HIS LAST LOVE-34

HIS LAST LOVE-34

"Pindanah chho ang" ka ti hluai a, mak min lo tih hmel khawp mai. Ka kut a vuanin ka ding nghal hluai a, "Hriatthiam loh ka ngah emai, pindanah chho ila sawi dun ang" ka ti leh a, kawngka lam melh zawk pah hian, "I nu" phui phunin a lo ti a, "A ho mai mai...min hauh leh keiman ka tuar tawh mai ang. Awm hrang mah ila nupa kan la ni tho alawm. Lo kal rawh...mumal deuhin sawi dun teh ang" ka ti tet tet a, "Pindanah kan chho dawn a nia" ti a choka a Liantei awm chu ka auh lauh hnuah inchung lamah ka chhoh pui a, Anthony-a awmdan chu ka hrethiam thei lo reng reng, a ţawng no lo a, a kal no bawk si lo, a landan ngawr ngawr phei chu a pa lutuk tlat a ni. 

Khum lu nghengin kan ţhu dun ran a, a hmel ngui lup reng chuan chhan eng emaw a neih ka ring tlat. Anthony-a chungchang chauh a nih ka ring lo. 

"Engah nge ka inbarh luh pawh ka hre lo. Aaa...ka pa hian engah nge min barh luh pawh ka hre lo ti ila a dik zawk ang. In chhungkua hi rin ai daihin in buai a, pawisa bak chhuan tur in neih bik loh nen i nu te lah an la chapo ve em em zui a" ka ti khawl khawl a, a lo thinrim bik lo. 

"Diktak chuan ka nu te hian min khawngaih ve a, tun hma te kha chuan ka vui deuh pawhin min fuih a, tuar hram hram turin min hrilh ţhin a, tunah chuan a ni em em tawh lo an ti aniang ka nu bik phei chu a hel tlat tawh. I rilru ti na thei zawnga a lo awm emaw, ţawngkam a lo nei palh emaw a nih pawhin i hriatthiam rih a ngai a nia. Engmah kan sawi fel tak tak dawn lo a, chuvang chuan peh hel kual reng lo a a nih tur ang ang kan nih tawp tawh a ngai. Tun bak chu thu ngai kan sawi tawh lo ang, a ninawm zo zai tawh emai" ka ti hmak bawk. 

"I hriat duh min zawt la, zep lovin engkim a nihna diktak zelin ka hrilh ang che. Chuta ţang chuan thutlukna i siam dawn nia, mahse inţhen i tih chuan" tih pahin min rawn en a, ka lo en let ve lai chuan, "Ka ţhen dawn chuang lo che" rang zet hian a ti a, a ţawng ran dan em em chu pui tak a ni. 

"Tikhan ti nghal ringawt lo la" ka tih chuan, "Nau i pai mek a, ka fa ve tho a ni. Naute kha nangmahin i siam lo a, silaimu tello chuan target a fuh theih loh. Thuneihna ka nei ve a, kan fa hi tih fahrah ka tum lo" a ti a, a lu ah ka nam pawp a, vin zet hian, "Thutak sawi tum laiin uang sek mah ta che" ka ti hlar a, a lu chu a tuai a, nuihza hmel a pu lo bawk. 

"I rilru tih thawven ka tum a nih kha. I nu'n lo phal lo pawh ni se ka neih leh theihna tur che a nih chuan ţhingţhi pawhin ka dil ngat ngat mai ang. Ka hmangaih che alawm Pâte, naute nen hian ka hmangaih che u. Ka seilenna chhungkua hi ka duhthlan a ni bik lo tih min hriat sak la, ka sen lai aţanga min tuam hlawm tu an nih avangin ka hmangaih lo thei bik chuang lo tih te nen" a mitmeng thuk raih chuan min en a, a hmel a thutak em em bawk a, a aw chu a zawi viau nain a thusawi chu hriat chian loh lai ka nei lo a, keipawhin ka hmangaih alawm, mahse let leh ka chak hlawl lo a ni. Bakah ka nu'n a phal dawn lo nasa. 

"Lo let leh chakna ka nei tawh lo, i chhungte hi ka hrawn peih tawh hlawl lo. Ka zep buai lo mai ang, ka hrawn lui peih tawh lo. Sawi tak ang khan lo let leh duh pawh ni ila ka nu hian a phal dawn rih lo hrim hrim a, min hmangaih tak tak chuan i chhungten hrehawm nasa tak min tawrh tir reng hi i hmuh theih ka ring lo, min indan pui daih tawh ang. Kan indang dawn a nih chuan ka nu pawhin kan inneih leh a phal dawn bawk a" tih zawngin ka kar a, ka thil tih dan hi mo fel zia a ni lo maithei a, mahse ka hrawn peih tawh thlawt lo takmeuh a ni. 

"Chu chu ka tum dan a nia, in luah tur pawh ka hmu fel diam tawh. Mahse, ka pa'n ngen tak tein min ngen a, kum tam tak a lo zep tawh thuruk zawng zawng min hrilh a, Anthony-a chungchang thlengin" a ti hnual ruih a, khawngaih viau mah ila a ngai bawk tuar leh tura let chu huphurh tak tein ka huphurh a, ka pasal vang liau liau hian lo let leh ta pawh ni ila an duh duh a tih kual theih chuan ka awm tawh bik lo ang. 

"Anthony-a chu a mak hle mai. Engtin chiah nge ka pa chuan a sawi a" ka tih chuan, "Kan tleirawl lai daih tawh khan ka pa hnenah a nihna diktak a lo sawi tawh a, ka pa lahin sumdawnna leh kan thil neih te hi nakin zel, a thih hnu thleng pawha enkawl a kalpui zel tu tur a duh a, Anthony lahin hmeichhiain min hip lo a ti bur bawk si, beisei a neih loh chinah ngat phei chuan keimah min nawr na a, ka mimal nun thlengin a chik a, ka inpeih hmain nupui min neih tir hial reng a" a ti dam dap a, a rilru a hah ve tih ka hria a, a u lah mi pangngai lo tih theih tur chi a ni ta mai si a, a mangang ve viau ang. 

"A tuai chuang bawk si lo a, a mak hle mai" ka ti ban charh a, "Mipa in min hip zawk a ti miau si a, rapawm lamah te pawh a kal. Ka pa hi chuan Anthony ah hian beisei a nei tawh lo a tih theih a, a fapa a nia, a hmangaih ve tho a, ka sawi tawh kha, phir te hi chuan pasal an la nei dawn a, kei hi a hnena awm reng turin min duh a, ka kalsan lui a nih chuan rilru nuam a ka awm ka ring lo. Ka buai zo vek tawh a nih hi, rilru a phir nuai reng mai" a ti a, a ţhu kun lup a, ka lo khawngaih leh hman a, ka lan tir lo thung. 

"Nih leh Chhandami hian buaina a neih changin a mamawh ţhin che a, i bula awm a chak a, a thlahlel che a, chutiang chu i ni ve em? I hmangaih ţhin tih ka hria a, i first love a ni lehzel a, a awm ang hian i awm ve em?" ka ti leh ta daih a. 

"Hmeichhe dang mamawh ila i bulah ka awm nang. I nu hlau chung chunga ka rawn hmuh ziah che hi" tih pahin a ţhut dan chu a siam rem a, ka kawngah a kuah a, ka mal chungah a bawk leh hlu hlu tawh. 

"Min ngai a, ka bulah i awm chak a nih chuan min indan pui thei mai lo mi?" ngenngawl zet hian ka lo ti leh a, a sam dum hlap leh kir chiatah chu ka chul a, a nem thep a, khawih a nuam viau zel. 

"Theih chu ka thei a, ka pa in hrehawm a ti thung ang a, lo let leh mahla tuman an ti chhe ngam tawh lo ang che. Nakin hun zel ngaihtuah chuan, keini mai bakah kan fate an nawm sak theih nan saw in a kan awm saw a ţha ber" a ti a, ka pawm zawng a ni vak lo thung. 

"Kan fate chuan kan hlawhin lehkha an zir ang a, kan theih chhung kan chawm ang a, an inzir puitlin hunah min chawm let ve ang a, i pa thil neih hi engmah chang lo mah ila kan awm thei tho ang chu. I hlawh leh ka hlawh hmangin nuamsa deuhin kan awm ve thei tho ang. Diktak chuan i nute hi ka hrawn hreh tawh em a ni" ka ti leh a, "Ka hrethiam che. In ruak ka hauh lawk kha ka lo be nawn leh ang, ka bula i awm duhna tur a nih phawt chuan ka indan pui ang che" a ti ve ta nge nge a, a rilru erawh a hmin zan lo tih ka hria a, a pa a ngaihtuah a ni. 

"Lo mu ţha la" a inben kan rualin ka banah a pawt a, keipawh chu ka mu ve mai a, min kuah nghal chial a, ka hmui a min fawh chuan ka lo hnar bik lo, ka chhan let ve rual chuan min fawp uar sauh a, ka kawr chhungah zen lutin ka taksa chu a chul kual ruai a, min thlakhlelh zia a hriat theih a ni. Ka kawr a hlim chhoh lai chuan a hmui hnuai lam chu ka lo fawp dek dek a, keipawn ka ngai a, ka thlahlel ve tho a, amah bik hi chu huatna pawh ka nei tawh lo. 

A inlak hran thut avang chuan hamhaih deuhin ka lo en a, "I chetsualna a la rei lo emai" min vengthawng tak hian a ti a, ka kawr chu pawt thlain ka taksa chunglam ruak kung tawh chu a khuh ţha leh a, duat deuhin min kuah zui a, "Hmeichhe dang i biak leh chuan thu leh awm lovin ka ţhen hmak tawh ang che" ka tih chuan lo nui hawkin ka chalah a fawp vang vang a, "Ka be lo ang" a ti a, ka ring leh hmak tawh. 

"Ka nulat laia ka pindan a nia, hmeichhe pindan e ti lo chuan a hnawk thei teh mai a nia, pasal ka nei a, ka che fel ve chauh alawm. Tun hma chuan ka nu'n min hau nasa thei lutuk" zangkhai deuh hian ka ti leh zat zat tawh a, indan chungchang kan sawi fel tawh bawk nen, thaw a veng huai tawh. 

"Engkim a ţha vek tawh ang chu tiraw?" tih pahin min kuahna ban chu nghet deuhin ka kuah bet ve a, "Ka beisei" a ti sup a, ka hmuiah bawk chuan a fawp leh a, a bekah dawmin keipawn ka lo chhang let veleh a, hun thawl kan neih ngai loh avangin ka ngai a, ka huat viau chang pawhin ka thlakhlelhna a bo ngai chuang lo. A hmui chuan ka nghawngah chhui thlain a fawp kual a, ka dul puar ve al tawh a a fawh lai chuan a samah ka lo ţham a, pawn lama thawm a rik bur takah chuan "A van hun lo tak" a ti hluk a, a inlak hran rual chuan ka lo nui hak hak a. 

"Tho teh ang..ka kham thei dawn lo che a, silai kah ka zir duh tak tak ang" a ti leh a, hepa tak hi chu a. 

"Saii, ka nu vase lei thar ka thlauh keh vek a nia" Liantein a ti lang lang a, "A hau dawn che a nih chu, fimkhur ve tur che alawm" ti a ka auh let chuan, "Lo chhuak duh kher suh u..hei ka chhar khawm mek, puih ka ngai lo. Mahse ka pa a lo haw tawh a nia aw, U Nico kha chaw ka chhum kep bawk a" a lo ti leh a, ka nu a awm chuang lo bawk a kan in a chaw ei chu a hreh vak bikin ka ring lo. 

Pindan aţang chuan kan inzui chhuak ta tho a, a phone ka en sak leh lo a, Chhandami pawh ka la block sak ta reng a, tikhan in block vel mai mai rawh se, rawn biak a chin chuan rilru a nuam lo mai mai. Ka number a nei tho a pawimawh a awm chuan a rawn sawi thei tho. 

Ka pa chuan pangngai deuhin a bia a, chaw kan eikham hmain ka nu pawh a lo thleng a, choka ah lo lutin ka pa hnenah chanchin a sawi thuak thuak a, ka pasal chu be lo bawkin a chhuak leh a, a chhungte avang hian Nicholas pawh hi a haw vek tawh a ni ber. 

Ni a liam ve zel a, keipawh hna ka kal leh tawh a, indan chungchangah kan la buai a, ka chhungte bulah ka la awm ta reng a, Ngheti phei chu kei aiin a lo mangang emaw tih mai tur a ni, "Ka ngaihtuah che a, an in hi i tan a him lo a, ka hlauhthawn ve tho rualin i pasal hi ka khawngaih a, amah enkawl puitling tu a pa han hnial luih ţalh lah a hreh ve dawn tho bawk si. In dinhmun hi a lai zo vek tawh a nih hi. Mahse maw, U Nico-a bulah hian vui vak vak suh aw. Entirnan, i chhungte nen hian inhau bur bur ta ula, anmahni i huat ber lai pawhin miin an sawisel chuan i chhungte i ţan zawk tho ang. Chhungkua inhmangaihna hi chu a thuk khawp a, a tawp khawkah chuan kan inţan ţham tho zel. Chutiang chiah chuan U Nico pawh hian a chhungte a hmangaih ve dawn tho a, a nu leh Faith-i pawh sual viauah se khawngaih nachin a nei dawn tih hre tlat rawh. Hmangaih viau che mah se a chhungte pawh a haw tak tak thei dawn bik miah lo a nia, indang ula, engkim a fel vek mai ang han ti ngawt ila pa te phal lo chung chhuah chu rilru a nuam duh dawn chuang bawk si lo a, ho te te a i vui reng phei chuan a chhungte zawk a ţan daih mai ang" a ti bawrh bawrh reng a, a sawi dik ve tho mai. 

Ka duty zo haw ka tum lai chuan damdawiin kawtah Pa Chhawna a lo awm reng a, ka hmu thut chu ka hamhaih viau nghe nghe a ni. A buai ţhin tehreng nen, hmuh ka inbeisei loh ber te zinga mi a ni. 

A hawi kual ruai laia, "Ka pa" ka tih chuan hnung lam a lo hawi vat a, min hmuh rual chuan nelawm deuh hian min nuih a, "E..Saii, ka lo nghak che a, i pa khan chawhma a duty a ti sia, damdawiin a lut chhuak ho ka lo thlir reng a, ka hmu mai si lo che a, i pa'n i duty hun a hai emaw ka ti hman rum rum a" a lo ti zung zung a, "Ka ţhiante nen kan ti ti rei deuh a" tih pahin ka pan hnai a, a kawr hak lai a pawh chhuah kim loh, pawr turh a tlem te lo inbilh lut bik chu ka pawh chhuah sak a, "Ngati nge min zawn a?" ka ti zui zat a. 

"Ka hmu khat em che a, ka ngai deuh che mawle. Saw lai deuhah sawn motor ka dah a, thil kan ei dun dawn mi?" min rawn deuh ti tih a a tih chuan ka lo bu nghat a, a bag ken lai chu, "Khawi ka lo ken sak ang che" ka ti a, min pe ve mai bawk a, ka pasal nen pafa diktak an ni tih ka hriat tawh vang nge in anna lai an ngah riauin ka hre thar a, ka pa tak hi chu ka chungah a ţhain sawiselna tur a vang khawp mai. 

Restaurant nuam ve tawk takah kan inzui lut a, mi an tlemin duh tawka ti ti nan chuan duhthusam a ni. 

"Hetiang hmun te hi engtin nge i hriat ve a?" ti a ka fiam chuan, "Phir te hian kalna tur hmun nuam chu an hre khawp mai. Chhungkuain kan kal ve fo a" a ti mai a, hmun awlah chuan inhmatawnin kan ţhu a, thu dang sawi lovin ka ei duh zawng en turin min ti a, menu ka en kual lai pawh chuan a la ngawi reng a, boruak chu a uap deuh churhin ka hre mai. 

Eitur kan order fel hnuah, "I nu eng nge a an? A lung a la awi lo viau em?" a ti a, za lo deuh a nui chung hian, "A zia ve deuh tawh ang" ka ti liam puat a, ka pasal nen hian inţhen angin kan la awm lo a, sum ka chhuah lo a, min ma bawk lo a, ka bungrua pawh an inah a la awm vek a, kan awm hrang satliah a ni ber. 

"Hmanni a a office a ka hmuh kha chuan a la lungawi lo khawp mai a, mahse i pa nen kan sawi dun ţhin a, nupa awm hran reng ringawt chu ţha kan ti lo a, nang ber i lo haw duh chuan i nu pawh a nem ve maiin kan ring a" a tih chuan, "Ka pasal bulah ka sawi vek tawh alawm. Kan indang dawn a nih loh chuan ka hreh tawh a, a hrehawm ve em a, tawh sual ka tawh palh leh ka hlau bawk a" ka ti tlang khawl a, a lo bu nghat a, a hmel chu a dam thluam a, thil dang engmah a lang lo. 

"I nute pawh ka hrilh nasa a, lo let leh mahla hrehawm i ti tawh hauh lo ang. Nitin ka chhuah ţhin avang hian in boruak ka hre ve vek lo a, i nu'n min hrilh fo a, awih chin ka nei thung a, nuam i tih loh miau chuan indang mah ula a pawi lo, mahse, Nicholas hi ka innghahna ve ber a ni a, a hlat a awm hi ka zuam chiah lo a ni" a ti charh charh a, a hmuh loh turin dawhkan hnuaiah ka kut ka khal neuh neuh a, ka zam ve takzet a ni. 

"Nakin hun ngaihtuahin ka tlangval lai aţangin rilru nei ranin thil ka ti a, hna ka thawk nasa ţhin. Fa ka la nei ve ang a ka ti a, an tan vek a ti ka ni. Fapa pahnih ka nei a, sawrkar hna pawh thawk lo se an tana ka lo dah lawk sa hi an buaipui zui peih a nih phawt chuan hausak puina tham tho a ni a, Anthony-an lehkha a zir ţhat duh loh takah phei kha chuan kawng ka lo sial lawk sak kha ti fuh ka inti viau nghe nghe. Mahse, fa lehkhathiam lo neih ringawt chu ka duh bik lo a, Nicholas hi ka nawr nasat phah a, khauh deuhin ka enkawl a, a zir puitling ta reng bawk. Anthony lahin ka hnung a zui emaw tiin ka fate chu ka chhuang a, ka uanpui ruk ve viau laiin a tleirawl laia a thu min hrilh kha a ti mai mai lo tih ka hre chho a, leh lawk" a ti hluai a, amah bawk chuan, "A tleirawl lai hian, 'pa hmeichhia hian min hip ngai miah lo, ka ngaih ve deuh leh ka lung ti leng tu chu hmeichhia an ti zel' tiin min hrilh tawh a, thutak hla takah ka la lo a, intih maksak a tum naah ka ngai a, ka ngaihven zui em em lo. Mahse, eng eng emaw chhuanlamin phaiah rei tak tak a awm a, ngaihţhat lohna em em ka neih lo, ka hnung a zuiah ka ngai ka tih tawh kha. Sumdawnna thil a tih loh leh, a hnathawh nen a inrem tak thil a sawi a, a thang vang vang pawhin ka ngaihtuah ngai lo, fate hi rin chhiat an lo har khawp mai" a ti leh a, a mitmeng chu a ngui deuh ruih tawh a, lungngaihna thuk tak pai hmel a pu tawh a ni. A inthunun zo tawh lo ah ka ngai mai. 

"A ngaihzawng, chupawh mipa lehnghal a hmu ru reng ţhin tih ka hre chhuak a, resort a changtlun zawk theih nan chutiang khatiang chuan ka ti dawn a tih te kha dawt vek a lo ni. Vai, sumdawnna kawnga pui thei ţhianţha tak tak neia a insawi ţhinna te kha min bumna lek a lo ni a, ka fapa a nih avangin ka hmangaih a, a thusawi apiang a kawi a ngil a ka lo zawm zel te, ka lo awih sak zel te kha ka thiam loh a ni. Ka hna mai baka ka fate tana kawng ka lo sial sak pawh nise kan sumdawnna ah chuan a inrawlh ka phal ta lo a, in inneih hnuah phei chuan phaiah a kal leh tak miah loh hi. Engahmah a inhnamhnawih ka phal tak lohah phei chuan kawhmawh a bawl chho a, amah pawh a inti na reng a, damdawiinah a lut fo nghe nghe" a tih chuan kan inneih hlim a ka pasalin Anthony-a hnen a, "Nang chu damdawiinah i mikhual hleinem" a tih kha ka hrechhuak zawk a, an lo buaipui ve viau a nih hmel. 

"A insiamţhat deuh beiseiin tuna a enkawl lai huan hi ka enkawl tir a, ka ring lo a, ka thlithlai reng a, rin lawk ang ngeiin mipa bawk a kawp leh a, huanah khan a awm tir chawt a, mipa in an hip tlat hi a mak khawp mai. A landan leh engkim hi mipa pangngai vek a ni tho si a, hmeichhia aiin a mipat pui a thlang tlat thung. Tih ngaihna ka hriat loh tawpah Pathian pawi ka sawi a, min hremna a nih hi tiin a dam zawnga lak ka tum a, chuti chung pawh chuan harsa ka ti tho. Ka fa u ber mah nise Anthony hi ka ring lo a, ka tu leh fate, ka tuchhuan te thleng pawha an nawmsakna leh zahpuiawm an nih bik loh nan a kawng ka lo sial tawh hi ho mai mai a tih tawp ka phal lo bawk. Ka pa khan min ring tawk a, ka pa vang tal pawhin nakin zel thlengin awm reng se ka duh. Anthony hi chu ka en liam vel mai mai tawh a, nakin lawkah phai a ti leh ang a, thunun theih a ni lo a, a duhzawng hi thlakthleng sak theih a ni lo bawk. Mi ţha pangngai a kawp ngai lo a, zu leh sa, ruihhlo duh tak tak ho hi a ţhianţha an ni zel a, Nicholas chiah hian a ti thei. Ka rin awm chhun a ni a, ka innghahna a ni. Fa nei vat tura ka duh chhan cheu pawh eng dang a ni lo, fate hmangaih hi a na a, Nicholas pawhin chu chu hria se ka duh a, a fate tan tal pawh ka thu zawm se ka duh vang a ni. Hna ţha tak a nei tawh a, in ngaihtuahawm kher loh ang, mahse fate hi an inang vek thei lo a, enkawlna khat dawng rau rau pawh danglam thei tak an ni. Lehkhathiam thei an awm laiin a ngaihna hre hlawl lo an awm thei a, nu leh paten kan theih laia fate tana kawng lo sial sak hi a inchhirawm lem loh" a ti leh duah a, an thil neih sa te hi a ri ral mai mai a phal lo tih ka hre ran a, enkawl pui turin a fapa te pahnih zinga a laktlak zawk Nicholas hi a duh tih ka hre bawk. Mihring chu pawisa hian min lo thunun a nih ber hi, hman sen loh nei te pawhin neih belh dan an ngaihtuah ruai zel mai. 

"Nicholas hi a awm hran ka phal lo a nih ber chu. Ka kut leh ke a ni thuai dawn a, nitin office kal mah se min pui thei reng dawn tho a, in inchhir hauh lo ang. In dan in duh na na na chuan ka ui bet ţung lo ang che u, mahse in nupa hi chuan inpui ah ngei hian awm ve reng ula ka duh khawp mai" ngenngawl tak hian a ti a, rilru siam dan pawh ka thiam lo. Anthony kher kher pawh chu hmelţha vuah si a duhzawng a mak reng reng, Pa Chhawna tan hi chuan a luhaithlak ve viau ang. A chungchangah Kungtei khan dawt min hrilh nual tih ka hriat phah bawk. 

"Chhungkua kan ni a, keipawh i pa ka ni. Kan zep reng thei dawn chuang lo a, ti hian kan chhungkaw thuruk ka hrilh ta che a, Anthony chu ka thiam dan danin hrem mah ila awmzia a awm lo a, a insiamţha duh lo a, a thei lo bawk. Ka fanu te pahnih lah pasal la nei tur an ni a, mi pangngai an nih chuan engtik niah emaw pasal an la nei ve ve dawn. Sumdawnna lam an tuipui lo ve ve a, sawi hmuh mah ila an ngaihven ngai lo, fate enkawl hi a lo har khawp mai. Nangni nupa tal chuan min chhuahsan lo ula ka ti a ni" a ti chuai ruih a, a hmai a tuai tawk a, a hmel en ringawt phei chuan a khawngaihthlak tawh lutuk tlat a ni. 

"Ka lo ngaihtuah ţha dawn nia" ka ti a, a fa lo zawk pawhin ka khawngaih chuan a fapa ngei Nicholas phei chuan a khawngaih khawp ang. Ka pa hi ka pa tak a ni lo va, ka pa tak ang chiahin ka ngai thung. Ka unaute an laktlak loh avangin amah kalsan lo turin ngen tak tein min ngen ta se ka kalsan theih ka ring lo. Ka pasal inkhap rei lutuk pawh hi ka hrethiam ta viau mai. 

"Ngun deuhin lo ngaihtuah rawh, Nicholas hi ka innghahna ber a ni a, min kalsan lo turin ka ngen che u a, amaherawhchu, in kal duh ţalh a nih chuan ka dang tawh lo ang che u. In duh angin in indang dawn nia" a ti a, tih ngaihna tak pawh ka hre tawh lo. Pa Chhawna hi ka khawngaih thar riau a, Anthony-a laktlak loh lutuk chu ka ngei bawk a, Faith lah Anthony ai mahin a laktlak loh zawk emaw tih tur a ni, Hope ngat phei chu intihhlum a lo tum tawh avangin a duh lohna laman an nawr lui ngam tawh dawn miah lo a, hemite chhung hian buaina an ngah ve khawp mai. Chhungkaw buai award chu siam se dawng tur chiang sa an ni. An buai tawh nak laiin a sual pawl an la awm zui, an kim vel vek a ni ber. 

In thlengin min thlah a, lut kawi tur a ka sawm chuan, "Aaa..tih tur ka la nei a, a rang lamin ka lo leng zawk dawn nia. Nangpawh lo in ngaihtuah la, i nu leh Faith-i te pawh an in luling ngam tawh dawn lo a, an thil lo tih tawh te kha i ngaidam thei hlauh a nih chuan min chhuahsan lo hram dawn nia" a ti nawn leh a, mi ngaih a pa zahawm leh hausa, mi chung en a ni a, an inchhung lah hetiang nuaih hi a ni bawk si, Anthony phei chu chhungkaw hming ti chhe thei a nih avangin mizoram ah awm reng lo se a duh tawh zawk maithei a, a fapa a nih angin a hmangaih dawn tho bawk si, tha leh zung senga a lo din ve tawh ho hi a ri ral mai mai a phal bik bawk si lo, a rilru hah dan tur chu ka hriatthiampui a, ka hmuh hnuhnun ber ţum ai khan a lo cher tawh bawk. 

"Aw le...lo in enkawl ţha la" tiin motor aţang chuan ka chhuk a, inchhung ka lut te chu ka inngaihtuah nasa deuh aniang ka nauin min lo biakna pawh chu ka lo hre pek lo, "Ngaithla ta che" ti a ka beng zawna a au vak chuan ka phu zawk a, a thinrim zawkah ka la ţang zui. 

"Min be thut thut zel mah ta che" ka ti vin ţhak a, "I lo luh hlim aţang khan noodles chhum i duh ve em ka tia ka zawt tawh che" a lo ti ve thung. 

"Duh lo..thil ka ei tawh" tih chiahin ka chhang a, pindanah ka chho nghal a, khum a bag ka theh thlak rualin ka ţhu zawi hnawk a, Pa Chhawna lahin engkim min hrilh fai leng a, a mimal chanchin erawh a sawi tel lo thung, a nunhlui zawng zawng a mo hnen a sawi chu a tan pawh a nuam bik lo ang, khang kha chu min hrilh kher lo mah se ka hrethiam, mahse khati taka nasa a min ngen hnua indan luih ţalh chu ka tan pawh a nuam tawh dawn bik lo. 

'Zanah lo kal rawh. Thutlukna siam fel tawh tak tak teh ang, ka ning tawh' tiin ka pasal chu message ka thawn a, a lo kal tur thu sawiin min lo chhang let rang khawp mai. 

Ka nu lo haw chu pindanah ka kai lut a, midang hriat lohin Pa Chhawna nen kan inhmuh thu ka hrilh a, a sa phat mai. 

"I hmuh zel te chuan engahmah an ngai nang che. A lo kal a nih pawhin ka buai ti la kalsan mai tur che alawm. Ka thu lo chuan i haw tawh dawn hauh lo ka tih tawh kha" a ti nghal hlak hlak a, ka lo thaw hak a, ka nu hi a thin a rim laklawh tlat a, a awm ve tho mai. 

"Inţhen pawh kan ni lo a, a mo ah min la ngai a min lo hmu a ni mai. Ka ngaihtuah chet chet hian hun ţha vawikhat pek leh chu a ţha ka ti. Ka pasal tello a an awm theih loh zia ka hre tawh a, a hma ang ngawt kha chuan min ti thei tawh bik lo ang. Awm dan ka thiam ve tawh dawn alawm. A mak lutuk, Pa Chhawna kha ka khawngaih tlat a nih chu, a rilru hah tur zia ka hriatthiam pui a, a phur a rit ve viauin ka hria" ka ti a, a hma kha chuan ngawih ka chuh reng ţhin a nih kha, tunah chuan min tih ang chiah a tih let ve duhna ka nei tawh a ni. Ka rilru a danglam reng a, chu chu ka pawm thlap. Mahse tun aţang chuan ka rilru a danglam tawh lo ang. Nicholas-a duh ang ngeiin naute hi a fahrah lo bawk ang, nuam sa taka seilen tir ka tum tawh zawk. 

"Aih, ka remti lo. Saw inah sawn i let tawh lo ang. I pa pawh ka la nawr reng a, in indang dawn lo a nih chuan i pa'n a remtih veleh sum kan chhuah ang. Nau pai lai pawh ti na hreh lo tu te hnen a i let leh ka phal tawh lo" a tih chuan, "Ngaihtuah chiang la, ka pasal te hian resort thlengin an nei a, an khawsak theih em hi. Nu Hlimi hi in a awm tawp chi a ni a, Pa Chhawna lahin a fate zingah ka pasal aia rin a nei lo, ka hna hi a hahthlak a, an sawi ang tak takin hlawh a tlem bawk. Pa Chhawna ber lahin an hnen a kan awm loh a hlau em em a, ka hna aţang hian bang mah ila ka buai hauh lo ang" tih zawngin ka kar veleh thung a, ka hma hun a eng riauin ka hre bawk. 

"Mi hausa mo nih chu tu te pawhin an chak vek. Mahse keini chu mi hausa pak huam chi kan ni ve hleinem. Pawisa ai chuan naute nen a in himna ka ngaipawimawh zawk a, an inchhir tak tak a, ngaihdam min dil nasa viau a nih loh chuan i let leh ka remti lo. Sum leh pai aia hlu leh pawimawh a tam a, an duh duh a inthunun kual tir ka tum lo reng reng" a la ti bur tho a, Pa Chhawna kha chu hmu se a khawngaih ve tho ang mawle. 

"Pa Chhawna khan lem a chang mai mai lo, a hmelah khan lungngaihna a langchhuak a, a phur rih ve zia ka hria alawm" ka tih chuan, "I nep emai" a lo ti hlak a. 

"Khawngaihna ngah hi nep tihna a nih chuan ka nep ni mai rawh se. Mi khawngaih thei a kan awm hi kan vannei zawk alawm. Kei chuan nep ka ti ve vak lo, khawngaihna ngah leh an chunga thil ti sual tu te ngaidam thei ho hi chu ka dah sang viau zawk a" ka ti a, ţawng tuma a an zuau lai chuan, "Pa Chhawna ka khawngaih a, Nu Hlimi leh Faith-i chu ka ngaidam chuang lo. Ka ngaihdam theih pawh ka ring ngai lo. Ka mi ngaihsan ho zingah ka tel ve lo tihna a nih chu" ka lo tih khalh leh a, "Nicholas a rawn lang zing hlur a" a tih chuan, "Nu Hlimi leh Pa Chhawna te pawh an lokal ve fo alawm. Min ring tawk rawh, hmanni a thil thleng ang kha a thleng nawn tawh lo ang. A duh duh danin min ti kawi tawh lo bawk ang" ka ti a, a mak lutuk, Pa Chhawna ngeiin thil awmze diktak min hrilh hnu hi chuan ka huaisen lehzual sawt a, chona min pe ka ti dawn nge pawh ka hre lo, indan duh ngawih ngawih si kha haw leh huphurhna ka nei tawh hauh lo. 

Mahse ka nu chuan, "Ka remti lo, rilru nuamin ka awm thei dawn lo. Nicholas pawh hian min sawipui reng tawh suh se. Thu ngai bak sawi tur a hre chuang lo a, ka chhanna pawh a ngai reng tho ang. I pa pawh a duh leh thinrim mai mai rawh se, tun a kan thil tawn mekah hi chuan ka ngaihdan ka sawi ve ngam a, ka duh angin thil ka ti ngam bawk. In indang dawn a nih chuan inţhen rawh u. Ka rilru ka thlak lo ang" a ti hmak a, a kut vawnna ka thlah rualin pindan aţangin a chhuak a, chaw ei lai pawn kan inbe mumal lo. 

Liantei zawkin, "U Nico-a hi ka khawngaih tawh e..a lung a leng ve sia, Saii lo ui beh reng ringawt pawh hi thil dik a ni lo. Anni nupa lah inhauhna an nei bawk si lo, a sual thlak ka ti keichu" ka nu en pahin a ti a, a lo hre lo der hmak a, "A nep emai...an nu a duh tak tak a nih te chuan indan pui se a ni mai lawm. Saii, engtin nge i tih khah? A pa kalsan a hreh i ti en ni khah?" Zikpuiin a lo ti ve a, Anthony-a chungchang an hre ve lo a, Pa Chhawna hi a pa tak tak ngei a ni tih bak an hre lo. 

"Thutlukna chu Saiin siam rawh se" nghet charh a tih pahin ka pa chu a tho a, ka nu a lo ter nghal at mai. Mi chhungkaw thuruk sawichhuah ngei ngei ngaiin min siam leh ang tih te pawh a hlauhawm. 

CONT..