BLACK AND WHITE-1

BLACK AND WHITE-1

(He story hi Vanmalsawma tih story a changtunu u Tintin-a story kha a ni dawn a, ziah tumna ka neih miah loh laiin Vanmalsawma story ah avang khan ziak rawh in ti sup sup sia hei ka ziak ta mai. Vanmalsawma tih story nen khan a inzawm lo a, va en let kher a ngai lo. A duh tan chuan chhiar tur a awm reng tho aw)

"Engati nge nangmah a i nuih vur vur reng a, mi â ang mai..i khi ţhaw reng mai" ka dawhkan bul chiaha ţhu ka ţhianpa ve ber chu ka kiuin ka nghawk zauh a, la nui reng chunga ka lam lo hawiin a hmui a tuai zauh a, "Exam hi kan han ti ve bawk ţhin a, an zirlaibu a tel miah lo leh sap ţawng thumal thar ka hriat belh nual zel. Uluk deuhin kan zirtir a, note kan pe a, a ni lo hlir an ziak a, ţhenkhat lahin an hawrawp an ti lian chawp a, an thiam chhun chhun phek khat daih ten an ziak a, an phuahchawp nasa ţhin lutuk hian nuih a ti za ve alawm" a ti a, midang pawn an lo sawi zui ve sap sap bawk.

"Exam zawh hnua zirtir tute min hmuh lahin zak hmel an pu lem lo a, a ţha ve hrim hrim. Hmuh chhuah thar lah hi an han ngah thei khawp a, keimahni zawkin kan tisual ta mai emaw tih rum rum te a awl ţhin alawm" kan thawhpui tho Mely in a lo tih ve chuan kan nui dar dar a, exam hall a hawi vual vual ţhin ho paper kan han check chiah phei hi chu thinrim tum viau mah ila a theih miah loh chang a awm ţhin. 

"Vani, in pa pawh bike in a leu leh zuai zuai tawh mai. Hei ka cousin awm ţha duh vak lo, kan buaipui ve luih luih ţhin khan status ah a hmang chuai chuai mai" Hluhluin a rawn ti veleh a, ka sa leh phat tawh. Mahse, nui chung hian, "A duh duh naah kal mai mai rawh se. Kan inneih hma chu in pa ti tawh suh" ka ti a, ka hna kal tur min thlah fo a, ka haw lam min hruai ţhin bawk a, amah lah mi phawk ve tak a lo ni bawk nen, ka thawhpuite ho hian an hre tawh khawp mai. 

"Lo haw lo la Tintin-a hi chu neih tlakah ka ngai lo. A ngaih a sam si, a awm ţha duh bawk si lo. A hmel a chhe lo a, a palianin amah hi hmeichhe hip chi a lo ni ve bawk si, inngaihzawn lai ringawt pawn rilru hah deuh a i awm chang a tam a, innei mah ula in innei hlen lo ang. Mipa chu hmeichhia in an tih seuh seuh phei chuan an nem zel a nia" Hluhlu in a tih chuan ka thaw hak ringawt a, a sawi dik vek a, hnial kalh vak dan pawh a awm lo. Ka hre lo a ni mah zawk. 

"Hmana proxyvon hluar hunlai a lo ti ve hrep tawh ke bai suih suih kha a phur a, hei i en duh kher leh thlalak a tam a nia. Damdawi a ti tawh lo nain zu in chu a la hrat khawp a" Hluhlu-in a tih leh chuan lu ka thing a, "A awm awmin awm rawh se ka tih chu. Sawi reng zel suh u a ninawm" ka ti bak hlar mai. 

A rukin phone ka phawrh chhuak zal zal a, ka bialpa laktlak loh ve tak chu ka call a, a la thei der lo. Kei, hmeichhe â lutuk hian mipa awm ţha duh lo lutuk ka hmangaih tlat a, ţhen pawh ka tum ngun, ka thei lo leh ţhin. Ka tleirawl chhuah tirh aţanga ka ngaihzawn ve ngar ngar tawh a ni a, mipa dang hian min hip hlawl lo ti ila a dik ber ang. 

Amah vau nan hrim hrim 'Dawr pawh ngaihsak lovin i leng leh tawh tih ka hria, mi hian thil an hre thei a, hei i thlalak thlengin ka hmu vek. Inţhen mai ang' tiin beidawn tawpah message ka hnutchhiah ta ringawt a. 

Ka ţhiante lah chuan an tih tur an tih zawm mawp mawp a, an vei zui ve tehchiam lo. Keimah te hian rilru nuam lo deuhin ka awm nitin zel ti ila a dik ber ang. Ni e, ka ţhiante sawi kha a dik vek. 

Laltinkhuma, Tintin-a nen hian kan inhriatna a rei tawh. A nau chiah Sensiari nen hian tet te aţanga inkawm kan ni a, ka naupanlai a min velh ţah ngun zia thlengin ka la hre vek. Kan tleirawl chho a, min han ngaizawng tak tak mai chu mi aia uchuak a ni leh a, message hmanga inbia in bul kan ţan ve tho a, a awm ţhat duh loh em avanga ka lo hnar hnu kha chuan a inkhawm tlut tlut a, zing ţawngţai inkhawm kal puiah te hial min sawm ţhin. "Nangmah vangin ka inthlak danglam vek tawh" a tih te khan kei, tleirawl te khan ka lo awih ve mai a, a nu, Nu Ruati kan tih mai ţhin lah mihlim a ni a, Tintin-a inthlak danglam thut leh a pianthar ţhat zia in tinah a sawi a, zing ţawngţai inkhawm tura an kal dun pawh ka hmu fo mai. Miin fiamthu a "setan-an a aiawh turin khawvelah a rawn tir" an tih ţhin kha an fak ta luih luih a, chuti na na na chu tiin pawl 12 ka zir ţumin kan in kawp ve rawih a, ani pawn college a rap ve chiah bawk. Ka vawikhat tawnna a ni a, ka zah em avangin ka ţhiante hnenah kam khat pawhin kan chungchang ka sawi ngai lo. Ka ţhiannu u a ni ka tih tawh kha, ka ţhiannu nen a kan inkar a chhiat phah ka hlau tel bawk ţhin. Vengchhung a hnatlang a awm lahin kan in bulah kher a rawn thawk ţhin a, ka tel ve miau zel avangin ka hmuh lai chuan upa zawk te a awl a, phur deuhin a thawk turh turh ţhin. Kei tih loh chuan tuman a inthlak danglam thut chhan an hre lo a, 'a nu ţawngţai zar' an ti mai zel a, kan pahnih bakin thudik kan hre lo. 

Ka hlim a, keimah vanga a danglam ta chu min hmangaih vangah ngaiin ka rilru zawng zawng ka pe a, ka thinlung thlengin ka pe hial a ni. Mahse, ka duh zia a hriat hnuah meuh chuan a nunhlui ah bawk a kir leh a, rui chungin chak deuh deuhin bike a khalh a, ka duh ve theih nan a lo piangthar der mai mai tih chu keimah bawkin ka hre hmasa leh ber a, vengchhung mi te lahin, "Tintin-a te ang hi chu an ţha hlen tak tak thei ngai lo" an lo ti ve sek bawk nen, ka ipik ţun zel. 

"Keimah vangin i inthlak danglam emaw ka tia, min lo bum reng a ni maw?" ka tih lahin, "Ka inthlak danglam a, ka da leh tawh a nih hi. Min hmangaih chuan min pui zawk la" a ti let daih zel a, ţawngkam a tlachham ngai si lo, mi phawk ve tak tih takah fiamthu a lak daih a ching bawk si, a ngawi zawkah ka ţang leh nge nge ţhin. 

Pathian zarah kan harsa lutuk lo a, ka nu hian sawrkar hna a thawk a, kan chhungkua kan hlimin Tintin-a vanga ka rilru hahna te pawh chhungte bula ka awm chuan a zia deuh ţhin a, mahse tih a ngai leh tawh. Ka nu'n amah aia naupang pasal a nei a, thawhchhuah nei lo, mu tawp, ei tawp chi a ni. A fel viau dawn maw kan tih laiin kan buaina ber a ni chho a, ka nu a fuih pawrh hneh a, ka nu lahin a hmangaih bawk si, a fate aiin kan pahrawn thlavang a hauh na zawk ţhin a, a hma zawnga inhau ngai mang lo kha ţhenawm khawvengte hriat tham khawpa nasa in kan inhau ta fo a, ka nu bula min hek chu sawi loh, min la beisei ţhin zui a, ka ten a, tih theih ka nei bawk si lo, pawn lama nui ve reng chung hian ka chhungril erawh a uap churh ţhin. 

MA ka zawh hnuah tuna ka thawhna, kan khua Kolasib a private school pakhat ah hian ka thawk ve thei hlauh a, tun a ka ţhiante, Mely leh Hluhlu-i te nen hian kan inkawm chho a, tun hma a ka ţhiante nen erawh kan inhlat sawt viau. Tintin-a nen a kan chungchang an hriat ve hnu khan ka hrilh ve nghal mai lo kha an lungawi lo a, kan inkar a zau tial tial a, hna kan neih hnuah meuh phei chuan phone a han inbiak ve reng te kha kan ti tawh ngai lo a, kalkawnga kan intawh changa kan inbe ţhin hi a ni mai. Ka ţhianţha ber a ka ngaih ţhin, ka bialpa nau Sensiari phei chuan min hlat lehzual a, khawlaia kan inhmuh pawhin biak hmasak loh chuan min be ngai lo. 

Kan khua Kolasib ah vek kan awm tawh a, Tintin-a pawhin bike dawr te neiin a hnuai hi workshop a ni nghal a, khawkhat ah awm tawh mah ila rilru hah erawh a chawl thei chuang lo. Inchhungah ka pahrawn vangin kan buai a, keimah chiah phei chuan a bulah ka awm ngam lo a, ka ţhian hlui ten min hlat tial tial a, ka bialpa vangin ka na fo bawk a, tu hriatpui si loh hian ka nun chhungril hi a hrehawm a, mahni inkhawngaih vanga a ruka ţah chang ka ngah a, ka naute vang chauhin ka inti chhel lui mai mai zawk a ni.

"Vani, school bus in mi i haw ve dawn? Tintin-a a lo kal dawn em?" school kan ban chuan Mely bawkin a lo ti leh a, "Hluhlu-in a leng daih a tih kha, a lokal lo tawp ang. School bus hian ka haw ve mai ang" ka chhip a ka sam hui chhoh pahin ka ti hlak hlak a, an lo lawm phian a, kei erawh ka awm a nuam tak tak thei lo. Hmangaih ber te nen a han inbiak ţhat vak loh hi chuan rilru a nuam mawh khawp mai. 

Bus ah chuan lutin a hmasaber tukverh bulah ka ţhu a, ka malchunga bag ka dah rualin ka bulah Mely a lo ţhu ve a, "Bus a chuan a ti ti mai mai hi a nuam ber alawm. Ngaihtuah duh suh, chhia leh ţha hre rual a ni tawh alawm" a ti sa sa a, kan hnunga ţhu ten an hriat ve phak a hlau ni ngei tur a ni a ţawng zawi emai. Kan school hi a hlat deuh avangin bus kan nei a, Tintin-an min lo hruai ţhin avangin ka chuang tam ve lem lo thung. 

"Ka ngaihtuah hleinem" ti mah ila, "I hmelah a lang vek" a tih deuh tlat avangin ka nui ta ringawt a, "Thlemna hi hneh a lo har a nih hi" thawk lak halh paha tih pahin phone ka phawrh a, ka message thawn chu a chhiar tawh ngei a, min rawn chhang let lo thung. 

"Ih maw....a chang hi chuan thawk harsa ka ti ţhin. Nitin naupang bulah kan awm a, rilru an la peng a, school ah hi chuan a zia phian zawk a, inah kan han haw a, mahni a han awm chiah hian ka pik mup mup a, ka sawithiam dan ber chuan sarang phui deuh a up beh tlat ang mai ka ni ţhin" ka ti a, thli in ka sam a chhem len chu ka hui leh zauh zauh ţhin a, ka buaina hi han sawi ve bawk ţhin mah ila ka thawl phah ngai chuang hauh lo. 

"In enkawl ţha rawh..a thim zawngin ngaihtuah lo la, i nu pawhin i pahrawn nihna diktak a hriat hunah a ţhen ve mai ang. Tintin-a pawh hian a hmangaih che a" a tih lai chuan lo pawt chatin, "Min hmangaih pawh ka ring tawh lo. Inţhen hi a duh lo bur ringawt a, mahse min hmangaih se chu a insiamţhat ka ring" ka ti a, ka hui leh pap ţhin a, hawina lam apiang hi rilru hahna a ni ringawt. 

"A hmangaih che alawm...hmangaih dan che a thiam lo zawk a nih hi. Kan thil tih ţhan hi bansan thut a har a, pasal tlak a ni lo ka ti fo nain a hmangaih che chuan ka hria. Midang nei daih thei la chu duhthusam a nia, i thei chuang si lo a, Pathian kutah dah tawp mai rawh" a ti ta ringawt a, han sawi dun ve bawk ţhin mah ila engmah kan sawi kaw ngai tak tak chuang lo. 

Tintin-a dawr bulah ka chhuk a, a chhunga ka luh chuan a ţhianpa ber Sawmtea a lo awm a, ka bialpa thawmhnaw vek a ha chu mak ka ti angreng khawp mai. Lukhum lah chu hmanni lawka Tintin-a ngei nen a kan lei a ni lehnghal a, mask leh tarmit dum a vuah bawk. 

"Khaw nge i kal dawn?" phawk angreng tak hian ka ti deuh ha a, min en zawk a, chhan pawh min chhang lem lova a kun tak ngulah chuan ka nui chhuak hak a, naupang emaw min ti lehpek tawh niin ka hria. 

"Laltinkhuman a lem a chang turin a ti lehpek tawh che a ni maw? Naupang bum mai mai rual lekah min ngai tawh suh u. A thawmhnaw ha eng ang mah la hnunglam aţang ringawt pawhin ka hre hrang che u. I ţhianpa bulah chuan ka lokal kawi tih hi lo hrilh ang che" thupe aw zet hian ka ti a, pawn aţangin darthlalang chhanah ka en thuak ţhin a, chutiang turah chuan an ngai leh a ni ngei ang. Dawr chhunga ka luh hi an beisei lo tawp ang.

"Mesak-a te in rawng hnawih a ngai a, a pui ve daih a" zawi sup a Sawmtean a tih chuan, "Daw lo mai teh. A kalna ka hre vek, a lo haw tawh takin tiin ka lo lut kawi a nih hi. Khawi a rawng mah a hnawih lo, lak tlak loh lutuk mai" ka ti leh hlak hlak a, ka awm a tawt lutuk hi chuan ka ang chiam zel hrim hrim a, min hrechiang ber tu te an ni. 

"Rawng leiin an chhuak zuai a, tunah chuan an hnawih mek tawh ang. Tihbuai chi an ni rih lo maithei" a lo tih leh chuan, "Ti buai dawn lo e...ka lokal tih hi sawi la a tawk. Ka ti buai lo khawp ang" tih leh chhuah ka rual a, "Vani, i ngaih ang kha a ni lo a nia. Mesaka te in rawng an hnawih tak tak alawm" tiin min au zui lawm lawm nain ka hawi let tawh lo. 

Chak deuhin ka kal hlawk hlawk a, ka pen pawk pawk a ni ber. Puitling, zirtirtu hial ka ni tawh chung hian trick ho te te hmanga min bum a tum fo a, kan inzuina a lo rei ve tawh bawk nen, kei lahin ka hrechiang nasa tawh mai si a, min bum fing zo tawh a nih ber hi. 

Inchhung ka luh chuan ka pahrawn chiah a lo awm a, biak pawh be lova pindan a luh tlang mai ka tum chu, "I nauten i nu damdawiinah an kal pui mek. A lung lam bawk a ni a, i riah pui a ngai maithei" a lo ti a, ka ke pen a tawp chiang hle. 

Pindan kawngkhar hawnna vuan ran chung hian ka hawi let a, a lo rui leh bual tawh lehnghal a, mei a zu khu hlat hlat bawk. 

"A pasal i awm a, zu in mai mai lo khan nangman riah pui ta che. A pawisa i duh tho a, a dam lo pawh buaipui rawh" ka ti ve hmak a, ka nu ka hmangaih loh vang a ni hauh lo, thawhchhuah nei lo rui reng bawk si a khawi tlat hi ka hne em a ni. 

"In a ka awm reng loh chuan inchhung a zahawm loh. I bialpa laktlak loh zet kha a lokal leh emaw a nia nga" a ti deuh kher a, ka chhan let chuan kan inhau leh vak dawn tih hriain a thusawi chu hre lo ang hmakin pindanah ka lut a, khuma ka ţhu chiah chu ka pheikhawk tlawh phelh pahin ka thaw hle hle ringawt. 

Khum lu a lukham dahin ka ţhu awn a, ka nau chiah Mary bia in thil awmdan ka zawt a, "A ngaihtuahawm loh, zanin chu keimah ka riak ang a, Mama leh Teresa-i an rawn haw ang" a lo ti zung zung a, ka thaw huai thei mai. 

"Mamawh in neih chuan lo sawi zel rawh aw" tiin kan inbiakna chu ka ti tawp a, ka phone chu ka awmah ka dah a, ka awmdan ngai chuan ka awm ta hle hle a, rilru erawh a vak thui lehpek khawp mai. 

Ka lo chhing sek ni ngei tur a ni ka phone nghawr der der chuan min ti harh a, ka taksa si a ka dah avangin ka phu zawk nghe nghe a ni. Min rawn biak tum tu ka en chu ka ţhu chhuak hluai mai, phone screen ah chuan 'Nu Ruati' a inti kalh a, ka bialpa nu ngei a ni. Tukverh lam ka hawi a, khua a lo thim tawh a, ka naute thawm takngial pawh ka lo hre lo chu niin. Mak ti deuh taka phone ka en lai chuan a ri chu a tawp hman a, mahse reilote hnuah Nu Ruati bawk chuan min lo call leh a, hamhaih angreng taka "Hello" ka tih rual deuhthaw chuan, "Lei Vanram, keima duat, eng nge i tih a?" mipa aw thum zet mai hian a lo ti a, tu nge a nih hrilh nawn ka ngai lo chiang kher mai. 

"Laltinkhum, message ah ka rawn sawi vek tawh kha. Thang kebaia nen in inphur a, zu in in ho tih te pawh ka hria. Inţhen ang ka tia ka rawn sawi vek tawh kha" ka lo ti ve nghal a, lungawi lohna ka ngah sa bawk nen, ka ţeu nghal hlar mai.

"Ehe...chutiang ka va hmu lo ve" mak ti awm taka a tih chuan hul zet hian ka nui hak a, "I hmuh chian em kha maw...a pawl kalh alawm. I chhiar chiang lutuk tlat" ka tih chuan, "I va mak e...ziak leh chhiar ka thiam ţha lo ka tih kha" nuihza aw zet hian a ti a, ka thinrimna fiamthu a min laksak leh tawh chu ka ngaihdan a ni lo bur. 

"Message a inţhen thu ka sawi apiangin ziak leh chhiar ka thiam lo i ti ziah" ka tih chuan ka sawi zawh hma hmain, "Ni e..spelling chawp zel angai. Chuvang chuan sawi tawh lo mai rawh" min la ti zawk a, sawi tur a vang leh tawh khawp mai. 

"Rengtekawn lamah in inphur thla a, hmeichhia pawh an tel a ni lawm ni? Dawrah lah pawn aţang chauh a ka en ringin nangmah angin Sawmtea i awm tir a, min bum kual mai mai a ni. Kan upa tawh, hetiang mai mai a awm rual kan ni tawh lo" thutak deuh a ka tih chuan, "Damlo kan kan zuai a, chumi hnuah Mesaka te in rawng kan hnawih leh" a rawn ti a, a thusawi chu awih hlawl lo mah ila, "Ka nu damdawiinah an admit a" ka ti ta tho a, kan inkar chu chinfel na hun a la tam alawm. 

"I pa nen chauh in awm dawn mi? Ka rawn riak dawn, khapa nen chiah khan zankhua a in awm ka phal lo" a ti nghal pung pung a, min beisei ţhin tih a hriat aţang kha chuan ka nu pasal hi a haw hlur mai. 

"Nupa pawh kan la ni lo a, rawn riah kher a ngai lo. Ka naute pahnih an awm dawn a, a rui deuh a nih pawhin eng em a thleng lo ang. Chubakah i rui hmel kha ka hmu peih hlawl lo" ka ti hrak a, min rawn chhan leh hma chuan Nu Ruati aw ngei maiin, "Ka phone kha engatan nge i tih a Tinkhum? Ka zawn buai nasat nen engati nge choka ah i lo tawm pui kuk a? I phone a rik reng saw" a ti lang lang a, ka lo thaw halh a, dawt hlir hi min hrilh a, ka beidawng ve ţhin khawp mai. 

"A chhia emaw ka tia ka charge chhin a, battery low vang lek a nih chu. Ka lo be leh ang che, zanah ka lokal dawn a nia" tih leh phone dah a rual a, engmah ka sawi ve hman tawh lo, ka phar uaih ringawt. 

Ka lo mutthilh daih avangin ka naute chu chawhmeh ţhing ka rin pui a, an ei tui viau tho chuan ka hria. Chaw ei na te kan ti fel a, ka pahrawn zu rui pawh a ang leh nasa tawh, fiah lo tawkin eng eng emaw a sawi a, a meng duar duar a, a bu lup lup reng mai. 

Ka naute lehkhazir tura ka tirh liam hnuah ka inbual a, ka zawh rualin Tintin-a pawh a lo thleng a, rui hmel a pu lo nain a nam leh tho ang. Amah hi mizo mipa ah chuan palian pawl tak a ni ang, a hang vak lo a, a hmel leh landan hi chu sawiselna tur a vang khawp mai, a nungchang leh mizia, a chinţhan thil ţha lo tak tak te hi bansan phei se chu tuman sawiselna tur an hre lo ang. 

Ka pahrawnin fiah mang lo a, "Tintin, meizial i nei em? Khawmaw min han ţheh teh" a tih chuan, "Ka phal dawn mawnle...i zu in kha ka meizial in i charge te te ang a, a thawh ţhat hnuah min hau leh nghek awm sia" ngeiawm zet hian a lo ti kual vel a, hei hi mak ka tih lai ber a ni ţhin. Min beisei vanga a huat em em laiin a lang chuan a be chhe ngai hauh lo a, min veng ru ran ţhin thung. 

"Min han pe mai mai teh" ka pahrawnin a tih leh chuan, "Kha..zu zo vek la, in inah hian ka duh chen chen ka leng ang" tih pahin ka pahrawn hmaah cigarette bawm khat leh lighter a dah a, lungawi hmel deuh a buk nghut nghut pah hian, "Leng reng rawh i hnawk hleinem" a ti ve tak nain zingah chuan inleng neih a ţul loh zia a a sawi leh chiam dawn tih ka hre lawk vek. Zu ruih thiam lo chi a ni a, a â vek zel a, ka nu hi dawhthei ka ti ţhin khawp mai. 

A bula ka ţhut rual chuan, "Lei Vanrami chu i va rimtui ve" tih pahin min lo kuah a, a nui vur vur bawk a, kan ep chiaha ka pahrawn ţhu pawh a buai buaiin a buai a, min ngaihsak lem lo. 

"Ka rimtui ve bawk lohin, ka inbual zo chiah alawm" tum bur chunga ka tih chuan ka dara kuah reng chungin ka sam a rawn hnim zauh a, "Vanram rim i nam" a ti vel a, Vanrammuani ka lo ni kher kher hi pawi tih chang ka ngah mai. 

Ka pahrawn awm ve chhung chu ka insum ţang ţang a, Tintin-a lah a haw mai duh bik bawk si lo, pai ţuang ţuang chunga ka pahrawn chuan pindan a pan chu kan thlir zui reng a, a luh fel veleh, "I mu ngam ang maw? Pawn aţangin ka lo veng dawn che em?" min ngaihtuah zet hian a ti a, a mitmeng fiah tak mai chuan min en run bawk a, in ngaizawng rei ve tawh viau mah ila chik deuh a min en chang hi chuan hmeichhia tih takah ka zam ve fo mai.

"Kawngkhar ka kalh mai dawn a, mut ngam loh tur thu a awm lo. Nangpawh haw tawh rawh, ka be peih rih lo che" ka tih chuan za lo deuh hian a ţhen suk a, "Ka phone kha a chhia emaw ka ti tak tak, a thi hmak a, phone vang mai mai chuan inţhen lo teh ang. Smart phone hi chu a hnawk sak a ni" a ti thum dut dut a, insawithiam dan a hre zel ka tih tawh kha, a chang chuan ka awt letling zawk ţhin. 

"I mak ka ti...rilru hahna ka ngah zia hrereng chung pawha insiamţhat i tum miah lo hi. Ka buaina hmu miah lo chung hian ka hmangaih che i ti ve ziah a" lungawi lo fe a ka tih chuan, "Awww...love is blind an tih kha. Ka hmu lo reng ang chu, hmangaihna te chu a mit a del alawm" ngaihsam fe hian a ti a, heti hian fiamthuah a la zel a, engmah a sawi tak tak theih ţhin loh.

"Ka hne che" ka ti ram hmak a, hmalam ka en ngar a, amah ka hmuh hian ka ţhianţhaber ni ţhin Sensiari mitthla ah a lang tel zel a, min biak duh loh chhan ka hre bawk si lo, engkim hian min ti lungngai a ni ber e. Depression emaw anxiety ka nei ni ten ka inhre ţhin. 

"I awm ang hian awm ve ta ila engtin nge min tih ang? Keimah vang hian hrehawm ti deuhin awm reng ta la chu hman hmanah khan min kalsan tawh ang" tiin zawi te tein ka phun leh sap sap a, ka ţap lo a, ka mittui pawh a tla lo. Mittui hian ţangkaina a nei tlem em a ni. 

"I nu chu eng nge a an tawh a?" a ti leh ta daih a, thawk hak pah hian a ţhat thu ka sawi a, kan in be tlem khawp mai, ka hlim lo tih chu a hre chiang a ni. 

Zan rei tawh takah pawnah kan inzui chhuak a, pawn light tih loh chu a thim a, a reh ţhiap tawh bawk a, ţhenawm hnai te pawh an mu vek tawh a nih hmel. 

A kawr hnung a ka pawh ţang lai chuan a ding thut a, "Min thlah thui suh, nangmaha i let lehna tur a hlat chuan ka ngaihtuah ang che" a ti ve ngei a, ka lamah rawn inherin ka dar tawn tawnah a dawm a, a dar pawh ka chen loh avangin dak vah hian amah chu ka en let ve a, "I awm ang chiah hian ka awm ve tawh ang. I ruih chuan ka rui ang a, hmeichhe dang i kawp leh mipa dang ka kawp ve ang a, tun laiah te chuan mipa chauhin an tih tura kan ngaih kha hmeichhia pawn an ti ve vek tawh alawm" ka ti a, ka ţawng zawi viau nain a mitmeng danglam zawk te, min melh danah te chuan a hre pha ngei tih ka hria. Ka dar a vawnna chu a ti nghet salh bawk. 

"I buaina hi ka hmu a, ka hre bawk. Hmeichhe dang ka kawp san ngai lo bawk che. Min ring turin ka hrilh ngun tawh che. Mipa ka nia, zu in ve zeuh chang chu ka nei ang, mahse ka phatsan ngai lo che" zawi te, chang zet si hian a ti a, a thutak ve reuh hle.

"Ka kham tawh..engkim hi ka hne vek. Mihring ah hi chuan ka beidawng ngawih ngawih tawh. Ka thih hunah in la inchhir hlawm khawp ang" ka tih chuan, "Thih sawi ziah suh" a ti vin hluk a, engahmah ka ngai duh lo ve tlat.

"Dam ka thlakhlelh tawh miau loh chuan ka thi mai ang chu. Mahni intihhlum te chu a harsa reng reng hleinem. Ka phur a rit lutuk hi ka tuar zo lo lek lek tawh a nih hi" ka tih chuan, "Ka hrevek ka tih chu, khatiang zawnga ţawng chhuah fo kha a ţul lo" vin zet hian a ti leh nghek a, ka dar a nghet zet a vuan chungin min sawi pah nawk bawk. 

"I hriat vek chuan min pui ta che" ka ti a, ka awki pawh a hma aiin a ring ve ta deuh a, puitu ka mamawh a, puih ka ngaihna lai ka hre bawk si lo, ka â zo tawh a ni ber. 

"Zanin pawh ka veng ang che ka tia i duh hleinem. Puih i ngaihna sawi rawh, min hrilh phawt chuan englai mahin ka tlanchhe dawn lo" a ti a, sawi tur hre lo zawk ka ni leh tawh a, ka awmdan hi ka kham takzet a ni. 

"Haw rawh..keipawh ka lut dawn" ka ti thei hram a, ka dar a dawmna chu thlahin ka biangah a dawm ve thung a, chutah rawn kunhniamin ka hmuiah a fawp a, khawlaia hetiang thil tih hi ka duh lo bur thung. Ka tal a, a awmah ka nam ngat ngat bawk a, awmzia a awm lo kher mai. Tih ngaihna ka hriat loh tawpah a hmuiah ka seh vak a, na a ti bawk aniang rum hawk chung hian a inla hrang a, a kutzungpuia a hmui huh hliam mai a tuai lai chu boruak kham lo zet a thaw ham ham chung hian ka lo en reng a, "Kawlh hi chu i kawlh ve mawle" zawi sup hian a rawn ti chhuak a, a nui pah suk bawk. "Haw rawh" tih bak thil dang ka sawi tawh lo. Kan dinna lah chu mi in pawn light in a chhun chiang ropui si, min enthla tu chu awm se chiang deuhin min rawn hmu thei ang tih tur a ni. 

"Eng emaw a awm chuan min lo call ang che. Pindan kalh ţha la, i buaina hi ka hre vek a nia" ka bek a dawm pahin dam deuh zawk hian a ti leh a, ka bek sam chu a kutzungpuiin a tuai pah nauh nauh bawk. 

"Rintlakin awm rawh" ka tih chuan ngaihawm deuh a nuih pah hian a bu nghut a, "Keimah vanga i rilru a lo hrehawm chuan tihpalh aw" zawi fahran a tih leh pahin a rawn kun hniam leh a, "Tihpalh aw" a ti nawn leh a, a chalin ka chal a rawn tauh dat a, ka hmui zawna a thaw lum ham ham pawh chu hrechiang tak ka ni. 

"Min fawp tawh suh khawlaiah kan awm hi" ka tih zawh rual chuan ka hmuiah bawk a fawp leh zauh a, sawi lo ang vel ka ni. A ban a ka ben thlawp rualin a insiamţha a, ngaihdam min dil leh ni awm tak hian uangthuang zetin a beng hmawr a pawt a, lei a chhuah zauh bawk a, keipawh ka nui veleh tawh. Han thinrim viau ţhin mah ila a daih rei lo thei khawp mai. Engang pawn hau ila a ngawih reng loh leh fiamthu ah min laksak a, ka lawmna tur tawk lek a min chhaih zui a thiam bawk si, Laltinkhuma hi chu ţhen mai a harsa takzet a ni. 

"Bike ken i phal mang si lo a ke a haw a ngaih ziah phah" min kalsan uk hnuah a rawn hawi let leh a, "Kal mai mai teh, in in a hnai lutuk. Bike a lokal zel kher a ngai lo a bengchheng. A thatchhiat thlak lutuk emai" ka tih chuan a nui chhuak hawk a, "Muttui aw keima duat...i hlauh chuan min lo call dawn nia, ka lokal nghal ang" a ti a, ngai viau mah ila mut ka duh avangin kan invai liam a, ka naute ngaihven ka duh vang a ni tel bawk. 

Mama chu mipa a ni a, a beisei ve hauh lo ang, mahse ka nau hmeichhia te hi ka ngaihtuah ţhin a, ka pahrawn a mut fel hma chu ka mu ngai lo reng a ni. Teresa-i muhil tawh chu kaitho lehin chhung lam aţanga pindan kawngka kalh turin ka hrilh a, phun nasa viau mah se a tana ţha tur zawk a ni. 

Ka pindan a ka luh ve rualin khumah ka bawk nghal thlawp a, ka pahrawnin min tih dan hi kamkhat pawhin ka nu hnenah ka sawi ngai lo. Lung lam ţha lo nei a ni a, ka pahrawn a hmangaih si, lo hrilh ta ila ka nu hian a tuar ngei dawn a, thihna hial a thlen ka hlau a ni. Ka pahrawn mai ni lovin ka putea pawhin min beisei fo a, thisen zawm mah ni ila a lo zin chang chuan min khawih a tum fo ţhin, ka nun hi a zalen lo a, ka himna hmun ber tur ni a ka ngaih kan inchhung hi pawn lam aiin ka hlau zawk a, ka unaute hi ngaihtuah viau lo ila chu ka thih loh pawhin ka insawn chhuak daih tawh ang. Ka putean min ngai ber ni awm taka ka mal a chul hliau hliau lai te hian ka nu pawh awm se ka ip chawih chawih zel a, ka buai rukna hi tlangaupui chiam chi a ni si lo, mahni a tawrh tlawk tlawk hi ka tih theih chhun a ni mai. 

Damdawiin aţanga ka nu lo chhuak chu duat deuhin kan enkawl zui a, ka hlawh a tlem viau nain a ei duh zawng leh chak zawng ka zawt reng a, huat chang ngah viau mah ila ka hmangaihna a kiam phah chuang lo. 

"I putean Aizawl ah lo chho se la, ka ţhiante hian school an nei tho a, tah chuan a thawk ang a, lehkha a zir zawm leh ang a, MA ringawt a tawp chu a uiawm emai a ti a" ti a ka nu thusawi ka hriat rual chuan ka hawi let zawk a, inrinni a ni a, kan pahnih chiahin inah kan awm a, remchang a chuh a nih ka ring. 

"Ka zir peih tawh lo, tuna ka thawhna hi a nuam ka ti" ka tih chuan, "Tintin-a vang tiraw? I kalsan hreh em ni?" min en ran chung hian a ti a, lu ka lo thing thung. 

"Nangmahni vang zawk..nang leh ka naute, ka kalsan tawh dawn lo che u. Hlawh chu a tlem deuh nain tuna ka thawhna hi nuam ka ti, khawiahmah ka kal dawn lo" ka ti a, kha zan rapthlak tak kha tun mai a thil thleng angin a rawn inlar nghal zut zut a, hlauhna in min tuam hlup hlup bawk. 

"I putea te bulah awm thei la duhthusam a ni. Ka dinhmun hi en la, khua a vawh deuh leh ka buai a, lo thi thut ta ila engtin nge in awm ang? Tuna i hlawh hian i naute i chawm thei dawn em ni? Ka la dam ţhat lai hian zir leh rawh. I putean a buaipui duh phawt che chuan lawm deuhin kal zawk rawh. I tan vek a nih hi" a ti dap dap a, a awki a dam viau nain thu min pe a ni ber zawk. 

"Sawi tawh lo teh...MA ka zir chhung zawngin hmun dangah ka awm a, in bula awm ka duh tawh zawk. Min tir lui duh suh ka kal dawn chuang lo" ka ti ve ta hmak a, min en ran a, engmah phei chu a sawi tawh lo. Kha thil rapthlak tak ka chunga thleng kha tuman an hre ve lo a, ka bialpa takngial pawhin a hre lo. Hrilh ngat ila chu thinrimin a che nghal buan buan duh mai ang. 

Chhuat ka nawh laiin, "Tintin-a hi a innghahna tlak loh a nia aw" a lo ti leh a, ka che chu ka tawp chawt a, chhuat nawhna fawng chu nghet zetin ka hum bawk. 

"In inkawp tirh aţanga ka sawi tawh a nia, nin pawh i ning ang. Mahse, nakinah i la inchhir dawn. An hausakna hian a chhan hram hram zel a, ni lo se chu tuman an uksak peih lo ang. Tintin-a bialnu nih hi a zahthlak lutuk tih hre tawh. Vengchhung mite phei chuan an hmuh pangngai loh vek tawh che hi, i ţhiante pawn an kawm duh tawh lo che a" a tih zawm leh a, a sual a sual ka tia ka phun ve sek chung hian miin an sawichhiat chuan ka khawngaih leh tho zel. 

"Min en liam mai mai rawh...nangpawn pasal i nei leh a, i pawisa a a rui reng chung pawhin kan en liam ve mai mai tho alawm. Tintin-a aiin a laktlak loh zawk daih" tih leh earphone vuah ka rual a, ring deuhin zai ka ngaithla a, ka nu chu a hmui phun ka hmu a, eng nge a sawi ka hre thei tawh lo. 

Pathianni zingah inkhawm turin ka bialpa nen bawk kan inzui leh hnak hnak a, inkhawm hi a peih lo viau nain ka sawm chhuak lui ţhin. Zan lamah a rui lehpek aniang a mit a sen ram a, awmze nei lo deuhin a sam a thur siang bawk a, mahse chu chuan a ti hmelchhe chuang lo. Ruihhlo ti nasa lo phei se chu tun ai hian a hmelţha zawk ngei ang. Mi pawn an ui zia an sawi fo reng a ni. 

"Ka pheikhawk hi bun a harsa lutuk, ka lo bun kher kher a ni" ka tih rual chuan ka darah min kuah a, "I lo tlu vel ange aw..puan i bih lehnghal a, i tluk chuan ka hre lo der dawn che a nia" a lo ti fiamthu a, Tintin-a bula awm chuan thutak luih tlat pawh tum ila a theih loh a ni tawp mai. 

"Ka ke a na vek tawh alawm kan la kal tawi tehreng nen" ka tih chuak thawk chhuah hawk pahin min kal pel a, ka hmaa a rawn ţhu hniam chu a ngaihna ka hre lo khawp mai. 

"Phun phun lo khan ka hnungah hian lawn rawh ka pua ang che" rawn leh hawi chung meuh hian a ti mauh mai. 

"Ka zak..tho rawh ka vuan zawk ang che" ka tih chuan min en ran chung hian, "Ka zak ve hleinem" a ti charh a, lu ka la thin khum tho. 

"Bike keng suh i ti ziah a, i buai leh ber ziah" tih hluk hluk pahin a tho a, kan hnung lam aţanga nui ri ka hriat chuan ka hawi let a, ka ţhian hluite an lo ni reng mai. 

"Nidang aiin in tlai ve tho a ni maw?" ti a pangngai taka ka zawh chuan, "A nih hi...inthup thei vel sia, kum engzat nge kan lo hriat loh ang aw? Tunah lah in inzui chhuak ta fo sia" Thartein a tih chuan ka nui ringawt a, zak viau lo ila chu ka zep bik lo tawp ang. 

"A dum leh a var" Sensiarin a lo tih chuan awmze nei deuhin an inmelh ralh a, ngeiawm deuh hian an nui bawk a, sawi tawh ang khan ka ţhianţha ber ber te an ni a, eng nge min huat chhan ka hre tlat lo a ni. Sensiari phei chuan a u nen a kan inkar a thil thleng hi a hre vek sia. 

"Kal mai mai teh u" tih ram hmuk pahin Tintin-a chuan a ban min kuah tir a, "Min vuan la muangchangin kal rawh. Haw lamah chuan i pheikhawk hi phelh ang che" ning tih hriat zeta a tih hluk hluk lai te chuan nui tet tet chunga min kalpel tu ka ţhiante chu ka en a, ngaihdam ka dil vek tawh a, anni lah an in la hrang zel si, ka rilru nat zia hria se chu hetiang hian min ti hauh lo ang. 

Thawhţan tukah pawh school thleng min thlah thlap a, school naupang ţhenkhat hian an star tih ka hre reng. Min nel zual tu leh lerh hre ve ţan ho phei chuan, "Miss, i bialpa hi a chhe lo" nui kar kar chung hian an ti ţhin a, ka nuih liam mai zel. 

"Hruai i ngai dawn em?" bike a ţhu reng chunga a tih chuan, "Aih..bus in ka haw mai ang" ka ti ve mai a, bike a tih nun vut vut tawh hnuah "Lokal teh" tih pahin min han hui leh rih a, "Eng nge a?" ka ti ha a, ka pan hnai ta tho a. Min lo kuah a, ka beng bul tê ah hian, "Mipa dang lam hawiin i hnar pawh len suh ang che" a ti leh mauh mai. Ner nang chungin amah chu ka en a, "Covid hunlai lahin mipa dang lam hawiin khuh bawrh bawrh zel rawh min tia, tunah lah i phal lo leh bur a, i hahthlak, kal tawh mai teh" ka tih nang nang lai chuan a lo kiai suk a, "Min hriatchian kha" tih bak a sawi tawh lo. A thikthu a chhe ve em a ni. 

 Min kalsan hnuah pawh ka dinna ngaiah ka la ding reng a, hmangaih viau mah ila kawp reng hi a ţha angem tih thlengin ka ngaihtuah ţhin. Ka ţhen chuan ka na dawn a, ka ţhen loh chuan nakin zelah natna nasa zawk min thlen sak ka hlau tho bawk si. Nun hi a hahthlak a ni. 

"Vani chu" tih ri ka hriatna lam chu ka hawi a, Dino nen kan inhmachhawn ran mai. 

"Eng nge i lo tih?" nui lui chunga tih pahin a hnung lam ka thlek a, "Ka fanu ka rawn thlah" tih sup pahin ani pawh chuan hnunglam a hawi zauh a, "A la na em?" ka tih chuan lu thin vut pahin, "A zia tawh" a lo ti leh sup a, han inhmuh takah chuan rilru in nunhlui a chhui kir nghal rauh rauh mai. 

CONT...