HIS LAST LOVE-25

HIS LAST LOVE-25

"Vawiin chu ka chawlh ve ni a ni bawk a ka nute an lo leng dawn a nia aw" midangin ka thusawi an ngaihven em em loh laiin Nu Hlimi chuan, "Eng nge an lo tih dawn?" a ti a, han zah der ve tum viau ţhin mah ila a awmdanin a zir loh miau chuan a harsa thei khawp mai. 

"Inneih ni a an lokal bak kha an lo la kal leh lo a, sawrkar chawlh a ni tho bawk nen, kan lo leng dawn an ti a nih kha. An awm rei lo ang" pangngai tak hian ka ti a, a la tum hmuk tho. 

"Lo leng rawh se...kan inhmu khat alawm. I pa rawn tel ve thei se ţha tur a nia, a lo tel loh hmel bawk si a" Pa Chhawnan a tih chuan, "Aw..Liantei nen chiah an lokal ang" ka lo ti vat a, Pa Chhawna tak hi chu hrawn a harsa hran lo a, a rilru a kawi ve vak lo bawkin ka hria. 

 "Hna thilah chhuah i ngai a, hmuh pawh i hmu hman dawn em ni?" Nu Hlimin a lo ti leh hmanhmawh a, a ţawng pawh a nem lem lo khawp mai. 

"Ka chhuah hmain an lo thleng hman em ang chu. Ka hmuh hman tak loh leh in awm alawm. Chaw te pawh ei nghal law law se a ţha ang" a ti a, Nu Hlimi chuan a chhang tawh lo nain ka nu te lo leng tur chuan a lung a ti awi vak lo tih chu a hmel landanah a hmuh theih. 

Pawnah kan nupain kan lo nghak a, Nicholas chuan min fiam leh zeuh zel a, keiin Rita-i bula a awmdan ringawt ka la sawi thung. 

"Engmah lo hre lo ta pawh ni la hmeichhe dang bulah i mu reng tho a nia" ka tih chuan, "Rai i haw vak lo a nih hi tiraw? A vanneihthlak" a lo ti daih a, thinrim a sawi ka ni lo bawk a ka nui veleh mai a, min ngaihtuah ţhin em avangin ka awmdan tak hi a zawng zawngin ka hrilh duh lem lo a, hmeichhe dang ang bawkin rai no hi nuam ka ti bik lo. 

"Fa pathum vel ka neih meuh chuan ka ni deuh luih ang a, ka hnute a uai pur ang a, ka sam a kawh fur bawk ang a, nang lah i lang naupang tial tial awm si a, tlangval i kham chiah loin ka hre bawk a, min lerh san duh mai ang a" fiamthu ti tak deuha ka tih chuan, "Khatiang zawng khan ngaihtuah lo la i hahdam a ni mai" a ti vel hmak a, "Nicholas, lo lut lawk teh. Pot hi ka chawi zo lo min lo tih pui teh" Nu Hlimin a tih tak avangin inchhungah min luh san a, ka nu te pawh an lo thleng chawpchilh deuh nghal chu a ni mai. 

"I nu pangpar ho chu an mawi hle mai. In inneih ni khan kan lokal ve tak nain ka lo en lem lo a, tualzawl chei mawi tham a nei a nih hi. Ka duh ve tehreng nen kan in awmna in a zir mang si lo a" ka nu chuan a ti leh rih a, pangpar ho chu a enkual a, ning viau mah ila Liantei nen chuan kan zui ve zel a, pangpar a hmuh tawh chuan thil dang a ti hleithei ţhin lo. 

"In lo va thleng hma leh si ve" ka pasalin a rawn tih takah chuan, "Nia..kal vat ila haw leh vat ang kan tia, tum angin kan hma thei lo zawk a" a ti a, pangpar pawh chu a kalsan ve ta nge nge a. 

"Ka pa a chhuak hman a, a hmuh chak tehreng cheu nen" inchhung a luh pah hian ka ti a, Nu Hlimi pawh a lo awm ve tak nain ka nu'n a biak hma chu a be lo a, a biak lahin a rul tawk chauhin a chhang a, ka lo inthlahrung zawk. 

Inpui a kan ţhut khawm ţhap hnuah Kungtein thingpui a rawn sem a, "Nangmah hian lum tur che alawm. Lo chhawr bawrh bawrh ru aw..hna a kal loh ţum chuan a chhawr theih ve viau a nia, in bulah a awm a, hma pawh a sawn nasa khawp mai" ka nu'n a lo ti a, a nuih pah hak hak laiin midang chu an nui ve lem lo. 

"Chhawr na hun pawh a awm vak lo. Tumah hian kan phut lo hrim hrim a, tunlai mo te chu an nuam sa tawh a, zing thawh hma a ngai tawh mang bawk si lo a, engpawh ti se Kungtei leh phir ten an tih pui zel a, a night ţum phei chuan a rawn haw hi nilengin a mu a, kan sawisel hran lo a nia aw, a hna hi kan hrethiam a, chhawrna hun a awm lo ka ti satliah mai a nia" Nu Hlimin a tih chuan ka nu nui hmel a ral riai riai a, a sawi uar nasa mai bawk si, ka thin a rim leh ţun tawh.

"A nih chu mawle...in lo dawm thiam a in fakawm hle mai. A night ţum hi chuan kan bula a awm lai pawn inkhawm ţhulh ţhak ten a mu ţhin a, an hna hi a hahthlak ve bawk si a" a ti nawi niaih a, sawi tur a hre lo lutuk chu ka lo khawngaih zawk.

"I pasalin a chawm thei che a, keini kan la dam bawk a, in luahman chawi a ngai lo lehzel nen bang mai rawh ka ti fo a, a duh lo tlat a, private ah a thawk a, hlawh a tam chuang bawk si lo, bang se hahdam deuhin awm se a ţha ber mawle" a tih lai chuan Nicholas ka va en a, ani chuan Nu Hlimi ngawt chu enin mitmeiin a khap ve reng a, awmzia a awm hlawl lo a ni. 

"Hah deuhin ka zir ve a, theihtawp ka chhuah ve ka tih tawh kha. Ban daih ringawt chu a uiawm ve em alawm" ka lo ti a, ka bula ţhu ka nu chuan ka malah min kheuh zeuh a, a kut chu lo vuan betin ka hum zui vang vang a, ka nu hian keimah ang bawkin fiamthu a duh nain a nasa tel ve lo a, chuvang chuan mi nasa lutuk nu Hlimi te ang chu a hnial hneh lo nasa ang. 

"Hlawh a tlem a nitin kal ve bawk si chuan awmzia a awm lo alawm. Ril a ţam a, thil ei ngei ngei a ngai a, motor man nen, thla khat chhunga pawisa i hman chhuah zat kha chhut la, i hlawh zat nen, chan i nei tlem viau ang" a ti lehzel a, "Hlawh chu a tam lo, mahse ka hna neih ve chhun a nih hi" ka tih lai chuan ka nu'n ka kut a lo hum let a, ngawi turin min duh tih ka hria, mahse ka nu lehzel pawh zah derna pakhatmah nei lova a ţawng bawng bawng hi ka haw ve em a ni. 

"A duh lo chung chung kan zirtir a, a lo tuipui ta phian sia, a ţhiannu ber Ngheti nen an thawhna hmun a lo inang lehzel bawk nen, a hna hi nuam a ti ve tawh a, fa te an han nei ang a, a thawk reng peih kher lo maithei a ni" ka nu chuan a ti ve bawk tak nain a rilru diktak a sawi chhuak lo tih ka hria a, inchhung boruak lah chu a uap leh churh tawh a, ka pasal lungawi lo hmel ka hmuh takah phei chuan buaina kan neih leh ka hlau ru leh et et tawh.

"Fa an neih chuan duh lo mah se a ban ngei ngei a ngai ang. Ka hrisel lo a, nau ka awm thei dawn miah lo a, awmpuite kuta fate dah lah a ţhat loh zia tu pawn kan hre vek a, phir te lah zirlai an nia, midangin hna an nei vek bawk a, a ban tawp mai loh chuan tih ngaihna a awm lo" a ti dam thlap a, ka nu nen a kan invawnna kut chu a thlan dap tawh a, ka pasal nen hian Pa Chhawna duh ang a innei kan ni a, Nu Hlimi hian min duh lo viau pawh ni sela ka nu awmlai lehzel a insum karna nei miah lo a a ţawng duh hi a ngeiawm a, min hmuhsit zia a hriat theih bawk. Min en hniam viau lo se la chu lo nasa deuh pawh nise hetiang zawng hian ţawngkam a nei duh lo hrim hrim ang. Dam deuhin ţawng hluak hluak mah sela a thusawi kha a dawngsawng tu tan chuan a ngeiawm lutuk tlat a ni. 

"Bang kher lo a tih dan a awm mai ang. Hei ka nau pawh a awm a, hna kal dawnah la dah ang a, banah ka lam leh mai ang a, tunlaiah hna a van tawh tehreng nen ka bang phal teuh lo mai" ka lo ti leh a, ka nu phei chuan sawi tur pakhatmah a hre ve tawh lo. 

"Naupang chu nu te hian kuah chawt se a fuh ber. Lak lawr lutuk te hi a ţha ngai lo. Hna ai chuan fa te an pawimawh zawk. I pasalin a chawm thei che a, thlaphanna tur a awm lo. I nu leh i naute tihbuai reng ai chuan nangmah ngei khan enkawl la, i inchhir lo zawk ang" min ti a, ka chhan leh hma chuan, "In ho emai. A pum pawh a la puar em lo a naute chungchanga in hnial a la hun lo. Hna chungchang pawh kha Saii thu thu ni rawh se" ka pasalin a lo ti hlauh a, Nu Hlimi chu a tum bur a, ka nu leh ka naute chuan nuam lo an tih hmel khawp mai. 

"In lo leng ngai si lo a pindan vel te in en duh em? Nghetin min rem fel pui vel a, a nuam reuh lutuk a sin" ka tih chuan ka nu'n "A ngai lo" a lo ti vat a, ka kut a vawn lai mek zawk chu a pawt pah kher lehnghal. 

"Pindan a kal kher loin heti hian kan inkawm thei alawm. Phir te chu an leng chhuak em ni a?" pangngai deuh hian a ti leh a, "Pindanah an awm aniang" ka tih lai mekin Hope a lo chhuk a, tarmit a vuah a lehkhabu a ken tawh hi chuan thil dang tih nachang hre lek lovin love story a chhiar tihna a ni ţhin a, tunah pawh lehkhabu a hum ran mai. 

"In lo leng elo? In va fel ve a" a ti a, nu Hlimi bulah chuan ţhuin ka nu te hmuh turin a nui sang a, Faith-i a tel ve lo chu ka lawm ru angreng. 

"Eng lehkhabu nge i chhiar a?" Liantein a lo tih chuan phur deuhin a hrilh a, sofa awl pakhatah an insawn a, duh zawng leh nuam tih zawng inang na na na chu an ti ti dun nghal bawrh bawrh mai. 

"In sawiselna te i nei hran lo maw? Nau pai lai chuan in uluk a ngai a nia aw..tluk palh te a hlauhawm a, che phut phut lo la, fimkhur viau ang che" ka nu'n a tih leh takah chuan, "In uluk ve e..neih nghal daih theih se ka ti. Tun aţangin ka huphurh nghal em em a" ka ti a, kan nufa a kan han nui dun vel chu a lo hmu leh thei pek lo aniang nu Hlimi chuan, "Naupang tea fa neih hi chu a buaithlak chang a awm a, in hmanhmawh lutuk a ni kan in ti reng mai. Ţha deuh a a neih theih loh erawh kan hlau tho a, eitur pawh kan fimkhurpui a, a ngaihtuahawm loh ang" a lo ti leh zung zung a, thei leh thlai thlengin Nicholas vekin a lei ţhin sia, thudik ka hre reng chung pawha ka mitmei veng hauh lo a dawt a sawi thei hi ka thin pawh a rim lo, nuihzat lamah a kal tawh zawk.

"In lo buaipui a in ti lawmawm tak tak a ni. Nangni in ni hlauh a kan thla a muang a, in enkawl ţha dawn tih kan hria a, rilru nuam deuhin kan awm ţhin. Saii pawh hian nuam a tih thu min hrilh ve reng a, kan pa pawn a fak khawp mai che u" ka nu chuan a ti ve bawk a, a ruk tak chuan min ngaihtuah viau ang. 

"Mi kan duat hluak hluak thiam ve vak lo a, a hun a in ngaihsak hi a ni mai a. Sawi leh ţhin ila hna chungchangah pawh kha, amah kan ngaihtuah vang zawk a nia. Hlawh tlem si, a hah tho bawk si hi kan khawngaih a, kan sawichhuah hian Saii pawhin huat chang a nei ang, hna a neih ve kan remti lo emaw tih chang te a nei maithei a, mahse kan khawngaih vang zawk a nia, fa a neih hnuah ngat phei chuan a hah lehzual dawn lutuk a" a ti leh vel a, a nun lem lutuk hi keimah zawk ka lo hah ţhin. 

Ka nute haw tur chu ka zui chhuak ve a, Nu Hlimi erawh chu an haw dawnah phei chuan hmuh tur a awm tawh lo. 'Inchunga ka pangpar dah ka han ngaihven lawk ange' tiin chhuanlam a siam a, a kal ta kha a lo let tawh lo a ni. 

"Liantein scooty keng lo se chu in makpa hi inthlah haw tir ula ţha tur a nia" fiamthu a ka tih chuan, "A ni dawn tak e tiraw? Makpa chhawr na hun pawh kan la nei lo a, eng emaw chu ngaihtuah a ngai a ni" ka nu'n a lo ti ve nghal zat a, "Lo ngaihtuah char char rawh u. A chak a, thiam loh a nei mang lo a nia" ka ti a, ka nu nen kan han fak tak tak chu lai deuhin a lo nui ve suk suk a, sawi tur a hre ve mang lo thung. 

"Lo leng fo ula aw" a tih hnuah inchhungah min luh san a, ka nute nen chuan sawi duh kan neih a ring te pawh a ni mahna. 

"I nu kha i chhang let char char a, a ngaihdan a nih loh hmel em kha. Mo nih chuan dawhtheih te a ngai a, awmdan tur chu ka hrilh vek tawh che kha" a ti chiah reng a.

"Ka zah ve lutuk alawm. Ka hriat lai ngei a ka chanchin chhe lam a sawi te, min sawisel bawih bawih chang te pawhin ka chhang let ngai lo. Chhan ve zeuh chang nei mah ila ka pasalin nu leh pate chu zah ve deuh la a tih ţhin avangin ka zah der ve tho a, ţul tawpah lo chuan ka chhang ngai lo ang a ni mai. Bakah Nicholas hian ka thlavang a hauh tlat a, a awmlai chuan min khak fek fek ngam vak lo zawk a, keimah chiaha an zinga ka awm chuan ţawngkam chhe tleuh nan min hmang ta mai emaw tih tur te a ni ţhin a, chutiangah te pawh chuan ka chhang let ngai lo. Mihring chuan dawhtheih loh chin kan nei ve a, ka dawhtheih loh chin a thlenin ka chhang let a, ţawngkam tawi te pawn chhang ila an haw em em zel a, chutiang vel chu a ni mai" ka ti deuh duah a, ka nu chuan min en vang vang a, a mitmengah chuan min khawngaih tih ka hai lo. 

"I pa'n pasal neih tir che a tum khan ka remti lawk bik lo a, mahse pasal te chu hnial an lo har aniang, chumai bakah i pa'n engkim a hrilh tawh che kha, lo inrawlh ve sek a, lo hnial kalh reng kha ka inthlahrung a, i pa sawi ang tak takin Nicholas chu a fel a, sawiselna tur kan hre lo. A hrehawm deuh a nih pawhin tuar hram hram la, tawrh chhuah hun a awm ngai a nia" a tih chuan, "Min ti duhdah viau ta se min la chhuak daih duh angem?" ka lo ti a, min en phawk khawp mai. 

"Eng nge i sawi awmzia ni a?" tiin min lo zawt let ha a, "Aww...ka pasalin in dan daih a duh laiin Pa Chhawnan a phal lo bur a, sawi chhuah chuan chhungkaw buaina a ni nghal zel a, Nu Hlimi lahin min ngaithei lo nasa mai bawk si, min ti rethei viau ta se min hruai chhuak daih duh angem ka tihna a nih chu" ka tih chuan Liantei zawkin, "Tunah pawh hian kan rualin lo haw daih mahla pawi ka ti lo. I nu kha a sual hmel emai, a hrehawm dawn lutuk. Mahse, U Nico a khawngaihthlak sia" a lo ti a, an pahnih chuan min en tlawk tlawk reng a ni ber. 

"Kut an thlak bur bur che a nih loh chuan kan hruai haw thei ngawt hleinem che. Mo nih chuan chhel a ngai ka tih tawh kha, bakah lo haw ta la Liantei sawi ang khan Nicholas a khawngaihthlak lutuk ang, a khua a har dawn bawk si. Thu ţha ka hrilh ve ţhin che kha hrereng la, i la tuar chhuak em em ang" ka nu'n a ti thung a, "Pawisa hman chawp tur i nei em? I pasalin a pe ţhin ang che tiraw? Pawisa hman huau huau i hrat bawk si a, khatiang te kha sim rawh aw" a tih leh chuan, "Pawisa a ngai lo ka nei alawm. Ka mamawh ang chu Nicholas hian kei aiin a hria a, min lei sak mai zel a, ka ngaihtuahawm miah lo a nia. Zikpuii bulah engmah sawi suh u aw..ka pa bulah pawh an duat lutuk ti tlat ang che u. Ka tana ţha tur ni a a rin avangin ka duh lo chung pasal min neih tir a, Nu Hlimi ten min tih dan a hriat chuan a inthiam lo lutuk palh ang. A bulah khan sawi tho mah ila keimah ka nih miau avangin ka sawi uar lehpekah a ngai dawn a, nangmahnin in sawi ve chuan a inthiam lo dawn sa a nia" ka ti mawlh mawlh a, pawn a kan din reng chuan min rinhlelh ka hlau ve tho si a, "Kal tawh rawh u" ka tih chuan anni pawhin min lo hnial bik lo. 

Inchhunga ka luh rual chuan inhau thawm ka hre nghal a, choka aţanga rawn chhuak a ni nghe nghe. Ka tlan phei thuai a, ka pasal leh nu Hlimi te lo indin chilh ran ka hmuh chuan hrilhfiah chawp ngai lovin engkim ka hrethiam nghal vek. 

"Hmeichhia in pasal an neih hnua an chhungte lam an inrawlh nasat lutuk chuan a dik thei ngai lo. Kan fanu a ni tawh a, he in hi a in a ni ve tawh bawk. A in la hrang tlat a, pawh tum mah ila a theih loh ţhin. An in lamah chaw in ei phei reng a, a nu te pawh kha an lo leng sek mai ang" nu Hlimi chuan a ti hlak hlak a, min hmu lo a ni phawt ang. 

"I ngaih ang kha a ni lo" ka tih chuan ka lam a lo hawi a, choka luhna bulah ka ding a, min hmuh hnuah pawh a hmel a la danglam chuang lo. En thuak pawhin a thinrim zia a hriat theih ang tih tur hmel a pu alawm. 

"Nuţa i nei lo a i hrethiam lo pawh aniang. Mo neih ve lem si a an in lak hran tlat chuan nu leh pa mai bakah unaute pawn nuam an ti ngai lo. Kan in hi i in angah i la ngai thei lo a, keini pawh nu leh pa angah min ngai thei chuang lo, mi hrang anga i la in ngaih tlat vang a nih hi kan inpawh theih loh" a tih chuan, "Ka chhungte hi awm hnai viau siin an lokal ngai lo. Vawiinah vawikhatna atan an lokal ve a, i ngaithei lo ringawt a, chaw kan ei phei dawn pawhin kan dil thlap zel che a, i phal loh chuan ka phal lo ti la kan ei lo mai dawn alawm" ka ti ve a, ka nu te kha ka khawngaih a, ka lung a awi bik lo em a ni. 

"Kan phal loh zel chuan thinrim nan in hmang ang a, in vui leh mai dawn a sin. Kan in hi i in ang chiahah ngai la chu ka nu te i ti sek lo ang. Kan ngawi mai mai a, i sawi leh min dil apiang kan aw zel a, lawm nachang i hre chuang lo" min ti a, ka nu te an lo leng ve a ni mai a, min ţan zawngin ţawngkam an nei miah lo bawk a, a eng khan nge a thin ti rim em em pawh ka hre lo e a. 

"Ka nu bulah hian ka vui ngai lo hrim hrim. I ngaih angin ţhenawmte hnenah in chhiatna lai ka sawi ngai lo bawk. Ka len ve hlekin rel nghal zel tur cheah min ngai a, kan in lama kan kal leh vui turah min ngai a, ka tan hian awm dan thiam a har ve tho a sin. In ngeih leh inpawh tlang taka awm chu ka duh alawm mah se min ngai chhe em a, kan inpawh theih lo a nih hi" ka ti ve salh salh a, dawt ka sawi lo bawk. Kan inneih hlimah bak ka nute hriatah ka vui ngai lo va, Ngheti hnena chhungkaw boruak ka sawi bak tu hnenah mah ka sawi ngai lo, min ring chhe thei lutuk hi ka kham tawh takzet a ni. Tun hi nu Hlimi nen kan inhauh tak takna hmasaber a ni maithei, ngawih ka chuh a kan inhau lo a ni mai a, tun ţum chu ka ngawi thei thlawt lo a ni ber. 

"Duhtawk rawh u. Ka nu pawh ho te teah thinrim tawh lo la, nangpawh ngawi tawh rawh" tiin ka pasalin min lo khap hlauh a, ni lo se chu a ţawng chhung zawng ka chhang ang ka ti hman tawh a, a thinrim viau nain thiam lohna ka nei tlat lo a, ka hlau hran lo. 

"Ka thinrimna kha a ho hleinem" a tih chuan, "A tawk ka tih chu" khauh deuh zawk hian a lo ti leh a, fridge bulah tim daiin Hope a ding a, a lungngaih hmel hle bawk. 

"Saii nu te an lo len ve kha a pawi hleinem, chhungkaw inpawhna zawk a nia. An awm laiin i ngaihtheih lohna i ti lang vak a, min ti zak khawp mai. Thleng nawn tawh suh se, tun bak ka sawi tawh lo ang" a ti a, a kal nghal daih chu ka enzui a, nu Hlimin min melh rum em avangin ka umzui lo thung. 

"U Sai, rawng kan bawl dawn mi? Ka pa te an lo haw chuan chaw ei an rawt leh mai ang" Hope a lo inrawlh hlauh chu ka lawm ngei mai. Nu Hlimi chu kal pelin ka pan hnai a, fridge ka hawn veleh kan thlai dah ţhat ho chu min lak chhuahpui a, "Hope, thingpui lum rawh. In leng kan nei a puar khawpin engmah kan ei hleinem" meinei deuh a a lo tih chuan chawhmeh la a ka kun chu ka ding ngil zawt a, a dinna lam ka hawi rualin Hope chuan ka kawr banah a lo pawt a, kan inhauh leh a hlau tih hrereng mah ila, "Ka nu leh pate ka bia ang a, lo leng tawh miah lo turin ka lo hrilh ang. I puar loh alawm kan hlauh, thingpui chu keiman kan lum ange" ka ti ve ngat a, nawm loh lai, thinchhiat zual lai a ni bawk nen, nu berin kawhmawh a bawl chu ka ngaithei der lo. 

"U Nico-an sawi tawh suh u a tih kha. In aţanga chhuah a tum leh phei chuan ka pa a inrawlh leh ngei ngei dawn a, kan buai leh vak a ni mai. U Saii nu te lo leng ve mai mai chu ngati nge i helh viau a? Kan khua a har loh phah a, a nuam daih zawk alawm" Hope chuan a lo ti ve sap sap a, henu te hi mahni inchhungah pawh a tim dai reng mai. 

"I pa chu ka sawipui ang a, an duh phawt chuan chhuak rawh se. Thingpui chu nangman min rawn pe ang che" tih leh choka aţanga chhuah a rual a, ka inher rualin Hope chu a thaw hak a, beidawng ngawih ngawih te pawh a ang alawm. 

"Ka nu hi chuan a rilru a thlak reng a, vawiinah in chhuah a phal a nih pawhin naktukah chuan a phal leh tawh lo ang. Kan inchhung hi a hrehawm tiraw?" a ti a, a nui hul hak a, a inthlahrun hmel khawp mai. 

"Ka lo awm hmain hetiang hi a ni tho em?" ti a ka zawh chuan, "Ni e..U Nico leh Anthony te hi an inmil ngai lo a, an buai reng zel alawm. Ka nu leh pate an inhau nasa ţhin bawk a, boruak muan lai a awm tak tak lo. Nangmah vangin kan buai an tih pawhin awih duh miah suh, kha nau i pai tawh lehnghal a, hun hrehawm berah pawh beiseina nei tlat rawh ka tih kha aw, a pawimawh a nia" a ti dam thlap a, ani hi chu ngainat loh theih pawh a ni lo, a rilru a ţha em a ni. Phir ve siah chuan an hmel leh pianphung tih loh chu Faith-i nen hian an danglam hlak a, mi hrang hlak ang mai an ni. 

Pindana ka luh chuan khumah a lo mu a, rawngbawl zawh vek hnua chho ka ni bawk a a lo inbual fel diam tawh bik aniang a thawmhnaw thlengin a lo thlak tawh a, amah pawh be lem lova towel ka ben lai chuan, "Lokal teh" a lo ti a, ka kal ve mai bawk. 

Khuma ka lawn lai chuan ka banrekah hmerin a lamah min pawt hnai a, "Na hrehawm i nei em?" min ngaihtuah hmel taka a tih chuan lu ka thing a, towel la vek tawh si kha a bulah ka mu a, ka kham turin a ban a lo dah rem thlap bawk. 

"Kan inchhung hi hrehawm i ti em?" a tih lai chuan a mutna lamah ka saisir a, a awm thai neuh neuh chung hian, "Ti ve tho e" ka ti sap a, mahni inkhawngaihna ka nei leh tawh a, ţah te lam lam a chhuak alawm le. 

"Mumal deuhin ka pa ka lo sawipui ang" a awm a ka kut dan chu a vawn hnan a, "Ka nu ka chhang ve vak kha i thin a rim em?" ka tih chuan ka kut chu la kangin a fawp zauh a, "Thinrim lo e..a thiam bik lo alawm. Ţul tawpah lo chuan nangpawn chhang lo la, a thinrim apianga i chhan ve zel chuan thiamthu sawi tur i nei bik dawn lo tihna a ni mai. Engtin pawn awm se ka nu a nihna a bo dawn lo a, ka nu a nih chuan i nu a ni ve tho tihna a ni bawk. Ka hmangaih cheu a, ka tana hmeichhe pawimawh tak in ni ve ve. Thil thleng zawng zawng leh in awmdan te hi ka en liam mai mai ngai lo. Ka chik ru reng a, an dik loh naah chuan keiman ka hau mai ang. An fapa ka nia, min haw thei tak tak lo. In inkar a zau zel loh nan nang chu loh theih loh chinah lo chuan i ngawi daih zel dawn nia" a ti charh charh a, a chhungte chunga ka lungawi loh zia ka sawi zui duh bik lo. Lo vui vak ta ila tunah chuan min huat pui ngei ang a, an dik lohna a hmuh ve miau avangin a thiam bik lo ang. Mahse a chhungte, a pian tirh aţanga enkawl tu an ni a, ka pasal ngei pawh hian a haw rei thei bik lo ang. Faith-i kut a thlak ţep ţum pawn reilote hnuah a khawngaih leh tho a nih kha, chhungkua chu a dan a dang a, keichuan ka duh chen chen ka be lo thei ang a, ka haw kumkhua thei bawk ang. Chutih rual chuan ka pasal hian a thei ve dawn lo a, awmdan tawk thiam a ngai khawp mai. 

"Ka pa bulah chuan in dan chungchang bawk i sawi leh dawn tihna mi?" ka tih chuan, "Umm..a ni mai ang chu" tih zawngin min chhang a, kan ngawi zui rauh rauh a, Nu Hlimi hian ka englai hi nge a huat em em ka hre lo, ka nu te lehzel pawh zah pah lo takin a ţawngkhum duh chu a nia, in dan sawi lahin buaina a chhuak a ni zel si, mak tak maiin Nicholas nen hian kan inneih rei theih ka ring lo tlat a, a chhan pawh ka hre lo, thil awmdan vel leh a chhungte mizia zawng zawng nen, inţhen hun kan la neih ka ring tlat a, chu chuan hlauhna min siam sak ve ţhin. 

Ka lo muhil aniang ka hmai za mer mer chuan min ti harh a, ka bulah ka pasal a lo la awm reng. Hnai deuh ah min lo en a, ka men rual chuan ka hmuiah a lo fawp a, ka nui chhuak hak nghe nghe a ni. 

"I chau a ni maw Cleopâte?" a ti deuh kher a, a awm a nam dat pah hian, "Khati khan min ko kher suh. Nangmah vang hian hming ka ngah tawh lutuk a ka hming tak pawh ka hre lo ţep tawh" ka ti a, thawh mai ka tum chu ka hmuiah bawk duhthaw zetin min lo fawp leh a, a inla hrang leh vat thung. 

"Ka muhil rei em?" sana en paha ka tih chuan, "Minute 20 vel" a ti a, a tho hmasa a, ka tho tur chu ka kut a vuanin min lo pui a, tunlai tak phei chu min duat ve reuh lutuk. 

"Mut hi nuam ka ti, hna a kal ngai reng hi a ninawm rualin ka bang phal bik si lo a, hah man a awm dawn lo em a" ka ti niah niah a, rawng kan bawl hma hlauh a, hun awl kan ngah phah a, a tih chi phian mai. 

Chapal ka bun rual chuan min pawm nawlh a, ka khek deuh ţhat a, a dara chum pahin "Min dah thla teh" ti tuarh tuarh mah ila, "Ka pawm thla ang che..i tlu palh ang" a ti deuh tlat a, ka tal bat bat chung pawha min dah thlak duh miau loh avangin a nghawngah ka kuah ve ta nge nge a. 

Inchung pana lo chho mek Hope-in min hmuh rual chuan a nui hak a, "Em em cheu hian, U Nico, Rita-in thu mak deuh a rawn sawi a nia aw, aaa...in kalna kha en uluk teh u in tlu ange" a ti nuaih a, a hmui hup a nui tet tet chung hian min kal pel a, a thusawi chuan awm a ti nuam lo tho mai. 

Inhnuai kan thlen thlak rualin min dah thla ve nghal a, Rita-i hmuh ka beisei tehreng nen Nu Hlimi leh Faith-i te bak ka hmu lo. An mangan hmel a, an ţhu mai mai pawh chu an phi sek ni maiin ka hria. 

"Ka khawngaih e" Faith chuan a ti leh ţhin a, Nu Hlimi a lo hui pap a, Rita-i chungah thil ţha lo tak a thleng ni awm tak a ni. 

"Eng nge a?" ka pasalin a tih rualin Pa Chhawna pawh a lo lut ve chiah a, nu Hlimi te hmel a dik lo awm chu a hmu ve nghal aniang nidang angin pindanah a lut tlang nghal daih lo a, "Buaina in nei em ni?" tiin sofa ah a ţhu a, Nu Hlimi lo hui leh pap chu kan ngaichang ran hlawm mai. 

"Rita-in min lo bia a, a cancer a ni awm e" a tih chuan keipawh min ţhawng khawp mai. 

"Ka khawngaih e...a hmelţha a, a vanglai tak a ni ve bawk a" Faith-in a lo ti leh a, "Ni chiah e..a hringtu nu hian a ngaihsak lo ve sia, pasal a ţhen a, a nei leh ţhin a, chutiang vel chu a nih avangin a nu ang maiah min ngai a, tunah pawh result ka hriat veleh ka rawn hrilh nghal che a tia, a chhel reuh tehreng nen a ţap ve lek lek mai" pakhatin a lo ti ve thung a, a damloh awm ka hre bawk si lo, a mak teh thut emai. 

"A englai nge cancer a?" Pa Chhawnan a lo tih chuan, "A pumpui a nia, cancer rau rau ah pawh ka hlauh ber pawl a ni" Nu Hlimi bawkin a lo ti leh a, "A nih chu" tih bakin a chhang tawh lo. Rita-i hi chu engahvak a ngai ve lo hrim hrim a, a thi pawh ti ila 'a va pawi ve' a ti ang a, a zo der a ni mai. 

"Lo leng pawh nise huat a lak vak chi a ni tawh lo tihna a ni mai. Cancer phei chu a hlauhawm a, a nasat tawh phei chuan an dam chhuak lo tlangpui a, nu angin min nei ve si a, theih tawpa kan ngaihsak ve a ngai. A nih loh chuan nakinah kan inchhir lutuk palh ang" tih pahin Nu Hlimi chuan awmze nei deuhin min rawn en a, kan inchhungah Rita-i a lal sawt dawn tihna a ni mai. 

CONT..