HIS LAST LOVE-16

HIS LAST LOVE-16

"Hetiang hun hi a thlen ka rinna a rei tawh a, ţhen duh chu ni la hmanah khan i ţhen tawh ang. Hre lawk vek chungin alawm ka hnaih luih char char che...ka duh lutuk che avang aniang" a ti a, ka khawngaih ru angreng viau nain pangngai tak anga lan ka tum tlat a, pasal nei reng chunga ngaihzawng neih chu ka ngam ngang lo a ni. 

"Hrehawm ka tih tak tak lai, ţhian kawm tur mumal pawh ka neih loh laia ka kianga i awm reng ţhin avang khan ka lawm lutuk a nia aw. Keini pahnih hi chuan dal tu lian deuh kan nei a, inkawp mah ila kan hmabak a ko lutuk a, ka pa phei chuan min tuithlar duh hial ang. Ka ngaihtuah chiang a, tunah chuan ka chunga thil thleng hi pawm thiam ve a hun tawhin ka hria. Ka pasal nen hian kan inmil reng kher lo thei a, mahse chu chu nupa inkara thil thleng ngei ngei tur a ni a tih theih ang. Engpawh lo thleng dawn se hmachhawn thei tura ka inbuatsaih a ţul tawh zawkin ka hria" ka ti deuh duah a, kan boruak rit lutuk chuan thil ei pawh a ti chakawm tawh lo. 

"Ka hrethiam che alawm...i duh ang chu ni rawh se" awlsam deuh a a tih chuan mak ka ti letling zawk a, ka lawm tho bawk si. 

"Ţhian kan la ni reng thei tho a nia aw" aw zangkhai thei ang bera tih pahin fian ka dawm a, ei ka tum lai takin, "Kan duh tak te nen a ţhian nih hi a har khawp mai" a lo ti leh a, ka ei ta tho a. 

Ka thil ei ka lem te te hnuah, "Kan tana ţha ber tur a ni si a nih hi. I sawi ang tak tak khan ka pasal hi ka ţhen dawn lo a, ka chunga ţhat a chhuah ve lai taka ka ţhen phei chuan tuman min thiam lo ang. Ka lo ngaihtuah chiang ngai lo a, ngam tak tak si lo khan inţhen kha ka thupui ber ţhin a, mahse tunah chuan thil kal hmang ka hre tawh a, ka mualpho dan tur thlengin ka chhut thiam tawh. Ka pasal hi lo ţhen ta ila chuan tunhma a ho taka ka nun ţhin ang kha a ni thei tawh dawn lo a, thil tak tak ka hrefiah a, chuvang chuan nupui anga awm ka duh phah a ni ber" ka ti charh charh a, eitur a la khawih miah lo chuan ngaih a tih ţhat loh rualin ngaihven deuh angin ka awm duh bik lo. 

"I theihtawp i chhuah dawn nia, i duh lo chung chu pawh pen luih tlat che ka tum lo. Mahse, a harsa deuh dawn a nih pawhin ţhian i mamawh chuan i tan ka awm reng ang. Ka puihna i lo mamawh thut a nih pawhin sawi hreh lo la, khirhkhan deuh pawh nise ka tlanchhe lo ang" a ti ve ta nge nge a, a pawm thiam ve ta chuan min ti lawm khawp mai. 

"Kan thil chah hi a dai dawn a nia, ei vat vat teh ang. Kan chah hnem angreng si a, luak chhuak chung chunga chaw ei luih a ngai leh dawn a nih hi" ka ti fiamthu a, ka thil ei a tui loh ang bawkin ani pawh a tui bik ka ring lo. 

"Aw..ei zo i la ka thlah dawn che nia" a lo ti leh mai a, kan eizawh hnu a kan chhuak te chu nidang angin a phur lo a, a ngui bur reng ni maiin ka hria. 

In thleng min thlah a, kan inbe lo tluan ţhak a, bike aţanga ka chhuk rual a, "Ka sawi kha aw..ţhian i mamawh chuan ka awm reng a nia" a tih chu thingpui dawr aţanga kan chhuah hnua min biak lehna hmasaber a ni. 

"Tehreng mai...kan inbe ziah tho dawn a nia, hmeichhe tan mipa kawm a thiang lo tih dan a awm hleinem" tiin ka nui var var a, a tih ziah danin in lam pana ka kal chu min thlir liam leh a, ka sawi duh em em ţhin ka sawichhuak ta chu thaw a veng hawk mai. 

Inchhung ka luh rual a Nu Hlimin, "I va rei ve" a lo tih chuan, "Ka ţamchhawl a, thil ka ei kawi a" ka ti vat a, thudik sawi ila chu min liak leh hrep ang chu mawle. 

"Ţhenawm khawvengte hriatah chhungkaw chanchin sawi loh tur a nia, an sawichhawng a, kan hre leh ţhin si a, lungawi lohna kan neih pawhin inchhungah tawp rawh se" Pa Chhawnan a lo tih chuan mak la ti angreng khawp mai. 

"Chhungkaw chanchin sawi darh ţhinah min ngai tihna em ni?" ka ti ve ngat a, ka sawi lo chiang si a, sawi anga min puh chuan ka thin a rim viau ang. 

"Lo ţhu phawt rawh. Mi hian eng eng emaw an sawi ţhin a, Chhandami thlengin an sawi kai leh tawh a" a ti a, an bulah pawh ţhu lovin ţhutthleng dangah ka ţhu a, inhauh ka inpeih at ti ila ka sawi sual lo khawp ang. 

"Tu hnenah mah chhungkaw chanchin ka sawi ngai hleinem. Zep loh chuan min sawipui tum tu chu an awm leh ţhin a, mahse ka nuih liam a, a chhe zawng leh ţha zawngin ka sawi lo ve ve" ka ti a, Sangpuii pawh ka ringhlel rum rum tawh mai a ni. 

"I nu hnenah hian miin an lo sawi ţhin a, nuam i ti lo a nih pawhin ţha deuhin sawi la, kan inrem tlan nan kan insiamţhat a ngai tihna a ni mai a" a tih leh chuan Nu Hlimi chu ka en a, "Tu in nge sawi? Engtin nge an sawi?" tiin ka zawt a, ka aw pawh a nem fahran lo. 

"Dawrah i kal ngun a, dawr ah hi chuan mi an tam ţhin a, ka kal ve apiangin min hrilh tawk an awm ziah" a ti a, ka awih lo nasa mai. 

"An hming sawi la ka zawt fiah mai dawn alawm. Dawt a inpuh hi ka duh lo bur a, ka sawi hauh loh sawi anga min puh a nih chuan ka chhuahchhal ngam vek. An hming sawi la a tawk mai" ka ti khar khar a, eng mi pawh ni sela ka thiam naah chuan tumah ka hlau lo reng a ni. 

"An hming sawi kher a ngai hleinem. I sawi pawh kan ti lo a, chhungkua chuan tihdan phung leh thuruk te kan nei a, chu chu sawi darh lo ila a ţha i pa'n a ti a nih kha" a ti leh daih a, an sawi tak tak pawh ka ring lo e a. 

"Nangpawh dawrah i kal ngun lutuk a, hunawl i neih apiangin Sangpuii te dawr i ti ziah a, tu tan pawh inchhunga awm tam tluk a awm lo" a tih lai mekin Nicholas a lo lut a, kan boruak ţang deuh ut chu a hrethiam nghal a ni ngei ang ka bulah a lo ţhu a, a nute chu thil awmzia a zawt a, an sawi ţha duh khawp mai. 

Ka thlavang a hauh dawn emaw ka tih laiin ka malchunga ka bag dah chu a la kang a, "Han inthlak rawh" a ti daih a, mak ka ti nasa mai. 

"I awih ve tho em ni a?" ka tih chuan, "Han inthlak rawh" a lo ti leh a, thinrim deuhin ka ding a, a bag ken lai ka pawh thlak sawk hnuah inchungah ka chho a, min puh chhe tu te hming an sawi ngam loh chuan tuman Nu Hlimi bulah min rel lo tihna a ni mai. A phuahchawp mai mai bak a ni lo ang. 

Ka inbual zo bualin aţanga ka chhuah chuan khum lu nghengin a lo ţhu awn diai a, a kawr hma a inhawng huai tawh bawk a, a hahdam hmel khawp mai. 

Min lo enreng avang chuan, "En pawh min en suh. I mizia ka hrechiang i ti vel luam zel a, midang thusawi i awih leh tho si. Ka ngei che a nia" ka ti a, ka sam huh chu ka hru tawk tawk a, a nui hmel te chu ka haw hlur mai a ni. 

"I sawi lo ang..ka hria alawm" a ti leh ang lawi a, "Ka thlavang pawh i hauh ngam loh kha. Ka dik loh naah chuan lam ţang ka zawng ngai lo, i chhungte hriat laiin min hau vak vak mahla ka sawisel lo ang. Mahse ka dikna ngei ngeiah chuan ka thlavang hauh nachang hre ve rawh" ka ti hlak hlak a, ka fak vak vak te kha ka inchhir dawn dawn ta mai. 

"A sawi lo ang ka tia ka hrilhfiah kha. Nangpawh vin nghal pung pung zel lo la, ţha deuhin hrilhfiah la an tan ngaihthlak a nuam zawk ang a, an rin phah zawk ang che" a tih chuan ka en reng ringawt a, sawi tur ka hre tawh lo a ni ber. 

"An thu zawm vek la, an duh dan chiahin awm rawh ka tihna a ni lo. Thinrim nghal zel lo la, an thusawi apiang huat a i lak zel chuan in inmil thei lo ang" a tih zawm leh a, "Min tih dan kha a lungawithlak loh ve em alawm. Ţhat ka chhuah a, aaaa....theih tawp chu ka chhuah ve alawm. Rawngbawl ringawt pawh thiam ţha ţhum lovin pasal ka nei a, mahse Kungtei ka pui ziah a, ka zir a, ka thiam ve zel a. Sangpuii dawrah pawh a ţul tawpkhawkah bak ka kal ngai lo. Tih lungawi ka tum ve char char a, chuti chung chuan ka fel lohna lai an thur chhuak nalh nalh zel tho alawm" ka lo ti tan tan a, min zawtfiah hmasa lo a khatianga min ti kha ka hua a ni ber. 

"Ka hrilh tawh kha..an sawichhuak tawh lo ang" a lo ti leh then a, sawi pui tum viau mah ila a sawi pui tak tak theih ţhin lo. 

"Chhandami an sawikai te an tia, Chhandamin thiam lohna a nei reng reng hleinem. Pawisawi lo an hnuklut ve ziah te hi ka ngei a nia. Kan nu leh pate an nia, ka be chhe lo ang. Amaherawhchu, hetianga min ti hi ka haw lutuk tlat" ka ti a, towel zar turin thlanglam ah ka chhuak ta daih a. 

Inchhunga ka luh leh chuan a kawr a lo phelh fel der tawh a, "Ka inbual ve lawk dawn. Min lo nghak rawh" tih leh bualin a luh a rual a, kan pindan kawngkhar a ri zui dat dat bawk. 

"U Nico kha a la thinrim em?" rawn ti tu Hope chu ka lo en phawk ngawtin ka ring. 

"A thinrim hleinem...inbual turin a lut chiah a, pangngai deuhin lawm min biak" ka tih chuan, "Ka nute nen an inhnial deuh a, a thinrim loh chuan a ţhat chu. Anthony a awm si lo a, ka ţhiannu lah naktukah phaiah hnathawk turin a kal daih dawn a, ţhianho in inthlahna nei ang u kan tia, an in thleng min thlah lawk rawh tih ka duh a, scooty hi zanah chuan ka khalh ngam chiah lo a" a ti niah niah a, a zam bawk aniang a kut ţang a khal neuh neuh mai. 

"Inthlah tir rawh thinrim ang pawn a awm loh kha. Eng chungchangah nge an inhnial a?" ka lo ti leh a, tim deuh dai hian bualin lam chu a melh zawk a, chutah min rawn din hnaihin, "I chungchangah a nia" a ti sap a, ka ngaihven zawng tak a ni. 

"Eng ber nge an sawi a?" ti a ka zawh chuan, "Ih...eng lo a nia, Saii in en hrang lutuk a, in mil theih loh phah a nih kha. Mi chanchin sawi zawt zawt ching a ni hleinem tih vel a sawi a, ka nu'n i nupui i ţan leh lutuk a tia, an inhnial chho a" a ti sar sar a, ka bulah lah a nu leh pate a ţan daih bawk sia, ka hrethiam teh nuaih lo e a. 

"Chuan an thinrim ve ve tihna mi?" ka ti leh a, a lo bu nghat a, "Ka nu pawh a thinrim tho a, U Nico lahin i endan a dik lo a ti ve tlat bawk sia, awii..an thusawi kha ka sawichhawng leh thiam tawh lo" a ti a, inchunga min chhoh tir hnu khan an lo inhau em maw ni. 

"Aw..ka lo hrilh ang. Chaw ei khamah daih a ni dawn tho a, ka lo hrilh dawn nia" ka tih takah chuan lungawi deuhin a kal veleh mai bawk a, he inchhung hi chu ka kham tak tak a ni. 

Bualin aţanga a lo chhuah chuan ka lo hrilh nghal a, aw a ti ve mai dawn maw ka tih laiin, "Kan pahnihin kan thlah dawn nia" a ti daih a, ka ner nang mai. 

"Ka peih ngawt hleinem..ka chau, ka mu hma dawn" ka tih chuan a taksa chunglam hruk hul pah hian a nui suk a, "Kan in date pah dawn nia" a ti vel a, ka thlavang a hauh ve tih ka hriat hnu kha chuan ka thinrimna pawh a kiang nghal duak a, lungawi hliah hliah angin ka awm duh lo thung. 

"Khawiah nge kan kal ang a?" ti a ka zawh chuan, "Ka bialnu i ni miau a, i duhna hmun i thlang ang chu" a ti a, a inlak zei ve hian ka nuih a za ziah lehnghal. 

Chaw eikhamah phir te chu kan thlah a, an ţhianten an lo hmuak thlap a, an lo thlah theih tur thu an sawi chuan ngaihţha deuhin kan kalsan a, zan boruak chu a nuam viau nain han len velna tur kan hre lo dun khawp mai. 

Phone ka en lai chuan, "Tu nge i biak?" tih pahin min rawn hnaih a, phone chu ka lo thukru vat a, Ngheti chiah be mah ila midang daih bia anga awm hi a nuam ve riau. 

"I motor khalh lai chiah ngaihtuah rawh" ka tih chuan, "Thil dang min tihsan daih a ka tui lo zo vek" naupangchhia tak hian a ti a, Mapuia ka biak a ring a ni phawt ang. 

Chhang lem lo hian phone bawk chu ka en leh a, a hmuh theih loh turin ka dah daih a, a ngaih a ţha thei ngang lo aniang, "Mipa nge hmeichhia tih tal sawi teh" a ti deuh hluk a, ka nuichhuak teuh khawp mai.

"I thikthu lah hi a chhe ve ropui sia, i phone ah khan hmeichhe hming ka hmu ngun lutuk. Hmanni ah pawh hmeichhe pakhatin a lo bia che a, a dp pawh ka en vek. Tleirawl te a la nih hmel a, a hming pawh i save thlap" ka ti fak fak a, Hlimpuii tiin a hming chu a save a, a message ka hmu ngun khawp mai.

"Pasal luck deuh i nei hi ka thiam loh a ni hleinem" a ti a, a nui leh ruh ruh tawh a, ka lo ngei viau thung. 

"Chuvang tak reng chuan alawm tupawh bia ila lo buai ve suh ka tih ţhin. Nangpawn i be lo chuang lo a" ka tih chuan, "Tumah ka chhang let ngai lo. Nupui ka nei tawh a, tih tur chin ka hria" a ti nghat a, ka ţhutdan chu siamremin a lam ka hawi a, ding deuhin hmalam a en ran thung. 

"Hmangaih i lo nei ve tawh dawn tih chu hriat sa a ni a, tu nge i hmangaih hmasaber?" ka tih chuan min rawn en zawk a, mak min tih hmel nasa mai. A beisei hauh loh zawhna ka zawt tih a hmel danglam nasat danah a hriat theih. 

"Hmangaih hmasaber tih te chu nunhlui ah a tel pha vek a, a liam vek tawh" a tih pawh chuan, "Sawi ve mai la aw" ka lo ti ţalh a, "Sawi chhuah fo a ţulna a awm lo" bul zet hian a ti a, a sawi chak lo viau a nih hmel. 

"Tunah chiah alawm ka sawi. Kan sawichhuak fo dawn hleinem" ka tih chuan a lo thaw hawk a, a ning takzet tih a hriat reng mai. 

"Nupa chu in hriatchian tluk a awm hleinem. Keimah min hriatchian ang hian nangpawh ka hrechiang duh che" luhlul chhuah a ka tih chuan, "Ngawi rih teh..inah kan sawi dawn nia" a ti deuh tlat a, hrechak viau mah ila ka zawt lui ta bik lo. 

Mahse, kan mut rual rualin, "Sawi tawh rawh le" ka ti leh a, keimah zawkin ka kuah ve ngei chu mak a ti deuh aniang ka banah a lo hmer chawt a, a kut lehlam lukham chung hian min en ran a, kei lahin, "Sawi rawh" tih pahin ka kuah nghet sauh a, a awmah ka bawk lek lek tawh zawk a ni ber. 

"Chhandami" ka hawisawn ruala a phun sup ri ka hriat chuan rang deuhin amah bawk chu ka en leh a, "Tu maw?" ka ti nawn leh ngat a. 

"Chhandami" a lo ti leh mai a, "Ani pawn a duh ve tho awm che sia, engati nge in inngaihzawn mai loh?" mak ti deuh chung hian ka ti a, Nicholas a hmangaih zia pawh min hrilh vek a nih kha. Ţhian ang chauhin a en emaw a inti a, a lo hmangaih ve reng tho si, an buaithlak dun khawp mai. 

"Ka chhungten an duh dawn chuang lo a, kan tan chuan ţhian bak pelh loh a ţha ber" a ti a, a mit a chhing ta daih a.

"Hna ka nei ang a, chumi hunah chuan chhungte tello pawhin kan awm ve thei ang a, tih vel ten i ngaihtuah ngai em?" ti a ka zawh chuan a lo bu zeuh a, "Ka bialnu ni tura sawm ka tum mek laiin pasal a nei alawm" tiin pangngai deuhin min chhang leh a, inkawp lo tur hrim hrim hi an awm ve a nih ka ring, an khawngaihthlak dun reuh khawp mai. 

"Tunah i la hmangaih em?" ka tih chuan, "Hmangaih tawh lo ang" tih pahin min kuah a, ka lam a lo hawi zui zat bawk a, "I awm tawh a, hmeichhe dang ka mamawh tawh hleinem" a ti a, min endan chu a thuk ka ti dawn nge a ril ka ti zawk dawn pawh ka hre lo, ka mitah tak min en a, dimtein ka sam a chul pah bawk a, "Keichuan hmeichhe pakhat bak ka mamawh ngai lo" a ti a, ka chal a a fawh chuan ka mit ka lo chhing tawp a, sawi tur reng reng ka hre ve lo. 

"Ka duh che ka tih ziah kha, ka sawi nawn ngun tawh emai, hrereng tawh rawh" a tih chuan, "Kan inneih hlim khan i thin a rim hle si a, tharumah phei chuan ka hneh dawn lo che tih i hre vek a, i nupui ka nihna anga min khawih luih i tum miah lo kha mak ka ti" ka lo ti a, ka sawi zawh rual rualin ka zak nghal a, min la nuih zui lehnghal a, theihnghilh nghal hmak rawh tih a chakawm rum rum mai.

"Mipa ka nih hi...hmeichhe chak lo zawk tharum hmanga ka bei a nih chuan mipa hming ka pu ngam tawh nang" a ti a, ka nui ta var var a, a dikchiah, mipa diktak chuan hmeichhe chak lo zawkte remti lo chung an khawih lui lo tawp ang. 

"Eng nge i hmeichhe duhzawng?" ka zawhna chu atthlak tih hmel zetin a nui a, a ho lam ve bawk em a ni. 

"Nangmah ang hi" ka biang nul hliau hliau paha a tih chuan, "Ka awih lo emai...hmeichhia ka ang i ti ve lo aniang kan inhmuh hmasak ber aţanga tun thlengin Pâte tih hlirin min ko alawm" ka ti a, a nuih a za khawp mai. 

"Ka hriatchian hnu hian ka duh che alawm. Tunah chuan nangmah ang chiah chiah bak ka duh tawh lo, i nihna ang ang hian, engkim hi ka duh vek" a ti a, ka hmui a a rawn fawh chuan chhang let ve chak viau mah ila ka thiam ngang lo a ni. A inlakhran hmain ka hmui hnuai lam chu a pet zauh a, "Fa neih ka duh tawh" a ti mauh mai. 

"Rai i inhuam te chuan" tiin ka lo fiam a, a duhzawng hi zep lovin a sawi phawng phawng zel mai si a, ka lai lek lek a ni. 

"Fa 11 vel nei ila, unau tam chu puitlin hnuah a hlu an tih ţhin kha. Panga velin sual kawng an zawh a nih pawhin anmahni pui turin paruk vel lai an la awm dawn a" a tih chuan ner nang nang chung hian ka en a, a thutak angreng bawk si, a ti tak tak em maw ni. 

"Machine ah min ngai em ni a? Fa 11 lai neih te chu a tlin pawh ka tlin nang. Miin min nuihzat dawn ropui lehnghal" ka ti a, tam tak chuan fa neih tam an duh a, keichu ka ni ve lo. Pathum hi ka duh tawk khawp mai. 

"Nih leh i inhuam zat kan nei ang, sawmhnih vel lek neih i duh pawn keichu ka inpeih reng a nia" a ti vel a, "Uang reng lo mai teh. Pathum bak kan nei lo ang, hrehawm leh na tuar nasa ber tur chu keimah ka ni a, a hah ber tur ka ni bawk a, chuvang chuan ka duh zat lo chu ka nei dawn lo reng reng, nei tam deuh turin min ti mahla ka ip tlat ang. Ka ip bet tlat ang a, an lo chhuah hmain an thi hmak hmak mai ang" ka ti fiamthu a, kan fiamthu chu a malsawm lo ngei mai. 

"Chutiang chu sawi tawh lo ang. Nau ka pai theih dawn leh dawn loh pawh kan la hre lo a, hetiang zawnga fiamthu thawh hi chu a ţha chiah lo" ka ti leh hnuhnawh a, thu ho mai mai sawiin kan ti ti zui a, min fawp leh zauh ţhin tih lohah chuan thil danglam em em a thleng lo. 

Tuk dang aiin ka harh hma a, khum ka thawhsan hnuah pawh Nicholas chu a la muttui khawp mai. Khum bula ding chung chuan a muhil lai hmel chu ka thlir a, a sam kir hian a ti lang ţha nge ţha lo zawk pawh ka hre lo. A hmel hi chu ţha ka ti em em reng tawh a, a ngo vak lo te hi keichuan ka duh zawk mah. Mipa ngo leh lutuk hi chuan ka mit an la ngai lo. 

Hope pawh a lo tho ve tawh a, Faith-i awmna ka zawh chuan, "Insawizawi turin a chhuak. Nizanah beer ka in ve vak a, tukin chu ka zawi lutuk a, ka rit bur bawk si. Thingpui i duh ve em? Ka chhuang mek a nia" a lo ti zung zung a, "Duh ve tho" tih pahin tih tur ka melh kual a, ka chawhma dawn bawk nen, rei ka pui hman leh dawn chuang lo tih hre mah ila awm mawl tawp chu ka duh bik lo. 

"Vawiin class ka kal dawn lo a, in ban hunah min lo call rawh aw..bazar ah kal tawh ang. Min hnial zel a, ka nawr lui ve tawh dawn che. Pawisa pawh i nei tih ka hrereng" a ti a, a sawi dik chiah, bazar kal a tih apiangin chhuanlam ka siam ziah a, tunah chuan min chei danglam mah se pawi tihna ka nei tawh lo. Ka danglam hnua Nicholas awmdan ka hmu chak miau a ni.

"Kan kal dawn nia" ka tih chuan naupang thil thar nei ang maiin a lawm a, a zuang tawr tawr lo chauh a ni. 

"Min lo be ngei ngei ang che" a ti deuh reng a, ka kal tur pawh kawtlai thleng min thlah nghe nghe a ni. 

Chawhma chhung ka duty a, Mapuia ka hmu lo tluan ţhak a, casualty ah chuan a awm ka ring nain ka va zawng buai duh vel lo a, a rilru dam deuh hunah amah zawkin min lo pan leh mai turah ka ngai. 

"Lokal tawh la" ti a Hope ka hrilh chuan, "Damdawiin piah lawkah ka awm tawh. Ka nghak zawk che" a rawn ti a, a phur lutuk hian ngaih a ti ţha lo zawk. 

"Tih tur i nei mi?" Nghetin a lo ti veleh a, min thlek deuh ha a, a mitmeng aţang chuan a ngaih a ţha chiah lo tih a hriat. 

"Aw..Hope nen kan bazar dawn a, min chei danglam a chak emai a duh ang chuan han ti teh se" ka tih chuan a lo nui hak a, "Keipawn ka hmu chak ve tho che a nia. Naktuk chu danglam deuhin lokal ang che" a ti ta daih a, "I lokal ve dawn lo em ni?" ka ti he haw a, kan pathumin kan kal ho ang chu tih nak laiin a mak ţhin a nia. 

"Aw...kal lo mai ang. Hope nen kal rawh u, in in pawh zelna tur zawk a nia, inkawmngeih ula, nangpawn nuam i ti tial tial mai ang" a tih tak tlatah chuan ka kalsan a, Hope lah chuan min lo lawm em em khawp a. Min hmuh rualin ka banah a kuah a, scooty pawh a lo keng lo ni awm tak a ni taxi a phar a, kan ţhut luh hnuah pawh a ti ti par par reng mai. 

A ţhiannu dawrah min hruai a, duh zawng mang ka neih loh laiin Hope chuan pathum vel lai min thlan sak a, a khat tawkin, "I inhmeh dawn lutuk" a ti leh ţhin a, pawisa ka ui deuh avangin phur viau e ti lo chuan kan lei tam mang hlei lo a. 

Haw hnuah pawh pindanah min zui lut zel a, "Va intleuh thuak thuak rawh..ka lo nghak ang che" tih pahin ka thil khai lai chu min laksak zung zung a, dan hman pawh a ni lo. 

"Pasal neih tak vanga in uluk loh ngawt tur a ni lo. Hmeichhia chu kan pasalte tan kan nalh reng a ngai a nia, inthlahdah leh lutuk chuan hmeichhe dang an melh daih mai ang..tunlai mi an chhe lo tawh ropui si. Va inbual rawh ka chei ang che, ka chei chakna che a rei tawh lutuk" a ti bawrh bawrh a, naupang thuawih thei tak ang maiin a thu chu ka zawm ve zel a, lu su lovin ka inbual a, ka inbual zawh veleh darthlalang hmaah min ţhut tir a, min chei nghal a ni deuh mai. 

Ka hmai a chei hnuah kan kawr lei chu kekawr nen inrem thlapin min hak tir a, hla deuh a kal vang vang tur te pawh ka ang alawm. 

"Ka hmai hi i chei nasa mah mah a nih hi. Ka inhmeh pawh ka ti lo" darthlalang a inthlek paha ka tih chuan, "A nasa teuh lo mai..i inchei ngai loh vang mai mai a nih kha. I inhmeh lutuk ringawt..U Nico-a lo haw thleng ti hian lo inchei rawh aw" a ti a, kan thil tih chu ho ka ti angreng viau nain a lunghnur ka hlau si a, rem ka tih sak leh ta nge nge a. 

"Chhe lo a ti ve dawn chiang che alawm. I te sia, thawmhnaw lian pui pui i ha hnuk hnuk zel a, i sam a tawi bawk si, patil te pawh i ang alawm. Mahse, tunah chuan i dik zaih tawh" a ti a, ka ep chiahah a ţhu a, lungawi hmel deuha min en chung hian a nui leh var var ţhin a, "Mi chei ka thiam zia hi chu aw. Lehkha hi zir tawh miah lo mah ila pawisa ka thawkchhuak reng tho ang mawle. Ka nute lah hian min zirtir lui tlat a, ka fail loh pawhin mark ka hmu ţha ngai lo. A hmingin college ka kal ve a ni ringawt" a ti siam siam a, thla te min han lak sak leh rih ţhin a. 

Ka inchei nasat em avangin inhnuaiah ka chhuk ngam lo a, pindanah Nicholas ka lo nghak deuh tawp a, Hope lah chuan, "Ti hian lo nghak reng rawh. Keimah zawk ka chhuk ang a, i tih ai ka zuk ti vek ang" a ti a, a inhuam nasa mai bawk sia. 

A office bang a lo luh chuan ka phu deuh zawk a, ka ding hluai lehnghal. Ani pawh min hmuh rualin a ke pen a tawp chawt a, hmuh thiang lo hmu ang mai a ni. Phawk deuh a min en vang vang hnuah, "Khaia" a ti ban charh a, nalh min ti nge ti lo pawh ka hre thei lo. 

"Keimah tho ka nih hi khatin min en reng kher suh" ka tih chuan, "Khawiah nge i kal dawn?" tiin min lo zawt khauh a, ka ke ler aţanga ka chhip thlengin a en chhuak vek a ni ber. 

"Khawiahmah ka kal dawn lo. Hope duh danin ka inchei a nih hi" ka ti a, a chek tlak tlak mai.

"Party na vela kal tur ni awm tak i ni. Va inthlak rawh...peng pung mai" a ti kher a, nalh min ti vak lo a nih hmel. 

"I nalh tih tura inchei ka ni lo a nia, i nauin danglam deuh a min hmuh chak vang mai mai a nih hi aw" ka ti ve zaih a, tawi te pawhin min fak se ka lawm ve deuh tur a nia. 

"Aw..engtin pawn awm la i nalh vek. Ka hmu ţha vek che. Mahse engatinge khati vak vak a i hmai a hnawih a? Chhut pawp a kehchuai thei ang mai alawm i nih. I inhnawih loh pawh khan i mawi" a ti deuh duah a, "Min fak hreh emai a, hetiang hi hnawih ve che ila chu kawngchhe deuh i ang ngawt ang. Landan tih danglam te chu hmeichhe tan chuan a nuam ve alawm. A ngai reng chu a ninawm ve a, khatianga an chiam chiam kher kha a ngai lo" ka tih chuan nur nangin min en a, a uluk lehpek khawp mai. 

"Khatiang kha i pu rih dawn tihna mi?" ka thawmhnaw vel kawh kual paha a tih chuan buk nghat pahin, "Aw...hetiang hian ka inchei char char rih dawn" ka lo ti var a, thawk chhuah hawk pahin a kut chu a thlak thla hnawk a, a awmdan hi ka hrethiam vel lo e a. 

"I landan leh nihna ang ang khan ka pawm thlap che a, ka duh bawk che. I landan thar hi ka ngaihzawn nawn leh a ngai dawn a nih hi" a ti a, a inher nghal nain a nui hmel kha ka lo hmu hman a, chuti chung chuan a hlim nge a lungngai tih ka la hre thei chuang lo. 

"Ka landan chu engpawh lo nise keimah tho alawm ka nih. Pawnlam chiah a danglam a, chhunglam chu a pangngai reng tho a" ka tih chuan, "Engtin pawn awm la ka duh che ka tih tawh kha. Ka Pâtea i ni reng tho ang" nuihza aw zet hian a ti a, rei deuh chhung chu min fiam zui leh dawn a nih hi. 

A inthlak chhungin ka lo inphihfai a, a reh har zek lehnghal a, a hautakin keimah zawk hian ka peih rei kher lo ang. Inhnuai ka chhuk veleh Hope a lokal nghal a, "Engtin nge a tih?" nui sang chung hian a ti a, a phur khawp mai.

"Ka hmai i hnawih chhah lutuk a, hlum nen min tehkhin vel a nih kha, i keh thei ang min ti alawm" ka tih chuan, "A ruk chuan nalh a ti tho ang che. A hmu thut che a, a awm thiam lo mai mai a nih chu. Thinrim awm deuhin a awm na a a hlim vur vur zawk ngawt ang chu" a ti a, a nui kar kar reng a, Faith a lo tum bar thung.

"Vawiinah ka hriat lohin eng nge in lo tih vel a? U Saii pawh kan zinga lo tel ve duh mang si lo Hope chiah i zui duh a, enhran bik neih hi a ţha lo a nia. Inkawm hran ching ho ngat phei chu an ţhing ka ti" min melh ram ram paha a tih chuan kan lo nui ringawt a, min ngainat loh chhan ka hre mang si lo a, ka awmdan apiang lo sawisel hi nuam a ti ve hrim hrim. 

"Bowl vel hi kan sil thawl ange..dahkhawm chuan chaw ei khamah a tam duh emai" tiin ka kalsan ta daih a, "Naktukah ka chei leh ang che. I thawhpuite ho pawhin mawi an lo ti ngawt ang che. I inchei phei chuan i hmelţha lehzual a, i hmel ang chu nei ve ila ka inchhuang thei ngawt ang" Hope in a tih chuan, "I buaipui peih e a, sawn mai mai si" Faith-in a lo ti hlak a, ka lehhawi rang kher mai. 

"Tu ber nge sawn i tih kha?" ka tih chuan a meng tal tap a, pha dai hian Hope chuan min lo en ve bawk a, "Sawn i tih kha keimah hi ka ni em?" ti a ka zawh nawn leh phei chuan en pawh min en tawh lo. 

"A sawi ve mai mai a nih kha. Faith chu i hrechiang tawh alawm, a thinrim lai chuan engpawh a sawi ţhin, Anthony-a ţhiannu pawh tuk chawp a ang si a tih vel mai mai kha, engahmah ngai duh suh aw U Sai" Hope chuan a lo ti zung zung a, sawi mam sak tum viau mah se Faith chu ka la en reng a, "Sawi chiang law law rawh...sawn i tih chu tu ber nge han sawi teh" ka tih leh lai chuan Kungtein min lo khap a, "A ţawngsual aniang" ti mah se Faith ţhutna lam chu ka pan ta tho a.

CONT..