HIS LAST LOVE-28

HIS LAST LOVE-28

"A landanah chuan kha thlalak kha i pasal i hmuh tir ve tawh a nih hmel" min elsen zet hian a ti a, heti khawpa min ti hrehawm duh chuan min hmangaih hlawl lo ang. A tello a ka hlim a hmuh theih loh vang zawk a nih hi. 

"Hmuh tir e...midangin an hmuh tir ai chuan keimah ngeiin hmuh tir ila ka tih avangin i rawn thawn rualin engkim ka hrilh ve ta a nih kha. A puitling a, dawn sawn pawh a thiam. Mi nupa pawh ţhen hi i ngaih ang ngawt a awlsam a ni lo ang. A pawi thui hma hian inhnuk dawk la, lo inrawlh ve tawh suh" ka ti fak fak a, a rilru nat deuhna tur zawngin ţawng mah ila pawi tihna ka nei tawh bik lo. 

"Ka hrethiam lo, i pasalin a ngaihsak duh loh lai zawng che a ngaihsak tu che ka ni. I khawhar lai zawng zawngin i bulah ka awm bawk. Nangmaha hrehawm i tawrh tlawk tlawk ai chuan tiin i tan hun ka insiam a, i hrehawmna chhawk zangkhai tumin ka hmanhlel ţhin. Chuti chung chuan hnawl ka ni tho a, i tana theihtawp chhuah zawk hi hnawl zawkah ka ţang a, ka pawm thei lo" a ti a, kan inkawm laia min biak ţhin danin min bia a, deusawhna a tel tawh lo. 

"Pasal ka nei tawh tih hre sain min bia a, min kawm a, ka pasal hi ţhen mai theih a nih loh zia i hre bawk. Min rawn pawh tirh aţang khan hetiang hi thil thleng thei a ni tih i pawm sa a ngai zawk. Beisei ru reng tur zawk i ni" ka tih chuan, "Hrehawm i ti miau a, kha khan beiseina min siam alawm. Engtik niah emaw chuan duh lo deuh chunga a neih a pasal hi a la kalsan maithei tihna rilru ka pu a, i rilru lak tumin theih tawp ka chhuah a, buai viau mah ila min mamawh laiin i bulah ka awm lo ngai lo. Thil ţha ka tih sak theih ang zawng zawng che ka ti vek a, engati nge min thlan zawk loh? I pasal hian eng thil ţha nge a tih ve a?" a ti a, a vin leh lek lek tawh a ni. A duhthaw khawp mai. 

"Ka sawi lawk vek tawh kha..ka pasal ka ţhen thei lo a, ka ţhen dawn lo tiin ka hrilh lawk thlap che. Beisei i nei lui ţalh a nih chuan i thiam loh a ni tawh. Hrehawm ka tawrh pawi i ti lo a nih chuan i duh dan danin che rawh. Eng thil pawh ti la tun bak chu ka hmu tawh lo ang che" tih leh kal ka rual a, min dang lo a, min au zui lo bawk. 

"Ka rilru a hah emai...ka taksa a chau bawk si, hetiang a nih chuan ka tla rawk rawk ang a, ka cher chak viau ang" Ngheti hnena ka tih chuan lainat hmel takin min lo en a, Mapuian thlalak kha a kawl miau chuan ka pasal pawhin tih theih a nei bik lo. Kan tih theih zawng chu tawrh a ni mai. 

"Police man tir mai rawh u" a lo ti a, ka nui hul deuh hak a, "Faith-i leh a cousin an inkawmngeih ka tih tawh kha. Eng thil pawh ti ila ka chhungte ho hian an hre dawn tho tho. Mapuia ka ring hma lutuk kha ka tih sual a ni" ka ti chuai raih a, awmdan tur ber pawh ka hre tawh lo. 

"Ka chau ngawih ngawih reng mai" ka ti a, kan hmaa dawhkanah chuan ka bawk a, na nei ve ţhin mah ila in lama in duat chu sawi loh, ka chet ve loh an hlau a, min phut ru ran reng mai chu a nia, ka mona aia hrehawm hi chu a vang khawp ang. 

"Hahdam tum rawh..thlalak chu lo thawn ta tehreng pawh nise U Nico berin a ring che a, chu aia pawimawh chu a awm lo" ka hnunga chul paha a tih chuan, "Biak pawh min lo la biak loh hi. A thlalak hmuh khan a nghawng ve tih a hriat mai alawm. Nidang ang chu nise vawihnih vawithum min lo call leh tawh ang" ka ti a, ka phone ka en zeuh zeuh reng a, a ri khat lutuk chu ka silent ta mai emaw te ka ti rum rum a, message a lo thlen leh ka en vat a, ka beisei angin ka pasal hnen aţanga ka dawn a ni ţhin lo a, ka hnual rawih zel. 

"Mapuia phone number a dil bawk si che a, engtia tih nge a tum le?" a ti vang vang a, ka hriat bik loh thuin ka chhang a, sawisa hrep se a lawmawm viau ang, chuti khawp chuan Mapuia hi ka haw tawh a ni. 

"Nghak tawp mai rawh. Mapuia pawh a be em em ang. In nupa inkar a chhiat phah loh chuan lungawi phawt mai rawh. U Nico chu a puitling a, a ţhen phah lo ang che. Nupa tam tak chungah hetiang thil hi a thleng ve ţhin a, ţhenkhat phei chu an duh thu ngeiin a ni ţhin lehnghal. An inţhen phah ngai chuang lo a, mualpho hlauin an thup bo mai alawm. I nu leh pate phei chuan mualpho an hlau lehzual ang a, an chhuah tir miah lo ang che" a tih pawh chuan min hnem zo tak tak lo. Ka hlauhthawnna hi a reh thei tak tak lo a ni. 

Ka haw dawn thlengin ka pasalin min lo be lo a, in ka thlen pawhin ani chu a lo la haw ve lo. Faith-i chuan phone hum ran chungin rum deuhin min melh a, thlalak a hmu tawh tih hai rual a ni lo. 

"Faith-i phone a mi hi eng nge awmzia ni a?" Nu Hlimin a lo ti ta chiah reng a, Pa Chhawna a lo la haw lo a, chuti chung chuan zam tak ka ni tho. 

"Eng nge Faith-i phone ah chuan awm a?" ka tih laia ka aw dik lo te chu chiang takin ka hre thei a, anni pawh hian an hrethiam maithei. 

"Mipa dang i fawp a, eng nge awmzia? Tun hnai a mi a nih hmel lehnghal" a ti a, mak ti hmel leh thinrim hmel a inchawhpawlh nawk a, a beisei loh thil a hmuh avang chuan sawi tur a hre vak bik lo niin a lang. 

"Ka duh lo chung min fawp lui a, thil pawimawh deuh awm angin a sawi a, khatiang thil kha a ti dawn tih ka hre lawk bik lo" ka ti a, ka bag hrui chu nghet deuhin ka vuan a, an hmel a min rin lohna langchhuak chu hmuh a hrehawm khawp mai. 

"I pasal hi i duh khawp lo em ni?" a ti hul hak a, a ţawngkam chuan na takin min chhun a, Mapuia ka huatna a zual a, keimah leh keimah pawh hi ka inhaw thei hial a ni. 

"Ka duh vanga thleng a ni lo tak tak" ka tih laiin ka pasal a lo haw a, ka ngaihbel nge a pawr riauin ka hria a, sofa bula ka ding zum zat reng chu min rawn panin, "Eng nge thleng?" bul zet hian a ti a, a aw ri chang zet ka hriat ringawt pawhin ka lo ip chawih thei. 

"In nu kha zawt la ti nia, miin Faith-i hi thlalak an thawn a, i nupui leh mi pakhat infawp lai lehnghal, a rapthlak takzet a ni. I nupui hian ngaihzawng a nei ru reng a, i zep pui tlat tihna em ni?" a lo ti a, "Ka duh vanga thleng a ni lo a tih mawlh mawlh kha. U Saii zia in hrechiang a, ring zawk ta che u. Mi fawh luih te chu a har hleinem, mipa ngat phei chuan tharum an ngah a, a man bet lui tihna a ni mai lawm. Pasal nei chunga ngaihzawng nei chi pawh a nih loh hi. Kan chungah thleng ve ta se, kan mo na ten min hauh phah vak se chu min khawngaih ber ber tu i ni tho ang. U Saii a nih vang ngawtin khati khan ti vak vak suh, hrehawm a tih ve dawn nak laiin" tiin Hope chuan ka thlavang a lo hauh a, an melh rum hlawm khawp mai. 

"Lo inrawlh tei vet suh. He thil hi en liam mai mai theih a ni hleinem. Nau a pai ţan chauh tihah mipa dang a fawp nghal a, hetiang chuan engtin nge kan rin ngam ang a? Fa pawh nei se a fawr san reng mai dawn a sin" Nu Hlimi chuan a ti bawng bawng a, min zah loh sa nen, min zah lo lehzual a, ka awm ve reng laia ka chanchin chhe sawi chu pawi a ti lo zual sauh a nih hmel. 

"Ţawng hlawk viau ţhin suh. Ka hriatna a rei tawh, Saii thiam loh a ni lo. Ngawihsan ula, a thleng nawn tawh lo ang" nghet charh a ka pasalin a tih pawh chuan, "Rin leh a har tawh awm e, en liam a ngawihsan mai mai pawh a har. I la naupang tih kan hre vek a, thil tih nachang i hriat loh chang pawn i pa hian a la naupang a a ti mai zel a, tuna thil thleng ah hi chuan i naupanna hi chhuanlam a tling lo. I pa lo haw se sawi ho a ngai a nih hi. Uire tih kan hriat reng nen a chen ho reng chu a peih pawh ka peih lo" a ti a, "I ţawngkam fimkhur rawh ka tih che kha" vin zeta ka pasalin a tih chuan phawk deuhin a en a, "I duh leh ka pa chu hrilh rawh. In duh dan danin rorel ula, mahse ka nupui hi ka phalna lo chuan a chhuak lo ang, khawiahmah a kal lo ang" khauh zet hian a tih zawm leh a, ka banrekah hmerin min kalsan pui a, kailawnah te chuan a pen chho pawk pawk a, ka um dat dat reng a ni ringawt. 

Pindan chhung kan luh rualin sofa a pan a, a ţhu hnawk a, ka buaina thlen sak hi a lian tham em a, ka be hmasa ngam ngang lo a ni. A ţhutna zawna ka kal chuan, "Ka pa chu ka sawi pui mai ang. Thleng nawn tawh suh se. Dan ka tum a ka dang thei lo a nih kha. Damdawiin ah ka kal kawi a, amah ka hmuh meuh chuan a pawi tur ang a pawi zo vek tawh. Insawifiah pawh a ngai lo, ngawi tawh rawh. Thil dang chu keiman ka ching fel mai ang" a lo ti a, tim daiin a hmel chu ka en a, zan a mu ţha lo aniang a mitmeng te chu a dul ruih a, en mai pawhin a chauh zia a hmuh theih. 

"Ka zak a, nuam lo ka ti bawk a, ka duh vanga thleng chu nise i bulah hian ka awm ngam tawh lo ang. Ka duh vang a ni lo tak tak a, midangin min ring lo mah se nangman min rin chuan a tawk mai" ka tih chuan, "Boruak a ziaawm hma in in lamah i awm phei duh em?" tiin min lo zawt a, ka duhthusam mah nise ka nghing lawih thei hial a ni. 

"Min hmuh reng hi nuam lo i ti tihna mi?" ti a ka zawh let chuan lu thin nghut pahin tawi tein a nui a, "Nih leh ngati nge chutiang i sawi thut?" ka lo ti leh hram a, min hmu peih lo niah ka ngai tlat a ni. 

"Naute nen a ka ngaihtuah vang zawk che u. An sawichhuak reng dawn a nuam i ti lo ang. I hahdam loh chuan naute khan a tuar ve zel dawn a, i duh chuan awm phei rawh, nitin ka rawn tlawh ang che" a tih veleh, "Min hmuh duh loh vang te, ka bula awm i peih loh vang te a ni lo tak tak maw?" ka ti nawn leh ngat a, min en vang vang a, a bula ţhu tur pawhin min sawm lo. 

"Ni lo ka tih kha. Boruak san laia heta i awm ve a nih chuan i taksain a tuar ang" a tih lai chuan ka lo pawt chat a, "Min ţhen dawn tihna a ni em?" hlauthawng ru taka ka tih chuan min rawn ban ve ta nge nge a, "Lo ţhu rawh" a tih veleh rang deuhin a bulah ka ţhu a, min lo kuah nghal mah se thla a muang thei tak tak chuang lo. 

"Min ţhen a nih loh chuan ka ţhen lo ang che ka tih tawh kha. Mipa ka nih hi, ka ngaihtuah chian hnuah chauh thil ka sawi ţhin a, ka hlen chhuak ngei ngei bawk. In in lamah awm rih mahla nangman min ţhen loh chuan ka ţhen bik lo che tihna a ni mai" a ti dam thlap a, a kawnga ka pawm beh rual chuan ka chhipah a khabe a nghat a, ka pasal hi ka rinphak bakin ka duh ve tawh a ni. Hmangaihna awmzia ka hre lo a, ka hmangaih leh hmangaih loh ka hre thei lo. Ka duh takzet a, a tello a awm hrehawm ka ti tih erawh chiang takin ka hria a ni. 

"Ka pa'n a phal kher dawn mi? Pasal neih hnua mahni in lama awm reng chu a mawi chiah si lo a, nangman phal ringawt mah la midangin an phal lo maithei a ni" ka tih chuan, "Ka pa ka lo sawipui ang. Ka nute an thin a rim a, thlalak chiah an hmu a, hau hrep che mah se an demawm hran loh. Mahse an duh tawk mai dawn lo a, an sawi chhuak fo dawn a, nangma tan a ţha lo ang. Boruak a ziaawm veleh ka lo hruai leh ang che" a ti a, vin lo mah se hauh hrep ang maiin hrehawm ka ti tho a, ka nu leh paten ka haw chhan min zawt ta se engtin nge ka chhan ang tih thlengin ka ngaihtuah a, thlalak pakhat vangin ka hlimna a kiam zel a nih ber hi. 

"Nilengin min lo be lo a, ka ngaih a ţha lo hman alawm" ka kuahna ka ti nghet salh a, ka tana a hlutna ka hrethiam zel a, pasal ka nei hi tunah chuan ka lawm tawh zawk. 

"Ka rilru a buai ve alawm. Ka inchhir lehna tur thil ka tih palh ka hlau a, ka inngaihtuah fim ve lawk a nih kha" a ti a, pindan kawngkhar a rik takah chuan ka tho vat a, Hope a lo ding ran mai. 

"Ka pa a lo haw a, U Nico hi a be duh a, nang chu hetah ka lo awmpui ang che, hlauthawng suh" tih leh rawn luh a rual a, Nicholas pawh ka hnung lawkah a awm tawh a, min hnem tum ni awm taka ka dar a hmer salh hnuah pindan chu a chhuahsan a, Hope nen chuan kan in en a, sawi tur kan hre lo ve ve aniang ngawi rengin khumah kan ţhu tlawk tlawk a, nidanga kan chaw ei hun a ni tawh nain zanin tlai chu rilţam kan hre lo vek a nih hmel. 

"Ka ring che a nia aw" Hope in a tih chuan nui lui chung hian ka bu nghat a, "Kan inchhung hi chu a hahthlak ve hrim hrim a, mahni fel leh ţha an inti vek a, pawisa ngah viau siin mi rethei an ngaithei bawk si lo. Hausa ve tho an be tlawn a, an lokal hlek leh eitur an lo hlui vat zel a, midang tih sual an hre thei bawk si. Nu leh pa leh unaute hi hmangaih tur chu a nia, ka hmangaih bawk. Mahse a chang chuan an awmdan hian ka lung a ti awi lo a, ka ipik ngawih ngawih ţhin. Chuvang chu a nia min ti hlim turin fa nei vat la aw ka tih reng ni. Naute a awm chuan rilru a zangkhai ve deuh ang a, ka nu bula awm pawh a nuam deuh ang. Keichu maw...ka chhuah ve te hian in a haw ka chak ngai lo reng reng" a ti siam siam a, khumah chuan muin a dul zawnah a kut pahnih a dah a, inchung chu a en reng a, kan boruak tawn mek hian kan vaiin min ti chau a nih hmel khawp mai. 

"In inneih dawn pawh khan ka nu leh ka pa te an inhau hrep a, ka nu'n ka u in nupui a neih a phal lo a, hna a nei ve chiah a, a la naupang bawk tih ţana a ţan laiin ka pa'n nangmah nen a innei tur hian a duh bawk si a, in inneih ni te khan ka nu chuan inkhawm a tum lo a, a mawi lo e tiin kan tur chhuak thei hram a, kan inchhung boruak hi englai mahin a ţha ngai lo. A duh loh dana thil a kal vang aniang nangpawh a huat em em che ni. Engahmah ngai duh lo la, i awm awmin awm ve tawp rawh. Nikhua ka hriat theih tirh aţanga ka tih dan a nih chu. Ka beng ka chhu ngawng lui a, a changin ka mit ka ti del a, ti hian ka nung ve mawp mawp mai" a ti a, ka khawngaih veleh chhawng a, kan hahdamna hmun ber mahni in ngei pawh nuam a ti lo chu a lainatawm takzet a ni. 

"Kan tawrh tlan a ngai a nih hi. Min ngainat loh sa nen thil ka lo ti sual leh kher bawk si a, keimah vangin in vaiin in tuar a, hun hi her let leh thei ila chu Mapuia kha ka hmu miah lo ang" ka tih chuan zawi tein a lo nui a, "Rilru ţha deuh hi chu mi hian min bum reng mai zawng a nih hi. I duh vanga thleng a ni lo a, thlalak ka hmuh hlim khan rilru ka siam fel vek tawh. Ka u hi i duh ve takzet tih ka hria a, nau i pai bawk a, i duh thuin khatiang thil kha i ti dawn lo tih ka hria alawm. A hmu thiam ve lo hoin an ringhlel mai mai che a nih hi. Ngawi tlat a, vawikhat i insawifiah tawh a, an sawi chhuah leh pawhin engmah sawi ve duh suh. I ngawih reng chuan an sawi rei peih bik lo ang. Kan inchhung hi chu a ninawm tak tak a ni" a ti malh malh a, "I hming hi i pu zo ka ti" nui deuh chunga ka tih chuan, "Eng lai ber hi maw?" a lo ti ve vat a. 

"Thil a eng zawngin min thlir pui tlat a, beiseina ka hloh i hlau a, hun hrehawm ber ka tawh chang pawhin thil ţha zawk beisei turin min hrilh reng zel a, i hming hi i pu zo alawm Hope, awm lo la chu hrehawm ka ti lehzual ngawt ang" ka tih chuan a lo nui var var a, "Nangpawh awm lo la chu ka vei zawng sawipui tur ka nei dawn lo a, hrehawm ka ti ve tho ang. Chhungkaw chanchin hi pawn lam mi hnen a sawi a rem ţhin si lo a, ti hian i bulah ka inbunruak a, ka awm a nawm phah ve ţhin a, kan in hnem tawn a ni mai" a lo ti ve nghal zat a, rei ngial kan ti ti hnuah Nicholas a rawn lut a, "Inhnuai lam ka zu ngaihven ange" tiin Hope a tho tharh a, a chhuak nghal daih bawk. 

"Ka pa chu a thinrim em?" ti a ka lo zawh chuan min chhang mai lovin ka malchungah a rawn bawk a, ka tih fo danin a sam chu ka lo khawih sak a, "A lung a awih chiah bik lo a, hlauthawng suh, ka hrilhfiah vek" a ti a, boruak a uap churh reng a, a hniam ruih bawk a, rilru a hah tut tut reng mai. 

"Kan in lama awm phei chu a phal em?" ka tih leh chuan, "Aw..chaw ei khamah ka thlah ang che" a ti a, kan in lama awm phei ka chak tehreng nen awm phei tur a min tih meuh chuan nuam ka ti lo leh a, ka chhungte pawh ka hmu hreh. 

"Min huat phah em?" ka ti leh a, Pa Chhawna tak hi chu keipawh hian sawiselna tur ka hre mang tlat lo a, ani lehzelin min huat chuan a hrehawm zual lutuk dawn a ni. 

"Haw lo e...ka hrilhfiah ka tih kha. Tih sual chin i nei a, mahse i thiam loh a ni hleinem" a ti ve tlat a, khuk chem chem a khuk ral daih te pawh a chakawm.

Chaw eikham veleh Pa Chhawnan, "Saii, lokal lawk teh" a tih chuan ka pasal ka en a, a lo bu nghat a, thinphu dep depin pindanah ka zui lut a, zai zir a ţhutna tur min kawhhmuhah chuan bet lo deuhin ka ţhu a, ka ep chiaha a rawn ţhut ve phei chuan ka thin a phu dawt dawt tawh. 

"Nicholas-a hnen aţangin thil awmzia ka hria a, keichuan in in lama let kher pawh ţul ka ti lo, mahse a ngaihtuah tlat si che a, boruak ţha lo hian i naupai lai thlenga a nghawng a hlau a, ka lo remti ta mai a nih kha. Kan duh loh vang che a haw tir che kan ni lo a, i nuten an pawm thei rih tlat lo a, an thinrim zual pui a reh hunah a lo hruai leh mai ang che. Mihring chu thil tisual thei vek kan ni a, kan duh dan thlap thlapin thil a kal reng thei ngai lo. I chunga thil thleng mek pawh hi tihpalh liau liau a ni a, ka dem hauh lo che a nia" a ti dap dap a, "I pate hnenah pawh zep nei lovin engkim hrilh tlang vek la, khawi hmunah pawh awm la kan monu i ni reng dawn a, boruak a zia veleh in pa'n a rawn hruai leh ang che. Naute nen a in hahdam zawk nan karkhat vel i awm rih ang a, i lo haw leh vat dawn nia" a tih zawm leh a, kawngkhar kan khar phui lo bawk nen, pawn lama Nu Hlimi ang hlak hlak reng chu kan hre thei ruai ruai a, ka duh vanga thleng a nih loh zia chu an hriatthiam tho ka ring, an hre duh lo mai mai aniang. 

"Ka tihpalh a nih kha" ka tih chuan Pa Chhawna chu nelawm deuh hian a lo nui a, "Ti hian tawp tawh rawh se. Pawn lam miin an hre lo a, an hriat ve kher loh nan ti hian inchhungah tawp hmak se la, nangpawh inthiam lo lutuk duh suh. I tan chuan hahdam a pawimawh ber a, hna i chawl thei chuang si lo, i rilru tal hahdam rawh se. Mihring chuan buaina kan tawk a, a reh leh mai zel alawm. I pa te pawh ţha deuhin i hrilh fiah dawn nia" a ti nawn leh a. 

Haw tuma ka insiam chu ka pasalin min lo pui a, min ngai a, min thlakhlelh ve tehreng nen thil ka ti khaw lo ta sia, ka khawngaih reuh. 

"Min lo hruai leh har lo la" ka tih chuan za lo deuhin a nui a, "Ka lo hruai vat ang che. Hahdam deuhin lo awm la, naute hi ngaihven ţha bawk la" ka dul khawih pah hian a ti a, za deuh a nuih a har khawp mai. 

Bag nen a inhnuaia kan chhuk chuan, "Ka rilru a hahdam thei hlawl lo. Miin hria phei se chu engtin nge kan awm ang? Pawn pawh kan chhuak ngam nang. Mipa dang hnaih suh ka ti fo a, thuawih loh rah a nih hi" nu berin a lo ti hlak hlak a, "Nangmah ber khan tu hnenah mah sawi lo la miin an hre lo a ni mai. Saii, i kal nghal dawn em ni?" Pa Chhawnan a lo ti ve thung a, ka bu zeuh ringawt a, thil ti sual a ti khaw lo tu nih chuan hawi san vah a har khawp mai. 

"Naktuk i chawhma dawn tho a, chawhnu lamah ka lo leng ang. Inrinni a nia, class kan kal dawn chuang lo a" Hope pawh chuan lo ti vein Faith erawh a tum bar reng a, a nu nen an ţhu dun chawt reng mai. 

"Aw..i lo leng dawn nia" ka ti ve mai a, in aţanga kan chhuak chu min zui chhuak a, Anthony-a dawr kal haw kan la tawk zui. Ani pawh hian engkim a hre ve vek a, engmah a sawi ve lem lo.

"I kal tawh dawn a?" a ti veleh a, buk nghat paha, "Aw" ka tih chuan, "Lo haw leh vat rawh aw. I awm loh chuan kan khua a har lutuk ang" zangkhai deuh hian a ti a, "Pawisa thir aiah hei hi min pe a" tiin ka kut a la a, ka kut phah a sweet a rawn dah ruih chu ka pasal pawh a lo nui ve hawk hawk mai. 

"Cheng 9 man a nih kha. A nih leh aw...lo haw vat la" a tih hnuah inchhungah min luh san a, Hope erawh kan kal thleng a awm thung. 

"Nuam i ti lutuk anga i lo haw duh tawh lo vel ange aw" ti a ka pasalin min fiam chuan tawi tein ka nui a, ka thaw leh hak ţhin a, ka hrehawm tihna chu a hrethiam aniang, "I hahdamna tur zawka ti ka ni tih i hria tiraw?" a ti zawi sup a, in a ka awm chuan Nu Hlimi leh Faith-i ten min ţawngkhum fek fek reng dawn a, chu chu a hmu tlang ve vek a nih ka hring.

"Hria e" thawk hluai paha ka tih chuan ka kut a rawn hmer zawk a, min thlah leh thuai mah se ka lawm tho tho. 

"An thinrim rei lo ang, ka lo hrilhfiah ang a, an sawi peih lo vat ang. Fimkhur tawh la, ka ring che a nia" a tih chuan rilru a nuam ve deuh a, "In in lamah, inthlahrun a ngaih lohna hmunah awm rih la, ka lo hruai leh vat ang che. I telloin ka awm rei thei dawn lo tih i hriat kha" a tih zawm leh a, kan in kawtah motor a ti ding a, che chang lo a ka ţhu reng chu, "Kal ila, ka awmpui rih che ang a mut dawnah ka haw ang" tih pahin seat hnung lama bag lian vak lo kan dah chu a ban a, muangchangin motor aţang chuan ka chhuk a, thlalak pakhat lekin heti taka hrehawm hian min siam thei ang tih ka lo ring ngai lo. 

Kawngkhar rawn hawng tu ka nuin kan nupa a min hmu thut chu mak a ti kher mai. A tlai tawh angreng si a, min biak nachang pawh hre lawk lo hian min en vang vang a, "Kan lo lut ang chu" nuihza aw zeta ka pasalin a tih takah chuan kawng min kian sawk sawk a, midang pawh an lo la meng ţhap a, mak ti hmel an pu vek bawk. 

"Eng nge thil awmzia? Zan zanah bag nen lehnghal, khawiah nge in kal dawn?" ka pa'n a lo tih chuan, "Eng emaw sawi dun lawk teh ang" ka pasal chuan a ti nghal thawr a, ngaihţhat hmel vak loh chung hian ka pa chu a tho a, ka pasal a hui zauh hnuah a lehkhachhiarna pindan lamah an phei a, kei erawh chu ka unaute bulah ka ţhu hnawk a, ka ţap lo chauh a ni. 

"Eng nge thleng a? In inhau em ni?" ka nu'n a tih chuan zep ţhen engmah nei lovin engkim ka sawi vek a, ka sawi zawh vek hnuah pawh ka pasal leh ka pa chu an la reh vang vang mai. 

"A pawi hleinem..duh vanga thleng a ni lo i ti lawm lawm chung pawha an awih duh tlat loh chuan hetah i awm rih anga a ni mai alawm. Hmeichhe rai no pawh duat nachang hre lo chu a mawl emai. Nitin i duty a, i rilru tal a hahdam loh chuan i naupai lai pawn a tuar mai anga sin. Nicholas hian thutlukna diktak a siam a nih hi. A nute thunun thei lo mah se nang leh i naupai lai ngaihtuah nachang tal a hria alawm. I nute chu engati nge thil ti sual ve ngai miah lo ang a an awm a?" Zikpuiin a ti hlak hlak a, a lungawi lo khawp mai. 

"Engmah hrechiang lovin thlalak chiah an hmu a, an thinrim em em pawh hi a mak vak lo" ti mah ila, "An hrechiang lo a nih chuan an zawt fiah mai tur che alawm. An ring lo ve hrim hrim che a nih chu. Hmeichhe lepchiah tak pawh i ni lo a, rai puar chunga mipa dang i fawh duh an ring reng reng em maw ni? Thlalak a awm thlap lehnghal a, mi thang kamah i awk tih chu a hriat vek alawm. An lem emai a, haw tawh lo tawp la ti nia" a la ti tho a, ka nuin lo khap vat lo se chu a sawi tam viau maithei a ni. 

Ka pa leh ka pasal te rawn inzui chhuak chu tim daiin ka lo en a, mahse ka pa chuan, "Liante, thingpui han lum teh. Nicholas hian a haw hmain in phawt rawh se" a ti dam thluam a, ţhutna ruakah ka pasal chu a ţhu a, a bula ka va insawn chuan tawi tein min lo nuih a, midang hmuh lohah ka mal a hmer zawk a, min thlamuan ve ni awm tak a ni. 

"Tuaite, i pindanah eng eng emaw kan dahkhawm a, zanin chu Liantei bulah mu mai rawh aw. Naktukah i nu hoin in ching fel dawn nia" ka pa bawk chuan a ti leh a, a thinrim miah lo chu mak ka ti letling zawk a, ka pasalin thiam deuhin a hrilhfiah a nih ka ring. 

"U Nico, riak ve daih la" Liantein a tih chuan a nui chhuak hawk a, "Zan dangah ka lo riak ang. Zanin a lo riah chu i pa'n a phal lo" a ti fiamthu a, Zikpuii erawh chuan engmah a sawi ve tawh lo a, ka pasal pawh a haw chuang lo nain a be lem lo. 

Haw tuma a din chuan ka lo ding ve nghal zat a, "Lo duat ula aw...nitin ka rawn endik dawn nia" nui chunga a tih chuan ka chhungte pawh an lo nui ve mai a, "Kan lo duat viau ang. Ngaihtuah lutuk lo la, chaw te pawh i rawn ei zeuh zeuh ang chu" ka nu'n a lo ti var a, pawn thlengin ka zui chhuak a, ani pawh motor ah a lut nghal mai bik lo. 

"I pa bulah lo hau suh ka tia, a hau lo ang che" ka kawnga kuah paha a tih chuan ka din hnaih a, "Ka nute pawh an thinrim reng em lo ang chu" ka ti sap a. 

"Thinrim reng lo ang, tunah rih chuan rilru hrehawm deuhin an siam reng dawn che a, inah ka awm reng hman lo nen, kan inkhap seng lo ang. Hetah awm rih la i tan a ţha zawk. Ka inngaihtuah fe hnuah thutlukna ka siam a, ka ti sual lo ang. Pawisa i mamawh em? Ka pe dawn che em?" a ti zung zung a, a nute mitmei ven a ngai a, min ngaihtuah tho bawk si, ka pasal thlengin ka hrem ve zel a nih hi. 

"Ka nei alawm. Kan inhmu lo vang vang dawn tihna pawh a ni lo a, fel fai deuhin lo awm rawh aw. Towel huh kha pho chhuak zel la, a nih loh chuan a rimchhe duh a nia. I thawmhnaw bal pawh dah darh nuaih suh ang che, bal bawmah khung thlap zel rawh. I incheina leh awm hmun hak pawh ka dah hran thlap kha, lo dah pawlh nuaih miah suh" ka tih lai te chuan nui ruh ruh chungin min lo en reng a, "Eng nge?" ka ti bul hmak a, a taksa si chatin min lo kuah a, engmah phei chu a sawi lo. 

Kan ngawih vang vang hnuah, "Kal i phal tawh em?" a ti a, "Aw" tih chiahin ka chhang a, "Min man bet tlat sia, hetiang chuan ka kalsan thei nang che" nuihza aw zet hian a ti a, ka thlah rang khawp mai. 

"In ngaihtuah hah lo la, i hahdam zawk theih nan hetah ka hruai che tih hrereng rawh. Nangmah chiah i nih tawh lo a, ngaihtuah tur dang i neih tawh kha" ka chhipah a fawp zauh a, kawngpui an a awm kan nih avangin thil dang a ti lo thung. 

"Nuamsa deuhin ka siam thei lo che a ka inthiam lo" zawi ruih hian a ti a, "Keimah hian ka ti hrehawm ve zel zawk che a, ka hrem che a ni ringawt. A thleng nawn tawh lo ang" ka ti a, hreh deuh chungin min kalsan a, a tlan liam thleng kawtah chuan ka ding a, a liam fel hnuah inchhungah ka lut ve chauh a. 

"I chauh deuh chuan mu nghal daih rawh..i bag pawh ka dah chho vek tawh aw" Liantein a tih laiin ka pa chuan, "Ei chak i nei em?" a lo ti ve mial a, "Ka mu phawt dawn" tih zawngin ka chhang a, min en ţhap lai chuan inchungah ka chho daih a, min khawngaih tih ka hre reng a, an hmel pawh ka en ţha duh lo, ka no zual mai mai ang tih ka hlau a, ka tihsual avanga buai kan ni a, chhel deuh a ka awm a ţul a ni. 

CONT..