HIS LAST LOVE-22

HIS LAST LOVE-22

"E..i ti ringawt a, eng nge awmzia? I lawm ve lo em ni a? Fapa ka neih chuan i ti ţuah hum reng a ni lawm ni?" towel a ban a, a darah a bat liam a, ka test kit pek kha a la hum ran reng a, a awmdan chuan min ti thinur khawp mai.

"Ka inbual harh phawt anga kan sawi leh dawn nia" a tih phei chuan ka pan hnai sawk sawk a, a zawn ka thlen rual a a kawr a pawh sawk pah hian, "I lawm ve vak lo tiraw? I la tlangval chak em ni a? Fapa kan neih chuan i tih duah ţhin kha chu ţawngkam ţha mai mai tiraw? Awii...i hmelchhiat zia hi" ka ti hlak hlak a, ka thinrim lutuk chuan sawi tur ber pawh ka hre lo. Ka rilru a awm awm ka sawichhuak phawng phawng a ni ber. 

"Lawm e...chuvang chuan inngaihtuah harh lawk ka duh. I hmuh lohin bualin chhungah ka Sdo dance lo ang tih tunge sawi thei" hmel pangngai reng hian a ti a, a kalsawn nghal nul nul bawk a, ka rai tih ka hrilh hnuah nui hmel a la pu lo reng reng. 

Khumah ka ţhu hnawk a, rilruah thil chi hrang hrang a rawn lut a, khum puan phah thai neuh neuh pahin ka pasal awmdan chu ka ngaihtuah rauh rauh a, a awmdan khan min ti lawm hlawl lo a ni. Sawi tur a hriat loh pawhin nuih ve tal tur a nia. Tunlai ka awmdan a danglam ka ti reng a, tui ka tih deuh ţhin ei duh tak miah loh te ka nei a, ka chau thei bawk si, ka taksa a danglam awm pawh chiang takin keichuan ka hria a ni. 

"I thau deuhin ka hre reng a ni" bualin aţanga rawn chhuah paha a tih chuan ka melh zawk a, boxer a ha ve tawh nain kawr a la ha lo a, khua a vawh tawh tehreng nen, towel a lu a hruk lai chuan ka hawi sawn a, sawi pawh ka sawi peih tawh lo. 

Thlang lam bathlar a towel huh a zar leh te te hnuah hoodie sen duk a ha leh tawp a, ka hmaa a rawn ţhingţhit lai te chuan a sam chu a la hnawm chap a, nidang angin ka lo khawih sak lo a, hria ang pawhin ka awm lo. 

"Engtin nge i awm?" ka malchunga ka kut dah a rawn vawn lai chuan, "Ka thin a rim" ka lo ti hmak a, a thaw ri hawk a, tih vak ngaihna a hriat loh hmel khawp mai. 

"Ka hlim alawm. Ka hlim lutuk a sawi tur ka hre lo zawk a nih kha. Min ţhawng a, a ţha chiin" a ti dam vei thlup a, "I hlim hmel ka va hmu si lo ve" a mitah ka en ran a, a mit khap te chu a ban deuh charhin ka hre mai. 

"Nang aiin ka hlim zawk daih maithei a ni" a ti a, tawi tein a nui a, ka kut chu a vuan nghet sauh bawk. 

"I dawnsawn dan kha a mak em a, i duh lo emaw ka ti hman alawm. Ţah te i ti chhuak a, zuau deuh phei chu ni ila ka ţap ang chu" ka tih chuan inthiam lo hmel pu chung hian a hmui hnuai lam a seh sauh a, eng emaw sawi tumin a ang leh zuau ţhin a, sawi tur mai a hre bik lo ni awm tak a ni. 

"I ţap lo tiraw?" a ti leh tawp a, "Ţah loh hi...ka chau" ka tih rual chuan ka bulah lo ţhu chho vein, "Khawi, ka lo mutpui ang che" tih leh min kuah a rual a, "Ka mu hman hleinem. Rawngbawl a ngai alawm" ka tih chuan, "Ngaihven suh" a ti a, khuma a mut rualin keipawh chu min kuai mu ve a, a ban ka lukham a, a kut awl lam chuan min kuah betin a âwmah ka hmai ka phum a, a rimtui hman rim chu ka hip vang vang a, a hrehawm lem lo khawp mai. 

"I thinphu a mumal bik lo a ni maw?" ti a zawh pahin a awm chu dimtein ka khawih a, a phu rang a, keimah ang chiahin, nau ka pai tih ka hriat hlim ang chiah khan. 

"Ka lawm vang a nih kha. Ti khan i hrethiam tawh em?" a ti a, ka chhipah a fawp vang vang a, tuna ka hlimna ang hi vawikhatmah ka la tem chhin ngai lo a, hetiang tak hian a lo hlim theih ang tih pawh ka hre lo. Ka chhungten ka chunga an rilru put hmang an thlak phah ngat phei chuan a lawmawm lehzual viau ang. 

"Ka hmangaih lehzual sawt che" a tih chuan ka dak chhuak a, "Nau ka pai vang chiahin min hmangaih aniang a hma zawngin i sawi ngai hleinem" ka ti ve kher a, chil a lem zawngin a hrawk bawk a che ralh a, zam hmel a pu ve ngei bawk. A awmdan hi amah nen a inrem hlawl lo a ni. 

"A ri loin ka hmangaih che alawm" a ngawih vang vang hnua a tih chuan ka nui hak a, a dangdai thei mai bawk si. 

"Thawm dim deuhin ka hmangaih che" a ti a, a nui zui hawk a, "Ka hmangaih che a, chuvang chuan ka hmuh phakah awm reng ang che" a tih zawm leh a, tunah tak chuan kal bo rawh min ti mah se ka kal awm tawp si lo a. 

"I hmangaih hmasaber kha hmeichhe dang daih a ni a, mi first love han nih hi chu a lawmawm ve riau a" a rilru hriat tuma ka tih chuan, "A hnuhnung ber i ni tho alawm. I ni reng dawn bawk. Hmangaih hmasaber ai chuan a hnuhnung ber hian a daih rei a, a hlu fe zawk" tiin ka hriat duh tak chu a sawi chhuak a, tumah ka thik hran lo, a tana ka hlut ve zia hriat ka chak mai zawk a ni. 

Inhnuaia kan chhuk chuan Nu Hlimi a lo ang a, "Tih tur a tam thei si. Hmeichhia tam viau siin ti tu tur kan awm ngai bawk si lo. Hmarcha ka leikhawl sa te hi pickle ah ka siam ang ka ti a nia ka hman leh dawn lo a nih hi. Phir te lah lehkhazir an ngai a, Kungtei nen chauh chuan engkim kan ti vek seng lo" a ti hlaih hlaih a, inthlahrun a na duh ţhin khawp mai.

"Eng eng nge tih la ngai? Ka lo ti ang" ka tih chuan, "I chauh em kha. Lo ţhu hahdam la keiman ka ti mai ang" ka pasalin a tih chuan Nu Hlimi chuan tur fe hian a melh a, "Engmah ti ngai mang si lo eng nge i hriat a?" a ti a, mak ti hmel te pawh a pu deuh alawm. 

"Pâtei hi a chau a, chhawr vak chi a ni lo. Tih tur chu sawi rawh, keiman ka ti mai ang" a ti nawn leh a, a thutak run bawk si, Nu Hlimi a meng phawk tawh nasa mai. 

"Kungtei nen kan ti deuh vek alawm. Saii hi a duty zawh hian pindanah a tawm bo daih zel a, a inthlak zawh veleh lo chhuk nghal sela, min pui ve ţhin sela ni tur a nia" a ti nang nang a, ka sawi fo ţhin ang chiahin ka awm lai pawhin ka chanchin chhe lam an sawi bawng bawng tho zel a, awm ve lo ang hmakah min ngai a, keimah hrim hrim hi engvakah min ngai lo a ni ber. Hmusit tih ţawngkam hi hman a nuam lo viau nain min hmusit ni berin ka hria. 

"Tih tur a awm tawh loh te chuan ang chiam zel kher lo la, tih tur a awm chuan ţha deuhin sawi mai ţhin rawh" a tih chuan, "I nupui hi i ţan leh lutuk a, i duat a, i duat sual zo vek tawh a nih hi. Fanu ang chiahin ka en a, hauh a ţul chuan ka hau ve bawk ang chu. A hriat a ka an ngam chuan ka pawh hle tihna a ni mai" a lo ti hlak hlak a, a awm ang viau zel tho bawk si a, a ngawi hmasa zawkah kan ţang leh nge nge ţhin. 

Kan awm kim laia ka naupai thu kan sawi chuan Hope a lawm thiam ber a, "Ka mumang a thleng dik a nih hi. Hmanzan ka mumangah naute in lo nei alawm" tiin min kuah chuk chuk a, min hlat hleithei lo a ni ber. 

"Duhtawk teh Hope..i u Saii hi a nuam lo a nia" ka pasalin a lo tih te chuan, "I over emai..ka lawm ve a nih hi. A nuam ka ti e, krismas present diktak a nih hi" a ti chul reng a, min kuah a, min sawi nawk nawk reng mai. 

"In enkawl ţhat a ngai a nih chu. Hna thawk hah lutuk lo la, doctor rawn reng bawk la, damdawi ţha nen, naute hmelţha deuh nei rawh u" Anthony pawhin a lo ti ve a, Pa Chhawna meuh pawn min chibai lo chauh a ni. 

Nu Hlimi erawh chuan, "Tun anga kan changkan hma pawn nau kan pai a, hna kan thawhpui lawp lawp alawm. Nawm loh te, chauh te chu naupai hian a keng tel ve a, kan haider mai zel. Kan tih tur kan ţhulh phah ngai lo. Tunlai mi hi chu in zuau leh lutuk a" a ti a, min lawmpui angin a awm ve lo a, an sawi zui reng te chu a nin hmel mah zawk. Mo dang neih a chak ngawih ngawih laia nau ka pai daih vang te pawh a ni mahna. Kan inneih hlim kha chuan rai vat se min ti ţhin a, a ţhiante hnenah pawh tu a awh thu a sawi chamchi ţhin. Mahse, Rita-i a lo lang a, Nicholas a atchilh zia a hmuh hmaih lo a, an hausa tih a hriat hnuah ngat phei chuan kei aiin a duh zawk a, mipain nupui an neih hma lutuk chuan tlangval an kham lo a, fa hi neih vat duh loh tur tih zawngten ţawngkam a nei ţan a, ka pasal nen hian inţhen ila chu a lawm zawk ang tih tur a ni. 

"Nuam lo chung chunga chet te chu a hrehawm awm emai. Kan awl thei alawm, U Saii chu indim rawh se" Hope in a tih laiin Faith chuan, "Mut mai mai theih nan a remchang alawm. Ka nuam lo a ti mai zel dawn a" nui hak hak chung hian a ti a, inchung chhohna kailawn bulah bang nghengin a ding a, phone a hmet mawlh mawlh reng a, Rita-in chanchin a hre ve leh daih tawh maithei a ni. 

"I buaina chiah ngaihtuah rawh ka tih tawh kha. Mi kher zawnga ţawng fek fek hi ching tam suh" tiin ka pasal chuan a lo khap a, thinrim a sawi pawh a nih loh laiin Faith bawk chuan, "In nu hi i ţan ve sia. Ka thu hriat ka sawi vek hnuah pawh i la ţan tho a, i mawl ve ngawt mai. I fa a ni chiah maw?" a ti a, kan buai leh dawn chiang a ni. 

"Eng maw i sawi?" bul zet a tih pahin Nicholas chu a ding a, Faith dinna lamah chuan a pen phei pawk pawk a, thil thleng tur hrethiamin an umzui vat reng a ni. 

"I fa a ni em ka ti mai a nih kha" Faith-in a tih rual chuan a kawr awmah ţhamin a sawi nawk a, ka lo ip ve chawih mai. 

"Fiamthu a nih kha..thlah teh, hetiang zawng chuan ti tawh suh u ka zo lo ţhin" tih pahin Nu Hlimi chu an inkarah a tla zep a, mipa leh hmeichhia an ni bawk a, an inkhawih nat palh an hlau aniang Anthony a inrawlh vat bawk. 

"Khatiang zawnga ţawngkam i nei leh a nih chuan i inchhir khawp ang. Hmeichhia i nihna khan min dal dawn hauh lo" tiin a nau chu a vau a, Faith-i sual leh lutuk hi mak tih zawk chang ka ngah mai. Hetiang em em hi chu mihringah an awm theih ka ring lo a ni. 

"Lokal teh...chho tawh teh ang" tih pahin ka pawt hrang a, "Ching tawh hlek suh ang che" sehchilh zeta a tih leh takah chuan a kawr bana pawh pahin ka en vat a, Faith ngawt chu a lo la en a, a mitmeng a dur khap a, ka dawm bet chung pawhin a la in humruh a, a beka thisen zam pawng ţawlh ţawlh khawpin a insehruh a, an inkarah midang tlazep vat lo sela chu kut a thlak ngei ngei ang. 

"Inbengdai teh Nicholas..upa zawk i nih kha" thupe aw zeta Pa Chhawnan a tih takah chuan ngaihngam deuhin ka thlah a, thil thleng thut chu Faith chuan a hlau tih hre mah ila ka khawngaih lem lo, a ţawng thei em a, tuman an ti na thei lo emaw a inti a, a cho chhuah liau liau ka ti mai. 

"In rapthlak emai..kan inchhung hi zu hmun ang mai a ni tawh. Tunhmain hetiang thil hi a thleng ngai lo, kan inhau ngai lo a, in unau pawh in in nghir ngho ngai lo. Tunah lah nitin deuhthaw buaina a awm a" Nu Hlimin a tih lai chuan, "Kal ang" tih leh min kuah a rual a, pindanah min chhoh pui ta daih a, ka naupai lai meuh pawhin a ti lawm zo ngang lo chu a ni. 

"Insiam rawh" pindan chhung kan luh ruala a tih chuan phawk deuh hian ka en a, "Khawiah nge kan kal dawn?" ka ti ha a, ka hlauthawng bawk. 

"Kan chhuak dawn. Hotel ah awm ila, hotel aţangin inluah tur zawng ang. Ţhian ka ngah a, kan hmu har lo ang" a la ti hluk hluk a, a thinrim takzet aniang a mit leh hmai te chu a sen deuh ang tlatin ka hmu. 

"Thinrim a thil tih rum rum a ţha ngai lo a nia. Ka pa'n min dang tho ang. Kan chhuah a hlau a, chhung inkhawm naah lah a sawi hmaih ngai mang lo a, a remti lo ang. I hrevek alawm" ka tih chuan, "I tuar reng peih em ni a?" vin zet hian a ti a, ka phu dawrh lo chauh a ni. 

"Peih lo mah ila tih theih vak a awm chuang hleinem. Tunah pawh chhuah tum chiah mah ila thih tha takmeuh pawhin min dang duh ang. He in a min awm tir reng a duh tlat chhan hi hre lo mah ila eng emaw thil lian tham tak vang chu a ni ngei ang. Kan mualpho loh nan chhuak lo phawt ang" ka tih pawhin, "An kal thui mah mah tawh. Insiam rawh" a ti nghet churh a, a luhlul nasa mai si, hnial chi a ni lo tih hriain bag lian vak lo ka lachhuak a, mut kawr leh inthlakna chiah ka dah a, a thawmhnaw, zanin a hakthlak tur ka dah tel bawk a, hotel a riah chhuah tum chauh kan nih avangin thil dang ka thun tel lo. 

Inhnuaia kan inzui thlak leh chuan Pa Chhawnan, "Khawiah nge in kal dawn?" a lo ti chiah reng a, kan hmaah a ding a, Anthony a mitmei zeuh pawh chu ka hmu ru ran a ni. 

"Kan chhuak dawn. Awm ho tawh lo ang u. Inţhen hrang ila kan inrem zawk ang" tiin ţha deuhin a chhang ve mial a, hlawh kan nei ve ve a, in luahman tih vel chu ka lungngai hran lo, mahse chhuah an phal dawn lo lutuk hi ka buaina ber zawk a ni. 

Rin ang ngeiin, "Chho rawh u..tumah in chhuak lo ang. Faith, i ute nupa hi ngaihdam dil rawh" khauh zet hian a ti a, Nu Hlimi malchunga bawk tlat chungin Faith-i chuan, "Ka thiam loh pawh a nih loh kha. U Nico kha a thinrim vak ringawt a, fiamthu bakin ka sawi lo" a ti zat zat a, a rukin ka pasal kut ka vuan a, a thin a thawk leh thut ang tih ka hlau a ni. 

"Ngaihdam rawn dil rawh ka tih chu. Nicholas, nangpawh khawiahmah kal suh ang che. Ka fapa naupang zawk i ni a, he in hi i ta tur a ni. Hetah hian i awm reng ang" tih thlengin a sawi tawh a, diktak chuan Pa Chhawna chu ka khawngaih zawk. A aw a manganna tel kha ka hriat hmaih lo a, a thlabar hmel bawk nen, kan chhuah a hlau takzet niin a lang. 

"Ka dil dawn bawk lo" Faith lah chuan a ti tlat a, Pa Chhawna zawk chu an ţhutna lamah a kal phei a, Faith-i samah chuan a ţham ta mai a, a pawh thawh rualin a sama ţham reng chung chuan a hmaiah na zetin a beng a, kan dinna lamah a rawn hnuk phei dawr dawr mai. 

"I ute nupa hi ngaihdam dil rawh" a ti leh a, Faith chuan ţap chungin ngaihdam min dil a, inchhung boruak chu a ipikin a uap churh a, luak a chhuak nghulh thei a ni. 

"Umm..ti kha chuan in pindanah chho ula, tumah thinrima in chhuah ka remti lo" pangngai tak hian a ti a, englai pawha phir te thlavang hauh ţhin tu a ni a, heti taka kan chhuah a hlau hi chhan ţha tak a awm ngei ang. Chhungkaw tinte ang bawkin thuruk an nei ve chiang ang. 

Ka pasal muhil hmel chu ka enreng a, a duh lo chung pindanah ka chhoh luih pui ta kha a ni a, chhuah a, in luah tur zawn ve daih duh viau mah se Pa Chhawna kha ka khawngaih tlat a, a mak lutuk, a hmel ka en khan ka chhuak lui thei thlawt lo. Kan nupa pawh kan inhauh phah reng a, rei ngial ka beih hnuah ka pasal hi ka bengdai thei hram a, kan mu ta chauh kha a ni a, a muttui viau tawh chung pawhin ka la muhil thei der lo. 

Ka dul ka chul ka chul a, a la puar lo nain ka fa ngei a insiam ţan mek tih ka hriatna chuan rilru a ti hlim deuh a, mahse, a pian hma hawt aţangin hetiang buaina hi kan nei ţan a, khawvel eng rawn hmuh a, he inchhunga seilen hi a chak kher lo maithei a ni. Pa Chhawnan Faithi kut a thlak phei kha chuan ka rap lutuk a, khatiang thil kha ka naute hmuh atan hian ka duh lo bur bawk. Kan chhungkaw buaina hi a lo pian hma ngei a chinfel a, chhungkaw boruak nuam tak hnuaia seilen tir ka duh a, chinfel dan ka hre si lo a ni. 

Ka muhil thei hlawl lo chu thlang lamah ka chhuak a, thla eng en a boruak vawt tak ka hip vang vang lai chuan, "I muhil thei nange?" a rawn ti a, Anthony a lo ni reng mai. 

Kan pindan dep chiah hi a pindan niin a aw lo chhuahna lam ka hawi chuan bang ngheng a ding chung hian min lo en reng a, "Aw..ka harh telh telh a" ka tih chuan a kut kuangkuah chu phelhin ka dinna lamah a lokal hnai a, sawi tur a vang bawk aniang kan ngawi dun rauh rauh a, thawm hriat tur a awm tawh mang lo a, kan thaw ri ringawt pawh a ring duh khawp mai. 

"Mal viauah a in ngai a, amah hnaih tu, mi rinawm, a hnaih a awm reng thei ni a a ngaih chu a ngaina nghal mai zel. Ka pa'n khauh deuha a enkawl vang te pawh aniang, hmangaihna dawng ve ngai lo ah a in ngai a, a kianga i awm tak rengah chuan amah ai pawhin a dah pawimawh tawh zawk che a nih hi" a tih laia amah ka en chuan ka lam lo hawi pahin, "Nicholas" a ti sup a, a mal bik zia chu ka lo hre daih tawh alawm. 

"Mahse ka pa hian a hmangaih alawm. A fapa a ni miau a" a tih leh takah chuan phawk deuh hian ka en a, "Chhuahsan suh u. Faithi leh ka nuten kawhmawh an bawl a nih pawhin chelh la, dang tlat rawh. Ka pa hmuh phak lohah kal bo pui suh. Kan thil neih zawng zawng, kan sumdawnna thlengin Nicholas hmingin a dah vek" a ti a, ka ngaihbel nge a mitmeng chu a thim deuh ruihin ka hria a, an awmdan hi ka hrethiam lo tulh tulh mai. 

"Nicholas hian engmah a hre lo tihna em ni?" ka tih chuan, "La hre lo...a hre thuai ang. Keipawhin tihpalh thil takmeuhin ka hmu chhuak a, i pasal hi ka nu nau laka a fa a nih hi" a ti ta mai a, chhut chawrh ang mai a ni. Nau pai ţan tirh, a hrehawm zual lai a ni bawk nen, kan boruak teh nuaih chu ka zo lo lek lek a ni. 

"Buaina kan nei mek a, la hrilh rih lo mahla a pawi lo. Ţul a tih hunah ka pa hian a hrilh mai ang. Chhuak tura ka duh loh vang chauh che u a hrilh hre ve che ka nih hi. Engpawh thleng se i pasal hi dang bet tlat rawh. Dawt ka lo hrilh tawh maithei che a, tunah chuan thudik chauh ka hrilh che" a ti a, tlak dal inkham phei chu nghet zetin a hum a, a inpetruh nasa in ka pasal chu a thik ta emaw tih mai tur a ni. 

"Kan chhungkua hi chu engtikahmah a nuam ve thei ngai lo ang. Inthliarna a nasa a, nu leh paten duhsak bik an nei a, an lantir bawk. Nicholas hi an en hrang deuh emaw ka ti ţhin a, ka pa lehkha dahţhat ka hmuh aţang kha chuan ka pa hian kan hmuh tur chauhin a en hrang a, a ruk tak chuan a duhsak ber a, a hmangaih ber tih ka hriat phah a ni. Thlei bik an nei tlat a, ka nu leh pa an in hmangaih bawk si lo, boruak a ţhat beisei suh. A chhe tial tial zawk maithei a ni. Ka pa hi thi se chu kan darh huk ang, chu chu kan hmasak awmchhun a ni mai. Kan awmkhawm reng thei dawn lo, kan la keh darh dawn tho tho" a tih te chuan min ti hlau a, kei mai bakah ka naupai mek bawk hi a ni ka ngaihtuah chu. 

"Mahse nangni chu in vannei a, fate rau rau ah pawh thlei bik nei ka pa hian tuna ka huan enkawl lai chauh tih loh hi chu in hmingin a dah vek. Kan sumdawnna, ka patean a enkawl mek thleng hian. Ka patea pawh in hnuaia thawk ang a nih chu" a ti a, kal mai a tum chu, "Zawh duh che ka ngah mai" ka ti a, min ngaipawimawh lo zet hian, "Muttui" tiin tawi tein a nui a, a pindanah a lut ta daih a, thil awmdan hi a mak chho tial tial mai. Huan leh an sumdawnna mai bakah ram an nei nual tih ka hria a, engtin nge an neih theih bik ka hre lo a, ka ngaihven lo bawk. Ka buaina ber zawk chu an chhungkaw maksak lutuk hi a ni, buaina lian tham a awm apiangin thuruk eng emaw tak hriat tur a awm zel a, Anthony meuh pawh kha ka ring leh tawh lo. 

Zing ka thawh chuan Hope leh Kungtei te chiah inhnuaiah ka hmu a, min biak duh ka rin loh nen Hope chuan, "Thingpui ka lo siam ve ang che aw" a ti dam thlap a, buk nghat pahin chair ka pawt tawlh a, dawhkan chu ka kil a. 

"Faith kha a ţha em?" inthlahrung angreng taka ka tih chuan, "Ţha ang...tikhan a sim deuh ang chu. Duh aiin a ţawngtam mah mah zel a, ka pa ngaihtheih loh chin a thlen ka hlau reng a" a ti mai a, "Nizan i mu ţha thei em?" tiin min zawt zui zat bawk. 

"Aw...mu thei a ni mai. Midang an la tho ve lo mi? Ka nu te pawh" ka tih chuan, "Aw..ka nu chu Faithi pindanah a mu ve a, an tho tlai dawn aniang. I chawhma dawn tiraw? Chaw ei hma ang aw keipawh kal hma ka ngai a, kan kal rual dawn nia" a ti siam siam a, kan boruak khan a nghawng ve miah lo anga awm a tum nain chawhmeh a chan lai te chuan a thaw leh halh ţhin a, a ipik ve takzet tih chu ka hrethiam mai. 

Nicholas pawh ka kaitho chawp a, a bula ka ţhu chu min pawt thutin a awmah ka bawk rawk a, "Kan rualin Hope a kal ve dawn a, tuk dang aia kan kal hma a ngai ang. Thawh i hai a nia" a sam chul paha ka tih chuan, "Faith-i a tho tawh em?" a ti a, ka rindan vel a ni. A thinrim a reh chuan a ngaihven leh ka ring sa hrim hrim. A mak hran lo, thisen zawm, unau an ni a, thisen hi chu a chak khawp mai, inhau fo mah ila kan inhmangaihna a nep phah ngai chuang lo. 

"Tho lo..Hope leh Kungtei chiah" ka tih chuan, "I tho nuam em?" a ti leh ta daih a. 

"Aw..nangpawh tho ve tawh rawh" tih paha thawh kan mai ka tum chu min lo kuah lehin ka sam a chul thuak a, "Anthony hi engahmah a inrawlh dawn lo a, rorel dan tur pawh ka hre zozai tawh lo" a ti zuai ruih a, ka khawngaih reuh khawp mai. 

"Ngawi tawp rih mai rawh. Tun ţum chu ka pa'n chinfel dan a hre mai ang. Thinrimin thil a ti rum rum ngai lo ka tia ka fak ve tehreng che nen nizan khan i insum zo lo a, tun chinah chuan ching tawh suh. Anthony a inrawlh duh loh phei chuan rilru fim put tum tlat rawh" ka ti ve mawlh mawlh a, "Ka nau kha a ţawng chuang tlai em a, ka insum zo lo a nih kha. Ka pa hi midang chungah ţuan zel lo se chu kan chhuak daih tur a nia. A thleng nawn tawh lo ang" ka hnungzang a chul hliau hliau paha a tih chuan Anthony thusawi kha ka hrechhuak a, a pa'n a hmangaih bik zia hria se engtin tak ti ang maw? 

A ţhut chhuah rualin kawr ka lo pe a, "Chaw ei leh insiam a ni mai keichu" ka tih lai chuan mak tih hmel tak hian min lo en a, "Chaw lo eichak i nei lo em ni?" a ti hu mai. 

"Nei nang...eichak vak ka nei rih lo. Eichak loh chu ka nei a" ka tih chuan ka kawr chhungah zen lutin ka dul a khawih a, "Lian vat vat se a ţha ang. Naute lian pui kan neih theih nan thil ei ţeuh ţeuh rawh" a ti leh hem tawh mai a, a thu ve thei bawk sia. 

"Han mu leh lawk teh" tih pahin min nam mu a, ka kawr chu ka nghawng thlengin a hlim chho a, min en chik lutuk chu a nuam lo lek lek a ni. 

"Eng nge i en a?" ka tih chuan, "Kan naute ka en a nih hi" a ti mai a, rawn kun hniamin ka dul chu a fawp vang vang a, lungawi hmel taka a ţhut ţhat leh hnuah ka kawr pawh chu a pawt thla leh thlap a, "E...khawimaw bra ka la hlim chho tel lo, kha pawh kha ka en duh" fiamthua a tih lai chuan rang deuhin ka inbeng kang a, ka ţhuchhuak tur chu hnunglam aţanga min lo pawm betin ka tukhumah a fawp a, a lam ka hawi rual chuan ka chalah a lo fawp leh nghal chat bawk. 

"Min ngai viau zel suh" tih hlak pahin a hmuiah ka hup a, a nui tih ka hre thei a, min en ve reng chung hian a hmui ka hupna kutphah chu a liak a, ka la sawn rang khawp mai. 

"Ţawp lutuk mai" ka ti vin hlar a, ka kut phah chu a âwmah ka tat a, a lo nui hawk hawk a, kan nupa pindan chhungah na na na hi chuan boruak a chhe rei ve vak ngai lo. Ti hian kan chhuak ang a, boruak uap churhin min lo hmuak leh ngei awm si a, a huphurhawm ve thei a sin aw. 

"Kan inneih hlim khan ka nu'n Nicholas nen hian in anna lai in ngah lutuk a tia" ka tih chuan, "Keimahni ang chiah fa kan nei leh bawk ang ti rawh. Vawiin ah i hrilh ve dawn nia" a ti a, kan in anna lai tak erawh ka hrilh duh kher hran lo. Kan pa ten min enhrang bik emaw kan ti ve ve a, min lo hmangaih hle si, Pa Chhawna leh ka pa pawh hian min hmangaih a nih te chuan lanchhuah tir hreh lo se a dik vek ni mai tur. 

Ka insiam lai chuan hahdam deuha khuma ţhut awn dar dar pah hian min lo en reng a, eng nge a ngaihtuah ang ka tih rilru lai mekin, "Pâte" a ti thum leh dût tawh a, a lam ka hawi vat a, thu pawimawh deuh a sawi ang chu tih nak laiin, "Nu in nau a pai hian a mi hmuh zin deuh te hmel ang hi naute in an pu duh an tia. Naute hmelţha deuh thlalak en ta se kha naute hmel ang deuh kha a fa pawhin a pu ve ang tih ngaihdan a awm ţhin. Mipa thawhpui i ngah a, tumah kha rei deuh en lo la" a ti mauh mai a, ka vawm chawrh lo chauh a ni. 

"Chutiang ngaihdan atthlak lutuk chu nei ve suh. In naupanlaia an tih ţhin dan aniang chu" ka tih pawhin, "Ka thlalak i nei em? I neih loh chuan khawi ka thawn ang che. Mipa i biak zawh apiangin an hmel hliah bo nan ka thlalak en daih zel rawh" tih pahin a tho kang uaih a, fing deuh tur a kan ngaih te pawh hian naupanchhiatna lai an lo nei tho a nih hi. Thikthuchhiat vang zawk nge pawh ka hre lo. 

"I ti mah mah deuh lo maw?" ka tih chuan, "I nau pai kha i la lap mah mah deuh lo maw?" a lo ti ve zat a, "Lak thutak viau dawn pawn a la puar eih loh hi" ka ti leh a, ka kawr ka hlim rual chuan, "I dul hmul tal a tho tawh ang, a ding tawh ang ka tihna" a lo ti hram a, darthlalang ah ka in en a, ka dulah lah hmuh thamin hmul a awm mang bawk si lo, hlim hmel a pu lo kha ka vui viau nain a ninawm ţan riau. 

"A nih chuan ka dulah hian oil kan chulh ange...a lo pian huna a sam a ro lutuk loh nan" amah runluih nan a ka tih chuan a lawm zawk mah emaw tih tur hian a lo nui hawk a, "Lip gloss te hnawih rawh a hmui a rep palh ang" a lo ti ve nghal zat a, kan han nui dun leh ţhin a, keini nupa hi chu miin over bik min ti mah se vui thei kan ni lo, kan over em a ni. Kan pahnih chiaha kan awm pawhin nuihpui vak vak theih thil tih tur emaw sawi tur kan hre tho zel. 

"Naute hmelţha deuh pa ka ni chak tawh. Lian thuai thuai la lo chhuak vat teh" ka dul zawnah a phun sup sup a, duat deuha a fawh leh hnuah pindan aţang chuan kan chhuak ve thei hram a, kei ai mahin a phur tawh zawk. 

Hope pawh a lo inpeih at tawh a, Faith leh Nu Hlimi erawh chu hmuh tur an la awm lo. Motor chhungah Hope a ţawng zat zat reng a, kan nuih pui nasa mai.

"Naute thawmhnaw tur hi lei nghal mai ka duh tawh" a ti thul, a phurin a nghakhlel khawp mai. 

Damdawiin a ka awm hnuah ka nu ka hrilh ve a, a phul hlut a, kan inbiak lai rengin a ţhiante a hrilh kual vel a, ka pum dawmin ka nui var var a, a pian hma hauhin mi tam tak hlimna a siam sak a, tunah la inpawh thei rih lo mah ila a pian hunah chuan kan chhungkua pawh kan inpawh phah ngei ka beisei tlat a ni. 

Ngheti lah chuan zawhna chhan sen loh min zawt a, kan thawhpui ten an la hre ve lo nain kan ţhiandun chuan naute chungchang hlir kan sawi a, a pian hma hauh aţang hian ka hmangaih hlur mai a ni. 

Luak chhuak ka hre ve ţan a, ka nuten chaw ei turin min sawm na a chhungkaw boruak a la rih em avangin ka hnial zel rih a, chhuanlam fahrah te te ka siam a, ka unaute phei chu an vui lek lek tawh. 

"U Sai, bawngsa ka siam a nia" phur zet a Hope in a tih chuan chaw ei hun ka nghahhlelh thu ka lo hrilh a, ka sa duh ber a ni a, Kungtei nen hi chuan an hre hneh tawh viau mai. Kungtei sawi takah chuan kan la inbe mang lo a, a ţul, loh theih loh a kan inbia tih lohah chuan kan inhel zak zak reng a, kei aiin nuam lo a tih hmel tawh zawk. Hrehawm ti taka min siamna kha hrerengin ka be duh bik lo a ni. Ka sual a, midang runluih ka hrat ka tih tawh kha, chhan awm lo a min be duh lo ringawt tu hi ka be chak rih hlawl lo. 

Mak deuhin bawngsa chuan ka luak a ti chhuak tlat a, ka duh ţhin tehreng nen chaw ei laklawh laiin bathroom lamah ka tlan chawn chawn a, ka pasalin min um zui vat bawk. 

Ka luak barh barh lai chuan ka hnungah a chul a, a chang leh a beng thak thak a, "I rai tirh aţang khan luak chhuak reng turah ka ngai che a, i pangngai rei lutuk a ka ngaih a ţha lo hman alawm" a la ti zui a, hmeichhe naupai awmdan a chhiar nasa a, a hriat tawh viau rualin hmeichhia zawng zawng kan inang vek lo tih a hre tel lo a ni. 

"Vawiinah doctor a lokal chuan rawn ngei ngei rawh. Nangmah chuan i ti lehpek lo ang, thlah pah chein kan rawn ang" a lo ti sek a, pathianni a ni chungin nikhat pumhlum lek pawh nupa in hun kan hmang dun thei chuang lo. 

"A hunah chuan ka rawn mai ang. Awii..ka thil ei rim kha ka ti thei hlawl lo" ka ti a, kam ka ţhuah bawrh bawrh a, ka duh vang liau liauin thiam leh thiam lo in Hope-in min siam sak a, ka hmaizah angreng khawp mai. 

"Ka pum chhung hi a ni nghulh zel hrim hrim a, chutiang bak chuan ka sawi thiam lo" ka tih lai chuan ka ban a rawn vuan a, ka duh lo chungin min kaichhuak lui tlat a, kham daih bik a nuam si lo, tui ka in leh te te hnuah kut ka sil a, dawhkan chu ka kil leh a, bawngsa lah chu ka pasalin a belah a chhung hmak a, "A duh chuan a bel a mi va suak mai rawh u" a ti bur mai si a, Anthony leh Hope te nuihza kan siam sak a ni ringawt. 

Inkhawm naah dawrkai Sangpuii nen kan ţhu dun a, a phun sar sar reng a, ka ngaihsak lem lo nain, "I nu a lokal a, Saii rawn mo hnu hian kan buai phah nasa lutuk a, chhungkaw inkawmngeih tak ni ţhin si kha kan inhau reng tawh a, kan inhmu sakhi ţham tawh mai a ni a tia, ka lo khawngaih lutuk che a, chutiang mi chu i ni lo tih ka hrechiang sia maw" a tih chuan ka rilru a na ve reuh hle. Inchhung, chhungkaw buaina bik hi pawnlamah chhuak lo se ka tih viau laiin Sangpuii te chhungin an hriat chuan a darh leh hluai tawh ang. 

Ban hla kan sak chuan ka nu, Nu Hlimi chu a lam leh ngei a, chunglamah a ban pharin a mit a chhing a, a zai tui hmel khawp mai. A rei hnuah phei chuan a su leh auh ţhin a, midang chu nekin a lai takah a tawlh lut ta nge nge a, mihlim kan tih ţhin, an vai chuan ka ti lo, ţhenkhatte hi chu Nu Hlimi ang chiah hi an ni reng a ni. Zu ngawlvei, drug addict te aia an fel bikna ka hre hauh lo. 

CONT...