HIS LAST LOVE-14

HIS LAST LOVE-14

"Eng nge awmzia?" ka ti ban charh a, pangngai deuhin ka awm emaw ka tih pawh hian Ngheti hi chuan dik lo lai a lo hmu chat ţhin. 

"I ngaina tawh alawm. Duh lo mahla i ngaina tawh a, awm hrang ula chu i khua a har anga, i ngai ve veng veng mai ang" a ti a, a nui zui kar kar a, ka pasal nen an in nel viau tawh a, Mapuia chanchin min sawipui khat tawh khawp mai. 

"Ka pa awmdanin zir se chu inţhen pawh ni ila hrehawm ka ti vak lo ang. Mahse, ka pa'n a phal miau lo a, tuman min lawm huam ngam dawn lo bawk a, mahni a in ka luah hrang a nih loh chuan ka nuam sa kher lo ang" a lam hawi pah hian ka thaw halh a, pawi min tih pui ang pawn a awm lo. 

"Zawi zawiin rilru i pe ve tial tial mai ang. I vannei a, pasal i nei ţha alawm le. A hmelţha si, a lian bawk si, a kut a thisen zam lang kalh zel te hi mawi ka ti a nia" a ti a, a phur sarh mai bawk si a, nitin ka pasal a fak mawlh mawlh reng mai.

"A ho emai...chutiang te chu damloh laia drip khai nan chiah a ţangkai. Ţangkaina dang a nei lo emai" ka ti ve thung a, ka hmuh ngun lutuk vang nge ngaiah ka nei titih der tawh. 

"A ţha ve alawm..i hma hun tur chu nangmahah a innghat a, Mapuia chungchangah pawh thurawn pek dan tur che ka hre lo, thil ţha leh ţha lo thliar thiam rual i ni tawh a, ţha i tih angin i kal pui dawn nia" min ti a, thil dang min sawipui zui daih a, rilru a insual buai nasa khawp mai. 

'Hei khum a ruak vek' ti a ka pasalin message min lo thawn chu nui var varin ka chhiar a, "Kar vak mai rawh" tiin fiamthuin ka chhang let a, a mutthilh daih tawh ka ring a nia, a khua a har ve a ni ngei ang. 

'Keimahin ka mu thiam tawh lo' a rawn ti vel a, phone en in a nui ve suk suk reng ang chu. 

'I nu leh pate inkarah va inthawlh kuk la a ni mai lawm' ka tih chuan, 'I bulah lo chuan ka mu peih lo' a ti a, a zak ve ngai miah lo hi thil mak tak chu a ni. 

'Tlaivar ţhak la a ni mai alawm' tiin ka chhang veleh a, ka thutak bik vak lo. 

'Naktukah ka lo hruai ang che' a ti a, 'A ngai lo' ti a ka chhan letna chu a en duh tawh ţhak lo. 

A sawi ang ngeiin ka inthlak hma hmain a lo thleng a, kalkawina tur kan nei lo bawk a Ngheti pawh kan ruala haw ve turin a sawm a, min duhpui lehzual sawt dawn tihna a ni mai. Mapuia ka hmu hman ta lo a, hmaichhan ngei a ti ti pui ka duh khawp mai. Ngheti sawi ang khan pasal ka nei tawh a, kan pa hi hmangaih lo mah ila mipa dang kawp tel chu a rem ţeuh lo a ni. 

Ka intih fai hnuah chaw ka ei ve a, zing lamah hi chuan kan ei rual khat a, tunah chuan mahni chauh a ei pawh hrehawm ka ti tawh lo. Nicholas a chhuah hnu chuan mut hahdam tumin inchungah ka chho a, thlang lam bathlar a ka chhuah rual chuan Anthony pawh a pindan aţangin a lo chhuak ve chiah a, "I kal dawn nange?" tiin ka lo zawt vat a, "Aw..kal lo mai ang..ka nuam lo riau a" a ti a, ka awmna lamah a lo phei pah a, ani nen pawh hian kan inkawmngeih viau tawh. 

"A va zia lo ve...keipawh chawhma chhung chu ka mu daih ang. Kan mu mumallo thei lutuk a" ka tih laiin, "Rita-i lo leng ţhin hi eng nge i ngaihdan?" tiin min lo zawt daih a, ka hamhaih lek lek a ni.

"Nicholas nen an inkawm ţhin a, a ţhianpa a lo tlawh ve ah ka ngai" ka ti a, dawt ka sawi chiang a ni. A hmel chu sawi loh, a hming thlengin ka hne vek tawh. 

"Lo len a chin aţang chiah hian ka hre ve a, fimkhur rawh aw...hmeichhe zei tak tak chu mipa tan hnar an har a nia, i pasal a neih sak daih mai ang che" fiamthu ti tak hian a ti a, chu chu ka ngaihdan chiah a ni. 

"Inchhang bung in nia, a ţhiante chanchin a hrilh ngai miah lo che em ni?" tlak dal bawh al al chung hian ka ti a, a lo bu nghat a. 

"A inkharkhip tlat a, kan hriatah chuan zirlai leh hna chungchang chiah a sawi lang ţhin. A ţhiante an lokal ngai lo a, Chhandami bak hriat kan nei meuh lo" a tih veleh, "Chhandami hi a bialnu a ni lo tih i hria em?" ka lo ti a, phawk deuhin min en a, a hre lo tawp a nih dawn hi.

"In rin dan kha a dik hleinem, in ngaih ang a ni lo bawk a. Chhandami hi hmeichhe lepchiah a ni lo, Nicholas nen pawh ţhianţha tak alawm an nih. An inkarah thil dang a awm lo. Chhandami hi miin an sawichhiat vak vak phah a, a tuar tu ber a ni ka ti ngam sak. Ka khawngaih letling zawk" ti a ka hrilhfiah hnuah pawh a la ngawi reng a, ka thusawi chu mak a ti ve hle niin a lang. 

"Fa pahnih lai nei tawh a ngaizawng tlat an tih khan keipawn mak ka ti lutuk a, mahse tunah chuan engkim ka hre tawh a, Chhandami hi a lo fel ngawt mai" ka tih leh chuan, "Engmah ka lo hre ve hleinem" a ti charh a, a dik tho ang. Veng khata awm pawh kan inhrechiang tawh hlawm lo a, ţhenawm hnai te te kan nih loh phei chuan inhmuh loh vang vang pawh thil awm thei a ni tunlaiah chuan. 

"Rita-i chanchin chu ka hre thui lo a, mahse a ţhiannu chuan mi nupa inkar a tlak zeh ching a ni lo a tia" ka lu ka dawm nghal vang vang a, zan aţang tawhin ka khua a sik ser ser reng a, hritlang ka kai vang a ni ber. Ka hrawk a thip hlur bawk nen, hrehawm ka ti ru khawp mai.

"Ţhiante thlavang hauh hi a na a, ţhian satliah chu nise a lokal reng peih lo ang. Fimkhur la, nangmah inveng reng chungin i pasal pawh hi veng tel rawh. Hmeichhe sual chuan mi chhungkua an chawk buai vek thei a nia" a ti ve ngei a, inhauh chang pawhin a tawpkhawkah lo chuan a inrawlh ngai lo a nia, Rita-i chu a lo hmu mawh viau ţhin a nih hmel. 

"Aw...ka fimkhur dawn alawm. A ţhiannu sawi ang kha a nih tak tak phei chuan min tihbuai duhna rilru a pu bik lo ang" ka ti a, ka lu ka dawm reng avang chuan, "Na i nei em ni?" tih pahin ka banrek a rawn hmer a, "Ka lu a na reng a, damdawi ka ei anga ka mu mai dawn" rawn ti tih a ka han tih chuan, "Mu hahdam rawh...nachhawkna chu ka kawl a sin..i ei duh em?" a ti zung zung a, "A ngai lo ang..keipawn ka kawl alawm. Reilote ka muhil anga a zia mai ang" ti a ka chhan hnuah ka kalsan a, "Tlaiah pawh lo tho chhuak duh kher suh. Kungtei leh phir te ka lo hrilh ang" tiin min au zui a. Anthony ang chiah hian a chhungte rilru hi ţha ve se nuam ka ti mai tur a nia. 

Damdawi ka ei hnua ka muhil chu chawhnu lamah zunchhuakin min ti harh a, dar 2 lek a la ni bawk a tiin ka zun hnuah ka mu leh a, ka harh leh meuh chuan khua a lo tlai ruih tawh. Khum bulah Nicholas a lo ţhu reng tawh a, thawh ka tum chu ka awmah a lo dawm a, "Tho suh..i damloh kha" a lo ti ve ngial a, a thawmhnaw hak ka hmuh rual chuan a la inthlak miah lo tih ka hre nghal bawk. 

"Duty tur ka nia, thawh ngei ngei ka ngai alawm" tih pahin ka tho leh uaih a, "A chawlh theih mai lo em ni?" khauh deuh tak hian a ti a, a ngaih anga awlsam hi nise ţha tur. 

"Theih loh reng reng..duty ngei ngei ka ngai alawm. Ka ţhu tawp dawn tho a, damlo an tam loh phei chuan tih tur a awm lo" ka ti a, a remti lo chung ka tho lui ta tho a. 

Bualin lam pana ka kal chu, "I eng nge na a? Tu emaw hnenah zaninah ka duty ai lo duty la, ka dam hunah ka awi ve ang che ti la a ni mai lawm" ti bul bul chung hian min zui ve zel a, "Ka sawi lawk tawh lo a, tumah an inring lo ang. Min zui reng lo teh" ka ti hlak a, awmzia a awm der lo. 

Ha ka nawh lai te chuan ka bulah a lo ding ve reng a, darthlalang aţangin ka en a, ani pawn min lo en ve reng a, "Chawhnu leh chawhma kha tawk an ti lo em ni a? An chhawr fe vek dawn che a nih hi" lungawi loh hmel fahran hian a lo ti leh a, rum zet a ka melh chung pawhin, "Ka ti tak tak" a ti leh hram a, a buaithlak a ni. 

"Khawvel leh a chhunga cheng te hi i thu chauhin an nung hleinem. Ka hna a nia, hlawh ka hmu a, ka hah ve bawk ang chu. Hlawh chauh duh a thawk ka ni hleinem. Damlo ka buaipui a ngai alawm" ka ti duah a, "Nangpawh i damlo mek a nih hi" a lo ti ve zat a, ka chhang buai peih tawh lo. Ka tih tur ang ang ka ti mawp mawp a, hmai ka phih zawh hnuah pawh a dinna ngaiah a la ding tum bur mai. 

"Min thlah rawh aw....zanin chu nangmahin i lo mu kak leh huang mai dawn nia" ti a ka chhaih fiam vel chu a ngaihtheih loh hmel viau nain "Ka thlah ang che" a ti ta tho a. 

"Vawiin chu nilengin ka buai a, tih tur a tam si, Kungtei pawh a indaih lo. Lu na mai mai chu mutpui tham a ni em mawni le" Nu Hlimin a lo ti hlak hlak a, hei hi a nia mak ka tih ţhin chu. Ka awm ve reng lai pawhin min sawi chhe hreh chuang lo reng reng. 

"Mo nih chuan tawrh chhel a ngai a sin" Faith-in a lo ti ve zeuh bawk. 

"In phut leh lutuk a nih kha. A phak tawk ang chu a ti ve tho alawm. Ke tin lut ringawt ah pawh i rum dur dur kha" tiin ka pasal chuan Nu Hlimi chu a chhang let a, hetianga langsar deuh a min ţawngkhum chang leh, ka thiam zawk ni a a ngaih chang chuan ka thlavang a hauh ngei ngei ţhin. 

Faith-i a phun zui hlak hlak reng a, ngaihven tawh lovin ka tih tur ang ang ka ti mawp mawp a, Ngheti pawhin vawi hnih lai min lo call tawh. Kawn a min lo nghak turin ka hrilh a, kan nupa chuan kan chhuak zui nghal a. 

"I lo haw khan min kai tho nghal la ţha tur a nia, engmah tih ve loh te chuan inthlahrun a na lehzual a" ti a ka chhuahchhal chuan, "Nuam i ti zawk tho alawm" a lo ti duh lek chauh a, "Awm mai mai te chu nuam e..mahse a inthlahrunawm alawm. Ka lo muhil leh kher kher a ni" ti niah niah chungin motor ah ka ţhu lut a, Nu Hlimi ţhiante ho chuan engmah ti ngai lo angah min ngai leh vek dawn a nih hi.

"Mo i nia, an phut che pawh hi a awm ve tho. Mahse, damloh naah chuan inhriatthiam tlan a ngai a" a ti a, a tlan chhuak nghal mai dawn maw tih laiin a kut chuan ka chal a rawn dek a, ka pang a lum leh lum loh hriat tumin a ngaichang vang vang a, ve lutuk hian a. 

"Zanin i tluan thei ang maw?" ti a min zawh chuan ka bu nghat a, min ngaihtuah ve tak tak niin ka hria. 

"Tluan thei ang...tih tur vak a awm ngai lo ka tih chu. Zanah hian kan hahdam daih zawk emaw tih tur a nia, zingah min lo hruai leh la a ţha a ni mai" ka tih laia a lo nui chu, "Eng nge i nuih?" ka tih zawm zat a.

"Ka tello in i awm thei tawh lo a nih ber hi" a ti chu ka ngei angreng khawp mai, a intithei zawk emaw tih turin a awm lehnghal. 

"Ngaihtuah suh ka lo duat ngawt ang" Nghetin a tih takah chuan ka chhuk ve thei ta hram a, ka kal tur chu, "Mu mai mai la, a ţul ang ang chu Ngheti khan ti rawh se" tiin min au zui lung lung a, hawi let meuh a "I thu lo ve chiang e" ka tih chuan, "Min ngaih viau tak leh min lo call mai dawn nia" a ti vel a, Ngheti a lo nui kar kar a, ka nui ve duh lo nain ka haw chuang lo. 

"In pa hian a duat tawh che e...a sawi tho nain a sawi chhuah ringawt aia nasa in a duh che in ka hria" a ti a, a nui hak hak reng a, kan awmdun rei ve tawh a, hmeichhia a ngaihsak lo viau nain min lo duh pawh nise mak ka ti hran lo. 

"Ka ţawngthei lutuk hi a ni mai a, ka hmel a chhe hran hleinem" uang zet a ka tih chuan, "Awii..i zak thei lo e" tih pahin ka darah min nam dat a, kan pa nen a in haw lo deuh a kan awm hi hmuh a nuam a ti ţhin khawp mai. 

"In pa i chawk ho zo vek tawh a, midang pawh hi nakinah chuan i tello in an awm thei lo ang a, duty chhung lek pawh hi rei an ti ngawt ang" a ti vel a, "Aa..ka mizia hi a ho a, mihring ho tak mai ka nia, mahse, a hunah chuan fin kar tur, tumah inbum tir loh tur. Bum theih khawpa mawl nih ka hlauh vang alawm Nicholas pawh ka rin theih miah loh" ka ti a, beisei ka lo nei ve ting tang ang a, ka beisei ang a nih leh si loh chuan beidawnna leh lungngaihna chiah ka chan tur a ni mai.

"A rintlak ngawt ang. A rilru a nghet a, ring tawp rawh" a ti a, thil dang ka sawipui ta daih a. 

Zingah min lo hruai leh ngei a, Ngheti a awm ve ţhin avangin motor chhungah chuan kan inhnial vak tawh ngai lo. 

"U Nico, i luck viau lo maw?" ka ţhiannu chuan a ti pek a, aw then kharh pahin a nui hmel thup tum ni awm takin a hmui a tuai zauh a, zei lo hle si hi midangin luck deuh tura an ngaih hian a lawm thei a nia aw..mahni in hmangaihna hi a lo nasa ţhin a ni ka ti mai.

"Nupui neih tawh hnuah chutiang an in zawt chut chut ngai lo" a ti a, a lawm hle tho si. 

"Ka hrechak alawm. Hlawh nei bakah nihna sang deuh hlek hi chu hmeichhe ţhenkhat hian an pak huam zel a, ngaizawng tu i ngah ngawt ang ka ring, i chhe lo si" a ti khawl khawl a, ka ţhutna nghenchhan vuan chung hian hmalamah a rawn dak a, a phur sarh lehnghal. 

"Nupui nei chung chuan luck a har khawp" a ti a, a sawi ţha duh lo vel lutuk chu a ngeiawm zawk. 

"Nizanah i khua a sik leh em?" ti a min zawh pahin ka pang a rawn dek leh a, a kut a la let leh vat a, ding deuh a hmalam en chung hian, "I khua a sik rih lo" a ti sup a, ka khawsik mai mai pawh heti taka a buaipui chuan khum betin lo na ta ila a buai awm mange. 

Office kal tura a chhuah hma chuan a nu hnenah, "Pâtei hi lo phut suh u aw a damţhat loh hi. Kungtei tih theih bak chu lo ti ve rih lo mai rawh. Mu hahdam rawh se" tiin a chah thlap a, a rukin ka lo nui ver ver mai. 

A kal hnu lawkah nu Hlimi chuan, "Mipa fa hi chu an buaithlak a nih hi. Nupui an nei anga kan hahdam ve deuh ang chu tih nak laiin keini aiin an nupuite hah an hlau zawk a, nupui ngam lo nih te hi a zahthlak tih hriat tur a nia" a ti hlak hlak a, ka hriat ngei tura sawi a nih vang aniang a au ring emai. 

"Tih tur a awm chuan min hrilh la" choka a ka lut zet tawh chu ka chhuak leh a, min lo melh rum khawp mai. 

"In pa'n a hre leh ang a, buaina a tam mai mai. Han mu rawh" a ti hmak a, "Ka hrilh loh chuan a hre dawn hleinem. Tih tur chu sawi la, ka inthlak hunah ka ti nghal mai dawn alawm" ka lo ti ve a, pangpar bak a ni leh lo ang ka tih rilruk lai mekin, "Pangpar ka dahna khi a bal tawh lutuk a, kawt a kan dah ho chu ka rem fel fai vek tawh a, inchung khi tihfai a ngai" a ti chiah reng a, pangpar berkher chu ka buaipui chak loh zawng tak a ni. 

"Ka inthlak lawk anga ka han ti fai ang. Tih tur a awm a ka lo hriat loh palh chuan min hrilh zel dawn nia...fa ang chiaha min en kha" ka ti ve ngat a, diktak chuan ka chau a, mut hahdam chak viau mah ila a phun ri hriat reng ai chuan a duhzawng tih a thlanawm zawk. 

Nicholas a lo haw chuan ka lo inbual fel thlap tawh a, ka muhil hauh lo thung. A tih ziah danin khumah phone a vawm thla a, a kawr phelh pah chuan, "I lo muhil em? Eng nge i an?" a ti a, thawk halh pahin ka dar ka san ak ringawt a, "I mu nange?" amah bawk chuan a ti leh a, min en chik khawp mai. 

"Ka mu peih lo law law a nih kha. Mutthilh ka tum ngial na a ka mut a chhuak thei si lo a" tiin dawt ka hrilh a, a awih lo tih a hmelah a lang reng. 

"Hei hi eng nge?" chhuat a a thil hun chu ka kawk a, "Eitur a nih kha...chaw i ei thei lo emai khang ho kha ei rawh" a ti chiah chu mak ka ti ngei mai. 

"Eitur min leisak ve mial a ni maw?" ka ti a, phur deuhin ka hawng a, eitur chi hrang hrang a tam lutuk ringawt, a rawn khai haw lian ka ti reng a ni. 

"Eng nge i hriat a?" ka ti ta thlawt a, tuna a awmdan phei hi chu amah a ang lo lehzual. 

"Nupui te damlo duat nachang hre lo khawpa chut ka ni hleinem" min elsen ni awm taka a tih chuan za lo deuh hian ka nui hul hak a, "Aa...chut tih vel te kha chu fiamthu mai mai alawm" ka ti ve tak nain, "I thinrim laia i sawi chhuah zawk a nih kha" a ti a, a va han hre rei em em ve mawle. Faith-i thlavang a hauh ţum a kan inhauh nasat zia chu ka sawi tawh a, khami ţum khan chut ka tih zia ka sawi chiam a, a theihnghilh thei lo a nih dawn hi. 

"Kei chuan thinrim chung pawn fiamthu ka thawh thiam alawm" ka ti zaih a, a awih lo khawp aniang tur zet a min melh chung hian a hnar a tum dat a, bualin ah min luh san daih lehnghal. Bualin aţanga a lo chhuah chuan a thil min hawn ka lo ei lai chu lungawi hmel deuh hian min en a, a fel a chhuah chang hi chuan ka hmu chhe lui ţalh ngai bik lo. 

"Rita-i nen in la inbe ţhin em?" tih pahin sana ka en a, a tlai viau dawn maw ka tih laiin a lo la hma angreng a, a rawn haw hma lui ve a nih dawn hi. 

"Lo be ta ila?" tiin min zawt let a, "I bia a ni mai alawm. Ka thik hauh lo nain eng emaw chu a la awm a ni lo maw?" ka ti a, kawppuite dawp vak hi thil nuam tak pakhat chu a ni ve. 

"Awm lo turah ngai ang" a ti liam satliah a, Rita-i chanchin hi a sawipui theih der loh. Fiamthuah a la daih zel. Sawi chhuak chuang lo hian ring ve rih phawt ila a ţha mai. 

Duty hun kan thlak leh tawh a, Mapuia nen pawh kan inhmu leh thei ta. Kan dawhkan hmaah dingin min ngaichang ran a, thil ei puiah min sawm a, chhan mai dan tur pawh ka hre tawh lo, "Vawiin chu haw hma ka ngai a, nidangah a ni mai" ka ti ta ringawt a. 

"I zia a dang riau mai" a ti a, ka biak khat deuh vang a nih ka ring. 

"Ka chau lutuk a, chuvang chu aniang. Tunlai chu inah tih tur a tam lutuk a, hunawl ka nei mang lo" tiin chhuanlam ka siam a, a awih ve tho aniang a bu nghat nghat mai. 

"Duh leh naktukah kan ei dun dawn nia, thil hrilh tur che ka nei" ka tih chuan mak a ti deuh niin a lang a, engmah phei chu a sawi lo. 

In a ka haw chuan Rita-i a lo awm leh tawh a, phir te inkarah ţhuin a mal chungah kawr nalh deuh a dah a, a nui var var bawk a, inchhunga ka lut chu min hmu ang pawhin a awm lo. 

"U Sai, lo ţhu ve rawh. Hei, Rita-i hian chaw a lo ei dawn a" Hope chu a ţawng chhuak hmasa ber a, kei min u laiin Rita-i an u veleh miah lo a, an maksak reuh khawp mai. 

Chutia Hope berin min biak takah chuan Rita-i pawhin min en ve ta nge nge a, lo kal ngai lo ni awm fahran hian, "Nau i keng tawh em?" a ti vel a, a mizia hi lem ka ti ţan riau mai, milem diktak a ni. 

"Keng ţeuh tawh e..a chang leh ka pua a, a chang leh ka pawm a" nui chunga ka tih chuan za lo tih hriat zet hian a lo nui ve a, a lokal ngun ropui si, ka hne hlur tawh. 

"Ka sawi awmzia chu i rai tawh em ka tihna a nia" tim dai hian a ti a, Nu Hlimi a lo lut ve chiah bawk. 

"A rai te pawh kan la rai ve ang chu..hmanhmawh lo la, a rai tur ber pawh ka la hmanhmawh loh hi. 'Ka ning lutuk' tih ruala san chhuah nghal mai theih a ni si lo a, ka inpeih thlap hunah chuan ka puar ve luah mai ang" ka ti deuh kher a, za lo deuhin a nui a nui ringawt a, min chhan ngaihna a hre tawh lo. 

Choka a ka luh veleh Kungtein, "Thingpui i duh em?" a lo ti var a, "Aih...tui ka in anga a tawk mai" tih leh fridge hawn ka rual a, tuivawt hi chuan hah a ti dam ve deuh alawm. 

"Rita-i hi ngati nge a lokal reng le? U Nico nen lo inkawm ţhin pawh nise a ti mah mah deuh chu ka ti. Hmeichhe nasa leh zakthei lo deuh hi chu an lo hlauhawm e..i ti ve tho em?" ti a min zawh chuan ka nui ringawt a, hmeichhe nasa an sawi tawh chuan ka tel ve ngei ngei a ngai a, ka sawi chhiat ve chuan mahni insawichhia ka ni mai. 

"Mahse, a awm tihna chin ka nei ve tho. Ka pi leh Faith hian an be ţha thei em a, nuam a ti aniang. Be duh lo vek se chu a lokal reng peih lo ang" a ti niah niah a, ka sawipui chak hran lo. A hming takngial pawh ka lam ri peih tawh lo. 

"Kungte, Nu Hlimin sunhlu kung bul vel va phiat fai rawh a ti" Rita-i ngei chuan a rawn ti a, tlangnel deuhin choka ah chuan a lo lut a, Nu Hlimi te hi a hriat ţhan an ni mang si lo a, a tlangnel hma khawp mai. Zahna a tlachham ve thlawt a ni. 

"U Sai, ka thil chhuan hi lo vil rawh aw" ti a min chah thlap hnuah Kungtei chu a chhuak a, Rita-i nen chiah kan awm ta. Ka be peih lo lutuk chuan phone ka phawrh a, awmzia a awm lo khawp mai. Ka ep chiahah a ţhu a, dawhkan bawh meuh hian a rawn kun hnai a, "I duh leh hmangaih miah loh pasala i nei thei hi mak ka ti. Ka ngaihtuah nasa ţhin a, in inhre lawk lo lehnghal a ni awm a, engtin nge i theih zawk a?" a ti a, "Ţangkaipui loh tur an ngaihtuah vak vak ngai lo" tih chiahin ka chhang a, min ngaina lo tih ka hria a, min ngaina lo tu lo biak ţhat vak ka tum lem lo. 

"Nicholas hian ka chanchin a sawi ngai em?" ti a min zawh leh chuan, "Sawi ngai nang...thil ţangkai lo kan sawi ve ngai hleinem" pangngai thei ang ber a lan ka tum a, engahmah ka ngai lo tih hria se ka duh a, chuvang chuan amah ka huatna hi a lanchhuah ka hlau ber. 

"Phaia a awm ve lai khan kan inzui nasa a, tun thleng hian min la thlah hleithei lo a ni ber. Zana ka lo biak hian i lo muhil tawh ţhin em ni?" a ti vel a, a naupanchhia bakah hetiang hi a ţhing ka ti ngawih ngawih. Duh leh a ţhiannu Rinpuii kha hrilh se la, ka ngaihthlak chak loh zawng tak a ni. 

"Dawt min hrilh duh suh...ka thu hriat avang ringawtin ka thinrim ngai lo. Ka zawt fiah a, ka finfiah leh thlap phawt ţhin. Dawt hmanga dawi at mai mai theih ka ni ve lo" ka ti hmak a, Kungtei thil chhuan vilin gas bulah ka ding ta daih a. 

"Dawt ni lo ta se?" cho zet hian min melh a, a zam lo ve khawp mai. Rinpuii khan a chapo ve ar niin a sawi a, a ţhiannu hi a hrechiang lo nge hrereng chungin dawt min hrilh tih pawh hriat hran theih a ni tawh lo. 

"Dawt a nih loh chuan thudik a ni mai lawm. Awii...enteh keichu hetiang lam hi ka sawi ve peih lo. Buaina hi ka duh lo a, ka tlanchhiatsan hram hram ţhin. Nicholas nen a in awmdan leh chanchin engkim i sawichhuak chak zek zek a nih leh i ţhiante bulah sawi la. Keichuan a ţhing ka ti tlat, mipa vanga buai hi ka duh loh ber pawl a ni. El pui neih ka duh lo a, a duh takzet che a nih chuan inneih puiah sawm la, i inruk tir mai dawn alawm" ka ti a, hmeichhe dang nei tur angin ka ngaihtuah ngai tawh lova, ka thusawi zawh tak kha sawi nuam ka ti tawh bik lo. Mahse, an induh ngawih ngawih a nih chuan an thu ni rawh se, ka ngaihdan a nih loh pawhin ka ti lang kher lo ang. 

"I awm chhung chuan engmah a tih theih loh alawm. Nicholas pawh hian a sawi dawt lo nain chhuak turin a duh maithei che a ni. Mipa hi chuan thil an sawi tam lo a, i hrethiam mai ang" a tih leh phei chuan ka ngai ho telh telh zawk. He nu hi a â emaw tih mai tur a ni. Ka mipa duh tak hi midangin nei ve ta se, a nupui bulah hetiang thil hi ka sawi ve lo tawp ang. 

"Ka lo zawt chiang dawn nia..a lo duh tak tak anih chuan ka chhuak em em ang..pasal te thu kan hnial ngam nang" nui hak hak chung hian ka ti a, Rita-i tan chuan ka ngeiawm viau maithei a ni.

Dawhkan a ka phone dah chu a nghawr dat dat a, hmanhmawh deuhin ka kal phei a, phone ka en chiah chu ka nui chhuak hak mai. 

"Eng nge?" ka ti nghal thawr a, "I pasal hi min be chak vak nange?" nuihza aw zeta a tih chuan, "In leng i nei a, i va rei ve" ka ti a, Rita-i a ni tih a hre nghal aniang, "Ka lo haw tlai dawn nia aw" a ti ta daih a.

"Engati maw?" ka tih chuan, "Kan ţhianpa a accident a, hospital lam panin ka kal mek. Chanchin ka rawn hrilh leh ang che. A rang lama lo haw ka tum ang a, min ngai lutuk hman lo ang" a ti deuh duah a, tunlai a over lutuk hian ngaih a ti ţha lo rum rum zel. 

"Riak daih mah la a pawi lo" ka lo ti sam êt a, "Khawiahmah ka riah san phal lo che" a tih chuan ka lai ve ringawt nia!

"Aw ka dah" ka ti vat a, a nuih hawk hawk lai chuan ka hmet tawp daih a, min fiam dan a thlak a, tun hnaia min fiam ţhin dan hi chuan min ti zak fo mai. 

"A lo haw har dawn a nih chu. I hmuh duh ţalh leh i leng rei ve deuh anga a ni mai" Rita-i chu enin ka nui seih a, a mitmeng chu a ling nghal hlarin ka hria. 

"Ka nghak lo zawk ang. Ka bia ang a, a kalna hmunah ka kal ve anga a ni mai. Hrilh tur ka nei a, a pawimawh angreng si a" a ti niah niah a, hetiang hi mi chapo awm dan a ni ngai lo, a nun a hniam lutuk zawk a nih hi.

"Phaia in awm lai chuan eng nge in tih ţhin a? Nichin khan sawi i tum zuau in ka hria a, ka ngaihthlak sak hman tawh che" tih leh gas lama phei ka rual a, ka off hnuah ka ţhutna ngaiah bawk ka let leh a, a ngawi dâk reng mai.

"In in luah dun em ni? Nunhlui ka ngaipawimawh hauh lo nain sawi duh i neih hmel em a" ka ti a, diktak chuan ţhenkhat hi chu an bialpa emaw pasal te bialnu tih an hriat reng ten dawt an hrilh a, finfiah mang hlei lovin an lo awih nghal tawp zel a, 'a la duh ang a, dawt min hrilh a nih dawn hi' tihna rilru an pu ngai lo. An kawppuite an haw nghal ringawt zel a, anmahni bawkin hrehawm an ti leh ber ţhin tho si. Keichu ka danglam a, an thusawi apiang lo awih a, thinrim nghal mai chi ka ni ve lo. Finfiah hmasak phawt ka duh a, an thusawi kha a lo dik a nih leh thinrim chauh ila, a nih loh chuan mahni kan inti hrehawm thlawn mai mai. 

"Luah dun chiah lo a, mahse in luah dun ang vel chu kan ni tho" a ti a, a mitmengah chuan a zam bik loh zia a lang vek a, min hrilh chak bawk a sawi vek rawh se. 

"Chung vel vang chuan i la hauh bur tihna em ni?" ka tih chuan, "Kei aia dah pawimawh a neih chuan a chhungte an ni mai. Min pui ţhin tu ber a nia, tun thlengin keichuan ka la ngai hlu a, ka lo len ziah chhan pawh a ni pakhat a, ka ţhiante hi ka thlah ve mai mai ngai lo" a ti charh charh a, a lo luh hlim ang em kha chuan a pawr tawh lo. 

"A nih chu mawle...lo nghak rawh..a lo haw har lo ang" ka ti ve tak na a awm reng turin ka duh chuang hauh lo, a mawiah ka sawi ve mai mai zawk a ni. 

"I duh thlawt loh chuan nei lui reng duh suh, i khawtlai mai mai zawk ang. Keichu ni ila chuan ka pa thu zawm lovin ka hlimna tur lam ka pan ang a, ka mipa duh zawng ka nei lui tho ang. A chang chuan nu leh pate hnial kalh a ngai ve ţhin a, thil dang zawng aiin hlimna a pawimawh zawk. I pasal bulah hian i hlim hlawl lo a nih chuan i hlimna tur um vat zawk rawh" a ti duah a, a thusawi chu a dik tih lai ka nei a, dik lo tih ka nei bawk a, "I lo duh reng tawh zawk a ni lo maw? I rilru i pe ve tawh reng reng em?" ti a min zawh chuan ka ngawi daih a, Rita-i nen a an han inkawm te hi hmuh nuam ka ti lo ngei mai a, mahse, keimahah danglamna dang a awm awm ka hre bawk si lo, hmeichhe dang nen a ka hmuh dun hian nuam ka ti vak lo tih chu ka pawm thlap a, chutih rual chuan thil dang beisei ka nei a, eng ber nge ka beisei ka hre thei bawk si lo hi ka buaina pakhat a ni. 

CONT..