HIS LAST LOVE-12

HIS LAST LOVE-12

"Hmuh thiang lo hmu i va ang ve" ka pasalin a tih rualin Nu Hlimi chuan hmun dang a melh ve nghal a, "Nidangah i thlah ngai mang si lo a, mak a ti ve deuh a nih hi" tiin Hope a lo nui var var a, a nuţa nen kan inpawh ve ta chu a lawm tak tak niin ka hria. 

"Hman miau loh chuan thlah ngaihna awm hek lo. Chaw ei lo siam rawh u ka rei lo ang" ti a a chhungte a hrilh hnuah, "Kal ang le" tih leh ka dara kuah a rual a, hawi let lo mah ila kan chhuah thlengin min enzui reng tih ka hria. 

"Nau phei chu pai la an tlu tawp thei dawn a nih kha" a tih chuan ka lo nui mai a, nau pai te chu ka ngaihtuah ringawt pawhin ka ţim sung sung thei. 

Car kawngkhar chu min hawn sak vei thlap a, min duat sawt lutuk hi lo dawnsawn dan ka thiam lo zawk. A bialnu chungchang kha ka zawt dawn khawp alawm.

"Pawisa i nei em?" lo ţhut luh ve paha a tih chuan mak ti deuh tak chung hian, "Nei ve e" ka ti a, thlarau pawisawi lo chiin a tibuai emaw tih hial tur a ni. 

"Mi fate neih an eisak reng ngai lo aw. Hrereng tawh rawh" a tih leh phei chuan ka bangbo khawp mai. Car a tawlh riai riai rual chuan a lam ka hawi a, uluk deuhin hmalam a lo en ran a, "Eng nge awmzia? Ka hriatthiam theih turin sawi ve mai ta che" vin hlar a ka tih chuan, "Thluak hi nun nan chauh em ni i hman a?" ngeiawm zet hian a ti a, mi hi a ngainep ve thei ngawt mai. 

"Thluak te chu kan nun nan chiah a pawimawh. Thil ţul lo lo ngaihtuah a, hriatreng nan kan hman chuan kan hlim lo vek dawn a sin. Pehhel kual vak lo hian a nihna tak sawi ve mai ţhin rawh" uar zet hian ka ti a, nur nangin ka lam a lo hawi a, driver zawk ni lo se chu min melh rum leh viau tawh maithei a ni. 

"Tarmit-a nen a thil in ei dun hian pawisa a pe vek ţhin em?" ti a min zawh chuan, "Aw, ka pek a phal ngai hleinem" ka ti ve mai a, mipa tih tur deuh bikah kan dah ţhin tak nain kei chuan pek ka tum ve fo a, mahse a remti lo ţhin. 

"Chu, pawisa nei reng chungin mi fapa i ei hek char char a nih chu" ti fuh inti fahran hian a lo ti a, "Sawm ruk man ve ve pawh lo ei ula thla khat chhung chuan 3600 a ni daih. Thla khat a ni 31 a awm phei chuan 3720 daih a ni lehnghal a, nang phei chuan chhut si se lovin i ei leh buan buan awm si a" a tih zawm leh a, sawm ruk man ai tlem ei chang kan nei a, a ai tam kan ei ţhin bawk a, Mapuia vekin pawisa a pe thung. 

"Chutianga i lo chhut ve thlap kher a ngai lo. Kan ei dan a inang hleinem, a changin kan ei tam a, a changin kan ei tlem a, engmah i hre lo" ka tih chuan, "In ei tam phei chuan 5000 a kai daih ang. Doctor pawh nise a chhungte in nghahna a ni maithei a sin. Thil eipui a a sawm che apiangin ka thusawi hi ngaihtuah chhuak ţhin rawh" a ti a, ka hriat loh hlau ni awm takin ka lamah a rawn thle hnai a, "5000 ka tih kha aw...5000 thawh chhuah harsat zia chu i hria ang" a ti leh kher a, nuam ka tih bik loh vang a nia ka ei man tal pek ve ka tum ziah, chu erawh ka sawichhuak vel peih tawh lo. 

"Tukin hi a tawpna ni rawh se" ka tih tak hmakah chuan, "Eng maw?" a lo ti vat a, amah pawh en tawh chuang lo hian, "Naktuk aţang chuan hman viau mahla min thlah tawh suh. Min ti hnual vek thei thil bak sawi tur i hre lo" ka ti a, kuangkuahin pawn lam ka thlir ta daih a. 

"Thil ţha ti la chu van sanga thlawh pui vang vang thei tur che ka sawi mai tur a nia. Min duh e tih vang maia mi fate lo ei char char hi a ţha ngai lo" a ti deuh duah a, ka dang leh ti tih der tawh. 

"I va han ţawngthei sawt tak aw. A thu hrimah, i bialnu chanchin min va hrilh ngai lo ve. I nei tih ka hria a nia aw..phaiah a awm tih ka hre bawk a" ka ti a, a rukin ka melh zauh a, min en ve lo mah se chutiang ka hria chu mak a ti chiang a ni, a hmelah a lang vek. 

"Mi parda keu ruk i hrat hmel riau mai" min ti a, a aw chu a danglam hauh lo a, mahse, chawpchilh a a hmel danglam kha ka hmu chiang viau thung. 

"Parda i inzar hliah a nih rau rau chuan fimkhur ve deuh ta che. Tlemte chauh ka keu chung pawhin ka hmu nghal thei a nia" ka tih chuan, "Keu kau zau deuh la chu i hmu chiang lehzual tur a nia" a lo ti ban charh a, ka chhang tawh lo. 

Ka thawhna hmun kan thleng a, message a ka hrilh lawk angin kawtah Nghetin min lo nghak a, ka chhuk hnuah a ţhutna lam tukverh ah chuan ka dak lut a, "Zanah kan sawi leh dawn nia. Parda keu a, a chhunga thil awm kan hai vak chung pawhin kan duh ang kan hmu lo fo a nia aw. Ţhian atan min duh tak tak a nih chuan min hrilh vek ang che" ti a thu ka pek hnuah ka hmui chu ka chip hmak a, min chhang lem hlei lo hian ka hnar a lo piai vak a, hmui ka chip rei hleithei lo a ni ber. 

Min thlah ruala, "I mawl em ni?" vin zet a ka tih chuan, "Min ngai viau mahla kal tawh rawh, i ţhiannu'n a nghah reng tawh che saw. Fawh phawt i beisei em ni?" a lo ti vel a, ka hamhaih deuh chu min nuih sukin motor chu a tawlh riai riai a, inlak hran loh theih pawh a ni lo. 

"Damchhungin a mizia hi ka hrethiam thei ngai dawn lo a nih hi" Nghetin min rawn pawh rual chuan ka lo ti hap a, a chang chuan infiam nan mai mai min hmang niin ka hria a, inchhungah hlimna a hmu mang si lo, keimah hmang hian a hlimna tur a siam chawp ni berin a lang. 

"Mize inhriatchian leh lutuk pawh a ţha chuang hleinem. Tikhan awm tawp la a dik a ni mai. Ka lo ngaih ţhin ang aiin a fel a, ka duh pui deuh tawh che" a tih ve chuan tur zetin ka melh a, engahmah a ngai lo tih hriat zetin a sam a tuai a, "Mapuia ai chuan a pa daih zawk" a ti leh tawh. 

"Niminah chuan Mapuia min la duh pui em kha" ka tih chuan, "A danglam tawh alawm" a ti a, damdawiin chhunga a lut chu a hnungah ka zui dat dat a, "A danglam theih pawh ka ring lo i ti ziah a ni lawm ni?" tiin ka chhuahchhal a, zankhat thil thuah a rilru a thlak thut a nia, a mak ve ngawt mai.

"Ran takngial pawh a enkawl tu te a zirin an danglam thei alawm. I bulah a awm tam a, a danglam zo tawh a nih hi. Kei takngial pawn biak nuam ka ti tawh alawm. Ka sawi ang tak takin a chapona leh induhtawkna i chawk sawm vek tawh" a ti veleh a, a danglamna a tih hi ka hmu ve thei lo nge hmuh ka tum lo pawh ka hre tawh lo e a. 

"Mapuia chu min duhpui leh tawh lo tihna mi?" ti a ka zawh chuan, "Duhpui e...a fel alawm. Mahse, pasal i nei tawh a" a ti daih a, ka hriat lohin ka pasalin a lo tham emaw tih mai tur a ni. 

"Engpawh chu lo nise Mapuia nen kan awmdan hi a lo hre ve zel a, hrilh tu an awm chiang a ni. Kan thawhna hmunah hian hmelhriat ţha deuh a nei a ni ngei ngei ang. Nangmah hi i lo ni lo maw?" ka tih chuan a ngaihdan a nih loh hmel khawp mai. 

"A phone number pawh ka nei hleinem. Mapuia nen chuan engtin pawn lo awm ula keichuan ka zep pui zawk ang che u. Nicholas hi a fel hnu hian ka hmu ţha lehzual a, ka duh pui zawk che ka ti a ni mai a, enthlatu angah chuan min ngai lo mai teh" a ti a, kan inrual chiah nain kei aiin a la naupangchhia fe zawk a, biak thiam viau chuan a tih duh tak tak ka ring tlat a ni.

Kan awl deuh lai chuan, "Ngheti" ka ti leh a, min lo en ha a, "Mapuia hmel hi ka hmu ţhin. Nizan pawh Nicholas nen inpawh deuhin kan ti ti a, ka hlim ve tehreng nen mut tum a ka mit ka chhin rualin Mapuia hmel a lo lang a" thutak deuhin ka ti ve tak nain, "Thlemna a nih chu" a lo ti then a, kan ti ti a inrual tawh meuh lo a ni ber. 

"Nicholas aiin ka duh zawkin ka hria. Duhthlang thei dinhmunah chuan ding ila Mapuia hi ka thlang zawk ang. Ka demawm viau em?" ka ti a, "Aw leh aih" a ti leh ringawt a, ka thin a rim ţeuh tawh. 

"Thurawn ka mamawh lai tak a nih hi" ngenngawl zet a ka tih chuan, "Nicholas hi i duh vanga i neih a ni lo a, i mi hriat ţhan pawh a ni lo, in inneih dawnah amah nen phei chuan in inhre ve chauh a, chuvang chuan i demawm loh. Mahse, pasal nei i ni tawh a, in inneih dan chu engpawh lo nise pasal nei reng chunga ngaihzawng nei chu kan dem ţhin a ni lawm ni?" a ti daih a, Nicholas-a huhang in a man hneh tawh khawp a nih hi. 

"I pasal runluih nan hmang rawh i ti ţhin bawk si" beidawng angreng taka ka tih chuan, "I hlawhtling tawh alawm. I chungah ţhat a chhuah tawh ber te chuan runluih zel a ngai tawh chuang em ni?" tiin min lo zawt let leh khauh a, "A nih tak chu" ka ti hmak a, lehlam ka hawisan ta daih a, ka ţhiannu hi chu a rilru a nghet lo a, thlem thluk pawh a awl. Rilru nghet chet chawt chu ni sela hlawh tam zawkna hmunah a kal daih tawh ang a tumna a rei tawh emai. Chuti chung chuan min chhan dan vel hi ka lungawi thei chuang lo.

"A ruk tak chuan a dik lo i ti ve tho" a lo tih leh chuan rang deuhin a lam ka hawi leh a, "I chhungril takah chuan tuna i awmdan hi dik lo tihna i nei ve alawm. Chuvang chuan lam ţang i zawng a, i rilru a nawm deuh theih nan ngaizawng rawh, a ţha alawm ti tu tur i dap a nih kha. I ţhianţha ber ka nia, keiin in pa aiin thlang rawh, i tan a ţha a, pasal neih hnua midang kawp te chu mi tih loh dan pawh a ni hleinem ti ila chu i rilru a nuam sawt ang a, inhnem nan tak min hmang bawk ang. Mapuia lam i âwn zawk chung hian chhungrilah inthiam lohna i nei ve tho a, i rilru nawm deuh theih nan ka ţawngkam ţha tlem i beisei a nih kha" a ti khawl khawl a, a sawi dik lo hauh lo. Ka awmdan hi a hrehawm tial tial mai. Ka pasal neih hma khan lo intawng hman chu ila ka tlanchhiatpui dawr dawr mai tur a nia. 

"Chutiang tur si te chu a tirah khan min sawi phur pui loh mai tur alawm" ka tih chuan, "Mipa hi pangpar ang lekah i ngai a, tu hnenah mah rilru i pek theih ka rin loh avangin i pasal runluih nan hmang la, a rilru put hmang a lo langchhuak mai ang ka ti ringawt alawm" tiin a lo insawithiam a, awm awl tawh viau mah ila ka hah ngawih ngawih tho. 

Nidang ang lo takin Mapuia a lo lang hauh lo a, ka zawng ru deuh reng a, kan awmna lam pana rawn kal thawm a awm apiangin ka lo en vat a, Mapuia ni lo va midang daih ka hmuh chuan ka hnual rawih rawih zel. Zawng ru reng e ti lo chuan chanchin ka zawt ngam der lo a, zana kan inbiak laia Nicholas chanchin ka sawipui vak vang kha em maw ni aw ka ti rum rum tawh mai.

Ngheti lah chuan, "Khatia i ring fan vak vak lo khan be mai la, awlsam deuhin a awmna i hre thei mai dawn alawm. Pasal i nei tih a hria a, i pasal chanchin te chu in sawidun a ngaih chang a awm lo thei lo alawm. Thinrim nan a hman chuan a buaithlak awm e" a lo ti ve sek a, rilru a ti nuam lo zual ting mai. 

Ka inthlak zawh vek hnuah a lo lang ve hlawl a, min delh tu lung lian pui lak sawn dawrh ang mai a ni, ka zang huai mai. "Kan buai deuh hlek a" tiin thupha a chawi a, "A pawi hleinem, hei keini pawh kan haw dawn chiah a" ka lo ti var a, ka nui lui sang a, hrehawm ka tihna kha ka hmelah a lanchhuah loh hram ka beisei. 

"Ka lo hmu zuai che a nih hi. Vawiin chu thil eina hun mumal pawh ka neih loh hmel" inthlahrung taka a tih chuan, "A pawi lo a pawi lo" ka lo ti leh sawk sawk a, midang awm ve tawh mah se chik deuh a min en chung hian, "I ţha maw?" a ti ta tho a.

"Aw..ţha e..kan hna hi ka hrethiam alawm. Kan buai chang a tam a, buai loh laia kan inhmuh kha a tawk mai alawm" ka lo ti a, ka rilru nawm lohna a langchhuak ve te chu ka zak rum rum mai, Ngheti thu min hrilh ho nen, awmdan ka thiam lo thut a, a thleng nawn tawh lo ang. 

"I thlen hunah min lo hrilh hrim hrim rawh aw" tiin min kal san a, tlem chuan ka awm a nuam leh deuh a, mipa ngaihven ngai miah loin Mapuia ka ngaihven tlat mai hi ka hrethiam lo, ka boruak tawnin a zir loh vang nge ka duh zawng tak a lo nih vang zawk, a chhan engmah ka hre thei lo. Hetiang lamah hian tawn hriat ka la nei lo ve em bawk a ni. 

"Tikhan a fel mai alawm. Hun thawl a nei reng bik lo a, i túm thlawn a nih kha. I pasal bulah awm la, ţawng zat zat reng la i inhmeh zawk. Mapuia bula i awm hi chuan i mize diktak a bo deuh ţhin a, ka duh dan a ni lo" a ti a, ka hnial duh lem lo. Kan duh ve deuh te bulah chuan kan lai ţhin a, kan inthup ve bawk ang chu. 

Lengkawi loin ka haw tlang ve teh mial a, Nu Hlimin inleng a lo nei a, inchhung ka luh ruala nu pakhatin, "Mami, nau i keng ve tawh em?" a lo tih chuan ka ding dat a, ka chhan hma hmain Nu Hlimi chuan, "An la pai lo a nih hi. Kar hmasa lawk pawn ka period i ti a ni lawm ni? Eng nge maw awmzia ni?" a lo ti zung zung a, ka zak ve reuh hle mai. 

"An la pai ve mai ang. Tunlai mite hi chuan nupa a hun hman tam an duh vangin nau an pai lawk duh ţhin lo a, an danglam tawh khawp a nih hi" a inleng pakhat zawkin a ti hlauh a, "Aaa....nupa chu fate hian min phuar nghet zawk a, kan pa nen hian tu hmel hmuh kan chak ve bawk nen, fa hi nei vat vat se kan ti ţhin a" nui chungin Nu Hlimi chuan a ti tak nain a nuih a za tak tak lo niin a lang. 

"Duh hun huna fa neih theih a ni hleinem. Hmeichhia kan inang lo a, nau pai har chi leh pai hma chi te, nau pai thei lo te kan awm a, pasal neih tak vang maia 'nau i keng tawh em?' ti a inzawh ngawt chi pawh a ni lo. Bengvar emaw kan intih laiin mi rilru kan lo ti na zawk thei a nia" pangngai tak hian ka ti a, ka thlen hlima min lo be tu leh Nu Hlimi chu awmze nei deuh hian an inmelh a, min ngaihnat loh zia an hmel a langchhuak chu ka lo hmuh hmaih bik lo. 

"A dik chiah" rawn ti tu chu ka lo en vat a, bottle kengin Hope chu choka aţangin a lo chhuak a, class a kal lo leh pek em maw ni?

"Hmeichhiain pasal neih hnua kan chak ber chu nau pai a nia, fa kan awt ţheuh alawm. Mahse, u Saii sawi ang khan mi kan inang lo a, fa awt ngawih ngawih hnenah 'nau i pai tawh em?' emaw, 'i va pai har ve' ti chiah ila chu a rilru kan tih nat mai bakah kan ti hnual nasa ngawt ang. En tawp ila mi pawi kan sawi lo a ni mai. Nau pai chuan pum a puar ngei ngei a, hriat tum lo pawh ni ila kan hre dawn tho tho" a ti a, min kheuh zeuh a, inchunga chho turin zaizirin min hrilh a, a mawiah, "Ka han inthlak lawk ange" ka ti ve a, min biak leh hmain ka chho nghal daih bawk. 

"Ngati nge maw mi nau pai leh pai lohah an lo buai chiam ţhin ni aw? Fa nei thei lo ho hi ka khawngaih ţhin, tupawn beisei an nei a, an zawt sek ang a, anmahni ngei pawn an awt ang a, pai theih loh miau chuan tih ngaihna a awm dawn bawk si lo, mahse tunah chuan thiamna a sang tawh a, beidawng mai lovin thil mak beisei tlat ila a ţha a ni mai. Ţhenkhat lah an rai thei leh lutuk a, enkawl sen loh an nei a, ţhenkhat lahin an paih thul. Tam tak chuan Pathian rorel dan hi fair lo an ti ve ngawt ang, hriatthiam a har ve ţhin bawk a" tih bawrh bawrh pahin Hope chuan min zui chho a, an pindan a kal pelh ve tak hnuah chuan leh hawi meuh hian, "I lut dawn lo em ni a?" ka lo ti a, nui rah rah chung hian lu a thing a, "Ka lo leng dawn" tih leh min kawih her a rual a, min nam kal zui dat dat mai. 

Pindan kan luh rualin khumah a let hual a, "Ka damlo der a, diktak chuan lehkhazir hi ka phur lo. Phaiah min dah ula designing lam min zirtir zawk rawh u ka tih lahin Faith-i a khawngaihthlak an ti ţuah hum reng bawk si a" a ti niah niah a, sofa ah ka thawmhnaw ka keng phei a, a hmuh loh turin rang deuhin ka inthlak a, kut ka silfai leh hnuah a mutna bulah chuan ka ţhu ve a. 

"Designer nih chu i chak takzet a ni maw? Graduate phawt la, an phal em em ang" ka tih chuan, "Chak tehreng mai. Ka bialpa ka chawm thei bawk ang a" a ti a, nui chung hian, "Enga?" ka ti hluai a, a thusawi chu ka hresual emaw ka ti hial a ni. 

"Bialpa ka nei alawm" tiin a inbengkang a, tunge a nih ka zawh hma hma chuan, "Nikum khan kan college chhaka insak naah a inhlawh ţhin a, chuta ţang chuan kan inhria a, a hmelţha a nia aw. Bakah a fel a, an unauah a upa ber a, hmeithai fapa a nia, a naute enkawl nan hna a thawh a ngai si a, min lo nghak rawh ka chawm vat ang che ka ti ve tawp a, mahse, ka chawm ang che ka ti kher kha a hua aniang thla khat vel min be duh lo a" nui har har chung hian a ti a, keipawh ka lo nui ve hak hak a, ngaihzawng kan hre hma a, kan rilru a puitling har viau thung a, a buaithlak khawp mai.

"Mipa pangngai a nih chuan a zak ve ang chu" ti mah ila, "Zak mah se chawm a ngai dawn tho tho alawm. I duh chuan hna i thawk ve tho ang a ka ti tho a, nau pathum lai a nei a, a nu a hrisel lo si, ka zir vat vat a, ka enkawl an ngai alawm" a ti ve ngial a, "I nuten phal lo ta se" ka lo tih chuan, "Ka hlauthawng ţhin reng alawm. U Nico ang hian min tih ve ka hlau a, nangpawh i bang bik chuang lo a, i mal dawn tih ka hriat vang a nia ka kawm nghal bawrh bawrh che. Ka khawngaih tlat che u a, in chunga thil thleng hi ka ngaihtuah ve nasa ţhin a, a hrehawm ngawt ang. Mahse maw, U Nico hi misual a ni lo a nia aw" ka mita min en kal chung hian a ti a, phir mah nise Hope leh Faith hi chu an hrang hlak a ni. 

"A sual lo ang" zawi sapa ka tih chuan, "Sual lo e..a tum a ruh a, zirlai chiah a buaipui a, a zir tlut tlut a, hmeichhia pawh a ngaihven ngai lo. Mahse, U Chhandami nen khan an inzui thut a, an naupan laiin an inkawm ţhin a, an inhmuh loh vang vang hnu, keini pawn an inkawm tawh lo emaw kan tih hnuah boruak an rawn nei thut a" a ti a, a thutak phian lehnghal a, thudik a hre bik lo tawp a nih dawn hi. 

"Chhandami an dem luai luai a, i dem ve em?" ti a ka zawh chuan, "Dem hran lo. Duh zawng tê kan nei ve a, pasal a neih loh lai, a khawhar ve lai a ni bawk si a, ka dem lo. Keipawh ka bialpa hi ka ţhiante chuan min duhpui lo a, Faith ngei pawh hian min vau ţhin. Tumah hrilh suh aw, Faith hian kan inţhen tawhah a ngai a, kan la inkawp reng tih a hre miah lo a nia" ka mal ben thak pah hian a ti leh rih ţhin a, a khat liam ve khawp mai. Tumah a hrilh ngam awm bawk si lo a, a khawngaihthlak letling zawk.

"Hrilh lo e...ka zep theih ve zawng alawm" ka tih takah chuan, "Nih leh U Chhandami hi i hua em?" a ti ve ta daih a. 

"Haw lo e...huat nachhan tur ka nei hleinem" zahzelah a kawr a ui hmul kai chu ka then sak a, "Pâtea nen kan mu chawhma ţhak a, hmul ka kai vak a nih hi. U Nico hi chu maw kan bula a awm khat vang te pawh aniang, bialnu a neih awm ka la hre lo tak tak a nia aw. A duh zawng chu duh bur chi, a tih tawh chu ti tlut chi a nia, a luhlul a, a ho ve hle nain a rilru a nghet a, in buaina ber u Chhandamin pasal a nei leh dawn a, nangmah chiah i awm tawh. In awmdun chang te hian a lungawi hmel tawh e ka lo ti ţhin a, a duh chi i nih ngat chuan i chhuahsan daih a hlau ngawt ang" a ti siam siam a, a ţawng lai chu ka lo en reng a, a bialpa pawh chu mipa vannei tak a ni ve reng reng e. 

"A ho in ti teh fo a, chapo leh intivei ve deuh, kul muk deuh turah a sin ka lo ngaih ni" ka ti chu a nuih a za kher mai. 

"I ti awm ang lo emai. Kei phei chuan Anthony aiin ka ngaina daih zawk. A ţhiante nen an awmkham chang te hian a ho ber a ni ziah a, min chhawnchhaih vak ngai lo nain a rilru a chhe lo a, min ngaihsak miah lo anga a awm pawhin a hunah chuan ka hmaah a ding ţhin a, hei vang hian ka ngainat phah a nih ka ring. Tun hnaiah phei chuan min fiam zeuh zeuh a ching a, a bula awm a nuam sawt lutuk. A mal ţhin a, chhungkaw lam i sawipui lo hram hram dawn nia. Ţul a tih hunah aman a hrilh mai ang che" a ti a, zawh zui vak chi a ni lo tih hriain ngawih ka chuh a, rei deuh kan ti ti hnuah an pindan lamah min phei san a, ka inbual a, phur lo teh mah ila Kungtei pui turin inhnuaiah ka chhuk a, a lo reh ţha tawh khawp mai. 

"Khawiah nge kan inleng te kha?" ka ti lut a, "Pangpar an en dawn a nih kha, thingpui min lum tir a, an rei leh ta phian sia" Kungtei chuan a lo ti a, puih ka inhuam viau lai hian tih tur a vang ţhin si a, kan ti ti a, nasa vak loin mi tu emaw ber kan rel phah ziah. 

Mapuia chanchin ka la hrilh lo tih ka hrechhuak thut a, phone phawrh chhuakin, 'Ka thlenna a rei tawh aw. Hei rawng ka bawl dawn chiah a, inleng kan lo nei si a ka rawn be hman lawk lo che a' tiin thu ka thawn a, a hrethiam em ang chu.

Nicholas-a lo haw chu pindana chho tlang nghal loin choka ah a lo lut hmasa a, tlaiah chuan ka awm ziah tih a hre tawh a, a lo lut hmasa ngei ngei. 

"Mi fate pawisa i ei hek sak leh em?" tih pahin awmze nei zet hian min melh a, ka ep chiahah a ţhu lehnghal a, ka bulah tal ţhu se ţha tur. 

"Mi fate hi dilchhut viau lo se a ţha ang" ka lo ti ve ngat a, a lo kiai suk mai. 

"U Nico, thei tui vawt a awm kha. Chaw kan la ei har hmel si a, i in duh em? Ka lo siam sak dawn che mi?" Kungtein a lo ti zung zung a, "Ka nupui hian siam rawh se" a ti a, "Ka siam hman tho a sin" a tih pawh chuan, "Kan nu siam a tui ber" a ti tlat a, melh ram ram chungin ka tho a, a tukhuma kut suihin hahdam hmel deuhin a ţhu a, dawhkana thei tui leh no ka dah chhuah lai te chuan a lo nui suk suk reng a, ka hmu lo emaw a ti chek a nia nga, ka hmu ru reng sia. 

No a thei tui ka thlit chhuah hnua ban mai a tum chu a kut ben sawk pah hian, "A tak emai, tui ka pawlh lawk dawn" ka ti hlak a, "Aww..ka intui loh i hlau a ni maw?" ti a min lo fiam chuan ka hmui ka ti pawrh a, nuihza ka siam emaw tih mai tur a ni. 

"Engmah sawi lo mah ila i nuih ka ti za em em zel a" lungawi lo deuh a ka tih chuan, "Ka tan chuan Mr. Bean i ni mai" a lo ti ve zat a, a dang duh tawh bik der lo. 

"Ka ţhiante an fanu piancham an lawm dawn a, Pathianniah hunawl i nei em?" ti a pangngai deuh a min zawh chuan kan duty dan ka chhut neuh neuh hnuah, "Ka chawhma ang" ka ti a, Pathianni takngial pawh ka awl ve thei lo chu a nih hi. 

"A ţha...inkhawm banah ka lo hruai che ang a, kan tel ve thei dawn tihna a nih chu" a ti nghal ringawt a, "Min rawn loin thutlukna i siam a" ka tih chuan, "Rawn chung zel chein kan kal ve ang. Hmun hnih aţangin an in a kal pawh theih a, i duh zawk i thlang dawn nia" nuihza aw zet a a tih chuan ka lo thaw hak a, a tum tawh chu a tum tlat tho ang.

"Inkhawm ban rualin ka bang nghal thei hleinem. Damdawiin a lokal kher pawh a ngai lo" ti niah niah mah ila, "Ka nghak ang che. Pasal te kal phal loh tih intar ka hmu ngai lo" a lo ti ve zel a, "Tukin a ka thil zawh che kha min hrilh phawt loh chuan ka kal lo ang" ka ti a, "Zanah" Kungtei hriat hlau taka a tih takah chuan ka nui ru ver ver mai. 

"Inkawm ang le" khuma mut thlawp pahin ka mutna bul awl lai chu ka beng thak thak a, Mapuia ka la be leh lo tih hrereng mah ila Nicholas hi ka hrechiang chak zawk rih a, hun ţha ka neih ve chhun hi bawhpelh ka tum lo bur. 

"Eng ber nge i hriat duh?" ti a min zawh pahin ka bulah a lo mu a, ka dul zawnah a ban a khám a, ti hian a rei hnuah min kuah leh daih mai ang. 

"I bialnu phaia awm kha" ka tih chuan, "Rita-i" zawi sup hian a lo ti a, "In ni rei em?" ka ti a, "A naupangchhia e" nuih hawk pah hian a lo ti thung a, "Sawi mai mai teh" a banah ka beng thlawp a, min kuah ta chiah reng a, a phakar ve sin. 

"Bialnu tih tur chiah pawh a ni lo" ban charh a a tih chuan, "Chu, ngaihzawng i la nei ngai bik lo a ni maw?" tiin ka nuihsawh a, a lawm lo ngang aniang ka nâkah a ţham a, a za ngang mai.

"Lehkha ka zir a, ka hlawhtlin theih nan theihtawp ka chhuah a, bialnu nei hman ka ni hleinem. Ka zalen dawn chauh a ti hian kum khaw daih thilpek ka dawng leh a" ka lo nui hak hak reng a, a thusawi chu huatah pawh ka la tawh lo. 

"Rita-i chuan a ngaizawng che em ni? I bialnu nghet a niin ka hria a" ti a ka zawh chuan, "A ni mai ang chu" a ti leh ang lawi a, "Eng eng awmzia? Duh let ve miah lovin i ngaizawng tho maw?" ka ti hluai a, mak ka tihna chu ka thup thei lo. Hetiang hi engtin nge maw an theih zawk ţhin ni?

"Umm" tih ringawtin min chhang a, "Engtin nge theih zawk a?" ka ti ta chiah reng a, ka ţhu hluai lo chauh a ni. 

"Ka mal loh phah alawm. Kan inrul tawk chiah" a ti leh ringawt a, a sawi ţha duh chiah lo. 

"Nih chuan i tan pawh a pawimawh ve tho a ni maw?" ka ti a, "Tehreng mai" tih zawngin min chhang leh a, sawi pui hleihtheih pawh a ni lo. Rita-in a duh a, Nicholas lahin a mal lutuk loh nan rilru pe thei lo chungin a lo kawp ve mai a, tichuan inngaizawng nghet ang chiahin an awm tihna a nia, langsar deuh a a kawp duh lo pawh hi a awm ve tho mai. Rita-i nen a mi hmuh a inzui ai chuan Chhandami nen a inzui a duh zawk a, a thawhpui, mizoram lama a ţhiante bulah takngial pawh a sawi chhuak duh lo niin Chhandami ngei pawn min hrilh a nih kha. Rita-i hming a lan ai chuan hmingchhe deuh dawn mah se Chhandami hming a lan a duh zawk a, an sawizawm pawh pawi a ti lo zawk chu a nia, Rita-i laka a rilru put hmang tur chu ka hrethiam ve uar mai. A duh ve hauh lo tihna a ni mai. 

"I ti tawp vek tawh tihna mi?" zawi te tak taka ka tih chuan, "Nupui ka nei tawh alawm" a ti a, min mut hnaih sauh a, ka nghawngah a hmai phumin thlamuan hmel deuh hian thawk a la zui a, ka lo dawngsawng thiam chiah lo, ka lungphu a danglam leh danglam loh hriat tumin ka awm ka dawm a, ka ngaihthlak vang vang lai chuan, "Pâtea i nih chhung chu barakhaih che pawh ni ila i lungphu a danglam ve lovang. Khatiangin ti ve duh suh" min ti a, a la nui zui lehnghal a, ka zak ve ţep alawm le. 

"Ka thin a thip lutuk a, chuvang chu alawm. Hmarcha ka ei hnem lutuk a a thip veng veng mai" tiin chhuanlam ka siam a, ka awm zawna ka kut dah chu a rawn hum hnan a, "Ka la ti danglam dawn alawm. Tunah chuan ka beisei lo, mahse a la danglam ang, ngaihthlak chawp ngai lovin i hre nghal thei ang" inringtawk tak hian a ti a, "Kan en ang chu" ti a ka cho let chuan zawi tein a nui a, a pawmah ka ngai. 

Pathianni tuk a ni a, duty ka ngaih avangin hma deuhah ka harh a, ka pasalin min lo la kuah bet tlat a, thawh hma a ngaih loh ni chuan a muhil nghet ţhin si, a kut ka dah sawn lai pawh a hre lo. 

A rawn thawh ve chuan chaw ka lo ei mek a, "Nurse hi chu inah in awm tlem e. Pasalte in awm ve niah pawh in kawm hlim hman lo chu a nia" Faith-in a lo ti niah niah a, in lak fel a tum thei a nia aw..henu hi chu ngaia neih a har a ni. 

"Kan awm ve chhunah kan nuih tir suk suk reng tho alawm" Nicholas en paha ka tih chuan laih hmel deuhin a lu a tuai a, a nui ţha ngam chiah lo niin ka hria. Kan inpawh ve sâwt a, inhnial reng tho mah ila thinrim a inhnial vak vak kan nei tawh vak lo. Pasal atan la pawm thei chiah lo mah ila ka huat ţhinna zawng zawng kha ka phum bo tawh a, khawiah nge an zawh tak pawh ka hre tawh lo, zawn chawp a ngai hial tawh ang. 

CONT..