HIS LAST LOVE-31

HIS LAST LOVE-31

"Anthony leh midang an lo let mek. Hope chu a ţha tawh a muhil mek a, keiman ka awm pui lawk ang. Thawmhnaw lum deuh lo la chhuak la Anthony i lo pe dawn nia" phone ah a rawn ti zung zung a, ka thawhna hmun an pan thu a rawn sawi bawk, kan in aţang chuan a hnai ber a, hmanhmawh thilah phei chuan private pawh nise pan loh theih loh chang a awm ve ţhin. 

"Hope chu a lo la haw ve thei rih lo em ni?" ka tih chuan, "Aw..zanin chu riah a ngai dawn aniang. Anthony kha ka thawmhnaw lo thawn la nang chu lo mu rawh, a vawt riau a, lum deuh hlek rawn thawn la" a ti a, a buai aniang biak pawh min be rei lo. 

Anthony rualin midang pawh an lo haw ve a, an ngui nghiai hlawm a, Faith erawh chuan a tihdan ngaiin min melh rum leh khawp mai. 

"I kal leh dawn mi? Hei thawmhnaw chu aw" tih pahin Anthony chu ka pe a, lo ban pah hian, "Kal lehnghal mai ang. Zan a rei zel a, a ngaihtuahawm tawh loh, mu tawh rawh u" a ti dam thlap a, "Ni e, Saii, han mu tawh rawh, nang phei chu hah ve vak chi i nih rih loh kha" Pa Chhawnan a lo ti ve bawk a, kal mai ka tum chu, "Eng nge maw a hriat ni? A duh apiang kan leisak a, ţul tawpkhawkah lo chuan hauh pawh kan hau ngai mang lo a, tunhmain hetiang tih duhna hi a nei ngai mang si lo, kan buai zo vek tawh a nih hi" ti a nu Hlimi ţawng chuan min ti ding leh chawt a, "A ti nawn tawh lo ang, doctor kan hmuh pui ang a, a zia ve mai ang" Pa Chhawnan a tih laiin, "Nangmah vang vek a nih hi. Ti lui suh ka ti mawlh mawlh a, boruak dangin min chim nasa lutuk a kan buai zo a nih hi. Engmah a dik thei tawh lo" a lo ti hlak a, tawi te a nui chung hian inchungah ka chho a, anmahni indem lova keimah min dem ka ring reng a, Hope lah hian min ngaina ve bawk si, ka bulah a awm tam a, keimah lo chu dem tur dang an hre lo ang. A thi lo hlauh a, thi phei se chu min haw viau ang.

Damdawiin a kal loh ni a ni hlauh a Nicholas leh Hope te rawn haw chu ka lo chiau au vat a, "Lokal rawh i pindanah ka hruai ang che" zangkhai thei ang ber a tih paha a kut vawn ka tum chu Faith-in min lo vawn khalhin, "Ka hruai thei reng alawm. Kha, i pasal a lo haw kha, buaipui zawk rawh" min ti a, ka dang chu a ni der mai. 

Hope lah chu a taksa a la zawiin a kal ţawk ţawk a ni ber a, chaw kan lo ei tawh avangin ka pasal chu chaw ei ka siam sak a, office a ţhulh thei bik si lo, hmanhmawh deuhin a ei a, ka tih fel hlan chuan insiam turin inchungah a chho ve thung a, "I thiam loh a ni lo a nia" Anthony-an a tih chuan midang an awm leh awm loh hriat tumin ka hawi kual a, tumah an awm hnai lo hlauh.

"Kan thiam loh alawm. Kan ngaihsak tawk lo a, buai rukna a nei tih tuman kan hre lo thei a nia, Faith-i chu ţawng ve mai mai rawh se, engahmah ngai duh suh" a tih hnuah min chhuahsan a, thleng ka sil lai te chuan ka in ngaihtuah buai nasa mai. Kan indan an phal lo tlat a, min ngaithei chuang bawk si lo, Hope-i chunga thil thlengah lah mahni in en let tum lovin min puh leh daih a, ka haw daih mai dawn mawni ka ti rum rum a, a chhan diktak ka sawi chuan ka pa pawhin min huat phah bik lo ang. 

"Ka kal dawn nia" hnunglam aţanga ka pasalin min rawn kuah chuan ka kut a sahbawn phuan kai chu ka tleuh fai a, a lama ka inher lai chuan ka kawng a kuahna chu a phelh thawl a, inhmatawn a kan din veleh min lo kuah nghet leh vat a, "Lo haw har lo la, eng emaw a thlen leh phei chuan kan buai dawn emai" ka tih chuan, "Buai vak lo ang. Anthony a awm reng dawn a, i khua a har deuh leh Hope a awm a, a pindanah i lo mu hahdam ve daih dawn nia" a ti a, eng nge a chhan pawh ka hre lo, ka ngaihtuah thui lutuk vang te pawh aniang tuna thil thleng mek hi keimah vangah an ngai niin ka hria a, inchhung khawi lai mah hi nuam ka ti tawh lo, Hope pawh ka hnaih hreh zo vek. Mipa ho chuan min be ţha hlawm viau nain hmeichhe lam bawk hi a ni buaithlak chu. 

"Ka ngaihtuahawm loh...kal phawt teh" ka ti a, ka kut a huh avangin a thawmhnaw chu ka si ve ngam lo a, a hawikual vut hnuah ka hmui a fawp hram a, enghelh neih loh hmel deuh hian a chhuak zui a, a kal liam rual chuan ka thaw halh a, chhuah ka duh chang lah hian ka pasal ka khawngaihna hi a zual emaw tih tur a ni ţhin a, a buaithlak thei khawp mai. 

Hope chanchin a hriat ve avangin chhunah Rita-i a lo lang hlawl a, Nu Hlimin, "Thingpui lum sak rawh" a la ti zui. Ka lo aw ve nghal mai a, thingpui ka chhuan laia choka a an lo lut te chu an la nguai bur hlawm a, Rita-i pawh a ţawng zat zat dawn lo a nih hi ka tih rilruk laiin Nu Hlimi chu Hope ngaihven turin a chhuak leh rih a, Rita-i chungchanga ka ngaihdan dik loh zia ka hre nghal zat bawk. 

"I pasal hian a hmangaih chein i hria em?" min ti a, a thu min zawh teh daih chu mak ti deuh viau mah ila, "Min hmangaih alawm" ka lo ti mai a, "Nih chuan ngati nge ka lo kal hi min hnar haw ngai miah loh le? A laka ka rilru put hmang a hre vek si a, a hmangaih che a nih chuan ka lo kal fo ngam lohna tur a awm mai awm a nia" a tih chuan, "Inleng hnar haw te chu nuam a ti bik nang. Bakah ka nuten an duat bawk si che a" ka lo ti leh a, "Chhandami nen an inhmu ţhin tih i hria em?" a tih leh takah chuan ka hawichhuak rang khawp mai. 

"Mak i ti ni maw?" tiin a lo ţhen sak a, "I nute bula i awm lai khan i pasalin a lo tlawh ziah vang chein i ngaih a ţha ve em em a, kan ţhiannu hian Chhandami nen an inphur chhuak a hmu fo mai. Biaktei i hria em?" a ti a, a tirah chuan ka bangbo deuh a, mahse ka ngaihtuah vang vang hnuah huan a shooting nei tura kan kal ţuma lokal ve kha a ni tih hrechhuakin ka bu nghat a, "Biaktei leh Chhandami lehzel engtin nge i hriat?" ka ti a, Biaktei lah kha a nelawmin a ţawngkam pawh a nem a, a ngainatawm viau laia ka ring duh chuang miah lo kha ka lo ti fuh khawp mai. 

"Biaktei chu ka cousin alawm. Chhandami phei chu tupawn i pasal hming nen an sawi zawm a, hriat loh theih a ni hleinem. I nute bula thlamuang deuh a i awm vang vang lai khan i pasal motor ah Chhandami a chuang fo tihna a nih chu. Dawt ka hrilh lo che a nia" a tih chuan ka hlauthawng ve deuh a, Chhandami hi a hmangaih tih ka hria a, buaina a lo tawk leh a nih phei chuan Nicholas berkher hi chuan a tlanchhiatsan hauh lo ang.

"Ka ring lo che ka tih tawh kha" ka tih veleh, "I hlauthawng zawk a nih kha. I rilru a nuam chiah lo tih a hriat reng alawm. Nau hial i pai tawh a, Nicholas hi nangchuan i hmangaih dawn chiang sa a tiraw?" ngeiawm zet hian a ti a, "I natna chu engtin nge ni zel a?" ka lo ti thung. 

"Ka la in enkawl ve reng chu a nia, ka dam mai ang. Cancer te chu thihpui ka tum hleinem. I nu hian min ţawngţai reng bawk a, Pathianin tih theih loh a nei lo, ni lawm ni?" ti a min zawh pahin a mithmul a kan ralh a, "Ni e...lo dam ţha zel rawh" ka ti a, a hmazawnah thingpui chhawp sakin Nu Hlimi ta tur pawh ka hung tel a, a lokal hunah a in ve tawh mai aniang chu. 

"Chhandami te ang chu an fin i chelh teuh lo mai. Pawisawi lo awm deuhin an awm a, mi pasal an hmu hreh chuang lo. Keichu in in a ka lokal hi a ni mai a, tunah phei chuan i pasal aiin Nu Hlimi ka ngai daih tawh zawk. I pasal hi ka lokal chhan a ni vak tawh lo" a tih chuan ka awih lo lutuk chu ka lo nui hak a, tur zet a min melh takah chuan, "Sawi zawm rawh" ka lo ti thuai a, a sam chu a chhipah hui chho te tein, "I pasal nen kan inkawp lai pawh hian a lo be ziah alawm. A chang leh a ţap vel ţhin a, ka hre ve vek zel sia, a zak lo tak tak a ni" a ti leh a, "An inkawmngeih a, rilru natna kan neih chuan kan ţhianţha te alawm kan ţah khum ţhin" ka ti then a, Chhandami berkher chu ka ring chhe phal tawh thlawt lo a ni. 

"I mawl emai..i rilru an la ti na vak anga a ni mai lawm. Nicholas chu a rilru a nghet a, Chhandami a hmangaih zia ka hre vek. Nupui/pasal dang ve ve nei mah se a theihnghilh thei tak tak teuh lo mai. Nang phei chu a duh vanga nei che a ni lo a, tih tak zet a a hmangaih ţhin hi a thlang zawk reng tho ang" a tih te chuan engmah sawi ve lovin ka lo ngaithla a, engahmah ngai lo angin awm mah ila rilru chu a nuam chiah bik lo. An inzui nasat ţhin zia te, an khawhar an inhnem tawn ţhin dan te ka hriat tawh vang a ni maithei. 

"I damlo hi i la na lo riau mai" ka ti leh ta daih a, Nu Hlimi a lo lut ve chiah bawk. 

"Lak nat vak a ngai hleinem" a ti a, kan inbe zui lem lo a, "Hope khi engmah a ei duh lo a, thil a ei loh chuan a chau reuh bawk si. Faith leh Anthony ten an awmpui chawt a, amah chauh a kalsan kan ngam tawh rih lo" tiin Rita-i chu a hrilh a, chhang a lam zui nghal a, ka pek veleh, "Nitin hian buaina hrang hrang kan nei a, a thawpikthlak bawk a ni. Ka fate ho zia pawh hi a danglam zo tawhin ka hria" meinei zet hian a ti a, ka chhang chak viau nain buaina ka tih punlun ka hlau a, ngawih ka chuh a, an thingpui inna te ka tih fel hnuah pindanah ka chho ta daih a. 

Ka nu ka call a, a lak rual chuan, "Nu..nizanah Hope intihhlum a lo tum a, damdawi a ei vak a, Faith-i phei chuan hmu lo se kan chhan hman lo ngei ngei ang" ka ti a, ka mittui hnai nghal kuarh chu mak ka ti khawp mai, tunlai phei chu ka rilru a no a, ho te a lungchhiat vak chang ka nei ţhin. 

"A va zia lo ve" a tih chuan, "Ka lo haw hma mah mah a ni. Thlakhat vel tal lo awm ila ţha tur a nia, a hrehawm chuang loh nain hetiang buaina hi a awm leh sia, ka tan a nuam lo a, han inrawlh vak dawnin an ngaihdan a nih loh ka hlau sia, ka awmdan hi a buaithlak tak tak a ni, a laklawh vel vek" ka ti a, ka khua a har ve angreng bawk nen, ka aw dik lo chu keimah pawhin ka hre thei. 

"Tuar hram hram rawh, boruak pawh a pangngai chho mai ang. I pa thu lo chuan engmah ka ti ngam si lo a, mahni in a i awm angin i awm thei lo tih kha hre phawt la, mo nih chuan tlawm zawka ţan te a ngai ţhin a nia" a ti a, "Ka mize hlui kha a bo tial tial ni maiin ka hria" ka ti a, Rita-i thusawi kha chu zep tlat tho mah ila ka awm a nawm loh dan vel erawh ka hrilh vek a, ka thawl huaiin ka hria. 

Ka nu ka biak zawh chuan Chhandami ka call leh a, engkim min hrilh lawk tawh vang khan ka inthlahrung viau na a pasalte an tel tawh chuan hriat chian a chakawm ţhin a, chuvanga biak tum chu ka ni. 

"Saii, kan va inbe khat ve" a lo ti var a, a aw chu a zangkhaiin buaina tawk a ang lem lo a, thla a muang sawt mai. 

"Eng nge i tih a?" ka ti hmasa te te a, "Mahni tawkah ka buai ve thei lutuk, naupang buaipui an ngai sia, kan indang ve tawh bawk si, inchhungah hian khawih neuh neuh tur a tam khawp a" a ti a, "In indang tih te chu min hrilh ve tur che alawm" vui awka taka ka tih chuan, "Nia, status ah te khan i lo hmuh ka ring a, kan la buai em a midang pawh ka la hrilh lo, ka nu te ka hrilh ve a, chuzawng chu a ni mai" a ti dam thlap a, han rin sual ngawih ngawih chu har tak a ni. 

"Nicholas nen in inbe ngai em?" ka tih chuan, "Be ngai vak lo, sawi tak ang khan kan la buai a, ka hmuh loh nachin pawh ka hre tawh lo" a ti leh daih bawk si a, Rita-i lahin hrechiang a inti rapthlak bawk si, tu zawk nge rin tur pawh ka hre tawh lo. 

"A nih chu....in inkawmngeih angreng sia, in inhmu reng turah ka lo ngai a" ka ti leh hram a, "Kan inhmuh lohna a rei tawh. Kan inbe zeuh zeuh a, chupawh rei a ni ngai lo. Ka hmu hman tawh lo alawm" a ti ve tlat a, a nihna ang rawt a ka sawi a nih loh chuan mi han dawp lah hi ka thiam lo nasa mai bawk si, "Nakinah kan lo la leng ang" tiin kan inbiakna chu ka ti tawp a, rilru a buai ve nuaih mai. 

Pindan aţanga ka chhuak chu Faith-i nen kan intawk a, be lova kal pelh mai ka tum chu, "Nangmah vang vek" a ti hriam hrak a, ka ding chawt a, a dinna lama hawi let pah hian, "Engtin maw i tih?" ka ti a, min la melh no lo nasa mai. 

"Kan chhungkaw tan chuan vanduaina i ni ringawt. Ka pa hian engtin nge U Nico-a nupui tura a duh zawk che ni. Boruak chhia zawng zawng i rawn keng lut a, i lo awm hma chuan Hope pawh hian hlim lohna a nei ngai lo. Kan pahnihin kan inkawp chawt a, engkim kan ti dun a, a tum bur ngai lo a, lungngai hmel pawh a pu ngai lo. I rawn awm hnu hian in pahnihin in inkawm tam a, intihhlum hial a tum phah a nih hi. Haw daih rawh...ka nu pawn a ning tawh che. Kan in a lo awm ve turin tuman kan duh tawh lo che" a ti hmarh hmarh a, a duhthaw mai bakah a nasa khawp mai. 

"Ka lo hre miah hleinem. Keimah vanga in buai a nih chuan pawi ka ti" ka tih lai chuan, "Pawi i ti lo aniang chu i la awm ve reng alawm. Pawi ti tak tak la chu i haw daih tawh ang. Ka pa chiahin mo atan a duh che a, tunah chuan U Nico pawh hian nupui turin a duh tawh maithei che, mahse midang chuan tuman kan duh lo che. In inneih dawn pawh khan kan lungawi lo vek a, ka pa kan hnial ngam lo mai mai a nih kha. In inneih dan lah a lem ropui si, ka u hi ţhen daih rawh. I tello pawn a awm thei" tih thlengin a sawi a, ka va han insum nasa tak. Ţawng ve ila chu kan inchhang pawr ang a, buaina bawk a ni leh dawn a, chuvanga ngawi mai mai chu ka ni. Mo zawk ka ni miau a, thiam zawk mah ila an ţan zawk tur a hriat vek. 

"Nangmah vanga kan buai luih luih pawn inthlahrunna pakhatmah i nei lo, ţhen mahla U Nico chuan nupui dang a hmu leh dawn tho a, buaina min thlen reng chung pawha i la awm ve reng a nih chuan zakthei lo ka ti viau ang che" a ti hlak hlak a, a mittui a tling pam tawh a, a hmai thlenga a sen danah a thinrim viau a nih ka ring. 

"Hope hi intih hlum tum turin ka hrilh reng reng lo. A hlim lo a, inchhung hi nuam a ti lo. Chung vel chu ka bulah a sawi ţhin a, keiin ka lo hnem a, thil dang kan sawi ngai lo. Min ring chhe laklawh lutuk a keimah vang vek a thleng ah in ngai a nih kha" tih leh inher ka rual a, kailawn a ka chhuk chu, "I van zakthei lo tak. Nangmah vanga buaina kan tawk reng chung pawh hian inthiam lohna chhe te pawh i nei eih lo em ni a?" ti a min zawh pahin min um zui a, "Ka thiam loh pakhatmah a awm lo. In enfiah ula, buaina a awm lo a nih mai" ka ti hlak a, ka ding zui bawk a, "Nih tak chu a" bul zet hian a ti a, min lehpelh pahin min su chawrh a, kei lah ka lo inring hman bawk si lo, ka bawk thla rawp rawp a, ka pum a lian ve deuh tawh bawk nen a na kher mai. 

In beng kangin inhnuai chhuatah chuan ka pum dawm chungin ka ţhu nuaih a, kailawn tawp lama ding ka ni hlauh a, ni lo phei se chu tun ai hian a na ngei ang. Thisen a rawn chhuah phei chuan ka hlauthawng a, Faith-i lah chu ka bulah dingi ka lamah a kut a rawn phar chhuak leh hluai ringawt zel a, a nat mai bakah ka mangang takzet a ni. 

"Kungte, ka nu, min lo pui teh u" ka ti chel chul a, Faith-i a lo au ve bawk nen, Nu Hlimi leh Rita-i an rawn kal vat a, kailawnah Anthony a rawn tlan thla hlawk hlawk bawk. 

"Min lo pui teh u" ka ti leh ţhin a, nu Hlimi chuan min pawm bet a, "Engtin nge kan tih ang? Anthony motor va la chhuak teh. I pa a awm bawk si lo, i ţha em Saii? Khawi lai nge na?" a ti ve chel chul a, "Naute hi...nau ka chhiat ange aw" thlaphang taka ka tih chuan, "Engmah a thleng lo ang. Damdawiin ah kan kal dawn nia, engmah a thleng lo ang" a ti mawlh mawlh a, Anthony a rawn let leh chuan min pawm a, motor ah dimtein min hlang a, a na lutuk chuan ngaihtuahna a ti mang a ni ber, naute ringawt rilruah a awm bawk a, nikhaw hre loin awm em lo mah ila an ţawng chu ka hria a, an thusawi engmah ka hre tawh lo. 

Ka pasal a lo thlen chuan damdawiin khumah ka mu bâm tawh a, "I ţha em? Na i nei em?" a rawn tih chuan lu ka thing a, engmah ka sawi lo. Ka ţawng chak hlawl lo a ni ber. 

"Naute chu a ţha a, Saii pawh a ţha tho. Doctor chuan indim tawh rawh se a tia, eng emaw thut a thlen leh chuan nau chhiat mai te pawh a awl tawh dawn a" Nu Hlimi zawkin a lo ti a, ka thawhna hmun a ni bawk a ngaihven tu pawh ka ngah ngang mai. 

Khum bulah ka pasal chu a ţhu a, ka kut vuan reng chungin ka sam a chul pah a, naute nen a kan ţhat thu a hria chu a thawveng huai niin a lang. 

"Eng thil nge thleng a?" ti a min zawh chuan, "A rang teh thut lutuk a, engvakmah ka hre lo. Anthony leh ka nu ten damdawiin ah min hruai a, min lo buaipui zung zung a, ka tlukna kha a na em a, thil dang ka ngaihtuah thei lo" chau tak chung hian ka lo ti a, "Engtin nge i tluk theih?" a ti lehzel a, ka chhan hmain khum mawng lama ka nu ding chu ka en hmasa te te a, "Faith-in min su palh a" ka ti zawi sap a, chawp leh chilhin a mitmeng a inthlak a, ka kut a vawnna pawh chu a na sawt kher mai. 

"Faith-i pawh a tal buai a, tihpalh liau liau a su a ni. Saii lah a lo invuan hman bik si lo a, a thleng thut a ni ber. Kan che buai vek a, hrilh vat nachang che pawh kan lo hre lo. Doctor ten an buaipui laiin kan lo hrilh chauh che a nih kha" a lo ti zung zung a, mu zangthal reng chung hian ka thaw hle hle ringawt a, min su palh lo chiang alawm. Ka tlu dawn tih a hre lawk lo nain min sut dan kha tihpalh a ni lo. 

"Khawiah nge Faith-i chu a awm?" chang zet hian a ti a, nu Hlimin, "In ah" a tih rual chuan a ţhutna aţangin a tho a, min vawnna thlah mai a tum chu keimah zawkin a kut chu ka lo vuan let a, "Ka lo kal lehnghal ang" a tih chuan Nu hlimin, "A tihpalh tak tak ka tih kha. A u Saii hi ngaina lo mah se khatianga tih kha a tum lawk a ni bik lo, hrehawm a tia, tunah phei chuan a rilru a hah tawh viau ang" a lo ti vat a. 

"Henu phiangsen hian buaina a thlen hnem tawh lutuk. Saii hi a ngaina lo a, a chhiatna tur thil chu engpawh a ti duh ang. Lo ţan hlek suh" a ti vin hluk hluk a, a kutah chelh tlat lo ila chu Nu Hlimi chu a pan hnai nghal ruak duh ngei ang. 

"Hetiang thil hi a tih duh bik i ring em ni? I nau a nia, i hrechiang ber ang chu. Heng thil kher kher hi chu a thisenin a ngam lo, a tihpalh a nih kha" a lo tih leh chuan, "Lo ţan tei vet suh" a ti vin ţhawt a, kei takngial pawn ka hlau dawn dawn mai. 

"I nupui chauh kha ngaihsak rih rawh. Tunah tak chuan Faith-i chunga thinrimin awmzia a nei lo, kan hmuh phakah pawh a awm loh hi" Nu Hlimin a tih chuan thawk a la hawk a, a ngaihdan a nih loh hmel ngang mai. 

"Thil pawi a thleng zui a nih chuan in hre viau ang. Saii hi in tih nat leh chuan kan chhuak ang, in phal lo a nih chuan Faith-i zawk ka thehchhuak bawk ang. Ţha deuhin kan sawi reng a, awmzia a nei ngai lo. Kan naute hi chan ta ila engtia tih nge in tum? In enliam leh thei tho ang chu, in ngaina hlawl lo a nih chuan ka chhuah pui thei reng alawm. Ka pa pawh lo hrilh ang che" a la ti khur khur a, a phone phawrh in ka nu te hnenah chanchin a hrilh nghal zat bawk. 

"I nute lo thlen veleh ka haw ang. Ka rawn lehnghal ang" a ti a, a ţawng zawi nain a khauh viau thung. 

"A nute i hrilh kher a, an ngaihtuah lutuk anga sin" Nu Hlimin a lo tih chuan, "Haw tawh rawh" a ti ram hmak a, hetiang hian vawikhatmah nu Hlimi a la chhang let ngai lo. 

"Ka ngaihtuah ve tho a, ka awm ve rih ang chu" a tih leh chuan, "I lo ngaihtuah ve a ngai lo. Haw rawh" bul zet hian a ti leh a, Nu Hlimi meuh pawhin a hnial ngam lo aniang, "Saii, ka haw phawt ang a, a ţul dan a zirin ka lo kal leh ang. Doctor in a ţha vek a tih tawh kha, nakinah en dik tur chein a lokal leh mai ang" a ti a, muangchangin a chhuak zui nghal a. 

"Na i nei em?" ka sam chul pahin a ti dam thlup a, a rilru nawm nan, "Na lo e" ka lo ti a, ka samah chul tawh lovin ka kut chu a kut pahnihin a vuan a, a thinrim hmel kha lungngai hmelin a inthlak tawh a, ka khawngaih takzet a ni. 

Ka nu leh Liantei rawn tlan lut chu ţhutna a lo kian vat a, "Engtin nge i tluk sual theih? Nicholas eng thil chiah maw thleng a?" tiin ka nu chu a phul nghal hlut a, "Faith-in a su a, a tlu a nih kha" zawi te tak tak hian a ti a, ka nu chu a thin a rim hmel khawp mai. 

"Kan inbiakna a la rei loh nen, kan inbiak hnu lawk a thil thleng a nih hmel hle mai. I kalsan chhung lek pawh a chutianga an ti duh a nih chuan ka fanu tan hian a va him awm lo ve. Nau te lo chhiat palh hlauh phei sela chu a damchhungin hrehawm a ti tawh dawn a sin" ka nu chuan a ti a, ka pasal chu khum mawngah ngaihtuah ding hmel takin a ţhu kun lup a, a inthiam lo takzet tih hriain ka nu chu mitmeiin ka khap vat a, a hrehawm lehzual duh ngei mai. Taksa mai bakah rilru a na a, ka chau hluah hluah a ni ber. 

Pa Chhawna a lo kal ve pawh chuan ka nu chuan zah zo lovin, "Kan ring tawk cheu a, kan fanu pawh in kutah kan hlan a, mahse in fanu ngei vangin hetiang hian a awm leh a, keichu ka insum thei tawh lo, ka dawhthei tawh hlawl lo. In in a a awm ka remti tawh lo" chang fek fawk hian a ti a, ka pasal chuan min rawn en nghal a, hlauthawng hmel a pu a, "Kan bulah awm tawh rawh se" nghet charh a ka nu'n a tih leh chuan ka pasal bawk chuan min rawn hnaih nghal ruakin ka kut a vuan a, min en vang vang a, kal lo tura min duh zia a hmelah chuan a langchhuak chiang a ni. 

"Kan thiam loh a ni. Keipawh chanchin ka hriat veleh ka lokal nghal a, indim tur a ka hrilhna pawh a la rei lo a sin mawle. Khawngaihin inbeng dai rawh" Pa Chhawnan a tih chuan, "Fate chunga hetiang thil hi a thlenin tu nu mah an inbengdai thei lovang. Tlem a tlemah naute kan chan ţhelh a, Saii tan pawh a pawi duai thei a sin. Hmeichhia a nia, nakin zelah harsatna a tawh phah thei a, raipuar tih hriat reng tlu khawpa a su duh a nih chuan thil dang pawh a ti duh ngei ngei ang" ka nu chuan a ti a, a thin a rim bawk a ţawngkam pawh a duh tui vak lo. Ka nu hi keimah ang tho a nia, fiamthu a duhin a ţawng duh a, chutih rual chuan a thinrim tawp a thlen chuan khua a hmu tawh lo ţhin a, tu hmai eng mah a zah lo a, sawi hreh pawh a nei ngai lo. 

"Saii, na i nei em?" Pa Chhawna chuan a ti ta daih a, chhang lem lovin ka nu chu, "Ngati nge i lokal duh kher a? Nau ka chhiat em lo a, doctor in haw tura min tih hunah ka haw leh mai dawn alawm" ka ti a, ka pasal hrehawm ti hmel chu en pawh ka en duh tawh lo. 

"Ka lokal ang chu. Nicholas-an min lo biak khan in ka thleng ve chiah a, Liantei nen kan lo kal nghal a nih hi. Nangmah chauh chuan ka awm tir ngam tawh lo che" a ti leh tawh a, mitmeiin khap eng ang mah ila awmzia a nei thei lo. 

"Ka haw lawk anga ka lo kal lehnghal ang" ka pasalin a tih chuan kan en ţhap a, inchhungah boruak a siam dawn tih hrereng mah ila, "Aw va haw rawh..min ngaihtuah suh" ka ti a, ţawng ve sek pawh a peihawm loh. 

"Va haw rawh u...kan nufa in kan lo awm ang" ka nu pawh chuan a lo ti ve a, Pa Chhawna ho a an inzui chhuah hnuah ka pasal chuan ka sam a chul leh a, "Hrehawm i ti tiraw?" ka lo tih chuan tawi tein a nui a, ka kut chu la kangin a fawp pah zauh a. 

"I nute thinrimna kha a awm lutuk. Keipawh ka thin a rim a, ka chingfel vek ang. Khatiang thil kha a thleng nawn tawh lo ang. Ka haw ang a, i chunga hetiang thil ti tu hi chuan hremna a tuar ve tur a ni" a ti a, engtin chiah nge Faith-i chu a tih dawn hre lo mah ila ka lo bu nghat a, min su palh lo tih ka hria a, ka nute an lo kal tho bawk a, kan buaina ber chingfel tur chuan haw lawk mah se pawi ka ti lo. 

"Haw rawh...i lokal leh vat dawn nia, keipawh ka haw thei har nang, Hope kha ngaihven tel la, thil ţha lo deuh tih a lo tum leh ange" ka ti hram a, ka chalah duat deuhin min fawp a, Liantei lo luh rual chuan a ding a, "U Nico i haw dawn chuan haw tawh rawh. Inthlak la, i duh leh i lokal leh zawk dawn nia. Saii pawh a harh ţhat chuan awm rei a ngai kher lo ang. Mahse, hna i nei a, nitin chhuah i ngai bawk si a, ka nu sawi ang tak tak khan i tello a in in a amah chiaha a awm tur hi ka ngaihtuah zo vek tawh. Ngaihţha deuh a kan awm theih rih pawh ka ring lo. I veng reng thei dawn lo a, nau a pai a ni tih hre ran a hetiang thil a thleng thei a nih chuan hei aia nasa pawh hi a la thleng lo ang tih a sawi theih loh" ka nau chuan a ti ve duah a, min melh leh zawk ţhin a, tun ang hian a thutak ngai lo. 

"A thleng nawn tawh lo ang. Ka awm lai a thil thleng a nia, ni e, pawi ka ti khawp mai" ka pasal chuan a ti bah nawk a, a zam takzet tih pawh a hriat theih a ni. 

"Kan lo len ţuma an awmdan ka hmuh hnu kha chuan rilru nawm loh thut chang te ka nei ve ţhin a, ka pa lah hian mo nih chuan tawrhchhel a ngai a ti mai zel a, mahse unaute chu kan ngaihtuah lo thei lo a, aaaaa...nangmah hi ka khawngaih bawk si che a" ka nau pawh chuan a ti nawi niaih a, vawiin a thil thleng kha ka ngaihtuah let daih thung. 

Inhnuai ka thleng thla ţep tihah Faith-i ţawngkam avangin ka ding leh a, chak deuh a min kal pelh pahin min su chawrh a nih kha. Naute em chan lo mah ila thisen a chhuak a, na a awm bawk. Min sut dan kha ka ngaihtuah let ngial pawhin tih palh a ni thei lo. Ka tluk chu a ring em lo maithei a, thinrim a min su lui a ni thung. 

Ka pasal chhuah hnu lawkah ka nu pawh a lo lut veleh a, puan te min sin ţhat tirin, "Tun ţum chu ka thin a rim khawp mai. Mo fel leh ţha i nih theih nan kan fuih ve hram hram zel che a, i theihtawp i chhuah ve tih pawh kan hria. I mize hlui pawh i paih ve tial tial a, an mit tlun tuma theihtawp i chhuah laiin hetiang thil hi a thleng a, tihpalh an la ti tlat zui. I pa pawh ka hnial zel tawh ang, haw tir leh che a tum a nih pawhin ka phal tawh lo" a tih chuan, "Nu..chutiang em em" ka lo ti zuai raih a. 

"An ti lutuk mah mah alawm. Nicholas khan chhuanlam dang siam lovin thudik tak min hrilh hlauh zawk a, ni lo phei se chu tlu sual satliahah kan ngai che ang a, an bulah bawk kan awm tir leh dawn che a sin. Ka remti tawh lo reng reng, thi daih mah la pawi an ti tawp nang" a ti hlak hlak a, ka ţawng peih tawh lo chu mit ka chhing a, thil thleng te kha chiang deuhin a rawn inlar leh zut zut a, min ngaithei lo viau mah se hetiang thil hi ti lo tur an nia sin mawle. Ka pasal lah a ngawi mai mai dawn lo tih a hriat reng a, ka nu lah chuti bawk. Ka pasal nen a kan inţhen pawh pawi ti lo awm takin ţawngkam a nei deuh reng tawh a, a thinrim vang mai mai te pawh a ni mahna...engmah ka hrethiam tawh lo.

CONT..