HIS LAST LOVE-9

HIS LAST LOVE-9

"I inpeih tawh em?" Mapuian a lo tih chuan phone ka ak a, ka ding zui nghal a, haw tum ni awm taka a awm chu mak ka tih ruk viau laiin, "Ka haw hman tawh a" a lo ti leh a, Ngheti ka en chuan a bu nghat a, kal rawh u min tih naah ngaiin, "Kal ang" tih leh kal ka rual a. Ka thawhpuite hian pasal ka nei tawh tih an hrevek a, zungbun ka bun ve vang bawk a, an hmuh laia mipa dang zui chu a nuam chiah lo.

"Hmun dangah chawl daih ang aw. Helai hmun chu a hneawm tawh emai" tiin damdawiin bula restaurant chu a kawk a, ka lo remti ve mai a, kan inphur chhuak leh ta nge nge a. 

Min kalpuina hmun chu a nuam khawp mai. A changkangin mi pawh an tam lo a, engkim mai chu a fai em em vek a, ei man pawh hmun dang aiin a to leh bik ngei ang. 

Inhmachhawn a kan ţhu chu tlemin ka la lai ve deuh a, sawi tawh ang khan ngaihzawng la nei ngai lo ka ni a, ti hian pasal ka nei ve tawp a ni mai a, tawn hriat ka nei loin ţhian satliah ni lo mipa bula awmdan ka thiam vak lo a ni. 

"I hmanhmawh em?" a tih chuan lu ka thing mawl tawp a, mo ka ni a, haw tlang mai lo a lenkawi daih te hi a mawi lo tih chu hre mah ila ka in thar hi ka thlahlel lo a, haw ka chak hlawl lo a ni. 

"Vawiin hi ka nu piancham a nia, bazarah min kalpui peih angem?" pangngai tak hian a ti a, lai miah lo a min en ngam te chu mak ka ti ngei mai. 

"Peih e..mahse lei tur ka thlanpui thiam kher lo ang che. Ka nu hak tur pawh keichuan ka lei thiam lo a nia, ka lei ve chu a ha duh ngai lo" fiamthu a ka tih chuan, "Ka nu chuan a duh vek ang. Min thlan pui ang chu" a lo ti deuh tlat a, za lo deuhin ka nui ta ringawt a. 

Eitur kan nghah lai chuan ka kut ka thukru a, zungbun chu ka tuai nauh nauh a, Mapuia hi mi ţha tak a ni a, a bula awm pawh nuam ka ti. Engahmah min nawr lui ngai lo a, dawhthei takin min nghak mai zel a, hrehawm ka tih zual lai zawng zawnga ka tan awm leh min ngaihsak ţhin tu a nih avangin ka tan hian a hlu lehzual.

Eitur an lo dah rual chuan, "Ei ţeuh rawh aw" a ti a, hmelhriat hmuh palh hlauin a lo lut thar apiang chu ka lo en vat ţhin a, pasal neih hnua mipa dang zui chu fimkhur a ngai khawp mai.

"Unau engzat nge in nih ve?" ka ti ta vel mai mai a, "Pahnih chiah kan ni. Upa zawk ka nia, ka nau chuan pawl sawm a zir ve mek chauh a" a ti a, an chhang a khat ve viau a nih hmel. 

"Keini pawh pathum chiah kan ni" ka tih laia, "Apa, keichu cycle min lei rawh aw, ka accident tawh miah lo ang" ti lang lang tu chu ka en vat a, Chhandami te an lo ni. 

Naupangin 'apa' ti a an koh chu Nicholas a ni lo a, mipa dang daih a ni. A pasal hlui a nih ka ring nghal mai a, an chhungkua a an lo inzui lut ka lo en reng lai chu Chhandamin min rawn hmu a, tawite a min nuih chuan ka lo nuih let ve a, damdawiin a an awm lai khan a tana hriat nuam lo tur ka sawi nual a, ka inthiam lo angreng khawp mai. 

Ka ep chiah, ka hmazawnah an ţhu a, eitur an lam hnu chuan Chhandami chu a ding a, min melh ralh hnuah zunin lam a pan a, hriat chian duh ka ngah lutuk chu ka ding ve nghal uaih mai. 

"Eng nge ni a?" hriatthiam loh hmel taka Mapuian a lo tih chuan, "Ka zun a chhuak lutuk a, zun zawh veleh ka lo eizawm leh ang" ka ti a, Chhandami chu ka zui nghal a, vanneihthlak takin hmeichhe zunin lamah chuan tumah an lo awm ve lo. 

Kut a lo sil mek lai chuan a hnungah dingin, "In innei leh dawn niin ka lo hria a" ka ti a, a kut che chu a tawp chat a, lo hawi chhuakin darthlalang aţang chuan min rawn en a, a hlim lo riauin ka hre lehnghal.

"Nicholas nen hian kan inngaizawng lo ti ila i awih angem?" nui lek lek a a tih chuan, "In inngaizawng alawm. Mi zawng zawngin an hria a, khalam kha chu zep buai duh lo mai rawh u. A ţhiante hnena a sawi lai ngei pawh ka hria a" ka lo ti a, a kut chu a nuai nawk nawk a, a kekawr ipte a rawmawl uai hnuang mai chu phawrhin tap chu a herh tawp zui zat a, ka lam pawh a lo hawi ve ta nge nge alawm. 

"Min hmangaih alawm" a kut hruk hul mawlh mawlh pah hian a ti a, "Ka hria" ka tih chuan min rawn enin, "Mipa leh hmeichhe inhmangaihna ang ni loin" a ti deuh sap a, ka awih hlawl lo, an maksak takzet a ni. 

"Tunah chuan sawi vekna hun a awm lo a, hun i neih hunah kan inhmu dawn nia. Veng dangah ka awm vat dawn a, chumi hma a i hman theih chuan engkim ka hrilh ang che" a ti a, a hmelah danglamna hmuh tur a la awm chuang lo nachungin a mitmeng te chuan pawi a sawi lo ta riauin ka hria a, "Naktuk hian ka hman nileng dawn a, day-off a nia, i hman angem? Khawiah nge kan inhmuh ang? Nang chuan an chhungkaw chanchin te hi i hrechiang deuh ang tiraw?" ka ti mawlh mawlh a, a lo nui var var mai. 

"I hriat duh zawng chu hriatchian tum et et chi i ni ve a ni maw? In inang chiah a nih hi, i phone number min hrilh la ka lo bia ang che" tih leh phone phawrh a rual a, keiin ka phone number ka lo hrilh vat a, "Ka chhuak hmasa ang a, ka ţhut fel âwmah i lo chhuak ve chauh dawn nia, he restaurant ah hian kan veng nula a thawk ve tih ka hria a nia, fimkhur rawh, nu tereuhte sam sei deuh a niin ka hria" ti a min  chah thlap hnuah a chhuak a, amah tak pawh chu a fimkhur khawp mai.

"Ka rei em?" Mapuia hmaah chuan nui var var chung hian ka ţhu a, ka kut hnawm chap te chu tissue paper chuan ka hru leh vel a, Chhandami chhuah hnuah kut ka sil a, ka chhuak ve nghal a, Mapuia pawhin rei min tih loh thu a lo sawi reng a ni. 

"Nizana ka thil sawi kha" a tih chuan ka thil ei lai chu ka tawp chawt a, hmaichhanna sawi dun em chu ka la duh chiah lo a sin mawle. 

"A tibuai viau che em? Ţhawn thut che ka duh bik lo, mahse inzep reng ţulin ka hre tawh lo a, i pasal nen in inneih dan ka hriat chian hnuah phei kha chuan ka khawngaih che a, ka duhzawng tak i ni bawk nen, ka insum zo lovin ka rawn sawi phawng a nih kha" a ti deuh duah a, a hmel leh mitmeng te, a chezia thleng hian a dam thlap a, kei meuhin a bula awm nuam ka tih chuan a fel tihna a ni mai. 

Chhandami chu ka thlek leh ţhin a, min en ve tawh hauh lo a, a fate chu buaipuiin a rawn kalpui pa nen chuan an inbe leh zeuh ţhin a, keichu a tan chuan awm ve lo ang hmak ka ni. 

Restaurant aţanga kan chhuah hnuah bazar ah kan kal a, Mapuia nu thil tur kan lei fel meuh chuan a lo tlai leh ruai hman tawh. Beisei loh deuhin gate bulah Nu Hlimi a lo ding a, sunhlu kung a thlek vang vang laia bike ri a hriat chuan a rawn hawi phei vat a, Mapuia nen kan inphur a hmu chu a lawm loh hmel nangiang mai. 

"Ka lo bia ang che" zawi sepa ka tih hnuah ka kal nghal vang vang a, Nu Hlimi pawh en tawh lo chuan gate chhungah ka lut a, ka pen hlawk hlawk a ni ber. 

"I lo haw tawh maw? I chau em? Thingpui i induh em?" Kungtein a lo ti var a, "Duh lo e..ka in eipuar tawh alawm" ka ti a, pangngai deuh a lan ka tum nain nuam ka ti meuh lo chu a ni. 

"Han inthlak la..U Nico a lo la haw ve lo a, i duh leh mu hahdam daih rawh. Nisa ah i kal em ni? Kha i biang a tai hlar alawm" a lo ti leh a, a chang chuan kei aia u zawk ang mai hian a khawsa a, chhungkaw enkawltu a ni bawk a a puitling reuh khawp mai. 

"Khapa kha tu nge ni?" Kungtei ka chhan hmaa Nu Hlimi aw ka hriat takah chuan ka inher zawk a, kawnkaah a ding ran a, a tum bar mai bawk. 

"Kan thawhpui a nih kha. A remchang em a kan lo haw rual a" ka tih chuan, "I chawhma a, rawn haw hma tur i nih laiin tlai deuhah mipa i rawn inthlah haw tir a, eng nge awmzia ni a? In leng kawi em ni?" a ti a, a vin hauh lo nain a aw chhuak chu a nelawm loh khawp mai.

"A nu piancham a ni si a, bazarah ka kal kawi pui lawk. Chuzawng chu a ni mai" ka tih lai te chuan min lo enchikin min ring lo hle tih a hriat a, mahse a lo buai ve na tur a awm lo. Ka pasal hi ka duh miau hleinem. Hetiang thil hi a thleng thei tih chu an hre lawk vek ang. 

"Midangin an hriat chuan an lawm lo khawp ang. Kungtei nen chiah kan hre rih a, kan zep pui ang che. A thleng nawn leh a nih chuan i pa ka hrilh ang" a ti charh charh a, ka lo ner nak chu a hmuh hman ka ring. 

"Pasal neih tawh chuan nulat laia kan tih ţhin ang zawng zawng hi a tih theih tawh loh tih hriat tur. Mi sawi inkai phei chuan chhungkaw mualphona a ni tawh ţhin a, nichina ka hmuh ang kha hmuh nawn ka duh tawh reng reng lo a nia. Kungte, rawngbawl a hun tawh khawp mai, Saii, nangpawh inthlak la pui ve rawh. Vawiin chu ka nuam lo riau a, mut hahdam ka duh" a ti zung zung a, ka va han ngei tak. 

"Duh vanga pasal nei ka ni lo tih inhriat ve a ngaiin ka hria" ka tih chuan ka kawr hnungah Kungtein min lo pawt a, "Engmaw i sawi kha?" Nu Hlimi pawhin a lo ti vat a, ka sawi ngai chu ka sawi nawn leh ngat a, amah ngawt chu ka en ran bawk. 

"I duh emaw duh lo emaw pasal nei lai i ni tho tho. Mipa dang bike a chuan te kha thil ţul lo tawp a ni" a tih chu motor ri nen a inpawlh nawk a, tu emaw chu a lo haw chiang a ni. 

Nu Hlimi chuan pawn lam a thlek zawk a, chutah keichu min rawn en lehin, "Namnul mai mai theih kan ni ve lo a nia, keini chuan kan fate kan thunun a, Nicholas chu sawi loh, Anthony takngial pawh kan duh loh zawngin a awm lui ngam lo. Pathianin kan enkawl tura min pek an ni a, an tan theihtawp kan chhuah a, kan thu awih a, kan duh anga nun hi an tih theih ve awmchhun a ni" a tih nghat nghat laiin Nicholas a lo lut a, a lo haw hma hle mai.

"Eng nge thleng a?" a ti a, a nu leh keichu min en tawn reng a, a bangbo khawp mai. 

"Saii hi mipa pakhatin a rawn thlah a" Nu Hlimi chuan a lo ti a, ka zep ang a ti zo chiah sia, a sawi leh tho si. 

"Ka ţhianpa a nih kha" ka pasalin a tih chuan phawk deuhin ka en a, Nu Hlimi pawn mak a ti ngang aniang a meng zau kawk mai.

"A thawhna damdawiinah hian ţhian ka ngah alawm. Chupa chuan tarmit a vuah em?" a tih chuan hriatthiam loh hmel fein nu Hlimi chu a bu nghat a, a beisei loh tawp a thleng tih a hriat reng. 

"Ka ţhianpa ti ila ka nau a ni ber ang chu, kan tirh kah, kan tih peih loh apiang ti ţhin tu a nih kha" min en ran chung hian a ti a, sawi buai tuma ka ang zuau chu mitmeiin min lo khap vat a, "I tirhkah nen bazarah an kal dun tihna maw? Khapa nu thil tur kha an lei dun bawk a" Nu Hlimi chuan a la ti cheu a, a awka chhuakah chuan a lawm loh zia a hai theih loh. 

"Aw..min rawn dil a, ka lo phal sak a nih kha. Ngaihtuah duh suh khapa khan ka thu loin engmah a ti ngam lo. A pa hrak lo bawk a, kan thuhnuaiah a kun khut khut reng mai. Kan hman loh changa kan nupuite thlah kual tu ber alawm a nih" a ti deuh duah a, min rawn enin a nui suk a, Nu Hlimi nen chuan kan dang lel tawh zawk. 

"Chutiang a nih chuan a ţhat chu. Mahse, tirhkah pawh nise ching tam lo ula a ţha ang. Khaw nge driver kha?" tiin Nu Hlimi chuan pawn lam a thlek leh vut a, Nicholas erawh chuan chhang lem loin a kal pel a, choka ah a lut daih a, Nu Hlimin min hmuh dik loh theihna tur lakah min chhanhim tho nain a ţawng duh dan kha ka lawm zawng a ni tehchiam lo. 

Pindan chhung ka luh rualin phone ka phawrh a, Mapuia message lo awm chu ka hawng vat a, 'An hau che em?' tih zawng a ni a, in a la thleng kher lo ang a, kalkawngah a ding kawi a nih ka ring. 

'Hau lo e..min thlah ringawt a nih kha. A ho emai, engahmah ngai duh suh' tiin ka chhang let a, nichin khan ka thiam loh ni ve deuh lo se chu ka chhang let ngei ang a, mahse, Mapuia nen kan inkarah inţhianţhatna aia thuk zawk a awm miau avangin ka chhang let duh ta lo a ni. 

Hahdam deuh tumin khumah chuan ka ţhu rih a, Nicholas-a lo lut chu, "Engati nge kan tirhkah i tih ve ringawt a? Doctor a nih kha" tiin ka lo chhuahchhal nghal a, "Lawmthu min hrilh zawk rawh" khuma phone rawn theh thlak pah hian a ti duh lek chauh a, "Lawmthu sawina tur a awm reng reng em ni a?" ka tih chuan a mithmul a lo kan ralh a, "Damlo thut ta la ani bak kha pan tur i nei lo, min puih i duh te chuan min pui ţha ve hle hle la, tirhkah tih kher a ngai lo. Natna chungchangah ngat phei chuan nang aiin a hre zau daih zawk" ka ti tan tan a, ngeiawm zetin a lo nui chhuak hawk thung. 

"Ani ang doctor zir chhuak hlim hlawt ai chuan kawmthlang pitar, a damrei tawh a engkim a hre vek tawh an tih pawh khu ka ring zawk" chang fek fawk hian a ti a, a lo ngainep awm hle mai. 

"I ngainep ve hle mai maw...eng emaw hlekah i chapona hi a lang chhuak nghal zel mai chu a nih hi" ka ti hap a, "Ka ngainep lo a, ka ngaichang lo bawk" min kal pelh pah chuan a ti leh hram a, sofa ţhuin tui a in a, zu a in dawn lo tak tak em maw ni?

"Chhandami nen hian in inngaizawng miah lo em ni?" ti a pangngai taka ka zawh chuan a lo ner suk duh chauh a, "Miin an sawi a" ka tih leh takah chuan min rawn en ve ta hram a, "Chhandami hi i lo nei zawk lo a ni" ngeiawm zet hian a ti a, thu pangngai a sawipui theih hlawl loh.

"Ţhian atan min sawm a, ti ti pui che ka tum a nih hi. I thusawi zawng zawngte kha i theihnghilh zo leh vek tawh em ni?" ka tih chuan, "Khapa kha i duh em?" a lo ti ve thung a, Mapuia a sawina a ni tih hrereng mah ila, "Tu khapa maw? Tu nge i sawi chu ni a?" ka ti ta tho a, ka sawipui chak loh zawng tak a ni. 

"Kan doctor tuai tir i biak ve ziah kha" a ti deuh kher a, mi hi a lo chik awm ţhin ka ti. 

"Chutiang i hriat ve zel a ngai lo" ka ti hlak a, nuam a ti zawk emaw tih tur hian a nui reng a, a rilru a na miah lo tak tak em maw ni?

"Nizan aţang tawh khan i danglam riau mai. Eng thilin nge ti danglam che?" ka thlek deuh ha a, inkawp ve lo se chu Chhandami fate khan pa an tih ka ring lo reng reng. 

"Midang hlim hmel i hmu thei lo riau mai" ka tihdan ang chiahin a lo ti ve a, "Ka zalenna ka lawm a nih hi" a tih phei chuan ka hrethiam lo lehzual. 

"Ka awmchhung chu i zalen lo tihna a ni mai lo mi? He zungbun hian min phuar zawm reng a, i tawt ve mup mup lo em ni a?" ka ti tawl a, kan inneihna maksak lutuk a pawm vat thei leh ngaia a nei hma lutuk hi mak ka ti ve thlawt a ni. 

"Dawt tello a bulţan ţhat ka duh" a ti a, a thutak ve deuh tawh nain ka la pawm mai thei chuang lo. 

"Dawt hlir em ni min lo hrilh ţhin a?" ti a ka zawh leh chuan, "Kan inneih hlimah kha chuan ka ngaina lo che alawm. Nang anga hmeichhe nasa kha an awm thei ang tih pawh ka hre lo" a lo ti a, min nel lo tuten nasa min ti a, min nel tu ten kawm nuam min ti leh daih a, ka hrethiam tawh vel lo e a. 

"Min ngaina lo reng rawh" ka tih veleh, "Ka ngaina che alawm" a lo ti vat a, "Min ngainat loh theih dan tur kawmthlang pitar hnenah zawt mai rawh" ka ti a, ka mu nghal hmak a, nuihza aw zeta "Saiţhuami ţhin hi a" a tih te chu hre pha reng mah ila ka ngaihven tawh lo. Ka hming lah hi duh duh danin a phuahchawp kual a, a lungawithlak vak lo.

A inbual hlanin Kungtei pui turin ka chhuk a, Mapuia chuan thlalak min lo thawnin, 'Saii awm ve se aw' a rawn ti vel a, mahnia nui var var chungin an chhungkaw thlalak chu ka en a, hmeichhia an tam deuh hlek a, tu ber nge a nau ni ang ka rin zawn thiam lo. 

"A va rimtui ve" Anthony-an a lo ti lut a, huanah a kal ţhin a, amah hian a enkawl deuh tawp a, a chauh viau chang pawhin a hmel hmuh a hrehawm ngai lo. 

"U Saii hi chawhmeh siam ka zirtir a, kan uluk teh mai a nia" Kungtein a lo ti var a, fridge nghengin Anthony chu a ding a, "Saii meuhin a siam chuan a tui ngawt ang" a ti a, a mitmeng chu a nung sar a, min fak der mai mai lo niin a lang. 

"Ka thiam tak tak hunah phei chuan i thau viau maithei a ni" ti a ka lo fiam chuan a nui hawk hawk a, "Kan thau luah anga a ni mai lawm" a ti a, phir te pawh an ril a ţam tawh aniang an lo lang ve tawh a, Faith hian min ngaina lo viau nangin Anthony awm lai chuan a ti lang vak ngam tawh lo. 

"Kha...Saii leh Kungtei te rawngbawlna hnawk vel kha lo phiatfai rawh u, pakhatin sil tur awm ang ang saw sil se la, pui ve zung zung rawh u" a lo ti a, a naute laktlak loh lutuk hi ani chuan a dik lo a ti ţhin a, ka bulah pawh a sawi fo mai.

Zanah Mapuian min lo call ve mial a, "In pa a awm hnai em?" a ti hmasaber a, "Pindan chhungah a awm. Keichu ka chhuak daih a" ka tih takah chuan a thlamuang sawt aniang, "An hau lo tak tak che maw?" a ti ţha leh a, min hauh loh thu bawk chu hrilh lehin, "Lo awm ve la ka ti tak tak a, ka sawm ngam chiah si lo che a" a tih chuan, "Ka lokal ve thei nang. Kan inah ka awm bawk si lo a, mitmei ven tur hlir a nia" ka ti a, kan la upa lo ve ve a, a rilru put hmang min hrilh hma hauh aţang tawhin kan ti ti a inrual a, in ngainat a awl bik ka ti mai, Mapuia bula ka awm chuan ţhian dang ka mamawh vak lo.

"Engtik thleng nge neih i tum?" a tih leh chuan, "Ka hre lo le" ka ti halh a, thla eng chu ka en vang vang a, ka nun kal dan teh nuai hi keimah pawn ka hrethiam tawh lo. 

"Ka nuten ţhen an remti lo bur a, kei lahin ţhen chhan tur chhuanlam ţha ka hre tawh bawk si lo. A bialnu an tih ber lahin kan inngaizawng lo a ti bawk si a" ka ti a, midangin an hriat phak hlauin ka ţawng zawi ve khawp mai. 

"I duh lo a, chu chu ţhen chhan a tling lo mi?" a ti a, "A dik viau tho a, mahse ka duh loh zia hre sa renga min neih tir an ni a, chhuanlam a tling lo alawm" ka lo ti ve zel a, zan reh a ni tawh bawk a a thaw ham ham ri chu ka hre thei a, inţhen turin min duh ve takzet niin ka hria. 

"Eng nge in la tih? In la buai map map mai mi?" ka ti leh ta daih a, "Aw...hei an haw darh ţan chu a nia, kei phei chu pindanah ka awm daih tawh. Naktuk i lokal lo ang a tiraw?" a ti zuai ruih a, Chhandami nen inhmu dawn lo ila chu day off hi ka huphurh leh ngawt ang. 

"Kal lo ang" ka tih lai mekin ka phone chu ka kut aţangin a rawn phih thla a, ka hnungah Nicholas a lo ding reng chu niin. 

"Min pe let rawh" ka ti ram hmak a, phone ka ban veleh a lu ai sangah a keng kang a, dingdihlip viau mah ila ka ban pha ngang lo. 

"Eng nge i hriat a?" thinrim zeta ka tih chuan, "Phone hman a hun tawh lo" bul zet hian a ti a, "Ka phone a nih kha, duh hun hunah ka hmang ang" ti a ban leh ka tum chuan a keng kang leh daih a, thinrim a insehruh ţeuh bak tih theih a awm lo. 

"I sual ve thlawt a ni...ka ngei hluah hluah che" ka tih chuan, "Ka hria alawm" a ti dam thlap a, ka dara vuan bet reng chung hian phone chu a en a, "A dah tawh a nih hi" a ti ban charh a, a ak zui daih bawk. 

"I zakthei lo hle mai. Tih tur i hriat hlawl loh leh phone hmang ve la a ni mai alawm. Kei min rawn tihbuai kher a ngai hleinem" ka ti kha kha a, inhmachhawnin kan ding ran a, ka lungawi lo lutuk chuan sawi tur pawh ka hre tam lo. 

"Siamţhat ka tum mek a nih hi" tiin insawithiam a lo tum ve a, "Siamţhat tur engmah a awm loh hi. Engkim kan sawi dun tawh a, mipa dang chu sawi loh, Anthony lai ngaizawng der turin min hrilh a, chuti khawp chuan ni lawm ni inţhen i duh?" ka tih chuan a lo thaw chhuak hawk a, "Mi hi hnial pang pang zel lo teh. Ka inthiam loh vang chauha ţhat chhuah ka nih hi" a ti nghat a, ka dar a vawnna pawh chu a la thlah duh chuang lo. 

"Eng berah khan nge i inthiam loh a? Kan inneih hlima sual leh luhlul i chhuah kual vel vang kha em ni?" tiin ka ţawng el a, rin lo deuhin a lo bu nghat a, "A vaiin" zawi deuh sup hian a ti a, kan inhau a nih loh chuan kan inbe ngai mang lo kha a ni a, a hnaih ber ţhinin pasal a neih leh dawn avang maia ţhat chhuahah ka la ngai tho tho.

"Hmeichhe dang anga bum kual mai mai theih ka ni ve lo a nia. Hmeichhe ţhenkhat hi chu an thinrim laiin an thinrim vak a, mipa in an han thlem deuhin an lungawi leh mai a, chutiang chu ka ni ve lo. Engtin pawn awm la ka tuar thei a, ka hrehawm ti hmel i hmu lo ang. Chuvang chuan a der mai maiin inthiam lo duh suh" ka ti nghat nghat a, Chhandamin a kalsan dawn a, awm ngaihna a hre lo ah ka ngai a ni ber. 

"I thluak hian a vahbosan daih che em ni a? Fing inti viau si a der leh a tak pawh hrethiam lo" min tih chuan, "Min ngaina ngai hlei loin ţhian aţanga bulţan ka duh dededeidei i ti kual leh vel hi ka hrethiam lo. Ka hriat duh zawng lah min sawipui duh ngai der lo lehnghal a" ka ti pang pang a, a lo chek hlak mai. 

"Ţhian anga bulţan ka duh tih thleng chiah kha ka sawi. Thu hi uar viau zel lo teh" a ti hluk a, ka dar a dawm reng nain tlemin ka tawlh hnung deuh a, amah chu ka en vang vang a, a lai ve deuh nge ni a hnar a tuai zauh a, a hmel chu a chhe lo, hna ţha tak a nei a, sawisel tur lai ka hre hauh lo chung hian ka duh thei der lo. Ţhat a chhuah ve deuh avang hian duh luih tum ila chu ka ten daih ang tih vel a ni. 

"Khawi ka phone" ka tih leh takah chuan, "Rawn la rawh" tih pahin min thlah a, a inla hrang zui nghal a. 

"Khawi?" ka ti nawn leh a, a hma zawna kut ka dawh chuan hnuai lam a bih zawk a, kei bawk chu min lo en lehin, "A awmna i hriat kha, la rawh" a lo ti leh a, mi chhaih kual vel hi nuam a ti sawt riau mai. 

"Hmh...i duh leh kawl zankhua rawh" tih leh kal ka rual a, ani chhaih kual mai mai theih ka ni hleinem. 

Inkhuh hlunin ka mu a, a thawm chu hrereng mah ila ka che duh tawh hauh lo. Mapuia khan min lo be ngam tawh rih kher lo ang a, kan inhnial ri a hriat avanga dah ta daih a nih ka ring bawk. Ani ka biak loh phei chuan biak tur dang ka nei chuang lo a, kawl reng mah se pawi tihna ka nei lo. 

Zing ka harh chuan ka mutna bulah ka phone a lo awm a, Nicholas erawh hmuh tur a awm tawh lo. Bualin kawngkhar lah chu tlem a inhawng deuh a, hmai phih tura ka luh pawhin hmuh tur a la awm ta chuang lo. Kei hi ka tho tlai em maw ni tiin bualin aţang chuan ka chhuak a, sana te chu ka'n en leh rih ţhin a, dar7 chiah a la ni a, thawh ka hai lo hlauh. 

Inhnuaiah pawh a awm lo a, tim deuh daia Kungtei ka zawh chuan, "Insawizawi turin a chhuak aniang. A tih ziah dan a nia, in inneih hnu khan zu in a ching a, a thawh tlai phah ziah a, a thawh hma ve chuan insawizawi turin a chhuak ziah alawm. Nalh loh an hlau hlawm khawp a" tiin a nui hak hak a, thingpui bel a chhuang kai nghal zat a, Nu Hlimi pawh sam buk chhupin a rawn ţhu ve luau mai. 

"Vawiin chu chhuah lawk na tur ka nei a nia aw" pangngai deuhin ka lo ti a, min melh vung vung hnuah, "Khawiah nge?" a ti ve chauh a, a thophang aw chu a ţial ruai mai. 

"Ka ţhiannu nen kan inhmu dawn a, kan inhmu khat angreng a, ka chawlh ve niah inhmuh kan rawt a" tiin dawt ka hrilh a, Chhandami ka tih chuan a remti kher lo ang. 

"Rei tawh suh..Nicholas-a te tirhkah pa kha rawn inthlah tir tawh lo bawk la" a ti deuh kher a, nakin zel ah ka tan insawi fihlim a awl zawk anga tiin thudik ka hrilh duh lem lo. 

"Keimahin ka lo haw leh ang. Lo inthlah tir pawh ni ila a pawina a awm vak chuang hleinem. Ţha deuhin awm mah ila mi chuan min sawi tho a" ka tih chuan, "Sawisel bo a kan awm a ngai reng alawm. Min duhsak tu emaw kan tih te pawh hian kan chet chhiat hun an chang ran reng a, ţhianţha a kan ngaih ţhenkhat hi chuan kan ţhatna an duh tak tak hauh lo a nia, i mualpho chuan kan chhungin kan mualpho dawn" a ti leh tawh a, "Kan thiltihna leh ţhian kawm naah te pawh Pathian hre ran ila kan chesual lo nge nge ţhin" a tih zawm a, Pathianthu a sawi peih a, biakin a a lâm phei chu pui tak a ni. 

"Pi Dengi lah hi tuktin group ah Pathianthu a rawn post a, chhunah a chhuak ang a, mi a rel leh ang a. Keini chhung ngat phei chu min sawi peih tak tak a ni. Engmah an nih bik loh nen, an pa eiruk nasatzia lah kan hre vek a, kan sawi vak vak lo a ni mai a, Pi Hliapi pawh a ni tho, inla thlarau mi deuh si hian sawisel tur a zawng reng a, kan sunhlu kung mai mai te saw kawngpui a ti hnawk tih mai maiin a lo sawi chiam zel, tuktin kan phiat fai a, an in bulah phei chuan awm se rah tur ber hriat harsa khawpin a hnawk ang mawle. Mi hi a er leh lutuk a, kan sunhlu kung thlengin a ngei em em vek tawh a nih hi" a ti bawrh bawrh a, group a a mi ngainat loh te lo lang ve chu a anpui nasa khawp mai. 

Thingpui pawh a la inzawh hmain a ţhiannu ni awm tak a lo lut a, an han inhmu chu an phul hlut a, inpui lamah an inkai phei a, an Pathian thu sawi ri chu choka ah pawh kan lo hre pha a, an Amen ring thei khawp mai. Sal tang tam zia leh sal tang ho mizia an han sawi te chu mahni inngaihbel mai te a awl a, hremhmun tla tur an sawi zingah chuan kan nupa pawh kan tel ve chiang a ni. 

"Tunlai mi tam tak hi chuan zu leh sa an tlan a, an lungawi em em a, veng tinin biakin lian leh mawi tak tak kan neih vek tawh laiin inkhawm kan tlem thei hle si" Nu Hlimi ţhiannu'n a tih lang lang lai chuan Nicholas a lo lut a, "Saw mite pahnih hlawrh hlawrh lah saw" tih hluk pahin a kawr banin a thlan a hru thuak a, tui vawt a ban zui zat a. 

"An Amen ring leh nasa tawh a nia aw, ţawng hriat loh a lo thleng leh ţep tawh ang" nui rah rah a Kungtein a tih chuan a lo ner deuh a, a ei loh hmel khawp mai. Mihlim hrim hrim hi ka sawisel a ni hran lo a, lem deuh deuh hi chu an awm chiang a ni. 

Dar11 velah Chhandami chuan min rawn be ta ngei a, inhmuhna tur hmun te kan rel fel hnuah ka insiam a, a chhan pawh ka hre lo, ka phur khawp mai. Nicholas hnenah engmah ka sawi lo a, hria se chu ani pawhin a remti kher lo maithei. Mahse, Chhandami khan sawi duh a nei tih ka hria a, ka ngaihthlaksak ngei bawk ang. 

Rei tak hnuah scooty ka la chhuak a, Chhandami sawina hmun chu ka pan a, a fate a hruai dawn lo niin a sawi a, naupang chimbuai a duh loh phei chuan a pawimawh viau a nih ka ring. Kan inhmuhna tur hmun chu a pite in niin a sawi a, an zin daih a, an tunu nula in in a nghak a, chutah chuan kal turin min ti a, pawn lama inhmuh a ngam chiah lo a nih hmel. A mamawh tu zawk ka nih miau avangin phun nawi lovin ka lo rem ti ve mai bawk a, ka tana ţangkai thei leh kan inneih chhan thleng hian hriat a lo nei maithei a sin. 

CONT...