HIS LAST LOVE-33

HIS LAST LOVE-33

"I pa hi chuan engtikahmah inţhen hlen a remti lovang. A insawi dan takah Nicholas hi a naupanlai aţanga a hriatchian a nia, ngainatna riau a nei tlat a, a chhungte chu engtin pawn awm se tuar thei turah a ngai che a, a ring tawk che a nih ber chu. Chubakah nau i lo pai hman si a, hei vang pawh hian inţhen hlen a phal dawn lo" ka nu chuan a ti a, ngawi rengin thlai hnah chu ka kheuh neuh neuh a, rilru a kal thui viau thung. 

"Nau i pai hman tih mai mai, anmahni vangin naute ka chan ţep zawk a nih kha. Nu Hlimi lahin engkim hre vek chungin min ti na tu thlavang a la hauh zawk a, diktak chuan thinrim changa an buan buan te, pasalte nu leh pa chhan let pung pung te hi mo tan chuan a mawi chiah lo ka tih avangin ngawih ka chuh hram hram zel a, ka insum nasa thei lutuk hi ka puak keh lo chauh zel. Min tihdan ang hian ti let ve zel ila thiam loh ka chang leh daih dawn a, miin keimah min dem vek ang. Thui deuh ka ngaihtuah ve tho a, chuvanga ngawih chuh ţhin chu ka ni. Ţhat ka chhuah lui hram hram a, tih lawm tum ve mah ila ka thil tih leh keimah hrim hrim hian an lawmna ka thlen sak thei ngai lo, inchhung ka lut chiah hi a hnîm nghal ruih zelin ka hria a, a hrehawm vel vek a ni ber mai" ka tih chuan, "Tunah tut tut chuab keimah hian haw ka phal rih lo. I pasal i ngai a, let leh i duh a nih pawhin ka phal rih chuang lo. I pa pawh ka hnial ang a, min nawr lui thei bik lo ang. Ka phal lo chung chu i haw dawn lo a ni tawp mai" a lo ti chang fak a, thil ka sawipui ţhin ber Hope lah tunah chuan a laktlak rih si loh a, an veng deuh tawp ang a ni ber a, ka pa'n pasal min lo neih tir kher kher hi a pawi ta ber mai. 

"Engkim hi ka hne vel vek mai, taksa leh rilru zawng zawng thlengin a chau a, ka pa hian min haw luih tir leh a nih chuan ka ngawi mai mai tawh bik lo a, indan chu lo phal lo ta tehreng pawh nise ka ngawi mai mai tawh dawn bik lo. A hman hmanin min lo dem vel mai mai teh se. Inţhen chungchang chu ka sawipui tho ang a, aaaa....ka mumallo zo vek tawh a nih hi" ka tih chuan ka nu chu a lo nui a, "I pa mitmei veng duh suh. In inţhen hlen dawn lo anih pawhin ka thuin i duh chen chen kan bulah i awm dawn nia" a ti a, Nicholas ka ngaihtuah a, khawngaihna chin nei ve mah ila a ngaih a sam leh lutuk hi ka haw hlur mai. Kan inkarah engmah a awm tawh lo tih vang maiin Chhandami a phur chhuak fo a, min hrilh hriat ve a harsat loh tehreng nen, an inhmangaih tawn zia hre tu tan chuan ngaihţha deuha lo en liam mai har deuh a sin. 

A insawi ang tak takin zanah a lokal leh a, ngawi rengin kan ţhu dun a, ka nu leh pate lah ţhenawmnu damlo kanin an chhuak daih a, Liantein lehkha a zir a, Zikpuiin kan bulah tv a en thung. 

"Nico, eng nge in inlam boruak?" Zikpuiin a tih chuan, "A ngai, a ţha lo" a ti liam puat a, a mitmeng dul ruih leh a sam pawr deuh fap te ka hmuh chuan ka khawngaih ve reng a, ka ti lang duh hauh lo thung. 

"Indang daih mai ula, hna in nei ve ve a, mi in pawh luah ula in awm thei dawn lutuk tho alawm" ka u in a tih leh chuan, "Rem lohna a awm a" inthlahrun hmel tak hian a ti a, "Eng nge a rem lohna chu?" ka lo ti ve vat mai. 

"Nakinah" tih chiahin min chhang a, "Anthony a awm tho a, nupui ţha deuh, i nu leh Faith-i te duhthusam ngei nei se la, in inpui saw chu an luah lum mai dawn alawm. Ka nau ve hi chu a engkim hian i nute pawi a sawi a, engtikahmah an pawm thei chuang lo ang. In buai nitin ang a, siamţhat tum viau mah ula an haw tial tial tho ang" ka u bawk chuan a ti leh a, a ngaihdan a nih tawh loh chinah chuan thu han khuh mawi te, han zep vak te hi a nei ve ngai lo a, a nihna ang tawpin a sawi a, a ngaihdan sawi chhuah phawng phawng a hreh tawh ngai lo. 

"I pa nen in sawidun ngai em?" Zikpuiin a tih leh chuan, "Aw..ka hre vek tawh" a ti sup a, phawk deuha ka lo en lai chuan ka mitah tak min rawn en vein, "Engkim" a ti leh sup a, a pawr deuh fap reng ka ti reng a, Pa Chhawnan engkim a lo hrilh tawh a nih chuan a tan pawh dawnsawn dan thiam a har ve viau ang. 

"Lo inkawm rawh u" tih leh ka u chuan tv off a rual a, a tho nghal nalh bawk a, "Nakin deuhah Liantein thingpui a rawn lum mai ang. Keichu thingpui ka ngaina ve vak lo a, i inchak tawh chuan in nu kha lo lum tir rawh. Paper check tur ka nei a, ka kalsan lawk ang che u" a ti zung zung a, kan chhan hma hauhin kailawn lam a pan a, a tlan chho ri ţuk ţuk a, ka u ber awm tawh lo mah se kan boruak chu a zang huai chuang lo. 

"Faith-in a be duh che" ka u thawm a reh ruala a tih leh phei chuan phawk lehzualin ka en a, ka beisei loh zawng hlirin thil a thleng mai. 

"Eng chungchangah nge min biak duh a?" ka ti ram hmak a, a kekawr ipte aţanga phone phawrh pah hian, "Ngaihdam dil che a duh" tih ringawtin min chhang leh a, ka awih lo lutuk chu ka nui chhuak lek lek a ni. 

"Thil chi hrang hrang i lo keng lut mai. Chhandami nen in chungchang pawh kan la sawifel lo a" ka tih chuan, "Buai lohna turah buai teivet suh. Engmah a awm tawh lo ka tih tawh kha" a lo ti leh hlur tawh a, Chhandami hming ka lam ve hian a lawm lo ringawt zel niin ka hria. 

"Ka buai ve bawk ang chu. Chhandami ka biak lahin ţha te te a inhrilhfiah a awm lo, ka ţawng laklawh laiin phone a ti tawp hmak a, nang lah hi i ngaih a sam ropui si" ka tih lai chuan a lo ţhen suk a, "Nui suh" vin zet a ka tih rualin a tum leh hmuk a, khawlah min ngai ni berin ka hria. 

"Khawlah min ngai tiraw? Robot ah min ngaiin ka hria, che thei, min control tu thu thu a awm, rilru na thei miah lo ah min ngai tiraw?" ka tih kha kha lai chuan, "A tawk tawh" zawi supin a lo ti leh ringawt a, ka thin tawt lutuk chu a reh hleithei der lo. 

"A tawk lo nasa mai, helamah ngaihngam deuhin ka awm a, nangni pahnih lah ka hriat lohin in lo inphur chhuak ziah a, in inhmangaih viau ţhin a ni lawm ni? Nupui/pasal neih ve ve hnu pawha la inphur chhuak duh tur te chu inneih mai tur cheu lawm. Fa pahnih lai nei tawh mah se i hmangaih te chuan nei mai ta che" ka la ti tan tan a, inhmatawnin kan ţhu a, a hmel landanah chuan a thinrim leh hle tawh tih ka hria a, ka hlau bik hauh lo thung. 

"I ţawngkam fimkhur ţhin rawh ka tih kha" khauh zeta a tih chuan, "Ka fimkhur seng bik lo a nih hi. Hmangaih deuh lo nei ta ila, i hriat lohin hmu ila engtin nge i tih ang? Min nam nul mah mahin ka hria. Chhandami pawh a ni tho, kan inkawm nel tawh tih vang maiin ka mitmei a veng duh lo ringawt a, miin an lo hmu lehzel cheu nen, eng angah nge min ngaih ang a? A pasalin a rukin a bum char char min ti mai dawn a sin. In inchhung pawh hrehawm ka tih tawh nen, nang lahin i lo belhchhah veleh zel a" ka ti a, ka rilru a dam thei hlawl lo a, ngaihdam min dil a tum bawk si lo, ka thinrim lutuk chu ka thawk thlengin a rang vek tawh. 

"Ka hrilhfiah tawh che kha" a ti hmuk a, ka lo ner khum a, "Min hrilhfiah dan kha a lem lutuk. Tupawn thik thu kan nei a, a rilru a zau, thil a hrethiam tih vang ngawt a in nam nul leh lutuk hi ka duh bik lo. Chhandami lah a thinrim zawk zawkah a ţang leh ta nghal a, nangpawh chuti bawk" ka tih chuan a lo thaw hak a, "Thinrimna zawng reng suh. I bula awm a hahthlak tial tial mai" a la ti zui. 

"Hahthlak i tih chuan lokal reng lo la a ni mai alawm. Faith-i chetdan avang te khan inthiam lo ngawih ngawih zawk tur in nia sin. In chapo leh lutuk a nih hi" ka ti a, ka ţawngkam a na lutuk tawh tih hriain ka ngawi zui ta daih a, ani pawhin min be tawh bik lo. 

Tum bara ţhutthleng nghenchhan ka nghen hnawk hnu chuan, "Ka tihpalh a nih kha" a ti ve ta hram a, ka lo melh ralh a, engmah ka la sawi duh chuang lo. 

"Kha, phone hi la la i duh duhin ti rawh" a ti a, ka malchungah phone a rawn theh phei a, a ţhutna aţang chuan thoin choka ah a lut ta daih a, a phone chu ka en a, Chhandami nen an inbiakna pawh a lo awm ngei alawm. 

'Innu a rawn thinrim ringawt a, a ti ang lo tak tak a ni' ti a Chhandami thu thawn ka chhiar chuan ka nui hul hak a, ve lutuk hian a. Pasal nei reng chungin mi pasal puihna dik dûk dûk lo se chu ka thinrim bik tawp nang. 

Thikthuchhiat leh lutuk hi duh lo viau mah ila a ruka ka pasal biak ching zawkin inthiam lohna a nei miah lo chu ka ngei ve deuh a, a number chu ka delete hmak a, ka block zui daih bawk. An lo in ngainat leh chuan thil a pawi zo vek dawn a, pasalte hi chu a theih dan dan a ven ve tlat tur. A ti lutuk e min lo ti pawh nise pawi ka ti lo, ka pasal a nia, ngaihţha lo deuh a awm reng ai chuan ţha ka tih angin thil ka ti ve a ni mai a ni. 

Message dang ka enkual a, hmeichhiain an lo biakna vel chu a awm ngei a, a tih dan ngai bawkin a chhang lo a, hmeichhia, amah lo be tu a chhan let awm chhun chu a unaute, a cousin te leh Chhandami an ni mai. Midang chu ka haw em em hran lo a, kan inneih hlimah pawh hmeichhia chuan an lo be reng tho. Nupui nei tawh tih hriat reng an be duh zel mai hi mak tih chang ka ngah mai. An duh zawng tak a lo ni a nih pawhin nupui a neih tawh chuan biak loh a, duh loh ngam ve mai tur a nia, ka pasal hi a chhe hran lo a, a la upa lo bawk nen, lo duh ve tu hi an awm reng mai. Ka pa sawi ang tak tak khan inţhen pawh ni ila nupui ţha deuh a la nei leh thei tho ang. 

A rawn let leh chuan thei tui min rawn pe a, "In rawh" a ti hmuk a, ka bulah rawn ţhuin ani chuan a in nghal mai a, a lungawi chiah bik lo niin ka hria. 

"Tlaiah khan ka rilru a kal thui hman a, inţhen hlen hial ka ngaihtuah kai a, ka nu bulah pawh ka sawi nghe nghe a" ka tih pawh chuan a la ngawi reng a, "Tunlai tak phei chu ka mood a inthlak chhen a, ka tluk sual hnu phei kha chuan a nasa lehzual emaw tih tur a ni. Ka awm mai mai pawh hi thawklehkhatah ka pik mup a, rei deuh chhung chutiang chuan ka awm a, a reh fel hnuah pawh ka chau rawih zel tho. A chang leh ka ţah a chhuak a, a chang leh ka hlim a, a changin ka hlauthawng bawk a, thil te tham deuh a i ngaih khan min tihbuai vak chang a nei a, ka awmdan hi ka hrethiam bik lo. A hrehawm lutuk ringawt" tiin ka phun leh sap sap a, hmalam ka en ngar a, ani pawh chuan sawi tur a hre lo aniang ngawih a la chuh tlat a, a phone takngial pawh min la laksak lo. 

"Engkim hian min ti chau zo vek tawh. Kan in pawh hi nuam ka ti chuang lo. Khawhar deuh chang te ka nei a, inţhen hlen daih duh chang ka nei bawk a, indan i sawi lahin ka pa'n a phal lo bur zel bawk si" ka tih chuan, "A chhan a awm alawm" a lo ti a, ka thlavang a hauh na viau chungin ka hriatah chuan a chhungte hi a ţan ve tlat zel tho a, vui vak theih pawh a ni ngai lo. 

"Eng nge a chhan chu ni a?" ka tih chuan, "Min la hrilh chiang lo a, a chian hunah ka hrilh ang che. Ka piandan, ka nu leh pa thlengin ka hre tawh a, a awihawm loh a, pawm thiam ka zir ve mek a nih hi" a lo ti zuai ve ruih a, a hmel chu ka en a, a la ngui bur mai. 

"Tu nge i nu leh pa te chu ni a?" tiin hre lo awm deuhin ka zawt a, a no ken lai chu a hung ţha a, ka no pawh min laksak ve nghalin a no bulah a hung a, chutah ka kut pahnih chu vuanin nghet deuhin a hum a, "Ka nu chu a thi tawh, tuna ka nu nau hi ka nu diktak chu a ni. Ka pa tak a ni lo emaw ka tih char char ţhin hi ka pa a ni bawk. Ka nu'n Anthony a pai lai pawh hian ka pa leh min hring tu nu kha an lo inngaizawng ru reng a, ka pian ve phah a nih hi" a ti a, za lo deuhin a nui hawk a, "Ka pa hian ka hriat ve hauh lohin ka hmingin engkim a dah a" a ti leh a, Anthony-a thusawi kha a lo dik vek a nih dawn hi. Hei, tunah chuan amah pawhin a hre ve ta alawm. 

"Min hringtu nu kha a hmangaih thu a sawi a, tuna ka nu hi chu a chhungten fel an ti a, mo atana an duh avanga an neih luih tir a ni awm e. Ka nu tak erawh a tal hiar ve deuh niin a sawi" a tih chuan, "Nu Hlimi hi a hmangaih ve lo tihna mi? Fa an neih duah tawh hnuah pawh hian a la hmangaih lo tihna maw?" ka lo ti a. 

"Ka hre lo le..ka nu kha a hmangaih a, tuna ka nu hi a zia an hre chho a, nupui atana a neih luih tir avanga ka pu inchhir zia min hrilh tel a, thil dang a sawi tam lo, ka zawt lo bawk a. Fate duhthlan ni lo, anmahni duhzawng fate neih tir hi ka pate ho thisenah a bet a nih ka ring. Ka chungah a thleng veleh chiah a, nang ni lo phei la chu damchhungin ka hmangaih hauh loh bulah ka awm dawn tihna a ni mai. Mahse nang chu ka hmangaih che a, a tawk a ni mai lo mi?" tiin ngenngawl deuhin min en a, inţhen hlen ka sawi zeuh zeuh avangin a chapona zawng zawng a dah hniam ve vek tih ka hre thei a, ka khawngaih leh der tawh. 

"Nupa chu kan inzawmna a nghet tawh a, thuruk leh zep ţhen a awm tawh tur a ni lo a, mahse nang chuan zep i nei tho a, ka hrechhuak leh kher kher bawk nen, ka mood a dik loh lai phei chuan ka haw lehzual a" ka tih chuan, "Ka tihpalh a nih kha" zawi te tak tak hian a lo ti a, "Engkim ka hrilh tawh ang che. Ka pa'n indan a remti lo a, a thil neih ang ang ka hmingin a dah bawk. I duh chuan i hnawt chhuak vek thei alawm" a ti ta mai a, mak ka ti lutuk chu min lo nuih a, ka ân deuh hau lai chuan ka hmui hnuai lam a rawn pet zauh a, "Lo haw tawh rawh" a ti sup bawk. 

"Chhandami kha ka block daih a nia" ka tih veleh muangchangin ka malchunga a phone let bak chu a en a, chutah keimah bawk min lo en lehin, "A pawi lo..i lo haw leh duh na tur a nih phawt chuan i duh duh ti rawh. Ka ngai che a, i awm loh chuan pindan chhung pawh a hnawk rum mai" a ti ta daih a, ka rin loh dan deuhin a ţawng daih. 

"Mipa dang chu nise i awm loh chuan pindan chhung a ruak huai mai an ti ngei ngei ang mawle" ka lo ti hlak a. 

"Mipa dang ka ni lo a, i pasal alawm ka nih. Kan pindan chhung a ruak lo a, bungrua a inhung thluah. I awm loh chuan a hnawk a, a chul rup bawk a" a ti a, ka nuihza chu ka insum tlat a, ho te a intih lawm tir ka tum loh pawhin ka nuih a lo za leh ringawt ţhin. 

"Tun ţum chu ka nu a thinrim ve em a, keipawh ka thinrim tho a, inţhen hlen thlengin ka ngaihtuah ka tih chu" ka tih chuan, "I ngaihtuahna ringawt alawm. Min ţhen hlen dawn lo tiraw? I lo haw leh ang chu" min thlem ti tih hian a ti a, ka hmai zar tu ka sam chu a hui kiang a, min en vang vang a, a mitmenga min duatna langchhuak chu ka hmuh hmaih bik lo. 

"Ka nu thu lo chuan engmah ka ti ngam lo. Keimahin thutlukna ka siam thei lo" ka tih laiin ka nu te an lo haw a, ka kut a vawnna chu a thlah vat a, ka nu chuan be lem lovin a kal pel a, an pindanah a lut tlang a, ka pa nen erawh an inbe ve luam a, Nicholas hian min hrilh loh tam tak a la neih ka ring a, an in lam pawh a la buai viau maithei. A lo len ve lahin ka chhungte an awm ve zel si a, nupa ni tawh mah ila kan pahnih chauh hian min thlahfal ngai lo tih theih a ni. 

"Ka va inthlak ve ange, ka kawr hak hi a lian leh lutuk a, chet vel a rem lo riau" tiin ka pa pawh an pindanah a lut ve nghal a, "Faith chu i be dawn em?" ka pasalin a lo ti ve nghal zat bawk. 

"Biak nachhan tur ka nei hleinem" chang fek fawk a ka tih chuan, "A be duh che a, i thlen veleh min lo biak tir rawh a tia" a ti a, nuam a ti chiah bik lo a nih hmel.

"A nih leh call la" ka tih chuan rang deuhin a phone chu a rawn la a, unau na na na chu a mak khawp mai, inhuat viau chang a awm a nih pawhin kan inhmangaihna hi a chak zawk a, a inhuat tak tak theih ţhin loh. 

"U Sai" Faith-i aw ka hriat ringawt pawh chuan ka awm a nuam lo nghal ringawt a, ka sual pawh a ni maithei, ka haw hle bawk. 

"Eng nge?" ka ti bul hmak a, ka bula ka pasal ţhu ve reng ka melh lai chuan, "Ka tihpalh a nih kha. Ka pa bulah pawh ka sawi fel vek tawh a, buaina a awm reng ai chuan inngaidam tawn mai ang" zam lo tak hian a rawn ti a, ngaihdam min dil dan chu a lawmawm hlawl loh. 

"Min su palh ang vekin i sawi ang chu" ka tih chuan, "Ka su palh che alawm" a ti dam thlap a, heti hian Nico-a hriat lai kher a min biak duh chhan ka hrethiam chiah. A ţanna ngaiah a ţang tlat ang a, a chhungte chuan a tih palh tak takah an ngaih sak mai ang. 

"Aw le..ka dah" ti a dah mai ka tum chu, "Ka su palh tak tak che a nia" a la ti hram a, ner nawk chung hian phone chu ka pe let a, buaina neuh neuh tam lutuk hi ka kham leh hlui tawh.

Ka nu rawn chhuak chuan, "I lo mu hahdam em? Indim i la ngai nasa a nia, doctor pawhin a indim loh chuan nau chhiat a awlsam bik tawh a tih che kha" a ti a, a vin lek lek lehnghal. 

"Aw..mu hahdam ve e. Ka indim alawm" ka ti mai a, "Rilru leh taksa hahdam a pawimawh ber. Eng emaw thut a thlen leh chuan naute kha an chhan thei tawh lo ang. Pathian zarah i vannei a, an chhan hman hlauh zawk a, thil thleng a awm leh chuan a pawi tawh viau ang" meinei deuh hian a ti a, ka pasal chu en pawh a en duh lova, a awm ve tih hre lo ang hmakin a awm ti ila ka sawi sual lo ber ang. 

"Ei chak i neih chuan min lo hrilh la, naktukah ka lo keng ang. I nute an lo haw tawh tho a ka haw phawt ang" ka beng zawnah a rawn ti thum dût dût a, a ţawng zawi thiam vak bik lo a, ka nu pawn a hre pha tho maithei. 

"Aw..va haw phawt rawh. In lamah buaina chawk chhuak tawh lo la" ka ti a, Nu Hlimi min lo biak dan kha ka hrilh dawn em maw ni ka ti hman a, mahse buaina a belhchhah leh ang a, ţullo ah kan chhung hnihin kan buai leh ang a, ka peih tawh lo. 

A haw turin ka nu a biak chuan ka nu'n a lo chhang duh lo a, zah hmel deuhin min lo en a, kal tlang tawp turin zaizirin ka lo hrilh a, ka nu pawh hi a ti mah mah ve deuh chu a ni. Kawngkhar a khar rualin, "Nu, a biak che chuan chhang ve em em la" ka ti nghal a, a huat lutuk awm pawh ka hre si lo a, a mak ve ngawt mai. 

"Sawi tur a awm hleinem. A chhungten an ti ţha duam bik lo che. Inthiam lohna pakhatmah an nei bawk si lo, mihring pawh an ni ve lo aniang. In indang dawn a nih loh chuan i haw ka phal tawh lo" a ti leh tawh a, ka ngawi daih a, kan dinhmun hi a khirh telh telh mai. 

Chhandami lah chuan mut dawn a ruaiah min lo call a, inhnuaiah ka la awm hlauh zawk a, ni lo phei se chu chhan pawh ka chhang ngam tawh nang. 

"Aw" ka tih rualin, "I haw leh tawh em? Nicholas a biak lawk theih em?" a rawn ti a, a vin hran lo nain lungawi lohna a nei tih a awki ah a hriat theih vek. 

"Awm nang...kan in lamah ka la awm daih alawm. A haw deuh chiah a, a awm lai khan lo call la ţha tur" ka ti ve ngat a, ka rin ve tawh nen ka ngaina lo zo vek tawh. Ka pasal hnen a min hek duh dan kha ka ngei a, ka pasal zawkin a chhang let lo hlauh a, chhang let ve phei se chu ka thinrimna a zual viau ang. 

"Biak ka tum a, ka be thei lo a, a pawimawh a sin mawle" a ti niah niah a, "Eng nge ni a?" ka tih chuan, "Aaa..chhungkaw lam thil a nia, nakinah ka lo be leh mai dawn nia. Whatsapp ah lah message a seen thei bawk si lo a, nang hi, min block a ni lo maw?" nui chung hian a ti a, ka hmui ka pet zauh a, ka chetdan chu naupangchhia ka ti leh tawh a, chuti chung chuan ka inchhir chuang lo. Nupuite ngaihtheih loh chin a thleng a nih chuan an ti mah mah tihna a ni mai. 

"Aw...a lo kal leh veleh ka lo bia ang che" ban charh a ka tih chuan, "Min block em ni a?" a rawn ti leh a, "Umm" tih chiahin ka chhang a, a nui hul deuh hak a, ka chet dan naupangchhia zet vangin ka zak ve chem chem mai. 

"Kan inhmu a, a motor ah ka chuang a, ka hahdam theih nan hmun reh deuh a min hruai turin ka ti bawk a, mahse Saii, i pasal lo kha ţhianţha ka nei hleinem. Fahrah ka ni a, ka bul ve a, Nicholas lo chu han rinchhan tur ka nei lo. Ka pasal hi ka ringhlel a, ka fate avang hian inţhen leh chu ni theiin ka hre bawk si lo, hmeichhia ka nia, thurawn lakna tur te ka mamawh ve alawm. Kan hrilh lo che kha kan thiam loh chu a ni ngei a, chutih rual chuan i chet dan hi a dik bik hauh lo a nia. Aaa...i kum ngaihtuah chuan a awm ve tho mai, i la naupang a, nau i pai bawk nen, engpawh nise i ngaih ang kha a ni lo a nia" a rawn ti duah a, a sawi dik khawp mai. 

"Nia, ka la naupang alawm" ka ti hlak a, ka kum rualpuite chu an ţhiante ho nen thawveng zetin an nui huat huat ang chu. Kei ve chu mawhphurhna sang lutuk ka koah a innghat a, puitling zawk te pawn tawrh harsa an tih tur ka tuar mek bawk a, ka rilru put hmang te hi a dik thei tawh lo, a buai nuai reng a, nichin lawkah Chhandami ka block a, tunah ka inchhir leh a, chutiang mai mai chu ka ni rih, ka laktlak rih hlawl lo a ni. Thil ţha leh ţha lo pawh ka thliar thiam rih lo a ni ber. 

Ka ngawih tak rengah chuan phone dah hmasa zawkah a ţang leh a, ţhutthlengah chuan ka ţhu hnawk a, kei hi ka awmdan a dik hauh lo. Pindan aţanga ka nu lo chhuak leh hnenah chuan, "Nu, depression te hi ka nei a ni lo maw?" ka ti hluai a, min en vang vang hnuah a chek tlak a, "Nei lo ang..hahdam deuhin awm la. Nicholas hian tunlai tak chu chanchin lawmawm a rawn keng ngai lo a, hmu lo tawp rih mah la a pawi lo, i hahdam zawk ang" a tih chuan, "Keimah mai bakah ka nau pai lai hi ka ngaihtuah a, ka buai alawm. Bakah ka chau thei si, ka thaw a rang awl bawk si a, ka ngaihtuahna te hi a buai nuai reng mai, ka vai ruai reng ni maiin ka hria" ka ti a, Chhandami hming sawi ka tum zuau a, ka ngawi leh ta daih a. 

"Hahdam tum la, engmah ngaihtuah suh. I ngaihtuah a nih pawhin a ţha zawng chauhin ni se" a tih chuan, "A ţha si lo alawm" ka lo ti hlar a, Chhandami lah buai lai takin a lo lang a, min hnem tur ang zawng ni lo, rilru ti hah zawng kherin a ni lehnghal. Ka pasal chiah belh tur a nei a nih pawhin a lutuk chin hi a awm ve tlat a ni. Ka block kher erawh insawi thiamna tur ka nei lo. 

"En teh nu, ho te teah pawh ka thinphu te hi a rang vek zel. A hma khan a ni miah lo a, ka chet sual hnu kha chuan ka hlau hma thei lutuk, naute hi ka ngaihtuah ropui sia, ka awmdan hi a mak teh mai a nia" ka ti mawlh mawlh reng a, "Hahdam rawh ka tih kha, naktuk zingah ka kaitho hma che ang a, tawi te te ka kal pui ţhin ang che. Exer lak te hi a ţha a, boruak ţha lo in a deng reng che a, i zo lo a nih hi" min ti a, ka mangang lutuk chu a hrethiam a ni ang min kuah tho a, Liantei nen a kan pindan inluah ţawm thleng chuan min hruai chho a, ka haw leh hnu hian keimahin ka la mu leh lo. 

"Liante, i u kha ngaihven ţha rawh aw. Mamawh a neih chuan lak sak zung zung la, Saii, nangpawh mutthilh tum rawh aw, zingah ka rawn kaitho hma ang che" tiin ka nu chuan min chah a, Liantei chuan min ngaihsak zui em em lova, a lehkhazir laiah chuan a bur chawt a, chau viau e ti lo chuan ka muhil thei lehpek lo a, tun hnai a thil thleng vel te hi ka ngaihtuah kual a, haw leh ka hreh a, ka pasal ka ngai ve tho bawk si, chutih rual chuan a chhungte vang hian inţhen hlen daih duh chang ka nei bawk a, a inkawkalh nuaih a, a buaithlak vel vek a ni ber. 

A office bangin min lo tlawh kawi leh a, ka nute erawh an pu an sawn dawn a, inthlahna hun an hmang ve a, a lo haw tlai deuh ang. 

Eitur min lo hawn chu Liantei lawmah a tla a, a lo dah ţha zung zung a, Saiziki erawh chuan, "Ka inbual nghal dawn" tiin min kalsan a, ani pawh hian ka pasal hi a duh hunah a be ţha huam a, a chang leh be lem lovin a kalsan hmak a, Liantei hi a awmdan a ngai reng a, ka pasal pawhin a ngaina ber reng a ni. 

"Nizan ka haw hnu khan ka pa nen kan sawi dun leh a" tih pahin ka bulah a lo ţhu a, ka mal chu la kangin a malchungah a nghat a, na lo te tein a hmet zui a. 

"Eng ber nge in sawi dun a?" ka tih chuan, "In dan a remti lo. Inpui nghak turin min duh a, kei leh ka nupui fanaute" a ti zuai ruih a, ka lo hrethiam lehpek lo chuan, "Ngati nge nang kher? A fapa pawh lo ni la Anthony pawh a fapa tho a nia, Hope leh Faith te an awm bawk a, keichu ka hrethiam lo reng reng. Thu ngai kan sawi reng a, engmah kan sawi kaw ngai bawk si lo" ka ti a, a lo bu nghat a, a dik alawm a tih ve naah ka ngai mai. 

"Hope leh Faith chu pasal nei tur an ni. Mipa leh hmeichhia hi a inang ngai lo. Pasal an nei ang a, an pasal te thlazar hnuaiah an awm ang a, hmeichhe lam chhungte inrawlh vak a mawi tawh ţhin si lo a, pasal an neih meuh chuan ka pa pawh a inrawlh duh vak ka ring lo. Kei lo chu inpui luah tu tur dang an awm lo. Saw in saw ka pa hian a ngai hlu a, luah lum turin kei hi min duh bawk. Kan chhungkua a awm turin" a ti dap dap a, tun hma aţang tawhin Anthony hi a duat zawk niin ka hre ţhin a, nupui pawh neih luih tir ve lovin Nicholas zawk hi a duh lo chung nupui a neih tir a, ro chungchanga a hming a lang ve hauh lo hi mak ka ti angreng khawp mai. 

"Naupang zawk pawh ni la i nuten min ngaithei miau lo a, awm hran hun a la awm nge nge ang. Anthony pawh hian nupui a nei ve ang a, inpui chu Anthony leh a nupui fanauten an luah lum mai ang chu" ka lo ti then a, min en vang vang hnuah ipik hmel zet hian a thaw chhuak hawk a, "Anthony chu beisei chi a ni lo" a ti a, a aw chu a ri chang chang chauh a ni. 

"Engati nge?" ngaihţha lo fe a ka tih chuan, "Fa a nei ve lo ang" a ti a, a hmui a liak zauh a, lungngai hmel a pu leh tawh bawk. 

"Fa a nei thei lo tihna em ni? Nupui pawh a la nei em lo a, engtin nge fa a neih theih leh theih loh in hriat a? Eng nge a awm zia ni a?" ka ti mawlh mawlh a, "Ka pa hian keimah bak fapa a nei lo" a lo ti leh tawp a, ka bangbo khawp mai. 

"Anthony hi i pa fa a lo ni lo leh daih tihna mi? Awii...eng circle nge ni ngai? Keichu engmah ka hrethiam tawh lo. Ka belchiang cheu ang a, ka hrechiang sawt ang cheu tih nak laiin ka bo tial tial zawk a, ka ngaihdan apiang a dik lo zel bawk si" ka tih chuan, "Anthony hian mipa bak a duh lo" zawi te tak tak hian a ti a, ka thu hriat chu ka ringhlel rum rum mai. 

"Engtin maw i tih? Han sawi ring deuh teh" tih ha pahin ka beng chu a lamah ka dawh hnai a, ţawng chhuak lawk lovin ka chawn chu na zetin a ţham a, "Tenawm" a tih laiin, "A na..ka chawn kha thlah rawh..em em che hian" ka lo ti ve hlak hlak a, "Han sawi nawn leh teh" ka ti tel hram bawk.

"Anthony hian mipa bak a ngaizawng ngai lo. Rai thei lo chi chiah a kawp tihna a nih chu" a ti a, phawk deuhin a lam ka hawi a, a chauh hmel ngawih ngawih. A thlarauin a chhuahsan ta emaw tih mai tur a ni. 

"Eng thlah nge maw in ni bik le?" ka ti chhuak halh a, min chhan ka beisei lo nain, "Ka hre lo" a lo ti veleh hram a, sawi tur pawh kan hre tawh lo, kan in en ngawih ngawih reng ringawt mai a ni. 

CONT...