HIS LAST LOVE-21

HIS LAST LOVE-21

"Ka tih tlangnel vak pawh ka hre lo. A lokal a, min be bawrh bawrh reng a, min ngaina tu na na na chu a ngainat loh theih loh alawm. A fel reuh a, phir te lahin vawikhat a lokal na aţangin an kawm nel nghal a, lo hmu mawh viau suh" Nu Hlimi chuan a ti deuh zek a, ka bula ţhu ka pasal chu ka kheuh zeuh a, min lo en rualin mitmeiin lo khap nghal mah ila, "In tih dan hi a dik lo" a ti ta tho a. 

"Eng nge dik lo a? A eng ber hi nge dik lo i tih a?" pakhat lah chuan a ti kha kha tawh a, a faten an zilh hian a haw viau ţhin reng a ni. 

"Dik lo chu nangmah khan i hre ber ang. Rita-i hi lo pak huam zel suh. Pathian thu i sawi dur dur reng a nangmah berin i zawm mang si lo" a tih takah chuan, "Duhtawk tawh rawh Nicholas" Pa Chhawnan a lo ti vat a, inrawlh hun a hre chat chat khawp mai. 

"Rita-i hi thil ţha tih tuma lokal a ni ngai lo. Saii a runluih duh vang bak a ni lo. Chu chu in hrevek chung pawhin a lam in ţang vek zawk a. Kan nupa pindanah tlangnel fe in a lo lut ngam a, nangmahni vangin Saii hi engahmah a ngai lo" a ti leh hmak hmak a, kei takngial pawh ka lo ip chawih chawih a, ka fuihpawrh angah an ngai leh dawn tih ka hriat vang a ni. 

"Vawiinah khan i ute pindan ka hmu chhin chak..ka la lut ve miah lo a a tia, ka lo hruai a nih kha. In zah lohna lam a ni miah lo a nia" Faith-in a lo tih chuan, "A nih khawp kha. I zah lo hmasa a, Rita-i pawn a zah lo ve mai. A bul ber chu nangmahni in ni. In thiam loh vek" tih leh din a rual a, ka banrekah hmerin min pawt tho zui ve nghal bawk. 

"Zahthlak a ni hleinem...pasal nei chunga ngaihzawng neih ching" Faith-in a tih chuan, "Engmaw i sawi?" a lo ti vat a, a awki chu a hniamin a zawi ruih a, a khauh viau thung a ni. 

"Ka ţhiannu cousin nen an in ngaizawng alawm. Ka hriat zawng zawng ka sawi lo zawk a, sawi vek phei ila chu in inţhen daih tawh ang" a tih chuan ka banrek a hmerna chu a ti nghet salh a, "I buaina chiah ngaihtuah rawh" a ti a, a insehruh ţeuh reng a, a thinrim chu inthunun a tum nasa hle tih en mai pawhin a hriat theih a ni. 

"Inhnial hian eng buaina mah a chingfel thei ngai lo. Saii pawh insiamţha la" Pa Chhawna chuan a ti daih a, Nicholas pawh a nui chhuak hawk reng a ni. 

"Fel leh ţha in inti emai, hetiang chuan kan cheng ho reng thei lo ang" a ti a, inchung pan a kan chhoh lai te chuan, "In dan, insawn chhuah tih vel kha ngaihtuah reng reng suh aw. Thinrim apianga in chhuahsan i ching hi ka ngaithei lo a nia" tiin Nu Hlimin min la au zui a, keichu ka ngawi reng a, ka inrawlh ve na chi a ni lo tih ka hria a ni. 

"Khati khan i ti vak ringawt a an thin a rim reng phei chuan inchhung a nuam lo lehzual vek dawn a sin" ka puan bah lakthlak mawlh mawlh paha ka tih chuan, "An awmdan hi dik hek lo mawle. An zuam loh nan che an dik loh naah chuan chhang let hreh lo la, mahse zah loh phah chuang suh" a ti leh tawh a, a nu leh paten an endan hi a unau dangte aiin a danglam zawk a, chu chu kei ngei pawhin ka hmu thiam ve tawh. Chuti chung chuan ka zah loh a hlau em em reng tho a, a bulah hian vui nasa ţhin viau turah min ngai nain vui vak theih a ni lo zawk a, a ngawih daih loh leh an thlavang a hauh a, aman tlem te a sawi ţhin hi a ni mai. Chuvang chuan vui vak vak ka tum buai peih tawh lo. 

"Awii...mu phawt teh ang..a ninawm emai" tih leh mut ka rual a, he inchhungah hian englai mahin boruak ţha hip tur a awm ve ngai lo. Kan la dam ţha vek te hi a mak zawk. 

Puan min sin tir a, ka bula lo mut ve pah hian, "Tarmit-a kha i be tawh ngai lo tiraw?" a ti ţha leh a, an sawi peih em a, keipawh hian la inbe reng kan ang ţhin ka ti. 

"Bia ila chu tunah pawh phone ka khawih ang chu mawle. Mapuia zawk khan hmana kan inbiakna a lo hmuh tir aniang" pangngai deuh a ka tih chuan, "Mi ţha a ni lo ka ti ka tia lawm. Min hnial pang pang zel a nih kha. Ka thu awih la chu buaina i tawk lo ang mawle" ka kawnga kuah pah hian a ti a, dik ti viau tho mah ila, "A chhungril ka hmu tlang vek thei bik hleinem. A inthup thiam bawk si, hmeichhe khawhar mit chuan a chhungrik khakna kha a hmu pha lo hrim hrim" ka ti a, a nui deuh a, ka en tih a hriat veleh a tum leh hmuk thung. 

"Hmeichhe khawhar hian mipa ni lovin inhnem theihna dang zawng zawk ţhin rawh u. Mipa sual tawn palh phei chuan khawharna kha lungngaihna in a pawlh leh a, ţap ţuau chunga thihna a thleng duh" a tih chuan, "An ţap ţuau kher lo ang" ka lo ti vat a. 

"Intihlum tam zawk hi chu an ţap ngei ngei ang. Ţap chungin an thi ang a, an thih hnuah an ha an ţhial leh ang a, chutiang vel chu" a ti a, ka lo ner nang a, ka lungawi vak loh chang chuan ti hian thu ho deuh deuh min hrilh a, ka lungawi ve mai zel. 

"I sawi ho emai muhil teh" ka tih chuan, "Piangthar lo a thi te thlarau chan hi a rapthlak a sin. Nangpawh piangthar ang che. Mipa dang melh dâwk dâwk tawh lo la, sual hnathawh a nih kha" a ti a, a thusawi ei lo deuh chunga, "I piangthar tawh em ni a?" ti a ka zawh chuan, "Ka thar vâwk reng mai" awlsam zet hian a lo ti a, ka nuih a za angreng. 

"Engtik laiin nge i pianthar a?" ka tih chuan, "Hmanah kţp in drama kan chang a, setana lemah min ţan tir a, hremhmun a lo tla apiang kha sa an tih tak tak theih nan nawalhin ka lo hliau zel a, khata ţang khan" a ti a, nuihza insum hmel a pu a, dawt min hrilh tih hriain ka nuih a za tawh khawp mai. 

"I nawt alh hnem mawlh mawlh awm sia, a bawk kang lai kha engtin nge i tih a? I paih zel em ni?" ka lo ti veleh a, "Ele...ka ei zel mai" a tih chuan ka nui hak hak a, dawt sawi thiam bawk si lo, fiamthu a thawh ve te lah hian min chhaih thinrim a tum emaw tih tur zawk a ni ziah. 

"Keipawh hmanah drama kan chang a, thingkung ah min ţan tir a, ban ka phar rei lutuk a nithum chhung vel chu ka ban ka ti che ţha ngam hleinem" ka tih chuan, "A la zia a nih chu. Keichu ka ngo si lo a, blackboard ah a sin min ţan tir" a tih leh takah chuan kan nui dun nasa a, mut pawh a chhuak thei meuh lo. 

"Fapa kan neih hunah chuan ka duat ang chu aw" a ti leh daih a, mipa a awt lutuk hi fanu ka nei daih ang tih ka hlau ţhin, a hnual phah ka hlau a ni ber. 

"Fapa ti lovin fa ti ve mai zel rawh. I lu te hi met khat deuh la, fanu kan neih palh chuan i sam a ţawn kak sek duh maithei a ni" ka tih chuan a lo nur nang a, a hmai chu ka kut ţangin muangchangin ka thai a, a sawi ang tak tak khan a ngo lem lo nain kei ang lo takin a hmai a mam a, a hnar leh a hmui a nalh bawk nen, hmuhnawm tih chang ka ngah mai. A sam kir lah hi a inhmeh zawk emaw tih mai tur a ni, fa kan nei a nih chuan Nicholas hi chhun zawk se a ţha ang.

"Mapuia kha chu a hmelţha puak a, nang chu i hmelţha ţalh mai" ka tih chuan a lo ner sawk a, "Muhil tawh rawh" a ti daih a, ka fak ve chu a zak deuh a nih ka ring. 

Zing a ka harh chuan ka bulah a lo la mu a, Pathianniah hi chuan insawizawi turin a chhuak ngai lo a, a mu rei ber zel. Thawh ka tum chu min kuah bet tlat a, a taksa si chet a min pawt hnaiin ka nghawngah a hmai a phum a, a thaw lum ham ham te chu kei dek haw chi tan chuan tawrh harsa tak a ni. 

"Ka tho duh a nia" na lo tein a luah ka nam a, "Pasalte an thawhsan ngai lo" a ti hmak a, min kuahna chu a ti nghet salh a, a lung a awi hmel khawp mai. 

"Rawngbawl te a ngai alawm. Ka puih ve loh chuan ka chung a pik lehzual dawn a sin. Mo ka nih hi" tiin ka nam na sauh a, inlak hran pah hian, "Mo i lo kher kher hi chu a" a ti hluk a, a mut zangthal hnuah pawh a mit a la chhing reng a, min en duh lo leh tlat dawn aniang. 

"Mo ka nih lohin i nupui ka ni thei nang mawla" tih pahin ka tho a, hmai ka phih zawh hnuah pawh a mut ngaiin a lo la mu ta reng a, "I harh reng kha..meng ve em em ta che" ka tih chuan, "Min kalsan lai thlir hi a harsa ka ti" a ti vel a nih chu mawle. 

"I nasa mah mah a nih kha. I eitui loh hlaua peih lo chung chunga tho hma ka nih hi" ka tih chuan a nui a, muangchangin a meng ve ta nge nge a. 

"I vannei ka ti" min en ran chunga a tih chuan, "Engvangin maw?" ka lo ti ha a, "Pasal i nei ţha..hmeichhe vannei tak chu i ni. Tunah pawh i hah hlauin ka thawh hma phah leh dawn chu a nia" tih pahin a tho a, Pathianni tuk danga tho hma ngai mang si lo, Kungtei zia a danglam tak thut vang a nih ka ring. 

"Infak vak lo khan tho mai mai teh" ka pan hnai a, a sam chul mam sak pah hian, "I sam te lah hi sava bu ni awm tak a ni. Tukin hian theihpatawpa nasain a inkawkalh sung zel a, tunah nalh mah se i putar hunah hrehawm i la ti ang" ka ti bawrh bawrh a, kan nupa chiah hian awm thei ila chu a nuam viau ang, thil theih a ni rih mang si lo a.

Inhnuaia kan chhuk chuan phir te an lo inhnial a, keimaha ka chhuk lo chu a tihzia hlauh e. An indin chilh a, rum zet hian an inmelh a, Faith-in fiante a ken laiin Hope chuan no a keng a, anmahni hnaih takah sam buk chhupin Nu Hlimi a ding a, chini bur a keng thung. 

"Buaina a awm em?" ka pasalin a tih chuan an lo hawi rual ţhap a, "An thingpui siam laiin an inhnial a, saw en ta che u..chini a darh nuaih saw. A bur hi laksak hman hlauh lo ila chu a baw zo vek ang chu" Nu Hlimi chuan a lo ti hlak hlak a, a la hma viau a sin mawle. 

"Eng chungchangah nge in inhnial a?" ka pasal bawk chuan pangngai takin a ti leh a, "Faith-i hian ka awmdan apiang a sawisel a nih kha. Thingpui bela chini ka telh nghal te kha a duh dan a lo ni lo a, nangmahin ti ve mai rawh ka tih lahin ka peih lo a ti tlat bawk si. Hetiang mi khawlhkham lutuk, thatchhe bawk si" Hope zawk chuan a ti hlaih hlaih a, a no ken lai chu a lek leh uaih ţhin a, a phir pui nu chu a khawng mai ang tih te pawh a hlauhawm. 

"A bel a i telh nghal vek te chuan chini duh ang zatin a thlum theih hleinem. Thlum deuh ka duh a, ka duh ang takin ka no ah min thlum sak rawh ka ti a nih kha" Faith-in a tih chuan, "A hranpain kan thlum leh mai dawn alawm. A hran hran a tih khan chini a hek mai mai. Lei khawl sa pawh a zawh hma theih em hi" Hope in a ti veleh a, "Zo hma reng ang chu i bialpa te i ken ruk sak ziah alawm" pakhat chuan a ti a, a lu a ri zui kauh mai. Hope-i chuan a lu ah a khawng tak tak a, plastic no ni hlauh lo sela chu a na viau ang. 

"A na lutuk hmeli" a ti tuarh a, a fiante ken lai chuan Hope chu a vaw ve ngei a, a nat hmel vak lo thung. 

An sam a an inkek chiah chu "In va zahpuiawm tak e aw. Inthlah rawh u..inthlah nghal rawh u" vin zet a tih chiam chiam pahin Nu Hlimi chuan chini burin a khawng tawn zak zak a, a chang leh an hnungah a beng a, an inthlah duh chuang lo. 

"Nicholas i naute hi rawn ţhelh ta che. In kek tawh suh u in va mak tak e aw" mangang zet hian a ti leh chul a, phir te lah chu an sam a inkek reng chungin a chang leh an intlawh a, a chang leh ţawngkam chhe pui puiin an inţawngkhum a, kei tak pawhin tih ngaihna ka hre lo. 

"Exer a nih kha..an peih chen chen insual rawh se" Nicholas chuan a ti then a, hmuhnawm tih hmel deuhin a naute insual chu a la en zui a, a maksak tak tak a ni. 

"Exer tih chi pawh a nih loh hi. An sam an kek ţil vek mai dawn a sin. Awi..inzahpuiawm emai inthlah nghal rawh u" Nu Hlimi bawk chuan a ti leh a, pâtea bauh ri kan hriat rual deuh thawin Anthony a lo lut a, "Khaia" a ti ban charh a, a nui vur vur lehnghal a, mipa pahnih an inrawlh duh tak lohah chuan an inkarah ka tlazep a, pâtea a bauh vak vak reng bawk nen an hlau aniang, harsa tak chungin ka ţhelh thei hram a, an sam chu puk ţha dun tak a ni. 

"A nuam viau lo maw?" Nicholas-an a tih te chuan an la thaw dun hlawi hlawi a, an hah viau a nih hmel. 

"Faith, i insual khan i thingpui a thlum bik phah em?" a ti leh a, a sam hnawk hui kian pah hian Faith chuan lu a thing a, "Hope, i insual khan kan chini a hek loh phah em?" a ti leh a, Hope chuan zawi te hian "Aih" a ti sap a, "Awmze nei miah lovin in hah thlawn tihna a nih chu. In insual khan in buaina ber a fel phah hauh lo. In in pet ţhelh nasa dun duai duai si, ching tawh hlek suh u" tih pahin a pan hnai a, chhuat a fian leh no tla chu a chhar a, an pahnih chuan a pe leh ve ve a, "Insual phah nan in hman leh chuan in hmuh loh turin ka dah bo vek tawh ang. In buaina a ho emai, thingpui chu va lum ţha leh rawh u...in pahnih khan" a ti a, an zawm lo ngam lo aniang sam puk luihin gas lamah an phei nghawng nghawng a, an la lungawi chiah lo tih a hriat reng mai. 

"Eng nge an in bak kaih chhan ni a?" Anthony-an a tih chuan Nu Hlimi bawkin a lo hrilh leh a, "Insualna tham a nih loh tawp chu. Faith, Hope-in a bela chini a telh kha a thlum lo deuh i tih leh i no ah telh belh mai rawh. A nih loh chuan i duh ang takin nangman lum la, mi tihdan sawisel suh. Keini chuan engtinpawn ti ula thingpui a nih chuan kan in duh vek a nia" a ti a, insut feih feih riin a zui a, Faith zawk chu a ţap leh tawh ni awm tak a ni. 

"Duat bik in nei a nih kha, U Nico pawh, Anthony pawh Hope ţan zawng hlirin in ţawng a, keimah min thiam lo vek a nih kha. U Saii ka kawm ve ngai loh vang maiin U Nico pawhin min ngei a" a ti chho leh ţan tawh a, ka ngawi reng chung pawhin ka tel ve leh ta a nih hi. 

"U Saii i ngei ve hrim hrim zawk a nih kha. Rita-i nen pawh in rel ziah a, in ţawng ka hre vek zel. U Saiin ka nu kawr a leisak pawh kha nangmah hian hak i phal lo a nih kha. A rawn mo tirhin tun ang em em hian i haw ngai lo, Rita-i i kawm aţangin i haw hlur tawh a nih hi" Hope chuan a ti salh salh a, choka chhung chu a reh zui dâk a, sawi tur kan hre lo tlang a ni ber. 

"Khatiang te kha chu a hma pawn i sawi tawh. U Saii rilru nat loh nan ka zep tlat ang i ti ve a, i thinrim vang maiin i sawichhuak leh tho si. Ţawngthei lutuk mai" Faith-i chuan a ti a, ka lo nui tawp a, han tih vak ngaihna pawh ka hre lo. Chhungkaw tinah hian hetiang buaina hi chu a awm fo a, unau han insual chang te hi a awm ve ţhin, min telh ve ringawt erawh ka duh lo khawp mai. 

Pa Chhawna a lo thawh ve takah erawh chuan phir te pawh an ngawi ve ta nge nge a, an thingpui siam pawh chu ka in tui hran lo. Chaw ei laiin ka pasal chuan, "Tlaiah Saii te inah chaw kan ei ang" a ti a, min hrilh lawk hauh lo a chutianga a ti chu mak tiin ka melh hrak a, min lo en ve lem lo. 

"Zanin tlai chu a theih loh ang. I patea te chhungin chaw an lo ei dawn a, kan sawi lawk tawh kha" Pa Chhawna chuan a ti a, "Lo ei ngai lo pawh an ni lo a, kan tello pawn in ei thei" ka pasalin ti veleh mah se, "Tuman chaw in ei chhuak lovang" a ti hmak a, hnial chiah a ngai lo aniang a ngawihsan ve ta nge nge a, pa ber a ni bawk a a thu khawp mai. An sawi ang tak tak khan a fate hian a thu an zawm lo ngam meuh lo chu a ni. 

Ka tihziah danin ka duty a, ka pasal bawkin min lo hruaiin in kan thlen chuan patea chhung pawh chu an lo awm tawh a, ka hmu khat a, ka nel hran lo khawp mai. 

An fate pahnih lokal ve chuan an tih fo danin min melh ralh a, awmze nei deuha nui chung hian Faith-i lam an hawi a, Hope erawh hmuh tur a awm lo. Patea fate hi hmeichhe pahnih an ni a, an koh duatna, Mampuii leh Nopuii tih chiahin ka hria a, an hming tak pawh ka la hre lo. 

"Ka han inthlak lawk ange" ka ti mawi ve a, Nicholas erawh chu a patean a koh avangin a va fin ve a, keimaha inchunga ka chho chu, "U Sai" tih ri ka hria a, hnunglam ka hawi chuan a pindan kawngkhar phen aţanga Hope lo dak dek dek ka hmu a, a biru em maw ni. 

"Lokal teh" tih pahin min hui a, hrethiam lo viau mah ila a pindanah chuan ka lut ta tho a, hmeichhe pindan tih takah a fel thlap mai. 

"Engati nge inhnuaiah i awm ve loh a? I unaute an lokal khu" ka tih chuan, "Ka peih ve lo..ka bialpa an sawisel leh dawn a, ka hre peih lo. Enteh maw U Sai, tunlai chu ka awmdan a mak thei lutuk. Ka hma hun hi a thim riauin ka hria a, ka engtih tha mah a tho lo" a ti a, khumah chuan ţhuin a meng khup lap a, khup ep chiaha lehkhabu inrem tlar ţhatna lam hawi pah chuan, "Ngati nge? Hma hun eng tak i nei alawm. Chutiang chuan ngaihtuah duh suh" ti a ka hnem ve chuan, "Ka period dawn aniang. Hetianga ka awm tawh chuan ka period ngei ngei zel. Ka pik mup a, khawhawi a tawi vek zel a, ka period dawn a ni chiang mai" a ti mawlh mawlh a, a nui zui ar ar a, banga a milem ziah intar ho chu kawkin, "I va thiam ve" ka ti ta daih a. 

"Ka tuina a nia, hunawl ka neih chuan lehkhabu ka chhiar loh leh milem ka ziak a. Naute nei vat rawh u aw..U Nico nen in inpawh tawh tho sia, naute nei vat ula ka ti. Rilru hah deuh chang pawha kawm hlim tur a awm dawn tihna a nia, ka duat viau ang" a tih chuan, "I bialpa nen in inti thiam lo em ni a?" ka ti ta nge nge a. 

"Ni lo e...tukin a ka thusawi avang khan i rilru a hrehawm em? Ka zep ang ka tia, ka zep reng bawk a, mahse ka thinrim khan ka sawichhuak leh ta si a, hrehawm a ti ngawt ang ka lo tia" a ti a, a inthiam loh hmel tak tak mai. 

"Ti lo e...engahmah ka ngai lo" tih pahin a malpuiah ka beng thak a, "I awm ve lo ang tih ka hlau ngawih ngawih zawk ţhin a, keimah vangin i tih ngai loh pui pui i ti ziah a, ka khawhar i hlau a, ka rilru nat i hlau thei bawk si. Awm lo la chu hrehawm ka ti ngawt zawk ang" ka tih zawm leh a. 

"Ka khawngaih ţhin che a, i hriat ngai pawh ni lo, i kal ngai miah lohna hmunah i rawn mo a, in inneih hlim phei kha chuan ka u hian a ngaihsak ngai bawk si lo che a, ka pawm ngam lawk lo zawk che a, mahse, hrehawm i tih ka hlau ru thei lutuk" a ti a, a nui sen sen a, Kungtein min biak duh loh hnu ngat phei chuan ka tan, ka ban phakah a awm reng a, vantirhkoh a ni ringawt. 

Inhnuaiah pawh kan chhuk dun a, midang bulah awm ve loin choka ah kan lut tlang thung a, patea nupui Pi Tharin min zui lut vein, "Tukinah buaina a chhuak a ni maw?" fiamthu hian a ti a, "Faith-i aia thlan i neih vang niin ka hria" a tih leh chuan ka nui tawp hmak a, ani erawh a la nui hak hak reng mai. 

"Unau kan nia, Faith-i nen chuan kan inkawm reng alawm. Engkimah U Saii hi a puh zel a, Kungtei pawh a fuihpawrh a, U Saii a biak duh loh phah a, a rilru a chhe em a nih kha" Hope chuan a ti leh tawh a, duh aiin a ţawng tam leh tawh tih a hria aniang min lo enin lei a chhuah tet a, a hawisawn leh vat bawk. Ka hriat duh tak ka hriat phah tal alawm. 

"Nico-an a ngaihsak loh phah viau che u em ni?" Pi Tharin a tih leh takah chuan ka insum thei ta lo a, "Ka awm ve reng a, ka awm lai chuan khatiang khan ţawng bawl bawl zel lo teh u, a inzah loh thlak emai. Mi ropui ka ni lo a, engahmah min ngai lo mah ula a pawi lo. Mahse in ţawngkam tal fimkhur ţhin rawh u" ka ti a, thinrim a sawi ka ni lo a, ka vin hauh lo bawk. An hnaih a ka awm reng chung pawh a awm ve miah lo anga min ngai ţhin hi ka dik ka ti bik lo a ni. 

"I huat tura sawi ka ni lo a nia. Tunlai chu phir te hian buaina an nei reng an tia, chaw kan lo ei pheina chhan pawh a ni pakhat a, Faith-i chu ka zilh tawh a, Hope zawk hi hmuh turin a awm mai lo a" a ti leh vel a, "Lokal teh" tih pahin Hope chuan a banah a vuan a, "U Sai, kan rei lo ang aw" ti a min hrilh thlap hnuah Pi Thari chu a chhuahpui a, Kungtei ka lo din hnaih nghal vat bawk. 

"A dik em?" ka ti ringawt a, min en zawk a, a thil chan lai chu a chan chhunzawm leh mawlh mawlh a. 

"Rei tak chhung hrehawm ti deuhin ka awm a, i pawi ka sawi ta emaw ka tia, Faith chuan i hnenah eng nge a sawi a? Ka ţhat lohna a hrilh che nge a vau bet zawk che?" ka tih pawh chuan a la ngawi reng a, "Nau ang tak takin ka en che a, ka kawmngeih bawk che a, midang thusawi vang mai mai a min hua a nih chuan i thu alawm. I chhiatna lai ka sawi ngai lo a, ka khawhar hnem tu ber i ni ţhin. I pawi ka sawi a nih chuan pawi ka ti khawp mai" ka ti a, thil dang ka khawih san a, min melh zeuh zeuh tih ka hre ru reng a, nuam chu a ti chiah bik lo a ni. 

Thil chhuan ka chawh laiin ka pasal chuan hnunglam aţangin min rawn kuah a, "Kan pahnih chiahin kan awm lo" tih sap pahin ka inla hrang vat a, "Min en ţhup mah se ka ngaih che chuan ka kuah tho ang che" a ti a, min kuah lui leh ngat a, Hope a lo nui kar kar reng a, ka zah ruk viau laiin ka pasal chuan engahmah a ngai lo. 

"Kalsan teh engmah ka ti thei lo" ka tih lahin a kut pakhat a min kuah reng chungin a kut lehlamin fian chu min dawm pui a, "Thlah rawh keiman ka lo chawk ang" a ti a, hnialin awmzia a nei lo tih hriain ka thlah a, hnunglam aţang chuan a chawk a, "In ninawm emai lo hawi teh u" Hope in a tih chuan hnunglam kan hawi ve ve a, phone a lo lek va mai. 

"Thla ka la a nia aw" a tih takah chuan Nicholas chuan fian chu a thlah a, hmalamah min dintir in gas hnaih zawkah amah a awm tawh a, ka kawngah dawmin a rawn kunhniam a, "Naupang lawm zawng lah hi a ho sia" a ti vel a, kan biang lah chu a insi rial a, a nau ai chuan amah hian nuam a ti zawk daihin ka hria. 

"Ka dahţha reng dawn chiang lutuk. In fate hnenah ka hmuh tir ang a, an la zak ve ngawt ang" tiin Hope chu a nui ar ar reng a, zah sen pawh a ni tawh lo. Patea fate leh Faith an lo luh ve rual chuan boruak a inthlak nghal ti ila ka sawi sual kher lo ang. An boruak rawn ken luh chu a uap a, nui ri hriattur pawh a awm zui lo. 

Faith-i chuan a phone a lek kang va a, a mi biakin, "Hman ila chu ka lokal ve ngei ngei ang" a tih chuan a nui hak a, "Lokal ve la ţha tur. Mampuii te hian an hmu ve chak che a, nakinah la bazar ho ang u an ti" a ti lang lang a, phone aţanga nui ri lo chhuak aţang chuan Rita-i ngei niin ka hria, min runluih nan a ka hriat tura rawn be vel an nih ka ring bawk. 

"An â em a nih saw..engahmah ngai suh" ka beng zawn a phun sup pahin Nicholas chuan ka biangah a fawp a, ka dul a hmer zauh hnuah "Ka lokal leh vat ang" a ti a, Faith-i chu pan hnaiin a darah a hmer a, choka aţanga a kal chhuah pui hlawk hlawk lai chu kan en reng a, dan buai ka tum lo a, inrawlh lo ila a ţha ber ka la ti fan a ni. 

Engmah pawh ka zawt lo nain Faith-i tum bur reng danah a hau a nih ka ring a, hei tak hi Nicholas ka fak ve na lai a ni. A hnena ka vui apiangin a chhungte ţhatna lam a sawi a, zah turin min ti a, a chhungten a hriat laiin ka chhiatna lam an sawi thei hauh lo bawk. An hriatah ka thlavang a hauh a, ka hriatah a chhungte thlavang a hauh a, Faith pawh a hauh tih a hriat reng laiin kan hmuh laiin a hau hauh lo thung. A laiah a ding thiam a, thinrimin thil a ti rum rum ngai lo. Hma hun chu ka sawi thei lo, tunah chuan ka fak ve rih khawp mai. Anthony ai pawhin a puitling daih zawk. 

Patea te haw tur chuan an ko hrang leh a, pawnah kan ding ţhap a, kan dinna piah deuhah muk deuhin kan hriat ve loh thil an sawi pui a, Nu Hlimi leh Pi Thari an tel ve avangin thil ţha vak an sawi ka ring lo. 

"Kan inah lo awm daih rawh" tiin Nopuii chuan Faith chu a sawm a, Hope erawh chuan ka banah kuahin min hnaih deuhah a ding a, a kut lehlamin Faith banah a kuah tel tho bawk. Tumah hi a en hrang ve lem lo a, a thin pawh a rim tawh lo a nih hmel. 

"Nia..kan in ka nin viau chuan ka lo awm daih ang. Nakinah Rita-i te nen kan bazar dawn kha aw..nikhat class kan ţhulh a ngai ang. Hope, i lo tel ve dawn em?" ka hriat tur ngei hian a ti a, a ngawi reng a, Mampuii te unau lah chuan an chak tawh thu sawiin an phul hlut a, "U Saii hi kan hruai ve dawn mi? Mahse, thawmhnaw pa deuh deuh min leipui awm sia" ti a meinei deuh a min fiam chuan ka lo nuih liam mai a, en liam chin neih loh chuan kan ri bur bur reng mai ang. 

Ka duty chu ka chau lehpek khawp mai..dawhkanah rem leh rem loin ka bawk zawn zawn reng a, patea te chhungin chaw an lo ei aţang pawn kar a liam hnem leh tawh. Buaina lian tham kan neih loh laiin neuh neuh chu a awm reng a, inchhung boruak hian min ti chau hluah hluah a ni ber. 

"Tunlai chu i zawi riau mai. Dik lohna i nei a ni lo maw? Doctor a la awm a, in entir rawh" ka hnunga chul paha Nghetin a tih chuan, "Ka peih lo. Ka chauh chhan chu i hrethiam mai lo mi?" ka ti let a. 

"Hrethiam tho e..mahse nidangah pawh buaina chu in nei reng a, tun ang hian i chauh pui ngai hleinem. In inneih hma pawn ka hrilh lawk che kha, mi ţha an ni lo ka tih kha" a tih chuan, "Tualthah hmang pawh nise duhthlan tur ka nei chuang hleinem. Ni lawm ni?" ti a zawh pahin ka mithmul ka san ralh a, thaw hap chung hian a lo bu nghat a, min khawngaih hmel viau thung. 

"Mo nih hi namai lo deuh a sin. Kei phei chuan pasal neih tih vel hi ka la ngaihtuah chhin lo reng reng. Mo kan nih vang hrim hrim hian ho te teah dem kan hlawh a, mo sual chu an awm na meuh mai, mahse kan mona te ah hian thui tak chu a innghat a, an lo sual viau chuan ţhat bik reng a har a, an fel miau chuan sual luih tlat a har bawk ang a" a ti charh charh a, "Sual lui tlat, an pasal te lak hran tum, a ţha lo zawnga fuih ching hi chu dem vak vak mah ila a pawi lo, mahse, mo tih vanga ho te te a mi dem kan ching ngawt zel hi chu a dik lo" a ti leh a, ka ngawi rauh rauh a, eng eng emaw ngaihtuah kualin ka ţhu chhuak thut a, ka ţhiannu pawh ka ti phu nasa khawp mai. 

"I mawl em ni a?" tih vak pahin ka hnungah a beng thlawrh a, "Ngheti, ka period lo a nia aw. Thla hmasa tluan khan ka period lo a nia" hlauthawng taka tih pahin a kut pahnih ka vuan chawt a, "Ka hrechhuak chiah...enteh, ka rai em mawni le?" ka ti leh a, ka thinphu pawh a rang kher mai. 

"Aniang..i hrisel ţha a, rai lo la chu i period a tawp thut lo ang. Test kit ka va leisak dawn che mi? Ngawi rawh lei kher ngai lo pawn gynae ward ah pawh a awm ang. Tikhan lo awm rawh ka va zawn sak ang che" tih leh thawh a rual a, hmeichhiain nau an pai hian mipa an nu hah a, an chau ve nghulh ţhin tih te ka hre ve a, mipa zawng zawng ni vek kher lo mah se Nicholas ka call a, "Ka nupui hi a khua a har leh tawh em ni?" zangkhai vahin a la ti zui a, a chauh loh hmel nasa mai, ka inringhlel rum rum zawk alawm le. 

"I chau nghulh em?" ka ti thawr a, nurse ka ni a, thil chinchang ka hriat tho rualin test hmain hriatchian ka chak a, ka test ve si ang a, ka hnual leh lawi si ang tih te ka hlau. 

"Chau nghulh nang" thum deuh dut hian a rawn ti a, thil dang nuhah awm dan ka hre bik bawk si lo, "Pangngai lo deuhin i awm em? Ka sawi awmzia chu danglamna i nei em?" ka tih chuan, "Nei lem nang..ka ţha alawm min ngaihtuah suh" a la ti tak deuh deuh a, a ngaihna a awm hlawl lo a ni. 

"Ka dah phawt mai ang. Duty zawh hunah ka rawn be leh dawn che nia" ka tih rualin Ngheti pawh a lo thleng a, test kit chu min pe in, "Va ti lawk rawh. Luhpui i ngai em?" phur tak hian a ti a, lu ka thin hnuah zunin ah ka lut a, ka test ta ngei a, ka nghah chhung te chuan ka tha te a khur thei hial alawm le. Nau ka pai chuan ka chhungten min duat ve deuh ang a, min huatna pawh a reh ve tial tial ang a tih te ka ngaihtuah a, rai hlauh ila ka ti kher mai. 

Test kit ka humna kut chu a khur deuh der der a, Ngheti ka entir ve chuan thawm a ţha kher mai. Min kuah chuk chuk a, keipawh chu ka ţap lo chauh a ni. Ka chhungte an danglam phah ngat phei chuan, chu tluka hlu chu a awm lo. 

Nicholas hrilh hlan ka nghakhlel tawh a, a lo haw hun nghakin pindan chhungah chuan ka vei kual sek a, test kit ka hum ran reng a, ka thinphu pawh a mumal hleithei lo, a inthum rawn tluk tluk reng a ni ber. Chawhnu lam duty ka nih avangin in ka thlenna a la rei bik lo a, chuti chung chuan nidang zawng aiin a lo haw harin ka hria. 

Pindan chhung a lo luh rual chuan "Hmuh tir tur che ka nei" ka lo ti var a, "Eng thil nge?" a tih veleh a kut ka la a, test kit chu ka hmeh bel chawt chawt a, en vung vung pah hian, "Hei hi eng nge?" a ti a, a mitmeng danglam chu ka hmu reng a, ka thil pek chu eng nge a nih a hria, a hamhaih ve chiang a ni. 

"Hrethiam lo der suh..ka rai tihna a nih hi. Nau ka pai alawm" phur deuh a ka tih chuan, "Ee...." a ti ban charh a, thil dang engmah a sawi lo. 

CONT..