HIS LAST LOVE-37

HIS LAST LOVE-37

Ka nu leh Hope te pawh camping ah an lut ve ta poh chu a ni a, an phur lo khawp mai a, ka pa'n lut turin a ti lui bur mai si, an hnial ngam lo a ni. An kal ta chu inchhung a reh ve ruih a, ka pasal a lo la haw bawk si lo, Kungtei leh Faith-i te nen ei kan rel a, Faith-i chuan, "Ka nu chu piangthar sa ang a nia, ka nau a luh pui a ni mai a, Hope zawk hi rawn ţha chhuak hlauh se ka ti hle mai. A thu hrimah, damdawi ruih te chu a hahthlak hmel tehreng nen, men pawh an meng ţha peih ngai lo a nia, a peih ngawt zawk alawm. Tun hma te kha chuan ruihhlo ah hian ka inham buai ve dawn lo reng reng, eng emaw hleka ruihhlo bel nghal zel ho hi an nep e a ti ve ziah si a, amah ber ruihhlo vangin a buai leh a, ka khawngaih zawk" a ti siam siam a, chaw ei khamah an kal dawn emaw ka tih laiin ka nu'n an luhpui tur, a ţhiannu ve ber te ina chaw ei phei a ti tlat si a, an kal hma deuh phah a ni. Ka pa chunga a lungawi loh vang a ni deuh ber. 

"Harh fim a khawvel hmachhawn peih miah lo te hi an awm ţhin a, mihring kan danglam ang bawkin kan chunga thil lo thleng te hi kan dawnsawn dan te, kan hmachhawn duh dan te a inang lo a, Hope pawh hian ruihhlo nen a tawrh a thlang ta mai a nih hi, a zia lo tak tak a ni" ka lo ti ve a, a thil tih lai chawl meuh hian Faith chuan min lo en a, "Eng nge a buaina ber ni a? A hrilh ţhin che em?" a ti heu mai. Ti khawp khan ka nu nen an in lu ling a, an thuneihna lantirin inchhung boruak an ti chhia a, Hope hian chhungkua a vei a, inchhungkhur hrehawm a tih lutuk vang tih a la hre chuang hauh lo a nih hmel. 

"Ka hre lo le...buaina hrang hrang a nei aniang. A lo chhuah hunah a sawi duh leh a la hrilh mai ang che" ka ti ta ringawt a. 

"Nau neih i huphurh em?" min ti ve ngei a, tunah tak chuan min ţawng el vel ang pawhin a awm lo. Camp a tirh luh ve a hlau te pawh a ni hmiang ka ti mai.

"Huphurh ve tho e...rai hi a ninawm rualin neih pawh a huphurhawm. A na dawn a, chutak chu a nia peihawm loh, naute chu ka hmu chak tawh lutuk" ka tih chuan, "Mipa nge hmeichhia i duh?" a lo ti leh a. 

"Ka duh ve ve...mipa pawh hmeichhia pawh nei ila tluang deuh a ka neih theih chuan ka lawm vek ang. Phir te hi nei ila ka ti a nia" ka tih chuan amah ka sawichhan emaw a ti aniang a lo nui hak a, "Phir hi chu midang tan kan lawmawm rualin keimahni tan hian a hrehawm chang a tam. Kan inzawmna a nghet bik a, Hope pawh hi ka ute pahnih aiin ka ngaina daih zawk, diktak chuan ruihhlo a khawih ta mai te hi hrehawm ka ti ve reng. A hlim loh te hian ka lo hlim lo ve ringawt zel a, keichu hmeichhia nei la ka ti, hmeichhe naupang chu chei an nuam bik e" a ti ve vel a, min be ţha ve reuh lutuk chu a awihawm loh zawk. 

"Ka rawn nang hman nange?" rawn ti tu chu Rita-i bawk a ni. A lokal khat a a thawventhlak ka lo ti hman tawh a sin le. 

"Aw...hmun dangah chaw an ei dawn a, an kal ta a nih kha. Pahnih kan ni tho a a tia ka nu khan thlah pawh a duh lo a, i sam chu a va nalh ve a" Faith chuan a lo ti sawk sawk a, a sam rawng a thlak leh tawh a lo ni. Cancer ka hriat zingah a la inti danglam peih ber ang.

"Nia, ka cousin in min tih sak a, hunawl i neih hunah ka la hruai ve ang che" a tih chuan, "Tunah ka hman alawm. Zanah chuan lehkhazir a ngai leh tawh a, tuna min hruai theih chuan ka hman reng" beisei nei tak hian a ti a, henu pawh hi a â he mai. 

"Nih leh insiam la" Rita-in a tih laiin, "A ţullo, Saii kha pui rawh se" ka pasalin a rawn ti ve zat a, Rita-i nen a rawn inzui lut te pawh an ang alawm le. 

A thil lo hawn chu dawhkanah a dah a, a hmel landan en ringawt chuan Rita-i tan chuan biak a chakawm tehchiam loh ang. 

"Thawm nei ve ta che, ngawi rengin i lo lut a, min ti phu alawm" keimah zawkin ka lo tih chuan tawi tein min nuih a, "Motor ri hre lo khawpin in lo bengchheng tihna a ni mai" a ti hmuk a, Kungtein, "Thei tui" a lo tih chuan a bu nghat a, khua a lum leh tawh a, thingpui kan in ţha leh peih meuh tawh lo.

"A thlawn a sam tih danglam theih te chu a ţha e, U Rita-i cousin a nia, pawisa chawi pawh a ngai lo" a sam khawih paha Faith-in a tih chuan, "I u Saii tan chet zung zung a harsa tawh. Lehkha i zir loh chuan inchhungah tih tur zawng rawh" khauh zet hian a ti leh a, Faith chuan min melh ram ram a, min ngei leh ringawt tawh a ni maithei. 

"Awii...i inla khirh vel lutuk aw. Mi pawh an rai a, inchhung chet an buai phah ngai chuang hleinem. Nau a nei hnai lutuk pawh a ni chuang lo a" dawhkan kila a ţhut laia Rita-in a lo tih chuan, "Nangpawh hi lokal fo suh" chair nghenchhan nghen pah hian a lo ti a, thinrim hmel a pu tawh lo a, a landan chu a hahdam hmel viau mai. 

"I sual ve e...mi lo leng ve te lo kal fo suh tih te chu a" Faith-in a tih pawh chuan Rita-i ngawt chu a la en a, "Lo kal fo lo la kan ţha tlang zawk ang. Ka naute i ngaina a i lo kal duh a nih pawhin anmahni fuihpawrh zawng leh an rilru hruai sual zawngin ţawngkam nei tawh suh. Kan buaina tam tak hi nangmah vang a nih na chin a awm" pangngai tak hian a ti a, a vin lo nain a khauh viau tho a ni. 

"Eng buaina mah ka thlen sak lo cheu aw" inven tum taka a tih chuan, "An rilru i suk sak alawm. Ka nu chak lohna i hmang ţangkai a, Faith-i lawm zawng i hre bawk a" a ti a, nu Hlimi nen a kan ti ti dan kha ka hrilh ve vek a, a lung a awi lo viau nghe nghe a ni. 

"I duh dan danin min puh ringawt suh" a ti vin hlar a, ka pasal chu a lo kiai suk a, "Doctor lehkha te, ultrasound te, lehkha dang pawh aniang, duh tawk tawh rawh" a tih chuan Kungtei leh Faith te chu an phawk hra a, kei chuan mak ka lo ti ve lem lo, lehkha keng a rilru nat hmel zet a a lo kal te khan a lem mai mai a ni tih ka hre daih tawh. 

"Eng nge doctor lehkha leh ultrasound tih vel chu a awmzia? I nui kher lehnghal a" Faith chuan a lo ti a, gas lamah pheiin ka nui ru tet tet a, an ring leh lutuk a, thil sual ti ve theiah pawh an ngai lo a nih hi. Nu Hlimi erawh chuan dawt a hrilh avang khan tun hma angin a ngaina tawh lo tih erawh ka hria. 

"I u Rita-i hi zawt rawh" ka pasal chuan nuihza aw zet hian a lo ti a, "Nicholas, inbia ang" hriam hraka Rita-in a lo tih chuan, "A ruk a ral a inbiak vel a ţul hran lo. Theihtawp i chhuah tawh a, duhtawk tawh rawh. Siamţhat ka tum mek a nih hi, lo inrawlh tawh suh" zawi te, chang zet si hian a ti a, ka pa'n a ngenin a ngen a, inchhungkhur a a rilru pe deuh tur leh a dik lo lai te siamţhat pui turin ngen takmeuhin a ngen a ni, ka pa ngenna a hnar theih loh vang chauhin kan la awm a, ni lo se chu kan indang daih tawh ang. A thil tih tawh ti mai mai lo chi a ni a, tun hma ang khan eng thil mah a en liam mai mai tawh ngai lo. 

"Faith-i leh nu Hlimi ka ngainat vangin ka lo kal ţhin. Thil dang vangah i ngai a nih chuan i ti sual ve tho a nih chu. Nang hi chuan min ring chhe ve hrim hrim a" Rita-i chuan a ti a, "I lo kal chhan leh i thil tum chu nangman i hre ber. Tun bak sawi nawn ngai suh se" a ti a, kan inleng nu pawhin a chhang tawh bik lo. Faith ber chuan a hrethiam lo aniang ka pasal leh Rita-i te chu a melh tawn zak zak reng a, "In thil sawi kha engmah ka hrethiam lo" a ti ban charh bawk. 

"I u hian a duh duhin min puh ve ringawt a, ţhianţha tiin ka lo tlawh ve ziah che a, tunah tak phei chuan nangmah vang ni lovin Faith-i te vangin ka lo leng ber tawh zawk. Min ring chhe emai, chuti taka min lo ngaithei lo a nih chuan ka lo leng tawh malek ang" tih leh chhuah a rual a, Faith-i a hawi hu hu mai. 

"U Nico, a thinrim daih a nih kha. Nangpawh hi i lo haw a kan inleng i hnar haw nghal ringawt a, i sual lutuk mai" Faith chuan a ti ta hlak hlak a, hrethiam ve miau hek lo le. 

"Rita-i buaipui reng lovin tih tur zawng rawh. Mi fel leh mi ţha thliar thiam rual i ni tawh. Min bazar pui thei, a thlawnin sam min siam sak thei tih vang mai mai a mi ţha a ngaih ngawt tur a ni lo. A thu hrimah, veterinary doctor ka ni duh i ti a ni lawm ni? Sam dum hlap kha ranin an ngaina ber, a mawi ber bawk. Eih uih che hian, chhi chhe mai" a ti deuh nek a, "Aww..a damlo lehnghal a, a khawngaihthlak em kha. A nu nen an inkar a ţha lo ropui lehnghal a, min ngainat te chuan lo duat kha kan tih ve theih tawk alawm" a la ti cheu a, thinrim lamah pawh a kal thei tawh lo aniang kan nupa chuan kan in en a, kan nui ta ringawt a. 

"Eng nge in nuih? In khawngaih ve lo em ni a?" Faith-in a tih chuan, "A dam vek..dam lohna a nei lo. Inchhung chet leh nangmah chiah in ngaihtuah rawh. Kungtei a buai deuh chang pawhin Saii ring chawt tawh suh" a ti a, kan Faith-i lah chuan Rita-i kalna lam chu a thlek zui vang vang a, ka pasal hi hlau viau lo se chu a umzui duh maithei a ni. 

"A dam lo chiang alawm...ka nu nen kan hriatpui a, in entir turin phaiah pawh a kal ziah a, a enkawl tur ber school pawh a la enkawl thei rih lo a" a ti niah niah a, rum zet a ka pasalin a melh takah chuan pawnchhia a chuh rawk rawk a, thlai kan thenna hnawk chu a hui khawm a, a sual lutuk avanga a nuţa pa ngeiin loh theih loh a kut a thlak zeuh zeuh hnuah chuan tih a nuam ve sawt khawp mai. Nicholas mai bakah keipawh min hlau ve ta deuh alawm. 

"Faith-i hi ţha deuha enkawl chuan a zia ve zel maithei a ni. Min ngaithei lo lutuk ang pawhin a awm tawh bik lo a" pindan a luh paha ka tih chuan, "A â bet but emai" a lo ti liam puat a, khuma ţhut pahin min pawt a, a malchungah ka ţhu hnawk a, rang tawkin ka inla hrang a, ka rit tawh si a, a malchunga ţhut em chu ka ti deuh a, amah si chetin a bulah ka ţhu ta zawk a. 

"Fa pawh nei ila ka nu leh paten Faith-i te an enkawl ang chuan kan enkawl lovang. An lawmawm tih vanga an thu thu a awm te hi a ţha ngai lo" a tih chuan, "Inti pa deuh pawh fate hmaah chuan an nem thei teh mai a nia. Khauh deuh a enkawl tum pawhin an thei ngai lo" ka lo ti ve a. 

"Keichu ka ni lovang, misual, kawhmawh bawl ching an nih ai chuan khawngaih loh luih an ngai. Fate hi chu hmangaih dan thiam a ngai a, ka unaute zah leh hlauh tur a awm a ngai bawk, an hahthlak dan hi nangpawn i hriat kha. A tlai hnua insiamţhat tumin awmzia a nei mawh si, an naupanlai aţanga enkawl dan tawk thiam a ngai. Hmangaih tho mah ila ka nem vak lo ang, min thunun tu tur zawk an nih loh zia kan hriattir a ngai alawm" a ti nghat nghat a, ka lo hnial lem lo. 

"Pa ber i nia, ţha i tih ang ang a ni mai alawm" a awm a bei paha ka tih chuan, "Umm...nau i neih hunah pawh kan lawm vek dawn a, kan pawm chak ang a, pawm reng kan duh ang. Mahse, nakina i hahna tur vek a ni a, pang lum an hriat tawh chuan pawm reng an ngai tawh ţhin a, kan pui reng hman dawn si lo che a, an ţah loh chuan mu reng se a ţha ber. Pawm luih tum tlat ho chu hauh mai tur, i hahdamna tur zawk" a ti a, a ngaihtuah thui ve khawp mai. 

"Rin aiin i hre daih, Chhandamin fa a neih tawh vang em ni?" fiamthu a ka tih chuan min kuah hlu hlu pah hian, "A fate pian laiin ka awm lo ve ve. Hmeichhe dang sawi lang sek suh, nang leh naute baka pawimawh ka tan chuan a awm lo. Ka chhungte an ni leh a, inrem tlang taka kan awm ka duh ber. Ka nu camp lut pawh hi eng nge maw a an dawn ni?" a ti a, kan buai leh vak a, ka chhungten min rawn hruai daih a hlau hlur a, a fimkhur sawt a, tute pawh min veng uluk ti ila a dik ber. Kan pindan chhungah lo hi chuan a inla thutak a, Faith-i takngial pawhin a hlauh tawh em kha. Anthony pawh a zilh fo a, a chhang let ngai lo. Huanah a mipatpui a khawi duah tawh ngai lo tih erawh ka hria. Upa zawk mah nise ka pasal hi a zah ve a ni. 

Ka nute camp lo chhuak chu langsar deuh a han danglam tehchiam a awm hran lo a, a la vin pung pung reng a, a ang hlak hlak reng bawk a, meinei deuhin min ţawngkhum tawh ngai lo thung. A piangthar nge ka pasal leh ka pa a hlau ka hre lo. Hope erawh damdawi a la ei rui leh lo a, a pindanah a inkhung chawt a, a inkhawm zui lo nain damdawi ber a thlah chuan a ţha a ni mai kan ti mai zel a, inkhawm zui lo mah se an hau ngai em em lo. 

Ni a kal chak a, thla a liam zung zung bawk a, nau neih ka hnaih tawh lamah chuan chawlh ka la a, keiman ka huphurh chu thuhran ka chhungten min huphurh pui lutuk chuan min ti huphurh lehzual a, neih pangngai a neih ai chuan zai chhuah tir mai te ka duh rum rum hial a ni. 

"A dawn hnaiah meuh chuan ka chiai vek. Lehkhazir ka duh bawk si, naute ka hmu chak bawk si" ti a Faith ţawng lang lang ka hriat chuan ka ţhut hmunah ka lo nui chhuak hak a, kan awmna a inhlat viau nain a ţawng chu ka hrechiang em em tho. 

"U Nico hi office a la kal tho bawk sia, nau neih dawn hnaih a mahni a in a awm hi a hrehawm em?" ka dul khawih paha Hope-in a tih chuan, "Hrehawm loh e..i awm alawm" ka lo ti a, a kut chu ka lo vawn sak a, thla tam tak chu a fihlim tawh niin ka hria a, Nico-a aia ka lawm lohna bik a awm lo, nau ang chiahin ka en ve a, damdawi a ti ta lo hi lawm ngawih ngawihna tham a ni. Inchhungkhur boruak a zia chho ţan bawk nen, nu ber ang hlawih hlawih, vin pung pung ţhin hi chu ngaiah kan nei deuh vek tawh a, ka naupai lai hian boruak a siam ţha ka ti lo thei lo. Hope pawh ka bulah a tap chawt a, naute a hmuh chak tawh zia a sawi fo mai. Ani tan hi chuan chhungkaw boruak ţha a pawimawh ber a, buaina kan ngah ţhin lutuk kha a zo lo a, ruihhlo ah a ţuan a ni ber a, beiseina nei tlat tura min fuih ţhin tu ber a nih avangin beisei tur nei lo ang maia a awm kha ka rilru a na zual a, beiseina nei tlat rawh tiin fuih ve lo mah ila naute hian beiseina thar a siamsak leh ka ring tlat a ni. Chu chu ka duhthusam a ni bawk. 

"U Saii thleng hian ka hmuh dan a danglam vek tawh. Ka ngaina ve deuh tawh che, naute i neih ţep tawh vang aniang" Faith chuan choka aţanga lo chhuah pah hian a ti a, zep ţhen nei si se lova a ngaihdan leh rilru put hmang a sawi phawng phawng ţhin hi a ţhat chang a awm a, a ngeiawm chang a tam bawk. 

"I ngainat leh ngainat loh a pawimawh lo emai. Nang te chuan i duh ang apiang tihpui ve thei zel tu che chiah i ngaina a, nangmah dodal chang nei ţhin te chu i ngaina vak ngai hleinem. A nu ber i ngaina vak si lo a, keiman ka pawm hmasa ang" Hope chuan a lo ti a, "I zak em ah...nau khawih chu nang aiin ka thiam a, ka chhiar zau nasa tawh bawk a, nang aiin ka pawm hmasa ang. A puitlin hunah tu nge pawm hmasa ber che an la tia nga, chuvang chuan pawm hmasaber tu ka ni duh" Faith pawh chuan a ti zat zat a, "In va ho mai mai e aw" tiin ka pa pawh a lo nui ve vur vur reng a, a phir pui ber a hnial leh vak peih tawh a nih chuan Hope hian ngai a awh chho ve zel tihna a ni mai. Dimdawi erawh a la ngai khawp mai. Muangchanga hmalam pana kan hruai loh chuan a tlu sual palh leh mai ang. 

"Raipuar nu, eng nge i lo an a?" ka pasal lo haw in zangkhai deuh a a tih chuan, "Ka ţha...na ka nei lo. Nau neih hun an tih ni a thleng ţep tawh a, na engmah ka la nei lo" ka lo ti a, "A va mak ve..in entir a ngai em? A hunah tak i neih loh te chuan a ţha dawn mi? Hetiang hi an sawi fo a, an ril in an lo in rek hlum ţhin an ti a ni lo'm ni?" ngaihţhat loh hmel fe hian a ti a, phir te lah an meng phawk nghal hra a, Nico-a thusawi hi rintlak ber a an ngaih ţhin vang a ni. 

"I ti rapthlak e a. Nau neih ni tur a doctor ten an sawiah hian an nei kher ngai hleinem. Kan pel thui viau a nih loh chuan ngaihţhat lohna tur a awm lo. Fa pakhatna tur si engkim ka awlsam vel vek hi mak ka ti zawk. Nau pai lah kha ka haw em em si lo a, mood inthlak chhen ang te kha ka neih ve pawh ka hre lo" ka tih chuan, "I neih khawp kha. Nangpawh hi nau neih zawh veleh camp ah lut la a ţha ang. Tiraw ka nu, i monu hi a dawheh emai" fiamthu a a tih chuan nui vak hreh si, nui ru pâwt pâwt chung hian nu Hlimi chu a hawi sawn hmak a, ka pasal hian a beidawn tawpah a chhungte enkawl dan a hmu chhuak thar a ti tawh mai teh ang, Nu Hlimi nen kan ti ti na vel ka hrilh vek hnu khan nu Hlimi a endan hi a danglam deuh ti pawh ni ila a dik tho ang, a khawngaih ve a, a lo la hriat ngai reng reng loh thil Nu Hlimi khan a sawi ţeuh a, khataţang khan ho te teah a chungah a thinrim tawh lo a, fiam zeuh zeuh a ching chho a, kan zia ve tawh viau mai. Midang an dik lo viau emaw kan tih lai khan keini nupa pawhin dik lohna tam tak kan lo nei ve tho a, mahni hi inhmuchiang phawt ila, midang kan endan chu a danglam chho mai zel. 

"Tho teh ka hnung a na lutuk...ka hnung pawh a ni chiah lo ka kawng aniang, a na vel vek" tih pahin ka pasal chu ka nghawk a, a muhil nghet thei si, a harh lawk lo leh tawh. 

"Remruatsak, ka hnung a na ka tih chu, awii hepa ka nin zia hi, tho vat ta che" tih pahin ka dawhtheih loh tawpah a hmaiah ka beng chawrh a, a meng kawk a, a tho hluai a, a harh chiang khawp mai. 

"Ka hnung lam hi a na a, a changin a na a, a changin a reh leh a, ka sawithiam lo. Nau ka nei hnai aniang" ka tih rualin khum aţangin a chhuk a, "A nat hlimah min kaitho nghal ta che raipuar nu" min la ti zawk a, "Ka tum a i harh thei hleinem. Bakah ngaihţhat lohna ka nei lawk lo a" ka lo ti a, tunah chuan tlemin a zia leh tawh a, ka awmdan chu a mak khawp mai. Nau nei hi ka hmu ve fo nain mahni berin tawn loh chuan hriat vek a lo har a nih hi. 

"Damdawiinah kal ang" tih leh min pawm a rual a, "Ngawi rawh a zia leh deuh. Inthlak rawh midang te pawh kaitho hmasa rawh. A nasat tak tak hma hian rilru fim pu ta che" ka lo ti a, calendar ka en a, nau neih ni tura doctor in a sawi kha a la thleng lo a, mak ka ti angreng khawp mai. 

"I cheh hman anga sin. Kan kaitho chawp dawn nia" a ti tlat a, pindan aţangin min pawm chhuak a, "Tho rawh u...Saiin nau a nei hnai, tho teh u" tih pahin a naute pindan kawngkhar chu a tlawh bur bur a, na tuar mek min pawm tih a hrechang tawh lo ni awm tak a ni. 

A kaihthawh loh ber Anthony chu lo chhuak hmasa berah a ţang a, "Khai aw...in buai em ni? Motor ka lo buatsaih ang, ka nute pawh ka zuk kaitho nghal ange" a ti zung zung a, kailawn a kan chhuk chuan phir te thawm pawh ka hre tawh a, inchhung light a êng pup a, kan chhung buai a ni der mai. Ka pasal lah a chiai a, a phili buai nasa in a hawina lam apiangah min pawm her ve a, luhai vek na tham chu a ni tawh. 

"Khatin pawm her ve bawih bawih mah ta che. Anthony-an motor a lak chhuah tawh chuan hlang lut la damdawiinah kal rawh u, kan rawn zui ve ang che u" ka nu'n a tih te chuan choka lamah a tlan phei daih a, keiin a darah ka ţham a, midangin, "Nicholas, khalamah eng nge i tih?" an lo ti bawk a, engmah sawi lovin min let pui leh a, choka hi kan awm tamna ber a ni ve a, inchung aţanga kan chhukin kan lut tlang a, kan hna bang kan hawin choka ah kan tlang a, ngaiah a nei nge a phili vang hrim hrim tih pawh ka hre tawh lo e ah. Min pawm kher pawh a ngai lo a sin mawle, min kai se emaw, min kuah se a tawk der ni mai tur a nia, keimah pawn ka la kal thei ang chu. 

Damdawiin kan thlen chuan doctor in min en thuai a, nau neihna hmuna min nawr lut nghal mai lo te chu ka pasal ngaihdan a ni lo a, "Na a awm tawh a ti mawlh mawlh a, hetianga na tawrh tir reng ringawt. Neih tir vat se a reh huai a ni mai lawm" a ti hluk hluk reng a, "Ngheti, i ţhiannu in nau a nei dawn. An la nawr lut duh lo lehnghal a, lo kal rang teh" a ti leh lung lung a, midang awm ve phei se chu ka zak viau ang. 

Doctor in min endik reng chunga min nawr lut mai lo chu a thin a rim hlur a, mipa na na na chuan nau a hnaih leh hnaih loh te a hrethiam ve kilh kelh tawh bawk si lo, "Na intawrh tir reng ringawt" a ti a, a vei tawn sek a, a chang leh ka kut a vuan a, a chang leh ka sam a chul a, a awmdan chu ka lo ning zawk a, "I ninawm sek. Min awmtir ve mai mai teh. Doctor te kha lo vin tei vet suh..ka thawhna hmun a nih hi, min ti zak zo zai lutuk" ka lo ti veleh zeuh zel a, dam ţha pangngai phei chu ni ila kan inhau nasa leh tawh viau ang. 

"Na i tawrh reng ka phal loh vang a nih hi" a tih chuan, "Hmeichhe dang pawn an tuar ve tho alawm" ka ti a, ka ţawng ţha peih vak lo zawk a, a changin a na a, a chang leh a na lo leh deuh a, ka awmdan teh nuaih chu kei tak pawhin ka ning a, ka pasal buai phili nasa lutuk chu ka ning lehzual. 

Ngheti te leh ka nute pawh an lo thleng a, an mangan hmel hlawm khawp mai. Fa pakhatna tur a nih avangin min ngaihtuah ţheuh a, Ngheti pawh rin aiin a chiai daih mai. 

Khawvar dawn hnaihah min nawr lut ve hram a, ka pasalin min ngaihtuah a, ka luh dawn thlengin ka kut a vuan a, min thlah phal lawk lo lehnghal. Luh ve an phal mang si lo va, thinrim phun hluk hluk chungin min thlah a, min buaipui tute ka mi hriatchian vek an nih avangin na viau mah se keichu ka thla a muang khawp mai. 

Naute ţap ri ka hriat rualin, "Lalpa, ka lawm e" tiin ka phun sap a, thlanin min bual huh vek a, ka chau ngawih ngawih bawk. Ka rilru erawh a fim vek a, ka pai tirh aţang khan kan chhungkaw boruak, a mihring a te pawh min thlak danglam tu tur a nih hi ka ti ve ţhin a, Pathian hnenah pawh ka ţawngţai fo a, kan chhungkaw siamţha turin ka dil ţhin. Pathianin ka ţawngţaina a chhan ngei ka ring a, innghir ngho reng lova lungrual taka min awm tir tu a nih ka beisei a ni. 

"Saii, hmeichhia a nih hi" nurse ho chuan an ti a, ka hmuh turah an rawn pawm a, nau piang hlim a nih avangin a hmel chu ka hmu thiam chiah lo. 

"An lawm ngawt ang" ka lo ti a, min pawm tir ve tak nain rei a ni lo, ka chau em a, an la let leh vat a, ka vei rei bawk a ka neih meuh chuan ka meng hleithei lo a ni ber. 

A ţap ngâk ngâk ri ka hriat chuan maimitchhing chungin ka nui a, nu nih hi engtiang chiaha hlimawm nge ka lo hre ngai lo a, naute an pian chiah hian na zawng zawng theihnghilh vek khawpin kan hlim ţhin a ni tih pawh tunah ka hre ve chiah. 

Naute an pawm chhuah hnuah keipawh min nawr chhuak a, khumah chuan fimkhur deuhin min muttir a, mutthilh nghal mai ka duh nain min ngaihtuah avanga min be tu an tam em a, mutthilh theih pawh a ni lo. 

"Ka pawm hmasa dawn ka tih tawh kha. Ka hauh lawk vek tawh"

"Keiman ka pawm hmasa dawn, U Saii pawn pawm hmasa ber rawh min ti" ti a phir te inhnial ri chu ka hre ruai ruai a, "In pawm hmain midangin an pawm daih tawh. Bengchheng suh u, ka phal hma chu in pawm lovang" khauh zet hian ka pasal chuan a lo ti a, nuih an ti za a, ka hliam avangin ka nui ngam bawk si lo, hahthlak ve tak chu an ni. 

Ka muhil ka harh chuan khum mawng lamah ka pasalin kan fanu chu a lo pawm a, ka harh tih a hriat rual chuan khum bulah a rawn ţhut pui a, "A hmel hi i hmu tawh em? Ka naupanlai chiah chiah a nih hi" hlim deuh hian a lo ti a, nupuite lawm nan a nangmah a chhun che intih chu a awm lo ve khawp mai. 

"Khawiah nge midang?" ka tih chuan, "An haw lawk a nih kha. An lokal leh har lo ang" a tih lai chuan naute chu a tal laih laih a, a ţap dawn titih der mai. 

"Hnute a duh a nih hi" a ti a, ka bulah chuan fimkhur deuhin a rawn mut a, "Pe rawh" a ti leh tawp a, ka kawr ka hlim lai chuan kan nupain kan in en a, ka lai ru angreng khawp mai. Ka pek tak tak hmain ka nu a rawn lut hlauh a, min tih pui leh a, "Hnute tui i nei ţha phian a, a tihzia angreng khawp mai. Hnute tui neih loh hian a buaithlak ţhin a" a ti a, naute in hnute a hnek dek dek lai chuan ka pasalin hnai deuhah a lo bih a, kan naute lah chu a lian phian a, hmuhnawm tham chu a ni ve hrim hrim.

"Ka sen lai chiah chiah a nih hi" a lo ti leh a, rum deuh a ka melh lai chuan a phone a phawrh a, "En rawh hei" tih leh a nausen lai thlalak min hmuh tir a rual a, nu Hlimin a pawm a, a thusawi kan awih loh hlauin a lo inring sa thlap a nih pek hi. 

"Hmel mumal pawh a la neih loh hi..tunah engmah a la hriat loh" ka tih chuan, "Chutin fate an ti ngai lo. A hmelţhat em hi" a lo ti vat a, hnute a hnek zawh chuan kan muttir ren rawn a, a en vang vang hnuah ka pasal bawk chuan a pawm lehpek a, ka nu pawn a en liam mai mai ringawt. 

"Pang lum a hria anga i hah dawn, pawm reng loh tur i ni a ni lawm ni? Kar hmasa lawka i sawi a nih lehnghal" ka tih chuan, "Ka pawm muhil anga ka lo mut leh ang. Pawm loh chuan mutthilh a tum lo" a ti daih a, ţhutpui hle hle lovin a awi a, an hmuhnawm rualin pang lum a hriat laklawh ka hlau tak tak a, pawm suh intih ngawt chi lah a ni der bawk si lo, ka la che ţha thei bawk si lo a, en liam tawp mai loh chu tih theih ka nei lo a ni ber. 

"U Nico, kan lo pawm ve tawh" tiin phir te chuan an dil reng a, "In thlauh ang" a tih loh leh, "In zei lo si, in ti na ang" a ti bur a, mut rawh tih pawhin a mut duh chuang lo. Ka nau nei min buaipui tu nurse kha naute en tumin a lo lut a, fiamthuin, "Muttir rawh u, a mut duh chuan mu rawh se. A ţap vak vak te a nih lem loh chuan naute chu mu se a ţha ber" a rawn ti lang lang a, ka pasal chuan a hre lo der hmak thung. 

"A hlauthawng si, a ngaihtuah bawk si che a, keini lahin luh ve kan phal bawk si lo, thinrim deuha a ang hluk hluk kha kan hrereng alawm. Nau i nei chiah chu i pasal a buai ber a nih hi" ka bula a rawn tih chuan ka nui liam mai a, ka duty leh theih hunah phei chuan min chhaih nasa hlawm viau ang. Khati taka a buai kha ka ring lo a nia, min ti mualpho ve reng mai. A lawmawm tho bawk si, zah chu ka tuar ve mai aniang chu. Min chhaih suh u tiin hrilh lawk thlap mah ila ka pasal awmdan avang khan min chhaih dawn tho tho. 

Puitling an lo kal leh chuan ka pa'n ţawngţai a rawt a, an han ţawngţai chiah chu thla a muang lehzual viau mai. Faith-in min melh thip ram reng tawh lova, ka fanu chu enin a mitmeng a nung sar reng a, nu Hlimi lahin Nicholas chuan a tih nat palh hlauin a khak reng a, tihdan tur an inhrilh mawlh mawlh bawk a, ka nu nen pawh an ti ti ve nasain naute leh ka pasal chanchin sawiin an nui dun leh ţhin a, Zikpuii leh phir te pawh an inbe ve thei tawh a, ka fanu chuan kan zavaia thinlungah hmun lian tak a awh nghal a, min ti hlim vek ti ila ka sawi sual kher lo ang. 

"A hming chu i pain sa rawh se" tiin ka pa chuan Pa Chhawna a en a, "Sap hming tih vel kha a ţullo aw. Sap hming pawh pu ila zo deuhin min ko tho tho. Tar lampang phei chuan an lam thiam lo a, min ko sual a, hming mak deuh kan pu daih zel. Mizo hming kha a tawk mai. Kan ţhiannu Michelle-i pawh a piin a ko thiam lo a, Michael an tih vek hi" ka pasal chuan a lo ti a, ka pawm zawng tak a ni. Sap hming hi tel kher lo se in koh a awlsam mai. 

Pa Chhawna chuan, "Lalmawipuii" a ti ta daih a, kan nupa hming kaihkawp te a kan fanu hming chu a sak ve ka ring deuh a, ka pasal pawh a hawi hai khawp mai. 

CONT..