a buaithlak ţhin a, hlawh a tlem phei chuan bansan a ţha zawk ang ka tihna a nih chu. In pa'n hlawh a nei tho alawm" a ti leh a, ka mona a la rei loh nen, ka hna thlenga min sawipui nghal mai chu mak ka ti ru khawp mai. 

"Kan innei ve chauh a, i ngaihtuah thui mah mah a nih kha. Bakah, ka hna chungchangah chuan keiman ka duhdanin thutlukna ka siam turah ka ngai" dam thlapa ka tih chuan a ngaihdan a nih loh hmel hle a, pawi tihna ka nei hran lo, min hnawtchhuak daih pawh nise pawi tihna ka nei chuang lo ang. 

"Ni e...hmanhmawh lo ila, inhmangaih sa a innei an ni lo a, in ngaina chho ve phawt rawh se" Pa Chhawna chuan a lo ti hlauh a, ni lo se chu thinrimin min hau maithei a ni, ka hna lam a nih tawh chuan keilah hian ngawi zawk nih ka tum mang si lo a, ka thawhna a la rei lo bawk nen, ka zirna senso zawng zawng chhut phei chuan bansan phal chi a ni lo. 

An bulah pawh ţhu rei peih loin chokaah ka phei daih a, "Hna i thawk leh tawh a, i hah dawn tehreng nen, engmah lo ti ve suh" Kungtei chuan a lo ti leh tawh a, ani hi ka hmuh tirh aţanga ka ngainat nghal awmchhun a ni ngei ang. 

Chaw ei kham hnu lawkah Nicholas pawh a chhuak a, a kalna tur hre sa ah ka in ngai a, ka zawt buai peih lo. Khuma muin phone ka khawih a, ka thawhpuite lah chuan min fiam sap sap reng a, an ngaih ang a ni der si lo. Chhang let lem lo hian movie ka en ta daih a, ka lo mutthilhsan aniang thawm in min ti harh zawk a, ka inbeng kang a, ka ngaihthlak chian chuan inhnial buai thawm ni ngeiin ka hria. 

💛💛💛💛💛💛💛

(A chhunzawmna aw)

"Zanreiah rui deuhin i lo haw a, thinrimna tur i la zawng zui a maw? I pa leh i ute hian eng nge thiam lohna an neih?" ti a Nu Hlimi au tuar tuar ri ka hriat chuan khum aţangin ka chhuk sawk sawk a, chapal pawh ka bun hman lo, pindan kawngkhar chu pawh hawn ka han tum ve tak nain a lo inhawng sa reng a, khar phui loin ka mu tihna a nih ber chu. 

"Mi thianghlim an nih loh zia i hria alawm" a ti a, Nicholas ngei a ni. A vin ve hauh lo nain a khauh viau thung a, keipawh chu ka ding leh rih a, ka inrawlh ve na chi a ni em ka hre chiah lo a ni. 

"Nupui i nei tawh a, in inpawhna a ngheh lehzual nan fa nei vat ula a ţha ang an ti mai chauh a nih kha. I u phei chuan engmah a sawi ve lo lehnghal. Thinrim sain i lo haw a nih kha, mi awm ţha hle hle lai kut i rawn thlak ringawt a, nangmahni kan ngaihtuah vang che u a nih hi" Nu Hlimin a tih leh hlak hlak laia a lo nui ri chuan ngaihno a bei hlawl lo. 

"In nunrawng hle mai" a ti bul hmuk a, Nu Hlimi sawi dan hmangah chuan Anthony kut a thlak a nih hmel khawp mai. 

"Aw ti rawh u...thawm in nei rei tawh lutuk, tumah kan mu thei hleinem. An inneihna pawh a la rei lo a, nawr vak kher a ngai hleinem. Nicholas hi a duh angin awm tir ve rih rawh u, fate thunun leh lutuk pawh hi a ţha ber chuang lo. Kal rawh Nicholas..va lut tawh rawh..va mu tawh rawh" hmeichhe aw hian a ti mawlh mawlh a, Hope nge Faith a nih ka hre thei mai lo a, Hope a nih ka ring mah zawk. An lo buai fe tawh awm sia, ka lo muttui awm hle mai. 

La inhum ruh ţeuh chung hian pindanah a lo lut a, a hmelah pawh lungawi lohna nasa tak a nei tih a hmuh theih a, a kawr a phelh lai chuan khum lu nghengin ka ţhu rem a, ka kuangkuah zui at a, kei ang bawkin fa neih chungchang an lo sawipui ve a nih hmel. 

"In insual em ni a?" ka lo ti a, a taksa leh kut vel te chu ka en chik deuh a, hliam hmuh tur a awm lo hlauh. 

"Lo buai ve suh" a ti hmuk a, ka chhan ve hmain kan pindan kawngkhar chu pawn lam aţangin an rawn kik karh karh a, kan misuala lah chu bualin ah a lut nghal nulh a, keimah bawka ka hmachhawn leh a ngai dawn tihna a ni mai.

Kawngkhar ka hawn chuan pawnah Nu Hlimi a lo ding a, "Ka ti harh che em?" ti a min zawtin zawn nei ni awm takin pawn lam aţang chuan pindan chhung chu a thlek dâk dâk a, a hmuh tam loh nan ka din hliah tlat thung. 

"Rei lo e...Nicholas a lo luh khan ka harh ve chiah. Buaina in nei em ni?" hre lo awm tak hian ka ti a, inla rau hle si an rilru a hrisel lo tlat. 

"Khawiah nge a awm? Zu a lo in leh ange aw..muttir hmak rawh aw" a ti a, ţumdangah chuan min biak hian a dak deuh vah ţhin a, tun ţum chu a meng hnual ve raih mai. 

"Bualin ah a lut a, a inbual dawn aniang. Buaina in nei a ni maw? Eng lampang nge a?" ka ti nawn leh a, "Aaa...a lenchhuah hma khan i pa leh Anthony te nen eng emaw an sawi ho a, a len naah thil tawn a nei aniang thinrim sain a rawn haw a, a u kut a thlak ta mai sia, kan buai phah ta a nih kha" a ti a, a aw chu a zawiin midangin an lo hriat ve a hlau deuh te pawh a ang ka ti.

"Eng nge an sawi a?" amah en ran chung hian ka ti a, nu nasa ve tak mah nise dawt sawi a thiam bik vak lo tih ka hre tawh a, tunah pawh melh tur dang a zawng kual ruai mai. 

"Nakinah amah i zawt dawn nia" a tih chuan, "Nangman min hrilh zawk rawh. Kan la inpawh lo em a, keichuan ka zawt chhuak thei lo ang" ka ti ve tlat a, a ngawih vang vang hnuah, "Fa neih chungchang a nia" a ti ve hram a, ka nui hak mai. Anthony pawh chu fel ang deuh a awm siin ka hmangaih miah loh nen a fa nei turin min lo beisei ve tho a ni maw. 

"An ti mak hle mai. Fa neih chungchangah kher chuan lo buai ve suh se" ka ti khawl a, ka zah zo tawh lo a ni. Nicholas hian min pawngsual a nih loh chuan fa neih ngaihna a awm lo, an fapa hi ka duh reng reng hleinem.

"In inpawhna tur zel a nia, an sawi dik lo chuang lo. Kan ngaihtuah takmeuh che u a, karah fa an awm chuan nupa chu kan inpawh zual sauh ţhin" a tih chuan, "Fa neih hnua inţhen leh pawh tam tak an awm alawm. Nicholas chu i lo nghak dawn em?" ka ti a, nghah kher a ngaih loh thu sawiin a kalsawn a, ka thaw huai mai. 

Fa neih chungchang hi an sawi fo mai a, ka ngaihdan a ni lo takzet a ni. Inhmangaih taka innei chu ni ila keimahni zawk hian neih thuai thuai kan duh ang a, mahse chutiang chu kan ni miau lo a, an lo inrawlh ve sek hian awm an ti nuam lo mai mai. Hmu chak lo viau mah ila hemi chungchangah kher hi chuan keipawhin ka pa ka biak ve a ngai ang. 

A inbual zo chuan pawn lamah towel a va zar ve thlap a, en pawh min en lo hian khum chu a kal hual a, a tih fo ţhin angin sam hnawng chap chung chuan khumah a let leh tawp a, ka ţhut lohna lam hawi zawngin a saisir hmak bawk. 

"Hey..i pa te chuan engchiah maw an sawi a" ti a zawh pahin ka kuai a, a chang leh ka nam a, kawr a ha bawk si lo nen, a taksa chu a khauh ţha khawp mai. 

"I buaina tur chiah ngaihtuah rawh" a lo ti bul leh hluk a, ka lam a la hawi duh chuang lo. 

"Min hrilh la naktukah ka pa ka hmu mai dawn alawm. Biak duh veleh induh daih zel suh" tih zawngin ka kar tawh a, a mizia ka la hriatchian miau loh avangin engti zawnga ngen tur nge ka hre tlat lo.

"Inţhen i duh em?" a tih chuan, "Tehreng mai...inţhen ila chu vanram kai tluk hialah ka in ngai ang chu" uar zet hian ka lo ti a, a zangthal thawk ruala verther zet a min nuih chu ka duh dan a ni hauh lo thung. 

"Anthony hi i hman ţangkai thiam chuan kan inţhen thei ang" a ti a, ka mut ve rual chuan ka lam hawiin a saisir ve tawh a, kan in en ran a, a thusawi chu ka hrethiam lo khawp mai. 

"A bulah awm tawh lo turin min ti emaw ka tia" ka tih chuan, "Ka rilru ka thlak alawm" a ti then a, a maksak tak tak a ni. 

"Engtin nge ka hman ţangkai ang a? Keini aiin a fing zawk daih ang chu" ka lo ti let a, diktak chuan, kan inţhen theihna tur a nih phawt chuan engpawh ti ila pawi tihna ka nei hauh lo. 

"Pâte ka tih nachhan che i hria em?" a tih chuan, "I sual vang" ka lo ti vat a, a nuih a lo za viau mai. 

"Ka uite ang chiaha i duhawm vang zawk" tih pahin ka bekah a dawm a, a kut awl lam chu aman a lukham zui zat bawk a, duhawm min ti kher kher te chu mak ve deuh a ni, a ruih vangah ka ngai hmiah. 

"Mahse hmeichhia angin ka en ve thei lo che" a ti leh tawh a, ka lo ner nak a, ka rin dan vel a ni.

"Hmangaih dang ka nei a, kalsan ka tum hauh lo bawk. I naupang a, i hmelţha bawk a, min ţhen phawt chuan heng i duhawmna te hian mipa ţha zawk a la hip dawn. Hmeichhia anga en thei tu che" tiin a phun sup sup a, a kutzungpuiin ka biang chu a nul pah bawk a, min khawihna ai mah chuan ţha deuha thil a sawi ve chu mak ka ti zawk. 

"Ţhen che chu ka duh a, engtin nge ka ţhen theih ang che. Ka chhungte hnen a ka sawi lahin an remti lo bur a, remruatna i nei em ni?" ka tih laite chuan ka hmui ngawt a lo en a, hmeichhia ang chuan min en chiang alawm, "Min chhang ta che" tih vak pahin ka bek a dawmna kut chu ka nam sawn a, "I sawi zo chiah a, ka chhang dawn che alawm. Hmanhmawh suh" a lo ti ve niah niah a, ka pa pawh hmuh a ngai leh dawn lo a nih hmel. 

"Aw...min hrilh dawn a nih pawhin min khawih tel kher tawh suh" ka tih veleh ka biang chu a rawn dawm leh kher a, a kut ka ben sawk ruala a nui hmel te chu a nelawm ve reuh lutuk. 

"Anthony hian hmeichhia chu a duh vek. Hmeichhia angin a en bawk che a, i tih tur chu i hre mai ang" ka mita en ran chung hian a ti a, a thutak phian mai. 

"I unaupa mutpui turin min duh maw?" ka ti hluai a, mak ka tihna ka thup hleithei lo a ni ber. 

"Ni lo e..tumah mutpui suh" a ti leh ang lawi a, "Hriatthiam theih turin fiah deuhin sawi ve mai rawh" ka ti chang fak a, ka nin tawn zia a hrethiam ngei ang.

"Ngaizawng der rawh" zawi te tak tak hian a ti a, ka ţhu chhuak hluai thung. 

"Thil ţha tak sawi tur i neih ka ring lo reng a ni" ka sam tuai thuak paha ka tih chuan, "Kan inţhen theihna awmchhun a nih chu" a ti hmuk a, a inbengkang a, a hahdam hmel bik khawp mai. 

"Ka ngaizawng der thiam reng reng hleinem. Ani pawhin min duh kher nang mawle" ka ti a, a lamah chuan ka thle phei a, "A duh ang che" a lo ti leh mai a, remruatna ho ve tak chu a ni. 

"Ka duh lo ti ta ila" ti a ka zawh chuan mithmul a lo kan ak a, awlsam zet hian, "Hmangaih lo tu che i nei reng dawn tihna a ni mai" a ti then a, amah en reng chunga ka inngaihtuah vang vang chu ani pawhin dawhthei takin min lo ngaichang ran a, "Ka tum ang" ka tih takah chuan a kiai suk a, ka pa runluih nan hrim hrim pawh ţhen ka duh khawp mai. 

Hna kal tura a insiam te chu a mood a fuh hmel vur vur khawp mai. A che reng reng chu a zangkhaiin a hmel pawh nidang ai ngawt chuan hmuh a nuam a, eng chiah nge a tum ka hre lo nain duh dan inang kan nei thung. Kan pa te thu kan hnial chuan nghawng ţha lo a nei dawn tih kan hre ve ve a, hreh deuhin an thu kan zawm a, kan inţhen leh ţhen lohah chuan thu an nei tawh lo a, chu chu tih puitlin kan tum a ni. 

Inhnuaia chhuk hmasa zawkah ka ţang a, choka ka luh rualin Hope chuan min lo nuih var var a, Faith erawh lungawi lohna a nei emaw tih tur a ni, min lo en rum ngang mai. 

"Ka nu nen kan lo sawi dun a, i bulah fa neih chungchang an sawi ve tho a, fa i neih chuan hna aţangin bang rawh a ti bawk a, nizanah Nicholas a buai chiam a, i fuihpawrh em ni a?" a lo ti kha kha a, ka nui chhuak lo chauh a ni. 

"Mihring pawh ni lo te chu fuihpawrh theih a ni hleinem" ka ti sam et a, an hriatthiam loh hmel khawp mai. An hriatthiam theih loh tura sawi ka ni reng bawk a. 

"A fuihpawrh bik nang...nizan kha chuan zu a in a" tiin Hope chuan ka thlavang a lo hauh a, nuam lo a tih hmel takzet a ni. "Ka nu'n a rui vak lo a ti vek" pakhatin a lo ti ve thung a, a chhe tan tan ngawt mai. 

"Rui lutuk lo mah se zu a in tho alawm. Bakah Nicholas chu fuihpawrh vak theih a ni lo ang. Kan buai zo vek tawh a, sawichhuak tawh suh u" Hope bawk chuan a ti leh a, thla khat em pawh ka la mo lo a, an zia an chhuah hma takzet a ni. Thla khat chhung tal te chu inthup ve tur a nia. Nu Hlimi lah chuan min melh ralh ralh duh chauh a, a tih ai a fanu a tih tir vek a nih hmel. 

"A fuihpawrh thei awm emai. Fa neih an duh loh ve ve phei chuan fuihpawrh a awlsam dawn lutuk. Anthony hi vawikhatmah kut a la thlak lo a, i lo awm veleh hetiang hi a thleng" a ti leh hram a, a la naupang emai tiin ngawihsan ka tum zet na a a chaltlai reuh lutuk chu ka en liam thei bik lo. Ka din hnaih sauh a, "Nizana thil thleng engmah ka hre ve lo. Nicholas hi fa neih chungchang in sawipui ve tih pawh ka hre lo. Buaina in lo nei leh a nih pawhin ngaihdan siam ngawt lovin min zawt chiang hmasa tawh ang che u" ka ti ve salh salh a, nasa min lo ti deuh a nih pawhin pawi tihna ka nei lo. Anni pawhin an zia an chhuah nghal hreh loh chuan ka hreh bik nachhan tur ka hre lo. An lawm loh hlauin theihtawp ka chhuah ve tho alawm. 

"Aa...kan inhau ngai lo em a, nizan a boruak sosang hluai kha an hrethiam lo mai mai a nih kha. An thla a lo phang lutuk a, hrethiam hram hram rawh" Nu Hlimin a lo ti dam thluam a, inhau ngai lo chhungkua nise an fapa ngei hi a duh loh zawng nupui an neih tir lo ang. 

"Buaina hi ka thuhnuai a awm leh ka duh hun hun a ka thlen tir theih a ni bik lo a, engamah hmaa indem ringawt ka duh bik miah lo a nia" ka la ti ve ţalh a, mo te hi kan sawisel leh ringawt zel a, kan mona ten an zir miau loh chuan ngawi renga dawh mai mai hi harsa ve deuh a nia. Anni ho an ţanrual ţhap laia dinsak tu kan nei ve lo a nih pawhin kan tan ding ve ngam ila tuman min zuam ngam lo ang. 

"I va han nasa tak...hmanni lawka rawn awm si" tih hlak paha Faith kal chhuak chu enzuiin, "Chuvang chuan ngaihdan dik lo deuh lo nei tawh suh" tiin ka chhang let a, a din chat rualin Nicholas pawh a rawn lang ve hlawl mai. 

A farnu nen chuan chik deuhin min en tawn a, "Buaina a awm em?" a tih chuan Faith chu a lo zualko nghal zat zat a, keichuan engmah ka sawi tawh lo. Ka thin a rim a, ka nau rualin zah lo taka min lo ankhum bawrh bawrh kha ka hua a, Nu Hlimi zawkin min lo khak se chu chaltlai deuhin ka chhang let bik lo ang. 

"Keimah vangin in lo inhau a a zia lo hle mai" a ti vel a, inţhen sawi tak vanga a mood fu leh lutuk hi ka ngei lek lek a ni. 

"Ţha deuhin ka sawi a, a thinrim ringawt a nih kha" pangchang tak hian a ti a, a men deuh par bawk a, lemchan a thiam takzet a ni. 

"Chaw ei siam ula in thinrim a reh mai ang" a ti liam satliah a, chutah a sana chu bih vutin, "Ei tak tak teh ang u. Tukin chu tlai thei ka ni lo" thutak deuh zawk hian a ti a, ka zawn a lo thlen chuan ka dar a hmer salh a, min kal pel zui nghal mai a, a tho nuam bawk aniang a rimtui emai. 

"Ka thusawi kha fiamthu a lak chi pawh a ni lo" tiin Faith pawh a lo let veleh a, a u chu a si chât reng mai. Ani lahin eng teh ualah a lo ngai lo a, a hmanhmawh bawk nen, a nin deuh hnuah phei chuan, "Naupangchhia viau lo teh. In dik a, in thiam lo ve ve" a lo tih sak a, mihring hi kan inang lo ve khawp mai, hmaichhana in ţawngkhum sak sak ngam te kan awm a nia, keipawh ka bang bik lo a, nasa min ti tawk an awm ve reng tho a, ka an puite zingah ka awm a nih ber hi. 

A kal dawnah chuan, "Min lo zui teh" a tih avangin kawt lai thleng ka zui chhuak a, "Ka thusawi kha hrereng ang che" a ti a, an in chu thlek vang vangin a nui suk a, a mitmeng erawh hriatthiam a harsa khawp mai.

"Khatia min nawr reng a, thu min pek reng chuan ka ti duh lo zawk mai ang. I thil tum tih puitlin nan a min hman ţangkai i tum a nih phei chuan ngaizawng der lovin engkim ka hrilh vek dawn a nia" ka ti kha kha a, keimah chauh ka mualpho dawn niin ka hria a, thutlukna fumfe tak ka la siam lo bawk a inngaihtuah nawn leh viau ka ngai ang. 

"Ka hrilh ang che khan ti la thil dang chu ka kutah dah rawh" a ti nghat a, mipa ngaihsam ve tak mai a niin ka hria a, a rintlak ngût ange maw. Fiamthu a duh an ti zel mai bawk si, a naute a fiam lai pawh ka hmu ve fo tawh a, a nui duh ngai mang si lo a, hmel tak rûn chunga a naute a han fiam te hian mak ka ti lek lek ţhin a, a ze diktak ka man chat hma chu a thusawi hi zawm mai mai ka tum bik lo. 

Kawta motor a dah chhuah sa thlap lam pana zangkhai deuha a pen phei chu ka thlir zui reng a, a bialnu hi a hmangaih hle tih chu ka hria a, thuruk dang pawh a la nei chiang a ni. 

Inchhung ka lut leh chu Anthony nen kan intawk a, "I tho nuam maw?" tiin ţha deuhin min bia a, tim deuh daia a hmel ka en chiah chu karei leh! 

CONT..