HIS LAST LOVE-LAST

HIS LAST LOVE-LAST CHAPTER

"Dim ve deuh teh u, in lo pawm khaw lo ang e" ka pasalin a tih chuan an melh rum hlawm khawp mai. Ka chhungte lahin pawm an la inchuh laih laih reng a, an hmu ve ţhin tho nain vawikhat an hmuhna ni awm hrim hian an lo cheibawl ţhin.

"Nicholas hi i over tlat..mi pawn fa an nei, a pawm sak tu te an vil chawt ngai lo. Fa in nei ve dek dek a, naute ai pawn min vil nasa zawk a, kan ti na dawn pawh ni hlei lo, nangmah ang chiah khan a nat kan hlau ve tho aw" Zikpuiin a lo ti fiamthu a, "Nang phei chuan i pawm hmain kut sil hmasa zel ang che" ka pasal bawk chuan a lo ti leh a, an inhnialna karah chuan ka lo nui ve hak hak a, kan kawppuite hi tihluihna hmangin thlak danglam kan tum tur a ni lo, min hmangaih tak tak chuan kan tih leh sawi ngai lovin anmahni thuin an inthlak danglam ve mai an lo ti ţhin a, ka pawm khawp mai. Nicholas hi kan inneih hlim leh kan inneih hma zawng zawnga a zia chu sawi ngai lovin tupawn an hria a, ka ţhiannu Ngheti pawhin biak ringawt pawh a hlau hial ţhin a nih kha, tunah chuan a danglam tawh a, ka sawi ngai lovin a inthlak danglam tial tial a, hmeichhe ngaihsak a duat vel thiam miah lo khan a thiam dan danin min duat ve a, a ţawng duah ngai lo a, mahse tunah chuan a ţawng duh ve viau tawh, inhnial phei chu kei aiin a thiam tawh zawk. Heng a inthlak danglamna te, a tih ngai hauh loh tih a chin tak chhan te hi min hmangaih vang ka ti lo thei lo. Mal bikah a in ngai a, a khua a har a, Chhandami lahin kawppui a nei tawh bawk nen, a inhnem na leh a khawhar hnem tu awm chhun ka ni a, hei vang hian reilote ka awm loh pawhin min lo ngai hman viau zel. 

"Ka fanu hi chu hundred percent-i a ni ringawt. Sawiselna lai tur a awm lo, a ţah belh tih lohah chuan" tih pahin Bawihtei hnute hne lai chu a biangah a rawn piai zeuh a, "A ţah belh chuan hundred percent-i a ni thei nang" ti a ka unauten an lo fiam chuan, "A ţah chuan a la thaw ve tihna a ni mai. Kha chu kan chhiar tel lo ang" a ti a, Zikpuii te lah chuan an kap deuh sek a, a nui ve suk suk reng a, an in ngamtlak ve tawh khawp mai. 

"Nuam i ti deuh tawh em?" ka pa chu nui sanga en in ka bu nghat a, pindan a a lut ka zui lut ve a, vui leh vak turah min lo ngai a nih ka ring.

"A ţhat chu...a hrehawm reng lo ang ka tih kha. Inhre ngai hlei lo chhungkua in ni thut a, awmdan tur in hre lawk lo a, i nute awmdan te, i chunga an thil tih te kha chu ngaidam la theihnghilh tum rawh, chhungkaw nih in zir naah ngai la, a eng zawngin ngaihtuah tlat la" a ti a. 

"Ka ngaidam thei mai ang, an thil tih zawng zawng kha ka la ngaidam vek thei chiah lo nain ka la thei ve mai ang. Mahse, ka theihnghilh thei kher lo. Theihnghilh theih chi pawh a ni lo hrim hrim a" ka tih chuan a nuih a lo za khawp mai. 

"Ngaihdamna hi a hlu a, mi fel famkim kan nih bik loh chuan midang thil tih sual hi kan ngaihdam theih lohna chhan tur ka hre lo" a tih chuan, "Bawihtei i pawm ka hmuh khan ka naupanlai ka hrechhuak zawk a" ka ti ta daih a.

"Bawihtei ang rual i nih lai i hre pha em ni?" tiin min lo zawt fiam a, "Ni lo e...ka hrechhuak ve mai mai" ka tih chuan, "Ka pawm ziah che alawm. Zikpuii leh Liantei ka en ang chiahin ka en che a, engmah danglam a awm lo. Ka fanu i ni a, i ni reng dawn bawk a, in ngai mi hrang lo la, i pa tak tak emaw min tih lai ang khan awm reng rawh" a ti a, ka hmaa ka pa ţhu chu ka en reng a, min enkawl danah a fir viau nain ka chhel phah a, hna ka neih ve ngei theih nan lehkha min zirtir a, a tih theih ang apiang chu a ti vek a, vui nasa viau ţhin mah ila vui thei ka nih loh zia ka inhre tawh a, ka pa a ni hi ka inchhuang a, ka lawm takzet tawh zawk a ni. 

"In dan lam te in ngaihtuah leh tawh em?" ti a min lo zawh leh chuan lu ka thing a, "Hrawn hrehawm khawpa an sual leh te a nih loh chuan indan kher ţul ka ti rih lo. Lo indang ta ila Bawihtei hi Liantei bula ka rawn dah vang vang a nih loh chuan awmpui lak a ngai ang a, awmpui te kut a naupang han dah ngawt chu ka ngam chiah lo a, ti hian ka awm loh lai pawn ka nu'n a lo awm thei a, a duat a, a atchilh a ni ber zawk a, a hahdamthlak phian a, Nico-a bulah pawh ka la sawi leh lo, ka pa lahin a phal lo bur mai bawk si a, tunah pawh an khua a lo har leh tawh ngawt ang. A mutthilh chhung lek pawh rei an ti ţhin a, kan haw ang a, saw lamah an lo inchuh ve luai luai mai ang" ka ti a, chhel min tih zia te, ka puitlin sawt zia te min hrilh luam a, pa te hi chu nu te aiin kan lo kawm tam lo zawk nge nge a, ka pasal neih hnuah hetiang hian kan ti ti dun ta fo a, tunhma in kan ti ngai lo. 

Kan haw dawnah pawh ka nu'n Bawihtei a pawm chhuak a, Liantei leh Zikpuii ten an lawm pah reng bawk a, ka pa pawh a lo chhuak ve nain a inthunun thei phian a, ka pasal nen an inbe daih a, ka fanu chu pawm a chuh ve ţung lem lo. 

"A riah theih ka ring tlat, Saii, riah tir mai rawh u. Zanlaia a ţah leh kan awi tlaivar ţhak ang a, zan khat lek chu phal ve mai la" Zikpuiin a ti nang nang a, "I ti ang lo e a, a nu tello a riak chhuak rual a la nih loh hi, hnute a la hne alawm" ti a Liantein a lo kam khat te chuan, "A buaithlak, inţhenawm ila chu nileng zankhuain ka awm thei tur a nia" a la ti hram a, a chang leh, "I inla fa nei bik emai" min ti a, "Pasal nei ve rawh" kan tih lahin, "Lehkhabu ka chhiar nasa a, ka duh zawng ka la hmu lo. Ka lehkhabu chhiar a mi te hi ka la hlimpui rih" a ti tlat tho bawk si, thingtlang ve deuhah awm phei se chu nula senior an ti sup sup tawh ang. Thingtlang ka sawichhiatna lam ni lovin hmanah ka pu te khuaah kan zin a, khaw lian lo tak a ni. An khua a mi te khan nupui/pasal an nei hma angreng a, ka pute ţhenawm nula, la upa vak lo pawh khan nula senior ka ni tawh a ti deuh reng a, chuvanga sawichhuak chu ka ni pakhat. 

Motor a kan luh hnu thleng pawhin Bawihtei chu an la chhaih a, ani lah a mut a chhuak tawh si, ka awm zawna ka pawm rualin hnute a zawng a, muhil hman mang lovin an siam a, a chau ve khawp ang. 

"Lo leng zeuh zeuh rawh u, in chhungte bulah ţha deuhin sawi ula, chaw lo ei ţhin rawh u. Bawihtei a awm loh chuan kan khua a har der tawh a nia" an ti vel a, "Hetiang naute hmelţha te chu a thlawn a pawm reng kan phal bik hleinem. Kan intun nunna tur in phal ang tawk min pe ve ţhin ang chu, diaper man tur te, a thlawn a naute cial pawm reng tum te chu in ti ang lo emai" ti a ka pasal a lo uan ve chuan an ner nang nang hlawm a, steering vuan ran tawh chung hian ka ţhutna lama ding ka chhungte chu nuihza hmel pu tak chung hian a rawn en ve a, "In chawhmeh a zir te pawh a ni bawk ang a" a ti leh zauh a, "Tui tawk tawk hlir kan lo hlui ang che, pa berin fate hmanga pawisa siam i tum a ni maw? I ti ang lo hle mai, i diaper lei lah hman lohin a awm tawp a nih hmel a" tiin an lo fiam let a, khami ni kha keipawn ka hrechhuak a, Bawihtei diaper lei tum khan puitling diaper a rawn lei ţeuh a, nu Hlimi lahin, "Thlasik atan dah ţha rawh, kan vaiin kan hreng ang a, zung tur a thawh sek a ngai lo a ni mai" a lo ti ve ngei a, ka chhungte ka hrilh ve a, an sawi chhuak fo mai. Tunah pawh ka chhungte nen chuan kan inmelh ralh a, kan nui zui dar dar a, pa nih a zir mek a, a chesual fo mai. 

"Thlasikah kan chhungin kan hmang ang, kan rawn pe ve dawn cheu nia" a ti a, min chelh rei a, motor chhungah awm reng mah ila kal an phal lawk chuang lo. Rei mawi tawk kan din hnuah ka pa'n, "Kal tir tawh rawh u, an tlai lutuk ang. Hla deuh a awm tur pawh an nih loh kha" a lo ti a, min kal tir ve hram a, Bawihtei chu kuahin ka thaw hak a, ka pasal chuan min en rang lehpek khawp mai.

"Eng nge a?" a ti thum dût a, kei lahin, "Engmaw?" ka lo ti let a, "I thaw vak a" a ti leh tawh. Ka thawk nasat deuh hian a ngaih a ţha lo ve ringawt zel. 

"Ka thaw ve bawk ang chu..ka la dam tihna a ni mai alawm" ka tih chuan, "I thawk dan kha rilru hahna nei ho thawk dan a nih kha. I pa nen khan rilru ti hah thei sawi in nei em ni?" a ti a, kawng en ngai bawk, kei min en duh bawk, a indaih lo a ni ber mai. 

"Chutiang kan sawi lo reng reng, ka duh duh dan style in ka thaw ve ang chu, i duh dan kher a min thawk tir tum lo la" ka tih leh chuan, "I ngai kawi a nih kha, ka ngaihsak vang zawk che alawm. Rilru hahna te i lo neih palh takin ka ti mai mai. Inţhen ang i tih loh leh kan indan hma chu ka nu te bulah ka awm dawn i ti leh ang a" a ti a, ding deuhin hmalam a en na a a nui tih ka hre tho, a hunlai a a mangan tehreng nen a thlamuan hnu hian min chhaih nan tak a hmang tawh a, vawikhat na reng reng chu ka la tih der khawp ang. 

"Ka thawk dan avang ringawtin i van sawi hnem hman em em..kawng sir kha melh pah rawh, momo te an lo zawrh leh chuan lei haw ang. Kan awm rei ropui si, kut ruak a haw ngawt ai chuan eitur tal lei sak teh ang" ka ti a, an lo ang leh nasa tawh viau maithei a, ka awm loh lai a nih chuan pawi ka ti hran lo, min ţawng khum vak ngam tawh lo nain ka awm loh lai chuan an la ang zeuh zeuh. 

Inchhung kan luh chuan beisei loh deuhin phir te chiah ka hmu a, "Bawihte" tih leh ka lama lo phei an rual a, "A mut a chhuak, muttir rawh u" ka pasalin a tih rualin an hnung an dawh a, "U Sai, kan lo puak chhawk ang che. Zanlaia a harh chuan i puak leh reng a ngai dawn a, men chhung na na na chu kan lo paw ve ang" an ti a, nau lawm ngang an ni bawk a, min awl hneh lutuk ringawt. Paw tu zawk nih inchuh a an inhnial bap bap hnuah Faith-in a pua a, "Khawnge ka nu te hi" ka tih chuan an pindan lam an kawk a, an nui tet tet bawk.

"A tlu sual em ni?" ka ti ta ringawt a, an nui bawk si a, serious tak a ni lo turah ka ngai. 

"Tengtere sahar a an pack ang chi hi i hria em?" Hope-in a tih chuan ka lo bu nghat a, ka pasal pawhin a lo ngaichang ve ran mai. 

"Khatiang kha vawiinah Faith-in a lo hawn a, kan chiah a, tui a ti lutuk a a tui kha a hawp ţeuh a, a kua a ţha lo" Hope bawk chuan ti lehin kan han nui leh rih ţhin a, "Kan thil hawn pawh a ei ve thei dawn lo a ni maw?" tih pahin kalkawng a kan thil lei ho chu ka pe a, 'thau ka hlau' an ti fo nain an ei zo leh vek tho ang. 

"Inchunga chhoh hma ka nu chu hmu ve lawk ila" ka pasalin a tih takah chuan nu Hlimi te pindan lamah kan inzui phei a, kawngkhar kan kik chuan pa Chhawnan min lo chhawn a, "Ka nu chu?" ka pasalin a tih rualin kawngkhar chu a hawng zau a, kan luh chuan khumah a lo mu bâm mai. 

"Ehe...ka nu, i dam lo em ni? Phir ten a ek a tang an ti che a, damdawiinah kan kal mai dawn mi? An lo kap e che ang a, i thawl hawk mai ang" khum mawng lama ţhut pahin Nicholas chu a nui ruh ruh a, "Ka ê thei leh lutuk a ka buai zawk a nih hi. Tengtere tui ka hawp nasa a, ka chau chhe lo chauh tawh" a ti chuai raih a, peih lo deuh a ţawng ţawk ţawk a ang ber. 

"Nutling puiin tlin tawk bak hawp tur a ni hleinem" pa Chhawnan a lo tih chuan, "Awii..i sawi ngai i sawi ngun tawh emai chhuak mai teh" a kut vai chung meuh hian a lo ti a, "I hawp zo zai kha a turu em alawm. Khati zat kha hawp ve ila chu kawţhalo in kan thi fel der tawh ang chu. Pathian zarah nang chu i taksa a chak ţha a, chuti chung pawh chuan i chau tho a nia. Eitur pek luih dawn che lahin ka ha a ţim i ti bawk si" pakhatin a lo ti leh a, nu Hlimi chu a awi dur dur reng mai. 

"Chaw nem deuhin ka va chhum anga i ei thei ang, ţhial vak ngai lo turin. Thil ei loh tawp chu a ţha lo, ors i in em?" ti a ka lo inrawlh ve chuan, "In lo..tuman ors an la sawi lo" a ti a, a nachang an lo hre leh pek lo a nih chu. 

"In vat a ngai a nih chu, a nih loh chuan dehydrate te a hlauhawm a, kan in zeuh zeuh ţhin vang hian lei sa ka dah nual alawm..ka va siam sak ang che" tih leh chhuah ka rual a, Bawihtei pawh an lo paw mu ve ngei tawh alawm. 

"U Sai, ka din hlek chuan a che nghal zel a, ka ţhutpuiin a harh nghal zel bawk si. Vei kual reng a ngai a, ka la ţhu lo reng reng, ka lu a hai ţan tawh" Faith-i chuan a lo ti a, fuihpawrh tu a neih loh chinah chuan Faith-i sual lutuk pawh a zia ve sawt khawp mai. 

"Ka lo la dawn mi?" ka tih lahin, "A ngai lo, ka'n paw rih ang" a ti tho bawk si, Hope pawhin, "Ka lo pua ang ka tihin a phal chuang lo, en liam mai mai rawh" a lo ti a, ors siam tur chuan choka ah ka lut ta daih a. 

"Ka pi chu eng nge a an?" Kungtein a lo tih chuan a awm dan ka hrilh a, hei pawh hi Rita-i leh Faith-i ten an fuih pawrh a min biak duh loh aţang kha chuan ka nel tak tak thei tawh lo a, amah zawk hian nuam a ti lo a, min be seuh seuh zel a, pawisa leh incheina lawm tih takah Faith-i phei chu fuih pawrh a nawm zia thlengin min hrilh a, ngaihdam min dil bawk. Faith-i hian kan buai tak tak hunlai kha a sawi chhuak ngai hauh lo a, ngaihdam min dil lo a, inthiam lo ang pawn a awm ngai chuang lo nain zawi zawiin min hnaih ve hret hret a, ka sual loh zia a hre ve tawh aniang zah lo deuhin min ţawng khum duh tawh lo a, ka pasal a hlauh tawh em vang a ni pakhat bawk ang. Hope thung chuan "Faith-i hian a ngaina ve tial tial che a, fa in nei tawh bawk si a, mo atan an pawm ve tawh che aniang a inthiam loh thu a sawi ţhin a, biak hmasak che pawh a ngam vak tawh lo, a inthlahrung ve deuh a" tiin min hrilh fo a, fa chu nei lo ila an la ngai reng dawn tihna a nih hmel. 

Ors nen a pindan a ka luh leh chuan nu Hlimi a lo awm tawh lo a, a awmna tur awm ang hre tho mah ila, "Khaw nge?" tih pahin ka hawi kual a, "Bathroom ah...a tlan zankhua mai ang tih te pawh a hlauhawm. A damdawi ei khan awmzia a nei vak lo a nih hmel" pa Chhawnan a lo ti a, kawţha lo khawp khawp a tengtere tui han hawp mai chu a ti ang lo ve deuh bawk a ni. 

A lo chhuah chuan, "Hei siam sa ka hung ţeuh a, in zo vek rawh aw. I in tam chuan i chau lutuk lo ang" ka ti a, ka pasalin, "Inchungah chho ang" a lo tih ve sek avangin kan inzui chhuak leh ta nge nge a. 

"Bawihtei hi chu mut dawnah ka rawn dah ang" Faith-in a lo tih chuan ka remti ve mai a, rin aiin nau khawih an zei a, ni lo se chu an kutah ka dah ngam bik lo ang. 

"Bawihtei pian hnua an danglam thut hi dawn sawn dan ka thiam lo lek lek zel. A chang leh keimah hian ka lo zir bik lo aniang a tih chang ka nei a, a nel leh ngainat theih turin ka awm lo aniang tih thlengin ka ngaihtuah a, chhungkaw inpawh tlang tak nih chu ka duh a, mahse englai pawh a min kher reng ţhin ten pangngai deuh a min be ve hi awmdan ka thiam lo, ka dik lo aniang" pindana luh pahin ka ti bawrh bawrh a, min kuai her a, ka dar tawn tawnah dawmin min en ran a, min en tlang vek a tum emaw tih mai tur a ni. 

"Nangmah in dem lo la, inthiam lo duh reng reng suh. Engkim hmu vek lo mah ila ka hrethiam pha tho a, i cho chhuah a nih loh zia te, i rilru chhiat loh zia thlengin ka hria. Ka chhungte an ni a, chuti chung chuan i dikna hriain i thlavang ka hauh tho. I dik loh naah chuan nangpawh ka hau tho che. I tih dik loh miau chuan i thlavang hauh reng a ţul bik lo a, ka hau che a, i dik naah chuan i hriat ve kher loh lai pawhin i thlavang ka hauh char char thung a, Bawihtei vanga danglam an nih rualin an ngainat ve tawh vang che a ni tel bawk ang. Mahni indem vak kha ching tawh suh" a ti deuh duah a, a awki chu a dam thlap a, ngaihthlak a nuamin min hnem bik riau niin ka hre ţhin. 

"Nangmah vang alawm" ka tih chuan mak a ti deuh niin ka hria. Ka thaw hak a, a hrethiam lo thei si.

"Nang hian zir viau lo la chu kan awm khawm tawh kher nang. Ka sawi thiam dan ber chuan a laiah i ding tlat a, thil bukna ang chiah i nih hi. Dik deuhin min buk kual a, duhsak bik pawh i nei lo. Min ţan hlur reng la, ka thu thuin awm la chu tunah pawh kan la inmil lo ang a, boruak a chhe viau tawh maithei. Chutiang bawkin i chhungte hi ţan zawk tlat reng la chu ka thin a rim ang a, fair lo ka ti ang a, tun ang hian ka pawh thei lo maithei che a ni" ka ti a, dingdihlip chung meuh chuan a nghawngah ka kuah a, ka uai a ni mah zawk ang. 

"Hmeichhe dang vangin i thinrim bur bur zel tho kha" tiin min lo fiam a, ka thutak ve tehreng nen a ti ho zo leh vek tawh. 

"Ka thin a rim a, ka rin loh phah chuang hleinem che. I insawifiah chuan ka dam leh nghal zel a, ka rin lutuk vang che a ni ber. Ring miah lo che chu ni ila ka rai lai, kan buai vak lai khan nau ka ti tla daih duh ang chu" ka tih chuan mit ti zim deuh sun hian min lo en a, a ngaihdan a ni chiah lo a nih hmel. 

"Doctor tam tak hian an remti vak tawh lo" ti a min hnial kalh a tum chuan ka lo pawt chat a, sawi pawh a sawi zawh hmain, "Nau ti tla turin doctor ka mamawh ve kher hleinem. Mamawh pawh ni ila min pui thei tur hmelhriat ka nei nual alawm. Ka sawi awmzia zawk chu, ka rin vang chauh chein boruak a chhiat ber lai pawh khan ka tuar ve hram hram ka tihna a nih chu mawla" ka ti a, a nui chhuak ta hawk a, kan inhrilh kaw ve hram a nih hmel. 

"Min ring leh lutuk hi lawmthu hrilh hluai mai che ka duh" ka bianga piai zauh paha a tih chuan, "Tenawm emai" ka lo ti hlak a, tun hnuah ngat phei chuan a nunhluiin min ti buai pha tawh lo. Hmeichhe dang an lo tel ve ţhin a nih pawhin nunhlui a nia ka ti thei tawh a, vawiin leh hun lo la awm zel tur hi a pawimawh ber. 

Faith-in Bawihtei a lo dah chuan ka mut pui nghal a, a harh leh a, diaper te kan thlak a, ka awih leh te te hnua mu chunga hnute ka pek chuan a muhil veleh mai a, ka kuah a, a kut leh ke te hi ka khawih reng zel a, fate hi an ngo emaw an hang emaw, an hmelchhia emaw an hmelţha emaw pawh ni se nu te mitah chuan an ţha ber vek a, piangsual leh rilru lam fel lo pawh nise nute hian an hmangaih loh phah chuang lo. Nu te mita mawi leh ţha ber chu fate an ni a, mi fa te sawichhiat vak mai te hi chin loh a ţha. Midang kan nuihzat hian mahni chungah a let ve thei tih te hria ila, hmeichhia kan tih zawng pawh nise han fak hram ila, mi pawi kan sawi lo a ni mai. Nu hmangaihna hi sawifiah thiam phak bakin a nasa a, chu chu fa ka neih hnu hian ka hrethiam ve chauh a ni. 

Ka pasal in min rawn kuah chuan, "A vawt" tih hlak pahin a banah ka lo beng a, "Patling mu in nupuite han kuah loh tawp chu a nihin a ni lo reng reng" a ti a, Bawihtei lam hawia ka saisir chu hnunglam aţangin min rawn kuah leh a, a taksa ka sik rual chuan ka nui hak a, "Muhil nghal ang che" ti mah ila ka beng hmawr a rawn pet zauh a, min kuai herin ka hmuiah a fawp leh a, silai a puak ţhuai ţhuai mai. 

Zinga ka harh rualin Bawihtei mutna lam ka dap nghal a, a lo ruak huai mai. Ka meng kawk a, zanah kawngkhar kan kalh thlap bawk si, ka pasal mutna lam ka dap a, ani chu a awm. Ka ţhu chhuak a, ka mangang lutuk chuan, "Tho teh Bawihtei a awm lo" ka ti a, sawi ka tum takin a inperh tho zawt ka ti mai, ka phu nasa lutuk chu ka ţe chhuak teuh lutuk ringawt. 

"Khawiah nge?" phak zet a tih pahin a kal kual a, chhuk ve ka tum chuan chhuata ka fanu mu chu ka hmu a, khum aţangin a tla a nih ka ring nghal mai. Amah hian a tal na ve reuh tawh lutuk a, a let thla daih a ni maithei. Ka mutthilh hnuah ka nek tla a ni maithei bawk. Mahse, vawikhatmah khum aţangin a la tla ngai lo, carpet dup kan phah hlauh a, chumi chungah chuan a lo mu reng a, a ţap miah lo te chu a mak zawk. Khawngaih viau mah ila thawk huai na tham a ni ve hrim hrim. 

"Engtin nge i tlak theih le? Engmah i sawi thei bawk si lo" ka ti hap a, pawm reng chungin a taksa chu ka chul kual a, na a nei mawlh ka hlau a ni ber. 

"A mutna lamah hian tlak dal siam a ngai a nih hi. Vawiinah Khuma ko ila rawn siam teh se. Leitur a awm em? A awm chuan lei pawh a pawi lo" ka pasal lah chuan a lo ti ve sek a, "Ka hre bik nang...zan ka mu ţha ngai lo a, ka mut vein ka mu nghet tih i hre reng a, khum aţanga fate tla chu ka hriat loh pawn hriat tur che alawm" ka ti a, Bawihtei chu ka en leh ţhin, hnute hnek pahin min en ve kiau a, a khawngaihthlak zawk. A tlai tawh em em mai lehnghal a, parda kan zar phui vek chuan a thim khup a, thawh kan hai ngei ngei zel. 

"A bula mu zawk pawn i hriat loh chuan hriat ngaihna a awm hleinem" a lo tih chuan, "Tuk danga ka kaihthawh che hian ka sawi vak vak che pawn i harh thei ngai lo a, i ban ka paih sawn lawp pawn tui deuhin i mu tho zel sia, tukinah lem khawih pawh ka khawih hma chein i inperh tho nghal a, tuk danga kaihthawh che ka tum hian hrereng chungin i muhil der mai mai ţhin a ni maw?" tiin ka chhuahchhal a, a nui tawi tak mai. 

"Harh hma chang leh harh theih miah loh chang ka nei, ka pianpui a nia, nupuite ber chuan min hrethiam ang chu tiraw?" a ti daih a, min nuih tlawn pah kher bawk. 

"Ka tho peih rih lo tih ve mai awm che, i muhil der kher a, i mu nghet ve hrim hrim emaw ka ti char char alawm" ka la ti nang nang a, "Muhil der chung pawn ka hmangaih tho che...mahse fimkhur tawh la, i fanu kha i nek tla khaw lo ange" fiamthu ti tak deuh hian a ti a, "A mak tak tak a ni, a tla ngai der si lo a, fimkhur a ngai tawh a nih hi" ka lo ti ve a, fa pakhat kan nei a, kan buai em em reng ringawt mai a ni. 

Ni a kal duak duak a, thla lah chu a ral pur pur emaw tih mai tur a ni, kum khat hial a vei hmu phei chuan Bawihtei pawh a changkang ve tawh a, a hmel a ţhain lawm pawh a hlawh ve viau mai. Nu leh pa te nge nge chu min ngai a, keini tih lohah chuan Nu Hlimi hi a ngai bawk a, ka nu ai pawn a ngai daih zawk. Naupang hi an fing ve khawp mai, duat rawn tih a inhria a, a pangchangin ka nin deuh changa ka vin ve hlek te hian min lo khap vat a, an atchilh a ni ber. 

Inchhung khur boruak pawh a nuam tawhin buaina kan nei khat tawh a, Anthony chu pa Chhawna duh ang ngeiin phaiah a awm leh tawh a, pindanah tawm chawt zel mah se a awm loh chu a hriat ve lutuk tlat. Faith-i hian min la pawh thei tak tak lo a, a thil tih sual te, ka chunga a awmdan te kha amah zawk hian a la hrereng niin a lang. Hope-in min ngam bawrh bawrh tehreng nen Faith nen chuan mikhual, in hmelhriat ve si a in nel vak chuang lo kan ang ber. 

Ka chhungten min awl hneh viau nain chaw pek hi chu ka kuta dah chang an ngah a, Bawihtei chu chaw pek a harsa a, an peih vak ngai lo. Tunah pawh stroller ah ka ţhut tir a, a ei duh leh chuang miah lo a, thawm hlekah a hawi sawn a, hahthlak tak a ni. 

"A ei duh nange?" hnunglam aţanga ka dar a rawn dawm paha ka pasalin a tih chuan, "Duh lo chu a nih hi. A hawk dak leh lutuk a, thawm awm hlekah a hawisawn zel" ka lo ti hlak hlak a, a veh a veh a ţul chang te a awm ţhin, kan buaithlak sawt khawp mai. 

"Ka lo chhaih ang" a ti a, a kalsawn leh daih ang lawi a, Bawihtei chaw ei tir tuma ka buai lai chuan ka hnung lam aţang bawk hian "Bawihte" a rawn ti a, kan piah lawk a tv en a ţhu Hope chu a khek nghal tuarh mai. 

Thil ţha lo a thleng leh pek emaw tiin ka hawi let a, ka pasal ka hmu chiah chu ka awih lo zawk, ka mitmu hi pawk chhuak nawlh mah se mak ka ti lo vang. 

"Khawi a mi nge?" ka ti hlut a, "Kan drama channa a mi a nih kha. Engtin nge i hmuh theih zawk a? A var an uar em a a pink hi hmang ang kan tia, awii...i ninawm e" nui kar kar chungin Hope chuan a ti ve thung a, mi phei chuan rawn hmu se mak an ti lehzual viau maithei a ni. 

A hnung lamah fairy ang deuh hian thla lem a vuah a, a thawmhnaw hak ngai reng a ha tho nain Bawihtei lawm atan thla lem senno a vuah vah mai. A fanuin chaw a ei duh nan a a thil tih dang chu sawi pawh ka sawi peih lo, keimah zawk hi ka lo zak. 

"Naupang chu an duh ang apiang tih sak loh tur, enkawl dan thiam viau a ngai i ti zawt zawt a, tunah lem thla lem nen i zuang kual vel a" ka tih chuan, "An duh ang apiang tih sak loh tur, rilţam a dah loh bawk tur. An puarna tur a nih chuan tih hreh neih loh tur" a ti duah a, ka dang leh der tawh. In la pa viau chung hian a fanu tan hi chuan makeup pawh a hmang ve duh hial ang tih tur a ni. 

Hetiang hi kan nitin hun hman dan chu a ni mai, naupang pakhatin min chawk buai hneh hle a, kan nupa in nitin hna avangin kan chhuak a, pi leh pu bula awm tam tih takah Bawihtei pawh a khirh a, a la siamţhat leh theih mai turah kan ngai. In a kan awm hman ve ni chuan kan bulah a awm tam ve thung a, ka pasal phone leh ka phone ah chuan barbie leh nursery rhymes a tlar thla dul a, la hrethiam lo mah se awih nan kan hmang a, Nicholas hian barbie vel a en ve duh a ring tlat a, computer hmaah a ţhutpui a, pa ber pawn barbie na na na chu a en nasa a, an hming thlengin a hre vek tawh. 

Ka nute pawh an lo leng ve zeuh zeuh a, nu Hlimin a lo be ţha ve viau zel tawh a, an haw hnuah a rel zui ngai tawh lo bawk. A nawm vak loh lai hian in a ka awm chuan ka ngaihven peih ber a, nurse tih takah damlo ngaihven hi ngaiah ka nei tawh aniang, a lo ţha phian a, ngaihsak tu na na na chu min hau vak vak tawh ngai bik lo. 

Ka thawhpuite lah chuan pasal ka neih ţhat thu an sawi fo a, Ngheti phei chuan, "Ho te te ah inţhen emaw indan emaw sawi lo la, U Nico-a hi a fel a, i ţhen chuan ka kawm tawh lo ang che" tiin min vau khar khar reng a, Chhandami nen erawh kan inbe ta ngai lo. Rei tak chhung chu a status ka hmu ve ţhin a, tunah chuan ka hmu thei tawh lo, ka phone number a nei tawh lo a nih ka ring. 

Kan chhungten Bawihtei tan a ka nu te bula an thil lo dah ka lam kawi a, nidang aiin ka haw tlai ta deuh a, an pafa in tual zawlah min lo nghak a, min hmuh chiah chu Bawihtei pawh a phur ngang mai, a khek ve chel chul a, a sam lah chu an ţawn kak ve ngei a, lehlamah tam deuhin an ţawn khawm a, lehlamah tlem te an ţawn leh ang lawi a, a hê bui mai. 

"I sam hi tu ţawn sak che nge a?" pawm paha ka tih chuan ka pasalin, "Keimah" a lo ti vat a, Bawihtei nen a kan inpawm chu uangthuang deuh hian min kuah a, kan chhipa a fawh ve ve chuan, "Eng nge awmzia?" nui hak chung hian ka lo ti a, min chhang lem lovin kan nufa chuan hmuhnawm tih hmel deuh hian min thlir a, a hmelah chuan a lungawi zia a langchhuak thei hial a ni. Tun ang hian kan hlim reng theih ka beisei tlat a, hmeichhe dang lo inrawlh tum pawh nise keimah chauh min thlan ka beisei a, a hmangaih hnuhnung ber ka nih reng theih ka beisei bawk. 

Sapho hian 'First love can never die' an ti a, mahse, kei chuan, a 'first love' : chatuana a hriat reng tur nih ringawt ai chuan a 'present love' nih a, a future thleng pawha ruahmanna i siampui theih, a hmangaih hnuhnung ber nih ka thlâng zawk e. 

A TAWP TA🥰