HIS LAST LOVE-19

HIS LAST LOVE-19

"Chhandami a tlu sual a, damdawiinah ka kal ve lawk. Min lo nghak suh" ka pasalin a rawn tih chuan Ngheti ka en ringawt a, ani lahin phawk deuhin min lo en let a, ka chawhnu ţum hi chuan kan haw rual ve fo a, tukinah pawh amah nghak turin min hrilh a nih kha. 

"A tlu na em? A englai nge a sawh a?" ka tih chuan, "Step ah a nia, a ke hi na a ti ber. Naupang buaipui ngai nen an indaih lo a, Ngheti nen lo haw dun rih phawt mai rawh u. Chanchin ka lo hrilh leh ang che" tih leh phone dah a rual a, "Eng nge a?" Nghetin a lo tih ve chuan phone hum ran chungin ka thaw hak a, ka awmdan hi ka duh dan a ni hauh lo. 

"Chhandami a tlu sual a nih chu...step ah a lum aniang. Buaipui a ngai sia min lo haw san mai rawh a ti" ka ti a, kei hi ni zawk ta ila min buaipui ve tho angem le tih te ka ngaihtuah a, rilru mak pui pui ka pu ţan der mai. 

"Pawi lo..kan la nghak rei hman chuang hleinem. Taxi in haw ang aw tunlai chu bus a tawt thei emai. Chhandami pawh a ţha leh vat turah ngai phawt ang" a ti zung zung a, damdawiin aţang chuan kan inzui chhuak a, Mapuia te kan la tawk zui a, hmeichhia a kalpui ve ngei a, a bialnu a ni lo thung. 

"In haw dawn mi?" tiin min be hmasa a, nuih luih pah hian ka lo bu nghat a, "Aw..kan haw dawn chiah. I la awm rih dawn mi?" ka lo ti ve a, "Keipawh ka haw har tawh lo ang. Ka haw daih thei tawh zawk a, ka ţhianpa an admit sia, ka tlawh kawi ve zawk dawn a nih hi" pangngai tak hian a ti a, kan inbe chhe zui hran lo nain kan inpawh tak tak thei rih lo a ni ber. 

"I ţawng duh lo riauin ka hria, Chhandami hi i thik a ni mai lo maw?" nui har har chunga Nghetin a tih chuan, "Teuh lo mai..an inkawm dan engkim ka hria a, Nicholas hian duh pawh nise Chhandami hian a duh tawh teuh lo" uar fe hian ka ti tan tan a, Chhandamin a hmangaih ţhin lai khan ka pasal pawhin a lo hmangaih ve reng tho tih chu ka sawi tel lem lo. 

"I pasal pawhin nangmah bak duh a nei hleinem. Mahse, engtin nge Chhandami tluk sual chu a lo hriat daih theih le? A pasal nen an inkawm ţhin em ni?" a ti hlut a, a tho deuh uaih ni berin ka hria. 

"Ka hre bik nang...chutiang thleng thlengin min hrilh hleinem. Bakah Chhandami pasal chu anmahni aiin a upa daih zawk a, an inkawm kher lo ang" ka ti niah niah a, "A pasal a awm lo ang a, na a ti bawk si ang a, a hmelhriat ţha ber Nicholas a be tawp aniang" a tih chuan, "Aw..chutiang chu aniang" ka lo ti veleh tawp a, rilru a vak thui ve khawp mai.

In ka thlen veleh Nu Hlimi pawhin, "Khawiah nge in pa? In lo haw rual ang chu tih nak laiin" a lo ti a, "A ţhian pakhat a tlu sual a, damdawiinah a kal pui a nih kha" ka tih chuan, "Tei vet a, ambulance a ni em ni a? Mi chesual apiang a puih dawn chuan a lu chungah siren ţawn bet law law se, tlan ri ruai ruai reng se a ni mai alawm" a ti tan tan a, Nicholas nen ka hmeh bel a, ka nuih a za bawk si, ka nui ngam chiah bawk si lo, choka luhna bang nghenga Hope ding chu ka en duh lo law law a, ka ek chuan ka nui chhuak nghal a ni mai. 

"Tu a ţhian nge ni a? A hming a sawi em?" Pa Chhawna chuan a lo ti ve a, bag hrui vuan ran chung hian a lam ka hawi a, "Aa...sawi chu a sawi a ka hre leh tawh lo" ka ti ban charh a, a awih lo deuh ni a ka hriat hnuah, "Kan buai laiin min lo bia a, ka thawhpuiten min lo be ve sek bawk sia, ka ngaithla chiang lo a" ka ti ţha leh a, a buk tak nghatah chuan choka ah ka lut a, Kungtein rawng a lo bawl peih leh thlap tawh. 

"Ka pui hman ngai mang lo che a nih ber hi tiraw?" ka inthlahrung angreng hle a, filter a tui ka dawh lai chuan, "A hahthlak hleinem. In a i awm ve chhunah min pui char char zel tho alawm. Tunlai tak phei chu Hope hian min pui ţhin a, pasal ka nei ţep tawh sia a ti mai a" a lo ti a, ka en phawk khawp ang.

"Pasal ka nei dawn a ti maw?" ti a zawh pahin nichina Hope dinna lam kha ka en a, a lo awm tawh lo. 

"Ti ang chu mawle. Amah hi a â phuang bawk sia maw..a bialpa hi a duh lutuk a. Ka nei phawt ang a, ka pasalten ka zir zelna tur pawisa an nei lo dawn chiang sa a, ka chhungte zawkin min tumsak dawn tho tho a tia, a rilru thlak tir ka tum ngial nain a harsa lutuk ringawt. Pasal neih chak hunlai ang kha a thleng ve tawh aniang, keichu ka ni miah lo" a ti zung zung a, a ni khawp ang. Tleirawl ât hunlai, kan mipa duhtak te nupui nih chak hunlai ang kha. 

"A va buaithlak ţhin tak. Palai pawh lokal se an remti kher nang mawle..hei pawh hi a ngaihtuah tawi thei leh lutuk a" ka tih chuan, "Ni chiah e..bakah hna pawh a nei lo. Inhlawh chawp ve mai mai a nia, ka hmuhsit phak a ni hauh lo a, mahse ka pi leh pute hi chuan an hmusit dawn a, ka makpa tih pawh an duh lo ang" a ti a, kan ngaihtuah thui dun khawp mai.

"A ti tak tak lo turah ngai phawt ang. Ka han inthlak ange aw" tih leh inher ka rual a, inchung panna kailawna ka chhoh lai pawhin Nu Hlimi ang ri ka la hria a, Pa Chhawna hi a dawhthei ngawt mai. 

Inthlak nghal mai lovin Nicholas ka call a, a la dawn tawh lo emaw ka tih hnuah, "A ke ruh a lo khi a" a rawn ti nghal ringawt a, a inthlahrun ve hmel lutuk ringawt. 

"I la awm dawn nge i lo haw tawh dawn?" ka tih chuan, "An pa kan lo nghak a, a rawn hruai dawn a nih hmel. A lo thlen veleh ka lo haw ang" a ti a, thawm bengchheng dang hriat tur a awm lem lo bawk a Chhandamin "Min haw san mai rawh" a ti ri chu chiang takin ka hre tel thei a ni. 

"Chaw eiah ka lo nghak dawn che em?" ka tih leh chuan, "I ril a ţam tawh em?" tiin min lo zawt let a, "Ţam lo tawp chu a ni lo. Chhandami chu ni lo se ka nghak kher lo che ang a, Chhandami a nih vangin nghah i duh chuan ka lo nghak ang che" ka ti deuh duah a, ka fiamthu reng zel a, ka uang peih lutuk hi ţhenkhat chuan ka â ve hrim hrim emaw ti tawk an awm fo mai. 

"Min lo nghak rawh ka rei lo ang" a tih takah chuan ka inbual a, Chhandamin a pasal pawh be lova Nicholas a be daih chu mak ka ti ve tho mai. Ka ringhlel hauh lo a, an inngaihzawn rinna pakhatmah ka nei lo. Inngaizawng tur chu nise Chhandami nuthlawi lai khan an inngaizawng daih tawh ang. A pasal hi a lo sual leh tawh em maw ni tih thlengin ka ngaihtuah a, belh tur leh innghahna tur a nei lo ve lutuk hi a khawngaihthlak a, chutih rual chuan an pahnih chiaha an awmdun hian nuam lo tihna ka lo nei ve ringawt a, ringhlel lo mah ila keimahah hian dik lo chu a awm chiang alawm. Mihring nih te chuan thikthu te chu kan nei ve tur a nia, an inhmangaih zia ka hriat tawh vang te pawh aniang, kam tu nei ang tlatin ka inhria a, lo haw vat se a dik a ni mai. 

"Nicholas ka lo nghak ang" choka a luh paha ka tih chuan, "A lo van haw har reng reng ve. I bia em? Khawiah nge a la awm?" Nu Hlimin a lo ti leh hman a, a fate a khuahkhirh leh lutuk hi a ţha pawh ka ti lo. An upat ve tawh nen an nun engkimah a la inrawlh a, hahthlak an ti ve thei ngawt ang. 

"A lo haw mek" ka ti thla ve rawk a, ei nghal dawn lo mah ila Kungtei chu chaw ei ka siampui a, "Pasal ka nei ţep tawh sia, ka'n inzir lawk ange" ti a min lo pui ve tu Hope chu an melh deuh ţhap a, "Ka pasal tur ten awmpui an nei pha awm si lo a, keimah vekin ka tih a ngai dawn a" uangthuang tak hian a ti a, a chhungte rilru en a tum a nih ka ring. 

"Retheih chuan tumah an inhmangaih reng thei ngai lo. Bakah i la naupang lutuk, fiamthu pawhin pasal neih lam kha sawi tawh suh" an ti a, a nui tawi tak mai. 

An chaw ei chhung pawnah ka awm a, a reh vung vung a, motor thawm hriat tur a awm lo. An eikham hun awm velah inchhungah ka lut leh a, an lo seng fel mek tawh zawk a, engmah tih loh ai chuan tiin apron ka chuh tharh a, "Lo ti suh" ti ve bawk mah se thleng ka sil lui ta tho a, ka ti ţhang tawh a, ka awlsam ve tawh a, bakah nurse nih hi chuan thatchhiat a har khawp mai. 

"I va rei ve i ti dawn?" ka thil sil ka tleuh lai chuan hnung lam aţangin min rawn kuah a, Kungtei a chhuak hman hlauh zawk a, ni lo se chu midang hmuh a inkuah vel hi ka la zak tlat.

"Han inthlak rawh chawhmeh a daih hmain ei ve ang" ka tih chuan, "I thinrim lo tiraw?" a lo ti a, "Ngah nge maw ka thinrim ngawt ang le? Han inthlak mai mai teh" ka ti hlak hlak a, i hmelhriat apiang buaipui suh tih vel chu ka hrilh peih lo, nu Hlimin a hrilh leh vek dawn tho. 

"Ka lo veng rih ang che..ka ngai tawh bawk che a" a tih chuan ner deuh nang chung hian amah chu ka en a, "Dawt ka sawi lo aw" a lo ti ringawt a, ka nuih hak lai chuan min fawh tumin a lo kun hniam a, a hmui chu ka kut huhin ka lo hup chawt a, "Han inthlak rawh ka tih chu. Mipa tak tak te chuan nupuite rilţam an hmu thei ngai lo" tih pahin ka kut chu ka la thla a, nuihza insum hmel a pu a, min chhaih a chak leh tawh khawp ang. 

"Lo siam rawh ka rei lo ang" a ti a, a kal ve ta nge nge alawm. 

Chaw kan ei lai chuan Chhandami chu ka sawi chhuak a, "Khawi hmunah nge a tluk?" tiin bul ka ţan a, "An inah" a lo ti mai a, Chhandami pasal te in hi Nicholas te office nen a inhlat lo niin an sawi a, ka la kal chiah lo nain ka ngaihruat ve thiam tho. 

"An pa a be thei lo em ni?" ti a ka zawh chuan, "Aw..phone a la thei lo a, a chhungte an awm lo bawk a, a mangan tawpah min lo bia a nih hmel" a ti a, ka lo bu nghat nghat a, thinrimna tur a awm miah lo a, ngaihţhat lohna tur a awm awm pawh ka hre chuang lo. Chhandami hi la hrechiang lo reng ila chu ka thin a rim ang a, Chhandami ka ngaihtuahin thil pawi a tih duh ka ring lo a ni. 

In pui lama kan kal ve chu Faith-in min lo melh ralh a, a nui deuh bawk nen, hetiang hmel a put hi chuan min haw leh tawh tihna a ni ţhin. 

"Vawiinah ka ţhiannu pakhatin thil min hrilh a, ka zep ang ka ti zet nain in huangtau zel ka hlau a" a ti dam thlap a, engtak chu ni maw?

"Eng nge a?" ka tih rual deuh thaw chuan, "Ka cousin nen an inbe ţhin a ti che a, a mak lutuk vawiin kha thil kan sawi kan sawi a, a cousin chanchin vel a sawiin i thawhna hmun a sawi chhuak a, U Saii pawh a thawk alawm ka ti kha i hming a lo hre nasa mai, nurse i ni tih thlengin a hria a, a cousin nen chuan in inbiak nasat thu a sawi a, ka zak a sin aw" a ti vang vang a, a vin hauh lo nain a awki dam raih chu a ngeiawm tel tho a, hetianga min han chhuahchhal vel hi a nuam tih zawng tak a ni. 

"A cousin chu Mapuia a nih chuan kan inkawm ţhin alawm" ka ti a, pangngai deuh a lan ka tum tlat a, min en ţhap bawk nen, a zamawm takzet a ni. 

"Ka ţhiannu chuan inkawm chiah lo ang deuhin a sawi" Faith-in a tih chuan, "Engtin nge a sawi?" Nicholas zawkin a lo ti a, mitmeiin khap tum viau mah ila awmzia a awm lo, kan hmaa a nau ding chu a melh run a, Mapuia nen kan tawpna a rei tawh nen tun a taka a sawichhuak leh chu mak ka ti angreng khawp mai. A chhan lawk lohah chuan, "Sawi vat rawh" a ti leh a, Faith-i mitmeng chu a buai nak a, hlau hmel a pu bawk. 

"Hei inngaizawng ang deuh hian. Ka sawi chhawng thiam vak lo a, mahse chutiang chuan a sawi. U Saii dp ka hmuh tir pawhin 'ka cousin a biak ţhin chu a ni' a tia lawm" a ti a, "A ni tak tak em ni? Chupa chu i bia em Saii?" Nu Hlimin a lo tih chuan, "Lo inrawlh ve suh" a ti hmak a, chutah a nau bawk chu en lehin, "Nangpawh i buai lohna turah buai phi ruai reng suh" chang khel khawl tak hian a ti a, inbiak tawh loh hnua an sawichhuak daih hi mak ka tiin rilru a ti buai riau a, sawi tur pawh ka hre ve lo chu a ni. 

"Ka buai pawh a ni lo...vawiinah khan kan ti ti satliah a, kan sawichhuak palh a, kei phei chuan engvakmah ka zawt lo hrim hrim" a tih chuan, "I hrechiang bal a nih loh chuan i thu hriat satliah sawichhuak sek tawh suh ang che" a ti ram hmak a, an inchhang lawk dawn a hriain a rukin a kawrah ka pawt a, a hre ţha duh der lo. 

"Saii a ngaihtuah vang a nih kha..a mualpho a hlau a" Nu Hlimin a lo tih leh chuan, "A mualpho a hlau a nih chuan a rukin a hrilh mai tur a ni. Tuman sawi ri tawh suh u" tih leh kal a rual a, ka umzui vat a, he inchhung hi hrehawm ka ti tial tial mai. Nicholas nen kan inpawh sawt viau laiin a chhungte hian min ngaina lo tial tial a, Rita-i a awm ve tawh bawk nen, inţhen daih mah ila pawi an tih ka ring lo. 

"Ka thlavang i hauh hian an fel sawt ngai miah lo a nia aw. Faith-i sawi kha chu Mapuia aniang, kan inbiak ţhin lai khan a ţhiannu chuan ka hming a hria aniang. Nangpawh insum ve ţhin tur che a nia, Nu Hlimi kha a thinrim mai mai dawn a sin" ka ti sek sek a, nitin a office bawk si, engkim hre vek phei se chu min chhuahpui daih tawh maithei a ni. 

"Mi khei rana ţawng a bansan a ngai alawm" a lo ti then a, towel a ban zui zat a, "Chupawh nise an tawp san leh hmak chuang nang. Kei takngial pawh ka ngawih chuan ngawih ve mai tur che a nia, Mapuia ka hmu anga ka sawipui mai ang" ka tih rual chuan, "Khapa kha i hmu lo ang" zawi te, chang zet si hian a ti a, a ngaihna hre lo deuha ka lo en lai chuan, "Buaina min thlen hnem tawh. Vawikhatmah hmu tawh suh" a ti hmuk a, bualin ah a lut daih a, ka sawi tum a man lo mai mai zawk a ni. 

Ka hmu ang a, a cousin hnenah chuan ţhian bak kan nih loh zia hrilh tura tih ka tum a nia, engkim hrilhfiah vek se, a cousin pawh chuan sawi tawh lo hmak mai se a ţha mai dawn a, bakah a rukin kan inbia emaw tih laia ka hming lo sawi reng reng, a ti ang lo leh lutuk mai. 

Nu Hlimi leh Pa Chhawna te hian an ngawihsan mai mai lo maithei a, Pa Chhawna phei chu chhungkaw mualpho hlau ngawih ngawih chi a ni bawk nen, ka pasal awm loh hlanin min sawipui leh maithei. Chutiang hun a sawi dan tur te, Mapuia dawt sawi tir dan tur te ngaihtuah a chhuat dunga ka vei reng lai chuan bualin aţangin a lo chhuak a, "Ţhu ta che..i rawl vek mai tur a sin" a tih te pawh chuan a la ţawng nem chuang lo a, ka chungah a thinrim ve emaw tih mai tur a ni. 

"Ka rilru a hah ve a nih hi" ka tih chuan, "I lerh kawh man a nih kha, be suh ka ti ka tia lawm" a ti hmuk a, keipawh ka ding chat mai. 

"Ka khawhar laia ka biak a nia, ka tih tawpna a rei tawh reng alawm. Ka thiam loh a ni tho nain thiamna chin pawh ka nei ve. Hun ţha ka pek rual che khan ka ti tawp hmak a, khami ni aţang khan vawikhat pawh ka la be leh lo. Thawk ho kan nia, inkalpelh paha inbiak zeuh chang chu kan nei, mahse phone ah kan inbe tawh ngai lo. Ka inven ve nasat tehreng nen, lerh kawh chu min ti lo mai teh" ka ti hlak hlak a, Mapuia aiin ani hi ka thlang zawk a, rilru ka siamfel rualin ka ti tawp vek a, kan kal thui hman lo a, khawhar hnem atan chauh a ka tih takmeuh a ni a, mi ka hman ţangkai man chu tunah ka hmu ve dawn ta a nih hmel. 

"I fak em em a in inbiakna pawh a ti put ru duh a nih hi. Sawi lo se tuman an hre tawp nang. Hlat rawh ka tih lai khan hlat la chu buaina i tawh phah lo ang" a la ti a, a dik ve tho. Kan inbiak tirh pawh khan mi nupui ka ni tih a hria a, ka mualpho hlauin a rukin min bia se chu tuman an hre lo ang. Mizoram zimte ah hian mi kan inhre pawh fur a, mualpho a har lo tlat a ni. 

"Hlat rawh min tih lai kha i sual lai a nia, zawm tur nge zawm loh tur ka hre mai bik lo alawm. Mapuia lah ka chungah a ţha a, nang chuan biak pawh min biak ngai mang loh kha" ka tih chuan min ning aniang a thaw chhuak hawk a, "Mapuia chu tuman sual an ti lo hrim hrim a, a fel zia hlir an sawi avangin keipawhin fel turah ka ngai tawp a" ka ti leh a, min ngaihsak tawh lovin tshirt a la chhuak a, a hak lai te chuan, "Ka zawt chiang tho ang, tum nei rana a lo sawi chhuak a nih chuan ka thin a rim khawp ang" ka lo ti leh a, "A ninawm..sawi tawh lo teh ang. Mapuia ang deuh fa kan nei palh ang" uar fe a a tih hnuah thlanglam bathlarah a chhuak a, a thinrim vang emaw tiin ka zui chhuak a, towel huh a lo zar lai ka hmuh chuan ka thaw huai mai. 

"Zanin chu thla a eng hle mai" tih paha a bula ka din chuan, "Mapuia hmel ang pup a nih kha. Bial var pup" a lo ti kher a, nuih hak pah hian, "Sawi tawh lo ang i tih kha aw" ka ti a, ka nghawk tel zeuh a, a ruk chuan a nuih a za veleh tawh tho ang. 

"Lokal teh" tih leh ka ban rek a hmer a rual a, a lamah min pawt pheiin a hmaa min dintir rual chuan hnunglam aţangin min kuah a, amah a lian bawk nen min khuap run a, thlifim a tam nen vawt pawh ka hre lo. 

"Fa kan neih hunah mipa nge hmeichhia ni se i tih?" naupangchhia zeta a tih chuan, "Mipa pawh hmeichhia pawh, ka duh ve ve. Ka fa a nih chuan ka hmangaih tho ang. Mahse, chutiang chu sawi a la hun chiah lo e..rai pawh ka rai mang si lo a" ka ti a, ka luak te hi chhuak ve tawh se ka ti, nupa chauh chuan a khawharthlak emai. 

"Fa kan nei a nih chuan an fahrah ve lo ang" a tih chuan ka thlek deuh a, ka hmu chiang thei lo nain amah bawk chuan, "Ka ţhen dawn lo che ka tihna a nih chu" a lo ti leh a, "Kan inneih zan kha chuan inţhen nghal mai ka duh a" nui hak chung hian ka ti a, ka nu hnena inţhen ka ngen ţum te kha ka la hrereng. 

"Keipawh inneih thutiam kan chham lai te khan inţhen ka duh a" a lo ti ve zat a, "Tunah chuan inţhen lam kha chu ngaihtuah tawh suh. Ka kal tir dawn lo che" tih sup pahin a lo kunhniam a, ka biangah a fawp vang vang a, nupa kan ni nain hna avang hian hun kan hmang dun tam lutuk bik lo a, in a ka awm ţum a office a kal daih te hian ka ngai ve veng veng zel. 

"Kal rawh pawh min ti la ka kal duh kher nang mawle. Ka aiawh tu tura i duh hmeichhia i lo hruai haw a nih pawhin in pahnihin ka vaw chhuak zawk ang che u" ka ti fiamthu a, lo nui ve hawk hawk mah se, "I ti duh tak tak ang" a ti tho a, kum khat em pawh kan la innei lo a, min hrechiang tawh khawp mai. Min pawh vat hi a mak hran lo a, a khua a har a, mipa mah nise hnemtu a mamawh ve tho a, a nun ruak ka hnawhkhat chu ka ti lo nain a khawharna ka hnawt kiang aniang, min duh lo takzet si kha min ngaina tawh emai. 

Zing ka thawh veleh pum damdawi ka ei a, ka dawlh sual nge ka dangah a la bet tlat zui. Uar deuh ţhat ţhat chungin bualin ah ka tlan lut a, damdawi mum dawlh ka harsat lutuk hi chu ka buai phah fo mai. Ka vawikhat tawn na pawh a ni lo. Tui ka in a, ka uak a, ka khuh leh ţhin a, ka mittui pawh a tla hial a ni. 

Chutiang a ka buai lai chuan "Eng nge ni a?" thum deuh dut hian a rawn ti a, a thophang aw zawng zawng nen, buai viau chung pawn ka phu zawk thei tho mai. 

"A hrehawm lutuk" ka tih chuan min rawn pan hnaiin ka hnungah a chul a, darthlalang aţanga a nui hmel ka hmuh chuan ka ding ngil zawt mai. 

Ka melh ram a, tui leh in leh ţeuh phawt a, chumi hnuah, "Eng nge i nuih a?" ka ti ta chauh a, ka chhip aţangin ka samah a zut thla a, ka darah a tawp a, "Ngati nge i luak a?" ka dar dawm reng pah chuan a ti a, a hmel ah chuan beisei nei a ang lutuk ringawt. 

Ka chhan hma chuan, "Eng lo a ni em?" a lo ti leh a, "Engmaw?" ka ti deuh ha chu, "Hre lo der suh. Hmeichhiain an zep tlat ţhin hi ka duh dan a ni ve hauh lo a nia" thutak zet hian a ti a, a nuih loh theih loh reng reng. 

"Awii...nau ka pai emaw i ti em ni a?" nui hak hak reng chung hian ka ti a, a nuih a za ve hauh lo. 

"Ka dangah damdawi mum a bet a nih kha. Ka luak chiah pawh a ni lo, a rim rawn nam kha hrehawm ka tia chuvang chu alawm. Rai ila chu nang aiin ka lawm zawk daih dawn a, ka zep phal teuh lo mai" ka ti zung zung a, muangchangin ka dar a vawnna kut chu a la let a, "E...." a ti ringawt a, zahzelah a sam a tuai a tuai ringawt a, a hmuh laia ka nui hreh tawh chuan hnuai lam ka bih a, chapal pawh a bun hman lo ni awm tak a ni kelawngin a ding reng mai. 

"I rawn van hmanhmawh awm em em. Hmeichhia kan inang lo a, rai no laiin luak a chhuak vek kher lo te an tih ţhin kha" ka tih chuan, "I hrisel a puh tur dang a awm hleinem. I rai hma chu uak tawh suh" a ti thla rawk ringawt a, "A intihderna chi loh emai" tih sup pahin a chhuak a, a zah ve deuh hi chuan sawi tur a hre vak lo a, ka nuihpui leh vak ţhin. A thinrim chang lahin ka nin khawp sawi tur a hre leh ang lawi a. 

"I kal hma dawn tho a ka thlah ang che" choka a kan lut chu min lo melh no lem lo hlawm khawp mai. Zan lama an thil sawi kha an sawichhuak leh te pawh a ni mahna. An tho hma thei hlawm lutuk hi a chang chuan ka ning ţhin. 

"Pâtea hi ngaihtuah ve ţhin rawh. Tunah pawh i u in a kaihchhuah leh tawh kha. Kungtei a buai a, engkim amah chauhin a ti vek hman lo" Nu Hlimin a lo tih chuan, "Kai chhuak hman in awm alawm" a ti mai a, Kungtei bulah ka phei daih a, min endan chu nidang a ang lo riauin ka hre lehnghal.

"Puih i ngai em?" ka tih chuan, "Aih" tih chiahin min chhang a, ka thil khawih lai pawh rang deuhin min laksak a, hrilhhai deuha midang ţhutna lam ka hawi chuan Faith a lo ţhen ţha a, Hope hmelah erawh danglamna a awm lo. Nu Hlimi chuan min en lem lovin thingpui a in a, Nicholas a hau pah reng bawk. 

"I tho fuh chiah nange?" tim dai hian ka ti leh a, min melh zawk a, min chhang lovin gas ah chuan thirbel a chhuang kai a, a nuam lo takzet a ni. 

"Lo in eipuar rawh..Pâtea chu ka va ngaihven ange" a tih hnuah Nicholas lah chu a chhuak mai bawk sia, nuam ka tih ber ţhinna hmun choka boruak chu a uap churh a, hrehawm tih thumal hian a hrehawmzia a sawifiah zo kher lo ang. 

"Eng nge ka lo tih ve ang? Hun ka la ngah a" Kungtei bulah bawk chuan ka ti leh a, "Ka ti vek tawh" a ti hmak a, "U Sai, lokal rawh tual va phiat ang. A la hma angreng sia, ni sat tak tak hmain kan phiat zo hman ang. I duh leh thingpui in hmasa la" Hope chuan a lo ti hlauh a, ka lawm lutuk chu ka lehhawi rang khawp mai. 

"Chaw ka ei leh vat awm tho sia, in lo law law ang" ka lo ti vat a, pawn a kan inzui chhuak chu thaw a veng huai mai. 

"U Nico hi chuan ka nu ang hi a ning ţhin a, a chhuak daih zel alawm. Kungte khan a be ţha duh na che nge? Kan thawh hlim chuan a pangngai vek sia, in rawn thawh ve khan a tum daih a, hrehawm i tih hmel em a ka hruai hrang daih che a nih hi" a ti zung zung a, tual pawh phiat ta lo chuan kil khatah bang nghengin kan ţhu a, inchhung ai chuan a nuam daih zawk. 

"Aw..nizan pawn ţha deuhin kan la inbia a, a danglam thut a nih kha. A mak tak tak a ni, engtinmah ka ti bawk si lo a" hmunphiah a ka hma lam thai neuh neuh paha ka tih chuan, "Hetianga kan mi ngainat deuh te an awm hian a hrehawm duh a sin. Lungngai suh..ka awm hi. Kungtei lungawi leh hma chu choka a i awm apiangin ka lo awm ve zel ang. Mo nih chuan pindan a tawm bo daih a nuam dawn bawk si lo a tiraw?" a ti a. 

"Nuam lo e...inthlahrun a na tawh a, mahni in a kan awm angin a awm theih tawh loh. Tih tur a awm loh lutuk te hian a hrehawm letling zawk a, kan mona te hlim hmel kan hmuh loh ngat phei chuan chaw ei thlengin a hrehawm. Kan biak ve a ţawng an lo hriat loh palh te hian min chhang duh lo emaw tih a awl a, mahse nangni chu in fel. Ka ri bawrh bawrh ngam a, vuina tur ka nei lo" tih paha a lam ka hawi chuan a lo nui var var a, ani hi awm lo se chu hrehawm ka ti viau ang. Ka pasal ve lah hi a nu a an vang maiin a chhuak a, Kungtei awmdan danglam kha a rawn hre ve leh tawh lo reng reng. 

"Mo ka la ni ve dawn a, i chunga ka sual viau chuan ka mona te an lo sual ve viau ang tih ka hlau a, kan inchhung pawh hi a nuam reng bik lo tih ka hria alawm. Hrehawm tih chang i ngah viau ang. Ka nu leh Faith te awmdan hi ka hmuh hmaih lo a, ka hmangaih a, an thlavang pawh ka hauh zawk tur a ni. Mahse, an tihdan che leh thil dang pawh aniang, ka hria a, ka hmu bawk a, U Nico nen in boruak a ţhat hma phei kha chuan i lo beidawn mai ka hlau ţhin a. Tunah pawh a la ni tho, beidawng miah suh aw. Mihring kan nih chuan harsatna hi chu kan tawh tur a nia, hun khirh paltlang tur a tam bawk a, beiseina kan neih tlat loh chuan hmalam kan pan ve thei lo ang" a ti malh malh a, Nicholas leh pâtea te lo haw thlengin kan ţhu a, "I la insiam nange? Tho la chaw va ei rawh" kan lam pana lo phei paha a tih chuan ka sana bunlai chu ka bih a, chaw ei chhung leh insiam chhung nen hun ka lo nei tam tawh lo. 

"I rei lutuk a lo nghah pah chein Hope nen hian kan lo ti ti mai mai alawm. I naupanlaiin mi ran vulh lai i hawn ru ţhin a ni maw?" fiamthu a ka tih chuan a lo ner nak a, "Va ei vat vat mai teh...i rualin ka lo ei ve dawn em?" a tih tak daihah chuan nui hak hak chungin Hope nen chuan kan kekawr mawng kan beng fai thuak thuak a, kan pathum chuan inchhungah kan inzui lut a, boruak chu a uap lehnghal churh ni maiin ka hria. 

Chaw ka ei lai chuan Hope leh ka pasal chu min ep zawngin an ţhu a, Kungtein min be duh lo mah se a hrehawm lutuk rih lo. A che vel chu ka melh leh zeuh ţhin a, tuk danga min be seuh seuh ţhin si kha a tum bar a, en pawh min en duh lo. 

Ka insiam lai chuan Kungtei awm dan chu ka hrilh ve ta nge nge a, "A zia ve aniang" min tih sak a, a awm rei tawh a, kei aia hrechiang zawk tur chu a ni. 

"Nizanah pawh ţha deuhin kan inthlah kha, a mak lutuk, tukin chu min be duh miah lo a, ka biak pawhin min chhang ţha duh lo. Kungtei berkher phei chu nau ang chiahin ka en a, a hrehawm ka ti tak tak a ni" ka ti niah niah a, ka kawr ka pawh mar thuak thuak hnuah a lam hawiin ka inher a, "Hundred percent-i i ni mai. I nalh lutuk" min lo ti leh tawh a, ka tum deuh bar reng avang chuan, "Ka lo sawipui ang. A la naupang a, ho te te ah a lungawi lo mai zel alawm" a ti ve ta nge nge a, "Ka hming sawi lang lovin sawipui ang che. Tukin khan Saii i be duh lo a, i awmdan kha ka hmu thiam vek ti rawh" ka ti deuh kher a, a ngaihven lo nasa mai bawk sia. 

Hunawl kan neih veleh Ngheti hnenah Mapuia chungchang chu ka hrilh ve a, Faith-i ţhiannu in a sawichhuak chiah kha mak ka ti em a ni. Bakah hmeichhe tam zawk hi chu kan chungah engpawh thleng se kan ţhianţha te hi kan hrilh nghal ţhin hrim hrim. 

"Engtin nge tih i tum?" a tih chuan, "Ka sawipui ang. Ka bia a, beiseina ka siamsak hnuah ka ti tawp leh a, ka dik bik lo tih chu ka hria alawm. Ka thiam lo hul hual a, hrehawm pawh ka ti. Mahse, dik lo deuha thil a lo ti a nih chuan ka hau tho ang. A chungah rilru chhia ka pu ngai lo a, thinrim a ti tawp pawh ka ni lo. Rilru chhia a lo pu bik a nih chuan ka thin a rim ngawt ang. Ka khawhar lai leh chhungte chunga ka lungawi loh laia ka be fo mai kha chu keima thiam loh a ni a, puh tur dang ka hre lo. A rilru nat avanga min tih chhiat a tum a nih erawh chuan ka thiam loh a ni tawh lo" ka ti a, Mapuia message tur ka type zui nghal a.

CONT..