HIS LAST LOVE-29

HIS LAST LOVE-29

"I muhil nghal daih mi?" ti a Liantei ţawng ri ka hriat veleh ka zangthal a, "Muhil lo nasa mai" ka ti vat a, a kawrlum hak lai phelh pah hian, "Hmai ka phih anga ka lo mu ve nghal ang" a ti a, min chhuahsan leh a, ka thil tawn teh hrep hian hnathawh min ti chak lo a, mu ngawt ngawt mah ila mut pawh a chhuak thei chuang lo. 

"U Nico-a i ngai a ni maw?" a rawn ti lut leh a, Zikpuiin a lo zui lut ve bawk. Khuma an lo ţhut ve takah chuan keipawh ka ţhu chhuak a, lo inţhen ta ila chu ka rilru a na ang a, ka ngai viau bawk ang. Mahse ka unaute hian min thlamuan hneh a, hman aţang tawhin ka lam an ţan a, ka kianga an awm phawt chuan engkim ka tuar thei ang ka lo ti tawh ţhin. 

"Ka nute lo len ni a Nu Hlimi awmdan vel Liantei hian min hrilh a, ka thin a rim nasa mai. Diktak chuan ka pa leh Pa Chhawna te thil tih a ni a, pawisawi loin in tuar ber a, buaina a awmin an chingfel leh thei tawp si lo, ka pa pawh hi ka dem riau tawh mai a ni. Hetah awm char char la, haw duh tawh miah suh" thinrim zeta a tih chuan Liantein, "A awm reng thei nang. A pasal a khawngaihthlak mai bakah a mawi chiah lo a, an inchhung boruak a ţhat veleh a haw leh ang chu" a lo ti vat a, kan unau zia hi a inang lo ţhah a, Zikpuii hian engmah a la thutak ngai lo a, pasal ka neih dawn pawh khan min zilh liam puat a, min khawngaihna a lantir vak chuang lo a nih kha. Mahse, a ngaihtheih loh chin a thleng a nih chuan a khirh ber a, a rilru thlak tir a har a, a luhlulin tu hmai eng mah a zah tawh ngai lo. 

"A nupui hi a hmangaih takzet a nih chuan a chhungte bula awmpui loh dan a ngaihtuah ve mai ang chu. Hmeichhia ve thoin an hmeichhiatpui an ngaithei lo a, rai no lai, a hrehawm ber hunlai a ni lehnghal a, an ti mah mah deuh chu a ni. Haw tawh miah suh, fa pakhat pawm tlei chhung a rei lo emai, an tello pawhin i awm thei. Ka pa leh Pa Chhawna te chengchawng hi, an thil tih hi a dik hlawl lo. An hlim zawk ang an han ti vel a, in hlim loh khawp hi maw" a ti hlak hlak a, a dik na chin a awm ve tho mai, unaute chuan min hmangaih a, ka hrehawm tawrhna hian a ti na tih a hriat reng mai. 

"An inneih dawnah pawh engmah i sawi loh kha, ngawi mai mai rawh. Hetiang tur te chu a tirah khan dan tur che alawm" Liantein a tih chuan, "Ka pa'n a sawi chhuah hlim chuan ka hnial ve nasat em kha. Tuaitei hrilh suh u a tih miau avangin ka hrilh lo a ni mai a, in ngaihtuah nawn leh tur a ka tih nasat zia te kha i hre tawh lo em ni? Chhungkaw pa berin thutlukna ka siam tawh a tih bur chuan hnial luih har deuh a sin. Saiin hrehawm a tih ka hlauh avangin a eng zawngin ka sawipui ţhin a, ka pa te thil tih hi englai mahin ka thlawp ngai lo, hei, mi pakhat chauh thu a kal a ţhat loh zia chu a lan chhuah mek hi. Ka thu ber, ka huai ber tih vang ngawtin midangte hi kan thu thu a dah kan tum tur a ni ngai lo. Saii te inneihna pawh hi an chhungkuain pawm tlang vek se chu tun ang hian hrehawm a tuar nang, inmil deuhin an awm tlang ang chu" a ti duah a, a ţhu hle hle thei lo chu a vei kual sek a, a thaw leh hak ţhin a, a thin a rim takzet a nih hmel. 

"Siamţhat theih a awm tawh chuan loh hi. A pasal a hmangaih a nih chuan a chhungte chu lo sual deuh pawh nise a tuar ve mai tur alawm. Mo nih hi a nuam zawk zawk lo tih te hriat ve a ngai a, bakah a pasal a sual lo a, a theih ang angin Saii thlavang a hauh ve tho a, heti chunga a pasal nen a pawh ţhen tum chu a sual thlak emai. A duh lo chung nu leh pa thu zawmin pasal a nei a, inţhen chungchangah chuan inrawlh tawh suh u, Saii thu thu a ni mai" Liantein a ti ve thung a, Zikpuii erawh a la meng rum ngang mai. 

"Nicholas hi ka khawngaih lo a ni bik lo. A nu leh a nauin heti em em a Saii an hua hi ka thin a rim a nih hi" Zikpuiin a tih chuan, "A ni tho a, keini pawh kan thin a rim tho alawm. An remti lo chung Pa Chhawnan a neih luih tir a nih pawhin pawm dan thiam ve mai se, ti hrehawm kher lo se kan tia, kan duhthusam a ni ve tho a, keini pawn kan remti lo a, ka pa kan hnial ngam lo a ni mai a, chuti chung chuan Nicholas kan huat phah lo a, nel deuhin kan kawm nghal bawrh bawrh thei a, Saii an ngaithei lo leh lutuk hi chu a sual thlak a, an dik lo hul hual a, mahse a pasal nen a pawh ţhen phet tum hi ţha ka ti chuang lo. Tunah pawh Saiin hrehawm a tih hlauin helamah a rawn dah a ni mai a, a ngai ve lutuk dawn tih hriat tho tur a nia, Nicholas pawh hi khawngaihthlak ve deuh a sin" pakhatin a lo ti leh a, sawi ve tur pawh ka hre tawh lo. A bul ber chu keimah ka ni a, Mapuia kha lo ring lehnghal lo ila chu hetiang buaina hi kan tawk kher lo ang. Mi rin ka harsat ţhin nen Mapuia ka ring hma lutuk hi mak ka inti a, ka inhaw rum rum mai. 

"Nu Hlimi te nufa chuan awm hlen daih se an ti ngawt ang. Nico-an a rawn dah pawh hi an lawm ngawt zawk ang chu. Haw tawh lo se kan hlim tlang a ni mai" Zikpuii chuan a ti leh hmak a, eng ang pawn min dan tum se ka pa'n haw leh tura min tih chuan min dang lui thei dawn lo tih ka hre ran a, chuvang chuan Liantein chhan let a tum pawhin ka lo khap a, a duh tawkin ang se, a zia veleh mai ang. 

Pindana ka nu a lo luh ve chuan Zikpuii bawkin, "Nu, Saii hi engtia awm tir zel nge in tum a? A haw leh phal lo ve chhin ula, hrehawm tuar tur ringawtin in kutah kan hlan lo ti ve tlat ula, an zia maithei a sin ti ila ka pa bawk hian a remti lo leh ang a, ka pa te ţhian dun thu duh lutuk hi chu ka hne ngawt mai. An duh duh danin thil an ti a, Saiin a tuar leh daih tho si" a lo ti bai bai a, min khawngaihna a lanchhuah tir nasa lutuk chu Zikpuii a ang lo zawk. Min en liam mai mai se mak ka ti lo zawk ang. Hetianga awm hi a inhmeh hlawl lo. 

"I pa thu thu a ni mai" ka nu'n a tih chuan, "Ka rindan vel a ni. I thuin thil i tih ngam ka ring lo reng a" a ti hlak a, "Pa in la nei a, pa berin ro a rel ang chu. Keipawn kan bula awm ve reng turin ka duh alawm mah se pasal a nei tawh a" ka nu chuan a ti dam thlap a, "Nih leh Saii, i haw leh duh nge inţhen i duh?" ti a Zikpuiin mi zawh chuan chhan ngaihna hre lovin ka en ngai ka en tlawk tlawk ringawt a, inţhen ta ila ka pasalin a tuar ber dawn a, thil ti sual lo ber a ni bawk si, ka haw duh tawh lo ka ti ngam chiah lo a ni. 

"Nicholas ka khawngaih a" ka ti a, ka aw chhuak tham ţuak mai chu tih reh tumin aw ka thian zui kharh a, ka pa a lo la lang ve lo a, nakinah mumal zawkin kan la sawi dun thei ang chu. 

Dan ngaiin hnaah ka kal leh a, rai vanga chawlh ngawt thu a awm si lo a, tha a za lo ţhin khawp mai. Nghetin min hmuh rual chuan, "Niminah U Nico-a a lo haw tlai em?" a lo ti nghal a, "Tlai ang chu mawle...keipawh ka nu te bulah ka awm phei alawm. Phone ah ka rawn hrilh duh lo mai mai che a nih kha" ka ti a, min en phawk khawp mai. 

"Eng nge awmzia ni a? Mapuia lah kha ka rawn kal lamah kan vengah ka hmu a, dawr a thil ka lei laiin a lo lut ve a, veng dang daih a ni sia mak ka ti deuh a, chu aia mak ka tih lehzual chu maw...min lo bia a, a hmai a duk deuh a, a kam sir pem pawh ka hmu a, in pa nen buaina an nei deuh a nih ka ring a, U Nico-an eng nge a sawi?" phawk deuha a tih chuan, "Engmah a sawi lo" ka ti ringawt a, Mapuia chuan kan vengah chhungte an neih thu min hrilh tawh a, Nghetin kan venga a hmu nawlh chu mak ka ti hran lo, an chhungte a tlawh ve a nih ka ring.

"Mapuia phone number a dil che bawk sia, midang hriat lohin a hmu anga kut a thlak aniang. U Nico-a tan chuan a thinrimthlak ve dawn e, sawisa hrep se ka ti reng a ni. I nu te bulah chuan ngatinge i awm phei daih a?" a ti leh hnuhnawh a, engkim min hriatpui tu a ni bawk a thil awmzia ka hrilh thuak thuak a, ka sawi zawh rual chuan, "In va hahthlak tak aw" a ti halh a, min hnem vak ngaihna pawh a hre bik lo a ni. 

"I pa'n engtin nge a tih che?" ti a min zawh leh chuan, "Nizanah Nicholas nen an inbia a, eng nge an sawi ka hre lo nain ka pa chuan min duat lutuk, ţha deuhin min bia a, indim turin min ti deuh reng bawk a" ka ti a, nidang aiin kan buai a, ti ti na hun thawl kan nei lo hlauh chu ka lawm letling zawk a, boruak a hrehawm em a, sawi chhuah reng pawh ka chak lo a ni. 

"Ka thlah ang che...ka tlan chak lo ang" ka bag min pek pahin min ngaichang ran a, Nicholas chu awm se taxi in haw rawh a ti leh kher ang a, mahse min lo be lo bawk nen, scooty a chuan mai mai chu nau pai laiin a tuar dawn lo tih ka hrechiang a, ka lo remti ve mai a, taxi a mahni a haw ai chuan ka ţhiannu nen a haw dun chu ka duh daih zawk a, ka khua a har ve deuh a nih ka ring. 

"Mapuia chu kan venga ka hmuh bak ka la hmu leh lo reng reng. Ani pui hi a chawl em maw ni?" helmet khum paha a tih chuan, "Sawi tawh lo teh..a hming ringawt pawh hian min ti hah. Ka hne hluah hluah mai a ni" ka ti a, a bu nghat a, engmah a sawi zui tawh lo bawk. 

In kan thlen chuan lo chawl turin ka sawm ngial na a hman lo a inti ve tlat sia, lo lut kawi lovin min haw san a, kan inah chuan Liantei chiah a lo awm a, Hope khan lo len a tum viau nain a la reh vang vang mai. 

"Ei tur ka siam zo vel chiah a, inthlak la kan ei dawn nia" a lo ti var a, "Ka inbual law law dawn..tui lum a awm em?" ka tih chuan, "Aw..i inbual zawh hun ka lo nghak ang. Thingpui ka la lum chuang lo a, han ti ve deuh vat vat la aw, ka ril a ţam ve tawh tho a nia" a ti zung zung a, rilru hah lai pawn mahni in nge nge hi chu a danglam bik khawp mai. 

Ka inthlak laia ka phone ri chu ka en vat a, ka pasal hming a lan chuan rang deuhin ka la a, "I haw tawh em?" a rawn ti a, a aw pawh nimin lam ai ngawt chuan hriat a nuam deuh alawm. 

"Ka thleng chiah...eng nge i tih?" ka ti ve thung a, "Anthony nen huanah kan kal a, kan lo lut kawi ang" a ti a, keipawh tlemin ka phur ve ta deuh a, Anthony hi kan in ah a lo la kal lo a, a lo kal duh a nih phawt chuan pawi tihna ka nei lo. 

"Lo lut kawi rawh u, Liantei nen kan awm a, ka nu leh pate hi khawiah nge an kal ka hre lo. Zikpuii chu inneih naah a kal a" ka ti zat zat a, kan inbiak zawh hnuah ka inbual a, inhnuaia ka chhuk leh meuh chuan Liantein thingpui a lo siam thlap tawh a, Hope ka hmu thut chu beisei lawk mah ila ka hamhaih lek lek a ni. 

"Ka lo leng ang ka tih kha" amah zawk chuan nui var var chung hian a lo ti a, Liantei eitur siam chu tui tih hmel deuhin a ei zui a, a ute pahnih lokal an tum bawk nen, kan inhmukhawm ruih dawn a nih hmel. 

"Ka lokal hma lawk khan Rita-i a lokal a, ka rawn chhuahsan nghal daih. Ţum dang ang bawkin a inchei leh nasa a, a chhe lo lutuk, damlo pawh a ang lo" Hope-in a tih chuan, "A damlo em ni?" Liantein a lo ti ve vat a. Rita-i hi an hre ve viau tawh nain a natna erawh an la hre ve lo a ni. Ka chhungte hnenah hian thil ka sawi ngai em em hran lo a, ţul tawpa ka hrilh ve ţhin hi a ni mai. 

"Aw..ka pumpui a cancer a tia lawm. Mahse a dam ţhat hmel lutuk, a mak bik tawp. A mitmeng pawh a harh a, a fiah ţha. Ngui deuh a hmuh ka tum a, rin aiin a ngui vak lo bawk a" a ti a, Rita-i kan ring chhe lutuk hian nuih a ti za tawh zawk a, ka nui chhuak lek lek hial a ni.

"A nasa lutuk lo em ni a? Pumpui cancer hi kei ka hlauh zawng tak a ni. Kan ţhenawmpa pawh kar hmasa lawk khan pumpui cancer vangin a boral a, a cher chhe lutuk ringawt. Engmah a ei thei bawk si lo a, a khawngaihthlak zia chu a" Liantei chuan a ti malh malh a, "Lo cancer ve ta ila chu ka hlau dawn lutuk a, ka taksa pawh a chhe chak viau ang. Rilru hi a pawimawh ve a, mahse Rita-i chu ka hmuh tum loh dan deuhin ka hmu tho tho" Hope lah chuan a la ti ţang ţang a, ka awm loh veleh a Rita-i kan in a a kal chuan ngaih a ti ţha lo a, Nicholas a awm lo hlauh zawk a, awm phei se chu rilru bet lo deuhin ka awm reng dawn tihna a ni mai. 

"A natna chungchangah dawt a sawi a nih i ring deuh em ni?" Liantein a tih chuan Hope chu a lo bu nghat a, "Chutiang a nih chuan mawl ka ti ngawt ang. Damlohna, a bikin cancer phei chu fiamthuna chi a lo hrim hrim a, dam loh der te hi a malsawm lo. Midangin min ngaihven se tih avang ngawt a natna khirh deuh vei anga insawi te hi a ţha lo. Nat tak tak te pawh a hlauhawm a" Liantei bawk chuan ti lehin thu ho mai mai sawiin an ti ti siam siam reng a, inpui lamah ka phei san a, tv ka on ve tak nain eng thil mahin ka rilru a la peng thei tak tak lo. 

Ka khua a har a, buaina lian tak ka thlen avang hian ka inthiam lo a, ka zak a, hrehawm ka ti bawk. Ka engtih mah a tui thei lo a, ţawng pawh ka ţawng ţha peih lo, han sawi chiam tur ka hre hlawl lo. Ka awm bo vang vang hnuah haw leh pawh ni ila Nu Hlimi te chuan an zia an thlak ka ring chuang lo a, Rita-i a awm chhung chu min ngaithei loin hnawk min ti reng tho ang. An thu awihin Pa Chhawna leh ka pa te hian ka pasal nen hian min inneih tir lo se chu tupawh kan zalen ang a, kan hlim vek zawk tur a nia. Engmah thlak danglam theih a ni tawh si lo a, nau ka la pai tak deuh deuh lehnghal a, inţhen chu ngaihtuah ngam chi pawh a ni lo. 

Anthony a lo tel ve ka rin nen Nicholas chiah a lokal a, Hope nen an inhmu chu inbe lem lovin an in nuih tawp a, Liantei lah chuan, "Pakhat te te a rawn pem in tum em ni? Kar khat a liam meuh chuan nu Hlimi pawh bag puar luahin a lokal ve tawh ang ka ring" a ti fiamthu a, Nu Hlimin min ngainat loh zia a hrereng sia, fiamthu thawh nan a hman kher chu a ţul viau lo. 

"I pa'n a hau che em?" ka pasalin a tih chuan, "Min duat lutuk" ka lo ti vat a, ka dulah chuan chulin, "Ka ngai tawh che u" a ti sup a, ka lo nui hak thung. 

"Zan khat chiah ka la riah chhuahsan che a, i lung a va leng hma ve" fiamthu a ka tih chuan a hmui a seh zauh a, a nui ţha duh vak lo. 

"Hrehawm i ti em?" tiin thutak deuhin min zawt leh a, lu ka thing a, "Hrehawm pawh ti ila keimah vanga buai kan ni sia, ka tawrh a ngai alawm" ka tih chuan, "I thiam loh a ni lo. Mipa dang nen a in thlalak hmuh kha a nuam lem lo, mahse tihpalh a nih kha. Mapuia kha ka hmu ngei a, ka hmuh hmain thlalak kha a cousin a lo thawn a, a cousin in ka nau a thawn veleh chhawng a nih kha" a ti charh charh a, Mapuia ka huatna hi a nasa telh telh a ni ber. 

"In lamah an la sawi em?" ka tih leh chuan, "Sawi e..an sawi reng rih ang" tiin tlang deuhin min hrilh a, ka lo thaw hak ringawt a, kei meuhin hrehawm ka tih chuan a hrehawm hle tihna a ni mai. 

"Ngai viau che mah ila hetah hian i hahdam zawk ang. In enkawl ţha la, nangmah chiah in ngaihtuah rih rawh. Hrehawm i tih tho leh min hrilh la, i duh hun hunah ka lo hruai ang che" a tih lai chuan amah chu ka ngheng a, min lo kuah vat a, ka chetsual palhna hian nghawng a ngah ve khawp mai. 

"Ka fimkhur tawh ngawt ang...tih sual palhin a hrehawm duh emai" ka ti leh ringawt ţhin a, la naupang viau mah ila Mapuia thil tum man thiam rual ka ni tawh a, nau ka pai hnu ngat phei chuan Nu Hlimi te pawhin min duhsak ve tawh ang a ka ti fo a, hlimna hlirin min hmuak emaw ka tih laiin hetiang hi a thleng leh si a, Nu Hlimi te pawh ka dem chuang lo, a lungawi thlak loh ve bawk em a ni. 

"A thleng nawn leh a nih chuan inţhen lo mah ila ka rinna che a tla hniam tawh viau ang" tiin ani pawn min vau pah nghal a, Zikpuii a lo haw chuan ka ţhut dan ka siam rem a, a rawn thinrim leh dawn emaw ka tih laiin, "I lo leng elo? Kha, Pâtei pawh kha nizan chu a tlaivar ţhak maithei a ni" a ti kher a, ka thaw deuh huai nain min koh dan chu ţullo ka ti ve thlawt a ni. 

"Ka rawn biak hnu che khan i muhil nghal lo em ni?" ka pasal pawhin a lo ti ve nghal zat a, "Muhil nghal nang, Liantei nen kan ti ti rei a, kan sawi ho ropui si" ka ti ve zaih a, ka rilru hah vanga muhil thei lo ka ni reng sia, Liantei chu lukham a sik rual rual a muhil nghal thei kan tih ang chi kha a ni. Keimahin ka tlaivar deuh thaw a nih ber chu. 

"Ka bulah i mu lo a i awm thiam lo a nih chu" Zikpuii hriat phak loh turin ka beng zawnah a phun sup a, "Nuam ka ti zawk maithei a sin" ka tih chuan, "Nuam i ti zawk thei lo. Ka kuah loh che chuan i muhil thei tawh lo a nih kha" a ti a, nuihza hmel a pu a, ka muhil thei lo chu a lawm zawk emaw tih mai tur a ni. 

Hope nen an haw rual a, chaw ei turin kan ti tak nain boruak a chhiat belh a hlau em a, Hope a awm ve bawk nen, chaw ei loin a haw pui a, an kal liam chiah chu khua a har leh ruih tawh. 

Karkhat hnuah ka lo hruai ang che ti si kha kan ina kar hnih ka awm hnu pawhin min la hruai haw lo a, nitin deuhthaw a lokal a, chaw a ei zeuh zeuh bawk a, chuti chung chuan vawikhatmah lo haw rawh a la ti lo a, ka nu leh Zikpuii phei chu an ngaihdan a ni vak tawh lo a, rilru nuam lo deuhin awm reng ţhin mah ila ka ngaihţhat lohna ka ti lang duh ngai bik lo. 

"Hrehawm i ti em? I pasal lah hi a lokal fo a, i tello bawkin a haw leh ţhin a, in inchhung boruak a la ţha lo viau em ni? I zawt chiang tawh em?" ka nu'n a tih chuan lu ka thing a, "Haw chak deuh anga lan ka duh bik lo alawm. Boruak ţha tawh se chu sawi ngai lovin min hruai haw mai ang" ka ti ve tlat a, Hope hnen aţangin Rita-i a leng zeuh zeuh reng tih ka hria a, eng ang pawn tlangnel se ka pasal hi ka ring tawk a, a inven theih chhung chu hmeichhe dang a hnaih duh ka ring lo. A sawi ang tak tak khan inrintawnna tello chuan inlaichinna ţha a neih theih loh tak tak a, chuvang chuan rin hmasak phawt ka duh, a rintlak loh zia ka hria a, ka hmu a nih loh chuan ka ngaih ka ti ţha lo ringawt duh bik lo. 

"I pa lah hian engmah a sawi mang bawk si lo a, Chhawna nen an inbe zeuh zeuh tih chu ka hria a, eng lam nge an sawi ţhin hre lo mah ila in chungchang a nih ka ring. Fimkhur viau tawh rawh, Nicholas chu a puitling a, thil ti rum rum lovin thudik a zawng hmasa thlap a, mipa dang phei chu nise an ţhen nghal daih ang che chu. Chhungte duhzawng pasal neih chu a inchhirawm loh a sin" a ti a, ka lo ner nang nang mai. 

"I mumallo e..a chang leh i dem a" ka tih chuan, "A chhungte alawm ka dem. I pasal hi chu englai mahin ka dem ngai lo. I hahdam theihna tur a zawng reng zawk a nih hmel. Ngaihtuah lo che sela chu i hahdam theih dan tur zawng buai lovin a tawrh tir tlawk tlawk ang che" a ti a, ka pasal chu fak viau mah se, "A tirah chuan i duh bik loh kha. Zikpuii hnen aţangin engkim ka hre vek tawh, ka pa i hnial ngam loh vanga remti ve chauh i nih kha" ka lo ti leh kher a, ka thin a rim hauh lo a, a huat tura sawi ka ni lo bawk. 

"In innei rei a a fel zia ka hre chhawm ve zel mai alawm. Inpui chang tu tur chu ni lo se in dang daih ula ţha tur. Ka ngaihtuah ve tho si che a, i nu te zia ka hrechiang tawh bawk nen, haw leh pawh ni la rilru nuam deuhin ka awm thei kher lo ang" a ti a, a rilru a hah ve deuh nge a thusawi ho te chu a mumallo in thil a ngaihtuah kual nasa tih a hriat reng mai. 

Beisei loh deuhin tlaia a lokal chuan, "I lo haw duh tawh em? An zia deuh tawhin ka hria a" inthlahrun hmel tak hian a ti a, a awm loh laia ka nute thil sawi kha a hre pha emaw tih mai tur a ni. 

"I chhungten an remti em ni? Hrehawm deuha a awm dawn chuan haw rih lo mah se a pawi miah lo a nia, nau a pai bawk nen, hahdam deuhin awm se ka duh a, an remti lo a nih chuan hetah awm rih mai rawh se" ka nu'n a lo ti ve khauh a, ka pasal hriatah min ui der ve tih a lang reng mai. 

"An sawi tawh lo a, a hrehawm tawh lo turah ka ngai. Helama awm tir reng pawh nuam ka ti chuang lo a" a ti ban charh a, a dinhmun hi a laklawh ve a, mipa a nih miau avangin a chhungte vanga kan in lama ka awm a ngai hi a tan chuan a tlawm thlak ve a, an in lama ka awm a, ka chunga a chhungte an sual leh min khawngaih tho bawk si, in dan a sawi lahin Pa Chhawnan phal loh tak tein a phal lo a, a sen lai aţanga enkawl chho tu an ni a, sum tam tak sengin lehkha an zirtir a, hna ţha deuh a neih phah a, han hnial kha a nawm lohna chin a awm ve dawn bawk a, a laklawh kual vel vek a, amah tak pawh hi a khawngaihthlak zawk, a rilru a buai ve viau ang. 

Ka pa berin insiam tura min tih leh tlat tawh avangin pindanah ka chho a, ka pa hi chuan mualpho a hlau a, miin ka pasal nen kan inţhen emaw an tih a hlauh zia a sawi fo ţhin reng a ni. Hrehawm deuh mah se ka pa tak hi chuan min haw tir leh ngei ngei ka ring sa hrim hrim. 

"I thiam loh a nih rualin tihpalh a ni tel a, buaina an siam sak che a, i hrehawm tih theihna tura an awm a nih chuan i lo haw leh daih dawn nia. Mo te ti rethei lutuk chu an fel bik lo tihna a ni mai, ţhat i chhuah chung pawh a an kher reng che a nih chuan in ka nei ve tho a ti la, englai pawha rilru na reng reng a awm ai chuan inţhen a pawi lo daih zawk" bag a ka thawmhnaw min khung pui paha Zikpuii ang hlak hlak chu ngawi rengin ka ngaithla a, ka awm mai mai te hi min lo en leh vang vang ţhin a, min khawngaih a, min ngaihtuah takzet niin ka hria. 

"I â mai mai emai. Naute chu fuih a, chhel taka awm tur a hrilh zawk tur alawm. Mihring kan nih chhung chuan hrehawm chu kan tawrh tur alawm. Tawrh ila, tawrh chhuah hun a awm ngai" ka nu'n a lo ti leh daih a, a hma lawka a thusawi nen inrem lo tak a ni. 

Inhnuai lamah kan inzui thla a, ka pa chuan engmah a sawi tawh lo a, eng rilru nge a put tih takngial pawh a hriat theih loh. "Insiam rawh" tih zawng kha a sawi a, pasal ţhen than a ka than a hlau viau a nih hmel. 

Haw kawngah chuan ka pasal nen chauh ni mah ila kan inbe mang lo a, a hmel a thutakin thil tam tak ngaihtuah hmel a pu a, ka be buai duh bik lo a ni. 

Kan ngawih vang vang hnuah, "A hahthlak" a ti chhuak sup a, a ţhutna lam ka hawi vat a, min en ve lem lo nain, "In dan bawk i ngaihtuah leh tawh em ni?" ka ti a, a lo bu nghat a. 

"Ka pa ka hnial lui mai dawn em mawni tih thlengin ka ngaihtuah. I awm lohin ka ngai bawk si che a, i awmin ka khawngaih che a" a ti a, a dinhmun hi a khirh ve tho ka tih tawh kha, kan nupa inkar a chhe vak ngai lo chung hian buaina dang kan ngah a, a hlim tak tak theih chuang loh. 

"In dan chu keipawn ka duh ve tawh mah se ka pa hi i hnial lui thei lo ang. A chhan chu--" ka ti chiah tihah chuan Nicholas hian thudik a la hre ve lo tih hriain ka ngawi ta daih a, mak a ti deuh aniang min rawn en pah hian, "Eng nge a chhan chu ni a?" ngaihţhat loh hmel tak hian a ti a, "I nu thlarau a zah ve ang a, i hnial tlat chuan hrehawm a ti lutuk ang" ka ti a, ka thusawi chu keimah pawh hian ka hrethiam lo.

"I thusawi khan awmzia a nei lo" a lo ti ve chiah reng a, "I pian hlimah i nu a boral a, a ruang bulah theih tawp a ţha a enkawl tur chein an lo intiam ve maithei a, mipa thutiam phei chu tu te pawh hian kan ngaipawimawh bik ţhin lehnghal a, i chhuahsan daih chuan i nu thla a zah ve anga" ka tih chuan za lo deuh hian a lo nui hul hak a, "Dawt i sawi, ka chik che ka tih tawh kha. Dawt i sawi chuan ka hre zel thei" a ti khauh a, engmah ka sawi zui tawh lo a, ani pawhin min zawt lui bik lo. 

In kan thlen chuan Pa Chhawna leh Hope ten ţha deuhin min lo dawng sawng a, Hope phei chuan Nico-a bag khai lai a lak sak a, "Chaw va ei rawh u" a tih hnuah inchungah a chhoh pui a, "Kan lo ei kham chiah a, chawhmeh sat lai sawn va ei ve nghal rawh u. Saii, in sawiselna i nei em?" pa ber chuan a lo ti zung zung a, min be ţha lutuk chu mak ka ti zawk. 

"Nei lo e...ka ţha lutuk" ka tih chuan, "A ţhat nasat chu. Hmuh phak loh a i awm chuan kan ngaihtuah ve tho che a, in inah nuam i ti zawk dawn tih hre mah ila helam kan khua a har ve tho a" tih pahin ka pasal chu a melh zawk a, nui hak hak chung hian ka kalsan a, choka a Rita-i ka hmuh rual chuan ka nui tawp riai riai thung. 

"In lo thleng maw? Hei chaw ei rawh u, kan siam tui teh a nia" zangkhai deuh hian a ti a, a chhip aţanga a ke ler thlengin ka en a, a thawmhnaw hak chu a inhmeh in ka hmuh dan a ngai reng a, a cher lo a, a thau lo bawk a, Hope-i sawi ang tak takin natna khirh deuh nei mek pawh a ang lo. 

"Eng nge i an?" ka ti mawi ve a, Nu Hlimi chu awm lo se ka be kher lo maithei a ni. 

"Ka ţha alawm..tunlaiah chuan in enkawlna a ţha tawh a, bakah a la nasa lutuk lo a, cancer hi thihpui ka tum lo hrim hrim bawk a" a tih laiin ka pasal pawh a lo lut ve a, chik deuhin ka lo en a, Rita-i chu hmu angin a awm lo a, a awm ve tih hre lo ang hmiaha a awm chuan thla a ti muang ve huai thei. Ka awm loh lai pawh khan a hnaih vak chuan ka ring lo. 

"Engtin nge i in enkawl? Chemo a ngai an ti em?" ka ti leh zel a, "Doctor ka rawn reng a, chemo pawh ka la khai ve ang chu. Tam tak hian an chhiat pui zawk ţhin a, ka hlau deuh a, ka cancer tih ka hre lo der hmak anga ka dam mai ang" nui har har chung hian a ti a, "I hriat loh der chhungin a darh vak dawn sin" ka lo ti ve thung a, "Darh vak lo ang. Ulcer angah ka ngai tawp dawn. Nu Hlimin min ţawngţaipui nasa bawk a ka dam mai ang" tih pahin Nu Hlimi dinna lam chu a hawi a, "Dam mai ang...nitin lokal la, kan ţawngţai ziah dawn nia" a lo ti nem hluak a, Rita-i chuan nuam a tih hmel ngang mai. 

"In in chu a nuam em? I lo haw duh tawh pawh kan lo ring lo a, Nicholas chauhin a koh haw theih loh chuan kan vaiin Saii ko turin kan kal dawn nia kan lo tia" nui reng chung hian a ti leh a, Nu Hlimi pawh a lo nui ve ngei a, min nuihsawh a ang ber zawk. 

"Thu ţha sawi tur i hriat loh chuan ngawi mai rawh. In duh leh in ţawngţai ula, cancer tak tak pawh ni lo ţawngţai dam te chu a har vak lo ang" deusawh zet a ka pasalin a lo tih chuan mitmeiin ka khap vat a, Rita-i ngawt chu huat hmel zetin a melh ngur a, ka khap tih pawh a hre kher lo ang. 

"Tikhan min ti ve ziah suh aw...ţhian pawh ni ila i fiamthu hi a sang ţhin mah mah, nupui pakhat chiah i nei a, i veng zo mang si lo" fiamthu ti tak deuh hian Rita-i chuan a ti a, heti em em a kan in a a rawn tlangnel ngam hi a ni ka hriatthiam loh ber chu. 

CONT..