HIS LAST LOVE-18

HIS LAST LOVE-18

Zikpuii lo haw chu pindan lama a kal tlang hmain a banah ka lo vuan ding a, ka bulah ka pawt ţhu ve a, phawk deuh a min en lai chuan, "Ka nu hnenah ka kal a, sawn ka nih leh nih loh ka zawt a" ka tih chuan, "Mawl viau zel suh" a ti vak a, a thinrim ti tih nghal der niin ka hria. 

"Nangpawh hian eng emaw chu hriat i nei ngei ngei ang. Ka pa hian min en hranna lai a nei tih chu ka hria a, a fa tak ka nih leh nih loh ka hre lo thung a, tunhmain boruak ţha lo a lo awm tawh tiraw?" ka ti leh thawr a, ka tan ţangkaina a awm hauh lo nain hriat ve ngei ka duh tlat a ni.

"Chutiang thleng thlengin ka hriat pui ve hleinem. Ka pa fa lo ni ve lo pawh ni la hriatchian kher a ngai hleinem. Thudik hian mi a vaw na ţhin a, i lo ni lo tak tak a nih phei chuan i hnual mai mai ang. Nangchu ni ila hriatchian ka hlau viau zawk ang" a ti a, Liantei pawh a lo bu ve nghat nghat a, mahni in ngeiah nuamsa deuhin an la awm bik a, ka thik rum rum zel. 

"Ka pa a lo ni lo a nih chuan ka pa tak tak chu tu nge a nih ka hre duh alawm. Naupangchhia ka ni tawh lo a, engkim ka hriat ve vek a hun tawh" tih ţanin ka ţang a, Zikpuii ngei pawh chuan tih ngaihna vak a hre bik lo. 

"Ka pa talin min hrilh duh ang tiraw?" ti a ka zawh leh takah chuan, "Hrilh duh turah ngai ang. Eng pawh sawi se hnual phah lo la, pasal i nei tawh a, siamţhat theih tawh loh thil vanga indawmkun ai chuan hmalam pan a ţha zawk" a ti ve ta nge nge a, vengchhung miten an hre lo leh ka hriata engmah an sawi ngai lo hi a mak vak lo a nia. Tunhma chuan ka nu leh pate hi thingtlangah an awm ţhin a, kum nga ka tlin kumah Aizawlah an pem a, tuna kan awm naah hian kan awm ta ngar ngar a ni. 

Ka nu leh pate chu an lo haw rual ve mial a, ka pa hmel ka hmuh chuan ka nu'n a lo hrilh vek tawh tih ka hre nghal a, tumah min be lovin an pindan an pan a, ka zui lut rang khawp mai. 

"Ka pa, pa Chhawna bulah eng nge i sawi?" ti a zawh pahin sofa ah ka ţhu tharh a, "Buaipui tawh suh ka tih kha" ka nu zawkin a lo tih chuan, "Pa Chhawna leh a fate zawng zawng pawhin an hria alawm. Kei lahin engmah ka hre ve si lo, min hmuh dan tur te ngaihtuah ve ta che u" ka ti vin ţhak a, he thil hi pasal ka neih ni aţang khan ka hrechak lehzual a, min lo ngaithei lo viau ţhin em tih te pawh hriatchian ka chak a ni. 

"Lo va chhuak rawh" ka nu lam hawi chung meuh hian ka pa chuan a ti a, "I fanu a nia, thil dang a awm lo. Ka chhuak dawn lo" a lo tih chuan, "Chhuak rawh...hre vek tawh mah se a pawina a awm hleinem. Mi zawng zawng hriat turin a tlangaupui dawn tihna pawh a ni hleinem" ka pa'n a tih leh chuan ka thinphu a rang ve ringawt a, an lak thutak tak viauah chuan ka zam leh si a ni ber. 

Ka nu chhuah hnu chuan min ep zawngin a ţhu a, a hmel landan chu a dam thlap a, ka hmuh hnuhnun ber ţum nen chuan inthlau tak a ni. 

"Ka hna avangin thingtlangah kan awm ţhin a" tiin bul a ţan a, "Nitin ka chhuak a, office banah ţhian ho a card den kan ching a, i nu leh Zikpuii hi ka ngaihsak vul chuk ngai lem lo. Zu ka in lo nain zu in mi ai pawhin hrawn ka hrehawm zawk maithei" a ti a, sawi zawm tawh miah lo mah se ka lo pian ve dan chu ka ngaihtuah thiam vek tawh a, ka pa fa ka ni lo tih ka chiang tawh bawk. 

"In ah ka awm tlem a, i nu nen pawh hian kan inpawh lovin a ţulah bak kan inbe ngai lo. Khum khatah mu dun reng mah ila inhlat deuhah kan mu a, mi hrang hlak ang kan ni. I nu'n ngaihzawng a nei tih pawh ka hre ngai lo a, miin chhunah in nu in inleng a nei ţhin an tih pawhin ngaihţhat lohna ka nei ngai lo. Nau a pai tih ka hriat khan ka thin a rim a, kut ka thlak hial a, ka fa a ni lo tih ka chian em avangin ti tla turin ka hrilh a, ani lahin a duh mang si lo. Ka nawr a, ka vau nasa a, min hlau viau mah se 'ka ti tla dawn lo..min ma mai rawh' a ti tlat zel a, ka hna chelh lai avangin kan awmna khuaah khan zah ka kai ve a, thlai leh buhfai thlengin lei kan ngai ngai meuh lo ţhin a, mi rawn ber ka ni bawk. Mualpho ai chuan tiin ka en liam vel mai mai a, a pum a len hnu phei chuan lawmpuina min hlan tawk an awm a, tuman ka fa a ni lo tih an hre lo. Mi pathum chiahin thudik kan hria a, ani pawh pawmlai nei tho a nih avangin i nu a ngaihsak zui ngam lo a, ngaihdam min dil a, a harsa viau nain i pian hma hauh aţangin ka fa angah ka ngai che a, i pian hnu phei chuan ka hmangaih lehzual che a, ka en hrang ţhin cheah ngai tawh suh, i unaute ai chuan i landan leh mizia a danglam deuh zawk a, mahse ka en hrang ngai lo che. Ka fanu i ni a, kei lo pa i nei lo" tiin min hrilhfiah a, a hmingchhiat loh nan a ka nu a ţhen loh thuhran, a fa ni hauh lo kha fa ah min pawm a, lawm tur nge pawh ka hre lo. Hmingchhiat hlau lovin ka nu hi ţhen daih se chu tunah hian ka nu nen chauh kan awm rek rek maithei a ni. 

"Ka naupanlai pawh khan min en hrang ngai miah lo maw?" ti a ka zawh chuan, "En hrang ngai lo. Ka fanu tak tak angin ka ngai che a, i unaute ka hmangaih ang chiahin ka hmangaih che alawm. I nu hi ka haw ţhin a, mahse i lo piang a, i hmel ka hmuh khan i nu ka huatna pawh a reh duak a, i pa tak tak khan rawn lak che tum mah se ka phal ka ring lo. Ngaihtuahna ţha lo leh dik lo i neih ţhin kha bansan la, ka khirh deuh ţhin a nih pawhin ka hmangaih loh vang che a ni lo. I unaute an hming a ka koh laiin nang chu Tuaite ka ti bik che a, i cial viau a sin" a ti a, kan han nui leh rih ţhin a, keipawh ka pa ka huat ţhinna kha a bo ta diakin ka hria. 

"Nih leh engati nge pasal min neih tir a? Min ngai miah lo em ni?" ka ti leh a, "Ngai e...i unaute ka ngaih ang chiahin ka ngai che. Mahse, i zia a danglam a, nunphung leh inchei duh dan thlengin i danglam bik a, mi pawh hian i fanu hi a inti pa em ni an ti fo reng a ni. Kan unau hian kan duhzawng kan nei lo vek a, nupui pasal nei rual kan nih chuan i pi leh pute an inrawlh a, ţha an tih zawng min neih tir ţhin. An lo thlang sual lo nge nge zel a, i ni leh i patea te ho hi ngaihtuah la, chhungkaw hlim tak vek an nih hi. Nu leh pa duhzawng nei ho hi chuan an tisual ngai mang lo a, tisual chu tlem te chauh an ni ang. I nu han chesual zeuh pawh kha ka thiam loh a ni a, ka ngaihsak tawk loh vang a ni. I hlim ka duh a, i nawmsak ka duh bawk a, i pa Chhawna fapa fel zia ka hria a, hna ţha tak a nei bawk nen, nei ngei la ka duh avangin i hriat lohin thil ka ti a nih kha. A harsa rih a nih pawhin nakinah chuan Nicholas ka neih tir che hi i la lawm zawk ang" a ti a, mihring te hian duhthlan theihna kan nei a, thil ţha leh ţha lo thliar thiam turin chhia leh ţha hriatna kan nei bawk a, fate nupui pasal tur zawnsak hi a dik ber kher lo a, keichu ka vannei a, Nicholas a ni hlauh a. Mahse, fa ka nei ve a nih chuan an duhzawng tak ka neih tir ang. An hlim loh leh nawm sak loh ka hlauh vang maiin keiman ţha leh fel ka tih zawng ka neih luih tir ve lo ang. Hmangaihna hi dinhmun ah a innghat lo a, pawisa leh nihna hian hmangaihna a keng tel ngai lo. Rethei viau chung pawhin a inhmangaih theih a, a mihring a te kan inpawh a, kan indawm thiam a, kan inţawiawm tawn a, nghet taka kan invawn reng chuan mi awh kan kai dawn tho tho. Hmangaih naah chuan phu leh phu loh a awm lo a, mi hausa tak thinlung hian rethei berh ve tak a thlang daih thei a, mi kan hmangaih tawh chuan kan thinlung hi tuman kan thunun zo tawh ngai lo a, kan thawk a tawp hma zawng chuan kan thinlung hi kan mi thlan bik tan chauh a phu reng tawh ang. 

"Kan naupanlai aţang tawh khan min en hrang bik ni a inhriat chang ka nei ţhin a" ka ti ţha leh a, "Ka enhrang hleinem che. I unaute aiin i danglam ka tih tawh kha. I harh a, ţhiante velh i hrat a, i len chhuah ve hlek tawh chuan buaina min siam a ni nghal zel a, tumah i hlau bawk si lo. Lenchhuah kan phal loh lahin tukverh bulah i ding a, i ţhiante infiam i en a, inchhung a awm ber khan chutiang chuan ti rawh u, nang kha lo tel ve bawk suh, vai naupang kha chu kawm ve suh u, tih mai maiin ro i rel zat zat reng tho a, i ţhianten an hlau che a, an nu leh paten an hua che a, khin tham loh pui an khing leh ţhin che a, thinrim a rawn tlan lut an awm fo kha nangpawn i la hria ang. Khatiang nuaih a nih ţhin avang khan ka khirh lehzual a, i unaute ka enkawl dan lo deuhin ka enkawl che a, mi zawng zawng hi i thuhnuaiah an awm vek lo a, thil engkim i thunun vek thei bik lo tih hriattir che ka duh vang a ni ber. I duh dan ringawtin thil a kal vek thei lo tih hria la ka duh ţhin bawk a, khauh deuh a ka hruai ţhin che kha ka enhran vang che a ni lo, ka hmangaih vang zawk che a nih kha. En liam mai mai che ila chu i thinrimna te hi tun thlengin i la thunun thei lo ang a, pawi lian zawk i khawih tawh maithei. Tunah chuan i inthunun thei tawh a, i mihring puite zah nachang pawh i hre tawh alawm" a ti duah a, ka pa'n min hrem nasat ţhin zia kha nimin lawk a thil thleng ang maia chiangin a lo lang a, ka insum thei lo chu tawi tein ka nui a, ka duh lo chung pasal min neih luih tir tih lohah chuan a sualna em em ka hre leh tawh lo. 

"Pasal neih kha ka hreh a, ka neih loh chuan ka nu natna a chhuah leh ka hlau bawk si. I thu ka zawm a, i duh ang ngeiin pasal ka nei a, chuti chung chuan chaw ei tura ka lokal khan min lo hau tho a" ka tih chuan a lo nui hak a, "Pasal i neih khan kan ngai a, i tello a awm dan kan thiam lo a ni ber e. Amaherawhchu, tuman be suh u, kan ti lungleng mai mai ka ti tlat a, ngai viau che mah ila kan rawn be duh lo che a, khami ţum a ka lo hauh nachhan che pawh thil dang a ni lo, i zawngchhang ka hlauh vang zawk a nih kha. Hmu chak viau che mah ila pasal i nei tawh a, kan in a i lokal reng a mawi tawh lo. I phur chang apianga i lokal ngam loh nan ka hau che a, zanin tlai chu hau lo che mah ila i lokal fo chuan ka hau leh tho ang che. I pasal te in saw i in angah ngai la, nuam tih tum la, anni pawn an fak ve khawp che kha" a tih chuan ka ner sak a, "An daw pawrh a nih chu" ka ti hlak a, ka pa chuan min en phawk khawp mai. 

"Fake account vek an nih saw. Anthony, Kungtei leh Hope chu sawiselna tur ka hre lo. Mahse, Nu Hlimi leh Faith chu tawrhhlelhawm khawpin an sual. Setana hian an mawngah meiling a zep emaw tih mai tur a ni, hremhmun rim an nam. Pa Chhawna pawh hian a ţan tlat a, ka thiamna zawkah pawh keimah min hau zel. Nu ber lah hian min puh chhiat na tur ringawt a zawng a, kan retheih bik lutuk loh nen hian kei aia hausa a hmuh meuh chuan a pak huam mai lawm. Nicholas hi ţhen daih mah ila pawi a ti teuh lo mai. Hmanni lawkah pawh a fapa nupui atana a duh zawk nu, Rita-i hnen aţangin rangkachak zungbun a dawn kha. A man a to awm si a thilphal e a ti deuh reng a, Nicholas hi ţhen ila chu Rita hi an neih luih tir leh ngei ngei ang" ka ti hlawih hlawih a, Rita-in zungbun a rawn pek ni kha ka ngaihtuah let leh a, luak a chhuak nghulh thei alawm le. 

"Nicholas nen in inkar a ţhat chuan a tawk mai. Thil ho mai mai emaw kan tih pawh hi min suih nghet tu an lo ni reng zawk ţhin a nia" dam thlapa a tih chuan, "Aw..Nicholas pawh hi a sual chuang lo. Min ngaihsak deuh hian Nu Hlimi leh Faith bawk an lawm lo ţhin a, min thik ţhin ni berin ka hria. Hmanni ah pawh vai dawr a mi thil thlum min lo hawn sak a, keimaha ka ei bik a hlau aniang zunthlum nei chung chungin nu Hlimin min ei zawh pui vek alawm. Ni thum chhung a chauh pui kha" ka ti chu a nuih a lo za khawp a, a thil ei kha a turu ve em a ni. A chauh pui ber erawh a thil thlum ei ngawr ngawr kha a niin ka hre lo thung a, ka pa bulah ka sawi ve mai mai zawk a ni. 

"In nupa inkar a ţhat a, a ngheh phawt chuan tuman an ti chhe thei lo ang che u. Min zawhna ang kha i nu zawt ve tawh lo la, tun thlengin a la inthiam thei lo a, sawichhuah sek a duh lo bawk a, a inzahpui a, a thil tihsual kha a hre ran reng a, a khawngaihthlak ber tawh zawk. A beng hriatah sawi lang tawh lo la, i pa diktak i hmu duh a nih pawhin keiman a hmuh theih dan ka ngaihtuah pui ang che" a ti lehzel a, ka pa hi ka lo ngaih sual ţhin tehreng nen tunah chuan huat luih pawh tum ila ka thei tawh kher lo ang tih ang vel a ni. 

"Kan naupan laia kan awmna khuaah khan em ni a la awm?" ka tih chuan, "Ni e..inhlawh chawp a nupui fanau chawm a nia, kei aiin kum 10 dawnin a naupang a, tunah hian eng nge an dinhmun ka hre lo. Mahse,a nupui hming nen ka hria a, zawn chhuah a harsa lo ang. Hmu lo law law la chu duhthusam a ni a, i hmu duh ţalh a nih leh ţhian hluite a zawh theih ang" a ti a, ka ngaihtuah vang vang hnuah, "Ka hrilh leh ang che" ka ti ta ringawt a, Nicholas rawn ve phawt ila a ţhat ka ring. Ani chu kei aiin a puitling a, tih dan tur pawh a hre zawk ang. 

"Ngati nge pindanah in inkhung char char a? Saiţhuam, i pasal pawh a lokal tawh saw" Liantein a rawn ti kha kha a, "Saiţhuami ka ni lo" bul zet a ka tih chuan, "U Nico-an Pâtei aka Saiţhuami a ti vek" a ti a, ngeiawm zet a nui chung hian kawngkhar a khar a, an inkawmngeih ka tih tawh kha, Liantei phei chuan kei aiin a ngai tawh zawk emaw tih tur a ni. 

"Ti rawh Tuaite, chhuak ve tawh teh ang. In pa a lo hawihai rei lutuk palh ange" a tih takah chuan keipawh ka lo ding ve mai a, inpui lama kan phei chu Nicholas chuan min lo en ran a, a mitmeng hi chu a rum ve hrim hrim a, tunah pawh meng no lem lo viau mah se min ngaihtuah vanga min en ve satliahah ka ngai thei tho. 

"I lo thlenna a rei tawh em?" ti a ka pa'n a zawh chuan a la rei vak loh thuin a chhang a, a bula ka ţhut rual chuan, "Keimah ang tho tiraw i nih?" tiin ka beng zawnah a lo phun sup a, mal a intih rualin mal bik nih a hlau a, amah anga nu leh pa nei lo a hmuh hian a mal lo tih a hria a, anmahni pawh a ngaina nghal zel niin ka hre ber tawh. 

"Ni e...nangmah ang chiah" ka tih chuan hnunglamah a kut a rawlh lut nghal rawk rawk a, midang hmuh ve loh tur hian ka kawngah a kuah a, "A hrehawm em?" a ti vel a, lu ka lo thing mai a, "Ka awmdan tak pawh ka sawi thiam lo. Beisei sa mah nise min ţhawng tho a, danglam vak ngaihna pawh ka hre lo. Thudik ka hria a, ka thawl huai miah lo. Chutiang chuan ka awm, kap tu ka la nei lo" ka tih lai mek chuan, "Awii...hemite nupa hi an inhrilh ru ngat ngat mawle. Eng nge in hriat a? Kan hriat phak loh turin in phun sur sur reng mai. U Nico-a pawh mi hrilh ru rual i nih tawh loh kha" Liantein a ti hlak hlak a, a vin viau nain a nui tel sang thung. 

"A tihdan alawm...a hmeichhia ser sur a nia. Min hrilh ru lo hian a awm thei thlawt lo" ka tih chuan ka nakah a hmer vak a, ka eu zawk a, ka unaute chuan min hmu lo der ta vel mai mai niin ka hria. 

Ka nu chuan min be tho mah se min en ţha ngam lo a, ka khawngaih letling zawk. Chaw ei dawhkan kan kil ţhap a, ka ep chiaha a ţhu chung pawhin vawikhat pawh min melh eih lo. 

Kan haw dawn hnaihah meuh chuan choka ah min kai lut a, "I pa'n a sawi vek em?" a ti nghal thawr a, a mitmeng te chu a buai nak a, hlauh nei te pawh a ang. 

"Ka hrethiam che alawm..hahdam rawh, ka hmuh dan che a danglam phah lo a nia, ka nu i la ni reng a, ka chung en leh ka entawn ber i la ni tho" tiin ka thlamuan let zawk a, "Ka tihsual kha chu entawn suh. Mipa hi chhungkaw chawm tu an nia, an hah a, nupui fanaute bulah hun an hmang tam lo ţhin bawk a, chutiang chu i tawng ve a nih pawhin i pasal tan chauh rinawm tlat rawh" a tih chuan, "Mipa zawng zawng an ni vek chuang hleinem. Bakah chhungkua an ngaipawimawh a nih chuan buai viau mah se chhungte bula awm tam theih dan an ngaihtuah ve mai tur alawm. I thiam loh vek a ni bik hauh lo a nia, a thu hrimah, nang aiin card a thlang zawk a, i va awm ţawp thei awm ve" tiin boruak tih zangkhai tumin ka fiam a, tawi tein a nui a, a mitmeng a ngui viau thung. 

"I mona ten a nu a chhun an tih loh nan che fel deuhin awm la, i pasal hi i hmangaih lo a nih pawhin ngaihzawng nei reng reng suh. Tui baw hnu hi a vaiin a ruh leh theih tawh ngai lo a, chutiang chiah chuan tihsual kan neih pawhin a vaiin a siamţhat theih tawh ngai loh. Nakina i inchhir loh nan ka thusawi hi hrereng ang che" a ti a, pawn thleng min zui a, kan thlanchhuah rual chuan ka pa thu min hrilh te chu ka hrilh chhawng zung zung a, a ngaithla uluk ve reuh lutuk chuan ngaih a ti ţha lo lek lek mai. 

"A zia lo hle mai..i pa tak chu i hmu duh em? I duh chuan a rang lamin ka hruai ang che" a ti nghal rum rum a, "Chutiangin min hruai thei ngawt hleinem" ka tih chuan, "Ka thei..i pasal ka nih hi" a ti nghut a, ka sawi tum a man lo nasa mai.

"Ka pasal chu i ni ngei alawm. Hmu duh pawh ni ila thil a tih rum rum theih loh ka tihna a nih kha. I beng lehlam chauh hian ngaithla ţhin suh" ka tih chuan a lo nui hawk a, "I rim aţang ringawt pawhin i rilru put hmang ka hre tawh" a ti mauh mai a, ka awih lo lutuk chuan hmui ka ti pawrh vak a, min en lem hlei lova. 

"Tunah khan a chanve chauhin min ring a, ka hmu tlang thei che. Min ring rawh, ka bulah hian nuam i ti ber ang. Ka thlazar hnuaia i awm phawt chuan i duh apiang ka tih sak ang che. Hmeichhia chuan duat tu leh ngaihsaktu neih in duh ţhin a, chutiang te chu ka pe vek ang che" a tih chuan ka lo thaw hak ringawt a, "Ngati nge a?" tih pahin ka lam a lo hawi a, ka kut a vuan zawk a, a rei lo viau thung. 

"Ka thaw a nih kha...i va han mak tak. Ka thawk apianga insawifiah a ngaih dawn chuan inţhen ila ka hahdam zawk ang" ka ti fiamthu a, "I thaw huk a, ngaih i ti ţha lo alawm" a tih chuan, "Khalh mai mai teh" ka ti hlak a, a lo chek tlak a. 

"I rilru hmin tur hian eng nge ka tih ngai a?" a ti a, a ţawng ring lem lo nain a fiah khawp mai. 

"Engtik lai khan nge a inţan ka hre lo, mahse ka rilru chu i hmin daih tawh alawm" tiin ka inpuang ve ta nge nge a, kan veng kawna motor a ti ding chu mak ka ti lem lo. 

"I pasal angin min en ve tawh maw?" tih paha ka kut a rawn vawn chuan ka lo bu nghat a, "En loh che pawh tum ila ka pasal i ni tho tho a" ka tih chuan, "Hlauh i nei tiraw?" a lo ti leh khauh a, min hrechiang tawh khawp mai.

"Hmeichhia hian hlauh kan ngah ţhin alawm. Nupa phei chu damchhunga awmdun tur kan ni a, nupa inkara midang an tel ve phei chuan damlai hremhmun a ni ringawt an tih ţhin kha" ti a ka hrilhfiah lai chuan Rita-i hmel ka mitthla ringawt lehnghal. 

"Tam tak tan chuan a ni ang..i tan chuan a ni ve dawn lo. Thu ka tiam ve vak vak ngai lo a, biakin a ka thutiam kha tun thlengin ka la ring. Hlauthawng lovin biakin chhunga kan thutiam kha ngaihtuah la, hlen ngei ka tum ang" a tih chuan, "Ka ring lo che ka ti hleinem. Palh a lo awm ve ţhin a, chu zawk chu a nia ka sawi" ka ti a, hmeichhe zei deuhin mipa an thlem an thlem chuan mipa zawk hi an nem leh nge nge ţhin a, ka ngaihtuah zawng ringawt pawhin ka ten. 

"Palh a awm thei tih mai mai intihbuai tir suh. Hmeichhia hi chuan thil ni thei lo thleng thleng in ngaihtuah ziah a, in hah phah a, exer la a tlankual char char ang vel in ni. Suangtuahna thinrim pui tawk te an ţhin a, mipa mu mai mai lai beng pawp duh tawk te in awm ang" nuihza aw zet hian a ti a, keipawh ka insum thei bik lo. 

"In bula tui deuh a kan mutthilh ve mai mai laiin in ngaihtuahna avang ringawtin min beng pawp duh ang tih a hlauhawm alawm. Thil ţul lo deuh deuh ngaihtuah lo khan min ring tawp la, ka tello a i din theih loh hunah pawh rinchhan tlak ka ni zel ang" nelawm leh dam thlup hian a ti a, chhan vak ngaihna pawh ka hre tawh lo. 

Min rawn hnaih thut a, a hmaiin ka awm bawr chu a nawk zauh a, in lak hran leh vat pahin, "Min ring a nih kha..min duh bawk a, min atchilh lo chauh a nih kha. I rim aţangin ka hria" a ti a, a nui ruh ruh lehnghal a, min fiam dan phung hi a thlak leh thut ţhin a, inrin hman a ni ngai lo. 

In kan thlen chuan Pa Chhawnan min lo ko leh a, a bulah kuangkuah atin nu Hlimi a ţhu a, Anthony pawh a awm ve mial alawm. 

"Saii, i nu hnenah i kalna i sawi lo em ni? Hei a ngaihtuah che u a, i chawhmeh duh zawng a lo siam bawk a" dam ruih a a tih chuan ka nuichhuak lo chauh a ni. 

"Hrilh e..ka kal hmain ka sawi a, min chhang lo zawk a nih kha" ka tih chuan, "Ka hritlang a, ka beng te hi a phui vek a, i ţawng ring lo ang a ka lo hre lo a nih dawn chu" a ti a, a dangdai thei mai bawk sia maw. 

"Kungtei pawn a hre vek alawm. Ka kal dawnin a awm ve kha" ka tih lai chuan, "A kal ve bawk ang chu. Hnai teah a chhungte an awm a a kal lo zawk ngawt alawm. A chawhmeh duh zawng i siam leh zingah a ei mai ang a, thunun tum lutuk suh u. Khap a ngaih chinah chuan Nico hian a khap mai ang. In buaina a te tham thei emai" a ti ta zek a, "Min hrilh lo a chhuah a ching a, min hrilh ziah rawh kan ti mai a nih hi" Nu Hlimin a tih lahin, "A hrilh che a i hre lo zawk a nih chu. Saii thiam loh a ni hleinem. En liam mai mai rawh, ringtu ţha, mihlim ngat tan a thinrimna tham a ni lo" meizei zet hian a ti a, Nicholas pawh a lo nui hawk a, ka nui ve ngam der lo. 

"Indan ka sawi lahin in remti lo a, hetiang a nih reng dawn chuan kan la chhuak nge nge ang. Naupang khuahkhirh ngai kan ni tawh lo. A tawk chin hre rawh u" a ti a, pindan a kan luh meuh chuan ka ngui bur tawh. 

"Inbual hmasa rawh ka lo nghak ang che" towel min pek pah hian a ti a, inhnuaiah inhau hrep mah ila inchungah hi chuan kan sawi zui ngai mang lo a, ka thinrim viau chang hian ka ang ţhin a, chutiang a nih lem loh chuan kan sawi zui peih tawh ngai lo. 

Khum zawn tukverh bula ka din lai chuan hnunglam aţangin min kuah a, "Ngati nge i lo la mut loh?" tih sup pahin a hmuiin ka biang a rawn nawr a, ka kawngah nghet deuhin a kuah bawk a, hetianga kan inhnaih viau hi chuan ka zam chhe nghal mai ţhin. 

"Ka mu dawn chiah..min thlah rawh" tih pahin ka che thut a, min kuahna aţang chuan tal chhuakin khum lam ka pan a, mu nghal mai lovin blanket ka pawt pharh a, "I lo mu dawn lo em ni? Light ka off tawh dawn nia" ka tih chuan min lo nuih suk a, thil mak deuh deuh a ngaihtuah leh tawh a ni maithei a ni light chu amah zawkin a off a, khuma a lo mut rual chuan min kuai mu ve a, ka kawngah min kuah nghal zat bawk a, tim viau mah ila ka hlau hran lo a, a taksa ka nghen hian nuam ka ti tlat tawh. Thla a muang huai huai zel tawh zawk. Kei aiin a lian zawk daih nain min khan leh chial tawh a, kan inhnaih bawk a ka nghawng zawnah chuan a thaw lum ham ham a, a za ka ti leh tawh. A taksa lum ka deh hian ka zam titih nghal zel tawh a, hrehawm ka ti tawh ngai hauh lo. A mutna lama ka inher chuan duhthaw zetin min lo fawp a, ka kawr hlim a ka taksa a chul kual te chuan thil thleng tur hrechiang viau mah ila ka dang tawh lo. Ka pasal a nihna angin a ta ah min siam a, ka inchhir hauh lo. 

Kan in a chaw kan ei aţanga kar khat hnuah ka pa tak ka hmuh duh thu ka hrilh leh ang lawi a, la inhnial reng ţhin mah ila nupa diktak kan nih hnu hi chuan inhriatthiamna tlem chu kan nei ve a, thinrim a inhauh buan buan ang kha chu kan ching vak tawh lo a, kan sim chuang lo bawk. 

"Engati teh thut nge?" a lo ti hu a, mak tih hmel deuh hian min en a, hmuh ka duh loh thu ka sawi vek tawh vang a ni. 

"Ka rilruah a awm deuh thut a" ka tih chuan "I rilru i thlak leh palh takin karkhat ngaichang leh phawt ang" a lo ti then a, ka mizia hi a hrechiang tawh khawp mai. 

"Ka mumangah ka hmu a, ka ngaih a ţha lo alawm" ka tih leh chuan, "A hmel i hria em ni? A hming chauh hre chunga mumanga i hmu thei chu a mak hle mai" a lo ti ve zel a, ka dawhtheihna a tlem leh viau tawh. 

"Ka pui ang che i tih kha. Ka hruai ang che i ti bawk a, ka pasal diktak i nih tak hnu hian i induh riau" tih pahin a malchungah ka ţhu a, ka kawngah a lo kuah vat a, keipawhin a nghawngah ka kuah ve chial mai. 

"Khawi silai kah ka lo zir leh lawk" fiamthu a a tih chuan a hnungah ka beng thlawp a, "A ţullo...chhun pachangah lehnghal, em em che hian" ka ti pang pang a, nuih hawk hawk pah hian ka kawng a kuahna chu a ti nghet salh a, "Kawmthlang pitarin Saiţhuami hi a va inbual ngun awm ve a tih che kha" nuihza aw zeta a tih leh phei chuan ka zak ve ram ram mai. 

"Ka pa diktak chanchin kan sawi a, tuna i thusawi nen hian a inpersan lutuk. I hram tlahawlh emai ka ti ti pui peih tawh lo che" ka tih chuan, "Karkhat ngaichang ang ka tih kha. Hmu ta la engtin nge i tih ang a?" a ti a, chutak chu keipawhin ka hre lo. 

"A hmel ka hmu ve hrim hrim chak a a ni mai. A hlim em tih te. A mak tak tak a ni, vawikhat pawh a hmel ka la hmu lo a, mahse ka pa tih ka hriat hnu hian rilruah a awm reng mai. Buai viau mah ila ka paih bo hleithei lo" ka ti ta nge nge a, ka nu a ngaihven duh miah loh chhan te pawh hriat a chakawm alawm. 

"Tuna ka pa fel zia ka hre thar leh bawk a, mualpho a hlauh vang pawh lo nise fa anga min pawm thei hi a fel ve thlawt a ni. Ka lo ngei ve ringawt ţhin te kha ka zak zawk, mahse ngei tur khan a awm miau a" ka tih chuan "Nangmah leh nangmah i inchhang char char a, engmah ka sawi ve hman lo" a ti a, a nuih a za viau mai. 

"Chawlh theih dan tur ngaihtuah la min hruai la a ni mai. Ani pawn min lo hmu chak ve tho maithei a sin" ka ti a, a lo remti veleh thlap tawh a, "Puan pho ka seng anga Kungtei ka pui ang. Mihlim ho pawh an lo leng a, thingpui an duh leh tawh ang ka ring" tih leh a malchung aţanga chhuk ka rual a, "Tih tur i va ngah ve" ban charh a tih pahin a ding ve nghal a, a zi mar ţalh ţalh a, pathianni hian inleng kan ngah ţhin a, kan buai zual emaw tih mai tur a ni. Chawhnu lam duty a la ngai zui. 

"Ka kal a hun leh ţep tawh a, thingpui tal ka lum chhawk loh chuan a chi loh" ka tih chuan, "Chhuk rawh puanpho chu ka lo seng ang" a ti ve mial a, mak ti deuh a ka en reng lai chuan, "I thaibawih tih i tum" a lo ti nghal a, chhan tuma ka an zuau zuau lai chuan amah bawkin, "Thaibawih a ni hleinem..chhungkaw ţangrual alawm" a ti leh a, a va mak zung zung tak. Thaibawih tih ka tum mang si lo a, a inpuang zo leh vek tawh a nih ber hi. 

"Aw..i thaibawih lo i thailand a nih kha..a pa daih zawk. Thingpui ka lo siam kep ang che..lo chhuk vat rawh" ka tih hnuah ka chhuahsan a, a landanah sawisel tur ka hre hauh lo nain a landan phena a rilru ţhatna hian min hneh a ni ber. A kiangah ka hlim a, a thlazar hnuaiah ka him a, ka duh tial tial mai. 

CONT