HIS LAST LOVE-39

HIS LAST LOVE-39

"Bang suh a ti tawp lo nain a ţawngkam aţang chuan bang tur chein a duh ve tho che niin ka hria" muang charh a Nghetin a tih chuan ka hawi mai mai a, awmdan tur ber pawh ka hre tawh lo. 

"Fa neih duah hnuah lo inţhen ta ila engtin nge ka fate ka chawm ang? Mipa hi chuan nupui dang an nei leh thei deuh zel a, chuvang te chuan ban tawp mai chu harsa ka ti deuh a" ka lo tih chuan, "I ngaihtuah thui lutuk a nih chu. Tunhma zawngin a sawisel ngai lo che a, fa inneih hnuah pawh a sawisel chuang lo che a, mahse bang tur chuan a duh che. Bawihtei hi nangmah ngeiin kuah chawt thei la a duh ber ang" a ti leh a, a ţha zawnga min sawipui a tum ngial a, kei lahin ka ngaihtuah chian poh leh ban tawp mai chu ka ui ve tho bawk si, ti hian ka thawk lui zel ang a, a nih nih kan ni tawh mai aniang chu. 

"I nute an fel ve deuh tawh a, Bawihtei an lak chhawk thei bawk che a, a zia deuh alawm. Tun hma ang kha la ni reng se chu bang rawh tih ngai lovin i ban ngei ngei a ţul zawk ang" a tih chuan, "Ni chiah e..Bawihtei hi an lawm ve a, kei ai mahin an pawm ngun zawk emaw tih tur a ni. Zanah min awih pui ngai lo nain chhunah chuan ka chang mang lo" ka lo ti ve vat a. 

"Pasal neih hi tih mai mai a ni lo khawp a, kan pasal te leh an chhungte an pawimawh a, keimahni kan pawimawh bawk a, thisen zawm lo na na na chu an fate an hmangaih ang chiahin min lo hmangaih ve thei kher lo ang, mahse ţhat leh ţhat hi a inlawm tawn theih a, kan tlin lohna lai inhriat sak run lo bawk ila ka lo ti ve ţhin a, kan mona te hian zir se chuan ko sual te hi an vang ngawt ang ka ring. Chutiang bawkin mo te ber kan fel chuan innghirnghona te pawh a awm lo deuh ang a, mihring chu ţha famkim kan awm lo tih hria ila a dik vek mai, mahni kan inhriatchian chuan mi chhiatna lai va hmuh bik daih a har lutuk tlat" a ti duah a, "Nei ve tawh mai la" ti a ka lo fiam chuan, "Awii..ka huphurh alawm. Ka rin aiin i peih rei daih a, in inneih zan aţangin inţhen i sawi nghal mai kha a nia. Diktak chuan thla khat lek pawh i awm peih ka ring lo a, i chhel reuh lutuk hi keimah zawk ka lo lawm a, chuti chung chuan nangmah vang hian pasal neih ka hreh phah tho bawk a" a ti a, a nei har viau tak tak maithei a ni. 

"A nawm loh hmel i ti deuh em ni?" ti a ka lo zawh leh chuan, "A ni mai ang chu" a ti hap a, "Mihring hi chu kan mak ve a, kan ni vek e ka tihna ni lovin mo te en hrang tlat, an tha phut ţung tho si a ei leh in a huphurh tlat ţhin ho hi an awm ve a, mo te rel hrat deuh te, hmu tling thei reng reng lo, an thil tih apiang sawisel sak ching an awm bawk a, inti piangthar deuh, mo te tana hrawn hrehawm tak si an awm bawk a, an inpawlh nuaih a nih ber chu. Keichu pasal ka nei dawn a nih rau rau chuan indang tur chi ka nei ang, buaina a tlem bakah awm khawm loh hian in mil a awl zawk. Awm khawm dul dul a, inhrawn nasat lutuk chuan neuh neuh a tam a, kan buaina te hi a tirah tereuhte angin lang mah se a rei zel a, chhungkua pawh kan inhlat tial tial ţhin a" ti lehin a hmaa coffee inchhawp chu a in a, "Mi in a kan va mo hian hrehawm tuar berah kan inngai a, a ni bik miah lo a sin" ka tih chuan min en phawk khawp mai. 

"Mo kan nih avang hian thil hi kan la kawi ve ţhin bawk a, an fate an hauh ang chiah a min hauh a, an fate an vin ang chiah a min en ve te hian mo kan nihna kan hre kar a, kan haw bik ţhin a, keimah ang chiahin an fate pawh an hau ve tih kha rilruah a awm tawh ngai lo. Min hau nasa bik, min vin nasa lutuk kan tia, kan la na bik tlat zel a" ka tih chuan, "Chu chu thil awm thei a ni ve tho. Mahse, awm ho dul dul loh hi thil ţha ber a ni ka ti tho tho. Hnam dang ho pawh an awm hrang hmak a, neuh neuh te hi an neih tlem hmel bik ka ti ţhin. Awii...engmah kan sawi kaw lo ang, sawi tawh lo teh ang" a ti a, ka lo nui hak a, ka phone screen a en ruala Bawihtei thlalak lo lang chu a thim leh hma zawng ka en a, reilote chiah chhuahsan ţhin mah ila ka ngai veng veng zel.

"Ngheti, fa ka neih ve hnu hian nu hmangaihna nasatzia ka hre chauh mawle. Bawihtei ka hmangaih ang hian ka nu'n min hmangaih ve ngei awm si a, na ka tawrh hlaua a bula min awm tir reng a tum te kha mak ka ti viau ţhin a, tunah chuan mak ka ti tawh lo. Fate hmangaih hi a lo na em a ni" ka tih chuan nui kar kar chungin min rawn nawk a, "Fa i nei a i puitling sawtin ka hria" min ti vel a, fiamthu a sawi mah nise a dikna chin chu a awm tho ang.

Mapuia lokal chu, "Eng nge i duh?" ka ţhiannu chuan a lo ti hmak a, "Ka pi ka rawn kan dawn a nih hi. In lo enkawl ţhat leh ţhat loh ka rawn zawt hmasa che u" a ti a, a nui ruh ruh a, ka ngaina thei tawh hlawl lo. Khati khawp khan min ti hrehawm a, ka pasalin min ring tlat lo se chu kan inţhen vang vang tawh maithei a ni.

"I pi pawh kan hriat si loh. A doctor zawk khan va endik la ti nia, keini min rawn zawh hmasak a ngai hleinem" ti a ngeiawm zet a ka ţhiannu in a lo chhan chuan, "Saii, i damţha em?" a ti ta daih a, ka chhang duh lawk lo a, chhanna beisei a min en reng takah chuan zawite hian, "Umm" ka ti ringawt a, melh pawh ka melh zui peih lo.

"Naute pawh ka lo la en ve lo a, a lian tawh em? Naupang hi chu an lian chak bik teh a nia" a ti luam a, "Aw lian ve tawh e" tih chiahin ka chhang leh a, "A ruka thla la tur te hi i lo hruai leh pek lo maw? Lo ding hnai lutuk lo la, thlalak te a lo darh leh palh ange" tiin ka ţhiannu bawk chuan a lo ţawng el leh a, huat tham a nih tehreng nen haw duh lovin a nui liam mai mai a, engahmah a ngai lo vel lutuk chuan thin a ti rim hlur mai. 

"Khatiang kha chu kan kal pel tawh. Saii, ka lawmpui che a nia, i status hmu thei ho chuan i fanu hmelţhat zia ngawt an sawi ţhin a, a chhun che a nih ka ring" a ti vel a, a phone number hi ka block bakah ka delete a, damdawiinah lah kan inhmu khatin engtin nge hun a hman ve ţhin tih takngial pawh ka hre lo.

"A pa a chhun an ti zel" ka lo tih chuan a ţhen sak a, "Nangmah a chhun zawk ang che. En tu a ngah tho a, ka lo la en ve lo mai mai a nih kha. Kum khat a tlin hunah thil ţha deuh ka lo leisak ang" a ti a, hman a min biak ţhin dan a min be leh te chu a mak zawk. Thil duhawm lo thleng ţhin kha chu hria ang pawhin a awm duh tawh lo. 

"Engmah lei a ngai lo, kan ti hek mai mai che" ka ti a, ka hmaah damlo file inchhawp chu ţul hawt lo ah ka keu ta ringawt a, pawimawh awm ang hrim hian uluk deuhin ka bih a, ka tih ang chiahin ka ţhiannu in a lo ti ve bawk. 

Mapuia pawh a chhungah a lut ve ta nge nge a, a lut fel chiah chu thawk huai pahin kan ţhiandun chuan kan inmelh a, kan han nui dun leh rih ţhin a, min tih chhiat vek hreh lo ho hi chu ka hnaih lui tlat duh bik lo. 

In a ka haw chuan Bawihtei a lo muhil daih a, "A mutthilh chuan paw reng duh kher suh. I dar a kham mai mai ang" nu Hlimi hnen a ka tih chuan, "Ka mut a, thawm hlekah a harh nghal zel a, ka paw bet tawp a nih hi. A mutna a rei tawh a, a harh ţep tawh ang" a lo ti a, nui chungin Bawihtei biang chu ka tawk zauh a, Rita-i ka hmuh rualin ka nui hmel a ral riai riai thung. 

"Ka lokal khat bawk a vawiin chu ka lo leng ve a nih hi. In naute pawh ka hmu ve chiah a, a hmelţha khawp mai" a ti luam a, tawi tein ka lo nui a, "Ka inthlak fel hnuah ka puak chhawk ang che" tiin choka ah ka lut ta daih a. 

"Fa in neih hnu em em hi chuan inrawlh ka tum tawh hleinem. Min ngaina lo mahla ka lo leng ziah dawn tho a, min ngainat zir rawh. In pa vanga lo kal ka ni tawh lo e aw" ti chungin Rita-i chuan min umzui a, "Kawm tur dang i nei tho alawm, kei a lo ngainat ve kher che a ngai hleinem" ka ti a, thingpui bel ka chhuang kai zui nghal a. 

"I luhlul ve reuh sia, mi i ngai sual laklawh mai mai a nih kha" dawhkan kil paha a tih chuan, "Miin an ţahpui rawih rawih khawp a natna rapthlak, cancer vei anga insawi duh te chu tuman fel an ti nang" elsen zet a ka tih chuan tum burin min en a, a tello pawh hian buaina a tam tawh a nia, a rawn lawr ve sek ringawt mai.

"Kei hi chu min thik vak duh suh. Chhandami ang ka nih loh hi, i pasal hian min hmangaih ve hleinem. Tunah pawh Chhandami tan chuan engkim tih a la huam ngei ang a, chutiang khawp chuan a hmangaih alawm. A first love a ni a, a theihnghilh dawn hauh lo tih hre tawp rawh. Thik tur âwm ngawih ngawih i kawmngeih a, kei min ngaithei der lo thung a" a ti zat zat a, gas bulah ka ding daih a, a hnaihah pawh ka ţhu peih lo. 

"I sawi kha chu nunhlui mai a ni tawh. A nun a ka tel ve hma a mi daih a nih kha. Duh duh a hmangaih thei alawm, mi sawm chuang lo hmangaih tawh pawh nise pawi ka ti lo, ka sawi ang khan a nunah ka la bet ve tlat lo a, min hriat hma daih thil a ni. Tleirawl laia a ţha tih, a hmangaih nih ai chuan a puitlin tawh hnua a hmangaih nih hi ka duh zawk. A hmangaih hnuhnung ber nih hi pawi ka ti lo, thla a muang daih zawk" ka ti ve ngat a, a nunhlui an sawi reng te, chu chu a hmangaih ţhin tih vel an sawi peih lutuk hi ka kham hluah hluah tawh. 

"Ka cancer ka tih khan min ngaihtuah lo deuh angin a awm na a ka chhungte bulah a lo zawt a, min hmangaih ka ti hauh lo a nia aw. Mahse, kum kha leh chen kha kan lo inzui ve tawh a, min ngaihtuah loh pawh tum se a thei lo, keimah pawh min zawt lovin ka chhungte hial a lo bia a nia, ţhianţha tak chu a ni ve chiang alawm" intithei fe hian a ti a, chutiang thleng thleng chuan ka lo hre veleh pek lo, ka pasal hian min hrilh nachang a hre lo ve ziah. 

"I hre ve nange? Mak i ti deuh a ni maw? Ka nute a lo zawt a, min kam khat phah nghe nghe alawm" a tih leh phei chuan dik lohna a nei emaw ka ti hial tawh zawk. 

"Cancer anga i insawi kha i zak miah nange?" ka tih chuan, "Zak ila ka sawi dawn mi?" tiin min lo zawt lek a, ka thaw hak a, "Min siam kep ve rawh aw" a la ti zui. Ka ei loh zia lantir nan ka meng kual ralh a, "Khatin i mitmu ti che kual vel suh. Tlang deuhin ka hrilh tawp mai ang che, in inneih hnu pawh khan i pasal hi ka beisei lui zel alawm, ka duh miau a, ka ngai bawk. Kan awmdun nasa a, ani pawh hian min ngai ang a, a lo let leh mai ang tihna rilru ka pu ţhin a, mahse fa in neih chiah khan ka beiseina zawng zawng a bo vek a, ka lokal duh lawk lo reng a. Beisei awm lo beisei luih tlat ai chuan hmalam pan ka thlang tawh zawk. Keichu ka frank a, zep si se lovin thil nihna diktak ka sawi tawp zel. Chhandami te anga fing ker ho hi hlau zawk rawh. Keichu min thik duh tawh suh, Nicholas hian min duh hlawl lo, ka ngei a nia" a ti bawrh bawrh a, thinrim hmel a pu lo a, a insawi ang chiah chiah hi a nihna a ni maithei. 

Choka a ţhutthleng inhung chunga a thil dah ho chu a la leh rih a, keipawn phun nawi lovin thingpui chu ka siam kep ve mai bawk. Dawhkan ah chuan a phawrh hnuk a, "I fanu ta tur a ka lei a nih hi. Hlim mihlim-i sawn a en chak a, nangmah ngei pek che ka duh bawk sia, midangin an dawn daih chuan i thinrim leh ang a" a tih chuan a uang emaw tiin ka melh kâwk a, a uang hauh lo, a hmel a thutak lutuk tlat. 

"Fa nei tawh ho chu engatanmah ka ti lo ka tih kha, beiseina ka nei rei zawk a, mahse tunah chuan ka peih tawh lo, ka hne tawh, ka tlawmngai ve tawh bawk" a tih lai chuan a hmaah thingpui ka chhawp sak a, a thil rawn lei ho chu sarang aţangin ka phawrh chhuak nghal a, midang zawng aiin vawikhatah a lei hnem lehpek a, a uchuak ve thei khawp mai. Mi aia pe ţha bik tu nih a duh vang a ni ber ang. 

"A sen no hlir a nih hi" ka tih chuan, "Keipawn rawng ah chuan ka ngaina lo ber. Thil sen no hi ka hmu nalh thei ngai lo, mahse hmeichhe naupang tan chuan a mawi ve sia" a lo ti a, "Keipawh ka ngaina ngai lo. Ka nu'n thawmhnaw par min leisak ve pawhin a sen no a tel chuan ka ha duh ngai lo. Mahse fanu ka nei a, ka ngaina ve deuh tawhin ka hria. Miin an rawn pe ţeuh a, a hak tir loh theih bawk si loh" amah pawh hrilh em em chuang lo hian ka ti a, ka phawrh zawh rualin nu Hlimi pawh a lo lut a, "Dawhkan chungah dah tawp mah ta che. Chaw eina hmun a nih hi, fimkhur ve tur alawm. Hmarcha a lo kai palh phei chuan hrehawm a ti dawn a sin, engmah a sawi thei ve bawk si lo" a ti hlak hlak a, dawhkana thawhnaw ka dah pharh ho chu a khawm sawk sawk a, "Suk lohin ka hak tir dawn hleinem. Ka suk nghal duh vang a nia ka dah chhuah, kai pawh nise ka su reh vek ang" ka tih chuan rum zetin min melh a, "I ngaih a sam emai" a ti chung chungin a thawmhnaw lak ho chu ka chhuh sak a, "Thla ka la lawk dawn...kan status ve ang chu" ka ti a, a ner nasa ngang mai.

"Thil engkim, in kalna hmun, in hun hman dan, in thil ei mai mai thlengin in status chuai chuai reng a, tunlai mi hi chu in mak emai, in boruak hi ka zo ve lo. Thla i lak zawh veleh su rawh, hna i kal lui tlat bawk si a, i hah deuh dawn a ni mai" min ti a, a vin hluk hluk zel hi chu ngaiah ka nei ti tih der tawh. Ka mo tirh ang em kha chuan a sual tawh lo a, ngainat a har viau thung. 

Min pe tu ngaithei lo viau mah ila lawmthu sawi nan a status ka tum lai chuan Chhandami status ka hmu a, ka en rang khawp mai. 

"Office ka dawr a, hei pui hian eitur min lei sak a" tiin ka pasal nen a an thlalak a dah a, ka mood a chhe nghal vekin ka hria. Rita-i lahin min sawiţhaih nan tak a hmang a, mipa hi chu 'ka hmangaih che' an tih pawhin rin reng reng loh tur an tih ţhin te hi ka hrethiam vek tawh. Biak pawh min rawn be lovin a reh hmak a, a tana hmeichhe naran ni lo, Chhandami berkher thil a la ei pui zui. Engmah a awm tawh lo ti deuh reng mah se ngaih a ţha zan thei chuang lo a, hmeichhia ka thik awmchhun a ni bawk ang, chuvang chuan a hmu lo ve mai turah ka ngai a, thlalak a an nui hmel hmuh phei chuan thin a rim hlur thei mai. 

"Ka insu hmasa dawn nge Bawihtei kha ka lak chhawk dawn che? Ka inbual phawt zawk dawn mi?" ti a nu Hlimi ka zawh chuan, "A muttui laia kan inhlan chuan a harh ang a, a ţap leh reng mai dawn a sin. I tih tur chu ti thuai thuai la i zawh vek hnuah i la dawn nia. Ţhutpui lah hi a duh bau lo lehnghal a, mutthilh a hreh si, ngaihsak loh a hre bawk si, kan han in awi tak tak hi chu lu a hai vek thei ţhin. Hetiang em em a naute khirh khan pawh hi ka hre ngai lo" a ti bawrh bawrh a, min hauh leh hmain inchungah ka chho a, ka inbual rualin Bawihtei thawmhnaw thar pawh ka su a, rawng sen no awm ve ngai lohna pindanah rawng sen no a tam tawh khawp mai. 

Ka pasal lo haw chu ka be ţha peih lo a, hmalamah Bawihtei ka pua a, zai ngaihthlak pui pahin ka awi a, kan bulah a lokal ve a, Bawihtei a rawn chhaih te pawh chuan ka hmu lo der tlat a, midang an awm ve avangin ka hau lo mai mai zawk a, ni lo se chu ka chhuahchhal tawh ngei ngei ang. 

"Hei eitur ka lo hawn che" a thil khai lai lek kan zauh paha a tih chuan, "Nangmahin va ei rawh. E...i puar tawh tak ang, i puar ung ang ka ring. I ei tui dawn bawk si, kg engemaw zatin i rih belh hial ang chu" ka lo ti a, a bangbo khawp mai. 

"Eng nge awmzia?" ka awmdan hrethiam lo deuh a a tih chuan, "Chhunah thil i ei tui em a, inbuk pawh i ngam tawh lo ang ka ti a nih chu" ka ti a, a meng tal tap a, ka thinrim ringawt chu a ngaihna hre lo viau mah se kan bulah a ding ve ta reng a, min tih lawm nan nursery rhymes chu a lo zawm ve zeuh zeuh a, a mak ti hmel erawh a bo hleithei lo thung. 

"Awii...nu enteh U Chhandami status hi, a number hi ka la nei ve reng a, min ngei lai phei chuan ka huat deuh tur a lo hmang ţhin" Faith-in a ti lang lang a, a ţha khawp alawm, Mapuia min fawp lui pawh khati khawp khan an thin a rim a, an fapa, an unaupa hi han chilh ve tak tak teh se. 

"Delete rawh ka tihna a rei tawh kha" tih pahin nu Hlimi chuan Faith-i phone chu a bih ve a, "In va ho tak, in naupangchhia hlawm si, mi status mai maiah buai mah ta che u. An duh duh an hmang ve bawk ang chu, an phone a nia, an thu thu alawm" Hope-in a tih laiin nu Hlimi chuan, "Nicholas" a lo ti ve thung a, vin vak lo mah se a aw chhuak chu a nelawm loh ve thlawt a ni. 

"Bawihtei pian hlimah thu ţha ka hrilh che a, zawm ngei i tum thu sawiin i intiam zut zut a ni lawm ni? Mipa tam zawk hian hmeichhia hi kut in thlak ngai miah lo, a mawi pawh a mawi lo a, mahse kut thawh lo pawhin in ti na thei lo. Hetiang hi ching tawh lo teh u. Nupui in neih tawh chuan in nupuite chauh hmangaih ngam rawh u, a pa daih zawk. Hmeichhe dang tam tak kar a in nupui te chauh in hmangaih hian mipa diktak in ni tihna a ni zawk" a ti khar khar a, ka pasal chu a hawihai lehpek khawp mai. Chhandami status kha a hmu lo tihna a ni phawt ang a, status hi a en vak ngai lo va, amah tih chhan zawnga status ka neih ve pawhin ka hrilh phawt loh chuan en nachang a hre ngai chuang lo. 

"Kan sawi zawh vek tawh kha, tun a tak a thar thawh leh a ţul lo" a ti bul hmuk a, nu Hlimi chuan Faith-i phone a chhuh sak a, ka pasal hmaah chuan a lek vah a, "Sim hmak ang che" a ti a, phone chu pe letin keimah min rawn en a, "Sap ho zai ai chuan ngurthangvela zai tir rawh, a nih loh pawn zaipawl ngaithla rawh u, Bawihtei khan a ngaithla duh ber" a tih chuan ka awih lo lutuk chu ka lo nui a, "A awihawm loh e" ka ti kher bawk nen, a run khawp mai. 

"Nitin kan in awm a, a duhzawng leh duh loh zawng chu keiman ka hre ber. Hna vanga chhuak reng lo hian awmpui nileng ţhin la chu i fanu duhzawng i hre ve ngei ngei ang. Keipawh hna te chu ka hmu ve reng a, i pa'n a phal loh vangin ka thawk lo mai alawm" a ti leh tawh a, ka pasalin min lo en rual chuan ka hawi sawn a, ka lawm loh zia hre ve reng reng rawh se. A ngaihsam lutuk hi ka ngaihtheih lohna a rei tawh. 

Inthlak tura a a chho pawh ka zui duh lo a, a tihsual a hre miau a, nidang angin min phut lui tlat ngam lo. Anthony-a lo haw lah chu a mit a duk chur a, a chhan kan zawh chuan, "Ka ţhianpa'n min hai a" a ti ringawt a, nu Hlimin, "A hnek hual emaw a ti palh che em ni? I upat tawh nen, kuttum lek chi ho chu ţhianah siam tawh suh ka tih che kha. I pa ţhianpa fanu chu i hmu ta lo em ni?" ring leng lawng hian a lo ti a, "Ka hmu hman lo, ka la hmu ang" a ti sup a, Anthony hi belhchian chuan a khawngaihthlak lutuk tlat, a chanchin ka hre vek tawh a, sawi chhawng lo ila a ţha zawk ang. 

"Aw hmu rawh aw..i mit kha dam fel se hmu ngei ngei tawh ang che" nu ber chuan a ti dam thlap a, phir te hian engmah an hre ve lo a, inpawh ve viau e ti lo chuan Anthony pawh a inthup ve nasa a, inah tak hi chuan a ţhian hmeichhia te bawk an lokal ngai meuh lo. An khawngaih ve dawn a, an hre lo pawh hi a ţha zawk. 

Bawihtei ka mut fel tir hnuah ka zung leh zuai a, ka let leh chu mu lawk lovin khumah tho ka ţhu leh rih a, ka fanu muhil bam mai samah chuan ka chul a, a biang a puar ve reuh bawk nen, a landan chu a lawmawmin a muhil chung pawh hian min ti hlim em em tho a, ka en ning thei lo a ni ber. 

"I melh puak pawp ange aw" ka pasalin a lo tih chuan ka hmui ka ti pawrh a, ka mu nghal daih a, Bawihtei lam hawi zawngin ka saisir zui hmak bawk. 

"I thinrim elo?" a ti a, ka dara a rawn khawih rual chuan a kut chu ka vai thla a, "Min khawih lo teh ka chau" ka ti hmak a, ka darah bawk vuanin min kawih her a tum a, a ngai ang chiahin a kut chu ka lo nawr thla leh a, thawk a la ri hawk a, engmah sawi tawh lovin ka bulah a lo mu a, min kuah nghal mai ka hlau chuan, "Min kuah suh" ka lo ti lawk sa a, "Ka kuah thei lo che, zangthalin ka mu, i duh leh min lo en la" a ti kher a, hei hi a nia a awm duh ţhin dan chu, ka thinrim hian a thinrim ve duh ngai miah lo a, thinrim ve ve a inhauh chang chu nei ve ţhin bawk mah ila a tam lo khawp mai. 

"I mak ve e ka ti" ka ti sap a, Bawihtei chu ka kuah chak a, ka ban hi rit a ti lutuk ang tih ka hlau bawk si, a samah ka chul ta ringawt a. 

"Min hmu turin a lokal a, ka hmaah a ţhu reng a, min be bawk a, ka hmu lo der thei ngang lo a ni. Ka mak ve e ka in ti" nuihza aw zeta a tih chuan, "Ka hne che..ka ngei bawk che a, sawi sawi pawn awmzia awm lo. Ka mitmei veng zo lo khawpa i hmangaih a nih te chuan ka nute bulah khan min awm tir reng la, Chhandami hi hruai lut mai ta che" ka tih rual chuan ka puan sin lai a pawt hlim a, Bawihtei a muttui tho ti ni awm hrim hian na zetin a mutna lamah min pawt her lawp a, "In awmdan ka duh loh lai ka sawi chuan fiamthuah i la ziah alawm tiraw? Tunah pawh fiamthuah ngai leh la, i fiamthu thawh ka lo ngaithla ang" ka tih te chuan ka biangah dawmin ngunthluk deuhin min lo en a, duh tawk mai lovin, "Ka hne a ni tawp mai. Ka chau vek tawh" ka ti leh a, na zetin thawk a la a, ka tihpalh tih bak ka dawng leh lo ang.

"Ka sawi ang kha a ni mai" tih pahin puan min sin tir a, Bawihtei a va melh zawk hnuah a awm si chetin min kuah bet a, thik viau mah ila ka ţap lo a, ngawirengin a lungphu chu ka ngaithla a, ka pasal mak tih khawpin ka ţah belh lo a, ţap belh deuh hi ka ngaithei lo ţhin. Movie ka en ve fo a, changtunu a ţahbelh viau chuan ka en peih ngai lo. Keipawh ka hringnun bikah hian changtunu ka ni a, mite nin khawpa ho te te a ţah nghal zel ka tum lo bur. Ka ţah a chhuah loh chu thuhran, ka zak tlat. 

"Chhandami a lokal a, thil kan ei dun lawk dawn te pawh ti ve mai la, min ngaihpawimawh chuan i ţhiante pawhin min ngaipawimawh ve mai dawn a, Chhandami ngat phei chu a dan a dang a, fel deuh angah ka lo ngai ţhin a, a mamawh lutuk na che hian a ti buai zo vek aniang" ka ti a, "A ni maithei, a baihvai ve a, ka la hmangaih emaw i tia, i hlauthawng mai mai a nih kha" a tih chuan, "Hlauthawng lo ila chu nangmah hian hrehawm i ti zawk ang. Hmeichhia in kan mipa duh deuh ţhin kan ngaihven peih tawh lo a nih chuan a tawp chiang hle tihna a ni mai. Rilru a let hlawk ţhin a, hmeichhe awm nem tih vanga zuam ngawt chi kan ni lo. Chhandami pawh a baihvai a ka hre tho a, in chanchin pawh min hrilh vek a, ka khawngaih bawk. A sualna sawi tur ka hre lo nain tunhma ang khan ka ngaina thei tawh lo. A pasal hlui a neih leh hnu hian a danglam vek a, inven nan hman a Chhandami kha a phum bo hmak ni berin ka hria. Chuvang tak chuan ka hlauthawng a, i rilru leh nangmah thlengin i let leh ang tih te" ka ti duah a, ka hawi chhuah rual chuan ka hmuiah a lo fawp a, ka chhang let lo thung. 

"Chhungkua ka din tawh hi, ka kalsan lo ang che u. Chhandami bula ka awm pawhin rilru ah chuan in nufa chiah in awm tho a, nilenga ka ngaihtuahna leh rilru zawng zawng luah tu chu nang leh Bawihtei hi in ni mai" zawi te tak tak a phun sup sup pahin ka hmai zar tu ka sam chu ka bengah a zep a, "Nang hi chu tu hmeichhia mahin an lan thei tawh lo ang che. Ka Cleopâtei i ni miau a" a tih leh chuan ka nui hak a, ka tum leh vat thung. 

"Ka thikthu hi a chhe em em hran lo a, mahse i hmeichhe hmangaih ţhin hian a la hmangaih reng che a, nupui ka nihna angin in pahnih chauh a in awm dun hi hmuh nuam ka ti lo. Thikthu nei miah lo ila chu nang pawh hian nuam i ti bik lo bawk ang a" ka ti a, "A thleng nawn tawh lo ang. Keimah vangin hlauthawng deuhin i lo awm rek rek a, tihpalh aw" a ti a, min thlem thiam bawk a, ka hau hlak hlak reng nain ka thin a rim reng thei bik lo a, mut chhuah lamah phei chuan min fawhna pawh ka chhan let veleh tâk kha. 

Buai hian hun a lo kal chak bik aniang. Nitin kan nupa in hnathawkin kan chhuak a, ka pasal a nileng ziah a, kei chawhma leh chawhnu a inthlakin ka duty zak zak a, hna kal tura ka chhuah dawn apiangin chhungkaw nu ber lah hian bang turin min lo ti ve ziah a, ka chhang let ngai tawh lova, hna chungchangah kher kher chuan a thusawi ka zawm ngai lo bawk. 

Bawihtei lah chu la vak kual zung zung thei lo mah se a thawmhnaw kan thlak ngun a, ka hna bang hi insuk turin min hmuak a, ka insu hnawk zel a, Bawihtei erawh nu Hlimi char charin a bual thung a, keichu 'nau khawih i zei lo emai' min ti a, a tunu a ni bawk a, a dimdawiin a duat khawp mai. 

"Kan indan hun chu in khua a har awm. Bawihtei kan hruai ang a, naute dang kan nei leh a nih pawhin kan bulah tho an awm a ngai ang a" fiamthu a ka tih chang te hian pa Chhawna ai chuan nu Hlimi hian min lo hnial kalh nasa zawk ţhin a, mut lai a nih tawp loh chuan nilengin Bawihtei hi a kuah chawt a, "In dang mah ula Bawihtei hi chu in hruai thei lo ang" a ti ţhin a, pasalte lak aţanga hmangaihna dawng ngai lo a ni bawk a, ka fanu hian a khawharna tam tak chu a lak kiansak a, ka rin phak bakin ka fanu hi a hmangaih a ni. 

Ka nute lahin an hmu chak a, lokal reng chu mawi lo an ti ve tho bawk si, min rawn video call leh ringawt zel a, in ah ka awm reng bik si lo, nu Hlimi leh ka nute, ka nu pahnihte pawh ti ila a dik tho ang, video call hmangin an inbiak tam phah khawp mai. An inrel tawn tawh ngai lova, Bawihtei chanchin bak sawi tur an hre mang tawh lo. Inchhung boruak uap churh ţhin kha a zangkhai vâwk tawh a, Bawihtei nui hmel ringawt pawh hian kan vaiin min ti hlim ţhin a ni ber tawh. 

"An hmu khat emai, a ni em em tawh lo, an khawngaihthlak" a tih tlat avangin nu Hlimi phalna thlapin kan in lamah kan leng phei a, Bawihtei lah a chhawnchhaih ve theih tawh bawk si, Liantei leh Zikpuii ten an ţhut chilh chawt a, ka nu'n pawm a chuh reng bawk a, ka pa'n a pawm ve chuan mak tak maiin ka hnuk a ulh tlat a, a tunu chu a en vang vang a, a lawm thiam vak lo chuan a lu leh kut tereuhte ah te chuan a fawp leh ringawt ţhin a, ka ţahbelh loh tehreng nen ka pa'n lungawi tih hriat zet a ka fanu a en vang vang ka hmuh chuan mittui a hnâm nghal mai. A fa ka ni ve lo chung pawh a hmangaih taka min enkawl seilian tu chuan ka fanu pawh hi a hmangaih khawp ang. 

Ka awmdan chu hrethiamin ka pasal chuan min kuah a, Bawihtei chiah an ngaihven avangin ka chhungte chuan min rawn en ve tawh lo. 

"I pa hi lawmthu hrilh nawn leh ka duh" ka pasalin zawi sup a a tih chuan, "Eng thilah nge?" ka lo ti thuai a, ka thutak ve tehreng nen, "Ka nupui i nih vang hian" a lo ti a, ka lo nui sang a, thiam lo chung chunga min tih hlim a tum ve ţhin te hi a lawmawm hrim hrim. Pa Chhawna leh ka pa te hi ka haw hlur zel a, tunah chuan parţhi awrh tir mai ka duh tawh. 

(NAKTUK ZANAH A TAWP ANG)

CONT....