HIS LAST LOVE-38

HIS LAST LOVE-38

"Eng hming pawh pu se Bawihtei a ni dawn tho alawm aaa" ka pasal chuan a ti ban charh a, a fanu chu lungawi hmel deuh hian an en a, an fapa inpawm hlu hlu chu hmuhnawm ti takin ka lo thlir ve thung. 

"Tun aţanga i pawm nghal reng chuan i ti sual vek ang. Saii bawk a nia aw hah dawn, muttir mai mai rawh" Nu Hlimi pawhin a lo ti ve a, ka hma ngai ni awm taka ţawngkam a neih ve vawikhatna a ni ngei ang. 

"Khawi nge han la teh..nupuite ngaihsak hman lo lekin naute ringawt i kuah mai" a ti leh a, ka pasal nau pawm lai chu dimte, tih nat hlau tak hian a laksak a, a mut mai dawn emaw kan tih laiin a pawm ve ta reng a, naute chu a en ţhin a, a mitmeng leh hmelah chuan lungawina ka hmu a, Pathian hnenah ka thlen nasa bawk a, ka dilna te kha min chhang ngei dawn tih ka hria a ni. 

"Phakar e...i laksak a, i pawm leh daih tho sia, khawi kan lo pawm ve tawh ang a" Faith-in a lo ti veleh a, Nu Hlimi si chetin a ding a, ka fanu chu a thlir ve ngawih ngawih mai. 

"A la sen si a, a pianghlim ang chauh a nih kha. In lak lawr lutuk chuan a damlo mai ang. A nu bulah hian muttir mai mai rawh u" Pa Chhawnan a lo tih pawhin awmzia a awm lo. Ka harh hnuah ka chhungte phei chuan an la pawm lo hrim hrim a, ka pasalin a kuah chawt bawk nen, an pawm chang lo a ni ber. 

Midangin naute an lak takah chuan ka mutna bulah a lo ţhu a, ka kut vuanin ka sam a chul a, lungawi hliah hliah hmel a pu a, chu chu keiin hmuhnawm ka lo ti veleh chhawng a, kan awmna pindan chhungah chuan a vawikhat nan hlimna in thla a zar ve a ni. 

"A na em?" tiin min zawt ve chauh a, lo tih tauh vak chi ni miau hek lo le, ka thaw halh a, "Na lutuk..mahse tunah chuan a reh tawh" ka lo ti sap a, "Nei tawh suh intih ngawt chi a ni mang si lo a, i neih leh hunah chuan a zia tawh ang" bangbo deuh a a tih chuan intih nat hlau takin ka lo nui a, thil ni thei lo leh tih theih loh tur chiang sa ang hi a sawi ve vak ngai lo a, a thusawi lawk, a hlen loh awmchhun chu naute pawm chungchang vel chiah kha a ni maithei. 

"Saii, kha thei tui hi in rawh. Thil i la ei mang lo a, naute saw hnute pek reng a ngai dawn a, i chau lutuk palh ang" Liantein a rawn tih takah chuan, "Aw..ni tak, in tur chi kan lei ţeuh kha. In bawrh bawrh rawh" inti bengvar zetin ka pasal chuan a lo ti ve hlut a, midangin an sawi hawn phawt loh chuan engmah tih nachang a hre rih lo a ni ber a, Liantei pawh a nuih a za khawp mai. 

"A na viau lo maw?" a tih ve chuan, "Awii...thi daih mah ila mak ka ti lovang, a nat dan chu turu tak a ni. A dang ka nei peih tawh lo e" ka pasal hriat loh tur hian ka ti a, ka nau chu a nui kar kar a, "Chu, pakhat i nei a a dang neih leh i hlau nghal ringawt a ni maw?" a ti ve sa sa a. 

"Aw...dam a nau ka la pai leh thei a nih chuan ka nei leh ngei awm si a, ka huphurh lawk. Fa nei tam deuh ho hi chu motor dawng tlak hluah hluah an ni. Truck lianpui pawh dawng se ka sawisel lovang, pakhat lek kan neih pawhin a dang neih leh kan huphurh nghal a nia, fa ngah deuh ho hi ka fak letling tawh zawk" ka ti deuh duah a, ka san chhuah liau liau ka fanu chu ka en ţhin a, a lian angreng bawk si, Pathian hian mihring min siam hian a lo ngaihtuah chikim e tih bak rilruah a awm lo.

"Thau hmuk se a lawmawm dawn lutuk ringawt. Tunah chuan ka la pawm thiam ve chiah lo a, lian hret se la, ka rawn awm ziah ang" thei tur min in tir pahin Liantei chuan a ti siam siam a, ka pasal chu a nu bulah kan fanu enin a ding leh daih tawh. 

Midang an awm loh hnu chuan, "Min ngaihsak lo reng reng. Na ka tuar ve em em a, ka chauh tehreng nen" ka ti fiamthu a, ka fiamthu tih erawh a hrethiam kher lo ang. Kan fanu pawh ka bulah a muhil bam a, rem leh rem lo hian ka sam a lo chul a, "Ngaihsak e...ka ngaihsak ber che" a ti dam thlup a, dawt a sawi lo tih hre mah ila, "Naute chiah alawm i ngaihsak, keichu min ngaihven ţhat peih miah loh kha" ka ti leh a, a nui liam mai ang chu ka tih laiin thutak deuh hian, "Aaa..Pâte, naute em em chu thik lo la, in pahnihin ka hmangaih che u ka tih tawh kha" a ti a, ka biangah a dawm a, duat deuh a min en chuan ka lungawi tawk ve em em tho. 

"Tum bur tawh lo la, ka duat ber che alawm. I ţha ber, ka hmangaih ber che" naupangchhia zet a a tih chuan, "Khatiang duai duai kha chu ka duh chuang lo, ka ten tlat" ka lo ti tlat a, a ngaihna a hre lo khawp mai. 

"I ti leh bawk si, nih leh duat i duh dan sawi la" a ti leh a, ka lo nui ta ringawt a, "Ka uang mai mai a nih kha, min ngaihsak a, i chezia ah ka hre vek alawm. Ţawngkam a in duat leh lutuk hi chu a tenawm a, nupa pawh ni ila ka ten tho tho. Min hmangaih thu i sawi hi a tawk viau a ni" ka tih chuan, "Nitin ka hmangaih che ka ti ang a, thil dang ka sawi lo mai ang" a lo ti ve zat a, naute a tal leh deuh chuan, "Pawm loh chuan i muhil duh reng reng lo" tih leh pawm a rual a, "A mak e...pawm reng suh ka tih tawh kha. A awm ah khan dim deuhin dawm la, a muhil veleh mai dawn alawm" lo ti mah ila awmzia a awm lo, a din pui a, khum bulah chuan a awi a, tihngaihna tak pawh a awm lo a ni ber e. 

Damdawiin aţanga kan chhuah chuan kailawnah fimkhur deuhin min kai chho a, min pawm a tum ngial nain ka duh tlat lo. A awlsam zawk tiin kawrfual ka ha ve ngei a, kailawnah chuan pen a lo ti harsa veleh tho si, ka kawrfual hak lai chu a chawi chhing a, muangchangin min chhoh pui a, ka hnung chiahah Nu Hlimin naute pawmin min zui a, a hnung lehah phir te nau puan leh damdawiin a kan mutbu ken vel khai bawr lukin an lokal ve bawk a, mi chuan min hmu se an nuih a za ve viau ang. Ka hawi let a, min lo en ţhap a, keipawh ka insum hleithei lo. Ka pasal lahin kal chak a phal bawk si lo, kan chhangchhia a ni tawp mai. 

Pindan chhung pawh an lo ti fel diam a, nau puan thlengin an lo chhawp sa a, in a an haw lawk lai khan an lo siam fel ve a nih ka ring. Ţhat chhuah ngai hlei lovin ţhat an han chhuah ve chu ţah te lam lam an ti chhuak alawm le. 

Khuma ka mut fel hnuah nu Hlimi chuan ka bulah naute a rawn mut a, a te si, a kim ve biai bawk si, ka pasal nen tlawnga mu ţhin kan ni a, naute mutpui tur a awm ta thut te chu a mak a, ka ni deuh huih reng mai. 

"Mihring chu i ni ve sia aw" tih pahin ka pasal chuan a rawn tawk zauh a, rang deuhin Faith-i nen chuan, "A hmaiah khawih suh" kan lo ti rual a, Hope pawh a lo nui ve hak hak mai.

"U Sai, na i nei em?" Hope chuan a lo ti ve thung a, "Nei lo e...indim deuh chu a ngai nain na lutuk sawi tur ka nei miah lo. I u lah hian min dim leh mah mah a" ka fanu en reng chung chuan ka ti a, a muhil daih nain a muhil lai mai mai pawh chu ka thlir ning thei thlawt lo a ni. 

"A muhil tho sia a tep chap chap mai. A hmui te hi a tê sia..awii ka duh emai. A thlalak pawh ka ngah tawh lutuk ka status reng mai" Faith chuan a ti chul a, anni pawhin khaw dang an hawi thei meuh lo chu a ni. 

"A mutthilh chuan a bulah khan au vak vak mah ta che. Chhuak tawh rawh u insuk tur pawh a tam kha" ka pasal chuan a ti a, an hnial ngam bawk si lo chu lungawi lo deuhin an chhuak a, nu Hlimi erawh a la awm reng thung. 

Khum bula a ţhut vang vang hnuah, "Nicholas, nupui in neih hian hmeichhe dang en kan vek a ngai a nia aw..hei fa hial in nei tawh a, mipa phei chuan hmeichhe dang awmpui in awl sam a, midang lakah fa i lo nei tel hlauh ange" thutak deuh hian a ti a, a sawi dan kî chu hrethiamin ka ngawi reng a, ka pasal zawk chuan, "Kalsan tawh rawh ka tih kha. I hriat reng ringawt chuan hmalam i pan thei nang. Mipa zawng zawng kan in ang vek lo" a lo ti a, nu Hlimi chu a thaw halh a, a hlauhna a reh hleithei lo hi engtia han tih chi nge mawni? Puih theih dan lah ka hre mang bawk si lo a, sual viau mah se hetiang lam kawngah kher kher hi chuan a khawngaihthlak takzet a ni. 

"Mipa zawng zawng inang vek lo tih reng ringawt a ni lo. Rilru hi nghet rawh se, i pa ang hian awm ve reng reng suh ang che" tih leh thawh a rual a, ka pasal pawh chuan a chhang let tawh bik lo. 

Ka bula naute mu chu a en leh vang vang hnuah pindan aţang chuan a chhuak a, "A inchhir ve deuhin ka hria ka nu hi" tih pahin ka pasal chu ka bulah a rawn mu a, min tihnat hlau takin min kuah zui zat bawk. 

"Engti inchhirin maw? A hlauthawng zawk a nih kha, a lo tawn tawh a nih avangin hmeichhe dang laka i fa ka pawm a ngaih ve a hlau a nih kha" ka ti tlang rawt a, "A nih tho rualin a sual ţhin lutuk kha a inchhir ve deuh niin ka hria. Ka sawi chiang ngam lo nain inchhir tho si, sawichhuak ngam si lo a ang" a ti nuah nuah a, a inchhir awm pawh keichuan ka lo hre lo a, inchhir anga a awm loh vang te pawh aniang, inthiam lohna leh inchhirna pawh nei lem lovin naute hian a ti hlim ve hranpa mai mai niin ka hria. 

"Faith-i hi chu a la â a, tunhma a a awm ţhin dan kha chu hrereng mahla ani chuan a hre tawh kher lo ang. Naute a awm phei chuan a be chhe tawh kher lo maithei bawk che a, keimah ka pawimawh ber, tiraw?" a ti a, ka nghawngah chuan a hmai a phum zui a, "Pawimawh e...awmdan i thiam viau chuan boruak a nuam chho ang a, a nih lem loh a, tun hma anga en liam theih chin i ngah lutuk chuan kan pahnih hnih hian min zuam leh tial tial mai ang. Naute kan nei a, a hlimchhawn chauh a la ni bawk a, engmah a la hriat tak tak loh" ka lo ti a, ka fuih pawrh pawh a ni chiah lo, ka fuih a ni mah zawk. Kan inchhung angah chuan hetiang hi a ngai, tu te inchhungah pawh a ni vek ang, mipa in diktak a ro an rel loh chuan engmah a dik thei lo. 

"Ka inchhir e chu an ti kher lo ang a, a ruk tak chuan an inthiam lo ang. An awmzel danin a hril mai ang, an inthiam lo tak tak a nih chuan an ti chhe ngam lo ang che. Nangmah hi i fel em a, an tihsual i hriat reng sak ngai lo a, nupui ka nei fuh, ka ring tawk che" a tih meuh chuan, ka la hriat vek thu sawi a nuam tawh chiah lo, min tih ţhin dan kha la hre vek mah ila ka ngawi a, ţhat an chhuah zel a nih chuan ka thungrul bik lo ang. Anni ngaidam thei lo tur khawpin ka fel bik lo a, ka khing let ur ur fo a, ka pasal hian zir viau lo se chu kan innei tawh kher lo zawk ang. 

"Faith-i te hnenah eng nge i sawi ve?" ka tih chuan, "I bula ka sawi ang tho hi. Ka nau a nia, fak a ngaih naah ka fak mai. I u nau nei i buaipui nasa a i fel lutuk ka ti zeuh a, kha, insu rawh tih pawn a phun loh kha" nuihza aw zet hian a ti a, ka sawi reng kha, unau an ni miau a, keiin haw reng mah ila ka pasal hi chuan a haw ve reng dawn chuang lo, huat reng pawh tum se a thei lovang, huat tir ka tum a nih chuan keimah ka inti hrehawm mai mai zawk ang. 

Rin aiin nau rawn en tu an tam a, kan fanu pawhin thil pek a dawng hnem malh malh khawp mai. Ka thawhpui te an lokal a, ka pasal thawhpuite an lokal bawk a, thawmhnaw ringawt pawh hak sen loh a dawng hial ang chu. 

"A ţhan san vat dawn a, miin an rawn pek hi ring se la, lei belh a ngai tawh lo" ka ti fo chung pawhin an lo lei leh ţhin a, phir te lah hi lei nuam ti ti an ni lehnghal a, khawia pawisa nge an neih pawh ka hre zo zai tawh lo. Anthony-a ţhiante lah a khat tawkin an lokal ve reng a, a u ţhiante zingah ka pasal pawh hian hmelhriat a lo ngah ve phian a nih hmel. Kan chhungte lam an lokal nasa bawk nen, inleng kan nei ngun lutuk chu ninawm lamah a kal zawk a, Bawihtei lah ka hlauh ang ngei ngeiin a sual chho a, thla khat a tlin meuh chuan zanrei deuh a awih lawp lawp a ngaih chang te a awm a, mut a chhuah deuh phei chuan, "Nangmah vang" tiin ka pasal hi ka chhuahchhal reng mai.

"Ehe...ve tehmial che chuan" ka ti hlut a, inchhungah Chhandami a lo pen lut zan zan a, ka pasal lah office a kal daih bawk si, kan boruak a ţha vak lo bawk nen, lo dawnsawn dan ka thiam chiah lo khawp mai. 

"Ka lokal vat thei lo a" a ti a, ţhutna ka lo kawhhmuh ah chuan a ţhu a, a ep chiahah ka fanu pawm ran chungin ka ţhu ve bawk. 

"Khaw nge midang?" tiin a hawi kual a, tumah a hmuh tak lohah chuan a tlangnel sawt niin a lang. 

"An chhuak vek..Kungtei chiah a awm a, a nuam sam lo a, a mu ve lawk a nih kha" ka lo tih chuan, "In pa ka la be thei lo reng a, i mak ve ka ti. Engkim ka hrilh vek tawh chung che pawhin min la thik tho a" a ti fiamthu a, a nui zui hak hak a, kan lo ngaihven em em lo a, kan la block reng tak ang. 

"Min hrilh kim loh i neih nual ka ring. Bakah ka pasal a ni a, ka hriat loh a i lo hmu kha ka tan chuan a lawmawm vak loh alawm. Mahse, thil hlui a ni tawh a, sawi tawh lo ang" ka ti zung zung a, mipa vanga inhnial chiam hi kei a naupangchhia ka ti tlat a, ţhing ka tih chi a ni bawk. 

"Ka hmuh che hian ka hrechhuak lo thei lo alawm. Ţhian chu in mamawh chang kan nei ve ţhin a, nupui pasal te hriat chi loh thuruk eng emaw inhrilh duh chang te a awm ţhin. Pasal ka nei a, anin nupui a nei a, kan inkarah engmah a awm tawh lo bawk a, lo inbia in lo inhmu fal pawh ni ila thinrim a lak chi a ni lo" a ti dam thlap a, nau lo en tur a lokal ni awm tak a ni a, a thusawi duh zawng chu ka kham riau thung. 

"Awii..sawi tawh suh, a rei tawh em kha. I lungawi loh chuan ka lo siamţha ang. Thil hlui an sawi an sawi tawh ngai lo" pangngai taka ka tih chuan, "Nia, a tirah kha chuan ka thin a rim a, engkim ka hrilh chung che pawh a khatiang zawnga i che kha ka haw em a" a lo ti leh a, ka fanu pawh chu a rawn la hnaih chuang lem hlei lova. 

"Boruak dangin min tlak buak lai a nih avangin rilru a buai ve deuh bawk a nih kha. Ka tih duh ngai loh thil ka ti ţeuh alawm. Mahse, sawi tawh ang khan, khatianga a ruka in inhmu kher kha chu tu nupui mah an lungawi ka ring lo. Engahmah ngai duh tawh chuang lo la, ka thin a rim tawh lo a nia" ka ti a, a lo ţhen sak a, a lung a awi chiah lo tih chu ka hria. 

"Keipawn ka lo hre tawh lo a, Nicholas hi biak chu ka tum ţhin a, ka pasal a fel vak loh hian a hnenah ka vui ve ţhin a, tun thlengin ka be tlang thei lo zel a, ka thin a rim tawh bik lo nain kan inhmuh takah chuan ka hrechhuak zawk a, ka sawi mai mai a nih kha. Ţhian dang pawh kawm lova inkawp chawt kan nihna laiah Nicholas hi chu a danglam ve deuh a, ka beisei ka tihna a ni hauh lo a nia" nui hak hak chung hian a ti leh a, ka lo nui ve mai a, tunhma ang chuan kan inpawh tawh chiah lo.

"Khawimaw naute chu ka lo en ve" a ti a, ka bulah a rawn insawn nghal bawk a, ka lo insiamţha sawk sawk a, a tan a en nuam turin naute chu ka pawm a, a muhil leh tawh a, chuti chung chuan, "In pa nausen lai thlalak i hmu tawh em?" a ti deuh hlut a. 

"Aw...nau ka neih hlim khan min hmuh tir alawm" ka tih chuan, "Nang ai chuan in pa a chhun zawk a nih hi. School kan kal lai khan intithei deuhin a nausen lai thlalak min hmuh tir ţhin a, kan puitlin hnuah pawh a ni tho, uangthuang deuhin min hmuh tir ţhin nain ka lo en uluk thei khawp a, Nicholas a ang zawk tak tak a nih hi tunah rih chuan" a ti siam siam a, a phur hmel khawp mai. 

"An chhungte ho pawn an ti vek alawm. Mahse naute chu an hmel a danglam reng a, sawi dawt theih pawh a ni rih lo. Thla khat chiah a la nia, nakinah a hriat zel mai ang" ka tih chuan, "Ka lo pawm ve ang" tih leh Bawihtei chu rawn ban a rual a, nau pawm tawh a ni bawk a ngaihngam deuhin ka fanu chu ka hlan a, chemtein a vit pawp dawn pawh ni hlei lo ka tia, ka hlauthawng em em lo. 

Bawihtei lah chu a tal leh bat bat tawh a, Chhandami chuan zawi te tein a sawi a, a en uluk ngang mai. Fa pahnih lai a nei tawh bawk a, a khawih vel pawh kei ai chuan a zei deuh. 

"Awii...Nicholas chu a ang tak tak a nih hi, ti hi chuan Nicholas ka pawm a ni ringawt" nui har har chung hian a ti a, heti tak hian Chhandami hi ka hmuhah a la nui nasa ngai lo. Ka fanu hi a lawm ve tak tak te pawh a ang. 

"Pafa an ni miau a, an inang ve bawk ang chu" ngaihsam deuh a ka tih chuan, "In pa tan pawh a ngaihţhatthlak dawn a nih hi. Heti chuan a fa a ni tih a chiang deuh ang a, ka fa upa zawk a pian khan ka pasalin min ringhlel a, Nico-a fa turah a ngai a, a hrehawm duh zia chu" a ti a, en pawh min en lem lo. 

"A va ti ang lo ve" ka lo ti mai a, tun a sawi leh tho tur te chu hman hmanah khan min hrilh daih tawh tur a nia, a hmelah engmah a lang chhuak ve ngai bawk si lo, ka rilru tih nawm loh a tum ve hrim hrim se a thuphungin a sawi ve mai mai tih takngial pawh ka hre thei lo. 

"Chu chu alawm..ka neih chhun tih a hriat vang khan a thik ve thei em em ringawt a, Nicholas lo thik tur dang a hriat loh vang te pawh a nih ka ring" a tih laiin Nu Hlimi a lo haw a, Chhandami chu a en vang vang hnuah, "Chhandam, i insiam tawh em?" chiang khelh khawlh hian a ti a, a hlauhna bawk kha a lian leh hluai tawh aniang chu. 

"Engtia insiamin?" tim daiin a lo ti a, a inthlahrun nghal dâk danah Nu Hlimi hian a be ţha tehchiam ngai lo tih a hriat theih nghal vek. 

"Aw...fa nei thei tawh lo turin i insiam tawh em?" a ti leh a, nuam lo ti hmel pawh a pu lo. Nu Hlimi a ni miau a, amah aia dinhmun hniam, a ngam zawngah chuan sawi hreh engmah a nei lova, a tim chhin eih ngai lo bawk. 

"Aih...la insiam chiah lo" ban charh a Chhandamin a tih chuan, "A nih chu, Nicholas nen in inbe ngai em?" a ti leh a, ka lo inthlahrung leh tawh zawk. Kan in aţanga ka let hlim kha chuan min tih el nan Chhandami a sawi mawi vel a, a ngaithei der si lo. Nu Hlimi nun hi chu a hahthlak ngawt ang. 

"Be ngai lo...tunah pawh hrilh lawk lovin ka lokal tawp, nau an nei tih chu ka hriatna a rei tawh a, ka lokal hman lawk lo zawk a" tiin ţha deuhin a lo chhang leh a, "A ţhat chu...pasal neih tawh chuan ţhian kawm vak loh te hi a ţha zawk alawm. Buaina pawh a tlem deuh nge nge ang chu. Pasal nei chunga ka ţhiante ti duan duan reng ho hi chu an hne awm tlat" a ti pek a, Chhandami nen chuan kan in melh ralh a, nu Hlimi lah chuan a thusawi chu pawi ti ang pawh a awm lovin sahdah a hmuam a, dawhkanah kuhva a dah chhuak a, a tih tur ang ang a ti mawp mawp ringawt a, a ţha vek e ti zel ila sawisel tur kan hre lo deuh ang. 

Phir te pawh rin aiin an lo haw hma a, Hope-in engmah a sawi loh laiin Faith chuan, "Naute khan tu emaw a ang a sin" fiamthu ti tak deuh hian a ti a, Chhandami an khei reng mai chu keimah zawkin nuam lo ka ti a, an pindan ţheuh ah lut bo diak lo phei se chu awm ngaihna a vang viau ang. 

"I chhungte hi chu hmelma a siam chi an ni lo reng reng. An hlim ber lai pawh a tlawn ngai tho ang chi kha an nia" a ti fiamthu a, "An fel tawh lutuk. Naute hi an lawm a, tun aia a len deuh hunah phei chuan ka chang mang lo ang" ka lo ti a, "Thinrim kher lo la thil ka hrilh ang che aw" a tih chuan ka lo bu nghat a. 

"Hmeichhia chuan duhthu kan sam nasa ţhin a, thil ni thei lo tur thleng thleng a kan ngaihtuah ţhin hi i hre mai ang. Nicholas ka duh tak tak lai chuan amah nen a inneih thleng khan ka ngaihtuah ţhin a, fa kan nei ang a, a chhungte ho hian min duat rawn ang a tih thlengin, tunah chuan engmah a awm tawh lo ka tih kha aw. Ka duhthusam ţhin ang zawng zawng chu i chungah a thleng ta vek a nih hi" a tih chuan, "Nang hi i rui deuh em maw ni? Hman a kan ti ti vak ţum kha i ang tawh lo" ka lo ti a, kan nui dun tak nain kan nui lui vel mai mai a ang zawk. 

"Kan thil tawn hian mihring hi min lo thlak danglam nasa thei khawp mai. Pasal neih fuh loh hi a lo pawi e ka tia, nang chu i vannei a, pasal i nei fuh a, ti hian damchhungin nuam sa deuhin i awm reng tawh dawn tihna a nia. Ka chhut chet chet phei chuan ka thik rum rum zel che lawm" a darin min nawk pah zauh a, a nui var var bawk. 

"I pasal hi a nihna ang angin pawm la, lungawina i hmu ve mai ang. Nupui pasal kan inneih tawh chuan kan kawppui te chiah hi damchhunga kan hmangaih tawh tur, kan hmangaih hnuhnung ber tur an ni mai a, kan kawppui te ber kan sit tlat a, midang kan awt zel a nih chuan lungawi a har alawm" ka tih chuan, "Aa...keini chu a fu lo lak lawh a nih hi" a ti halh a, khawngaih tur nge pawh ka hre lo. 

Ka fanu tana kawr a lo ken chu min pe a, ka pasal lo haw hmain a haw a, ka pasal a lo haw chuan Chhandami chu ka unblock ve ta nge nge a, amah pawh ka hrilh chuang lo. 

Mut hmunah Chhandami lo len thu ka hrilh a, engah vak a ngai lem hlei lova, "A la beisei deuh chein ka hria" uang zet a ka tih chuan, "Ka beisei ve loh chuan a tawk. Khatiang zawng khan ngaihtuah ţhin suh" a ti a, ka dul a chul lai chuan a kut ka lo man sak a, "Chul chul zel suh, tunah phei chuan a mawi rih lo ropui si, ka sit teh mai a nia" ka lo ti hlak a. 

"Engtinpawn awm la i mawi vek, i dul pawh a mawi em hi" a lo ti a, ka kawr chu hlimin a fawp a, nau neih zawh hnu hi chuan dul hi a mawi lo duh bik hrim hrim. 

"Ka pasal berin mawi i tih chuan a ţha a ni mai" ka ti a, ka hmui a rawn fawh chuan ka lo chhang let ve vat a, kan inneihna a la rei lo bawk a kan la inthlahlel ve rih khawp mai. A bek a dawm chung meuhin duhthaw deuhin lo chhang let ve mah ila inlakhran hun a hria a, ka bula a leh thlak hnawk rual chuan min kuah a, Bawihtei a ban tel zeuh zeuh bawk. 

Ka muhil thei ve lo chuan a phone ka khawih mai mai a, dar khat velah Chhandamin, 'Message pawh a tlang ve thei ta alawm' tih zawng hi a rawn thawn a, ka chhang let lem lova, a meng rei angreng si, rilru hahna a nei a nih ka ring. Henu hi a nun hi a buai ru riauin ka hria, rinchhan tur leh hnem tu tur a zawng ruai reng mai. 

Thla thum chawlh ka lak a zo a, Bawihtei lah a lawmawm ve tawh si, hna a kalsan ka hreh viau nain ban ngawt ka phal bik bawk si lo, ka kal tur chuan ka pawm leh rih a, Nu Hlimi lahin, "Hman aţangin bang rawh ka ti ka tia lawm. Hlawh tlemte neiin i kal reng a, night a ngai leh ang a, Bawihtei hi engtin nge a awm ang? Tunlai mi ho lah hi hna neih loh in hlau a, fate hi ngaipawimawh zawk ta che u" a ti hlak hlak a, "Mihring chu kan chin a hriat hleinem. Miin hna duhin theihtawp chhuahin an zawng zawk a, engpawh lo thleng se thlaphang lo a kan awm theih nan hna neih ve te chu a ţul alawm. Hmeichhia nih vanga hnathawh loh ngawt tur tihna a ni lo a" ka ti let a, a tum bar a, Bawihtei erawh hi chu a duat a, a kutah awm chawt mah se ka ngaihtuah lo. 

"Umm..ka thlah ang che. Hna chungchangah in inhnial ngun a, engmah in sawi kaw ngai lo. Inhnial tawh lo law law rawh u, i peih chhung chu thawk rawh" tiin ka pasal a lo inrawlh vat a, "Bawihtei ka ngaihtuah vang zawk alawm. Naupang hi nu te uapna hnuaia an seilen tluk a awm lo" a ti leh hram a, hre ve tho mah ila hna zawm leh ngei ka duh tlat a ni. 

"In awm alawm..Saii hian a ring tawk cheu tihna a ni mai. A awm loh hlanin ţha deuhin lo enkawl ula, ring tawk lo cheu sela chu in kutah a dah ngam nang" tiin ka pasal chuan min hruai chhuak a, "Eng emaw tawk thut thei reng kan nia, hna bansan ringawt chu a uiawm lutuk. Bawihtei pawh ka ngai a, a bula awm reng chu ka chak a, thawk a phit a bang rawh intih reng ringawt mai" ka ti a, motor chhungah chuan ka la ang hlak hlak a, a sawi ngun em a, ka ning ve tawh a ni. 

"Eng nge i ngaihdan?" ka tih leh chuan ding deuh a hmalam en chung hian, "Bang turin ka nawr lui ve lo ang che" a ti ban charh a, "Keiin hna ka nei a, ka pa sumdawnna buaipui tur a awm bawk. Puitling i ni tawh a, Bawihtei tana ţha leh ţha lo chu i hre ber ang. Ka hlawh hian engkim a lei pha lo a nih pawhin Bawihtei nen a in mamawh ang chu a lei pha ang, thawk lo mah la thlaphang takin ka siam lo ang che mah se i duh chuan thawk tho la, i duh leh ka hlawh hi ring chawt la, ka sawisel lo ang che. I zir hah a, chu chu ka zah sak bawk che a, i hna chungchangah chuan nangman thutlukna siam rawh. Ka pawm vek" a ti dam thlup a, ka kut ka khal nauh nauh a, a lam ka hawi leh ţhin a, min en ve lovin hmalam ngawt a en thung. 

"Nia..ka zir hah a, ka ban daih chuan zir hah man a awm dawn lo em a, bakah inven ve nan hmeichhia hian hna kan neih ve a ngaiin ka hria a, Bawihtei hi awmpuite bak enkawl tu tur awm lo se chu sawi buai lovin ka bang hmak ang a, mahse ka nu hi nitin inah a awm a, an lo in awm thei ang a, ka ring lutuk tho che, ka rin loh vang che ni lovin han ban tawp mai chu ka hreh deuh a" ka ti charh charh a, ţawng pawh ka ţawng ring tawh lo, han inchhuang viau dawn ila ka hlawh a la tlem bawk si, mihring chu danglam thut thei kan ni a, lo inţhen palh ta ila kan in enkawl ve theih nan hna ka neih ngei a ţul a tih thlengin ka ngaihtuah a, inven ve nan ka duh tho bawk si, ka pasalin min chawm thei a, Bawihtei hian min mamawh a, kuah chawt thei ila tih chu ka duhthusam a ni ve tho bawk a, rilru a insual buai nuai reng mai. Ka buai rukna hre hlei lovin nu Hlimi lahin bang rawh min lo ti ve sek bawk nen, a buaithlak vel vek a nih hi. 

"I duh chuan thawk rawh..ka sawi buai lo ang. Night pawh ngai se Bawihtei awmpui tur chuan ka awm alawm. I tuina ber i thawkah ka ngai a, i rilru nawmna tur a nih phei chuan ka chawm theih vang ngawt chein bang turin ka nawr lui lo ang che" min hrethiam tak hian a lo ti a, min ti inthlahrung zo vek zawk. 

"Aaa...ka hrethiam rih lo. Ka nu pawn hna a nei a, kan naupanlaiin nitin office a kal a, ti hian pangngai deuhin kan seilian tho a, ţhenkhat lah hian nupa a nitin a chhuah hi an thlawp lo angreng bawk si, keichu ka hna hi nilen a ngai lo hlauh zawk a, ka hrethiam rih lo" ka ti leh a, hna ka nei ve hi kan la buai phah fo dawnin ka hria. An zavai hian pawm thiam mai se chu rilru nuam deuhin ka thawk thei ang a, nu berin a pawm thei thlawt bawk si lo, ka pasalin min pawm pui mah se nuam lo tihna a awm ve reng tawh tho tho. 

"Ka nu thusawi chu ngaithla liam rawh. Engpawh sawi se hmin zan lo chung chuan bang suh. Bang mah la, bang lo pawh ni la i thutlukna siam ang chu ka pawm vek. Sawi tawh ang khan a ţha ber tur chu nangman i hria a, i thu thu a ni mai" a ti a, sawi ve tur pawh ka hre tawh lo, min hrethiam viau nain bang turin min duh ve tho niin ka hria a, hlawh pangngai tak a nei a, min chawm zo nasa dawn bawk si. Ka hlim loh hlauin min nawr lui duh lo mai mai niin a lang. Kei chuan fa neih hnua nuin hna kan thawh ve hi a pawi viau dawn em maw ni ka ti, thutlukna siam ngaihna pawh ka hre lo e a. 

CONT..