HIS LAST LOVE-15

HIS LAST LOVE-15

"Chutiang thleng thleng chuan lo buaipui ve duh suh. Pindan pakhat inluah ţawm reng na na na chu inhuat luih reng a har alawm. Bakah ka mimal thil hi ka ţhianţha te lo chuan min hriatpui ve ngai lo" ka ti a, dawhkan chunga a kut dah chu a hum ruh vei ţalh ţalh a, a thin a chhe ngawt ang. 

"Kan inkawm nasa em a, nupui a nei ta mai hi awih har ka la ti. A thu chu nise naupangtea nupui a neih duh bik ka ring lo, ka la awih lo a ni ber" a ti ţha leh a, Anthony a lo lut chu a melh ralh a, a ngawi zui ta daih a. 

"Saii, coffee i siam peih em? A hun tawh lo viau nain ka ţhiannu a lokal a, a haw hmain in ve lawk rawh se" inthlahrun hmel taka a tih chuan, "A harsa hleinem...ka lo siam ang" ka ti var a, lungawi hmel taka nuih suk pah hian a bu nghat a, min chhuahsan lehnghal a, a ţhiannu a lokal tih ka lo hre lo reng reng. In khatah cheng ho mah ila kan inhrechiang lo hlawm khawp a nih hi. 

"Rita, inrinniah chuan kan kal thei a nih chu. Ka nu ka dil a, tih tur a awm chuang hleinem a tia, ka chak tawh lutuk. Ka sam hi ka khawih danglam lohna a rei tawh lutuk amaw" tiin Faith-i lo lut chu a phul hlut a, an hmuh lohah ka ner sak a, mize inang deuh hi chu an lo inkawm thei khawp mai. An in upat hleih tehlul nen, inrualkhat ang mai an ni. 

"Saii, nangpawh lokal ve la" Rita-i chuan a ti vel a, "U Pâtei te chu tih danglam vak ngaihna a awm lo ve e...tan tawi leh tawp kha a ni mai a, pawisa sen vak pawh a ngai ve lo ang" Faith chuan a lo ti ve vat a, an pahnih chuan in mitmeiin an nui tet tet a, ka ngei zawng tak a ni. 

"Officer nupui mah ni ila inren hi ka thupui ber fo ang. Nakin lawkah fa te kan la nei ang a, naupang tan pawisa kan la hmang huau huau zawk ang chu. Pasal te berin min hmuh nalh tho te chuan parlour pan dûk dûk kher a ngai hleinem" ka ti a, min hnial ngaihna an hre tawh lo aniang an ngawi dâk a, min ngaithei lo hle tih erawh ka hria. 

Coffee no hnih chawi pahin an pahnih chuan ka nuih a, ka chhuahsan thlengin min enzui maithei a ni. Ha aiah ha, mit aiah mit tih hi ka zawm ţha viau ţhinin ka hria. 

Anthony te ţhian dun pawh inpuiah an lo ţhu ve ran tawh a, a ţhiannu chu hmuh hmelţhat ka tum lutuk nge a hmelţha hlawl lo. A ngo puak a, a var a ni zawk mah. A mitmeng a zimin a hmui a chhah leh a, a hmai a hlai phuk mai. A sam sei tak chu a sen vek a, kawr ban bul a hak avangin a tattoo pawh a lang kalh a, mizo a ni lo em maw ni ka ti rum rum. 

"Saii a nih hi aw..ka nau nupui. Saii, hei hi Ţhuampuii a nih hi" Anthony chuan a lo ti zung zung a, a hming leh a landan chu a inpersan nasa mai. 

"A nih chu...i va fel ve" ka ti mawi ve a, min lo nuih var var a, "Lo ţhu ve rawh" an tih takah chuan an ep chiahah ka ţhu chat a, Rita-i te bula awm ai chuan a nuam zawk hrim hrim. 

An pahnih chuan an infiam bawrh bawrh reng a, kei ka lo ţhu ngawi ran thung a, Nicholas pawh ka ngai ve lek lek alawm le. Ka phone a rik leh takah chuan hmanhmawh deuhin ka kekawr ipte aţangin ka la chhuak a, min lo biak tum tu hming ka hmuh rual chuan, "I va rei ve" ka ti nghal thawr a, ka ngaithla zui nghal a.

"Thil ka lo hawn ang che..eng nge i duh?" a rawn ti ve ngial a, inchhung boruak a hrehawm bawk nen, chutianga min ngaihsak ve ni awm taka ţawngkam a rawn neih takah chuan ka hahdam ve huaiin ka hria. 

"Engpawh rawn hawn rawh ka duh vek. Pâtea chaw a tlem tawh a, lo hawn tel bawk la, thil thlum lam lo hawn hnem rawh..vai dawrah a tam ang. Chaw eiah kan lo nghak dawn che em?" ka ti zung zung a, "Nangmah khan min lo nghak la a tawk mai" a tih laia ka nui ve chu ka inthiam lo lek lek a ni. 

Rita-i leh Faith te an lo inzui chhuah takah chuan, "Landan tih danglam vak hi kan uniform nen a inhmeh ve lo lutuk a, mahse i tih ţalh leh kan kal dawn nia, parlour a ka kal lohna chin pawh ka hre tawh lo" ka ti lang lang a, an pahnih chuan ka lam an lo hawi rang khawp mai. 

"Vai dawrah i ti emaw ka tia, tu nge i biak a?" Nicholas chuan a ti a, a bangbo khawp mai. 

"Inrinniah ka chawhma dawn a, duh leh chawhnu lamah kan kal ang a, nangpawh i sam kha streak ve la, tunlaiah chuan a mawi alawm" ka ti leh vel a, "Ka va hrethiam niaih nuaih lo ve Pâte" a ti ban charh a, a bul velah lah thawm a tamin damdawiin ah a la awm ni awm tak a ni. 

"Aw..rei lutuk lo la, chaw eiah chuan ka lo nghak ang che. Parlour vel chu kan sawi ţha leh dawn nia" tih leh phone dah ka rual a, hepa pawh hi a chut leh lutuk a, ka thusawi dan hmang aţang khan lo hriatthiam ve nghal mai tur a nia, hmel chang a ti ţha a, zei lo eih uih lutuk mai. A hmelţha te ka ti ta vel chu a nia, khawvel tak hi chu a. Kei pawh hi ka naupanchhiatna lai a lo lang leh ţhin a, min haw tute runluih hi a ţha lo a sin le, palzam tum zel ila buaina a tam lo duh zawk tih ka hre reng si a, mahse, ka runluih leh tho zel. 

"I pa bulah kan in hi hung chhuak vek ang ka ti mawlh mawlh a, a duh lo vel a, ţhenawmte hian min nek nasa lutuk a a dik tawh lo reng reng. Teh ţhat tir leh a ngai a nih hi, ţhenawmte nek luih ţalh te chu a Pathian thu lo leh lutuk. Vengchhungah camping a awm apiangin an chhungin an lam dârh dârh a, Pi Ramtiami phei chuan a lam pah hian min nghawk lui ziah lehnghal a, in la piangthar hle si hian min nek lui char char a, teh ţhat tir leh vek hnuah hung vek tur. I pa'n a remti lo a nih pawhin keiman hlawhfa ka ruai mai ang" Nu Hlimin a rawn ti lut bawrh bawrh a, Anthony-a zak hmel chu a khawngaihthlak zawk. 

"An ram chin bak an pel lo ang. Pi Ramtiami te chhung chu tuman sawiselna tur an hre hleinem" a lo ti vat reng a, a ţhiannu chuan phone a khawih a, an thusawi chu a hre lo der a nih hmel. 

"An pel a ka hria alawm mawle. In hnung lamah sawn kal la va enfiah ve ta che. Min si lo chauh tawh a nih saw. Hetiang an nih chuan Pathian thute hi sawi ve tawh lo se la, lam ve lo law law rawh se. Anni ho hian alawm mihlim nu ho min ti hmingchhe ţhin chu" a ti a, ka nuih a lo za a, insum a ngai bawk si, hrehawm tak a ni. 

"An hriat tur khan i lo va ang leh ange aw..a zahthlak a nia, miin min chhaih leh ang a" Faith-in a tih chuan, "Ka hrilh ngun tawh a, min namnul zel chuan an hre khawp ang. I pa pawh hi a va rei em em ve mawle. Saii, inpa hi eng nge a chanchin?" a ti zuah zuah reng a, a thu ve em a sin.

"An ţhianpa a chesual a, damdawiinah a awm. Chaw lo ei san rawh u keiman ka lo nghak ang" ka tih chuan min hnuk hrep duh hmel a pu a, Pi Ramtiami te vang vek a ni. 

"Amah chiah buaipui tu tur a awm em ni a? A ţhiannu a lokal tih te pawh ka hrilh vek a, ngaihpawimawh ve tur alawm. Mi ti thinrim zawng hlir hian an khawsa a, hahdamthlak loh leh lutuk. Pi Ramtiami te chhungkaw chungchang pawh sawi ho fe tham a nih laiin ţhiante chesual tih mai mai, be rawh lo haw nghal rawh se" a tih hlak hlak lai te chuan a kuhva ei lai chu a per velin ka hria. Pa Chhawna hian engtin nge maw a duh zawk ni?

"Aw..kan bia ange" ka ti ţha ve mai a, ka call zui nghal a, ka bulah a ding tlat bawk si, biak der chi pawh a ni lo. 

"Ward ah an dah lut chiah a, i ril a ţam tawh em?" a rawn tih rual chuan, "Ka nu'n lo haw tawh rawh se a ti. Rita-in a nghak che a, Pi Ramtiami ten min nek lutuk a ti bawk a, chung vel chu sawipui che a duh aniang" pangngai deuh a ka tih lai chuan Ţhuampuii chu a ding hluai a, engmah sawi lovin Anthony nen an inzui chhuak a, a pian a nalh zek mai. Kan inchhung angah hi chuan a rawn mo chak lem lo khawp ang. 

"A â thei pung pung sia aw...chaw lo ei ţeuh se la a zia mai ang" a tih laiin Pa Chhawna pawh a lo lut a, Nu Hlimi chuan a lo ngaihven vat a, inchung lama an inzui chhoh lai te chuan rei deuh chhung a ang ri hriat tur a awm a, ka pasal thusawi pawh ka hriat mumal loh phah vek. 

"I la rei dawn em?" ka ti leh ta ringawt a, "Rei lo ang...hrehawm i tih deuh leh pawnah khan min lo nghak mai rawh. Sangpuii te inah te lo awm daih la" min ngaihtuah hmel tak hian a ti a, Sangpuii te hian dawr an nei a, kan nupa a kan len luh ve berna te an ni. 

"Aw...chaw ei ka siamsak ang a, Sangpuii te inah ka lo nghak ang che" Faith-i te hriat ngei tur hian ka ti a, runluihna lam ni tawh lovin Nicholas a thu ngeia kal ka ni tih an hriat theih nan zawk a ni. 

Chaw ei ka siampui thlap hnuah Pa Chhawna hnenah, "Sangpuii te dawrah Nicholas ka lo nghak dawn aw" ka ti a, a lo remti nghal mai a, ngei viau ţhin mah ila tunah chuan Nu Hlimi aiin ka ngaina daih tawh zawk a, mahse, Nicholas a en hran zia mi sawi ka hriat nual tawh avangin ka pawh thei tak tak chuang lo. 

"Ramtiami re raw hi chu ka haw ngawt mai. Mahni chantawk a lungawi thei lo mihring a nia, kawm pawh kan kawm ţhat peih miah loh hi. Zan a biakin a kan ţawngţai dawn pawhin kan sawm ve ngai hleinem. Hetiang mihring nun lem lutuk hi chu Pathian huat zawk tak a ni" tiin Nu Hlimi chu ka kal dawnah pawh a la ang hmuar hmuar reng a, "Fimkhur ţhin rawh. I thusawi kha miin an lo hre hlauh ange. Mihlim ţheuh ţheuh inti hrang pawl in awm ţhin a, a dik lo" Anthony-an a lo tih ve te chuan a thinrim zual sauh emaw tih tur a ni. 

Pawna ka chhuah chuan a reh nghal ruih a, boruak a thiang nghal kawk a, ka dai sawng sawng mai. He in ropui tak hi mi chuan a nawm hmel an ti ang a, a chhunga chen ve pawh an chak viau maithei. Mahse, a chhunga chen nawm loh zia hre tu ka ni a, pawn a riah hran daih ka chak chang a tam zawk mah ang. 

Sangpuii te dawr kawtah chuan mi an lo tam leh viau tawh a, kuhva an ei a, meizial an zu khu hlat hlat a, chaw an eikham tawh hlawm a ni ngei ang. Dawr chhungah ka lut tlang a, Sangpuii pawhin min lo lawm thiam lehpek khawp mai. 

A fanu tê lah chuan min kawh pahin, "Anu hei tunge?" a ti leh tawh a, ka hming hi a hre thei hlawl lo a ni. 

"Saii a nih hi...U Saii tih tur aw" a tih chuan, min en reng pahin, "A hmelchhia" a ti reuh a, ka lo nui hak hak nain a nuam chiah lo khawp mai. 

"I u Saii te chu a hmelchhe hleinem" Sangpuiin a tih pawh chuan, "A hmelchhia" a ti zel a, ka fanu chu nise ka hau ang mawle. 

"Tlaiah khan i nu a lokal a, tunlaiah chuan mo duat kan intihhmuh tawh a, an duh dan danin kan awmtir a a tia, ka nu nen an sawi nasa alawm. An rilru chhiat dun zia kan hai der si lo a" Sangpuiin a tih chuan ka nui ringawt a, ţawng tam lo ila a ţha ber. Sangpuii pawh hi a ţawngthei ve tho a, ka sawi ve chuan mi bulah a lo sawi chhawng leh ang a, Nu Hlimin a hre leh dawn tho tho. 

"Saii pawh engmah kan tih tir ngai lo. Kungtei hian a awl hneh a, hna a kal bak hi chu mut a ni mai a tia, ka nu lah chuan, 'chhawr bawrh bawrh rawh u. In duat leh lutuk chuan a inluling zel mai ang' a lo ti luam a" a ti sar sar a, "Nau in pai har a tih zia te chu a rawn sawi chiam zel a, mi an tam chang phei chuan ka lo ip chawih chawih zel" amah bawk chuan a ti leh a, "Nu leh pa tan chuan a awm ve tho alawm. Tu hmel hmuh te an chak ve ang a, in hnena a rawn an hian a thawl hawk zel ang a, a tan pawh a ţha" ka ti chu min en deuh ha a, a beisei loh dan deuhin ka chhang tih a hriat reng. 

Diktak chuan ka mona hi nuam ka ti hlawl lo a, mi ţawngkhum fek fek an hrat a, an bulah awm ve reng mah ila ka chanchin chhe lai an sawi hreh lo a, biak ţhat pawh ka hlawh mang ngai lo. Ka chhungte chanchin min sawipui tum tu hi Sangpuii chauh lo pawh an la awm zel dawn tih ka hre lawk vek a, ka tana fin chhuah hun chiah a ni. Kan bula midang rel nazawng hian keimahni min duhsak tihna a ni lo a, sawipui chiah ila chu kan inchhung boruak a chhe lehzual ang. Chuvang chuan naupan lai aţanga ka kawm, Ngheti aia rin ka nei meuh lo. Ani'n engkim min hriatpui chuan a tawk mai. Thu hre tu an tam lutuk hian a buaithlak a, buai lehzualna mai mai a ni. 

Dawr kawta motor a din rualin ka ding ve hluai a, "Hun a awm tak leh chaw ei khamah kan lo leng ang" tih leh chhuah ka rual a, motor ah chuan ka ţhu lut nghal a. 

"I ril a lo ţam tawh em?" kawngkhar ka pawh phui ruala a tih chuan, "A ţam tawh lo zawk. Chaw ei pawh ka chak tawh lo" ka ti a, kan tlan chhuah rual chuan, "Sangpuii lah hi a fanu hauh nachang a hre lo leh lutuk a, a ţawngkam a mawi lo si, a ţawng pawh a la fiah lutuk lo a nia, khatiang ţawngkam kha khawi aţanga a hriat nge ni?" ka ti hlak hlak a, "Engtin nge a tih che?" ti a min zawh chuan a lam ka hawi a, a samah ka tuai zauh a, ka tih ţhan a ni a, ani pawh hian ngaiah a nei tawh ang. 

"A nu hnenah ka hming a zawt leh a, a nu'n ka hming a hrilh veleh a hmelchhia min tia, hmelchhia tih te chu naupang sawiah chuan mawi lo deuh a sin" ka ti niah niah a, hmalam a en ran nain a nuih ruala a mit bul vun chuar chu ka hmu thei a, ka enchiang ve ţhin bawk em a ni. 

"Min nuih em ni a?" lungawi chiah lo a ka tih chuan, "Naupang chuan thudik bak an sawi ngai lo an tih kha" a lo ti fiamthu a, in pawh kan thleng chawpchilh nghal a, ka lut hreh lehpek khawp mai. 

"Midang ţawngkam a la chhawng mai mai a nih kha. Hmelchhia tih pawh kha a hrethiam kher nang. Ti tawh suh pawh a ti lo, a nuih liam mai mai a" ka tih lai chuan thil fun min pe a, "A nute hriat lohin kan la vel dawn nia, vai dawr pakhat chiah ka hmu a, a thlum chi an neih ang ang ka la lawr vek...ei vek rawh" a tih takah chuan ka thil chah min lo hawn tih ka hre nghal mai a, ka chhuk hmain parlour vel kha ka hrilhfiah a, ka sawi fiah lai te chuan ngunthluk deuh a min lo en reng chung hian a nui suk suk a, ho a ti leh viau maithei a ni. 

Kawtah ka lo nghak a, kan pahnih a kan lut chu min lo en ţhap a, Anthony takngial pawh a la awm bo lo ve tehmial a, Pa Chhawna nen an ti ti a, min ngaihsak ve lem lo thung. 

"Ţhiante buaipui tih vel mai maiin i va thang rei ve. Hei, Rita-i hian a nghak nileng ţhak che a, naktuk hi a pu piancham a ni a, kal ve turin a duh che a nih chu" Nu Hlimin a lo ti zung zung a, "Ka hman hleinem. Office kal a ngai alawm" a ti liam satliah a, "Inthlak hmasa teh ang" tih zawm zatin ka darah min kuah a, inchungah min chhohpui ta daih a. 

"Pi Ramtiami ten min nek a tia, a mood a fu lo zo vek a nih khu. A ang dur dur reng mai" a inthlak lai chuan ka lo ti a, khuma ka ţhu chu hnung lamah ka innem khalh a, ka ke ka ti che reng a, ke tih phut euh euh reng hi sim duh viau mah ila a har khawp mai. 

"Nek lo ang..chutiang mi an ni hleinem" a ti mai a, "I chaw kha i dahţha em?" ngeiawm zet hian a ti zui a, Pâtea chaw tur pawh a lo hawn tak e. 

"Nang baka ui ang an awm hleinem mawle. I kir chuat a, i ngo bawk si lo, khawchhak lamah chuan awm la an talh daih tawh ang che" ka tih chuan a lo nui hawk hawk a, min fiam thinrim hi nuam a ti ve hrim hrim a, min han thlem leh vel te hian a lungawi ve em em a, keipawhin ka ngaina tawh takzet, chu chu ka pawm thlap. 

A kawr a phelh hnuah, "Min lo ngai em?" ti a min zawh pahin ka bulah a lo ţhu a, min kuah pahin a hmuiin ka nghawng a nul thuak a, a za ka tih ţhin avangin ka awm sawn rang leh hle tawh.

"I zei lo ve sia" a ti a, min kuah ţha leh a, a khabe chu ka chhipah a nghat a, ţawng lovin kan awm ve vang vang a, ka insum theih loh tawpah, "Naktuk chu i hman lo tak tak nge i kal peih lo?" ka ti a, a banah ka dawm ve ran a, kan inmil ve hmel lutuk ringawt. 

"A pahnihin" a lo tih chuan ka thaw hak a, "Nilengin a nghak tak tak che a nia, i kal loh chuan Nu Hlimi a lungawi lo leh ngawt ang" ka tih chuan, "In dang daih ang hmiang" a lo ti a, Ngheti hi a sawi dik thei riau mai. Tunah pawh ka bula a thusawi ang kha a thleng dik leh tawh. 

Ka chhan lawk tak loh chuan, "Ka bulah i awm reng duh angem?" tiin ka beng zawnah a phun sup a, "Ka nupui angin" a tih zawm leh a, a ţawng chu zawi viau mah se ka hrechiang lutuk tlat a ni. 

"Chutiang chu a la hun chiah lo. Thla 6 vel chiah kan la innei a, bakah nang phei chu inpui luah tu tur zawk a ngaih i ni a, miin mak min ti lutuk ang. Engtin pawn min ti se ka hlau hran lo a, zah lo anga lan ka duh lo a ni mai a, nakinah sawi ţha leh zawk ang" ka ti duah a, thil reng reng hi tih puitlin hmaa ngaihtuah chian hmasak phawt loh chuan tihsual palh a awl lutuk tlat a ni. 

"Ka bula awm reng chu i duh tiraw?" a ti leh a, amah en tumin a lam kan hawi a, kan inhnaihin kan hmui chu a insi lo chauh tawh a ni. 

"Duhthlan tur ka nei hleinem" ka ti hap a, kan hmui a insik rual chuan ka lum deuh pup a ni ber. Ka lo hnar bik loh avangin a hmui chu muangchangin a ti che a, ani hi ka mipa fawh hmasakber a ni. Ka kut lah chu khawiah ber nge ka dah dawn tih hre lovin ka hum ngawt ngawt ringawt a, a chetdanin min ţhawn lutuk vang nge, ka thinphu rang lutuk chu ani pawh a lo hre thei hial maithei a ni. 

"Min chhang let ve la" ka hmui si reng chunga a tih chuan, "Ka thiam hleinem" ka ti vin hlar a, ka thinrim vang pawh a ni lo, ka laih vang zawk a ni. A hmui chet danah chuan a nui niin ka hria a, chhang let thiam lo mah ila min fawp leh a, mipa vanga ka thinphu a danglam ve pawh ka ring ngai lo kha a nia, ka beisei loh leh rin ngai miah lo angin thil a thleng ti ila a dik ber ang. 

A inlak hran rualin ka hawisawn nghal a, zawitea a nui ri chu hrereng mah ila ka hre lo der tlat a, thla 6 zet kan cheng dun tawh a, ngamtlak tawh viau mah ila min fawh meuh chuan ka lai huih mai. 

"Krismas lai chu nise inchhung chei nan i ţha dawn a nih kha" ti a min fiam pahin ka khabe ah a dawm a, ka hmui la huh deuh chu a tuai fai a, amah en tur a min khawih her te chuan inchung ka melh lui tlat a, ka vun a ngo ve bawk si, ka sen nasa viau ang ka ring. 

"I hmuiah ka fawp a i meng kalh daih a" nuihza aw zeta a tih chuan, "Inchung ka melh a nih hi. En ve mah la, kan lo ngaihven ngai lo a, inchung khi hawl fai a ngai tawh a nih khi" ka ti a, ka biangah a dawm a, a en ve leh en ve loh pawh ka hre lo. Mipa kan fawh hian keimahniah danglam a awm thei tih ka lo hre lo a, ka huat vak loh vang nge pawh ka hre lo, ka awmdan chu ka sawithiam chiah lo. Ka tan chuan thil thar vek a ni. 

"A fai vek khi" a tih rual chuan min rawn fawp leh a, ka mit ka lo chhing tawp a, chhang let thiam lo mah ila hrehawm ka tih hauh lo tih chu ka chiang khawp mai. 

Chaw kan ei laiin Rita-i a lo lut a, Nicholas chuan a lo lawm vak lo tih a hmelah a lang reng a, a haw daih tawh kan ring kha a nia, a awm rei peih angreng. 

"Naktuk chu i hman lo maw?" ti a Nicholas a zawh chuan, "Aw" tih chiahin a chhang a, a kalsan mai ang chu tih nak laiin, "Hman tum ve hram mai la, ka pu pawhin a hmu chak che a, sawm rawh a ti reng a, i lokal loh chuan a nuam dawn lo a sin" a ti nang nang a, a ţawng no mai bawk si, ngaihthla ringawt chung pawhin ka lo hah vek. 

"A hman lo lo ti rawh" bul zet hian a ti a, Rita-i lah chuan keimah min melh rum daih a, ka thiam lohah a ngai daih a nih hmel. 

"Nupui neih tak vang maia inlak hran tur tihna a ni hleinem. Kan ţhian dangte pawhin kawm a har sawt emai an tih che kha, ţhian te chu hetiang hunah chuan kan inţawiawm tur alawm" a ti a, a men deuh par lehnghal. 

"Midang an lokal chuan a tawk mai" a ti leh tawp a, "Nangpawh i lokal a ngai alawm" pakhat lah chuan a ti ţalh a, ka kham san ta daih a. 

Dawhkan a thawhsan hnuah pawh a la zui kual zel a, an inpawh viau ţhin aniang a pangchang ngam emai. In ngamtlak vak lo se chu vawikhat a hnar khan a beidawng nghal mai ang. Mahse, nunhlui chu nunhlui a ni a, sawisel leh huat theih ka nei lo. 

"Naupangchhia viau zel lo teh. Ka lo kal lo ang, ka hrilh chian tawh che kha" khauh deuh taka a tih chuan Rita-i pawhin a sawi zui ta bik lo a, a lung a awi lo hle tih erawh a hriat theih a, Nicholas-a luhlul zia a hre awm hle si, a sawm lui peih ka ti reng a ni.

"Ţhiante hi chu mamawh hun an awm leh nge nge ţhin a nia" zawi deuh taka a tih hnuah min chhuahsan a, nitin hian buaina eng eng emaw kan nei ziah a, inngeih tlang taka awmkhawm lai kan neih awm pawh ka la hre lo. 

Mut hmunah pawh kan sawi zui a ti ila ka sawi zui a ni zawk mah. Zawhna ka zawt reng a, min chhang ţha duh lem hlei lova, Rita-i chanchin sawi hi a peih chiah lo niin ka hre ber. Inhnaih takin kan mu ve tawh a, mipa zawk hian min kuah bet tlat reng a, sawi lo mah se min duh tih ka hrethiam ve mai a, keimah zawk hi ka inhrechiang lo thung. 

"Keimah lo chu ngaihven vak duh suh" tih paha ka kawr chhunga a kut a zen luh chuan, "Ka dul bak khawih miah suh ang che" ka lo ti nghal hlar a, "A mam chho vek a, vun bak khawih tur i nei ve chuang hleinem" a ti fiamthu a, zak ru viau mah ila zak deuh angin ka awm duh tawh bik lo. 

"Tarmita khan a fawp tawh che em?" a ti deuh khawl a, ngaihtuah let ang mai hian chunglam ka melh a, ani pawhin min lo ngaichang ran a, rei ngial kan ngawih hnuah, "Min lo fawp pawh nise buaina tur i nei mi? Hmui te chu fawh tur a siam alawm" ka tih chuan a inbengkang uaih a, a va han nasa chiang tak. 

"A fawp tawh che maw?" a ti nawn leh a, ka mitah a en ran a, a thutak em em mai lehnghal.

"Ka sawi duh lo" ti a thlek sawn mai ka tum chu ka biangah a dawm a, "Sawi rawh" a ti deuh hmuk a, hetiang chuan min lo fawp tawh pawh nise ka sawi ngam kher lo ang. Ka biang a hmerna lah chu a nain a thinrim ta emaw tih mai tur a ni. 

"Fawp lo...min fawh ve ngawt chhan tur a awm hleinem mawle" ka tih chuan chik deuhin min en a, min zirchiang ve ni awm tak a ni. 

"Dawt i sawi em?" a tih pawh chuan a awki chu a la dam chuang lo. 

"Sawi lo...chhunah hlir kan inhmu a, thingpui dawrah lehnghal. Min fawp duh pawh nise kan awmna hmunin a zir ngai hleinem" ka tih takah chuan thawveng huai ni awm tak hian a nui a, ka biang a dawmna pawh chu a thlah chawpchilh nghal a, "A ţhat chu...mipa dang i fawp dawn lo. Ka hria alawm" a ti a, nui hawk hawk chung hian ka biang chu a chul leh ta vel a, fa neih hranpa pawh ka ngai tawh lo ang. Hei, fapa lianpui ka nei sa reng alawm. 

"I ti ţha e...mipa dang melh lo la a ţha a ni mai" a ti a, ka biang bawk chu na vak lo hian a beng thak thak a, eng angah nge maw min ngaih le?

"Duhtawk teh...i infiamna ka nih loh hi, na ka hre ve tho alawm" vin hlar a tih pahin a kut chu ka beng sawn a, "Naktuk aţang chuan ka nupui diktak i ni tawh ang" inti thunei fahran hian a lo ti ve a, ka kawr chhungah bawk a zen lut a, ka awm bawr a khawih rual chuan rang tawkin ka inla hrang a, "Ka la inpeih lo...ka in ngaihtuah mek chauh a nih hi. Min nawr luih nasat lutuk chuan ka haw leh daih palh ang che" ka ti bawrh bawrh a, min en vang vang hnuah ka mut lohna lam hawiin a saisir hmak a, ka be zui duh ta bik lo. Rei deuh chhung min hrethiam a, inthlahrung viau mah ila ka ngam tlat lo a ni. Tih hmasak tur ka nei bawk. 

Damdawiin ka thlen veleh ka inthlak a, a ţul ang ang ka tih hnuah phone ka en ve chauh a, ka pasalin min lo biak a tum leh nasa tawh. 

'Ka bialnu ah ka ngai rih ang che' a tih loh leh, 'Zaidam zir ve deuh la, ka chungah ţhat chhuah ve rawh' a ti vel a, ka nui chhuak lo chauh a ni. 

"Eng nge a?" tih paha Nghetin min rawn nghen rual chuan phone ka thuk ru a, rindan a nei tho aniang a nui rah rah mai. 

"Nakinah ka hrilh ang che" ka ti ngial nain, "Tunah" a ti deuh tlat a, thil awmdan vel chu ka sawi thuak thuak a, a phur lutuk chu a mitmeng thlengin a de sar sar ni maiin ka hria. 

"A ţha alawm...nupa anga in la awm theih loh leh inngaizawng phawt ula...muangchanga ke pen bek bek hi a ţhatna chin a awm ve a nia. A sawi ang tak tak khan nangpawn ţhat chhuah ve deuh la, i ngaina tawh a, i la duh ve vat mai ang. I pasal ang ni lovin i bialpa angin ngai phawt la, engkim a tluang purh mai ang" a ti charh charh a, ka pasal a nih reng dawn tho chuan tum chhin ve chu ka chak khawp mai. 

Ka haw dawnah Mapuia nen kan inhmu a, damdawiin bula thingpui dawrah bawk kan lut leh a, mi an tlemin duhtawkin a ti ti theih ngei ang. Eitur kan chah hnu chuan kan han in en leh ren rawn phawt a, ţawng hmasatu nih kan duh lo ve ve chu kan nui leh ringawt ţhin a, tleirawl inngaizawng ang mai kan ni. Mahse, ka bialpa a ni hauh lo a nia. Min duh thu a sawi reng nain ka chhang let ngai lo a, a bialnu angin min en tawh tih hre mah ila ka bialpa angin ka en ve ngai lo. Keichuan, ka thawhpui, ka ţhianţha ang chauhin ka en a ni. 

"Sawi duh i nei em?" a ti ta nge nge a, ka lo bu nghat a, dawr te tih takah kan thil chah pawh an rawn dah vat a, a khu vat vat tho mai. 

"Bialnu nei rawh" ka ti deuh tawp a, a nihna rawt rawt a thil sawi hi ka tih dan phung ve a ni a, pehhel kual chiam chuan a rei mai mai a, a dawngsawng tu tan hriatthiam a har bawk. Mi zawng zawng hi Nicholas ni se chu sawi dawt lovin hel kual chiam mah ila an hrethiam tho ang a, mahse, Nicholas an ni ve si lo a, a nihna diktak a ka sawi mai a ngai a ni. Ka bulah awm lo mah se ka pasal hi ka ngaihtuah chhuak ve ziah mai. 

"I awm alawm" uangthuang deuha a tih chuan, "Keimah lo mawle...hmeichhe dang bialnu nei rawh. Keichu pasal ka nei tawh a, miin an hriat phei chuan mualpho chiah kan hmabak a, kei chang ni lo, ka chhungte pawh an zak lutuk ang" thutak zet hian ka lo ti a, hetianga sawi a ngai hi nuam ka ti bik lo, a ţulna in min nang a nih ber hi. 

"An hau che em ni?" min ngaihtuah hmel taka a tih chuan, "Hau lo e..keimah zawk hian rilru ka siam a, ka nu leh paten ka pasal hi ţhen an remti dawn hauh lo a, ngaihzawng nei daih mah se nei lui zel turin min ti tho ang. Kan in a ka kal ve lahin ka pa hlim hmel ka hmu ngai lo va, lo inţhen ta pawh ni ila nuam ka ti chuang lo vang. Chutiang nuaih chu thil awmdan a ni rih si a, ka tang laklawh a nih hi. Bialnu nei la, keichu ţhian pelin min en tawh suh" ka ti a, a rilru nat loh theih dan tur berin ka sawi tak na a a na tho maithei a ni. 

"I pasal hi i duh tawh em ni? I ngaina tawh tiraw?" ka hmel a danglam a awm leh awm loh hriat tum ni awm tak hian min en ran a, kan hmaa eitur inchhawp chu kan la khawih miah lo ve ve bawk. 

"Ka ngaina a, ka duh leh duh loh chu ka hre lo. Mahse ka hre chhawm ve zel turah ka ngai a, ka haw hran lo a, ka pasal hi hunţha pek ka tum bawk. Chutiang a ka ti dawn a nih chuan nang hi ka biak loh che a ngai a, ţhian anga min en a nih chuan ka lo kawm ang che, i ţhian ka ni reng ang. Ţhian bak pelin ka en ve thei lo che a, a mawi loh bakah a thiang lo tlat a" ka ti charh charh a, a meng khup lap a, khawngaih viau mah ila ka hrilhfiah a la ngai dawn tho tho a, ka tih tawp a ngaih hun a la thleng ngei ngei dawn, nakin nakin tih ai chuan tuna ka tih tawp hi kan pahnih tan hian a ţha ber rih tlat a ni. 

CONT...