HIS LAST LOVE-35

HIS LAST LOVE-35

"Haw ka rem ti lo ka ti mawlh mawlh a ni lawm ni? Engkimah i thu ka zawm zel a, ka thu engahmah i ngai lo zo tawh a nih hi. Nu ka nihna angin ka fanu thlavang ka hauh a, ka hum ve a ni mai" ka nu chuan thinrim takin a ti a, "Pasal a nei tawh a, nau a pai tawh bawk. Inţhen ta se a chan chhe zawk tur chu Tuaitei tho hi a ni. Hauh ţung suh, hrehawmna leh harsatna te chu a tawk ang chu, a sual let ve a ngai alawm. A pasal pawh a khawngaihthlak lutuk tawh" ka pa'n a ti ve bawk a, an vin dun khawp mai. 

"Chaw ei lai em em chuan inhnial lo teh u. Nu, nangpawh hian ngaihtuah chiang leh hrim hrim la, U Nico mai bakah Pa Chhawna leh Nu Hlimi te pawh an lokal ngai lo pawh a ni lo a, an inthiam lo an lokal ve reng tho a, an sual an chhuah ngam ka ring tawh lo" Liantein a lo dam duam a, "Ka fanu hrehawm tuar ka hmuh theih loh avangin ka lo hum ve a nih hi. Ka dik lohna ka hre lo" a ti a, a kham zui hmak a, choka aţanga a chhuak chu ka pa hoin kan en zui vang vang hlawm a, tun tut tut a let leh chu a phal hauh lo ang. 

"A buaithlak a ni..an thiam loh mah nise hetianga awm reng zawng a dik lo. Ţhenawm khawvengte ngaih a ţha lo thuai ang a, heta i awm reng chuan miin an sawi sep sep mai ang che. Inţhen i duh lo a nih chuan let leh vat la a ţha ang" ka pa chuan a ti charh charh a, ka nu thinrim chu a ti lui dawn bik lo tih ka hria a, a rilru a buai ve viau maithei. 

"I nute hri hre vang hian kan chhung buai ve vek a nih hi. An fapa in a ţhen thei dawn lo che tih an hriat reng chuan sual chhuah loh mai tur alawm. Nute hian an fapa te hi an ta ah an la ngai tlat zel a, ţhenkhat hi chuan nupui an neih hnuah pawh an la hauh hlur zel. A tawk chin a awm ve a, chu chu hriatthiam tur a nia" ka pa chhuah hnuah Zikpuiin a ti hlak hlak a, chaw ei pawh a tui tawh lo. 

"Aaa...a theih chuan haw leh phawt mai rawh. Rai lai chuan pasalte bula awm pawh i chak ve anga, chuloah nupa ve lem awm hran reng zawng a ţha ngai lo. Nau i pai hnuah vawihnih ngawt i lo awm phei tawh a, mi phei chuan 'a tlan ngun lutuk' an ti tawh maithei che a, ka pa sawi ang khan hrehawm tuar lo tawp chuan pasal a neih theih loh alawm. Hetianga in awm hran reng chuan nupa in hmangaih tak pawh ni ula in inthlakhlelhna te a bo zo mai ang. Ka nu pawh ka lo sawipui ang a, haw leh vat la a ţha ber" Liantei bawk chuan a ti leh a, kan tlum ber mah nise a rilru a lo puitling ber zawk a nih hi. 

"Liantei sawi chu a dik tho na a keichu ka thinrimna hi a reh hleithei lo. I nu te hi ka haw hlur mai a ni, ka ngaihtuah chian poh leh ka thin a rim a, tih vak ngaihna a awm bawk si lo. Nico hi fel viau lo se chu inţhen hlen daih mah ula pawi ka ti lo" ka u chuan a ti a, chhang lem lovin chaw chu ka ei mawlh mawlh a, ka taksa chak loh hlauin ka ei lui a ni mah zawk. 

"Lo thinrim ve viau pawhin awmzia a nei lem lo. Saii thlavang kan hauh nasa tih an hre vek tawh a, tunah pawh an lokal reng chung pawhin a haw kan phal lawk lo chu a nia, tih mai mai chi a ni lo tih chu an hre tawh ang. A thleng nawn leh a nih leh an indang tawh mai aniang chu. Pa berin a phal loh tlat chuan nang pawh inpa hi indang turin nawr reng bik lo la, mihring hian buai rukna leh chak loh rukna lai kan nei ţheuh a, mi bul a sawi ngam loh kap tu kan nei ran zel a nia, inhrethiam tawn ula, i thlavang a hauh lo ngai chuang hleinem" ka nauin a tih chuan ka bu nghat a, Pa Chhawna lungngai hmel kha mitthlaah a awm reng a, a mangangin a beidawng ve hle tih a hriat a, lo nawr chiam pawh ka tum tawh hran lo. Indan pui lui tlat mah ila ka inthiam thei chuang lo ang. 

Rin ang ngeiin ka nu a hel lui tlat a, ka pasal pawh a lokal ngunin ka nu hnenah phei chuan khawngaih a ngen hial a, heti taka ka pasal inphahhniam hi ka la hmu ngai lo. A chapo ka ti ţhin a, mipa induhtawk ve tak a ni. Mahse, ka haw loh hlauin ka nu hnenah khawngaih a dil ţhin a, tih lawm tumin ţan a la nasa hle bawk. Pa Chhawna leh nu Hlimi te pawh vawihnih chu an lokal leh tawh a, Nu Hlimi ka be ngai lo nain pa Chhawna erawh chu ţha deuhin ka be ţhin. Ka pa leh Liantein an nawr reng takah chuan ka nu chuan haw leh min phal sak a, ka pasalte chhung an lokal ngun bawk nen, a hnial lui reng thei ta bik lo a ni. 

Ka pasal nen tlai lamah in kan thleng a, inţhen kan nih loh avangin ti hian ka zui haw leh tawp a, ka thawmhnaw ţhenkhat phei chu kan inah ka hnutchhiah daih nghe nghe. Ka pum pawh a puar lian ve tawh a, ka thawmhnaw a lian hlawm bawk a rai kawr hranpa ngai lovin ka neih sa ho pawh ka la ha tawk vek. Mahse, Zikpuii leh ka nu ten min leisak nual a, inhmeh lo inti chung chungin kawr fual hnalh ka ha ve ta fo mai. Ka pasal ber lah chuan min fak a hnekin ka kawrfual ha hi min en vang vang a ching a, "I mak e" a ti leh khauh ţhin, hmeichhia deuh a ka inchei hi mak a ti tawh zawk niin ka hria. 

Kawta motor a tih din veleh ka chhuk a, "U Sai" tih pahin Hope-in min lo pan vat a, lehkhabu a keng leh ran tawh a, "Tlai ni nemah hi chuan kawt laia lehkhabu chhiar hi a nuam em a, kan in nang fu chiah a nih hi. I lo haw leh chu ka van lawm tak" a ti a, min kuah tumin a phar zuau a, a tim leh deuh aniang a kut chu a la let leh thuai a, a cher kuam a, a mitmeng a thuk raih a, a mit hnuai a dum kual deuh ruai bawk a, eng emaw tih a nei tih a hriat viau nain chulam chu ngaihven duh lovin nui hak hak chungin keimah zawkin ka kuah a, ruhkawl ang mai a ni. 

"I chaw ei a tui lo a ni maw?" fiamthu a ka tih chuan, "Ka hre lo le...tunlai chu lehkhabu pawh ka chhiar khat. Mahse vawiin chu ka phur thut a, i lo haw dawn vang aniang" zangkhai deuh hian a ti a, "I chhuak em ni? Chhuak lo tur a ka tih che kha" khauh zetin ka pasalin a lo ti ve thung. 

"Reilote bak ka chhuak lo. Jerry-an min lo sawm a, thil ţulah ka kalpui lawk a nih kha" a ti mai a, "Ţul a awm chuan min hrilh la keimah ka kal mai ang. Chhuak tawh hlek suh" thupe aw zet hian a ti leh a, Hope chanchin hi min hrilh ngai hauh lo a, a thih em loh chuan tiin keipawhin ka zawt ngai lo, a taksa en mai pawhin a awm ţha zui lo tih erawh a hriat. Miin an la hre vak lo aniang Ngheti takngial pawhin engmah min hrilh lo.

"U Sai, lak luh ngai a awm em?" Kungtein a rawn ti ve ngei a, "Aih, Nicholas hian a khai thei alawm, bag pakhat lek a nia" ka lo ti a, pa Chhawna a lo chhuak ve a, ngaihţhat hmel tak hian min nuih a, midang chu ka hmu lem lo. 

Inchhung kan lut chu boruak a la ţha tehchiam lo tih ka hre nghal mai a, he inah hi chuan boruak ţha leh nuam ka beisei lo hrim hrim. 

"Kungte, Nico-a tih tir lovin bag te kha chu lo lak sak ve ta che. Rawng kan bawl zo vek tawh a, tih tur dang a awm tawh chuang hleinem" Nu Hlimin a lo ti hlak hlak a, a pawr lehpek khawp mai. 

"A ngai lo an tia, chuvang alawm" inthlahrung daka Kungtein a tih chuan, "A ngai lo pawh ti se han dah sak rawh. Nico-a hi nitin a phar buai a, a hah lutuk tawh" a ti a, keichu en pawh min en lo a, Kungtei chuan ka pasal bag khai lai chu a laksak a, buaina a awm ai chuan a ti aniang a lo pe ve mai a, rei tak awm loh hnua han haw leh chu ka lai ve ţut mai. 

"I lo haw tawh maw?" lo ti ve tu Anthony chu ka en a, a chanchin ka hriat meuh chuan ka hmuh dan a danglam riau tawh a, tawi te a nuih pahin ka bu nghat a, ka pasal pawhin a lo be bik lo. 

"Khaw nge Hope?" a ti ve chiah a, choka a a awm thu an lo hrilh chuan thawveng huai hmel a pu a, Hope chu engtin emaw a lo awm a ni ngei ang, a fel theih tehreng nen. 

Chaw ei hmain Pa Chhawnan chhung inkhawm neih a rawt a, Faith-i pawh an ko a, min melh ralh ralh a, min la ngainat hmel chuang loh. Rita-i a lo awm ve lo hlauh a, Pa Chhawna chuan insiamţhat an ngaih zia te a sawi a, keipawh min zilh tel tho a, Pathian thu a chhiar laia nu Hlimi lo Amen leh ţhin chuan nuih a ti za lek lek a ni. 

Buaina lian tham em em tawk lovin kan cheng ho ve ren rawn a, nu Hlimi leh Faith-i te pawh an fel viau a, Hope ngat phei chu in a ka awm chuan ka bulah a tap deuh chawt reng mai. Ka nute pawn min lo be ve reng a, hrehawm ka tih leh tih loh min zawt chamchi a, hunawl a neih chuan a lokal veleh zeuh zel bawk. Keipawh ka rit chho ve zel a, zingkarah ka pasal nen kan walk ţhin a, sawm ngial mah ila Hope a lokal ve duh ngai lo. Damdawi a ti nasa a, a inchiu em lo nain Kungtei hian damdawi kawr leh a bur te a chhar fo thu min hrilh ţhin. Chuvang te chu aniang zingah a tho thei lo a, class pawh a kal tawh ngai lo. 

A nuam chho viau dawn emaw ka tih laiin englai maha min ngaithei ngai lo na na na chu an zia a chhuak leh ţan a, min sawi el nan Chhandami hming thlengin an lam ri leh tawh. Pa Chhawna a chhuak daih zel a, ka pasal lah chuti bawk. Anthony lah huana riah a ching a, min hriatpuitu chu Kungtei leh Hope te an ni mai, anni lah an hlauh loh mai bakah Hope ngat phei chu engahmah an ngai lo a, a ngaihtuahawm tawh loh deuhin an hria aniang amaha pindana a tawm vang vang pawhin an ngaihven nghal chung tawh ngai lo. 

Ţum khat choka a bean ka then mawlh mawlh laiin Faith-i leh Rita-i an rawn inzui lut a, henu lah hi damlo inti ve si a ţha ţung reng mai. Nu Hlimi leh Hope pawh an awm a, Kungtei a insu thung. 

"Nu, enteh U Rita-i zin lo haw hian thil min lo hawn a, en ang u..a nalh hmel hlawm tawp" Faith-i chuan a ti lang lang a, an lo u ve ta alawm. 

"Hope, nangpawh ka hawn sak che a nia aw" Rita-in a tih laia Hope ka en chuan a lo chhing leh diar diar tawh a, thingpui no leh chhang a keng a, a mitmeng a vai leh riai tawh. 

"Ka cher lutuk ka ha tawk ve lo ang" a ti nawi niaih a, Nu Hlimi chuan a en vang vang a, ka ngaihbel nge a rilru a nat ve hmel riauin ka hria. 

"Saii, i haw na a rei leh tawh tih ka hre tho nain nau i pai sia, i hak tawk tur awm ka hre ve lo a" pawi ti awm taka a tih chuan, "A pawi hleinem...ka pasalin hak sen loh min leisak tho alawm" ka ti ve ngat a, a nui hmel chuan a mit a thleng lo chiang hle. 

"A ho lutuk te ti ve mai la, nang lah hi mi rilru ti nuam lo zawng hian i ţawng kher zel a" awki pangngai taka nu Hlimin a lo tih chuan, "Ka pasalin min leisak ka ti a ni mai a, rilru nawm lohna tur a awm em ni?" tiin ka zawt let a, fate heti khawpa an buai a, ruihhlo hial an khawih tawh chung pawh a inhmuhchhuah nachang hre lo nu chu ka zah peih tawh bik lo, engahmah ka ngai lo a ni ber tawh zawk. Fel leh ţha a inti em a, a fate buaina pawh hi a thiam lohah a ngai lo aniang, Pa Chhawna erawh chuan tun hma zawng aiin Pathian a bel nasa zawk tih ka hria a, ka lawmpui, amah pawh a hahdam deuh tawh ang. 

"Aaa...i lo tihdan ki kha a nia a sawi, i lawm loh hmel em a, chu lam zawk chu" Faith-in a lo ti veleh a, tun hma ang chuan min vin pang pang ngam tawh bik lo. 

"Lawm loh nachhan tur ka nei hleinem. Pangngai deuhin ka chhang a, lak kawih tur in zawng zawk aniang. Bakah thawmhnaw hi duh zawng bik ka nei a, mi nazawng lei hi ka ha duh ngai lo. I zin leh hunah pawh min hawn ve dawn chuan min lo zawt lawk dawn nia" ka ti a, an ngawi ţhap a, rapthlak min ti leh hlawm viau ang. Engpawh huamin ka haw leh a, a hma ang khan ka inchin leh tir nawk nawk tawh dawn bik lo. Engtin pawn lo awmin, lo ti let ve pawh ni ila thiam ka chang ve thei tawhin ka hria, ka tuar rei ve emai. 

"Hei ka thil hawn hi ha chhin rawh u" Rita-i chuan a ti ta daih a, "Tunlai chu Chhandami nen kan inbe ve zeuh zeuh a, a mak tak tak a ni. A pasal leh ka cousin hi an lo inkawm ţhin reng a, kan hriatna pawh a la rei lo. Khawvel hi a lo zim takzet a nih hi. A pasal leh ka cousin an lo inkawm vang te pawh aniang kan inbe ve tawp a, rin aiin a fel. Mizoramah ka awm tam lo lutuk a, awm tam ila chu hman hmanah khan kan inhre tawh ang. A pasal pawh ka lo ngaihven ngai em em lo a, ka hre chiah chu mak ka ti a sin aw" a tih zawm zat zat a, engah vak ka ngai lem lo. Chhandami nen kan la inbe leh lo a, ka pasal phone ah pawh ka la block reng. Rai puar luah chung chuan hetiang a chek hnawk ho hi ka mamawh lo khawp mai. 

Pa Chhawna lo hawin nu Hlimi hnena "Camping ah lut rawh" a tih chuan ka pasal a lo nui chhuak hawk a, ka nghawk sawk a, ka nuih a za ve tho nain ka nui duh lo lui tlat. 

"Ngah nge maw ka luh ve ngawt ang le? A lo chhuak leh ho kan lo hmuak zawk ang chu" Nu Hlimin a tih chuan, "Chhungkuaah chuan nu ber an pawimawh a, lut ngei ngei rawh. Camping a luh te hi a ţha" a tih leh chuan ka pasal chu insum thei lo berah ţangin a lo nui leh a, kan dinna lam chu rum zetin nu Hlimin a rawn melh a, "Remruatsak, eng nge i nuih i nuih a? I nu hi min nuihzat tihna em ni?" a ti khar khar mai. 

"Hope nen hian lut rawh u..Faith-i pawh lut ve sela, i lo chhuah meuh chuan i monu pawh i duat ve deuh tawh mahna" ka pasal chuan mei nei zet hian a lo ti a, "Aaa...intuaithar nan a ţha ve a, fel leh ţha kan intih lutuk chuan Pathian kan hlat viau tawh a ni ţhin. Kan inchhung boruak a hrehawm a, nu leh pain kan zir loh chuan a hahthlak reng ang. Kei lah ka hman si lo a, nang tal lut la, Hope leh Faith pawh duh leh tel ve se" Pa Chhawnan a tih charh charh lai chuan Hope chu a ngawi ran a, a kekawr ipte a a cigarette ah chu a pawng purh a, an hau ve ţhin tak nain tunah chuan an hau peih tawh lo. 

"Hope hi lut se a tawk mai" Nu Hlimin a tih chuan Hope a lo nui hak a, "Ve tak cheu hian..ka sualna chiah hi in hmu lian a, mo pakhat chiah in la nei a, ţhat pawh in chhuah theih loh laiin midang ka vei e in han ti vel a, biakin chhungah ring tak takin in ţawngţai a, in ţap pur a, mi fate sualna lah in hria, pawn lamah in rel a, biakin chhungah in ţawngţaisak a, kei ai chuan Pathian hian a haw zawk ang che. Rita-i a lo lan ngun deuh leh in buai vek a, U Saii in iai nghal zel a, in hmuhsit ngawih ngawih ţhin U Chhandami in sawi mawi leh tawh a, ih maw Nu, Vanram i kai phawt chuan rui chung pawh hian thi ila vanram ka kai ve ang" a ti salh salh a, "A tawk e Hope, insiamţha ang u kan tih tawh kha" Pa Chhawnan a lo tih chuan, "Ka tum alawm. Ka nu te ho hi chu e..mahni inchhung siamţhat hmasak tum lovin midang siamţhat an tum a, inchhungkhur vei mang si lovin mi chhungkua an vei daih a, famkim bik mang si lo hian mi sualna an hre thei em em a, mahni in en tum mang si lo hian hmuh kim loh neih hlau ni awm takin midang a en chiang a, ka hrethiam thei lo. Hetiang nu ka nei hi ka zak ngawih ngawih, min hring tu chu ngei chu ni lo se hnawtchhuak turin ka ngen ngei ngei ang che. Tlaiah pawh khan Rita-i a lokal a, an pak leh huam tawh kha. U Saii pawh an ţawngkhum leh fek fek tawh alawm. Ko sek suh u, an inah hahdam deuhin awm rawh se, kan inah chuan nuam a ti rei dawn chuang lo ka ti mawlh mawlh a, in ko haw lui a, an ze ngai an chhuah leh tawh kha. Ka kham hlawm cheu nia" a ti a, a ţhutna aţang chuan thoin zawi deuhin kai lawn a pan a, a thawmhnaw hak a lian si, a sam a pawr bawk si, tunhma a Hope kha a ang tawh hlawl lo. 

"Camp ah chuan lut rawh. Fate aia mi fate i vei zawk ţhin te, inchhung khur aia khawtlang siamţhat i duh zawk tlatna rau te kha a bo ve mahna" a ti leh kher a, kailawn a a chho chu kan en ţhap a, Pa Chhawna ka khawngaih leh hle tawh. 

"Engtin nge an tih che?" ka pasalin a tih rualin Pa Chhawna chu a ţhu hnawk a, a hmai a tuai puak a, a beidawn hmel ngawih ngawih ka ti mai, a khawngaihthlak lutuk. 

"Pindanah chho phawt teh ang" tih leh kal ka rual a, Nu Hlimi te chu Pa Chhawnan a zilh dawn tho a, ka pasal pawh a hranpain ka hrilh ve mai aniang chu. Buai luih luih ka peih tawh lo a, ka rit ve tawh bawk nen, mut mai mai a chakawm zawk. 

"Engtin nge an tih leh tawh che?" pindan a kan luh rual chuan a ti ram hmuk a, ka thaw hak a, khuma ţhut pah chuan Rita-i lokal laia thil thleng vel chu ka hrilh a, "A tam mai...tunhma a i lo kawp ve chawt ţhin a nih avang hian i hmangaihah an ngai a, natna a neih hnu phei hi chuan i rilru hi Rita-i lamah a let leh turah an ngai a ni ber" ka ti a, an thusawi hmang aţanga ka hriat dan a ni. Rita-i ngei pawhin, "Mipa chu an hmangaih hmasaber nih ai chuan an hmangaih hnuhnung ber nih ka duh zawk" a ti a nih kha, ka pasal hming an sawi lo nain ka lo man thiam ve. 

"He nu tei vet lah hi..eng natna mah a nei lo. Ka awm laia lokal ngam mang si lo awm loh veleh a rawn lawr sek a" a ti hluk hluk a, "I hmangaihah an ngai a, in hmangaih lo tan kha leh chen kha inkawp theih a ni lo an ti alawm" ka lo ti ve thung. Hope pawn an thusawi kha a hre ve a, engahmah ngai lo angin ka awm a, ka lo sawipui ve vel nain rilruah a awm zui rauh rauh thung. 

"Nang bak hmangaih ka nei lo ka tih tawh kha" ka dar tawn tawn a dawm pah hian a ti a, "Hmangaih ka lo nei ve tawh a nih pawhin nang nen a kan intawn hma daih a ni. Nang chu ka damchhungin ka hmangaih tawh ang che" thutak zet a a tih chuan a mitmeng ril ruihah chuan ka lo en a, "Rita-i hi ka hmangaih ngai lo a, ka hmangaih awm chhun chu nangmah chauh i ni" a ti a, ka dul lam chu en thlain, "Leh lawk...ka sawi theihnghilh, naute nen hian" a ti leh a, a ho zo leh vek tawh. 

"I fa a ni a, i hmangaih ve bawk ang chu. Fate em em chu ka thik bik hleinem" ka tih chuan a lo nui suk a, "In pahnih hian ka hmangaih che u. Hmangaih lo nei tawh ţhin mah ila nunhlui a ni tawh, ka thawk tawp thlenga ka hmangaih tawh tur chu nang leh naute chiah hi. Chuvang chuan engpawh thleng se khawiahmah min kalsan tawh suh" a ti dam thlup a, muangchangin ka lo bu nghat nghat a, ka lawm em a, ka nui tel bawk. 

"Rita-i chu lokal leh mah se engahmah ngai suh. A duh dan danin lo phar kual ve rawh se. Duh leh insect killer ten lo kap la" fiamthu a a tih chuan ka nui chhuak ta hak hak a, thawveng huai ni awm takin ka dar a vawnna chu a thlah a, ka bek tawn tawnah dawmin inti neitu fahranin ka hmuiah chuan a fawp a, inlakhran paha, "Va inbual rawh" ka tih chuan a thaw hawk a, ka dul a pen keuh chu a chhan ka hre der lo. 

"Kha kha engvang nge?" ka dul dawm chunga ka tih chuan, "Ka lai" tih leh thawh a rual a, towel banin bualin ah a lut a, a pheikhawk pawh a phelh hauh lo. 

Pheikhawk bawm a a chapal chu ka la sawk sawk a, bualin kawngkhar chum bur bur pah chuan, "Eng nge i hriat a? Kha i chapal te hi la ta che. Khatiang pheikhawk ţek ţuk nen khan engati nge bualin ah i luh nulh a?" ka ti lauh lauh a, kawngkhar chu zimtein a rawn hawng a, "Ka fawh che khan nuam i tih loh hmel" a ti mauh mai a, a thutak em em mai lehnghal.

"I ninawm...i thu khel a ho thei emai. Inbual mai mai rawh" ka tih chuan, "I lo lut ve duh em?" a lo ti leh a, "Duh lo, ka inbual daih tawh alawm. I bulah thla tam tak ka awm leh tawh hi, ka kalsan che i la hlau reng tih ka hria a nia aw" ka ti kha kha a. 

"Aw..khawhar ka peih tawh lo. Ka khua a har ţhang a, ngaiah ka nei thei chuang lo" a ti a, kawngkhar chu a khar zui a, mi khawhar leh mal tak an nih ve ve avangin Chhandami nen pawh an inhnaih phah tih ka hre tawh a, naupanlai aţanga khawhar ţhang a ni a, kha khan tun thlengin mal taka awm hlauhna a la neih tir niin ka hria. Naupanlai hun hi a lo pawimawh khawp mai, kan thil tawn hian puitling kan nih hnu thlengin min nghawng thei tlat a, hei vang tak hian alawm ka nau pai lai hi ka ngaihtuah em em ni. Thla rei lote hnuah nau ka nei ve mai ang a, theihtawp a ngaihsak a duat ka duh a, naupanlai hun nuam tak hman tir ngei ka duh a ni, nu leh pa karah ni ngei bawk se. 

Ka pasal chu zanah an thawhpui, kan ngamtlak tak, keipawhin a hminga ka koh nalh nalh theih chu a thih thu an rawn hrilh a, "Lokal ve rawh ti ila i chau dawn a, nangmahin i lo awm hreh em?" a ti ve ngial a, ka hreh loh thu ka hrilh a, hetiang mitthi leh thla tih vel hi a ngaina hran lo a, hei vang hian dawih deuh turah min ngai ve ţhin. Inti pa deuhin mitthi leh thla a hlau tihna a nih ber chu. 

A insiam laiin Chhandamin ka phone ah a lo call a, "Mitthi kha ka hre ve a, kan inhre ţha ve angreng a, kal ka tum a, Nicholas a kal ve dawn em?" a rawn ti a, ka pasal chu ka melh ralh a, "Aw hei a insiam. Zan a rei tawh si a, engtia kal nge i tum?" ka tih chuan, "Ka hre lo a, kan pa hian min thlah thei maithei a, thei lo maithei bawk a, Nicholas kha ka lo bia ang chu" a ti a, chhiatna lam a ni bawk nen, phal loh chi a ni tawh lo. 

Phone pek paha "Chhandami" ka tih chuan phone chu a la ve ngei nain keimah zawk chu phawk deuhin min en daih a, "Be ta che" ka tih leh takah chuan, "Eng nge?" a ti hmuk a, hriatchian loh chuan a mitmeng te, a awki leh a ţawngkam te hi a nelawm loh ve thlawt a ni.

"Kal dawn e" a ti leh tawp a, a ngaihthlak leh ren rawn hnuah bul zet hian, "Ka hre nang" a ti leh a, a be ţha duam lo chuan ngaih chu a ti ţha ve chiang alawm. 

"Aaa..inpa kha kaitho rawh. Hner hnur mai, hnar thlurh thlurh lo khan tho se inthlah tir rawh. A ţulah chuan inthlahrung suh" a ti deuh hluk hluk a, Chhandami mizia hi ka hrechiang tiin ka sawi thei lo a, ka ngaina tawh miah lo. 

"Kal lo mai rawh an vui nghal dawn lo" a ti leh a, Chhandami aw chu ka hre pha ruai nain eng nge a sawi ka hre lo, ka pasal zawk chuan, "Kha" tih leh phone min pek a rual a, a la tih tawp loh avang chuan, "Min be duh mi?" ka ti thla rawk a, "Aw..be duh e. Kan pa hi a nuam lo a, a muhil tawh a, naupang pahnih awmpui an ngai bawk si, a kalna lam tur a ni tho a Nicholas khan min lo lam se pawi i ti em?" a ti vei thlap a, a nuam lo lek lek zawk alawm le.

"Awww...i kal ve duh miau te chuan" ka lo ti ban charh a, "Kal duh teh meuh mai. Ţhian hi ka ngah lo a, chuvang chuan ka ngaipawimawh ve lutuk a, ka ţhian tlem te zinga mi a ni ve a" a ti a, a ngenngawl angreng si a, ka pasal hnenah chuan, "Lam kawi mai rawh" ka ti ta nge nge a. 

"Nakinah chuti khati i ti leh ang e" a lo tih chuan, "Ti lo ang...ka ring che alawm...min hmangaih bawk a" a taksa a kuah paha ka tih chuan, "Hmangaih e" a lo ti thum dût a, "A nih chuan lam phei rawh. Kalna tur a neih loh miau chuan tih ngaihna a awm hleinem. Chhiat tawhna lamah chuan inhriatthiam a ngai ţhin a, va ti hawrh lo la a ni mai" ka tih chuan uang zetin a hnar a lo tum dat a, "Eng nge ka an? Ti hian ka kal dawn" tiin min han rawn ve a, tlem a tawlh hla deuhin a thawmhnaw hak chu ka en a, "Umm...a ţha, hundred percent-a i ni leh tawh" ka tih chuan nuih hawk pahin min kuah a, a chhipah chuan fawp zauhin hreh deuhin min kalsan a, Hope-i thawm ngaichang turin min chah bawk.

Kan inchhung boruak hi tlem chuan a danglam ve deuh a, ka pa'n kan nupa chunga mawhphurhna a nghah hnem tawh vang a ni ber. Hope pawh ka pasal kutah a awm chawt a, a ngaihvenin khauh deuhin a enkawl a, a veng reng seng bik lo nain a zia chhoh zel kan beisei. Nu Hlimin thuneihna a nei tawh lo ka tihna a ni lo a, nu ber a nihna angin zah turin min ti a, amaherawhchu, Nicholas a dah chungnung ve deuh tawh a, Faith-i hnenah pawh 'i u rawn rawh' a ti ve ta fo mai. Indan kan cho si a, kan indan a hloh vang a ni berin ka hria. Nu berin a zia a chhuah leh zeuh zeuh tawh nain tun hma aiin ka nuam sa daih tawh zawk a, Kungtei pawn min hlau der veleh tawh hle a, Hope nen kan la inkawmngeih reng nain a inhawng ţha duh vak tawh lo a, ka thlavang erawh a hauh hlur reng a, a thu lo ve em zawk a ni. 

Kan ţhianpa boral hnu lawka ka night tur chu ka pasalin a huphurh ngang mai, "Sulhnu chhui leh nunhlui ngaih chu tih hla kha sak pahin i night ţum chuan khum hi ka chul kual ţhin" a ti vel a, "I ţhianpa i hlauh vang a nih kha a, inti pa hle si dawih leh lutuk mai" ka ti hlak a, ka insiam zui mawlh mawlh a. 

"Hlauh ka nei lo aw..ka ngaih vang che a nih hi. Min va ngaihsak ţha duh lo ve, dawih min ti vel a, nangnu hi min hmusit chiang mai" a ti fiamthu a, nui hak hak chung hian thawmhnaw ka thlak a, rai puar avanga night loh ngawt thu a awm si lo a, chubakah chet harsa khawpin ka dul a la lian bik bawk si lo, kei tak pawhin ka peih lo ve reng. 

"Ka chhuak lawk dawn, U Sai, i rualin ka chhuak ve lawk ang, ka ţhiannu a damlo a" Hope-in a rawn tih chuan, "A ţul lo" khauh zet a tih pahin khum aţang chuan a ţhu chhuak a, ka ngawi reng thung. 

"Ka ţhiannu a damlo a ka kan ve duh alawm" a tih chuan, "Chhuah a ţullo ka tih chuan chhuak lo la a ni mai. Naktuk office chawlh alawm, ka kalpui ang che" a ti bur mai si a, dil lui ngial mah se a phal tlat si lo a, lunghnur deuha a chhuah leh tak kha. 

"Anthony hi i va hlat sawt ve. In inmil ve chiah a, i hlat leh daih a" ka tih chuan, "Ka la pawm thei lo, ka rap deuh reuh" a ti a, ka hrethiam khawp mai. Ka sawipui zui duh bik lo.

Inrinni mah nise an chhuak deuh vek a, ka pasal pawhin Hope a hruai chhuak a, amaha chhuah tir chu a ngaingam ngang lo a ni. Faith pawh a leng chhuak a, Kungtei a buai deuh avangin keimahin tv ka en a, ka en duh zawng pawh ka hmu lo. Sound awm mang lovin ka hmet kual reng ringawt a, Nu Hlimi te pindan aţanga thawm lo chhuak chuan min ti phawk hra mai. 

"Min hmangaih hlawl lo, kei aia ngaih pawimawh i ngah emai. Kan fate an puitling vek tawh a, engkim an hrethiam tawh. Min hmuh hniam zia leh engahmah min ngaih loh zia hi an hmu thiam vek tawh a, Hope-i takngial pawn min zah loh hi. Tumah hian min zah lo, Anthony leh Nicholas i en hran zia te hi ka hai ring suh, engkim ka hrethiam vek a, ngawih ka chuh hram hram zawk a, thil engpawh ti dawn la vawikhatmah min rawn der ve ngai lo. Ka hma hun tur te, ka tana ţha tur eng thil mah i ngaihtuah ve ngai lo. Muantei leh Nicholas hi nangmahah an lal ber a, Muantei phei chu thi daih tawh mah se i la theihnghilh thei lo a nih ber hi. Nicholas i hmuh hian i hrechhuak zel em ni? He inchhunga inthliarna tam lutuk hi keimah vang a ni lo, i bul ţan a nih hi" Nu Hlimi chuan a ti hlaih hlaih a, pindan kawngkhar a inhawng huai bawk nen, a aw chu a ring kher mai. 

Pa Chhawna aw chu ka hre ve tak nain eng nge a sawi ka hre ţha thei lo a, zawi te tein a ţawng a nih hmel. Mahse, Nu Hlimi bawk chuan, "Nicholas hi ka nau fapa a nih vang chiahin ka pawm. I khawlai fa mai mai chu nise he inchhunga a awm ve hi ka remti hauh lo ang. Ka enkawl seilian a, ka hmangaih ve tho. Anthony nen a i en hran lutuk avang hian Nicholas nen a kan inkar pawh a zauh phah a, nangmah vang vek a nih hi" a ti leh a, hetianga nasa hian an inhau ngai lo a, ţhat chhuah tum sa teh mah se ka pa'n kan nupa a min dah lal ve deuh hi a lawm lo a ni phawt mai.

CONT...