HIS LAST LOVE-32

HIS LAST LOVE-32

"Eng emaw palh a awm takin zanin chu hetah kan riak dawn a nih chu" ka nu a chhuak leh zawk a, a rawn let leh hnua a thusawi chu chhang lem lovin ka bu zauh ringawt a, sawrkar angin private ah hi chuan an in chhuah tir ve nghal zung zung ngai lo bawk a mak ka ti hran lo. 

"I pa pawh a rawn kal maithei. Rawn kal lo tawp mah se a pawi lo. Thu dang te a rawn nei leh ang a, i chhungte awmdan hi keichuan ka en liam thei tawh lo, i haw tawh lovang" a ti ta hmak a, Liantei nen kan in melh vat a, ka nu luhlul zia ka hria a, a tih tawhah chuan a rilru thlak tir a har khawp mai. Ka pa fa ka ni lova, chuti chung chuan huaisen takin min pai tlang ngam a, hei ringawt pawh hian ka nu rilru len ve zia chu a ti lang chiang awm e. 

"Nu, tikhan ti ringawt lo la, U Nico pawh a khawngaihthlak a" Liantein a ti dek dek a, "A hma pawn Nico-a kan khawngaih avangin kan haw tir leh a, rei pawh a awm hman lo, hetiang thil hi a thleng lehnghal a, eng angah nge an in ngaih ni? I u hi an hmusit alawm...i pa Chhawna tih loh midang zawng hi chuan an duh lo vek a, a nau pai leh pai loh pawh an ngaihven lo, an hnena a awm reng chuan a nau pai hi an la tih hlum sak mai ang, an rapthlak tlang emai" a ti tan tan a, "Tunah tak phei chuan an inchhung boruak pawh a chhe dawn a, U Nico kha engmah ti lovin a awm mai mai dawn lo a, a thinrim hmel te kha ka hmuh hmaih hauh lo. Keini lehzelin buaina kan lo siam belh chuan hrehawm a ti lutuk ang" a tih leh pawh chuan, "Chhungkua an nia, an inhaw reng dawn lo. A nau thil tih hi en la, engmah ti lovin awm mai mai se chu a mak zawk ngawt ang chu. An nu hi a hmangaih lo chu ka ti lo, nitin a chhuak a, a chhungte an hrang si, Saii hi an hnenah ngaihngam takin ka dah ngam tawh lo. Inţhen rawh se, sum kan chhuah ang. A thin a rim a nih leh nupui dang nei mai rawh se" tih thlengin ka nu chuan a sawi a, lehlamah Chhandami a lo ni nen, Rita-i a tel bawk, ka rilru ringawt pawh chu ka chauh pui a, ka luak te a chhuak nghulh thei mai. 

"Kha, Hope a nih hi, chhang lawk rawh" ka nu'n a rawn tih chuan ka lo muhil lek lek tawh a, peih lo deuh a phone chu lain ka chhang a, "U Sai, ka lo mu nasa deuh a engmah ka hre ve lo a, eng nge i an tawh?" chau aw taka a rawn tih chuan, "Ka ţha e..min ngaihtuah suh" ka ti a, keipawh chu ka ţawng ring thei chuang lo. 

"Helam pawh kan buai nuai a, U Nico lah a thinrim a inhrosa vak vak a, Faith-i phei chu kut a thlak a, in aţanga chhuak turin a ti bawk a, an thawm ring lutukin min ti harh a, hei ka tho chhuak ve a" a tih lai chuan tukverh lam ka hawi a, khua a lo thim der tawh. 

"I ţha zel maw?" ka ti ta ringawt a, "Aw...ka harh ve zel a, midangin dang nasa viau lo se chu kut a thlak na khawpin ka ring. Enteh U Sai, tun ang em em a U Nico-a thinrim hi ka la hmu ngai lo, chhungkua kan nia, kan cheng ho a, a ngaihdan a nih loh tawpah pawh hetiang hian a awm ngai lo. Chhia leh ţha hre lo lek a che buan buan a ang ber a, tunah pawh an la ri luih luih mai, kan kal hnai ang aw" a ti a, a rik rawk rawk hnuah ka pasalin a chhungte a vau khur khur ri chu chiang lo ruaiin ka hria a, Nu Hlimi pawh a au ring khawp mai. "A zahthlak" ti a pa Chhawnan a lo khap ri thlengin ka hria a, "Hrep cheu hian, nangni ho hian zahna leh buaina bak min thlen lo. Henu hi in chhuah tir lo a nih chuan kei hi min dang tawh suh u" tiin a chhungte chu a vin vak vak a, Faith-i kut a thlak pawh chu mak ka ti em em lo, i insiamţhat loh chuan hmeichhia i nihna hi ka theihnghilh mai ang tiin a lo vau lawk tawh a, naute chan thut thei dinhmun a min dintir tu a ni bawk a, a thinrim chuan khua a hmu tawh lo a ni ber ang. 

"Chair a chhir bur a a lo chhuak daih" thawm nasa tak karah Hope chuan a lo ti leh a, ngaihthlak zawm duh lovin ka off ka ta daih a, damdawiin a luh ngai khawpin min siam a, ka pasal ber hi thinrim lo se chu a mak zawk ngawt ang chu. 

"An buai tihna a ni em? Hope meuhin a lo biak che chuan thil thleng a awm aniang a" ka nauin a lo tih chuan, "A thin a rim ve rih a nih kha, a reh leh mai ang" ka ti ve tak nain ka ngaihtuah ru khawp mai. Helamah ka nu a thin a rim a, ka pasal awmdan avangin in lamah Nu Hlimi a lo thinrim ve thung ang a, a fanu duat lutuk Faith-i kut a thlak phei chuan keimah vang vekah an ngai leh ngei ang. 

Ka awmna a rawn thlen leh chuan, "Eng nge i an? I zia deuh tawh em?" a rawn ti lut a, khum bulah chuan ţhu lehnghalin ka kut a vuan a, amah pawh chu a pawr deuh fapin ka hmu a, khawngaih viau mah ila kap tu ka nei a, thawk a ipik hluah hluah reng a, min enkawl ţhain min ngaihtuah hlawm viau mah se keimah ber hian ngaihtuahna fim pawh ka hmang hlei thei lo. 

"In pa a lo thlen tawh chuan Liantei nen thil kan va ei lawk ang. I pa pawh biak a ngai a, tikhan lo awm rawh u kan rei lo ang" ka nu'n a lo ti vat a, an chhuak zui nghal a. 

"I nu khan kan in lama haw leh a phal tawh lo em ni?" zawi te tak tak hian a phun sup a, ka sam chul pahin min en vang vang a, "Aw..a phal chiah lo" ka tih chuan a hlauthawng aniang a mitmeng chu a buai nghal nak a, a chhungte thunun kawngah hian Nicholas hi a nep hauh lo, a chhungte zawk hi an chapo a, min ngaithei lo a, thunun an har ve bawk em a ni. 

"Eng nge i ngaihdan? Kan indang daih mai dawn mi?" a ti leh tawh a, "Kan indan hmain ka rin leh hmasak phawt che a ngai" ka lo ti ve thung. 

"Min ring lo maw?" a ti a, a awki pawh tlemin a ring deuh tawh a, ka thusawi chuan a ţhawng tih a hriat reng mai. 

"Chhandami nen in inhmu ngai em?" ka tih chuan a mitmeng a danglam zawk a, rei a ni lo thung a, a insiamţha leh vat a, "In inphur an hmu ţhin cheu a, a veh a veh tu cheu an awm aniang, mi kâ aţangin ka lo hre ve leh a, i hmangaih ţhin zia ka hre bawk a, rilru a kap reng mai" ka lo ti leh a, Chhandami khan dawt min hrilh a nih chuan mak ka ti viau ang. 

"A pasalin a ze ngai a chhuah leh tawh a, intih thawven ka duh a tia, ka hruai chhuak ţhin" tiin zep nei lovin min hrilh tlang a, ka lo thaw hak a, ţawng ţha peih tawh ila chu zawhna ka ngah leh khawp ang. 

"Chhandami ka bia a, kan inhmu ngai lo a ti ve sia" ka tih chuan, "A pasal nen an buaina a nia, a hrilh duh lo che aniang" a ti mai a, hlauthawng hmel pawh a pu chuang lo a, Chhandami a hmu zeuh zeuh chu thil sualah a ngai lo pawh a ni maithei, 

"A pasal nen an buai naah chuan i inrawlh ve tihna mi?" ka ti a, Rita-in a sawi khan ka awih chiah lo a, Biaktei hming a sawi tel takah kha chuan awih na chin ka nei leh a, tunah amah ngei pawn a sawi a, min hrilh hre ve miah lova a ruk a rala a lo hmu chuan lung a ti awi bik chiah lo.

"Inrawlh lo, chhuah thawven a duh a, ka hruai chhuak a, chuzawng chu" a ti a, thil lianthamah a ngai lo a ni phawt mai.

"Engmah min hrilh ve lo a, i nupui ka nia, Chhandami nen in chungchang thui deuh ka hre bawk a, mi te pawh rawn ve tur che a nia" ka tih chuan, "Pawi i tih ka ring chiah lo a" a ti ban charh a, a chang chuan a ngaihsam lutuk hi ka ngei ngawih ngawih ţhin. 

"I la ngaihsak hle a nih dawn chu" ka tih chuan, "Ţhian ang chauhin a ni tawh" a lo ti ve zat a, ka sawi ţeuh chak viau nain ka ţawng peih tawh lo. Ka kut a vawn pawh chuan ka lo ţang ţung bik lo a, ţhian ang chauhin tih ringawt a insawifiah hi ka duh khawp lo a, nidangah ka sawi leh mai ang ti rilru in thinrim lo ang maiin ka awm a, an inkarah engmah a awm tawh loh phei chuan Chhandami pawhin min hrilh tlang vek law law se a dik ni mai tur. 

Damdawiin aţanga ka chhuah dawn ni chuan an buai nuaih a, Pa Chhawna leh ka pasal te remti lo chung ka nu chuan kan in lamah min hruai haw lui a, ka pa a lo lang ve hauh lo a, boruak hi engti zawngin nge a inher zel dawn ka hre tawh bik lo. Kei lah Chhandami vangin ka lungawi lo ve sa deuh bawk nen i he lovin ka nu chu ka zui haw a, dawih dui lo chi leh chhel ve tak mah ni ila ka pasalte in lama ka haw chuan hlau reng rengin hun ka hmang dawn a, in veng rengin ka awm a, a thlamuanthlak dawn lo emai. Chu ai chuan hahdam taka ka awm theihna kan in lam pan mai chu ka remti ve ta a ni. Ka pasal lah hian an chhungkaw thuruk hi a la hre ve hauh lo a, an fa a ni ve miah lo chunga duat taka amah enkawl tuah a ngai a, fahrah tur kha nu leh pa pein lehkhathiam, chhawr tlakah an chhuah niah a ngai a, an ngaihdan ţawmpui diak diak lo mah se a zah a, a chunga an ţhatna rulh let ve chu a tih turah a ngai a, Pa Chhawna bik phei chu a hnial khat khawp mai. 

In kan thleng chu Zikpuiin min lo dawng sawng a, ka pasal lah chuan min zui ve zel a, khawngaih viau mah ila awm hran rih ka duh tlat a ni. Ka pa thu angin pasal ka nei a, inţhen thu hlaah chuan thu a nei tawh lo, ka duh angin ka kal ve thei tawh turah ka ngai. 

"Nicholas, khawngaih viau che mah ila ngaihngam deuhin in in lamah kan awm tir thei tawh bik lo. In inneih dawn pawh khan rem kan ti chiah lo a, mahse ka pa kan hnial ngam lo a, tunah chuan ka nu duhdan kan ţawmpui avangin ka nu lam kan ţang vek tawh a, Saii lah i nau ngeiin a su tlu a, nau chhiat maithei dinhmunah hial a din tir a, ka pa pawhin a sawi buai thei lo ang. Ka nu leh pate hian retheih hre miah lovin min enkawl ve tho a, chuti chung chuan in chhungkua hi chu kan phu lo che u a ni e. I nu leh i unauten in inneih an lo remti ngai miah lo tih chu hria ila ka pa hi ka hnial char char ang. In chhungkuain in remti tlang emaw kan ti vek a, chuvanga remti ve mai chu kan ni. Saii hian mi ţha tak nei se kan tih vang a ni bawk a, kan beisei a san tehreng nen buaina kan tawk mawlh mawlh zawk a nih hi" Zikpuii chuan a ti a, ţhutthlengah min ţhut tir a, ka nghen turin lukham dup a dah thuah ţeuh bawk a, ka pa erawh ka la hmu ta chuang lo. 

"A thleng nawn tawh lo ang. Ka nupui a nia, a chunga thil ţha lo a thlen ka duh bik lo" a tih chuan, "I veng seng chuang hleinem. In hnathawh hun a inang lo a, Saii lah chawhma leh chawhnu a duty chhawk zak zak a, i awm loh hlanin tun a thil thleng aia pawi zawk hi a thleng leh thei. Min hmusit ngawih ngawih tu te hi engahmah kan ngai bik hleinem. Kan pa te ve ve hian lo inneih tir lo tawp che u sela ţha tur. Sawi rem chawp a innei ve siah chuan buaina ngah ber in ni hial ang. I nuten in inneih an remti lo tih chu hria ila keini pawn kan remti bik lo ang" a ti nawn leh a, a aw te chu a ngainatawm hlawl loh. 

Zikpuii pawh chhang let tawh lo chuan ka ke chu a chawi kang a, a malchungah a dah a, "Pawi tur zawng zawng chu a pawi vek tawh a, inthiam lo kher duh suh. I thiam loh a ni lo bawk a, mahse Saii hi lo haw kan phal tawh rih lo" Zikpuiin a tih leh te chuan ka ke lamah chuan a ţhu ngawi ngul a, a inngaihtuah ding hmelin amah chu a ngui vek a, ka nu'n min thlem nasa bawk a khawngaih loh ka tum ve ţang ţang a, a har khawp mai. 

A phone lah chu a ri reng a, a chhungte mangangin lo biak an tum reng a nih ka ring ve tawp a, zawm zata a rik takah chuan a switch off ta ringawt a, mahni in en let aia midang dem ching an ni bawk a, ka chhungten an tih dan hi hria se chuan an ngaihdan a ni lo leh khawp ang. 

A haw dawnah chuan, "Naktukah ka lokal leh ang" a ti thlap a, a beidawng mai mai dawn lo tih hriain keipawh ka ngaih a ţha a, Chhandami nen an chungchang pawh ka la zawt leh ta lo a, ka chhungte awm ve loh hunah ka la zawt leh tho ang. 

Ka pa lo haw chu a thin a rim khawp mai, Pa Chhawna nen an inbe tawh a nih ka ring a, ka chhungte chuan min ţhut bial laih a, ka pa'n, "Pasal nei a ni tawh a, pawh ţhen ţalh a ţul lo. Chhawna pawhin ngaihdam min dil a, Nicholas pawn an thiam loh a nih thu a sawi mawlh mawlh reng a, pasal neih hi thil nuam a ni reng reng hleinem, awm nawm tir in tum lutuk aniang chu" a tih chuan, "Kan en liam rei tawh bawk alawm. Saii hi a vui ngai hauh lo va, hrehawm a tih thu a sawi ngai lo nachungin a hmelah a lang vek zel tho. An in a kan va len ţum lahin a nuin meinei deuh deuhin min lo ţawng khum a, a zak map lo lehnghal. Chuti chung chuan kan ngawi zel a, Saii zawk kan hau a, tuar rih turin kan hrilh chamchi a, kan ngawi thei lutuk a ngaiah min nei tawh a nih hi. Duh leh anmahni ang bawka hausa neih tir se la, hetiang mai mai a intih hi ka duh lo. I fanu chungah thil pawi lutuk a thleng lo chauh a nih hi" ka nu'n a lo ti hlak hlak a, ka pa meuh pawh a zah zo tawh lo a nih chuan a thin a rim takzet tihna a ni mai. 

"Inţhen chiah se chu Saii hi a chan chhe zawk tur a ni. Nicholas chuan nupui ţha deuh a hmu leh mai ang, Saii erawh chuan Nicholas anga ţha a hmu tawh lo ang. Nuthlawi fa nei tawh phei chu tuman mo atan an duh lo ang" pakhatin a lo ti veleh a, boruak a rit leh tawh khawp mai. 

"An duh loh leh kan hnenah a awm char char anga a ni mai lawm. I thiam loh vek a nih hi, an khawsa thei a, hna ţha deuh a nei bawk a, a nuam sa ber ang i ti ţuah hum reng a, han hnial hlek che ila chhungkaw pa ber ka nih hi i ti leh a, i mit a sang lutuk a, i fanuin a tuar a nih hi. A farnu naupangtein hetiang hian a siam a nia, min hmuhsit zia chu a hriat mai alawm. Ngaihdam pawh min rawn dil se ka ngaidam mai mai dawn lo, anni angin hausa ve lo mah ila an duh duh a tih kawi theih kan ni bik lo. Hlutna kan nei a, Saii hian hlutna a nei a, chu chu hre ve rawh se" ka nu bawk chuan a ti leh duah a, "Chhungkua chu innghir ngho chang a awm ngai. Saii pawh haw leh rawh se. Nangpawh inrawlh lutuk lo la, Chhawna nen kan inbia a, a fanu pawh a inthiam lo lutuk a tih kha. Ka tlan thla a, ka lehpelh dawn lai tak khan a dinna a lo sawn a, ka ding hman tawh lo khan ka su palh a a ti e a tia, tihpalh thil a lo inrawlh vak chu a tih chi loh. Chhawna pawhin hrehawm a tia, a awm rei ve deuh tawh bawk nen Saii pawh hi a ngaina ve tawh a" a lo ti dam thlap a, ka nu rilru hneh a tum nasa niin a lang.

"Saii berin min su palh lo a tia, chu chu ka ring zawk. A sut hma khan an inhnial deuh a, a thinrimin na deuhin a su a, Saii a tluk phah a nih kha. Naute phei chuan tawrh phah se tun ai hian ka nasa zawk ang. Nicholas ngawr ngawr chu sawiselna hre lo mah ila saw inah sawn Saii hi a let tawh lovang. An nu hi a hmangaih tak tak a nih chuan indan pui mai rawh se" a ti hmak a, "Ka thu ang chuan ti rawh u. Midang ngaidam thei lo khawpa fel kan nih loh hi. Let rawh se ka tih chuan min hnial lovin let se a ni mai. Lo sawi buai ve sek suh" ka pa pawh chuan thinrim takin a ti a, ka nu chu hlauthawng takin ka en a, lung ţha lo, enkawl reng ngai a nih avangin ka ngaihtuah deuh a, hlau hmel a lo pu lo hlauh a, ka thaw huai mai. Chhandami phei chu sawi tel ila bungrua an la nghal rum rum duh ang chu tih theih khawpin ka nu leh ka unaute hi an thin a rim a ni. 

"Keipawn ka phal tawh lo. Pa, kan remti lo chung a pasal neih tir i tum pawh khan an fel a, a nawmsakna tur zawk i tih bur avangin kan hnial lui duh lo che a, tun ţum chu nangpawhin min hnial bik suh. Saii mona te hi ka rap hluah hluah, ka huat deuh hian nau pai se Faith-in Saii chunga a tih ang hian ka ti ve lo ang. Ngaihdam dil thuah pawh Pa Chhawna leh Nicholas te chauhin ngaihdam min dil a, midangin ngaihdam an dil chuang hleinem. I haw luih tir a nih chuan ka haw ngawt ang che" Zikpuii chuan a lo ti a, inchhunga buaina a awm hlek a inrawlh nghal ţhin si tun ţum chu ka ngawi tlat a, Chhandami avangin ka pasal chungah pawh ka lawm chuang lo. 

"Saii, eng nge i ngaihdan?" ti a ka pa'n min zawh chuan ka nu ka melh vat a, min fuih nasa a, i haw lehnghal mai chuan an zuam sawt che ang a, i nem lehnghal mai chuan an tello a awm thei loah an ngai che ang a, an hmusit lehzual sawt ang che tih thlengin ka pa hriat loh turin damdawiinah khan a sawi a, ka nu pawh chuan awmze nei deuhin min lo melh let ve a, ka pa bulah chuan, "Hetah ka awm rih duh" ka ti ta nge nge a. 

"I chiang maw? I pasal tello in hetah i awm thei tak tak ang maw?" a lo tih leh chuan, "Aw...ka hlau alawm. Ka hlau reng tawh dawn bawk a, bakah Nu Hlimi phei chuan Faith-i a ţan tlat tho a, keimah bawk min mawh puh leh ang a, Hope-i chungchangah lah keimah vek min puh a, inţhen chu ka ti chuang lo, kan inneihna a la rei lo a, inţhen chu ka tan pawh a zahthlak a, mahse heta awm rih ka duh" ka ti a, ka nu chuan, "Ka phal hma chu i haw lo ang. Sum chhuah mai a nia ka duh" a lo ti ve bawk a, ka pa lah han thinrim viau dawn se tun ţum chu ka thiam loh a ni lo ve tlat a, ka nu ţanna lah hnial kalh tur lai a hre chiah bawk si lo, ka nu leh ka unaute an an hlaih hlaih lai te chuan a lo hui leh pap zel a, phone a hmang deuh reng bawk. 

Kan in a ni hnih ka awm hnuah Chhandamin min lo bia a, "Chanchin ka hre ve chiah a, eng nge i an tawh a?" a rawn tih chuan, "Kan in lamah zawk ka awm tih pawh i hria ang a, i lawm ngawt ang chu tiraw?" ka lo ti a, a ngawi chiang khawp mai. Nicholas hnena ka sawi lahin kan inkarah engmah a awm lo a tia, a rilru a hah a, ka hruai harh a ti thul, an lo zep vel leh ka rin em em laia Chhandamin dawt min hrilh kha ka haw hlur mai. 

Ka ngawih tak rengah chuan amah bawkin, "Eng nge awmzia ni a?" a rawn ti leh a, "I rilru a hah a nih pawhin ţha deuhin min hrilh la, ka ring che a, ka pasal nen inzui nileng mah ula ngaihţha deuhin ka awm ang chu. Midang ka aţangin in inphur chhuak ţhin tih ka hria a, ka zawh che lahin kan inhmu ngai lo i ti daih bawk si. Pasal i nei tawh a, a ruk a ral a kan pasalten hmeichhe dang an hmuh chuan tupawh nise a ngaihţhatthlak ngai loh tih te pawh i hre vek ang chu. I pasal zia min hrilh thawi tawh a, ţha deuhin sawi la chu ka hrethiam em em ang che" ka ti duah a, ka thin a rim thar leh a, ka thinphu rang lutuk te chu a chhan pawh ka hre bik lo, ka hlauhthawn vang aniang. 

"Ka pasal hian ngaihzawng a neiin ka hria a, an veng hming thlengin keipawh miin min hrilh ve vek a, min ngaihven pui lawk rawh ka ti a nih kha. Ka ipik lutuk a, chhuak harh mai mai ila ka ti bawk a, hmanni a min rawn zawh khan ka sawi ngam lo a, buaina in nei tih ka hre thawi bawk si a, thil ţha lo engmah kan ti lo" a ti zung zung a, ka lo nui hul hak ringawt a, sawi tur pawh ka hre tawh lo. 

"Buaina ka neih chuan Nicholas lo chu biak tur ka hre lo a, min pui thei ber a ni bawk a, kan inzawmna ngheh zia pawh zep loin ka hrilh vek tawh che kha" a tih chuan ka thin a rim thut a, "Chuti si engati nge i neih mai loh? I lo mamawh viau a nih pawhin mi pasal a ni tawh a, kan innel tawh tho a, min hrilh hre ve la chu lungawi lohna ka nei miah lo ang" ka ti a, a ruka thil a tih avang hian ka pasal a la beisei ve te pawh a ang a, ka ring em zawk a, chuti ni lo se chu ka rilru a na ve viau ang. 

"Ka neih loh chhan chu ka sawi vek tawh kha. Chuti taka i phal lo a nih chuan i pasal chu ka lo be tawh lo ang" a ti ve ngat a, engmah lah hi an hrethiam duh hlawm mang si lo a. 

"Inbe lo tawp rawh u ka ti lo. I pasal kha hmeichhia nen i hriat lohin inphur chhuak reng se i rilru a nuam bik lo ang. Inţhianţha deuh pawh lo nise ngaihţha deuh a awm veng veng na chi a ni lo alawm. In chhuah dun chhan lah tunah i sawi leh vek tho sia, a tirah khan sawi la chu in chhuahchhal kher pawh a ngai dawn lo a, buaina a tam tawh sa nen, ka hah vek tawh" ka tih rual chuan phone a dah a, ka sawi duh ang pawh ka sawi zo hman lo. Ka ţawngkam a ngeiawm ve tho tih hre mah ila phone a ti tawp daih chu ka ngei angreng. 

Ka pasal pawh tlaiah a lokal a, "Ei chak i nei em? I neih chuan ka va lei leh ang. Phone i la thei lo a" a ti nghal zung zung a, ka nu a lo thleng ve chiah bawk. 

"Nei hran lo...zingah ka nu nen kan lei a" ka tih chuan muangchangin lu a lo bu a, ţhutthleng awl laiah a ţhu a, a bulah ka ţhu ve tak nain nidang angin kan inpawh lem lo, kan inhlat deuh dui hi a chhan ka hre bik chiah lo a, ka chunga thil thleng chu thuhran, Chhandami nen an chanchin ka hriat vang a nih ka ring ber. 

"Chhandami nen in chhuah dun ţhin kha ngati nge min hrilh ngai miah loh a?" ka tih chuan, "Engahmah i ngai tawh loin ka hria a, hrilh lo chein ngaihţha deuhin ka chhuah pui. Ti ti pahin kan tlan kual a, chuzawng chu. Aa..a ti ti ka ngaithla a ni zawk mah" a ti leh tawh a, an inkawmngeih a, an inhmangaih bawk a, nupui/pasal, fa hial pawh nei se an inhlat tak tak thei lo ang. Fa pahnih lai a nei tawh chung pawhin Chhandami pawn harsatna a tawh hlekin a be hmasaber zel chu a nia, mi pasal a ni tawh a tih pawh a awm lo, a inzah loh thlak ve deuh chu ka ti. 

"Nupui i nei tawh a, i ţhian pawh nise i nupui mitmei i veng ve tur a nia. Mi hi an ţawngthei a, Rita-i lahin a vehin a veh che a, midang hnen aţangin ka hre ve leh tho si. Ka ţhian a nih hi tiin mipa dang chhuahpui sek ila i lawm dawn bik em ni?" ka tih chuan, "Thil kal tawh a nih kha, sawi tawh suh" a ti hmuk a, ka ngei kher mai. 

"Thil kal tawh pawh nise helama ka awm lai a thleng tho a nia, Chhandami nen a in inzawmna hre ve vek chung chuan thinrim loh har deuh a sin. Ani pawh chuan nang lo biak tur a nei miah lo em ni? Mapuia vanga rilru hrehawm deuhin helamah ka awm a, nang lahin engmah pawh min hrilh loin Chhandami i lo chhuahpui a" vin zet hian ka ti a, ka nu chu an pindanah a awm daih a, a hre pha kher lo ang. 

"Chhandami lo buaina dang pawh a fel hleihtheih loh laiin Chhandami i ti sek ringawt mai. Engmah a awm tawh lo ka tia ka hrilh chian tawh che kha. Min rin theih loh leh i thu ni rawh se" a ti hmuk a, chauh hmel zet hian ţhutthleng nghenchhan chu a ngheng hnawk a, ţhutthleng banah a kiu nghatin a chal a hmet zui a, keipawh ka ngawi ran mai. 

Rei tawk fang kan ngawih dun hnu chuan, "Zanah ka lokal ang" tih leh thawh a rual a, "Lokal a ngai lo ang" ka tih chuan min rawn en nghal vut a, dak meuha amah en ve ran chung hian, "Lo kal duh suh. Ka hmu peih rih lo che" ka ti nawn leh a, a thaw ri hawk a, kan awmdan mek chu a nin hmel takzet a ni. 

"Eng nge i thinrim chhan? Faith-i nge Chhandami?" bul zet a a tih chuan, "A ni ve ve. Rilru mumal pawh ka put theih loh laiin Chhandami thlavang i hauh ţung reng a, kan thiam lo a nih chu ti a min hrilhfiah in tum lo ve ve bawk. Chhandami pawh ka ngainat ve tawh tehreng nen thil awmdan ka sawiin thinrim zawkah a ţang a, Faith-i lah chuti bawk, amah vangin naute nunna derthawngah a awm a, ka ning vel vek che u" ka ti ta chiam a, a ruka an lo inhmu leh Rita-i berkher hnen aţanga thudik ka hria kha ka haw ta ber niin ka hria. 

"Zanah ka lokal ang" a tih nawn leh chuan, "A ngai lo ka tih chu" a hma aia vin zawk hian ka lo ti leh a, "Aw..ka hmu tawh lo ang. A ţha em? Pitar pawh nise i huat zel dawn chuan hmeichhia hrim hrim ka hmu tawh lo ang" ngeiawm zet hian a ti a, "I haw lo bik dawn mi? I huat dawn loh phawt te chuan a ruka mipa hmuh tur chu ka ngah ve tho alawm. Mipa tam tak hian min phurh chhuah an chak ve tho tih hria la, rai puar pawh hnar lo tawk an awm zel a nia" elsen zet a ka tih chuan a kut a phar chhuak uaih a, min beng dawn emaw tiin keipawh ka lo thle vat a, engmah a thleng lo thung. 

"I ţawngkam kha fimkhur tawh ang che" sehchilh zet hian a ti a, ka chhan leh hmain a chhuak nghal daih bawk. 

Ka nu nen rawng kan bawl laiin ka phone a ri a, nu Hlimi a nih avangin, "Ngheti a nih hi" ring deuh a ka tih hnuah phone chu ka chhuahpui a, ka lak zet hnuah inchung chhohna kailawnah ka ţhu a, ka hello ve ta chauh a. 

"Nico-a hnenah eng nge i lo sawi leh tawh a? Inchhung a lo luh phat aţangin thinrimna a zawng nghal a, kan in ngaidam tawh tawh a ni lawm ni? I awm lo chung pawhin engati nge i pasal hi a kawi zawnga i la fuih reng a? Boruak ţha lo hi Hope hian a la zo lo tih pawh i hre reng awm si a, Faith pawh a zia chho ve zel a, thlamuang leh inrem tlang deuhin kan awm ve tawh ang chu tih nak laiin i pasal i lo fuih pawrh leh a, i eng pawi nge kan sawi a heti taka min huat a? Naute i chan em lo a, nangmah mai bakah i chhungte hnenah ngaihdam kan dil mawlh mawlh reng bawk a, lo haw rawh se engmah a thleng tawh lo ang kan tih pawhin a phal lo tu zawk chu i nute an nia, kan tih theih ang ang kan ti vek chung pawhin nang chuan huatna i lo la pai ran a, hla deuh a awm chung pawhin kan inchhungah buaina i thlen tho a nih hi" a rawn ti tan tan a, a duhthaw khawp mai. 

"Ka pasal hnenah khan in chungchang engmah ka sawi lo" ka tih pawhin, "I sawi aniang chu, sawi lo la inchhungah buaina a awm tawp nang. Faith-i hi kan fanu a ni a, hmanni a thil thleng kha tihpalh liau liau a ni bawk. I pasal hnenah hian engthil pawh sawi la, kar reng pawh nila he in aţang hian kan hnawtchhuak lo ang. I ngaihtheih loh leh ti khan i awm reng dawn nia" min rawn tih chuan mak ka ti ngei mai. Chhungkaw inrawn tlang lo a mi pakhat chauh thu a kal chu a lo ţha lo takzet a nih hi. Nu Hlimi te thu hnialin Pa Chhawna hian ka pasal nen hian min inneih luih tir lo se chu heng buaina zawng zawng hi kan tawk hauh lo ang. 

"Aw...ka lo awm reng dawn nia" ka tih chuan, "Awm reng rawh...pawi kan ti reng reng lo. Ţhat chhuah kan tum pawhin i lo haw duh lo tlat a, ngaihdam dil lahin awmzia a nei lo. Mihring hian dawhtheih chin kan nei vek a, kan thlem dem dem tawh lo ang che. I lo haw leh haw loh chu i thu thu ni rawh se. Koh haw luih tlat che kan tum bik tawh lo ang. I pasal hi a lokal leh a nih pawhin inchhunga buaina siam tur zawng chuan lo fuih pawrh tawh suh" tih leh phone dah a rual a, ka thinrim lutuk chu hul deuh hian ka nui tawp a, an rilru chhiat dan em em hi a awihawm loh zawk. 

Choka a ka luh leh chuan, "Ţhu hahdam tawp rih rawh ka tih kha, Ngheti chuan eng nge a lo sawi a? Chaw te lo ei ve sela" ka nu'n a lo ti zung zung a. 

"A sawi ţeuh mai" ka ti ringawt a, a thil chan lai ngawt chu en pahin, "Ka pasal nen a indan hi phal lo tlat ta se engtin nge ka tih ang le? Ka ţhen hlen daih mai dawn mi?" ka tih leh chuan, "I ngai lo em ni? A lokal ziah sia, a ngai viau ang kan lo ti mai a sin" a lo ti a. 

"Ngaih chang chu a awm a, a changin ka haw bawk a, mahse hetiang a nih reng chuan kan innei hlen chuang lo ang. Fa neih duah hnua inţhen leh kha a hlauhawm zawk a, min indan pui loh chuan ngai viau mah ila ţhen daih duh chang ka nei ve ziah tawh. Ka pa hian inţhen a phal angem le?" thutak deuh hian ka ti a.

CONT..