HIS LAST LOVE-10

HIS LAST LOVE-10

Phone hmanga a pi te in awmna min hrilhfiah fe hnuah ka thleng ve thei hram a, veranda ah lo dingin min hmuh rual chuan a nui var var a, henu hi a mak ve ngat mai, a nuih hian a nui a ni mai a, a nih loh chuan midang a khawngaih zia a sawi ve chang pawhin a hmelah leh mitmengah te hian engmah a langchhuak ngai lo. Damdawiinah te khan ka hnenah thupha a chawi a, kha thil kha a ti tak tak a nih hmel si a, mahse keichuan a hmelah inthiam lohna ka hmu hauh lo a nih kha. Min elsen mai mai emaw ka tih phah hial a, eng thil pawh tawk se a nui emaw a ţap a nih loh chuan a hmelah hian a rilru puthmang a langchhuak ve ngai lo a nih dawn hi ka ti tawp tawh. A hlim loh hmel reng a, a hmelin pawi a sawi tehchiam lo nain danglam hmuh tur a awm lo ţhin khawp mai.

"Kan vengah hi chuan hriat ngai loh in zawn risk tawp chi a ni lo teh a sin. Bo vak a awl lutuk a, lokal rawh lo lut rawh" a lo ti zung zung a, a dinna piah lawkah chuan ui lianpui a bawk a, "Pâtea nu a nih hi" a la ti zui. Nicholas-a ui thlah tu ngei kha a nih hmel. Kei lah Pâtea ka ni ve tho si a, chutiang a nih si chuan ka nu chu Chhandami piten an lo vulh daih a nih hi, kawtah a bawk hnûr lehnghal. Ka ngaihtuahna mawl mang lutuk avanga nui deuh ţha chung chuan helmet ka phelh a, Chhandami nen chuan kan inzui lut a. Inchhungah pawh chuan ui a lo la awm cheu mai.

"Matei chuan pindanah lehkha a chhiar daih a, kan thawm a hre pha lo ang. I duhna lai laiah khan ţhu rawh. Hmul i kai maithei a nia aw" tiin min hrilh lawk a, ka ţhut fel thlap hnuah chokaah a lut a, inchhung chu a nuam reuh tak tak a ni. A lian lo nain a felfai thlap mai. 

No pahnih a lo chawi lut a, ka hmaa ka intur a dah hnuah ka bulah a lo ţhu ve a, "Min ngaina vak loin ka hria a, chuvang chuan thei tui tui deuh ka lo siamsak che a" a ti fiamthu a, Nicholas nen an inrual hmel a, kei aiin a u daih ve tho tihna a ni. 

"Chutiang engmah a awm lo" ka kutţang elh rik kauh kauh paha ka tih chuan, "Kha kha" a lo ti vat a, ka kut chu a kawk zauh bawk.

"Eng nge?" ka lo ti ha a, tim deuh dai hian, "A ţha lo an ti...kut elh rik chu a bawk duh an tih kha. Hmeichhe kut bawk luau chu a mawi lo bik ţhin si, ti tawh suh" a ti a, ka nuih a za angreng. 

"Ka ti ziah alawm...a rik pawp pawp te hian a nuam ve a..khawi, ka lo tihsak ve ang che. Kutzungpui phei chu elh loin ka pawt ri thiam" ti a ka fiam chuan a kut a hum vat a, za vak lo hian a nui zui a, Nicholas nen an inzui ve ţhin chu a ni sia aw...an chut dun awm mange. 

"Sawi tur i neih chuan sawi tawh la, midang an lo haw hman phei chuan a vir tawk chauhin min siam dawn tihna a nia" ka tih chuan nui deuh chung hian a thaw hak a, ka sawi lawk ang chiah kha a ni, a nuih ve pawhin a mitmeng a danglam chuang lo. 

"I ngaih ang kha a ni lo tih ka sawi hmasa duh. Nang chauh i ni lo, min hre tu zawng zawng chuan inngaizawng ah min ngai vek a, ka faten an lo pa veleh zel bawk nen, kan inngaizawng lo kan tih pawhin ka chhungte takngial pawn an awih hleinem. Kan ţhiante ho lahin inkawp nghet viau turah min ngai vek a, Lawma hi thudik hre tu awmchhun a ni awm e" a tih chuan mak ka ti ve deuh a, dawt i sawi tih ngawt chi lah a ni mang si lo.

"Engtin nge in inchhar a? I fate en chuan pasal i neihna a rei tawh hmel angreng si a" ka ti a, thei tui awmna no chu a malchungah dahin no tlang chu a tuai a tuai a, sawi a chak zawk zawk lo tih a hriat reng mai. 

"Ka nu leh pate hi min hringtu tak an ni bik lo a, fahrah runah ka awm ţhin a, ţum khat chu thawmhnaw tam tham tak kengin kohhran hmeichhia an lokal a, kum 12 ka ni tawh a, tun thlengin ka la hre vek thei. Ţhian ka kawm ve ngai lo a, keimahin ka awm melh melh ţhin a, kil khat a lei ka thai neuh neuh laiin tuna ka nu hian min rawn pawh a, ka hming te min zawtin min ti ti pui luam a, rei pawh awm lovin min hawsan leh mai a" a ti a, tukverh lam chu hawiin ral hla tak a thlir ni maiin ka hria, a mitah chuan danglam hmuh tur a la awm chuang lo a, a ţawng lai a nih loh chuan a chip hmak a, amah hrechiang lo chuan hmu se nelawm loh satliahah an ngai ang. 

"Chuan an lokal leh em ni?" tiin keimah zawkin ka lo zawt a, "Aw..rin loh deuhin thla khat hnuah an lo leng leh a, tuna ka pa nen hian an lokal a, nu leh pa atana ka duh leh duh loh te min zawt a, fa atan min la a, an hnenah tun thlengin ka cheng zui ta a nih hi" a ti a, Nicholas nen an dinhmun a inan hmel viau mai. 

"Nuam ka ti a, nu leh pa ka nei ve ta kha ka hlimin rethei mah ila tumah ka awt ngai lo. Ka pa hi mistiri niin a ţhat ve deuh lai kha chuan tun ang hian kan harsa ngai bik lo a, mahse a hnathawh naah a chesual a, i hmu tawh em ka hre lo, i ţhiannu pawn a hrilh tawh tho maithei che a, a kut ding lam tan ngai khawpin a awm a, pa ber ramtuileilo a nih tak hnu kha chuan kan rethei khawp mai. Fa pahnih an nei a, keimah nen kan vaiin pathum kan ni. Zirlai vek kan ni bawk nen, ka nu hian hna a thawh nasat phah a, ka theih ang angin ka lo pui ve ţhin. Kan chhungkaw lam chu duhtawk daih ang" tiin za lo deuhin a nui hul hak a, thei tui chu a lem khalh a, a heh a pet zui fan fan a. 

"Ka hrethiam alawm..sawi hrehawm i tih chuan sawi zui duh kher suh" ka lo tih chuan, "Pawl 8 kan nih laiin" a ti a, ka lam lo hawiin ka mitah min en ran a, "Pawl 8 kan nih laiin Nicholas nen hian kan intawng" a ti nawn leh sap a. 

"Ka pa hian thiamna tak tak nei turin min duh a, zirna a ngaisang a, sikul ţhaah min dah bawk. Naupang ţha ber ber kalkhawm naah ka kal ve a, a hautak hran lo. Nitin bus in ka kal a, mimal sikul, fee tam lutuk chawi ţawk ţawk ngai a ni lo na a ka zirpuite kha an hausa hlawm khawp mai. Kan dinhmun hre ranin tumah kha ţhianah ka siam duh ngai lo a, an neih ang ka nei ve thei dawn lo a, an tih ang ka ti ve thei dawn lo tih ka hriat ran vang a ni ber. Min ngaina lo thuai reng a, tuman biak en ah min en lo. Mahse, Nicholas hian min hnaih lui tlat a, hun remchang a awm hlek tawh chuan ka bulah a tap chawt a, a tir chuan ka ning viau ţhin nghe nghe a ni. Zirlaibu ka bih san daih chung pawhin min be lui zel a, keipawn ka tlanchhiatsan reng thei bik lo, ţhianah kan insiam ta nge nge a ni. Kan vengah a lo awm veleh zel a, kan kohhran a in an loh avangin ka lo hre lo mai mai zawk a ni. Ani chu motorin an thlah a, an lo hruai leh a" a tih chuan ka lo pawt chat a, "Anthony a tel ve ţhin em?" ka ti zauh a. 

"Aih..kan sikul kha luh hma a test paltlang ngai a ni a, lut tur chuan lehkhathiam nih a ngai alawm. Anthony hi chu a rilru a chak loh bakah a zir peih lo a, Nicholas nen kan inkawm hnuah pawh Anthony-an sikul a tlan bo thu a sawi fo mai. A pa'n a vuak chang pawhin 'Ka tlan bo leh tho ang, nithum daih law law min vaw rawh' a ti ţhin a ni awm e" a tih chuan kan han nui dun leh rih a, "Nicholas thung chuan zirlai aia dah pawimawh a nei lo. Ka zir vat vat ang a, kum30 ka tlin hmain ka duh ang hi zawh hman ka tum ang a ti ţhin a, sikul a lut hma a, kan class ah khan a naupang ber reng a ni" a ti a, ka lo phawk khawp mai.

"Nang aiin a naupang maw?" ka tih chuan a nui hak a, "Kum hnih chauhin" tih pahin a kut ţang pahnih min hmuh tir a, ka lo nui ve hak hak mai.

"Kan veng a inang tho a tiin tuktin min lo sawm ţhin a, sikul banah a rualin min haw tir bawk a, inthlahrung viau mah ila a tih tawh chu a ti tlat zel si a, a thu ka zawm leh nge nge ţhin. Naupangte chauh la ni mah ila kan dinhmun inthlauh zia ka hai ngai lova, kei aiin lehkha a thiam a, ţhian leh duhsaktu a ngah zawk bawk a, kan hrang hlak a ni ber. Mahse, keimahniah khan thil pakhat inang a awm, khawharna" a tih chuan ka lo hrethiam khawp mai. 

"Min hringtu nu leh pate kan hmuh phakah an awm lo ve ve a, Nicholas pawh en hranna lai tam tak an nei ţhin tih ka hria, a bikin a pa hian a naupanlai phei chuan a haw viau ţhin a, Nicholas chuan, 'A remti lo chung ka nu hian min la lui a, ka pa tak hi chuan an hnena awm turin min duh lo' a ti ţhin. A pa diktak a hriat chak thu min hrilh fo a, kei lahin tih ngaihna ka hre bik bawk si lo. Tun thlengin a pa hi tunge a nih a la hre lo" a ti a, Kungtei nen kha chuan a hriat kan ring a, mahse Chhandami berin a hre lo a tih chuan thudikah ka ngai. 

"Ka tan a awmreng ţhin a, sikul khatah kan lut dun char char a, englai pawhin kan inkawp chawt a ni ber. Kan inhau ngai lo a, hmeichhia na na na chu upa zawk mah ila a der a tih tauh chang chu ka nei ve ţhin a, min thlem ve nasa ţhin. Mahse, hun khirh a hmachhawn chang chuan upa zawk ka nihna a langchhuak a, ka fuih a, ka thlamuan ţhin. Chutiang chuan kan inpui tawn a, kan infuih a, nikhat pawh inhmu loin kan awm ngai lo tih theih a ni. Engtik laia inţan nge a nih ka hre lo, ka ţhianţhaber chu ka hmangaih ta tlat a, pawl 12 kan nih laiin hmaichhanah ka rilru put hmang chu ka hrilh ta nge nge a, 'hmeichhe dang bula i awm chuan nuam lo ka ti zel' ti a ka hrilh chuan 'ka awm tawh lo ang' a ti ve mai a, ka duh zia ka sawi takah chuan 'nang aia duh ka nei' a ti thung. Tu nge a nih ka zawt a, a lehkhabu zawng zawng chu phawrh chhuakin ka hmaah a nghat chawrh a, nui chunga 'heng ho hi' a tih khan lo nui ve hak hak mah ila ka hnual a, ka rilru a na em em bawk. Khami ni kha ka theihnghilh theih loh phah a ni" a tih chuan ka khawngaih angreng hle mai, a zahthlak dawn bawk si. 

"Pangngai takin kan inkawm zui a, ka thusawi kha hre lo ang hmiahin a awm a, keipawn ka sawi nawn lo chiang hle. Amah hlat ka tum lai takin phaiah college a kal tur thu min hrilh a, ka tello a kal a hreh lutuk khan 'ka nu dil ila lokal ve rawh' a ti hial a, an phal dawn lo sa tih hriain ka hnar zel a, a laka ka rilru put hmang a danglam phah maithei a sin tiin ka lawm ru viau zawk. A kal ta a, a theih dan danin kan in be ţhin a, a lo haw tur thu ka hriat khan ka hlim a, ka lo nghakhlel viau a, mahse min hmu tura a lokal khan hmeichhia a lo hruai tel a, an inhuat loh hmel bawk si, khami ţum khan ka rilru put hmang a la danglam hauh lo tih ka hriat phah a ni. Ka be zui duh ta lo a, a mangang a, nitin a lokal a, a chang leh khawlai aţangin min ko vak vak a, ka nu leh ka unaute hnenah 'a awm lo' ti zel rawh u ka ti a, a kal leh thlengin ka hmu ta lo a ni. Kan khawsak lah a harsa zel a, lehkhazir bansan mai tum a rilru ka siam hnuah ka pasal hlui ni ta, U Buatsaiha hian min lo rim a ching a, JE lai a ni ve nghe nghe. Ka chhungte lahin an iai lo tih a lang reng a, in upat hleih viau mah ila ka beng hriatah an fak chamchi ţhin. U Buatsaiha lah chuan 'i chhungte pawh ka enkawl vek ang, min nei rawh' tiin min ngen fo a, thil chi hrang hrang hmangin thlem takte in min thlem a, fahrah nun hrehawm tak tem rei hman lo a min siam a, min chhanchhuak tu ka nu leh pate ka rulh let ve theihna alawm tiin min sawmna chu ka pawm ta a ni. Nicholas hnenah engmah ka hrilh lo a, mahse a chhungte hnen aţangin a lo hria aniang kan insawirem hnu lawkah a lo lang hlawl a, rei tak hnuah pasal neih ka tum avang chauhin kan inhmu a, 'keimah vang a ni em?' tiin min zawt a, pasal neih ka tum chhan diktak ka hrilh a, pawnah chhuahpuiin haw turin ka hrilh bawk a, 'i rilru ang kha pu ve thei lo mah ila i tan ka awm reng ang' tiin min haw san a, ka hmu lo zui vang vang a, engtikahmah min duh let ve dawn lo tih hriain pasal neih pawh ka hreh lo sawt a, ka hmuh lehna hmasaber chu U Buatsaiha nen kan inţhen aţanga karkhat naah a ni" a ti dap dap a, a mak hle mai, keichuan Nicholas hian a atchilh bur turah ka ngai a, Ngheti min hrilh dan pawh a ni. Tumah hian an inkar a thil thleng hi an hriatpui lo em maw ni ka ti hial a ni. 

"Kan inkawm zui leh a, ka fate lahin an ngaiin pa ang riakah an ngai a, mahse i ngaih ang kha a thleng chuang lo a nia, kan inhmuh leh chuan bialnu nghet a nei tawh" a tih chuan mak ka tihna a langchhuak aniang, "Aw...a nei alawm. Engkim hrilh che ka duh si a, ka sawi tel lo thei lo a ni. A lo len ngun avang leh hna a zawm hnua kan inkawm nasat lehzual avang hian mi chuan a bialnu ni turah min ngai vek a, ka chhungte, kan chanchin hre vek tute pawh an bang chuang lo ka tih tawh kha. A bialnu nen hian langsar deuhin an inzui ngai lo a, a thawhpuite pawn keimah hi a bialnu anga min hriat vek phah a ni. Nuthlawi ka nih avangin miin min sawi duh lehzual a, thla hnih thum chhung lekin veng pumah kan thang chhuak ti ila ka sawi sual lo ber ang. Ani lah chuan pawi a lo ti lo nasa mai a, an duh duh sawi rawh se a ti mai zel a, miin min dem fiam pawhin a nui liam mai zel. A bialnu lah phaiah a awm daih a, lehkhathiam tak tho a ni a, company lianah a thawkin ka hria. Thu dik lo a thang vak a, tupawn an hriat apiang an awih a, tel ve miah suh. Kan chungchang an sawi hi dik lo a tam zawk a nia. Mahse, ka ţhian a nih vanga fak mawi tumna lam ni lovin Nicholas chu a fair a, nangmah nei tur khan engtiangin nge an thlem ka hre chiah lo nain in inneih hma khan a bialnu a ţhen tih chu ka hria" a ti lehzel a, a thusawi tin chuan min ţhawngin ka nghing ve dawt dawt zel a ni ber. 

"Helamah a bialnu a awm miau loh avangin kan inzui chawt tih chu ka pha lo a, mipa dang, ka pasal ai pawhin ka hmangaih tih pawh ka pawm thlap. Mahse, ani chu ka tana awm reng chungin ka ţhian chauh a ni a, hmangaih viau mah ila ţhian nihna aia sang min thlen pui duh lo. Kan inhriat tirh phat aţangin kan inkarah hian ramri a kham sa a, ka hmangaih avang ngawtin chu ramri chu ka pel thei lo. Ka kawppui tur ni lovin kumkhuaa ka ţhian ni tura duan lawk a ni" a ti a, a nui var var a, a tana khuanu ruat hi a pawm thiam hmel bik khawp mai. 

"A tana hmeichhe pawimawh ber i ni dawn tho a, neih luih tum la chu i nei thei tho ang. I nawmsakna tur a nih phawt chuan a hnar lui hauh lo ang che" ka tih chuan, "Nupui a neih hnu hian maw?" tiin min lo zawt let a, ka lo bu nghat a, "Bialnu a neih lai pawh chuan" ka ti sap a. 

"Ka hmangaih ber ka neih duh luat vanga hmeichhe dang ka ti na a nih chuan hmangaihna dik a ni lo a ni mai. Mi nasa ka ni lova, ka rilru a dawihin tumah ka ti na ngai lo. Ka ngam lo a ni ber. Hetiang kawngah hian ka fair ve tho a, ka nawmsak theih nan hmeichhe dang ka tih nat kher ţulin ka hre lo. Thinlung ka nei a, hmeichhe dang pawhin an nei ve alawm. Bakah, Nicholas hian ţhian ang bakin min en lo a, min hmangaih tura ka nawr lui a nih chuan kan hlim chuang lo ang. Thil thleng hi ka pawm thiam vek a, U Buatsaiha pawh a inchhir a, a insiamţha nasa a, chuvanga neih leh tum chu ka ni. Fahrah ka ni a, keimah anga ka fate an fahrah ve ka phal lo" a tih chuan, "Mahse, hmanah phone a be lai ka hre fuh a, ka ţhen dawn lo tih vel a sawi a" ka ti a, a nuih a za kher mai. 

"A ti lui a nih dawn chu. Mi a be lawr duah ngai lo a, Lawma nen an inbia aniang, i ngaithla ru tih a hria a nih dawn chu. I sual loh zia min hrilh fo alawm" a la ti zui a, ka chanchin an lo sawi vel ţhin em maw ni. 

A chang leh, "A ngaina nghal bik lo ang che. A lungawithlak loh a, a awm ve tho a, nangpawn i ngaina bik lo ang a, in tawrh ve deuh a ngai a ni mai. A khawngaih ve tho che a nia" a ti thul, a ti ti chu a mumallo sawt khawp mai. 

"Min ţhen chu a duh ve tho tiraw?" ka tih chuan atthlak a ti deuh nge min lo nuih a, "Duh chang chu a nei ve ang" a ti a, a sawi thui duh lem hlei lova. 

"Min zawh duh i neih chuan min lo be zel dawn nia. Kan venga ka awm loh hunah pawh ka phone number i neih tawh kha" tiin min thlah a, Nicholas-a chanchin pawh Kungtei sawi ang deuh tho khan a sawi a, a malna leh khawharna chu lehkhazirah a tlak a, hmeichhia a ngaihsak vak lo tih te, a pa endanin a zir loh avangin a unaute a el ru hle ţhin tih te min hrilh a, a unaute aia a ţhat zawkna pholan a tum reng ţhin a ni awm e. An chanchin than dan ropui lem loh tak chu a duh dan a nih bik loh zia a sawi nasa a, inneih naah pawh a lokal ve ngei thu a sawi. "Nicholas-a tana ni chhinchhiah tlak tak a ni a, tel pui ve ngei ka duh a, ka tel ve reng bawk a, mahse ka nui kher lo. In din dun laia i inthen reng erawh kha chuan nuih a ti za deuh a, langsar vak lo chuan ka nui" tiin fiamthuin a insawifiah a, inkhawm bana a haw nghal thu min hrilh tel a, tlai lama a hmuh kha chu a bialnu a nih a rin thu leh engmah a hriat ve loh thu a sawi a, ka ring leh hmiah mai. 

"Ka la haw dawn rih lo" a tih tlat avangin keimahin ka inkhalh haw a, a thu min hrilh ho te chu ka ngaihtuah zui rauh rauh a, Chhandami rindan kha a dik a nih chuan a bialnu hlui chu inneih hmang turin a lo haw ngei tihna a ni a, a ruka an inkawp vang nge tuman engmah an sawi lo a, a hmu ho pawn ţhian satliahah an ngai vek ang. Ka rin ai daihin min hrilh ţha duh a, min ti ti pui a duh chhan pawh damdawiin a ka awmdan avang khan a ni. "I pasal ţhianţhaber ka ni a, inhmuh a ngaih hun a awm lo thei dawn lo a, engkim ka hrilh vek loh che chuan midang ang thoin ngaihdan dik lo i nei reng dawn a, kan chhungkua hi ngaihsan tlak kan nih loh rualin hmeichhe nunhniam leh lepchiah chu ka ni bik lo" a ti a, ka zak khawp mai. Mi hi an landan a teh ngawt chi an ni lo a, midang thusawi aţanga ngaihdan lo siam ve ngawt chi a ni lo tih te, nuthlawi kan endan a dik loh zia te ka hriatchhuah phah a ni. 

In ka thlen chuan Kungtein inchhung a lo ti fai a, min hmuh rualin "Thingpui i duh em?" a lo ti var a, a bengvar reuh si, he nau hi chu duhsak loh theih a ni lo. 

"Duh lo e...ka len naah ka in a" ka ti a, pindan lam ka pan zui nghal a, Nu Hlimi hmuh tur a awm loh chang hi chuan a thawventhlak ţhin. Chhandami khan, "An sual deuh pawhin ţhat chhuah lui tlat a, an sual reng peih lo ang" a ti tak nain kei hi chu ka dawhthei lo a, an awm ang chiah a awm ve te, runluih te ka chak et et ţhin. 

Mapuia pawn min lo be leh ngei a, ka thu hriat te khan rilru an luah hneh deuh avangin ţum dang angin ka be tui vak lo, "In pa nen khan in inhau nasa em? A ngaihven vak lo che emaw ka tia, zanah chuan hun remchang a awmin nangman min lo be hmasa ţhin rawh" a tih chuan, "Inhau nasa lo e...ka mut san daih alawm. Ani pawn a hre leh tawh teuh lo mai" ka ti a, kan inneih dawn avang maia a bialnu a ţhen chu mak ka ti a, Chhandami aia a thlan zawk lehnghal, an inţhen tak tak ka ring chiah lo a ni. Fair tih thuah phei chuan mipa hi chu an fair rei thei tak tak lo. Nupui nei reng chunga hmeichhe dang biak ching ka hre hnem mai, an intih hmuh emaw tih zawk tur a ni. Pathlawi ho lah hi an hrang a, tawn hriat an nei tawh a, hmeichhe hneh dan lah hi an hre bik riau emaw tih tur a ni a, tlangval ai maha luck zawk an tam ang. Mahse, pathlawi hmelţha leh tlem a changkang, pawisa nei ve deuh lo chu an luck vak bik chuang lo. Ka pasal pawh hi a bang chuang lo, a tlangval lai pawn duh der tu a nei ve reng niin Chhandami khan a sawi a, pathlawi pawh nise hmeichhe tam tak chuan an iai hauh lo ang. Ţhen pawh ni ila inthiam lohna a nep deuh ang. 

Pindan chhung ka tihfai laiin a lo haw a, engmah sawi lo hian closet a pan a, a chul thuak a, a fai leh fai loh hriat tum ni awm tak hian a kut phah a en zui vung vung a, ka va han ngei ţhin tak. 

"Che fel ber awm ang zia zanga khatianga i tih vel le" ka tih chuan min lo nuih suk a, "Phul hlut zel suh ka fiam che a nih kha" a ti a, a kawr a phelh zui nghal a, chhuat chu ka nawt sawk sawk a, a hriat tham loh tur hian ka phun reng bawk a, zawhna ngah viau mah ila a duhzawng a nih loh chuan min chhang leh duh chuang lo ang. 

"I sual i chhuah tawh dawn lo em ni a?" ka ti ta thlawt a, chhuat nawhna fawng hum ran chung hian khum zawn tukverh bula a ding chu ka melh a, "Vau zam theih i ni ve hleinem, pasalţha i ni miau a, i nihna ang ang a pawm theih che ka tum mek a nih hi" ka ti a, a nui nain a thusawi chu ka awih tho mai. Ani hi a bialnu nen an inţhen tak tak em maw ni?

"Bialnu i nei lo em ni?" ka tih ve zaih a, "I hriat kha" bul zet hian a ti a, a hawi sawn daih bawk.

"Chhandami hi i bialnu ni se chu a pasal hlui hi neih leh a duh hauh lo ang. Min duh vanga min nei i nih loh kha hrereng la" ka tih takah chuan ka lam lo hawi vutin ka ke ler aţangin chik deuhin a en chho dan dan a, ka mitah a tawp chat a, "Tunah pawh ka la duh hleinem che" tiin a kiai deuh suk a, ka inthup peih lo, a hmuh tur chuan ka ner nang mai. 

"Keipawn nupui ka nei alawm, a nei ve bawk ang chu" a ti then a, a bialnu diktak zawk chu sawichhuah a tum lo ve hle mai maw. 

"E...kei chuan pasal ka nei tak e, pa nih pawh i tlin dawn e" chimawm zet hian a ti a, kan inneih hlim khan hetiang hi a ni ngai si lo, tuna a zia hi a hmuhchhuah thar nge a mize diktak zawk ka hre lo, mahse kan inneih hlima a zia kha ka duh daih zawk. Fiamthu a duh lutuk an tih te kha ka awih rum rum tawh mai. 

"Khatin min ti vel suh aw. Englai pawn ţhen che ka zak chek chek reng a nia" ka tih lai chuan kan pindan kawngkhar a ri bur bur a, tu emaw chu a thinrim chiang a ni. 

Ka va hawn rualin Faith-i a lo pen lut a, sofa a thawmhnaw ro ka dah ho chu a hai buan buan a, a tam zawk phei chu chhuatah a tla nghe nghe a ni. 

"Dim ve deuh ta che..chhuat a la hnawng lehnghal a a bal anga sin" ka tih chuan, "Inchunga puan pho zawng zawng nangman i seng vek a, ka kawr pahnih a kim lo alawm. Hmeichhe kawr i duh viau te chuan Hope hrilh mai ta che" a ti chu ka lo nui hul hak mai. 

"I thawmhnaw ka laah i ngai em ni a? I kawr khan dul a khuh pha lo deuh vek a, engatanmah ka ti lo. In pindanah ka dah vek, va zawng ţha leh rawh" ka ti a, thinrim zetin ka lam a lo hawi a, kan inhmachhawn ran mai. 

"Ka zawng a ka hmu hleinem. I thawmhnaw leh ka thawmhnaw pawh i hre hrang lo aniang chu. A hranpain in thawmhnaw bik i su ziah tho a, i hriat hran loh chuan thawmhnaw ro pawh Kungtei seng tir mai ta che. Inlak fel viau pawh a ngai lo min tibuai" a ti tan tan a, a va han nasa reuh tak. 

"I thawmhnaw tih tlak kha chhar la, chhuat bal a kai a nih chuan tunah su nghal ang che" tiin Nicholas a lo inrawlh a, Faith pawh a meng zau kawk mai. 

"Ka thiam loh a nih loh hi. Ka zawng char char a, Kungtei nen pawh kan zawng nasa lutuk, kan hmu hleinem" a ti a, ţah a tum leh tawh aniang a aw pawh a dik tawh lo. 

"Chutiang mai mai thinrim na tham a tling lo. Saii hi i zuam mah mah a, a dik lo" a ti a, ka thlavang a hauh ve chu kei ngei pawhin mak oa ti takzet a ni. 

"Henu hi in ţan bik hrim hrim. Ka thawhnaw bo hi ka pa'n a man to chi min leisak a nia, vawikhat bak ka la ha hleinem" vui awka deuha a tih chuan, "Ka sawi ang chuan ti mai rawh" a lo ti leh hmak a, a mittui a tla chu a ni mai. 

"Ka ti awm lo" ti a kal mai a tum chu a lo dang vat a, Faith chuan a biang tuai pahin a u en tum chuan a dak deuh vah a, Nicholas pawh chuan a lo en ve ran a, a lungawi loh deuh phei hi chuan a luhlul hmel lehzual ţhin. 

"Ka pa ka hrilh vek dawn a nia" Faith-in a tih chuan, "Va endik la, a bal a awm chuan tunah su rawh. Kan duat lutuk cheu a in dik lo zo tawh a nih hi. Lal emaw in inti ringawt mai" a ti a, a ţawng zawi viau nain a khauh angreng khawp mai. Kum 20 pawh an la tling lo a, an la nau ve deuh bawk nen, kan duat che u a tih hi dawt a ni lo, kehthei dawm takmeuhin an dawm a ni ber. Anni lah phir an nia, lian ve uaih tawh mah se an hmel a ţha a, nu leh pa tan phei chuan an la lawmawm tho maithei a ni. 

"Engmah a bal lo" a thawmhnaw chhar khawm ho chu sofa ah dim vak lo hian a theh thla hnawk a, rum zet a min melh leh nghek hnuah inher hmakin pindan aţang chuan a pen tau chhuak nghawng nghawng a, a hnung lam chu enzuiin Nicholas pawh a nui ruh ruh mai. 

"I nau rangkachak hi chuan engtikahmah min ngaina dawn lo a nih hi" ka ti halh a, chhuat chu ka nawh zawm a, nawh tur a tam lem loh avangin ka zo thuai a, chhuat nawhna vel ka dah fel hnuah thawmhnaw ro thleh tumin sofa ah ka ţhu a, ka hmaah a lo ţhu ve nghal zat a, tun hnai phei chu ka bulah a awm tam riau. 

"A la naupang a, hrethiam rawh" a tih chuan Faith-i chungchang a sawina a ni tih hriain, "Kei aia a naupanna a tam lo emai" ka ti hlak a, thawmhnaw tlem te chu a la ve a, a malchungah a dah a, min thleh pui dawn a nih hmel. 

"Kan duat a awmdan an thiam lo a nih hi" a ti leh a, mahnia awm ţhang tih takah thawmhnaw thleh mai mai chu a thiam khawp mai. 

"Nih chu" tih ringawtin ka chhang a, a lo thaw ri nghal hawk chu hre tho mah ila ka ngaihven peih lo. 

"Nau tak tak angin en rawh" a tih leh takah chuan a ţhutna lam chu ka hawi vat a, "Liantei i en ang chiaha i en ve theih chuan a tibuai reng peih lo ang che. A ngaina vat mai ang che" a lo ti leh a, ka ner leh nasa tawh. 

"Ve lutuk che hian..Liantei ang chuan en ila nitin kan insual ang chu. Kha, i pa a hrilh dawn lehnghal a, an hau ngei ngei ang che" ka tih chuan a nuih a za kher mai. 

"Min nei hi i inchhir em?" a ti ta daih a, a uang han ti dawn ila a hmel chu a thutak angreng phian bawk si, "Inchhir mah ila awmzia a awm hleinem" ka ti ta ringawt a. 

"A dik, awmzia a awm lo. Chuvang chu alawm ţhian atan ka sawm che. In nel ila, inpawh bawk ila, kan innei reng thei lo a nih pawhin inneih chhung tal chu nuam deuhin hun hmang ang" a ti deuh duah a, Nicholas pawh a ang lo zawk alawm le. 

"Nangmah i ni lo" ka tih chuan a lo nui leh hawk a, "I nem ve deuh chuan a mak tlat zel. Min ngaina ngai hlei loin ţhian nih i duh thut te hi mak ka ti. A chhan tur awm ang ka ngaihtuah ngial pawhin ka hrechhuak thei lo a, min hman ţangkai i tum leh tawh a nih ka ring ber" ka tih chuan a hmel a inthlak hlawk a, hmuh a nawm leh tawh loh chu thuhran, min hua emaw tih tur a ni leh tawh. 

"Ţhat ka chhuah zawk a nih hi" a ti nghat a, "Chu tak chu lawm mak ka tih" ka hnung thak hiah pah hian ka lo ti a, a va han thak hun lo tak. Ka vun ro lutuk hi chu ka buai phah ve fo mai. 

"Naupang ang maia titau a, mi hnial pang pang rual ka ni ve tawh lo" a ti kha kha a, "I duhzawng ni lo nupui a neih reng te chu a peih pawh i peih em ni?" ka lo ti ve thung a, Chhandami thu min hrilh te avang khan ka hmuh dan a danglam deuh nain ka ring zo hlawl lo a ni. Mi rin ka harsat ve hrim hrim a, inchhir leh ai chuan belhchian fe hnua rin chauh ka duh zawk ţhin. 'Mi ka ring hma a, ka ring sual ngun reng bawk a' ti ţhinte hi an â ka ti. Tihsual zeuh chu a awm thei a, mahse tisual reng hi chu an ât vang a ni mai. Rilru ţhat vang a ni pawhin ka hre lo. Mahni kan inven ve nan midang hi ring zung zung lo ila a ţha a ni mai.

"Peih lem nang..ka neih tho che a ngai rih chu a nih hi" a ti liam satliah a, thil hi a ngai ho lam a, a ngaih a sam ve hrim hrim ni berin ka hria. 

"Ka chanchin i hre thui em? An hrilh ţhin che em?" ka tih chuan a hmui peh sawih zauh pah hian lu a thing a, "Tual pawh lo that tawh la i bula ka awm reng tho a ngai tihna a ni tawh ber a" a ti ban charh a, a ţhutna aţanga a thawh dawna a nui hmel chu ka hmu hman a, hma hun nei tawh lo, a duh anga nung ve thei tawh lo turah a inngai ni berin ka hria.

CONT...