HIS LAST LOVE-26

HIS LAST LOVE-26

"A damţhat em kha..dawt a hrilh che u aniang" ka pasal chu kan melh ţhap a, an melh ţhap a ni zawk mah ang chu, Faith-i bik phei chu a meng rum khawp mai. 

"Lehkha min lo thawn thlap a, a hming leh kum zat pawh a inziak vek. Eng mi pawh ni se natna chungchangah kher chuan dawt a sawi bik nang" a ti ţeng hlar a, a taksa ka en khan keipawn ka awih chiah bik lo tawp mai. 

"Doctor hmelhriat ţha neih chuan lehkha mai mai te chu a siamchawp theih alawm. A nat vaj hunah bak ka awih lo ang" Nicholas chuan a ti teh tlat a, "Lo na pawh nise tih theih vak a awm hleinem. Mihring chu thi vek tur kan nia, nangni pawn pawm thiam zir rawh u" Pa Chhawna chuan a lo ti ve bawk a, a lo len leh hun chu an lo duat khawp ang. 

"In rilru a van chhe em em. U Nico pawh engmah i hriat chian tawp loh kha. U Sangpuii u pawh a dam ţha viau emaw kan tih laiin a pum a sawisel a, an in entir meuh chuan a lo cancer a nih kha. Miin thih pui tham natna an neih laiin ka awih lo an ti ngawt ngai lo. Nang ni la engtin nge i tih ang a? Na i neih laiin ka awih lo ti tlat ta ila i thin a rim viau zawk ang chu" Faith chuan a la ti hlak hlak a, a phone chu a en leh ţhin a, "Shillong ah ka kal dawn a tia, mahse krismas a ni mai dawn sia kumthar lamah aniang. Hei i awih loh chuan en rawh" tih pahin phone chu Nico-a hmai zawnah a lek kang vah a, pakhat lah chuan a lo en ţha duh lo nasa mai. 

"Kan buaina tur a nih loh tawp chu" a ti duh lek chauh a, "A dik, kan buaina tur a ni lo. Amah tê khan mi a rawn chawk buai viau zawk a, in rilru a hmin hneh si. Â viau mah ta che u" Pa Chhawnan a lo ti veleh zat a, ngawih ka chuh leh tlat tawh thung. 

"In va mak pafa ve mawle. Amah hring tu nu ngei pawh innghahna tlak loh ni a ngaiin keini min rawn hrilh hmasa a, min rin ve tehreng nen in lo awih sak lo vel a, hria se chu a rilru a na ngawt ang chu. Em em cheu hian, kan lo hrilh kher kher che u a ni. A natna chu in duh leh ngainep ula, keichuan a theih ang angin ka pui dawn. A lo leng a nih pawhin hrehawm a tihna turin awm hlek suh u" nu berin a ti hlawih hlawih a, a vei turh turh a, a rilru hah leh thinrim hmel chu a pui khawp mai. A bulah chuan kal ila min vai thal tawp duh ang tih tur vel a ni. 

"I mak tun tun emai. Hmanni lawkah dam ţha ver vawrin kan hmu a, a ţawng zat zat a, a khap fak fak a, a mitmeng pawh a harh khawp kha. Pum lam sawisel hmel a pu lo e kan ti mai alawm" Pa Chhawna chuan a lo ti a, a ţawngkam thiam lo lutuk chu ka nui chhuak lek lek a ni. Nicholas nen pafa dik tak an ni tih ka hre tawh bawk nen, an inchhun ka ti rilru khawp mai. 

"A khap ve bawk ang chu. Damlo thi lek lek tawh pawn an mit an khap tho alawm. I pile na i rum dur dur lai pawn nangpawn mit i khap a, Rita-i a nih vanga a mit khap mai mai lo rinhlelh te chu a, chhungkua min rawn chawk darh vek pawh ni hlei lo, i ngaithei lo ve em em a" Nu Hlimin a tih chuan, "Ka sawi tum chu i hria" a ti bul hmuk a, ka sawi fo a, ka sawi leh ţhin ang, kan inchhung hi chu a hahthlak a ni. 

"Chaw ei in la tih loh chuan ka pa kan ti ti lawk dawn mi?" Nicholas chuan inthlahrung takin a lo ti ve a, "Eng chungchangah nge?" pakhatin a tih chuan, "Kan pahnih a sawi dun chi" a ti ve tlat a, "Aw le...chawhmeh lo chhuang lum ula, chaw ei har lo ang u. Pindan ah lokal rawh Nicholas" ka pa chuan a ti ta nge nge a, a sawipui tum ka hre ran a, ka awm a nuam lo takzet a ni. 

Hope nen a kan siam bak kha Kungtein chawhmeh a lo siam belh ni ngei tur a ni, a thil kan rim chuan pum a ti let butin ka hria a, "Kungte, i thil kan rim chu a va na ve" insum hman lo hian ka ti lehpek a, ka chaw ei chakna zawng zawng a ti reh vek thei hial a ni. 

"Ka lo hre lo a, kan chhin daih ang e. I awm a nuam lo leh tawh em ni?" a lo ti sawk sawk a, mi a be ţha leh deuh tawh nain keimah zawk hian pawh har ka la ti tlat a, a hma ang khan ka en thei tawh lo a ni ber. 

"Ka awm chu a nuam lo deuh reng a, ka chau nghulh a, ka ning tak tak a ni" ka tih chuan, "Nau pai chuan a awm ve alawm. I huat ngai loh i haw ta sia, kan lo ti sual leh ţhin" a ti a, chhang tawh lem lovin ka tih tur ka ti mawp mawp a, kan in pangngaiah chuan awm ila ka mu nasa khawp mai. Pa Chhawna hian 'kar khat vel chu i duh leh in in lamah riak phei rawh' ti thut se ka ti tak tak a ni, a ti awm der si lo a. 

"I pa leh Nicholas chu va ko rawh. An va rei em em ve, chhung inkhawm kan la nei bawk si lo, Anthony pawh a lo haw tawh a, lokal tawh rawh se" Nu Hlimin a tih takah chuan an pindan lamah ka phei a, kawngka an khar phui lo nain kik hmasak loh chu a mawi lo ka ti deuh a, kik ka tum uaih laia an ţawng ka hriat takah chuan ka kut ka la let vat a, ka duh loh zawng tak mah nise ka ngaithla ta kar a.

"Ka hrilh lawk che kha, ka nu'n a remti lo a nih chuan ti lui lo turin ka ti che a, tu pawh nei ila a remtihna thlap a nih loh chuan an nuam sa lo ang ka ti bawk a, ka sawi lawk kha a thleng dik vek. Eng mi nge ka neih ang a, tu hmeichhia nge ka neih ang tih ka hriat hma hauhin i thu zawmin nupui neih ka remti a, ka zah vang che a ni tel bawk. I thu ka hnial ngam lo a" ka pasalin a tih lai chuan, "Chhandami i ngaihtuah vang a remti chauh i ni" ka pa'n a lo ti a, chu thu phei chuan ka beng a verh khawp mai. 

"Chhandami chu a ve chauh zawk a ni" a tih chuan a lo pawt chat leh a, "I hmangaih alawm" a ti charh a, ka thinphu te chu a rang ve ringawt a, ka pasalin a chhan let dan tur ngaichangin ka thaw dep dep tawh a ni ber. 

"Ka hmangaih ţhin...pasal a neih hma daih tawh kha a ni. Tunah chuan ţhian kan nihna bak engmah a awm tawh lo. Nupui ka nei tawh a, a nawmsak loh chuan a chhungte pawh ka hmu ngam tawh dawn mi? Chu chu ngaihven tawh zawk rawh. Ka sawi fo kha, min indan tir mai rawh" a ti a, a aw aţang ringawt pawhin a ngenngawl hle tih a hriat a, a reh zui vang vang a, ka pa hi amah ang chiaha luhlul a ni ve a, a duh loh zawng thil chu a sawi pui thei kher lo maithei a ni. 

"Inpui nghak tu tur i ni ka tih tawh kha. In dan chungchang kha sawi leh tawh suh. A rei ang a, fa te in neih chuan i nu pawh a zia awm chho mai ang. Saii chu nangman duat la, a mamawh leh chak zawng engkim leisak la" a ti a, ka fapa i ni ti se a dik vek mai tur a nia. 

"A hautak lo a, a duh zawng chu ka lei sak thei. Mahse, hlimna hi ka lei phak a ni hleinem. A mamawh engkim tih sak thei mah ila hlimna ka pek theih loh chuan kan inneihna hi a hlawhchham tho tho. Pawisa aia pawimawh dang a tam a, chu chu ka nupui fanaute ka zirtir tam ber tur a ni. Min enkawl dan ka sawisel tihna a ni hauh lo a nia, sum aia mihring hlut zawkna an hriat thiam loh te ka hlau a, he in a kan awm ve reng a, kan kal ngai a kan kal reng a nih chuan hma kan sawn thei lo ang" a tih lai mek chuan thawm ka hria a, hmanhmawh deuhin kawngkhar chu ka kik ve nghal a, pindan chhung lam a ţawng ri a reh rualin, "Chaw ei kan siam a" ka ti ve nghal zat a, ka pa zawkin min lo chhawn a, choka a ka lut leh chu Nu Hlimin min lo en nasa mai. 

"I va rei ve" a tih chuan, "Ka zun a chhuak reng a, ka zung hmasa lawk a" ka ti daih a, a awih ve tho aniang a bu nghat a, thawm rawn nei tak zawk chu Hope daih a ni. 

"An lokal dawn em? Chhung inkhawm pawh kan nei leh hman dawn lo a nih hi. Kim ve ţum pawn pawimawh tih dang in ngah thei lutuk a, chhung inkhawm in ngai pawimawh lo sawt riau mai" a ti a, chhang lem lovin Kungtei te chaw ei siam chu ka pui ve mawlh mawlh a, a tlai leh duai tawh a, mut baka chak ka nei leh tawh lo. 

Chaw ei khama Kungtei thei siam chu tui ti deuhin ka ei a, acid te ka ei chak a, an phal dawn lo nasa mai bawk si, rai no thil chak hi ka rin aiin a lo na a, ei ngei ngei loh chuan rilruah a awm reng mai a ni. 

"Thei thur i van ngam sawt em em. Pasal neih pawh hian rai lai tak hi peihawm loh ka tia, fa nei tawp thei ţhin ila na leh hrehawm kan tuar lo ve deuh ang a" Hope in a tih chuan, "Dik chiah..ka ning tawh a nia. Zing thawh hlima luak chhuak te hi a hrehawm a, pasal te lah an mu bawrh bawrh zel bawk sia" Nico-a hriat ngei tur a ka tih chuan nui chung hian min rawn en a, ka pa nen khan an ti ti muk hmel viau a, chaw ei lai pawhin an ţawng mang lo. 

"I tawrh ai tuar thei ila chu ka tuar vek ang. Tunah na i nei em?" tih paha min lo pan chuan Kungtei leh Hope te an lo nui rah rah a, Kungtei danglam leh ta deuh chu a zia phian mai. Nem nghal mai ka tum bik hauh lo thung.

"Na lo lai i nei em ti zawk rawh" ka tih chuan, "Na lo lai i nei em?" tih pahin dawhkan bula ka ding chu hnunglam aţangin min rawn kuah a, a nu leh pa te an awm lem loh a, a naute nen chauh kan nih chuan min kuah bawrh bawrh zel. 

"Nei mang nang...hahchhiau zawng te hian pawk chhuak nawlh thei se ka hahdam huai ang mawle" ka lo ti fiamthu a, Hope lo nui hak hak chu, "Nui vak vak suh naute i ti harh ang. A nu hian hrehawm a ti leh dawn a" a lo ti ve thung a, "I over e..awiii ka zak zawk. Nicholas-a hi amah hlui zawng zawng kha a bo vek tawh. In la zei vek bawk si, ka ei lo ve thlawt a ni" Hope chuan a ti lang lang a, "Pa nih tawh chuan a ngai ve a nia" a ti dek dek a, "Fa em pawh in la nei lo, a rai ve chauh a, pa i la nih tawp loh kha" an lo ti a, an fiam nasat poh leh nuam a ti emaw tih mai tur a ni. 

"Hope, i bialpa a lokal. A va bei hma ve a, hnathawh kawr a rawn ha nia aw" tiin Faith chu a nui har har a, a uang nge a ţawngkam chuan mei a nei ve hrim hrim pawh ka hre lo, vawikhatmah a lo la leng lo a, kei phei chuan ka la hmu lo hrim hrim. 

"Hnathawh kawr pawh ha se ka mitah a ţha ber tho tho" Hope chuan lo ti ve in sil hmun lam a pan a, kut a sik sawk sawk hnuah choka chu a chhuahsan a, "Engtin nge maw a duh zawk ni? A ţhing si, a inhlawh kual reng a, cement a chawk ngei zel bawk ang a, a kut phah te saw a thap viau ang" Faith chuan a la ti hlak hlak a, chuti taka kan inleng pa a hmusit chu ka rilru a lo na ve ringawt a, danin a phal loh leh thiang lo a nih loh chuan eng hna mah hi hmuhsitawm a awm tlat lo a ni. 

"Fimkhur ţhin teh..ţawng phawng phawng zel suh. Hope-i bialpa chuan hna a nei a, nang chuan hna i neih ve loh kha. Chhungte chawmhlawm mai mai alawm i la nih. Zak tur zawk chu nangmah hi a sin" Nico-an a lo tih chuan a hmui a ti pawrh a, a chhang let ngam lo thung. 

Choka kan chhuahsan rualin Hope-i bialpa pawh kan hmu ve ta chiah a, a hmelchhe lem lo. Faith-i sawi angin a ţhing lo bawk. Pangngai takin a inchei a, tim daiin, beh loh hmel deuhin a ţhu a, a inthlahrun hmel lutuk te chu a khawngaihthlak zawk. 

"Kimtea a nih hi aw" Hope chu a lo nui var var a, a ţhianpa hming a lo sawi takah chuan din loh theih pawh a ni tawh lo, "I va fel ve...leng reng rawh aw" ka ti mawi ve a, Nu Hlimi a ţhu tum bur a, Pa Chhawna pawh a lawm vak hmel chuang loh. Hope chu an hau ngei dawnin ka hria a, ka lo huphurhpui nasa mai. 

"Thlasik lai laiin thei chiah in chhawp a, thingpuite va lum rawh" Nico chuan a lo ti fiamthu ve a, awm ve reng chi ni hek lo le, inchungah kan chhoh san a, an chanchin pawh kan sawi zui lem lo. 

"Ka pa nen khan eng nge in sawi?" ka ti ta zawk a, inbual lo a mut em chu ni theiin ka hre lo a, towel leh thawmhnaw hak thlak vel ka lak hnuah a mutna bulah ka ţhu a, "In dan ka duh ka ti" a lo tih chuan, "A remti em?" ka ti ve nghal zat a, lu a thing a, beidawn hmel zet hian a thaw zui hawk a, loh theih loh chin a thleng a nih loh chuan ka pa phal lo chung chu a ti lui lo tawp ang. 

"Rita-i kha a cancer tak tak i ring em?" ka tih leh chuan, "Ring lo...ngaihsak a duh vang a nih kha. Thil dang chu ngaihven duh suh, ei chak i nei em? Zanrei a mi kaihthawh ngai lovin..Cleopâte" a tih chuan ka lo nui hak a, "Englai pawn acid ka ei chak" ka ti chu min melh rum khawp mai. 

"Nu chuan a ţha leh ţha lo i hre ber ang. Engmah ka sawi dawn lo" a ti vel a, "Ţha leh ţha lo ai chuan chak a na tawh ţhin. Rai ve chhin la i hre mai ang" naupangchhia zet a ka tih chuan, "Khawi, i chhul ka lo haw ang a ka lo rai zawk ang" a ti a, kan han nui leh rih ţhin a, kan inneih hlim kha chuan ka hnial dang ziah a, tunah chuan a dang ţha duh tawh der lo. 

Ka inbual zawh chuan a lo mu fel diam tawh a, khua a vawt bawk nen, khur hlak hlak chungin a bulah ka inthawlh ve a, ka kut vawt a a awm ruak kung mai ka khawih chuan a lo rum nghut a, ka nuih hak laiin ka hmuiah a rawn fawp a, "Silai kah a zir chi rih awm si lo a" inlak hran paha a tih chuan, "Chi nang...i kap hlum ang" ka lo ti vat a, ka kawr chhungah zen lutin ka dul chu a chul a, "Laiphir a nih em loh chuan a haw lutuk bik dawn mawni" a ti ban charh a, ka nui hak hak a, ţawngkam a thiam sawt lutuk hi thinrim theih tak tak pawh a ni ţhin lo. 

"Naute hi lo ti tla ta ila engtin nge min tih ang?" ka ti a, a ngawi vang vang a, min chhang tawh dawn lo emaw ka tih hnuah, "Kawmthlangah ka paih ve daih ang che" a ti a, a thutak phian lehnghal. 

"Nih leh lo chhiat ta ila" ka tih chuan, "Chutiang sawi suh" a ti bul hmuk a, a awm a ka kut dah chu vuanin a fawp zauh a, "Pathian zarah kan dam vek ang chu" a ti chu ka tho kang uaih a, "Engmaw i sawi kha?" ka ti hluai a, pawisawi lo deuh a min en ran chung hian, "Kan dam kim em ang chu Pathian zarah" a lo ti leh a, ţawngkam a thiam tawh ka ti zo chiah a, a zei lohna leh ţawngkam thiam lohna bawk a langchhuak leh tawh a nih hi. 

"Pathian zarah ţha deuhin i nei ang ti ve mai ta che" ka tih chuan, "Ka sawi tum i hriat tho chu" tih hluk pahin min kuah mu leh a, min rawn hnaihin a hmuiin ka nghawng a nul kual a, a fawp leh ţhin a, "Lehlam hawi mai rawh" ka ti leh ringawt ţhin a, "Umm" a ti ringawt a, ka taksa chu a chul a chul a, a tawpah phei chuan, "Silai kah chu zir ang, ka kap na vak lo mai ang" a ti leh tawh a, ka nam sawn a, ka inla hrang zui hmak bawk. 

"Ka it awm em em pawh a ni si lo a ngah nge maw i ngaihtuahna a dâm nghal ruih zel ni" ka ti nang nang a, nui hawk chung hian min rawn hnaih a, min kuah leh ta tho a, awm hle hle mai loh chu tih theih a awm lo. 

"I itawm alawm le. Cleopatra ianga hmelţha Cleopâtei nupuiah ka nei a, awm hle hle ila chu Pathianin min hrem duh hial ang chu" a sawi zawh hmain a chalah ka nam pawp a, a ţawng zui lo chiang khawp mai. 

Zing a ka harh chu ka luak a chhuak leh ut ut tawh a, ka pasal muttui lai chu ka sawi nawk nawk a, mit chhing reng chung hian a inlet thawk a, "Ka la tho peih lo" tho phang aw zet a tih pah hian a mutna lam aţang chuan bucket tê a rawn lek chhuak hem mai! A lak lai ka hre lo a, a inchhawp tih pawh ka hre lo. 

"Ka ning" tih hlak pahin ka tho a, bathroom ah ka lut zui nghal a, ka luak a chhuak dawn tuh a hre vek a, min ngaihsak lo anga awm a hreh ve si, mut a duh ve tho bawk siin ka mutthilh hnuah a lo inchhawp lawk tih a hriat reng mai. 

Bathroom ah chuan ka tih tur ang ang ka ti bawrh bawrh a, ka ti sawk sawk a ni zawk mah ang. Ka insil fai hnua ka chhuah chuan ka thawm a hriat rualin mit nuai nuah nuah chungin a lo ţhu chhuak a, "Eng nge i tih a?" phak chuap hian a lo ti a, bucket pawh khumah a let bal mai. 

"Hre lo der vel lo mai teh. Ka luak a chhuak a ka tho tih te chu i hrereng alawm. Ka thinrim loh nan i hre lo der a nih kha. Naute pa ve si i thatchhe emai" ka tih chuan, "I mood a inthlak thut thut a, i harh apiangin min kaitho bawk a, mut ka kham bik miah hleinem. Dar2 velah ka hmai hi kâng chhe vek ta sela min la duh tho angem tih mai mai te min la zawh kha" a ti deuh duah a, tunlai chu mutchhuak reng e ti lo chuan mut ngheh theih miah loh chang te ka nei a, dawih ngai mang si lo dawih riau chang ka nei bawk a, a muhil bik ang tih ka hlau ţhin em a ni. 

"Nupui neih chuan chung te chu i huam vek tur alawm. Meng mang lovin min bia a, bucket in min khawng lo chauh a nih kha. Min ngaihsak lo emai" ka ti hlak hlak a, ka che vel chu a mitin min chhui zui reng tih ka hre ru ran a, ka ngaihven duh bik lo thung. 

"Cleopâte" a ti thum dut a, a lam pawh hawi duh lovin ka hak tur ka thlang a, hria ang pawn ka awm lo. 

"Pâte" a tih leh pawhin ka eih duh chuang lo a, "Saiţhuam" a tih pawhin hre lo ang hmakin ka awm. A beidawn tawpah, "Va luak ţha leh rawh..i hnung ka lo chul ang" a ti ta ringawt a, thinrim viau si kha nui lo turin ka insum hram hram tawh zawk a ni. 

"Min thlah dawn em?" ka tih chuan, "Ka tho nghal" a lo ti vat a, rang deuha min rawn panin ka kawngah a kuah a, ka nghawng a fawh pahin min chawi kang euh a, min chawi sang em em lo a, min dah thla leh vat chung pawhin ka lo ţe ţhat tho. 

"Zun reng a ngaih hunah phei chuan min kalpui peih lo hian diaper min hren tir duh ang ka ring" vui awka deuh taka ka tih chuan, "Kekawrte lianpui i ha reng dawn tihna a ni mai lawm. A thawl nuam ngawt ang chu" a lo ti fiamthu a, ka kut ka lek uaih lai chuan nui hawk hawk chung a min lo kuahin a awmah min pawm bet a, "A nuamah emaw a hrehawmah emaw kan tih khan a huam zau alawm, lungngai suh" tih paha duat deuh a ka hnung a chul chuan awm a nuam ve veng veng mai. 

Inhnuaia kan chhuk chuan Hope ţap ri kan hre hmasa ber a, zanah an hau daih tawh ang chu tih laiin zingkarah an hau a ni khawp ang. An lo ţhu khawm laih a, Faith leh Pa Chhawna te meuh pawh an awm ve chuan thil ho mai mai a ni lo tihna a ni mai. 

"Keiman ka chawm zawk mai ang han tih te chu a atthlak lutuk. Ţhen hmak la, i zirlai chiah ngaihtuah rawh. Kan fate in ni a, in retheih kan phal lo. Chuvang chuan in kawppui tur kher kher hi chu ka fimkhur a, miin min dem luih luih mah se ka inrawlh tho ang. Zanah lah kan mut hnuah a haw a, mi mut hun pawh a hre lo, mi mawl a nih kha" Nu Hlimin a lo ti hlak hlak a, Nicholas chuan min kuahna a thlah a, Hope-i bulah chuan kal pheiin, "Tho rawh" a ti dam thlap a, amaha a thawh hun pawh nghak lovin a kaitho zui zat bawk. 

"Zing kar karah inhauh tur a ni ngai lo. Mi hausa ringawt pâk huam zel suh ka tih fo kha. Sum i duh emai i chalah hian pawisa bel ila a ţha ang" a ti a, Hope chu a hnungah dintirin midang chu a enkual a, rin aiin a thinrim hmel daih mai. 

"Lo inrawlh suh..nu leh pa te chuan in ţhatna tur kan duh a, phir te ngat phei chu ţul tawpah lo chuan kan hau ngai lo. Nizan la la khan ka hau ang ka ti zawk a, a inleng pa kha a awm rei leh lutuk a, kan mut san a nih kha. Khatiang mi kha nei se chu chaw a nghei fo ang" a ti tan tan a, chhungkaw buai award te hi siam se, kan chhungkua hian kan dawng ngei ang a, a lo thlawn a buaina hrang hrang tawrh mawp mawp ai chuan a hlawk thlak ve deuh ang. 

"A nei ngei dawn tihna a ni lo, en liam mai mai rawh. Ho te teah buaina in chawk chhuak ziah mai, a ninawm zo zai tawh" a ti nghat nghat a, "A ho awkawng lo..thu a awih loh chuan a hma hun thlengin a chhe vek thei. A tana ţha tur ka duh vanga zilh hau ka nih hi" a la ti kha kha a, "Nang hi chu ah..i kuang chhungah pawh pawisa kan phum tel leh tel loh hriat tumin i dap ruk ruk tho ang" ka pasalin a tih chuan Pa Chhawnan a lo khap a, "Mi in an hre reu reu ang e. Hope, nangpawh i nu thusawi kha ngaihtuah chiang la, pasal neih fuh loh chu kumkhuain a pawi tawh ţhin a nia. Nicholas, Saii chaw ei chhung kan ti ti lawk dawn mi?" dam thlap hian a ti a, Hope-i chu ka kai a, choka ah ka luhpui ta daih a, dawhkan kilin a ţhu kun lap a, kan be ngam rih lo a ni ber. 

"Ka la tlan bo daih ang. Ka awm loh chuan an inchhir ve ngawt ang. Pawisa men hian an meng a, ka nu leh pa an thinrim tawh chuan Anthony lah hi a ngawi daih zel a, hman aţang tawhin U Nico awm lo se chu he inah hian ka awm tawh teuh lo" amah zawk chuan a ti hlak hlak a, a la insut feih feih reng mai. 

"Tlan bo lo e..a zia ve mai ang. An pawm thiam rih lo mai mai a nih kha" ka tih chuan, "Kan pian hma aţanga an nih dan ve hrim hrim a nih hi. Mi hausa leh rethei thliar leh lutuk, mi rethei ngaihnep ching chhungkua a ka piang hi a pawi ngawt mai. Ţul tawpah lo chuan kan hau ngai lo an ti vel a, an duh loh zawng ţhian ka kawm hlek chuan ka nu hian min hau hrep zel. U Nico bawk hian ka thlavang a hauh char char zel a, lehkhazir a phaia a awm hlan te khan keimah hian hrehawm ka ti ber ang. An rilru hi a dik lo a, duhthlang thei dinhmunah ding ila chu he chhungkaw zinga mi hi ka ni ve hauh lo ang, ka thlang lo chiang viau ang" a ti a, sawipui vak chi ni a ka hriat loh vangin ngawih ka chuh a, Hope-i ang chiahin Kungtei pawhin hrehawm a tih hmel khawp mai. 

Hna kal tura ka chhuah dawn te chuan, "Kan inchhung hi chu a hahthlak leh lutuk a, mahni thu te hian in kal hlawm a, nu leh pa thusawi engahmah ngai hlawm lo mai. Mi zah derna chhe te mah in nei lo" tiin nu ber a la ang tun tun reng a, thinrim ve ţhin viau mah ila beng chhut ngawn luih a ngaih chang a awm ţhin. 

"Ka pa khan eng nge a sawi leh a?" motor a ţhut luh paha ka tih chuan, "In hi ka hmingin a dah a, chu chu min hrilh. Kan chhuah loh nan theih tawp a chhuah a ni ber" a ti a, chhan tuma ka an zuau lai chuan, "A buaithlak khawp mai" a ti ban leh charh a, inchhung boruak ringawt pawh chauh pui tham a nih tawh nen, rai no hrehawm zual lai a la ni zui a, reilote tal kan in lama riah phei ka la chak reng mai. 

Anthony a hnen aţangin hre vek tawh mah ila, "In chu i hmingin a dah na a rei tawh nge a dah ve chauh zawk?" ka ti a, a dahna a rei tawh tih ka hre vek tawh thung. Nu Hlimi hian a fate dang aiin a en hrang bik a, Pa Chhawna hian zankhat mit chhin pawh lo tawk se Nicholas a lan bik lutuk loh nan a tih a nih ka ring. 

"Ka dahna a rei tawh a ti. Lehkha a awm vek a, ka en hman rih lo a, nakinah muangchangin ka la en ang. Indim rawh aw...taxi in haw la, ka sawi kher loh pawn doctor hmuh kha ngaipawimawh rawh" a ti zung zung a, nau ka pai hnu ngat phei hi chuan a mizia a danglam lehzual a, hmeichhe dang chuan sawiselna tur an hre lo maithei, mahse keimah ka ni miau a, kan inhnial palh leh ţhin. 

"I kal hmain Hope kha ngaihven deuh rawh aw. Tlan bo te a sawi a, rilru len hunlai a ni bawk si, a lo tlan bo tak tak ange, kan chhung buai a ni leh mai" hlauthawng taka ka tih chuan, "Tlan bo a tum ziah, a tlan bo tak tak ngai lo" a lo ti mai a, an hau ţap zawih zawih bawk si a, keichuan a ti duh tak tak mai ang tih ka hlau khawp mai. 

Ka inthlak zawh rualin Mapuia message ka dawng a, 'Kan inhmuh ţhin naah khan lokal lawk rawh. Sawi duh ka nei, ngaihdam dil che pawh ka ba in ka hria' a rawn ti a, lo inkawm hrep tawh kan ni bawk a a tihsual a hriat tak avang chuan ka chhiar nui ver ver mai. Ţhian ka kawm zau lutuk lo a, ka ţhian neih ve chhun te hi chu ka hlut ve a, Mapuia pawh rilruah a lo awm leh ţhin. 

Ngheti hnena ka hrilh ve chuan, "A ţha alawm. Ngaihdam a dil dawn che aniang. A thil tih dan kha a ţha lo em a, hmana in inbiakna a lo tlangzarh vak ringawt a, inpa nen in inţhen phah chuang si lo a, a beidawng tawh aniang" a ti a, a hmelin pawi a sawi lo bawk nen, Mapuian khatiang a ti ve kha chu midang hnenah sawi ta ila an awih kher lo ang. 

'Haw dawnah law law ka lokal ang' tiin ka chhang let a, Ngheti bawk chuan, "Mi nupa inhmangaih lai pawh ţhen tum ringawt hi chu a mipa hna lo ve bawk em alawm. A duh tak tak che a nih chuan lawm takin a kal tir ang che. A rilru a na deuh anih pawhin i hlim phawt chuan a ti ang a, ui chung chungin a kal tir zawk tur che a ni. Pawh beh che a tum a, a hlawhchham a, chuvang maia i hlimna tih chhiat ve zel a tum chuan hmangaihna a ni lo a ni mai. Hre reng rawh, ţhian pela a biak che chuan i hau hrep dawn nia" a lo ti leh a, ka zawm ţha khawp ang. 

Haw dawna Mapuia biak ka tum chuan a message a lo awm leh tawh a, 'Ka nghak mek che' tih zawng a ni a, keipawhin 'Aw le' tih bakin ka chhang lo. 

In chung lamah ka chho a, Mapuia min lo nghahna hmun lama ka kal chu kil khata hmeichhe pakhat lo ding hi ka kal pel a, min lo nuih ve tak nain ka hriat ngai a nih loh avangin ka nuih let ve lem lo, result nghal satliah a nih ka ring a, nitin mi chi hrang hrang an lokal a, hmelhriat sa an nih loh chuan kan phek en vek tawh mai ţhin. 

"I lokal thei hram hram maw?" a nui sang a, a fai var zel bawk nen, hmuh a nuam lehpek khawp mai. 

"Aw..kal thei hram. Ka rei hman lo thung a, in lamah kan buai ve lutuk a" ka tih chuan, "Mi status ka hmu a, nau i pai tawh em ni?" tiin min lo zawt ve thung a. 

"Aw...pai ve mek a, mak i ti em?" ka ti a, a hma ang khan pawh deuh a biak ka tum a, a harsa rih khawp mai. 

"Mak hran lo a, pasal i nei tawh miau a, harsatna i nei a nih ngawt loh chuan nau chu i pai tur alawm" a ti satliah a, min din hnaih pah a, tawlh hnung hret hret mah ila min din hnaih zel tho. 

"I dam ţha hrim hrim maw?" ka ti ta ringawt a, kan taksa chu a insik hlauin a awmah na vak lovin ka nam a, ka dawm a ni mah zawk. 

"I hmuh ang hi a ni mai. In pa nen in hlim viau niin ka lo hria a" a tih te chuan nuam ka ti tawh chiah lo a, nui lui chung hian, "Aw..hlim ve tho e, nau ka pai bawk sia, chu chuan min ti hlim a" ka ti a, ka aw chhuak te chu a ro halh a ni ber. 

"A ţha alawm. Awlsam deuh a ka kiansan theih che ka ring a, hmu lo tur chein ka insum ţang ţang a, insum theih loh hun a thleng ta a nih ber hi" a ti a, thupha chawi tum angin min ko a, min bum mai mai chu ka ngaihdan a ni lo viau tawh. 

"Thupha i chawi dawn emaw ka tia, thil dang tih tumin ka rawn pan lo che. I inthiam lo emaw ka tia, i ngaihdam dilna ngaithla tur chauhin ka lokal. Thu ho mai mai ngaithla tura lokal ka ni lo" ka ti ta hmak a, kal mai ka tum chu ka darah chelhin a hmer vak a, a na khawp mai. 

"Min thlah nghal rawh" sehchilh zet a ka tih chuan, "Duh lo ta ila?" ngeiawm zet a nui chung hian a lo ti a, min cho let duh dan te chu ka haw hlur mai. 

"Ţhian pawh kan ni thei tawh lo tihna a ni mai. Pasal ka nei a, ka pasal hi ka hmangaih a, pasal dang neih ka tum tawh lo bawk. I pawm thei lo a nih chuan sawi tur ka nei lo, beiseina ka lo siamsak ţhin che a ni maithei a, chumi ah chuan ngaihdam ka dil nghal bawk che" ka ti a, ka vin lo nain ka aw ah chuan ka thinrim zia a lang chhuak chiang khawp ang. Kalsan ka tum leh chu na lehzual zawkin min hmer a, ka ţhen sak nghe nghe a ni.

"Min thlah rawh ka tih chu" vin zet a ka tih chuan rawn kun hniamin ka hmuiah a fawp ta mai a, tal nghal bat bat mah ila min dawm ngheh em avangin ka tal chhuak thei der lo.

CONT...