HIS LAST LOVE-17

HIS LAST LOVE-17

"Sawn i tih chu keimah hi ka ni em?" a ţhutna bulah ka ding a, zawhna ngai ringawt ka zawt nawn ngun tawh khawp mai. 

"Eng nge thleng a? Eng nge in tih?" Nu Hlimin a rawn tih chuan, "Faith hian sawn mai mai min ti a, nangpawn i hria ang tiraw? Sawn ka ni em ni a?" ka lo ti leh a, chawp leh chilha a hmel danglam nghal chu ka hmuh hmaih hauh lo. 

"I hriat duh leh i nute zawt la a ni mai alawm. Ka thusawi hi chu ho te pawh i haw bik ţhin hrim hrim. Hope lah hi i kawm hrang daih zel a" Faith chuan a lo ti hlak hlak a, Nu Hlimi a lo lan takah chuan a huai leh tawh khawp mai. 

"Ka huat bik vang che a ni hran lo. I thusawi kha ka beng verh zawng a nih avangin ka zawt che a nih hi. Ka chanchin in hriatchian viau chuan zep reng lovin sawi mai ta che u" ka aw chu a vinin ka tawt up up a, hrehawm ka ti takzet bawk. 

"Vin lo in ţha deuhin sawi ţhin rawh. I chanchin engmah kan hre lo. Faith-i phei chu i khin rual pawh a ni hleinem. Eng emaw han sawi ila i thinrim nghal zel a, chenpui i har emai" Nu Hlimin a tih phei chuan ka thinrim zual sauh a, ka insum nasa hle thung. 

"Sawn intih te chu tu nge duh bik ang? Sawn ka lo ni tak tak a nih leh min hrilh ula, in mualpho phah dawn tihna pawh ni hlei lo" ka tih chuan, "Min zah lo leh lutuk a, i lo awm aţang hian nitin inchhungah buaina a chhuak ziah. I lo awm ve hma chuan ka fate ho nen hian inhnial chu sawi loh hauh pawh kan inhau ngai lo. I mizia hi hre lawk ila chu mo atan ka pawm kher lo ang" a ti chu kei takngial pawhin rapthlak ka ti.

"Dikchiah...U Nico te chu Rita-i pawn a duh lutuk. Nang aiin a changkang a, an hausa zawk bawk a, lo innei lo tawp ula ţha tur" Faith-in a tih lai chuan, "Duhtawk rawh" mipa aw hian vin zetin a rawn ti a, Nicholas chu kan en rang hlawm viau ang ka ring. 

"Eng buaina nge in lo neih leh tak a?" ti a zawh pahin Faith chu a en run a, a melh a nain hrechiang lo tan phei chuan hlauhawm tak tur a ni. 

"Ka ţawngsual a a lo la thutak a nih kha. A thinrim nghal zel a, fiam theih pawh a ni ve hleinem" tiin Faithi chu a lo insawithiam nghal a, ka ngawi reng tawh thung. 

"Faithi te ţhian ho chu an fiamthu a sang a, fiamthu a sawn a ti kha Saii hian a haw pek a nih hi. A ţhian dangte pawh sawn, falak tih velin a fiam ngun alawm. A ţhiante a fiam ang chiahin Saii a fiam ngam ve tawh a nih chuan a pawh viau tawh tihna a ni mai a, Saii lahin a haw zel bawk si" Nu Hlimin a tih chuan, "Sawn in tih te chu fiamthu a ni hleinem. Faith-i pawh Saii hi nang aiin a upa a, i duh duh a i ţawngkhum theih a ni lo. Ngaihdam dil la, ti leh tawh suh ang che" khauh deuh tak hian a ti a, an ngaihdan a nih loh hmel hlawm kher mai. 

Pa Chhawna pawh chanchinbu kengin a lo lut a, thil awmzia min zawh chuan Nu Hlimi bawkin min lo chhan khalh leh zung zung a, a sawi uar nasa mai bawk si, a thiam lo zawk ka ni leh daih tawh. 

"In bula awm a hahthlak emai" ti a Faith-i thawh tum chu ka pasal chuan a lo nam ţhu vat a, a dim lo em em mai lehnghal. 

"A na alawm..ngati nge khati vak vak a min nam a?" ţap ţuau hian a ti tawh a, "Ngaihdam dil rawh ka tih kha" a ti nghat a, a nau darah chuan a dawm bet tlat a, awlsam deuh a kal tir a tum loh hmel khawp mai. 

"Ngaihdam dil nachhan tur ka nei lo. I duh leh nilengin min vuan bet la, ka tihsual ni loah ngaihdam ka dil awm lo emai" tiin Faith pawh chuan luhlul a chhuah ve tlat a, keichu inrawlh ka tum tawh lo, ka hmaah ka pasal a din chuan a tawk mai. 

"Ka hrilh ngun tawh che u kha. Saii in ngaithei lo a nih chuan ka tih ţhin kha fiamthu a sawi ka ni lo, he inah hian ka awmpui reng dawn hauh lo a nia" a tih chuan, "Ka thu lo chuan in chhuak lo ang. In sawn chhuah kha sawi tawh hlek suh" Pa Chhawnan a lo ti vat a. 

"I thusawi ka zawm lo ngai lo. Ka naupan lai aţangin tun thleng hian i thu ang zelin thil ka ti ţhin. Mahse, Saii in ngaithei lo a nih chuan kan chhuak ang. Hrehawm tuar tura kan hnen a rawn awm a ni lo. In ngam chuan in ti leh dawn nia, tun bak hun ţha ka siamsak lo ang che u" a ti a, a ţawng zawi nain a khauh viau thung. 

"Ka rorelna, ka uapna hnuaia in awm chhung chu ka thu in zawm tur a ni. Saii pawhin Hope a hruai hrang a, Faith-i an sawm tel ve duh ngai lo a, kawm bik neih te hi a ţha lo. Chhungkua chu kan vaiin inpawh deuhin kan awm tur a ni" Pa Chhawna chuan a lo ti leh a, "Min sawm bik hleinem. Keimah zawkin damdawiin bulah ka nghak a, a duh lo chung bazarah ka kalpui a nih kha. Faith-i chu class a kal a, inah awm se chu kan sawm ve ngei ngei ang. U Saii phei chuan bazar kal a sawi lo hrim hrim, ka ti lui a nih kha" tiin Hope a lo inrawlh vat a, midang chu an thinrim zual sauh emaw tih tur a ni. 

"Lo ţawng ve suh..nimin a in thil tih avanga kan buai zia hi hre ta che. Saii lahin Faith-i sawm ve ang tih a hnekin i sawi apiang a lo remti nghal zel a, mo fel chuan chhungkua an huikhawm zawk a ni ngai a, mahse, tunah chuan inţhen hrang ngai hlei lo phir te pawh an hran tawh em hi" Nu Hlimin a ti hlak hlak nain Nicholas chuan, "Sawi duah a ţul tawh lo. Ka thusawi kha hrereng ula a tawk. Lallawmpui, ngaihdam chu dil rawh" a ti nghat a, Faith chu a ţap a ni tawh mai. 

"A ngai lo..ka insiam dawn ka tlai palh ang" ti a kal mai ka tum chu, "Kan enliam chuan an zuam zel ang che. Ka sawi ang chuan ti rawh" tih pahin Faith chu a sawi che dat a, Nu Hlimi leh Pa Chhawna ten lo hau ve char char mah se a thlah duh chuang lo. 

"Ka tihpalh" zawitein Faith chu a phun sap a, min melh rum viau thung a, lu ka buk nghat hnuah choka aţang chuan ka chhuak a, Nu Hlimi ang hlak hlak ri chuan inchhung a luah hneh khawp mai. Min haw zual sauh dawn tih ka hria a, Nicholas awm loh lai chuan an tawrhhlelhawm viau ang. Mahse keichu a ruka hrehawm tuar ngawt ngawt chi ka ni lo a, an sual viau chuan ka pasal bulah ka sawi zel ang. 

"Ka thlah ang che..chaw i ei dawn em?" pindan a lo luh paha a tih chuan, "Ei lo mai ang" ka ti mawl tawp a, darthlalang hmaa ka din rual chuan ka hnungah a rawn ding ve a, a taksa si chetin min kuah bet a, "Eitur kan lei phei dawn nia" a ti a, ka bekah a fawp vang vang a, "I rimtui thei si" a tih leh chuan ka nui ve ta nge nge a. 

Ka kawnga a kut suihbeh chu vawn pahin, "Pa Chhawna hian a ngaina vak lo che em ni?" ka ti a, a awm ngheng chungin darthlalang aţang chuan a hmel ka en a,han danglam vak ka hmu hran lo. 

"Ngaina vak lo ang...Anthony nen an inpawh angin kan inpawh ve lo a, an tihbuai reng che chuan kan chhuahsan daih dawn nia" a tih chuan, "An phal kher lo ang. Ka chanchin i hrechiang tiraw? Sawn ka ni tak tak em ni?" ka lo ti a, rawn kun hniamin ka bengah a fawp zauh a, a biang chu ka biang nen a ti si a, min hnaih viau naa hrehawm ka ti hauh lo. 

"Kal phawt la nakinah kan sawi dawn nia. Ka hriat ang ang ka hrilh ang che. Duty phawt rawh" a tih chuan aw ka lo pawh ve mai a, tui lo deuh a duty ka hlau ve tho a, hre rih lo mah ila pawi ka ti lo. 

"U Sai, chaw i ei dawn em?" inhnuai ka thlen thlak ruala Kungtein a lo tih chuan, "Ka tlai tawh emai ka ei lo mai ang" ka tih a, chabi vai vir paha Nicholas lo chhuk ve chu ka en zawk a, tumah be lovin ka chhuak ta daih a, pawn ka chhuah hnuah Hope-in min umzui tih ka hre chauh a ni. 

"I rilru a na em? Keima sawm chhuah i nia, nangmah an dem daih che sia, nuam lo ka ti lutuk a" ka tih chuan, "A awm ve tho alawm" ka ti a, hrehawm a tih hmel khawp mai. 

"Ka lo hrilhfiah ţha leh ang. An hau tawh miah lo ang che" a ti ve ngial a, nui hak hak chung hian, "Ka uang a nih kha..thiam lohna i nei hleinem. Rilru nuam deuhin awm la, naktukah min chei leh dawn nia" ka tih takah chuan a nui ve ta nge nge a, a thaw huai ang ka ring. 

Damdawiin lam pana kan kal chu a ding thut a, "Eitur ka va lak ang che" tih leh chhuah a rual a, ka tho hma bawk nen, thingpui chiah ka in bawk si a, ril chu a ţam ve reng mai. 

"Ka rawn la nual a, Ngheti i pe ve mai dawn a nia" a tih chuan Ngheti ka nghak lo tih ka hre ve chiah a, "Nghetin min lo ring ngei ngei ang" tih hlut paha phone ka phawrh chuan, "Ka hrilh tawh" a lo ti then a, phone number pawh an inpe tawn tawh tak alawm. 

Damdawiin ka thlen rualin Nghetin, "Buaina in nei em ni? Nicholas zawkin min lo be daih a, ka rawn thlah dawn a i hmanhmawh chuan lo kalsan mai rawh a tia, kan kal rual loh ţum hi chuan buaina in nei a ni ziah" a lo ti bawrh bawrh a, "Nei vak lo...thawh ka hai a" tih pahin a hmaah eitur ka dah a, kan buaina kha ka sawichhawng peih rih lo a ni ber. 

"I ngui deuh burin ka hria, thil thleng chu a awm chiang alawm. I sawi chak loh chuan sawi rih lo la, i sawi duh chuan ka ngaithla thei reng a nia" a ti a, ka lo bu nghat ringawt a, engmah phei chu ka hrilh lo. 

"I lo dam em?" Chhandami ka hmu chu mak ka ti ngei a, haw tum a ka intintuah lai mekin ka hmaah a rawn ding hlawl a, a nui ve ngei bawk.

"Dam e...i va reh ve. Kan inhmuh lohna a rei tawh hle mai. Eng nge i rawn tih a?" ka tih chuan, "Ka in entir a, ka thin hnun hi a na reng a, ka ngaih a ţha vak lo a, i la haw loh takin ka tia ka lo zawng risk che a nih hi" a tih chuan a banah ka dawm a, "Hawh lokal rawh thil ei ang u" ka ti deuh hlut a, Ngheti chu a pha leh pek a, Chhandami a huat vang pawh a ni lo, sawitur kan neih a ring a ni zawk mah ang. 

Mapuia nen a kan chawlh ziah na hmunah kan inzui lut a, rin aiin mi an tlem a, eitur kan chah hnu chuan, "I thin hnun tih loh chu a dam ang tiraw?" ka ti fiamthu a, a lo nui ve var var mai. 

"Aw...kan ţha e..kan pa chhungte pawh an fel ve tawh lutuk" a tih chuan ka lo lawmpui ve em em ringawt a, "In nupa inkar a ţha deuh tawh em?" tim deuh dai hian a ti a, min zawh hreh hmel khawp mai. 

"Aw..ţha ve zel e. Nicholas hian lo hmangaih ve ta che sela engtin nge i tih ang?" ka ti khawl a, nuam lo chu ka ti ve reng. 

"I awm tawh alawm. Ţhian ang chiahin min en a, min lo hmangaih pawh nise nunhlui a ni tawh a, tih theih a awm tawh lo. Keipawhin pasal ka nei tawh a, ka hlim alawm" a tih chuan, "Ţhian ang chiahin a en bik lo chein ka hria. A hmangaih hmasaber i ni hial ang chu" ka ti a, pasal nei lo se chu Chhandami nen hian an innei tawh maithei a ni.

"A hmasaber pawh lo ni ila nangmah i awm tawh a, a hmasaber nih ai chuan a hnuhnung ber nih a ţha zawk alawm, damchhungin a hmangaih tawh dawn che tihna a nia, a hlu daih zawk" zangkhai deuh hian a ti a, ani pawh hi a hlim ve tawh a ni phawt ang. 

"Phaia a awm laia a bialnu i tih kha helamah a awm a, a lo leng reng zel" ka tih chuan mak a ti deuh aniang a meng zau kawk a, "A lo leng ngam maw?" a ti hluai a, a awih chiah lo zawk niin ka hria. 

"Leng ngam ang chu..mi tih lawm a thiam bawk sia, ka chhungte ho pawhin an ngaina vek" a eitur bik ka dah hnaih sak a, "Nu Hlimi hi chuan mi hausa a ngaina a, a be chhe lo ang. I tan a hrehawmna turin a awm ngai em?" ti a min zawh chuan, "Awm ngai tho e mah se a tam zawk chu ka haider lui tlat a, min runluih deuh ni a ka hriat pawhin hre lo ang hmiahin ka awm a, engahmah ka ngai lo tih hria se ka duh ber a" ka ti a, a nui ve hak hak reng a, hmuh a nuam sawt tak tak a ni.

"Nang chu khawi hmunah pawh awm la i ngaihtuahawm loh ang. In nupa inlar a ţhat te chuan midang chu ngaipawimawh vak duh suh. Keipawh miin min sawi sup sup pawhin ka ngawi tlat a, an rin loh dan deuhin ka pasal hlui ka nei leh thut mai alawm. I chhungten engtin pawn ti che sela i pasalin a rin che chuan a tawk mai. Ţan tlakin awm la, i hmaah a ding zel mai ang" a ti a, ka pasal hi kei ai chuan a hrechiang fe zawk chu a ni. 

"Pa Chhawna nen hian tun thlengin an la inpawh loin ka hria" ka tih leh takah chuan, "Inpawh em em lo ang. Nicholas hi chuan khawhar rukna a nei reng ţhin a, a unaute anga ngaihsakna leh hmangaihna a dawn nasat ve loh vangah ka ngai a, nu Hlimi pawh hian a hmangaih tho nain mahni hrin ngei lo hi chu en hranna lai a awm leh ţhin a, a mal ţhin sia, a khawngaihthlak a sin aw. School kan kal lai pawn pakhatna pawh nise Nicholas ai chuan Anthony-a pass ţawk ţawk khan a ti lawm zawk ţhin a, an chhungkua hi chu kei aia hrechiang an vang viau ang. Anthony hian buaina a siam ţhin che em?" tiin min zawt let khauh a, lu ka thing ne ne a, "A fel lutuk" ka ti chhuak sap bawk a. 

"A zia a thlak tawh a nih chu. Tunhma a an buaipui ber ţhin a nia, a insiamţha tawh a nih dawn chu. An duat bik lutuk avang hian Nicholas hian a haw reng ţhin a, an nu leh pate awmdanin zir se chu an inkawmngeih ngawt ang. An ti khaw lo zo vek alawm" a ti ve barh barh a, Chhandami sawi hi a dik ang, Anthony leh Nicholas te hi ţul tawpah lo chuan an inbiak ngai awm pawh ka hre lo. 

"Ka awm rei tawh viau nain hriat loh ka la ngah zawk ang. An mizia chu ka hre lutuk tawh a, Nu Hlimi leh Faith-i ngat phei chu in a haw ka hreh ngawih ngawih ţhin nachhan ber an ni. Mahse, ka tuar lui zel a, hrehawm ka tih pawhin ka lantir duh ngai lo, a lanchhuah chuan tlawm zawka min ngaih ka hlau tlat a, tlawm zawk nih ka duh bawk si lo. Ka mizia hi keipawn mak tih chang ka ngah a, ka chapo nge pawh ka hre lo, mahse min ngaithei lo tu ten tlawm zawk hmuh a min hmuh hi ka duh lo bur" ka ti charh charh a, a lo bu nghat nghat a, a ngaithla uluk khawp mai. 

"Mo te mil tum miah lo, an chhiatna zawng char char mi hi an awm ve a, i la tuar chhuak em em ang. In pa nen hian inhmangaih tlat ula, in ţan dun tlat chuan tuman an ti chhe thei lo ang che u. Mo nih chuan dawhtheih hmasak te a ngai ve a, nangmah i fel miau chuan tumah an sual rei peih lo ang" a ti a, kan inhmu lo rei bawk a sawi tur kan ngah dun khawp mai. 

Peng kawi tawh lovin inah ka haw tlang a, Kungtei chiah a lo awm a, hawi kual paha "Khawiah nge midang?" ka tih chuan, "Ka pi chu pindanah a awm a, midang an lo la haw lo. Thingpui ka chhuang nghal aw" a lo ti zung zung a, thil ei tawh mah ila ka aw tho a, Kungtei chiah a awm hi chuan ka hahdam huai huai zel. 

Rei pawh ka ţhut hmain Anthony a lo haw ve a, biak hmasak ka chang lo leh tawh. Ho mai mai sawi a kan ti ti laiin, "Hmeichhia lo leng kha i bialnu a ni maw?" tiin ka fiam a, "Ka ţhiannu a nih kha. Pasal a nei dawn" a lo ti daih a, Kungtei takngial pawn mak a ti ve niin a lang.

"Awii...in inngaizawng emaw kan lo tia, Hope nen phei chuan a duh chhe e..thing bung kilh khawm a ang te kan lo ti vel a" Kungtein a tih chuan a lo nui hawk hawk a, a ţhiannu an sawisa chu a lawm zawk mah emaw tih mai tur a ni. 

"A fel a pasal pawh a nei ţha dawn. Hmeichhe fel hi chu an hlu vet vet em..hmel aiin a pawimawh zawk. Saii te ang hmelţha bawk, fel bawk hi chu an vang pharh ang a" tiin min han sawi tel hram a, "Chuchiah...U Nico hi vannei i ti ve em? Amah chuan zawng se U Saii ang hi a nei awm tawp si lo. Fa nei tawh ula ka ti, a chhun kawp cheu phei chuan a hmelţha dawn lutuk" ti a Kungtein a lo tui hnih chuan, "Hmelţha pawh kan lo lai ve thei tho a nih hi" ka ti fiamthu a, pathum lek mah ni ila kan thawm a ţha khawp mai. 

Anthony leh Kungtei te thusawi chu nuih pui reng mah ila tukin a Faith-i thusawi khan min la kam a, awm a nuam thei tak lo. 

"Tukin chu U Saii hi Faith-i leh Nu Hlimi te nen an inchhang lawk deuh a, U Nico a thinrim nasa mai, Faith-i kha kut a thlak duh mai ka ring a, ka lo hlauthawng a nia aw" Kungtein a tih chuan hriatthiam loh hmel deuh hian Anthony chuan min lo en a, "Eng chungchangah nge?" tiin keimah min zawt na a Kungtei zawkin a lo sawi zat zat a, a uar thiam angreng si, a sawi hmangah chuan kan invaw hlum lo chauh a ni ber.

"An zuam theih turin awm suh. Faith bik hi chu a hrisel loh vangin ka nu leh paten an duat a, Hope a hrisel ţhat nen, Faith hi chu damdawiinah kan luh pui ngun khawp mai. Ka nu leh pate chuan an ţan zel dawn a, nangmah kha an hlauh turin awm la, khak fawk zel rawh. I enliam mai mai chuan an zuam tial tial mai ang che" a ti a, ani pawh hian ka thlavang a hauh ţhin a, a hriatah chuan min huatna an ti lang vak ngam lo ţhin reng a ni. 

"Min hrilh tawh rawh" khum a mut paha ka tih chuan a lo lawn ve vat a, a inbualna a la rei lo a, tawnzau leh boxer chiah a ha bawk nen, ka taksa a rawn sik chuan ka dai sawng sawng mai.

"Buaina i siam phah ange" a tih chuan, "Siam phah lo ang. Thudik ka hriat duhna a rei tawh a, ka nu leh pate fa ka ni lo emaw tih chang ka ngah mai. Ka chanchin chu khawi aţangin nge i hriat?" ka tih chuan, "Ka pa aţangin" min kuahna tih ngheh salh pah hian a ti a, chuti chu a hriatna a rei hle tawh dawn tihna a nih chu. 

"Engati nge min hrilh vat loh" a awm a dawm ran chung hian ka ti a, ka chhuahchhal a ni ber. 

"Hre lo la ka duh zawk a, phir te kha chuan ka nu hnen aţangin an hria a nih ka ring. Sawi chhuak mah ila a siamţhat theih dawn chuang lo a, hre lo la hrehawm i ti lo zawk ang" a ti leh tawh a, kei lahin ka hre chak bawk si, "Min hrilh rawh. Dawn sawn dan ka thiam em em ang, naupang pawh ka nih tawh loh hi" ka ti deuh tlat a, a sawi hma chu zawh char char ka tum a ni tawp mai. 

"Thudik tak a ni em tih phei chu ka hre lo a, an sawi danah chuan i pa nen an inneih lai rengin i nu hian mipa dang fa a pai ni awm tak a ni" a thusawi chuan rin aiin min deng na a, sawi tur pawh ka hre lo. Ka thinrim lo a, ka lungngai lo a, mak ka ti takzet thung.

"Nang hi i pa fa i ni ve lo..chu chu ka hriat dan a ni mai" amah bawkin a tih leh chuan, "Uire a nih chu...ka pa chuan engati nge a ţhen mai loh le?" ka ti a, ka zawt chiah pawh a ni lo..keimahin ka phun ve mai mai a ni mah zawk. 

"I pa leh ka pa chu an inang chiah a, mualpho an hlau a, mi sawi an kai loh nan engpawh an ti duh ang. Nangpawh a fa angin a pawm che a" ka sam a chul a, ka ngawi reng nain ka rilru erawh a buai khawp mai. 

"I rilru a nat ka hlauh vang a nia ka hrilh duh loh che" a tih lai chuan lehlam hawiin ka saisir a, ka pa hian min en hran bikna deuh a nei ka ti ţhin reng a, ka nu pawh ka zawt fo reng a nih kha. Ka hmel leh landan zawng zawng thlengin a danglam a, ka pa hian a mualpho loh nan chiah fa atan min pawm a nih ber hi. 

"Thudik a ni em tih pawh kan hre lo a, hrehawm ti duh suh. Bakah ka awm tawh a, ka kalsan miah lo ang che" tih pahin ka kawngah a kuah a, ka koki a a fawh lai chuan ka mit ka chhing a, ka thu hriat hi ka awih thei hlawl lo a ni. Nicholas hian chiang lo ruaiin tlem te chiah a hria a, min hring tu, ka nu ngeiin min hrilhfiah vek thei ang. 

Day off a ni tho a tiin ka nute office a kal tumin ka insiam a, ka thu hriat kha a lemin a awihawm loh em a, ka nu ngei zawh fiah ka duh a ni. 

"In inah i kal nghal dawn tiraw?" ka pasalin a tih chuan ka lo aw vat a, "Chaw i ei nghal dawn em?" a ti leh a, ka hriat loh thu a ka chhan chuan, "I duh leh einghal rawh. Zanah ka lo lam ang che" a ti a, ka tih tur a hre vek a, a thu min hrilh kha hrechiang law law turin min duh aniang ka kalna hmun tur ka sawi pawhin min dang hauh lo. 

"Lo ei ve daih la...office banah i lo tlang ang a" ti a sawm pahin ka kuah a, min lo kuah let rang khawp mai. 

"Keichu a ngai lo" a tih chuan ka lo pawt chat a, "I lo tel ve loh chuan ka pa'n min hau leh hrep ang. Rawngbawl hmain ka haw ang a, chaw ka lo chhum kep ang che" ka tih tak tlatah chuan a remti ve ta nge nge a. 

"Ka nu te hrilh ve hrim hrim rawh aw..i hrilh loh chuan an hau leh ang che" a ti a, a kal dawnah ka hmuiah a fawp zauh a, ka chawlh ve ni a a awm loh chuan khua a har ve rawih rawih zel. 

"Vawiin chu ka nu te office ah ka kal lawk dawn a nia aw...tlaiah pawh Nicholas nen kan inah chaw kan ei ang..min lo kep suh u" ka ti ve thlap a, Nu Hlimi chuan min chhang duh lo a, Kungtei erawh chuan, "Aw..U Nico pawn a sawi tawh tho a, lo haw har su aw..kan khua a lo har lutuk ang" a ti a, nu berin min ngaihsak duh bawk si lo, rilru nuam lo deuhin ka chhuak lui a, a ang leh nasa viau maithei a ni. 

Ka nu'n min lo hmuh chuan, "Hna i kal lo em ni? Min hrilh lawk si lo a" a lo ti a, a hmaah ka ţhu a, midang an awm ve ţhu avangin rei deuh ka ţhut hnuah pawh ka sawi duh tak chu sawi na hun a awm meuh lo. 

"Thingpui dawrah chawl ang" ka ti ta ringawt a, sana a en hmasa te te a, "A hun tawh tak a nih hi" tih pahin a thil khawih lai chu a khup thawk a, a ţhiante hnena, "Ka fanu hi thil kan ei pui lawk ange aw" a tih hnuah kan inzui chhuak a, ka thil zawh tur hi hria se chu min kalhran pui duh kher lo maithei a ni. 

"Engmaw i lokal chhan ber?" midang awm ve ho chu ka en hmasa te te a, chumi hnuah an hriat phak loh tur hian, "Faith-in sawn min ti a" ka ti sap a, min en phawk khawp mai. 

"In inhau leh tawh em ni a?" a tih chuan, "Inhauh loh lai kan nei hleinem. A thinrim laiin sawn mai mai min ti a, a phuahchawp ringawt chu a nih ka ring lo. Ka pa fa ka ni ve lo em ni a?" ka ti a, a mitmeng te chu a buai riauin ka hre tlat a, ka ngaihbel mai mai a ni thei tho bawk. 

"Ni e...i pa fa ve tho alawm i nih" a tih te chuan min ti lungawi zo tawh lo. 

"Ţha deuhin min hrilh mai la, thudik chauh ka hre duh. Ka upa ve tawh a, engpawh sawi la chhiat phah nan ka hmang dawn chuang hleinem" ngenngawl deuh a tih pahin a kut ka vuan a, ka hriatfiah hma chu rilru nuamin ka awm dawn chuang lo. 

"Mi hran fa i ni lo, chubak sawi tur ka nei lo. Mipa dang laka ka fa chu nila i pa hian a pawm duh lo ang che. Thudik ka hrilh che a, i awih leh awih loh chu i thu thu a ni mai" a ti hmak a, ka mita min en ngam miau loh avangin dawt a sawi a nih ka ring zawk mah. 

"Thup reng theih a ni lo a, thudik ka sawi pawh ti la ka awih lo. Nicholas pawhin a pa hnen aţanga a hriat thu a sawi a, dawt mai mai ni se chu ka pa hian Pa Chhawna hriatah a sawi lang hauh lo ang" ka ti ve tlat a, a lo thaw hak a, min nin hmel takzet a ni. 

"I pa lo pasal dang ka nei lo a, ka uire lo bawk. Chhawna te chuan khawi aţangin nge an hriat ka hre lo. I pa fa ni lo la chu a buaipui reng peih lo ang che, a mizia te chu nangpawn i hrechiang alawm" lungawi loh hmel taka a a tih chuan, "Mualpho a hlau alawm. Nangmah leh keimah vanga mualpho vak a hlau a, chuvang te pawh chu a ni thei a sin. Hmanah pawh ka zawh ţhin che kha, ka pa hian min en hrang bik emai a fa ka ni ve lo em ni ka tih fo kha. Nicholas nen in anna lai in nei i ti bawk a, ani pawh Pa Chhawna fa a ni reng reng hleinem. Keipawh hi ka pa fa ka ni lo tiraw?" ka ti nawn leh ngat a, min chhang tawh lovin a hmaa eitur inchhawp chu a ei a, ka nu thil ei chu ka en ngawih ngawih a ni ber a, ka awih thei hlawl lo a ni. 

"Engmah min hrilh duh loh chuan ka pa ka zawt dawn a nia" ti a ka sawi ţhaih chuan a lo hawi chhuak vat a, "I pa zawt mah la engmah i hriat belh chuang lo ang. I buai loh na turah i buai mai mai a nih hi. Ngaihţha deuhin awm la i rilru a hrehawm loh a ni mai. Min rinhlelh reng chuan nangmah bawk i hah a, hrehawmna i insiam sak mai mai" a ti duh lek chauh a, a sawi ţha duh lo viau a, dawt a sawi tih ka hre bawk a, thudik min hrilh hma chu ka zawt nawn char char tho ang. 

"Ei rawh a dai ang" ka hmaa eitur inchhawp a kawh takah chuan thuawih deuhin ka ei ve mai a, ka nu ka melh pah zeuh zeuh a, nuam a ti bik hauh lo ang tih chu a hmel landanah a hriat vek. 

"Tlaiah kan nupa in chaw kan lo ei dawn a nia" ka tih chuan, "Lo ei rawh u" a ti ve mai a, "Engati nge dawt min hrilh kher a? Thudik min hrilh rawh, lo uire pawh ni la ka nu i ni a, ka hmuh dan che a danglam dawn chuang hleinem" ka tih chuan min chhang duh tawh lo a, ka thil ei chu min nghak a, ka ei zawh veleh "Kal ang" tih leh thawh a rual a, pawisa a pek fel hnua kan inzui chhuah pawh chuan, "Miin sawn mai mai min tih hian pawi tihna i nei lo em ni?" ti a ka zawh chuan a ding chawt a, min chhang ve tawh dawn emaw ka tih laiin kan lam pana taxi lo tlan chu a phar a, a din veleh kan veng hming te hrilhin, "Lut rawh" a ti hmak a, duhthlan tur dang ka nei chuang lo. Lunghnur deuh chungin ka lut a, engkim min hrilhfiah ang chu tih nak laiin engmah a sawi ţha duh lo a, a sawi ve chhun pawh dawt hlir lehnghal. 

A la hma deuh bawk a inah chuan Liantei chiah a lo awm a, "Ehe...Saii a lokal mawle..a van mak em em" a lo ti hluai a, ka nau nen pawh hian kan inang lo riauin ka hre tlat tawh.

"I chhungten an hau che em ni?" min ngaihtuah hmel taka a tih chuan, "Hau ang chu mawle. Sawn mai mai min tia, ka nu hnenah sawn ka nih leh nih loh ka zawh lahin engmah a sawi ţha duh lo a, min hrilh ve chhunte kha dawt hlir a nih ka ring. Diktak chuan a fanu ka nia, min hmangaih tak tak se chu miin sawn min ti kha a hua ang a, thudik sawi tur a ngen chawp pawh a ngai lo ang. I pa fa i ni lo a, mahse tuman kan en hrang lo che, i pa hian fa ang chiahin a ngai che a, sawn i ni reng reng lo te pawh ti se ka dam deuh huai ang chu" ka ti bawrh bawrh a, min en ran chungin tv remote in a lu a thai neuh neuh a, a bangbo khawp mai. 

"I sawi awmzia chu sawn an tih vang mai chein ka pa fa ni ve loah i in ngai tihna maw? Ţawngkam duh tui lo deuh te hi chuan an hmang fo alawm..sawn lo pawh sawn tih chang te an nei a, i chhungte chuan ţawngkam an thlahdah tihna a ni mai alawm" a tih chuan, "Nicholas pawn a pa hnen aţangin a hria a, ka pa fa ni ve lo angin lawm min hriat. Ka nu leh pate hian thuruk an nei chiang mai. Ka zawt chhuak dawn khawp alawm. Sawi tur awm miah lo chu nise Pa Chhawna te chhungkua hian engmah an hre lo ang. Sawi theih turin ka nute hi an awm tihna a ni mai" ka ti tan tan a, Liantei hi kei aiin a fing zawk daih a, mahse tun ţum chu a ngaihna a hriat bik loh hmel khawp mai. 

"Tunlaiah chuan hmanrua kan nei ţha tawh a, a test theih reng alawm. Ka nute i rinhlelh tlat leh test la, a fel vek a ni mai" a ti then a, nurse zawk lehnghalin ka lo ngaihtuah chhuak miah lo a, a ţha ngawt tak ang. 

CONT..