HIS LAST LOVE-23

HIS LAST LOVE-23

Thawhţan tuk a nih chuan chawhma ka duty dawn avangin ka tho hma a, ka rit lûk a, mut rei chak ve ţhin mah ila ka hna avang bawk hian ka thei lo leh ţhin. Ka pum a nuam lo reng a, a let leh but ţhin niin ka hre mai. Ka luak a chhuak ngun viau bawk a, ka awmdan hi a nuam hlawl lo ti ila ka sawi sual lo ber ang. 

Ka inphih fai hnuah inhnuaiah ka chhuk a, choka a luh tlang mai ka tum chu Nu Hlimi ţawng ri ka hriat chuan ka ding chawt a, an ţawng hre phak turin bang phenah ka biru vat bawk. 

"Faith-i hian a ngaina thei tawh hauh lo ang che. Hel dan che a zawng char char tawh a nih hi. Inneihna hi chu kan pawm tlan hnuah chauh an puitlin ţhin a ni ngai a, mahse nang chuan i duh angin thu i kaltlang pui a, kan remti lo chung Nico-a nupui i neih luih tir a, thu i lo nei bik em a nih hi" lawm lo awka taka a tih chuan ka lo ip chawih a, ka chanchin bawk an sawi leh tawh a nih hmel. 

"A ţhatna tur te, Chhandami a thlah theih na tur te a ti ka ni. Nangni remtih leh tih lohah ka buai lo. Saii hi sawiselna tur ka hre lo bawk" Pa Chhawnan a tih chuan za lo tih hriat zet hian a lo nui a, ka chungah ţhat a chhuah rei lo ka ti reng a, a lo remtih ve loh vang a nih dawn hi.

"I hre reng nang inah i awm khat em alawm. A lo awm aţangin lak hran hleih theih loh khawpa inpawh phir ten inkhak fek fek an ching ţan a, nitin deuh thaw buaina kan nei a, Nico-a hnenah han sawi ila 'nangni pawn in zir bik lo' a tih loh leh, 'duat la i duh angin a awm mai ang' a ti liam then zel a, hmeichhia hian hriatna kan nei ţha a, kan tan a ţha dawn lo tih ka hre lawk sa vek a, dan che pawh ka tum nasa. Neih tir suh..a zir chhuak a, hna a nei ve chauh a, a duh angin nun hmang ve rawh se ka ti lawm lawm a, mahse ka thusawi ngaipawimawh lovin i neih luih tir tho a, Saii rawn mo hnua buaina kan ngah tak zia chu i hria alawm" a ti hmarh hmarh a, mi thusawi ngaihthlak hi mawi lo viau mah se ka dinna ngaiah ka ding reng a, min ngaina lo lutuk hi mak pawh ka ti tawh lem lo, kan inneih hma aţangin min lo duh lo daih tawh zawk a nih chu. 

"Nico-a sawi chu a dik chiah a nih chu. In zir bik hleinem. Mei nei deuh a ţawngkhum fek fek in ching a, Faith-i lahin a zah der duh der lo. Nangpawh i bang chuang lo, Saii inngaihbel theih dan tur a an i hrat a, ngaihven lo che u angin awm ţhin mah ila eng thil mah ka hmuh hmaih ngai lo. Tun chinah chuan fimkhur tawh ang che u. Nangmahni vanga in an chhuahsan a nih vaih zawngin a pawi viau ang" Pa Chhawna chuan thupe aw takin a lo ti veleh a, keimah vanga inhau an nih hmel bawk nen, awm a nuam lo nghal raih raih mai. 

"I fapa ngei a duh lo chung nupui i neih luih tir hi engtikahmah ka hrethiam thei ngai lovang" Nu Hlimin a tih chuan min ţhawngin ka phu zawk lo chauh a ni. Ka beng ka chhi kar reng a, Nu Hlimi pawh hian thudik a lo hre ve reng tawh a nih hmel a, hriatchian zel ka chak a ni. 

"An inmil tawh khawp alawm. Mo fel, rilru kawi nei miah lo kan nei a lawm hle zawk ta che. In phun a, in sawisel reng ringawt mai. I biak ţhat huam ţhin Rita-i hi rawn mo zawk sela chu nangmah ber hian hrehawm i ti dawn. I remti emaw remti lo emaw an innei tawh a, sawiselna tur zawng ruai reng suh" pakhatin a lo ti veleh a, zingkar a nih mai bakah an ţawng ring angreng si a, kal hnaih vak a ngai hran lo.

"Buaina kan ngah sawt zia hi i hre ve lo em ni? Mo sual chuan chhungkua an um darh an tih ţhin kha. Fel pangngai tak chu nise phir te pawh an la inkawp chawt ang. A mizia min hrilh lai pawhin 'chutiang te chu neih tir lo mai rawh, keipawn ka huphurh' ka ti mawlh mawlh reng alawm. Nupui i neih luih tir avang hian Nico-a ai mahin keimah hian hrehawm ka ti zawk. Ka fate an inhmu sakhi ta ram mai te hi en liam tawp har ve deuh a sin. Nang lah chuan kan monu vang mai maiin i fanu kut i thlak a, hetiang a nih reng chuan keimah zawk ka la chhuak nge nge ang" a ti hlak hlak a, chhungte hlau dui, an thu a kawi a ngil a zawm thlap thlap lo chi pasal ka nei hi ka vannei takzet a ni. A chhungte hi hlau viau reng se chu tun ai hian hrehawm ka ti daih zawk ang.

"Insiamţha ula buaina kan nei lo a ni mai" a ti hmuk a, Nu Hlimi chuan a ngawihsan mai dawn maw ka tih laiin, "Kan awmdan ngai rengin alawm kan awm. Ka thusawi ngaichangin ngai pawimawh ve ţhin la chu mo kan nei ţha ve deuh tur a nia, ka remti lo chunga i thu i kaltlangpui lui hi chu i la inchhir dawn khawp. Chawhtawlh lianpui ka lei ang a, i tihsual i hriat hunah a chhungah i ţhu luau dawn nia" a ti a, ngaithla zui duh lovin pawnah ka chhuak ta daih a, min ngainat loh zia ka hre tawh a, a tawk mai. 

"Ka lo phiah chhawk dawn che mi?" ka aw ri a hriat rualin Kungte tual phiat lai chu a rawn hawi chhuak a, "A ngai lo ka zo ţep tawh" pangngai tak hian a ti a, min hua angin a awm tawh ngai lo a, min pawh ngam rih lo ah ka ngai. 

Pangpar bula ţhutthleng hniam an dah ah chuan ka ţhu a, Kungtei hmun phiat en reng chung hian ka rilru ka kawm leh tawh a, ka nuten min duat ve ţhin nen, ka unaute lah engtin pawn ti ila an thinrim duh ngai lo a, naupangber ka ni lo chung pawhin min dawm thiam em em reng a, naupangber emaw min ti tu pawh an awm nawk ţhin reng a ni. 

Zingkar a ni a, a la hma viau nain ka chhungte ka ngai thut a, ka mona ten min tih ţhin dan zawng zawngte ka chhui let a, ka inngaihtuah lungpuam ve deuh aniang ka mittui a tlak rual chuan ka nui hak a, vanvadakin ka khap fak fak a, ka ţahbelh loh tehreng nen ka mittui tla ve ringawt chu a mak khawp mai. 

"Tah khan ţhu reng mah ta che, a khu si, i hritlang anga sin" tih lung lung pahin ka pasal chuan min rawn pan a, sana ka en zawk a, insiam a hun leh dawn der mai. Khua a vawt tawhin puan ka bat deuh reng zel a, kan ţhenawm hnaite phei chuan inchhung leh in kawt vel an chei nasa tawh. 

"Min thlah hman angem?" ka puanbah siamţhat paha ka tih chuan, "Hman chiang" a lo ti var a, nau ka pai hnu hi chuan zingkar hma takah pawh kaitho ila hlim hmel a pu tho zel. 

"A ţhat chu..scooty hi ka khalh chhuak veleh ţhin tawh mai dawn em mawni ka ti deuh a" ka tih leh chuan, "A ţullo..ka thlah thei che" a ti hmuk a, ka hnungah a ding a, "Chetsual palh a hlauhawm. Tlai huamin ka thlah char char ang che" a ti leh a, ka ţhutna nghenchhan chu vuanin a rawn kun hniam a, a lian ve angreng bawk si, hnunglam aţanga min khuap run hi chuan ka thla a muang em em zel. 

"Ngheti chuan scooty a keng dawn a, kan rualin a lokal tawh rih lo ang" hmai zawngthal haw in ka hnunga a ding chu ka en a, a lo bu nghat a, "In inah i kal tlang dawn nia, office banah ka lokal ve ang" a ti a, "An thinrim leh ang a, kan buai leh mai mai zawk ang" ka tih pawhin, "Thinrimna tur a awm lo. Kan hrilh lawk dawn nia, i chhungte i ngai a nih kha" a ti deuh tlat a, Pa Chhawna nen an inang a, rilru an siam fel tawh chuan sawh sawn tir leh a harsa ţhin. 

"Engtin nge ka ngai tih i hriat?" ti a ka zawh takah chuan ţhutthleng nghenchhan chu a thlah a, ka bulah a rawn ţhu ve ta nge nge a. 

"I ţap sia i chhungte i ngai a nih ka ring. Ka hau bawk si lo che a, ţah nachhan tur dang a vang e" a ti sam mai a, makti deuh a ka en lai chuan a lo nui ruh ruh a, a hmuh loh laia ka awmdan a rawn hriat chat theih avangin a intithei leh tawh a ni ngei ang. 

"Engtin nge ka ţap tih i hriat?" ka lo ti leh zel a, "I mit ah" tih ringawtin min chhang a, ka lo ţap kher kher kha ka inchhir a, ka zak bawk. Mi hmuh theih khawpa chak lohna lantir hi ka zah ve zawng tak a ni. 

"Keiman ka dil anga an phal loh tak leh min lo dil pui zawk dawn nia. Nangman i tih vek zel chuan a nuam lo duh emai" ka ti ve ta nge nge a, amah zawkin a dil chuan 'a pasal a fuih pawrh' min ti leh ang a, an lung a awi lo zual mai mai ang. 

Chaw ka ei laia choka a nu Hlimi a lo luh chuan, "Tlaiah kan in lamah chaw kan ei phei dawn em mawni kan ti deuh a, in phal loh chuan ka kal lui chuang lo ang a" inthlahrung ru angreng tak hian ka ti a, nichin lawkah min duh loh zia a sawi ka hre ru bawk nen, awm a ti nuam lo zo vek. 

"I pa dil rawh" a ti hmak a, Pa Chhawna lah hmuh tur a awm leh tawh mang bawk si lo, kan kal leh thei dawn lo a nih hi ka tih rilruk laiin ka pasal chuan, "I phal phawt chuan ka pa pawn a phal ang. Min lo beisei ve reng si a, awm hlen tur kan ni hleinem" a lo ti hlauh a, kan in lama kal hi ka dil zen zen ngai lo a, ka dil ve chhunah lah nu ber a thinrim nghal zel a, dil mai mai ngam chi pawh a ni lo. 

"Va kal rawh u. Tunlaiah chuan mo te hriatthiamna kan nei tawh a, an in lama kal thlengin kan phal sak zel a, mo nih hi a nuam tawh ngawt ang" a fapa hriat tur ngei chuan a ti a, chhuahna tur pawimawh ka neih chang leh hna ka kal dawn te hian 'kan zau tawh a' tiin amah leh amah a infak nghal zel a, huat sen pawh a ni tawh lo. 

"Lokal tlai lo la, ban veleh rawn tlang nghal ang che. Kan haw tlai lutuk chuan min hau leh palh ang" tih pahin khuma a ţhu chu ka en a, kei aiin a kal har deuh ţhin bawk a ka insiam chhung pawhin ti hian ka bulah a awm reng zel. 

"A hma lutuk thei lo ang. Kan office leh in veng a inhlat a, traffic a jam phei chuan kal zung zung a harsa a" a tih pawhin, "A jam vak lo ang. A rei berah darkar chanve vel" ka tih chuan a lo nui hawk a, "Helicopter lei a ngai dawn a nih hmel. Ka rawn thlawk thleng rang thei khawp ang" a ti ve ngei a, darthlalang hmaa ka din hian ka dul hi a rukin ka en leh zeuh zel a, a la puar eih lo. Kei tak phei chuan puar thei lo se ka ti, ka tê ve si a, hmalam a puar luah chuan ka mak dawn emai. 

"Phaia lehkha ka zir pui ţhin ten naktukah chaw eikhawm an rawt a, i lokal ve duh em?" a ţhutna lam ka hawi vat a, "Khawi hmunah?" ka tih chuan an ţhiannu ve tho te in a eikhawm an tum thu min hrilh a, "Ka lokal ve duh lo" ka tih chuan mak a ti lek lekin ka hria. 

"I duh chuan kal rawh ka phal vek alawm. Ka thin a rim dawn lo, mahse keichu ka kal ve peih lo" ka ti chung pawh a "Engati nge? I phur thei hle si" a tih chuan ka ning deuh tlat a, "Ka chau ve alawm mawle. A chang leh ka lu a na a, nuam lo chung chungin hnaah pawh ka kal lui mai mai a nih hi. Hlawkna awm lo turah nuam sam vak lo chungin ka kal peih lo" ka ti a, min rawn melh zawk a, a ngaih a ţhat chiah loh hmel.

"Ka zawh chein na ka nei lo i ti zel a, ka ngaihsak theih nan che na i neih chuan sawi ziah rawh. Chawlh la tawh mai la" a tih chuan ka chek tlak a, thu pangngai a sawi tluan ve dawn maw tih pawhin a tawp lam hi a nawi tho zel. 

"Ka rai ţan ve dek dek a chawlh lak ka tum nghal te chuan kumkhua chatuan a min chawlh hlen tir chak an tam viau ang. Mi pawh pum puar luahin an duty ve tho alawm" vin lek lek a ka tih chuan, "Nang angin an phun peih ve lo aniang chu" a lo ti zauh a, min en tawh lo mah se ka melh rum khawp mai. 

"Eng maw i sawi kha?" ka ti nawn leh ngat a, "Nang angin pasal an nei fel ve lo aniang ka ti" a ti leh daih a, a sawi hmasak kha ka lo hrechiang viau thung. 

"Hmeichhia phun peih lo tak tak an awm lo. An in lamah chuan an phun ve vek ang. A ţul a, hna dang kan nei lo a, pawisa duh ve bawk si chuan kal hram hram a ngai alawm. Ka chawl duh ti ila chu min nuihzat nasa hlawm viau ang. Mi aia zuau bikah min ngai ang a, nangpawh an dem tel tho ang che. Pangchang deuh angin ka lang bawk ang a, chutiang te chu ka duh loh reng reng" ti duah mah ila, "Umm" tih chauhin min chhang leh a, a kâ pawh a ang lo. 

"Engtin nge min hmuh? Eng angin nge min hmuh a? Ka hriat chakna a rei tawh" vin tawh lo hian ka ti a, min duh ve reuh bawk si, ka chhel vang tih chu min hrilh tawh ngei a, ka duhkhawp lo a ni mahna. 

"Mihring angin" fiamthu a a tih chuan, "Ka uang lo a nia" ka lo ti vat a. 

"Jacket dum leh jeans ha angin ka hmu che. Ka hmu tawp che, chutiang bak chuan ka sawi thiam lo" a ti a nih chu! A ngaihna a awm hlawl lo a ni. 

"Min duh tho sia...chutiang lam zawng chuan lawm ka zawh che. Min duh chhan te, min hmuh dan te" ka ti leh a, "Duh chhan sawi tur ka nei lo. I awm ang ang khan ka duh tawp che" a ti leh ringawt a, "Ţawngthuchhe loah ka hmai hi lo kang sawr bawk vek pawh ni se min duh dawn tho tihna mi?" ti a zawhna atthlak lutuk ka zawh chuan a nuih a za viau a, keipawn ka hlim pui ta phian. 

"Duh tho ang...i landan danglam hlawk mah se nangmah i nih chuan ka hmangaih tho ang che" a ti a, a ril ve viau nain zing ni sat tawh hnuah chuan chhungril thlengin a chhun pha chiah lo, ngaihthlak erawh a nuam khawp mai.

"Tlaiah chuan lo haw hma rawh aw. Lo tlai lo la, ka rawn be sek dawn che a nia" motor aţanga chhuk pahin ka ti leh hram a, zei lo ve viau mah se han kal hran chiah hi chuan a ngaihawm ve veng veng zel. 

"Zingkarah hetiang ei suh" tih pahin Ngheti chocolate ei lai chu ka laksak a, "I ei ţhat peih ngai tawp loh kha" a ti a, min laksak a tum chiah chu a vaiin ka hmawm a, min melh rum nasa mai. 

"A ţha lo tak tak alawm" chocolate hmuam ţun chung hian ka ti leh tho a, ka fiam chak vang a nih rualin ka eichak vang pawh a ni tel a, Ngheti eitur chhuh sak hi chu a nuam ve hrim hrim. 

"Zanin tlai chu ka nu te inah chaw kan ei dawn a" intithei deuh a ka tih chuan hlim hmel a pu chawpchilh nghal a, "A ni maw? An phal tawh em ni? Boruak a dai tawh em?" a ti mawlh mawlh a, kan boruak a chhiat viau chuan keimah ang chiahin a lo hah ve ţhin. 

"Boruak hi chu a dai thei tak tak lo, ka nu leh Faithi te hian min haw tlat a, an thusawi ka hriat ruk dan phei chuan Nicholas nen kan inneih chungchangah hian nu Hlimi remti lo chung pa Chhawnan a duh angin thu a kal tlang pui a ni awm e. Min duh lohna an lantir reng hi mak pawh ka ti tawh lo. Rita-i vang emaw ka ti zawk a, kei aia Ritai an duh vanga min ti hrehawm mai mai emaw an nih ka tia, kan inneih hma aţang tawha min lo duh loh em vang zawk a lo nia" ka ti a, hrehawm tih hmel deuh hian min en a, "Mo pui fel deuh nei tal ila ka ti, a nuam ve deuh ang" ka tih phei chuan min khawngaih hmel khawp mai. 

"I nu hi chu a buaithlak tak tak a ni. Biakin ah a lam a, Pathian thu a sawi mai bakah damlo ţawngţaipui ngai an awm apiangin an inah kalin an ţhian hoin an ţawngţaisak a, inchhungah a sual hle tho si. Mahse maw, hetiang hi chu miin an hre lutuk, be ţha viau pawh nise a ruk tak chuan engahmah an ngai lo a, hnunglamah an nuih tet tet zawk zel" a tih chuan, "An nuih lo aniang ka chanchin pawh a sawi darh nasa a, an lo sawi pui thei zel alawm" ka lo ti a, min rel nasat theih zia ka hre ve miau a ni. 

"Amah ang ho bakin an sawipui lo ang. Mi rel nuam ti mi hi an awm ve hrim hrim bawk a, lo sawi darh vak pawh nise nang ai chuan amah hi mak an ti zawk ang. I nu te ang ho hi chu an ţawngthei a, an thusawi hi tuman engahmah an ngai lo thung a, rilru nuam deuhin awm rawh, hrechiang tu che apiangin fel an ti ang che. I langchhuak tawp a, i inthup ve lo a, i ri bawrh bawrh zel a, i ngainatawm alawm. Chuvang chuan insit phah reng reng suh" a ti dam thlap a, ţhianţha nge nge hi chu an lo hlu a ni. 

"Tunlai tak phei chu ka awm a nuam lo ve lutuk a, ka phur hlawl lo. Ka chet loh chuan ka nu a lungawi lo zel bawk sia, rin aiin mo nih hi a hahthlak daih. Mi in a ka awm aţang chiah hian mahni in hlut zia ka hria a, kan in leh ka chhungte ka ngai ve veng veng zel. Lo rethei viau pawh ni ila tuna ka awm naa engkim nei thei a awm ai chuan rethei deuh chung pawh a chhungte bula awm ka thlang zawk ang. Mahni in nge nge hi chu a danglam deuh alawm. Thlasik laia puan lum deuh kan sin ţhin nen hian ka tehkhin a, a lum nuam a, taksa a hahdamin thla a muang a, awm a nuam veng veng a" ka ti sap sap a, mahni in hlutna ka lo hre tawk lo ţhin a, tunah chuan hrechiang ber ber te zingah ka tel ve tawh ang. 

"Mo nih chuan tawrh tur a tam a, hmeichhia hi kan lo chhel ka ti. Kan hlut tehreng nen kan hlutna hi an la hre ţha duh lo ţhin zui a, i ngawi reng ţhin em ni a?" ti a min zawh chuan lu ka thing na a, "Ţul tawpah lo chuan ka chhang ngai lo" ka ti tho a. 

"A nazawnga chhan let chu ka duh bik lo a, ka pasal nu leh pa chu ka nu leh pa an ni ve mai a, zah lo deuh a chhan let vak vak chu ka duh lo a, ţul ka ti lo bawk a, a tawpkhawkah ka chhang let ţhin. Zah bik loh tur ka tihna ni lovin ngawih reng ringawt pawh hian kan inchhung angah chuan rah ţha a chhuah dawn chuang lo a, min zuam telh telh mai dawn a, chuvang chuan ka chhang let zeuh zeuh" ka ti a, ka pasal leh a chhungte chanchin hi a chhe zawnga sawi duh lo ţhin mah ila Ngheti bulah hi chuan ka insum thei ţhin lo. 

Kan inthlak zawh veleh kan ţhian dun chuan kan inzui chhuak a, thlah ka ngai lo ka ti chung pawhin "Ka thlah ang che" a ti lui tlat a, ka hnial lui thei ngang lo a ni. 

"Sawi leh ţhin ila i nu hi chu a mak ve e. I rai hmain tu neih a chak em em a, i rai ta cheng a, fa neih hma lutuk a ţha lo a ti leh daih bawk sia, indang daih thei ula ka ti ngawt mai, i pa lahin a phal lo nasa bawk sia" a la ti a, a vei ve ngang a nih hmel. 

"Chu chu nia...Rita-i vang emaw ka ti ka tih tawh kha. Mahse, tunah chuan Rita-i vang a nih ka ring tawh lo. Keimah tawp hi min hua a, min sawisel a chak ve hrim hrim vang niin ka hre ber tawh" ka ti a, kan ti ti tui bawk a kan thleng hma khawp mai. 

Kan inkawtah a ding dat a, a kawr pawt ţai chung hian ka chhuk a, "Lo lut ve rawh..thingpui emaw thei tui tal lo in rawh. Coffee i duh pawn a awm ang ka pi, i duh duh ka lo siam sak ang che" fiamthu a ka tih chuan a lo nui ve hak hak a, "Inhuam viau mahla ka lo lut lo mai ang. Tunlai chu ka pi a nuam lo a, in a ka awm loh chuan a thla a muang lo. Nikum a a puan lum kan leisak ho te kha kumin kum tirah khan 'ka thi tawh dawn a, krismas ka hmang ve hman tawh dawn chuang lo' a tia, a lo sem zo vek a, Krismas a hnai leh tawh sia, a la dam ţha angreng bawk nen, puan lum lei tur te pawh ngaihtuah a ngai a, hun ka nei lo ve lutuk" a ti duah a, a tar â deuh tawh a, a hahthlak tak tak a ni. 

"A thar hlak lei leh vek a ngai a ni maw?" nui reng chunga ka tih chuan, "Ngai e mawle..kan lei nual tawh a, mahse a rimchhe hma ţhin a, lei sak zeuh zeuh a ngai. Suk fai sa hi a ro hma chu vawt lo tuar mai rawh tih ngawt chi a ni mang si lo a, ka pi ka en hian khawvel hi ho ka ti ţhin. Ka la tar ve ngei awm sia, ka pi ang hian ka la chak lo ve dawn a ka tia, theihtawpin ka duat a, ka pi ah hian keimah ka inhmu ţhinin ka hria" a ti a, hrethiam lo viau mah ila ka lo bu nghat nghat a, a tlan liam thlengin ka ding a, ka hmuh phak loh hnuah inchhungah ka lut ve chauh a, min hmuh rualin Liantei a lo ding hluai mai.

"Ehh...nau kan pai tawh vel amaw..ka van hmu chak tawh tak" tih pahin ka darah a kuah a, a kut awl lamin ka kawr chhanah ka dul a chul a, a la puar mang si lo, Nicholas lahin a chul a chul ringawt a, kan nghakhlel tlang a ni. 

"Nau i pai takah chuan pasal neih chu a nuam deuh tawh em?" ti a min fiam chuan, "Nuam tak a ni..nei ve vat vat rawh" ka ti a, a lo ner nang nang a, bialpa a neih awm pawh ka la hre lo, lehkha a zir vak vak ringawt a, phone aiin lehkhabu a lawm zawk ti ila a chiang ber ang. 

"Kan hmuh chak tawh zia che chu maw..in lo leng har bawk si. Ţhu rawh..thingpui ka lo lum sak ang che" a ti zung zung a, kan tv dahna ep chiah ţhutthlengah ka ţhu a, kan inchhung chu ka enkual vel a, zankhat tal hahdam deuhin ka pindanah ngei mu leh thei ila ka ti. 

"Eng nge i ei chak? Bawngsa i duh em? I eichak zawng apiang kan siam dawn nia" a ti vel a, min duat ve ngei a, a inhmeh hlawl lo. 

"Ka nu'n sangha rep tui deuh kan nei a tia, chu chu siam rawh. Sa ka ei chak lo, thlai ka duh zawk" ka tih chuan nui var var chung hian min en a, "Tui deuhin ka siam ang che" tih pahin ka bulah a rawn ţhu a, ka darah a lu nghatin min ngheng chial a, kawr chhanah ka dul a khawih zeuh zeuh bawk. 

Ka nute an lo haw hnu phei chuan kan ri laih laih a, nau ka pai ve ta chu ka pa pawh a lawm khawp mai. "Tuaite, eichak i nei em?" a tih chuan, "Liantei ka hrilh vek tawh" ka lo ti vat a, ka nu phei chuan min ngaihsakin tih tur leh tih loh tur te, ei nasat chi leh ei vak loh tur te min hrilh nasa mai. 

Ka nu pindan a a lut chu ka zui lut a, pindan sei a sofa inhungah chuan ka mu hle hle a, ka nu thawm ka hre nain a che vel chu ka en lo hrim hrim. 

"I nuam lo deuh em ni?" ka lu zawnah ţhutthleng a rawn hung hnai a, min hnaih deuh a a ţhut takah chuan, "Ka ngai ţhin ropui che sia, i mumangah min hmu deuh reng lo maw?" fiamthu a ka tih chuan za lo tih hriat deuh hian a nui a, "A hrehawm em?" a ti sap a, a aw chu a zawi khawp mai. 

"Hrehawm loh e" ka tih lai chuan ka sam a rawn khawih a, rilru hrehawm laia nuten min han duat hi chuan hnuk a ulh hma bik ţhin aniang mittui a hnai leh tawh khawp mai. 

"Min hrilh la, tumah ka hrilh dawn chuang hleinem. I thawl hawk mai ang" dam deuh a a tih hnuah pawh, "A hrehawm loh..nuam ka ti tawh lutuk" ka la ti tlat a, ka pa ang a ni ve lo a, nute nge nge chuan min khawngaih leh bik ang a, kan haw san hnuah pawh rilru nuam lo deuhin a awm reng ang a, chutiang chu a thlen ka duh bik lo. 

"A hrehawm deuh pawhin tuar hram hram rawh" a ti a, ka sam a chul lai chuan, "Kan inneihna kha nu Hlimin a lo pawm ve lo a, Nicholas hi nupui neih tir a la phal lo a, mahse pa berin thu a ti tlang a, min ngaina lo pawh nise ka hrethiam, hrawn an har lutuk lo zawk a ka vannei a nih hi. Ka duh duh danin ka awm ngam a" tiin a rilru nawm nan dawt tlem ka hrilh a, a awih leh awih loh ka hre lo thung.

"A hrehawm deuh pawhin pasalte berin min duat chuan thil dang chu tuar hram hram ila tawrh chhuah hun a awm ngai. I u Zari kha i la hria ang a, a pasal chhungten an hmusit a, an ti duhdahin nau pawh an lak chhawk duh ngai lo kha a nia, mahse tunah chuan an ngaina vek tawh. Mi hi ţhat nain kan hneh thei a, an sual deuh pawhin ţhat chhuah lui zel ila tuman min haw rei thei ngai lo" a tih chuan, "Awi..chutiang ti thei tur chuan pianthar ţhat a ngai dawn emai" uar fe hian ka lo ti a, Nicholas a lo thlen tak avangin kan ti ti rei hman meuh lo. 

Kan in aţanga kan haw veleh ka inbual a, kan mu nghal daih a, reilote chu ka muhil ang, ka harh chuan dar12 a lo pel tawh. Ngheti chocolate lei ang kha ka lo lei haw ve lo a ni ka ti rilru a, ka ei leh chak a, rilruah a awm reng mai. 

"Tho teh" ka bula mu ka pasal chu ka sawi nawk nawk a, "Chocolate min lo lei teh" ka tih chuan a tho phang bawk nen, a bang bo khawp mai. 

"Engmaw?" tho phang aw deuh hian a ti a, "Chocolate" ka lo ti leh a, a mit nuai pahin a ţhu chhuak a, banga sana intar a en hnuah keimah bawk min en lehin, "Dawr a inhawng tawh lo ang" a ti sam et a, mut leh mai a tum chu a hnungzangah ka nam a, "Sangpuii te an la meng ang" ka ti ta tlat a, ka ei chak em a, inthlahrung viau mah ila ka tir lo thei lo. 

"Thil thlum i eichak em ni?" a tih chuan, "Aw..raino lai hian chak a na bik aniang ka eichak tawh chu rilru ah a awm reng zel. Ka ei chak a ni tawp mai" phawk deuhin min lo en a, sana a melh leh ţhin bawk a, "Khawi zu ka zuk laksak ang che aw" ban charh a a tih chuan ka tlawh pawp lo chauh a ni. 

"Chocolate eichak laia khawizu lo tih te chu a" ka ti hlak a, ka lung a awi lo nasa mai. 

"Mutthilh hnan mai rawh..naktuk ah tam deuh ka lei ang che" a ti liam puat a, ka inrin hmain a mu leh daih lehnghal. 

"Ka mut a chhuak hlawl lo. Han phone chhin teh, a nih loh chuan keimah ka kal mai ang" ka tih chuan a tho leh ţuah ţuah a, min en run bawk a, a awmdanah chuan min ning tawh tih a hriat. 

"Naktukah ei sen loh ka leisak ang che. Muhil rawh" a ti hmuk a, ka va han ngei mai mai teh. 

"Keimah ka kal mai ang" ti a ka tho uaih chu rang zet a min nam mu leh chawrhin, "Engtin nge i rai bik a?" a ti vin hrawk a, ka awmzawn a a kut a dah tlat avangin ka tho thei tawh lo a, ka melh nasa viau thung. 

"Ka eichak a, i kal peih loh leh keimah ka kal ang ka ti mai alawm. Rai laia awmdan ka chhiar vek i ti a ni lawm ni? I hrethiam leh der si lo a, rai lai hian luak chiah a chhuak hleinem, eichak zawng te kan nei ve alawm" ka tih hlak hlak takah chuan a thaw hawk a, sana bawk chu a en leh a, ka ngen tlai ve bawk em a ni, ka ei chak miau bawk si. 

"I la pai rei hmel sia aw..i rai rei dawn bawk si" ti nuah nuah chungin khum aţang chuan a chhuk a, "Kan inneih hnu hian ka eichak zawng ka ngen tlut tlut awm pawh ka la hre lo, tun hi vawikhatna a nih hi. I la phur lo em em zui a" ka tih chuan, "Hetiang a nih dawn chuan nei nghal hluai mai la a ţha ang" a ti kher a, a wallet chu a ban pah vut a, en pawh min en tawh lovin a chhuak nghal daih bawk. 

Sangpuii te a kaitho chawp ni ngei tur a ni ka thil ei lai chu hmuhnawm tih hmel deuh hian min lo en a, kaitho lo se chu chocolate ei tur ka nei hauh lo ang. Inhau zui tawh lovin kan mu veleh mai a, "I mutna bul dawhkanah khan ka dah aw" tih pahin min kuah a, a che leh tawh lo. Ka eichak leh thut ang a, thawh ngei ngei a ngai leh ang tih hlauin a rawn lei ţeuh a, ka hnaihah min chhawp sak thlap bawk. 

Ka nute in a chaw kan ei vang aniang Nu Hlimin min be leh duh tawh lo a, hrehawm viau mah se ngaiah ka nei ve ţep tawh. Ka chawhnu dawn avangin ka kal har deuh a, damdawiin ka thlen hi chuan ka thaw a veng huai zel. Ka duty zo, haw tur a ka insiam lai chuan ka pasalin min lo bia a, "Ka ţhiante inah chuan ka kal tlang anga ka lo haw har lo ang" a rawn ti ve thlap a, keipawh rilru nuam deuhin ka haw a, a nuam rei lo viau thung. 

Sana ka en sek a, biak ka tum lahin phone a la thei bawk si lo. Ka ngaichang reng a, dar 9 a rik meuh chuan a ni em em tawh lo tiin ka call leh a, mahse hmeichhiain min rawn chhang daih a, "Nicholas kha ka lo bia" ka tih chuan min rawn chhang tu chu a nui hak a, "A biak tlak kher loh maithei a ni" a rawn ti a, Rita-i ngei niin ka hria.

CONT..