HIS LAST LOVE-30

HIS LAST LOVE-30

Choka a awm ve dang ho ngaihsak em em lovin chaw kan ei a, chaw ei a tui duh lovin kei phei chuan ka chhungte ka ngai a, he in boruak hi chu kan in lam boruak nen a hrang hlak a, inthlahrun a na in puitling zawk te zah lo anga kan lan loh nan kan thiamna rengah pawh ngawih chuh a ngai a, kan nupa phei chu kan chep lehzual bik niin ka hre ţhin. 

Pindan a kan luh chhoh dawn thlengin Rita-i chu a la awm a, Nu Hlimi bulah ţhuin a ti ti zat zat a, a nui uarh uarh reng a, kan bula a awmdan nen a inang lo em a, an ngaina viau pawh hi a mak hran lo. 

Hope zawk chu kan pindanah a lo la awm a, kan lut min hmuh chuan inthlahrun hmel tak hian, "I thawmhnaw ka khai chho si a, hetah ka lo nghak tawp che u" a lo ti a, chhang lem lovin Nicholas chuan towel a ban a, a inthlak leh zet hnuah bualin ah a lut a, "Awm ve reng rawh. I awm hian a khawharthlak loh ve deuh alawm" ka tih chuan, "I awm loh hlan khan thil mak deuh deuh a thleng ţeuh mai" a ti a, kan in lama ka inbual diam tawh avangin thlang lamah ka inthlak a, min biak pawhin ka chhan lawk loh phah nghe nghe a ni. 

"Eng nge thleng a?" khuma lawn kai paha ka tih chuan, "Ka bialpa nen kan inţhen a, kan college hnaih deuhah an awm kher bawk si a, Faith lah hian a hmuh remchan apiangin mei nei deuh deuhin a ţawngkhum ţhin a, ka khap hneh mang si lo, a tawrh theih loh tawpah ka phu lo emai che a tia, min ţhen a nih kha. Ka rilru chu a na ve reng a, mahse inlaichinna chu chhe thei a nia, nupa pawh an inţhen chuan inngaizawng mai mai phei chu inţhen hun a awm ţhin a, a thim zawng leh lungngaihthlak zawnga lak ka tum lo a, ka tuar thei phian a nih hi. Mipa vanga indawm kun reng ka duh bik lo a, ka bialpa pawh demna ka nei hran lo. Faith-in mi awm laia a ţawngkhum ţhin dan ang hian a chhungten min ti ve se keipawh hian ka ţhen ve tho ang. Hrehawm ka tih ber zawk chu ka chhungte chapo lutuk te, dik leh ţha an inti lutuk te hi a nia, ka kham hluah hluah tawh. Inchhung ai chuan pawn nuam ka ti zawk a, inchhung ka lut chiah hi chu sarang a up phui vek ang vel ka ni, ka ipik ngawih ngawih" a ti mawlh mawlh a, Hope kher hi chu a fel em a, hlim reng tura ka duh ber te zinga mi a ni. 

"Ka chhungte hi ka ngaina lo tial tial a, ka nu nen phei chuan kan inhlat sawt lutuk. Ka nuih ve vak vak lai te hian ka ţah a chhuak thut zel a, hahdam tuma lehkhabu ka chhiar te hian rilruah a lut thei lo. I awm loh lai pawh khan thlalak chungchang kha an sawichhuak leh ţhin a, U Nico nen i thlavang kan hauh ţang ţang a, kan inhauh phah fo mai. Kan inchhung hrehawm lutuk hi chu lo haw duh tawh miah lo mah la ka dem hauh lo ang che. Mahse, U Nico a khawngaihthlak a, a khua a har lutuk a, a thin a chhe bawk si, thlalak chungchang an sawichhuah phei chuan pui thei tak a ni. Kalsan tawh miah suh, i awm leh awm loh kar a hla a, i awm chuan U Nico pawh kan fiam bawrh bawrh ngam a, i han awm lo chiah hi chu a inla pa thei a nia aw..biak hmain ngaihdam dil hmasak phawt a ngai" a ti a, kan han nui dun leh rih ţhin a, "Lo len phei reng a nuam si lo a, ka ngai tak tak che a nia aw. Naute pawh hi ka ngai, piang tawh se ka ti e, nghah rei a la ngai dawn si" a ti leh nang nang a, "Hun a kal chak alawm...ni leh thla a liam zung zung a, neih a hun vat mai ang" ka lo ti a, kan inah khan kar hnih ai tam hret ka awm a, ka haw leh chiah hi chu boruak a danglam bawk nen, ka ni deuh huih mai, ka dik thei thlawt lo. 

Ka pasal inbual zawh rualin Hope pawh a pindan lamah a phei a, in lama ka ţhian neihchhun a ni ve a, awm lo se chu hrehawm ka ti lehzual viau ang. 

"Kawr hak tur ka lo lak sak ang che" tih leh khum aţanga chhuk ka rual a, closet ka hawng a, reilote ka awm bo chhung pawhin a lo hnawk nuaih hman mai. Ka pasal neih hma kha chuan ka pindan chhung ka dah hnawk vak zel a, tunah chuan ka ni tawh bik lo. 

Thawmhnaw ka lak hmaa a dinna lam ka hawi chuan, "Vawiin khan chinfel ka tum a, ka lo hruai leh ta daih che sia. A fel fai sa ka hai pawr ting tang a, ka la dah fel leh hman lo anih kha. Lo hai pawr rih lo tawp ila ţha tur" a lo ti zung zung a, a dawheh ve khawp mai. 

"Tihfel dawn vanga tih hnawk hmasak kher a ngai hleinem. A inkhai ţha sa pawh a uai per pur alawm" ka tih chuan, "A va mak ve..a inkhai sa chu ka khawih miah hleinem" a ti daih nain a tih hnawk a ni tih ka hre tho a, mipa hi chu hmeichhia angin an che fel thlip thlep lo a, kan pindan pawh hnawk nuaih a hmuh inring kha rin aiin ka hmu fel fai zawk a, a pha lawk nasa bawk nen, ka hau kher duh ta lo mai. 

"Kha aw" tih pahin a thawmhnaw hak tur ka pe a, a lo ban vat a, ha mai lo hian lungawi hmel zetin min en vang vang a, "Eng nge i en a?" lai ru taka ka tih chuan, "I awm hi chuan a nuam mawle" a ti a, hmui ka tih pawrh khum hnua kal mai ka tum chu min lo pawt ding a, "Min ngai ve miah nange?" a ti leh a, pawisawi loh hmel zetin min en bawk nen, ka insum thei lo chu ka nui chhuak ta nge nge a. 

"Nitin deuh thaw i lokal a" ka tih chuan a mit hmul a lo san ralh a, ka ţawng leh hma hmain, "Chuan engtin?" a lo ti leh hmanhmawh a, "Nitin deuh thaw i lokal a, ni lo se chu ka ngai viau ang che. I lokal zing viau chung pawhin zanah chuan ka ngai ţhin tho che a nia" chiang fek fawka ka tih chuan lai tih hriat zet hian a nui ruh ruh a, ka ngawih leh daih takah chuan, "Han sawi zel teh" a ti leh pek a, "Aww..lokal zing viau mah la i haw zawk chhung pawn ka ngai hman zel che ka ti a nih chu" ka ti nawn leh a, tunah tak chuan a ka ah pawh zen ila min seh lo ang tih tur vel a ni. 

"Kan buaina ber a fel ti tih tawh a, tun chinah chuan khapa kha i hmu tawh tur a ni lo" khauh zet, thupe aw taka a tih hnuah min thlah ve hram a, thawmhnaw a inbel mawlh mawlh lai pawh chuan a bulah ka lo ding ve reng a, ka hmaah dingin ka thlavang hauh zel lo sela chu ka rethei lehzual khawp ang. Mi lerh vak lo leh chhungkaw hlutna hrethiam mi pasal ka nei hi ka vannei takzet a ni. 

"Ka sawi chu i hria maw?" a tih leh chuan ka lo bu nghat a, towel chu a bul remchang laia a dah hnuah muangchangin a lamah min pawt hnai a, a awmah nghet zetin min kuah a, naupangin an nautelem ngainat ber an kuah tlat ang mai hi a ni. 

"A thleng nawn tawh lo ang" ka ti a, a awm a hmai ka phum lai chuan, "Kha mi tenawm kha melh pawh melh tawh lo la kan fihlim a ni mai" a ti hluk a, min kuah nghet sauh danah tihpalh thil liau liau a thleng a ni tih a pawmthiam tawh a nih ka ring. 

"Buaina ka thlen sak tawh lo ang che" ka tih chuan ka khabe ah dawmin min kuai dak a, "Keimah vangin i buai ve hrep phah a, kan awm hran hial a ngai a, ka inthiam lo ve tho a, ka siamţha thei tawh chuang si lo" ka tih leh lai chuan ka hmuiah min lo fawp a, min ngaihsakna hi a lem mai mai a ni lo tih chiang takin ka hrethiam ve a, ka pasal anga min ngaihsak a, min duat tu hi ka tawn leh pawh ka ring tawh lo, chuvang tak chuan thil pakhat kal dik loh vang ngawt a ţhen nghal mai chu ka duh bik lo a ni. 

A inlak hran rual chuan a mitah tak en chung hian, "Ka hmangaih che" ka ti a, ka vawikhat sawina a ni nain ka rilru tak tak a sawi ka ni. A beisei loh deuh ka sawi vang nge mak a tih hmelin a mitmeng pawh a buai nak a, rei a ni lo thung. 

"Nangpawh ka hmangaih che" a ti a, tawi te a lo nuiin a awm bawk chu ka ngheng leh a, midangin min rin theih loh laia min ring tlat ţhin tu a nih vang pawh hian ka tan chuan a hlu takzet a ni. 

Mut hmunah pawh min kuah chawt reng a, min fawp zeuh zeuh reng bawk a, ka ngai viau nain kei ai mahin a khua a lo har zawk niin a lang. 

Lungawi hmel taka ka dul a chul lai chuan, "Muhil rawh..zingah ka harh hma leh dawn a sin. Meng mang lovin bucket tê min pe leh ang a" ka tih chuan a nui hawk a, ka nghawngah a hmai a phum a, a thaw lum ham ham a, za ka tih ţhin nen tunah chuan za pawh ka ti tawh lo, a nuam ka ti chuang lo nain ngaiah ka nei tawh a nih ka ring. 

"Keimah chiahin ka mu ziah a, ka bula i mut ve chhunah ka mutthilh san phal hleinem che" a tih chuan, "Zantin i bulah ka mu leh tawh dawn alawm. Naupangchhia ang hian awm ţhin lo teh" ka ti a, ka nghawnga a fawh vang vang hnuah a inla hrang ve hram a, mut zangthal paha ka lama a ban a rawn dah rual chuan ka tih ziah danin ka lo kham vat a, ka mutthilh hnuah a la let mai zel. 

"Ka awm loh laiin Rita-i a lokal ngun em?" ka ti a, keitak pawh chu ka mut a chhuak bik lo khawp mai. 

"Ka hre lo..in ah ka awm khat ve tho a" a tih chuan, "Ni dawn tak" ka ti hluai a, kan inah a awm ve rawt tak alawm. 

"Buaina min thlen em lo ang chu tiraw? Ka rawn awm ve hnu hian thil a thleng hnem tawh lutuk a, ka tan pawh a nuam lo a, Rita-i tal chuan buaina min thlen tawh lo se" ka ti niah niah a, zan a rei tawh a, kan ţawng zawi tawh viau mai. 

"Buaina a awm lo ang..an ţawngţai ţha a" nuih hawk pah hian a ti a, Rita-i nen hian kha leh chen kha an lo inzui ve tawh na a Nicholas zawk hian rilru a pe ve ngai lo a, tunah phei chuan a ngaithei lo viau tawh, a awmdanin zir se chu ţhian inpawh tak an la nih theih tho ka ring. 

"Ka zun ai va zung teh..a vawt si ka tho peih lo" ka kiu a nghawk zauh paha ka tih chuan, "Naktukah pipe kan lei dawn nia, thawh kher ngai lovin i vuah vu ang a" a lo ti fiamthu a, min han kuah ţha leh vel a, thlasik lai hi chuan zung tura thawh ringawt pawh hi a peihawm loh ţhin, Nicholas pawh a mu ţha sauh sauh a, min zunpui rawh pawh ti ila a peih tawh kher lo ang. 

"Mi zunchhuah lai laiin lo uang sek lo teh" ka ti hlak a, "Thlasik chhung chu diaper hreng mai rawh. Naupang hman ang hi i hmang ve thei tho ang" a lo ti leh a, rum deuha ka en lai chuan a mit chhing tlat chung hian a nui a, ka en tih pawh a hre kher lo ang. 

"Ngati nge i nuih reng a?" ka tih veleh, "Cleopâtei bulah ka mu a" a lo ti vat a, "Khawmaw awm sawn teh ka insum thei tawh lo" ka ti ta daih a, kan thusawi inzawm lo thei lutuk chuan nuih a ti za rum rum mai. 

Ka zun zawha ka mut leh veleh min lo kuah lehnghal a, sawi lang reng lo mah se a chezia ah chuan min ngaih ve zia a hriat theih. Nui tat tat chung hian a kawr chhungah ka zen lut a, ka kut vawt a a taksa ka khawih chuan ngaihtheih loh hmel fe hian a lo rum nghat a, ka kut a man chawt bawk. 

"Lum i ti chak em? Pangtilum i nei lo si, lum ti deuh a siam dan che ka thiam a nia" a tih chuan a chalah ka nam pawp a, "Ngaihtuah loh loh tur ngaihtuah chhuak ve ziah suh" ka tih hlak rual chuan a nui chhuak ta hawk a. 

"I duh loh chuan muhil rawh" bul zet a a tih chuan, "Duh hun hunah ka muhil thei bik hleinem mawle..muhil rawh in tih ngawt zel mai" ka ti nang nang a, "In nghawr dur dur khawpin hnar thlurh thlurh la i it awm lo deuh ang" a ti leh hem tawh a, keiin ka lo hnial ve vat a, kan nupa chauh a kan awm pawhin khawi hmun mah hi a reh ngai lo, kan awm ve na hmun chu a ri rum rum reng mai a ni.

Dar 12 a rik tawh hnuah pawh, "I ke ţang khan min chep min chep suh" a la ti thum dût dût reng a, "Ka tih ţhan a nia, ka hriat loh lai hian ka lo ti leh ringawt zel. Ka dah mai mai emaw ka tih pawh hian a lo awm mai mai lo zel a" ka ti zung zung a, "I nawm loh kha, mut tam i mamawh, muhil rawh" khauh zet hian a ti leh tawh a, muhil lo mah ila ţawng ve ngamna chi a ni tawh lo. 

Ka lo muhil ve ngei aniang ka harh leh chuan dar4 a lo ri tawh a, ka zung a, thawh nan a la hma deuh avangin ka mu leh a, thlamuan hmel deuh a ka pasal muhil chu ka thlir a, ka insum theih loh tawpah ka tih fo danin a sam nem thap mai chu ka khawih a, a kir avang hian hraw deuh angin a lang a, khawihin a nem viau thung. 

"I la muhil chuang nange?" a rawn tih chuan ka phu deuh zawk a, a tho phang aw chu a pawr em em mai lehnghal. Ka kut ka lak sawn rualin a mit a rawn meng a, ka kut chu a rawn vuan a, "Lo khawih leh rawh" a tih takah chuan keipawhin ka khawih veleh mai a, "A nuam em ni?" ti a ka zawh chuan tawi tein a nui a, engmah phei chu a sawi lo. 

"Ka harh laklawh a, mutthilh a har leh tawh maithei, bakah ka mutthilh leh chuan thawh ka hai ka hlau sia" ka ti a, min chhan lawk loh avang chuan a muhil leh tawh emaw ka ti hman a, mahse, "Zai mai rawh..zawi te tein zai la i muhil mai ang" a ti a, a mut a chhuah vang nge peih lo deuh a ţawng te pawh a ang alawm le. 

"Ka awm a nuam lo..ka pang te hi a kham" ka tih chuan min rawn hnaih a, "Dam rawh se" a ti liam satliah a, muangchangin ka hnung zang chu a chul a, a muhil leh vat thung. Eng ang pawn thinrimin ti tau mah ila a mut a chhuah lutuk chang chuan engahmah min ngai lo, a duh tawk a mu a, a harh hnuah min thlem mai zel a, huat enah pawh ka en tawh lo. 

💛💛💛💛💛💛💛

Ni a liam zung zung a, hunpui te hmangin kum thar kan chuang kai a, ka chhungte erawh an zia a ngai reng a, an la kum hlui ruih a nih ber chu, an thlah phal thlawt lo a ni.

Rita-i pawh a lo la leng fo a, ka pasal lah hian a hmu lo der hmiah zel a, keiin a taksa danglam leh danglam loh ka lo chik ţhin viau thung. 

"Kumin hi a kal puat puatin ka hria, khawvawh chhung a rei lo thei si, vawt reng se a nuam ber a sin mawle" Kungtein a ti lang lang reng a, kan buai buaiin kan buai a, kei phei chu ka ka naupai laiin ka rilru zawng zawng a la a, khawvawh leh vawh lohah ka buai ve vak lo. Ka dul a la lian kawh luah lo nain a lian ve deuh tawh a, darthlalang hmaah ka ding deuh reng a, ka pasal pawhin hmuhnawm a ti ţhin khawp mai. 

Damdawiin lamah lah min ngam tlak zual chuan min nuih reng a, tunah pawh kan doctor senior in min fiam leh mek a, rum deuh a ka melh laiin ani chuan, "Tikhan min melh suh, nupui a la nei mai ang a kan tih laiin i puar ve al tawh sia, en liam mai mai i har tlat" a ti a, kan in ngamtlak ve hrim hrim a, thawk tu zawng zawng deuhthaw hian min ngamtlak a ti pawh ni ila ka sawi sual kher lo ang. 

"Saii chu naupai a haw vak lo a a tih zia tak tak a ni. Haw viau se chu a pasal a khawngaihthlak dawn lutuk a, Pathian hian a tawk te te hian ro a rel a" Ngheti chuan a lo ti ve mauh mai a, a thutak phian lehnghal. 

"Ve lutuk che hian a" ka ti hlak a, Mapuian min rawn kal pelh lai chuan kan ngawi ţhap a, inhmu fo mah ila ka be tawh ngai lo a, ngeiawm deuhin min nuih kher zel lehnghal a, hauh hrep chak viau mah ila thil pawi a thleng leh thei tih hre ranin ka insum hram hram zel a, a fal a hmuh ka tum tawh lo bur mai a ni. Nu Hlimi leh Faith-i te lah chuan min ngei apiangin an sawi chhuak a, huat loh ka zir a, kan inhauh vak loh nan ka ngaithla liam ve mai zel a, pasal ka neih hnu hian ka danglam nasa khawp mai. 

"Saii chu a nau pai lai hian a chhun vaih chuan a pian rual rualin a ang nghal hlak hlak ang a, a chhar tu kha a melh rum vel ang a, a hlauhawm viau ang" Dr. Maruata bawk chuan a ti leh a, "Nau han nei chiah se chu maw..a buaipui thiam dawn lo nasa mai sia, ka lo huphurh lawk" Nghetin a tih chuan, "Kum tling sain nei se Saii tan chuan a ţha ber, a nih loh chuan an inbuaipui khaw lo ang" kan doctor-a bawk chuan a lo ti veleh a, "Min ngai tlaw ve sia, ka tlaw loh zia chu nau ka neih hunah in hre mai ang. Nautelem lianpui ka lei ang a, ka'n inzir lawk ang e" ka ti a, an lo nui hak hak a, ka thawhpui nurse ve tho ho pawn min huphurh pui a, fa nei tawh ho ngat phei chuan tun aţangin nitin nausen enkawl dan min hrilh a, an sawi hnu an sawi nawn tlut tlut reng hlawm mai. 

"Rita-i a lo la leng ngai em?" ti a midang awm loh hnua ka ţhiannuin min zawh chuan, "Tehreng mai, ka ning em a, ka hrilh lo mai mai che alawm. A beisei ber ka pasalin a be ngai mang si lo a, a rawn leng reng tho bawk si, mak ka ti letling zawk" ka ti a, Nu Hlimi a tlawn thiam bawk si, kei, mi tlawn thiam lo leh tlawn tum miah lo chu min lan hneh lutuk tlat a ni. 

"A peih hle mai...nupui pawh nei se ka birh tlut tlut chuan a lo let leh mai ang tihna rilru a pu aniang. Ni lo se chu a lokal reng peih lo ang. U Nico nen an lo inzui sil ve tawh a, neih let leh theih a inring aniang chu" a ti a, ka pawm zawng tak a ni. Inchei deuhin a lokal ziah a, cancer inti ve siin a landan a danglam hauh lo bawk. A sam a tan tawi a, chuzawng chu a danglamna a ni mai. 

"A ni maithei...ka nu leh Faith-i te hian an duhsak bawk si, damlo kan duat ang mai hian an duat a, amah ka en hian keichu a damloh tak tak ka ring tawh lo" ka lo ti ve a, a landan tawpah chuan tupawn hmu se mi hrisel pangngai deuhah an ngai ang tih tur vel a ni. 

"I pasal berin engahmah a ngaih loh chuan vei run duh lem suh, a ho emai. Tikhan awm ve mai mai se la, in nupa inkar a ţhat chuan a tawk mai. Fa in han nei anga e...i nute chuan an ngaihsak lo rei thei teuh lo mai, nangmah thlengin an ngainat phah vek mai ang che. Mo nih chuan hrehawm tawrh ngei ngei a ngai tih hre tawp la, nuam sa deuh tur a i inngaih chuan sawisel tur i hre ţeuh zawk ang" a ti a, kan ţhian dun hian kan la naupang ve tho a, keimah zawk hian pasal ka nei tawh a ni mai a, ka kum erawh a la tam vak bik lo. Heti chung hian kan thiam dan danin kan infuih tawn a, duhsak taka infuih na na na chu hlawkpui nachin pawh kan nei ve tho ţhin. 

In a ka haw chuan Hope chiah a lo awm a, choka ah thei tui a lo siam a, min hmuh veleh, "I duh ve em? Ka siam ve nghal ang che aw" a lo ti var a, buk nghat pahin amah chu chiang deuhin ka en a, a mit a sen ram a, a bui deuh lâk bawk a, "I ţap elo?" a lama thlek ha paha ka tih chuan, "Aih" tih chiahin min chhang a, dawt a sawi tih ka hre mai. A bialpa nen a an inţhen kha chu a tuar thiam phian a, a chhungte, a thisen zawm pui zawk te hian an ti na ngun em a ni. 

"Ngati nge class i kal loh a? Chawhma lam ka duty chang hi chuan ka lo haw hian i awm ngai mang lo a, i class kal peih lo i tlan bo leh tawh a ni maw?" fiamthu a ka tih chuan a lo nui ve mai a, tunlai tak phei chu a nun hi a nguai tlat a, tih hlim viau tum pawn kan ti hlim hlei thei lo ţhin. 

"Tunlai chu ka chhuak peih vak lo a, class ka kal loh pawn ka nuten min hau ngai chuang lo a, chhuah hrim hrim hi ka ning a, ka graduate ve theih pawh ka ring lo, tu bulah mah ka awm peih lo reng reng. Mahni a awm ka duh zawk a, nang leh Faith-i bulah ka awm hnem deuh hlek a, a nih loh chuan mahni a awm a nuam bet" thei tui min pek pah chuan a phun sap sap a, a che reng reng chu a zawiin damlo vak te pawh a ang dawn dawn alawm. 

"Ka thiam dan danin rai kawr ka ţhui sak che a, mahse nakinah, i rai len tak tak hunah ka pe ang che. Khawl khawih ka la thiam vak lo a, nalh pawh a nalh vak chuang lo. Ţhui sak ve hrim hrim che ka duh a, i ha ve tho dawn nia" a ti a, a nui hak hak a, a hmel hmuh hi a nuam lo tial tial mai. 

"Pum a len vak hun nghah a ngaih dawn chuan i ţhui lian thawkhat tihna a ni maw? Ka hnuk duah duah ange aw" fiamthu a ka tih chuan, "Awii....chutiang em em a ni lo" a kut vai pah hian a ti a, a nui ri chuan thla a ti muang ve huai mai. Ka sawi fo ţhin angin Hope hi chu ka ngaina em a, a hlim loh chuan nuam ka lo ti lo ve vek ţhin. 

Ka inbual a, ka zawh veleh Kungtei ka pui a, hmanhmawh lutuk loin chhuat ka nawt a, Hope pawh a tawm bo leh tlat tawh. Nu Hlimi lah chuan, "Chhuat i nawh zawhah tv leh a bul vel kha hru rawh aw..inleng kan nei thut thut ţhin si a, paw phukin an rawn hmu ang tih a hlauhawm" a lo ti ve sek a, "Ka lo hru ang" ka ti ve mai a, inchung lam chu en chhoin, "Khawiah nge Hope kha a awm a? Ani hi tunlai a awm ţha duh lo riau mai. Class a kal duh ţhak lo a, a khat tawkin reilote a chhuak zawk a, hma deuhah a lo haw leh a, Faith-in thlem tak te a a thlem pawhin class kal turin a thlem chhuak zo chuang lo. Thu a awih loh reng chuan a pa ngaihtheih loh chin a la thleng dawn khawp alawm" a ti hlaih hlaih a, a bialpa vangah an ngai fur niin ka hria. Keipawn ka sawi pui fo a, inngaizawng leh mai rawh u ka tih pawhin kan nau-i hian a duh tawh tlat lo. Kan inkar a khi laklawh tawh a, ho te teah kan inhau reng tawh ang a, a nuam tak tak thei tawh dawn lo. Kan la naupang a, midang kan tawng leh mai dawn alawm a ti ve tlat a, sawi pui hleihtheih pawh a ni lo ţhin. 

Ka pasal lo haw chu pindan lamah ka zui chho a, a kawr a phelh hnuah a kekawrbul pakhat a la chhuak leh chat a, a ro hlim hlawt a ni nghe nghe.

"Kha thil kha a chhiat tawh nen i ha ve ziah a" ka tih chuan, "Hak a nuam ber, ka hak thiam a nih hi. A ţhuina a peh a, i ţhui ţha thiam em?" ka lama a kekawrbul rawn lek phei paha a tih chuan, "Khawl chuan ka thiam lo a, hriau chuan ka thiam" ka lo ti vat a, "A ţhat chu" a ti ve mai a, a kekawrbul chu min pe in pindan aţangin a cbhuak a, a ngaihna hre lo deuh a ka din reng lai chuan lo lut lehin bawm lian vak lo a lo keng lut a, khawl la dum a hum ţat bawk. 

"Kha, ka inbual chhungin lo ţhui rawh. Hunawl hnawhkhahna a ni mai. I pasal buaipui thei a i awm hi i vannei nasa a nia" inti zei fahran hian a ti a, a thusawi nuihpui hak hak chungin bawm chu ka ban a, marker hian Hope tih a lo inziak a, pangpar lem nen, kan nau-i hi chu a che fel thlap a, a thil bik a hriat viau laiin Nico-a hi chuan a mamawh chu a hawhsak thei mai zel. Hriau leh khawl la pawh hi midangin hmang duh se chu ka nei lo a ti leh tlat tawh ang. Ka pasal nen hi chuan an in unau bik riauin ka hre ţhin. 

A inbual chhungin kekawrbul mawng lam, a ţhuina peh lai chu ka chilh ţha a, thil ka ţhui ngai vak lo a, ka cousin fate ho nautelem kawr ka ţhuisak ţhin kha a ni mai a, ka thiam dan danin ka ţhui a, ka chilh phui hneh ve viau tho mai. Rei ngial ka beih hnuah a mawng lam chu ka zo ve hram a, hriau seh bet tlat chung hian a ţhuina peh lai bik a la awm leh awm loh hriat tumin ka thlek kual a, vanneihthlak takin a awm lo hlauh a, bawm a ka khung leh thlap hnuah khum bulah ka hung ţha a, kekawr chu khumah ka pharh duai a, ka en ka en a, ţhui ngai lo mah ila ka chilh mawi ve viau chuan ka hria. 

"I zo tawh em?" bualin aţanga rawn chhuah paha a tih chuan darthlalang hmaa ding reng chungin khuma ka kekawr dah chu ka kawk a, a la kang a, a thlek vang vang hnuah keichu min rawn en a, a mitmengah chuan engmah ka chhiar thei lo, beidawng ngawih ngawih te pawh a ang lek lek zawk ka ti. 

"Engati nge min en char char a?" ka tih chuan, "Ka kekawr mawng hi...a chuar pawrh turh mai, hei en rawh i ţhuina lai bik hi a lawk luau mai" a ti a, ka ţhuina lai chu ka hmuh theih turah ka dah a, "Chilh phui rawh i tia, ka chilh phui a nih kha" ka lo ti then a, ka ha chhin kher lo nain a chuar lutuk awm pawh keichuan ka hre lo. 

"I thiam tho alawm..ha tho teh ang" ti a hak a tum chu a hma aia phawk zawk mah hian min lo en leh a, mak a tih hmel ngawih ngawih mai a ni. 

"Eng nge?" ka lo tih leh chuan, "Ka keu thei lo, a kau thei lo reng reng. A lawk lurh ka ti reng a, hmalam nen i chilh zawm vek a nih hi. I en lo mi?" a ti a, a awki pawh a sang tawh khawp mai. 

"A chhung ka zen lo a, pawnlam te chu en ve a, a tlang leh hmalam pawh ka en a, ka chilh tel tih ka hre lo reng reng" ka tih chuan, "Chilh tel e..hei, bawp dahna lai tur chu a kua a, mahse hmalam i va chilh tel alawm" a lo ti leh a, "A va zia lo tak. Kekawr dum bawk, khawl la dum bawk chu hmuh a har ve em a ni" ka ti a, ka inthiam lo ve tak tak. 

"Thil ţet an ţhuiin pawnlam aţangin an chhui ngai lo, ţhuina hnu a lang duh a, chhunglam aţanga chilh tur a nia, pawnlamah i chilh daih a, i ti sual a nih hi" a ti niah niah a, kekawr leh keichu min en tawn sek a, "Umm..inrinni ah min bazar pui la, hetiang chiah chiah hi lei tur zawng mai teh ang. A piangsual zo tawh a nih hi, ti hi chuan kekawr mawngah pangang dum lian pui a bet vung a ni ringawt, ha lo ve ang" a ti nghat nghat a, a lungawi chiah lo niin a lang. 

"Chutiang em em chu a nih bik loh kha" ka tih chuan, "I thiam loh chuan ka thiam lo ti ve mai la" a lo ti ve khauh a, "Kha kekawr kha a ninawm tawh hrim hrim. Dah bo ka tumna a rei tawh, khatiang chiah kha i lei leh a nih pawhin a dum lo deuh lei tawh rawh" ka ti a, balbawmah a vawm hlawm tawp a, "Pa i nih ţep tawh kha, hak tur nei lo pawh i ni lo a, kekawr pakhat vang maiin ti tau bur bur mah ta che" ka lo ti leh a, "Khawi, hak tur dang lo la rawh" a ti hmuk a, a thinchhe lutuk hi a buaithlak khawp mai. 

Zana kan mut dawn meuh chuan kekawr ţhui sual tih vel mai mai kha chu kan theihnghilh leh hmak tawh a, Hope-i hriau bawm pawh a la inhung ran a, ka pek theihnghilh daih a, zingah ka pe tawh mai aniang chu. 

"Pindan kawngkhar i khar phui leh tawh lo a ni maw? I van che fel lo tak" ka ti ve ngei a, khumah a mu ran tawh a, a kut pahnih chu a tukhum lamah suihbetin a kham a, ka thusawi vanga a lo nui hawk rum zet a melhin kawngka lam ka pan a, khar phui ka tum lai chuan hmeichhe ţe ţhat ri ka hria a, ka hawng zau leh deuh a, beng ka chhi ran a, "Anthony, U Nico, Hope-i saw va en teh u, a mak lutuk damdawi a ei ţeuh a nia, U Sai, in mu tawh em?" a ti tuarh tuarh a, thawm dang a awm lo bawk a thlaphang taka a au ri chu kan hrechiang hlawm khawp mai. 

Kawngkhar ka hawn zau rualin Nico-a a tlan chhuak a, ka umzui vat a, Hope-i pindan a kan luh hnu lawkah Anthony pawh lo lut vein Hope chu an buaipui a, chhuatah tui a baw nuaih a, Nico-a hlauthawng chuan Hope-in damdawi mum a la lem ve loh ho chu a kâ aţangin a kawm chhuah sak a, a khuh bawrh bawrh a, a uak vak vak bawk a, amah lah chu a zawi ngiai lehnghal. 

"Motor la chhuak rawh" Nico-an a tih chuan Anthony a tlan chhuak vak a, ka nu leh pate pawh rawn lutin an hlauthawng tlang khawp mai. 

Hope lah chu a luak a, men pawh a meng hleithei tawh lo a, a hmai chu a huh hliam a, tui leh mittui a inpawlh nuaih ang ka ring. Ka pasal chuan a nau chu a pawm bet tlat a, Nu Hlimin a taksa chu a lo hru fai a, kil khatah Faith a lo ţap ve bawk nen, kan buai nuaih nuaih mai. 

"Lo hruai rawh u" Anthony-an a tih chuan ka pasal bawkin Hope chu a pawm kang a, "Chanchin ka rawn hrilh ang che" a tih hnuah pindan aţang chuan an chhuak a, midang zawng zawngin an zui chhuah laiin keichu Hope-i pindan chhungah ka la awm a, chhuat a tui bottle let bal chu ka chhar a, a chhin pawh ka hmu zo lo. Damdawi mum lah chu a darh nuaih a, a hmawm zet tawh hnu a chhak chhuah leh ho phei chu chhuata tui bua ah a inchiah zawp a, a tui deuh vek tawh. 

"Ka lo ti fai ang" Kungtein a tih chuan ka kalsan a, han nui ve ţhin bawk mah se a hlim lo riauin ka hre ţhin a, ka hlauh ang ngei ngeiin thil a thleng ta a nih hi. Nu Hlimi lah Rita-i cancer ţawngţai dam tumin a hmanhlel a, a fanu in rilru lamah hliam na tak a nei tih a hre hauh lo, Faith-in hmu lo phei se chu a in ei hlum daih duh ang a, fa te aia ngaihsak dang ngah lutuk chuan hei hi a ni mai a hrin chhuah chu. Biakin chhungah Pathian faka lamin midang tan ţawngţai ve vak vak mah se a fate ber a ngaihsak loh chuan Pathian a lawm chuang lo ang. 

Kungtei nen chuan kan inmelh leh ralh ţhin a, sawitur kan hre lo aniang kan ngawi ran reng a, damdawi mum a lem tam hman loh chuan an chhan hman ngei ang a, Nu Hlimi pawh a danglam phah maithei a sin. 

CONT..