BLACK AND WHITE-6
BLACK AND WHITE-6
"Kal ang..Tintin-a nghah a ngai lo" ka nau inher nghal hmak chu hrilhhai ru takin ka en zui a, a ţhiante ruala kal lova min zui a duh tlat chuan chhan eng emaw a neih ka ring.
In kan chhuahsan veleh, "Engkim min hrilh rawh pawnah kan awm tawh hi" a ti ta chiah a, ka ring sual lo e. Tintin-a te in kalkawng ka en lai chuan, "A inkhawm dawn lo, nichin a dawr a ka kal khan kan inhmu" a lo ti leh hmak a, a mitmeng fing zet a min melh tak ranah chuan ka zam ti tih der mai.
"Eng lo a nia, sawi vak tur phei chu a awm lo. Ka putea nupui hi a nasa em a, keichuan ka hrawn thei mai, nang chuan i mil lo ang" ka ti nawi niaih a, Mary hian thudik a hriat chuan ka nute zawng zawngin an hre nghal a ni mai. Rilruah ka u a awm rauh rauh mai, hetiang a nih chuan ka u hnena ka sawi ngei a ngai ang.
"Ka pi Liani te chu a fel viau a ni lawm ni?" min thlek deuh ha chunga a tih chuan chil ka lem khalh a, "Aih, fel lo lutuk. I awm rei thei lo ang. Intihthiam loh hnua chhuah ai chuan awm loh law law a ţha zawk. Ti hian boruak chhia kan nei lo a ni mai" ka ti a, min en danah chuan ka thusawi chu a awih chiah lo tih a lang reng a, sawi belh ka tum hauh lo thung.
"Ka putea chuan contract ka hmu a tia, ka thawk dawn a, in inah hian ka thawh chhung chu ka lo awm ang a tih kha. Vani lo la hrilh suh u a ti bawk a" ka nauin a tih leh chuan ka tlu lek lek a ni.
"Engmaw?" ka ti hluai a, "I hriat vek kha" a ti duh lek chauh a, kan bula awm theih dan a zawng ngat ngat chu a nia, min dan chep a tum ve hle mai maw.
"A ţha alawm" ka ti ban charh a, biakin ah chuan ka ţhiante ho pawh ka hmu leh ngei a, Sensiari leh Zuali te chuan min melh ralh hnuah eng eng emaw sawiin an phun zui sap sap a, Thartei chuan nuam lo tih hmel takin min en tawh thung.
Kan pawl a in an miau avangin banah pawh kan chhuak ho a, an hnaih deuh a ka awm lai chuan nula pakhat hian, "Sensiar, khaw nge Tintin-a?" a lo ti zauh a, chunu lam chu ka hawi vat a, tu dang ni lovin kan veng nula senior u Zaii a lo ni.
"Ka hrawk a na a tia, a thawh hlim aţangin tuilum a in tluk tluk a" Sensiarin a tih chuan, "A va zia lo ve..in en sak em? Bawk te a lo awm em ni?" tiin u Zaii chuan a lo zawt leh a, ka din ve reng chhan chu keipawn ka hre lo, ka bialpa chanchin an sawi vang niin ka hre lo a, nghah lah ka nei der si lo.
"En a phal lo, ngaihtuah duh suh, tui leh chil a lem ţha thei lo a, chaw chu a ei ţeuh. Rilţam a na tawrh ai chuan a tia, ei tui hmel hle si kha ka ei lui a ti tho alawm. A inkhawm peih loh vang mai mai" a ti liam puat puat a, a ţawng hre pha ho lo nui tet tet chu ka hmu vek a, ka bialpa a ni tih an hre bawk si, ka lo zak chem chem mai.
"Kan rualin lo haw ve mai rawh Tintin-a a inkhawm si lo a, Mary pawh a kal daih tawh" ti a Thartein min sawm chuan Zualin a lo nghawk zauh a, Sensiari erawh chuan engmah a sawi ve lo.
"Aw..nia...haw pui tur ka nei chuang lo a" ka ti ban charh a, ngawi rengin kan haw ho a, nidanga ri bawrh bawrh ţhin si kha kan boruak chu a uap churh a, hrehawm tak a ni.
"U Zaii hi chu a upa ve tawh ngawt ang. Kum40 a tlin ţum khan a lawm a, kha te kha a rei tawh a nia. A nun hi a lem reuh si, a status lah hi piangthar ber awm ang zia zangin Pathian thu hlir a nia, nikhatah vawikhat tal mi a rel loh chuan chaw fang khat pawh a lem thei lo tih tur khawpin mi rel a hrat tho si" Zualin a tih chuan a rukin ka lo nui a, Thartein a sawi thawi tawh bawk nen, ka hmuh dan a danglam zo vek tawh.
"Status hi vanram kalkawng a ni hleinem. A ţha tih zawng a hmang a ni mai a, aman mi lo rel ţhin pawh nise midangte chhiar tur a thu ţha deuh deuh a dah chhuah reng peih chuan a ţha lutuk alawm. Misual ber status hi mi fel tak ten an lo hlawk pui daih thei a nia" Thartein a lo ti a, status hi vanram kalkawng ni se chu hremhmun tla mai thei dinhmun a ding kan tam ve khawp ang.
In ka thleng a, ka nute thingpui ka lum sak hnuah pindanah ka lut a, phone ka en chu message a lo awm nual mai. Tintin-a message bik chu ka hawng a, 'Tukin chu ka hrawk a na a, a hrehawm em?' a rawn ti ve ngei a, min ngaihtuah viau a, inkhawm hi a peih hlawl lo a ni. Tunhma a a phur theih nen, a ţhianpa thih hnu khan a ţhian hlui dangte a thlah tel vek a, inkhawm thlengin a ngaipawimawh tawh lo.
A vaia ka chhiar hnuah, 'Hrehawm loh e..i hrawk a na a chaw i ei ţeuh tho a' ka ti a, a seen rang emai a mu aniang.
'Miin an huat che in puar deuhin tuar rawh ka tih kha. Damloh pawn na hi puar deuh a tawrh tur. Min rawn kan thei awm si lo a zanah ka lo leng ang' a ti a, ka nui tawp. Chhang tawh lem lovin ka inthlak a, ka nu'n min hauh phah leh khawp ang.
Thartei a lokal chuan pindanah ka ko lut a, tunhma ang bawkin tlangnel deuhin khumah a lawn a, lukham pawmin rem deuhin a ţhu at a, a bula ka ţhut ve rual chuan, "Ka inthiam thei thlawt lo. Hrilh loh che ka tum a, lehlamah chuan rinawm lo chan ka chang ve thei tho a, Zualin hnenah hrilh lo tur chein ka intiam ve tho bawk si a" a lo ti a, min en vang vang a, min khawngaih takzet zia a hmelah a langchhuak thei hial a ni.
"I tawrh dawn ai chuan hria angin ka awm lo mai ang. A ruk chauhin min kawm ngam mah la ka tan chuan a lawmawm hrim hrim. Min ngei lo tih ka hria a, rilru a nuam ve deuh alawm" ka ti a, tawi tein a nui a, a kut ţang khal neuh neuh chung hian, "Sensiari bialpa kha i lo duh ru ve ţhin angin a sawi a" a ti chiah chu ka lum nghal pup a ni ber. Mak ka ti lutuk chu ka nghing dawt a, ka thin a rim nghal hlur mai.
"Engtin chiah nge a sawi a?" ka ti a, ka awki chang zet avang chuan a tim dai a, en pawh min en ţha duh lo.
"A tir chuan Vani hian i bialpa hi a ngaizawng ve a, a ti lang chuang hauh lo nain 'Sensiari hian a bialpa hi a phu hlawl lo, hausa lo se chu a chhe ve reuh ngawt ang. An hausa a, in enkawlna tur bakah incheina a nei ţha a, a lang ţha mai mai a nih hi. Tintin-a pawh hi ka duh tak tak hran lo, a bula ka awm hian Vanmalsawma ka hnaih theih phah a, chuvang mai mai chuan ka kawp. Sensiari nen ni daih lo se chu hmeichhia pawh ni ila ka bem ang' a ti tih vel zawngin a sawi a, hman a i sawi tawh sawi chhuak chauh angin a awm a, Aizawl a kan awm laia thil thleng angin a sawi" a ti sap sap a, hre veleh chauh mah ila thin a rim duh lutuk ringawt.
"Ka ngaizawng hlawl lo..Tintin-a pawh hi duh tak tak lo ni ila tun thlengin ka zui det det reng nang. Inţhianţhatna hi a hlu a, ka ţhianţha ni a ka ngaih te chu ka rel phal reng reng hleinem" uar zet hian ka ti tan tan a, ka thu hriat chuan na deuhin min deng dawt dawt ti ila ka sawi sual lo ang.
"Sensiari pawn a awih nghal bik lo, mahse a sawi thiam em a, keimah hian ka sawi chhawng thiam tawh lo zawk. Sensiari er ran ang te, a ruka rel char char ţhin ang ten a sawi che a, 'Vanin Tintin-a leh nangmah bik a sawi chhia cheu hi chu ka hrethiam, i nu leh pa thlengin a sawichhia a, in in pawh hi i pa ei ruk a in sak ang tein a sawi a' a ti" a ti leh chiah phei chu ka nui tawp tawh. An chhungkaw ho hi Tintin-a tih loh chu tumah ka la sawichhe lo. Tintin-a hi chu rel bur a ni ve hrim hrim. Tupawn a ţhat lohna lai vawikhat tal kan sawi vek tawh a, a tello in kan awm thei chuang lo.
"A mak ka ti e...a pawi ka sawi der si lo a, dawt a min puh duh khawpin min haw tho si. Ka englai ber hi nge a huat ang le?" amah pawh zawt chuang lo a ka tih chuan, "Tinkhuma a ngaizawng ve alawm" zawi te tak tak hian a ti a, chu phei chu mak ka ti lehzual. Kan inkawm rei tial tial a, kan thusawi chu mumang a ang telh telh mai.
"Chutiang te chu thil ni thei lo tawp a nih chu" nuih hak paha ka tih lai chuan thutak deuhin min lo en a, "A ni chiang e...Sensiari pawn a hre lo. A rukin a huat em em chhan che ka zawt a, a tir chuan min hrilh duh lo, mahse a rei hnuah min hrilh a, ka awih lawk bik hleinem, a fiamthu emaw ka tia, mahse a phone ah Tintin-a thlalak a awm nual mai, min hmuh tir vek alawm. A status a screenshot te pawh a awm. A thuruk ka hriat vang a nia min hlauh deuh tlat ni, inkhawm banah pawh a thusawi ka hnial zel a, a huat ngam miah loh kha" inringtawk tak hian a ti a, a sawi dik thlap, Zuali thusawi a lo kalh zel a, hua ang pawhin a awm ngam lo.
"Zuali hriat lohin Sensiari hnenah chuan ka insawifiah mai dawn mawni. Hetiang ringawt chuan a nuam lo emai" ka ti halh a, min en vang vang hnuah, "I thu thu a ni mai. Mahse, i sawi chuan boruak a alh hluai dawn a, Sensiari ngei pawn a zawt fiah leh ang a, ka hming a lang lo thei dawn lo a, nuam lo chu ka ti" a ti ban charh a, keipawn ka khawngaih ve tho. Min duhsakin a rukin min hrilh a, ka lo sawi chhuah sak chuan amah ngei pawh hian a tuar thei tlat. Ţhiante thuruk sawichhuah sak ngat phei chu tu te pawn kan huat ber a ni. Thartei phei hi chu veng dangah an awm reng ţhin a, tunhma khan inkawm tho mah ila veng danga an awm avangin tun ang em em hian kan inhmu ngun ngai lo. Kan vengah an rawn insawn a, thil awmdan a hmu vek a, min khawngaih vang liau liauin ti hian min rawn kawm a ni mai a, ka sawichhuah chuan keimah ang thoin Sensiari leh Zuali ten an ngei veleh dawn tihna a ni mai.
"Nih leh ka ngawi ang a, a sawi zel a nih tak leh min hrilh leh la, Sensiari chu ka lo hrilhfiah dawn a nia, a awih loh chuan nangpawh i awm a, min sawi pui anga tiraw?" ka tih chuan a lo bu nghat a, "Tehreng mai, pawi a khawih thui dawn a nih chuan ka lo hrilh leh vat ang che. Sensiari hi ring lo turin ka ti ve rawk che a, bual ât in a awm a ni ber a, Tintin-a nen lah an inbe ţha hlei thei tawh lo, tunhma a an in pawh theih tehreng nen. Nu Ruati ten an hriat chuan nangmah an puh che ang a, an haw maithei che a ni. Chutiang a thlen loh nan chuan beng ka lo chhi kar ang" a ti malh malh a, thla a ti muang a, lam ţang ka nei ve tih inhriain ka rilru pawh a nuam ta deuh.
"I zia hi a mak tawh e...college kan kal lai kha chuan a harh ber leh ţawng duh ber, thawveng ve deuh kha i ni ţhin a, i u pasal neih hnu hian i mak vek tawh" a tih chuan, "Mihring hi kan thil tawn a zirin kan danglam ţhin alawm. Kan mize ţhenkhat hi keimahni dah bo chawp a ni lo, kan thil tawn te hian min dah bo sak mai zel. Mihring rilru a pangngai reng lo an tih ţhin kha, rilru hian mi a hruai kawi hneh khawp a" ka ti mai a, lungkham nei miah lova kan awm hunlai kha ka ngai ve ţhin. Kan naupan lai khan upat thuai thuai kan chak a, kan han upa ta cheng a, naupanlai bawk kan ngai leh a, mihring nun hi chu a ho ve ngawt mai.
Thartei ka thlah zawhah ka nu'n ka putea awm tum dan min hrilh veleh a, ka ngaithla liam vel mai mai a, a huat leh dawn em avangin ka ngaihtheih lohna pawh ka lan tir buai peih lo. Ka chhan loh chuan a ngaih a ţhat loh ka hlau a, "A ţha alawm" ka tih hnuah pindanah ka luh san leh daih a, Zuali inthlak danglam nasa ta lutuk chu ka ngaihtuah zui vang vang mai. Tintin-a hmelţha a tih thu a sawi fo a, a lo duh ve reng tih erawh ka lo hre ngai lo.
Ni a liam ve zel a, thil danglam em em a thleng hran lo. Thartei nen kan inbe zeuh zeuh a, Zualin ka chanchin a sawi leh zeuh ţhin thu min hrilh ţhin. Ka thin a rim a, ka dawhtheih loh chin a thlen chuan ka ko khawm ang a, ka sawi chhuak piap piap duh mai ang. Thartei hi vengthawng lo ila chu chutiang chuan ka ti daih tawh bawk ang. Ka putea lah chu ka lokal dawn ti reng siin a reh vang vang rih a, ka nu ka zawh chuan a la hman rih loh thu a sawi a, thawk khat chu a veng deuh.
"Dawrah kan kal lawk" tih leh chhuah ka rual a, zan boruak chu a vawt var mai. Ka lo in ha lum lutuk si lo a, thui pawh ka kal hmain ka kut vawt lutuk chu ka thawk khum a, ka nuai leh nawk nawk ţhin a, a tlai deuh tawh bawk nen, dawr hma lam pawh an lo khar tawh a, a chhunglam thawm a ring viau thung.
"Pi Ding, i la khar lo deuh maw?" ka ti lut a, rin loh deuhin Tintin-a te ţhian ho leh Zuali an lo ţhu ve reng mai. Zuali chuan nui chungin Tintin-a kut a vuan ran a, ka lo en nasa lutuk deuh nge pi Dingi min biakna pawh chhan nachang ka hre mai lo.
"Eh...changtunu a lokal e. Vanram, lo len kan tum a, mahse i nu kan hlau a" Sawmtea chuan a lo ti var a, tawi te a nuih pahin ka hawi sawn a, chhuar a eitur in rem tlar ţhat chu ka enkual ta daih a.
"Message i chhang si lo a i mu tawh emaw ka tia" Tintin-an a lo tih ve pawh chuan ka chhang buai peih lo. Ka ţhianten an kuah bawrh bawrh pawhin ka haw ngai lem lo a, tun ţum chu eng nge maw ka hriat ni ka rilru a na tlat. Zuali hi ka hmu dik lo zo tawh a, ka ţhianţha te nen a min ţhen hrang tu a lo ţhutpui leh a kut a vawn tir te chu ka haw thar ta tlat nia mawle!
"Ka biak che chu Vanram, i beng i hnawh leh tawh mi?" tih leh din a rual a, min en chian tum a min rawn pan lai chuan Zuali ka lo en daih a, ka ngaihbel nge a nui hmel chu ral riai riaiin ka hmu. A chanchin chhe lam ka hria a, ka en chik ve tlat tawh. Miin min rel hian a na a, kan ţhianţha ni a kan hriat ten min rel leh lek phei chuan a na bik lutuk tlat.
"Khawimaw?" tih leh paha ka sam keu a tum chuan ka thle sawn a, "Engmah ka hnawh lo" tih hlak pahin chhang ka la a, ka awmdan chu mak a ti deuh niin a lang. A ruih vak hmel loh bawk.
"Nichinah haw tur a ka hrilh che kha" rum zet a melh chunga ka tih chuan, "Kan in ka hmu phak tho a" a lo ti fiamthu a, a nui ve tak nain ka thutak em a, amah chauh chuan a nui rei thei bik lo.
Pi Dingi ţhutna lam ka pan san daih a, pawisa ka pek hnuah pawisa kir nghah pahin Zuali bawk chu ka en leh a, a phone a khawih a, ani pawh a nui hmel hmuh tur a awm tawh lo.
"Vanrami nu hi a hlauhawm teh mai a nia aw, Hitler pawh kha la dam se Vanrami nu hi chu a nuih tlawn ve tho ang. An in a len chuan ţan mar pat a ngai" Sawmtea chuan a la ti lung lung reng a, kan boruak chu a hrethiam pha ve lo reng reng. Ben-a erawh chuan min melh leh ralh ţhin a, Sawmtean, "Hmeichhia hi chu a..a awm nem zawk ka nia an han inti ve a, min koh duat poh leh min tir nasa. Duat an tih tawh chuan an duh loh loh min tih tir dawn tihna" a tih leh lai chuan a lo nghawk zauh a, pakhat zawk chuan engmah a la hrethiam ve chuang lo.
"Kha aw Vani" pi Dingin a tih veleh pawisa kir chu la in ka chhuak nghal a, mak ka inti, dawr zim tea Zuali leh Tintin-a te awmdun kha ka hmu thei hlawl lo. Midang ni se ka'n thik dawn loh vei nen.
"Vanram lo ding teh" ka ner sawk a, min kohna chu hre lo ang hmiahin ka kal zawm mawp mawp tho.
"Ding rawh ka tih chu" a hma aia vin zawk a tih pahin min pawt ding a, ka hma a a rawn din rualin lei lam ka bih daih a, Thartei hnen aţangin eng eng emaw ka hre ve reng bawk nen, ka thin a rim a, ka rilru a na bawk.
"I ţha em?" zawi sup a tih pahin dimtein ka khabe a dawm a, "Tu nge hau che?" a tih rualin min kuai dak zui nghal zat a, amah vanga thinrim ka ni tih pawh a hre leh pek lo chu a nih hi.
"Min thlah teh..haw rawh, tumah ka be peih rih lo" tih pahin ka inla hrang a, kal mai ka tum chu ka hmaah bawk a rawn ding lehnghal tho.
"Buaina i nei em?" ka tih chuan lu a thing nghut a, "I buaina ka hre duh" bul zet hian a lo ti ve a, a remtih hma chu ka kalsan lui thei dawn lo tih ka hrechiang hle bawk.
"Eng buaina mah ka nei lo. Keimahin ka awm duh a, tumah ka be peih lo" ka ti let a, kei aia a san zawk miau avangin dak deuh vahin ka en a, chik deuhin min lo en let ve a, in a haw a, Thartei hnen a chanchin hrilh ka chak ber tawh.
"I hmel a dik lo, sawi rawh..eng buaina nge i neih? I pahrawn bawk a mi?" min ngaihtuah hmel tak a a tih chuan, "Ni teivet lo. Nangmah hi ka hmu peih rih lo che" ka ti chu a hmel a inthlak nghal vek.
"Engthil nge i hriat a?" thinrim insum tih hriat zet hian a ti a, mi inbulah ding lo ila chu min vin leh tuar tawh ang chu mawle.
"Ka sawi ang kha a ni mai..kalsawn rawh" ti a duhdah zet a ka chhan chuan a insehruh a, ama thiam loh zawkah a thin a rim let leh daih tawh a nih hi.
"Khawimaw kal teh" tih paha a taksa ka nam chuan a thaw hawk a, "Zuali kha tiraw?" a ti chiah chu ka phawk hra mai.
"I awmdan a dik lo, Zuali kha a ni em?" dam deuh zawk hian a ti leh a, chik deuhin min melh run bawk nen, chhan mai ngaihna pawh ka hre lo.
"Sawi dun ang aw" a ti leh a, vawn ka phal leh phal loh min zawt ni awm takin ka kut a melh zauh a, "A tam mai" ka ti ta ringawt a, "Aw ka hria" tih pahin ka kut chu a hum lum nghal vang vang a, min kaihna apiangah ka kal ve dat dat a, kan in chhak lawkah min ţhutpui a, êngin min chhun pha mang lo a, chuvang chu aniang kan ţhut fel rualin min kuah nghal hlu hlu mai.
"Kan ţhu chiah a ka sawi tur a bo vek" ka tih chuan a nui hawk a, "Sawi lo mai rawh" tih chiahin min chhang a, ka hahdam deuh tawh tih a hria a ni phawt ang. Keipawhin sawi kher a ţulna ka hre chuang lo, bialpa te bula ţhiante rel zawt zawt chu a ho emai. Keimah ngei hian ka la ti chhuak nge nge ang. Thil ka pai hnem lutuk a, ka tlin lo takngial dawn.
"Zuali kha hnaih tawh suh..hetianga ka tih chhan hi min zawt lo bawk rawh" ka ti a, thil dang sawi zui ka tum tawh lo.
"A chhan hre chak deuh chungin ka hnaih lo ang..nang berin i tih chuan" min tih hlim tum deuh si hian a ti vel a, nichin a ka thinrim vak kha a chhan ka hre bik lo, Zuali kha ka ngei viau a nih ka ring.
Ka hahdam thlengin min awmpui a, inchhung ka lut lah chu ka nu'n min hau lehpek a, engkim hi ka hne hlui mai. Thartei hnena ka thil hmuh ka sawi chuan, "Ka tih reng kha" a lo ti vat a, kan ti ti zui a, "Naktukah lo leng rawh aw" ka tih chuan a lo remti ve mai bawk.
Zingkar a ka nauin "Au Mami, Tintin-a an man an ti" a tih chuan dawhkan a ka bawk chu ka ţhu ngil awt a, ka thinphu lah chu a rang nghal em em mai lehnghal.
"Eng nga? Tu nge ti a? Engati nge an man?" ka ti nghal chul a, a phone en pah hian, "Ka ţhiannun min hrilh alawm. Tinkhuma an man an ti a tia, ganza an mansak ţeuh a ti" a tih leh phei chuan ka ţhu hle hle thei tawh lo.
"Ka'n zawt chiang chhin" tih leh thawh ka rual a, ganza a sawi tel chiah phei chu eng emaw hian ka awm a hnawh nghal tup tup mai.
"I thingpui chhuan a so bawrh bawrh kha ngaihven ta che. Heti khawp hian a sual a, an man har zawk ngawt alawm. Jail ah tang se la, nangpawh i harh chhuah phah mai ang. Pu Dino pawh a lo len duh tawh miah loh hi, i mipa kawp a hria a, a hlau che a nih ber hi" ka nu'n a ti bawrh bawrh a, naupang ang maia min la hau chu ka tha a na deuh nain a dam ţhat loh avangin thingpui chu ka siam sak ta tho a.
Ka siam zawh rual rualin pindanah ka tlan lut a, Tintin-a ka call nghal a, amah ngeiin peih loh hmel zet a "Hello" a rawn tih phei chuan ka hlauthawng lehzual..police station ah a awm mek a nih ka ring.
"An man che mi?" ka ti nghal thawr a, hlauthawng thaw dep dep a ka awm lai chuan, "Man lo nasa...mumang nen vawk chaw ka pe" pawr zet hian a rawn ti a, chawpchilhin ka thawveng nghal huai thei.
"Tinkhuma an man an tia, ka hlauthawng hman alawm" ka tih chuan, "Keimah emaw ti nghal vek suh u. Ka thawh hma phah a nih hi. Ben-a te venga mi Pu Tinkhuma, kum-45 kha an man" a rawn ti a, a lungawi loh hmel nasa mai.
"A kum zat sawi kher a ngai em ni?" nuih hak paha ka tih chuan, "Ka hming anpui ah naupang an awm tawh miau lo" a ti a, thu thar lah hi a hre thei, an mi man pa pawh a kum zat nen lam a lo hre leh hman vek tawh.
"Vawk chaw te i pe a i fel lutuk e, i nu a taima em a..keipawh ka'n inbual ange" ka ti ve luam a, an khawsa thei a, vawk vulh an ngaih loh tehreng nen nu Ruati hi a awm mai mai thiam tlat lo.
"Ka zar a taima mai mai alawm a nih. A harsa lai zawng zawng keiman ka ti vek. Kan vawk phei hi chuan ka hmingin min ko thei tawh" a tih hluk hluk laiin, "Tintin, ni a sat ţhat hunah vawkin kha sil rawh aw. Kha, pipe a awm kha, i lo khawh fai dawn nia. Dawr hawn hmain i ti hman vek" tiin nu Ruati a lo au ve lang lang a, kan vengah Tintin-a te nufa an au ring ber an ti ziah a, an sawi sual love.
"Kha kha a ni mai Vanram, innei tawh ang. Vawk chaw pek pui tur ka mamawh tawh. Nang nen chuan vawkin sil pawh a hrehawm ka ring lo, tiraw John?" a ti fiamthu a, vawk chaw pek a nawm deuh theih nan an vawk te hi hming a phuah sak vek tih kan sawi tel leh hram ange, a naupangchhia viau nain khawiah pawh Tintin-a chuan a nuihpui theih tur thil a zawng a, a awm loh chuan a siam chawp mai zel. "Hlimpui theih thil kan hmaah a inchhawp lo a nih chuan keimahni'n kan siam chawp mai tur a ni" a ti ţhin a, an vawk pawh John-a leh Linda tih te an ni nawk mai.
"I zia tawh em? Nizan kha chuan i ţap pur reng a" a rawn ti kher a, "Zia tawh, ka harh lo lutuk a mah se an man an ti che sia, ka harh nghal kawk alawm. I hming anpui an awm tih pawh ka lo hre ve lo" ka tih chuan, "Sawi tawh lo teh..thlah i ngai dawn em?" a ti daih a, a ngaih loh thu a ka chhan hnuah kan inbiakna chu kan ti tawp a, kan Tinkhuma a ni lo hlauh chu thaw a veng huai mai.
Peih vak lo chungin school ka kal a, ka putea ngawt rilruah a awm a, kan in a a lo awm hma leh ka nauin a hnaih tak tak hmain sawi chhuak vek mai ila ţha berin ka hria. Break laiin ka u ka phone ta ngawt a, "Tunlai chu kan pa nu hi a sual a chhuak a, mahse sawi duh i neih chuan lo leng tho rawh" a ti hlauh a, a pasal chhungte hi an buaithlak ve a, ţul tawpah lo chuan kan kal ngai meuh lo.
Banah ka kal kawi ta ngei a, an pindanah kan ţhu dun ran a, hreh viau mah ila, "Aizawl a ka awm lai khan ka putean min pawngsual ţhin a" tiin thil thlen dan engkim ka sawichhuak ta nge nge a, mak a ti bawk aniang a meng kawk a, a ang leh zuau ţhin a, sawi tur pawh a hre meuh lo chu a ni.
"Ka putea chu kan naupanlai pawh a min duat ber tu alawm. Tunah pawh a la ni tho a, pawisa te min lo thawn fo mai. Tintin-a vang a ni em?" a ti daih chu mak ka ti letling zawk.
"Tintin-a vang a nih na chhan tur eng nge awm a?" ka ti a, ka awki a rin deuh hlek avang chuan a kutin min lo zap vat a, thawm dim turin min mitmei zui zat bawk.
"A lo zin lai khan Tintin-a a ngaithei vak lo tih ka nu'n a sawi alawm. I bialpa ngaithei lo tu chu i haw zel a, miin an sawisel lahin a sawisel tu zawk i hua a, Tintin-a tan pawh ţhat a har ve ang" a tih chuan ka ipik lutuk chu ka thaw hluai a, tih vak ngaihna pawh ka hre tawh lo.
"In ring lo hlawm leh lutuk a a ţha thei lo zawk a nih hi. Rei deuh awm turin ka putea lokal a tum a, ka huphurh em avangin ka chunga a chet dan ka hrilh che a nih hi. Thurawn min pek ka ring tehreng nen mawhpuh tur dang i zawng daih a" lungawi lo zet hian ka ti a, min en vang vang a, min rin leh rin loh pawh ka hre lo, a hmelah chuan mak tihna bak thil dang engmah a lang lo tlat a ni.
"Dawt i sawi lo tiraw?" a ngawih vang vang hnu a a tih chuan, "Sawi lo..thudik tak ka sawi. Ka hlau alawm...ka hlau takzet. Kan hnena a lo chen ve ka hlau a, tunhma a a chet dan ang khan a che leh ang tih ka hlau a, hun remchang a hmuh chuan a ti leh ngei dawn tih ka hre bawk. Ka sawichhuah chuan ka nu a buai mai ang tih ka hlau a, aaa...hlauh loh pawh ka nei lo. Ka dinhmun hi khirh deuh a sin. Min puih dan ngaihtuah rawh aw" ngenngawl zetin ka lo ti a, a ngawi leh vang vang a, thil tam tak a ngaihtuah tawh tih a hriat theih.
"Ka nu hian a unau dangte aiin a ngaina a, a tuar ngei ang. A awih lo daih maithei tho bawk a, dawt i sawi lo takzet a nih chuan ka sawi chhuak ang. Hmeichhe chak lo zawk, tharum hmanga hneh mai theih kan nih avang ngawtin pawngsual kan phu bik reng reng hleinem. Tharum tello in kan bei let thei a, aw kan chhuah thei a, kan pa ka rawn ve ang a, kan sawi dun hnuah ka lokal ang. Tintin-a lo hrilh lawk la, ka nu a na dawn a, a lo na ve a a thinrim a nih pawhin engmah ti suh se" a ti ta khar khar a, a tlangthan vaih chuan ka mualpho ngei ang a, miin kan chhungkua min hmuh dan pawh a danglam ngei ang mah se hlau reng reng a nun hman ai chuan mualpho pawi ka ti tawh lo zawk. Ngun taka ka ngaihtuah hnu chauh a ka u hi hrilh ve ka ni bawk.
"Engati nge i sawi vat loh?" a ti leh rih a, ka kut a rawn vawn rual chuan nghet deuhin a kut ka lo hmer let a, ka u hi ka lama a ţan phawt chuan engpawh ka tuar thei ang.
"Ka hlau ka tih tawh kha. Ka putean min vau nasa a, ka nu lah heti mai hi a ni bawk si. Ka pahrawn hian engahmah a ngai dawn lo a, Mary te lah an la naupang veleh chhawng a, hlau chung chungin ka tuar tlawk tlawk a nih hi. Keimahah hlauhna a tuh a, a hlimchhawnah phei chuan Tintin-an duat deuh a min kuah te hian ka thinphu a rang a, ka insangmar ţeuh zel a, Tintin-a thlengin ka hlau vek thei hial a sin. Mangchhia chu nep te, a rapthlak dan chu ka sawi thiam lo zawk" ka ti mawlh mawlh a, a bu nghat nghat a, "Ka hrethiam, kan pahrawn chuan engahmah a ngai lo chiang viau ang. Ka putea rilru ang a pu ve zawk ang chu. Thudik i sawi ngei ka ring a, nakinah ka nuten an zawh fiah hunah che pawh chipchiar deuhin i sawi dawn nia. Hlau tawh reng reng suh, thil engmah i ti sual lo a, a tuar tu zawk i ni. Hlauh tur i nei lo" tiin min ţawng thlamuan a, ka u hi chu a rilru a lian a, a pa ve a, a sawi tawh chu a ti tlang ngei ang.
"Ka nu tana pawi lo tur zawngin aw. Chutianga tih chu ka tum ţhin a mah se ka nu hian Tintin-a avang hian min haw tlat a, tun a ka sawipui ang che hian ka sawi pui ve theih ka ring lo. Chinfel ngei ka duh si a, ka ngaihtuah tak tak phei chuan thawk ngaihna ka hre lo lek lek fo mai" ka ti a, ka vai riai reng ni maiin ka hria.
"Lo lungngai lo phawt rawh. Pawngsual hi khawvela ka thil huat ber te zinga mi a ni. Ka putea pawh nise ka ngawih bo pui lo tawp ang. Hlau miah lovin hman hmanah khan min hrilh tawh la chu thlamuang deuhin i awm thei tawh ni mai tur..a pawi e" a ti vang vang a, ka inthiam loh viau rualin ka hlauh tur ni a a rin hmangin min vau bet hneh em a, ka pa a boral tawh bawk nen, ka nu lehzelin min boralsan ve ka hlauh luatah ngawih ka chuh a ni.
Ka haw lam chu tlemin ka zang ve deuh a, thil thleng zel tur ka hriat lohna chuan min la uai rit deuh nain a zia viau tawh. Rilru ka siam fel a, ka u ka lama a ţan mai bakah mualpho huam a thudik sawi ka thlan vang te pawh a ni mahna.
Mut pah a lehkhabu ka chhiar mai mai laiin tukverh a ri rawk a, a vawt viau na a ka khar lem loh avangin thli in a chhem a nih ka ring a, mahse bar ah Tintin-a a rawn lawn liam hlawl mai. A rawn tla lut hnawk a ni mah zawk. Hliam a tuar emaw tiin khum aţang chuan ka zuang tho zawk a ni ber. Ka kâ hup hman lo ila chu ka phu nasa lutuk kha ka au chhuak ngei ngei ang.
"Eng nge awmzia? Buaina i tawk leh tawh em ni?" ti a zawh pahin ka pan hnai sawk sawk a, a zawn ka thlen rualin chhuat aţangin a lo tho ve chiah bawk.
"Ka nu'n a hre vek tawh ka tih tawh kha" zawi te, sehchilh zet si a ka tih chuan ka lam a lo hawi a, a mitmeng chauh hmel lutuk te chuan ngaih a ti ţha lo. Ngui ve bur mah se, "Ka damlo a..pa deuhin ka rawn inbin lut thei lo a nih kha" a la ti hram a, khum lam pana a kal chu, "I eng nge na?" ti a zawh pahin ka zui phei a, khum a thlen rualin a ţhu hnawk a, a nguai ve ruih tak tak.
"Ka ngai che a Vanram" ka zawhna pawh chhang lo chuan a ti a, "Ka nu'n a beng a chhi ran reng tawh tih hre ta che. Chhuak leh rawh, i damloh phei chuan in inah awm rawh" ka tih chuan, "I bulah ka mu chak" a ti then a, pawisawi loh hmel deuh hian min en a, kei erawh chuan ţul ka lo ti vak tawh lo. Ka nu pawh khan a sawi dik ve tho mai, miin an hriat fur tawh phei chuan Tintin-a aiin kei hi mak min ti zawk ang a, min hmu tleu zawk bawk ang. Kan awm ţhin dan tam tak hi siamţhat ngei a ngai a ni.
"Haw rawh" a ţhutna bul a ding ran chungin a darah ka nam a, "Ka lo riak dawn ka bengchheng lo ang" luhlul hmel zet hian a lo ti ve zat a, a jacket chhanah a ban a tuai leh ţhin a, vawt a ti a nih ka ring.
"I rui em ni a?" ka tih chuan lu a thing a, a jacket a ţham chung meuh a ka hnim chuan a nuih a za viau mai.
"Ka ngai thut che a ka mut tawh hnuah ka lo chhuak leh a nih hi" a ti deuh hluk a, a thawmhnaw en dik pah a, "Lo chhuah kher a ngai hleinem. Min rawn be mai ta che. I damloh nasat loh chuan haw leh rawh" ka tih lai te chuan ngawi ngul chungin min lo en ran a, a luhlul hmel lutuk ringawt. Chapal a bun a, pyjama a ha leh tawp a, a jacket hnuaiah chuan tawnzau bak a ha lehpek lo ang. A inchei dan aţang chuan dawt a sawi lo tih a hriat theih.
"Fimkhur a ngai tawh a, khawvar rualin haw ang che. Tunah tak chuan buaina siam ka duh hauh lo a nia" tih leh light off ka rual a, khumah lawnin ka mu nghal hmak bawk. Buaina lian lutuk kan hmachhawn thuai maithei a, ka nu hi huat chang ngah viau mah ila ka nu a ni miau a, ka hmangaih a, buaina dang siam sak ka duh rih lo.
"Vanram" Tintin-a chuan a rawn ti thum dût a, "Umm" tih bakin ka chhang lo.
"Muttui aw" a tih chuan a ri loin ka nui a, a awmna lo lam ka hawi daih a, ka nui hmel chu a hmu teuh lo. Ka bula a rawn mut ve rualin ka puan sinlai ah a rawn inthawlh ve nghal a, a taksa chu a sa vur tak tak mai.
"I khua sik a ni lo maw?" min kuah zet tawh nain a lam hawiin ka inher a, a pang te chu ka dek ţha leh vel a, a khua a sik chiang khawp mai.
"Damdawi ka va la ang" ti a thawh mai ka tum chu, "I nu a harh ang" tih pahin min kuahna a ti nghet salh a, "Khawsik a mut a ţha hleinem. I tlun phei chuan kan buai hrep dawn a sin" ka tih pawhin, "Ţawng ţawng lo khan mu rawh. Hetiang mai mai mipa tan a nep lutuk" a ti deuh kher a, ka chhip a fawh zauh hnuah puan min sin ţhat tir leh a, rilru nuam zan lo chungin ka mu meng kar reng ringawt.
Engtik laiin nge ka lo mutthilh ka hre lo Tintin-a bawkin min ti harh a, a tlun tak tak aniang a khur dar dar reng mai.
"Vawt i ti em ni?" ka ti nghal vat a, a bianga ka dawm lai chuan, "Mipa tan a nep leh lo" a lo ti hram a, nachhawkna tal chu lo inchhawp ve ila ţha tur.
"Damdawi chu ka va la lawk ang..thawm ka dim mai ang" ka ti a, a remti lo chung ka kal lui a, a hahthlak khawp mai. Damdawi te ka pek fel hnuah puan ka lak belh a, lum ka tih viau hnuah pawh Tintin-a chuan min la kuah bet tlat a, ka kuah let ve chuan a taksa chu a thlahdul ve deuh a, tih vak ngaihna ka hre lo chuan a hnungah ka chul ka chul ringawt.
Kan awmdan hi ţha ka ti bik lo a, ka pindanah hian lo lut tawh lo tawp mah se pawi ka ti lo. Kan naupan deuh laia kan tih dan ţhin a ni a, tun thlengin kan la chhunzawm a, bansan ka tum mek laiin hetiang hian a rawn awm leh a, ka nu'n a hriat vaih chuan a ţek leh khawp ang. Ka putea chungchang te hi a hre ve a nih chuan eng nge thleng zel ang le? Ka hrilh ngei a ngai awm si a, ngaihtuah zawng ringawt pawn ka hah.
"Vanram" chauh hmel tak hian a ti leh a, "A la vawt em ni?" rang zet a ka lo tih chuan, "Slipper min seh tir lo a a lawmawm" a ti leh hram a, a la nui zui. A rui mang si lo a, a taksa sa vur lo se chu thil dang vanga khur ah a ngaih theih tak tak ang.
"Damloh lai lehzel chuan fiamthu thawh ţalh tum lo teh" ka ti nang nang a, min tih hlim loh a hlau lutuk te hi ka khawngaih daih zel a, ka thinrim changa a chanchin a chhe zawnga ka sawi te hian ka ţhianten an lo sawi ve chuan ka khawngaih leh tho ţhin.
CONT..
Ngaihnawm thin mang e ka kham thei hlawl lo☹️
ReplyDeleteNgaihnawm top
ReplyDeleteLaltinkhuma hi ka duh chiang e🥰🥰
ReplyDeleteKhamwmloh thrin ve
ReplyDeleteKham awmloh ee
ReplyDeleteNgaihnawm thin e
ReplyDeleteTintina hi chu a Zia hi ka va han duh tak em....ziak thiam si kham awm loh thin.......leivanrami hi ka thik rum+ mai ehhh
ReplyDeleteVawk hming a in hman sak em hi chu a na lutuk Ramliann
ReplyDeleteNgaihnawm thin e mai
ReplyDeleteK hming vawk hminga ahman hi k pawmzam theilo🙄😆
ReplyDeleteA ngaihnawm em em..chutihrualin a putea a pawngsual ṭhin lai scene hi chu chhiar a hrehawm, hetiang hi awm lo thei se..
ReplyDeleteVanrami nun a hreawm Rualin a it awm letling hi ka ti thin
ReplyDelete