HIS LAST LOVE-7

HIS LAST LOVE-7

"Ehe....Anthony, engati nge i men miah loh? A khawih na che em ni? A duk mang bawk si lo a" ka ti hluai a, a mit dinglam chu a phui lek lek a, rapthlak zawk tak a ni. 

"Aih..ka kamsir hi a pilh ve hlek a, ka mit chu a ni lo" a ti sup sup a, sawi nuam a ti chiah lo a nih hmel.

"Nih leh engati nge i mit kha?" ka tih chuan, "Khuaiin min zuk a" a lo ti leh a, hmuh tur a awm lo ka ti reng a ni. 

"A zia lo hle mai. Khuai zuk te chu a hrehawm a sin. A thak a, a na deuh bawk sia" ka ti a, min pawm pui tak hian, "Ka hiat ţha ngam lo a" a lo ti leh sup a, chutah mask dum hi phawrhin a mit hliah tur chuan a hreng a, a tih dan dan te pawh a hre zawk e a. 

"A dam mai ang..chaw kan ei tawh a nia aw" ti a hrilh chuan a lo bu nghat a, choka lama a phei chu ka en zui reng a, ka pasal nen unau piang hmun an nia, kan remruatna hi a ţha dawn lo tawp mai. Mi fel tak a ni a, min be chhe ngai lo tu awmchhun a ni. Ka ngaizawng ngawt thei lo ang, tihdan dang ka zawn mai a ngai dawn a ni. 

Damdawiin ka thlen chuan ka inthlak nghal vat a, nurse hi chu kan inthlak mawlh mawlh reng mai a ni. 

"Chhandami fanu a damlo a, ward ah an awm ve a nia aw. Nizanah an admit a ni awm e" Nghetin a lo ti sar sar a, ward lam chu ka melh zawk a, Chhandami an tih hi ka la hmu ve lo a, Nicholas nen an inkawp nghet hle tih erawh ka hria. 

"Kan vit dam vat mai ang" ka lo ti fiamthu a, kan kal dan hi hrethiam lo in awm takin, vawiinah ka chawhma a nih chuan naktukah ka chawhnu dawn tihna a nia, chutiang chuan a inthlakin ni 12 chhung kan kal a, zan li kan night leh a, kar khatah day off vawikhat kan nei a, private ah hi chuan damlo ward a awm hi an tam lutuk ngai lo a, chuti chung chuan kan hah ve em em tho. 

"Nicholas pawh a lokal maithei a ni. Chhandami te nufa a ngaihsak zia lah ţhenawm khawvengten an sawi sup sup a, inpa pawh hian bansan ve mai tur a nia" a ti nang nang a, "Awii...sawi lo mai teh. A bansan awzawng lovang. Nizanah pawh a hmangaih zia a sawi vek alawm. Tu ber saw nge a rukin min lo hrilh teh" ka tih chuan, "No 6" a ti zawi sap a, ka hawi phei rang khawp mai. 

"Ka mawl zia hi...ka hre leh si alawm. Kan inneih hma khan damdawiinah hian ka hmu tawh tak e. Ka vei em em lo aniang ngaihtuah let nachang pawh ka lo hre lo" ka ti a, Chhandami a tih nu chuan min lo en ve reng a, a mitmeng aţang chuan min hria tih ka hre thei nghal. 

Kei ai chuan a u zawk daih dawn nain a la upat hmel lutuk bik lo a, a sam dum hlap chuan a dar a vaw pha chang chang chauh a, ngo ti a sawi theih tur a nih loh laiin a hmaifang a dik viau thung. 

"Ţha hang ngaihnobei a nih chian saw" tiin ka ţhiannu hriat phak tawk lek tur hian ka phun sap a, "Fa a neih hma chuan tun ai hian a hang zawk. A hmelţha sawt lutuk kha pasal neih a ngeih aniang kan ti sup sup a, mahse an inţhen ta daih sia. Nicholas nen hian engti tih a inkawp hlawl nge an nih ka hre lo" a lo ti a, kan inneih ni khan a rawn inkhawm ve thlap an tia, zakthei lo an tih viau laiin a hmel chuan pawi a sawi lo reuh a, tual pawh that se tuman an ringhlel lo ang tih tur vel a ni. 

"Saii, i haw hman tawh em ni?" kan doctor pakhat, Mapuian a rawn ti a, ani hi a fel reuh a, biak hmasak ka chang meuh ngai lo. 

"Aw..hman a ni mai. Engati nge? Min mamawhna i nei em ni?" hawihhawm takin ka lo ti a, kan hmaa dawhkan lianpui hmaah chuan a ding a, MBBS a zawhna a la rei lo a, ani pawh hi kei aia a upatna a tam vak lo. 

"Haw rual ila ka ti deuh a, eitur ka leisak ang che" a tih chuan Nghetin ka malah a lo sik vâwt a, ka chhan lawk lohah chuan Mapuia vek chuan, "I peih loh chuan a pawi chuang lo" a lo ti leh hman a, inngaihtuahna hun pawh min pe reng reng hleinem mawle.

"Ngawi rawh engmah ka la sawi loh kha" tih pahin Ngheti chu ka melh nghek a, a rukin ka mal thip hlar chu ka tuai vat vat reng mai.

"Ka ruala haw chu i duh em?" a lo tih leh chuan, "Aww..mahse Ngheti nen hian kan haw na tur a inang a, kan pathum a kan kal ho a ngai ang a" ka ti ban charh a, ka ţhiannu lah chuan, "Keichu min lo hruai dawn. In ruala ka haw ve daih chuan a ngaihdan a ni lo palh ang" a lo ti zung zung a, Mapuia ai chuan ka bangbo zawk mah ang ka ring. Ka pasal neih hnu hian scooty ka la hawl chhuak lo a, Ngheti pawhin a hralh a, pawisa min pe nghal vek a, hlawh ka lak veleh ka duhzawng tak ka lei ang tiin min hrilh a, mi ruala kan haw ve theih hunlai tak a ni. 

"Ka hman tihna a nih chu..kan haw rual dawn nia" nui var var a ka tih lai chuan Ngheti bawkin ka nâkah min lo nghawk leh nawk nawk a, "Aw le...casualty ah ka lo nghak ang che" tiin Mapuia pawh a kal veleh mai a, kan piah lawkah Nicholas a lo ding reng tih ka hre hauh lo. Mapuia ngawt ka en a, na ka tuar mawlh mawlh bawk nen, ka lo hmu lo tawp zawk a ni. 

A lam ka hawi rual chuan za lo zet hian a lo nui a, min melh rum leh viau tawh. 

"Eng nge i lo tih?" ti a ka zawh rual chuan Chhandami te nufa ka ngaihtuah chhuak chawpchilh nghal a, Ngheti pawhin a lokal ang a tih reng kha. 

"Ka rualin haw rawh" a ti ve khanglang a, "Haw pui tur ka lo nei tawh a, min sawm tlai hret a nih hmel" tiin ngeiawm deuhin ka lo chhang let a, a ngaihdan a nih loh hmel kher mai. 

"Naupang saw a mamawh tur ka va pe ang a, hetah hian lo awm reng rawh. Ka rualin i haw ang" thupe aw zeta a tih chuan ka lo ner nang a, a zakthei lo ka ti ve thlawt a ni. 

"Chu chu ka thu thu a ni. A mamawh tur pe ringawt lovin riah pui nghal law law rawh. Inthlakna tur ka rawn pe thlap peih che" ka tih ve tan tan te chuan a lo kiai suk duh chauh a, a changin ka ngei a, a chang leh ka ngei lo a, chutiang vel chu a ni. 

"Doctor hnenah khan pasal ka nei tawh i lo ti dawn nia" tiin min kalsan a, ka thaw chhuak hawk mai.

"Hepa hi chu phuar hlawm vek ka chak ţhin alawm. Hung tawp ila, kal pahin beng lawlh lawlh mai ila, ka mood hi a ti dik lo zo vek zel" ka ti hlak hlak a, diktak chuan kan inneih hnua buaina ka siam hauh lo te hi fel ka in ti. Ţha deuhin ka awm ve mai a, a ţul ţul ka ti ve zawk a nia. An chhungkua hian lawm nachang an hre hlawl lo. 

Ka inthlak zawh hnuah pawh ward ah a la awm a, Ngheti chuan, "A en loh lai chein tlan rawh aw. Mapuia nen in haw rual dawn kha" a lo ti leh a, hei pui hi ka ţhiannu mah nise hriatthiam loh chang ka ngah khawp mai.

"A chang leh ngaihzawng nei lo turin min tia, tunah lah Mapuia ruala haw turin min duh leh em em a" ka ti niah niah a, "Nicholas hi ka ngei ve deuh mawle. Ani pawn langsar deuhin a bialnu a hmu ngam a, nangpawn a hriat lai ngeiin Mapuia haw pui ve rawh. Amaherawhchu, i awmdan fimkhur la, vengchhung miten an hmuh che chuan i mualpho vak mai ang" a ti mawlh mawlh a, min nam deuh ţung bawk. 

"Tu nge lo hruai dawn che? Ngaihzawng i neih awm ka hre si lo a" ka tih chuan, "Bus driver leh conductor te leh an piang ve tih ka hriat loh mipui tam takin min lo hruai dawn" a ti a, a nui zui hak hak a, "Kal tawh rawh. Rilru tih thawven nan hrim hrim Mapuia nen chuan thil ei dun rawh u" tih leh pahin min kuai her a, min nam nghal dawr dawr a, ka hlim loh a hlau thei a nia aw. 

Mapuia pawh casualty luhna bulah a lo awm reng tawh a, min hmuh chuan nelawm deuhin a nui a, "Kal ang le" a lo ti nghal var a. 

Garage ah min luh thlak puiin bike pakhat hi a pan ding nghal a,scooty khalh fo mah ila tu mipa mahin bike ah min la phur lo. Dawt ka sawi hauh lo bawk.

"Lawn rawh le" a tih chuan hlau ru tak chungin ka lawn a, pangngai deuh anga lan ka tum tlat thung. 

Restaurant hmaah a ding dat a, ka chhuk hnuah bike a hun ţhat lai chu ka lo nghak leh a, mipa chhuahpui ngai hlei lovin Mapuia ka zui ve ta ringawt chu a nia, nuam tihna aiin nuam ka tih lohna a tam zawk ang. 

"Ei ţeuh rawh" menu min pek paha a tih chuan, "A chi nang...kan haw anga chhungten chaw ei an lo duh nghal ang a" tih niah niah pahin menu chu ka en kual dan dan a.

"I pasal neih ni khan ka lokal ve lo a, mi sawi hmangah i chhungten pasal an zawnsak che a nih hmel a" a ti ban charh a, mi hian thil an hria a, zep buang bar lovin, "Ni e...chhungte zawn hmuh sa ka nei a nih hi" ka ti halh a, bialnu nei lai lehnghal, ka ten lutuk ringawt. 

"I pasal chu a vannei khawp alawm" a tih chuan ka nui hak a, miin min han fak vel hian nuam lo ka ti ţhin. 

"Vanduai a inti zawk viau maithei a sin. A hriat miah loh" ka lo ti vat a, kei aiin in a thleng hmasa zawk maithei a, tunah chuan in a haw ka hreh ngawih ngawih zel tawh mai a ni. 

"Chu in inmil vak nange?" a lo ti ve nghal zat a, "Aaa...kan chhungten an sawirem a ni mai a, an sual hran chuang lo a" ka ti a, inhmu fo mah ila Mapuia nen hian kan inkawm tam lo a, kan boruak a ţha lo viau nain sawi vek ţul ka ti lem lo.

"Ţhian i mamawh chuan ka awm reng a nia" a ti dam thlap a, phone number te kan inpe a, min lo pawh thut chhan hi ka hre lo khawp mai. 

In thleng min thlah a, gate chhungah ka tlan luh tir duh lo thung a, "Naktukah chuan damdawiin bula restaurant ah khan ni mai" a ti fiamthu a, nuih var var pahin ka lo bu ve nghat nghat a. 

Inchhung ka lut chu tlai min ti deuh aniang min lo en hrek hrek hlawm a, "Chaw eiah kan lo nghak che a" tiin Pa Chhawna chu ţawngchhuak hmasa berah a ţang a, nidanga kan chaw ei hun a la ni tawp si lo. 

"Aw..ka han inthlak lawk ang" ka tih laia min ei loh hmel zeta Faith-i lo ner vel chu ka hmu reng a, ka unaunu chu nise kan inhau nasa tawh ang. 

Pindana ka luh chuan Nicholas pawh a lo inbual zo ve chiah a nih hmel. Kei aiin a thleng hmasa a, a inbual zo leh hman a nih chuan ka kal hnu lawkah khan a haw ve nghal tihna a ni mai. 

"Tu bike hnungah nge i bawh vûng a?" min lo ti a, min ngaihnep hmel em em mai lehnghal.

"Tu bike ah mah ka chuang lo" ka tih chuan a lo ner sawk a, a lungawi lo hmel a lantir nasa leh viau tawh. 

"Daw ziap zuap lo mai teh" a ti hluk a, ka kalna apiangah min zui a, ka ngawih tak rengah chuan, "I kal chiah kha ka rawn umzui nghal che. Biang phe hlawp hlawp khawpin doctor bike hnungah i chuang" amah bawk chuan a ti leh a, a va han naupangchhia tak. Min ngai naupang lutuk hi puitling a biak angin min be thei thlawt lo niin ka hria. 

"Sawi uar viau zel suh..bike hnungah ka ţhu a ni mai a, ka biang hi phe hlawp hlawp tham a ni lo hrim hrim. Ve lutuk che hian, nangpawh i bialnu fanu damlo kan turin ka thawhna hmunah i lokal ngam ve tho alawm" ka ti hlak hlak a, kan inhmachhawn ran a, a sam chu a hru duh dah bawk aniang awmze nei lo zet hian a ther sung a, min en dan lah chu hmuh thiang lo hmu ang mai a ni. 

"I chungchang a nih kha kan sawi. Min hnuk lut ve hlek suh, keichuan chiang deuhin ka hrilh tawh che" a ti vei hmuk a, a thil tih dik lo pawh dika a ngai zel hi alawm ka huat chu. 

"Keipawn ka la hrilh chiang ve thuai ang che. Ka nun a nia, bike a ka chuan leh chuan loh pawh ka thu a ni. I lo buai ve na tur a awm lo" ti a kal mai ka tum chu min pawt let rawk a, "Engmaw i sawi?" zawi deuh sup hian a ti a, ei loh hmel zet a ka men kual ralh rual chuan a lo chek hlak a, ani thinrim leh thinrim loh ka ngaipawimawh lo chiang emai. 

"I hriat chian rengah hian engmaw i sawi ti ve ziah suh. Ka nun a nia ka thu thu ka ti a nih chu. Bike a ka chuang mai mai chu ngatinge i lo huat viau a?" ka ti a, ka vin satliah a ni lo, ka au ring mah mah zawk a ni. 

"Ka ruala haw turin ka ti che" a tih chuan, "I rualin ka haw peih lo tihna a ni mai lawm. I nau awm lai kha ka nghak peih hleinem che. Kalsan teh naute rim i nam" ka ti chu a haw ngang mai. A hmel a dur khap a, ka dar chu a hmer nghet sauh bawk a, na tak a ni tawh. 

"I thawhpuiten engtin nge an sawi ang? Kei hi min ngainep" a tih lai chuan lo pawt chatin, "Nangmah i inngaihtuah vang chauh a midang zui phal lo i nih kha. Mahni hmasial leh chapo lutuk i nih hi. Mipa pawh he inchhung a mi kher hi kawp turin min duh a, a chhan chu pawn lamah a chhuak dawn miau lo a, nupui uiresan nih i duh lo a, midang nei tura min duh rualin Anthony chiah ka kawp i phal a, chupawh i chhungte chauhin an hriat dawn vangin" kawkalh nuaihin ka ti nawk nawk a, ka thinrim lutuk chu ka thusawi pawh a dik thlap thei lo a ni ber. 

"Ni chiah e..kan pahnihin kan mualpho lo ve ve ang. Chhungkaw mualpho theihna lam chu tuman an sawi darh duh dawn lo" tiin ka thusawi chu a lo pawm khawp mai.

"Chuvang chu alawm i tenawm em em ni. Nangmah chiah i in ngaihtuah vang hrim hrimin Anthony hi ka kawp lui lovang. I thusawi pakhatmah ka zawm tawh dawn bawk lo. I thil duh puitlin nan pawisawi lo pawh i hmang ţangkai hreh lo a nia, ramhuai ho pawn an pu sup sup ang che ka ring" ka ti hlawih hlawih a, "I ţawngthei pang pang si" a ti hluk a, mak ti hmel a pu leh tawh zawk a, bike a ka chuang mai mai a la vung vak hi ka ngaihdan a ni bik tlat lo a ni. 

"Ţawngthei ang chu..ngawi reng a tuar tlawk tlawk turin min beisei deuh em ni a? Min hnuai chhiah viau suh" ka tih chuan, "Ka hnuai chhiah lo che" a lo ti ve nghal zat a, ţawngthei min ti viau si hian a ngawi duh bik der ngai si lo. 

"I salah min ngai a i duh duh min tih tir i tum alawm. Sal ka ni lo tih hrereng ang che. Chapo tur hian engmah i ni bik lo. Lehkhathiam mawl i nih kha...lian thlawn, mahni ţha inti ve em em ringawt" ka ti hrep a, a tep chap a, ka lam a a kut phar meuh hian a ang leh zuau ţhin a, min chhan ngaihna a hre tawh der lo. 

"Ka thawhna hmuna damlo i rawn kan vel khan ka thawhpuiten eng angin nge min ngaih ang i chhut pha bik em ni? Meng rum thlawn ringawt, thil ţha melh chhuak thei mang si lo" ka ti a, a lo thaw ri nghal hawk a, thinrim lutuk vanga ţawng chhuak thei lo te pawh a ang alawm. 

"I tawrhna ringawt hre hlur tawh suh ang che. Ka nun hman dan lo sawisel ve tawh lo bawk la, ka duh ang sawi thei turin dikna ka nei a, i u anga kut min thlak ve a nih ngat phei chuan ka ngawi ve dawn hauh lo. Ka hek nghal ang che. Chuvang chuan min en liam mai mai la a dik a ni mai" ka ti leh hlak hlak a, rapthlak tih hmel zet hian min melh tlawk tlawk a, sawi tur la ngah viau mah ila, "Naute rim nam bulah ka awm peih lo" ka ti a, ka kalsan ve ta hram a. 

Midang rualin chaw kan ei hman ve hram a, kan nupa chuan kan inbe tawh lova, en pawh min en duh eih lo. Zanah pawh sofa ah ke lawr zuahin a mu a, kei khumah kar huangin ka mu a, a nuam ting a ni mai. 

Zingah a chhuah hmain ka chhuak a, kan boruak tawn mek chu a langchhuak aniang tuman chaltlai deuhin min ţawngkhum ngam lo. Min en tawp a, keipawn tumah ka be bik lo. 

Chhandami fanu buaipui tur a ka kal chu min lo en uluk hle a, ka chawn hmul thleng chuan hmaih nei lova chhiar chhuah vek a tum ni awm tak a ni. Rei tawk fang min en hnuah, "Pasal neih chu a nuam em?" a ti a, a nui hmel lem lutuk te chu ka hmuh hmaih a ring em maw ni?

"Kei aiin i hre zawk ang chu...fa pahnih lai i nei tawh alawm" ka tih chuan a hawisan hmak a.

💛💛💛💛💛💛💛

A ţul ţul ka tih zawha kal mai ka tum chu, "Engtikah nge kan chhuah theih ang?" a lo ti leh a, a fanu chuan min lo en ve kiau a, a duhawm reuh tak tak a ni. 

"Doctor in lo zawt dawn nia. A thu hrimah, in lo lut ve chiah alawm. Ţul a tih hunah in chhuah hun tur a hrilh mai ang che" nem vak lo hian ka ti a, "Niminah Nicholas a lokal a" a ti leh kher a, a fanu chu awm lo se ka ţham duh maithei a ni.

"Ka hria e..ka hmu alawm" ka tih chuan, "Nuam lo i tih ka hlau deuh a, lokal turin ka ti miah lo a nia aw. Naupang hi a ngaihtuah ve ţhin a, ţul ka ti lo chung a lokal lui a nih kha" a ti a, ka uniform ipte a pen thun luh pah hian a lam chu ka hawi leh a, a ţawngkama inthiam loh hmel viau si a hmelah chuan nuam lo tihna a lang lo hrim hrim. 

"Rawn luh khung hial teh a" ka tih chuan mak a ti deuhin ka hria, "Engmaw?" a ti deuh ha a, "Rawn luh khung rawh ka ti a nih chu. I fate hi rawn hruai bawk la, naupang nen a i lo luh chuan tuman an hnar haw lo ang che" ka ti a, mitmei ven tur awm lo phei se chu ka ţawng ring viau ang. 

"Engmah a awm tawh lo. I ngai dik lo mai mai a nih kha, kan inţhen daih tawh alawm" a lo ti nem duai a, ka ner nak mai. 

"Ka hriat a insawitheih vel i chak tih a hriat vek alawm. Nicholas hi ka duh hauh lo tih lo hre ve mai mai la, kan mu dun pawh ti la ka chaw ei a tui loh phah dawn lo reng reng. Hrereng tawh ang che" khauh zeta ka tih hnuah a fanu chu enin ka nui sang a, "I fanu chu a hmelţha hle mai" ka ti leh daih a, kum4 mi vel tur hi a ni a, kan thusawi chu a hrethiam lo hle tih an hmelah a hriat. 

"Fanu nei ve ila chu entawn tlakin ka awm ang mawle" zawite a ka tih leh hnuah ka kalsan a, mi pasal tih hriat reng kawp lui tlat hi ka zah bik vakna tur ka hre lo reng reng. 

"I va ang leh tun tun em ni a?" ka ţhiannun a lo tih chuan, "Ka zilh hlak a nih kha" ka ti mai a, pasal ka neih hma pawn keimah vangin ka chhungte an thlamuang ve ţhin. Kan ţhenawm a inchhawng ding luah kha mi chi hrang hrangin an luah ţhin a, ţhenawm kan neih sual deuh a, kan in lam hawi a tui chhia rawn paih te an chin chuan ka ngaihtheih loh tawpah ka hau mai zel a, ka pa'n min khap ve ţhin tak nain a nin chinah chuan ani pawhin hau turin min tir tho zel. Ka thiam naah chuan tumah ka hlau lo a ni tawp mai. 

Reilote chiah kan la duty emaw tih laiin haw a hun der a, Mapuia pawh a lo lang leh tawh. Tunlai chu in lam ka thlakhlelh loh em avang hian ka duty hun ni reng mai se ka ti ţhin. 

"Eitur ka lei ang che ka lo ti tawh sia" kan hmaah bawk a ding leh a, ka chhanna ngaichangin a mitmeng pawisawi lo zet chuan min en ran a, ani hi hnar a har dawn riau mai. 

"Ka inthlak anga ka hman a ni mai" tih paha ka ţhiannu ka en chuan, "Keipawh min lo hruai tu tur ka'n be tawh ang e" tih leh a phone phawrh a rual a, mi a be der ta vel niin ka hria. 

Mapuia nen a kan kal tur chuan Chhanhimi damdawi lei zo ni awm tak kan tawk a, "I haw tawh dawn em ni?" tiin a benga a sam zeh pah hian min zawt a, a landan hi chu a inthlahrun hmel dui reng mai. 

"Haw dawn chiah" tih bakin ka chhang lo. Ani biak ţhat ka ba hleinem. 

Mapuia pawh chuan, "I va ngei hmel hmuk hmuk ve" a lo ti a, "Damdawiin an lo luh hnuah chiah ka hria a, ngei tur khawpin ka nunah a pawimawh hleinem" ka ti sam mai a, an lo biak muan avangin damdawiin chhung tho a damdawi zawrhna bulah kan ding leh rih a, eitur min lei dawn tih hriain ka lo inhrek bawk nen, ril a ţam duh khawp mai. 

"Kal ang le" ka hnunga a dawm rual chuan ka lo nui ve sak a, mipa tan chuan a mawi ve tho maithei a ni. 

Damdawiin hnaih bera restaurant ah kan inzui lut a, mi an lo tam deuh avangin a awl chhunah kan ţhu a, kan insi lo chauh vek a ni ber. Sa ti fei deuh phei chu ei ila kan innghawk duk chur hlawm awm e. 

"Eng nge i ei duh ang?" a tih chuan helai hmun a Ngheti nen kan ei zin ber chow satui leih ka lam a, ani'n rice a lam thung a, lassi nen, a dik vel vek. 

"Pasal neih chu a nuam em?" a ti veleh a, a nawm loh zia hrilh hrep ka chak khawp mai. Mahse, "Khawvelah hi chuan nuam tak tak a awm hleinem. Ran takngial pawh hi ţawngthei se chu an nun an nin zia an sawi ve ţhin ang ka ring" ka ti deuh duah a, a lo nui hawk hawk a, a ha var rual nalh zet chu ka lo enchiang hle. 

"Pasal nei tawh ka kawm che hi a pawi lo ang chu maw" a tih chuan, "Pawi lo e...tunlai mi chu kan rilru a zau tawh alawm" ka ti mai a, diktak chuan ka lawm daih zawk. Ngheti ringawt chu ngaiah ka nei a, ţhian thar ka mamawh ve bawk alawm. 

"Ka hnaih vat lo che a ka inchhir tawh tak tak a ni" min en hauh lo a, kan ţhutna hnung lama thawm nei nak nak ho chu a en daih a, a ţawng zawi viau bawk a, a zak ve deuh a nih hmel. 

"A ho lutuk..hei ţhian kan ni tawh alawm" ka lo ti mawi ve a, min lo enin tawi tein a nui a, a tarmit te chu a inhmeh reuh tak tak a ni. Mipa ka fak ve ta fo mai a, ka nun hi ka ning ngang a nih ka ring. 

"Ni e, ţhian kan ni tawh alawm. Ka lo be ţhin ang che, kan ti ti mai mai zel dawn a nia" a tih te chuan, "I duh hun hunah min lo be rawh" ka lo ti ve zel a. 

Kan ei zawh chuan, "Ka la haw ve hman lo a" a ti ban charh a, a cher chhiat lutuk loh avangin a dul ka en a, a kiar lo hlauh. Nicholas hi ngei viau mah ila a taksa a nalh zek si a, ani aia nalh lo zawk ka kawm palh ka hlau a ni. 

"Keimahin ka haw ve mai ang. Ka nu tlawh kawi ka tum hrim hrim a" ka ti a, taxi min chanpui thlap a, a fel khawp mai. 

Ka nute office ka thlen hma chuan Nicholas hnen aţangin thlalak ka dawng a, ka download vat a, Mapuia nen a kan ding dun lai ka hmuh chuan mak ka ti khawp mai. 

'Mit ka ngah a nia, thu i awih lo riau" a rawn ti a, ve lutuk hian a. 

'I va ngah tak ve..vantirhkoh thlah kal zel in ni lo maw? Mi enthlak ching, ka rap thar riau mai che' tiin ka chhang let a, a en vat a, min chhang let tawh lo thung.

Ka nu hnen ka thlen chuan, "Engati nge i lokal?" a lo ti a, a hmazawn a ţhut pah hian, "Ngah nge ka lokal loh ang?" tiin ka zawt let a, a fanu ngei a hmu nain a hamhaih hmel khawp mai. 

"Saii chu pasal neih i ngeih a nih kha. I inchei dan leh i landan te chu a nu hnâp tawh mai" ka nu bul chiaha miin a lo tih chuan, "Ka pasal neih hmaa ka lokal pawh khan hetiang chiah hian alawm ka inchei" ka ti ve ngat a, mi an han fak der hluak hluak ţhin hi chu nuih a za zawk ţhin. 

"Thingpui i duh em?" ka nu en chung chuan lu ka thing a, "Ka in tawh" ka ti mawl tawp a, office chhung chu ka enkual a, ka hmelhriatte vek an lo la awm a, min lo nuih var var hlawm a, "Pasal neih chu eng nge a an?" tiin min au lang lang hlawm mai. 

"Zikpuii leh Liantei te an dam em? Ngati nge tuman min lo biak ngai loh a?" tiin ka chhuahchhal a, "An ngai lutuk che. I lunglen an hlau a, an lo be lo mai mai che a tih kha" a ti dam thlap a, hmui ka lo ti pawrh nasa mai. 

"Min ngaih dan a dangdai hle mai. Tlangval lerh ang vel an nih chu. Ka ngai ti chung renga be miah lo a awm thei ang kha, min ngai tak tak a nih chuan min lo be awm emai" uar fe hian ka ti a, ka duh lo chung min nawr lui a, min ngaihven zui hauh lo hi ka vui ve a, ka pasal chhungte pawn min ngaihnep phah sawt niin ka hria. Sai angin ka lut a, tunah chuan fanghmir ang lek ka ni tawh. 

"An ngai che a nitin an sawi ziah che alawm. Nicholas a fel em? In inmil tawh em?" a ti daih a, midang hriat a hlau nge a ţawng dim khawp mai. 

"Danin hmeichhia te hi humhalh tlat lo se chu ka dam tawh kher lo ang. Chutiang vel chu a ni" tiin ka sawi ţhaih a, midang zawng aia min hrechiang tu ka nu chuan, "Nang te chuan i damkhawchhuah theih nan engpawh i ti duh ang. I hriatna a fim chhung chu luhlul chhuahin i thaw lui tlat dawn tih kan hria" a ti fiamthu a, a va hun lo ţhin tak. 

"Amah mai bakah a chhungte pawh an fel lo. An zia an chhuah der tawh a nia aw. Faith-i zawk lah kha kei aia nau si ka tihsual ni hawt lo ah min chhuahchhal pang pang ngam a nia, inneih hlim hlawt a ze ţha lo an chhuah nghal hi mak ka ti hrim hrim. In thiam loh vek a nih hi" ka ti ţha leh a, thawm ka dim ve vak thiam si lo, min lo en deuh ţhap tawh. 

Ka nu chuan pawn thlengin min kai chhuak a, "I tana ţha tur zawk a ni kan tih kha. Nu leh pa te chuan fate tana ţha ber tur kan duh a, i pasal tur kan zawn sak reng che alawm. Sangzuali te unau pawh an duh zawng tuman an nei hleinem. Nu leh pate duh zawng vek an nei a, an nawmsak em hi" a ti hlak hlak a, lungawi chung bawkin ka haw leh a, thawvenna tur a awm lo a ni ber e. 

Ka thlen rualin Anthony pawh a lo thleng ve chiah a, tarmit dum a vuah a, a mit a la dam chiah lo a nih hmel. A tawm bo tlat zel a, in khata cheng e ti lo chuan kan inhmu khat khawp mai. 

Min hmuh rualin, "Lungawi lohna i nei chiang?" a lo ti var a, ka hmelah a lang chhuak lehpek tawh aniang. 

"Ka chau ve deuh mai mai mawle. Rawngbawl a la hun chuang lo bawk a ka inbual anga ka mu daih ang" ka ti ve zaih a, "Kungtei a awm alawm. Mu hahdam vang vang rawh" a lo ti ve zat a, phone a en zui ta daih a, a kutzungchal ah zungbun a bun leh tawh a, sana, ka sawi thiam dan berin a chhung hnawk deuh chi a bun tel a, a duhzawng a mak ve thei ngawt mai. A vun a ngo bawk a, a kut a hmul ţo chu a langsar khawp mai. 

"Aaa...midangin rawng an bawl laia lo mut daih bik chu a nuam chuang lo" ka tih leh takah chuan a phone aţanga mit la sawnin min rawn en a, "I lo awm hma pawn an ti tho alawm. Inthlahrung suh, khati ber bur kha chuan pâtean i cho emaw a tia nga, a seh mai ang che" a ti fiamthu a, pâtea an tih lah hian keimah emaw ka lo inti ve ziah lehnghal. 

"Aw le...i tih tlat chuan le" ka ti a, nui hawk hawk chung hian min zui lut a, beisei loh deuhin phir te an lo awm reng mai. 

"Ka nu'n rei a ti tawh che a nia, chawhma chiah i duty a, i lo haw har bawk sia, choka ah a awm" Faith-in a lo ti a, henu hian min ngaina lo fal a, a zia lo tak tak a ni. 

"Mu hahdam rawh se. Tih tur a awm chuang hleinem. Puih a ngaih leh kha in awm tho a" tiin Anthony zawk chuan a lo chhang a, "A rei a ti ka ti mai alawm" Faith chuan a ti hlak a, a u in ka thlavang a hauh deuh chu a lungawi loh hmel khawp mai. 

"Thil ho mai maiah buai ţhin suh u. Saii, han chawl hahdam rawh. I ril a ţam leh thil va ei hmasa la" a ti dam thlap a, phir te hnenah chuan, "In buaina chiah ngaihtuah rawh u. Hrilh nawn ngai suh ang che u" khauh zet hian a ti a, ka ril a ţam loh em avangin ka chhoh san ta daih a, inhnial thawm ka hre zui lo a, Anthony chu an hlau ve deuh a nih hmel. 

Nicholas rawn haw chu a hmel hmuh a hrehawm leh ber bur tawh khawp mai. Ka muhil lo nain khuma ţhu mu deuh chung hian phone ka khawih a, ka thil en lai ka lo nuihpui nasat tehreng nen a hmel ka hmu a ka nuihza a tawp vek. 

"Tu nge ka thla i lak tir a? I bialnu Chhandami kha em ni?" tiin ka lo chhuahchhal a, "Mi â hriat ve chi loh" chimawm zet hian a lo ti a, ka ngei tawk a tling leh viau tawh. 

"Eng nge i nih bik a? Fing viauah i in ngai em ni a?" thawh kân ţuah ţuah pah hian ka ti a, ka melh kal bawk a, "Midang ruaiin min zui ruk tir amaw?" ka tih leh chuan ngeiawm deuh hian a lo ţhen sak a, ka vawm lo chauh tawh a ni. 

"I pasalin zui suh ka tih chu zui lo mai rawh" inti thu nei zeta a tih chuan, "Huh..a hming chauha ka pasal i nih hi. I duh leh kha Chhandami kha buaipui la, min tibuai tawh hlek suh" ka tih laia a nui hmel te chu ngeiawm tak a ni. 

"A hming chauh lo a i pasal ni turin min duh em?" nuihza aw zeta tih pahin min rawn pan hnai a, kei ka lo tawlh hnung rawk rawk thung a. 

"Tu neih ve chakin inhnuaiah ka nu leh pate an ţhu ngui bur alawm. Kan siamsak mai dawn mi?" a ti a, a kawr kengin khumah chuan a rawn lawn zui zat a, "Fa ka neih pui hlawl lo ang che. An sam a kir chuat ang a, beram kan enkawl a ni ringawt ang" uar zeta ka tih chuan a nui chhuak hawk a, "Pawi hleinem...kan bé chuah chuah mai ang chu" a lo ti ve leh zel a, a mitmeng te chu ka hrethiam lo, verther ti ngawt dawn ila a ni chiah si lo, mahse chutiang deuh chu a ni tho tho. 

"Hmeichhia hi danin min humhalh tih hria la" ka tih chuan a lo thaw hawk a, phun deuh hluk chung hian a tho a, eng nge a sawi lah ka hre thei der lo. 

Khum aţang chuan ka chhuk sawk sawk a, thlang lam bathlar ah ka chhuak ta daih a. Kan in aia thlang lehzual a in ding thluah ka thlir vang vang lai chuan, "Pâte" a rawn ti thum dut a, "Enge?" vin zet a tih pahin ka inher sawk a, a chal dawm reng chung hian, "Lo en teh a thi em?" a ti a, na nei tih hriat zet hian a ţhen leh sawk ţhin bawk a. 

"Awii...engtik laiin nge i lo intih nat hman a? Nichin lawkah pawh i ţawng zuah zuah a ni lawm ni?" tih hlak hlak paha ka pan phei chuan, "En vat mai teh" sehchilh zet hian a lo ti a, "Lut ta che..i din ve reng te chuan ka hmu pha hleinem. Sofa ah sawn va ţhu rawh" ka la ti hlak hlak tho a, a awm ruak kungah chuan ka nam nawk nawk bawk. 

"Eng nge far hi? Thisen a ni em?" a lo ti leh hman a, inbual tumin a lut ve tawh ni awm tak a ni, a sam pawh a chhip lam chu a huh pheuh pheuh tih ka khawih takah chuan ka hre thei. 

"I kut hi la thla rawh" ka tih rual chuan a la thla ve mai a, a pem a, a thi siar siar bawk a, tam phei chu a ni lo. Mahse, thisen a hlauh zia hriain tih der ka char ve hrim hrim a, "A thi a nih hi..chal phei chu a thi duh a sin" ka ti chiah chu ka nakah a rawn ţham chawt mai. 

"Khawiah nge i tauh a? Ţhui a ngai ngei ngei ang. Hetiang em em a kak thuk te chu nat pawh a na lo em ni?" ka tih leh takah chuan min pawt lawp a, ka khek ţhat a, a malchungah ka ţhu fel der chu a ni mai. 

"Daw teivet lo mai teh" a ti hluk a, "A thi tak tak alawm. A luang nguai nguai mai" ka tih chuan a kiai suk a, thil ţha lo a ngaihtuah leh tawh ni awm tak a ni. 

Naupang kan pawm ang maia min pawm bet tlat chung hian ka awm bawr chu a chalin a rawn nawr a nih chu mawle! Ka beng sawk a, nui vur vur chungin a inla hrang a, "A thi nge thi lo ka enchhin a nih kha" a ti duh lek chauh a, ka ngei thei vur vur a nia.

"Min thlah vat rawh" ka tih chuan min pawm reng chungin a ding a, sofa ah chuan dim lo zetin min nghat a, "Naute hnek tham pawh i nei ve lo a nih kha. Hmeichhia nih chuan mahni a phun hluk hluk tham tal neih tur alawm" tiin ka awm bawr a hmuh dan chu a sawi duah a, "I nu mawng tiat lawih pawh nei ila i sawisel tho ang" ka tih chuan a nui chhuak ta hawk a, keipawh ka bang bik lo, Nu Hlimi mawng len zia hriain ka nui ve ta nge nge a, kan nuih dun hmasakber a ni hial awm e.

CONT...