HIS LAST LOVE-11

HIS LAST LOVE-11

"I lo va kal tlai ve..i chhungte ngaihdan a ni lo anga sin" inchhung ka pen luh rualin ka nu'n min lo hau nghal pang a, ka ngaipawimawh duh lem lo. Ka chawhnu a, ban veleh in a haw tlang loin kan in lamah ka haw ta zawk a ni.

"Tukinah Nicholas ka dil a, a phal vek alawm. Chaw ei khamah ka lo hruai ang che a ti" ka tih chuan ka unaute nen an in melh ralh ralh hlawm a, "I pa'n a hau ang che" ka nu'n a lo ti leh a, dar ka lo kân ak a, "Ka pasal berin a phal te chuan" ka ti liam satliah a, ka che vel chu min en reng hlawm a, mak an ti deuh niin ka hria. Keipawn a phal mai kha mak ka ti deuh a, ka chhungte ka ngaih zia ka sawi chhuak satliah a, "I duh chuan chaw ei phei la zanah ka lo hruai ang che" a ti ve ngei a, ţhat chhuah a tum ve tak tak a ang ber. 

Ka pa lo haw chu a lawm lo tak tak a, "Pasal nei i ni tawh a, mahni in lama kal reng hi a mawi pawh a mawi lo. Chaw i lo ei duh a nih pawhin ţha deuhin in pa hrilh la, in pahnihin lo ei mai ta che u" a ti khar khar a, ka pa hi chu ngainat luih harsa ka ti riau tawh. 

"Kal rawh min tia ka lokal a nih hi. Khaw khata awm ve lem inhmuh loh reng te chu nuam pawh in ti em ni?" ka ti let a, ka pa chuan pindanah min luh san a, ka nu thung chuan min zilh malh malh mai.

Kan chaw ei pawh chu boruak a nuam tehchiam lo, ka pa a tum hmuk reng a, hetiang chuan ka pasal hi ţhen mah ila inchhung nuam ka ti tawh kher lo ang. 

"Nidangah chuan inpa telloin lokal tawh suh" ka pa bawk chuan a ti leh a, "In mak ve e..a hre vek tawh alawm. Chaw ei chhung tal te chu hau lo ula, kan inhmuh khat tehreng nen inhmuh ve chhuna inhauh char char te chu a" Zikpuiin a lo ti hlauh a, "Tunlai mo ţhenkhat awmdan hi dik hek lo mawle. Kan in lamah an ti ţuau reng hlawm a, pasal neih hnua mahni in lama kal reng te hi a zahthlak tih hriat tur. Min chawimawi lo emai" a ti a, chhan loh ka tum zet nain, "Chutiang a nih chuan ka lokal tawh lo ang. Inţhen mah ila hetah chuan ka lo haw lo ang" ka ti ve hmak a, min melh khui a, ka hlau peih tawh bik lo a ni. 

"Inţhen kha sawi reng reng suh. Mipa aiin hmeichhia hi in chan a chhe zawk zel a, tuna i pasal ai ţha hi i hmu tawh lo ang. Ka thusawi ah khan han huat viau tur pawh a awm lo. Mahni in lama kal sek a mawi lo ka ti mai alawm" a ti a, midang an ngawih ţhap laiin keichuan, "I sawi peih em a nih kha. I vawikhat sawi naah khan ka hre vek. A ninawm em em lutuk mai. Phalna nei lovin ka lokal tawp bik nang" ka ti hlak hlak a, "I rapthlak pang pang ţhin mange aw" a ti vang vang a, ka nu'n min khap lo se chu ka ţawng duah ang ka ti a nia, an thil tih danah hian ka lawm bik reng reng hleinem.

Dar7 velah Nicholas a lokal a, ka pa'n a lo be luam a, thingpui te an lum sak leh vel avangin a ţhu ve ta reng a, Liantei nen phei chuan an inkawm thei phian mai. Kan haw tur pawh an vaiin min thlah a, kan tlanchhuah hnua ka hawi let pawhin kawtah an lo la ding ţhap a, ka hmelhriatte in kan tlanpel zut zut si a ka lung a leng ve reng. 

"An lo hau che em?" kan inchhung boruak hre ve ni awm taka a tih chuan, "Hau ang chu mawle. Mi hauh te chu an nuam tih ber alawm" ka ti hlar a, a lam ka hawi rual chuan min lo en ve zawk a, hmalam a hawi lehnghal daih nain a nui tih ka hria a, ka lawm tehchiam lo. 

"Kan inchhung boruak nuam lo ru deuh hi i lo hre sa reng tiraw?" tukverh lam hawi paha ka tih chuan, "I pa'n a lawm vak lo che tih chiah ka hria" a lo ti sup a, "Eng nge a chhan ni ang le? Min hmangaih viau ţhin kha a ni si a" ka ti vang vang a, thil inlum leh chhoh dan hi hriatthiam ka tum poh leh ka bo nasa ting a ni mai. 

"I tello a a awm theih loh hun nghak ve tawp rawh..keimah ang hian" awlsam zet hian a ti a, ani hi chuan a chunga thil thleng zawng zawngte hi a pawm thiam tawh chiang a ni. 

"Ka nu leh ka unaute an awm a, keichuan hmu duh tawh lo mah ila engahmah a ngai lo ang. Ka puihna a mamawh ve lo tawp ang" ka ti zuai raih a, chhungkaw boruak a nawm loh chuan tupawn hrehawm kan ti vek a, en hran bik ni a kan inngaih ngat phei chuan hrehawm kan ti lehzual ţhin. Chutiang chu tuna ka awmdan a ni. 

Kan veng kan thlen dawn hnaihah chuan motor a tlem tawh bawk a a ti aniang a tlan chak zual sauh a, ka hlau lem lo. Phone ka phawrh chhuak a, Mapuia message pawh a lo awm leh vang tawh. 

'I haw tawh em? I va reh ve' a ti a, chhan let ka tum lai chuan motor a ti ding thut a, kei a inring hman lo chu hmalamah ka bu dawrh a, tlem a tlemah ka intauh na lo chauh a ni. 

"I va mawl ve" ka ti vin hlar a, ka thinphu lah chu a rang em em mai lehnghal. 

"I phone ah khan mahnia nuih theihna khawp eng thil chiah nge awm a?" a ti a, kei ang em chuan a vin lo nain a thin a rim ve ringawt a nih hmel. 

"Eng thil pawh awm se i lo buai ve na tur a awm lo. Inrawlh ve phet i tumna lamah ka intauh na ţhelh a nih kha. Ka phone a nia, ka duh duh ka dah ang" thinrim zeta ka tih laiin a lo nui suk duh lek chauh a, "Mahni lo maha rilru buai ve lai laiin ka thlawk chhuak lo chauh alawm. Min ti phu nasa lutuk" ţhut ţhat paha ka tih chuan, "Ka intauh na ţhelh i tih zawh chiah kha, i thlawk chhuak lo tawp ang" a lo ti ve zat a, ka nun a a inrawlh peih sawt lutuk hi ka kham takzet a ni. 

"Engpawh ti ila lo inrawlh ve tawh lo la a ni mai. Ka nuih a za a ka nui a ni ve mai a, mi nui mai mai pawh lo ngaihmawh viau te chu a...in en let nasa viau rawh" ka la ti pang pang a, "Inchhung boruak a nuam lo i ti zo chiah a ni lawm ni? I ţhut ngui bur kha...doctor tarmit-a kha i be leh tawh zawk em ni a?" tiin min lo zawt let a, ka ngawi hmak tawh. 

"Ka ring dik a nih hmel" a ti leh sup a, kan tlanchhuak leh chu kan inbe tawh lo chiang khawp mai. A ngaithei lo em em hi mak ka ti hran lo, a nupui ka nihna angin mipa dang ka biak a duh lo tihna a ni mai. Bakah, Chhandami khan a fair zia a sawi luam a, mi be kual duah chi a ni lo tak tak a nih ka ring. 

"Mapuia chu lo be ta pawh ni ila i tan a pawina vak a awm em ni?" tiin ka zawt leh ta nge nge a, "Pawi lo ve" a ti ve tak nain vei nei a ang lutuk tlat. 

"Nih chuan ngati nge i huat viau zel a?" ka ti a, "I thlavang hauh leh a ngai ang a, hna min siam ve zel" a ti deuh hmuk a, ka thlek vang vang a, hmalam a en ngar lai chuan, "Min duh vang a ni zawk lo maw?" ka tih chuan a nui hawk a, hmui a chip leh vat thung. Engmah a sawi lo ve tehmial a, ţum dang zawng aiin a thutak emaw tih mai tur a ni. 

"Mapuia hi i thik deuh em ni a?" ka ti leh a, amah chauh lo chu thil dang ka en tawh lo hrim hrim. 

"Khaia! Ngah nge chutiang te a i lo ngaih a? Ani ang kha thik thamah ka ngai lo" a ti ve tak nain ka awih tawh hauh lo. Ka ngaihtuah ngial a, thik lo se chu ka biak apiangin min ti buai peih lo vang. 

"I thik aniang chu Mapuia ka biak apiangin min lo ti buai ziah alawm. Kan chhuak tur te thla i lo lak ruk tir a, thik lo ang khan awm vel lo mai teh" ka ti a, thla hnih leh tlem chiah kan la cheng dun a, ka mipa biak ţhin a thik ta mai hi mak ka ti letling zawk, Chhandamin a bialnu ni a a sawi kha a duh tak tak lo em maw ni tiin ka ngaihtuah phah hial a ni. 

"Aw, ka thik angah chuan ngai la ngawi tawh teh. I aw a beu si, ka lu a na vek tawh" a lo ti hluk hluk a, "I thik alawm" rang deuh a ka tih hnuah tukverh lam ka hawi a, a thikthu a chhe ve hle mai. Ka duh lo che ti chung rengin Mapuia mai mai pawh a thik thei tho chu a nia, min duh phei se chu a hlauhawm zawk ang. 

In kawta a din rualin ka chhuk a, nu Hlimi te hrilh lo a kal ka nih avangin keimahin ka lut hreh ve deuh a, garage a motor a dah chhung pawhin kawngka bulah ka ding a, inchhung thawm engmah ka hre thei lo a, chaw ei khamah bo nghal diak zel mah se zanin chu min lo nghak ţhap ang ka ring.

"Lut ta che" ka lam pana lokal paha a tih chuan, "Mahni chuan a nuam lo ve alawm. Chanchin lo hrilh lawk nachang i hre leh awm bawk si lo" ka tih chuan a ner suk a, min chhang peih lo aniang kawngkhar a pawt hawng a, lut ta mai lo chuan a ding leh daih a. 

Ka lam a rawn hawi chu mak ti ru deuh chung hian ka lo en ve a, ka bo leh lutuk chu aniang, hahthlak tih hmel zetin a thaw hak a, kawngka lama thlek buk pah hian, "Lut ta si che" a ti thum dût a, inpuiah awm an awm a nih phawt chuan a ţawng ri chu an hre pha vek ang. 

Rin ang ngeiin an lo ţhu ţhap a, Anthony leh Kungtei chiah an awm lo a, min lo nghak tu te chu an zahawm khawp mai. 

"I kalna tur i sawi si lo a chaw kan lo chhum kep vek che alawm" Nu Hlimin a lo ti a, a awka chhuakah chuan a lungawi loh ziah a hriat theih. 

"Nia..ka hrilh hreh cheu a, Nicholas chiah hi ka hrilh tawp a" ka ti daih a, diktak chuan an phal loh ka hlauh avanga hrilh lo ka ni zawk. 

"I nu tak tak angin min en thei lo mahla i nu ka ni tho a, min hrilh hreh nachhan tur a awm lo. Min pawh la, ka hnenah engkim sawi ţhin la, in in lama len phei te chu ka phal lutuk ringawt. Tlanchhiat tum ang maia a ruk a rala kal kher a ngai hleinem" a tih chuan, "Keiman ka hrilh cheu kha a tawk in ti lo mi? I duh khawp lo deuh a nih leh nidangah chuan min hrilh tawh rawh ti la a zo der a ni mai alawm" tiin ka pasalin min lo chhan khalh a, a lo hrilh ve ngei a nih dawn hi. 

"Lo ţhu rawh u" Pa Chhawnan a tih chuan thuawih deuhin an ep chiahah kan ţhu ve mai a, "Nicholas te unau hi khawiah pawh kal dawn se kan awm remchan chuan min hrilh hram hram ţhin a, chu chu kan chhungkaw tih dan phung ve a ni a, kum a upa tawh tih te, ka puitling tawh tih te hi chhuanlam tlingah kan ngai ve vak lo. Nu leh pa kan la dam a, chhungkaw khaiding tu kan la ni ve rih a, kan thu ang diak diakin kal rawh u kan ti lo nain fate hian min palzam lutuk lo se kan duh a" a ti charh charh a, thu min pe a ni ber. Inchhungah thu a neih hmel viau a, a thupek pawh a khauhin zawm loh palh a hlauhawm khawp ang. 

Ka thiam loh a ni ve tho bawk si chuan, "Ka hrilh zel tawh dawn cheu nia" ka ti a, Nu Hlimi lah chuan, "In runluih hi ka duh lo" a lo ti leh hmanhmawh a, ka runluih lai awm ka hre hauh lo. 

"Tumah ka runluih ngai lo che u. Ka inthup ve ţit ţet lo va, ka nihna ang angin ka langchhuak tawp a, in beng leh mit ti kham zawnga ka lo awm a nih pawhin ka thiam loh a ni hran lo. Ka mizia ve a nia, tihsual ka neih chuan ngaihdam ka dil ziah che u alawm" ka ti a, ka thiam loh a nih phawt chuan tumah ka chhang let ngai lo reng a ni. 

"I chapo lutuk a nih kha" Faith-in a lo tih chuan, "Kha kha chu i ngaih dan dan a ni mai. Mahse, keichuan ka chapo awm ka hre lo. Mihring, Pathianin angkhata a siam ţheuh ţheuh chapo thei kan awm hleinem. Inphah hniam duai reng ka tum lo nain chapo pawh ka inti chuang lo" ka ti a, rapthlak min ti a nih leh a ţha ting a ni mai. He inchhungah hi chuan a inla hlauhawm thiam apiang an nuam sa ni maiin ka hria. 

"Chhungkua chu inpawh tlang taka awm tur a nia, chuvang chuan kan fate chungah pawh kan fir a, tumah kan innamnul tir ngai lo. Engkim sawi ho ila, kalna tur kan neih pawhin inhrilh thlap zel ila, chhungkua chu inkawmngeih te a ţha a" Pa Chhawnan a lo ti leh a, midang angin min khei deuhin a ţawng ve lo a, ka chhang let ve lem lo. 

Pindan a kan lut chu darthlalang hmaah ka ţhu tum bar a, tunhma a ka nun leh ka nun hman mek inthlau hi a mak tih pawhin ka sawi peih tawh lo, a rapthlak a ni mah zawk. Kan in lamah lah ka pa berin khati khawp khan a lawm lohna a lantir a, helamah lah ka tihsual an chang ran hlawm vek bawk si, ka chep ngawih ngawih a ni ber. 

Ka ipik lutuk chu ka thaw chhuak halh a, inbual ka duh avangin ka sana bun lai chu ka phelh zui mawlh mawlh a, "Tarmit-an a be duh che a nih hi, chhang rawh" hnunglam aţanga a rawn tih rual chuan ka hawi let vut a, ka hnungah a lo ding leh reng tawh chu niin. Khuma ka phone dah chu a keng vu lehnghal.

"Khawi lo la rawh" tih pahin ka tho a, ka phone lak mai ka tum chu ka kutah a lo man a, a keng kang leh daih tawh. 

"Ţha deuh a ka hrilh lai che hian ti tawp ang che" a ti nghat a, phone chu min pe in thlang lamah a chhuak ta daih a, a thik viau tak tak em maw ni?

Mapuia lah chu a reh zui vang vang a, a lo call leh lawk loh avang chuan keimah zawkin ka call a, min chhang rang khawp mai. 

"Ka nute in ka thlen veleh ka lo bia ang che i tia i reh zui vang vang sia" tiin min chhuahchhal nghal a, zan lamah hi chuan hun awl a ngah a, ka awmna hmunin a zir lo viau chung pawh hian min biak a chak et et zel. 

"Aw ka tihpalh a nih kha..ka unaute nen kan inhmu lo rei a, sawi tur an lo ngah lutuk a" ka ti daih a, ka aw a dik lo ve deuh nge ni dawn, "I va chauh hmel ve, thil thleng a awm em ni?" a ti a, a aw aţang pawh chuan a ngaih a ţha chiah lo tih a hriat khawp mai. 

"Awm nang...duty zawhah ka tlang nghal a, tunah in ka thleng leh chiah bawk sia ka chau ve deuh a nih hi" ka tih lai chuan thlanglam tukverh chu a ri khap a, ka va hawi phei chuan Nicholas a lo ding leh run tawh. A mi melh a na in tunah pawh min melh deuh khui a, a hriat laia ti tawp turin min beisei deuh niin a lang. 

Tukverh lam pan a kal phei hlawk hlawk pah hian, "Lawk aw Mapui...he lai a hi bâk lianpui a awm..tukverhah a uai nelh nelh mai" a hriat tur ngeia ka tih chuan lungawi lo tih hriat zetin a hnar a tum dat a. A âwmah ka nam vak a, thlanglamah chuan ka chhuak ve ta daih a, ngawi reng mah ila kan in en reng tho avangin kan sawi tum chu kan inhre tawn thei tho ni maiin ka hria. Mapuian, "Bâk maw? A ni dawn mi? In inah lehnghal" a lo tih ve lawm lawm pawh chu ka chhang lawk lo reng a ni. 

Anthony-a pindan zâwna ka din hnuah, "Ka hnawt kiang tawh" tiin a dinna lam chu ka va melh a, hmuh tur a lo awm tawh lo a, ka thaw huai mai. 

"In pa a awm em?" ti a min zawh chuan a awm thu ka lo hrilh vat a, "Ka lo biak che hian a ti hrehawm ţhin che em? A runluih ţhin che em?" a ti mawlh mawlh a, ka nuih a za ru angreng. 

"Kawhmawh bawl rual a ni tawh hleinem. Ho deuh angin a awm ve tak na a a puitling a, a fing ru kar tho" ka tih chuan a nui hak a, "Kan inneih hlima a mizia leh nungchang ţha lo zet mai kha chu a bo tawh a" ka ti leh a, a awm lo tih hrereng chungin a dinna lam bawk kha ka en leh a, thawm pawh a rawn nei tawh lo. 

"In pa pawh i chawk ho zo vek tawh aniang a" tiin min lo fiam a, hei chu a tir aţanga Ngheti rindan sa a ni. 

"A mizia ve hrim hrim a nih hi..kan inneih hlim khan a inthup mai mai zawk aniang, tunah chuan tlemin kan in nel deuh tawh a, ka hre ţha duh lo nain boruak chu a hma aiin a zangkhai zawk chiang a ni" ka ti sap sap a, induh ve deuh ka la duh si a, ka thusawi chu a lo hriat ruk ka hlau khawp mai. 

"A nih chu" a ti ban charh a, "Ngheti khan bialnu a nei a tiin ka hria a" a tih zawm leh a. Min zawt pah deuh ni a ka hriat avangin, "Aw..a nei chu an tia, kan inneih ni pawh khan a lokal ve a, tlai lamah a ni thung a, phaiah a awm reng ţhin a, tunah pawh a awm leh daih tawh maithei a ni" ka ti a, a chanchin tlem te chauh ka hria a, a hming phei chu ka hre lo hrim hrim.

"Nuthlawi tiraw khah?" ti a min zawh leh chuan, "Ni lo e...nuthlawi kha chu a ţhiannu a nia, Chhandami kan tih ţhin kha, a hming chu i hre ngun ang" ka lo ti a, ka hmuh dan a danglam vek tawh a, fel ka ti tawh lutuk tlat. 

"Aw..hria e, kha kha a bialnu inti emaw ka tia, ka hresual a nih dawn chu" a ti a, "A ni maithei, Nicholas pawh hian ţhian atan min sawm fo a, mahse ka tihsual loh nan ka enthla rih a, inhauh reng ai chuan ţhian nih chu kei pawhin pawi ka ti tawh lo. Tunah rih chuan haw leh mah ila nuam ka ti dawn chuang lo a, he inchhungah tal hi chuan nuam deuha awm ve ka duh" ka ti a, ka pasal chanchin ka sawipui vak hnuah, "Thutlukna chu i siam tur alawm" a ti bauh a, ka inthiam lo leh hnuhnawh chuan, "I mu tawh em? Eng nge i la tih?" ka ti ţha leh vel a, a zahthlak thei ngawt mai. 

"Mu tawh a ka la muhil lo" a tih lai chuan ka lo pawt chat leh hmanhmawh a, a sawi duh pawh a sawi zawh hmain, "Ka buaina ringawt ka sawipui che a, ka pasal chanchin hlir a la ni zui a" tiin thupha ka chawi a, a pawi loh thu min hrilh nasa mai. Ani hi chuan min hrethiam zel a, ka thusawi apiang min zawm ve zel thei a, ka sawi duh zawng chu nuam ti âwm takin min sawi pui ve mai ţhin. Ka khat liam deuh chang phei chuan ngaithlatu ţha tak a lo ni ţhin. 

Mapuia nen kan inbiak zawh hnua ka luh meuh chuan pindan chhung chu a lo rimtui vang vang tawh a, kan inbe rei bawk a Nicholas a lo inbual zo hman a ni ngei ang. Rin ang ngeiin darthlalang hmaah dingin uluk fahranin a taksa chu a thlek a, towel a veng ran bawk a, nui tet tet chung hian ka melh ralh a, min hmuh rualin darthlalang chu a kalpel ve chauh a ni. 

"Nangmah leh nangmah hi innei tawp mahla i lungawi tawk em em tho ang ka ring" ti a ka fiam chuan, "Mahni leh mahni innei ang vel tho ka ni" a lo ti nghat a, a dik ve tho mai. Kan inbe khat a, zanah lah insi loin kan mu a, mikhual ang mai kan ni. 

"I inhmangaih a, i landan lah i sawisel hran lo tih a hriat reng a, a tawk mai alawm" ka tih chuan, "Mi engzat nge i fawh tawh?" tiin zawhna maksak zet min lo zawt mauh mai a, ka dang lek lek a ni. 

"I uang a ni lo maw?" ka tih lahin, "Uan loh hi" a ti hmuk a, dawt a sawi lo, a thutak miau alawm. 

"Tumah ka la fawp lo" ka tih rual chuan closet lamah a inher hmak a, eng nge maw a ngaihtuah ni? Mipa la fawp lo nih hi ka zak hauh lo a, keimah ang rualah hian kei ang chiaha hul ve an tam lutuk tlat. Nula senior hul har deuh deuh pawh ka hre nual mai. 

"Nang ve? Bialnu engzat nge i neih tawh a? Nupui i nei ta mai hi tuar fe fe an tam viau lo maw?" ti a ka zawh chuan, "Ka sam zai vel lek aniang" a ti a, a nuih a za tih hre turin a hmel ka hmuh kher a ngai lo. 

"I lo khawro ru viau lo maw?" ka tih chuan, "Ka hrawk leh sam hi chu a ro ve ţhin" tih pahin min lo en a, ngaihawm deuhin a nui zui a, tuna a nui hi chu a mawi bik riauin ka hria a, ka hmu sual ta mai emaw tih tur a ni. 

"I insawithei ve deuh tihna a ni maw Remruatsak?" uang zeta ka tih chuan, "Ka sam zai hi a mal malin i chhiar seng angem?" tiin a sam khawih pah hian min lo zawt a, nui kar kar chungin lu ka thing a, "Ehe..ka lo va ngah tawh ve" a ti hlut a, mak ti âwm deuh hian a awm vel a, a duh chuan a fel reng si a, sual kha han chhuah kher lo se ţha tur. 

"Hmeichhia hian i englai ber nge an duh ţhin a? Keiin ka hmu ţha thei thlawt bawk si lo che a" ka tih leh chuan, "Hundred percent-a ka nih hi" a tih chuan hrethiam lo zet hian ka lo thle deuh ha a, "Nalh lo lai awm lo, ţha famkim hundred percent-a min ti ţhin" nui hauh lo hian a ti a, kei ka lo nuih vak vak lai chuan, "Ka phuah a ni lo a nia aw" a lo ti leh zauh a, "Dawt sawi vanga thih theih chu nise mihring kan inchan zo tawh lo ang" ka ti a, a tshirt leh boxer lakchhuah sa hak pah chuan a nui ve suk suk reng a, a chang chuan biangsum nei te hi a ang ve ţhin a nia. A der ni lovin a nui ve tak tak niin ka hria. 

Ka lu su lovin ka inbual a, ka zawh chuan khumah a lo mu fel der tawh a, tun hnai tak chu hmun dangah min awmsan daih tawh ngai lo a, zu pawh a la in leh miah lo. 

Sir deuha ka mu chu a lamah min pawt hnai a, a taksa ka sik rual chuan min kuah nghal zat bawk. Tal aih aih paha, "Eng nge i hriat a?" ka tih chuan, "Mu mai mai teh" a ti hluk a, min hnaih zual sauh a, ka nghawng zawnah a thaw lum ham ham a, ka dawngsawng thiam meuh lo chu a ni. Ka tan chuan thil thar vek a ni mai. 

"Min kuah beh tlat chuan ka muhil thei nang" ka ti bai bai a, ka thusawi chu ngaipawimawh lo zet hian, "Mi fawh dan i hre duh em?" a lo ti a, ka tlawh zawt lo chauh a ni. 

"Chutiang te chu zir chawp a ngai reng reng hleinem. Ka thiam saah ngai la muhil mai teh" ka tih laia a nuih chuan ka che nasa zual sauh a, ka nghawngah a hmai a phum deuh bawk nen, a za lutuk ringawt. 

"Ka nghawng hian za a hre hma bik a nia, i tih luih reng chuan tum loh deuhin kut ka thlak palh mai ang che aw" ka ti kha kha a, a insiamţha duh chuang lem hlei lova. 

"Pâte, min nei hi i inchhir em?" a ti leh tawh a, "Ka thu a nei che ka ni lo a, mahse nangmah i lo ni kher hi vannei ka inti" ka ti ve mial a, kei ngei pawhin mak ka inti. Ka kâ aţang hian a rawn chhuak thut ni maiin ka hria. 

Ka thusawi avang chuan ani pawhin a mut dan a siamţha ve ta nge nge a, hnai deuhah kan in en a, mipa leh hmeichhe induh tawnna ang kha inkarah awm lo mah se kan inhaw lutuk tawh lo tih ka hre thei a ni.

"Kan inang chiah a nih chu. Hmeichhe dang ni lo va nang i lo ni kher hi ka vannei" a ti a, ka hmai zar tu ka sam chu a hui kiang a, a kut ţang chuan ka biang chu a nul a, nuam ka ti lo a, hrehawm pawh ka ti chuang lo. 

"Ngati nge keimah ka nih vanga vannei i intih a?" ti a ka zawh chuan, "I chhel a, i ţap pur reng lo a, nangmah i in ngaihtuah thei a, i huaisen a, i kawlhrawng bawk a" a ti charh charh a, "Chutiang hmeichhia chu i duh tihna mi?" ka lo ti leh a, a nui deuh a, min chhang lawk lo hian ka sam a chul thuak a, a kut chu a la let ve ta nge nge a. 

"A ni mai ang chu...hmeichhe ţahbelh leh no leh lutuk chu ngainat an har a, nun hi a sualin ka sual a, hei vang hi aniang, hmeichhe chhel deuh hian min hip zawk zel" tiin tlang takin min hrilh ve mial a, "Aww...hmeichhe ţahbelh leh no deuh chu tunlai ţawng takin an cute alawm" ka ti fiamthu a, a lo ner sawk mai. 

"Duhzawng tê kan nei ve a. Aaa...muhil teh ang" a ti ta daih a, kan inhnaih angreng si a, awmdan tur ber ka hre lo chu mit ka chhing ta tawp a, Mapuia hmel a lo lang ringawt lehnghal a, ka awmdan hi a mak riau, ka hrethiam lo a, ka hrilhfiah thiam lo bawk. 

Zinga ka harh meuh chuan hmuh tur a awm leh tawh lo a, a insawizawi peih tawh chuan a nun a hlim leh deuh tawh a ni maithei a sin. Ka intihfai hnuah ka insiam a, ka zawh veleh Kungtei pui turin inhnuaiah ka chhuk a, Mapuia hnenah khan Nicholas nen kan inpawh deuh hnu hi chuan boruak a zangkhai sawt tiin ka sawi a, thudik a nih zia tunah pawh ka hriat belh leh tawh. Zanah khan ti ti rei lo mah ila inhawng takin a duhzawng te a sawi ve a, kha khan ka hriat hauh lohin amah ka huatna kha a ti kiam ve zel a, tukin pawh tuk dang aiin ka tho nuam daih zawk. 

"Chaw a hmin ţep aw...midang hi an la reh diak a, i ei hma daih dawn nia" min hmuh rualin Kungtei chuan a lo ti var a, "A ngai chuang hleinem. Tunah dar7 vel chiah a la ni tho a" tih pahin kawngkapui lam chu ka thlek a, tuk dang aiin a rei deuh a nih hmel. 

"U Chhandami fapa in a lo sawm a, an rei deuh maithei a ni. Ka pi hrilh suh aw" Kungtein a lo ti sar sar a, "Nicholas ka zawng reng reng lo" ka tih chuan a nui var var a, "I zawn ruk reng kha, ka hrethiam vek alawm. Kawngkapui zawn i en zeuh zeuh reng mai" a lo ti vat a, Chhandami fapa pawh chu ngati nge a lokal le? Nu Hlimin hmu se chu naupang pawh nise a hau hrep duh maithei a ni. 

"I thik ve deuh em? Nangchu thikthu i nei ve lo ang tiraw?" ti a min zawh chuan, "Mihring chu thikthu nei lo tak tak an awm hleinem. Thikthu chhe fal bik deuh an awm thung a. Chhandami fapa i sawina a nih chuan ka thik lo aw. Bakah i u Nico nen chuan ţhian kan ni dawn chauh zawk alawm" fiamthu ti tak deuh hian ka ti a, "Ţhian pawh nise hmelma ai chuan a ţha zawk tho alawm" a lo ti then a, a hlim hmel var var khawp mai. 

"Tukin chu ka tho hma peih thlawt lo" ham bai bai chungin Hope a lo lut a, Faith-i a lo tel ve lo chu thawk huai na tham a ni. 

"Pasal neih hian lung a leng duh ngawt ang tiraw U Sai? Nangni phei chu inhnem tawn tur pawn in inneih danin a zir si lo a" a ti reuh a, tawi tein ka lo nuih a, mitmeng lian hi ka ngaina ngai lo na a phir te erawh hi chu an mitmeng a nalh khawp mai. 

"Tumah ka sawisel lo cheu a, mahse ka pasal neih dan ang hi chuan tu hmeichhia mahin nei ve lo se ka ti. An duhzawng, an hmangaih ber ngei kha nei thei se" ka tih chuan a lo bu nghat a, "Ni chiah..pawisa vanga an nei a nih pawhin an duhthlanna ngei ni se, nangni anga nawr luih chawp, sawirem chawp hi chu a hrehawm dawn emai. Ka pa hian ţhian a ngah si a, U Nico-a chunga a thleng ang hi ka chungah a thleng ve ang tih ka hlau teh a nia. A ţhian hnaivai ka hriat ve ho chu tun aţangin an fapa te ka chhui char char dawn. Ka hriat sa ho phei chu an hmelţha lo angreng sia, ka hlauthawng tak tak a ni" a ti bawrh bawrh a, Kungtei nen chuan kan lo nui hak hak nangin ngaihtuah a ti thui khawp mai. A fa ngainat loh ber chungah hetiang thil hi a ti a, a fanu rangkachakin hlauhna a nei reng tawh mai dawn a ni. Thlamuangin a awm thei tawh dawn lo hrim hrim. 

Darthlamang hmaa ka hmai ka tuai ve thuak thuak lai chuan, "Ka thlah ang che" a rawn ti a, a la insiam miah lo lehnghal. 

"Office i kal dawn lo em ni?" ti a ka lo zawh chuan, "Tukin chu ka hmanhmawh lo" a ti mai a, muangchangin ka inher a, ka kawr hma pawh pah hian, "A rawng hi ka kekawr nen hian a inrem lo em? Hmuh a hahthlak em? Ka hak ngai loh ka ha chhuak a" ka ti a, ka tim ve dai mai. 

Ani lah chuan a khabe dawm meuhin uluk deuhin min en vang vang a, rei ngial min en hnuah, "A nalh lutuk" a ti a, muangchang hian a bu nghat a, "A rawng hi a thim mûk lutuk lo tiraw?" ka ti leh hram a. 

"Umm...thim loh kha. Hundred percent-i i ni ringawt" a ti a, ka inringtawk sawt mai. 

Ka hna kal tur min thlah a tum ve mial chu a chhungte pawhin mak an ti ve deuh a, Nu Hlimi phei chu a ka hau mai. 

"Lo haw tlai suh" ram hmaka a tih hnuah dik lo a awm leh awm loh hriat tum ni awm takin a fapa bawk chu a en leh a. 

CONT...