HIS LAST LOVE-24

HIS LAST LOVE-24

"Khawi hmunah nge in awm?" pangngai deuh hian ka ti a, a reh vang vang hnuah, "Zautei te inah" a rawn ti a, min hrilh hreh hmel khawp mai. 

"Khawi lai takah khan nge an awm?" ka tih leh chuan, "I hre lo ang" a ti hmak a, ka ngei angreng hle. 

"Sawi mai mai rawh. Tuna i bula awm mipa kha nupui nei lai a nih kha. I inrawlh tam viau chuan a pawi ngawt ang, mualpho rap ka hreh dawn hauh lo a nia. I kai tho thei lo a nih chuan in awmna hmun chiang deuhin sawi rawh" tiin ka vau khar khar a, hmeichhe dang ţawng lang lang ri ka hria a, an pahnih chauh chuan an awm lo a ni phawt ang. 

Phone lah chu a hmet tawp daih lehnghal a, ka call nawn leh a, a la duh lo a, luhlul chhuahin ka call nawn tlut tlut a, a tawpah phei chuan a switch off hmak a, ka thinrim lutuk chu puak darh chuai mah ila thil mak a ni hauh lo ang. 

Phone an switch off tak rengah chuan beidawn tawpah Lawma ka bia a, ka pasal ţhianţhaber a nih avangin eng emaw hriat a neih ka ring a ni. 

"Zautei i hria em?" ka ti nghal thawr a, "Zautei tih chu mi pathum ka hria" a rawn tih chuan, "Nicholas te nen college an kal ho ţhin" ka tih leh takah chuan, "Ee..aw hria e, ka ţhiannu ve tho alawm ti ila Nicholas kaltlanga inhria kan nia, lian pui, â phuang chi, fel deuh mai mawle" a ti deuh duah a, ka thaw huai huai mai.

"An in awmna i hria em? An ţhian ho inhmuhkhawm an tia, chaw an ei nghal a, Nicholas ka be thei lo a" ka ti a, dil luih ngai hauh lovin an in awmna chu chiang deuhin a sawi a, wholesale dawr lian ve tak bul chiah a nih avangin ka tan pawh zawn hmuh a har hran lo ang. 

"Ka lawm e aw" ti a lawmthu ka hrilh chuan, "Kal pui i ngai em? A vawt tawh sia, scooty i khalh huphurh em?" a rawn ti a, a ţawng tam lem lo nain Lawma hi chu mamawhna kan neih phawt chuan a tlanchhe ngai lo. 

"Ngai lo e..Hope-i ka sawm mai ang. Ka lawm lutuk tak tak a nia" ka tih leh luam hnuah kan inbiakna chu kan ti tawp a, banga kan inneih thlalak chu ka melh vak a, a va han chak dawn lo chiang tak. 

"Hope, i muhil tawh em?" kawngkhar ka kik kauh kauh a, ka ko pah reng bawk a, phak deuh chap hian a lo hawng a, a muhil tawh a nih hmel. 

"Ka kaitho che a ni maw?" ka tih chuan, "Ka lo chhing sek a, engati nge? Na i nei em ni?" a ti zung zung a, ka chhip aţanga ka ke ler thlengin a en chik khawp mai. 

"Lut phawt teh ang" kawngka bula a ding chu pindan chhungah nam lutin keipawh ka lut ve nghal a, Faith nen pindan an inţawm tawh lova, a tih chi phian mai. 

"I u a lo la haw lo a, biak ka tum lahin Rita-in min lo chhang daih bawk si. Tunah phei chuan phone an switch off tlat tawh a, tih ngaihna tak pawh ka hre tawh lo. Ka ngaih a ţha lo ve tho bawk si a, Lawma hnenah Zautei te in awmna ka zawt a, min kalpui peih em? Riak rawh se ti ngawt ila ka nu leh pate an lungawi dawn bawk si lo a, scooty i khalh peih loh leh keiman ka khalh ang a, zana mahni a tlan vawk vawk chu ka hreh ve deuh a" ka ti zung zung a, ka sawi hnem hman khawp mai. 

"A va mawl ve a, zu a in lehpek aniang chu. Ka inha lum anga kan kal dawn nia. Nangpawh in ha lum rawh..khawlai phei chu a vawt dawn a nia aw" a ti a, a che zui nghal a, keipawh mut kawr nen chauh ka awm a, inthlak turin kan pindanah ka phei leh rih a, ka khuahkhirh a, ka fir ve deuh loh chuan ka pasal hian ngaiah min nei anga, min pal zam reng mai ang. Bakah biak theih loh leh mu leh mal nei lo khawpa zu a in hi ka haw hrim hrim. 

"Hope" ka tih leh rualin pindan aţangin a lo chhuak a, jacket lian pui a hak bakah lukhum lum te a khum a, keimah ang chiah, a vawt ve bawk em a ni. 

"Thawm dim deuhin kal ang" tih pahin ka banah a kuah a, kailawnah chuan muangchangin kan chhuk thla a, nawm loh nen, ka thin a rim hlur reng mai. 

"Gate ah sawn lo va chhuak la scooty ka rawn nawr chhuak ang. Thawm an hriat vaih chuan ka nuten min hau hrep mai ang" pawn kan chhuah rualin ka beng bulah a phun sar sar a, lu ka lo buk zeuh hnuah gate lam ka pan a, ani chu garage lamah a lut thla thung. 

"Ka lo khalh dawn mi?" ka tih veleh, "Aw a pawi lo" a ti nghal a, kan han tlan thaw chiah phei chu vawt tak a ni ringawt, thliin ka hmai thlengin a chhem a, nuih pawh tum ila ka nui thei kher lo maithei a ni. 

"Tunlai hmeichhe tam tak hi chu mi pasal tih an hriat reng pawh an kawp hreh ngai lo a. U Nico phei chu hmeichhia hian an duh ve thei lutuk a, school a kal lai te khan a classmate hmeichhia te an lo len phah fo mai. Hna a nei hma a, a la upat vak bik loh avang hian a puitlin viau rualin naupanchhiatna lai riau a nei ve bawk a, ngaihtuah chiang lova thil tih rum rum chang te a nei ţhin, hriatthiam a ngaih zawk chang a tam dawn a nia, mipa phei chu hmeichhiain an thlem heuh heuh chuan an tlu hma si, naktukah hau hrep la, zu in tawh lo turin hrilh rawh" a ti duah a, ka ngaithla liam mai mai a, naupan thuah chuan a hnathawh phu lohin a la naupang a, mipa phei chu an rilru a puitling har an ti lehnghal a, Hope-i sawi ang tak tak khan naupangchhia deuh a chet chang a nei ve ţhin. 

"Hmeichhe dangin an thlem thluk theih chuan min hmangaih lo hle tihna a ni mai. Ka nupui a rai mek a haw hma ka ngai tih pawh a awm lo, rai zawkin a leng ka hruai a ngai a, a ngaih a sam leh lutuk mai" ka ti hlak hlak a, kan kalna tur lah chu kan veng aţangin a hla zek lehnghal.

"Rita-i hi a inrawlh tel ve tlat a a ti ang lo tak tak a ni. A hmelţha a, mipa dang pawh a hmuh dawn tehreng nen ka u kher a ngaizawng a, amah leh amah a inti hmingchhe mai mai" a lo ti ve a, "Tunlai ah chuan mipa nupui nei lai reng pawhin ngaihzawng neih an hrat a, thil pawi lutuk ah an ngai tawh lo emaw tih mai tur a ni. Hmeichhe ţhenkhat lahin mi pasal tih hrereng chungin an lo duh ve thei zel a, mahse hetiang ho hian an nupuite an ţhen ngam tak tak ngai chuang lo. Hmeichhe dangte hi chu nawm chen nan chauh an hmang a, an nupuite ah an bet tlat tho. Pawm lai nei hi chu hnawl ngam a ţha khawp mai" a tih zawm leh a, ka pawm zawng tak a ni. 

"Lawma sawi dan chuan helai hi a nia" building lian ve tak zawnah kan ding a, kan dinna ep kawng sirah lirthei a ding thluah bawk. 

"Bike a la awm nual a, an ţhiante pawh an la awm ve aniang, kan lut ţhuai mai dawn mi?" scooty aţanga chhuk paha a tih chuan, "Aw..ka va hung ţha ve lawk ange" ka ti a, a awl laiah ka dah ve rawih a, Hope-i nen chuan kawngkhar lian pui hmaah kan ding a, awmze nei deuha kan inmelh ralh hnuah door bell ka hmet a, ka thinphu lah chu a rang ve ringawt a, a awmzia pawh ka hre lo, Rita-i nen an lo awm dun ka hlau a ni ber ang. 

"Ehe..." kawngkhar rawn hawng tu in kan hmel a hmuh chuan mak a ti bawk aniang a meng zau kawk a, min hre tawh ang maiin a awm a, ka vawikhat hmuhna a ni thung. 

"U Nico-a kan lo hruai dawn a" Hope-in a tih chuan, "Lo lut rawh u" a ti ban charh a, kawngka chu hawng zauin kawng min kian a, kawngka a ka pen luh te chuan hlauhna in min tuam ve ngei a, ka awmdan chu ka duh lo khawp mai. 

"Khawiah nge Nicholas te kha? Hei an nu a lokal a nia" kawngka lo hawng tu chu a au lang lang a, mi tlem te chiah an lo awm tawh a, min lo en ţhap bawk. 

"A rui deuh a inchung lamah a mu a nih kha. Ruih vak na tham a in loh nen, a taksa a chak lo aniang" mipa pakhat hian a lo ti a, ka hmuh hnu a ni a, a hming ka hre lo thung. 

"Han chho rawh u tumah an awm lo. A chung chiaha hian pindan pahnih a awm a, khawi emaw zawk zawkah a awm ang" nula bawk khan a ti leh a, a pian ka en chuan Lawma sawi, Zautei ngei kha a nih duh hmel. 

"Kal ang Hope" tih leh a bana vawn ka rual a, midang lo awm ve ho te chu an mitmei ka veng peih lem lo, ka thin a rim em a, ka insum hram hram zawk a ni. 

Pindan a kan luh ruala kan thil hmuh chuan ka thinrimna a ti zual kher mai. Nicholas chu kawr pawh ha lovin a lo muhil a, kekawr a ha vek tho nain a bula Rita-i awm ve chuan ngaih a ti ţha lo nghal ringawt a, ka lum pup pup a ni ber. 

"Phone kha a thi daih a" min hmuh ruala Rita-in a lo tih chuan, "Eng nge thleng?" ka ti hrawk a, Nicholas-a mutna lamah ka phei sawk sawk a, khum bulah dingin a taksa chu ka en vang vang a, a nghawnga hmui thla awm te chu ka hmuh hmaih lo nasa. 

"Ţap chunga i tlan haw nghal duh ka lo ring a, ka duh vanga thleng a ni lo a nia aw" awmze nei lo zet a lo ţawng ve sek Rita-i chu ka en a, "Engvangin nge ka tlan haw kher ang? Nangni ang mi khaw lo lutuk avang hian ka tlan hah peih reng reng hleinem. Zu a in fo a, hetiang hian a awm ngai lo. Eng thil nge i tih?" vin zet a ka tih chuan, "Eng thil mah ka ti lo. Zu a in a, a ruih deuh avangin ka buaipui a, ka muttir thlap bawk a, lipstick kha chu kan in buaipui na lama a kai aniang" tiin pawlawh deuhin min chhang a, ka thaw thlenga a rang vek chu mak ka ti hran lo, ka insum nasa em a ni. 

"Tho nghal rawh mawla" tih hlak pahin ka pasal samah chuan ka ţham a, ka sawi nawk nawk chung pawhin a harh eih lo. 

"Haw san mai rawh u. Mi pahnih vel an riak dawn tho a, zingah an lo thlah mai ang" Rita-in a tih veleh chair hnai ber chu ka chawi nawlh a, khum bulah hungin ka ţhu nghal tharh a, kut kuangkuahin ka pasal bula hmeichhe mu ve chu ka melh ran a, zak leh tim hmel a pu hauh lo, mi pakhat chu a ni ve chiang a ni. 

"U Sai, engtin nge kan tih ang?" Hope-in a tih chuan, "Ti hian a harh hun ka nghak dawn. I nghak ve peih lo ang tiraw? Nangmaha inkhalh haw leh i hreh awm sia, lokal rawh, ka thlah che anga ka kal leh mai ang" tih pahin ka ding leh rih a, awmdan tur tak pawh ka hre bik lo, mahse tlawm zawka ţan a, haw san daih ka tum lo hrim hrim. 

"A ngai lo..keimahin ka haw ngam alawm. Zan a la rei lutuk lo a, lirthei tlan a la awm ve nual tho kha. Ka buaina ber zawk chu ka nu leh paten in awm lo tih an hriat chuan an ngaihdan a ni dawn lo lutuk a" a ti niah niah a, hlau ve tho mah ila motor ka khalh thiam der si lo a, nghah mai loh chu tih theih a awm lo. 

"Khawvar hmain a harh hman ang. An thawh hmaa lo haw pui ka tum dawn nia" ka tih tlat avangin, "Aw le...khawi chahbi min lo pe rawh. Phone kha ngaihven la, chanchin ka rawn hrilh ang che" a ti a, chahbi te kan inpek hnuah min haw san a, inhnuai lama awm ho kha chu ka ngaihven peih lo, an rui vek a, engmah zawh tlak pawh an ni lo ang. 

"I haw ve dawn lo em ni?" Rita-i hnena ka tih chuan a lo nui sang a, a mitmeng chu a fim lovin a rui ve hle tih en ringawt pawhin a hriat theih. 

"Riah tum sa a kal ka nia, khua te han var se, haw te pawh ka haw ve ang chu" ngeiawm zet hian a ti a, Hope-i ka ngaihtuah bawk nen, rilru a phir in ka awm a nuam thei hlawl lo. 

"I thil tih duh dan hi a ţhing khawp mai. Midang ang ka ni ve lo ka tih tawh kha. Ka pasal i hrai ruih avang mai mai hian ka chhia leh ţha hriatna a buai ve lo vang. Tun hi a tawpna ni rawh se" ka ti ram hmak a, Nicholas chu harh tawh se ka ti kher mai, ka nuam lo a, mut hahdam te pawh ka chak ve tawh. 

"Thil dik lo tih ka nei miah hleinem. A rui a, pindanah ka hruai chho a ka lo awmpui zawk a nih hi. I ngaih angin kan inkarah engmah a awm tawh lo. Inţhianţhatna a ni mai" a tih laiin Zautei a lo lut ve a, Rita-i ang lo takin nuam lo ti hmel a pu a, en pawh min en ţha ngam lo. 

"A in tam loh nen hepa hi ngati em em nge le?" a rawn ti ve a, ani pawh a ruih hmel tho nain Rita-i leh ka pasal ang em em a ni ve lo thung. 

"Inhnuaiah lo chhuk lawk rawh se an ti. Zuk chhuk lawk la hetah ka lo awm ang" tiin Rita-i chu a tir thla a, a hreh viau nain Zautei thu chu a zawm lo ngam bik lo. 

"Kan awm ve reng a, engmah a thleng lo a nia aw" a ti a, ka pasal a mu miau a khumah a ţhu hreh aniang khum mawngah a ding ran a, ţhu rawh pawh ka ti duh lem lo. 

"Ka lo nghak mai ang, hrehawm ti duh suh" ka ti ringawt a, "Rita-i a lokal ve dawn lo emaw ka tia, Nicholas-a hnenah pawh a lokal lo ang ka ti vek a, mahse a rawn lang hlawl a, keini ho chuan a zin turah kan ngai vek a, a ţhulh leh aniang" a ti niah niah a, ka pasal ngawt chu ka en a, ka lung a awi lo nasa bawk nen, hmuh ka nuam vak lo maithei a ni. 

"Khawiah nge a phone hi?" ka tih chuan, "Ka hre miah lo. Ka mu hahdam dawn hetiang chuan motor ka khalh thei lo ang a tia, inchunga a chho kha Rita-in a zui chho a, ka chho ve tho nain a phone tak chu ka hmu miah lo. Lukham hnuai te kha han dap kual chhin teh" a ti a, hrilh nawn ka ngai lem lo. Ka ţhutna aţang chuan ka tho a, lukham hnuai chu ka dap nghal rawk rawk a, a lo awm ngei bawk. 

Ka on chiah chu battery a lo la tam ngang mai. "Dawheh lutuk" tih pahin lock ka hawng a, thikthuchhiat chang ka neih ve ţhin avangin a pattern hi min hrilh thlap a, chutiang bawkin keipawn ka hrilh ve a, kan nupa inkarah hian zep ţhen a awm vak tawh lo. 

Rita-i message a tam viau laiin a reply na hmuh tur a awm lem lo a, 'min reply duh lo' tih ringawt pawh a thawn ţeuh mai. 

"Phone i check sak em ni?" Zautein a lo tih chuan, "Aw..a pawi viau em ni?" tiin ka zawt let a, "Phone em em in check sak chu ka ti mai mai mawle" a chhip a a sam tuai chhoh pah hian a ti a, a kut lehlamin beer can a la hum ran tih pawh ka en chian tâk hnuah ka hre chiah. 

"In ngaizawn laia phone in check sak vel hi ka duh lo zawng tak a nia. A ţul ka ti lo a, a mawi lo ka ti bawk. Mahse, inneih hnu chuan pumkhat kan ni tawh a, ka pasal phone ka en sak chu a pawi viau em ni?" ka ti nawn leh a, lu a thing a, beer chu a in zui nghal a, an in lah chu a zalen hmel em em mai lehnghal. 

Rei tawk ka nghah hnuah a lo harh a, a mit nuai paha ka lam a lo hawi chuan a meng phawk khawp mai. A ţhu nghal sawk sawk a, a puan sin lai a theh hlim a, kawr a ha lo te chu kei ai mahin mak a ti zawk emaw tih tur a ni. 

"Zautei leh Rita-i te pawh mu tura an kal na a la rei lo. Nangmah vangin hmeichhe zurui pahnih ţawng ka ngaithla char char a, a lawmawm khawp mai" ka ti a, pindan chhung a melh kual lai chuan, "Kan pindan a ni lo. Hruai tur che a lokal ka nih hi" ka lo ti leh a, mak a ti hmel kha a bo a, nuam lo a tih hmel takzet tawh a ni. 

"No hnih bak ka in lo" a ti thawp sup a, a aw te chu a dik lo reng reng. 

"No hnih chiah i in a i chat thla amaw? I nghawnga hmui thla lang kalh te kha engtia tih nge i tum? I chhuak ve dek dek a hmeichhia i infawh tir nghal ringawt em ni a?" ka tih leh phei chuan a bangbo khawp mai. 

"Tumah ka fawp lo..ka lu a hai a, reilote ka mu anga ka haw ang ka tia" tih pahin sana a en a, dar2 a lo pel duai tawh tih a hmuh chuan, "Sana khi a thi aniang i sana bunlai kha han en teh" a ti leh a, "Nangmah ngei khan en rawh" ka ti a, a hmai zawna ka kut lek chhoin phal deuhin ka entir a, tim daiin min en reng ringawt. 

"Mi chuan an nupuite an ngaihven zawk a ni ngai a, nang chu ngaihven i ngai a, chawhma a duty ka ngai lehnghal, ka muhil ve hman dawn lo a nih hi. Zu in ve kher kher a ngai em ni a?" ka tih chuan a hmai a tuai thuak a, a mitmeng te chu ala dik lo, zu in tlem viau aiin a la ruih hmel lutuk. 

"Lokal teh" a tih chuan, "A duh tu ban a sei. Lo awm hnai mai rawh" ka ti hmak a, khum si chet a ţhu ka ni bawk a khumah chuan a bawk a, ka malchungah a lu a nghat a, "Tihpalh aw" tih sup pahin ka nâk a hmer zauh a, ka lo thaw hak ringawt a, ka thinrim a reh hleithei lo. 

"Tihpalh tih ringawtin engmah a fel thei hleinem. Ţhiante bula i awm pawhin fel fai deuhin awm mai ta che. Zu i in kher a, kan buai leh phah a nih hi. Hetiang te chuan i motor khalhah pawh ka chuang ngam tawh nang" lungawi lo ru taka ka tih chuan, "Ka harh tawh..ka khalh thei ang, hlau suh" a lo ti a, rem leh rem lovin ka dul a fawp a, a chet dan engmah hian min ti lungawi zo rih lo. 

"Ka ngei che a nia, kal ve kher lo la chu tui deuhin kan muhil bawrh bawrh tawh ang, a vawt si, ka ning" ka tih hlak hlak lai chuan, "I sawi dik vek..Nicholas hi a sual ngawt mai" a ti a, a nui zui hawk a, ka nuih a za ve der lo. 

"I bulah Rita-i a awm reng tih i hria em?" ka tih chuan, "Hre miah nang" tih ringawtin min chhang a, ka malah a hmai a la phum tlat a, ka nam sawn daih lo hi keipawhin mak ka in ti. 

"I bulah a awm reng alawm. Ka lo call che a, Rita-i bawkin min lo chhang a, a switch off vel bawk a, tihpalh tih ringawt khan ka thinrim a tih reh theih i ring em ni a?" tih pahin a hnungah ka beng chawrh a, a rik danah chuan a na viau ang tih a hriat. 

"Ka hre lo tak tak. Keimahin ka chho a, khuma ka mut hnuah engmah ka hre tawh lo. Ka hmu phir vek a, mumalin engmah ka hre lo" a ti thum dût dût reng a, "Phone aţangin midang thawm ka hria a, Zautein kan awm ve a ti bawk a, ni lo se chu Rita-i nen khan thil ţha lo deuh inti emaw ka ti ngei ngei ang. Inthiam lohna chhe te tal nei ve ta che" tih vak pahin a lu ah ka beng leh pawp a, engtinmah min ti let lo, na ti ang pawn a awm lo. 

"Ka inthiam lo a ngaihdam ka dil reng che alawm. Engmah ka hre lo tak tak a, hria ila chu ka bulah a awm lo ang" a ti ve tlat bawk si a, tih ngaihna tak pawh ka hre tawh lo. 

"Haw phawt teh ang" ka nam sawn a, a inthiam lo tak tak tih hre mah ila ka hre lo der tlat a, khum bula a kawr an dah chu ka la lawk a, amah vawm nan a hmang chung hian, "Ha la kal ang" ka ti chhum hmak a, ka thusawi a zawm lo ngam tawh lo. 

"Thinrim tawh lo la, hriat ka nei lo tak tak a nia" a kawr hak paha a tih chuan, "Thinrim lohna chi pawh a nih loh hi. Hmeichhe dang phei chu nise an tlan haw san che ang a, an be zui peih tawh lo ang che" ka ti a, khum mawngah dingin ka nghak ran a, "I danglam bik vang alawm ka duh tlat che" a tih chuan ka ner nak a, inhnuaiah kan inzui thla a, khuma Zautei mu chu kaitho in kan haw duh thu ka hrilh a, in haw dawnah min lo kaitho dawn nia kawngka kalh a ngai sia a tih avangin ka inthlahrung duh bik lo a ni. 

Kan kal dawn chuan, "Fimkhur tawh rawh aw Nicholas" a ti ve ngei a, kan tlanchhuah hnu chuan engmah ka sawi tawh lo. 

Ka ngawi reng chu a ngaih a ţha lo aniang, "Tihpalh ka tih kha a la tawk lo em ni?" a ti a, a lam hawi pah hian, "Fimkhur deuhin khalh la a tawk mai" ka ti a, ka hawi sawn leh hmak bawk. 

"Chaw ei khawm naah ka kal tawh lo ang, piancham lawm naah te. Hna thil a nih loh chuan khawiahmah ka kal tawh lo ang. I lungawi thei tawh em?" a ti chung pawhin ka lung a la awi thei tlat lo, a mak tak tak a ni. 

"Chutiang em em a khuahkhirh che chu ka tum lem lo. Kal char char pawh ni la fel fai deuhin awm la, pangngai deuhin lo haw leh bawk la chu ka thin a rim bik lo ang. I awm dan ang chiah hian awm ve ila nangpawh i lungawi bik tawp nang" ka ti a, kut min thlak duh hialin a nia ka rin ni. 

"Hmeichhe dang ka be ngai lo. Ka neih saah hian ka lungawi a, zanin kha chu thil thleng palh a nih kha. Ka duh dan a ni bik lo, Rita-i pawh ka lo hau ang" a ti dam thlup a, "Min ngaidam thei tawh em?" a tih leh chuan aw ka thian kharh a, tukverh lam hawiin pawn lam ka thlir ta daih a, awlsam deuh a kal pelh mai harsa ka ti tlat a ni. 

In kan thlen chuan kawngkhar ka pawt a, a lo inhawng nghal mai a, Hope khan a kalh lo lui a ni ngei ang. Motor a dah fel hnuah a lo lut ve a, kailawn bulah ka lo nghak a, min hnaih viau hnuah pawh zu rim ka hre mang lo a, in tlem in ti hle si a a chatthla thei kha a ni mak ka tih em em chu. 

"Eichak i nei em? Lei a ngai em?" pindan a kan luh ruala a tih chuan rum zetin ka melh a, "Ka duh zawng chu tlaiah ka lei vek tawh. Va inbual la a tawk mai, i nghawng a lipstick kai te kha hiat reh vek ang che" ka tih chuan nuihza hmel a pu a, engmah phei chu a sawi lo. 

A inbual zawh chuan ka lo mu fel der tawh a, khua pawh a var ţep tawh ang. A vawt angreng bawk si a, blanket chhah deuh ka sin chung pawh a mut lum harsa ka tih tehreng nen ka bula a lo mut chuan a taksa a vawt thlurh a, mut lum a ti harsa lehzual. 

"A vawt a nia" ka tih lahin, "Ka mu lum dawn reng alawm" a ti mai a, min kuah pahin ka hmuiah a fawp a, ka chhang let duh ţhak lo. 

"Min fawp let ve mai la" nui paha a tih chuan, "Ka peih lo...ka ngei lutuk che a, i bula awm pawh hi nuam ka ti lo" ka ti a, ka pasal bulah ngat phei hi chuan engmah ka zep peih lo. 

"Ka tihpalh ka tih tawh kha. A thleng nawn tawh lo ang. I awm chhung chuan hmeichhe dang ka mamawh hleinem" a ti vel a, ka kawr chhungah zen lutin ka dul bawk chu a chul leh a, "Hei hian i awm a lo ti nuam lo leh em?" a tih chuan, "Min ti hlim, nangmah hian ka awm i ti nuam lo zawk. Kan thawm kha ka paten an lo hre ru reng a nih chuan nangmahin sawi fiah vek ang che, ka pui dawn reng reng lo che a nia" ka ti khar khar a, ka mut chhuak viau lo phei se chu ka hau nasa khawp ang. 

Zinga ka harh chuan ka bulah a lo mu tawh lo a, ka ţhut chhuah rualin kawngka kalhna a ri rak a, ka pasal chuan thingpui leh chhang a lo chawi lut a, ka nui teuh kher mai. 

"Dar7 a la ri lo, kha thingpui in rawh" tih pahin khum bul chhuar chungah a dah a, "Ka rawn chhuk mai dawn alawm. Kungtei pawh ka pui ve ang chu" ka tih chuan, "Tih tur a awm lo. Hei hi in la, mu hahdam rih rawh" a ti a, min tih lawm a tum nasa lutuk chu a khawngaihthlak zawk. 

"Insiam a hun mai dawn a, ka mut leh chuan ka tlai ang. Ka in zo anga ka inbual nghal mai ang" ka tih pawhin, "Ka thlah dawn tho che a hmanhmawh vak suh. A hun taka i thlen theih chuan keichu tlai mah ila a pawi lo" a ti a, min nuih tlawn vel a, zan lama thil thleng kha chu sawichhuak leh duh mah ila inthlahrung deuh a sawi a ngai tawh ang, chutiang vel chuan ţhat a chhuah a ni. 

"Nidangah pawh min thlah ziah a ka tlai ngai chuang hleinem. I awmdan hi tihsual nei i va ang ve" ka ti a, inhauh ka peih vak bik lo a, ka awm a nawm loh bakah luak chhuak reng te hi ka hne hlei hlui tawh a, ka ţawng duah peih loh lai tak a nih ber chu. 

"Ka zawi lai i nang fuh a i vannei khawp mai" ka tih chuan, "I kutthlak a nat tho kha" a ti a, nui ruh ruh chungin ka bulah a lo ţhu a, a mitmeng pawh a pangngai leh viau tawh. 

"Khatiang thil kha a thleng leh a nih chuan kan inah ka haw san daih ang che" ti a ka vau lai chuan min lo kuahin ka nghawngah a fawp a, a hma angin za ka ti em em tawh lo. 

"I haw daih teh ka khua a har anga sin" a lo ti uang a, ka thinrim zia a hria a, ţawngkam mawi lo deuh deuh hmangin ankhum mah ila a thinrim veleh duh chuang lo ang. 

"Ka tello a awm i huphurh a nih chuan khatiang khan awm tawh suh ang che. Rita-i hi hnaih tawh hlek suh" ka tih chuan, "I thu vek alawm" a lo ti leh mai a, a thingpui lo ken chhoh chu ka in a, chaw ei hma ka ngaih avangin chhang erawh ka ei tel lo thung. 

"Ka inbual lawk dawn" ti a thawh mai ka tum chu, "I kal hmain vawikhat chiah" tih leh ka hmui a fawh a rual a, keipawn ka lo fawp let ve tawh a, ka lungawi tawh emaw a ti ngei ang a, Rita-i nen a an chanchin sawipui ka la tum tih a hre hauh lo. 

Chaw ei tuma ka chhuk chu min lo en ţhap a, zan lam a thil thleng kha an sawi dawn emaw tiin ka hlauthawng hman viau a, mahse ka chaw ei kham thlengin engmah an sawi lo a, Hope-i leh Pa Chhawna tih loh chuan min be hauh lo bawk. 

"Rita-i nen inla inbe ţhin em ni?" ding deuhin hmalam a en a, traffic a jam leh hman hlauin kan chhuak hma lehpek khawp mai. 

"Min lo bia a ka be ve lo" a tih chuan, "Block mai ta che" ka lo ti a, "I duh chuan nangman i block dawn nia" a ti daih chu mak ka ti khawp mai. 

"Nangmah a bia che a, i phone a ni bawk a, i block zawk ang chu" ka ti hlut a, ka pasal mah nise a awmdan hi hriatthiam loh chang ka la ngah hle tho mai. 

"Keichuan engahmah ka ngai lo a, ka block chuan keimahah awm a la awm emaw a ti palh ang. Min nin vang a ti duh dawn lo a, message min thawn tlut tlut se, chhang let duh miah lo ila a beidawng hma zawk ang" a ti a, a sawifiah chuan a dik thlup tho bawk si a, henu hi chu a hnawk sak takzet a ni. 

"Nizan a ka rawn kal hma khan ka nu nen kan inbia a, naktuk hi nilengin ka chawl thei dawn a, day off ka tihna a nih chu. Sawrkar chawlh a lo ni ve chiah bawk a, Liantei nen kan lo leng ang a tia" ka tih chuan, "A ţha alawm..lo leng rawh se" a ti mai a, ani hi chuan rawn riak mah se a sawisel kher lo maithei, ka venthawn ber zawk chu Nu Hlimi a ni. Min duh lo nasa mai bawk si nen, ka nute lehzel an lokal chuan a lung ka ti awi lo zual ang tih a hlauhawm. 

Damdawiin kawtah a ding a, motor aţanga ka chhuk dawnah chuan, "Hrehawm i ti lo tiraw?" a ti a, "Eng nge awmzia?" ka lo ti he haw a, min zawh dan teh thut hi a mak em a ni. 

"Rita-i leh nizana thil thleng vel kha. Ka duh vang a ni lo tak tak aw. Ka zu in kha a dik lo aniang, tihpalh tak tak a nih kha. A thleng nawn tawh lo ang" thutak deuh hian a ti a, "Rita-i hnaih tawh lo la a dik a ni mai. Min tih thinrim nan leh kan inkar a khik theih nan i zu in turah i hriat lohin damdawi eng emaw a lo telh ru te pawh a ni thei a, ka ngaihtuah chiang a, i bula a lo awm reng danah khan tum nei rana thil ti a ang. Ka thik tur leh tum nei rana thil a tih a, a bula i awm theih nana hrai ruih chawp hial i ngai a nih chuan i sawi ang khan engahmah i ngai tawh lo tihna a ni mai. Chu mai bakah min neih dawn khan min duh lo hle a, i pa thu i hnial hreh vang chauh a min nei i nih laiin Rita-i nen in inzawmna i pawt chat vek duh tho a, min duhna i neih loh chu thuhran, min haw viau chung pawhin hmeichhe dang i kawp tel duh tlat lo a, chuvang chuan ka ring che. I fair tih ka hria a, ka ring che a, ka thin a rim thung. Nizan kha chu inven nachang i hriat loh vang a thleng a ni a, tihpalh a nih kha. A thleng nawn leh a nih chuan tihpalh ti mah la tihpalh ah ka ngai ve thei tawh lo ang" ka ti duah a, ka kut chu la kangina fawp vang vang a, "Ţhuro ianga zaidam nunnem nupui i nei thei hi vannei in ti hle rawh" ka lo tih chuan a nuih a za viau mai.

"Umm..ka vannei alawm. Kal tawh rawh, hunawl ka neih hunah ka lo bia ang che. In dim la, tu hmel mah enchian loh tur kan tih kha aw. Kan naute in midang a an daih chuan kan hawi lawl lawl mai ang" a ti fiamthu a, nuih hak hak pah hian, "Khatiang thu atthlak lutuk kha awih tawh suh. Nu leh pa te chu min chhun ve bawk lohin, lo ngai reng rawh, keimahni ang deuh a rawn chhuak nawlh mai ang" ka ti a, kan han nui dun leh rih ţhin a, innei awm tak pawh kan lo ni a nih hi a. 

Ka kut a vuan a, thil pawimawh deuh a sawi dawn emaw ka tih laiin, "Vannei ka inti tak tak. Ţhuro ianga zaidam nunnem bakah Cleopatra ianga hmelţha Cleopâtei ka nei thei a" a ti a, sawi ho viau mah se ka nuih pui leh vak tho. 

Ka chhuk dawn thlengin ka kut chu a vuan a, ka chhuk fel hnuah a thlah ve chauh a, "A nih aw Cleopâte" nuihza aw zet a a tih rualin motor pawh a tawlh ve riai riai a, ka nui var var reng mai, Nicholas chiah hi mipa, pangpar anga ka en loh awmchhun a ni. 

CONT..