BLACK AND WHITE-3

BLACK AND WHITE-3

"Min ringchhe hle mai. Vawiin hi i piancham a ni tih Mary sawi hmang aţangin ka hre chauh. Ka lo theihnghilh palh a ka inthiam lo lutuk zawk a, mahse, tunah chuan ka inthiam lo tawh lem lo" ka ti chu za lo deuha a nui riin a zui a, ţhiante nen a intih thiam loh hi ngaihzawng ţhen ai paw'n a hrehawm zawk daih maithei a ni. 

"Nuam deuh a hman ka tum a, zingkar hma tawkah kan bazar a, rawng kan bawl zui leh a, mawng pawh hung hman lo lekin kan che ve a, kan thil siam sa zawng zawng Tintin-an a paih darh vek a" awki pangngai deuh zawk hian a ti a, a ţawng tawp lamah phei chuan a hnuk a ulh deuh niin ka hria, hmeichhe awmchhun a nih bakah a tlum ber a ni a, rilru no riau chang a nei ţhin. 

"A rui em ni?" ka tih chuan, "Ruih loh lai a nei em ni?" tiin min lo zawt let a, a ţawng pawh a chang leh fak tawh. 

"Ka lo hau dawn nia" ka tih lahin, "A ţullo, ka chungah bawk a ţuan leh ang a, lo inrawlh ve lo mai teh" a ti leh ang lawi a, pindan tukverh ka hawn rualin ka thaw chhuak hluai a, thlang lam ka thlir a, an in a lang thei lo chiah chiah nain ka hawi thla reng tho. 

"Kan awmdan hi a naupangchhia i ti ve lo mi? School naupang kan ni tawh lo a, college kal lai pawh kan ni tawh lo. Puitling a chhiar theih kan nih ve tawh hi, hetiang mai mai chuan awm lo teh ang. Min huat nachhan hi ţha deuhin sawi la, tih dik loh ka neih chuan ka lo insiamţha ang" ka tih rual chuan kan ţhiannu tho Zuali aw ngeiin Sensiari a au lang lang ri chu ka hre zui zat bawk. 

"Chhuat kha ka lo nawt ang" ti a Zuali biakna a chhan let hnuah, "Ka ring ve ţhin che a sin le" min ti a, ka bo tulh tulh mai. 

"Ka rintlak loh i tihna maw?" ka tih chuan, "Ni e, i rintlak hlawl loh. I vui vai peih lutuk vangin ka piancham pawh ka hmang nuam dawn lo a nih hi. Ka mi rin ber i nih vang hrim hrimin ka rilru a na lehzual. I thu vai vir kual vel dan lah kha ka nu te hnenah pawh ka sawi ngam lo zawk, sawi ila chu an haw ngawt ang che" a ti phawng phawng mai. 

"Engtin nge thu ka vai vir a? In chhungkaw chungchang sawi ka nei reng reng hleinem" ka lo ti a, mi hi ka rel ngai mang lo a, chuvang tak chuan ka bang bo lehzual. 

"I hre vek zawk ang. Ka sawi peih tawh lo" tih leh phone dah a rual a, ka nu lahin min lo ko ve sek bawk nen, thin a rim hlur mai. Kawngkhar ka hawng huau a, min ko ri chu chiang takin a hriat theih vek. 

"Engati nge i koh theih reng reng loh a?" tih pahin pindanah a lo lut a, "Tu te pawh hian naupang ang maiin min ngai a, ka hne tawh lutuk, inluah tur chu hmu ila ka indang daih ang" ka ti pang pang a, khuma ka nu ţhu pawh chu ka melh peih lo. 

"I putea thusawi kha eng nge i ngaihdan? Aizawl a awm leh chu i duh em? Thiamna hi tuman min laksak thei lo a, ka zia deuh tawh tho bawk a zir zawm leh chu i chak lo em ni?" a ti dam thlap a, ka putea a ring leh lutuk hi thudik a hriat hunah meuh chuan amah ti na zual tu a ni chiang khawp ang. 

"Aizawl ah ka awm dawn lo a, ka naute pawh hi ka putea bula awm turin ka duh lo bawk. Tuna ka thawhna hmun hi nuam ka ti rih a, thu dang lo nei sek lo teh u" tukverh a bar inkham nghen ar ar pah hian ka ti a, thli thaw chuan pindan chhung boruak a ti vawt vur tawh. 

"Tintin-a" a tih leh rual chuan ka nu chu ka en ve ta nge nge a, "Tintin-a vang a ni lo. Keimah ka inhloh loh nan a hnial che ka nih hi. Min tir lui a, keimah leh keimah ka inhloh a nih chuan inchhir reng rengin damchhung hun i hmang mai ang" ka ti a, ka thusawi chu hriatthiam loh hmel deuh a min en pahin a puan bah lai chuan a intuam ţha sauh sauh a, "Aizawl a awm avanga mahni inhloh kher tur tihna em ni? MA i zir chhung zawng paw'n i awm a, pangngai deuhin i lo haw leh a" bangbo angreng taka a tih chuan, "Ka inhloh lek lek fo reng alawm. Min hmangaih chuan min tir lui miah suh" tih zawngin ka nu chu ka kar a, mi tenawm lutuk bulah hian ka awm tawh dawn lo reng reng. 

"Vani, Tintin-a te ang mipa hi siamţhat theih an ni ngai lo a nia aw. Tumna nei miah lo siamţhat tum chu beidawn lehzualna mai mai a ni. I tleirawl chhuahpui a nia, i duh zia pawh ka hria, mahse, amah vang hian i hma hun ti chhe suh" a tih hnuah vawt a ti deuh tawh aniang, min chhuahsan a, Aizawl a ka awm hreh chhan hi a unaupa, ka putea vang zawk a ni tih hria se chu min tir lui reng lo tawp ang mawle. 

Pawnah pawh chhuak tawh lem lovin pindanah ka tawm tlat a, khua a vawh deuh avangin chaw kan eikham chuan keini chhungkua chu kan mu nghal zel. Mely leh Hluhlu-i te nen thu ho mai mai sawi a kan inbiak lai chuan, 'I buai em?' tih ringawt hi number hlang aţangin ka dawng a, chhang let nghal mai lovin a dp chu ka en leh te te a, U Dino a ni tih ka hriat chuan ka khi sak mai. 

'Buai lo e...ka mu mai mai tawh' tiin ka chhang let a, a kum a kum kan inbiak loh hnua kan inbe leh nawlh chu a mak duh tak tak a ni, min ti danglam tawh lo thung. 

'I muhil duh tawh em?' a rawn tih leh lai chuan Tintin-an min lo call a, amah avang hian mipa fel tak tak ka hnawl ve nual tawh. Sual hlawm lian pui a ni chung hian ka thinlungin a thlang miau si a, châng dang ka kan hleithei lo a nih ber hi. 

Ka benga phone ka chuktuah ruala, "Eng buaina nge i siam leh tawh a?" ka tih chuan, "I mu hmelţha leh hmâwn tawh mi?" a rawn ti a, motor thawm a tam danah khawlaiah an awm leh tawh tih ka hre nghal chat thei. 

"Sensiari nen kan inbia a, an eitur siam sa paih buak sak kher a ngai em ni? En liam ve mai mai ta che. Keimah min huat belhchhah sauh dawn a sin" ka ti nang nang a, ka rizai kawr a pangpar lem chu ka thai pah neuh neuh a, min ti na fo mah se ka be lo phal chuang lo. 

"I ţawng ka hre thei lo" a lo tih chuan ka lo chek hlak a, "Phakar chhuah a hun lo, ka fiamthu lo bawk. Keimah min sawm ve loh avanga khatianga i chet khan nang aiin keimah min haw zawk" ka tih lai te chuan, "Hello" a lo ti zeuh zeuh a, ka thlavang a hauh nasa a, midangin min tih nat a hlau tih hrereng mah ila, "I thil tih khan min ti lawm lo a nia" ka ti leh ta tho a. 

"I ţawng ka hre thei lo" a tih leh chuan a hma aiin ka ţawng ring zual sauh a, ka lawm loh zia ka sawi chhung zawng chu ka ţawng hre thei miah lo angin a awm a, "I lo leng dawn em?" ka tih veleh, "I nu'n a phal a mi?" a rawn ti nghal zat tho si. 

"I hriat theih khawp kha a. I duh chuan lokal rawh pindanah ka awm" ka ti a, lokal dan tur chu kei aiin a hre daih zawk. Inhnuai a mu ka nih avangin ka pindan tukverh hi a sang lo a, bar awm ve bawk mah se a chanve thleng vel chauh a awh a, mipa tan chuan ka pindan a lo lawn luh a har lo. Ka nu a khirh zual lai phei chuan zanreiah tukverh ah hian a rawn lawn lut fo mai. Ka nu lah hian duh loh tak tein a duh lo a, amah vanga hauh ka tawrh ngun zia te hi hre duh se chuan insiamţhat phah nan a hmang ngei ang. 

"Reilote ka nghak anga ka lokal ang" a tih hnuah kan inbiakna chu kan ti tawp a, vawt hle mah se ka tho leh a, ka pindan kawngkhar chu uluk deuhin ka kalh a, ka hlau a, ka thla a muang hlawl lo bawk. Ka rilru kal ding lutuk tur a lakpen theih ringa ko ka ni. Ţhian ka kawm tam lo a, Tintin-a hi ka neihchhun ang a ni mai. Ka bialpa a nih mai bakah ka ţhian a ni bawk a, ka thlamuanpuiin huat chang ngah viau mah ila a tawpah chuan amah bawk hi ka be leh nge nge ţhin. 

U Dino-a phone number te chu chhinchhiah ve thlap mah ila ka chhang zui tawh lem lo va, rilrua a lan tawh loh chu thuhran, Tintin-a ka lo nghak deuh tawp a ni ber. Dar10 velah min lo call a, thawm a tam khawp mai. Mipa mangang rawl a nih avangin ka inbengkang uaih nghe nghe a, "Ka la hman lo" hah hmel zet a Tintin-an a rawn tih phei chuan hlauthawng tak ka ni tawh. 

"Eng nge thleng a? In insual em ni? Khaw nge in la awm?" ka ti hlawp hlawp a, aman a zir loh em avang hian ka hlauthawng hma zo vek tawh.

"Ka fel fai aw Vanram...hei bike a rawn tlan par par a, kan hmaah a accident thek mai" ngaihsam hmel zet a a lo tih takah chuan, "I va hah hmel si ve. An na lo em ni a?" ka lo ti leh a, "Hah tehreng mai, hmeichhia kha a rit em alawm. A hmeichhe phurh buaipui lo khan bike kha buaipui ila ka hah lo zawk ang mawle"  a ti a, a hlauhthawn hmel vak loh danah an na lem lo a nih ka ring.

"Engtia accident nge?" ka tih leh chuan, "Aa...i dilchhut. Ka lo thlen hunah ka hrilh ang che. Ka hman ţep aw" tih leh phone dah a rual a, ţîk pawh ka ti hman lo, a tawp chiang lutuk ringawt. 

Tukverh darthlalang a rik kauh rualin a êng zuai a, motor êngin a rawn chhun zuai ang mai a ni. Sana ka en a, dar10:30 chiah a ni bawk. Tukverh ka hawn rualin ka dak chhuak a, êngin min lo chhun pup rualin ka chhing sawk a, ka mit a vai zui ram ram mai. 

"Laltinkhum" zawi te, sehchilh zet si hian ka ti a, hriat pawh a hre pha lo vang. Inhnuaiah hian pindan a awm fur a, kan in hi a zauin inchung pawh nei ve bawk mah ila mu peih kan awm bar lo. Inchung hi kan sak na a la rei lo a, ka phur changin ka mu veleh zeuh zel tih lohah chuan kan chho ngai vak lo. Inhnuai a zauh em avangin kan thawl tho a, thawm erawh dim a ngai khawp mai. 

Ka kut a ka hui zauh hnuah tukverh hawng reng chung chuan khum lam ka pan a, a thawm chu ka ngaithla reng a, a rawn lawn luhna ber ţhin leihlawn lah ka pahrawnin "A hnawk" tiin a dah bo daih si a, a buai ve khawp ang. 

"Vanram" zawi angreng taka tih ri ka hriat rualin tukverh a bar inkham chu eng emaw hian a khawng ri bawl a, rang deuh a light ka on hnuah ka hawi phei nghal thuai a, emergency light lian pui hum chungin a lo in uai tang ţang mai. 

"Hei tal hi lo la teh" tih pahin emergency light chu a ti che zauh a, "Khawi a mi nge? Engatan nge i tih a? Hetiang te rawn ken reng reng fimkhur a ngaih nak laiin" ti hlak hlak chunga pan pheiin emergency light chu ka lak sak a, a rit em em mai lehnghal. 

"Sawmtea min ken tir a nih kha. Ka lo lam leh ang a tia, a rei leh sia ka lo hawn daih" pindan chhungah chuan lo lutin khum lam a pan a, hoodie dum lianpui a ha a, a phelh chiah chu ka ţe chhuak lo chauh a ni. Ka lungphu lah chu hlauhna in a ti rang leh vak tawh lehnghal.

"Eng nge i tih?" sehchilh zet hian ka ti a, au chhuah vak ka chak et et mai. Tawnzau var a hakah lah chuan thisen a kai nuan a, khum a ţhut pahin hoodie chu chhuatah a theh thla a, en chian chuan a kut a thisen kai pawh hmuh tur a awm thluah mai. 

"Ka fel fai i ti a ni lawm ni?" thinrim zet a ka tih chuan, "Thil ţha ka tih avanga i thinrim zel dawn chuan duh leh thinrim rawh" thawk chhuah hawk pah hian a ti a, a kut ka khawih lai chuan min en ran a, a insual lo tak tak a nih hmel. Tintin-a hian ţhat ve deuhna lai a nei a, thu zep a nei ngai mang lo a, pawn lama a khawsak dan hi zawh chuan min hrilh thlap thlap a, thinrim dawn mah ila dawt a sawi ngai mang lo. Ruihhlo ti lo tam tak aiin ka ring zawk a, miten an sawichhiat bawih bawih chang pawhin a lam ka ţang ve tlat ţhin. 

"I kut pem pawh a la dam chiang lo a, khawnge i tuamna kha? Enkawl ţha ve ta che Laltinkhum" tih hlak hlak pahin a kut phah kak lai chu dim deuhin ka khawih a, a la nasa angreng khawp mai.

"Tlaiah khan ka phelh. Accident ka buaipui na lamah a thi leh a nih hi" a ti mai a, rum zet a ka melh rual chuan a lo ner sawk a, tih vak ngaihna pawh a awm lo, "Dim deuhin ka chhuak ang a, first aid box ka va la ang. Thawm lo nei reng reng suh" tih leh thawh ka rual a, tun hma, tha za rual lek an nih lai phei kha chuan a hliam ka buaipui nasa ţhin a, a private nurse ang mai ka ni. 

"Mami" chhuar a first aid box ka ban laia ka dar  a ka putean a rawn khawih chuan ka khawng awt a, ka ţim nghal sung sung thei. 

"Eng nge i tih?" ka dar a vawnna kut chu a ti che a, ka hlauh luatah ka mittui a tling nghal vek aniang ka hmu phe ruai mai. Heti tak hian ka lo la hlau tih tunah ka hre chiah. 

"Ka inti pem a, damdawi ka zawng a nih hi" aw khur dar dar a ka tih chuan, "Khawimaw ka lo en? Khawi lai nge pem a?" dam thluam a tih pahin a kut chuan ka hnungzang a chul a, ka ţim sung sung a, nuam ka tih vang a ni hauh lo bawk. 

"Va mu tawh rawh" ka ti mawl tawp a, ka dawih aw chu a hria a ni chek ang a nui a, min din hnaih sawt hle bawk. Thawh lawk a au chiam mai ka duh a, mahse, hetiang hun hlauhawm ber ka tawh lai pawh hian ka nu leh a natna huatthlala zet mai hian min dang leh ţhin. 

"Ka mu dawn" ka che phut a, ka nek dawrh a, rang zet a first aid box ka lak hnuah ka pindan lam panin ka tlan a, ka luh rualin kawngkhar ka kalh sawk sawk a, ka thinphu rang lutuk leh ka tha khur nasa avang chuan chet pawh ka che lawk thei lo, kawngkhar chu nghengin ka ding ta reng a, first aid box ka pawm ran bawk. 

"Hlauh i nei mi?" ti a min zawh pahin Tintin-a a lo tho a, ka lam pana a lokal chu ka lo en ran a, ani pawhin min en chikin a ngaih a ţhat loh hmel takzet a ni. 

"Ka nu a lo tho a, bengchheng suh aw" ka tih chuan a mithmul a kân ralh a, ka thusawi chu a awih chiah lo a nih hmel. 

"I pa zawk a ni em?" a ti chiah reng a, ka putea hi chu rinhlelh nachang pawh a hre lo, chuti khawp a lemchang thiam chu a ni. 

"Tu pawh chu lo ni se bengchheng lo la a ni mai" ka tih lai chuan a lamah min pawt hnaiin min kuah zui nghal a, ka thla a muang huai nain ka tha khur chu a hriat loh nan ka inhumruh nasa hle. 

"I ţap a mi?" a tih chuan lu thin pahin a kawngah ka kuah a, rem lo zetin ka kut pakhatin first aid box chu ka la kuah bet ve tlat bawk. 

"Ka awih lo...eng nge thleng sawi rawh" a ti hmuk a, a ţawng pawh a changin thu min pe a ni ber. 

"Engmah" ka tih lai chuan ka mittui tlak leh tlak loh hriat tum ni awm takin ka mit bul vel te chu a chul kual a, ka lo thle sawn vat thung.

"I kut kha thisen rim a nam" ner nang a ka tih chuan, "Khawmaw i ţah leh ţah loh ka lo en" nuihza aw zet hian a ti a, "I ninawm" ka ti vin hlar a, ţang ve viau mah ila min kuai dâkin  chik zetin min en a, ka mittui tla a hmuh miau loh avangin, "Umm..i hmelţha" a ti nghat a, ka hmui ka lo tih pawrh lai chuan a ţhen sak a, a ngaih a ţha tawh niin a lang. 

"Ti vat vat ang..thisen rim kha ka ngaithei lo" tih paha inlakhran mai ka tum chu min lo dawm bet a, "Eng nge i la duh?" ti a amah ka en ha lai chuan ka hmuiah a rawn fawp a, ka chhang let ve lo chu a ngaithei lo a ni ngei ang, "Thisen rim pawh nam ila min chhang let tho rawh" a ti a, a hma aia duhthaw zawk hian min fawp leh a, keipawhin ka hmui chu ka chet ve, mahse, thawm ngaichangin ka beng ka chhi ru ran reng mai. 

"Duhtawk teh" in la hrang hmasa zawkah ţangin kan dinna piaha towel te inkhai chu ka ban nghal zat a, "Tui ka inchhawp tho a, chhuak kher lovin towel hi chu ka ti huh mai ang" ka ti zung zung a, khum a ţhut pahin ka che vel chu a mitin min chhui zui reng tih hre mah ila ka hre lo der ve tlat a, a tshirt ka kawl lai chu phawrh chhuakin a ţhutna lamah ka theh phei a, a hmai a khuh thawk rual chuan a nui chhuak ta hawk a. 

"Nui vak suh kan thawm an hria ang" tiin ka lo khap vat a, fimkhur deuhin towel pawh ka ti huh a, a bula ka ţhut rualin a kut chu ka pawt sawk a, "Na ka neih chuan min duat ve deuh la" nuihza aw lek lek a a tih chuan, "Duat tlak pawh i ni hleinem. I awmna apiangah buaina a awm a, fimkhur ve deuh ta che Laltinkhum, i kut pawh a dam hleihtheih miah loh hi. A tuamna i phelh chiah a, thisen a chhuak lehnghal a" ka ti hlak hlak a, ka putea vanga ka tha khur a hriat palh ka hlau a, a rilru lak pen nan ka vin lui ve deuh a ni pakhat. 

"Mi chu an damlohin Bawihte, Duatte, a na em? an ti nem duai duai a, kei ve chu na ka neih hlekin tupawn Laltinkhum in tia, ka nat poh leh ka chungah in thin a rim nasa" lungawi lo deuh hian a lo ti thum dut dut a, a kut hru a kun reng chung chuan ka ţhen sak a, ka nui hmel a hmuh palh ka hlau angreng hle. A thusawi lah hi a dik ve tho bawk si, tunhma aţang tawhin hliam nei chunga a haw chuan a chhungten an lo hau hrep a, kei lah chuti bawk, a hre ve ran reng a nih dawn hi. 

"In in a lo len ve dawn lahin kawngkhar pangngai aţanga luh pawh in phal lo, tukverh a lawn liam a ngai a, a vahin ka rawn vak lut a, a chang chuan mihring ni lovin ran ang lekah min ngai alawm" a ti leh vel a, a lungawi lo ve ngang aniang a nui duh ţhak lo.

"Phun phun lo khan dawh hle hle rawh" ka lo tih chuan, "Ka insil thuak tawh chung pawhin thisen ka lo la kai nual a nih hi" a kut rawn khawih ve pahin a ti ban charh a, "Hmeichhia kha a lu a thi nasa, buaipui hrep hnuah motor kan phar chawp a, ka pawm lut alawm, a rih a a rih zia chu tuman min pui bawk si lo, buhfai bag hnih ang vel aniang" a ti a, awih lo hmel deuha amah ka en lai chuan min lo nuih a, "Ka ti tak tak" a lo ti leh zauh a, sawi lang lo mah ila a ruk chuan ka chhuang ve tho, a tlawmngai a, buaipui ngai an awm hian a hmu thei lo, a tlanchhe ngai lo a, a theih ang angin a pui ţhin. 

"Mipa chu a na ve vak lo mi?" a lo bu nghat a, "Na vak lo..Sawmtea te hoin an buaipui a, keichuan hmeichhia kha ka buaipui" a ti leh mai a, a hlauhthawn loh danah a na lutuk lo a nih ka ring ve tawp. 

"Sensiari te chawhmeh chu engtin maw i tih?" ka tih chuan nuih za lo tih hriat zet hian a ţhen suk a, "Vanrami awm ve lohna hmun chu hremhmunah ka chantir zel ang ka tih kha" fiamthu a a tih chuan a kut na lai chu ka hmer vak a, a na ti chu a rum hrawk a, a in pet ruh nasa khawp mai. 

"Keimah min huat phah daih tih i hria em?" ka tih chuan, "Tlaiah chaw i ei puar em?" a lo ti leh daih a, bangbo deuh chung hian lu ka bu zauh a, chutah ngaihţhat hmel deuh hian, "Chu anni aiin i puar tho alawm. Anni chuan eitur an nei hleinem" a ti then a, sawi tur pawh ka hre ve leh tawh lo. 

"Eng ber nge sawi i tum?" ka tih chuan, "I puar chuan a tawk. Mi huat nih mai mai a ho, keimahni vanga chaw ei thei lo, luak bawrh bawrh khawpa an awm pawhin puar deuhin mu hmak ila a tawk mai" a ti a, ka ngawih reng takah chuan, "Huatna hian thil ţha engmah a hring chhuak lo, mahni inhremna mai mai. Tumah haw ve suh, haw let lo la, buaina an siam sak che anih chuan i hmaah ka ding zel ang. I huat ve chuan anmahni ang chiah i ni tihna. Min haw tute kan enliam theih chuan kan puitling thawkhat viau tihna a ni mai" thutak deuh zawk hian a ti duah a, a thusawi chu amah nen a inhmeh hlawl lo. 

"Nih leh ngati nge insual buai naah hian i tel leh zeuh ţhin?" ka tih chuan, "Huatna hi chu thluakah a lut a, kan hre reng zel. Kuttum hian thluak a nei ve hleinem. Vawihnih khat kan hnek bur a, kan haw zui lo a, puitling deuhin thluak nei lo kuttum hmangin kan ching fel mai" a tih laia ka lo ner nang nang lai chu ka khabe ah dawmin ka hmuiah dim lo deuhin min rawn fawp a, a inla hrang leh vat thung. 

A kut te ka tuam sak leh hnu chuan ani pawhin tshirt fai sa chu a ha a, khuma ka mut rualin ka bulah a lo mu ve a, "Muttui ka hlau riah i phal dawn si lo" a ti deuh tlat a, a ke pawh a hlang duh lo. 

Kan ngawih ren rawn hnuah, "Buaina i nei tiraw?" a ti chhuak phawng a, min en chik danah ka hmel landan a danglam leh danglam loh hriat a tum a nih hmel. Lu ka thin rual chuan min lo kuahin a awm si chetin min pawt hnai a, ka buaina hi hre ngat se chu a thin a rim khawp ang le. 

"Buaina ka nei lo" ka ti sap a, ngaihtuah hmel taka min en tu chu rei pawh en ve lovin inchung ka en ngar a, "I nun hi a thlahrang film e" a tih chuan ka nui hak mai. Min tih hlim nan chauh a sawi mah nise a dik lohna ka hre lo, tunah pawh ka putea nen kan inbihruksiak zak zak reng chu a nih hi. 

"Lei Vanram, pasal neih i duh tawh em?" tiin min zawt leh thawr tawh a, han thup mawi ve deuh a nei ngai bawk si lo, chhanna a beisei nghal zel bawk a, a mize tlang leh lutuk hi a ţhatna a awm rualin ţha lo tih chang ka ngah zawk. 

"Ka nu leh ka naute ka ngaihtuah rih, bakah ka la naupan em hi. Kum30 ka la hlat viau a nia aw" ka ti kha kha a, amah pawh ka en chuang lo. Kei aiin kum khat chiahin a upa a, innei ngat ila chu kan inţhen leh hma viau maithei a ni. Kan rilru a la puitling vak lo ve ve tlat a. 

"I ching mai tur a sin" a ti chiah chu ka melh rang khawp mai, "I mawl em ni? Kum30 pelh hnua pasal nei pawh an rai sup sup alawm. Min ţawng chhiat vel ange, sap leh vai milar te pawh kum upat hnuah pasal an nei a, an rai pawp pawp tho" ka tih lai chuan a lo nui suk suk a, "Rai lohna damdawi i ei reng a, kha khan a ti ching thei che. Fair lo deuh a in ngaihzawn ai chuan innei mai ang" a ti tlang leh hrak a, thawh ka tum chu rang zetin min lo pawt a, a ban min kham tirin min kuah mu lui a, "Mu chungin ka thutak thei lo ka tih ziah kha" tih paha thawh ka tum leh pawh chuan, "Mu hle hle rawh" a ti hmak a, ka che zui bik lo.

"Mi kan bum hnem a, Pathian thlengin bum kan tum a, damdawiin min hum a, rai loh vanga thlawi lo chauh ka ni tih ka hria alawm. Kan awmdan hi a ţha lo a, keimah ang hian hmeichhe dang hi awm ve lo se ka duh bawk. Nuthlawi sawi mawi chiam lova hmeichhe thianghlim hlut zia te, mipa in hmeichhia te thianghlimna an hlut thiam sak a ţul zia te hi sawi mawi zawk ila tih chang ka ngah. Ka dai sual laklawh tawh a, thil ţha lo reng reng chu vawikhat tihin vawihnih a hring an tih hi a dik vek. Chuan nang pawn i sawi dik, fair lo deuh a inngaihzawn ai chuan inneih a ţha zawk. Mahse, ka nu leh ka naute hi ka ngaihtuah tho bawk si" tiin ka phun sap sap a, a kut chu ka kawr chhungah zen lutin ka dul a tuai hauh hauh a, "Kan inhnaih e. I duh chuan nikhatah vawi 10 aia tam pawh i han dak zawk zawk thei ang chu. Exer a ni mai alawm..i peih phawt chuan darkar khat danah te i tlawh ang a, hne hluiin i chhungte i la hmu thei tho ang" ngaihsam zet a a tih pawhin lu ka la thing tho a, "I ngaih ang ngawt kha a ni lo. Pasal kan neih chuan hmeichhia chuan dal tu kan ngah tawh a, bakah ka nei ngam rih lo che. I nun i siamţhat tak tak hma chu ka nei dawn lo che" ka ti ve phawng phawng a, kan ngawi zui rauh rauh mai. 

"Ruihhlo tello hian khawvel hi engtin nge a awm?" a ti zawi ruih a, a mit a natna thuk tak inphum chu ka hmuh hmaih bik lo. 

"A harsat chang a awm a, sual let a ngaih chang a tam lutuk. Mahse, khawvel a ni miau a, kan thih hma zawng chu khawvelah kan awm dawn a, eng ang pawhin lo hrehawm se ruihhlo tello a hmachhawn ngam te hi mi huaisen an ni mai. Tintin, tun a i nundan hi ngaihtuah chet chet la, nupui neih a fa neih te, pa nih te i inpeih tawh em?" ti a ka zawh chuan ka mitah pawh min en rei ngam lovin ka dul chu a tuai a tuai a, a kut che vel chu a en a, ngaichang reng mah ila engmah a sawi lo. 

"I ti thei ngei dawn tih i hriat sa loh chu engmah i sawi lawk duh ngai lo tiraw? I ngawih reng danah i inpeih leh peih loh i hre lo tihna a ni mai" ka ti a, min la chhang chuang lo. Hei hi a mizia a ka duhna lai a ni veleh tlat a, mi ţhenkhat chuan thil an sawi lawk zung zung a, midangah beiseina an siamsak a, an sawi ang an tih leh theih loh khan an duh vang ni hauh lovin mi an ti na ţhin a, Tintin-a hi chutiang chu a ni ve lo. A ti thei ngei dawn tih a hriat chian chu a sawi lawk a, amah a inrintawk loh a, a chian loh chuan eng thil mah a sawi lawk ve ngai lo. 

"Nupui i neih chuan i mawhphurhna a sang dawn a" ka tih leh chuan, "Min hmangaih em?" a lo ti daih a, "Hmangaih lo che ila chu hman hmanah khan ka kalsan daih tawh ang che. Ka hmangaih che a, tun thlengin ka la vuan ţang ţang che a nih hi" ka ti a, ka thaw zui halh a, ka hmangaih tih ka chiang khawp mai. 

"A uap e..a hahthlak. Ril deuhin min hmangaih thu han sawi teh" a kut la sawnin ka dul chu ka kawrin a khuh a, chumi hnuah rizai min sin tir leh a, lungawi hmel deuh a min kuah hlu hlu lai chuan fiamthu hian, "Ka hmangaihna che hi maw...thihpui tham khawpa nasa aniang" a bianga dawm paha ka tih chuan a nuih a za viau mai. Ka saisir rual chuan a ngai te bawkin min lo kuah leh a, ka putea ka hlauhna te kha a bo vek tawh, mak tak a ni. 

"I hmangaihna chu a va den ve, thih chilh bomb pai reng ang i nih chu" nuih hawk pahin a mu zangthal a, a âwmah ka kuah a, mit ka chhing zui nghal a, kan ngawih vang vang hnua, "I muhil a mi?" a tih chuan, "Aih" tih chiahin ka chhang a, ka mut erawh a chhuak tawh khawp mai. 

"Muhil rawh..keipawh ka haw dawn inbual te ka la ngai" tih paha thawh nghal mai a tum chu, "Fimkhur rawh aw" ka lo ti thuai a, diktak chuan tukverh a a lo lut ru fo hi ţhenawmten an hriat ruk tawh ka ring a, engahmah min ngai lo; a ruka min sawi sep sep duh tawk pawh an tam viau ang. Ka ngaihven lo lui mai mai zawk a ni. 

"Lo mu tui rawh" tih leh ka hmuia fawh a rual a, thatchhe deuhin ka lo chhang let ve a, ka khabe leh ka nghawng thlenga a fawh hnuah min thawh san a, a ruak nghal huai mai. 

"Tukverh hi i kalh dawn lo mi?" a tih chuan, "Ka lo kalh ang" ka ti leh tawp a, kawngkapui bulah ka nute pindan a awm a, an harhvang dun si, a haw dawn takngial ah pawh kawngkapui aţangin ka chhuah tir ngam ngai chuang lo. 

"Emergency light kha theihnghilh suh aw. Fimkhur hle ang che, ţhenawmten an vawk a chhuak emaw an tih leh chuan min man chhuak dawn nia, a pawi viau ang" ka tih chuan, "Tlanchhiat pahin ka ngûk vak vak mai ang" a ti a, kan han nui dun leh rih ţhin, kan awmdan hi mi hian an hre lo der vel mai mai tawh ang, chuti chung chuan kan la fimkhur ve em em tho a, kan zah a, an mitmei kan veng tihna a ni mai. 

Pindan chhung ka tih thim hnuah ka mu zui nghal mai a, phone pawh ka khawih tawh lo. Ka lo muhil nghal a ni chek ang chu tu emaw hian ka puan sin lai a rawn hlim a, ka mut kawr hak pan te chhanah chuan ka taksa chu a chul kual a, ka hlauh em avangin chet pawh ka che ngam lo. 

Ka awmbawr leh ka mal inkar chul reng pahin ka putea chuan it hmel zetin ka taksa chu a melh kual dan dan a, khum bula a ţhingţhit rual chuan chet mai ka han tum a, ka thei der lo. Verther zet a a nui chu thlaphang tak chung hian ka melh tlawk tlawk a, a mitmeng a min itna langchhuak te chu ka ten takzet a ni. 

A hmui a ka biang leh nghawng vel a nul kual lai te chuan chet sawn tumin ka tal aih aih a, ka taksa chu pawt bet tu a awm a, ka tal chhuak thei lo. Ka mittui chu ka bekah a luangthla a, thinrim ţeuh chung hian ka inhumruh vak vak a, au chhuah tuma theihtawp ka chhuah chung pawhin ka aw a chhuak thei tlat lo. Ka kawr hak lai chu ka awm thlengin a nawr tawm chho a, a kut a ka taksa lawng a khawih lai te chuan ţap chungin ka dawh tawp a, hrehawm ti viau mah ila tih theih engmah ka nei lo. 

Ka tukverh inkhawng ri bur chuan min ti harh hlawl a, thaw hlawp hlawpin ka ţhu chhuak a, thlanin min bual huh hluam mai. Pindan chhung chu a la thim vek a, hlau hlawp a ka thaw ri chauh lo chu thawm dang hriat tur pawh a awm lo. Khum mawngah chuan tu emaw a ding tlat hian ka hria a, ka mit ka nuai nawk nawk a, kut khur dar darin ka mutna bula switch chu ka ban de de a, pindan chhung a en pup rual chuan ka chhing sawk a, khum mawng lam ka en chian ngam rih loh vang a ni. Ka thaw pawh a la mumal hleithei lo. 

Thawm dang ka hriat tak lohah chuan muangchangin ka meng riai riai a, pindan chhungah chuan tumah hmuh tur an awm lo, ka mit len kualin ka kâ hmangin ka la thaw hlawp hlawp reng a, nichin a thil thleng kha ka mumang mai mai a ni tih hre mah ila a tak ang chiah a ni. 

Fimkhur taka tho chhuakin kawngkhar lamah ka phei a, a lo la inkalh thlap a, ka sam hui thuak pahin a kalhna chu ka vuan ran a, hmuh tur awm lo mah se ka hawi kual ruai reng mai. 

"Ka mumang mai mai" ka ti chhuak hap a, ka thla a muan phah chuang lo. Tintin-a haw hnu khan light ka off a, ka muhil nghal mai kha a ni a, tukverh ka lo kalh hauh lo tih ka hrechhuak a, ka inchhir hauh lo, tukverh hian min ti harh hlauh lo se chu tunah pawh hrehawm ka la tuar reng maithei a sin. 

Darthlalang hmaah dingin uluk deuhin ka in en a, ka mitmeng chu a phelh phang mai, ka sam a hnawk niaih bawk a, tupawn min hmu se hlauh ka nei tih an hre thei ang. Ka nghawng leh ka beng bul vel te chu ka en kual a, engmah danglam a awm lo. Uluk lo deuhin ka sam ka ţawn hmawk hmawk a, ka biang dawm chung meuhin tukverh lam chu ka en a, ka thil tawn tawh te ngaihtuahin ka khap leh fak fak ţhin a, ka putea mai bakah ka hlauhna, keimaha bet bawk hian mang lam thlengin min umzui leh tawh chu a nih hi. 

Ka putea te in a ka awm lai khan tuna ka awm ang hian ka awm fo a, mutthilh ngam loh chang ka ngah a, ka chauh tawpkhawk changa ka lo mutthilh ve pawhin mangchhia bawkin min kai harh leh ţhin. Ka cher phah kawk kawk reng a, Kolasib a ka haw leh hnuah pawh tu hriat pui si lohin rei tak chhung chu ka buai zui a, a reh ve ţan dawn chauh a hetiang hi a ni leh a, doctor pan ngai khawpin ka la buai lo ang tih pawh a sawi theih loh. 

Lehkhabu chhiarin khawvar hun ka nghak a, chuti chung chuan ka nu'n min rawn kaihthawh hma chu khum ka thawhsan ngam chuang lo. Pindan kawngkhar ka hawn rualin, "Sim vat ang che...ka haider rei tawh. I tih leh chuan i putea ka hrilh ang" zawi te, chang fak si hian a lo ti a, ngawi reng mah ila a thusawi awmzia chu ka hrechiang lutuk tlat. Tintin-a nen kan awmdan te, zana a lokal ţhin te hi a hre ru tihna a ni mai, min hau har ka ti zawk reng a ni. 

"Nula ka ni ve tawh chung pawhin inleng neih i phal lo a, tihdan dang ka zawng a nih kha" amah kal pelh paha ka tih chuan, "Mi pangngai chu lo leng rawh se, ka phal lutuk alawm" tiin ka hnungah min zui ve zel a, thil dang pawh a sawi, ka bengkhawn duh lo thung. 

"Mary pawh a graduate hunah chuan Aizawl a a lo awm ve a ngai ang a" ka putean a tih chuan ka chaw ei lai ka tawp chawt a, ka hawi chhuah ruala min lo endan ka hmuh chuan ka luak lo chauh a ni. 

"Hlawh ka nei tawh alawm..hostel ah ka dah ang. Kan ti buai tawh lo ang che u" ka ti nghat a, ka tho zui hmak bawk nen, ka nu leh paten mak tih hmel taka min en pawh chu ka hmu reng a, ka putea ka huat lutuk na lamah ka ngaipawimawh thei tawh bik lo. 

"Ehe...chaw in ei elo? In kawmthlang lawkah khuan pheikhawk khing ka chhar a, a la ţha angreng si a, in sukfai sa a tla palh a nih ka ring a" rawn tih hluai pahin ţhenawmpain a pheikhawk chhar ngei mai chu a lek kang uaih a, "Khatiang pheikhawk kan va nei lo ve..a khing chauh maw i chhar?" ti a ka nu'n a lo zawh chuan, "Aw...a khing chauh hi ka chhar. Chu, in pho lai a tla thla emaw ka ti a, ka'n chhar sak teh ang ka ti mai a, tu ta nge maw ni dawn le? Midang kan zawt chhin ange" a ti charh charh a, pheikhawk chu a thlek leh vung vung ţhin a, sil hmuna ka ding mai mai chu ka nu'n awmze nei zet a min rawn melh hrak lai chuan rang zetin chhuah lam ka bih nghal daih. Kawmthlangah lah hian an kal peih hlawm mai si a, nizana a pheikhawk bun ka en lo nain Laltinkhuma thlauh ngei a nih ka ring. 

CONT...