HIS LAST LOVE-36

HIS LAST LOVE-36

"Ka lungawi lohna ka lantir ve lahin kei ai aiin in lungawi lo a, ka faten min ţawngkhum fek fek an ching tawh a, Faith-i lo chu zah der tu pawh ka nei tawh lo. Nang phei chuan Muantei chiah i ngaihtuah a, a thihna a rei tawh chu thuhran, i nupui lo zawk a ni nain ani lo hmangaih i nei thei hleinem. I thawk a tawp ve hma chu i hmangaih ang chu. Phat tum buai duh suh, i la hmangaih zia chu Nicholas i en dan leh i thil tih vel danah hian a hriat vek. Keini ho hi chu a hming mai mai chauh kan ni. I thuruk thup mawi tu te, hliah khuh tu te kan ni ringawt" Nu Hlimi chuan a ti bawrh bawrh a, a thin a rim hmel bawk si, an thusawi chu Kungtein a hriat phak hlau viau mah ila an pindan kawngkhar ka va khar sak ngawt ngam bik bawk si lo a, "Pa berin nupui fanaute aia hmei, hmana thi tawh a la hmangaih zawk chuan chhungkua a hlim thei dawn lo tih hre tawp rawh, Pathian hming lam reng mahla i nunah a lang chhuak bik lo. A tawp thlenga i hmangaih tawh tur chu Muantei leh in fapa Nicholas chauh hi an ni. I rilru diktak ka hria a, keipawh ka hlim theih reng reng loh hi. Kan thiam dan danin hlimna kan zawng chawp vek zawk a nih hi" Nu Hlimi bawk chuan a ti leh a, ka hre tam tawk tawh tho alawm tiin pindanah ka chho a, ka pasal ka be nghal zat a, "Hope hi a ţhiannu bulah a awm a, ka nghak lawk. Kan rawn bazar haw dawn a, kan la rei deuh ang. Lo mu hahdam rawh" a rawn ti a, bazar tur khan kan ring tak e. 

"Aw...chawhma lamah khan reilote ka muhil bawk si a, ka mut pawh a chhuak tawh lo. Hunawl hnawhkhahna tur ka lo zawng mai ang. Rei lutuk lo ula" ka ti a, pindan a ka tawm vang vang hnua ka chhuak chu Nu Hlimi nen kan intawk chat mai, a ding thut bawk si, tih ngaihna vak ka hre lo chuan, "Nu" ka ti hluai a, a tum bur a, "Inchung ah pangpar han buaipui teh ang. Min lo pui rawh...ţhutthleng pawh ka dah sa vek" tih leh kal a rual a, a dik ang, a thau em avang hian a in fit vak bik lo va, a awm tamna ah chuan ţhutthleng a inhung ngei ngei.

Inchung zawl ka chuan chhuah ve rual chuan, "Daihlim laiah khan ţhu rawh. Khawih vak tur pawh a lo la awm chuang lo a nih hi. Tui pe ila a tawk mai ang. Heng ho hi ka siam rem chhung lo ţhu la, tui min pek pui dawn nia" a ti leh zung zung a, "Tui pek tawp bak ka thiam ve vak lo a, tih dan min hrilh chuan a dang pawh ka thiam ve tho ang" ka tih chuan, "Lo ţhu rih rawh" a ti a, ka ngawi ta reng a. 

"I pa'n Muantei chungchang a hrilh tawh che em?" a ti deuh thut a, chutianga ka hnena a sawi chhuak chu min ţhawng viau nghe nghe a ni. 

"Aih...hrilh lo e" ka ti ban charh a, "Ka nau a nia, la dam se chu i nutei tur tihna a nih chu. Kan inneih hma daihin i pa nen an inngaizawng tawh a, i pa chhungten kei hi min neih tir tlat bawk si, kan inneih hnuah pawh an inkawp chhunzawm zel a, tun thlengin chhungkua a la nghawng a nih hi. Hei vang hi alawm Nicholas nen insawirem chawp a in inneih pawh ka remtih loh em em ni. Rita-i nen lah an inkawp nghet nasa mai bawk si" a ti chu mak ka lo ti khawp mai.

Ka mak tihna chu ka hmelah a langchhuak a ni ngei ang, "Kan inhau thawm i hria tih ka hria alawm. Pindan a kan luh dawnin tv i en a, off lovin i kalsan ringawt bawk a, ka â bik hleinem" a tih chuan za lo deuhin ka nui a, "Nupui nei reng chunga mipa in hmeichhe dang an kawp tel chuan engmah a dik thei tawh lo. In inneih ni a Nicholas leh Rita-i te inhmu ru kha ka hmu vek a, khami hnu phei kha chuan i pa thutlukna siam hi dik lo ka ti lehzual, keimah ang chiah i ni dawn a hriatna ka nei" a ti a, ka hrethiam lo khawp mai. 

"Ka hrethiam lo reng reng" ka tih chuan a chek tlak a, "Chhungte insawiremnain i pa nen hian kan innei a, kan inneih hnuah pawh i pa leh ka nau Muantei te chu an la inkawp zui zel a, an inţhen hleithei lo. Muantei a rai ta reng a, tunge a pa ti a an zawh ngial pawhin a sawi duh lo a, keimah bak hre tu an awm lo. Nicholas hi a pai a, vanduaithlak takin nau chungah a thi hlauh a, ti hian kan enkawl zui ta a nih hi. Thi lo phei se chu tun thlengin i pa nen hian an la inkawp zui zel ang chu. A hmangaih hmasaber a ni a, a hnuhnung ber a ni bawk. Muantei tan lah chuti bawk, a thawk tawp thlengin i pa hi a hmangaih alawm. Kan fate an lian a, Nicholas pawh MCS lai niin hna nghet a chelh ve chiah tihah i pa chuan a nupui tur zawn a sawi a, fate nupui pasal tur zawn sak hi an thisenah a bet a nih ka ring. Ka ngaihtuah a, a kum a la nau si, Chhandami nen an hming an sawi zawm reng a, Rita-i hming hi a phone ah ka hmu fo bawk. Chuvang chuan ka remti lo a, keimah ang chiah i ni dawn tih ka hria a ni. Pafa an ni a, inchhunna lai an nei dawn tih ka hria a, ka fapa ang chiahin en ve mah ila nupui nei reng chunga ngaihzawng neih a hreh ka ring bik lo, i pa ang chiahin. Mahse, dodal nasa viau mah ila i pa chuan thu a kal tlang pui a, Nicholas lah a thinurin Chhandami nen an inphur chhuak an hmu fo a, ţhulh leh mai turin i pa hnenah ka ngen fo a, awmzia a awm lo. In han innei a, in inneihni ah la la Rita-i nen ka hmu dun nghal pang a, ka thil tawn tawh, ka chunga thleng tawh ang kha a ngai angin a inher nawn leh dawn ni a rinna ka nei lian a, i pasal i duh tak tak hma, rilru i pek hma khan chhuak daih turin ka duh che a, nang lah i luhlul ve tlat bawk si" a ti a, a thusawi leh ka chunga a awm ţhin dan chuan awmzia a nei chho viau mai. Amah hrim hrim hi chu tuman an fak lo a, a ţawngthei an ti bawk. A mizia chu engpawh lo nise ka ţhatna tur a duh ve ni a rinna ka nei a, ka hmuhdan pawh a danglam deuh, a mak tak tak a ni. 

"Nicholas hi mipa a ni a, kan hriatah a mimal nun engmah a chhakchhuak dawn lo tih ka hria a, duh deuh ang che a a awm ţhin te hi ringhlelh riau chang ka nei ţhin, a chhan chu i pa pawh hmeichhe dang kawp reng chungin min duh ber angin a awm tho. Rita-i a rawn inlar a, thiam takin ka zawt a, a sawi ţha duh par par bawk a ka fapa nen an awmdan zawng zawng reilote chhungin ka hre vek. An in hmangaih dun zia leh kan inchhunga tih lan a rem loh thu thlengin a sawi a, nau a pai loh nan a inveng tlat rih turin ka hrilh ţhin a, ka be ţha huam bawk. Nicholas nen hian innei zawk se ka tih vang a ni. An inthlah thei lo a, a hmei anga a la awm char char tho a nih chuan keimah ang bawkin hmeichhe dang fa i pawm a ngai dawn tih ka hre lawk vek" a ti a, a hlauhna chu ka hriatthiam pui. A thil lo tawn tawhin a nghawng nasa em a, a tawn ang deuh chiah a thleng leh bawk nen, thawnthu hlui kha a inher let leh a hlau ni berin ka hria. Mihring hi kan thil tawn tawhin min nghawng nasat lutuk chuan hlauhna kan ngah bik a, thil en liam mai mai kan harsat a, kan hlauh ber kha a thleng leh turah kan ngai tlat tawh ţhin. Mizoţawng hian sawifiah vak a har a, trauma tih hian a chiang ber mai. 

"Rita-i chuan dawt a hrilh che a nih hi. Muantei ah i chan a, Muantei ang hmakah i ngai a, kan inneih niah ka pasal nen i hmu dun bawk nen, a thusawi zawng zawng i lo awih nghal vek ringawt a, Muantei ni lovin Rita-i a ni a, ka pasal pawh ka pa ni lovin Nicholas a ni. Rita-i chuan dawt a sawi nasa a nih chu, an in hmangaih hleinem. An inngaizawng lo va, ka pasal hian chutiang zawng chuan a en ngai lo. Inchhungah pawh midang mitmei an ven vanga inbe ţha lo angah nang chuan i ngai a, Rita-in i thluak a suk sak che a nih chu. Ka pasal hian tu mitmei mah a veng lo, Rita-i hi a be peih lova, engahmah a ngaih loh vang zawk a en liam mai mai a ni. Ka pa hian Muantei chu a lo kawp zui a ni maithei a, mahse Nicholas chuan kan inneih hma khan hmeichhe dang nen an inzawmna a pawt chat vek a, min hmangaih nghal hauh lo, nupui nei chunga ngaihzawng dang neih a duh lo vang zawkin chutiang thil chu a ti a ni ber. Ka pa nen hian pafa, thisen inzawm chu an ni ngei a, in anna lai pawh tam tak chu an nei, mahse hmeichhe dang chungchangah kher kher chuan an danglam hlak" ka ti a, mak a lo tih hmel khawp mai. 

"I chunga lo thleng tawh ang kha thleng leh turah i ngai nghal ringawt a, kha khan i rilru a hruai sual a, mi thusawi mai mai pawh i awih phah a nih chu. A awm ve tho a, mihring chu hetiang thil kan tawn hi chuan kan â vek tawh zel a, a thim zawng hian kan ngaihtuah nghal ringawt zel, a bikin hmeichhia phei chu kan ngaihtuahna a kal thui ţhin a, thil ţha lo, nun zawng zawng nghawng thei i lo tawn tawh avang a nih kha. I pasal neih ang chiahin pasal ka nei veleh a, chuvang tak chuan i hlauhna kha a nasa lehzual a, nangmah ang chiaha ka awm ve i rin phah a nih kha. Hlau tawh suh, Nicholas hian ngaihzawng a nei hleinem, Rita-in thiam deuhin dawt a hrilh mai mai che a nih chu. I rilru tur chu ka hriatthiam pui che alawm, hman aţanga a lo kawp tawh, kei aia a tawn hmasak a nih miau avangin a la duh turah i ngai a, chuvang tak chuan nangmah ang ka nih ve loh nan a tlai hmain kei hian ţhen ila, Rita-i nen innei zawk se i ti a, a chhan chu ka pa hian tun thlengin nang aiin hmeichhe dang a la hmangaih zawk ni a i rin vang a ni. Chutiang chiah chuan Nicholas pawhin nakin zel thleng pawhin kei aiin Rita-i a hmangaih zawk a ring a, pakhat lah hian i rilru a hruai kawi thiam bawk si. Mahse, i hlauh ang kha engmah a thleng dawn lo" kut vai chung meuh hian ka ti a, vawikhat inhawng taka kan ti ti dun ve na a ni a, nuam ka ti a, ka khawngaih thar riau bawk. Anthony pawh a upa ve tawh a, kum tam tak chhung, pasal a neih ve tirh aţangin khawhar leh mal ngawih ngawihin hun a hmang ve ţhin tihna a ni mai. Inchhungkhur enkawl a thiam lo a, a nihna diktak Hope-in a sawi kha a dik vek bawk, mi fate sualna hmu lianin fate a hmu ţha bik a, inchhungkhur aiin khawtlang a vei bawk. Hope sawi kha dik lo a awm lo. Mahse, hmangaihna kawngah a hlawhchham ve a nih hmel. 

"I sawi dik alawm. Ka â lo chauh ţhin reng a, doctor pawh ka pan ngun ţhin viau reng a ni. Anthony-a dik lohna kan hre chho a, i pa lahin engkim Nicholas kutah a dah a, kha te kha Muantei vangah ka ngai lo thei lo. Aaa...ka â zo tawh a nih ber chu. Anthony hi engtin pawn awm se ka fapa a ni a, keichuan tawp chin awm lovin ka hmangaih tho. En hran bik ka phal lo a, a nihna ang ang hian ka pawm vek. I sawi ang khan ka chunga thleng ang hi hmeichhe dang chunga a thlen ka duh lo a, ka mihlim pui, ka pawisawi ţhin, ka mil loh em em te chunga thleng ve tur pawn ka duh chuang lo. Hmeichhia te hian hmangaih kan phu a, hmangaih nih kan duh a, kan pasalte ber hnen aţanga hmangaihna kan dawn loh chuan nun hian awmzia a nei lo a, fate ringawt chuan min tihlim zo tak tak lo. I luhlul vanga awm luiah ka ngai che a, ka pasalin min hmangaih lo pawh nise ti tlat turah ka ngai ţhin che a, chutiang chu ka duh loh zawng tak a ni. Hmangaihna hi runluih chi a ni lo, luhlul vang ngawt a neih theih a ni lova, nem lutuk vanga neih theih pawh a ni lo. A ngena ngen chhuah theih pawh a ni lo. Fimkhur a ngai a, a harsa a nih pawhin nakin zel a kan hlim zawk theih nan a chang chuan kan hmangaih ngawih ngawih te hi kan kalsan a ţul chang a awm ţhin. Keipawh ka tlai zo tawh a, ti hian ka pasal hmangaihna dawng ve hauh loin ka thi dawn a nih hi" a ti a, Pa Chhawna nen an inhau a, a rilru no a chhuak aniang a inphawrh ţha duh khawp mai. Rilru no lai a nih chuan hmeichhia chu kan inphawrh fai leng zel a, tuna ka hnena a thusawi ang hi nakinah chuan a sawi leh duh tawp nang. 

Kan ti ti dun zel a, a bul berah chuan a thil lo tawn tawh te, Rita-in dawt a a thluak a suk sak vang te, kan inneih ni a ka pasal leh hmeichhe dang a hmuh dun vang te a ni ber a, amah a lo fel vak lo hrim hrim bawk nen, engkim a inla lawn chho vek tawh a, ka hrethiam uarh mai. Nicholas hi a sawi ang khan a hmangaih ve tho a, a bialnu ni a a ngaih, rei tak a lo kawp tawh Rita-i hi nei se tihna rilru a pu bawk a, chuan keipawh pasal te hmangaihna thlahlel, dawng thei si lovin ka awm dawn lo tihna a ni. Sual a chhuah tlat ţhin hi chu sawi mawi luih chiam ngaihna ka hre lo, a fel vak lo ka tih tawh kha, inhawng taka kan ti ti thei pawh hi an inhauh vang chauh a ni. A chak lohna ber thil an sawi chhuak laklawh bawk si, ni lo se chu a rilru put hmang diktak pawh ka hre tawh nang. Han fak chiamna tur ka hre lo nain a hma ang em chuan ka haw tawh lo a, ka khawngaih bawk tih hi kan sawi leh hram ang e. 

Pangpar tui kan pek zawh dawnah meuh chuan, "Rita-i chu ka hau khawp ang. Puitling dawt dawt hrilh tur a ni hleinem. Ka thil lo tawn tawh avangin ka buai a, bum pawh ka awl ang. Midang chak lohna hman ţangkai tur a ni hleinem. I pa lahin Rita-i hi i fanu nen hian luhkhung rawh u, a cancer te hi chaw ngheiin, cher bawih khawpin ţawngţai sak rawh tih thlengin min ţawngkhum tawh a, mahse natna hi chu natna a ni mai a, in sawisel chi a ni lo" a ti leh hlak hlak tawh a, ţawng mawi lo ni lo se a fing var vak lo bawkin ka hria. 

"A cancer hi eng nge a an zel a?" ka tih chuan, "A ţha zel chu a nih hi...a sam pawh a kawlh ve lo a, a vannei tak tak a ni. Khu, Sangpuii te kawmtlang nu pawh khu professor lai a ni a, a cancer a, an in enkawl a, a sam a tla kawlh mul mai. Kan Rita-i hi chu a vannei a nih hi" a ti a, awih loh nachang pawh a hre lo. Keichu ka hriat tirh aţang khan ka awih lo nghal a, cancer tak tak nise heti taka a thawven theih ka ring lo, piangthar ţha deuh pawh an nguai rawih zel a nia. 

"Hope hi engtin nge ni zel dawn? Damdawi a lo khawih ve kher kher a a pawi emai" ka ti leh halh a, Hope kal sual ta hi chu pawi ka ti ve takzet a ni, han tih vak ngaihna ka hre bawk si lo.

"Ka hre lo le...a damdawi ei ţhin lah hi a ţhen chu mum tereuh te te a nia, ţhenkhat lah a te vak lo a, a tui a in bawk. Han hau ila a pawr pawrah a ţang bawk si. A bialpa nen kan pawt ţhen kha a la na aniang ti dawn ila mipa ka mamawh lo a ti fo bawk si. In hiah neuh neuh te a ching a, inchiu hrep ţhin ang mai a ni. Hriau hi hlau viau lo se chu a inchiu ve hial tawhin ka ring. Camp ah lut se a ţha ber, a nih loh leh home ah awm se la, Nicholas pawn home a sawi rik ţan tawh kha" a ti leh hlak hlak a, a aw a nem leh vak tawh lo a, a ze ngai a chhuak leh ţan mek tih a hriat theih bawk. 

"E...hetah a ni maw in lo awm?" ka pasalin a rawn ti a, kan awm rei bawk aniang ni pawh a hniam ruih tawh. 

"I nau i hruai ve si a, i kal hran tir em?" Nu Hlimin a lo tih chuan, "Aih, ka bulah zel alawm" a lo ti mai a, "Ven fimkhur an ngai a nia. Hetiang ho hi chu an zei lutuk, khuh kharh chung te hian an inpe zeuh thiam a, inchibai ni awm taka awm chung te hian strip 10 lai an inpe ru thei ang chu. Ka bulah a awm tih vang ngawt a ngaihţhat chi a ni lo, kawrhnuai chhung leh sam kar zawng zawng thlenga endik sak thlap an ngai. Dildar an ti em ni? Khatiang kawr chhungah te khan an thun ţhin a, i pa'n i kutah a dah a nih rau rau chuan veng fimkhur viau rawh" nem vak lo hian a lo ti leh a, "Fimkhur e..ka en uluk alawm" pangngai tak hian ka pasal chuan a lo ti leh a, "A ţhat chu...camp a luh duh loh chuan home ah dah rawh. A hlimchhawna ţan kan lak loh chuan kan ti sim zo lovang" a ti a, pangpar tui pekna chu dahin min kalsan a, kan nupa chuan kan in en hrek hrek ringawt a, Nu Hlimi chhuahna lam kawh pah hian, "In inhau em ni?" a ti ban charh a, lu ka lo thing vat a, a fel rei lo ve khawp mai. 

"Kal teh ang" tih leh min kuah a rual a, pindan chhunga ka lut chu ka dai sawng sawng mai. 

"Day off hunah huanah kal ang aw" zangkhai deuha a tih chuan, "Eng nge kan tih ang?" ka lo ti ha a. 

"Kan inti hlim ve ang chu" a ti a, ka lo hnial lem lo, nupa chauh a chhuah kan nei khat a, kan chhuak dun ngai tawh lo pawh ti ila ka sawi sual lovang. 

"Kan kal dawn nia, chhungkaw thlalak pawh kan la nei lo" tih paha ka dul ka chul chuan min lo nuih a, lo piang vat se a ţha ang, a pa hi chhun bawk se la, a hmelţha deuh ang. 

Chaw ei laiin pa ber chuan camp luh chungchang bawk a sawi leh a, Nu Hlimi a tum bur a, Faith pawn a hre lo der hmak mai. 

"Hope, i lut duh em?" zaidam deuha a tih chuan, "Ka nu a luh chuan ka lut ang. Keimah chiah chuan ka peih lo a, ka nu'n min luhpui rawh se" a ti ta tlat a, "A ho mai mai emai. An deputy speaker lah kan khaw chhuak a ni a, Anthony te aia u awrh, sazu kawh teuh a khawlaia a tlan ka hmu ngun emai. Midang an nih hunah keichu ka la lut ang" a ti ta daih a, ka pasal ber chu a nuihza ah a ţang leh a, "Chutiang sawi kher a ngai hleinem. Pathian alawm in luh chhan tur, intuai tharnan a nia ka tih" Pa Chhawna chuan thutak deuh hian a lo ti a, "Nang hi i rilru a dik lo. Pathian mi hriat a nihna aiin a sazu i hmu lian zawk a" tiin ka pasalin a lo fiam ve bawk a, an nui tet tet hlawm a, sawi zui hleihtheih pawh a ni lo. 

"In tih tlat chuan kan lut mai aniang chu" nu ber chuan a ti ta nge nge a, "Camp luh hmaa i lam pawh a pui a nia, camp chhuah hnuah phei chuan cyclone a ni ringawt ang. Lamtual lai takah i vir chur chur tur hi a pui dawn, camera nen ka inkhawm ziah ang" tiin ka pasal bawk chuan a lo fiam leh a, a malah ka kheuh ru zauh a, nu ber lah a tum lian tawh ropui mai bawk si, fiam zui chi pawh a ni tawh lo. 

"Lehkhazir ka duh a, ka lut ve lo mai ang. Enteh pa, sumdawnna lamah ka kal ta lo rau rau bawk a veterinary doctor nih ka duh. Tlai a awm chuang lo a, ka zir dawn mawni ka ti. Ka la naupang tho a, hun ka la ngah e" phur tak hian Faith chuan a ti a, a sual viau nain a hunah chuan lehkhazir a peih reuh a, a tum phawt chuan sang deuh a thleng thei ang. 

"Chak zawng zir tluk a awm hleinem. In zirna tur ka thawhchhuah theih chhung chu in duh duh in zir dawn nia, Hope pawh designer nih a chak a, designer ţha deuh a la ni dawn alawm" Pa Chhawna chuan a ti a, kan boruak chu rin aiin a ţha phian a, nu berin camp luh a remtih tak vang a ni maithei. 

"Hmana kan uite a thih aţang khan ran kan vulh leh duh tawh lo nain ka la ngaina reng a, ka vulh duh chuang dawn hauh lo nain enkawl chu ka peih ngawt ang. Mahni in a vulh hi chuan an thihin a hrehawm duh a, u Nico-a ui Pâtea pawh hi thi chiah se chu hrehawm a ti ve ngawt ang. Keichu mahni pual chuan ka duh tawh lo reng reng" a ti siam siam a, ngaihzawng hi Hope-in a nei nain Faith hi chuan a sawi ve ngai mang lo va, Hope bialpa a duh loh thu a sawi zing a, bialpa a neih ve awm ka hre lo thung. An mizia hi chenchilh lo tan phei chuan hriatthiam har tak a ni. 

Chawlh ka neih niah chuan kan nupain huanah kan kal a, Anthony te ţhian ho pawh an awm a, nuam an tih hmel khawp mai. Huan chu a mawi ngaiin a la mawi reng a, zanah chauh lo pawh tlawh tu an ţhahnemin pawisa chu an la lut ve viau ang. Sawrkar chawlh a lo ni ve kher bawk nen, ka pasal nen a huan kan tlawh dun thei chu a hlimawmin dam sawng sawng na tham a ni. 

"Saii, thla in la duh lo mi? Hei ka ţhianpa hi photographer a nia, nalh deuhin lak tir rawh u. Tunlaia miin an rawih ber a nih hi" Anthony chuan a ti lung lung a, chhun chhunah an ruiin ka hria. Hmeichhia pawh an tel a, hmanni a kan in a lo leng nu pawh kha a tel. 

"A pawi hleinem...chhungkaw thlalak te pawh kan duh a" ka lo ti uang a, Anthony-a ţhianpa chuan min lo pan thuaiin pangpar bulah te chuan thla min laksak a, thingkung lianpui hnuaia kan thlalak phei chu mawi tak a ni. 

"In inneih tuka shooting in neih kha ka hrechhuak" tiin Anthony a nui huk huk a, Nicholas erawh a nui ţha duh chiah lo. 

"Saii a ti tau ngei a, Nico pawh hian bathroom kawngkhar a chhir bur bur an tih kha" a ti leh a, keipawn kan thlen tirh khan ka hrechhuak daih tawh a, a lo atthlak khawp mai. 

"Mo ber a ti tau maw?" an ti a, thla min laksak tupa lah chu nui ţha ngam chiah si lo hian a nui put put a, kan thutak hleithei tawh hlawm lo. 

"Awii...Saii" tu emaw hian a rawn ti duai a, ka leh hawi chu shooting kan neih ni a ka cousin in a hruai, tuai deuh mai kha a lo ni. 

"Ehe...Chalţhuam, eng nge in tih a?" ka tih chuan a kal puite chu an lo nui dar dar a, Chalţhuama chu ka dinna lamah a lo phei hlawk hlawk a, ka zawn a thlen rualin ka banah nghet deuhin a kuah a, "Chalţhuam min ti tawh suh, Cte min ti vek tawh a, min hmuh leh pawhin Cte min ti zel rawh" ka beng bulah a rawn ti sar sar a, huan tlawh tu te hi an maksak hlawm ngei mai. 

"Aw..nih chu...i dam ţhin maw? Cte" ka ti ve ta nge nge a, "Ka la thi lo chu a nih hi hei ka la kal ve zâwt zâwt alawm. I lo rai pum tawh lehnghal a, eng eng emaw chu in ti ve tawh a nih hi tiraw?" a ti a, a nui duai duai a, ka pasal chuan a nin hmel khawp mai. 

"Nupa te chuan kan ti ve bawk ang chu" fiamthu a ka tih chuan, "Ni chiah...nupa ve lem mut khawng zuah reng thu awm lo. In pa hian a siamchhuah ţhat leh ţhat loh nakinah kan lo en leh ang. Awii...a pa a chhun chuan a hmelţha dawn chiang" a ti vel a, min kalsan hnuah ka pasal chuan, "Ka hnek dawn em maw ni? Tenawm lutuk" a ti hluk a, hetiang ho hi a ngaithei tehchiam lo. 

"Fang kual rawh u...in thlalak pawh a nalh e" Anthony chuan a rawn ti a, a ţhiante an kalsan diak hnuah Nicholas chuan, "I ţhiante i khawi a nih pawn hmeichhia hlir khawi rawh. Naupan laia thil thleng tih mai mai, a siamţhat theih vek. Tum leh tum loh a ni mai. Hmeichhia kawp lui rawh, i ziaawm zel mai ang. Mipa zawkah i ţang a, i pa thei tho alawm" a lo ti lehpek a, Anthony te awmdan endik a duh vanga huan kal rawt a ni pakhatin ka hria. 

"Ka tum ka tih kha" Anthony chuan a ti sup a, a zah hmel a, kei phei chu en pawh min en ngam lo. 

"Nupui nei lovin i awm reng thei dawn lo. I ţhiante pawh a hman apiang lo mikhual suh. Huan hi a ţawp sawt ti a mi sawi ka hria a nia, ka pa tana ro hlu a nih hi. Fimkhur rawh" khauh zeta a tih hnuah keichu min kai a, min kalsan pui hnuah pawh a dinna ngaia Anthony ding reng chu ka en a, ka khawngaih reuh. 

"A naupanlaia thil thleng a awm em ni?" a ruala kal dat dat paha ka tih chuan, "Umm..a piangsual zo tawh a nih kha" a ti hluk a, ka zawt zui duh lem lo a, Anthony-a chungchang hi a hriatna a la rei bik lo tih chu ka hria. 

"I endik dawn chuan nangmahin kal tawh rawh, ka chau deuh a, bar ah hian ka lo awm ang" ka tih chuan a remti ve mai a, a dai nuam a, tui vawt ka in hnu phei chuan ka harh huai mai. Zanah phei chuan a nalh leh zual a, hunpui lai ngat phei kha chuan englai pawn tlawh tu an awm tih theih a ni. 

"Saii" hmeichhe aw tliang deuhinna rawn ti a, school ka kalpui ţhin, thawveng zet mai, Hmangaihpuii a lo ni. 

"Awii...eng nge awmzia? I dam em?" ka ti a, ka ţhutna aţanga ka thawh rual chuan kan inkai a, kan au chel chul mai. Rai lian tawh viau e ti lo chuan ka zuang tawr tawr a, a ni pawh a bang bik lo. 

"Pasal i nei tawh tih te ka lo hria a, kan class group ah te khan lut ve ţhin ta che, i chanchin kan sawi ziah kha" a ti a, phone ka khawih khat thu ka sawi chuan a ner nang nang a, ka pasal awmna min zawt zui zat bawk. Huan a enkual thu ka hrilh chuan remruatna mak lutuk a nei lehpek a, "Nau i pai bawk si, rui der rawh" a ti hem mai. 

Ka nui var var a, ka pasal awmdan tur vel hmuh a chakawm riau. Hmanah hostel kan awm laiin Hmangaihpuii ho hian kan rui der chiam tawh a, tlaivar ţhakin min ţhingţhit tir a nih kha. Lehkhazir lohna tur a nih chuan eng eng emaw kha kan ti nasa ţhin. 

"A rim ka nam loh chuan a awih awm lo e" ka tih chuan, "Fizz ka nei alawm...a lokal dawnah i in ang a, zu rim deuh reuh a nam ve a" a ti a, ka lo pawm veleh nghal mai chu mawl inti viau mah ila thil pangngai reng hi chu a ninawm ve a, infiam ve zeuh zeuh te hi a ţha alawm. Ka pasal pawh a rilruah Anthony ringawt a awm dawn a, a rilru hruai kawi nan rui der hnâp ila, lem ka chang rei peih chuang lo, ka ti zangkhai ve deuh a ni mai. 

Bar bul hmun biru deuh hlek ah Hmangaihpuii nen kan ţhu a, a ţhiante lah chu an nui tat tat reng a, "Eng nge i tih ţhin?" ka tih chuan fiamthu lo hian, "Vawk leh ar ka vulh. Ka lo zin lawk a nih hi. Ka pa lah chuan beiseina sang tak neiin hostel ah te kan dah che a, vawk leh ar i vulh leh mai mai tho sia min ti ziah a, mahse ka taima a, ţhahnem ka ngai a, a hlawk ve lutuk" a ti a, ka lo bu nghat nghat a. 

"Doctor nih i tum ţhin kha a nia, mahse taimak phawt chuan kuhva khawr zuar pawh an hlawk tho alawm. Kan hna ţheuh hi sit mai lovin taima deuhin thawk ila a ţha a ni mai" ka lo ti a, "A dik chiah...kan thawh phak chin ang hi kan sit ve khanglang zel a, sit lovin thawk bawrh bawrh ila, hna nei lo ai chuan inhlawh lawp lawp ţhin te pawh hi ka ngaisang zawk" a ti a, ka pasal lokal phei kan hmuh rual chuan Fizz chu ka in bawrh a, a tui lo ngang mai. 

Pai deuh khat khat hian bar bula a ţhu chu ka pan phei a, ka ţhiannu lah chuan ka darah min chelh tlat a, zu rui awm deuh hian a ţawng lang lang bawk. Chutianga min hmu chiah chu ka pasal a lo meng nur khawp mai. 

"Khawiah nge i tawm bo daih a?" tih hrawk pahin ka banah a vuan a, min pawt lawp a, min veng tel ran thung. 

"Hei ka ţhiannu ka hmu a" ka ti bah nawk a, "Eng thil tehhreng nge in tih a?" a ti vin leh hrawk a, juice kan in thu ka hrilh te chuan ka dang ka ti awk der vel a, ka ţawng nawk nawk a ni ber mai. 

"Haw ang" bul zet a tih leh din a rual a, "I rui tiraw? I rui a nih kha. Takzet che hian...nau pai laia zu in ţhat loh zia hre ber tur i nih laiin" a ti hluk hluk a, a taksa si chet a min kuah lai chuan Hmangaihpuii chu ka melh ralh a, ka nuichhuak ta nge nge a, mawl leh lutuk mai, engtin nge maw a awih nghal mai theih zawk ni?

"Ka tihder che a nih kha. Hei hi Hmangaihpuii a nih hi aw..hostel a ka awmpui ţhin" ka chhip a ka sam hui chhoh pah hian ka ti a, ka ţhiannu lah chuan, "Ni e" tih pah hian fizz bur a lo hmuh a, ka pasal tih ngaihna hre lo lutuk chu a khawngaihthlak zawk. 

"I rilru hah ka hlau a, ka fiam che a nih kha. Anthony chu awm tir mai mai rawh, ţawngţaipui zawk la, Hope pawh, an pahnihin, an la ţha ve mai ang" midang hriat loh tur hian ka ti a, lemchan thiam deuh chu ni ila tun ai khan ka rui der rei zawk ngei ang mawle. 

"Inkawm awm tak pawh in nih hi a" ka pasalin ban charh a a tih chuan kan ţhiandun chu kan nui uarh uarh a, "Khawdangah awm lo phei ila chu kan la inkawm reng ang. Inhmuh khat chuan inkawp chawt reng a har a, vawk leh ar ka vulh hnem bawk si a" a ti leh tawh a, bar ah chuan ţhu hoin kan ti ti a, kan school kal lai chanchin te min zawtin ka pasal pawh chu a nui veleh suk suk tawh a, chu tluka hmuh hahdam chu ka tan a awm lo. A chhungte vangin a rilru a buai a, hahdam deuh a a nui ve hi ka tan chuan hmuh a nuam ber mai. Ka hlawhtling ah ka ngai. 

CONT..