HIS LAST LOVE-20

HIS LAST LOVE-20

"I buai rih lo ang chu tiraw?" tawi te a ka nui chu min lo enin a bu nghat a, ţum dang angin thingpui dawr kan pan lo a, damdawiin chhung, mi kal zen zen lohna hmunah ka ko hrang daih a, sawi a awm tawh chuan mi hmuh tur a zui chhuah chi a ni rih lo. 

"Eng lo a nia...i cousin leh kan pa farnu hi an lo inhria a" ka ti a, Faith-i te college hming ka sawi chuan, "Dindini a lut ve alawm. Kan inhnuaiah an awm a, a la naupang nain ka cousin te ah chuan ka pawh ber pawl a ni" a lo ti a, chu nu chu a ni ngei ang Faith-in a sawi kha. 

"Kan inbe ţhin tih a lo hria a, a lo sawichhuak a, tunhnaiah ka chanchin i hrilh em ni?" ka tih chuan, "Aw..hrilh e. Kan thlalak te a en a, min zawt alawm" a lo ti leh mai a, ka thaw hak a, thinrim viau dawn mah ila ka thiam loh a ni ve tho bawk si, kan inchhungah chuan rei deuh chhung an sawi leh dawn tihna a ni mai. 

"Tumah hrilh suh ti zel tawh rawh aw" tih pahin ka nui lui a, ani erawh a hmel a thutak run thung a, a lungawi lo emaw tih mai tur a ni.

"Faith-i nen engtin nge an sawi chhuah hlawl theih dan ka hre lo, a sawi duh si lo a. Mahse, Faith-i zawkin ka chanchin hrilh ang a, i cousin in ka hming avang ngawr ngawrin a lo zawt chik vak pawh a ni thei tho a, nangmah nen kan inbe ţhin angin a lo sawi a, kan inbiak lohna a rei tawh angreng si a, a nuam lo em a ka hrilh ve mai mai che a nih chu" dam thlap hian ka ti charh charh a, ka lungawi lohna ka lanchhuah tir ve ngam lo a ni ber. 

"I chhungte bulah chuan kan inbe tawh ngai lo ti la a tawk der mai lo mi?" a ti vei hmak a, "Aa...a nih tho rualin sawichhuak pawl an awm chuan la inbe reng angah min ngai thei a, ka dem hauh lo che a nia aw, i cousin hnenah chuan sawi tawh lo turin lo hrilh la, chu ngawr ngawr chu a nia ka hrilh duh che" ka tih laia a nui ri chu a ngeiawm lek lek a ni. 

"In chhungkaw buaina chawkchhuaktu ah min ngai tihna em ni?" a tih takah chuan, "Ngah nge maw i lak kawih tlat mai le?" ka ti halh a, pangngai taka sawipui theih reng reng loh mai, hahthlak lutuk.

"Ka dem lo che ti mahla min dem tih ka hria alawm. Kan thlalak a hmu a, i hming leh chanchin min zawt a, chuzawng chu a ni mai" a dar kan ak pah hian a ti a, "Kan insiamrem ve mek zel a, nangpawn i ţhian ka ni ang i tih kha. Ka chhungte mizia i hrechiang vek tawh a, ho te ah an lungawi lo mai zel. Dindini bulah chuan engmah lo sawi tawh suh ti ngei ngei rawh aw" ngen ti tih hian ka ti a, ngaithla ang pawhin a awm lo. 

"Nangmah chiah i inngaihtuah a nih kha" a tih chuan, "A ni maithei, mahse kan inbiak loh hi kan tana ţha ber a ni sia lawm. Mahni hma ka sial a, ka sual bawk a, khang kha chu ka pawm vek. Mahse, khawngaih takin Dindini bulah ka chanchin lo hrilh tawh suh" ngenngawl zet hian ka ti tawh a, Pa Chhawna duh loh chin a thlen phei chuan Nicholas-a hnenah "Ma mai rawh" a tih te ka hlau ve a, ka rilru a buai nuai nuai a ni ber. 

"I chanchin ka la sawi peih mah chuan lawm zawk ta che mawle. I ţhian chu ka ni dawn alawm, i tan ka awm reng dawn bawk. Ka ngaih lutuk vang che a i chanchin ka sawi ve chu a pawina a awm em ni? Nunhlui avanga an duh lo che a nih leh ka hnenah lokal daih la a ni mai alawm" a tih chuan ka en reng ringawt a, a thusawi chu a mak lutuk a, chhan let dan ka hre lawk lo a ni. 

"I pasal hian a hmangaih che a nih chuan engtin pawn awm la a pawm tho ang che. I thlavang a hauh bur reng a nih chuan a chhungten an ti chhe ngam lo ang che. Ngaihtuah chiang rawh, nunhlui avanga i pasal mitmei i ven a, a awmreng lai pawha a chhungten zahlo deuhin an ti bawrh bawrh ngam che a nih chuan a hmangaih lo che a, inchhungah thu a nei lo tihna a ni mai" a tih leh chuan, "Chutiang chu a ni hleinem. Nunhlui chu nunhlui a nia, a thin a rim phah ngai reng reng lo. Ka be ngai tawh lo che tih a hria a, nangmah vangin kan inhau ngai tawh lo. Ka awm ang ang hian min pawm thlap alawm. Ka thlavang pawh a hauh ziah a, a chhungte hian min ngaina lo em zawk a. Nang hi, tum nei ranin ka chanchin i lo sawichhuak a ni lo maw?" ka ti a, a nui suk duh chauh a, ka thin a rim viau tawh thung. 

"I ţhian te chunga i rilru put hmang a dangdai awm ţhin bik hle mai. I tan ka awm reng ang ti chung rengin ka nun nghawng chhe vek thei thil i ti tho a, eng nge tih zel i la tum? Kan nupa hian min pawh ţhen i tum em? Nge ni a ka pasal nu leh paten min hnawhchhuah theih na tur i ngaihtuah mek zawk?" ka ti salh salh a, ngeiawm zet hian a lo nui leh a, Mapuia ka hriat ţhin kha a ang tawh hlawl lo. 

"Kan inbiak nasat laia ka sawi ţhin kha i la hria em? Ka duh chu ka nei ţhin ka tih kha. Pawl12 kha mi aiin ka pass ţha fal bik hleinem, kei aia ti ţha tam tak an awm mah se doctor ka ni thei tho a, hmeichhia pawh duh ka neih chuan ka nei thei zel. Ka mit i la a, mi nupui i ni chung pawhin ka umzui reng che a, neih che ka tum vang a ni. Tuman min la hnawl ngai lo bawk" a ti a, kei takngial pawhin ka rap alawm le. 

"I lo van inthup thei em em. Mi fel deuhah ka lo ngai che a, tunah chuan engahmah ka ngai tawh lo che. I duh chu i nei ţhin a nih pawhin nangmah duh lo tu chu i nei thei ngai lo ang. Tuman an la hnawl lo che tiraw? Keichuan ka hnawl che, pawnchhe bal ţet hrup hnawlin ka hnawl che, bawlhhlawh uih vek tawh hnawlin ka hnawl che" ka ti hlawih hlawih a, thinrimin a lo insehruh ţeuh a, ka nui sak thung. 

"Ka dinhmun hrethiam a, min khawngaih vang hrim hrim a ka bula awm emaw i nih ka lo tia, i rilru chhe ţawih, thinlung thianghlim lo bal lutuk kha ka lo hmu tel lo a nih kha. Mi hi ka ring sual ta fo mai" tih pahin ka nui hul hak a, "Misual emaw ka tih kha mi fel leh khawngaihthlak tak a lo ni daih a, mifel emaw ka tih kha mi tenawm tak a lo ni thung a, mi hi an landan aţanga lo judge ve ringawt hi a dik lo takzet a nih hi" amah hrilh pawh ni lem chuang lo hian ka phun sap sap a, pawnlam landan ringawt hi chu bum tu lian tak a ni. 

"Mapui, ţhianţha takah ka ngai ţhin tak tak che a, i lo mak hle mai. Ka khawngaih che a, engkim ka ti tawp ta vek mai te kha nuam lo tihna ka nei ve hial a, a chhan chiang takin ka hrilh bawk che. Duhsakna min hlan ka beisei hauh lo nain ka hlimna tur i duh ve ţhin ka lo ring a, ka chhiatna tur zawnga chet i lak duh ka ring chhin ngai lo reng reng. Ka dawhtheih loh tawp a thleng a nih chuan i inchhir viau ang aw. Ka thinrim tawpkhawkah chuan zah ka hre ve vak lo a nia" tih leh kal ka rual a, ka mi rin ber pawlin min phiar ru ang riakah ka ngai a, ka ţah te a chhuakin ka hria. 

"Eng nge chanchin?" Ngheti chu kal pelh pahin, "Ka sawi peih rih lo" ka ti hlak a, ka inthlak zui mawlh mawlh a, ka thin a rim mai bakah ka rilru a na a, Mapuia berkher chuan hetianga min tih hi ka beisei lo a sin mawle. 

"An duh apiang neih tum ho hi chuan tual an that duh. Naktuk aţang chuan thir kawr hlir ka rawn ha tawh ang a, silai ka pai bawk ang" ka chhungril tawt lutuk tih thawl tumin fiamthu ka thawh a, ka ţhiannu lah chuan mak a lo ti nasa mai. 

"Ţha deuhin insawi dun ang chu tih nak laiin inthah chungchang te in sawi em ni a?" a ti he haw a, a hmai kheuh neuh neuh chung hian min en ran a, khawdang a hawi thei meuh lo.

"Sawi em em lo e...mipa hi chu hmeichhia aia rilru zau zawk, an chunga thil thleng pawm thiam zir mai ţhin ang hian ka lo hre ţhin a, thil hi ka hresual nasa ve thei ngawt mai. Mapuia hi a mizia a mak a nia aw...ka rin ai daihin a sual" ka tih takah chuan, "Hmm...lehlawi si che chuan...a hming pawh Pathian naute tiin i save thlap kha, i rin ang a lo ni leh si nange?" a ti a, min la nuih zui. 

"Ni nang aw...ka duh chu ka nei ţhin tih vang mai maiin a cousin bulah ka chanchin a lo sawi vak ringawt a, Faith-i te leh a cousin te hi an inkawm ţhin tih engtin tin emaw a lo hria aniang, bakah min atchilh ve em a, min zirchiang nasa ngawt ang. Ka lo thi ta a nih chuan Mapuia hi i man tir tawp dawn nia" ka tih chuan nui har har chung hian ka hnungah a beng a, keipawh ka bang chuang lo, boruak ţha lo in uap beh tir reng hi ka kham riau. 

"Tun hma khan i luck em em ngai si lo a, pasal i neih veleh atchilh bur tu che i tawng a, a mak ve ngawt mai" a tih chuan, "Hmelţha min tih theih hlawm em kha. Ka luck mah mah zawk alawm. Mipa mai bakah hmeichhia ten min ngaizawng a nia, hre lo der suh" ka lo ti hlak a, "Aww...an ngaizawng che a, an atchilh ngai hleinem che. I zia an hrechiang a an duh lo zel che alawm. U Nico anga duh tu che hi an awm lovang" a ti leh tawh a, ka pasal hian a be thiam riau a, inţhen pawh ni ila ka ţhiannu hi chuan keimah min thiam lo tawh zawk maithei a ni. 

In kawtah Nu Hlimi leh Kungtei te an lo awm a, min biak an tum loh hmel khawp lehnghal. Biak loh aiah tiin, "Nu, eng nge in tih a?" ka ti mawi ve a, min en vang vang hnuah, "Pangpar kan buaipui" bul deuh hian a ti a, min chhang tawh dawn lo emaw ka ti hman alawm le. 

"Puih in ngai em?" ka tih leh chuan, "Tlai lamah chuan heng ho hi tui pek a ngai ang" tih pahin ka hnunglam a mi ho chu a rawn kawk a, "Aw...inbual zawhah ka lo ti dawn nia" ti a kal mai ka tum chu, "Thingpui lum hmasa rawh..tui a hal tawh a, thingpui in ang" a lo ti leh a, ka bu zeuh a, inchung a chho tlang lovin choka ah ka lut a, dawhkana ka bag ka dah hnuah thingpui chu ka lum a, Nu Hlimi te chu engtin pawn lo awm se ka en liam thei, an tih loh dan a ni tlat lo a, Kungtei lehzelin min be duh lo hi chu hrehawm ka ti khawp mai. Nichin pawh khan min hmu angin a awm duh miah lo a, nidang ang chu nise thingpui ka duh leh duh loh te, ka chauh leh chauh loh te min lo zawt leh seuh seuh awm si a, tunah chuan ia ruak huai a, ka khua a har takzet a ni. 

Thingpui ka siam zawh rualin a lo lut a, Kungtein a rawn zui lut lo thung a, a ţhut fel veleh thingpui chu ka pe a, inve loh a nuam si lo a, a ep chiahah ka ţhu ve a, sawi tur a vang kher mai. 

"Faith-i thusawi kha tak tak a ni em? Tukin a i kal chhuah hnu pawh khan an la sawi a, mipa dang i lo be reng em ni?" chang fek fawk a a tih chuan, "Ka ţhianpa alawm. Nicholas pawn a hre vek" ka ti a, a mitah tak ka en ran a, Mapuia hnenah khan vawikhat pawh ka duh thu ka sawi lo a, ţhian ang chauhin ka en a ni ber a, chuvang chuan ka hlau em em hran lo. 

"Sawi tawh ang khan keini chu kan khirh a, mualpho kan hlau bawk. Mi hmuh a sawiselbo nih kan duh a, miin a chhe zawngin kan chanchin an sawi ang tih kan hlau ţhin. Miin min relna ka hriat ringawt te hian zan hnih lai te ka mu ţha thei lo ţhin a, a ţha ber kan ni thei dawn lo tih chu ka hria, mahse theihtawp kan chhuah lai hian nangmah vanga kan mualpho rup ka hlau. I uire a nih vaih chuan mi zawng zawng nuihzatbur kan ni dawn" a ti a, ngaihtuah chiang lo a thil ka lo ti kha a pawi tak tak a ni. 

"Chutiang chu a thleng lo ang. Ka insiamţha ve zel a, chhungkaw mualpho theihna tur thil chu ka ti hauh lo ang" ti ve bawk mah ila, "Ka ring tawk lo che alawm" a ti tawl mai. 

"Phir te i pawt ţhen hmak a, pasalte hnen a vui reng te hi a ţha ngai lo. Chhungkua kan ni a, lungawi lohna i neih chuan sawi mai rawh. Nicholas hi ka fapa a ni a, duh ngat ila chu i lak aţang hian ka la hrang thei lutuk. Mahse, chutiang chu ţha ka ti lo a, ti hian in awm ang angin ka en liam cheu a, ka hau ve che u a nih pawhin ka hmangaih vang che u a ni tih hriatthiam tum rawh u" a tih chuan ka ngawi reng a, min rel nasa ţhin tih ka hria a, a insawithiam meuh chuan a dik leh zul tho bawk si, mahni in lo a awm chu awmdan thiam a ngai a, aa...ka thiam ve lo a ni ber mai. 

"I pa pawhin min zawt a, engmah a ni lo ang ka ti tlat a. Hmanni a lo thlah tu che pawh kha i pa hriatah ka la sawi ri lo hrim hrim. A thinrim chu kei aiin a hlauhawm daih zawk a, zuam chi a ni lo. Mo nih chuan engkimah fimkhur a ngai a, keipawh i pa nen kan inneih hlim chuan inthlahrung dekin ka awm ţhin. An thusawi apiang ka zawm a, ka pasal a chhungte tih lawm loh hlauin ka hmanhlel a ni ringawt. Tunlaiah chuan mo duat kan intihhmuh tawh a, keini hunlai ai chuan in nuam sa daih tawh zawk tih hre tawp rawh" a ti leh a, ka la chhang chuang lo. Hlau lo tih vanga a zawng zawng a chhan vek chi pawh a ni chuang lo a, engpawh thleng se, thiamthu ka sawi ve theih nan a him chin zela ka awm a ngai miau a ni. Ka khin zel chuan ka insawithiam thei lo ang a, miin min dem vek mai ang. 

Ka inbual zawh hnuah reilote ka hahchawl a, khuma ka ţhu mai mai pawh ka lo muthlu leh dawn dawn ţhin. Ka mutthilh tak tak hmain ka tho a, tui ka in ţeuh hnuah inhnuaiah ka chhuk a, Kungtei nen intawk chat mah ila min be lo bawkin min kal pel a, keipawh pawnah ka chhuak tlang ta daih a, min huat chhan a nei chiang alawm. 

Pangpar tui ka pek lai chuan thil chi hrang hrang ka ngaihtuah ve a, duh lo viau mah ila mahni inkhawngaihna a awm lo thei lo a, hmaichhanah min ţawngkhum fak fak ngam a, sawi hreh an nei lo a, an tim eih ngai lo bawk a, engah vak min ngai lo tihna a ni mai. Anni aia hniam daihah min dah a, chuti ni lo se chu hmaichhana thu kha tak tak sawi an ching lo ang. 

"In ngaihtuah muk hmel ve" hnung lamah ka inher vut a, motor nghengin Anthony a lo ding reng mai. 

"Thawm i hria em?" motor kawh va paha a tih chuan lu ka thing a, a lo nui hawk a, "Em em che hian..eng nge i ngaihtuah a?" ti a min zawtin a lokal hnai a, "Thil chi hrang hrang ka ngaihtuah kual a, motor ri ka hre lo hrim hrim. Keipawh hian mak ka ti, i ţawng ka hre tho sia" ka ti niah niah a, kawngpui kan hlat lo a, ka lo ngaihven em em loh vang te pawh aniang. 

"An hau che mi?" a tih chuan, "Teuh lo mai" ka lo ti vat a, "Pasal neih hi a nuam vak lo ang tiraw?" a tih leh pawh chuan ka lo nui mai a, sawi a sawi loh tur ka thliar thei rih lo a, chhang lo ila a fuh ber ang. 

"Ka nu hian thil thar a lawm a, thawmhnaw thar, man to vak lo pawh nise i leisak peih chuan a ngaina thuai ang che. Ka nu'n a ngainat che chuan midang pawh i chungah an ţha nghal vek ang" a ti a, mak ka lo ti khawp a, "Ka tlawn dawn tihna maw?" ka ti ha a, amah ka en rual chuan ka lam a lo hawi ve chiah a, "Rita-i a huangtau a, zah a hre bawk si lo" tih pahin a ner sak a, "Thil thar a leisak reng a, a ngainat tawh em hi. Ţawngkaa i duat thiam lo a nih pawhin kawr thar leisak ve chhin rawh. A danglam deuh ang" a ti leh a, hlawh ka la reng a, engmah ka la leisak lo tih hrechhuak thar lehin, "Ka lo lei sak dawn nia" ka ti ve ta nge nge a. 

Choka a ka luh leh chuan Kungtei chauh a lo awm tawh a, min hmu lo ang hmaka a awm chu biak hmasak dan tur ka ngaihtuah rauh rauh a, "Kungte" ring angreng taka ka tih chuan min lo en a, "Min ngei em ni? I huat deuh tur angin ka awm em ni a?" ka ti deuh thawr a, min chhang duh hauh lo. 

"I huat zawnga ka awm a nih chuan ka tih dik loh chu sawi la ka lo insiamţha ang. Nangmah chiah ţhian ka nei a, inbiak duh loh ringawt chu a nuam lo emai" ka tih pawhin min ngaihsak chuang lo a, ka beidawn tawp a "Puih i ngai em?" ka tih chuan, "Ngai lo. Tih tur a awm lo" a ti hmak a, choka ah chuan ka awm lui a, keimahin tih tur ka zawng chawp a, Nicholas a lo haw chuan ka zang huai mai. 

"Eng nge vawiin lam te?" a tih chuan, "A ţha vek" ka lo ti vat a, Kungtei chuan a in duh zawng a lo zawt sawk sawk a, lungawi lohna nei lo ang mai a ni tawh. Engmah a duh loh thu a sawi hnuah inchungah kan inzui chho a, pindan a kan luh rual chuan khumah ka ţhu hnawk a, rilru a buai a, a hrehawm takzet bawk. 

"An hau che em ni?" a ti veleh a, lu ka thing ve tak nain, "Kungtein min la be duh chuang lo a, ka kawm nasat ber a ni si a, a hrehawm em alawm" ka ti ta tho a. 

"Ka hau ang ka ti tak tiraw?" a lo ti ve heu mai. A va han laktlak loh ve chiang tak. 

"Engmah i hrilh nange?" ka tih chuan, "Hrilh nang" a ti deuh sup a, "Lo hrilh ve tur che alawm. I ngaipawimawh lo lutuk a nih kha. A nuam lo emai ka tia tukinah pawh ka sawi vek kha" ka ti hlak hlak a, ka melh na khawp mai. 

"Tihpalh...tihpalh...nangmah chiah ka lo ngaihtuah a" tih luam pahin min rawn pan hnai a, ka bula a lo ţhut rual chuan nghet zeta min kuahin ka bekah a fawp vang vang a, "Keimah chiah min ngaihtuah la chu i sawi awm emai. Ngaihtuah dang i ngah lutuk zawk a nih kha. Laktlak loh leh lutuk mai" ka tih te chuan a nui mai mai a, han hauh zui vak ngaihna pawh ka hre tawh lo. 

Thla lai a vei leh hnuah pawh Kungtei chuan min la haw zui zel a, Mapuia chanchin pawh am sawi bang chuang lo. Kan awmkhawm tawh chuan Faith-in a sawi chhuak ngei ngei a, Mapuia nen a kan thusawi ţhenkhat a lo hre ve te chu mak pawh ka ti hran lo. Hunpui kan hnaih tawhin an inbuatsaih mup mup a, kei erawh ka tawt ţeuh reng thung a, ka pasal hi khawngaih lo ila chu mualpho huamin kan in lamah ka haw daih tawh ang. 

"Awii...a lo leng khat ka lo tih lai takin i lokal. I van chhe lo em em" an tih tak hlutah chuan thawm lo chhuahna lam chu ka en ve vat a, Rita-i a lo ni. 

"Inneih naah ka kal a, ka lo kawi a nih hi" a ti a, kawrfual hnalh mai, a pian nalh tak pho lang chiang em em mai hi a a ha a, mipa tan chuan a hmuhnawm khawp ang. 

"I duty nange?" tiin keichu min be ve mial a, "Ka chawhma a" tih bakin ka chhang lo. Inrinni a nih avangin Nicholas pawh inah a awm a, pindanah hna ka siam sak thung. 

"Khaw nge in pa?" a tih chuan, "Pindanah a awm" ka tih ţhat ve mai laiin Nu Hlimi chuan, "An bungraw dahna vel a sawn kual tir a nih kha. Inneih ni a an ţhianten an dah sak ang ang khan a la awm a, vawiin chu inrem fel nan hun an hmang ve a, a lo chhuk ţep ang" a ti zung zung a, Anthony sawi ang khan kawr chu ka leisak ngei a, danglam a awm phah awm pawh ka hre lo a, a la ha miah lo bawk. Min haw ve hrim hrim niin ka hre ber tawh. 

"Tunlaiah chuan mi kan buai tawh a, ţhianţha pawh kan inhmu hleithei tawh lo chu a nih ber hi" min melh ralh pah hian a ti vel a, mahni lo maha chauh ve nak laiin, a awmdan vel chu ka haw hlur mai. 

"Ni chiah e...i lo leng khat lutuk a, i pa te eng nge an chanchin? An sumdawnna chu a tluang zel em? School chu i enkawl dawn ta em?" Nu Hlimi chuan a ti zung zung a, Rita-i te hian school an nei tak e. Aaa..an hausa a, eng eng emaw an nei nual mai. 

"Aw...ka kuta dah an tum chu a nia. Ka buai ve em a, ka lo len chak theih zia chu" a tih lai mek chuan kailawn lam ka pan daih a, thei tui la tura chhuk ka ni a, choka ah pawh ka lut hman lo. Rita-i insawithei kual vel ka ngaithla peih lo a ni ber. 

"Khawiah nge i thil lak chu?" pindan ka luh rualin min lo zawt nghal chat a, kawngkhar bula hmunphiah intung ban pah hian, "Ka la lo, Rita-i a lokal a" ka ti a, amah pawh en chuang lo hian hmun ka phiat nghal thuai thuai a, "Eng nge a lo tih ve ziah a?" a tih leh chuan, "Ka hre bik nang...i hriat duh leh zu zawt la a ni mai lawm" ka ti vin hlar a, min en phawk khawp mai. 

"I huat tura sawi ka nih loh kha. Rita-i demna rilru pu chungin ka sawi aw" a ti leh vel a, zan ka mu ţha thei lo bawk nen, hna ka chawl ve thei mang si lo a, ka chau deuh chu hmunphiah hum ran chungin khumah ka ţhu hnawk a, ka engtih tha mah a tho tawh lo. Rita-i hi ka lo thik awm hle mai. 

"Na i nei mi?" tih paha ka bula a lo ţhut rual chuan pindan kawngkhar a ri kauh kauh a, kan nupa a kan in en ren rawn hnuah hawng turin a tho a, Rita-i leh Faith an lo lut hlawl mai. 

"In nupa pindan hi ka la hmu ve lo a, ka hmu chak tlat a" hawi kual ruai pah hian Rita chuan a ti a, a nui sang bawk a, hmuh hmaih a neih pawh ka ring lo. 

"I huangtau mah mah a ni. Lo leng fo lo bawk la a ţha ang" Nicholas chuan a ti a, a mitmeng a dur khap a, Rita-i chu a lo lawm lo takzet tih en mai pawhin a hriat theih a ni. 

"Nangmah vanga lo leng ka ni lo a nia. I nu leh phir te hi kawm an nuam em a, nangmah vang chu nise in a i awm lai hlir ka chuh ang chu. Ţhian ka kawm tam lo a, ka kawm tawh te erawh ka thlah ngai lo tih i hriat kha" a ti a, an inbiak zelna pawh chu ngaithla zui lovin lehkhabu tlem ka neih ve ho chu ka rem chhuak ta daih a, an awm lai hi chuan hmun pawh a phiah theih loh ang. 

"Rilru chhe pu ran chunga lokal ka ni lo a nia. In pindan ka rawn en ve a, a tawpna a ni bawk ang. Ţhiante i ngaipawimawh ta lo lutuk hi kan vui ve riau bawk a nia aw" zangkhai vaha Rita-in a tih chuan, "Rawn inlan tam lo la kan zavai atan a ţha a ni mai" a lo ti hmak a, ka hrechiang tial tial a, ka ngaina lo tual tual mai. 

"I damlo mi?" Rita-i te chhuah hnu chuan a ti leh tawh a, "Dam chu ka dam a..mahse nizan ka muhil thei lo kha ka tlaivar ţhak ang a nia, ka zawi, ka mut a chhuak" ka lo ti a, ka taksa a dawm rual chuan a awm nghengin zawi deuhin ka ding a, Faith-i hi ka nau diktak chu nise kut ka thlak tawh hial ang ka ring. 

"Va mu hahdam rawh tih tur a awm tawh chuang lo a" a ti ve mial a, mi duat hliau hliau a thiam vak lo nain theih tawp chu a chhuah ve ţhin chiang alawm. 

"A ngai lo" ka tih lai mek chuan min pawm kang thut a, khek deuh ţhat chung hian a nghawngah ka kuah a, "Mimawlpa..hetiang a nih chuan naupangtein ka la thi nge nge ang aw" ka tih kha kha lai chuan min la fawp daih zui a, ka thiam ve deuh tawh a, ka lo chhang let ve vat tawh zel. 

Min fawp reng chungin khumah chuan min nghat riai riai a, inlakhran nachang a hre dawn lo emaw ka tih tawh hnuah min fawhna chu muang ruihin a tawp a, "I hmui a nalh si, ka fawp nileng zankhua ţhak peih ang che" a ti a, ka hmui hnuai lam chu a pet pah zauh kher a, a fiamthu tih hre mah ila, "I ti mah mah aw..chutiang chen chen ka fawp ve peih reng reng lo che" tih paha nam sawn ka tum pawhin ka chungah a la awm tlat a, kan in en hnai khawp mai. 

"Muhil rawh..ti hian ka lo veng che ang a, ka fawp zeuh zeuh bawk ang che" a tih chuan a biang tawn tawnah ka dawm a, "I thu i duh lutuk hi chu kan la inhauh phah leh nge nge ang mawle" ka ti a, sawi ang ngei ngeiin, "Nangman i zir chuan kan inhau tawh lo ang" tiin min lo hnial nghal a, nupa inpawh tak ni tawh mah ila mahni dik kan la inti ber ve ve a, kan tihsual pawm mai hi harsa kan ti lutuk tlat a ni. 

"Nangman i ti leh daih tawh. Keipawh ka insiamţha ve ang i ti tel ngai lo reng reng" ka tih chuan, "Siamţhat tur lai chu ka siamţha zo vek tawh" a ti a, khumah chuan lawn kaiin ka mutna bulah a ţhu a, inhnial a inpeih leh at tawh maithei a ni. 

"Vawiin chu ka khuahar..ka nu leh pa ka ngai bawk si" tih pahin ka awm hnaih a, a kawngah kuahin a malchungah ka lu ka nghat a, "I mut ţhat loh vang a nih chu" a ti liam satliah a, ka sam a chul ve tak nain ţawngka chuan min hnem thiam lo. Ama sawi dan takah a zak tlat zel a ni awm e. 

Chaw ei tura inhnuaia kan chhuk chuan Nu Hlimin, "Chaw ei khamah Rita-i hi va thlah rawh aw. Anthony a lo haw hma dawn lo a, Rita-i lahin lirthei a lo keng bawk si lo" a lo ti zung zung a, ka zawt chiang chak thei a sin aw. A mo ka awm reng laia ka pasal hnaih tum ran tu hmeichhia a ngaihsak tlat te, min zahpah lo leh ka mitmei veng hauh lova ro a rel ţhin te, Rita-i thlavang a hauh tlat mai te hi a chhan chiang taka zawh a, hriatchian ka chak ţhin. 

"Faith-i a awm kha, scooty in va thlah rawh se" Nicholas an a tih chuan, "Kawrfual a ha a, a kar thei dawn bawk si lo, ka phur thiam lo alawm" a lo ti vat a, an ţangrual ve khawp mai. 

"Va thlah mai rawh..a rei chuang nang" ka lo ti a, chauh nen, inhnial hrep ai chuan remtih mai a ţha zawk. 

Ka telloin a duh si lo a, ka tel veleh ta nge nge a, Rita-i chu a ţawng zat zat reng a, an lehkhazir ve laite sawiin a nui har har a, ka chau ve tak tak aniang kei leh kei lo angin ka ţawng tlem viau thung. 

"Saii, i nuam sam lo em ni? I van ngui em em" a ti ve ngei a, lo buk nghat pah hian, "Mut ţhat loh vang a nih hi" ka ti satliah a, hnunglam aţang chuan min rawn nam pawp a, "Awii..keipawh ka dam loh chuan in pa hi ka hrechhuak ve ziah" a ti zui lang lang a, hneawm ve tak chu a ni. 

"Min duat thei tawp amaw..class ka kal theih loh te hian ban veleh min hmu turin a lokal a, eitur a lo keng ţeuh zel. I la hria em Nicholas? Ţum khat phei chu vawi thum vel lai ka tirh chhuah che kha" amah bawk chuan a ti leh vel a, eng rilru nge a put ang aw ka ti. Ka huat tur a sawi a ni ber ang a, a chhiat loh reuh nen a khawngaihthlak zawk. 

"I tana inpe a nih rau rau chuan vawi sawm chuang tirh chhuah law law tur che alawm. Vawi thum chu a tlem e, ka lo uipui che" fiamthu hian ka ti a, ka pasal erawh chuan a nin tawh hmel viau a, ka lo chhang let kher bawk nen, Rita-i chauh ni lo keipawh min ning ang ka ring. 

"A khawngaihthlak ve alawm. Mi zawng zawng aiin min ngaihsak bik ţhin a, kan la naupan ve deuh lai a ni bawk nen, khatiang hun lai kha a ngaihawm e. Hunpui a hnai leh tawh bawk si, ka lung a leng nghal der a nia, Krismas hi kal kan theih se ka ti" a tih chuan ka chhang duh ta lem lo a, tam tak tan chuan a ni ve ngawt ang. Mi rethei tan a huphurhawm a, lusun te tan lung ti leng zual tu a ni a, tam takin kal kan mai an duh ţhin hi ka dem hauh lo. Boruak eng emaw riau hi a keng tel ve a, tam tak tan chuan a nuam lem lo khawp ang. 

Rita-i chhuk hnuah kan let lehnghal a, kan ngawih dun rauh rauh lai chuan, "Naktukah in in lamah kan leng phei dawn nia" a ti ve ngei a, ka lawm hman nen ka hna bawk hian min dal leh ţhin. 

"Duty ka ngai alawm" ka tih chuan, "Duty zawhah kan kal mai ang a, ka nu hner hnur hi chu a buaithlak a ni. Hrethiam hram hram rawh, a ngaina thuai ang che" tiin min han hnem ve a, ka kawr leisak a ha duh miah lo kha chu rilru a na ve det a, inchhung hi a hrehawm tial tial emaw tih tur a ni. 

"Ka englai hi nge a huat ang le ka ti" zawi tea ka tih chuan, "Chhuah ka sawiin min hnial zel a, duh la chu ka chhuahpui ang che. Min enkawl man chu ka rul let dawn tho tho a, pawisa chu ka chhung reng dawn. Hlawh i nei a, ka nute pe ţhen mah ila ka hlawh eng emaw zat kan chang dawn tho a, kan buai lo ang" a ti deuh duah a, min hnem dan a thiam vak bawk si lo, chhuak mai ang a ti leh thawr zel a, hrehawm viau mah se keiin chhuah tawp mai chu a ni thei chiahin ka hre bawk si lo, rilru a buai ve ţhin khawp mai. 

Mihring hi inhrawn loh chuan kan inhrechiang lo a, keipawh ka dik vek bik lo ang, ka mona te pawh miin fel an ti viau thei a, kei erawh chuan sawiselna tur ka hre hnem viau thung. Ka chhang pawr ngai lo nain ka dik naah chuan ka chhang let ve zeuh zel a, ngawih ka chuh chang a tam zawk chung pawhin ţhenawm khawvengte chuan mo sual min ti tho a, ka lengchhuak ngai mang lo a, hmelhriat ka neih loh tehreng nen min hre tu chu an tam khawp mai. Mihlim hoin ka chanchin an sawi peih lutuk vang a ni ber. 

"Lut ang le" ka dara kuahin inchhungah min luhpui a, an lo la meng ţhap a, a mawiah kan ţhu muang ve a, Nu Hlimi chuan Rita-i fel a tih zia a sawi leh zuah zuah tawh. 

"I ti tlangnel mah mah a ţha lo. A lokal chhan i hria a, biak dan chintawk hre rawh" Nicholas chuan a ti chang fak a, Pa Chhawna tih loh zawng chuan an en ţhap mai. 

CONT..