HIS LAST LOVE-8

(Ka edit rih lo...hawrawp dik lo a awm maithei aw)

HIS LAST LOVE-8

Bualin a luh leh veleh inhnuaiah ka chhuk a, a chal pem pawh chu ka en zui sak lem lo. Inbual tuma lut si engtin nge maw a chal a tauh daih theih reng reng ni? A chesual ve khut khut ţhin a nih dawn hi. 

Tumah hmuh tur an lo awm leh tawh lo a, Kungtei phei chu awm lo se tuma luah loh in ang vel a ni ngei ang. Choka a ka luh chuan alu a lo vel mek a, chemte lain a bulah chuan ka ţhu ve a, "Min lo tihpui duh kher suh. Mi siam ka hmu a, ka phur thut mai mai a nih hi" a lo ti a, eng eng emaw sawipui pahin ka tih pui ta tho a. 

"Kha, behlawi rah hi lo chan rawh. Tui deuhin kan bawl dawn nia" phur zet a tih pahin silfai sa diam chu ka lamah a rawn nawr phei a, ka ngawih ve rauh rauh hnuah, "Kungte, i u Nico hian bialnu a nei reng si a, engati nge kei hi min neih daih le?" ka ti chhuak phawng a, min en phawk khawp mai. 

"Aaaa...a zawng zawngin ka hre ve chuang lo nain a bialnu kha an duh lo a, nuthlawi a nih mai bakah fa pahnih lai a nei tawh a, an rethei berh ve reuh bawk sia" a ti sap sap a, an retheih zia chu Ngheti kâ aţangin ka lo hre tawh a, an fapa in a duh miau chuan eng mi pawh nise an duhpui turah ka ngai. Theih ngat se chu tupawn hausak kan duh alawm, mi, an retheih avanga in hmuhsit ngawt zel hi ţha ka ti lo khawp mai. 

"An retheih te chuan khawngaih zawk awm tak a nia" muang ban charh a ka lo tih chuan, "U Nico chuan a khawngaih alawm. Mahse, ka pite hian nangmah an duh si che a, in inneih hma pawh khan an inhnial nasa ţhin alawm. U Nico phei chuan in chhuahsan a tum hial a, ka pu hian vau bet tlat lo se chu kan hmuh phakah a awm duh tawh kher nang" a lo ti a, a hriat ang chu a sawi ţha duh nasa mai. 

"Awii...mizo pawh hi kan chin dan a mak tawh e. Mahni fa te han vau beh tawp mai chu a rapthlak hle mai. Mi hausa ţhenkhat hi chuan an hausakna hi an hmang sual ve deuh bawk ţhin alawm. An pawisa hi midang rahbeh nan ni lo, mi rethei chawi kan nan te hmang zawk che ţha tur a nia" ka ti hlak hlak a, bengchheng lo turin min lo khap a, an hriat phak a hlau viau a nih hmel.

"An fa a ni ve hleinem" a ti chu, "Engmaw?" ka lo ti vak a, zaizirin min lo khap leh vat a, a hmelah chuan an hriat a hlau takzet tih a hmuh theih a ni. 

"Mi chuan an hre vak lo ang. Mahse, an chhungkhat laina te chuan an hre vek. I nu leh pate pawn an hria ang chu. Ka pi nau fapa a nih hi. Mumal tak phei chuan ka hre lo a, kan khaw mite leh ka pi nu a lo zin ţuma an sawi ka hriat kha a ni mai a" a ti a, hriat zel ka chak chuan, "I hriat ang ang chu min lo hrilh ve. Khawiahmah a chhuak tawh lo ang" ka lo ti vat a. 

"Ka sawifiah thiam chiah lo maithei. Ka pite hi Champhai khua an nia, keipawh ka ni tho a, ka pu hi hna vangin Champhaiah a awm a, chuta ţanga in ngaizawng chho chu an nia, an intawn dan hi chu an zep ngai lem lo, sawi nuam an ti zawk. An inngaizawng rei lem lo aniang an inneih hnuah pawh Champhaiah an la awm zel a, an sawi hmangah chuan U Nico hi sawn a nia, a pa'n a a nu kha a nei duh lo a ni awm e. A nu kha nau chungah a thi a, in pa hi a pian khan pawm pawh a pawm hman lo maithei a ni. Ka khawngaih a nia aw. Sawi tawh miah lo la maw, kan khaw mi, hrechiang inti deuh ho chuan U Nico pa hi tuna ka pu unaupa hi an ti" a ti sar sar a, ka hrethiam lo telh telh mai. 

"A nu chuan a fa paina pa chu a sawi lo em ni?" ti a ka lo zawh chuan, "Aih, hetah ka awm tih an hriat hnu ngat phei chuan ka haw chang hian sawi duh tawk an lo awm ve ţhin amaw. Ka pi nu vanga heta awm hi ka ni kher bawk nen, eng eng emaw min hrilh pah hian an chanchin min zawt tel ţhin bawk a, Champhaiah khan an lo awm rei hman em a ni. An sawi dan chuan a nu kha a fa paina an zawt chhuak thei lo a, min nei duh lo a ti ringawt a an tia. Kan veng bikah phei chuan an la hrechiang hlawm lutuk" a ti a, kan thusawi lai nen a inzawm vak lo tih hre tho mah ila, "Nu Hlimi nu chuan heta awm turin a ti che em ni?" tiin ka lo zawt leh a. 

"Aw..kan rethei a, ka pa lah a hnathawhna hmunah a chesual a, a kawng chin hnuai lam hi a zeng a, chuan an ţhenawmte inah ka inhlawh ţhin a, ka pi nuin min hmuh khan, 'ka fanu ten awmpui tur an duh lutuk alawm' a ti a, aw ka pawh mai bik lo a, mahse min khawngaih ngang aniang min hmuh apiangin a sawi ziah a, kan chhungkaw dinhmun a hriat hnu phei chuan kawr te min lei ţhin. Ka pi nu chu a fel tehmai nia aw...ka pi ang hi a ni lo reng reng. Inneih naa a lokal pawh khan a fel zia chu i hre thei mai ang. An inah khan awm turin min ti nain rem lohna awm leh ta sia, pawisa ka mamawh bawk nen ka pi te hi ka pan tawp alawm" a ti siam siam a, kan thil chan lai pawh kan ngaihsak tawh lo. 

"Chuan nichin a i sawi kha, a awmzia tak chu Nicholas hi nu Hlimi nau leh Pa Chhawna unaupa te fa maw a nih a?" ka ti nawn leh a, a lo bu ve nghat nain, "Ka pi nau fa tih chu ka hrechiang a, mahse a pa tih vel kha chu mi sawi ka hriat a ni thung a, dawt an phuahchawp mai mai pawh a ni thei tho a" a ti a, a pian ruala a nu a boral ve nghal vang a nih dawn hi Kungtei pawhin kawm hlim tura min tih fo ni. A khawhar ruk zia thlengin min hrilh ţhin a nih kha. 

"Anmahni hian thudik chu an hre tho ang tiraw?" ka tih chuan, "Hre awm emai. U Nico pawn an fa a ni ve lo tih a inhria, mahse a pian hlim aţanga enkawl nghal tu te an nia, a zahin a hmangaih tho alawm" a lo ti a, keichuan ba neiah a inngai zawk a nih ka ring. Fahrah mai ni tur kha anni vang hian nu leh pa mai bakah chhungkaw zahawm tak a nei a, lehkha an zir puitlin tir bawk a, anni hi awm lo se chu tuna a dinhmun hi a luah pha lo maithei a ni. Hei vang hian ba neiah a in ngai tlat ang a, min neih a hnial loh chhan pawh a ni thei a ni. 

"A nu chu thi lo se Champhaiah a awm daih ang a, keipawn pasal ka nei a ngai lo mai tur" ka ti fiamthu a, kan thusawi lai chu sawi chhunzawm ka chak tlat lo a ni. 

"In inhmeh alawm. U Nico hi pawnlamah chiah a zia a chhuah kan ti fiamthu ţhin a, inchhungah hi chuan a ţawng mawh a, hlimna a hmu hlawl lo a ni ber. Mahse, i lo awm hnu hi chuan a ţawng ve reng zel tawh a, phir te lah tunhma zawnga fiam ngai hlei lo a fiam ve zuk zuk tawh a, i bula awm nuam a ti chiang mai" a dara min nghawk salh paha a tih chuan ka lo ner nasa ngang mai. 

"I ngaihdan mai mai a nih kha. Ti thuai thuai teh ang, chawei an rawn duh leh vat mai ang" ka ti ta zawk a, Hope pawh lo lut vein filter ah tui a dawh ri nghal karh karh a, dawhkan hnawk ka huikhawm lai chuan min lo panin, "U Sai" min han ti ngei a(h).

"Umm" amah pawh en chuang lo a ka tih chuan, "Hlawh i lak veleh bazar ang aw" a ti a, ka lo nui hak a, a la ding reng tho. 

"Eng nge i duh a?" ti a zawh paha ka en ve takah chuan, "Thawmhnaw ka lei pui ang che. Inchei dan ka hrilh ang che, i duh em? Designer nih ka tum amaw..ka tuina lam a nia, thil nalh leh mawi ka hre teh mai a nia aw" phur zet hian a lo ti a, ka thawmhnaw hak lai ka en hnuah amah bawk chu ka en leh a, dik lo ka hmu ve hauh lo. 

"Ka thawmhnaw hi nalh lo i ti deuh em ni?" pangngai taka ka tih chuan, "Awii..chutiang a ni lo reng reng. I hmelţha sia, inchei nû ve deuh la tih thuah mawle. Heti pawh hian i nalh lutuk tho a, nû deuha i inchei ka hmu chak" a ti mauh mai a, ka mizia hi a nû tehchiam lo a, ka kawlhrawng nasa mai bawk si, inchei nû ve mah ila awmzia a awm chuang dawn em maw ni. 

"Ka hlawh a tam lo a, duh leh i duhzawng pahnih khat chu min leipui dawn nia" amah tih lawm nana ka tih chuan a nui var var a, "U Nico hlawh a tam alawm. Pahnih ai tam i duh tak leh kan dil belh mai anga" a ti then a, a ngai awlsam ve khawp mai. 

"Hlawh ka lak hunah kan sawi ţha leh dawn nia. Nû deuha inchei hi ka thiam ve vak lo a, hak nuam apiang ka ha ve a ni mai a, ka thawhna hmunah ka kalpui phei chuan min lo hai ngei ngei ang" ka ti a, Kungtei nen chuan min sawisa zuiin kan pathum chuan kan nui hak hak hlawm a, anni pahnih hi an fel reuh tak tak a ni. 

"Chaw ei ang u...chhuahna tur ka nei" rawn ti tu chu ka lo melh vak a, a chal chu a bel var ve vu a, a pem nep tehreng nen. 

"Khawiah nge kal i tum a?" an lo tih chuan, "Ţhiante inah" a ti mawl tawp a, kan en tak ţhapah chuan, "Ka leng ve bawk ang chu" amah bawk chuan a ti hluai a, chek tlak pahin gas lamah ka kal ta daih a, nau a awm leh tawh dawn aniang chu.

"Ka nu'n in nu bulah hun hmang tam rawh a tih che kha" Hope chuan a la ti ţang ţang a, zin bo daih mah se pawi ka'n tih loh nen, min ngaihtuah mai mai a ni. 

"Leng rawh se...awm dun ai chuan kan awm hranin kan fel fai zawk" tih paha an lam ka hawi rual chuan a lo ner suk a, khawiah pawh kal dawn se ka dang hauh lo ang. 

"Hun thawl ka pe ang che u" a ti kher chu ka ngei ngei mai. Kungtei te awm ve lo se chu ka chhang let hrep ang. 

Chaw ei lai pawh chuan kan ngawi ran a, Nu Hlimin min be leh zeuh ţhin tih lohah chuan tumah kan ţawng lo. An chhungkaw chanchin chiang lo deuhin ka hria a, hrechiang chak viau mah ila han zawh ngam mai ka nei rih lo.

Hmun kan tih fel hnuah inchungah ka chho a, midang pawh an pindan ţheuhah an lut bo nghal diak zel. Nicholas lah chu a insiam ve mai dawn maw tih laiin thlanglam hawi zawngin single sofa ah a ţhu a, beer can a dawm leh ran tawh a, meizial nen, hetiang reng a nih chuan a damrei lo tawp ang. 

"Ka leng dawn i ti a ni lawm ni?" khum tlanga ţhu chung hian ka au a, beer can chu ka hmuh tura lek kangin hawi pawh lo hawi lo hian, "I duh ve em?" a lo ti thung a, lu ka thing a, min hmu thei der si lo. 

"I len loh rau rau chuan inbe teh ang. Zawh tur che ka nei a nia" ţha deuha ka tih ve lahin, "Inbiak ka peih lo, mu rawh" a ti chhum hmuk a, hei tak hi a nia buaithlak ţhin chu. Min neih chhan ka zawh hian a sawi duh ngai ţhak lo. 

"Ka mu ang...min rawn tibuai bik reng reng suh ang che" ka ti a, hawi let meuh a min rawn enin a nui suk a, ka la thungrul ve dawn khawp alawm. 

Innei reng chungin inpawh lo deuhin kan awm chho a, biak kan nei ve ve a, ngaihzawng neih ka duh lo nain mal deuha awm tlawk tlawk pawh ka tum bik chuang lo. Hope pawh ka la hnar zel rih a, thla hnih lai kan inneih ve hnuah pawh hmeichhe thawmhnaw kan la lei dun ta chuang lo. 'A ţha law law kan lei theih nan ka inkhawl' tiin dawt ka hrilh ţhin a, a lo awih ve mai zel a, thil dangah ka buai daih thung. 

Mapuia nen kan inbe nasa a, duty naah kan inhmu a, thil kan ei dun a, a remchan ţumin kan haw dun leh a, ka pasal ai mahin ka pawh tawh zawk a ni. Kan nupa ve chu kan awm dun hlekin kan inhau a ni zel a, kan inneih hlima ngeng tak si kha tunah chuan a ni tawh bik lo a, mahse, kan inngeih lo zual sauh emaw tih tur a ni. Min hnial a ching ve tlat tawh a, sawi tur a hre lo viau emaw ka tih ţhin kha tunah chuan a hre tawh lutuk tlat a ni. 

"Chhandami pawh a pasal hlui nen an inneih leh dawn kha" Nghetin a tih chuan mak ka lo ti khawp mai. 

"Eng nge awmzia? Nicholas nen an inzui ngawrh viau a ni lawm ni? Kan inneih tirh lama a thusawi pawh ka la theihnghilh hleinem, phone a hman ţum a ka thlahthlam dawn lo a tih te, ka bulah ngei pawh a hmangaih thu a sawi alawm" ka tih chuan, "Chutiang thleng thleng chuan ka hre ve lo. Miin an sawi a, in in bawr vel a la rawn thleng thla lo mai mai a nih chu. Veng chhak lamah chuan an sawi nasa tawh alawm. An inhruai leh dawn an ti. Nicholas berin nupui a nei tawh sia, a nu leh paten an nawr ve deuh aniang, bakah fa pahnih lai an nei tawh a, inţhen hlen thei an ni hleinem" a ti bawrh bawrh a, pasal rilru na deuh ka nei dawn a nih ber chu. 

"A mak teh thut e..an inkawp lui zel turah ka ngai a, ka rin aiin an inţhen awlsam" ka lo tih leh chuan, "Keipawn ka ti ve tho alawm. An inkawp nasat zia hre tu kan ni a, an inthlah theih kan ring lo fur a, in inneih aţangin thla hnih vel chauh a la liam ang tihah heti hi an ni leh sia, eng nge maw awmzia ni?" a ti a, an inkar a thil thleng vel hriatchian a chakawm khawp mai. 

"Chhandami zawkin a hnar aniang. Ni lo se chu Nico hian a ţhen hauh lo ang. A hmangaih zia a sawi hial a, min khawih lui duh ngai miah lo te hi Chhandami vangah ka lo ngai deuh a" ka ti charh charh a, khawih ka beisei vang ni lovin, duh loh mah ila a nupui ka nih miau avangin min khawih luih duhna rilru a put te ka lo ring ţhin a, ka huat theih nan tal pawh chutiang chu a tih ka ring a, ka inveng nasa ţhin reng a ni. 

"Hmeichhia i nih angin a zah che pawh a ni maithei a" a lo ti zauh a, ka pawm loh zawng tak a ni. 

"Chutiang chu a ni miah lo ang. Chhandami a phatsan theih loh vang zawk aniang. A rinawm ve tawk alawm" ka ti a, a duh zia ka hria a, a fate thlengin a ngaihsak pui a, a rilru a na viau tak tak ang. 

Chawhnu lam duty ka ni bawk a Mapuia nen kan haw rual a, chawlh kawi ka duh si lo a nidang aiin kan thleng hma deuh. Gate hmaa a din rual chuan a kawr pawt ţung chungin ka chhuk a, lei ka rah rual chuan, "Ka lo bia ang che" a ti nghal a, min hrilh lawk lo a min biak tawp hi a la hreh deuh niin ka hria.

"I duh duh hunah min lo be rawh ka tih kha" tiin ka nui var var a, a fel reuh si, ngainat a awl tak tak a ni. 

"Ka insum deuh lo chuan ka ngaizawng daih ang che tih a hlauhawm" zah hmel tak hian a ti a, Nghetin min ngaizawng daih tawh a nih a rin nen, chutiang lam rilru chu a la pu lo a nih hmel. Kei, tawn hriat la nei lo zawk lah ka hnual ve rawih a, a chhan tak pawh ka hrethiam lo. 

"A pawi reng reng lo...min lo be bawrh bawrh rawh" ka ti fiamthu a, min luh hmasak tir a, kawngkapui ka thlen fel hnuah bike ri ka hre chauh a, in ka thlen thlengin min lo thlir ve thlap a nih hmel. 

"Nico nen in inbia em? Ban a hun daih tawh si a, a va rei ţhin ve" min hmuh rualin Nu Hlimin a lo ti nghal a, "Be nang..inbe thei lo em ni?" ka ti let a, "Be thei nang" tih paha lu a thin takah chuan a rilru na rilru tih thawvenna tur a zawng a nih ka ring deuh a, a peih hunah a lo haw ve mai ang. 

"Veng chhak lamah a kal a ni lo maw?" Anthony chuan a lo ti zauh a, kailawn a ka pen chho lai chu ka ding chawt a, ka ngaichang veleh rih a. 

"Khaw en lai chuan a kal lo tawp ang. Puitling a ni tawh a, mualpho a hlau ve bawk alawm" tiin Nu Hlimi chuan a lo chhang a, an sawi hmangah chuan thil thleng mek chu an hre vek tawh a nih hmel. Keimah chiah ka bang leh lel tawh a nih chu. Engtik laiin nge maw an lo sawikhawm bik ţhin ni. 

"Chutiang a nih te chuan hlauthawng tawh lo la, ngaihţha tak khan awm rawh. A lo haw ve mai ang. Khawiah emaw a kal kawi ve aniang chu" Pa Chhawnan a tih chuan Nu Hlimi pawh a ngawi ve ta mai a, an fate hi puitling vek tawh mah se an nunah thu an la nei viau a nih hmel.

Ka inbual zo cream ka lo inchulh lai mekin a lo lut a, kawngka bulah chuan dingin min en reng a, a mitmeng chu a vai riai a, a rui niin ka hria. 

"Ka ring reng a" ka lo ti ringawt a, a hun tawn mek chu hriatthiampui mah ila ţha deuh a lo dawn sawn ka thiam tawh lo a ni ber. 

"Eng maw i rin?" a ti a, lo pen lut leh hlekin khumah a ţhu hnawk a, "Aww...i ruih ka ring" ka tih lai chuan khum lu lam nghengin a ţhu âwn a, a chal chu a hmet zui niap niap a.

"Zu i in reng chuan i thi vat dawn a nia aw" ka tih leh chuan, "Chu chu i duh dan tak aniang chu" a ti a, a ţawng dan chu a ngeiawm lek lek a ni. 

Ka pan hnai a, a bula din phei chuan zu rim chu a hriat chian theih lehzual a, "Va inbual rawh...ka thawmhnaw ka su dawn mek a, i hak lai kha ka lo suk sak ve hram ang che" a kawr a pawh hlak pah hian ka ti a, a chauh hmel ve reuh a, tlem chuan ka khawngaih ve deuh. 

"Ka lu a na" zawi sup a a tih hnuah ka banrek a rawn man a, a mit chu a meng zui bawk a, a sen ram mai. 

"Min lo duat la" tawi tein a nui a, min nuihsawh hauh lo thung. Ka kut chu lak sawn mai ka tum a, a hmer ngheh em avang chuan ka then ka then ringawt a, "I over emai...inthlak vat la a nih chu" ka ti hlak a, lungngai deuh a hmuh ka tum nge ka hre lo, ka hmuh tum danin ka hmu miah lo.

"Tah hian mi?" uang zeta tih pahin a kut awl lam chuan a kawrkilh a ban a, ka lo bu nghat a, "I duhna hmun apiangah a ni mai. Hmu ngai lo pawh ka ni hleinem" ka ti sam then a, a hamhaih letling zawk in ka hria. 

"Thil ka hria a" ka tih leh takah chuan a mithmul a lo san ak a, "Chhandami vel kha" ka ti leh sap a, a sawichhuak tu nih pawh a nuam lo. 

"I hria ang chu..beng i nei alawm" a tih chuan ka lo chek tlak a, "Deusawh vel che ka tum hauh lo a nia. Rilru nat chuan mahnia awm te a chakawm ţhin a, chimbuai i duh loh chuan sawi la" ka ti ve mial a, Nicholas phei chu hmuh thiang lo hmu ang mai a ni, min en phawk khawp mai. 

"Enge i sawi ve sep sep kha..han sawi nawn leh teh" a ti a, a nui tawh lo nain min chhaih kual vel tih ka hre reng. Chuti chung chuan, "Chimbuai i duh loh chuan sawi rawh ka ti a nih chu. Rilru na bula awm reng te chu ka peih bik lo a" ka ti niah niah a, ka kut chu thlahin a tho a, a din ve takah phei chuan a âwm chu ka en ran a, "I awm hian a nuam ka ti" zawi te tak tak hian a ti a, a kalsan zui nghal bawk a, a ţawng zawi viau nain ka bengah chuan a ring hle a, a sawi sual ta mai emaw ka ti rum rum hial a ni. 

Chaw ei lai chuan Nu Hlimi ten an hau a, an zilh bawk a, a ngawi ngul a, a tih ziah dan a ni. Mahni thu a awm rual a nih tawh vang a nih ka ring. An hauh hian a ngawi tawp a, a chhang let lo a, an thusawi a zawm ngai chuang lem hlei lo bawk a. 

Mut hmunah Mapuia nen kan inbia a, keimahin ka nui kar kar reng a, Nicholas erawh a ţhutna ţhinah bawk khan a ţhu leh tawh a, Mapuian, 'In pa a muhil tawh em?' a lo tih chuan a ţhutna lam chu ka en a, pindan chhung a thim deuh ruih tawh nain a meizial ling vât chu ka hmu thei a, min hnungchhawn daih avangin a hmel erawh ka hmu thei lo. A inngaihtuah nasa ve hle a nih ka ring. 

'Thlang lamah a la ţhu luau mai. I mut a chhuak tawh em?' ka ti a, kan innel tawh viau nain ngam tlak vak loh biak hi chuan inthlahrun a na deuh ţhin. 

'Chhuak lo e...ka biak che chuan ka harh kar zel' a ti vel a, ţawngka phei chuan inbia ila ka nui ri hial maithei a ni. 

Tukverh lam hawiin ka saisir a, Nicholas pawh ka hmu thei tawh lo. Ka phone ah chuan ka bur ngar ngar a, ka kut leh ke bak a che tawh lo hrim hrim. 

'Lo duh ve tlat ta che ila engtin nge i tih ang? Ka hnenah i lokal duh zawk angem?' a ti a, hetiang zawng hian kan la inbe ngai si lo a, min ţhawng khawp mai. Phone chu ka en ngar a, ka chhiar nawn tlut tlut a, chhan mai ngaihna ka hriat loh lai chuan, 'Min chhang nghal duh kher suh aw. Mahse, keichuan ka duh takzet che a, chet ka lo la vat lo kha ka inchhir khawp mai' a lo ti leh a, ka hmui hnuai lam hmet vak vak chung hian ka chhiar nawn reng ringawt a, a tawpah, 'Aw le' ka ti ve thei hram a. 

'Ka rilru put hmang diktak ka sawi tawh a, thutlukna chu i siam tur a ni. Ka nghak char char peih a nia' a ti a, chhang lem lova kan inbiakna ka chhiar nawn leh lai chuan, "Pâte" a rawn ti thum dût a, mipa dang ka biak lai a ni bawk nen, ka phu nasa kher mai.

"Min ti phu alawm" vin zeta tih pahin ka zangthal a, tum deuh barin khum bula a ding chu ka en a, a beng hmawr khawih neuh neuh chungin min lo chhun en ve ran mai. 

"Ti ti ang..min lo ţhutpui rawh" a ti dam vei thlup a, amah pawh a ang lo zawk alawm le. 

"Ka mut a chhuak tawh. Ti ti dun ka peih lo" tih hmak pahin ka saisir leh a, inthiam lo ve tho mah ila ka rilru a buai ve rih tlat. 

A kal mai dawn maw tih laiin ka mutna lamah a lo phei a, ka hmazawnah tak a ding leh a, "Ti ti ka peih lo ka tih chu. Naktuk ka chawhma dawn lehnghal, mut tam ka duh" ti kha kha mah ila, "Lo inhung phei tawp rawh. Keimah alawm ţawng dawn. Muhil mahla ka sawi duh chu ka sawi tho ang" tih leh min pawm a rual a, khek ţhat pahin a nghawngah ka kuah a, phone ka hum reng bawk. 

"I thu hi duh viau zel suh. I thusawi ka ngaithla peih lo a ni mai lawm. Awwii...Remruatsak, ka hne lutuk che" ka ti chiam chiam a, phone chuan a rem lai laiah ka chhu pawp pawp a, engahmah a ngai der lo. A chak bawk si lo a, a duh lohna hmuna ka awm chuan min pawm lawp lawp zel mai a ni. A sam a ţham ka tum lai takin sofa ah min nghat a, center table a nawr sawn rawk a, a ţhut ziahna ţhutthleng chu rawn dah hnaiin ka hmaah tak chuan a ţhu a, ka awmdan a siam rem lai te chuan ka lo en reng tawp. Ka tal chhuah hlau ni awm takin ka mal chu a bawpin a chep bet tlat a, inţhuthnaih tak kan ni ringawt. 

"Eng nge i sawi duh a? A va pawimawh awm em em ve" ka ţhutna dum nam ran chunga amah ka en chuan nui ruh ruhin min lo en let ve a, ani chu a taksain a tlin em a, inkuangkuah hlun chungin hahdam hmel deuhin a ţhu a, naupang te pawh a ang alawm le. 

"Ţhian ni ang aw" a ti a, min rawn pawh a ni chiah lo, thu min pe a ni mah zawk. 

"I thinchhe emai ka peih lo" ka tih chuan, "Nang anga hmeichhe thinchhia leh kawlhrawng hi ka hre ngai lo" a lo ti ve hlak a, ka melh nasat poh leh nuam a ti emaw tih mai tur a ni.

"I nihna hre hawt lovin khatiangin min ti ngawt suh. Sualna leh ţhat lohna zawng zawng te hian an duh bik riau che emaw tih tur a nih laiin ka ţhat lohna i han thur chhuah nalh nalh bik le" ka ti kha kha a, "Ţhat lohna ten min duh bik riau a nih chuan nang hian min duh bik riau tihna a ni maw?" a ti a, nuih pahin a hmui hnuai chu a seh sauh a, a rui takzet a nih dawn hi. 

"Mipa melh na satliah, thinchhia leh thuduh, mahni hmasial bawk, sam ang chiah a rilru kir, nang ang mipa hi chu ka mumang lamah pawh ka hnar hnem tawh" ka tih chuan lu thin nghat pah hian a lo nui chhuak hawk a, a thinrim lo chu mak ka ti zawk. 

"Ka duh che ka ti hauh lo" nuihza aw zet hian a lo ti a, ni dawn tak e...min beiseitu hnawlin alawm maw ka hnawl le. 

"Ţhian tur pawh hi ka thlang fimkhur ţhin a, inrem ka duh lo. I duh hun hunah min hua ang a, beiseina in sang deuh a han thleng ang a, ni hnih ni thum hnu lekah huatna leh thinrimna pai tel ranin a lo chhuk leh tho ang a, ka peih lo. Kan awm dan pangngai hian awm reng zawk ang. I rilru nat vangin min bel mai mai a nih hi" ka ti deuh duah a, ka rilru diktak ka sawi bawk. 

"Duh ila chu nang lo hmeichhe dang belh tur an tam" a ti a, ka sawi reng kha, tunah pawh a chapona a chhuak leh tawh a nih hi. 

"Engmah kan sawi kaw lo ang. Kan induh lo a, kan inhmangaih lo a, kan inkarah inhip tawnna in hmun a chang ve lo a, chuvang chuan keini pahnih chu fumfe lo deuh a inkawp tura duan bik kan ni" ka tih chuan a lo thaw chhuak hawk a, a ipik hmel ve takzet mai.

"Kan inpawh chuan nuam i ti sawt ang" a tih chuan, "Min hman ţangkai i tum a nih kha. Kei hi i ba rulhna chauh ka niin ka hria" ka lo ti hmanhmawh a, phawk fein min en a, ka thusawi chu a lo beisei hauh lo tih a hriat reng. 

"Chutiang chuan an sawi em ni?" tiin min zawt let a, lu thin nar nar pah hian, "Tuman an sawi lo. Mahse, min hmang ţangkai deuhin ka hria. Tunah pawh Chhandami nen in inţhen veleh ţhianah min sawm a" ka tih chuan, "Ka ngainat vang che alawm" a lo ti vat a, ka awih lo nasa mai. 

"Lutuk che hian" tih hlak paha ka che deuh chu nghet lehzualin ka ke chu a lo chep bet a, a kham ţhûm tawh mai. 

"I va mak tak. Ţhian atana min duh a nih chuan zu in tawh lo a, i rilru leh i thluak thlenga a fim vek hunah min hrilh ţha leh rawh. A nih loh chuan min chep zankhua mah la ka pawm dawn chuang lo" ka ti ve tlat a, in ngaina sa kan ni lo nain awm dun tam na na na chuan kan in mihrang en reng thei bik lo a, ka chhungte lahin ţhen an phal bawk si lo, ţhian aţanga bul ţan chu ţha viau mah se Chhandami vangah ka ngai hmiah a, ka pawm thei rih tlat lo. A sawi apiang ka awih zel chuan min zuam vek ang. Hmeichhe nep leh nem deuhah min ngai ang tih te ka hlau. 

"Ka hrethiam e...zingkarah kan sawi ţha leh ang. Hma vêk vâwk ah, thutiam ka bawh pelh ngai lo a nia" a ti charh charh a, min thlah dul chiah chu thawk huai huai na tham a ni. 

"Tun tut tutah ka ti kher lo. Zu in lo vang vang phawt rawh ka tihna a nih chu" tih leh thawh ka rual a, ţhian nih a duh thut chhan tur awm ang ka ngaihtuah thiam lo. Beisei loh deuh hian a che thut thut zel a ni ber a, a mangang ang a, a beidawng tel bawk te pawh a ni ve thei tho. Kei lah ka puak phawng phawng a, inhau fo mah ila na a neih vel chuan keimah bakin an buaipui ngai lo. Nurse ka nih avangin min ring ve deuh te pawh a ni maithei e. A chanchin ka hriat chian hnu aţang kha chuan ka endan a danglam ve deuh a, zep kher a ngai pawn ka hre lo, ankhum bawrh bawrh ţhin mah ila thinlung ka nei ve tho a, khawngaihna chin chu ka nei ve, mahse, ka duh e ka tihna a ni chuang lo. Keimahah chuan Mapuia a la lian zawk tho tho. 

Alarm riin miin ti harh a, mut kham lo zetin ka meng lui a, pindan a ni zung lo lut chuan pindan chhung chu a ti lum ve deuh a, ni lo phei se chu ka tho peih lo zual viau ang. 

Nicholas chu a lo awm tawh lo a, nidanga tho hma ngai hlei lo a tho hma ve chu thil mak tak a ni. Mit nuai chat chat chunga ka ţhut chhuah rual chuan bualin aţangin a lo chhuak a, "Meeting tura kalchhuah in ngai te a ni lo maw?" ka lo tih chuan, "A ngai a, ka thawh hma chhan chu a ni lo" a ti a, zan lama kan thusawi te kha a lo la hrereng a nih dawn hi. Rui viau turah ka ngai a, a lo rui vak lo a nih hmel. 

"Kan inneih tawh ber te chuan ţhian nih ţhat leh a ngai tawh hleinem" ka tih chuan, "Keimah niah chuan a ngai" a lo ti nghal zat a, a thil vei hi a vei tut tut ţhin a nih dawn hi. 

"Rei deuh chhung ka tih kha. Zu in lo vang vang phawt rawh. I rilru buai lai chauhin ka awm ve tih i hria a, ka duh bik lo. Hlutna ka nei ve tho alawm. Kaih kawi mai mai tur ka ni bik lo" ka tih chuan nin hmel zet hian a lo thaw hawk a, rilru hmanhmawh chi a ni tih ka hre tawh a, ka chhanna a hriat duh vang hrim hrim a a tho hma chu awm tihna chin ka nei tho. 

"A thu hrimah, engati nge ka chungah ţhat i chhuah thut a? Ţhian nih i duh thut nachhan hi a awm em?" ti a ka zawh chuan, "Mi thar ka mamawh alawm" a ti a, zawt lui mah ila engmah a sawi zui duh tawh lo. Lawma nen kan in nel ve tawh tho a, nakinah ka la zawt ru ang. 

Ngheti hnena chanchin ka hrilh chuan, "Hrehawm a ti khawp a nih chu. A lung a len lutuk loh nan hman ţangkai che a tum aniang. Bakah Chhandamin a pasal hlui a neih leh laia mal deuha awm bik a duh lo a nih ka ring" a ti a, a dik hmel viau mai.

"Amah lah hian a sawi ţha duh ngai mang si lo a" ka tih laiin Mapuia a lokal a, coffee no hnih a rawn chawi chu kan dawhkanah a dah a, "Hun awlah ka lo tlawh zuai che" a tih chuan a ka lai ve ringawt a, zan a a thil sawi vang kha a ni ber ang. 

"I va fel ve" ka ti a, Ngheti chu ka melh ralh a, a kuttin a tan bul mah mah a, chu ringawt chu a buaipui a, lo be ve se keipawn sawi tur ka hre deuh tur a nia. 

"Casualty ah ka awm dawn a, chhunah chuan kan buai vak lo ang. I haw dawnah kan inhmu dawn nia" tiin min kalsan a, an thusawi a hre pha tawh lo ang tihah Ngheti chu ka nghawk sawk a, "I va â ve..lo be ve ta che. Sawi tur pawh ka hriat loh kha" ka tih chuan, "Zei ka zirtir che a nih kha. Ka tello a mipa kawm zir ve teh. Mapuia hi be ţha la, inpa hi runluih rawh. A tirah a en liam thei che a nih pawhin en liam theih loh chin a nei ang a, chutah chiah chuan i laka a rilru put hmang diktak i hre thei mai ang" a ti a, a hmelţha em em lo nain kan pa aiin ka duh zawk daih tih a hre lo a ni phawt ang. 

CONT..