BLACK AND WHITE-2

BLACK AND WHITE-2

"I hmanhmawh tawh em? In biak lawkna hun i nei em?" lai deuh a a kut phar uk chunga a tih chuan ka lo nui hak a, "Nidang aiin ka hma a, tlai mah ila nang te chu ka be hman reng che alawm" ka ti fiamthu a, tawitein a nui a, a nui hmel chuan a mit a thleng lo chiang hle. 

Gate bula ţhutthleng an dawhah chuan kan ţhu dun a, thawk hluai pah hian a lam ka hawi a, inhmu khat viau mah ila a lo la danglam lo hle. A sam kir chu a ţuak pheuh pheuh a, mahse tunlai mi chuan nalh kan ti tawh zawk. Ka nu enkawl tu ber doctor a ni a, kan inhre ţhain a nun buai ve tak pawh hi ka hriat pui ve nual mai. A nupuiin a boralsan a, kum3 lai a liam tawh nain a la na reng niin ka hria. 

"I nu a ţha zel em?" ti a min zawh chuan, "Aw..ţha ve zel e. I tello chuan kan awm thei tak tak lo a nih hi. Ka nu damlo hlek se ka naute pawhin Dr. Dino an ti zel a" nui sang chung hian ka ti a, a nui hmel ka hmu ve leh tak nain a lem ka ti tlat. 

"I lokal ve tawh ngai lo a, i pa a nih loh leh i naute an ni zel a" vui awka zeta a tih chuan, "Nia, Aizawl ah te ka awm a, ka lo haw hnu lawkah hemi school ah hian hna ka hmu leh bawk sia, ka naute an rintlak ve tawh a, ka indah awl ve deuh mawle" ka ti niah niah a, pa ţawngtam lem lo tak a ni a, sawi tur kan van dun viau mai. 

"I reh vang vang hnu kha chuan i ngaihawm ka lo ti khawp a sin" a ti ban charh a, a ţawng zawi hle bawk. A sawi awmzia hrechiang viau mah ila, "Nang chu kan hmuh ngun che chuan kan hrisello tihna a nia, kan hmuh khat che hian a ngaihţhat thlak zawk" ka lo ti vat a, ka nui hak hak nain ka nuih a za hlawl lo. 

"Biak pawh ngaihna che ka hre tawh lo a, i phone number min pe leh phal em?" inthlahrun hmel zet a a tih chuan, "Ka phone ka ti bo daih alawm...ka pe phal lutuk che" ka ti a, ka nute pawh a dil thei reng a, a ngam chiah lo a nih ka ring. 

A phone min pek rualin ka number ka lo chhu kai vat a, bell a ri zui tlang tlang bawk. 

"Kal tawh rawh..miss ber i awm loh chuan naupang ho an lo hawihai ange" a ti a, a kut fai leh nalh zet mai chuan a phone chu a hum vang vang a, kan inhmuh hmasak ber ah pawh a kut nalh zia ka hrilh tawh nghe nghe. Ka la â ve bawk nen, a nuih ka ti za viau a nih kha. 

"Hunawl remchang i neih veleh i lo la leng dawn nia" tih leh thawh ka rual a, ani pawh a ding ve nghal a. 

"I phal phawt chuan ka lo leng ngei ang" a ti a, kan inthlah fel hnuah a car lam a pan a, ka nu ka awmpui ţumin kan inhmu a, ka nu natna ang nei ho enkawl tu bik a ni. Ka la naupang a, Tintin-a nen kan inţhen lai a ni bawk. Dr. Dino nen kan inkar pawh hi tu hnenah mah ka sawi chhuak lo. 

In a kan awm laia ka nu a buai thut takin tiin a phone number ka dil a, ka phone number a la ve bawk a, min lo be zeuh zeuh a, Tintin-a ka ţhen lai, ka khawhar zual lai a lo ni bawk nen ka chhang let ve zel a, kei aiin a u fe nain a chhe lo a, a fai veng bawk si, zantin kan inbia a, ka duh ve hman ţep nghe nghe a ni. Mahse, ka nu vanga damdawiin a ka kal ţum bawkin nupui a lo nei reng tih ka hrechhuak a, canteen ah damdawi ka lei laiin an lo sawi a, 'Nupui chu la nei lo se ka star ngawt ang' tih vel an sawi lai khan ka lo nghing ve dawt a, mi pa ka lo be char char ţhin tih ka hriat khan ka zak a, hrehawm ka tiin ka inthiam lo takzet a ni. 

Amah ka zawt a, ţha deuhin nupui nei lai a nih thu min hrilh a, min be tawh lo tur a ka tih pawhin a sawi buai lo, min be lo hmak a, keipawh Tintin-a nen bawk kan ni zui lehnghal a, kan inbe nasain min duat thiam bawk nen, ka kianga Tintin-a a awm leh hnuah pawh rei tak chhung chu a rukin ka na a, ka ngai veng veng zel. A nupui thih thu ka hriat pawh khan hnem duh viau mah ila ka insum tlat a, ka hel ngat ngat a, ka hmu lo hlen dawn emaw ka tih laiin tunah tum loh deuhin ka hmu leh a, ka rilru put hmang erawh a danglam tawh thung. 

"Tunlai chu he hla hi ka duh bur..min fan veng veng zel" break lai chuan ka rilru hria ni awm takin Hluhlu-in di hlui tih hla kha zawi tein a play a, U Dino khan ka rilru a la peng lo a, ka bialpa hi ka hmangaih a, sual viau mah se ka thlah thei lo, mahse, chuti ang a nih rual chuan rei tak hnua kan inhmu leh thut khan min ţhawng a, ka lungphu pawh hi a la dik hlei thei lo. A tirah khan khawhar hnemah ka bia a, a hnuah Tintin-a ka thlah theih nan tiin ka be leh a, nupui nei lai lo ni lo se chu ka ngaizawng nghet hman viau maithei a ni. 

"Di hlui ngaih tur nei lem lo mah ila he hla hi chuan min ti na vek thei" Mely in a tih ve chuan ka lo nuih var var a, ka ţhian hlui ten min hlat daih bawk si, anni pahnih hi awm lo se chu hrehawm ka ti lehzual viau ang le. 

School banah dawrah ka kawi a, Tintin-a awm leh awm loh ka hriat duh vang a ni pakhat. A lo awm ngei a, hmeichhia pawh an awm nual. An lo nui dar dar chu ka luh rualin a tawp hmak a, hmeichhe zinga pakhat chu ka hrechiang a ni. 

"Nuih zawm leh rawh u" tih ngat pahin ka bag ka dah a, ka bialpa chuan min lo pan nghal vat a, "Nu ber a lo haw a in tim deuh a ni maw?" nuihza hmel pu tak chung hian a ti a, ka dar ah min kuah zui zat bawk. 

"Madik, engtikah nge i lokal?" ka ti leh ngat a, Madiki chiah chu ka en bawk. 

Zam hmel pu hauh lo a min lo en letin, "Vawiinah ka lokal a, ka nutei te bulah ka awm rih ang" a ti a, Aizawl a kan awm laiin Tintin-a nen boruak an nei ve a, Madiki lah hian duh tak tein a duh a, a atchilh a ni ber. Kolasib a kan awm vek hnuah pawh a lokal reng mai. Laltinkhuma lah hian a khawi ngam zel bawk si, thik viau mah ila an awmdun lai ka man chat ngai loh avangin tih vak ngaihna a awm lo.

"I chhungte hian an chawm zo khawp che aniang i hman emai, i duh hun hunah i zin thei a" ka tih leh chuan Tintin-a zawkin ka dar a rawn hmer salh a, tawp turin min duh tih hre mah ila henu hi chu ka ngaithei ţhak lo. 

"Private school a thawhna tur te chu ka hmu ve ţeuh alawm...ka thawk peih lo, hlawh a tlem emai" a ti a, a awki a min elsenna lang chhuak chu tuman an hriat hmaih ka ring lo. 

"Thawh loh tawp ai chuan hlawh tlem te neih pawh a ţha hrim hrim. Lo nui zawm leh rawh u, keichu ka kal dawn" tih leh ka bag lak ka rual a, Tintin-an min chhuhsak rang hle thung.

"Awm ve rih rawh..kan haw rual dawn nia" a ti ve ngial nain bag chu ka chhuhsak a, "Ka awm ve reng hman lo. Haw ila nuam in ti zawk ang" thinrim ru tak, vin hauh si lo hian ka ti a, Tintin-a erawh a ngaihdan a ni vak lo tih a hmelah a lang reng mai. 

"Haw a ngai lo ka tih chu" ka ti ram hmuk a, ka ngai pawimawh lo nasa, ka hlau eih lo bawk.

"I thu lo emai, ka haw dawn. Min lo zui suh ang che" tih leh dawr aţanga chhuah ka rual a, kal chak viau mah ila thui pawh ka kal hman lo, ka banrekah rawn manin hneh sawh zet hian min pawt her sawk a, ka inpal khut khut mai.

"Hrep tak che hian..eng nge i hriat a?" a ti vin hrawk a, a mitmeng rum zet a en ran chung hian, "I dawr hi mi awm ţha duh lo ho nawm sip bawlna a nih hi. Ka rawn luh rualin hmeichhe ho in beer an thukru sap sap a, Madiki lah hi i hnar thei thlawt lo, inkawp nghet law law rawh u" ka ti hlak hlak a, hmai zangthal haw in ka en a, za lo zet a a nui hawk te chuan ka thin a ti rim tial tial emaw tih mai tur a ni. 

"Hmeichhe dang ka duh lo tih vawi engzat nge sawi ngai dawn a? Kan inbiak apiangin ka hrilh che a ni lawm ni?" ka dar a min sawi nawk chung hian a ti a, khua a la thim bawk si lo, kawng kal ho in min en duh khawp mai. 

"Min thlah teh..hetiang chuan mi en nawm kan siam sak a ni ringawt" dam deuh zawkin ti mah ila, "I cho chhuah a nih hi" a ti bung nghut a, "Ka haw duh ka ti mai alawm. I thik ngawih ngawih mipa hi khawi ngam ve ta ila engtin nge i tih ang? Sangzela hi i hmuh laiin ka kuah ve thuak thuak dawn mi?" ti a a mipa thik ber ţhin hming ka sawi chuan ner sawk chungin thip zetin min melh a, a thinrim takzet tih hriat zetin a inseh ruh ţeuh a, ka dar lah chu a hmer na sâwtin a bek pawng ţalh ţalh pawh chu ka hmuh hmaih lo. 

"Kha mihring kha sawichhuak tawh hlek suh" thinrim insum tih hriat taka thawk hawk pah hian a ti hluk a, "Nangpawn i dawrah hmeichhe hran hran i khawi a, ka tih theih loh bik i ring em ni?" ka ti a, Madiki ringawt rilruah a awm a, ka ipik hluah hluah a ni ber. 

"Lokal rawh...va hnawt haw vek rawh" ka dar a vawnna a thlah rualin ka banrekah na zetin a hmer a, dawr lamah min hnuk dawr dawr mai. Ţang nasa viau mah ila awmzia a awm lo. 

"Ding teh Laltinkhum" hmeichhe aw fiak ţhakin vin zet a a rawn tih chuan rin loh deuhin a ding ve mial a, kan awmna lam panin Daizaui a rawn tlan dawr dawr mai. 

"A duh lo chung engatinge khatia i hnuh dawr dawr a?" tih pahin a awmah a beng chawrh a, a hlau lo khawp mai. 

"Lo inrawlh ve lo mai teh" Tintin-an a tih pawh chuan, "Vani hi i ţhen thei lo a nih chuan nangmah kha insiamţha mai rawh" a ti a, a phal lo chung Daizaui chuan min kalsan pui a, an in a awm ţhin, unaunu ang chiaha a en a ni bawk a buaina a siam zui lo. Kan kal ta chu, "Zanah ka rawn kal dawn a nia" tiin min au zui a, ka hawi let eih lo. Madiki ka hmuh tawh hi chuan ka thin a rim et et zel a, i thik pawh min ti se ka pha lo ang. 

"Kan Tinkhuma han hahthlak zia em em hi chu, a thinrim lah hian tu hmai eng mah a zah tawh ngai lo. Ran ang deuh hian a til te hi la ve se a dawih deuh ang. Ruihhlo duh lutuk ho hlir a kawm bawk si" a ti hlak hlak a, rilru lam chiangkuan loh sa nen, thil ni lo lo ka ngaihtuah leh chiam tawh. 

"Madiki hi a lokal sek a, boruak an lo neih ve tawh ţhin avang khan ka hmu thut kha ka thin a rim a" ka tih chuan, "I hmuh rual khan kek nghal buan buan mai ta che. Tintin-a tak pawh hian hnar ngaihna a hre tawh lo chu a nih hi. Hmeichhe nasa tawh vek vek chu hlauhawm deuh a sin an nih" a ti tan tan a, ka pawm zawng tak a ni. 

Daizaui hi a hming tak chu Daisy a ni a, hmun hran hran a an hmuh ţhin avangin Daizaui tiin an chhaih fiam ţhin a, a pu hlen ta daih a, a fahrah ve reuh em avangin Tintin-a te hian an awmpui ţhin a, a rilru a awm apiang sawi chhuak phawng phawng chi a ni. Hmeichhe nasa ti a sawi a ni ţhin a, chuti chung chuan dawr te an siam lai pawhin a ti ti ngaithla chakin tlangval ho an ţhu khat vek ţhin. Pasal a nei thut a, a pasal lah inhlawh chawp ve mai a lo ni bawk nen, eng eng emaw a zuar kual reng a, a hralh thei phian zel. A nulat lai ai khan nu a nih hnua a ti ti hi mipa in an lawm lehzual a, inleng neih loh lai an nei ngai mang lo. 

"A insiamţha duh lo a nih chuan ngaihzawng neihsan chhin la, a inchhir ram ram mai ang. A tuar tu zawkah ţang reng lo la, midang nei la, i hlut zia a hre mai ang" tiin min fuih ve ngei a, kan venga awm tho an nih avangin kan veng thleng kan inzui a, kan in awmna lama pen san ka tum chiah chu, "Ding lawk teh" a ti leh rih a, rin ang ngei ngeiin a bag aţangin cream a phawrh ţeuh mai. 

"Pakhat tal min dawr ve rawh, pawisa i neih rih loh leh i ba dawn nia. Hralh zawh hrim hrim ka duh sia, vawi hnih pekah te i hmang ang a" a ti a, "Keipawn ka hmang a, karkhat vel ka hman hnuah kan pa phei chuan i eng nghal uarh mai min ti alawm. A ţha lutuk ringawt" tiin a han fak leh rih a, a hmel ka en a, nisa hnuaia a vah kual vang nge ka hmuh dan a ngai reng mai. 

"Shikhar leh cigarette vel kha i zuar tawh lo mi? Acid leh pickle te?" a thil zawrh lai lak paha ka tih chuan, "Aw...zuar leh tawh lo. Thil ngai hlir zawrh chu miin hne lo mah se keimah hian ka hne a, kan pa phei chuan, 'zawrh loh pawh i nei tawh lo. Zu pawh i zuar ţep tawh ang' min ti alawm. Zu tih loh chu ka zuar kim vek tawh" nui har har chung hian a ti a, min bel luih deuh tlat avangin pakhat chu ka dawr ve a, "Tikhan ka chhanchhuah man che a ni mai. Tintin-a leh Sensiari bik hi chuan an thisen zawmpui ang mai hian min en a, ka thu an hnial ngam lo. Hauh an ngaih chuan min hrilh la, ka lo hau ang a, kan indawr zel bawk anga tiraw?" a tih chuan ka nui tawp. 

"Tehreng mai..fa i neih meuh chuan kha i tete pawh a lian sawt alawm" tiin ka fiam zauh a, "Lian ang chu...kan pa in ka peih lo chung khawih luih a tum phei chuan hnung lamah ka bat liam daih zel. A chang leh ka suih par a, ka fapa hian a hne zawr hneh khawp" uar fahran hian a ti a, hei hi a nia kan khaw tlangval ho pawn a ti ti ngaihthlak an chak nachhan chu.

"Tinkhuma kha a sual chuan lo sawi zel rawh" tiin a kal dawnah min chah thlap a, min kalsan chiah chu boruak a uap leh nghal churh mai. 

Inchhung ka lut chu tum loh deuhin ka putea ka hmu thut a, ka ding chawt a, ka hamhaih letling zawk. Ka nu nen ţhudunin an ti ti muk hmel khawp lehnghal. 

"I putea hi zanin chu hetah a riak dawn a, i hman hunah mikhual pindan kha ti fai rawh aw" ka nu'n a lo ti dam thliam a, ka tenna a reh theih thlawt loh avangin ka putea chu mit sir pawhin ka melh nawn lo. 

"Kan in a chep tehreng nen, kan unau pawh kan leng ţawk a nia, mikhual neih hi ka peih lem lo a sin" pindan lam pan pah a ka tih chuan, "Aizawl a lehkha i zir chhung zawnga buaipui tu che an nih hi. An lo zin chuan sawi ngai lo a buaipui zung zung tur zawk i nih kha" min ti a, thinrim ţeuhin pindanah ka lut a, ka putea ka hmuh hi chuan mangchhia mang ang mai ka ni ţhin. Hmanah kha chuan mualpho huam a police hnen a kal mai te ka duh rum rum ţhin a, mahse ka nu damlohna bawk hian min dang leh ţhin. 

Inbual tumin ka chhuak leh a, bathroom ka thlen hma hmain ka nu bawkin, "Ti zung zung la mikhual pindan chu ti fai rawh aw" a lo ti leh a, ka lu ka bu zauh ringawt a, ka chhang buai peih tawh lo. Ka inbual zo ka chhuah leh chuan ka putea chiah a lo awm tawh a, zawh hranpa pawh ngai lovin, "Vawksa rep lei turin i nu a chhuak lawk" a lo ti ve tak nain hria ang pawn ka awm duh lo. 

Pindanah lutin kawngkhar ka khar bur a, Daizaui cream zawrh ngei mai ka inchulh malh malh lai chuan ka pindan kawngkhar a rawn inhawng a, ka khawng nghal awt mai. Thil pakhat chiah ngaihtuah a ka thinrim em avangin ka lo kalh theihnghilh pek a ni.

"Eng nge?" ram hmak hian ka ti a, kawngkaah a ding reng a, min en chik khawp mai. 

"Enge i duh ka tih chu?" vin zet a ka tih leh takah chuan, "Kan hnen a i awm lohna a rei tawh a, khua i ti har alawm. I nu hnenah engmah i la sawi lo a ni phawt ang a" tiin ngeiawm zet hian a nui a, ka ten lutuk chu ka lo ner nak mai.

"Min la ngaih ve vang em ni engmah i la sawi loh?" a ti leh vel a, ka ţawngchhuah loh chhan hrechiang viau mah se, "Ni nang aw" tih pahin ka nui hul hak a, thawmhnaw ka inbel thlap tawh tho a, zam anga lan ka duh bik lo. 

Sam khuih kengin ka ţhutna aţang chuan ka tho a, "Ka ngai hlawl lo che a, ka ten ngawih ngawih zawk che. Mahni thisen zawmpui ngei pawh it duh mihring i nih kha, thi daih mah la ka engahmah a thawk lo ang. Ka nu hi ka hmangaih a, nang aia a thih hmasak hlau lo ila chu police ah ka kal ang a, i mualpho nasa tawh ang" ka ti fak fak a, a nui hmel chu rapthlak ti zet hian ka lo en a, nelawmna hmuh tur a awm lo reng reng. 

"Mi thianghlim ang mai khan ţawng bik lo la, hmeichhe thianghlim i nih loh tawp kha" min tih chuan ka inpet ruh ţeuh tawh a, college ka chhuah dawn hnaihah a vawikhat nan Tintin-a nen sex kan hmang a, a kum a kum kan inzui hnuah chauh a ni. Ka putea hi ka nu te unau ah pawh naupang ber a ni a, a la upa lo a, an in a ka awm lai khan min vau bet reng chungin ka duh lo chung min mutpui lui ţhin. Ka lo thianghlim tawh bik loh avang khan min hmusit zui hle bawk.

"Thianghlim tawh lo mah ila hmeichhia ka nihna a bo chuang lo. Min umzui reng a nih chuan mi zawng zawng hriatah i nihna diktak hi ka pho lang khawp ang" thinrim zet a ka tih chuan, "I nu pawh maw?" tiin min lo cho let a, buk nghat pah hian, "Ka nu pawh" ka ti sap a, thawk ka lak halh hnuah, "Mihring chu thi tur vek alawm kan nih" pawisak neih loh hmel tak hian ka tih zawm leh a, ka nauten thawm an neih tak avangin ka putea chuan min chhuahsan a, kei erawh chu ngawi rengin ka dinna ngaiah ka ding char char a, thisen zawmpui ngei te chunga rilru bawlhhlawh lutuk an pu thei ţhin hi mak ka ti. Samkhuih ha chu ka kutin ka thai neuh neuh a, ka ipik lutuk chu ka thaw leh hak zel bawk a, ka bialpa nen kan inhau a, tunah lah ka mihring huat ber mai nen in khatah kan awmdun leh a, thih hi ka hlau a, dam reng ka chak chuang si lo, ka nun hi ka hne a ni ber e. 

"Au Mami, u Tinkhuma a lokal, pawnah a ding a lo chhuak lawk rawh se a ti" mikhual pindan ka tihfai laia ka nauin a tih chuan tawi khawmuang lovin ka chhuak a, inhau leh dawn tho mah ila tunah chuan ka hmuh duh ber a ni rih. Ka mak ve a sin....a awm ţha duh lo a, kan inhau reng chung hian ka ipik zual chang emaw, chhungkua leh thil danga buaina ka neih chuan a hnenah bawk hian ka thla a muang ber ţhin. 

Pawn a ka chhuak chu bike a ţhu reng chung hian min lo en run a, min chik hmel lehpek khawp mai. 

"Eng nge i lo tih?" ti a zawh pahin bike bulah ka ding a, ka awki a nem hran lo a, tunah tak chuan tupawn min hmu se pawi tihna ka nei lo. 

"An hau che mi?" a ti dam ve ruih a, duat hmel zetin ka biangah chuan a dawm a, ka kun daih chu a ngaithei lo aniang, "Min lo en teh" tih pahin min kuai dak a, min en chik lutuk chu a nuam lo ram ram mai. Ka nu hi ngaihtuah lo ila chuan engkim ka hrilh vek tawh ngei ang. 

"Min hrilh rawh...nangmah ti na tu che hi tih nat ve ka hreh lo" ka mit a en ran chung hian a ti zawi sup a, "Nangmah lo ti ta ila?" ka tih chuan a hmui a pet sawi zauh a, "I nat phal lo tu ber ka ni ang chu" a ti leh daih tawh. Thil awmdan engkim hrilh ila chu midang mitmei veng lo lekin a che leh ang a, ka nu'n a tawrh phah ka hlau a ni. 

"Lawn teh" hnunglam a thlek zauh paha a tih chuan, "Khawiah maw?" ka lo ti ha a, ka zawhna chu atthlak a ti deuh aniang a lo ner sawk mai. 

"Bike ah khan lawn rawh khitah kal lawk ang" a tih leh laiin ka nau bawk kha pawnah a lo chhuak a, "Mary, chocolate ka lei ţeuh a, ka theihnghilh daih. In ta tur a ni sia, i u hian min lampui lawk rawh se aw" a lo ti zung zung a, dawt sawi thiam apiang hi thi zel se chu hman hmanah khan Tintin-a hi kan chân tawh ang. 

"Kan ta tur vek maw...keichu dark ka ngaina lo ka tih kha aw" phur zeta ka nauin a tih chuan, "Ka hria..i ngainat chi deuh hlir ka lei" a lo ti leh var a, Mary chu a nui sang mai. Kal turin min ti a, ka tih ai zawng zawng a lo tih vek tur thu min hrilh bawk. 

Bike a ka lawn rualin ka kut pahnih a la a, a kawngah a suih bet zui zat a, "Vawt i ti em? Jacket hi i ha duh em?" a ti leh hnuhnawh a, "Aih..tuna ka hak lai hi a lum ţha lutuk" ka tih chuan a ngaih a ţha aniang a tlan chhuak a, a hla berah Diakkawn bak thleng lo ang ka ti ve tak nain vengthar lamah a tlan a, "Khawiah nge min kalpui dawn?" ka tih leh chuan, "Khuangpuilamah" a ti hem mai. 

"Chutiang em em ka duh lo..ding nghal rawh, a nih loh chuan ka zuangthla dawn a nia" ka tih rualin chak deuhin a tlan a, han zuanthlak ngamna chi ziazang a ni lo. Hmun reh ve deuh a a din rualin ka chhuk nghal a, "Ehe...i zuangthla daih tawh ang chu tih nak laiin, i lo la awm ve reng a ni maw?" helmet phelh pahin nuihza aw zet hian a ti a, ka thinrim leh hlau bawk si chu ka thaw ham ham a, bike hma eng leh thla eng tih loh chu eng dang pawh a awm lo. 

"Sawi tawh la" a ti leh a, bike ah a la ţhu reng a, kei erawh bike bulah ka ding teu mai.

"Nangmah hi ka ngei che" ka tih chuan thle bak chung hian min en a, "Madiki kha i thlah fel tawh mi? An inah chaw ei law law ta che" ka tih chuan, "Ehh..kan thikthu a chhe leh ţan dawn ni maw?" a ti a, nui chung hian a bula ka ding reng lai chu ka kawngah a kuah a, a lamah min pawt hnaiin ka chhip a fawp pah zauh bawk. 

"Hnar tak tak ţhin la chuan a rawn tlangnel tawh hauh lo ang. Nangmah ker kawr hian i hnar thei lo a nih hi" tiin thinrimna tur dang ka zawng a, ka thik der mai mai lo thung. 

"Khanu kha ka duh lo, ka sawi ngun tawh, hrereng tawh ang che" a ti nghut a, a awki pawh a chang khawp mai. 

"Kan duh miah loh hi tuman kan khawi ngam ngai lo. I insiamţha duh bawk si lo, i nundan hi a khamawm emai, inţhen mai ang" ka ti leh tawh a, ka chhipa a khabe nghah pah a a nui ri chu hre tho mah ila tum burin ka in inkuangkuah tlat tho. 

Kan ngawih vang vang hnuah, "Ka sawi chu i hria em?" ti nawn lehin ka inla hrang a, kan in en leh ran tawh. 

"Ka sawi kha i hre zawk em? Khanu kha ka duh lo, i hria maw?" a lo ti let khauh a, "Midang hmuh tura kan thlalak i dah chhuah apiangin 'thihnain min ţhen hma loh chuan' i ti ziah. Kan la thi lo ve ve a, kan tan chuan inţhen a zahthlak tawh zawk. Bakah a chi loh" tiin fiamthu ah bawk a kai lut leh a, min rawn enin a nui suk suk reng mai. 

"Inţhen ka sawi apiangin fiamthuah lak tum ve ziah suh. Hetiang inlaichinna awmze nei lo lutuk a inham tang reng rual ka ni tawh lo" ka tih rual deuh thaw chuan, "Min ring rawh..banga inham tan ai chuan a nuam zawk daih ang" ngaihsam fe hian a lo ti a, rum zetin ka melh a, chubak tih theih ka nei lo. 

"Inţhen hi sawi ziah suh, depression ka nei nghal zel" nuihza aw zet a tih pahin a lamah bawk dim tein min hnuk hnai leh a, ka dara a kuah rualin ka chalah a fawp vang vang a, bike a tluk daih hlauin ka ţang ţung mai. 

"Haw tawh ang, ka nu a lo thinrim ang" tih paha chet mai ka tum chu min kuah betin, "Ka sawi i hria tiraw? Khanu kha ka duh lo, sawm loh inleng a nih ber kha. I hre tawh tiraw?" ngenngawl zet hian a ti a, ka buaina a la thutak ve ta niin a lang. 

"Thik awm ngawih ngawih hi an awm ve a" ban charh a ka tih chuan, "Ka tana hmeichhe awmchhun i nih hi" a lo ti leh hmak a, chhan ngaihna pawh ka hre veleh tawh lo. Ka hmuiah duhthaw zetin a fawp a, ka lo dawh mawl ve tawp. Ka hmui chu nawr kauin a lei chu ka kâ chhungah a rawn hawl lut a, a jacket a pawt ţang chungin ka chhanglet ve ta hram a, ka hmui hnuailam a fawh dek dek hnuah muang ruihin min fawhna chu a ti tawp a, ka thaw zui ham ham mai. 

"Khanu nen khan sawi in kai a nih vaih chuan ka hnaih leh tawh ngai lo ang che" chang zet a tih pahin bike ah bawk ka lawn leh a, "Sawi tawh suh..min kuah hle hle la nih chu" a lo ti sam et a, a hnar nasa ţhin tih hre mah ila Madiki hi chuan hmeichhe dang tih ngam loh zawng zawng a ti ngam vek a, en liam ngawt chi pawh a ni lo. 

"Tintin, lo ţhen lui tlat ta che ila engtin nge i awm ang?" a kawngah ka kuah a, a dara ka khabe ka nghah rual chuan min rawn melh zawk a, reilote tak tak chauh a ni. 

"Ka thih hma deuh a min chhanchhuah hman ngei ngeina tur hmunah inawhhlum ka tum ang. Vanrami vang vek tih ziak lian pui ka awrh bawk ang a" a tih chuan ka nui hak a, ani pawh a nui ve tho tih a taksa che datah chuan ka hre thei. 

"Inawkhlum ve dawn pawh ni la thih hma a chhanchhuah hman ngei ngei i duh a ni maw?" ka tih chuan, "Ka thi ngam lo..ka la thi phal lo" a ti a, ka hrethiam lo khawp mai. 

"Eng nge i sawi awmzia chu?" ka tih leh chuan, "Vanramah kal ngei ngei dawn pawh ni ila ka thi phal chuang lo ang" a ti leh a, "Engvangin maw? Vanram chu a nuam dawn a sin, Pathian hnaih ve tawh rawh aw, tuna i awmdan hi a ţha lo a nia" zaidam tak hian ka ti a, siamţhat tumin ka bei nasa a, ka la hlawhchham zel rih chu a nih hi. 

"Vanram chu a nuam ang..mahse, leiah vanram ka nei a, ka thih san phal lo che. Thih hnu piah lama vanram a awm ai chuan Lei Vanrami bula awm nuam ka ti zawk" a ti a, ka lo chek tlak mai.

"Lei Vanrami min ti ve ziah suh" vin hlaka ka tih chuan, "Ka lei Vanrami alawm i nih, vanram tak tak aiin ka thlahlel daih zawk" a lo ti leh a, "Bialpa dang nei ta ila" ka tih leh chuan, "In pahnihin ka bin let tawp ang che u" a ti fiamthu a, tum bura kal kha kan nui dun leh thei tawh a, hetiang hi kan ni mai, inhau ngun ber leh inţhen thei lo ber kan ni maithei a ni. 

A kawnga la kuah reng chungin ka ţhu ngil a, thli thaw chuan ka hmai a chhem hik vek tawh. Khua a vawt viau nain zan boruak chu a nuam khawp mai. 

"Nih leh ka duh lo chung mipa dangin min khawih lui ta se, min mutpui lui ta se engtin nge i tih ang?" ring leng lawnga ka tih rual chuan a ding chawt a, ka bu dawrh a, helmet ah ka intauh bur mai. 

"A na alawm" ka chal tuai vut vut paha ka tih chuan, "An khawih che mi?" rawn leh hawi meuh chung hian a ti ram hmuk a, ka chhang let lo chu ngaithei lo zet hian, "An khawih che mi ka tih chu" vin zet hian a ti leh a, ţawng tuma ka an zuau lai chuan, "Nichin a i hlim loh chhan kha a ni em?" a ti a, zawhna a ngah takzet a ni. 

"Min khawih ka ti hleinem...min khawih ta se ka ti mai alawm" ka tih chuan, "Ka that ang...ka that chiang khawp ang" chang zet hian a ti ta mai a, a fiamthu tawh hauh lo bawk. 

"Tuman min khawih lo..kal mai mai teh" a dar a nam paha ka tih chuan, "An khawih che chuan min hrilh ang che" a ti leh nghut a, ka pahrawn chungchang chu a hria a, min khawih hlauin min veng ve nasa viau zel, he a mizia vang hi a nia engmah ka hrilh duh loh nachhan chu. 

A insawi ba ting tang tawh si a, ka naute chocolate tur kan lei kawi zawk tih loh chu kan ding tawh lo. Bike ri an hriat rual rualin ka nu leh ka putea an lo chhuak a, "Chaw ei dawn dawnah khawiah nge i chhuah daih a?" lo tiin ka nu chu a lungawi loh hmel khawp mai. 

"Mary te chocolate ka pek tur ka theihnghilh a, min han lampui lawk a" Tintin-an a lo tih chuan, "Nang kha ka zawt lo che" ka nu chuan a ti hmak a, keichu min rawn enin, "Lo lut nghal rawh" tih leh luh a rual a, "Trunchbull mai pawh ni lo Miss Trunchbull ultra pro max a nih kha" uang zet a a tih hnuah, "Lut rawh" a ti leh tawp a, ka hnungah na vak lo in a nam a, Aizawl a kan awm laia kan inhmuh fo avangin ka putea nen pawh hian an inhria. Tintin-an a be miah lo nain ka putea zawk chuan a lo bia a, ţha deuhin a chhang ve mai a, min khawih ţhin tu ber a ni tih chu hria se a sawi ang khan a that duh tak tak maithei a ni. 

Ka lut duh lawk lo a, ka putea luh ve hnuah, "Khawimaw i phone han phawrh teh" ka ti leh hnuhnawh a, zan a lenpuia sawm tu an awm leh tawh ka rin vang a ni. 

A phone chu phawrhin min pe a, rin ang ngei ngeiin Madiki message pawh a awm vang alawm. 

"Hetiang mai mai block sak tur khawp che hian ka te lo a, ka block lo ang. I biak leh biak loh chu i thu ni rawh se, nuam i tih phawt chuan i be dawn nia" ka tih chuan a ngawi reng a, a dang ka en kual a, a group ngainat ber puanchhe zawrhna group pawh a lun leh viau tawh. 

"Zanah i lo leng dawn em?" ka tih leh chuan, "I nu kha a den e...nichin pawh khan min melh rawl vek. Sawmtea te inah ka kal maithei, ka lo hrilh ang che" a phone lak let pah hian a ti a, "Aw..kal rawh a pawi lo. Len pangngai chuan leng rawh, mahse, rui lo la, insual buai naah tel suh ang che. I ţhiante an lo sawisa a nih pawhin tel ve reng reng suh ang che" tiin ka chah thlap a, bike a tlan fua fua te an ching a, mi kal zen zen lohna hmunah te kalin a ţhiante cho chhuah insual buai naah a tel ve fo ţhin. A sim ve viau tawh chung hian zeuh a la awm ţhin. 

"Yes boss, chaw ei tui aw" a lo ti nghal zat a, inchhung a ka lut chu ka chhungten min lo en ţhap mai. 

"Kawrlum kan hak thuah lawk" tih leh pindana luh ka rual a, Mary a lo lut ve nghal bawk. 

"In kal hlan khan ka putea leh ka nu ten U Tinkhuma an rel char char a, ka khawngaih reuh tak tak a ni. Ka putea phei chuan an inkawp reng ai chuan Aizawlah kan hnen a awm turin ka hruai leh daih mai ang a tia" a rawn ti sar sar a, ka nui ve tak nain thinrim vanga nui ka ni mah zawk. 

"An thu lo emai...ka putea te hnen a awm leh ai chuan thih pawh ka duh zawk" ka ti ve kher a, "Ka nu pawn hruai rawh a ti tho alawm" a lo ti leh a, kei ai mahin a hlauthawng zawk niin a lang. 

"Ka duh lo chung chu min hruai ngawt thei bik hleinem. Tintin-a chu engtin nge an sawi?" ka ti ţha leh a, "A tam mai...a sual zia vel an sawi a, inkawp lo ula an duh a, chuan nichin a in kal hnu lawk khan u Tinkhuma te inah chuan lehkha pawimawh dahin ka kal a, hmana i kawm ţhin ho kha an lo awm vek, chaw an eikhawm dawn aniang. Ka bia a, mahse tuman min chhang lo a" a tih chuan phone ka en nghal a, Sensiari piancham a ni tak alawm. Mi status en nachang ka lo hre lehpek lo a, Tintin-a lah khan engmah a sawi bawk si lo. Kan awmdan a hre vek a, min sawm ve bawk si lo, ka hriat chuan ka rilru nat a hlau a nih ka ring ta ber. 

"An sawm ve lo che mi?" ka nau bawkin a lo tih leh chuan nui lui chung hian, "Sawm e..ka lokal lo mai ang ka tia" tiin dawt ka hrilh a, rilru erawh a na veng veng mai. 

"Kan in nel tehreng nen ka biak pawn min chhang duh si lo a mak ka ti deuh a, Au Mami, ka pa kha i ngai ve ţhin em?" a ti ta daih a, ka khum bulah hian ka pa nen a kan thlalak ka tar a, chu chu a en pah vang vang mai. 

"Ngai e..mahse tih theih engmah kan nei tawh lo a, ka pawm thiam tawh" ka tih chuan, "Tunlai chu ka mumangah ka hmu reng zel a, ka ngai tak tak a ni. Min ngaihtuah ve a nih ka ring" a ti a, ka sawi thui pui duh lem lo. 

Chaw ei lai pawhin ka nu chuan, "Mi hausa fa awm ţha duh lo lutuk i kawp reng chuan i tawpna a hlimawm loh viau ang. Aizawl a a awmdan pawh i putea hian min hrilh fo a, thlah hmak rawh" a ti leh tawh a, ka chhang let lo a, a thusawi chu zawm ka tum lem lo bawk. Ka putean an hnen a awm tur a min duh nachhan chiang takin ka hre bawk. 

"Ni e..nu leh paten min chawm thei tho ti ni awm tak hian an thawveng em em a, ruihhlo an duh hlawm si. Hetiang ho hi chu hnaih loh a him ber" ka putean a lo tih ve te chuan ka vawm chawrh loh nan ka insum hram hram a ni ber. 

Chaw eina vel kan tih fel hnu rei vak lo ah Sensiarin min lo call ve tehmial a, min rawn sawm leh hnuhnawh dawn em maw ni ti rilru niah niah chungin ka la a, "Vanrammuan" Sensiarin a rawn tih chu Nu Ruati mangang ţe teng tung riin a zui a, thil dang eng eng emaw a ri deuh bur bur bawk si, thil ţha lo a thleng a nih ringin ka tha a khur ti tih nghal der mai. 

"Eng nge thleng a?" ka tih chuan, "Awii...engmah ka hre thei lo pawnah kan chhuak lawk" a rawn ti leh a, thawm a awm zui leh a, a reh diak hnuah, "Ka u hi i fuihpawrh em ni?" min rawn ti nia mawle!

"Eng thilah?" hrethiam lo zet a ka tih chuan, "Tintin-a hi i fuihpawrh em ni? Vawiin ka piancham a nia, lawm tumin zing aţangin kan buai a, kan chawhmeh siam sa dawhkana kan dah zawng zawng a beng baw vek a, kan cake dahna dawhkan pawh a tlawh bur bur a, kan sawm ve loh vang chein i fuihpawrh tiraw? Nangma tih tir a ni em?" a rawn ti chiah chu sawi tur pawh ka hre lo, ka ţhianţhaber danglam ta thut hian chhan a nei ngei ang a, ka la hrechhuak bawk ang. Misual ber ang hialah min ngai tawh a nih ber hi. 

CONT...