HIS LAST LOVE-27

HIS LAST LOVE-27

Ka dar tawn tawnah nghet deuhin a dawm a, a awmah ka nam a, ka chum bawk a, tal chhuah tum nasa viau mah ila ka hah thlawn a ni ringawt. Ka taksa a chau bawk nen, engkim mai chu a hla du vek tawh a, insi ranin ding mah ila hla deuh a awm ang mai a ni tawh. Ka dar lah chu a na ngut ngut a, chak lo deuh anga lan duh lo mah ila ka mittui ka dang thei ta bik lo, ka lo ngaih hlut em em ţhin kha tunah chuan ka ten hluah hluah tawh. 

"Eng nge i hriat a? I va zakthei lo ve" min thlah ruala vin zet a ka tih chuan a nui suk duh chauh a, "Ţhianţha ah ka ngai che a, kan inţhianţhatna khan ngai a awh leh beiseiin hmu tur chein ka lokal a, hetiang rilru hi maw i lo put a?" ka ti leh a, ka ţah a chhuah lutuk avang chuan duh angin ka ţawng ring thei lo zawk a, ka pasal pawn min duh miah lo chungin min nei a, a thinrim ber lai pawn tha ka hman ţhat theih loh thleng a min man betin min khawih lui ngai lo. 

"Khatianga ka tih loh chuan engtikahmah ka fawp ve thei nang che? I hmui nalh zet mai hi fawh ka chakna a rei tawh" tih paha a kutţanga ka hmui a rawn nul chuan rang lutukin a kut chu ka lo beng thla a, ka mittui ka nuai fai tâwk a, ka ţah a chhuak viau nain ka ţap duh bik hauh lo bawk. 

"Ka khawhar lai leh beidawn ber lai pawha ka duh ngam tlat lo ţhin che kha a chhan ka hre ta mai, ka ring tak tak thei ngai lo che a, ngaihţhat lohna ka nei ţhin. Hetiang mihring hi i lo nih vang a nih dawn hi pawh tak tak i harsat em em ni. Ţhian pel a en che ka tum apiangin min dang tu a awm zel a, ka rilru ka pe ve hman lo che kha ka thil tih sual loh ber te zinga mi a ni ngei ang. I tenawm zia ka hre ta bawk a, vawikhatmah min rawn be leh tawh suh" ka ti khur dar dar a, ka aw khur nasa lutuk te chu ka thinrim em vang a ni ngei ang. 

"A mak...ka sawi fo ţhin kha. Ka duh chu ka nei ţhin ka tih kha i lo theihnghilh leh hman em ni? I hmel, i pian leh chetphung zawng zawng te hian min hip a, ka hmuh hmasak ber che aţang khan ka rilru zawng zawng i la vek, mipa dang bula i awm hi ngawi renga ka thlir liam mai mai theih i ring em ni? Ka mit fuk tawhna ka kalsan ve mai mai ngai lo" a tih chuan rapthlak ti lutuk hian ka en ngawt ngawt a, kei takngial pawhin rapthlak ka tih chu a rapthlak a ni mai. Hetiang mihring hi lemchan velah chuan an awm thei maithei, Mapuia anga rilru chhe lutuk hi chu thawnthu ziak tu ten a lem lem a an duan chawp mai mai theih chauhah ka lo ngai ţhin a, a tak takah an awm ka ring ngai lo. Mahse, tunah lawk khan ka hmu a, ka beng ngei hian a thusawi zawng zawng kha ka hre vek bawk a, rapthlak ka ti lutuk hi sawi vak ngaihna ka hre lo zawk. 

"I duh zawng apiang nei ţhin mah la keichu engtikahmah min nei thei ngai lovang. Kut ka thlak lo che hi lawm hle zawk rawh. Tun hi a tawpna ni rawh se, ka hmuh phakah rawn inlan leh tawh suh" tih leh kal ka rual a, tawi te ka pen hman tih chuan, "Nangmah zawkin inhmuh i duh sek maithei a ni. Nichin lawka thil thleng kha i pasal hnenah engtin nge i sawifiah dawn? Thil thleng palh emaw, ka duh lo chung min fawp lui ti la a awih kher angem? Mipa dang ni lovin keimah ka ni lehnghal" min deusawh zet hian a ti a, ka ke pen a tawp chiang hle. 

A dinna lamah bawk chuan inher lehin, "Ka pasal hnen a ka sawi duh i ring reng reng em ni? Nichin lawka i chet duh dan tenawm zet kha chu tu hnenah mah sawichhawn tlak a ni lo, ka sawi peih lo bawk. Ngaihtuah ringawt pawn luak a ti chhuak hlui thei a, intithei deuh a midang hrilh kual vel tur chuan min beisei suh" a awki ang chiahin ka ti ve a, ka sawi tawh ang khan Mapuia anga sual leh rilru chhia hi chu film leh thawnthu ah bak an awm ka ring ngai lo. 

"Kan en ang chu...kan inhmu leh vat dawn nia" a tih lai te chuan tur deuh khaiin ka lo melh a, chhan pawh chhang let duh tawh lovin ka kalsan hmawk hmawk a, inhnuai lama hmanhmawh deuh a ka chhuk leh lai te chuan ka hmui ka nuai tawk tawk a, Mapuia kha ka ten hluah hluah a, ka hmui ngei pawh hi ka ten zo vek tawh. Mifel ber ang maiin ka bulah a awm ţhin a, kei pawhin ka ngaina hman hle a nih kha, lem a lo chang nasa awm ţhin hle mai. Pawi sawi lo deuhah ka lo ngai ţhin a, mi rilru ţha leh tluangtlam tak emaw ka lo ţhin, hetianga rilru lama harsatna nei ang maia a chet hi ka ring ngai lo, ngaihtuah pawh ka ngaihtuah pha ngai lo. 

Nghetin min lo la nghak a, min hmuh veleh chanchin hre chakin min lo pan vat a, a bag chu ah pangngaiin a ak mai a, ka bag ve thung chu a lo awrh uai hnuang mai. 

"Eng nge chanchin? Ngaihdam chu a dil che em? In inkawm loh hmak hnu kha chuan nuam lo i ti ve ţhin si a, ţhian chu in ni leh thei ta em? Ani aia U Nico i thlang hi a tuar thiam deuh tawh em?" a lo ti mawlh mawlh a, Ngheti ţawng ri ringawt te chuan lu a ti hai a, Mapuian ka dar a hmerna kha a na ngut ngut bawk, a duk hial lo maw tih tur khawpin a ni tunah pawh a la nat ni. Ka ni muai muai a, ka chau nghulh a ni ber. 

"Ţhu phawt teh ang...ka chau lutuk ringawt" ka tih chuan kan hnaih ber ţhutna awlah min ţhut pui a, ka hlim hmel a hmuh loh vang aniang hlauthawng hmel a pu ţan tawh a, min en chik sawt khawp mai. 

"Engmah in sawi kaw chuang nange? Ţhian nihna bak pelin a en lui tho che em ni? Eng nge a sawi?" a ti leh a, min thlek deuh chung hian ka hnungzangah dimtein a dawm a, min fawh lai vel kha chiang takin a rawn lang a, ka ten lutuk chu au chiam chiam mai ka duh rum rum. 

"Tenawm tak a ni, Mapuia ang mipa hi an awm theih ka ring lo. Aaa...an awm lo ang. Amah bak hi a ni lo ang, amah ang hi an awm dawn lo hrim hrim" ka ti nawk nawk a, sawi hmasak tur ber pawh ka hre lo. 

"Eng nge i thusawi chu a awmzia? Kan tlawh pawh vak ngai lohna hmunah in inhmu sia a khawih che em ni? A mawi lo zawnga awmpui che a tum nge i duh lo chung a khawih che?" hlauhthawn hmel takin a lo ti leh mawlh mawlh a, ka pasal hmel mitthla ah a lo lang a, chu chuan inthiam lohna min siamin kut tal ka lo thlak lo kha ka inchhir leh hnuhnawh a, mahse rilru a buai em a, eng nge tih a tih loh tur tih te chu rilruah a awm lo hrim hrim. Engmah ka hre mumal lo pawh ti ila ka sawi sual kher awm lo e. 

"Sawi hmasak ber tur pawh ka hre lo. I rin ang a ni bik lo ang, ka ten hluah hluah, vawikhatmah ka hmu duh tawh lo" tiin thil awmdan ka sawi a, chipchiar taka ka sawi zawh meuh chuan a ding hluai mai. 

"Ka hek dawn...doctor la awm ve ho bulah ka hrilh kual ang a, hotu lu deuh ho hnen a hrilh turin ka ti bawk ang. Chutiang mi tenawm lutuk chu doctor inti ve tlak pawh a ni lo. Ka hek dawn chiang khawp mai" a tih khar khar lai chuan a banah ka lo pawt a, "Ţhu leh phawt teh" zawi te hian ka ti a, a ţhu veleh mai bawk a, "Keimah ka mualpho tel ve zel dawn a sin. An dilchhut dawn a, chik deuha thu an zawh che chuan a bul aţanga i sawi vek a ngai dawn a, ka hmingchhe ve dawn hrim hrim. Pasal nei chunga mipa dang bia, ngaihzawng nei tiin min sawi ve thei tho a sin" ka ti a, rilru chu a nuam zan lo kher mai. 

"A va zakthei lo em em ve. Eng angah nge a in ngaih a? Lo duh che pawh nise i duh ve lo tihna a ni mai a, pasal i nei a, nau i pai tih thlengin a hria. A fawp lui ţalh che hi ka lawm hlawl lo, ka hau dawn khawp mai" a la ti hlak hlak a, "Hau rawh..i hmuh hunah lo hrilhfiah ve rawh. Ţhian te tiin ka ring ve em em a, a chet duh dan hi a ţhing a, a sual thlak bawk. Hetianga a tih vang hian kan inţhen phah a ring reng reng em maw ni?" ka ti a, in a haw pawh ka phur tawh lo.

Ţawng leh a tum lai chuan ka kut a lo zah pah hian, "Lawk aw...Nico-an a lo call" ka ti a, a ngawi veleh mai bawk a. 

"Hello" ka ti te chu ţum dang aiin a dawih aw riauin keimah pawn ka hria a, ka hlauthawng vek tawh a ni ber. 

"Na i nei em? Eng nge i an?" a rawn ti dam thlup a, "Aw..ka ţha alawm" hlauthawng tak chung bawk hian ka ti a, min rawn vin pung pung lo chu ngaih a ţha lo zawk. 

"A ţhat chu..taxi in haw rawh aw. Keipawh ka lo haw har lo ang. In dim la, thei ka lo hawn ţeuh ang che" zangkhai vah hian a ti a, buk nghat pahin ka aw ve mai a, kan inbe rei hran lo nain rei deuh angin ka hria a, mak tak maiin a lo haw tur chu ka huphurh tlat bawk. 

"Lo kal rawh taxi ka chan pui ang che. Ngaihţha deuh khan awm phawt la Mapuia chu ka hmuh veleh ka lo hau ang. In pa in a hriat ve tak leh ka sawifiah pui dawn che nia. A puitling a, tlangkam aţanga a lo hre ta a nih pawhin a awih kher lo ang. Hahdam la, ngaihtuah tlut tlut lo la aw" ka ţhiannu chuan lo ti lehin damdawiin chu kan chhuahsan a, keimah leh keimah pawh hi ka inten deuh tlat tawh. 

In ka thlen veleh ka inbual a, ka hmui te chu ka nuai tawk tawk a, ka pasalin hre ta se tih ngawt mai chu rilruah a awm a, ka hah hluah hluah mai a ni. 

Inhnuai a ka chhuk laia "Saii" vin zet a Nu Hlimin a lo tih te chuan ka phu zawk a, ka thinphu a rangin a inthum rawn tlut tlut reng a, ka ţi dui reng mai.

"Eng nge ni?" ka tih chuan, "Kawng chhak lama ka pangpar dah ho khi lo han dah rem deuh teh. Vawiin chu pangpar ka buaipui a, dah rem turin tha pawh ka nei tawh lo. Chhak lama hnim te kha pawt fai pah la aw" a ti a, Kungtein tv a en a, min pui tur pawhin a ti chuang lem hlei lova, ka tha chhawr loh hi a hlau zek zek mai a ni. 

Chau chung chungin a sawi ang chiahin pot ho chu awmze nei thlapin ka rem a, hnim ka pawt fai bawk. Ka kawng leh ka tai lah chu a na reng a, a awmzia pawh ka hre tawh lo. 

Ka pasal lo haw chu inchungah zui chhoin ka kut leh ke vel ka sil leh thuak thuak a, ka thawmhnaw ka thlak lai te chuan ţha deuhin min be reng a, engmah hre ve lo mah se keimahah hian inthiam lohna a awm tlat tawh a, ngam hawrh a har rih khawp mai. 

"Vawiinah ka hmuh loh laiin acid i ei em? A ţha lo ka tih kha aw" a tih chuan, "Ei nang...taksa tana ţha ho bak ka ei lo. I chau em?" ka ti ve mial a, innei rei ve tawh viau mah ila vawikhatmah a chauh leh chauh loh ka zawt ngai lo. 

"Chau e..ţhu rawh i malchungah ka lo mu ang" a ti nghal zat a, chau lo e han tih mawi ve a awm lo, ka ţhut rual rualin min rawn hnaih a, ka malchungah a lu nghatin hahdam hmel deuh hian a mu a, "Vawiinah i lo fel em? I nu hi hrehawm i siam sak lo maw?" tiin ka pum chhunga naute chu a be uang a, ka thil tih chu hria se hetiang hian a awm awm tawp si lo. 

"Min ring em?" a sam khawih neuh neuh paha ka tih chuan, "Ring e..ka nupui ber ka rin lohin rin tur dang an vang awm e" a ti a, hlauhthawn lai a ni bawk nen, "Miin lerh deuh angin min sawi ta che engtin nge i tih ang?" ka ti a, ka malchunga mu reng chunga min rawn en chuan, "Min en kher suh" tih pahin a mit ka hup a, a nuih a za khawp mai. 

"I lerh lo a, a tawk der mai lawm. Min kalsan dawn lo tih ka hria a, hlauhthawn na ka nei lo. Naute nen ngat phei chuan ka hmuh phak lohah i tlan bo daih lo ang" a ti ve duah a, ka lo thaw hak ringawt a, miin an sawi hmaa hrilh vek ka duh a, mahse an lo sawi lo ve maithei a, Mapuia pawhin tumah a hrilh lo mai thei a tih rilru ka pu a, miin sawi tumna an neih miah loh laiin keimah zawk ka lo inpuang vek ang tih ka hlau bawk. 

"Nia..min ring rawh. Thil pangngai lo deuh hlek i hmu a nih pawhin ka duhthlanna ngei a ka tih a ni lo tih hre ran a, ka phatsan che a nih chuan miin min vau bet a nih loh pawhin tih luihna hmangin min hnaih tihna a ni mai" ka tih chuan a mit ka hupna kut chu la thlain chik deuhin min en a, a ngaih a ţha zan tawh lo tih chu a hmelah pawh a hriat theih. 

"Eng nge thleng a?" a ti ta chiah reng a, "Engmah a thleng lo" ti ve vat mah ila, "Dawt i sawi thiam lo a, ka hria alawm. Thil thleng a awm tiraw?" a tih pawh chuan lu ka la thing tho a, "Nupa chu in rinhlelh chang te a awm a, ka phatsan che anga ngaih tlat hun i neih ka hlau a, ka intlawh khalh lawk a nih chu" ka ti a, a thaw deuh huaiin ka hria. 

"I sawi a nih loh a, ka mit ngei a ka hmu a nih loh chuan engmah ka awih lo ang. Ka ring che ka tih tawh kha" a ti nghet charh a, a lu ah dawmin ka kun hniam a, a hmuiah chuan keimah zawkin ka fawp hmasa a, inlak hran leh mai ka tum chu min lo pawtin duhthaw zetin min fawp let a, vawiin a thil thleng kha theihnghilh ka duh vanga hetianga ti hi ka ni. 

"A mak hle mai" a ti a, ka awmdan chu mak a ti tak tak a nih hmel, hmuh thiang lo hmu ang mai alawm a nih le. 

"Min ring tlat ang che...ka fawh che kha chu min rin vanga lawmthu sawina a nih kha" fiamthu a ka tih chuan mak ti hmel pu reng chung hian a nui veleh mai a, kei erawh chuan kap tu ka nei ran a, a tak tak pawhin ka nui ve thei lo, ka nui lui vel mai mai chauh a ni. 

Chaw ei lai te chuan ka ei hnem loh hlauin ka chawhmeh duh zawng min suah sak a, mi ngaihsak a thiam vak lo nain a thiam dan dan hian min ngaihsak ve tho a, a chhungte hmuh lai pawhin min ngaih pawimawh zia a ti lang fo ţhin. 

"Pasal neih hnua ngaihzawng neih vel hi ka ngei zawng tak a nia, U Sai, i lo nei ve hlauh ang e aw. Kha, i pasal lahin a duat ropui che sia" Faith-in a lo tih ve phei chuan awm a nuam lo lehzual a, chaw ei pawh a tui thei meuh lo chu a ni. 

"A nei awm lo e..Rita-i a lo lawr sek a, U Nico hi a ngaihtuahawm daih zawk. Hmeichhe zei deuh phei chuan mipa han tih vel an thiam a, inti pa deuh pawh hi an tlu ruai ruai zel a nia" Hope chuan a lo ti fiamthu ve a, ka va han nui lui ngun tawh tak em. Faith phei chuan awmze nei deuhin min en deuh reng niin ka hre tlat a, thil sual tih chuan kan tlanchhe ruai reng mai chu a nih hi. 

"Rita-i hian a taksa mawina hmang ten thlem ta che sela a thlem thlu thei che angem?" tiin mut hmunah pawh ka la zawt a, a ngo lem lo nain a pian chu nalh tak a ni.

"Thei lo ang..hmangaih ka neih tawh chuan hmeichhe dang ka ngaihven ngai lo" ka dul chul pah hian a ti a, "Mipa chuan in hmangaih miah loh pawh in mut pui thei zel alawm" ka tih leh chuan, "Sawi tawh lo teh" a ti hmuk a, inchung enin ka ngawi zui rauh rauh a, ka insum theih loh tawpah, "Ka awm a nuam lo" ka ti chhuak phawng a, a inbeng kang uaih a, a tih dan ngai bawkin ka mitah chuan ngun thluk deuhin min en a, a ngaih a ţha tawh vak bik lo tih ka hre vek. 

"Na ka nei lo i ti bawk si a, engin nge i awm ti nuam lo?" a tih chuan, "Kan inţhen dawn tlata hriatna ka nei" ka ti chuai raih a, ka hlauthawng lutuk chu ka phi cheng reng a ni ber. 

"I duh thu a i chhuak a nih loh chuan ka ţhen lo ang che. Mipa dang duh i nei a, min chhuahsan a nih erawh chuan ka ko tawh lo ang che" thutak deuh hian a ti a, mipa dang vanga kan buai chuk ka hlau khawp mai. 

Min kuah reng chungin a muhil a, kei erawh chu chau viau mah ila rilru a hah em avangin ka muhil thei der lo. Che chang lova ka mut reng lai chuan khum bula ka phone dah chu a nghawr det a, ka en vat a, thlalak ka hmuh ruala ka thinphu rang lutuk chu thlawk chhuak daih tur ang vel a ni. 

Mapuia nen a kan infawp lai kha thla an lo la a ni ngei ang Mapuia ngeiin thlalak min lo thawn a, ka ţan theih tawh loh lai, ţang eih lo ang a lo dawh ve mai angin ka lang a, ka tha a zawi tawh hnu niawm tak a ni. 

'I pasal ka thawn dawn lo. I duh chuan nang pawhin delete rawh. I pasal chuan a ţhen phah lo maithei che a, a chhungte chuan mo atan an duh tawh hauh lo ang che. Kan duh leh hmangaih ngawih ngawih ten min kalsan avanga kan nat theih zia i hre ve ang. I chhungten an hmuh hun chu an chhuah luih tir maithei che a ni' a rawn ti a, hetiang em em a mihring an sual thei hi mak ka ti. 

'I rilru a dik lo a nih kha, in entir rawh. I chetdan hi mi pangngai chet dan tur a ni lo. Dik lohna i nei a nih kha' tiin ka chhang let a, ka chhungte thawn lo turin ka ngen peih lo, ka ngen rual rualin phut let a nei nghal ang a, ka ti hlawhtling thei lo ngei bawk ang a, thlalak hi an hmu dawn tho tho. 

"I va meng rei ve..i nuam lo em ni?" phak chuap a ka pasalin a rawn tih chuan ka phu zawk a, phone ka thlauh lek lek nghe nghe a ni.

"Thlalak ka dawng a" ka ti a, "Eng thlalak?" a ti mawl tawp a, ngaihţhat lohna a nei vak lo niin a lang. 

"Mapuia nen a kan infawp lai" hlau chung chung a ka tih chuan a inperh tho zawt a ni ber. 

"Eng thlalak maw?" ring deuh zawk a tih leh pahin ka phone ken lai chu a rawn phih thla a, a bih nghal ngur lai chuan keipawh ka ţhu chhuak ve a, ka lam a lo hawi chuan ka ipik lutuk chu ka thaw hak a, ka kut ţang ka khal neuh neuh a, "Hmela mai mai chu" a ti hluk a, ka malchungah phone chu a rawn theh thla a, hrilh nghal vat ila a ţha zawk ang tih rilru pu chunga hrilh ka ni a, Mapuia thu rawn thawn pawh a chhiar tel vek aniang a hmelah chuan thinrimna bak hmuh tur a awm lo. 

"Vawiin a thil thleng em ni?" a tih chuan ka lo bu nghat a, thinrim viau chunga a vin miah lo chu mak ka ti let zawk. 

"Engtin nge a tih che?" a tih leh chuan zep lovin kan inbiak dan zawng zawng ka hrilh a, ka sawi zo chu ka thawl huai mai. 

"Min rin leh rin loh chu i thu thu a ni mai. Thudik vek ka hrilh che a, ka duh vang a ni lo tak tak" ka tih rual chuan, "Ka hria" a ti bul hmuk a, "I thin a rim tiraw? Min hua em?" tim dai hian ka ti leh a, "Ka thil in tura Rita-in damdawi a pawlh ţum khan ka duh vang ni hauh lovin a bulah ka mu a, khami ţum khan thinrim lovin thudik i zawng a, chutiang chuan ka ti ve ang. I duh vanga thleng a nih loh chuan huat nachhan tur che ka nei lo" a ti a, inringtawn dun viau ţhin mah ila tunah tak chuan min ring lutuk lo in ka hria. 

"Mu phawt rawh...naktukah ka buaipui ang" tih leh mut a rual a, keipawh chu min kuai mu ve tak nain min kuah tawh lo. A awmdan chuan rilru ti hrehawm viau mah se ka dem lo a, Mapuia thu rawn thawn kha chhiar tel lo se chu min haw viau maithei a ni. 

"Ka nuten an hmuh chuan engtin nge kan tih ang? Faith-i kaltlangin an duh phawt chuan ka nu leh pate chu an thawn thei reng awm sia, uire angah min ngai angem le?" ka tih leh pawh chuan min chhang tawh lo a, pindan chhung chu a reh tlawk tlawk nain a muhil bik lo tih ka hria, rin aiin dawnsawn dan a thiam zawk a, thinrim a a chet nghal rum rum ka ring kha a ni a, rilru fim a hmang thei chu a lawmawm rualin ka hlauhna a reh chuang lo a, Nu Hlimi ngat phei chuan min duh loh sa nen, thlalak hi hmu ngat phei se chu min hnawtchhuak daih duh tak tak maithei a ni. 

"Hetiang a thlen hi ka ring sa hrim hrim a, chuvang chu a nia min ring tura ka tih che. Hmeichhiain hlauhna kan neih tawh chuan thil dik lo a awm a ni mai an ti ţhin a, ka hlauhna kha a reh thei tlat lo a, nangmah tawp a thlalak i hmuh emaw, i chhungte kaltlanga i hmu a nih chuan insawifiahna hun pawh min pe lova thil i tih rum rum ka hlau a, tlaiah pawh khan hrilh che ka tum nasa a, ka ngam tlat lo. Mahse, thlalak ka dawng ta si a, ka zep reng thei ta lo a, keimah aţang ngei hian hria la ka duh bawk. Kan inţhianţhatna chhe ta kha a siamţha leh dawn emaw tiin ka pan a, ka ring sual a, ka duh lo chung min fawp lui tih bak sawi tur ka hre lo. Min ring tur pawn ka ti lui lo che a, ka hnen aţangin i hria a, chu chu ka duh tawk. Ka mizia i hrechiang ber bawk a" ka ti charh charh a, thawl huai tawh mah ila a ngawih reng avang chuan awm a nuam thei tak tak chuang lo. 

"Mutthilh tum rawh..zingah kan sawi ţha leh dawn nia" tih chiahin min chhang a, "Min kuah bawk si lo a ka muhil thei lo alawm" ka tih rual chuan min rawn kuah a, "Muhil tawh rawh le..a harsat pawn tum rawh" vin hauh lo hian a ti a, min kuahna kut chu ka lo vuan a, boruak hrang hrangin min chim reng a, a thawpik thlak ţhin khawp mai. 

Zinga ka harh meuh chuan ka bulah a lo mu tawh lo a, ka awmdan lah hi a hrehawm tulh tulh emaw tih mai tur a ni. Rang deuhin bathroom ka pan a, chhel inti viau ţhin si kha mahni inkhawngaihna te ka nei ve tawh a, ka ţap ve lek lek fo mai. 

Inhnuaia ka chhuk chuan pâtea kai a a lo lut chu ka tawk a, "I muttui em?" a ti ve tak nain tuk dang a awmdan leh tukin a a awmdan chu in ang lo riauin ka hre tlat a, ka ngaihbel mai mai a ni thei tho bawk. 

"Aw..i va tho hma ve" ka tih chuan, "Pâtea hi pindanah a lo lut a, ka chhuah harh pui a nih hi. Nizanah kawngkhar kan kalh lo aniang" pangngai tak hian a ti a, midang lo tho chhuak ve te chu en pawh ka lo en lo, ka ngam chiah rih lo a ni ber. 

"Lokal rawh thingpui in ang" tih leh kal a rual a, a awmdan chu a danglam tak tak. Min biak ţhat tum viau mah se a thei rih lo a nih ka ring. Khatiang thlalak hmuh kha chu a nuam vak dawn lo hrim hrim a, min be duh lo mah se ka vui hauh lo ang. 

"Saii, Kungtein tual a phiat a, thingpui va lum rawh" Nu Hlimin a tih takah chuan hreh deuhin chokaah ka lut a, Nicholas chiah a la awm zui, Hope tal lo lut ve se ka tih rualin ani pawhin thlalak kha a hmuh chuan min ngai dik lo vek maithei a ni. 

"Ka duh vang a ni lo tak tak a nia" ka ti leh ringawt a, dawhkan kilin a ţhu a, ka che vel chu min lo en reng a, "Engati nge a falin i hmuh leh?" a ti a, a vin lo nain a ţawng chu a nem hran lo. 

"Ka sawi ang kha a ni mai. Thupha chawi ka duh tih zawngin min lo bia a, chhiar pawh i chhiar vek tho kha. A tak tak emaw ka tia, ka lo remti ve mai a, khatiang thil tenawm kha a ti dawn lo emaw ka tia, mahse ani chuan tum dang nei ran chungin min lo bum reng a, ka ât lutuk vang vek" ka ti sap sap a, ţawng pawh ka ţawng ring ngam lo. 

"Ngaihdam dil tum che angin a awm a, thang a lo kam reng tihna maw?" a ti leh kher a, ka thusawi chu a awih nge awih lo tih takngial pawh tuna a awmdanah chuan ka hre thei lo. 

"A ni ber ang chu..kha thil kha ka beisei lawk a ni bik lo, hre lawk ila chu ka kal bik miah lo ang. Ka hre lo a, engkim a ngai angin a kal leh vek thei dawn a nih hi tiin ka lo hlim viau zawk a, diktak chuan rilru na deuh a ka siam kha ka inthiam lo ve a, a rilru put hmang a thlak danglam ve aniang ka tia, ka lawm zawk a. Ani aiin ka thlang zawk che a, thudik a pawm thei lo a ni ber" mumal lo nuaih hian ka ti a, ka thusawi chu a inzawm lo hlawm viau nain ngaihthlak dan a thiam leh tho ang. 

"Engtia ti turin nge min duh?" a tih chuan phawk deuh hian ka en a, ani erawh a hmel landan a danglam ve hauh lo. 

"Engmah ka hrethiam lo. Ka rilru a buai a, thlalak kha ka nu leh paten an hmuh ka hlau bawk a" ka ti a, engtia han tih tur nge ka hrethiam tlat lo a ni. 

"A phone number min pe rawh" tih leh phone phawrh a rual a, dawhkanah chuan dahin ka dinna lamah a rawn nawr phei a, "Engtin nge i tih ang?" inthlahrung ru taka ka lo tih chuan, "A ţul dan danin, ka ring che a, ka hrechiang bawk che. Ka chik ţhin bawk che a, dawt min hrilh pawhin ka hre chat zel. Nizan leh tunah pawh, dawt i sawi lo" a ti a, Faith-i kut thlak a tum hnu kha chuan thinrim changa ri buan buan chi a ni ve emaw ka lo tia, a inthunun thei lutuk hi mak ka ti zawk. Hmeichhe zahna chang a hre tel kher bawk nen, mipa diktak a ni ka ti lo thei lo. 

Mapuia number ka dah hnu chuan phone chu a ak ţha leh a, "He mihring hi a ţawngtheih ţek ţek chhung chu hmu tawh hlek suh. Nang aia a thi hmasa ta a nih leh ruang i kil ve dawn nia" a ti a, choka a lo lut ve mek Nu Hlimi chuan, "I ţawngkam kha" tiin a lo khap vat a, ka lo ngaihven thuai a, danglam lutuk a awm loh danah thlalak an la dawng lo a ni phawt ang. 

"In rin tawnna tello chuan inlaichinna ţha a neih theih loh" chawhnu lam duty tur ka nih avangin a insiam chu ka lo en ve thung a, a thusawi pawh chu dik ka tih em avangin ka lo bu nghat a, min en zawk a, amah bawk chu in en lehin a kawr hak lai chu a chul thuak thuak a. 

"Min ring tak tak tiraw?" ka tih chuan keimah bawk min rawn en leh a, "Mapuia a ni kher kher hi ka rin loh phah lek lek che. In inbiakna kha hmu lo ila chu ka ring lo maithei che" tiin tlang takin a sawi a, "Chuan?" ka lo ti leh zeuh a, "Ka ring che" a ti ban charh a, tuk dang anga min fiam vak vak lo te chuan ngaih a ti ţha lo a, a nuam lo vel vek ti ila a dik ber ang. 

Duty tura ka kal chu damdawiin chhunga ka pen luh rualin Nghetin min lo pawt dawrh a, "Mapuia ka hmu a, min nuih vel a nih chu" a tih chuan, "Khawiah nge a awm?" ka ti a, "A ngaiah aniang. Nu pakhat nen an ni a, damlo aniang a pawr fap mai. Damdawiin a awm sa pawh a ni maithei venflon te kha a vuah a" a tih takah chuan a la hma tho bawk a tiin casualty ah ka lut a, Mapuia ka hmuh chuan, "A ngaiah khan lokal rawh" tih leh kal ka rual a, kailawn a chhoh pah chuan ka sana bun lai chu ka bih zawk a, a la hma ka ti thla rawk a, hun tlem te bak ka nei tawh lo. 

"I pasal ka thawn lo ang ka tih kha" pawn a rawn chhuah paha a tih chuan ka pan hnai a, a inrin hmain na zetin a hmaiah ka hnek a, tha ka hman nasat avangin ka kut chang chu a na ve ut ut mai. Ka thin a rim em a ni. 

"Tenawm lutuk...khatiang thil i tih khan eng hlawk nge i neih? Thlalak i thawn darh vang maiin ka rawn pan che i ring em ni? Ka pasal nen a min pawh ţhen i tum vang pawh hian ka haw hlur che. Engtikahmah ţhian kan ni tawh lo ang a, ka rilru ka pe ngai bawk lo ang che. Ka pasal hi nang anga rilru chhia a ni ve lo a, a naupangchhia ve lo bawk. Chuvang chuan i chet dun dan ţhing lutuk avang hian min ţhen beisei suh. Ka pasal ber ka lama a ţan chhung chu a chhungte pawhin min hnawtchhuak lo ang" ka ti bawrh bawrh a, ka thusawi te chu in kawkalh nasa viau mah se pawi ka ti lo. Ka rilru a awm ang ang ka sawi chhuak a, ka huat zia a hriat loh mawlh ka hlau a ni. 

"Kan en ang chu" a ti a, a nui hmel ka ngei lutuk chuan kutthlak tumin ka kut ka lek kang leh uaih a, "I hah mai mai" tih pahin ka ban rekah a lo hmer a, ka kut chu a paih zui sawk bawk. 

"Mi â i nih hi...mi an duh lo chung tih luihna hmanga neih i tum chuan i hlawhchham zel ang" pawr fe a ka tih chuan a lo nui suk duh chauh a, ka thinrim lutuk chu ka thaw hlawp hlawp a, ka ţah a chhuak ut ut thei mai. 

CONT...