BLACK AND WHITE-4

BLACK AND WHITE-4

"Eng pheikhawk mah ka thlauh lo e aw Vanram" thophang aw zet a a rawn tih lai chuan darthlalang hmaah dingin ka sam ka chul thuak a, ka kut lehlamin phone ka dawm ran bawk. 

"Tukinah ţhenawmpain pheikhawk khing a rawn keng lut alawm. Ka nu'n min rinhlelh hmel em em mai lehnghal a, i lokal ţhin tih a hre bawk si" ka tih chuan, "Eng pheikhawk nge a rawn ken luh a?" a la ti cheu a, ka nu min rinhlelh leh rinhlelh loh mai mai te chuan a ti buai pha teuh lo. 

"Lawk deuh..rih hmel deuh a nia, a lian bawk. Ka ke pahnih chu a leng chiang bal ang" ka tih chuan, "Khai a! A va len hmel tak ve mawle. Nizan khan in ka thlenin pheikhawk pahnih ka la bun. Khatiang thil ho mai maiah min rawn ringhlel suh" min ti let erh a, nuih te lam lam a za leh mai dawn alawm le. 

"Nangmah chiah i kal sia, ka hlauthawng deuh mawle. I lo thlauh palh aniang chu ka ti" ka tih leh pawh chuan, "Vawk chaw kuang tiat lawih pheikhawk ka bun ngai reng reng em ni?" a rawn ti a, "Aww..vawk chaw kuang tiat ka tih loh kha" ka tih pawhin, "I sawi hmangah a len hmel emai vawk chaw kuang a tiat hrim hrim" a ti ţalh a, "Laltinkhum" tih riin a zui a, a nu, nu Ruati aw ngei a ni. 

"Ruat ţahbelhi pawh a au leh lung lung tawh chu. Tak taka, thlah i ngai dawn em?" pangngai deuh zawk a a tih takah chuan, "I la mut kha, ka nghah che chuan ka tlai anga sin. Bus in ni mai" ka ti a, mahse, "Tlai lo ang...kan thlawk chho dawn nia. In inkawtah lo awm rawh" a ti a, phone a dah leh hmak tawh a, a hming hi amah ber hian mawi a ti hlawl lo a, a hming pum a kan koh pawhin a haw ţhin reng a ni. 

"I putea hian ka thlah thei ang a ti che a, i hman tawh em ni?" pindan aţanga ka chhuah ruala ka nu'n a lo tih chuan ning deuhin ka chek hlak a. 

"Tintin-a rualin ka kal dawn. Kan inbe fel vek tawh" ti a kal mai ka tum chu, "Vani, ka hrilh ţhin che kha" a lo ti leh a, thawk chhuah hawk pahin ka meng kual ralh mai. 

"A hun rih lo" zawi sapa ka tih hnuah, "Engkimah inrawlh vek a tum ringawt mai, mahni thisen zawmpuite ngei it tlat ching, tenawm lutuk" ka hriat tham lek a tih hlak hlak pahin pawnah ka chhuak a, a hmel chu thuhran, a mitmeng phakar lutuk mawlh mai hi ka haw hluah hluah a ni ber. 

"I hmanhmawh chuan min rawn um mai rawh Lei Vanram" Laltinkhum-an a rawn ti lung lung a, ding lawk lovin kan inchhak zawlah chuan a tlan kual a, a nui vur vur lehnghal. Ka nuten thawm an hriat hmain ka tlan chho hlawk hlawk a, ka uang ve lo tih a hriat chuan a ding ve mai bawk. 

"Khati teng tung te chuan vawt i ti dawn lo em ni?" ka ti hluai a, tshirt lian hlup leh kekawr bul tui a ha a, pheikhawk pum pawh a bun lo. Helmet lah chu bike ah a khai daih a, a sam te chu awmze nei lo deuh hian a hnawk ther sung mai. 

"Ka hmanhmawh a, ka bialnu a tlai ai chuan vawt ka tuar mai ang...ehh" a ti a, mit min siai zauh pahin a dak deuh a, a ha var tak langa a nui te chu hmuhnawm ka la ti reng mai; a nuih hi chuan a ha ui ngho hi a langsar em em zel bawk. A sual bawk si, chhe lo viau lo se chu keipawhin ka tleirawl lai kha chuan ka duh bik kher lo maithei a ni. 

"Chuang ta che..i hmanhmawh a ni lawm ni?" amah bawkin a tih leh takah chuan bike hnungah chuan ka lawn a, helmet pawh a khum ve ta alawm. 

Kan han tlan thaw chiah chu vawt a ti tih ka hre nghal a, "Tlan muang deuh mai rawh vawt i ti a nih kha" nuih hak hak paha ka tih chuan, "I nuih theih nan vawt ka ti der mai mai" a ti deuh tlat a, "Mipa pawn vawt an ti ve thei tho alawm. Tlawmngai lutuk ţhin suh" ka tih leh pawh chuan, "Nih chuan i lawm nan tlawmngaiin vawt ka lo ti der leh mai ang" a ti leh zat a, a ngawi zawkah ka ţang leh ta nge nge a, amaha a tlan haw hunah phei chuan vawt a ti khawp ang. 

School zawnah ka chhuk a, kalsan nghal mai lovin bike bulah chuan ka ding a, "Shawl ka inchhawp a sin...i bat haw mai dawn mi?" ka ti leh te te a, "I shawl ka bah haw chuan i lawm angem?" tiin min lo zawt let a, "Hluhlu...chawn tawi" a ti zui lauh a, nui chung ţha chunga a hawina lam chu ka en ve vat a, ka ţhiante pawh an lo thleng der mai. Naupangin thawm an nei neuh neuh si a, ka ţhiante thawm ka lo hre hauh lo. 

"Laltinkhum nghal viau suh. Vani chawn aiin ka chawn a tawi bik lo aw" Hluhlu-in a rawn tih chuan, "Vani nen a in chawn chu Mely chawnin a that vek" fiamthu a a tih leh chuan Mely chawn ka lo en kher a, a pawnfenin a hliah deuh nain tunlai a thau ve deuh lai a ni bawk nen, Hluhlui nen a kan chawn ai ngawt chuan a lian ţha e. 

Ka ţhiante nen a an infiam mawlh mawlh hnuah min luhsan a, "Ka shawl i bah haw chuan ka lawm dawn ka tih kha, i bat haw duh em?" ka lo ti leh a, ka sana bun lai chu ka bih pah zauh bawk. 

"I lawmna tur a nih chuan ka bat mai ang" a ti a, vawt ka ti a la ti duh ţhak lo. Shawl la tura ka lut chu ka ţhianten min lo be bawrh bawrh a, chhan pawh chhang mumal hman lovin shawl nen ka tlanchhuak leh a, hepa hi chuan min ngaihsak ve viau mah se min ti buai hneh khawp mai. 

"Khai a!" shawl par chiai chu pawt parhin uluk deuhin a enkual a, bat lawk lovin a hlam a hlam mai. 

"Bat vat rawh dar a ri ţep tawh" tih pahin ka chhuh sak a, a hlai ţha bawk a a taksa chu a khuh zo khawp mai. 

"Ka kal aw...hruai i ngaih chuan min lo hrilh mai dawn nia" a ti ve thlap a, a inher a, a tlanchhuak leh chiah chu auh zui hman pawh a ni lo, a shawl bah kha miin an hmuh a hlau nge pawh ka hre lo, tlan chak tak a ni ringawt. 

"Khapa nen khan in lo inkawp leh tawh elo?" U Dino aw ka hria chu ka vir zawk a ni ber. 

"Min ti phu dawn alawm...i fanu bawk em ni?" ka ti hluai a, class aţanga a lo chhuah chuan ka thlen hma daihin a thleng tawh tihna a ni mai.

"Aw..a damlo a, a hmuh turin class room kawtah ka ding kawi a" a tih laia ka lo buk nghat nghat lai chuan, "Ka zawhna chu?" a ti dam thlup a, chhanna beisei deuh hian min en bawk. 

"I hmuh ang kha" ka nui seih a, Tintin-a nen kan inţhen laiin U Dino nen hian kan inbia ka tih tawh kha, ka rilru natna te pawh ka hrilh ve nasa ţhin a, ka dam dawn chauh a, nupui nei lai a lo nih avangin amah zawk hian min ti na leh a, keipawh Tintin-a hnenah ka let leh ta kha a ni a, min hmu dun leh pawh hi ka zak vak lo, amah hi a dik vek bik chuang tlat lo a. 

"In inţhen hlen tawh emaw ka lo ti a sin. Damdawiin bak hi khawiahmah ka kal vak lo a, ka fanu pawh a pi awm loh lai a nih avang chauhin ka lo thlah a, mi chanchin ka hre ve ngai mang lo. Ţha deuha in inkawp leh theih te chuan a ţha alawm" a ti ve tak nain lawm hmel pawh a pu chuang lo.

Dar a rik tak avangin, "Hmanni pawn ka sawm tawh che kha...hunawl i neih chang chuan i lo leng ve ţhin dawn nia, ka nu lo kan pah a ni mai" ka ti a, chhanna pawh nghak lovin ka kalsan zui nghal a, min bum hnuah kan inhmu lo vang vang a, a fanu enkawl tu ber a remchan loh avangin ti hian aman a rawn thlah a, rei tak hnuah kan inhmu leh a ni mai a, Tintin-a nen min hmu dun kha lawm loh nachhan tur vak a neiin ka hre lo a, chuvang chuan keipawh ka inthlahrung em em bik lo. 

"Tun lawk a i biak zuai pa kha a chhe lo ka ti. A upa ve deuh tawh tih chu a hriat a, mahse amah kha a dam thlup a, vawithum vel chu ka hmu tawh" Mely-in a tih chuan, "Min lo enthla ni maw?" ka ti fiamthu a. 

"Enthla chiah lo...ka lo chhuah lai takin in lo ding dun a, in inhria em ni? I va sawi ngai lo ve" ti a dilchhut fe a min zawh chuan, "Nakinah" ka ti sap a, a lo bu ve nghat a, U Dino nen khan chanchin sawi tur em em kan nei lo, ka sawi theih zawng chu nupui nei lai lo ni lo ta se tih a ni mai. Ka hrechhuak hma hlauh a, ni lo se chu ka na viau maithei a ni. 

"Doctor a nih kha..kan khuaa i lo awmna a la rei lo a, i hre lo mai mai aniang. Bakah doctor te hre tur chuan damdawiin a kal tam te a ngai ve a, pathlawi a nih kha, a nupui a thi tawh a" zawi te te a ka tih chuan Mely chuan min en ran a, kan inţhut hnaih khawp mai. 

"Engtin nge in in hriat? I nu i buaipui pah velin em ni?" ti a min lo zawh chuan, "A ni mai ang chu" ka ti a, thil awmdan ka hrilh chiang chiah chu, "Nupui nei reng chungin ngaihzawng cheiin a chei che maw? Ka sawi awmzia chu beisei nei thei turin a be ţhin che maw?" phawk deuh hra hian a ti a, a chek zui tlak tlak bawk. 

"Niang chu mawle...keilah Tintin-a ka ţhen lunglen lai a ni bawk si a, ka nem hma a, ka bialpa hlui theihnghilh nan amahah khan rilru pek ka tum tlat a, chuvang chu aniang ka duh ve hman viau a, mahse nupui a nei tih ka hrechhuak a" ka tih chuan, "Awii...ah" a ti halh a, min khawngaih deuh ni a ka hriat chuan ka nui hak hak a, khang hunlai kha chuan ka la naupang bawk a, keipawh ka in khawngaih ţhin. 

"Hun liam tawh alawm. Tunah chuan amah ka hmuh khan danglamna ka nei tawh lo. A tirah kha chuan min ţhawng ve deuh a, tun hma a min hip ţhin ang khan min hip tawh lo, bakah, bialpa ka neih hi" ka ti a, sawi tur a hre lo lutuk chuan nuih a ti za zawk. 

"A nih leh Tintin-a hi i ring em?" thutak deuh a a tih chuan ka ngawi rauh rauh a, ka'n ngaihtuah ţhin a, kan hmaah hian thil dum leh var a awm a, kawng ţha leh ţha lo teh nan ka hmang mai ţhin. A var lama hruai luh ka tum a, ka ruala a kal chuan a var lamah a lo lut ve mai zel a, mahse, a mal tlat chiah chiah a dum lam, a thim lam bawk a pan leh ţhin. Fim kara awm a peih tlat lo te hi a chhan hriat ka tum nasa ţhin a, tun thlengin ka la hre thei lo chu a nih hi. 

"Amah hi chu ring e" ka tih laia ka ţhiannu mitmenga mak tihna langchhuak chu chiang takin ka hmu a, "Ka ring alawm" ka ti leh nghat a, amah hi chu ka ring a, a chheh vel a thil awm, mihring thleng hian ka ring lo thung. Ka ngaihtuahna awmze nei lo lutuk ka nuih pui leh lai chuan min rawn nghawk zauh a, "In tawpna hi a hlimawm i ring em?" tiin min zawt leh a, "Chu te chu Pathian thu thu aniang chu" tiin ka lo chhang mai a, "Siamţhat theih i inring tihna em ni?" a ti leh kher a, chhanna fum fe deuh pek chak viau mah ila, "Ka hre lo" tih bakin ka chhang thei lo. A la upa bik em em si lo a, siamţhat ka tum nasa tawh bawk. Tun thlengin ka la hlawhchham zel chu a nih hi. 

Banah bus in ka haw a, ka putea a la cham miau avangin ka naute ka ngaihtuah deuh chu Tintin-a dawrah pawh ka peng kawi lo. Daizaui cream man ka pek kim loh lah kha rilruah a awm ve reng a, ba neih hi ka thiam lo aniang, hlawh lak hunah kan ti tak nain pe zo law law turin an in lam ka pan ta nge nge a. 

"Vani, lokal rawh, chapal ka la thar leh tawh a" min hmuh rualin a lo ti var a, a fapa a pua a, chhuatah a thil zawrh tur ni awm tak ho chu a inchap darh nuaih mai. 

"Ba ka lo pe dawn che a, ţhut pawh ka ţhu muang hman lo ang. Duh leh zan lamah ka lo en zawk ang" tih leh ka purse phawrh ka rual a, "Aww...en chhung a rei hleinem. Tikhan en tawp la, nalh i tih zawng a awm leh bun chhin la, ba leh tawp la a ni mai lawm. Nang chu i rintlak a, i bat ka ui lo lutuk. Aizawl lam nen kan rate a inang vek a nia aw, bazar a zuar ho, ka sale ti ve ho saw chuan kei aiin an zuar to vek. A nalh si, a zang bawk si, bun loh ang vel an tih kha. I bunlai reng pawn kelawnga i awm laia i hahdam ang chiah khan i hahdam tho dawn tihna" tiin a thil zawrh lai chu a lo fak luam a, ka nuih a za angreng. 

"Pawn i chhuah chak vang vek a nih kha, ka chawm thei che a, inah awm zawk rawh ka tih ziah che kha" chem tah paha a pasalin a lo tih chuan, "Awii..Dear-a ţhin hi a" tiin a nui hak a, amah vek chuan, "Dear, sumdawng tawh suh han ti leh teh. Nangmah kha ka hralh nghal che a ni mai. Ka duh tak tak chuan hralh theih loh ka nei miah lo a nia" a ti a, anni hi chu an nupa chauh pawhin awm se an ri bawrh bawrh zel an tih ţhin kha an ni ve hrim hrim. 

"Kha, ti hian cream man kha ka pe kim che aw. I thil zawrh hi chu lei loh a har ţhin si, chapal chu duh leh zanah ka naute ka lo entir dawn nia" ka ti a, a phal lo chungin ka kal lui a, awm reng ila chu ka thim leh ţhak ang. 

Hmanhmawh ve nak laiin Nu Ruati lah chuan min lo au lang lang a, an in kawtah an gate vuanin a ding a, a kut awl lamin hmunphiah a keng a, a taima ve ngawt mai. Daizaui te nen hian an inhnaih a, ka bialpa nu a nih miau avangin zah viau mah ila veng khata awm na na na chu ka hmu fuh leh ţhin. 

"I bang chiah mi?" hmunphiaha bang vuak thawk paha a tih chuan, "Aw, bang chiah ti ila Daizaui ba ka pe lawk a" ka lo ti a, a ner nang mai. 

"Henu lah hi a..ka sumdawng e a tia, lei hma chu min bel peih. Kan pa phei chuan tumah a hnar thiam bawk si lo, nimin tlaiah naupang kekawrte a rawn lei haw ringawt a, kan tu te an lian ve tawh si, a fapa bawk alawm kan pek leh. Â ang deuh hian a awm a, a fing kar a, fa ang chiaha ka lo en ve ţhin chu ni lo se huat chang ka ngah ang" a ti bawrh bawrh a, mihlim a nih bakah mi rel a hrat tel a, ţawng mawi lo ni lo se kan veng chhungah chuan a fate bak rel loh a nei tawh lo ang an tih ţhin a ni, Tintin-a tiam lohin. 

Ka ngaihtuahna chu hria niawm takin, "Enteh, ka sawi duh chu maw...Laltinkhuma hi" a ti ta tak tak a, chutah min rawn din hnaihin zawi lehzual zawk hian, "Lo zilh ve teh, heti ringawt chuan rei kan dam lo ang. Zanah tlai tak takah a lo haw a, a bike khalh lah hi 'fimkhur rawh' tih veleh, 'tunah vuan lo in aw' a tia, tawi te te pawh tlan se vuan lo a faten bike an khalh chu tu nu mahin kan hmu thei lo. Amah hi a ngaihawm rualin a sual si a e, mi runluih chak tlatna rilru a pu reng mai te hi tih tawp dan min han ngaihtuah pui teh. Zu hi chu tunhma ang em em kha chuan a in tawh lo a, a ţhiante nen pawh Pi Mawii ang u an tia, an chhuah pawh hian kan ngaih a ţha, Pi Mawii te inah an leng ţhin a nih kan ring a, a la upa vak si lo a, amaha kal dan a thiam lo a nih hi" a ti duah a, a chang chuan ţhen vang vang chhin ila a a rilru hi a puitlin phah deuh angem aw ka ti ve fo mai. 

"Pi Mawii an tihin in ngaih ti ţha tawh suh u. Tunhma a zu, local kan tih mai ţhin hi tunlaiah chuan Amawii tihin a lar tawh a, zu hming sawi lawng lawng reng te chu tuman, zu in mi takngial pawn nuam an ti lo a, whiskey leh local zu ni lo ho hi Tintin-a te chuan Pi Mawii an ti mai alawm" ti a ka hrilhfiah chuan a meng rang nasa khawp mai. 

"Awii..a lo haw hian kan mu tawh ţhin si a, a ruih lutuk loh phei chuan kan lo hre lo a, kan inhnim thut thut reng bik bawk si lo. Engpawh nise, lo zilh ve rawh aw, i thusawi chu a awih deuh ang. Madiki lah hi a rawn tei thla sek a, mipa phei chu hmeichhiain an thlem heuh heuh chuan an nem rei thei lo. Tum loh deuhin nau an pai ang tih te a hlauhawm" min tih khum bawng bawng a, a fanu nen naupan tet aţanga inkawm kan ni bawk a, ka bulah hian sawi hreh em em a nei ngai lo.

"Madiki chu a lo leng em ni?" ka tih chuan, "Leng ang chu mawle, Tintin-a tak chu a rui lo a, mahse Madiki kha chu a dik lo deuh niin ka hria. Sensiari chuan damdawi a rui a tia, hnar haw a tum pawhin a haw duh lo. Nichin lawk khan an chhuak a" a tih lai mekin kan lam pana Tintin-a lokal chu Madiki ngei mai chuan a rawn zui a, mi chhe sawi chu koh aiin a hnai an tih kha, tum loh deuh a ka hmu dun chu ka sa ve phat mai. 

"A hmelţhat nen a khaw lo ngawt alawm. Mipa duh lo chung umzui duan duan reng mai" nu Ruatin a tih lai chuan gate chhung ka thlek a, Tintin-a bike inhung pawh ka hmu ta chiah e. 

"Nang nu kha" Madiki ngei mai chuan a ti a, kan lam a rawn kawk a, a kal chak sauh bawk a, Tintin-a a lehpel lai te chu ka lo en ran a, min hau hrep dawn maw ka tih laiin beisei loh deuhin min nam dawrh mai. Kei a inring lo lahin nu Ruati ka nek rawk rawk a, a awi dur dur a, kan tlu dun lo chauh a ni ber. 

"Duhtawk rawh" vin zet a Tintin-an a lo tih lai chuan, "Eng nge i hriat a?" ka ti ve thung a, eng rim mah a nam lo nain a mitmeng chu a vai riai mai. 

"Ve lutuk che hian, ka lokal tih i hriat vang em ni inthlak hma hma a i lo lan ve zat a? Lo tel ve sek suh" zam lo zet a Madikin a tih leh lai chuan kan inkarah Tintin-a a rawn inzep a, a hawi kual thuak a, "I ţha em?" min ngaihtuah hmel zet hian a ti zui sup a, chhan pawh ka chhang peih lo. 

"Madik, i nutei te in lamah haw tawh rawh. Chaw i lo ei duh a nih pawhin pangngai deuhin awm la, ţhenawm khawveng kan ngah a, kan hnaihah in a ding fer fur a, buaina siam ang zawnga awm kan rem ti lo a nia" tiin nu Ruati pawh a lo inrawlh leh a, Madiki chu a nui chhuak hawk a, tun a thil thleng mek hi a harh fim hunah chuan a hre tawh lo maithei a ni. Chuti khawpa rui chuan ka hmu. 

"Tintin, Madiki hi han thlah rawh" a tih leh chuan a nu thusawi chu hre lo ang maiin, "Min lo zui rawh" a ti bul hmuk a, ka lungawi loh zia a hmu thiam ve te pawh a ni mahna. 

Ka ban a min kaih mai a tum chu rang zetin ka lo vai sawn a, "Ţang buai lo mai teh" a ti deuh nghut a, ka banrek chu a rawn hmer lui ta tho a, an inkawt aţanga min kalsan pui dawr dawr chu tupawn min hmu se mak an ti lo ang, ngaiah an nei tawh zawk hial maithei a ni. 'Inhau reng, inţhen thei lo' tiin min fiam nan an hmang fo a, zah pawh a zahthlak, keimah ber hian ngaiah ka nei hleithei lo. 

"Madiki lahin min nam kat dawrh a, eng nge maw in hriat le? Min thlah rawh" a banah ka chum a, min thlah duh lo. Kan in lam min pan pui lai chuan, "Ding rawh" ka ti leh a, a ding duh chuang lo. 

"Ding teh ka hah lutuk" ring deuh zawkin ka ti leh a, a ding a, ka lama rawn inher pah chuan, "Ngaihdan dik lo i nei lehnghal ang chu tiraw?" a ti a, nghal ngawt a!

Ka kut a vawnna chu ka thing thla sawk a, min vuan nawn tawh bik lo. Chhanna hriat duh ni awm taka min ngaihchan tak rengah chuan, "Aw" ka ti mawl tawp a, a mit ko a lo san ak a, "Ka hmuh dun hma che u, i nu'n Madiki lokal thu a sawi aţang khan ngaihdan ka nei nghal vek. Ţhing leh lutuk mai, hmeichhe pakhat pawh thlah thei lo. Pawnah in la inzui chhuak tak deuh deuh a" ka tih bawrh bawrh lai chuan, "I ngaihdan ang kha a ni lo. Chhuahsan ka tum a, min zui zel. I duh leh Sensiari, aaa...i ngaih ang kha a ni lo" a ti bah nuaih a, "Min kalsan rawh" tih bak ka sawi lo, mahse ka thusawi chuan a mitmeng a ti danglam zawk mai. 

Che chang lova ngawi ngul a min en tak rengah chuan, "Ka thusawi chu i hre lo mi? Kolasib a lokal chhan tlakah a ngai che a, a lokal a ni mai. Kawm rawh, i duh duhin awm rawh. Ka dang dawn hleinem che. Duh leh Aizawl thlengin zui chho la" ka ti a, ka thusawi chhung zawng te chuan mit la sawn eih lovin keimah ngawt a en a, Tintin-a meuh pawhin sawi tur a hre lo ve chu a nia, a mak zawk. 

"Vanram, thudik ka sawi chuan ka dang a awk zel a, dawt chu nal deuhin ka sawi thei" inhauh laklawh laia ban charh a a tih chuan, "Ka uang lo" ka ti vin hlak a, "Keipawh ka uang lo" a lo ti ve nghal zat a, "Min hrechiang i intih chuan i hrethiam ang. Dawt leh thil dang ho deuh deuh chu nal deuhin ka sawi thei, thudik ka sawi chuan ka dang a awk zel" a tih zawm leh a, ka bo leh hu tawh mai. 

"A nih chuan Madiki chungchang i sawi kha thudik a nih zia sawi i tum tih em ni?" ka tih chuan a lo bu nghat a, "Tu nu leh pa mahin an fate dawt sawi thiam nal deuh ni turin an zirtir ngai lo. Ka rilru lak pen i tumna mai mai a ni" ka ti a, "Zirtir an tum ngai lo, an chetzia leh awmdanin a zirtir ţhin tho" a lo ti veleh a, tawi te a a nui pawh chu ka hmu hman a, lei lam a bih zui ta daih a. 

"I nu leh paten an awmdan hmangin dawt sawi an zirtir che tihna maw? Nangmah hmangaih ber tu te hian maw?" ka ti deuh kher a, zawi muangin a rawn dak chhuak a, a mitmeng a natna thuk tak inphum ru ka hmu ţhin hi alawm mak ka tih chu, amah lah a thawveng si. 

"Ka sual naah hian tumah ka dem lo. Ruihhlo ka tih chhanah tumah ka puh lo bawk. Ka dik loh vang a nih hi, chutiang bak chuan ka sawi thiam lo. Ka rilru dik loh vang" a ti leh ang lawi bawk si a, rei tak chhung kan inkawp tawh takmeuh mai, mahse, ka bialpa hi ka hrethiam thei lo a ni ber. 

"Lokal rawh ka thlah thleng law law ang che" tih leh ka kut a rawn vawn a rual leh a, "A ngai lo. Ka nu'n a hmuh che chuan a lo thinrim leh ang. Bakah, buaipui ngai i neih kha" ka ti chang fak a, ner sawk chung hian ka kut chu a thlah a, "Madiki te ang hmeichhia zui reng hi nuam ka tih bik ring duh suh" a ti a, a kal nghal daih lehnghal. Ka rilru chuan, 'thil hrechiang lovin engkimah amah kan dem ber nghal ringawt zel' ka ti a, mahse chu ka ngaihtuahna chu ka hnawt bo thuai a, demna tur awm lo se kan dem lo tawp ang ka ti ta zawk a, ka thil tawn ho chuan min ti hnual rawih mai. 

"I va tum nasa ber bur ve...i ţha maw?" ti a min lo fiam paha ka nauin pindan a min zui luh chuan, "Ka ţha" ka ti vin hlar a, ka inthiam lo leh si chu tawi tein ka nui a, a mitmeng fing zet chuan min melh kiau mai. 

"Mihring hi kan â ka ti. Min ti na reng tu te hi kan hnaih lui zel a, kan hliam tuam dam duh a min lo nghak reng tu te hi kan hmu lo der a" ka khum a leh thlak hnawk paha a tih chuan ka nui chhuak hak a, "Kha thu kha khawi aţanga i hriat nge?" ka tih chuan, "Ka ţhiante leh nangmah ka en cheu hian ka rilru ah a lo awm ve tawp. Tintin-a hi a mihring mihrinna chu sual ka ti lo, fel ka ti lutuk a, mahse, a nundan hi, ka nu sawi kha ring tawp rawh, 'a duhthlanna ngei a a fel a nih loh chuan Tintin-a te ang mipa hi siamţhat theih an ni lo' a tih kha, mi tam takin an lo ti sual tawh a, chung zingah chuan i lo tel ve hlauh ange aw. A chang chuan hmangaihna leh kan mi hmangaih te aia keimahni leh kan rilru hriselna kan dah pawimawh a ngaih zawk chang a awm a nia. Hmangaih tlak loh hmangaih tlat ho hian anmahni aia an mi hmangaihte an dah pawimawh hian an tuar nasa ţhin a, thihna hial pawh a thleng thei. A hmelţha, an hausa, a pâ, a bike a nalh tih vang mai maiin tumah hnaih loh tur, landan hi mihring bum ţhin tu langsar leh hlauhawm ber a nih hi" a ti dap dap a, BA a zir ve mek chauh a, rin aiin a ngaihtuah thui daih mai. 

"Mihring zingah hian hmangaih tlak leh hmangaih tlak vak loh an awm tihna a ni maw?" nuih rah rah pahin ka thawmhnaw hak tur ka la chhuak a, Mary pawhin lukham a ban a, a awm zawnah a pawm bet a, chunglam a melh vang vang mai. 

"Awm lo e...mihring kan nihna ang hian kan hlu a, hmangaih kan phu vek. Chuvang tak chuan alawm ka sawi, hmangaih phu mihring hian min hmangaih ve lo a, min ti na reng tu chu engvangin nge a vawn tlat bik ang?" a ti a, khuma ka ţhut rual chuan min lo en zawk a, unauin debate kan nei a ni ringawt. 

"Nih leh ruihhlo ngai te ve hi? Hmangaih an phu i ti em?" ka tih chuan, "Phu e..hmangaih phu lo mihring an awm lo ka tih tawh kha. Mahse maw Au Mami, ruihhlo ngai te hian tumah an hmangaih ve tak tak lo. Anmahni leh ruihhlo chiah an hmangaih a, chuti chung chuan kan kawm a, an bulah kan awm a, kan ţawngţaipui reng tho a" a ti a, a dik ve tho mai. 

"Kan ţawngţaipui alawm. Chumi chu ţawngţaipui a ngai a kan ti reng hlawm a, mahse, ţawngţaipui ngai hre thei deuh ho hian thinlung takin kan ţawngţaipui ţhin em? An tan thil ţha eng nge kan tih zui ţhin? Biakin chhungah kan vei a, khawlaiah kan ţih leh em ni? Nge biakin chhungah kan hmangaih a, khawlaiah kan zahpui zawk?" ka tih chuan a ngawi zui rauh rauh a, a tawpah, "I ţan a nih kha" a ti hlak a. 

"Ka ţan vang a ni hran lo. Kuhva, tuibur, sahdah, nghei a harsat zia chu a ti nasa ho in an hria ang. Hetiang chiah hian ruihhlo pawh hian thisen zunzam thlengin a fan chhuak a, nuin a fapa bulah, 'sim rawh' a tih vang maiin a sim ngawt thei bik lo. Misual hi an huatawm a, chutih rualin misual apiang hian hmangaih an mamawh a, mi piangthar ţha nih te hi a har dawnin ka hria, ruihhlo ti lo, inkhawm ţhin, kohhran a a kul a tai a inhmang ringawt hi mi piangthar ţha tihna an ni lo. Buaipui sen ni lo mah se mi piangthar ţha chuan a hmuh phaka puih ngai tam tak awm te hi a en kan vek theih ka ring lo" ka ti a, "Hmangaihna aţangin ruihhlo ngaite ah kan lut daih a" a lo ti zauh a, a ni ve tho mai, anmahni enliam mai ţhin te pawh hi ka dem hran lo, thlem awlsam ber an ni a, an nun tuihalna kan hmuhpui thei bawk si lo, an nun chhungril tak tak lah an sawi loh chuan kan hre lo a, kei lah amah hau turin ka fel famkim bik bawk si lo. Tintin-a hi chu Daizaui bawkin a hriat chian ka ring. 

Zanah U Dino a rawn lang hlawl a, a doctor a ni bawk nen, ka nu pawhin a lo be ţha khawp mai. Keimah vanga lokal a nih miau avangin a bulah ka ţhu ve mai a, nuam erawh ka ti chiah lo. 

"Sawmna ka hnar zo lo a nih hi" a tih chuan, "Lo leng ziah rawh" ka ti a, kan in en a, kan in nuih ringawt a, sawi tur kan hre hlawl lo a ni ber e.

"Vani, pu Dino kha thingpui te lum sak ta che. Keini pawn kan duh ang. A lo len ve man a thingpui tal a in loh te chuan a dik nang" ka nu'n a tih takah chuan ka tho tharh a, thingpui bel ka chhuan kai hnu a phone ka en chiah chu Tintin-a message leh missed call a lo tam nasa mai. Ka lo silent leh daih tawh a nih hmel. 

Message ţhenkhat chu ka en a, 'La ta che Vanram' tih te, 'In in kawt a car ding hi tu ta nge?' tih te, 'Tlaia ka thusawi kha theihnghilh nghal vek ang che' tih te a ni nawk a, tlaiah kha chuan a zuai ve ruih tak tak a, khatianga a awm kha kei ngei pawhin ka hmu khat lutuk ringawt, tunah chuan a dah bo leh tawh a nih hmel. A chang chuan a mize diktak thupin hmai kawr a vuah mai mai ni ten ka hre ţhin. 

Chhan let ka tum laiin a lo call leh a, ka "Hello" zawi khawp mai. 

"Phone kha engatan nge i tih Vanram? Min rawn chhan daih tawh tur alawm" a rawn ti lung lung a, "Inleng kan nei a, ka nu doctor khan ka nu a rawn ngaihven a" ka ti daih a, midangin ka ţawng an hriat loh nan ka kutin ka hmui ka hliah nasa mai. 

"I bialpa ve zuai kha maw? Nangmah a rawn len chhan che a nih kha, hmanah nupui a nei tawh a ni lawm ni? A tar tawh lo mi? Nula a va rim rei peih ve" ngaihnep hmel zet hian a rawn ti a, kan inkawp leh hnu khan U Dino nen kan inbiakna a hmu a, kei lahin delete nachang ka hre si lo, sawi vek loh theih ni hek lo le, thu hretu awmchhun a nih phah ta a nih hi. 

"Kan vengah a lokal remchang em a ka nu a lo ngaihven tak tak alawm. Nangpawh kha ka la ngaidam miah lo che a nia khatin mi rawn ti vak vak suh" ka tih chuan, "Aw le...kha putar haw hunah khan tha tharin ngaihdam kan indil dawn nia" a ti ve mai a, phone pawh a dah zui nghal a, tih ngaihna ka hre lo lutuk chuan Daizaui ka be ta ringawt a, message lo chuan ka ngam chuang lo, a hmuh hun hunah hmu mai teh se. 

Thingpui te ka sem zawh a U Dino bula ka ţhut leh lai chuan Daizauin min rawn chhang let a, 'Tintin-a hi chu a buai alawm. Mangang deuh, kal ngaihna hre lo a ang ka ti. Mipa a ni a, midang puihna ngen a hreh ve bawk si a, an chhungkua lah hi an hlim lo ru zek a, a naupanlai aţang khan a dik thei tawh lo alawm. In inzui rei tawh tehreng nen nangpawn hre ve tawh ta che. Mi hi pawn lam a kan landan ang ngawt kan ni ngai hleinem, buai rukna kan nei ţheuh a, mipa an nih vanga nat rukna nei thei lo an ni bik hleinem. Chutiang te chu hre ve tur i nia sin, zirtirtu ve lai i nih kha' min rawn ti zek a, an chhungkaw hlim lohna pawh ka hriatpui ve lo, an inah ka leng fo a, an inhau ngai mang lo a, tu te pawn kan awt a, chhungkaw hlim tak an niin ka hria. Kei chauh ni lo, vengchhung mite pawh hian Tintin-a hi chhungkaw chawk buaitu berah an ngai vek. A nun hi a ho ve em a, a awm lo hran lo. 

"Pu Dino, lo leng ziah rawh aw. Chhungkua chiaha kan awm phei chuan chaw ei khamah an mu bo diak a, a khawharthlak ţhin a" ka nu chuan a ti dam thlap a, U Dino-an a chhan hma hma in rinloh deuhin Tintin-a te an lo lut hlawl mai, Sawmtea leh Ben-a te nen an ni nghe nghe. 

Kan lo ţhu deuh ţhap si a an lai ve deuh nge an ding chawt a, ka putea inla beng var bawkin leng ţhu turin a lo sawm leh a, kan en ţhap te chu a zak ve deuh aniang Tintin-a chuan, "Lal nu Pui, hrisel lo nu, eng nge i an a?" tih leh ka nu hnunga nam a rual a, mitmeiin ka lo khap ve tak nain min en lo hrim hrim. Be miah lo a ka nu damlo kal pel a hreh ve a nih hmel. Bengvar nih a tum a, tih vak dan a hre chai si lo.

"Ka zia tawh e" tih chiahin ka nu chuan a chhang a, tv bul, kan ţhutna ep chiahah an ţhian ho chuan an ţhu a, U Dino a nen a kan ţhu dun chu min rawn melh thip khawp mai. Midang ti ti ngaithla hman lo lekin Tintin-a chu ka en leh ţhin a, kum naupangte a nih laiin thihna vangin a ţhianţhaber a chân a, a mizia a hloh chuang lo. A thawveng em em reng a, a ţawng phawng phawng a, rilru natna pai ru reng hmel pawh a pu lo. Khawtlangin an endan a dik lo a, kohhran a inhmang deuh hlek ho phei chuan an hmingchhiat phah hlauin an kawm duh ngai lo tih chu ka hria, mahse, dik lohna em em ka hmu tlat lo. 

U Dino chu a fing hlauh a, rei pawh awm lovin min haw san a, ka nu a tum zui bar bawk. 

"Zanin te chu ţhalai inkhawm zan a ni lawm ni? Leng mai mai lovin inkhawm ve ta che u. In duh thuin biakin in hlat a, keini ang chu tuman inkhawm ve turin min duh lo in ti leh daih zel bawk si" ka nu ţawngkam mai mai chu ka va duh lo tak. Ngaina lo viau mah se inzah loh leh lutuk hi chu ţha ka ti chuang lo. 

"Nizan zawk kha...i hre sual palh aniang" Ben-an a lo ti zauh a, tumah kan nui ngam lo thung. 

"Inkhawm te hi ngaihven ve rawh u. Pathianniah pawh biakin ah hmuh tur in awm ngai lo. Miin min en hrek hrek zel in tih fo ţhin te hi in ţhat loh bik vang a ni lo, in inkhawm khat vang mai mai. Hetianga in awm reng te chuan tuman inlengah pawh an duh lo ang che u, thi mah ula vanram pawh in kai nang, Pathian hnaih nachang te hre ve ta che u" ka nu bawkin a ti leh hlak hlak a, a fate rual vek an ni bawk a a zah lo pang pang khawp mai.

Hrehawm an ti aniang haw tumin an tho leh thuai a, kawt lai thleng ka thlah a, kan ngawi ran hlawm mai. Tlaia a awmdan kha haw viau mah ila ka nu vangin sawi tur ka hre rih lo a ni ber e. 

"Kal ang Bena, ruihhlo ti lo ho chuan an in kawt a din rei pawh an phal lo ang. Vani, inkhawm zanah kan lo leng leh ang" Sawmtean a tih rualin Bena nen an kalsawn a, nuam lo ka ti ru angreng hle. 

A ţhiante thawm a reh veleh a thim chinah min pawt phei rawk rawk a, "Eng nge i hriat a?" phawk hra a ka tih rual chuan ka hmuiah a rawn fawp zauh a, "Vanram ka rawn tem zuai a nih hi" a ti a, min vawnna chu a thlah zui nghal bawk. 

"Buaina i neih chuan ţha deuhin sawi la, kan sawi dun dawn nia" ka tih chuan, "A ngai lo e. Vanrama ka kal loh takin lei vanram ka rawn tem zeuh ka tih kha. Lut tawh rawh, i nu'n a lo hau ang che" zaidam deuh a a tih hnuah lut turin min mitmei zui a, "Haw nghal rawh aw" ka ti a, thuawih deuhin ka lut ve tak na a ka tawt ţeuh mai, mak tak a ni. 

CONT...