BLACK AND WHITE-5

BLACK AND WHITE-5

"Vani, ka hrilh ngun tawh lutuk che a keimah hian ka hne tawh zawk. Vawi engzat nge Laltinkhuma hi be tawh lo turin ka hrilh che? Kum khat vel hna in han nei ve dek dek a min pawi sa lo nghal ringawt a, thu i awih dawn loh chuan i putea rual hian Aizawlah let leh a, zir zawm leh rawh" inchhung ka luh rualin ka nu'n a lo ti hmarh hmarh mai. Min melh ram ram a, a tum hmuk bawk. A ti ve mah mah deuh chu a ni. 

"Lo leng turin ka sawm hleinem. An duh thuin an lo leng a, biak i remtih loh te chuan hnar haw mai ta che" ka ti let ve a, ka putea chuan kuangkuahin min lo en a, ţhutthleng nghenchhan nghengin hahdam hmel deuhin a ţhu a, mi fel ber ang mai a ni leh tawh. Lem chan a thiam si, ka ten a nia. 

"Lo leng lo mah se i ngaizawng a, i be reng tho alawm. Hnar haw mah ila i be leh tho ang chu. In la inkawp vang a ni mai alawm a lo len, nangmah vang ker kawr hi a nia, hetiang mi hausa fapa awm ţha duh lo satliah, a hmingin dawr a nei ve a, han nei chiah teh, eitur tui hnai fe fe hlui reng che mah se la i rethei viau ang" a la ti fak fak mai. 

Ka ţhutna ngaiah bawk ka ţhu leh a, ka nu a sa em a, pindana luh nghal chi pawh a ni lo. Ka pahrawn chu a ngawi reng a, a lungawi bik lo tih erawh ka hria. Kan inchhung hi chu a phui mup reng a, tukverh inhawng ve huai ţhin mah se a thawveng ve tak tak ngai lo. Boruak rit lutuk hian min la up hlum vek ang tih te pawh a hlauhawm.

"Len kan han phal loh leh i pindanah i hruai lut ru a" a tih leh chuan ka putean min rawn melh kawk mai. A beisei loh tawp a hria a ni ngei ang a meng zau kawk thei tak tak a, a mak ti hmel chu thinrimnain a thlak vat a, ka lo ner sawk mai. Tumah thik ngam tur a ni lo, zakthei lo ka ti leh ka ten lutuk chu ka luak lo chauh a ni. 

"Pheikhawk te pawh kha a ta a ni lawm ni?" ti a min zawh chuan, "Khatiang vawk chaw kuang tiat lawih pheikhawk a bun ngai lo. Naktukah enchiang leh rawh, a chhungah naupang an mu leng hial ang chu" tiin Tintin-a ţawngkam hawhin ka lo chhang a, a fanu ka ni a, min hau rawh se, pawi ka ti lo. Ka putea leh ka pahrawn hmaa min hau kher chuan ka rilru a ti na ve tlat. 

"He ti hi a nia, ka hau thei tawh reng reng hleinem. A bialpa hi han sawisel ila a thlavang a hauh tlat a" ka putea a en pah kher a, ka ding hluai mai. Min en ţhap a, ka ngaipawimawh tawh lo nasa. 

"I theih loh chuan min hau lo mai rawh. Tintin-a aia in fel bikna ka hre love. Khawlaiah in rui ve lo a ni mai a, inchhunga ruih te chu in hreh chuang hleinem. A ruihhlo tih in hre hlur a, a ţhatna lai hmuh sak ve in tum lo. Tuna in sawichhiat bawih bawih hian mi chanchin a chhe zawngin a sawi ve ngai lo" ka ti a, ka nu thinrim pawh pawi sa lovin ka pindanah ka lut ta daih a. Ring deuhin kawngkhar ka khar a, mahni thisen zawmpuite pawh it a khawih duh hial tu ka putea a lo luh hlauin ka kalh hmak bawk. 

Khumah ka bawk thlawp a, phone ka en chuan Tintin-a min lo biak tumna a awm leh ţeuh tawh. Phone lock chu ka hawng a, âm zet a thawk chhuah hak pahin ka call let a, min chhang rang ngang mai. 

"In inhau a ni maw?" a rawn ti nghal a, "Engtin nge i hriat?" ka tih chuan, "In in a nghing dur dur alawm" a lo ti nghal zat a, nuih pawh ka nui peih lo, "I haw tawh em?" ka ti ta daih a, a ţhiante phei kha chu ka nu ţawngkam avang khan an rilru a nat hmel reuh si a, a nuam lo duh tak tak a ni. 

"Kan in kawtah ka ţhu. Ka haw tihna a nih chu" a ti a, a awki a zangkhai viau nain a hlim bik lo tih ka hre thei, mak tak a ni. 

"Ih e Tintin, in inchhung kha engtik aţang khan nge nuam lo i tih ţan? Engmah i sawi ngai lo a, ka lo hmu thiam lo a, a hrehawm viau em ni?" ka ti phawng phawng a, ka aw chhuak a zawiin a nem viau thung. 

"Fa enkawl hi a har alawm Vanram, mu tawh rawh" a ti daih a, a si zui vang vang a, mei a zu lehpek tawh a ni ngei ang. 

"Kan inkawp hun chhung ngaihtuah chuan hriat ve ka phuin ka hria. Engmah zep suh, mipa pawh ni la inbunruah i chak ve tho ang chu, sawi rawh, ka lo ngaithla ang" tih pahin ka mu zangthal a, min hrilh ve keuh keuh dawn emaw ka tih laiin a zai daih!

"Laltinkhum" ka ti vin hrak a, "Khawtlang i vei zawk a" tiin a la zai bai bai mai, a zaithiam lo si, lai tak a ni. 

"Zai tawh suh, a lai ropui si, ka ţhen daih mai tur che a sin" ka tih chuan, "Het, a zai lai lutuk a mangchhia ka neih phah tih pawh ni hlei lo, mi lungleng zai ve an ţhen ngawt ngai lo" a rawn ti fiamthu a, ka thutak ve tehreng nen, a ho leh zo vek tawh. 

"Tak takin maw, ka nu khan in rilru a ti na em lo ang chu. Zanin chu rilruah i awm reng a" ka ti a, Daizaui hnen aţangin thu thar ka hre bawk nen, lungngaih rukna pai reng chungin a lo inthup vel mai mai em ni aw tih ten ka ngaihtuah reng mai. 

"Ka ngai che ti ve mai rawh" inringtawk tak hian a lo ti a, a sawi dik lo chuang lo, mahse, "Neih tlak loh ngaih reng hi ka peih vak tawh lo. I rui peih si, engkim, ka hriat ve loh thil zawng zawng nen khan ruihhlo a chinfel i tum a, zing i thawh aţangin ruih tur i ngaihtuah nghal hial ang ka ring. Nang hi chu i neih tlak hlawl loh alawm, rin tum ve pawn rin ngam chuang bawk si lo" ka ti ta zawk a, ka kar a ni ber ang chu. Ruihhlo chiah a ngaihtuah loh thuin min chhang dawn maw tih laiin, "Nia" tih chiahin min chhang a, "Nia ringawt maw?" ka tih leh kher takah chuan, "Ka nihna i sawi a.. nia ka tih mai lohin" a ti thum dût a, ka dang leh der tawh. 

"Aaa...mu mai teh ang. Lut rawh, nangpawh mu rawh" beidawng deuh taka ka tih chuan, "Min nei la ka insiamţha ang ka ti dawn lo. Ka insawi anga ka awm theih loh chuan a na tur chu nangmah bawk i ni. Khatiang intiamna khawngkhawbai kha ka peih ve lo, ke a kham duh emai, ngil deuhin ka ding reng dawn" a ti leh ang lawi a, "Eng nge i sawi awmzia chu?" ka lo ti ha mai. 

"Ka tum ve alawm" a ti hap a, "Ruihhlo tello a khawvel nawm leh nawm loh pawh ka zawh ziah che kha. Min nei emaw nei lo pawh ni la ka ţhat hma chu insiamţhat ka tum ang. Ka sim hma chu sim ka tum bawk ang. Buaina chu ka nei ve alawm, a tam mai" a tih zawm leh a, "Sawi vek rawh...ka lo ngaithla ang" inhawng taka ka tih chuan, "Ka sawi zawh nghal vek chuan min ţhen palh ang. Tikhan hre chak deuhin awm la, tlem te tein ka hrilh ang che. Zanin atan chuan 'buaina ka nei' tih hi ni phawt rawh se. Muttui le Vanram, rui ţhin mah ila fim kâkin ka hmangaih che" a ti deuh duah a, phone a dah nghal daih lehnghal, a che dangdai ve thei ngawt mai. Kei takngial pawh a chet dan hian min la ţhawng ţhin a, amah hrechiang lo tu phei chuan mak an ti ţhin viau reng a ni. A hrechiang apiangin an ngaina thung. A la inpeih lo ah ka ngai a, kum tam tak chhung a lo up beh tawh, amah ti hrehawm tu chu a inpeih hunah min la hrilh ve mai ang. 

Ka ţhen daih lo hi keipawh mak ka inti a, nep intih chang ka ngah ve tho a nia. Miin min dem ţhin a, mahse, chu aia nasa daih chuan keimah leh keimah hi ka indem a, ţhen duh viau ţhin mah ila kan mi hmangaih ngawih ngawih te hi chu, "Mi ţha a ni lo" tih vang ngawt a ţhen an harsat zia hrechiang tu ka ni. Midangin an en dan leh kan endan hi a danglam tlat tawh a, hmangaihna thiltihtheihna a ni chiah em ka hre lo, miin lo hmu pawr viau pawh nise hmangaihtu mit chuan a hmu mam vek a, siamţhat theih loh a an ngaih hi a siamţhat theih a ring a, beisei tur a awm lo an tih hnuah pawh beiseina a zawng chawp tho ţhin. Hmangaihna hian mihring te hi mi fingah siam lovin a fing sa pawh mi â ah a chhuah zel ni maiin ka hria. 

Ni a liam ve bek bek a, ka putea a haw chu ka thaw huai mai. Tintin-a nen kan inhmu tam lova, school ka kal tur min thlah hi a ni mai. Ka nu a khirh lehzual vang a ni pakhat. 

"Miss, lehkha zir hi ninawm i ti ve ţhin em?" ti a class 7 zirlai, Zozo-in min zawh chuan ka bu nghat a, nilum aia ka ţhu chhuak min rawn pawh hlawl a, an class bik hi zirtir lo mah ila kan veng naupang a ni a, mi a nel ve riau. 

"Tehreng mai, mahse ka tan vek a nia, ka zir ţhat chuan nakinah ka la nuam sa ang a, ka zir ţhat loh chuan hrehawm ka la ti dawn tih ka hria a, nakina hrehawm tih ai chuan tiin a hunlai khan ka zir vak vak mai alawm" ka ti a, a ţhu ngui nghiai a, a sam kir chiat mai chu tuai pahin a hui leh pap ţhin. 

"Rilru hahna i nei em ni? I va hui nasa pap pap ve a" ka tih chuan, "Lehkha zir hi ka ning e miss, scientist te pawh hian thil ropui deuh deuh an siamchhuak reng a, zirlai zawng zawng dahkhawm theihna box te hi siamchhuak ve tawh se, exam naah kan en mai ang a, exam veng tu te tan thil ţha pui pui an siamchhuak a, zirlaite hi min ngaihtuah lo e ka ti" a tih chuan ka nui chhuak hak hak a, a ngaihtuahna mawl mang tak leh a rilru thianghlim lutuk chu ka lawm angreng. 

"Thluak i nei alawm...i zir anga, i thluakah i khawl khawm ang a, exam naah i ziak chhuak ang. Mihring siam ai chuan Pathian siam i thluak hman kha a ţha zawk" ka tih leh chuan, "In ngaih anga awlsam a ni lo alawm. Zir tur a tam lutuk a, ka thluak a chawmawlh zo tawh" a lo ti ve zat a, Daizaui fanu ni awm tak a ni.

"Miss, keichu tun aţangin Pathian hnenah pasal sawrkar hnathawk ka neih theih nan ka ţawngţai ang a, ngaihţha deuhin ka awm mai ang" a tih leh phei chuan ka nuih a za kher mai, tu ţawngkam emaw a hria chu a ni phawt ang a, hetiang rual lek lek ho pawh hian phone an nei fur tawh a, thu mak deuh deuh an chhakchhuak leh phawng phawng ţhin. 

💛💛💛💛💛💛

Chawlh a ni bawk a ka nu'n ip sem turin min tir a, "Khawn neuh neuh lah hi a tam si, mi rethei tan chuan kohhran belh ngam a ni lo ţep tawh ang" ti a ka phun chu, "Ngawi mai mai rawh, sawmhnih khat bak thun a ngai lo" a lo ti vin hlar a, "Sawmhnih khat ti ringawt suh, mi rethei tak tak tan chuan cheng 10 pawh hi a uiawm a nia, khawsak a inang lo a, kan tan a awlsam hi midang tan a awlsam ve lo" ka ti a, ka chhuak zui nghal a, ţawp hnek hnawk a ka bialpa te ina ka luh leh ngei a ngai dawn a nih hi. 

"E...Vani, lo leng rawh" nu Ruatin a lo tih chuan ka ip ken lai chu ka hmuh tir ringawt a, choka a thawm nasa lutuk avang chuan choka lam chu ka thlek pah de de bawk. 

"Ka lo thun nghal ang" tih pahin a la a, inpui lama phei pah chuan, "Laltinkhum, i va sil ri nasa rawk rawk ve...chengkawl i sil em ni a?" a ti lang lang a, tum loh deuhin ka nui hak mai. 

"Ka hmingpumin mi ko ve ziah suh. Pitarin putar hming min put tir a, sil tur in va dah hnem ve" tiin a nu chu a rawn vin let a, in ah a awm a, thleng a sil bawk a nih hmel a, sil ring rawk rawk viau mah se a ngaihţhatthlak tho e. 

"Dim ve deuh ta che..thleng a nih kha. Chengkawl sil a sil a ngai hleinem" ka lama rawn let leh pahin nu Ruati chuan a ti leh kher a, "A tho tlai lutuk a thleng ka sil luih tir a nih saw. Sensiari lah dawr hawn hma a duh a, chaw pawh ei lovin a kal a, ti sawn ti ve rawh se" a ti zui zat bawk. 

"Tu nge i biak?" a rawn tih rualin thawm a reh zui nghal a, "I hriat ve zel a ngai lo, sil mai mai rawh" a nu in a lo ti na a choka aţang chuan a lo chhuak tho. 

In la pa ve thei hle si apron nen a ka hmu chu ka nuih a za dawn a mah se a hmel chuan nuih a ti za hauh lo. A mit hnuai chu a duk kual raih a, a kam sir pem pawh ka hmu chiang kher mai. 

"I hmu em? Vani, hei a pilh leh hrup tawh hi. Zawhte kawlh ang mai, pem pheng phung reng mai" nu Ruatin a tih chuan, "Sawi uar ziah suh" a lo ti vin hluk a, "Ka sawi uar hleinem. A nihna tak a nih chu ka sawi. Len cheh si, leng rei thei bawk si, i len leh hunah chuan tiffin pai tawh ang che" a ti tan tan mai. An nufa inhauh laia awm ve chu nuam lo ka ti deuh a, ka ip ken lai lek kan zauh pah chuan, "Ka'n sem zo law law ange" ka ti daih a, ka chhuak nghal nal nal bawk. 

"Lo ding teh" ka hnunglama a rawn au ri avang chuan ka ding chawt a, an gate pawh ka la thleng lo. 

"I ngaih ang a ni lo" a ti mawl tawp a, ka lam pana a pen thawm chu ka hre ngei a, ka leh hawi duh lo thung. 

"Dam-a bawk mawle..a nupui a sawisa leh tawh a, hmeichhe thlaphang na tuar kha ka hmu thei lo a" a tih ruala amah ka en chuan, "Sorry aw" a ti a, nui deuh chung hian a beng a pawt zauh a, a mitmengah erawh nuam a tih loh zia a lang vek. Ka mitmei a veng ve deuh a nih hmel. 

"A nupui i chhanna lamah Dama chuan a lo sawisa ve che tihna maw?" ka tih chuan garage lamah min pawt phei dat dat a, an chhuah deuh vek tawh avangin a chhung a ruak huai a, min luhpui nghal daih bawk. 

"Han sawi teh" bang nghen paha ka tih chuan, "A ţhianpa a lo awm ve a, an rui phurin min khawih rawn a, a nupui chu ka hum thei hram" a ti a, min melh ralh a, a beng hmawr khawih nauh nauh pahin nuam lo tih hmel deuh hian a nui a, a zak ve te pawh a ni maithei. 

"Zu rui zawk te chu i hneh lo mi? Pahnih pawh nise nang ang palian leh hrawl te chuan i hneh lutuk ang chu" ka tih chuan, "Anni aiin ka rui a" a ti zawi sup a, ka thaw hak mai. 

"I mak e" rum zet a melh pahin ka ti vang vang a, a mitmenga inthiam lohna chu hmuh hmaih lo mah ila buai naa a lut reng hi hahthlak ka ti ţhin, midang a ţanpui miau avangin han hauh vak theih lah a ni mang bawk si lo. 

"I hmui kha nat te pawh a na lo mi?" ka tih leh chuan a hmui a pet sawi zauh a, "Na lem nang" ngaihsam zet hian a lo ti liam puat a, han tih vak ngaihna pawh ka hre lo. 

"Tihpalh aw..Dama te in lamah ka kal tawh lo ang" lai deuh a ka ban bul a rawn ben dat lai chuan, "I buaina chu eng nge ni a? Thup i nei em ni?" ka tih chuan a hmel a danglam nghal vek. Lu a thing a, "Min hmuh ang hi ka ni mai. Hriat loh pawh i nei tho a" a ti ban charh a, leh lawi si chuan a. 

"Zan inkhawm banah kan inhmu dawn nia. I inkhawm peih loh pawhin biakin kawtah lo awm rawh" ka ti ta ringawt a, a bu nghat a, engmah phei chu a sawi lo. 

"Ka kal dawn a nia" ka tih chuan a hawi kual zawk a, tumah a hmuh tak lohah chuan ka dar tawn tawnah vuanin ka hmuiah a fawp a, ka inla hrang rang kher mai. 

"Ka lo nghak ang che" a hmui tuai zauh pahin a ti a, ka kal tur min en dan chu ka hrethiam lo, inhmu ngun viau mah ila min ngai ve ţhin si a, kal rih lo turin min duh ni berin ka hria. Mahse, tih tur ka nei miau a, "Ka rawn bia ang che" tiin ka kalsan ta nge nge a. 

Zanah chuan ka inkhawm ta ngei a, thusawi chu ka ngaithla ve tak nain ka bialpa lo chu rilruah a awm thei meuh lo. Ka bula ţhu chuan min be leh zeuh ţhin a, Tintin-a te ţhenawmnu a ni nghe nghe. 

"Kan tleirawl awmpui khan a lo awm tirhah Tintin-a tih hi sap hming emaw a tia, Laltinkhuma a lo ni daih sia, mak a ti lutuk a" tiin a hmui hupin a nui kar kar a, an ţhenawm hnaite takngial pawhin an hre lo chu a nia, engin nge maw lo ti buai ni. Ka lo ngaihven ngai lo ka tih tawh kha, kei lah Aizawlah khan ka pite bulah ka awm ren rawn phawt a, ka putean "A nuam zawk ang" tiin an in lamah min hruai a, ka duh lo chung min khawih ta ţhin a, ka nu vang chauhin rilru hrehawm tak chungin ka tuar hram hram a, ka buaina a len em avangin Tintin-a pawhin buaina a nei ve tih ka hre lo a ni. Sawi chhuah aiin inthup a thlang a, chutiang bawkin keipawh, kan in an ve na lai tak a ni. 

Inkhawm banah lah Sensiari nen kan la inhmu zui a, an nufa in an ni a, mi khual ang maia kan in en ta daih hi engvang nge a nih ang hriat ka chak dan a la ngai reng. 

"I va fel ve" tiin Sensiari chu ka be lui a, a nu bana kuah tlat chungin tawitein a nui a, "Nangpawh" a ti zawi sap a, "Ka ngai thei lutuk che" tih te, "Hrilh tur che ka ngah" tih leh bawrh bawrh te ka chak a, mahse, kan inbe zui lo. Hmeichhia hi chuan inbunruahna tur ţhian kan mamawh tlangpui a, ka zep lo, min hlat taka awm tawh ka ţhianţhaber hi ka ngai takzet a ni. 

Keimahin ka chhuk a, kawngpui ka thlen rualin, "Helamah" a lo ti lauh a, kawng sir thim deuh laia bike ding chu ka hmu chiah bawk. 

Bike bul ka thlen rualin, "Hei ha rawh..tlan thawt chuan a vawt ang" tih pahin hoodie dum lian pui min pe a, amah ka en a, jacket a ha tho bawk si, min lo ken sak ve ngei a ni maithei.

"A ngai lo, ka inha lum tho..jacket hnuaiah khan nangman ha rawh" ti mah ila bike hma a ti eng a, "Ha vat mai teh" min melh run chung hian a ti tlat a, ka hak zawh rualin, "Chuang rawh" a lo ti leh zat bawk. Puan bih mah ila leggins ka ha tel tho a, rem lo deuhin ka kar tho. Ka ţhut rualin ka kut pahnih chu lain a kawngah min suih beh tir a, "Tikhan a vawt lo deuh ang" a ti a, chak zet hian a tlan chhuak zui nghal a. Ka nu'n min lo hau leh ngei ang a, ka putea ngei pawhin min rawn vau leh maithei, mahse, duhthlan tur dang ka nei lo. Veng khatah awm mah ila zingah min thlah a nih loh chuan kan pahnih chiaha inkawm falna hun kan nei ngai mang lo. Zana ka pindan a a lo lut ru ţhin hi a ni leh mai. 

Venglai lamah kan tlan a, boruak a vawtin a kawngah chuan ka kuah nghet sauh sauh a, ka putean min khawih ţhin tih hria se engtin nge a tih ang le? Min khawngaih ang nge min ten ang tih tein ka inzawt fo mai. Ka pahrawn lah ka hlau em em reng a, ka nu'n ka thlavang a hauh ve ngai tawh bawk si lo, a hrehawm vel vek a ni ber e.

"Kan thleng" Tintin-an a tih takah chuan ka hawi kual nghal ruai a, meng reng chungin kan kalna pawh ka lo en lo. Ben-a te in bulah kan ding tih ka hriat rualin amah vuan reng chungin muangchangin ka chhuk thla a, bike a hun ţhat hnuah ka banah rawn kaiin in lamah chuan min phei pui a, "Sensiarin a la be duh lo che mi? I va ngui ve" ti a a phun sup chu chhang lem lovin ka zui zel a, unau an ni a, an sawi dun ngai lo em maw ni. An inpawh theih tehlul nen, keimah vangin an lo hrang daih ang tih te pawh a hlauhawm. 

Ka ngawi thei ta ngang lo chuan, "Keimah vangin in inbe duh lo ve em ni?" ka ti a, a nui chhuak hawk mai. 

"A chhan ka zawt reng zawk. Hahdam rawh" ka kut hmer ngheh salh pah chuan atthlak tih hmel zetin a chek tlak a, ka thil tawn zawng zawngte avang hian ho te ah pawh ka hlauthawng nghal vak zel. 

Rin lawk ang ngeiin Ben-a pawh amah chiahin a lo awm a, ţhutthleng seiah a mu a, tv chu hmuhnawm tih loh hmel deuh hian a en a, mei a zu khu hlat hlat bawk. 

"Eng nge i an?" Tintin-an a tih chuan, "Ehe..i damlo mi?" ka lo ti ve thuai a, "Parmawii mawle.." sawi chak loh hmel deuh hian a ti a, ka lo bu nghat a, an inţhen leh tawh tihna a ni mai. 

"Parmawii chu an pangpar chiah a par mawi, theihnghilh daih rawh. Chho ang Vanram" Tintin-a bawk chuan a ti leh zung zung a, Ben-a te hi chu an nufa chauh a awm an ni a, pianpui unau pawh a nei lo. A nu lah a la naupang a, a sumdawng bawk nen, a zin reng zel a, an inah hian kan kal ngunin kan tlangnel viau bawk. 

"Ka hmuh lai em em chuan inkai lo ula mawle, bialnu ţhen hlim hlawl ka nih hi" fiamthu a Ben-an a tih chuan nuih suk pahin ka bialpa ve thung chuan kan kut chu a lek kang zauh a, "Ka thlah dawn lo reng reng" lungawi hmel fe hian a ti a, min rawn en chuan ka lo nui ve var var mai. 

Inchung pana kan chhoh lai chuan ka kut thlahin a jacket ipte aţangin meizial a phawrh leh ang lawi a, "I thusawi i va theihnghilh hma ve, ka kut i thlah dawn lo a ni lawm ni?" ka ti fiamthu a, "Ka sawi tum i hria" a ti a, meizial a pet kawh nghal vu lehnghal. 

Inchung zawl a kan chhuak chiah chu a vawt nghal var mai. Chuti chung chuan ka kut ka dah chhuak a, "Lo vuan leh tawh rawh" ka ti chiah chu a kiai suk a, "Aw le..aw le lei Vanram" a ti a, ka kut chu la kangin a fawp nghal zat a, mi te ngaihah chuan misual tak pawh nise ka kut a vawn ringawt pawh hian keichu ka hlim a, ka thla a muang ţhin. 

"Meizial kha paih teh..pet kawh vu reng mai" ka tih chuan, "Kut vawn tak vanga meizial thlenga thik te chu a" a ti fiamthu a, thuawih deuhin a paih ve mai bawk a, ka kut a vawnna chu thlahin ka hnungah a ding a, ka kawnga a kuah rual chuan a taksa nghet ţha zet chu ka lo ngheng ve a, hetianga inhnaih deuh a kan awm chang hian taksa a hahdam a, rilru a kal thui ţhin thung. Kan pahnih hian hma hun eng tak nei ve ila ka ti ţhin. Mahse, chu chu kan la hlat lutuk tlat. Thiam lohna lai kan nei ve ve bawk. 

"Zawh duh che ka nei a?" thutak deuh a a tih ve ngei takah chuan ka thlek deuh a, "Sawi la" phur ru tak hian ka ti a, a sawi mai dawn maw ka tih laiin, "Aa..ngawi rawh i sam ka ei" a ti leh daih a, kan inhnaih angreng si a, a inthlahrunawm duh khawp mai. 

"Tak tak a Vanram, miin min sawi chhiat bawih bawih chang hian engtin nge i awm? Hrehawm i ti em?" a ti a, min kuahna a tih ngheh sauh sauh danah a zam ve deuh a nih ka ring. 

"Hrehawm ka ti ka tih ziah kha. Enteh Tintin" ka tih rual chuan a biangin min rawn nawk zauh a, kan han nui leh rih ţhin a, "Tun ang reng hi kan nih chuan hma lam hun suangtuah tur takngial pawh kan nei ve lo. A thim lam hlir kan pan a, engmah a hmuh theih loh. Kan ngaihtuah thui poh leh thaw a pik a, keipawh ka fel famkim bik lo, zilh vak thei che ka ni bik lo tih pawh ka hria, chutih rual chuan kan insiamţha thei tih ka hre tel bawk" ka ti a, ka beng zawna a thaw lum ham ham chu ka hre thei a, engmah a la sawi ve lo thung. 

"Naupang kal zirtir chawp ngai kan ni tawh lo a, duhthlan theihna kan nei a, kan hmang thiam tawh bawk. Thil ţha leh ţha lo kan thliar thiam a, ţha kan tihna lamah keimahniin kan kal thiam. Tu puihna mah kan mamawh hleinem, mahniin a ţha lam kawng zawh tum tlat ila, min hmangaih tu kan nu leh pate ţawngţainain min umzui nghal mai ang" tiin ka thiam dan tawkin insiamţhat kan ngaih zia ka sawi ve a, naupang bula thil awmdan sawifiah ang mai niin ka inhria.

Min chhang dawn miah lo emaw ka tih hnuah, "Tum lo ka ni lo" a ti a, chhanna ngai ringawt ka dawng leh dawn emaw ka ti hman, mahse, "A harsa ve ţhin a" sawi sup hian a ti a, sawi nuam a tih chiah loh hmel khawp mai. 

"Ka hria alawm...ruihhlo ka ti lo chung hian sualna dang ka neih hi keipawh sim harsa ka ti" ka tih chuan, "Nang chu Vanram alawm i nih" min ti a, nui chung hian a banah ka hmer zauh a. 

"Vanramah sual a awm ngai hleinem. Engkim, a ţha lo zawng zawng ka sim a ngai tihna a nih chu" ka lo ti var a, ipik hmel zet hian a thaw chhuak leh ham ham a, "Tintin, i buaina ka hre lo a, i duh lo chung chu zawh luih che ka tum lo bawk. Mahse, i tum ang tiraw? I pawimawh ber a, i tel ve loh chuan puih che duh mah ila tuman kan pui thei lo che" ka ti leh a, kei tak pawh ka ipik sawt khawp mai, zu rim hi a nam reng lo a, chuti chung chuan ruih a nei ţhin tih ka hria, a taksa a chhiat zel hma leh kan hmalam hun zawng zawng thlenga a chhiat tel vek hma a insiamţha turin ka duh a ni. 

"Tum e...tum ang, ka tum alawm" a ti bah ve nawk a, ka kawnga a kut suih behchu ka phelh sak a, a lam ka hawi rual chuan a hnar a tuai zauh a, a zam tihna a nih hi. A ti thei ngei dawn tih a chian loh chuan thu a tiam hreh ka tih tawh kha, mahse, a tum phawt chuan a thei dawn tih ka hria, a luhlul lutuk tlat, mi phei chuan a luhlul zia a hmelah pawh a hriat an ti ţhin a, a tum tawh chu tum tlat chi a ni. A theih loh chuan nghei a la tum tak tak lo tihna a ni mai. 

"Dawt sawi sim tel bawk ang che" khauh zet a tih pahin a mitah tak ka melh ran a, a nui suk mai. 

"Sim tur hlir...sim card ka ni mai" a ti deuh hluk a, a fiamthu tih ka hre thung. 

"Thil ţha lo te chu kan sim ve bawk ang chu. Kal teh ang, a vawt emai" ka ti khur dar dar tawh. Ka cher vang nge ka hre lo, vawt hi ka tuar thei hlawl lo a, kolasib a ka awm chung hian nipui lai pawn tuilum ngatin ka inbual ţhin. 

"A va mak dar dar ţhin ve. Vur phei chu tla se i khur khaw lo vek dawn a nih kha, kan inchhan hman lo ang" tih leh ka dar a kuah a rual a, "Ka hoodie ken lah kha ka ha duh lo i ti vel a, ha lo la chu i khawng hial ang. Ben-a te in kan thlen meuh chuan meilum a hem zawi chawp i ngai ang" a tih zawm leh a, min fiam hi nuam a ti ve hrim hrim. Min ti thinrim a, min chhaih nui leh a, hei hi chu tunhma aţanga a tih ţhan a ni. Amah hi mi inhmuam up chi a ni lo a, a â hran lo, fiamthu a duhin a phawk zia tupawn an hria a, a hming sawi tawh chuan, "Hepa hian thutak a pai hlawl lo" ti tawk an awm ngei ngei zel. A nghal tel lehnghal a, amah ngaina lo tu tan chuan a hnawksak tham viau ang. 

"Tintin" ka tih rual chuan, "Umm" tih pahin ka hma a a kal, kailawna a chhuk thla tawh chu a lo hawi let a, "Ben-a mutna bulah khan whiskey ka hmu a, bottle ah a inthun chhawng a, a hming ka sawi thei chiah lo, i in ve dawn em?" inthlahrung ru tak hian ka ti a, ka nawr mah mah em aw ka ti deuh a ni. 

Ka chhuk thla ve a, amah ka pelh dawn lai chuan, "Kan Pi Mawii chu ka lo hmu ve reng reng hleinem..ka in chak lo aniang, lungngai suh" a ti a, ka mawng a beng kher lehnghal. 

"Mawng tereuh te ka nei a, i lawm ve em em a" fiamthu a ka tih chuan, "Niang chu..ben pawh a ben rik theih loh" a lo ti ve nghal zat a, rin ang ngeiin Ben-a chuan amahin zu a lo in karh karh mai. 

"Parmawii tih hian hriat chhuah ka nei ziah, hmanah--" Ben-a te in aţanga chhuah pah a ka tih chuan, "Sawi lo teh" a lo ti hluk a, ka hrechiang chiah tawh lo nain a hming an pui hi hriat ka nei tawh chiang a ni. 

"Nia, hming in ang kan tam alawm" ka ti ve mai a, Ben-a lah kha a ţap lo chauh a ni ber a, a hriat lai phei chuan sawi chi pawh a ni lo. 

Haw lamah zu ni lovin coffee kan in a, "Amawii leh Pi Mawii te an awm a, coffee hi eng nge a nih ve" ti a nui pat pat chunga ka zawh chuan, "Nau Mawii a ni mai" a ti a, a hawi sawn dawn laia a nui hmel chu ka hmuh hmaih lo kher mai, a zak ve deuh a nih hmel. 

Kan in kawtah bike a ti ding dat a, vawt ka ti leh tawh kher mai, "Khua a vawh deuh hi chuan car te keng ve ţhin la ţha tur" ka ti a, a ner sawk a, ka thusawi chu ka inchhir chawpchilh nghal. 

"Ka ti mai mai a nih kha" ka ti leh hnuhnawh a, a ute pawh hian car an keng mai zel a, vawt ka tih lutuk chang hi chuan ka lo beisei ru leh ţhin. Chutih rual chuan beisei phak rual a ni lo tih ka hre chawpchilh nghal ţhin bawk. A khalh tu tur ber hian motor a rui ţhin a, thui min tlan pui thei lo ang. 

"Kha i phone..min ken tir lo a ah ve mai tur che a nia" ka tih rualin a screen chu a eng a, ka melh kher bawk si, message lo thleng chu ka hmu nghal chat lehnghal.

"Lawk aw" messenger bik chu ka en vat a, 'I haw tawh em? Zanin chu inbia ang, ka khua a har' tih hi a ni a, ka en zel a, a dang pawh a tam mai. 

"Tu nge?" a hmai zawnah phone ka dah a, a en vang vang hnuah, "A inziah kha" a lo ti mai a, "In inbe ţhin em ni?" ka tih chuan, "En mai rawh" a lo ti leh hmak a, ka en a, ka en chho zel a, Tintin-a chhan letna hmuh tur a awm lo. Mak ka ti hran lo, dawr a nei a, hunawl ah a rui a, kei takngial pawh message chuan min be ţha peih lo. A profile te chu ka check leh rih a, thikthuchhe lutuk nih duh lo viau mah ila a message kha a rapthlak hlawm em a, en chian loh chi pawh a ni lo. 

"A ţhing e..thlalak pawh a dah lo. Tunlaiah hetiang hi an ching tawh lo, facebook ah lehnghal" ka tih chuan, "Instagram ka hmang ve lo a" a lo ti then a, facebook pawh hi ka khawih luih tir a ni nghe nghe. Amah hian a ngaihven lo a, a number nei lo tan chuan facebook bak amah biak pawh theihna a awm lo. 

"I thikthu a chhia..i lawmawm reuh e" min la ti zawk zui a, "Aa..a naupangchhia. Kal tawh teh" ka nam a, kan tlai deuh tawh bawk nen, min chhaih zui tawh lovin a kal ve mai a, inchhung ka lut chu thawm ka dim ngang mai. Mary a lo la meng a, ka nute pindan lam kawh pahin a hmui zawnah a kut zungchal a dah a, fimkhur deuhin ka pindan lam ka pan a, intihfai ka duh dawn tih hriain ka nau chuan tui te min lo lum sak thlap a, ka intih fel fai hnu a thingpui kan in dun lai chuan, "Ka graduate ve ţep tawh a, Aizawl a ka awm a ngai dawn a, hostel a awm a fee chawi ai chuan ka pite bulah emaw, ka putea te bulah ka awm ve mai ang" a ti sap sap a, ka hlauh ang ngei ngeiin a rilru an lo hmin ta a nih hi. 

"Ka putea te bula awm a ngai lo" rang taka ka lo tih chuan, "Ka zir zel dawn chuan kan khuaah ka awm reng thei hleinem" a ti a, a lungawi lo deuh niin a lang. 

"I zir zel dawn alawm..mahse ka putea bulah i awm lovang" ka ti bur a, ka tho zui nghal bawk. Kal mai ka tum chu, "Ngati nge i phal loh tlat a? Ka nuten an sawi lahin i lo hnial zel bawk si" tih pahin min en ran a, "I ţhatna tur ka duh vang a ni mai" ka ti a, sawi ţeuh ka duh mah se a rem lo. Ka sawi chhuak a nih chuan kan buai thui dawn a, an nu lah hmeichhia ka hriat tawh a zawnga nasa ka tih ber a ni bawk si, ka nu natna ka vengthawng a, ka putea nupui ka veng tel bawk a, hre vaih se chuan kan mualpho nasa viau ang. 

"An fel lo nge i chungah thil ţha lo a ti zawk?" ti a min zawh leh chuan, "Ka mu dawn" tih leh ka pindan lama kal ka rual a, duh ai chuan a fing mah mah a ni. Tikhan rin dan tawk a nei thiam leh vek tawh ang. Thudik fum fe tak a hriat hma chu a beidawng lo bawk ang. 

'Sensiari leh Zuali hrilh miah suh. Diktak chuan biak che ka chak thei lutuk a, min khap tlat a. Vawiin pawh a dawrah ka leng a, a buai tehreng nen a lo rel tho che. Kan tih dan che hi nuam lo ka ti. Ka inthiam lo lutuk a, i hrehawm ti hmel ka hmuh te hian hrehawm ka lo ti ve ţhin. Ka lo be thut che hi mak i ti maithei a, naktukah a rukin kan inhmu dawn nia, thil awmdan ka hrilh vek ang che. Zuali bul ţan a nih hi...vawikhat a sawi naah Sensiari lahin a lo awih nghal mai si a, ţhianţha kan ni a, a ring lo lutuk che kha mak ka ti zawk. Ka tihpalh a nih kha aw' Thartei message mai mai chu(h)! Ka mutchhuak thlengin a reh vek thei hial alawm le. 

'Zuali chuan eng bul maw a ţan?' tiin ka thawn let vat a, a type chhung te chu rei ka va han ti tak. 

'Kan boruak neih mek hi mawle. Vanin a sawichhe nasa lutuk che tih zawngin a hrilh a, a tam mai. Hmaichhana sawi chi type vek sen pawh a ni lo. Zualin a sawi tirh chuan keipawn ka ngei che. Mahse, ţhianţha chu in ngei reng a har aniang ka khawngaih tawh che. Bakah ka nu'n min hau hrep a, kan kawm lo ringawt che hi a ngaihdan a ni lo lutuk a. Ka inthiam lo, rilru nuam lo a ka awmna a rei tawh lutuk' a rawn ti a, a dik ang. Chhungkaw pangngai tak an ni a, bakah Thartei hi chu ri phawng phawng chi, a ngaihdan a nih loh chuan sawi tawp a mi rel ve vak lo chi a ni. A nui uar uar zel a, mi chanchin kan sawi ve pawhin a bengkhawn ve chiam ngai lo. Kohhran upa fanu, huat em em nei lo, thawveng leh rilru ţha tak a ni. 

Inhmuh hun tur kan sawi dun a, inkhawm banah a rukin a lo leng dawn a ni. Zuali chu phun ser ser a hrat ve hrim hrim a, kan inţhianţhatna ti keh chhe vek thei khawpin eng thu chiah nge a lo sawi kan la hre thuai ang chu. 

CONT....