HIS LAST LOVE-13

HIS LAST LOVE-13

"Min thlah kher a ngai lo ka tih mawlh mawlh kha" ka hnungah a kut a dah a, "Kal mai mai teh" tih pahin min nam kal dat dat a, hawi let eng ang mah ila awmzia a awm chuang lo. Chuti chung chuan, "A va mak tak..Ngheti nen kan inthurual vek tawh alawm" ka ti a, pen dat dat chung hian ka hawi let leh tho a, "Kan phur ve dawn nia" a lo ti then a, pawn kan chhuah thlengin midang ho chuan min enzuiin ka hria. 

"I thu i duh ve sia aw...mahni thuduh deuh hi chuan Pathian thu takngial pawh an zawm thei lo an tih kha" vin lek lek a ka tih chuan, "Nupui te ngaihsak hi Pathian thu alawm. Ka zawm ţha ber zawk a nih hi" a lo ti a, ka ţang deuh nain motor chhungah chuan min nam lut nawk nawk a ni ber a, a chet ţhin dan en hi chuan a dik lo zawnga min la khawih lui miah lo hi a mak zawk. 

"Ngheti chu kawnah lo awm rawh se..hrilh rawh" lo ţhut luh ve pah hian a ti a, motor chu a ti nung zui a, a thu zawm diak diak hreh viau mah ila loh theih lohna in min nan avang chuan Ngheti chu ka hrilh ta nge nge a, a lo phur khawp mai. Scooty ka hawlchhuah vak loh hnu hi chuan ani pawhin ken a tum ta bik lo a, keng se, min phur se a fel vek ni mai tur a nia, a thar pawh a la leh tawh reng si. 

"Tu tih hriat loh naute piancham lawm naah min hruai i tum a, hmelhriatte pianchamah pawh kan kal peih lo chu a nia" amah pawh zawt em em chuang lo hian ka ti niah niah a, an nalh hlawm viau phei chuan min hmu ţhing tawk an awm leh mai ang. Thawmhnaw aţang ringawt te hian kan inteh ţhin a, hak tur ţha nei ve lo te chu an la inkiltawih tial tial dawn a nih hi. 

"Ka ţhiannu..phaia lehkha ka zirpui ţhin" a lo tih chuan a lam ka hawi vat a, "Eng nge i lo sawi ve bul bul kha?" ka tih chuan min ngei hmel deuh hian a lo ner sawk a, "Naute nu hi ka ţhiannu" tih bakin min chhang lo. 

"Hmeichhia ţhian lah hi i ngah ve zek a, kan pahnihin min sawm em ni a? Min lo beisei tel ve loh phei chuan ka zak dawn nasa a nia" ka la ti bai bai a, kal ve loh dan phet ka zawng a ni ber. 

"I bengchheng chel chul emai..ngawi tawh teh" a ti hluk a, zam map lova amah melh ram ram chung hian, "I thin lah hi a chhe ve ropui si, i la thihpui nge nge ang. Thin chhe vek tawh damrei an vang khawp a nia. Min thlah suh ka ti mawlh mawlh alawm. Ngah nge min thlah luih ţalh reng ni?" ka ti a, Ngheti min lo nghahna hmun kan thlen meuh chuan inmelh no lo tak kan ni tawh. 

"U Nico-a chu i va fel ve. Taxi in to deuhin kan kal leh ang chu ka lo ti rilru a, a lawmawm hle mai" ka ţhiannu chuan a rawn ti lut luam a, a lawm tak tak niin ka hria. 

"Nang talin lawmna chang i hria alawm" tiin ka pasal chu zawitein a lo phun sup a, Ngheti tak phei chuan a hre pha kher lo ang. 

Damdawiin kan thlen rualin Ngheti chu a chhuk nghal mai a, ka chhuk ve tur chu ka banah a lo chelh a, hamhaih deuh a ka en lai chuan, "Inkhawm ban veleh ka lokal ang. I hawina lam lo fimkhur viau ang che" zawi te, sehchilh zet si hian a ti a, a mitmeng lah chu a thip leh râm tawh lehnghal.

"Phuba lak tum ang maiin alawm i ţawng le. Ka thawhna hmun a nia, duh leh ka hawi kual nileng ang chu. Kil tin melh ve thei turin hmeichhia te hian dikna kan nei" ka tih chuan mit ti zim deuh san hian min lo en a, a thusawi tum ka hre lo der chu a ngaihdan a nih loh hmel khawp mai. Mapuia nen a kan inmelh dan a dik loh palh a hlau a, pehhel deuhin a duh loh zawng a sawichhuak leh tawh a nih hi. Pathianni ah Mapuia a lokal ngai lo tih a hre ve lo a, hrilh ka tum hauh lo bawk. 

"Hmeichhia te dikna i tih loh leh danin hmeichhia a humhalh i tia, khawvel thil a innghat lovin Bible chhiar rawh. I awmdan tur a inziak vek" a lo tih chuan ka nui hak hak a, ani pawh a insum thei ta bik lo aniang a nui ve ta nge nge a. 

"Mapuia hi thik lo angin i awm vel a i thik chiang khawp mai. I nupui ka nia" tih pahin ka awm ka dawm kher a, chik deuh a min en chung hian ka thusawi leh tur chu a lo ngaichang ran a, "Mipa zawk angin min en emaw ka tih laiin i fa rual lek i thik a" ka tih chuan a nui hmel chu a bo nghal hmak a, ka kut a vawnna pawh a nghet sawt viau mai. 

"I lei tereuhte kha i venţhat viau loh chuan i la inchhir ang" a ti a, chhan tuma ka an zuau lai chuan ka hmui chu enin a nui suk a, "Nuam i ti maithei bawk" a ti leh sup a.

"Aw...i thil tum ka hria a ka vengţha tawh ang. Hei, ka lei veng tu guard pawh an intlar ţhap mai" ka ti sawk sawk a, a ţhutna lama kun phei pah chuan ka ţhen vak a, ka ha ka kawh zauh hnuah, "Heng ho hian ka lei chu an veng ţha khawp mai. Min hnaih apiang chu an thisen a chhuak pheng phung zel" ti fuh inti zet hian ka ti a, thil hi a nihna ang rawt rawtin kan sawi ve ngai lo na a kan inhrethiam tawn khawp mai. Tun a ka thusawi pawh hi min fawh luih chuan i hmui ka seh ang tihna ang vel a ni. 

"I tlai ang..kal tawh rawh" a tih rualin ka kut a vawnna chu a thlah a, ka nuih a za ru angreng, kei, tawnhriat la nei lo lutuk pawhin zei lo ka tih chuan nuthlawi Chhandami phei chuan engatan mah a ti lo ang. A hnar hawlh za tuah pawh a hman duh tawh ka ring lo. 

"Inkhawm banah ka tih kha aw" ti a min lo auh zui chuan nui var var chungin ka kut ka vai a, nui ţha duh vak lo chung hian reilote a kut chu a vai ve a, thil dang tihna hun insiam lêk lo a lehkhazir chu hetiang hi a ni mai, an zei lo tlat. 

"In va inthlah rei em em ve..inpa hian a duh ve deuh tawh tak tak chein ka hria" phur zeta Nghetin a lo tih chuan, "Sawi lo mai teh. Zei deuh tur emaw ka tia, a zei hlawl lo. Hmeichhe zei deuh hlek phei chu an thin a rim zawk hial ang ka ring" ka ti a, min ngaihsakna lantir a tum ve ţhin dan te chu ngaihtuah letin ka nui reng a, min vin pung pung reng se a inhmeh ber mai.

"Rita-i nen an chanchin min hrilh aţang kha chuan hmeichhe zei deuh pawn a duh ka ring tho. Rita-i kha a zei dawn a, Nicholas hian duh tak tak miah lovin a kawp mai mai zawk a nia, kan mi duh zawng tak te hmaah hi chuan kan zam a, kan danglam vek ţhin alawm. Chutiang chu a nih ka ring, a duh tawh che ang a, chu chuan a ti danglam aniang" tiin ka pasal ţan zawngin ţawngkam a nei leh tawh a, "Pastor nise a inhmeh zawk ang. Piangthar ţha deuh hlek phei se chu min ţawngţai tawh ang ka ring. Nu Hlimi lahin chhung inkhawm a hman apiangin kan nupa a insiamţhat kan ngaih zia a sawi chamchi reng a, Nicholas tak pawh hian, 'ka nu chu a ţawngkam ringawt hi chuan hremhmunah min thlak ngun tawh' a ti fiamthu fo mai. Midang a hmuh fel em em laiin kan nupa ah hi chuan sual chiah a hmu a, Nicholas hi ngaihven turin min ti fo na a a fapa zawk hian min duat hliau hliau se chu a lungawi miah lo ang" ka ti bawrh bawrh a, ka ţhiannu ve ber a ni a, a hnenah hian engmah zep ka nei ngai lo. Diktak chuan ka pianpui unaute ai pawhin ka ring daih zawk. 

"Nangmah a mil vak lo che a, mimal ang zawnga beih chiam ai chuan Nicholas a hmer tel ve mai mai a nih chu" a tih chuan, "Awwii...ka sualna a sawi peih lutuk hi chu maw, 'ka nu ka sual emai min ţawngţai rawh' tih mai te ka duh ţhin a, ka awm ve reng laia a ţhiante hnen a min han sawi tak tak ţhin phei hi chu keimah ngei pawh hi ka in rap ţhin. Min rel nasat phei chuan Setana hi kan chhung hnai deuh a nih duh hmel thei a nia aw" fiamthu ti tak deuh hian ka ti a, kan han nui dun leh rih a, Nu Hlimi leh Faith-i hian nun an ti nuam lovin inchhung an ti hrehawm lehzual a, engtin pawn awm ila keimahah sawisel tur an lo hmu bik zel a, Faith-i ngei pawhin inleng awm laia min ţawngkhum fek fek te a ching tawh a, rilru no deuh chu ni ila ka ţap ru ve fo in ka ring. 

"Ka hrilh lawk che kha..a nu leh a farnute zia a mak lutuk ka tih kha" a tih lai chuan ka lo pawt chat a, Hope fel zia ka lo sawi ve vat a, "A ni maithei. Khawlaia kan inhmuh pawn min be ve ziah a, mahse Faith nen englai pawn an inzui a, tupawn an sawi lang ve zel ang. A felna lai sawi lang ţalh an awm ngai meuh lo. Sunhlu kung vang ringawt pawhin buaina a chhuak zing tawh a, Nicholas nen in innei dawn tih ka hriat hlima ka hlauhthawn chhan ber pawh a nute hi an nia, nangmah i nia, ka hlau lutuk lo zawk alawm" a ti a, Ngheti sawi ang tak tak hian kei ngei pawhin, 'hmeichhe dangin hrawn se engtin nge an awm ang aw' ka ti rilru ve fo mai.

"Anthony leh Nicholas te hian ka thlavang hauh tlat lo se chu kan buai nasa tawh viau maithei a ni. Thinrim a insum thei lo chi ka ni a, anni lahin an inchhung ah na na na chuan min hlau bik lo nasa mai bawk si, mahse mipa pahnih hi a laiah an ding zel a, ni lo se chu ţhenawm khawveng te sawi hat theih khawpa buaina lian tham kan nei tawh maithei a ni" ka ti ve charh charh a, mipa hi an ţangkai a, a hunah tak inrawlh ţhin lo se chu kan buai viau tawh tak tak ang. 

"Insum hram hram rawh..i nu a ţawng thei si a, boruak eng emaw a awm chuan nangmah i mualpho ber dawn a nia. In pa nen hian inpawh phawt ula, an endan che a dik lo zel a nih chuan amah ngeiin in dan a rawt mai ang" a ti vel a, keipawh ka dik vek bik chuang lo ang a, mahse an pawi ka sawi lo chung pawha ka tihsual leh ka ţhat lohna an zawng chawp ţhin hi chu ngawi renga tawrh tlawk tlawk a har ve ţhin. 

Dar11:30 velah Nicholas a lo thleng a, a thusawi ang chuan a awm ngei alawm. Nghetin a lo be luam a, a rul tawk lek lekin a chhang a, an la in nel vak loh vang aniang ka ţhiannu nen hian inbiak bawrh bawrh an nei khat khawp mai. 

"Ka peih lo a sin mawle" ti nang nang chungin ka zui leh dat dat tawh a, "Kan haw hma dawn nia" a ti ve mial a, motor a ka ţhut luh rual a hnunglam ka hawi chuan seat hnung a present bawm lo inhung chu ka hmu a, ka mit a lak deuh tlat avangin ka la ta nge nge a. 

"I hming pawh i ziak ve nange?" ti a zawh pahin ka en kual vel a, engmah a inziak lo tak tak. 

"A ngai kher hleinem" ngaihsam zet a a tih chuan, "Kal an tam phei chuan an dahkhawm ruih ang a, i pek tih an hre thei nang" ka ti a, hmeichhia hi chu kan ngaihmawh a ho a, hming inziak lo mai mai hian ka awm a ti nuam lo ve hial a, ziah chawp mai te ka duh rum rum tawh. 

"A tuamna aţang khan an hre mai ang" a lo tih leh chuan, "Firstcry a i lei a ni em?" ka ti a, min en ve lem lo hian a bu nghat a, "Ka hriat chat mai chu. Hetiang hi an hmang fo alawm. Midangin an lei ve phei chuan a tuamna inang a awm dawn a ni mai" ka ti zat zat a, eng he hu ah a ngai ve lem hlei lova. 

A ţhiante in chu kan thleng a, inchhawng sang ve angreng tak a ni a, chu in thlir chhoh vang vang paha, "Khawi lai berah nge an awm a?" ka tih chuan a chung ber dawttu an luah thu min lo hrilh a, Aizawl ah hi chuan mi in luaha khawsa an tam a, mak ka ti hran lo. 

Inchhung chu a bengchheng kher mai, hmeichhe nui ri a tam ber a, ţawng lang lang ri hriattur a awm bawk a, an chei nalhin lawm nasat an tum hmel khawp mai. Inchhunga lo awm hoin Nicholas nen min hmuh chuan ţhenkhatin min lo lawm a, ţhenkhatin min en hrek hrek a, hmuhnawm thlir taka min lo thlir tawk pawh an awmin ka hria. 

"I lokal ve duh pawh ka ring lo a, i ti lawmawm hle mai. Inpa hnenah hian lo hruai ve ngei ngei rawh ka tia" tih pahin hmeichhe pakhat hian min kuah thuak a, naute nu chu a nih ka ring. A lian vak bik lo a, hmaitlang hriam lam deuh, hmelţha veng mai a ni. 

"Ka lokal ve chu a nih hi" ka ti a, hetiang hunah hian sawi tur ka hre lo tlat zel a, miin ngeiawm an tih tur ang hian ka lo ţawng leh ţhin.

Mipa pakhatin Nicholas a koh tak daih avangin chunu bawk chuan, "Lo ţhu rawh..a hmelhriat an awm nual ang a, i bulah a awm reng thei lo maithei a ni. Kan pahnihin kan inkawm daih dawn a nia" a lo ti leh zung zung a, ka ţhut veleh ka bulah a lo ţhu ve a, a fanu ni awm tak midangin an chhaih nui ar ar lai chu hmuhnawm tih hmel tak hian a thlir a, naute chu a lawmawm viau nain fa neih ve ka chak phah chuang ţhak lo. 

"I ril a ţam em?" a bo vang vang hnuah a rawn lang leh hlawl a, rin ai takin mi an tam lo a, a zia phian mai. 

"Ţam lo..hei Rinpuii nen hian thingpui kan in alawm" pangngai takin ka lo ti ve mai a, naute nu ka tih kha Rinpuii hi a ni, a fel em em mai lehnghal. 

"I duh leh lokal ve la..thlanglamah sawn kan awm a" a tih chuan mawng kan meuh hian thlang lam chu ka thlek a, mipa pawh, hmeichhia pawh an awm nual mai. 

"Aaa...ka peih ve lo..nangmahin va chhuak leh zawk rawh" ţhut ţhat leh pah hian ka ti a, ka bag ka pawm ran a, hmelhriat loh vek an ni bawk nen, mi tlem viau e ti lo chuan ka ri par par ngam bik lo. 

"I lokal ve duh chuan min lo be mai rawh aw" a ti a, ka chhip a tuai zauh hnuah min kalsan leh a, thlang lam pawh an thawm a ţha khawp mai. 

"Phaiah lehkha kan zir ho ţhin a, a naupang pawl kha a ni ziah a, mahse, tuichilh na na na chu keini aiin a thiam zawk a" no a thingpui thlit chhuah paha Rinpuiin a tih chuan a lam hawiin ka ţhut dan ka siam rem a, Rita-i pawh a hre ve ngei ngei ang.

"Rita-i pawh a tel ve ang tiraw?" ti a ka zawh chuan, "Aw...tel e. Khawnge maw a kal daih ni? Thlang lamah sawn a awm ve aniang" a ti ta mai a, thlang lam chu a thlek dâk dâk a, a hmu mai lo nge ni, "Khawiah emaw a awm ang. Ani chu a lokal hma a, ka ţhianţha ber a nia" a la ti zui. 

"Ka sawi awmzia i man lo a nih kha. Phaiah chuan a awm ve ţhin ang tiraw?" ka tih leh chuan, "Ni dawn tak" a ti hlak a, a nui zui hak hak a. 

"Lokal thar ho saw thingpui ka va pe lawk ange ka rei lo ang. Kan sawi dawn nia" ti a min hrilh hnuah min kalsan a, mi tlemte hnena thingpui a sem chhung pawh chu rei ka lo ti khawp mai. 

"Saii, lokal rawh pindanah hian" ti a min auh lang lang takah chuan ka tho tharh a, an pindanah chuan ka zui lut a, "Kan indah hnawk rem rum a nih hi. Thil pek an lo keng zel si a, bakah zingkar aţangin min rawn chim a" tih mawlh mawlh pahin khum a thil awm ho chu a la sawn sawk sawk a, khum lu ngheng a rem ât a ka ţhut hnuah ka hmazawnah a lo ţhu ve a, "Chawhnu inkhawm banah hunserh kan ti daih a, hun a la tam. Nicholas nen hian in inhre ngai lo tak tak em ni?" a ti a, ka lo bu nghat a, kan inneih dan hi a ţhiante pawh hian mak an ti ve tho ang. 

"Rita-i chu ka ţhiannu ber a nia, Nicholas nen hian keimah aţanga inhria an ni a tih theih ang. A fel lutuk, nangpawn i ngaina nghal mai ang" a ti leh a, a ţhiannu chu a fak ve khawp mai. 

"An inngaizawng ţhin em ni?" ka ti bawl a, ka pehhel kual vel peih lo a ni. 

"Inngaizawng ti ila...a ni chiah lo" a ti ban charh a, ka ngaichang reng tih hriain, "In innei tawh a, ngaipawimawh duh suh. A tawp vek tawh alawm" a ti dam thlap a, min chhanna chu ka duh khawp a la ni chuang lo. 

"An inngaizawng emaw ka lo tia" ka tih chuan, "Ni lo e...an inkawp rawt a, keini pawn an inngaizawng emaw kan tia, mahse a ni lo an ti ve ve si a. Nicholas hian duh se chu an inngaizawng maithei bawk a, chutiang vel chu a ni. Rita-i hi a fel a, mi duh lo chung tihluihna hmanga neih luih tum chi a ni lo a, a rilru ang hi Nicholas hian a pu ve thei lo tih hre vek mah se a pawm thiam khawpin ka hria. Lungawi loh nan a hmang ngai lo" a ti dap dap a, ka hnen a thu sawi dan tawk a thiamin sawi chin tur a hre khawp mai. 

"Rita-i chuan a duh deuh tihna a ni maw?" ka tih chuan, "Aw..duh e, mahse, i awm ti nuam lo duh suh. Mi nupa kara tlakzeh tum chi a ni lo a, minister tunu ve lai a nia, a chapo ve ar a nia. Amah duh lo tu na na na chu a umzui reng lo tawp ang. Chutiang ti duh tur khawp a nun hniam a ni lo" a ti a, a ţhiannu thlavang a hauh na lutuk chuan ka nuih a ti za angreng. 

"A ţhat chu" ka ti ta ringawt a, "Ti hian lo awm rawh. Midang ka va ngaihven lawk ange" tiin min thawhsan zui daih a, thudik a sawi ţeuh ka ring nain Rita-i chungchangah kha chuan zep a ngah khawp ang, hetiang hi chu an hmel landan leh chezia ah hian a hriat ve ţhin. 

Keimaha rei pawh ka ţhut hmain Nicholas a lo lut a, Rinpuii fanu a la pawm zui. "A tlak lek lek kha...i pawm thiam ve thlawt lo a nih kha va pe let rawh" ka lo tih chuan, "Thiam e..naupang chuan hetianga tih te hi nuam an tia" tih leh boruaka vawr a rual ta mai a, a dawng leh vat nain ka ding uaih a, ka mawng a za vek thei alawm le. Naute pawh chu a buk euh euh a, a meng phar nasain a hrilhhai hmel khawp mai. 

"Hei...a men pawn zawrh zawrh hi...a nu leh paten an vawr ve ngai lo aniang chu. Vawiinah kum khat a tling chiah a, i ti awm ang lo lutuk mai" ka tih hlak hlak lai chuan naute hmel chu a lo en ve a, "Fate vawr lo an awm mang lo ang..nau awm dan awlsam ber alawm" a ti awlsam et a, a va han laktlak loh ber mai tak. 

"Eng nge i rawn tih ve a?" ka tih chuan, "Chutiang inzawh a ngai em ni? Ka nupui bulah ka awm chak a nih hi" pawisawi lo awm tak hian a ti a, naute chu a sawi che dat dat reng a, min en ran bawk a, tunah tak hi chuan pawi a sawi lo takzet a ni. 

"Mi hi i ngaihsak thar riau mai a, ka ngaih a ţha chiah lo" ka ti ban charh a, a mize inthlak hi ngaihţhat lohna tham chu a nia lawm. 

"I maksakna hian min hip tawh a nih hmel" a tih chuan, "Lutuk che hian" ka ti hlak a, min hnial kalh leh ang chu ka tih laiin phawk hra hian min en reng a, kei lahin amah ngawt chu ka en a, "Eng nge a? I kaih em ni?" fiamthu a ka tih chuan, "He naute hi a zung nia mawle" hmel danglam hauh lo hian a ti a, a che tawh lo reng reng. 

A mit aţang chuan a taksa chu ka mitin ka chhui thla a, a lo zunkhum tak tak chu niin. Ka nui chhuak hak a, naute lah chu ţha deuhin a awm a, an in pawm ţhang tih a hriat reng mai. 

"Rinpuii va ko teh" a tih tak hlukah chuan ka tlan chhuak vat a, Rinpuii hnen a ka va hrilh hnuah hmanhmawh deuhin kan inzui lut leh a, "Awii...Nicholas, tihpalh lutuk. A nutei te ho khan an pawm reng a, diaper an lo hren tir lo pek a nih hi" tih hlut pahin a fanu chu a la a, Nicholas lah chu a chhuak nghal daih a, naute zun mai mai chu a ho emai. 

Huh phunga a lo luh leh chuan ka lo nuih tat tat a, a va insil ve ni ngei tur a ni, ka fiam ang chu ka tih laiin hmeichhe pakhat a lo lut a, "In lo ţha maw? Ka chhuak leh lawk a" tih pahin a nui sang a, a fiamthu ve deuh em maw ni? A biangsum lah chu a khuar kalh lehnghal a, a ti duhawm khawp mai. 

"Bawihtei hian Nicholas a lo zunkhum a, a zia lo tak tak a ni. Saii, hei Rita-i aw" Rinpuii chu ka en a, chumi hnuah lo lut thar nu chu ka en leh a, a sang a, a pian a nalhin a hmel pawh a ţha veng a, a ngo lo thung. 

"A ni maw? I hming chu ka hre ve tawh alawm. I va fel ve" zangkhai deuhin a ti a, a kut a rawn phar chhuak nghal zat a, min chibai ve dan lah chu chibaiah pawh ka ngai lo, nghet lo deuh a min vawn zawk hnuah a kut a la let lehnghal a, ka pasal chu a melh ralh a, ani'n phone a lo bih daih thung. 

Biak loh aiah tiin, "Aizawl ah i awm em ni a?" ka ti mawi ve a, "Aw..ka awm reng rih tawh ang. Hna ka thawk nasa a, taksain a chhiat phah a, hahdam phawt ka ngai. Hlawh a ţha viau nain taksain a tawrh chuan awmzia a awm lo emai" a ti deuh duah a, Nicholas pawh a be ve tak nain ka ţhiannu a chhan ţhin dan bawkin a rul tawk chiahin a chhang a, Rita-i chu a lawm chiah lo niin a lang. 

Hunserh hman zawh chuan chaw ei a ni deuh nghal mai a, cake chu zan lamah an ti deuh a, kan awm ve hman dawn lo a nih hmel. Chaw ei khamah kan awm khawmuang rih a, ka zun chhung lekin Rita-i chu Nicholas bulah a lo awm hman a, a banah a kuah bet tlat a, eng emaw a sawi sep sep reng a, an hmai chu a insi lo chauh a ni. 

An bulah pawh kal ve duh tawh lovin an ep chiah dawhkan bulah ka ţhu a, Rita-i lah chuan a fawp dawn emaw tih mai tur a ni tawh. Ka pasal zawk chuan nuam a ti chiah lo niin a lang a, mi an la tam angreng si, keipawh chuan hmuh nuam ka ti chiah lo a, ka zahpui a nih ka ring. 

"Engahmah ngai suh..an tihdan ve reng a nih saw" Rinpuiin a lo tih te chuan ka nui lui peih tawh lo. Midang awm ve te pawhin an hmuh vek laia an infawp lo chauh chu ka ngei a ni ber. Thawh lawk a an hmai va nawrchilh nawk mai te pawh a chakawm rum rum alawm. 

Ka pasalin min lo en chuan rum zetin ka lo melh a, nuam lo a ti tih chu a hmelah a hriat vek a, a ban pawh lak sawn a tum ngun mai, a bula ţhu chu a beidawng har em a ni. Ţhian an nihna ah..aaa...ţhian aia thui pawh aniang, thinrim a hnar a hreh ve dawn tho si a, ka khawngaih ţhak lo thung. 

"Haw ang" ka tih takah chuan Rita-i pawhin min rawn nuih seih a, a thlah ve ta nge nge a, Nicholas pawh a ding nghal hluai mai. 

"In va hmanhmawh ve..la awm ve rih ula, Saii, in pa hi la awmpui ve rih rawh. Ţhian hlui inhmuhkhawm lehna ang deuh a nia, kan ngai ve alawm" Rinpuiin a lo tih chuan, "Aaa...ka haw pui loh chuan an inseh hlum takngial dawn. An inhnim thet thet tawh a, insaseng vat loh chuan mihring kan inchan zo lo ang" ka ti fiamthu a, ka fiamthu takmeuh a ni. Ka ţawng hre pha ho chu an lo nui hak hak a, Rita leh Rinpuii te erawh an nui ţha duh vak lo, mi fiamthu ve te. 

"Kal ang" tih leh kal ka rual a, min zui nghal mai lo nain min um pha har vak lo thung. 

"I pasalin hmeichhe dang a hnaih meuh chuan haw i rawt chung mai alawm" tiin kan in lam pana kan tlan lai chuan min fiam zawk zui a, "Ka chhanchhuak che a nih kha. I ţhian pawh nise i ngaihtheih loh chuan nangmahin talchhuak ve mai ta che" ka lo ti vin hlar a, "Ka ngaithei lo hleinem. A nuam lutuk zawk alawm" a ti vel a, ka bag hrui ka hum nghet tawh viau mai. 

"A ţhat chu...inah min dah phawt la i kal leh mai dawn a nia" ka ti ve ngat a, "I bula awm ka chak zawk" a lo ti a, nur nanga amah ka en lai te chuan a nui suk suk reng a, min runluih ve deuh em maw ni. 

"Zanin chu kan mut hran a ngaih hmel khawp mai" ka tih chuan a nui chhuak ta hawk a, "Rita-i kha i thik tih han sawi teh" a tih chuan ka hmui ka lo ti pawrh a, min hmu lem hlei lova. 

"Khatiang mai mai ka thik i ring em maw ni? Ka tan chuan pangpar ang chiah in ni. Pangpar thi khawng rup tawh, nuai sawm mai mai theih ang vel" ka ti chu a ngaihdan a nih loh hmel khawp mai. Ka thik lo ve chiang a, lo thik pawh ni ila a hriatthiam theih turin ka ti lang ve lovang. Hetiang kawngah kher kher hi chuan ka inthup thei lutuk tlat. An awmdan khan min tih zah em vang zawk a ni. 

"Kan inkar siamţhat ka tum hian hel tlat zel suh" a ti leh hmuk tawh a, "In runluih vel hi ka duh ve lo. Min runluih nasat poh leh nangmah zawkin hrehawm i ti ang. I awm ang zelin ka awm thiam ka tih kha" thutak deuh zawk hian ka ti a, min runluih niin ka hre tlat tawh.

"Ka runluih lo che" bul zeta a tih chuan, "Ka hmuh tur ngeiin in in liak hlup hlup lo chauh a nih kha. In tenawm emai" ka ti hlak a, in kan thlen meuh chuan kan inbe leh hleithei tawh lo, ka rindan sa a ni. 

Ka inbual zawh hnuah pawh sofa ah thlang lam hawiin a ţhu reng a, a khawhar hnem ţhin tu ber Rita-i a hmu leh a, a ngai thar leh vel a nih hmel. Mei a zu nain zu erawh a in lo hlauh a, "Naupang hi kum khat an tlin tawh chuan an zun pawh a hing tawh a, inbual lo chuan lo mu ve suh ang che" ka ti a, ka mutsan ta daih a. 

Ni leh thla a liam ve zel a, kan hun hman dan erawh a ngai pat reng a, Rita-i khan a rawn be zeuh zeuh tih ka hria a, ka bul lawka a phone a awm lai reng ten Rita-i message a lo thleng ţhin. Chhandami pawh a pasal nen innei lehin veng dangah a awm tawh a, kan inbe reng a, min fuih nasa ţhin. Hrehawm a tih thu a sawi dawt ngai lo nain a fate vanga engkim a tawrh a ngaih thu min hrilh ţhin a, a tirah mil lo viau mah ila ka pawh ber pawl leh ka biak tam pawl a ni der tawh. 

Rita-i chanchin pawh a hriat tam bik loh thu a sawi rualin zuam ngawt lo turin min hrilh tel a, ka hlau vak lo thung. Nu Hlimi leh Faith-i lahin ka tihsual an chang reng a, Faith-in dawta min puh avangin Nicholas pawhin min khak hial a ni. Kan inhauh phah hrep a, min khak ka ti tak nain a ngawi hmasa zawkah a ţang leh tho tho. Dawt sawi a thiam em a, Anthony takngial pawhin ka thlavang a hauh lo a, ka lamah thudik hre tu Hope a ţang tlat thung. 

Ka pasal nen kan inpawh viau tawh a, thla 6 lai kan inneih ve hnu phei chuan nupui anga min en thu a sawi fo a, ka pasal a nihna hi pawm ve mai tawh tura min duh thu te min hrilh ţhin. Mahse, ka ngam lo tlat a, ka rilru hian khawi lam nge a âwn ka hrechiang thei lo a, ka pasal bula ka awm laia Mapuia ka hrechhuak zel te hian awm a ti nuam lo a, ani phei chuan a bialnu ang chiahin min ngai tawh a ni. Pakhat tan nupui ka ni a, pakhat tan bialnu ka ni a nih ber chu. Kei lahin ka rilru put hmang diktak ka hrethiam thei mang si lo, ka haw lo ve ve a, ka duh awm ka hre bawk si lo, ka awmdan hi a hahthlak takzet a ni. 

Rita-i phei chu lo len zeuh zeuh a ching a, an hausa bawk nen, mi hausa lawm tih takah Nu Hlimin a lo be ţha hluak reng a, Pa Chhawna erawh chuan a be ngai lem lo. Faith nen an inkawm thei phian a, Aizawl ah ka awm hahdam lawk dawn ti si a cham rei tawh khawp mai. Nicholas nen a inkawmngeih satliahah an ngai vek a, Rita-i rilru put hmang ka hrechiang viau thung. Midang hrechiang thei hle si keimah ka inhre lo tlat hi a ngaihna ka hre lo, rilru a insual bap bap reng mai. 

"Mapuia nen hian in inzui nasa mah mah aw. Mi sawi in kai vaih chuan nangmah zawk a nia mualpho dawn. Inpa aia i duh zawk a nih chuan i chhungte hrilh la, i pasal hi ţhen law law rawh" Nghetin a ti hlak hlak a, kan night a, mut pawh a chhuak thei lo. 

"Chu chu lawm...inhmu tlem deuh ang ti ve fo mah ila awmzia a awm lo. Kan mualpho rup thei a nia ka tih pawhin kan thawk dun a, chhuanlam tur a tam alawm a ti daih zel a, ka rilru a hah ve zia aw" ka ti a, "Nih leh Nicholas hi ţhen i la duh reng em?" ti a min zawh chuan ka ngawi ta daih a. 

"I ngaina ve deuh tawh tiraw?" a tih leh chuan, "Aw..ngaina e..ka huat tawh loh chuan ka ngaina tihna a ni mai a, mahse ka duh tihna a ni chuang lo a, ka innawr lui duh lo bawk a, inţhen lam kha chu sawi rih lo phawt ang" ka ti ta daih a, a nui var var a, a ngaihtuah tur awm ang ka hre vek. 

"Inţhen ula chu hrehawm i ti ve tawh dawn a nih kha" a tih chuan ka en phawk khawp mai.

CONT..